੪. ਚਤੁਤ੍ਥਪਣ੍ਣਾਸਕਂ
੧੫੫. ਚਤੁਤ੍ਥਸ੍ਸ ਪਠਮਾਦੀਨਿ ਉਤ੍ਤਾਨਤ੍ਥਾਨੇਵਾਤਿ.
੮. ਕਮ੍ਮਨਿਦਾਨਸੁਤ੍ਤਵਣ੍ਣਨਾ
੧੭੪. ਅਟ੍ਠਮੇ ਲੋਭਹੇਤੁਕਮ੍ਪੀਤਿ ਪਾਣਾਤਿਪਾਤਸ੍ਸ ਲੋਭੋ ਉਪਨਿਸ੍ਸਯਕੋਟਿਯਾ ਹੇਤੁ ਹੋਤਿ ਦੋਸਮੋਹਸਮ੍ਪਯੁਤ੍ਤੋਪਿ. ਇਮਿਨਾ ਉਪਾਯੇਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ.
੯. ਪਰਿਕ੍ਕਮਨਸੁਤ੍ਤਵਣ੍ਣਨਾ
੧੭੫. ਨਵਮੇ ਪਰਿਕ੍ਕਮਨਂ ਹੋਤੀਤਿ ਪਰਿਵਜ੍ਜਨਂ ਹੋਤਿ.
੧੦. ਚੁਨ੍ਦਸੁਤ੍ਤਵਣ੍ਣਨਾ
੧੭੬. ਦਸਮੇ ਕਮ੍ਮਾਰਪੁਤ੍ਤਸ੍ਸਾਤਿ ਸੁਵਣ੍ਣਕਾਰਪੁਤ੍ਤਸ੍ਸ. ਕਸ੍ਸ ਨੋ ਤ੍ਵਨ੍ਤਿ ਕਸ੍ਸ ਨੁ ਤ੍ਵਂ. ਪਚ੍ਛਾਭੂਮਕਾਤਿ ਪਚ੍ਛਾਭੂਮਿਵਾਸਿਕਾ. ਕਮਣ੍ਡਲੁਕਾਤਿ ਕਮਣ੍ਡਲੁਧਾਰਿਨੋ. ਸੇਵਾਲਮਾਲਿਕਾਤਿ ਸੇਵਾਲਮਾਲਾ ਵਿਯ ਧਾਰੇਨ੍ਤਿ. ਸੇਵਾਲਪਟਨਿਵਾਸਿਤਾਤਿਪਿ ਵੁਤ੍ਤਮੇਵ. ਉਦਕੋਰੋਹਕਾਤਿ ਸਾਯਤਤਿਯਕਂ ਉਦਕੋਰੋਹਨਾਨੁਯੋਗਮਨੁਯੁਤ੍ਤਾ. ਆਮਸੇਯ੍ਯਾਸੀਤਿ ਹਤ੍ਥੇਨ ਪਰਿਮਜ੍ਜੇਯ੍ਯਾਸਿ.
੧੧. ਜਾਣੁਸ੍ਸੋਣਿਸੁਤ੍ਤਵਣ੍ਣਨਾ
੧੭੭. ਏਕਾਦਸਮੇ ਉਪਕਪ੍ਪਤੂਤਿ ਪਾਪੁਣਾਤੁ. ਠਾਨੇਤਿ ਓਕਾਸੇ. ਨੋ ਅਟ੍ਠਾਨੇਤਿ ਨੋ ਅਨੋਕਾਸੇ. ਨੇਰਯਿਕਾਨਂ ਆਹਾਰੋ ਨਾਮ ਤਤ੍ਥ ਨਿਬ੍ਬਤ੍ਤਨਕਮ੍ਮਮੇਵ. ਤੇਨੇਵ ਹਿ ਤੇ ਤਤ੍ਥ ਯਾਪੇਨ੍ਤਿ. ਤਿਰਚ੍ਛਾਨਯੋਨਿਕਾਨਂ ਪਨ ਤਿਣਪਣ੍ਣਾਦਿਵਸੇਨ ਆਹਾਰੋ ਵੇਦਿਤਬ੍ਬੋ. ਮਨੁਸ੍ਸਾਨਂ ਓਦਨਕੁਮ੍ਮਾਸਾਦਿਵਸੇਨ, ਦੇਵਾਨਂ ਸੁਧਾਭੋਜਨਾਦਿਵਸੇਨ, ਪੇਤ੍ਤਿਵੇਸਯਿਕਾਨਂ ਖੇਲ਼ਸਿਙ੍ਘਾਣਿਕਾਦਿਵਸੇਨ. ਯਂ ਵਾ ਪਨਸ੍ਸ ਇਤੋ ਅਨੁਪ੍ਪਵੇਚ੍ਛਨ੍ਤੀਤਿ ਯਂ ਤਸ੍ਸ ਮਿਤ੍ਤਾਦਯੋ ਇਤੋ ਦਦਨ੍ਤਾ ਅਨੁਪਵੇਸੇਨ੍ਤਿ. ਪੇਤ੍ਤਿਵੇਸਯਿਕਾ ਏਵ ਹਿ ਪਰਦਤ੍ਤੂਪਜੀਵਿਨੋ ਹੋਨ੍ਤਿ, ਨ ਅਞ੍ਞੇਸਂ ਪਰੇਹਿ ਦਿਨ੍ਨਂ ਉਪਕਪ੍ਪਤਿ. ਦਾਯਕੋਪਿ ਅਨਿਪ੍ਫਲੋਤਿ ਯਂ ਸਨ੍ਧਾਯ ਤਂ ਦਾਨਂ ਦਿਨ੍ਨਂ, ਤਸ੍ਸ ਉਪਕਪ੍ਪਤੁ ਵਾ ਮਾ ਵਾ, ਦਾਯਕੇਨ ਪਨ ਨ ਸਕ੍ਕਾ ਨਿਪ੍ਫਲੇਨ ਭਵਿਤੁਂ, ਦਾਯਕੋ ਤਸ੍ਸ ਦਾਨਸ੍ਸ ਵਿਪਾਕਂ ਲਭਤਿਯੇਵ.
ਅਟ੍ਠਾਨੇਪਿ ਭਵਂ ਗੋਤਮੋ ਪਰਿਕਪ੍ਪਂ ਵਦਤੀਤਿ ਅਨੋਕਾਸੇ ਉਪ੍ਪਨ੍ਨੇਪਿ ਤਸ੍ਮਿਂ ਞਾਤਕੇ ਭਵਂ ਗੋਤਮੋ ਦਾਨਸ੍ਸ ਫਲਂ ਪਰਿਕਪ੍ਪੇਤਿਯੇਵ ਪਞ੍ਞਾਪੇਤਿਯੇਵਾਤਿ ਪੁਚ੍ਛਤਿ. ਬ੍ਰਾਹ੍ਮਣਸ੍ਸ ਹਿ ‘‘ਏਵਂ ਦਿਨ੍ਨਸ੍ਸ ਦਾਨਸ੍ਸ ਫਲਂ ਦਾਯਕੋ ਨ ਲਭਤੀ’’ਤਿ ਲਦ੍ਧਿ. ਅਥਸ੍ਸ ਭਗਵਾ ਪਞ੍ਹਂ ਪਟਿਜਾਨਿਤ੍ਵਾ ‘‘ਦਾਯਕੋ ਨਾਮ ਯਤ੍ਥ ਕਤ੍ਥਚਿ ਪੁਞ੍ਞਫਲੂਪਜੀਵਿਟ੍ਠਾਨੇ ਨਿਬ੍ਬਤ੍ਤੋ ਦਾਨਸ੍ਸ ਫਲਂ ਲਭਤਿਯੇਵਾ’’ਤਿ ਦਸ੍ਸੇਤੁਂ ਇਧ ਬ੍ਰਾਹ੍ਮਣਾਤਿਆਦਿਮਾਹ. ਸੋ ਤਤ੍ਥ ਲਾਭੀ ਹੋਤੀਤਿ ਸੋ ਤਤ੍ਥ ਹਤ੍ਥਿਯੋਨਿਯਂ ਨਿਬ੍ਬਤ੍ਤੋਪਿ ਮਙ੍ਗਲਹਤ੍ਥਿਟ੍ਠਾਨਂ ਪਤ੍ਵਾ ਲਾਭੀ ਹੋਤਿ. ਅਸ੍ਸਾਦੀਸੁਪਿ ਏਸੇਵ ਨਯੋ. ਸਾਧੁਵਗ੍ਗੋ ਉਤ੍ਤਾਨਤ੍ਥੋਯੇਵਾਤਿ.
ਜਾਣੁਸ੍ਸੋਣਿਵਗ੍ਗੋ ਦੁਤਿਯੋ.
ਚਤੁਤ੍ਥਪਣ੍ਣਾਸਕਂ ਨਿਟ੍ਠਿਤਂ.
(੨੧) ੧. ਕਰਜਕਾਯਵਗ੍ਗੋ
੨੧੧. ਪਞ੍ਚਮਸ੍ਸ ਪਠਮਾਦੀਨਿ ਉਤ੍ਤਾਨਤ੍ਥਾਨੇਵ.
੬. ਸਂਸਪ੍ਪਨੀਯਸੁਤ੍ਤਵਣ੍ਣਨਾ
੨੧੬. ਛਟ੍ਠੇ ਸਂਸਪ੍ਪਨੀਯਪਰਿਯਾਯਂ ਵੋ, ਭਿਕ੍ਖਵੇ, ਧਮ੍ਮਪਰਿਯਾਯਨ੍ਤਿ ਸਂਸਪ੍ਪਨਸ੍ਸ ਕਾਰਣਂ ਦੇਸਨਾਸਙ੍ਖਾਤਂ ਧਮ੍ਮਦੇਸਨਂ. ਸਂਸਪ੍ਪਤੀਤਿ ਤਂ ਕਮ੍ਮਂ ਕਰੋਨ੍ਤੋ ਆਸਪ੍ਪਤਿ ਪਰਿਸਪ੍ਪਤਿ ਵਿਪ੍ਫਨ੍ਦਤਿ. ਜਿਮ੍ਹਾ ਗਤੀਤਿ ਤੇਨ ਕਮ੍ਮੇਨ ਯਂ ਗਤਿਂ ਗਮਿਸ੍ਸਤਿ, ਸਾ ਜਿਮ੍ਹਾ ਹੋਤਿ. ਜਿਮ੍ਹੁਪਪਤ੍ਤੀਤਿ ਤਸ੍ਸ ਯਂ ਗਤਿਂ ਉਪਪਜ੍ਜਿਸ੍ਸਤਿ, ਸਾਪਿ ਜਿਮ੍ਹਾਵ ਹੋਤਿ. ਸਂਸਪ੍ਪਜਾਤਿਕਾਤਿ ਸਂਸਪ੍ਪਨਸਭਾਵਾ. ਭੂਤਾ ਭੂਤਸ੍ਸ ਉਪਪਤ੍ਤਿ ਹੋਤੀਤਿ ਭੂਤਸ੍ਮਾ ਸਭਾਵਤੋ ਵਿਜ੍ਜਮਾਨਕਮ੍ਮਾ ਸਤ੍ਤਸ੍ਸ ਨਿਬ੍ਬਤ੍ਤਿ ਹੋਤਿ. ਫਸ੍ਸਾ ਫੁਸਨ੍ਤੀਤਿ ਵਿਪਾਕਫਸ੍ਸਾ ਫੁਸਨ੍ਤਿ.
੭-੮. ਸਞ੍ਚੇਤਨਿਕਸੁਤ੍ਤਦ੍ਵਯਵਣ੍ਣਨਾ
੨੧੭-੨੧੮. ਸਤ੍ਤਮੇ ਸਞ੍ਚੇਤਨਿਕਾਨਨ੍ਤਿ ਚੇਤੇਤ੍ਵਾ ਪਕਪ੍ਪੇਤ੍ਵਾ ਕਤਾਨਂ. ਉਪਚਿਤਾਨਨ੍ਤਿ ਚਿਤਾਨਂ ਵਡ੍ਢਿਤਾਨਂ. ਅਪ੍ਪਟਿਸਂਵੇਦਿਤ੍ਵਾਤਿ ਤੇਸਂ ਕਮ੍ਮਾਨਂ ਵਿਪਾਕਂ ਅਵੇਦਿਯਿਤ੍ਵਾ. ਬ੍ਯਨ੍ਤੀਭਾਵਨ੍ਤਿ ਵਿਗਤਨ੍ਤਭਾਵਂ ਤੇਸਂ ਕਮ੍ਮਾਨਂ ਪਰਿਚ੍ਛੇਦਪਰਿਵਟੁਮਤਾਕਰਣਂ. ਤਞ੍ਚ ਖੋ ਦਿਟ੍ਠੇਵ ਧਮ੍ਮੇਤਿ ਤਞ੍ਚ ਖੋ ਵਿਪਾਕਂ ਦਿਟ੍ਠਧਮ੍ਮਵੇਦਨੀਯਂ ਦਿਟ੍ਠੇਵ ਧਮ੍ਮੇ. ਉਪਪਜ੍ਜਨ੍ਤਿ ਉਪਪਜ੍ਜਵੇਦਨੀਯਂ ਅਨਨ੍ਤਰੇ ਅਤ੍ਤਭਾਵੇ. ਅਪਰੇ ਵਾ ਪਰਿਯਾਯੇਤਿ ਅਪਰਪਰਿਯਾਯਵੇਦਨੀਯਂ ਪਨ ਸਂਸਾਰਪ੍ਪਵਤ੍ਤੇ ਸਤਿ ਸਹਸ੍ਸਿਮੇਪਿ ਅਤ੍ਤਭਾਵੇਤਿ. ਇਮਿਨਾ ਇਦਂ ਦਸ੍ਸੇਤਿ ‘‘ਸਂਸਾਰਪ੍ਪਵਤ੍ਤੇ ਪਟਿਲਦ੍ਧਵਿਪਾਕਾਰਹਕਮ੍ਮੇ ਨ ਵਿਜ੍ਜਤਿ ਸੋ ਜਗਤਿਪ੍ਪਦੇਸੋ, ਯਤ੍ਥ ਠਿਤੋ ਮੁਚ੍ਚੇਯ੍ਯ ਪਾਪਕਮ੍ਮਾ’’ਤਿ. ਤਿਵਿਧਾਤਿ ਤਿਪ੍ਪਕਾਰਾ. ਕਾਯਕਮ੍ਮਨ੍ਤਸਨ੍ਦੋਸਬ੍ਯਾਪਤ੍ਤੀਤਿ ਕਾਯਕਮ੍ਮਨ੍ਤਸਙ੍ਖਾਤਾ ਵਿਪਤ੍ਤਿ. ਇਮਿਨਾ ਨਯੇਨ ਸਬ੍ਬਪਦਾਨਿ ਵੇਦਿਤਬ੍ਬਾਨਿ. ਅਟ੍ਠਮੇ ਅਪਣ੍ਣਕੋ ਮਣੀਤਿ ਸਮਨ੍ਤਤੋ ਚਤੁਰਸ੍ਸੋ ਪਾਸਕੋ.
੯. ਕਰਜਕਾਯਸੁਤ੍ਤਵਣ੍ਣਨਾ
੨੧੯. ਨਵਮੇ ਦੁਕ੍ਖਸ੍ਸਾਤਿ ਵਿਪਾਕਦੁਕ੍ਖਸ੍ਸ, ਵਟ੍ਟਦੁਕ੍ਖਸ੍ਸੇਵ ਵਾ. ਇਮਸ੍ਮਿਂ ਸੁਤ੍ਤੇ ਮਣਿਓਪਮ੍ਮਂ ਨਤ੍ਥਿ. ਏਵਂ ਵਿਗਤਾਭਿਜ੍ਝੋਤਿ ਏਵਨ੍ਤਿ ਨਿਪਾਤਮਤ੍ਤਂ. ਯਥਾ ਵਾ ਮੇਤ੍ਤਂ ਭਾਵੇਨ੍ਤਾ ਵਿਗਤਾਭਿਜ੍ਝਾ ਭਵਨ੍ਤਿ, ਏਵਂ ਵਿਗਤਾਭਿਜ੍ਝੋ. ਏਵਮਸ੍ਸ ਵਿਗਤਾਭਿਜ੍ਝਤਾਦੀਹਿ ਨੀਵਰਣਵਿਕ੍ਖਮ੍ਭਨਂ ਦਸ੍ਸੇਤ੍ਵਾ ਇਦਾਨਿ ਅਕੁਸਲਨਿਸ੍ਸਰਣਾਨਿ ਕਥੇਨ੍ਤੋ ਮੇਤ੍ਤਾਸਹਗਤੇਨਾਤਿਆਦਿਮਾਹ. ਅਪ੍ਪਮਾਣਨ੍ਤਿ ਅਪ੍ਪਮਾਣਸਤ੍ਤਾਰਮ੍ਮਣਤਾਯ ਚਿਣ੍ਣਵਸਿਤਾਯ ਵਾ ਅਪ੍ਪਮਾਣਂ. ਪਮਾਣਕਤਂ ਕਮ੍ਮਂ ਨਾਮ ਕਾਮਾਵਚਰਕਮ੍ਮਂ. ਨ ਤਂ ਤਤ੍ਰਾਵਤਿਟ੍ਠਤੀਤਿ ਤਂ ਮਹੋਘੋ ਪਰਿਤ੍ਤਂ ਉਦਕਂ ਵਿਯ ਅਤ੍ਤਨੋ ਓਕਾਸਂ ਗਹੇਤ੍ਵਾ ਠਾਤੁਂ ਨ ਸਕ੍ਕੋਤਿ, ਅਥ ਖੋ ਨਂ ਓਘੇ ਪਰਿਤ੍ਤਂ ਉਦਕਂ ਵਿਯ ਇਦਮੇਵ ਅਪ੍ਪਮਾਣਂ ਕਮ੍ਮਂ ਅਜ੍ਝੋਤ੍ਥਰਿਤ੍ਵਾ ਅਤ੍ਤਨੋ ਵਿਪਾਕਂ ਨਿਬ੍ਬਤ੍ਤੇਤਿ. ਦਹਰਤਗ੍ਗੇਤਿ ਦਹਰਕਾਲਤੋ ਪਟ੍ਠਾਯ.
ਨਾਯਂ ਕਾਯੋ ਆਦਾਯਗਮਨਿਯੋਤਿ ਇਮਂ ਕਾਯਂ ਗਹੇਤ੍ਵਾ ਪਰਲੋਕਂ ਗਨ੍ਤੁਂ ਨਾਮ ਨ ਸਕ੍ਕਾਤਿ ਅਤ੍ਥੋ. ਚਿਤ੍ਤਨ੍ਤਰੋਤਿ ਚਿਤ੍ਤਕਾਰਣੋ, ਅਥ ਵਾ ਚਿਤ੍ਤੇਨੇਵ ਅਨ੍ਤਰਿਕੋ. ਏਕਸ੍ਸੇਵ ਹਿ ਚੁਤਿਚਿਤ੍ਤਸ੍ਸ ਅਨਨ੍ਤਰਾ ਦੁਤਿਯੇ ਪਟਿਸਨ੍ਧਿਚਿਤ੍ਤੇ ਦੇਵੋ ਨਾਮ ਹੋਤਿ, ਨੇਰਯਿਕੋ ਨਾਮ ਹੋਤਿ, ਤਿਰਚ੍ਛਾਨਗਤੋ ਨਾਮ ਹੋਤਿ. ਪੁਰਿਮਨਯੇਪਿ ਚਿਤ੍ਤੇਨ ਕਾਰਣਭੂਤੇਨ ਦੇਵੋ ਨੇਰਯਿਕੋ ਵਾ ਹੋਤੀਤਿ ਅਤ੍ਥੋ. ਸਬ੍ਬਂ ਤਂ ਇਧ ਵੇਦਨੀਯਨ੍ਤਿ ਦਿਟ੍ਠਧਮ੍ਮਵੇਦਨੀਯਕੋਟ੍ਠਾਸਵਨੇਤਂ ਵੁਤ੍ਤਂ. ਨ ਤਂ ਅਨੁਗਂ ਭਵਿਸ੍ਸਤੀਤਿ ਮੇਤ੍ਤਾਯ ਉਪਪਜ੍ਜਵੇਦਨੀਯਭਾਵਸ੍ਸ ਉਪਚ੍ਛਿਨ੍ਨਤ੍ਤਾ ਉਪਪਜ੍ਜਵੇਦਨੀਯਵਸੇਨ ਨ ਅਨੁਗਤਂ ਭਵਿਸ੍ਸਤਿ. ਇਦਂ ਸੋਤਾਪਨ੍ਨਸਕਦਾਗਾਮਿਅਰਿਯਪੁਗ੍ਗਲਾਨਂ ਪਚ੍ਚਵੇਕ੍ਖਣਂ ਵੇਦਿਤਬ੍ਬਂ. ਅਨਾਗਾਮਿਤਾਯਾਤਿ ਝਾਨਾਨਾਗਾਮਿਤਾਯ. ਇਧਪਞ੍ਞਸ੍ਸਾਤਿ ਇਮਸ੍ਮਿਂ ਸਾਸਨੇ ਪਞ੍ਞਾ ਇਧਪਞ੍ਞਾ ਨਾਮ, ਸਾਸਨਚਰਿਤਾਯ ਅਰਿਯਪਞ੍ਞਾਯ ਠਿਤਸ੍ਸ ਅਰਿਯਸਾਵਕਸ੍ਸਾਤਿ ਅਤ੍ਥੋ. ਉਤ੍ਤਰਿਵਿਮੁਤ੍ਤਿਨ੍ਤਿ ਅਰਹਤ੍ਤਂ. ਦਸਮਂ ਉਤ੍ਤਾਨਤ੍ਥਮੇਵਾਤਿ.
ਕਰਜਕਾਯਵਗ੍ਗੋ ਪਠਮੋ.
(੨੨) ੨. ਸਾਮਞ੍ਞਵਗ੍ਗਵਣ੍ਣਨਾ
੨੨੧. ਦੁਤਿਯਸ੍ਸ ਪਠਮਂ ਆਦਿਂ ਕਤ੍ਵਾ ਸਬ੍ਬਾ ਪੇਯ੍ਯਾਲਤਨ੍ਤਿ ਉਤ੍ਤਾਨਤ੍ਥਾਯੇਵਾਤਿ.
ਮਨੋਰਥਪੂਰਣਿਯਾ ਅਙ੍ਗੁਤ੍ਤਰਨਿਕਾਯ-ਅਟ੍ਠਕਥਾਯ
ਦਸਕਨਿਪਾਤਸ੍ਸ ਸਂਵਣ੍ਣਨਾ ਨਿਟ੍ਠਿਤਾ.