੧. ਆਨਿਸਂਸਵਗ੍ਗੋ
੧. ਕਿਮਤ੍ਥਿਯਸੁਤ੍ਤਵਣ੍ਣਨਾ
੧. ਦਸਕਨਿਪਾਤਸ੍ਸ ਪਠਮੇ ਕੁਸਲਾਨਿ ਸੀਲਾਨੀਤਿ ਅਨਵਜ੍ਜਸੀਲਾਨਿ. ਅਮਙ੍ਕੁਭਾਵਸ੍ਸ ਅਵਿਪ੍ਪਟਿਸਾਰਸ੍ਸ ਅਤ੍ਥਾਯ ਸਂਵਤ੍ਤਨ੍ਤੀਤਿ ਅਵਿਪ੍ਪਟਿਸਾਰਤ੍ਥਾਨਿ. ਸੋ ਨੇਸਂ ਆਨਿਸਂਸੋਤਿ ਅਵਿਪ੍ਪਟਿਸਾਰਾਨਿਸਂਸਾਨਿ. ਯਥਾਭੂਤਞਾਣਦਸ੍ਸਨਤ੍ਥੋਤਿਆਦੀਸੁ ਯਥਾਭੂਤਞਾਣਦਸ੍ਸਨਂ ਨਾਮ ਤਰੁਣਵਿਪਸ੍ਸਨਾ, ਨਿਬ੍ਬਿਦਾ ਨਾਮ ਬਲਵਵਿਪਸ੍ਸਨਾ, ਵਿਰਾਗੋ ਨਾਮ ਮਗ੍ਗੋ, ਵਿਮੁਤ੍ਤਿ ਨਾਮ ਅਰਹਤ੍ਤਫਲਂ, ਞਾਣਦਸ੍ਸਨਂ ਨਾਮ ਪਚ੍ਚਵੇਕ੍ਖਣਞਾਣਂ. ਅਗ੍ਗਾਯ ਪਰੇਨ੍ਤੀਤਿ ਅਰਹਤ੍ਤਤ੍ਥਾਯ ਗਚ੍ਛਨ੍ਤਿ.
੨. ਚੇਤਨਾਕਰਣੀਯਸੁਤ੍ਤਵਣ੍ਣਨਾ
੨. ਦੁਤਿਯੇ ਨ ਚੇਤਨਾਯ ਕਰਣੀਯਨ੍ਤਿ ਨ ਚੇਤੇਤ੍ਵਾ ਕਪ੍ਪੇਤ੍ਵਾ ਪਕਪ੍ਪੇਤ੍ਵਾ ਕਾਤਬ੍ਬਂ. ਧਮ੍ਮਤਾ ਏਸਾਤਿ ਧਮ੍ਮਸਭਾਵੋ ਏਸੋ ਕਾਰਣਨਿਯਮੋ ਅਯਂ. ਅਭਿਸਨ੍ਦੇਨ੍ਤੀਤਿ ਪਵਤ੍ਤੇਨ੍ਤਿ. ਪਰਿਪੂਰੇਨ੍ਤੀਤਿ ਪਰਿਪੁਣ੍ਣਂ ਕਰੋਨ੍ਤਿ. ਅਪਾਰਾ ਪਾਰਂ ਗਮਨਾਯਾਤਿ ਓਰਿਮਤੀਰਭੂਤਾ ਤੇਭੂਮਕਵਟ੍ਟਾ ਨਿਬ੍ਬਾਨਪਾਰਂ ਗਮਨਤ੍ਥਾਯ.
੩-੫. ਉਪਨਿਸਸੁਤ੍ਤਤ੍ਤਯਵਣ੍ਣਨਾ
੩-੫. ਤਤਿਯੇ ਹਤੂਪਨਿਸੋਤਿ ਹਤਕਾਰਣੋ. ਚਤੁਤ੍ਥਪਞ੍ਚਮੇਸੁ ਦ੍ਵੀਹਿ ਥੇਰੇਹਿ ਕਥਿਤਭਾਵੋਵ ਵਿਸੇਸੋ.
੬. ਸਮਾਧਿਸੁਤ੍ਤਵਣ੍ਣਨਾ
੬. ਛਟ੍ਠੇ ਨੇਵ ਪਥਵਿਯਂ ਪਥਵੀਸਞ੍ਞੀ ਅਸ੍ਸਾਤਿ ਪਥਵਿਂ ਆਰਮ੍ਮਣਂ ਕਤ੍ਵਾ ਪਥਵੀਤਿ ਏਵਂ ਉਪ੍ਪਨ੍ਨਾਯ ਸਞ੍ਞਾਯ ਸਞ੍ਞੀ ਨ ਭਵੇਯ੍ਯ. ਆਪਾਦੀਸੁਪਿ ਏਸੇਵ ਨਯੋ. ਨ ਇਧਲੋਕੇਤਿ ਇਧਲੋਕੇ ਉਪ੍ਪਜ੍ਜਨਕਚਤੁਕ੍ਕਪਞ੍ਚਕਜ੍ਝਾਨਸਞ੍ਞਾਯ ਨ ਸਞ੍ਞੀ ਭਵੇਯ੍ਯ. ਨ ਪਰਲੋਕੇਤਿ ਪਰਲੋਕੇ ਉਪ੍ਪਜ੍ਜਨਕਚਤੁਕ੍ਕਪਞ੍ਚਕਜ੍ਝਾਨਸਞ੍ਞਾਯ ਨ ਸਞ੍ਞੀ ਭਵੇਯ੍ਯ. ਸਞ੍ਞੀ ਚ ਪਨ ਅਸ੍ਸਾਤਿ ਅਥ ਚ ਪਨਸ੍ਸ ਸਮਾਪਤ੍ਤਿ ਸਵਿਤਕ੍ਕਸਮਾਪਤ੍ਤਿਯੇਵ ਅਸ੍ਸਾਤਿ ਵੁਚ੍ਚਤਿ. ਏਤਂ ਸਨ੍ਤਂ ਏਤਂ ਪਣੀਤਨ੍ਤਿ ਸਨ੍ਤਂ ਸਨ੍ਤਨ੍ਤਿ ਅਪ੍ਪੇਤ੍ਵਾ ਨਿਸਿਨ੍ਨਸ੍ਸ ਦਿਵਸਮ੍ਪਿ ਚਿਤ੍ਤੁਪ੍ਪਾਦੋ ‘‘ਸਨ੍ਤਂ ਸਨ੍ਤ’’ਨ੍ਤੇਵ ਪਵਤ੍ਤਤਿ, ਪਣੀਤਂ ਪਣੀਤਨ੍ਤਿ ਅਪ੍ਪੇਤ੍ਵਾ ਨਿਸਿਨ੍ਨਸ੍ਸ ਦਿਵਸਮ੍ਪਿ ਚਿਤ੍ਤੁਪ੍ਪਾਦੋ ‘‘ਪਣੀਤਂ ਪਣੀਤ’’ਨ੍ਤੇਵ ਪਵਤ੍ਤਤਿ. ਯਦਿਦਂ ਸਬ੍ਬਸਙ੍ਖਾਰਸਮਥੋਤਿ ਨਿਬ੍ਬਾਨਂ ਨਿਬ੍ਬਾਨਨ੍ਤਿ ਅਪ੍ਪੇਤ੍ਵਾ ਨਿਸਿਨ੍ਨਸ੍ਸ ਦਿਵਸਮ੍ਪਿ ਚਿਤ੍ਤੁਪ੍ਪਾਦੋ ‘‘ਨਿਬ੍ਬਾਨਂ ਨਿਬ੍ਬਾਨ’’ਨ੍ਤੇਵ ਪਵਤ੍ਤਤੀਤਿ ਸਬ੍ਬਮ੍ਪੇਤਂ ਫਲਸਮਾਪਤ੍ਤਿਸਮਾਧਿਂ ਸਨ੍ਧਾਯ ਵੁਤ੍ਤਂ.
੭. ਸਾਰਿਪੁਤ੍ਤਸੁਤ੍ਤਵਣ੍ਣਨਾ
੭. ਸਤ੍ਤਮੇ ਸਞ੍ਞੀ ਚ ਪਨਾਹਂ, ਆਵੁਸੋ, ਤਸ੍ਮਿਂ ਸਮਯੇ ਅਹੋਸਿਨ੍ਤਿ, ਆਵੁਸੋ, ਤਸ੍ਮਿਂ ਸਮਯੇ ਅਹਂ ‘‘ਭਵਨਿਰੋਧੋ ਨਿਬ੍ਬਾਨ’’ਨ੍ਤਿ ਇਮਾਯ ਫਲਸਮਾਪਤ੍ਤਿਸਞ੍ਞਾਯ ਸਞ੍ਞੀ ਅਹੋਸਿਂ. ਸਚਿਤ੍ਤਕਾ ਮੇ ਸਾ ਸਮਾਪਤ੍ਤਿ ਅਹੋਸੀਤਿ ਪਚ੍ਚਵੇਕ੍ਖਣਾ ਕਥਿਤਾ.
੮. ਝਾਨਸੁਤ੍ਤਵਣ੍ਣਨਾ
੮. ਅਟ੍ਠਮੇ ਸਮਨ੍ਤਪਾਸਾਦਿਕੋਤਿ ਪਸਾਦਾਵਹਾਨਂਯੇਵ ਕਾਯਕਮ੍ਮਾਦੀਨਂ ਸਬ੍ਭਾਵਤੋ ਸਮਨ੍ਤੋ ਪਾਸਾਦਿਕੋ. ਸਬ੍ਬਾਕਾਰਪਰਿਪੂਰੋਤਿ ਸਬ੍ਬੇਹਿ ਕਾਰਣੇਹਿ ਪਰਿਪੁਣ੍ਣੋ.
੯. ਸਨ੍ਤਵਿਮੋਕ੍ਖਸੁਤ੍ਤਵਣ੍ਣਨਾ
੯. ਨਵਮੇ ਸਨ੍ਤਾਤਿ ਆਰਮ੍ਮਣਸਨ੍ਤਤਾਯਪਿ ਅਙ੍ਗਸਨ੍ਤਤਾਯਪਿ ਸਨ੍ਤਾ. ਵਿਮੋਕ੍ਖਾਤਿ ਪਚ੍ਚਨੀਕਧਮ੍ਮੇਹਿ ਵਿਮੁਤ੍ਤਤ੍ਤਾ ਆਰਮ੍ਮਣੇ ਚ ਨਿਰਾਸਙ੍ਕਭਾਵੇਨ ਸੁਟ੍ਠੁ ਮੁਤ੍ਤਤ੍ਤਾ ਏਵਂਲਦ੍ਧਨਾਮਾ. ਅਤਿਕ੍ਕਮ੍ਮ ਰੂਪੇਤਿ ਰੂਪਜ੍ਝਾਨਾਨਿ ਅਤਿਕ੍ਕਮਿਤ੍ਵਾ ਪਵਤ੍ਤਾ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.
ਆਨਿਸਂਸਵਗ੍ਗੋ ਪਠਮੋ.
੨. ਨਾਥਵਗ੍ਗੋ
੧. ਸੇਨਾਸਨਸੁਤ੍ਤਵਣ੍ਣਨਾ
੧੧. ਦੁਤਿਯਸ੍ਸ ਪਠਮੇ ਪਞ੍ਚਙ੍ਗਸਮਨ੍ਨਾਗਤੋਤਿ ਪਞ੍ਚਹਿ ਗੁਣਙ੍ਗੇਹਿ ਸਮਨ੍ਨਾਗਤੋ. ਨਾਤਿਦੂਰਂ ਹੋਤਿ ਨਾਚ੍ਚਾਸਨ੍ਨਨ੍ਤਿ ਯਞ੍ਹਿ ਅਤਿਦੂਰੇ ਹੋਤਿ, ਪਿਣ੍ਡਾਯ ਚਰਿਤ੍ਵਾ ਤਤ੍ਥ ਗਚ੍ਛਨ੍ਤਸ੍ਸ ਕਾਯਚਿਤ੍ਤਦਰਥਾ ਹੋਤਿ, ਤਤੋ ਅਨੁਪ੍ਪਨ੍ਨਂ ਵਾ ਸਮਾਧਿਂ ਉਪ੍ਪਾਦੇਤੁਂ ਉਪ੍ਪਨ੍ਨਂ ਵਾ ਥਿਰਂ ਕਾਤੁਂ ਨ ਸਕ੍ਕੋਤਿ. ਅਚ੍ਚਾਸਨ੍ਨਂ ਬਹੁਜਨਾਕਿਣ੍ਣਂ ਹੋਤਿ. ਚਤ੍ਤਾਲੀਸਉਸਭਮਤ੍ਤੇ ਪਨ ਪਦੇਸੇ ਵਸਤਂ ਦੂਰਾਸਨ੍ਨਦੋਸਵਿਮੁਤ੍ਤਞ੍ਚ ਗਮਨਾਗਮਨਸਮ੍ਪਨ੍ਨਂ ਨਾਮ ਹੋਤਿ. ਦਿਵਾਅਪ੍ਪਾਕਿਣ੍ਣਨ੍ਤਿ ਦਿਵਸਭਾਗੇ ਮਹਾਜਨੇਨ ਅਨਾਕਿਣ੍ਣਂ.
੨. ਪਞ੍ਚਙ੍ਗਸੁਤ੍ਤਵਣ੍ਣਨਾ
੧੨. ਦੁਤਿਯੇ ਕੇਵਲੀਤਿ ਕੇਵਲੇਹਿ ਸਕਲੇਹਿ ਗੁਣੇਹਿ ਸਮਨ੍ਨਾਗਤੋ. ਵੁਸਿਤਵਾਤਿ ਵੁਤ੍ਥਬ੍ਰਹ੍ਮਚਰਿਯਵਾਸੋ. ਅਸੇਖੇਨਾਤਿ ਅਸੇਖਧਮ੍ਮਪਰਿਯਾਪਨ੍ਨੇਨ ਲੋਕੁਤ੍ਤਰੇਨ. ਸੀਲਕ੍ਖਨ੍ਧੇਨਾਤਿ ਸੀਲਰਾਸਿਨਾ. ਵਿਮੁਤ੍ਤਿਕ੍ਖਨ੍ਧੇਨਾਤਿ ਏਤ੍ਥ ਠਪੇਤ੍ਵਾ ਸੀਲਾਦਯੋ ਤਯੋ ਸੇਸਾ ਫਲਧਮ੍ਮਾ ਵਿਮੁਤ੍ਤਿ ਨਾਮ, ਵਿਮੁਤ੍ਤਿਞਾਣਦਸ੍ਸਨਂ ਪਚ੍ਚਵੇਕ੍ਖਣਞਾਣਂ, ਤਂ ਲੋਕਿਯਮੇਵ.
੩-੪. ਸਂਯੋਜਨਸੁਤ੍ਤਾਦਿਵਣ੍ਣਨਾ
੧੩-੧੪. ਤਤਿਯੇ ਓਰਮ੍ਭਾਗਿਯਾਨੀਤਿ ਹੇਟ੍ਠਾਭਾਗਿਯਾਨਿ. ਉਦ੍ਧਮ੍ਭਾਗਿਯਾਨੀਤਿ ਉਪਰਿਭਾਗਿਯਾਨਿ. ਇਮਸ੍ਮਿਂ ਸੁਤ੍ਤੇ ਵਟ੍ਟਮੇਵ ਕਥਿਤਂ. ਚਤੁਤ੍ਥੇ ਖਿਲਵਿਨਿਬਨ੍ਧਾ ਪਞ੍ਚਕਨਿਪਾਤੇ ਵਿਤ੍ਥਾਰਿਤਾਯੇਵ. ਆਰੋਹਪਰਿਣਾਹੇਨਾਤਿ ਦੀਘਪੁਥੁਲਨ੍ਤੇਨ.
੫. ਅਪ੍ਪਮਾਦਸੁਤ੍ਤਵਣ੍ਣਨਾ
੧੫. ਪਞ੍ਚਮੇ ਏਵਮੇਵ ਖੋਤਿ ਯਥਾ ਸਬ੍ਬਸਤ੍ਤਾਨਂ ਸਮ੍ਮਾਸਮ੍ਬੁਦ੍ਧੋ ਅਗ੍ਗੋ, ਏਵਂ ਸਬ੍ਬੇਸਂ ਕੁਸਲਧਮ੍ਮਾਨਂ ਕਾਰਾਪਕਅਪ੍ਪਮਾਦੋ ਅਗ੍ਗੋਤਿ ਦਟ੍ਠਬ੍ਬੋ. ਨਨੁ ਚੇਸ ਲੋਕਿਯੋਵ, ਕੁਸਲਧਮ੍ਮਾ ਪਨ ਲੋਕੁਤ੍ਤਰਾਪਿ. ਅਯਞ੍ਚ ਕਾਮਾਵਚਰੋਵ, ਕੁਸਲਧਮ੍ਮਾ ਪਨ ਚਤੁਭੂਮਕਾ. ਕਥਮੇਸ ਤੇਸਂ ਅਗ੍ਗੋਤਿ? ਪਟਿਲਾਭਕਤ੍ਤੇਨ. ਅਪ੍ਪਮਾਦੇਨ ਹਿ ਤੇ ਪਟਿਲਭਨ੍ਤਿ, ਤਸ੍ਮਾ ਸੋ ਤੇਸਂ ਅਗ੍ਗੋ. ਤੇਨੇਵ ਵੁਤ੍ਤਂ – ਸਬ੍ਬੇ ਤੇ ਅਪ੍ਪਮਾਦਮੂਲਕਾਤਿ.
ਜਙ੍ਗਲਾਨਨ੍ਤਿ ਪਥਵਿਤਲਚਾਰੀਨਂ. ਪਾਣਾਨਨ੍ਤਿ ਸਪਾਦਕਪਾਣਾਨਂ. ਪਦਜਾਤਾਨੀਤਿ ਪਦਾਨਿ. ਸਮੋਧਾਨਂ ਗਚ੍ਛਨ੍ਤੀਤਿ ਓਧਾਨਂ ਪਕ੍ਖੇਪਂ ਗਚ੍ਛਨ੍ਤਿ. ਅਗ੍ਗਮਕ੍ਖਾਯਤੀਤਿ ਸੇਟ੍ਠਮਕ੍ਖਾਯਤਿ. ਯਦਿਦਂ ਮਹਨ੍ਤਤ੍ਤੇਨਾਤਿ ਮਹਨ੍ਤਭਾਵੇਨ ਅਗ੍ਗਮਕ੍ਖਾਯਤਿ, ਨ ਗੁਣਗ੍ਗੇਨਾਤਿ ਅਤ੍ਥੋ. ਵਸ੍ਸਿਕਨ੍ਤਿ ਸੁਮਨਪੁਪ੍ਫਂ. ਇਦਂ ਕਿਰ ਸੁਤ੍ਤਂ ਸੁਤ੍ਵਾ ਭਾਤਿਯਮਹਾਰਾਜਾ ਵੀਮਂਸਿਤੁਕਾਮਤਾਯ ਏਕਸ੍ਮਿਂ ਗਬ੍ਭੇ ਚਤੁਜਾਤਿਗਨ੍ਧੇਹਿ ਪਰਿਭਣ੍ਡਂ ਕਤ੍ਵਾ ਸੁਗਨ੍ਧਪੁਪ੍ਫਾਨਿ ਆਹਰਾਪੇਤ੍ਵਾ ਏਕਸ੍ਸ ਸਮੁਗ੍ਗਸ੍ਸ ਮਜ੍ਝੇ ਸੁਮਨਪੁਪ੍ਫਮੁਟ੍ਠਿਂ ਠਪੇਤ੍ਵਾ ਸੇਸਾਨਿ ਤਸ੍ਸ ਸਮਨ੍ਤਤੋ ਮੁਟ੍ਠਿਂ ਕਤ੍ਵਾ ਠਪੇਤ੍ਵਾ ਦ੍ਵਾਰਂ ਪਿਧਾਯ ਬਹਿ ਨਿਕ੍ਖਨ੍ਤੋ. ਅਥਸ੍ਸ ਮੁਹੁਤ੍ਤਂ ਬਹਿ ਵੀਤਿਨਾਮੇਤ੍ਵਾ ਦ੍ਵਾਰਂ ਵਿਵਰਿਤ੍ਵਾ ਪਵਿਸਨ੍ਤਸ੍ਸ ਸਬ੍ਬਪਠਮਂ ਸੁਮਨਪੁਪ੍ਫਗਨ੍ਧੋ ਘਾਨਂ ਪਹਰਿ. ਸੋ ਮਹਾਤਲਸ੍ਮਿਂਯੇਵ ਮਹਾਚੇਤਿਯਾਭਿਮੁਖੋ ਨਿਪਜ੍ਜਿਤ੍ਵਾ ‘‘ਵਸ੍ਸਿਕਂ ਤੇਸਂ ਅਗ੍ਗਨ੍ਤਿ ਕਥੇਨ੍ਤੇਨ ਸੁਕਥਿਤਂ ਸਮ੍ਮਾਸਮ੍ਬੁਦ੍ਧੇਨਾ’’ਤਿ ਚੇਤਿਯਂ ਵਨ੍ਦਿ. ਖੁਦ੍ਦਰਾਜਾਨੋਤਿ ਖੁਦ੍ਦਕਰਾਜਾਨੋ. ਕੂਟਰਾਜਾਨੋਤਿਪਿ ਪਾਠੋ.
੬. ਆਹੁਨੇਯ੍ਯਸੁਤ੍ਤਵਣ੍ਣਨਾ
੧੬. ਛਟ੍ਠੇ ਗੋਤ੍ਰਭੂਤਿ ਸਿਖਾਪਤ੍ਤਵਿਪਸ੍ਸਨਾਭੂਤੇਨ ਨਿਬ੍ਬਾਨਾਰਮ੍ਮਣੇਨ ਗੋਤ੍ਰਭੁਞਾਣੇਨ ਸਮਨ੍ਨਾਗਤੋ.
੭. ਪਠਮਨਾਥਸੁਤ੍ਤਵਣ੍ਣਨਾ
੧੭. ਸਤ੍ਤਮੇ ਸਨਾਥਾਤਿ ਸਞਾਤਕਾ ਬਹੁਞਾਤਿਵਗ੍ਗਾ ਹੁਤ੍ਵਾ ਵਿਹਰਥ. ਨਾਥਂ ਕਰੋਨ੍ਤੀਤਿ ਨਾਥਕਰਣਾ, ਅਤ੍ਤਨੋ ਸਨਾਥਭਾਵਕਰਾ ਪਤਿਟ੍ਠਾਕਰਾਤਿ ਅਤ੍ਥੋ. ਕਲ੍ਯਾਣਮਿਤ੍ਤੋਤਿਆਦੀਸੁ ਸੀਲਾਦਿਗੁਣਸਮ੍ਪਨ੍ਨਾ ਕਲ੍ਯਾਣਾ ਮਿਤ੍ਤਾ ਅਸ੍ਸਾਤਿ ਕਲ੍ਯਾਣਮਿਤ੍ਤੋ. ਤੇਵਸ੍ਸ ਠਾਨਨਿਸਜ੍ਜਾਦੀਸੁ ਸਹ ਅਯਨਤੋ ਸਹਾਯਾਤਿ ਕਲ੍ਯਾਣਸਹਾਯੋ. ਚਿਤ੍ਤੇਨ ਚੇਵ ਕਾਯੇਨ ਚ ਕਲ੍ਯਾਣਮਿਤ੍ਤੇਸੁਯੇਵ ਸਮ੍ਪਵਙ੍ਕੋ ਓਣਤੋਤਿ ਕਲ੍ਯਾਣਸਮ੍ਪਵਙ੍ਕੋ. ਸੁਵਚੋ ਹੋਤੀਤਿ ਸੁਖੇਨ ਵਤ੍ਤਬ੍ਬੋ ਹੋਤਿ, ਸੁਖੇਨ ਅਨੁਸਾਸਿਤਬ੍ਬੋ. ਖਮੋਤਿ ਗਾਲ਼੍ਹੇਨ ਫਰੁਸੇਨ ਕਕ੍ਖਲ਼ੇਨ ਵੁਤ੍ਤੋ ਖਮਤਿ ਨ ਕੁਪ੍ਪਤਿ. ਪਦਕ੍ਖਿਣਗ੍ਗਾਹੀ ਅਨੁਸਾਸਨਿਨ੍ਤਿ ਯਥਾ ਏਕਚ੍ਚੋ ਓਵਦਿਯਮਾਨੋ ਵਾਮਤੋ ਗਣ੍ਹਾਤਿ, ਪਟਿਪ੍ਫਰਤਿ ਵਾ, ਅਸ੍ਸੁਣਨ੍ਤੋ ਵਾ ਗਚ੍ਛਤਿ, ਏਵਂ ਅਕਤ੍ਵਾ ‘‘ਓਵਦਥ, ਭਨ੍ਤੇ, ਅਨੁਸਾਸਥ, ਤੁਮ੍ਹੇਸੁ ਅਨੋਵਦਨ੍ਤੇਸੁ ਕੋ ਅਞ੍ਞੋ ਓਵਦਿਸ੍ਸਤੀ’’ਤਿ ਪਦਕ੍ਖਿਣਂ ਗਣ੍ਹਾਤਿ.
ਉਚ੍ਚਾਵਚਾਨੀਤਿ ਉਚ੍ਚਨੀਚਾਨਿ. ਕਿਂਕਰਣੀਯਾਨੀਤਿ ‘‘ਕਿਂ ਕਰੋਮੀ’’ਤਿ ਏਵਂ ਵਤ੍ਵਾ ਕਤ੍ਤਬ੍ਬਕਮ੍ਮਾਨਿ. ਤਤ੍ਥ ਉਚ੍ਚਕਮ੍ਮਂ ਨਾਮ ਚੀਵਰਸ੍ਸ ਕਰਣਂ ਰਜਨਂ, ਚੇਤਿਯੇ ਸੁਧਾਕਮ੍ਮਂ, ਉਪੋਸਥਾਗਾਰਚੇਤਿਯਘਰਬੋਧਿਘਰੇਸੁ ਕਤ੍ਤਬ੍ਬਕਮ੍ਮਨ੍ਤਿ ਏਵਮਾਦਿ. ਅਵਚਕਮ੍ਮਂ ਨਾਮ ਪਾਦਧੋਵਨਮਕ੍ਖਨਾਦਿਖੁਦ੍ਦਕਕਮ੍ਮਂ. ਤਤ੍ਰੂਪਾਯਾਯਾਤਿ ਤਤ੍ਰੁਪਗਮਨਿਯਾਯ. ਅਲਂ ਕਾਤੁਨ੍ਤਿ ਕਾਤੁਂ ਸਮਤ੍ਥੋ ਹੋਤਿ. ਅਲਂ ਸਂਵਿਧਾਤੁਨ੍ਤਿ ਵਿਚਾਰੇਤੁਂ ਸਮਤ੍ਥੋ ਹੋਤਿ.
ਧਮ੍ਮੇ ਅਸ੍ਸ ਕਾਮੋ ਸਿਨੇਹੋਤਿ ਧਮ੍ਮਕਾਮੋ, ਤੇਪਿਟਕਂ ਬੁਦ੍ਧਵਚਨਂ ਪਿਯਾਯਤੀਤਿ ਅਤ੍ਥੋ. ਪਿਯਸਮੁਦਾਹਾਰੋਤਿ ਪਰਸ੍ਮਿਂ ਕਥੇਨ੍ਤੇ ਸਕ੍ਕਚ੍ਚਂ ਸੁਣਾਤਿ, ਸਯਞ੍ਚ ਪਰੇਸਂ ਦੇਸੇਤੁਕਾਮੋ ਹੋਤੀਤਿ ਅਤ੍ਥੋ. ਅਭਿਧਮ੍ਮੇ ਅਭਿਵਿਨਯੇਤਿ ਏਤ੍ਥ ਧਮ੍ਮੋ ਅਭਿਧਮ੍ਮੋ, ਵਿਨਯੋ ਅਭਿਵਿਨਯੋਤਿ ਚਤੁਕ੍ਕਂ ਵੇਦਿਤਬ੍ਬਂ. ਤਤ੍ਥ ਧਮ੍ਮੋਤਿ ਸੁਤ੍ਤਨ੍ਤਪਿਟਕਂ. ਅਭਿਧਮ੍ਮੋਤਿ ਸਤ੍ਤ ਪਕਰਣਾਨਿ. ਵਿਨਯੋਤਿ ਉਭਤੋਵਿਭਙ੍ਗੋ. ਅਭਿਵਿਨਯੋਤਿ ਖਨ੍ਧਕਪਰਿਵਾਰਾ. ਅਥ ਵਾ ਸੁਤ੍ਤਨ੍ਤਪਿਟਕਮ੍ਪਿ ਅਭਿਧਮ੍ਮਪਿਟਕਮ੍ਪਿ ਧਮ੍ਮੋ ਏਵ, ਮਗ੍ਗਫਲਾਨਿ ਅਭਿਧਮ੍ਮੋ. ਸਕਲਵਿਨਯਪਿਟਕਂ ਵਿਨਯੋ, ਕਿਲੇਸਵੂਪਸਮਕਰਣਂ ਅਭਿਵਿਨਯੋ. ਇਤਿ ਸਬ੍ਬਸ੍ਮਿਮ੍ਪਿ ਏਤ੍ਥ ਧਮ੍ਮੇ ਚ ਅਭਿਧਮ੍ਮੇ ਚ ਵਿਨਯੇ ਚ ਅਭਿਵਿਨਯੇ ਚ ਉਲ਼ਾਰਪਾਮੋਜ੍ਜੋ ਹੋਤੀਤਿ ਅਤ੍ਥੋ. ਕੁਸਲੇਸੁ ਧਮ੍ਮੇਸੂਤਿ ਕਾਰਣਤ੍ਥੇ ਭੁਮ੍ਮਂ, ਚਾਤੁਭੂਮਕਕੁਸਲਧਮ੍ਮਕਾਰਣਾ ਤੇਸਂ ਅਧਿਗਮਤ੍ਥਾਯ ਅਨਿਕ੍ਖਿਤ੍ਤਧੁਰੋ ਹੋਤੀਤਿ ਅਤ੍ਥੋ.
੮. ਦੁਤਿਯਨਾਥਸੁਤ੍ਤਵਣ੍ਣਨਾ
੧੮. ਅਟ੍ਠਮੇ ਥੇਰਾਨੁਕਮ੍ਪਿਤਸ੍ਸਾਤਿ ਥੇਰੇਹਿ ਓਵਾਦਾਨੁਸਾਸਨਿਦਾਨਸਮੁਸ੍ਸਾਹਿਤਾਯ ਹਿਤਫਰਣਾਯ ਅਨੁਕਮ੍ਪਿਤਸ੍ਸ.
੯. ਪਠਮਅਰਿਯਾਵਾਸਸੁਤ੍ਤਵਣ੍ਣਨਾ
੧੯. ਨਵਮੇ ਅਰਿਯਵਾਸਾਤਿ ਅਰਿਯਾਨਂ ਆਵਾਸੋ, ਤੇ ਆਵਸਿਂਸੁ ਆਵਸਨ੍ਤਿ ਆਵਸਿਸ੍ਸਨ੍ਤੀਤਿ ਅਰਿਯਾਵਾਸਾ. ਯਦਰਿਯਾਤਿ ਯੇ ਵਾਸੇ ਅਰਿਯਾ.
੧੦. ਦੁਤਿਯਅਰਿਯਾਵਾਸਸੁਤ੍ਤਵਣ੍ਣਨਾ
੨੦. ਦਸਮਂ ਯਸ੍ਮਾ ਕੁਰੁਰਟ੍ਠਵਾਸਿਨੋ ਭਿਕ੍ਖੂ ਗਮ੍ਭੀਰਪਞ੍ਞਾਕਾਰਕਾ ਯੁਤ੍ਤਪ੍ਪਯੁਤ੍ਤਾ, ਤਸ੍ਮਾ ਯਥਾ ਤੇਸਂ ਦੀਘਨਿਕਾਯਾਦੀਸੁ ਮਹਾਨਿਦਾਨਾਦੀਨਿ ਕਥਿਤਾਨਿ, ਏਵਮਿਦਮ੍ਪਿ ਗਮ੍ਭੀਰਂ ਸੁਖੁਮਂ ਤਿਲਕ੍ਖਣਾਹਤਂ ਸੁਤ੍ਤਂ ਤਤ੍ਥੇਵ ਅਵੋਚ. ਤਤ੍ਥ ਪਞ੍ਚਙ੍ਗਵਿਪ੍ਪਹੀਨੋਤਿ ਪਞ੍ਚਹਿ ਅਙ੍ਗੇਹਿ ਵਿਪ੍ਪਯੁਤ੍ਤੋ ਹੁਤ੍ਵਾ ਖੀਣਾਸਵੋ ਅਵਸਿ ਵਸਤਿ ਵਸਿਸ੍ਸਤਿ. ਤਸ੍ਮਾ ਅਯਂ ਪਞ੍ਚਙ੍ਗਵਿਪ੍ਪਹੀਨਤਾ ਅਰਿਯਾਵਾਸੋਤਿ ਵੁਤ੍ਤੋ. ਏਸ ਨਯੋ ਸਬ੍ਬਤ੍ਥ. ਏਵਂ ਖੋ, ਭਿਕ੍ਖਵੇ, ਭਿਕ੍ਖੁ ਛਲ਼ਙ੍ਗਸਮਨ੍ਨਾਗਤੋ ਹੋਤੀਤਿ ਛਲ਼ਙ੍ਗੁਪੇਕ੍ਖਾਯ ਸਮਨ੍ਨਾਗਤੋ ਹੋਤਿ. ਛਲ਼ਙ੍ਗੁਪੇਕ੍ਖਾ ਧਮ੍ਮਾ ਨਾਮ ਕੇਤਿ? ਞਾਣਾਦਯੋ. ‘‘ਞਾਣ’’ਨ੍ਤਿ ਵੁਤ੍ਤੇ ਕਿਰਿਯਤੋ ਚਤ੍ਤਾਰਿ ਞਾਣਸਮ੍ਪਯੁਤ੍ਤਚਿਤ੍ਤਾਨਿ ਲਬ੍ਭਨ੍ਤਿ, ‘‘ਸਤਤਵਿਹਾਰੋ’’ਤਿ ਵੁਤ੍ਤੇ ਅਟ੍ਠ ਮਹਾਚਿਤ੍ਤਾਨਿ, ‘‘ਰਜ੍ਜਨਦੁਸ੍ਸਨਂ ਨਤ੍ਥੀ’’ਤਿ ਵੁਤ੍ਤੇ ਦਸ ਚਿਤ੍ਤਾਨਿ ਲਬ੍ਭਨ੍ਤਿ. ਸੋਮਨਸ੍ਸਂ ਆਸੇਵਨਵਸੇਨ ਲਬ੍ਭਤਿ. ਸਤਾਰਕ੍ਖੇਨ ਚੇਤਸਾਤਿ ਖੀਣਾਸਵਸ੍ਸ ਹਿ ਤੀਸੁ ਦ੍ਵਾਰੇਸੁ ਸਬ੍ਬਕਾਲੇ ਸਤਿ ਆਰਕ੍ਖਕਿਚ੍ਚਂ ਸਾਧੇਤਿ. ਤੇਨੇਵਸ੍ਸ ਚਰਤੋ ਚ ਤਿਟ੍ਠਤੋ ਚ ਸੁਤ੍ਤਸ੍ਸ ਚ ਜਾਗਰਸ੍ਸ ਚ ਸਤਤਂ ਸਮਿਤਂ ਞਾਣਦਸ੍ਸਨਂ ਪਚ੍ਚੁਪਟ੍ਠਿਤਂ ਹੋਤੀਤਿ ਵੁਚ੍ਚਤਿ.
ਪੁਥੁਸਮਣਬ੍ਰਾਹ੍ਮਣਾਨਨ੍ਤਿ ਬਹੂਨਂ ਸਮਣਬ੍ਰਾਹ੍ਮਣਾਨਂ. ਏਤ੍ਥ ਸਮਣਾਤਿ ਪਬ੍ਬਜ੍ਜੂਪਗਤਾ, ਬ੍ਰਾਹ੍ਮਣਾਤਿ ਭੋਵਾਦਿਨੋ. ਪੁਥੁਪਚ੍ਚੇਕਸਚ੍ਚਾਨੀਤਿ ਬਹੂਨਿ ਪਾਟੇਕ੍ਕਸਚ੍ਚਾਨਿ. ‘‘ਇਦਮੇਵ ਦਸ੍ਸਨਂ ਸਚ੍ਚਂ, ਇਦਮੇਵ ਸਚ੍ਚ’’ਨ੍ਤਿ ਏਵਂ ਪਾਟਿਯੇਕ੍ਕਂ ਗਹਿਤਾਨਿ ਬਹੂਨਿ ਸਚ੍ਚਾਨੀਤਿ ਅਤ੍ਥੋ. ਨੁਣ੍ਣਾਨੀਤਿ ਨੀਹਟਾਨਿ. ਪਨੁਣ੍ਣਾਨੀਤਿ ਸੁਟ੍ਠੁ ਨੀਹਟਾਨਿ. ਚਤ੍ਤਾਨੀਤਿ ਵਿਸ੍ਸਟ੍ਠਾਨਿ. ਵਨ੍ਤਾਨੀਤਿ ਵਮਿਤਾਨਿ. ਮੁਤ੍ਤਾਨੀਤਿ ਛਿਨ੍ਨਬਨ੍ਧਨਾਨਿ ਕਤਾਨਿ. ਪਹੀਨਾਨੀਤਿ ਪਜਹਿਤਾਨਿ. ਪਟਿਨਿਸ੍ਸਟ੍ਠਾਨੀਤਿ ਯਥਾ ਨ ਪੁਨ ਚਿਤ੍ਤਂ ਆਰੋਹਨ੍ਤਿ, ਏਵਂ ਪਟਿਨਿਸ੍ਸਜ੍ਜਿਤਾਨਿ. ਸਬ੍ਬਾਨੇਵ ਤਾਨਿ ਗਹਿਤਗ੍ਗਹਣਸ੍ਸ ਵਿਸ੍ਸਟ੍ਠਭਾਵਵੇਵਚਨਾਨਿ.
ਸਮਵਯਸਟ੍ਠੇਸਨੋਤਿ ਏਤ੍ਥ ਅਵਯਾਤਿ ਅਨੂਨਾ, ਸਟ੍ਠਾਤਿ ਵਿਸ੍ਸਟ੍ਠਾ. ਸਮ੍ਮਾ ਅਵਯਾ ਸਟ੍ਠਾ ਏਸਨਾ ਅਸ੍ਸਾਤਿ ਸਮਵਯਸਟ੍ਠੇਸਨੋ, ਸੁਟ੍ਠੁਵਿਸ੍ਸਟ੍ਠਸਬ੍ਬਏਸਨੋਤਿ ਅਤ੍ਥੋ. ਰਾਗਾ ਚਿਤ੍ਤਂ ਵਿਮੁਤ੍ਤਨ੍ਤਿਆਦੀਹਿ ਮਗ੍ਗਸ੍ਸ ਕਿਚ੍ਚਨਿਪ੍ਫਤ੍ਤਿ ਕਥਿਤਾ. ਰਾਗੋ ਮੇ ਪਹੀਨੋਤਿਆਦੀਹਿ ਪਚ੍ਚਵੇਕ੍ਖਣਫਲਂ ਕਥਿਤਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.
ਨਾਥਵਗ੍ਗੋ ਦੁਤਿਯੋ.
੩. ਮਹਾਵਗ੍ਗੋ
੧. ਸੀਹਨਾਦਸੁਤ੍ਤਵਣ੍ਣਨਾ
੨੧. ਤਤਿਯਸ੍ਸ ਪਠਮੇ ਵਿਸਮਗਤੇਤਿ ਵਿਸਮਟ੍ਠਾਨੇਸੁ ਗੋਚਰੇਸੁ ਗਤੇ. ਸਙ੍ਘਾਤਂ ਆਪਾਦੇਸਿਨ੍ਤਿ ਘਾਤਂ ਵਧਂ ਪਾਪੇਸਿਂ. ਤਸ੍ਸ ਹਿ ਉਸ੍ਸਨ੍ਨਤੇਜਤਾਯ ਖੁਦ੍ਦਕੇਸੁ ਪਾਣੇਸੁ ਅਨੁਕਮ੍ਪਾ ਹੋਤਿ. ਤਸ੍ਮਾ ਯੇ ਪਟਿਸਤ੍ਤੁਭਾਵੇਨ ਸਣ੍ਠਾਤੁਂ ਸਕ੍ਖਿਸ੍ਸਨ੍ਤਿ, ਯੇ ਦੁਬ੍ਬਲਾ ਪਲਾਯਿਤੁਕਾਮਾ ਭਵਿਸ੍ਸਨ੍ਤਿ, ਤੇ ਪਲਾਯਿਸ੍ਸਨ੍ਤੀਤਿ ਸੀਹਨਾਦਂ ਨਦਿਤ੍ਵਾਵ ਗੋਚਰਾਯ ਪਕ੍ਕਮਤਿ. ਤਥਾਗਤਸ੍ਸੇਤਂ ਅਧਿਵਚਨਨ੍ਤਿ ਯਦਿ ਹਿ ਸਹਨਤਾਯ ਹਨਨਤਾਯ ਚ ਸੀਹੋ, ਤਥਾਗਤੋ ਹਿ ਸਬ੍ਬਾਨਿ ਚ ਇਟ੍ਠਾਨਿਟ੍ਠਾਨਿ ਸਹਤਿ, ਸਬ੍ਬਪਰਪ੍ਪਵਾਦਿਨੋ ਚ ਵਾਦਾਨਂ ਨਿਮ੍ਮਥਨੇਨ ਹਨਤਿ. ਇਦਮਸ੍ਸ ਹੋਤਿ ਸੀਹਨਾਦਸ੍ਮਿਨ੍ਤਿ ਅਯਮਸ੍ਸ ਸੀਹਨਾਦੋ.
ਤਥਾਗਤਬਲਾਨੀਤਿ ਅਞ੍ਞੇਹਿ ਅਸਾਧਾਰਣਾਨਿ ਤਥਾਗਤਸ੍ਸੇਵ ਬਲਾਨਿ. ਯਥਾ ਵਾ ਪੁਬ੍ਬਬੁਦ੍ਧਾਨਂ ਬਲਾਨਿ ਪੁਞ੍ਞਸਮ੍ਪਤ੍ਤਿਯਾ ਆਗਤਾਨਿ, ਤਥਾ ਆਗਤਬਲਾਨੀਤਿਪਿ ਅਤ੍ਥੋ. ਤਤ੍ਥ ਦੁਵਿਧਂ ਤਥਾਗਤਸ੍ਸ ਬਲਂ ਕਾਯਬਲਂ ਞਾਣਬਲਂ. ਤੇਸੁ ਕਾਯਬਲਂ ਹਤ੍ਥਿਕੁਲਾਨੁਸਾਰੇਨ ਵੇਦਿਤਬ੍ਬਂ. ਵੁਤ੍ਤਞ੍ਹੇਤਂ ਪੋਰਾਣੇਹਿ –
‘‘ਕਾਲਾਵਕਞ੍ਚ ਗਙ੍ਗੇਯ੍ਯਂ, ਪਣ੍ਡਰਂ ਤਮ੍ਬਪਿਙ੍ਗਲਂ;
ਗਨ੍ਧਮਙ੍ਗਲਹੇਮਞ੍ਚ, ਉਪੋਸਥਛਦ੍ਦਨ੍ਤਿਮੇ ਦਸਾ’’ਤਿ.
ਇਮਾਨਿ ਦਸ ਹਤ੍ਥਿਕੁਲਾਨਿ. ਤਤ੍ਥ ਕਾਲਾਵਕਨ੍ਤਿ ਪਕਤਿਹਤ੍ਥਿਕੁਲਂ ਦਟ੍ਠਬ੍ਬਂ. ਯਂ ਦਸਨ੍ਨਂ ਪੁਰਿਸਾਨਂ ਕਾਯਬਲਂ, ਤਂ ਏਕਸ੍ਸ ਕਾਲਾਵਕਸ੍ਸ ਹਤ੍ਥਿਨੋ. ਯਂ ਦਸਨ੍ਨਂ ਕਾਲਾਵਕਾਨਂ ਬਲਂ, ਤਂ ਏਕਸ੍ਸ ਗਙ੍ਗੇਯ੍ਯਸ੍ਸ. ਯਂ ਦਸਨ੍ਨਂ ਗਙ੍ਗੇਯ੍ਯਾਨਂ, ਤਂ ਏਕਸ੍ਸ ਪਣ੍ਡਰਸ੍ਸ. ਯਂ ਦਸਨ੍ਨਂ ਪਣ੍ਡਰਾਨਂ, ਤਂ ਏਕਸ੍ਸ ਤਮ੍ਬਸ੍ਸ. ਯਂ ਦਸਨ੍ਨਂ ਤਮ੍ਬਾਨਂ, ਤਂ ਏਕਸ੍ਸ ਪਿਙ੍ਗਲਸ੍ਸ. ਯਂ ਦਸਨ੍ਨਂ ਪਿਙ੍ਗਲਾਨਂ, ਤਂ ਏਕਸ੍ਸ ਗਨ੍ਧਹਤ੍ਥਿਨੋ. ਯਂ ਦਸਨ੍ਨਂ ਗਨ੍ਧਹਤ੍ਥੀਨਂ, ਤਂ ਏਕਸ੍ਸ ਮਙ੍ਗਲਸ੍ਸ. ਯਂ ਦਸਨ੍ਨਂ ਮਙ੍ਗਲਾਨਂ, ਤਂ ਏਕਸ੍ਸ ਹੇਮਸ੍ਸ. ਯਂ ਦਸਨ੍ਨਂ ਹੇਮਾਨਂ, ਤਂ ਏਕਸ੍ਸ ਉਪੋਸਥਸ੍ਸ. ਯਂ ਦਸਨ੍ਨਂ ਉਪੋਸਥਾਨਂ, ਤਂ ਏਕਸ੍ਸ ਛਦ੍ਦਨ੍ਤਸ੍ਸ. ਯਂ ਦਸਨ੍ਨਂ ਛਦ੍ਦਨ੍ਤਾਨਂ, ਤਂ ਏਕਸ੍ਸ ਤਥਾਗਤਸ੍ਸ. ਨਾਰਾਯਨਸਙ੍ਘਾਤਬਲਨ੍ਤਿਪਿ ਇਦਮੇਵ ਵੁਚ੍ਚਤਿ. ਤਦੇਤਂ ਪਕਤਿਹਤ੍ਥਿਗਣਨਾਯ ਹਤ੍ਥੀਨਂ ਕੋਟਿਸਹਸ੍ਸਾਨਂ, ਪੁਰਿਸਗਣਨਾਯ ਦਸਨ੍ਨਂ ਪੁਰਿਸਕੋਟਿਸਹਸ੍ਸਾਨਂ ਬਲਂ ਹੋਤਿ. ਇਦਂ ਤਾਵ ਤਥਾਗਤਸ੍ਸ ਕਾਯਬਲਂ.
ਞਾਣਬਲਂ ਪਨ ਪਾਲ਼ਿਯਂ ਤਾਵ ਆਗਤਮੇਵ. ਦਸਬਲਞਾਣਂ, ਮਜ੍ਝਿਮੇ ਆਗਤਂ ਚਤੁਵੇਸਾਰਜ੍ਜਞਾਣਂ, ਅਟ੍ਠਸੁ ਪਰਿਸਾਸੁ ਅਕਮ੍ਪਨਞਾਣਂ, ਚਤੁਯੋਨਿਪਰਿਚ੍ਛੇਦਞਾਣਂ, ਪਞ੍ਚਗਤਿਪਰਿਚ੍ਛੇਦਞਾਣਂ, ਸਂਯੁਤ੍ਤਕੇ (ਸਂ. ਨਿ. ੨.੩੩) ਆਗਤਾਨਿ ਤੇਸਤ੍ਤਤਿ ਞਾਣਾਨਿ ਸਤ੍ਤਸਤ੍ਤਤਿ ਞਾਣਾਨੀਤਿ, ਏਵਂ ਅਞ੍ਞਾਨਿਪਿ ਅਨੇਕਾਨਿ ਞਾਣਬਲਂ ਨਾਮ. ਇਧਾਪਿ ਞਾਣਬਲਮੇਵ ਅਧਿਪ੍ਪੇਤਂ. ਞਾਣਞ੍ਹਿ ਅਕਮ੍ਪਿਯਟ੍ਠੇਨ ਉਪਤ੍ਥਮ੍ਭਨਟ੍ਠੇਨ ਚ ਬਲਨ੍ਤਿ ਵੁਤ੍ਤਂ.
ਆਸਭਂ ਠਾਨਨ੍ਤਿ ਸੇਟ੍ਠਟ੍ਠਾਨਂ ਉਤ੍ਤਮਟ੍ਠਾਨਂ. ਆਸਭਾ ਵਾ ਪੁਬ੍ਬਬੁਦ੍ਧਾ, ਤੇਸਂ ਠਾਨਨ੍ਤਿ ਅਤ੍ਥੋ. ਅਪਿਚ ਗਵਸਤਜੇਟ੍ਠਕੋ ਉਸਭੋ, ਗਵਸਹਸ੍ਸਜੇਟ੍ਠਕੋ ਵਸਭੋ. ਵਜਸਤਜੇਟ੍ਠਕੋ ਵਾ ਉਸਭੋ, ਵਜਸਹਸ੍ਸਜੇਟ੍ਠਕੋ ਵਸਭੋ. ਸਬ੍ਬਗਵਸੇਟ੍ਠੋ ਸਬ੍ਬਪਰਿਸ੍ਸਯਸਹੋ ਸੇਤੋ ਪਾਸਾਦਿਕੋ ਮਹਾਭਾਰਵਹੋ ਅਸਨਿਸਤਸਦ੍ਦੇਹਿਪਿ ਅਸਮ੍ਪਕਮ੍ਪਿਯੋ ਨਿਸਭੋ, ਸੋ ਇਧ ਉਸਭੋਤਿ ਅਧਿਪ੍ਪੇਤੋ. ਇਦਮ੍ਪਿ ਹਿ ਤਸ੍ਸ ਪਰਿਯਾਯਵਚਨਂ. ਉਸਭਸ੍ਸ ਇਦਨ੍ਤਿ ਆਸਭਂ. ਠਾਨਨ੍ਤਿ ਚਤੂਹਿ ਪਾਦੇਹਿ ਪਥਵਿਂ ਉਪ੍ਪੀਲ਼ੇਤ੍ਵਾ ਅਚਲਟ੍ਠਾਨਂ. ਇਦਂ ਪਨ ਆਸਭਂ ਵਿਯਾਤਿ ਆਸਭਂ. ਯਥੇਵ ਹਿ ਨਿਸਭਸਙ੍ਖਾਤੋ ਉਸਭੋ ਉਸਭਬਲੇਨ ਸਮਨ੍ਨਾਗਤੋ ਚਤੂਹਿ ਪਾਦੇਹਿ ਪਥਵਿਂ ਉਪ੍ਪੀਲ਼ੇਤ੍ਵਾ ਅਚਲਟ੍ਠਾਨੇਨ ਤਿਟ੍ਠਤਿ, ਏਵਂ ਤਥਾਗਤੋਪਿ ਦਸਹਿ ਤਥਾਗਤਬਲੇਹਿ ਸਮਨ੍ਨਾਗਤੋ ਚਤੂਹਿ ਵੇਸਾਰਜ੍ਜਪਾਦੇਹਿ ਅਟ੍ਠਪਰਿਸਪਥਵਿਂ ਉਪ੍ਪੀਲ਼ੇਤ੍ਵਾ ਸਦੇਵਕੇ ਲੋਕੇ ਕੇਨਚਿ ਪਚ੍ਚਤ੍ਥਿਕੇਨ ਪਚ੍ਚਾਮਿਤ੍ਤੇਨ ਅਕਮ੍ਪਿਯੋ ਅਚਲਟ੍ਠਾਨੇਨ ਤਿਟ੍ਠਤਿ. ਏਵਂ ਤਿਟ੍ਠਮਾਨੋ ਚ ਤਂ ਆਸਭਂ ਠਾਨਂ ਪਟਿਜਾਨਾਤਿ ਉਪਗਚ੍ਛਤਿ ਨ ਪਚ੍ਚਕ੍ਖਾਤਿ ਅਤ੍ਤਨਿ ਆਰੋਪੇਤਿ. ਤੇਨ ਵੁਤ੍ਤਂ – ‘‘ਆਸਭਂ ਠਾਨਂ ਪਟਿਜਾਨਾਤੀ’’ਤਿ.
ਪਰਿਸਾਸੂਤਿ ਅਟ੍ਠਸੁ ਪਰਿਸਾਸੁ. ਸੀਹਨਾਦਂ ਨਦਤੀਤਿ ਸੇਟ੍ਠਨਾਦਂ ਨਦਤਿ, ਅਭੀਤਨਾਦਂ ਨਦਤਿ, ਸੀਹਨਾਦਸਦਿਸਂ ਵਾ ਨਾਦਂ ਨਦਤਿ. ਤਤ੍ਰਾਯਂ ਉਪਮਾ – ਯਥਾ ਸੀਹੋ ਸੀਹਬਲੇਨ ਸਮਨ੍ਨਾਗਤੋ ਸਬ੍ਬਤ੍ਥ ਵਿਸਾਰਦੋ ਵਿਗਤਲੋਮਹਂਸੋ ਸੀਹਨਾਦਂ ਨਦਤਿ, ਏਵਂ ਤਥਾਗਤਸੀਹੋਪਿ ਤਥਾਗਤਬਲੇਹਿ ਸਮਨ੍ਨਾਗਤੋ ਅਟ੍ਠਸੁ ਪਰਿਸਾਸੁ ਵਿਸਾਰਦੋ ਵਿਗਤਲੋਮਹਂਸੋ ‘‘ਇਤਿ ਸਕ੍ਕਾਯੋ’’ਤਿਆਦਿਨਾ ਨਯੇਨ ਨਾਨਾਵਿਧਦੇਸਨਾਵਿਲਾਸਸਮ੍ਪਨ੍ਨਂ ਸੀਹਨਾਦਂ ਨਦਤਿ. ਤੇਨ ਵੁਤ੍ਤਂ – ‘‘ਪਰਿਸਾਸੁ ਸੀਹਨਾਦਂ ਨਦਤੀ’’ਤਿ.
ਬ੍ਰਹ੍ਮਚਕ੍ਕਂ ਪਵਤ੍ਤੇਤੀਤਿ ਏਤ੍ਥ ਬ੍ਰਹ੍ਮਨ੍ਤਿ ਸੇਟ੍ਠਂ ਉਤ੍ਤਮਂ ਵਿਸਿਟ੍ਠਂ. ਚਕ੍ਕਨ੍ਤਿ ਧਮ੍ਮਚਕ੍ਕਂ. ਤਂ ਪਨੇਤਂ ਦੁਵਿਧਂ ਹੋਤਿ ਪਟਿਵੇਧਞਾਣਞ੍ਚੇਵ ਦੇਸਨਾਞਾਣਞ੍ਚ. ਤਤ੍ਥ ਪਞ੍ਞਾਪਭਾਵਿਤਂ ਅਤ੍ਤਨੋ ਅਰਿਯਫਲਾਵਹਂ ਪਟਿਵੇਧਞਾਣਂ, ਕਰੁਣਾਪਭਾਵਿਤਂ ਸਾਵਕਾਨਂ ਅਰਿਯਫਲਾਵਹਂ ਦੇਸਨਾਞਾਣਂ. ਤਤ੍ਥ ਪਟਿਵੇਧਞਾਣਂ ਉਪ੍ਪਜ੍ਜਮਾਨਂ ਉਪ੍ਪਨ੍ਨਨ੍ਤਿ ਦੁਵਿਧਂ. ਤਞ੍ਹਿ ਅਭਿਨਿਕ੍ਖਮਨਤੋ ਯਾਵ ਅਰਹਤ੍ਤਮਗ੍ਗਾ ਉਪ੍ਪਜ੍ਜਮਾਨਂ, ਫਲਕ੍ਖਣੇ ਉਪ੍ਪਨ੍ਨਂ ਨਾਮ. ਤੁਸਿਤਭਵਨਤੋ ਵਾ ਯਾਵ ਮਹਾਬੋਧਿਪਲ੍ਲਙ੍ਕੇ ਅਰਹਤ੍ਤਮਗ੍ਗਾ ਉਪ੍ਪਜ੍ਜਮਾਨਂ, ਫਲਕ੍ਖਣੇ ਉਪ੍ਪਨ੍ਨਂ ਨਾਮ. ਦੀਪਙ੍ਕਰਤੋ ਵਾ ਪਟ੍ਠਾਯ ਯਾਵ ਅਰਹਤ੍ਤਮਗ੍ਗਾ ਉਪ੍ਪਜ੍ਜਮਾਨਂ, ਫਲਕ੍ਖਣੇ ਉਪ੍ਪਨ੍ਨਂ ਨਾਮ. ਦੇਸਨਾਞਾਣਮ੍ਪਿ ਪਵਤ੍ਤਮਾਨਂ ਪਵਤ੍ਤਨ੍ਤਿ ਦੁਵਿਧਂ. ਤਞ੍ਹਿ ਯਾਵ ਅਞ੍ਞਾਸਿਕੋਣ੍ਡਞ੍ਞਸ੍ਸ ਸੋਤਾਪਤ੍ਤਿਮਗ੍ਗਾ ਪਵਤ੍ਤਮਾਨਂ, ਫਲਕ੍ਖਣੇ ਪਵਤ੍ਤਂ ਨਾਮ. ਤੇਸੁ ਪਟਿਵੇਧਞਾਣਂ ਲੋਕੁਤ੍ਤਰਂ, ਦੇਸਨਾਞਾਣਂ ਲੋਕਿਯਂ. ਉਭਯਮ੍ਪਿ ਪਨੇਤਂ ਅਞ੍ਞੇਹਿ ਅਸਾਧਾਰਣਂ, ਬੁਦ੍ਧਾਨਂਯੇਵ ਓਰਸਞਾਣਂ.
ਇਦਾਨਿ ਯੇਹਿ ਦਸਹਿ ਬਲੇਹਿ ਸਮਨ੍ਨਾਗਤੋ ਤਥਾਗਤੋ ਆਸਭਂ ਠਾਨਂ ਪਟਿਜਾਨਾਤਿ, ਤਾਨਿ ਵਿਤ੍ਥਾਰਤੋ ਦਸ੍ਸੇਤੁਂ ਕਤਮਾਨਿ ਦਸ? ਇਧ, ਭਿਕ੍ਖਵੇ, ਤਥਾਗਤੋ ਠਾਨਞ੍ਚ ਠਾਨਤੋਤਿਆਦਿਮਾਹ. ਤਤ੍ਥ ਠਾਨਞ੍ਚ ਠਾਨਤੋਤਿ ਕਾਰਣਞ੍ਚ ਕਾਰਣਤੋ. ਕਾਰਣਞ੍ਹਿ ਯਸ੍ਮਾ ਤਤ੍ਥ ਫਲਂ ਤਿਟ੍ਠਤਿ, ਤਦਾਯਤ੍ਤਵੁਤ੍ਤਿਤਾਯ ਉਪ੍ਪਜ੍ਜਤਿ ਚੇਵ ਪਵਤ੍ਤਤਿ ਚ, ਤਸ੍ਮਾ ਠਾਨਨ੍ਤਿ ਵੁਚ੍ਚਤਿ. ਤਂ ਭਗਵਾ ‘‘ਯੇ ਯੇ ਧਮ੍ਮਾ ਯੇਸਂ ਯੇਸਂ ਧਮ੍ਮਾਨਂ ਹੇਤੂ ਪਚ੍ਚਯਾ ਉਪ੍ਪਾਦਾਯ, ਤਂ ਤਂ ਠਾਨਂ. ਯੇ ਯੇ ਧਮ੍ਮਾ ਯੇਸਂ ਯੇਸਂ ਧਮ੍ਮਾਨਂ ਨ ਹੇਤੂ ਨ ਪਚ੍ਚਯਾ ਉਪ੍ਪਾਦਾਯ, ਤਂ ਤਂ ਅਟ੍ਠਾਨ’’ਨ੍ਤਿ ਪਜਾਨਨ੍ਤੋ ਠਾਨਞ੍ਚ ਠਾਨਤੋ ਅਟ੍ਠਾਨਞ੍ਚ ਅਟ੍ਠਾਨਤੋ ਯਥਾਭੂਤਂ ਪਜਾਨਾਤਿ. ਅਭਿਧਮ੍ਮੇ ਪਨੇਤਂ ‘‘ਤਤ੍ਥ ਕਤਮਂ ਤਥਾਗਤਸ੍ਸ ਠਾਨਞ੍ਚ ਠਾਨਤੋ ਅਟ੍ਠਾਨਞ੍ਚ ਅਟ੍ਠਾਨਤੋ ਯਥਾਭੂਤਂ ਞਾਣ’’ਨ੍ਤਿਆਦਿਨਾ (ਵਿਭ. ੮੦੯) ਨਯੇਨ ਵਿਤ੍ਥਾਰਿਤਮੇਵ. ਯਮ੍ਪੀਤਿ ਯੇਨ ਞਾਣੇਨ. ਇਦਮ੍ਪਿ, ਭਿਕ੍ਖਵੇ, ਤਥਾਗਤਸ੍ਸਾਤਿ ਇਦਮ੍ਪਿ ਠਾਨਾਟ੍ਠਾਨਞਾਣਂ ਤਥਾਗਤਸ੍ਸ ਤਥਾਗਤਬਲਂ ਨਾਮ ਹੋਤੀਤਿ ਅਤ੍ਥੋ. ਏਵਂ ਸਬ੍ਬਪਦੇਸੁ ਯੋਜਨਾ ਵੇਦਿਤਬ੍ਬਾ.
ਕਮ੍ਮਸਮਾਦਾਨਾਨਨ੍ਤਿ ਸਮਾਦਿਯਿਤ੍ਵਾ ਕਤਾਨਂ ਕੁਸਲਾਕੁਸਲਕਮ੍ਮਾਨਂ, ਕਮ੍ਮਮੇਵ ਵਾ ਕਮ੍ਮਸਮਾਦਾਨਂ. ਠਾਨਸੋ ਹੇਤੁਸੋਤਿ ਪਚ੍ਚਯਤੋ ਚੇਵ ਹੇਤੁਤੋ ਚ. ਤਤ੍ਥ ਗਤਿਉਪਧਿਕਾਲਪਯੋਗਾ ਵਿਪਾਕਸ੍ਸ ਠਾਨਂ, ਕਮ੍ਮਂ ਹੇਤੁ. ਇਮਸ੍ਸ ਪਨ ਞਾਣਸ੍ਸ ਵਿਤ੍ਥਾਰਕਥਾ ‘‘ਅਤ੍ਥੇਕਚ੍ਚਾਨਿ ਪਾਪਕਾਨਿ ਕਮ੍ਮਸਮਾਦਾਨਾਨਿ ਗਤਿਸਮ੍ਪਤ੍ਤਿਪਟਿਬਾਲ਼੍ਹਾਨਿ ਨ ਵਿਪਚ੍ਚਨ੍ਤੀ’’ਤਿਆਦਿਨਾ (ਵਿਭ. ੮੧੦) ਨਯੇਨ ਅਭਿਧਮ੍ਮੇ ਆਗਤਾਯੇਵ.
ਸਬ੍ਬਤ੍ਥਗਾਮਿਨਿਨ੍ਤਿ ਸਬ੍ਬਗਤਿਗਾਮਿਨਿਞ੍ਚ ਅਗਤਿਗਾਮਿਨਿਞ੍ਚ. ਪਟਿਪਦਨ੍ਤਿ ਮਗ੍ਗਂ. ਯਥਾਭੂਤਂ ਪਜਾਨਾਤੀਤਿ ਬਹੂਸੁਪਿ ਮਨੁਸ੍ਸੇਸੁ ਏਕਮੇਵ ਪਾਣਂ ਘਾਤੇਨ੍ਤੇਸੁ ‘‘ਇਮਸ੍ਸ ਚੇਤਨਾ ਨਿਰਯਗਾਮਿਨੀ ਭਵਿਸ੍ਸਤਿ, ਇਮਸ੍ਸ ਤਿਰਚ੍ਛਾਨਯੋਨਿਗਾਮਿਨੀ’’ਤਿ ਇਮਿਨਾ ਨਯੇਨ ਏਕਵਤ੍ਥੁਸ੍ਮਿਮ੍ਪਿ ਕੁਸਲਾਕੁਸਲਚੇਤਨਾਸਙ੍ਖਾਤਾਨਂ ਪਟਿਪਤ੍ਤੀਨਂ ਅਵਿਪਰੀਤਤੋ ਸਭਾਵਂ ਜਾਨਾਤਿ. ਇਮਸ੍ਸਪਿ ਚ ਞਾਣਸ੍ਸ ਵਿਤ੍ਥਾਰਕਥਾ ‘‘ਤਤ੍ਥ ਕਤਮਂ ਤਥਾਗਤਸ੍ਸ ਸਬ੍ਬਤ੍ਥਗਾਮਿਨਿਂ ਪਟਿਪਦਂ ਯਥਾਭੂਤਂ ਞਾਣਂ? ਇਧ ਤਥਾਗਤੋ ਅਯਂ ਮਗ੍ਗੋ ਅਯਂ ਪਟਿਪਦਾ ਨਿਰਯਗਾਮਿਨੀਤਿ ਪਜਾਨਾਤੀ’’ਤਿਆਦਿਨਾ (ਵਿਭ. ੮੧੧) ਨਯੇਨ ਅਭਿਧਮ੍ਮੇ ਆਗਤਾਯੇਵ.
ਅਨੇਕਧਾਤੁਨ੍ਤਿ ਚਕ੍ਖੁਧਾਤੁਆਦੀਹਿ ਕਾਮਧਾਤੁਆਦੀਹਿ ਵਾ ਧਾਤੂਹਿ ਬਹੁਧਾਤੁਂ. ਨਾਨਾਧਾਤੁਨ੍ਤਿ ਤਾਸਂਯੇਵ ਧਾਤੂਨਂ ਵਿਲਕ੍ਖਣਤਾਯ ਨਾਨਪ੍ਪਕਾਰਧਾਤੁਂ. ਲੋਕਨ੍ਤਿ ਖਨ੍ਧਾਯਤਨਧਾਤੁਲੋਕਂ. ਯਥਾਭੂਤਂ ਪਜਾਨਾਤੀਤਿ ਤਾਸਂ ਧਾਤੂਨਂ ਅਵਿਪਰੀਤਤੋ ਸਭਾਵਂ ਪਟਿਵਿਜ੍ਝਤਿ. ਇਦਮ੍ਪਿ ਞਾਣਂ ‘‘ਤਤ੍ਥ ਕਤਮਂ ਤਥਾਗਤਸ੍ਸ ਅਨੇਕਧਾਤੁਨਾਨਾਧਾਤੁਲੋਕਂ ਯਥਾਭੂਤਂ ਞਾਣਂ? ਇਧ ਤਥਾਗਤੋ ਖਨ੍ਧਨਾਨਤ੍ਤਂ ਪਜਾਨਾਤੀ’’ਤਿਆਦਿਨਾ ਨਯੇਨ ਅਭਿਧਮ੍ਮੇ ਵਿਤ੍ਥਾਰਿਤਮੇਵ.
ਨਾਨਾਧਿਮੁਤ੍ਤਿਕਤਨ੍ਤਿ ਹੀਨਾਦੀਹਿ ਅਧਿਮੁਤ੍ਤੀਹਿ ਨਾਨਾਧਿਮੁਤ੍ਤਿਕਭਾਵਂ. ਇਦਮ੍ਪਿ ਞਾਣਂ ‘‘ਤਤ੍ਥ ਕਤਮਂ ਤਥਾਗਤਸ੍ਸ ਸਤ੍ਤਾਨਂ ਨਾਨਾਧਿਮੁਤ੍ਤਿਕਤਂ ਯਥਾਭੂਤਂ ਞਾਣਂ? ਇਧ ਤਥਾਗਤੋ ਪਜਾਨਾਤਿ ਸਨ੍ਤਿ ਸਤ੍ਤਾ ਹੀਨਾਧਿਮੁਤ੍ਤਿਕਾ’’ਤਿਆਦਿਨਾ ਨਯੇਨ ਅਭਿਧਮ੍ਮੇ ਵਿਤ੍ਥਾਰਿਤਮੇਵ.
ਪਰਸਤ੍ਤਾਨਨ੍ਤਿ ਪਧਾਨਸਤ੍ਤਾਨਂ. ਪਰਪੁਗ੍ਗਲਾਨਨ੍ਤਿ ਤਤੋ ਅਞ੍ਞੇਸਂ ਹੀਨਸਤ੍ਤਾਨਂ. ਏਕਤ੍ਥਮੇਵ ਵਾ ਏਤਂ ਪਦਦ੍ਵਯਂ, ਵੇਨੇਯ੍ਯਵਸੇਨ ਦ੍ਵਿਧਾ ਵੁਤ੍ਤਂ. ਇਨ੍ਦ੍ਰਿਯਪਰੋਪਰਿਯਤ੍ਤਨ੍ਤਿ ਸਦ੍ਧਾਦੀਨਂ ਇਨ੍ਦ੍ਰਿਯਾਨਂ ਪਰਭਾਵਞ੍ਚ ਅਪਰਭਾਵਞ੍ਚ, ਵੁਦ੍ਧਿਞ੍ਚ ਹਾਨਿਞ੍ਚਾਤਿ ਅਤ੍ਥੋ. ਇਮਸ੍ਸਾਪਿ ਞਾਣਸ੍ਸ ਵਿਤ੍ਥਾਰਕਥਾ ‘‘ਤਤ੍ਥ ਕਤਮਂ ਤਥਾਗਤਸ੍ਸ ਪਰਸਤ੍ਤਾਨਂ ਪਰਪੁਗ੍ਗਲਾਨਂ ਇਨ੍ਦ੍ਰਿਯਪਰੋਪਰਿਯਤ੍ਤਂ ਯਥਾਭੂਤਂ ਞਾਣਂ? ਇਧ ਤਥਾਗਤੋ ਸਤ੍ਤਾਨਂ ਆਸਯਂ ਪਜਾਨਾਤੀ’’ਤਿ (ਵਿਭ. ੮੧੪) ਆਦਿਨਾ ਨਯੇਨ ਅਭਿਧਮ੍ਮੇ ਆਗਤਾਯੇਵ.
ਝਾਨਵਿਮੋਕ੍ਖਸਮਾਧਿਸਮਾਪਤ੍ਤੀਨਨ੍ਤਿ ਪਠਮਾਦੀਨਂ ਚਤੁਨ੍ਨਂ ਝਾਨਾਨਂ, ‘‘ਰੂਪੀ ਰੂਪਾਨਿ ਪਸ੍ਸਤੀ’’ਤਿਆਦੀਨਂ ਅਟ੍ਠਨ੍ਨਂ ਵਿਮੋਕ੍ਖਾਨਂ, ਸਵਿਤਕ੍ਕਸਵਿਚਾਰਾਦੀਨਂ ਤਿਣ੍ਣਂ ਸਮਾਧੀਨਂ, ਪਠਮਜ੍ਝਾਨਸਮਾਪਤ੍ਤਿਆਦੀਨਞ੍ਚ ਨਵਨ੍ਨਂ ਅਨੁਪੁਬ੍ਬਸਮਾਪਤ੍ਤੀਨਂ. ਸਂਕਿਲੇਸਨ੍ਤਿ ਹਾਨਭਾਗਿਯਧਮ੍ਮਂ. ਵੋਦਾਨਨ੍ਤਿ ਵਿਸੇਸਭਾਗਿਯਧਮ੍ਮਂ. ਵੁਟ੍ਠਾਨਨ੍ਤਿ ‘‘ਵੋਦਾਨਮ੍ਪਿ ਵੁਟ੍ਠਾਨਂ, ਤਮ੍ਹਾ ਤਮ੍ਹਾ ਸਮਾਧਿਮ੍ਹਾ ਵੁਟ੍ਠਾਨਮ੍ਪਿ ਵੁਟ੍ਠਾਨ’’ਨ੍ਤਿ (ਵਿਭ. ੮੨੮) ਏਵਂ ਵੁਤ੍ਤਂ ਪਗੁਣਜ੍ਝਾਨਞ੍ਚੇਵ ਭਵਙ੍ਗਫਲਸਮਾਪਤ੍ਤਿਯੋ ਚ. ਹੇਟ੍ਠਿਮਂ ਹੇਟ੍ਠਿਮਞ੍ਹਿ ਪਗੁਣਜ੍ਝਾਨਂ ਉਪਰਿਮਸ੍ਸ ਉਪਰਿਮਸ੍ਸ ਪਦਟ੍ਠਾਨਂ ਹੋਤਿ, ਤਸ੍ਮਾ ‘‘ਵੋਦਾਨਮ੍ਪਿ ਵੁਟ੍ਠਾਨ’’ਨ੍ਤਿ ਵੁਤ੍ਤਂ. ਭਵਙ੍ਗੇਨ ਪਨ ਸਬ੍ਬਜ੍ਝਾਨੇਹਿ ਵੁਟ੍ਠਾਨਂ ਹੋਤਿ, ਫਲਸਮਾਪਤ੍ਤਿਯਾ ਨਿਰੋਧਸਮਾਪਤ੍ਤਿਤੋ ਵੁਟ੍ਠਾਨਂ ਹੋਤਿ. ਤਂ ਸਨ੍ਧਾਯ ਚ ‘‘ਤਮ੍ਹਾ ਤਮ੍ਹਾ ਸਮਾਧਿਮ੍ਹਾ ਵੁਟ੍ਠਾਨਮ੍ਪਿ ਵੁਟ੍ਠਾਨ’’ਨ੍ਤਿ ਵੁਤ੍ਤਂ. ਇਦਮ੍ਪਿ ਞਾਣਂ ‘‘ਤਤ੍ਥ ਕਤਮਂ ਤਥਾਗਤਸ੍ਸ ਝਾਨਵਿਮੋਕ੍ਖਸਮਾਧਿਸਮਾਪਤ੍ਤੀਨਂ ਸਂਕਿਲੇਸਂ ਵੋਦਾਨਂ ਵੁਟ੍ਠਾਨਂ ਯਥਾਭੂਤਂ ਞਾਣਂ? ਝਾਯੀਤਿ ਚਤ੍ਤਾਰੋ ਝਾਯੀ, ਅਤ੍ਥੇਕਚ੍ਚੋ ਝਾਯੀ ਸਮ੍ਪਤ੍ਤਿਂਯੇਵ ਸਮਾਨਂ ਵਿਪਤ੍ਤੀਤਿ ਪਚ੍ਚੇਤੀ’’ਤਿਆਦਿਨਾ (ਵਿਭ. ੮੨੮) ਨਯੇਨ ਅਭਿਧਮ੍ਮੇ ਵਿਤ੍ਥਾਰਿਤਮੇਵ. ਸਬ੍ਬਞਾਣਾਨਂ ਵਿਤ੍ਥਾਰਕਥਾਯ ਵਿਨਿਚ੍ਛਯੋ ਸਮ੍ਮੋਹਵਿਨੋਦਨਿਯਾ ਵਿਭਙ੍ਗਟ੍ਠਕਥਾਯ ਵੁਤ੍ਤੋ, ਪੁਬ੍ਬੇਨਿਵਾਸਾਨੁਸ੍ਸਤਿਦਿਬ੍ਬਚਕ੍ਖੁਞਾਣਕਥਾ ਵਿਸੁਦ੍ਧਿਮਗ੍ਗੇ ਵਿਤ੍ਥਾਰਿਤਾ, ਆਸਵਕ੍ਖਯਕਥਾ ਹੇਟ੍ਠਾ ਵੁਤ੍ਤਾਯੇਵਾਤਿ.
ਤਤ੍ਥ ਪਰਵਾਦੀਕਥਾ ਹੋਤਿ ‘‘ਦਸਬਲਞਾਣਂ ਨਾਮ ਪਾਟਿਯੇਕ੍ਕਂ ਞਾਣਂ ਨਤ੍ਥਿ, ਸਬ੍ਬਞ੍ਞੁਤਞ੍ਞਾਣਸ੍ਸੇਵਾਯਂ ਪਭੇਦੋ’’ਤਿ. ਤਂ ਨ ਤਥਾ ਦਟ੍ਠਬ੍ਬਂ. ਅਞ੍ਞਮੇਵ ਹਿ ਦਸਬਲਞਾਣਂ, ਅਞ੍ਞਂ ਸਬ੍ਬਞ੍ਞੁਤਞ੍ਞਾਣਂ. ਦਸਬਲਞਾਣਞ੍ਹਿ ਸਕਸਕਕਿਚ੍ਚਮੇਵ ਜਾਨਾਤਿ, ਸਬ੍ਬਞ੍ਞੁਤਞ੍ਞਾਣਂ ਤਮ੍ਪਿ ਤਤੋ ਅਵਸੇਸਮ੍ਪਿ ਜਾਨਾਤਿ. ਦਸਬਲਞਾਣੇਸੁ ਹਿ ਪਠਮਂ ਕਾਰਣਾਕਾਰਣਮੇਵ ਜਾਨਾਤਿ, ਦੁਤਿਯਂ ਕਮ੍ਮਵਿਪਾਕਨ੍ਤਰਮੇਵ, ਤਤਿਯਂ ਕਮ੍ਮਪਰਿਚ੍ਛੇਦਮੇਵ, ਚਤੁਤ੍ਥਂ ਧਾਤੁਨਾਨਤ੍ਤਕਾਰਣਮੇਵ, ਪਞ੍ਚਮਂ ਸਤ੍ਤਾਨਂ ਅਜ੍ਝਾਸਯਾਧਿਮੁਤ੍ਤਿਮੇਵ, ਛਟ੍ਠਂ ਇਨ੍ਦ੍ਰਿਯਾਨਂ ਤਿਕ੍ਖਮੁਦੁਭਾਵਮੇਵ, ਸਤ੍ਤਮਂ ਝਾਨਾਦੀਹਿ ਸਦ੍ਧਿਂ ਤੇਸਂ ਸਂਕਿਲੇਸਾਦਿਮੇਵ, ਅਟ੍ਠਮਂ ਪੁਬ੍ਬੇਨਿਵੁਤ੍ਥਕ੍ਖਨ੍ਧਸਨ੍ਤਤਿਮੇਵ, ਨਵਮਂ ਸਤ੍ਤਾਨਂ ਚੁਤਿਪਟਿਸਨ੍ਧਿਮੇਵ, ਦਸਮਂ ਸਚ੍ਚਪਰਿਚ੍ਛੇਦਮੇਵ. ਸਬ੍ਬਞ੍ਞੁਤਞ੍ਞਾਣਂ ਪਨ ਏਤੇਹਿ ਜਾਨਿਤਬ੍ਬਞ੍ਚ ਤਤੋ ਉਤ੍ਤਰਿਞ੍ਚ ਪਜਾਨਾਤਿ, ਏਤੇਸਂ ਪਨ ਕਿਚ੍ਚਂ ਨ ਸਬ੍ਬਂ ਕਰੋਤਿ. ਤਞ੍ਹਿ ਝਾਨਂ ਹੁਤ੍ਵਾ ਅਪ੍ਪੇਤੁਂ ਨ ਸਕ੍ਕੋਤਿ, ਇਦ੍ਧਿ ਹੁਤ੍ਵਾ ਵਿਕੁਬ੍ਬਿਤੁਂ ਨ ਸਕ੍ਕੋਤਿ, ਮਗ੍ਗੋ ਹੁਤ੍ਵਾ ਕਿਲੇਸੇ ਖੇਪੇਤੁਂ ਨ ਸਕ੍ਕੋਤਿ.
ਅਪਿਚ ਪਰਵਾਦੀ ਏਵਂ ਪੁਚ੍ਛਿਤਬ੍ਬੋ ‘‘ਦਸਬਲਞਾਣਂ ਨਾਮੇਤਂ ਸਵਿਤਕ੍ਕਸਵਿਚਾਰਂ ਅਵਿਤਕ੍ਕਵਿਚਾਰਮਤ੍ਤਂ ਅਵਿਤਕ੍ਕਅਵਿਚਾਰਂ, ਕਾਮਾਵਚਰਂ ਰੂਪਾਵਚਰਂ ਅਰੂਪਾਵਚਰਂ, ਲੋਕਿਯਂ ਲੋਕੁਤ੍ਤਰ’’ਨ੍ਤਿ. ਜਾਨਨ੍ਤੋ ‘‘ਪਟਿਪਾਟਿਯਾ ਸਤ੍ਤ ਞਾਣਾਨਿ ਸਵਿਤਕ੍ਕਸਵਿਚਾਰਾਨੀ’’ਤਿ ਵਕ੍ਖਤਿ, ‘‘ਤਤੋ ਪਰਾਨਿ ਦ੍ਵੇ ਅਵਿਤਕ੍ਕਅਵਿਚਾਰਾਨੀ’’ਤਿ ਵਕ੍ਖਤਿ. ‘‘ਆਸਵਕ੍ਖਯਞਾਣਂ ਸਿਯਾ ਸਵਿਤਕ੍ਕਸਵਿਚਾਰਂ ਸਿਯਾ ਅਵਿਤਕ੍ਕਵਿਚਾਰਮਤ੍ਤਂ, ਸਿਯਾ ਅਵਿਤਕ੍ਕਅਵਿਚਾਰ’’ਨ੍ਤਿ ਵਕ੍ਖਤਿ. ਤਥਾ ‘‘ਪਟਿਪਾਟਿਯਾ ਸਤ੍ਤ ਕਾਮਾਵਚਰਾਨਿ, ਤਤੋ ਦ੍ਵੇ ਰੂਪਾਵਚਰਾਨਿ, ਅਵਸਾਨੇ ਏਕਂ ਲੋਕੁਤ੍ਤਰ’’ਨ੍ਤਿ ਵਕ੍ਖਤਿ. ‘‘ਸਬ੍ਬਞ੍ਞੁਤਞ੍ਞਾਣਂ ਪਨ ਸਵਿਤਕ੍ਕਸਵਿਚਾਰਮੇਵ ਲੋਕਿਯਮੇਵਾ’’ਤਿ ਵਕ੍ਖਤਿ.
ਏਵਮੇਤ੍ਥ ਅਨੁਪਦਵਣ੍ਣਨਂ ਞਤ੍ਵਾ ਇਦਾਨਿ ਯਸ੍ਮਾ ਤਥਾਗਤੋ ਪਠਮਂਯੇਵ ਠਾਨਾਟ੍ਠਾਨਞਾਣੇਨ ਵੇਨੇਯ੍ਯਸਤ੍ਤਾਨਂ ਆਸਵਕ੍ਖਯਾਧਿਗਮਸ੍ਸ ਚੇਵ ਅਨਧਿਗਮਸ੍ਸ ਚ ਠਾਨਾਟ੍ਠਾਨਭੂਤਂ ਕਿਲੇਸਾਵਰਣਾਭਾਵਂ ਪਸ੍ਸਤਿ ਲੋਕਿਯਸਮ੍ਮਾਦਿਟ੍ਠਿਟ੍ਠਾਨਾਦਿਦਸ੍ਸਨਤੋ ਨਿਯਤਮਿਚ੍ਛਾਦਿਟ੍ਠਿਟ੍ਠਾਨਾਭਾਵਦਸ੍ਸਨਤੋ ਚ. ਅਥ ਨੇਸਂ ਕਮ੍ਮਵਿਪਾਕਞਾਣੇਨ ਵਿਪਾਕਾਵਰਣਾਭਾਵਂ ਪਸ੍ਸਤਿ ਤਿਹੇਤੁਕਪ੍ਪਟਿਸਨ੍ਧਿਦਸ੍ਸਨਤੋ, ਸਬ੍ਬਤ੍ਥਗਾਮਿਨਿਪਟਿਪਦਾਞਾਣੇਨ ਕਮ੍ਮਾਵਰਣਾਭਾਵਂ ਪਸ੍ਸਤਿ ਆਨਨ੍ਤਰਿਯਕਮ੍ਮਾਭਾਵਦਸ੍ਸਨਤੋ. ਏਵਮਨਾਵਰਣਾਨਂ ਅਨੇਕਧਾਤੁਨਾਨਾਧਾਤੁਞਾਣੇਨ ਅਨੁਕੂਲਧਮ੍ਮਦੇਸਨਤ੍ਥਂ ਚਰਿਯਾਵਿਸੇਸਂ ਪਸ੍ਸਤਿ ਧਾਤੁਵੇਮਤ੍ਤਦਸ੍ਸਨਤੋ. ਅਥ ਨੇਸਂ ਨਾਨਾਧਿਮੁਤ੍ਤਿਕਤਞਾਣੇਨ ਅਧਿਮੁਤ੍ਤਿਂ ਪਸ੍ਸਤਿ ਪਯੋਗਂ ਅਨਾਦਿਯਿਤ੍ਵਾਪਿ ਅਧਿਮੁਤ੍ਤਿਵਸੇਨ ਧਮ੍ਮਦੇਸਨਤ੍ਥਂ. ਅਥੇਵਂ ਦਿਟ੍ਠਾਧਿਮੁਤ੍ਤੀਨਂ ਯਥਾਸਤ੍ਤਿ ਯਥਾਬਲਂ ਧਮ੍ਮਂ ਦੇਸੇਤੁਂ ਇਨ੍ਦ੍ਰਿਯਪਰੋਪਰਿਯਤ੍ਤਿਞਾਣੇਨ ਇਨ੍ਦ੍ਰਿਯਪਰੋਪਰਿਯਤ੍ਤਂ ਪਸ੍ਸਤਿ ਸਦ੍ਧਾਦੀਨਂ ਤਿਕ੍ਖਮੁਦੁਭਾਵਦਸ੍ਸਨਤੋ. ਏਵਂ ਪਰਿਞ੍ਞਾਤਿਨ੍ਦ੍ਰਿਯਪਰੋਪਰਿਯਤ੍ਤਾ ਪਨ ਤੇ ਸਚੇ ਦੂਰੇ ਹੋਨ੍ਤਿ, ਅਥ ਝਾਨਾਦਿਞਾਣੇਨ ਝਾਨਾਦੀਸੁ ਵਸੀਭੂਤਤ੍ਤਾ ਇਦ੍ਧਿਵਿਸੇਸੇਨ ਤੇ ਖਿਪ੍ਪਂ ਉਪਗਚ੍ਛਤਿ. ਉਪਗਨ੍ਤ੍ਵਾ ਚ ਨੇਸਂ ਪੁਬ੍ਬੇਨਿਵਾਸਾਨੁਸ੍ਸਤਿਞਾਣੇਨ ਪੁਬ੍ਬਜਾਤਿਭਵਂ, ਦਿਬ੍ਬਚਕ੍ਖਾਨੁਭਾਵਤੋ ਪਤ੍ਤਬ੍ਬੇਨ ਚੇਤੋਪਰਿਯਞਾਣੇਨ ਸਮ੍ਪਤਿ ਚਿਤ੍ਤਵਿਸੇਸਂ ਪਸ੍ਸਨ੍ਤੋ ਆਸਵਕ੍ਖਯਞਾਣਾਨੁਭਾਵੇਨ ਆਸਵਕ੍ਖਯਗਾਮਿਨਿਯਾ ਪਟਿਪਦਾਯ ਵਿਗਤਸਮ੍ਮੋਹਤ੍ਤਾ ਆਸਵਕ੍ਖਯਾਯ ਧਮ੍ਮਂ ਦੇਸੇਤਿ. ਤਸ੍ਮਾ ਇਮਿਨਾਨੁਕ੍ਕਮੇਨ ਇਮਾਨਿ ਬਲਾਨਿ ਵੁਤ੍ਤਾਨੀਤਿ ਵੇਦਿਤਬ੍ਬਾਨਿ.
੨. ਅਧਿਵੁਤ੍ਤਿਪਦਸੁਤ੍ਤਵਣ੍ਣਨਾ
੨੨. ਦੁਤਿਯੇ ਯੇ ਤੇ ਧਮ੍ਮਾਤਿ ਯੇ ਤੇ ਦਸਬਲਞਾਣਂ ਸਬ੍ਬਞ੍ਞੁਤਞ੍ਞਾਣਧਮ੍ਮਾ. ਅਧਿਵੁਤ੍ਤਿਪਦਾਨਨ੍ਤਿ ਅਧਿਵਚਨਪਦਾਨਂ, ਖਨ੍ਧਾਯਤਨਧਾਤੁਧਮ੍ਮਾਨਨ੍ਤਿ ਅਤ੍ਥੋ. ਅਧਿਵੁਤ੍ਤਿਯੋਤਿ ਹਿ ਅਧਿਵਚਨਾਨਿ ਵੁਚ੍ਚਨ੍ਤਿ, ਤੇਸਂ ਯੇ ਪਦਭੂਤਾ ਦੇਸਨਾਯ ਪਦਟ੍ਠਾਨਤ੍ਤਾ. ਅਤੀਤਾ ਬੁਦ੍ਧਾਪਿ ਹਿ ਏਤੇ ਧਮ੍ਮੇ ਕਥਯਿਂਸੁ, ਅਨਾਗਤਾਪਿ ਏਤੇਵ ਕਥਯਿਸ੍ਸਨ੍ਤਿ. ਤਸ੍ਮਾ ਖਨ੍ਧਾਦਯੋ ਅਧਿਵੁਤ੍ਤਿਪਦਾਨਿ ਨਾਮ. ਤੇਸਂ ਅਧਿਵੁਤ੍ਤਿਪਦਾਨਂ. ਅਥ ਵਾ ਭੂਤਮਤ੍ਥਂ ਅਭਿਭਵਿਤ੍ਵਾ ਯਥਾਸਭਾਵਤੋ ਅਗ੍ਗਹੇਤ੍ਵਾ ਵਤ੍ਤਨਤੋ ਅਧਿਵੁਤ੍ਤਿਯੋਤਿ ਦਿਟ੍ਠਿਯੋ ਵੁਚ੍ਚਨ੍ਤਿ, ਅਧਿਵੁਤ੍ਤੀਨਂ ਪਦਾਨਿ ਅਧਿਵੁਤ੍ਤਿਪਦਾਨਿ, ਦਿਟ੍ਠਿਦੀਪਕਾਨਿ ਵਚਨਾਨੀਤਿ ਅਤ੍ਥੋ. ਤੇਸਂ ਅਧਿਵੁਤ੍ਤਿਪਦਾਨਂ ਦਿਟ੍ਠਿਵੋਹਾਰਾਨਂ. ਅਭਿਞ੍ਞਾ ਸਚ੍ਛਿਕਿਰਿਯਾਯਾਤਿ ਜਾਨਿਤ੍ਵਾ ਪਚ੍ਚਕ੍ਖਕਰਣਤ੍ਥਾਯ. ਵਿਸਾਰਦੋਤਿ ਞਾਣਸੋਮਨਸ੍ਸਪ੍ਪਤ੍ਤੋ. ਤਤ੍ਥਾਤਿ ਤੇਸੁ ਧਮ੍ਮੇਸੁ ਤੇਸਂ ਤੇਸਂ ਤਥਾ ਤਥਾ ਧਮ੍ਮਂ ਦੇਸੇਤੁਨ੍ਤਿ ਤੇਸਂ ਤੇਸਂ ਦਿਟ੍ਠਿਗਤਿਕਾਨਂ ਵਾ ਇਤਰੇਸਂ ਵਾ ਆਸਯਂ ਞਤ੍ਵਾ ਤਥਾ ਤਥਾ ਧਮ੍ਮਂ ਦੇਸੇਤੁਂ. ਹੀਨਂ ਵਾ ਹੀਨਨ੍ਤਿ ਞਸ੍ਸਤੀਤਿ ਹੀਨਂ ਵਾ ਧਮ੍ਮਂ ‘‘ਹੀਨੋ ਧਮ੍ਮੋ’’ਤਿ ਜਾਨਿਸ੍ਸਤਿ. ਞਾਤੇਯ੍ਯਨ੍ਤਿ ਞਾਤਬ੍ਬਂ. ਦਟ੍ਠੇਯ੍ਯਨ੍ਤਿ ਦਟ੍ਠਬ੍ਬਂ. ਸਚ੍ਛਿਕਰੇਯ੍ਯਨ੍ਤਿ ਸਚ੍ਛਿਕਾਤਬ੍ਬਂ. ਤਤ੍ਥ ਤਤ੍ਥ ਯਥਾਭੂਤਞਾਣਨ੍ਤਿ ਤੇਸੁ ਤੇਸੁ ਧਮ੍ਮੇਸੁ ਯਥਾਸਭਾਵਞਾਣਂ. ਇਮਿਨਾ ਸਬ੍ਬਞ੍ਞੁਤਞ੍ਞਾਣਂ ਦਸ੍ਸੇਤਿ. ਏਵਂ ਸਬ੍ਬਞ੍ਞੁਤਞ੍ਞਾਣਂ ਦਸ੍ਸੇਤ੍ਵਾ ਪੁਨ ਦਸਬਲਞਾਣਂ ਦਸ੍ਸੇਨ੍ਤੋ ਦਸਯਿਮਾਨੀਤਿਆਦਿਮਾਹ. ਦਸਬਲਞਾਣਮ੍ਪਿ ਹਿ ਤਤ੍ਥ ਤਤ੍ਥ ਯਥਾਭੂਤਞਾਣਮੇਵਾਤਿ.
੩. ਕਾਯਸੁਤ੍ਤਵਣ੍ਣਨਾ
੨੩. ਤਤਿਯੇ ਆਪਨ੍ਨੋ ਹੋਤਿ ਕਞ੍ਚਿਦੇਵ ਦੇਸਨ੍ਤਿ ਕਞ੍ਚਿ ਆਪਤ੍ਤਿਕੋਟ੍ਠਾਸਂ ਆਪਨ੍ਨੋ ਹੋਤਿ. ਅਨੁਵਿਚ੍ਚਾਤਿ ਅਨੁਪਵਿਸਿਤ੍ਵਾ ਪਰਿਯੋਗਾਹੇਤ੍ਵਾ. ਕਾਯਦੁਚ੍ਚਰਿਤਨ੍ਤਿ ਤਿਵਿਧਂ ਕਾਯਦੁਚ੍ਚਰਿਤਂ. ਵਚੀਦੁਚ੍ਚਰਿਤਨ੍ਤਿ ਚਤੁਬ੍ਬਿਧਂ ਵਚੀਦੁਚ੍ਚਰਿਤਂ. ਪਾਪਿਕਾ ਇਸ੍ਸਾਤਿ ਲਾਮਿਕਾ ਉਸੂਯਾ. ਪਞ੍ਞਾਯ ਦਿਸ੍ਵਾਤਿ ਸਹਵਿਪਸ੍ਸਨਾਯ ਮਗ੍ਗਪਞ੍ਞਾਯ ਪਸ੍ਸਿਤ੍ਵਾ ਪਸ੍ਸਿਤ੍ਵਾ ਪਹਾਤਬ੍ਬਾ. ਇਜ੍ਝਤੀਤਿ ਸਮਿਜ੍ਝਤਿ. ਉਪਵਾਸਸ੍ਸਾਤਿ ਨਿਸ੍ਸਾਯ ਉਪਸਙ੍ਕਮਿਤ੍ਵਾ ਵਸਨ੍ਤਸ੍ਸ. ਅਭਿਭੁਯ੍ਯਾਤਿ ਅਜ੍ਝੋਤ੍ਥਰਿਤ੍ਵਾ ਮਦ੍ਦਿਤ੍ਵਾ. ਇਰੀਯਤੀਤਿ ਵਤ੍ਤਤਿ. ਇਮਸ੍ਮਿਂ ਸੁਤ੍ਤੇ ਸਹਵਿਪਸ੍ਸਨਾਯ ਮਗ੍ਗੋ ਕਥਿਤੋ.
੪. ਮਹਾਚੁਨ੍ਦਸੁਤ੍ਤਵਣ੍ਣਨਾ
੨੪. ਚਤੁਤ੍ਥੇ ਜਾਨਾਮਿਮਂ ਧਮ੍ਮਨ੍ਤਿ ਇਮਿਨਾ ਞਾਣਵਾਦਸ੍ਸ ਵਦਨਾਕਾਰੋ ਵੁਤ੍ਤੋ. ਭਾਵਿਤਕਾਯੋਮ੍ਹੀਤਿਆਦੀਹਿ ਭਾਵਨਾਵਾਦਸ੍ਸ. ਤਤਿਯਵਾਰੇ ਦ੍ਵੇਪਿ ਵਾਦਾ ਏਕਤੋ ਵੁਤ੍ਤਾ, ਤਯੋਪਿ ਚੇਤੇ ਅਰਹਤ੍ਤਮੇਵ ਪਟਿਜਾਨਨ੍ਤਿ. ਅਡ੍ਢਵਾਦਂ ਵਦੇਯ੍ਯਾਤਿ ਅਡ੍ਢੋਹਮਸ੍ਮੀਤਿ ਵਾਦਂ ਵਦੇਯ੍ਯ. ਉਪਨੀਹਾਤੁਨ੍ਤਿ ਨੀਹਰਿਤ੍ਵਾ ਦਾਤੁਂ.
੫. ਕਸਿਣਸੁਤ੍ਤਵਣ੍ਣਨਾ
੨੫. ਪਞ੍ਚਮੇ ਸਕਲਟ੍ਠੇਨ ਕਸਿਣਾਨਿ, ਤਦਾਰਮ੍ਮਣਾਨਂ ਧਮ੍ਮਾਨਂ ਖੇਤ੍ਤਟ੍ਠੇਨ ਅਧਿਟ੍ਠਾਨਟ੍ਠੇਨ ਵਾ ਆਯਤਨਾਨੀਤਿ ਕਸਿਣਾਯਤਨਾਨਿ. ਉਦ੍ਧਨ੍ਤਿ ਉਪਰਿ ਗਗਣਤਲਾਭਿਮੁਖਂ. ਅਧੋਤਿ ਹੇਟ੍ਠਾ ਭੂਮਿਤਲਾਭਿਮੁਖਂ. ਤਿਰਿਯਨ੍ਤਿ ਖੇਤ੍ਤਮਣ੍ਡਲਂ ਵਿਯ ਸਮਨ੍ਤਾ ਪਰਿਚ੍ਛਿਨ੍ਦਿਤ੍ਵਾ. ਏਕਚ੍ਚੋ ਹਿ ਉਦ੍ਧਮੇਵ ਕਸਿਣਂ ਵਡ੍ਢੇਤਿ, ਏਕਚ੍ਚੋ ਅਧੋ, ਏਕਚ੍ਚੋ ਸਮਨ੍ਤਤੋ. ਤੇਨ ਤੇਨ ਵਾ ਕਾਰਣੇਨ ਏਵਂ ਪਸਾਰੇਤਿ ਆਲੋਕਮਿਵ ਰੂਪਦਸ੍ਸਨਕਾਮੋ. ਤੇਨ ਵੁਤ੍ਤਂ – ‘‘ਪਥਵੀਕਸਿਣਮੇਕੋ ਸਞ੍ਜਾਨਾਤਿ ਉਦ੍ਧਂ ਅਧੋ ਤਿਰਿਯ’’ਨ੍ਤਿ. ਅਦ੍ਵਯਨ੍ਤਿ ਇਦਂ ਪਨ ਏਕਸ੍ਸ ਅਞ੍ਞਭਾਵਾਨੁਪਗਮਨਤ੍ਥਂ ਵੁਤ੍ਤਂ. ਯਥਾ ਹਿ ਉਦਕਂ ਪਵਿਟ੍ਠਸ੍ਸ ਸਬ੍ਬਦਿਸਾਸੁ ਉਦਕਮੇਵ ਹੋਤਿ ਨ ਅਞ੍ਞਂ, ਏਵਮੇਵ ਪਥਵੀਕਸਿਣਂ ਪਥਵੀਕਸਿਣਮੇਵ ਹੋਤਿ. ਨਤ੍ਥਿ ਤਸ੍ਸ ਅਞ੍ਞਕਸਿਣਸਮ੍ਭੇਦੋਤਿ. ਏਸੇਵ ਨਯੋ ਸਬ੍ਬਤ੍ਥ. ਅਪ੍ਪਮਾਣਨ੍ਤਿ ਇਦਂ ਤਸ੍ਸ ਤਸ੍ਸ ਫਰਣਅਪ੍ਪਮਾਣਵਸੇਨ ਵੁਤ੍ਤਂ. ਤਞ੍ਹਿ ਚੇਤਸਾ ਫਰਨ੍ਤੋ ਸਕਲਮੇਵ ਫਰਤਿ, ‘‘ਅਯਮਸ੍ਸ ਆਦਿ, ਇਦਂ ਮਜ੍ਝ’’ਨ੍ਤਿ ਪਮਾਣਂ ਨ ਗਣ੍ਹਾਤਿ. ਵਿਞ੍ਞਾਣਕਸਿਣਨ੍ਤਿ ਚੇਤ੍ਥ ਕਸਿਣੁਗ੍ਘਾਟਿਮਾਕਾਸੇ ਪਵਤ੍ਤਵਿਞ੍ਞਾਣਂ. ਤਤ੍ਥ ਕਸਿਣਵਸੇਨ ਕਸਿਣੁਗ੍ਘਾਟਿਮਾਕਾਸੇ, ਕਸਿਣੁਗ੍ਘਾਟਿਮਾਕਾਸਵਸੇਨ ਤਤ੍ਥ ਪਵਤ੍ਤਵਿਞ੍ਞਾਣੇ ਉਦ੍ਧਂਅਧੋਤਿਰਿਯਤਾ ਵੇਦਿਤਬ੍ਬਾ. ਅਯਮੇਤ੍ਥ ਸਙ੍ਖੇਪੋ, ਕਮ੍ਮਟ੍ਠਾਨਭਾਵਨਾਨਯੇਨ ਪਨੇਤਾਨਿ ਪਥਵੀਕਸਿਣਾਦੀਨਿ ਵਿਤ੍ਥਾਰਤੋ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੫੧ ਆਦਯੋ) ਵੁਤ੍ਤਾਨੇਵ.
੬. ਕਾਲ਼ੀਸੁਤ੍ਤਵਣ੍ਣਨਾ
੨੬. ਛਟ੍ਠੇ ਕੁਮਾਰਿਪਞ੍ਹੇਸੂਤਿ ਕੁਮਾਰੀਨਂ ਮਾਰਧੀਤਾਨਂ ਪੁਚ੍ਛਾਸੁ. ਅਤ੍ਥਸ੍ਸ ਪਤ੍ਤਿਂ ਹਦਯਸ੍ਸ ਸਨ੍ਤਿਨ੍ਤਿ ਦ੍ਵੀਹਿਪਿ ਪਦੇਹਿ ਅਰਹਤ੍ਤਮੇਵ ਕਥਿਤਂ. ਸੇਨਨ੍ਤਿ ਰਾਗਾਦਿਕਿਲੇਸਸੇਨਂ. ਪਿਯਸਾਤਰੂਪਨ੍ਤਿ ਪਿਯਜਾਤਿਕੇਸੁ ਚ ਸਾਤਜਾਤਿਕੇਸੁ ਚ ਵਤ੍ਥੂਸੁ ਉਪ੍ਪਜ੍ਜਨਤੋ ਏਵਂਲਦ੍ਧਨਾਮਂ. ਏਕੋਹਂ ਝਾਯਂ ਸੁਖਮਨੁਬੋਧਿਨ੍ਤਿ ਏਵਂ ਕਿਲੇਸਸੇਨਂ ਜਿਨਿਤ੍ਵਾ ਅਹਂ ਏਕਕੋਵ ਝਾਯਨ੍ਤੋ ਸੁਖਂ ਅਨੁਬੁਜ੍ਝਿਂ ਸਚ੍ਛਿਅਕਾਸਿਂ. ਸਕ੍ਖਿਨ੍ਤਿ ਸਕ੍ਖਿਭਾਵਪ੍ਪਤ੍ਤਂ ਧਮ੍ਮਸਕ੍ਖਿਂ. ਨ ਸਮ੍ਪਜ੍ਜਤਿ ਕੇਨਚਿ ਮੇਤਿ ਮਯ੍ਹਂ ਕੇਨਚਿ ਸਦ੍ਧਿਂ ਮਿਤ੍ਤਧਮ੍ਮੋ ਨਾਮ ਨਤ੍ਥਿ. ਪਥਵੀਕਸਿਣਸਮਾਪਤ੍ਤਿਪਰਮਾ ਖੋ, ਭਗਿਨਿ, ਏਕੇ ਸਮਣਬ੍ਰਾਹ੍ਮਣਾ ਅਤ੍ਥੋਤਿ ਅਭਿਨਿਬ੍ਬਤ੍ਤੇਸੁਨ੍ਤਿ ਪਥਵੀਕਸਿਣਸਮਾਪਤ੍ਤਿਪਰਮੋ ਉਤ੍ਤਮੋ ਅਤ੍ਥੋਤਿ ਗਹੇਤ੍ਵਾ ਅਭਿਨਿਬ੍ਬਤ੍ਤੇਸੁਂ. ਯਾਵਤਾ ਖੋ, ਭਗਿਨਿ, ਪਥਵੀਕਸਿਣਸਮਾਪਤ੍ਤਿਪਰਮਤਾਤਿ ਯਤ੍ਤਕਾ ਪਥਵੀਕਸਿਣਸਮਾਪਤ੍ਤਿਯਾ ਉਤ੍ਤਮਕੋਟਿ. ਤਦਭਿਞ੍ਞਾਸਿ ਭਗਵਾਤਿ ਤਂ ਭਗਵਾ ਅਭਿਞ੍ਞਾਪਞ੍ਞਾਯ ਅਭਿਞ੍ਞਾਸਿ. ਅਸ੍ਸਾਦਮਦ੍ਦਸਾਤਿ ਸਮੁਦਯਸਚ੍ਚਂ ਅਦ੍ਦਸ. ਆਦੀਨਵਮਦ੍ਦਸਾਤਿ ਦੁਕ੍ਖਸਚ੍ਚਂ ਅਦ੍ਦਸ. ਨਿਸ੍ਸਰਣਮਦ੍ਦਸਾਤਿ ਨਿਰੋਧਸਚ੍ਚਂ ਅਦ੍ਦਸ. ਮਗ੍ਗਾਮਗ੍ਗਞਾਣਦਸ੍ਸਨਮਦ੍ਦਸਾਤਿ ਮਗ੍ਗਸਚ੍ਚਂ ਅਦ੍ਦਸ. ਅਤ੍ਥਸ੍ਸ ਪਤ੍ਤੀਤਿ ਏਤੇਸਂ ਚਤੁਨ੍ਨਂ ਸਚ੍ਚਾਨਂ ਦਿਟ੍ਠਤ੍ਤਾ ਅਰਹਤ੍ਤਸਙ੍ਖਾਤਸ੍ਸ ਅਤ੍ਥਸ੍ਸ ਪਤ੍ਤਿ, ਸਬ੍ਬਦਰਥਪਰਿਲ਼ਾਹਵੂਪਸਨ੍ਤਤਾਯ ਹਦਯਸ੍ਸ ਸਨ੍ਤੀਤਿ.
੭. ਪਠਮਮਹਾਪਞ੍ਹਸੁਤ੍ਤਵਣ੍ਣਨਾ
੨੭. ਸਤ੍ਤਮੇ ਅਭਿਜਾਨਾਥਾਤਿ ਅਭਿਜਾਨਿਤ੍ਵਾ ਪਚ੍ਚਕ੍ਖਂ ਕਤ੍ਵਾ ਵਿਹਰਥ. ਅਭਿਞ੍ਞਾਯਾਤਿ ਅਭਿਜਾਨਿਤ੍ਵਾ. ਇਧਾਤਿ ਇਮਾਯ. ਧਮ੍ਮਦੇਸਨਾਯ ਵਾ ਧਮ੍ਮਦੇਸਨਨ੍ਤਿ ਯਦਿਦਂ ਸਮਣਸ੍ਸ ਗੋਤਮਸ੍ਸ ਧਮ੍ਮਦੇਸਨਾਯ ਸਦ੍ਧਿਂ ਅਮ੍ਹਾਕਂ ਧਮ੍ਮਦੇਸਨਂ, ਅਮ੍ਹਾਕਂ ਵਾ ਧਮ੍ਮਦੇਸਨਾਯ ਸਦ੍ਧਿਂ ਸਮਣਸ੍ਸ ਗੋਤਮਸ੍ਸ ਧਮ੍ਮਦੇਸਨਂ ਆਰਬ੍ਭ ਨਾਨਾਕਰਣਂ ਵੁਚ੍ਚੇਥ, ਤਂ ਕਿਂ ਨਾਮਾਤਿ ਵਦਨ੍ਤਿ. ਦੁਤਿਯਪਦੇਪਿ ਏਸੇਵ ਨਯੋ. ਇਤਿ ਤੇ ਮਜ੍ਝੇ ਭਿਨ੍ਨਸੁਵਣ੍ਣਂ ਵਿਯ ਸਾਸਨੇਨ ਸਦ੍ਧਿਂ ਅਤ੍ਤਨੋ ਲਦ੍ਧਿਂ ਵਚਨਮਤ੍ਤੇਨ ਸਮਧੁਰਂ ਠਪਯਿਂਸੁ. ਨੇਵ ਅਭਿਨਨ੍ਦਿਂਸੂਤਿ ‘‘ਏਵਮੇਤ’’ਨ੍ਤਿ ਨ ਸਮ੍ਪਟਿਚ੍ਛਿਂਸੁ. ਨਪ੍ਪਟਿਕ੍ਕੋਸਿਂਸੂਤਿ ‘‘ਨ ਇਦਂ ਏਵ’’ਨ੍ਤਿ ਨਪ੍ਪਟਿਸੇਧੇਸੁਂ. ਕਸ੍ਮਾ? ਤੇ ਕਿਰ ‘‘ਤਿਤ੍ਥਿਯਾ ਨਾਮ ਅਨ੍ਧਸਦਿਸਾ ਜਾਨਿਤ੍ਵਾ ਵਾ ਅਜਾਨਿਤ੍ਵਾ ਵਾ ਕਥੇਯ੍ਯੁ’’ਨ੍ਤਿ ਨਾਭਿਨਨ੍ਦਿਂਸੁ.
ਨ ਸਮ੍ਪਾਯਿਸ੍ਸਨ੍ਤੀਤਿ ਸਮ੍ਪਾਦੇਤ੍ਵਾ ਕਥੇਤੁਂ ਨ ਸਕ੍ਖਿਸ੍ਸਨ੍ਤਿ. ਉਤ੍ਤਰਿ ਚ ਵਿਘਾਤਨ੍ਤਿ ਅਸਮ੍ਪਾਦਨਤੋ ਉਤ੍ਤਰਿਮ੍ਪਿ ਦੁਕ੍ਖਂ ਆਪਜ੍ਜਿਸ੍ਸਨ੍ਤਿ. ਸਮ੍ਪਾਦੇਤ੍ਵਾ ਕਥੇਤੁਂ ਅਸਕ੍ਕੋਨ੍ਤਾਨਞ੍ਹਿ ਦੁਕ੍ਖਂ ਉਪ੍ਪਜ੍ਜਤਿ. ਯਥਾ ਤਂ, ਭਿਕ੍ਖਵੇ, ਅਵਿਸਯਸ੍ਮਿਨ੍ਤਿ ਏਤ੍ਥ ਚ ਤਨ੍ਤਿ ਨਿਪਾਤਮਤ੍ਤਂ. ਯਥਾਤਿ ਕਾਰਣਵਚਨਂ, ਯਸ੍ਮਾ ਅਵਿਸਯੇ ਪਞ੍ਹਂ ਪੁਚ੍ਛਿਤਾ ਹੋਨ੍ਤੀਤਿ ਅਤ੍ਥੋ. ਇਤੋ ਵਾ ਪਨ ਸੁਤ੍ਵਾਤਿ ਇਤੋ ਵਾ ਪਨ ਮਮ ਸਾਸਨਤੋ ਸੁਤ੍ਵਾ. ਇਤੋਤਿ ਤਥਾਗਤਤੋਪਿ ਤਥਾਗਤਸਾਵਕਤੋਪਿ. ਆਰਾਧੇਯ੍ਯਾਤਿ ਪਰਿਤੋਸੇਯ੍ਯ, ਅਞ੍ਞਥਾ ਆਰਾਧਨਂ ਨਾਮ ਨਤ੍ਥੀਤਿ ਦਸ੍ਸੇਤਿ.
ਏਕਧਮ੍ਮੇਤਿ ਏਕਸ੍ਮਿਂ ਧਮ੍ਮੇ. ਇਮਿਨਾ ਉਦ੍ਦੇਸੋ ਦਸ੍ਸਿਤੋ. ਪਰਤੋ ਕਤਮਸ੍ਮਿਂ ਏਕਧਮ੍ਮੇਤਿ ਇਮਿਨਾ ਪਞ੍ਹੋ ਦਸ੍ਸਿਤੋ. ਸਬ੍ਬੇ ਸਤ੍ਤਾ ਆਹਾਰਟ੍ਠਿਤਿਕਾਤਿ ਇਦਂ ਪਨੇਤ੍ਥ ਵੇਯ੍ਯਾਕਰਣਂ. ਸੇਸੇਸੁਪਿ ਏਸੇਵ ਨਯੋ. ਸਮ੍ਮਾ ਨਿਬ੍ਬਿਨ੍ਦਮਾਨੋਤਿਆਦੀਸੁ ਪਨ ਸਮ੍ਮਾ ਹੇਤੁਨਾ ਨਯੇਨ ਨਿਬ੍ਬਿਦਾਨੁਪਸ੍ਸਨਾਯ ਨਿਬ੍ਬਿਨ੍ਦਨ੍ਤੋ ਉਕ੍ਕਣ੍ਠਨ੍ਤੋ, ਵਿਰਾਗਾਨੁਪਸ੍ਸਨਾਯ ਵਿਰਜ੍ਜਨ੍ਤੋ, ਪਟਿਸਙ੍ਖਾਨੁਪਸ੍ਸਨਾਯ ਮੁਚ੍ਚਨਸ੍ਸ ਉਪਾਯਂ ਕਤ੍ਵਾ ਵਿਮੁਚ੍ਚਮਾਨੋ, ਅਧਿਮੋਕ੍ਖਵਸੇਨ ਵਾ ਵਿਮੁਚ੍ਚਮਾਨੋ ਸਨ੍ਨਿਟ੍ਠਾਨਂ ਕੁਰੁਮਾਨੋਤਿ ਅਤ੍ਥੋ. ਉਦਯਬ੍ਬਯੇਹਿ ਪਰਿਚ੍ਛਿਨ੍ਦਿਤ੍ਵਾ ਪੁਬ੍ਬਨ੍ਤਾਪਰਨ੍ਤਦਸ੍ਸਨੇਨ ਸਮ੍ਮਾ ਪਰਿਯਨ੍ਤਦਸ੍ਸਾਵੀ. ਸਮ੍ਮਦਤ੍ਥਂ ਅਭਿਸਮੇਚ੍ਚਾਤਿ ਸਮ੍ਮਾ ਸਭਾਗਤ੍ਥਂ ਞਾਣੇਨ ਅਭਿਸਮਾਗਨ੍ਤ੍ਵਾ. ਦੁਕ੍ਖਸ੍ਸਨ੍ਤਕਰੋ ਹੋਤੀਤਿ ਸਕਲਵਟ੍ਟਦੁਕ੍ਖਸ੍ਸ ਪਰਿਯਨ੍ਤਂ ਪਰਿਵਟੁਮਂ ਕਰੋ ਹੋਤਿ.
ਸਬ੍ਬੇ ਸਤ੍ਤਾਤਿ ਕਾਮਭਵਾਦੀਸੁ ਏਕਵੋਕਾਰਭਵਾਦੀਸੁ ਚ ਸਬ੍ਬਭਵੇਸੁ ਸਬ੍ਬੇ ਸਤ੍ਤਾ. ਆਹਾਰਟ੍ਠਿਤਿਕਾਤਿ ਆਹਾਰਤੋ ਠਿਤਿ ਏਤੇਸਨ੍ਤਿ ਆਹਾਰਟ੍ਠਿਤਿਕਾ. ਇਤਿ ਸਬ੍ਬਸਤ੍ਤਾਨਮ੍ਪਿ ਠਿਤਿਹੇਤੁ ਆਹਾਰੋ ਨਾਮ ਏਕੋ ਧਮ੍ਮੋ, ਤਸ੍ਮਿਂ ਏਕਧਮ੍ਮੇ. ਨਨੁ ਚ ਏਵਂ ਸਨ੍ਤੇ ਯਂ ਵੁਤ੍ਤਂ – ‘‘ਅਸਞ੍ਞਸਤ੍ਤਾ ਦੇਵਾ ਅਹੇਤੁਕਾ ਅਨਾਹਾਰਾ ਅਫਸ੍ਸਕਾ’’ਤਿਆਦਿ (ਵਿਭ. ੧੦੧੭), ਤਂ ਵਿਰੁਜ੍ਝਤੀਤਿ. ਨ ਵਿਰੁਜ੍ਝਤਿ. ਤੇਸਞ੍ਹਿ ਝਾਨਂ ਆਹਾਰੋ ਹੋਤਿ. ਏਵਂ ਸਨ੍ਤੇਪਿ ‘‘ਚਤ੍ਤਾਰੋਮੇ, ਭਿਕ੍ਖਵੇ, ਆਹਾਰਾ’’ਤਿ (ਸਂ. ਨਿ. ੨.੧੧) ਇਦਂ ਵਿਰੁਜ੍ਝਤੀਤਿ. ਇਦਮ੍ਪਿ ਨ ਵਿਰੁਜ੍ਝਤਿ. ਏਤਸ੍ਮਿਞ੍ਹਿ ਸੁਤ੍ਤੇ ਨਿਪ੍ਪਰਿਯਾਯੇਨ ਆਹਾਰਲਕ੍ਖਣਾ ਧਮ੍ਮਾ ਆਹਾਰਾਤਿ ਵੁਤ੍ਤਾ, ਇਧ ਪਨ ਪਰਿਯਾਯੇਨ ਪਚ੍ਚਯੋ ਆਹਾਰੋਤਿ ਵੁਤ੍ਤੋ. ਸਬ੍ਬਧਮ੍ਮਾਨਞ੍ਹਿ ਪਚ੍ਚਯੋ ਲਦ੍ਧੁਂ ਵਟ੍ਟਤਿ. ਸੋ ਚ ਯਂ ਯਂ ਫਲਂ ਜਨੇਤਿ, ਤਂ ਤਂ ਆਹਰਤਿ ਨਾਮ. ਤਸ੍ਮਾ ਆਹਾਰੋਤਿ ਵੁਚ੍ਚਤਿ. ਤੇਨੇਵਾਹ – ‘‘ਅਵਿਜ੍ਜਮ੍ਪਾਹਂ, ਭਿਕ੍ਖਵੇ, ਸਾਹਾਰਂ ਵਦਾਮਿ, ਨੋ ਅਨਾਹਾਰਂ. ਕੋ ਚ, ਭਿਕ੍ਖਵੇ, ਅਵਿਜ੍ਜਾਯ ਆਹਾਰੋ? ਪਞ੍ਚ ਨੀਵਰਣਾਤਿਸ੍ਸ ਵਚਨੀਯ’’ਨ੍ਤਿ (ਅ. ਨਿ. ੧੦.੬੧). ਅਯਂ ਇਧ ਅਧਿਪ੍ਪੇਤੋ. ਏਤਸ੍ਮਿਞ੍ਹਿ ਪਚ੍ਚਯਾਹਾਰੇ ਗਹਿਤੇ ਪਰਿਯਾਯਾਹਾਰੋਪਿ ਨਿਪ੍ਪਰਿਯਾਯਾਹਾਰੋਪਿ ਸਬ੍ਬੋ ਗਹਿਤੋਵ ਹੋਤਿ.
ਤਤ੍ਥ ਅਸਞ੍ਞੀਭਵੇ ਪਚ੍ਚਯਾਹਾਰੋ ਲਬ੍ਭਤਿ. ਅਨੁਪ੍ਪਨ੍ਨੇ ਹਿ ਬੁਦ੍ਧੇ ਤਿਤ੍ਥਾਯਤਨੇ ਪਬ੍ਬਜਿਤਾ ਵਾਯੋਕਸਿਣੇ ਪਰਿਕਮ੍ਮਂ ਕਤ੍ਵਾ ਚਤੁਤ੍ਥਜ੍ਝਾਨਂ ਨਿਬ੍ਬਤ੍ਤੇਤ੍ਵਾ ਤਤੋ ਵੁਟ੍ਠਾਯ ‘‘ਧਿ ਚਿਤ੍ਤਂ, ਧਿ ਵਤੇਤਂ ਚਿਤ੍ਤਂ, ਚਿਤ੍ਤਸ੍ਸ ਨਾਮ ਅਭਾਵੋਯੇਵ ਸਾਧੁ. ਚਿਤ੍ਤਞ੍ਹਿ ਨਿਸ੍ਸਾਯ ਵਧਬਨ੍ਧਾਦਿਪਚ੍ਚਯਂ ਦੁਕ੍ਖਂ ਉਪ੍ਪਜ੍ਜਤਿ. ਚਿਤ੍ਤੇ ਅਸਤਿ ਨਤ੍ਥੇਤ’’ਨ੍ਤਿ ਖਨ੍ਤਿਂ ਰੁਚਿਂ ਉਪ੍ਪਾਦੇਤ੍ਵਾ ਅਪਰਿਹੀਨਜ੍ਝਾਨਾ ਕਾਲਂ ਕਤ੍ਵਾ ਅਸਞ੍ਞੀਭਵੇ ਨਿਬ੍ਬਤ੍ਤਨ੍ਤਿ. ਯੋ ਯਸ੍ਸ ਇਰਿਯਾਪਥੋ ਮਨੁਸ੍ਸਲੋਕੇ ਪਣਿਹਿਤੋ ਅਹੋਸਿ, ਸੋ ਤੇਨ ਇਰਿਯਾਪਥੇਨ ਨਿਬ੍ਬਤ੍ਤਿਤ੍ਵਾ ਚਿਤ੍ਤਰੂਪਸਦਿਸੋ ਹੁਤ੍ਵਾ ਪਞ੍ਚ ਕਪ੍ਪਸਤਾਨਿ ਤਿਟ੍ਠਤਿ. ਏਤ੍ਤਕਂ ਅਦ੍ਧਾਨਂ ਸਯਿਤੋ ਵਿਯ ਹੋਤਿ. ਏਵਰੂਪਾਨਮ੍ਪਿ ਸਤ੍ਤਾਨਂ ਪਚ੍ਚਯਾਹਾਰੋ ਲਬ੍ਭਤਿ. ਤੇ ਹਿ ਯਂ ਝਾਨਂ ਭਾਵੇਤ੍ਵਾ ਨਿਬ੍ਬਤ੍ਤਾ, ਤਦੇਵ ਨੇਸਂ ਪਚ੍ਚਯੋ ਹੋਤਿ. ਯਥਾ ਜਿਯਾਵੇਗੇਨ ਖਿਤ੍ਤਸਰੋ ਯਾਵ ਜਿਯਾਵੇਗੋ ਅਤ੍ਥਿ, ਤਾਵ ਗਚ੍ਛਤਿ. ਏਵਂ ਯਾਵ ਝਾਨਪਚ੍ਚਯੋ ਅਤ੍ਥਿ, ਤਾਵ ਤਿਟ੍ਠਨ੍ਤਿ. ਤਸ੍ਮਿਂ ਨਿਟ੍ਠਿਤੇ ਖੀਣਵੇਗੋ ਵਿਯ ਸਰੋ ਪਤਨ੍ਤਿ. ਚਵਨਕਾਲੇ ਚ ਤੇਸਂ ਸੋ ਰੂਪਕਾਯੋ ਅਨ੍ਤਰਧਾਯਤਿ, ਕਾਮਾਵਚਰਸਞ੍ਞਾ ਉਪ੍ਪਜ੍ਜਤਿ, ਤੇਨ ਸਞ੍ਞੁਪ੍ਪਾਦੇਨ ਤੇ ਦੇਵਾ ਤਮ੍ਹਾ ਕਾਯਾ ਚੁਤਾਤਿ ਪਞ੍ਞਾਯਨ੍ਤਿ.
ਯੇ ਪਨ ਤੇ ਨੇਰਯਿਕਾ ਨੇਵ ਵੁਟ੍ਠਾਨਫਲੂਪਜੀਵੀ, ਨ ਪੁਞ੍ਞਫਲੂਪਜੀਵੀਤਿ ਵੁਤ੍ਤਾ, ਤੇਸਂ ਕੋ ਆਹਾਰੋਤਿ? ਤੇਸਂ ਕਮ੍ਮਮੇਵ ਆਹਾਰੋ. ਕਿਂ ਪਞ੍ਚ ਆਹਾਰਾ ਅਤ੍ਥੀਤਿ? ਪਞ੍ਚ, ਨ ਪਞ੍ਚਾਤਿ ਇਦਂ ਨ ਵਤ੍ਤਬ੍ਬਂ, ਨਨੁ ‘‘ਪਚ੍ਚਯੋ ਆਹਾਰੋ’’ਤਿ ਵੁਤ੍ਤਮੇਤਂ. ਤਸ੍ਮਾ ਯੇਨ ਕਮ੍ਮੇਨ ਨਿਰਯੇ ਨਿਬ੍ਬਤ੍ਤਨ੍ਤਿ, ਤਦੇਵ ਤੇਸਂ ਠਿਤਿਪਚ੍ਚਯਤ੍ਤਾ ਆਹਾਰੋ ਹੋਤਿ. ਯਂ ਸਨ੍ਧਾਯ ਇਦਂ ਵੁਤ੍ਤਂ – ‘‘ਨ ਚ ਤਾਵ ਕਾਲਂ ਕਰੋਤਿ, ਯਾਵ ਨ ਤਂ ਪਾਪਕਮ੍ਮਂ ਬ੍ਯਨ੍ਤੀ ਹੋਤੀ’’ਤਿ (ਮ. ਨਿ. ੩.੨੫੦, ੨੬੮; ਅ. ਨਿ. ੩.੩੬).
ਕਬਲ਼ੀਕਾਰਾਹਾਰਂ ਆਰਬ੍ਭਾਪਿ ਚੇਤ੍ਥ ਵਿਵਾਦੋ ਨ ਕਾਤਬ੍ਬੋ. ਮੁਖੇ ਉਪ੍ਪਜ੍ਜਨਖੇਲ਼ੋਪਿ ਹਿ ਤੇਸਂ ਆਹਾਰਕਿਚ੍ਚਂ ਸਾਧੇਤਿ. ਖੇਲ਼ੋ ਹਿ ਨਿਰਯੇ ਦੁਕ੍ਖਵੇਦਨੀਯੋ ਹੁਤ੍ਵਾ ਪਚ੍ਚਯੋ ਹੋਤਿ, ਸਗ੍ਗੇ ਸੁਖਵੇਦਨਿਯੋ. ਇਤਿ ਕਾਮਭਵੇ ਨਿਪ੍ਪਰਿਯਾਯੇਨ ਚਤ੍ਤਾਰੋ ਆਹਾਰਾ, ਰੂਪਾਰੂਪਭਵੇਸੁ ਠਪੇਤ੍ਵਾ ਅਸਞ੍ਞੇ ਸੇਸਾਨਂ ਤਯੋ, ਅਸਞ੍ਞਾਨਞ੍ਚੇਵ ਅਵਸੇਸਾਨਞ੍ਚ ਪਚ੍ਚਯਾਹਾਰੋਤਿ ਇਮਿਨਾ ਆਕਾਰੇਨ ਸਬ੍ਬੇ ਸਤ੍ਤਾ ਆਹਾਰਟ੍ਠਿਤਿਕਾਤਿ ਵੇਦਿਤਬ੍ਬਾ. ਤਤ੍ਥ ਚਤ੍ਤਾਰੋ ਆਹਾਰੋ ਯੋ ਵਾ ਪਨ ਕੋਚਿ ਪਚ੍ਚਯਾਹਾਰੋ ਦੁਕ੍ਖਸਚ੍ਚਂ, ਆਹਾਰਸਮੁਟ੍ਠਾਪਿਕਾ ਪੁਰਿਮਤਣ੍ਹਾ ਸਮੁਦਯਸਚ੍ਚਂ, ਉਭਿਨ੍ਨਂ ਅਪ੍ਪਵਤ੍ਤਿ ਨਿਰੋਧਸਚ੍ਚਂ, ਨਿਰੋਧਪ੍ਪਜਾਨਨਾ ਪਞ੍ਞਾ ਮਗ੍ਗਸਚ੍ਚਨ੍ਤਿ ਏਵਂ ਚਤੁਸਚ੍ਚਵਸੇਨ ਸਬ੍ਬਵਾਰੇਸੁ ਯੋਜਨਾ ਕਾਤਬ੍ਬਾ.
੮. ਦੁਤਿਯਮਹਾਪਞ੍ਹਸੁਤ੍ਤਵਣ੍ਣਨਾ
੨੮. ਅਟ੍ਠਮੇ ਕਜਙ੍ਗਲਾਯਨ੍ਤਿ ਏਵਂਨਾਮਕੇ ਨਗਰੇ. ਕਜਙ੍ਗਲਾਤਿ ਕਜਙ੍ਗਲਾਵਾਸਿਨੋ. ਮਹਾਪਞ੍ਹੇਸੂਤਿ ਮਹਨ੍ਤਅਤ੍ਥਪਰਿਗ੍ਗਾਹਕੇਸੁ ਪਞ੍ਹੇਸੁ. ਯਥਾ ਮੇਤ੍ਥ ਖਾਯਤੀਤਿ ਯਥਾ ਮੇ ਏਤ੍ਥ ਉਪਟ੍ਠਾਤਿ. ਸਮ੍ਮਾ ਸੁਭਾਵਿਤਚਿਤ੍ਤੋਤਿ ਹੇਤੁਨਾ ਨਯੇਨ ਸੁਟ੍ਠੁ ਭਾਵਿਤਚਿਤ੍ਤੋ. ਏਸੋ ਚੇਵ ਤਸ੍ਸ ਅਤ੍ਥੋਤਿ ਕਿਞ੍ਚਾਪਿ ਭਗਵਤਾ ‘‘ਚਤ੍ਤਾਰੋ ਧਮ੍ਮਾ’’ਤਿਆਦਯੋ ਪਞ੍ਹਾ ‘‘ਚਤ੍ਤਾਰੋ ਆਹਾਰਾ’’ਤਿਆਦਿਨਾ ਨਯੇਨ ਵਿਸ੍ਸਜ੍ਜਿਤਾ, ਯਸ੍ਮਾ ਪਨ ਚਤੂਸੁ ਆਹਾਰੇਸੁ ਪਰਿਞ੍ਞਾਤੇਸੁ ਚਤ੍ਤਾਰੋ ਸਤਿਪਟ੍ਠਾਨਾ ਭਾਵਿਤਾ ਹੋਨ੍ਤਿ, ਤੇਸੁ ਚ ਭਾਵਿਤੇਸੁ ਚਤ੍ਤਾਰੋ ਆਹਾਰਾ ਪਰਿਞ੍ਞਾਤਾਵ ਹੋਨ੍ਤਿ. ਤਸ੍ਮਾ ਦੇਸਨਾਵਿਲਾਸੇਨ ਬ੍ਯਞ੍ਜਨਮੇਵੇਤ੍ਥ ਨਾਨਂ, ਅਤ੍ਥੋ ਪਨ ਏਕੋਯੇਵ. ਇਨ੍ਦ੍ਰਿਯਾਦੀਸੁਪਿ ਏਸੇਵ ਨਯੋ. ਤੇਨ ਵੁਤ੍ਤਂ – ‘‘ਏਸੋ ਚੇਵ ਤਸ੍ਸ ਅਤ੍ਥੋ’’ਤਿ. ਅਤ੍ਥਤੋ ਹਿ ਉਭਯਮ੍ਪੇਤਂ ਮਜ੍ਝੇ ਭਿਨ੍ਨਸੁਵਣ੍ਣਮਿਵ ਹੋਤਿ.
੯. ਪਠਮਕੋਸਲਸੁਤ੍ਤਵਣ੍ਣਨਾ
੨੯. ਨਵਮੇ ਯਾਵਤਾਤਿ ਯਤ੍ਤਕਾ. ਕਾਸਿਕੋਸਲਾਤਿ ਕਾਸਿਕੋਸਲਜਨਪਦਾ. ਅਤ੍ਥੇਵ ਅਞ੍ਞਥਤ੍ਤਨ੍ਤਿ ਠਿਤਸ੍ਸ ਅਞ੍ਞਥਤ੍ਤਂ ਅਤ੍ਥਿਯੇਵ. ਅਤ੍ਥਿ ਵਿਪਰਿਣਾਮੋਤਿ ਮਰਣਮ੍ਪਿ ਅਤ੍ਥਿਯੇਵ. ਤਸ੍ਮਿਮ੍ਪਿ ਨਿਬ੍ਬਿਨ੍ਦਤੀਤਿ ਤਸ੍ਮਿਮ੍ਪਿ ਸਮ੍ਪਤ੍ਤਿਜਾਤੇ ਉਕ੍ਕਣ੍ਠਤਿ. ਅਗ੍ਗੇ ਵਿਰਜ੍ਜਤੀਤਿ ਸਮ੍ਪਤ੍ਤਿਯਾ ਅਗ੍ਗੇ ਕੋਸਲਰਾਜਭਾਵੇ ਵਿਰਜ੍ਜਤਿ. ਪਗੇਵ ਹੀਨਸ੍ਮਿਨ੍ਤਿ ਪਠਮਤਰਂਯੇਵ ਹੀਨੇ ਇਤ੍ਤਰਮਨੁਸ੍ਸਾਨਂ ਪਞ੍ਚ ਕਾਮਗੁਣਜਾਤੇ.
ਮਨੋਮਯਾਤਿ ਝਾਨਮਨੇਨ ਨਿਬ੍ਬਤ੍ਤਾ. ਬਾਰਾਣਸੇਯ੍ਯਕਨ੍ਤਿ ਬਾਰਾਣਸਿਯਂ ਉਪ੍ਪਨ੍ਨਂ. ਤਤ੍ਥ ਕਿਰ ਕਪ੍ਪਾਸੋਪਿ ਮੁਦੁ, ਸੁਤ੍ਤਕਨ੍ਤਿਕਾਯੋਪਿ ਤਨ੍ਤਵਾਯਾਪਿ ਛੇਕਾ, ਉਦਕਮ੍ਪਿ ਸੁਚਿ ਸਿਨਿਦ੍ਧਂ. ਉਭਤੋਭਾਗਵਿਮਟ੍ਠਨ੍ਤਿ ਦ੍ਵੀਸੁਪਿ ਪਸ੍ਸੇਸੁ ਮਟ੍ਠਂ ਮੁਦੁ ਸਿਨਿਦ੍ਧਂ ਖਾਯਤਿ. ਚਤਸ੍ਸੋ ਪਟਿਪਦਾ ਲੋਕਿਯਲੋਕੁਤ੍ਤਰਮਿਸ੍ਸਿਕਾ ਕਥਿਤਾ. ਸਞ੍ਞਾਸੁ ਪਠਮਾ ਕਾਮਾਵਚਰਸਞ੍ਞਾ, ਦੁਤਿਯਾ ਰੂਪਾਵਚਰਸਞ੍ਞਾ, ਤਤਿਯਾ ਲੋਕੁਤ੍ਤਰਸਞ੍ਞਾ, ਚਤੁਤ੍ਥਾ ਆਕਿਞ੍ਚਞ੍ਞਾਯਤਨਸਞ੍ਞਾ. ਯਸ੍ਮਾ ਪਨ ਸਾ ਸਞ੍ਞਾ ਅਗ੍ਗਾਤਿ ਆਗਤਾ, ਤਤੋ ਪਰਂ ਸਞ੍ਞਾਪਞ੍ਞਤ੍ਤਿ ਨਾਮ ਨਤ੍ਥਿ, ਤਸ੍ਮਾ ਅਗ੍ਗਨ੍ਤਿ ਵੁਤ੍ਤਾ.
ਬਾਹਿਰਕਾਨਨ੍ਤਿ ਸਾਸਨਤੋ ਬਹਿਦ੍ਧਾ ਪਵਤ੍ਤਾਨਂ. ਨੋ ਚਸ੍ਸਂ ਨੋ ਚ ਮੇ ਸਿਯਾਤਿ ਸਚੇ ਅਹਂ ਅਤੀਤੇ ਨ ਭਵਿਸ੍ਸਂ, ਏਤਰਹਿਪਿ ਮੇ ਅਯਂ ਅਤ੍ਤਭਾਵੋ ਨ ਸਿਯਾ. ਨ ਭਵਿਸ੍ਸਾਮਿ ਨ ਮੇ ਭਵਿਸ੍ਸਤੀਤਿ ਸਚੇਪਿ ਅਨਾਗਤੇ ਨ ਭਵਿਸ੍ਸਾਮਿ, ਨ ਚ ਮੇ ਕਿਞ੍ਚਿ ਪਲਿਬੋਧਜਾਤਂ ਭਵਿਸ੍ਸਤਿ. ਅਗ੍ਗੇ ਵਿਰਜ੍ਜਤੀਤਿ ਉਚ੍ਛੇਦਦਿਟ੍ਠਿਯਂ ਵਿਰਜ੍ਜਤਿ. ਉਚ੍ਛੇਦਦਿਟ੍ਠਿ ਹਿ ਇਧ ਨਿਬ੍ਬਾਨਸ੍ਸ ਸਨ੍ਤਤਾਯ ਅਗ੍ਗਨ੍ਤਿ ਜਾਤਾ.
ਪਰਮਤ੍ਥਵਿਸੁਦ੍ਧਿਨ੍ਤਿ ਉਤ੍ਤਮਤ੍ਥਵਿਸੁਦ੍ਧਿਂ. ਨੇਵਸਞ੍ਞਾਨਾਸਞ੍ਞਾਯਤਨਸਮਾਪਤ੍ਤਿਯਾ ਏਤਂ ਅਧਿਵਚਨਂ. ਆਕਿਞ੍ਚਞ੍ਞਾਯਤਨਞ੍ਹਿ ਵਿਪਸ੍ਸਨਾਪਦਟ੍ਠਾਨਤ੍ਤਾ ਅਗ੍ਗਂ ਨਾਮ ਜਾਤਂ, ਨੇਵਸਞ੍ਞਾਨਾਸਞ੍ਞਾਯਤਨਂ ਦੀਘਾਯੁਕਤ੍ਤਾ. ਪਰਮਦਿਟ੍ਠਧਮ੍ਮਨਿਬ੍ਬਾਨਨ੍ਤਿ ਇਮਸ੍ਮਿਞ੍ਞੇਵ ਅਤ੍ਤਭਾਵੇ ਪਰਮਨਿਬ੍ਬਾਨਂ. ਅਨੁਪਾਦਾ ਵਿਮੋਕ੍ਖੋਤਿ ਚਤੂਹਿ ਉਪਾਦਾਨੇਹਿ ਅਗ੍ਗਹੇਤ੍ਵਾ ਚਿਤ੍ਤਸ੍ਸ ਵਿਮੋਕ੍ਖੋ. ਅਰਹਤ੍ਤਸ੍ਸੇਤਂ ਨਾਮਂ. ਪਰਿਞ੍ਞਨ੍ਤਿ ਸਮਤਿਕ੍ਕਮਂ. ਤਤ੍ਥ ਭਗਵਾ ਪਠਮਜ੍ਝਾਨੇਨ ਕਾਮਾਨਂ ਪਰਿਞ੍ਞਂ ਪਞ੍ਞਾਪੇਤਿ, ਅਰੂਪਾਵਚਰੇਹਿ ਰੂਪਾਨਂ ਪਰਿਞ੍ਞਂ ਪਞ੍ਞਾਪੇਤਿ, ਅਨੁਪਾਦਾਨਿਬ੍ਬਾਨੇਨ ਵੇਦਨਾਨਂ ਪਰਿਞ੍ਞਂ ਪਞ੍ਞਾਪੇਤਿ. ਨਿਬ੍ਬਾਨਞ੍ਹਿ ਸਬ੍ਬਵੇਦਯਿਤਪ੍ਪਹਾਨਤ੍ਤਾ ਵੇਦਨਾਨਂ ਪਰਿਞ੍ਞਾ ਨਾਮ. ਅਨੁਪਾਦਾਪਰਿਨਿਬ੍ਬਾਨਨ੍ਤਿ ਅਪਚ੍ਚਯਪਰਿਨਿਬ੍ਬਾਨਂ. ਇਦਂ ਪਨ ਸੁਤ੍ਤਂ ਕਥੇਨ੍ਤੋ ਭਗਵਾ ਅਨਭਿਰਤਿਪੀਲ਼ਿਤਾਨਿ ਪਞ੍ਚ ਭਿਕ੍ਖੁਸਤਾਨਿ ਦਿਸ੍ਵਾ ਤੇਸਂ ਅਨਭਿਰਤਿਵਿਨੋਦਨਤ੍ਥਂ ਕਥੇਸਿ. ਤੇਪਿ ਅਨਭਿਰਤਿਂ ਵਿਨੋਦੇਤ੍ਵਾ ਦੇਸਨਾਨੁਸਾਰੇਨ ਞਾਣਂ ਪੇਸੇਤ੍ਵਾ ਸੋਤਾਪਨ੍ਨਾ ਹੁਤ੍ਵਾ ਅਪਰਭਾਗੇ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣਿਂਸੂਤਿ.
੧੦. ਦੁਤਿਯਕੋਸਲਸੁਤ੍ਤਵਣ੍ਣਨਾ
੩੦. ਦਸਮੇ ਉਯ੍ਯੋਧਿਕਾ ਨਿਵਤ੍ਤੋ ਹੋਤੀਤਿ ਯੁਦ੍ਧਤੋ ਨਿਵਤ੍ਤੋ ਹੋਤਿ. ਲਦ੍ਧਾਧਿਪ੍ਪਾਯੋਤਿ ਮਹਾਕੋਸਲਰਞ੍ਞਾ ਕਿਰ ਬਿਮ੍ਬਿਸਾਰਸ੍ਸ ਧੀਤਰਂ ਦੇਨ੍ਤੇਨ ਦ੍ਵਿਨ੍ਨਂ ਰਜ੍ਜਾਨਂ ਅਨ੍ਤਰੇ ਸਤਸਹਸ੍ਸੁਟ੍ਠਾਨੋ ਕਾਸਿਗਾਮੋ ਨਾਮ ਧੀਤੁ ਦਿਨ੍ਨੋ. ਅਜਾਤਸਤ੍ਤੁਨਾ ਪਿਤਰਿ ਮਾਰਿਤੇ ਮਾਤਾਪਿਸ੍ਸ ਰਞ੍ਞੋ ਵਿਯੋਗਸੋਕੇਨ ਨਚਿਰਸ੍ਸੇਵ ਮਤਾ. ਤਤੋ ਰਾਜਾ ਪਸੇਨਦਿਕੋਸਲੋ ‘‘ਅਜਾਤਸਤ੍ਤੁਨਾ ਮਾਤਾਪਿਤਰੋ ਮਾਰਿਤਾ, ਮਮ ਪਿਤੁ ਸਨ੍ਤਕੋ ਗਾਮੋ’’ਤਿ ਤਸ੍ਸਤ੍ਥਾਯ ਅਟ੍ਟਂ ਕਰੋਤਿ, ਅਜਾਤਸਤ੍ਤੁਪਿ ‘‘ਮਮ ਮਾਤੁ ਸਨ੍ਤਕੋ’’ਤਿ ਤਸ੍ਸ ਗਾਮਸ੍ਸਤ੍ਥਾਯ. ਦ੍ਵੇਪਿ ਮਾਤੁਲਭਾਗਿਨੇਯ੍ਯਾ ਚਤੁਰਙ੍ਗਿਨਿਂ ਸੇਨਂ ਸਨ੍ਨਯ੍ਹਿਤ੍ਵਾ ਯੁਜ੍ਝਿਂਸੁ. ਤਤ੍ਥ ਪਸੇਨਦਿਕੋਸਲੋ ਦ੍ਵੇ ਵਾਰੇ ਅਜਾਤਸਤ੍ਤੁਨਾ ਪਰਾਜਿਤੋ ਨਗਰਮੇਵ ਪਾਵਿਸਿ. ਤਤਿਯਵਾਰੇ ‘‘ਕਥਂ ਨੁ ਖੋ ਮੇ ਜਯੋ ਭਵੇਯ੍ਯਾ’’ਤਿ ਉਪਸ੍ਸੁਤਿਵਸੇਨ ਯੁਜ੍ਝਿਤਬ੍ਬਾਕਾਰਂ ਞਤ੍ਵਾ ਬ੍ਯੂਹਂ ਰਚਯਿਤ੍ਵਾ ਉਭੋਹਿ ਪਸ੍ਸੇਹਿ ਪਰਿਕ੍ਖਿਪਿਤ੍ਵਾ ਅਜਾਤਸਤ੍ਤੁਂ ਗਣ੍ਹਿ. ਤਾਵਦੇਵ ਜਯਾਧਿਪ੍ਪਾਯਸ੍ਸ ਲਦ੍ਧਤ੍ਤਾ ਲਦ੍ਧਾਧਿਪ੍ਪਾਯੋ ਨਾਮ ਅਹੋਸਿ.
ਯੇਨ ਆਰਾਮੋ ਤੇਨ ਪਾਯਾਸੀਤਿ ਬਹਿਨਗਰੇ ਜਯਖਨ੍ਧਾਵਾਰਂ ਨਿਵੇਸੇਤ੍ਵਾ ‘‘ਯਾਵ ਨਗਰਂ ਅਲਙ੍ਕਰੋਨ੍ਤਿ, ਤਾਵ ਦਸਬਲਂ ਵਨ੍ਦਿਸ੍ਸਾਮਿ. ਨਗਰਂ ਪਵਿਟ੍ਠਕਾਲਤੋ ਪਟ੍ਠਾਯ ਹਿ ਪਪਞ੍ਚੋ ਹੋਤੀ’’ਤਿ ਅਮਚ੍ਚਗਣਪਰਿਵੁਤੋ ਯੇਨਾਰਾਮੋ ਤੇਨ ਪਾਯਾਸਿ, ਆਰਾਮਂ ਪਾਵਿਸਿ. ਕਸ੍ਮਿਂ ਕਾਲੇ ਪਾਵਿਸੀਤਿ? ਪਿਣ੍ਡਪਾਤਪ੍ਪਟਿਕ੍ਕਨ੍ਤਾਨਂ ਭਿਕ੍ਖੂਨਂ ਓਵਾਦਂ ਦਤ੍ਵਾ ਸਮ੍ਮਾਸਮ੍ਬੁਦ੍ਧੇ ਗਨ੍ਧਕੁਟਿਂ ਪਵਿਟ੍ਠੇ ਭਿਕ੍ਖੁਸਙ੍ਘੇ ਚ ਓਵਾਦਂ ਸਮ੍ਪਟਿਚ੍ਛਿਤ੍ਵਾ ਅਤ੍ਤਨੋ ਅਤ੍ਤਨੋ ਰਤ੍ਤਿਟ੍ਠਾਨਦਿਵਾਟ੍ਠਾਨਾਨਿ ਗਤੇ. ਚਙ੍ਕਮਨ੍ਤੀਤਿ ਕਸ੍ਮਿਂ ਸਮਯੇ ਚਙ੍ਕਮਨ੍ਤਿ? ਪਣੀਤਭੋਜਨਪਚ੍ਚਯਸ੍ਸ ਥਿਨਮਿਦ੍ਧਸ੍ਸ ਵਿਨੋਦਨਤ੍ਥਂ, ਦਿਵਾ ਪਧਾਨਿਕਾ ਵਾ ਤੇ. ਤਾਦਿਸਾਨਞ੍ਹਿ ਪਚ੍ਛਾਭਤ੍ਤਂ ਚਙ੍ਕਮਿਤ੍ਵਾ ਨ੍ਹਤ੍ਵਾ ਸਰੀਰਂ ਉਤੁਂ ਗਾਹਾਪੇਤ੍ਵਾ ਨਿਸਜ੍ਜ ਸਮਣਧਮ੍ਮਂ ਕਰੋਨ੍ਤਾਨਂ ਚਿਤ੍ਤਂ ਏਕਗ੍ਗਂ ਹੋਤਿ. ਯੇ ਤੇ ਭਿਕ੍ਖੂਤਿ ਸੋ ਕਿਰ ‘‘ਕਹਂ ਸਤ੍ਥਾ ਕਹਂ ਸੁਗਤੋਤਿ ਪਰਿਵੇਣੇਨ ਪਰਿਵੇਣਂ ਆਗਨ੍ਤ੍ਵਾ ਪੁਚ੍ਛਿਤ੍ਵਾਵ ਪਵਿਸਿਸ੍ਸਾਮੀ’’ਤਿ ਵਿਲੋਕੇਨ੍ਤੋ ਅਰਞ੍ਞਹਤ੍ਥੀ ਵਿਯ ਮਹਾਚਙ੍ਕਮੇ ਚਙ੍ਕਮਮਾਨੇ ਪਂਸੁਕੂਲਿਕੇ ਭਿਕ੍ਖੂ ਦਿਸ੍ਵਾ ਤੇਸਂ ਸਨ੍ਤਿਕਂ ਅਗਮਾਸਿ. ਤਂ ਸਨ੍ਧਾਯੇਤਂ ਵੁਤ੍ਤਂ. ਦਸ੍ਸਨਕਾਮਾਤਿ ਪਸ੍ਸਿਤੁਕਾਮਾ. ਵਿਹਾਰੋਤਿ ਗਨ੍ਧਕੁਟਿਂ ਸਨ੍ਧਾਯ ਆਹਂਸੁ. ਅਤਰਮਾਨੋਤਿ ਅਤੁਰਿਤੋ, ਸਣਿਕਂ ਪਦਪਮਾਣਟ੍ਠਾਨੇ ਪਦਂ ਨਿਕ੍ਖਿਪਨ੍ਤੋ ਵਤ੍ਤਂ ਕਤ੍ਵਾ ਸੁਸਮ੍ਮਟ੍ਠਂ ਮੁਤ੍ਤਜਾਲਸਿਨ੍ਦੁਵਾਰਸਦਿਸਂ ਵਾਲੁਕਂ ਅਵਿਨਾਸੇਨ੍ਤੋਤਿ ਅਤ੍ਥੋ. ਆਲਿਨ੍ਦਨ੍ਤਿ ਪਮੁਖਂ. ਅਗ੍ਗਲ਼ਨ੍ਤਿ ਕਵਾਟਂ. ਉਕ੍ਕਾਸਿਤ੍ਵਾਤਿ ਉਕ੍ਕਾਸਿਤਸਦ੍ਦਂ ਕਤ੍ਵਾ. ਆਕੋਟੇਹੀਤਿ ਅਗ੍ਗਨਖੇਨ ਈਸਕਂ ਕੁਞ੍ਚਿਕਾਛਿਦ੍ਦਸਮੀਪੇ ਕੋਟੇਹੀਤਿ ਵੁਤ੍ਤਂ ਹੋਤਿ. ਦ੍ਵਾਰਂ ਕਿਰ ਅਤਿਉਪਰਿ ਅਮਨੁਸ੍ਸਾ, ਅਤਿਹੇਟ੍ਠਾ ਦੀਘਜਾਤਿਕਾ ਕੋਟੇਨ੍ਤਿ. ਤਥਾ ਅਕੋਟੇਤ੍ਵਾ ਮਜ੍ਝੇ ਛਿਦ੍ਦਸਮੀਪੇ ਕੋਟੇਤਬ੍ਬਨ੍ਤਿ ਇਦਂ ਦ੍ਵਾਰਕੋਟਨਵਤ੍ਤਨ੍ਤਿ ਵਦਨ੍ਤਿ. ਵਿਵਰਿ ਭਗਵਾ ਦ੍ਵਾਰਨ੍ਤਿ ਨ ਭਗਵਾ ਉਟ੍ਠਾਯ ਦ੍ਵਾਰਂ ਵਿਵਰਤਿ, ਵਿਵਰਤੂਤਿ ਪਨ ਹਤ੍ਥਂ ਪਸਾਰੇਤਿ. ਤਤੋ ‘‘ਭਗਵਾ ਤੁਮ੍ਹੇਹਿ ਅਨੇਕਕਪ੍ਪਕੋਟੀਸੁ ਦਾਨਂ ਦਦਮਾਨੇਹਿ ਨ ਸਹਤ੍ਥਾ ਦ੍ਵਾਰਵਿਵਰਣਕਮ੍ਮਂ ਕਤ’’ਨ੍ਤਿ ਸਯਮੇਵ ਦ੍ਵਾਰਂ ਵਿਵਟਂ. ਤਂ ਪਨ ਯਸ੍ਮਾ ਭਗਵਤੋ ਮਨੇਨ ਵਿਵਟਂ, ਤਸ੍ਮਾ ‘‘ਵਿਵਰਿ ਭਗਵਾ ਦ੍ਵਾਰ’’ਨ੍ਤਿ ਵਤ੍ਤੁਂ ਵਟ੍ਟਤਿ.
ਮੇਤ੍ਤੂਪਹਾਰਨ੍ਤਿ ਮੇਤ੍ਤਾਸਮ੍ਪਯੁਤ੍ਤਂ ਕਾਯਿਕਵਾਚਸਿਕਉਪਹਾਰਂ. ਕਤਞ੍ਞੁਤਨ੍ਤਿ ਅਯਞ੍ਹਿ ਰਾਜਾ ਪੁਬ੍ਬੇ ਥੂਲਸਰੀਰੋ ਅਹੋਸਿ, ਦੋਣਪਾਕਂ ਭੁਞ੍ਜਤਿ. ਅਥਸ੍ਸ ਭਗਵਾ ਦਿਵਸੇ ਦਿਵਸੇ ਥੋਕਂ ਥੋਕਂ ਹਾਪਨਤ੍ਥਾਯ –
‘‘ਮਨੁਜਸ੍ਸ ਸਦਾ ਸਤੀਮਤੋ,
ਮਤ੍ਤਂ ਜਾਨਤੋ ਲਦ੍ਧਭੋਜਨੇ;
ਤਨੁਕਸ੍ਸ ਭਵਨ੍ਤਿ ਵੇਦਨਾ,
ਸਣਿਕਂ ਜੀਰਤਿ ਆਯੁਪਾਲਯ’’ਨ੍ਤਿ. (ਸਂ. ਨਿ. ੧.੧੨੪) –
ਇਮਂ ਓਵਾਦਂ ਅਦਾਸਿ. ਸੋ ਇਮਸ੍ਮਿਂ ਓਵਾਦੇ ਠਤ੍ਵਾ ਦਿਵਸੇ ਦਿਵਸੇ ਥੋਕਂ ਥੋਕਂ ਹਾਪੇਤ੍ਵਾ ਅਨੁਕ੍ਕਮੇਨ ਨਾਲ਼ਿਕੋਦਨਪਰਮਤਾਯ ਸਣ੍ਠਾਸਿ, ਗਤ੍ਤਾਨਿਪਿਸ੍ਸ ਤਨੂਨਿ ਥਿਰਾਨਿ ਜਾਤਾਨਿ. ਤਂ ਭਗਵਤਾ ਕਤਂ ਉਪਕਾਰਂ ਸਨ੍ਧਾਯ ‘‘ਕਤਞ੍ਞੁਤਂ ਖੋ ਅਹਂ, ਭਨ੍ਤੇ, ਕਤਵੇਦਿਤਂ ਸਮ੍ਪਸ੍ਸਮਾਨੋ’’ਤਿ ਆਹ. ਅਰਿਯੇ ਞਾਯੇਤਿ ਸਹਵਿਪਸ੍ਸਨਕੇ ਮਗ੍ਗੇ. ਵੁਦ੍ਧਸੀਲੋਤਿ ਵਡ੍ਢਿਤਸੀਲੋ. ਅਰਿਯਸੀਲੋਤਿ ਅਪੋਥੁਜ੍ਜਨਿਕੇਹਿ ਸੀਲੇਹਿ ਸਮਨ੍ਨਾਗਤੋ. ਕੁਸਲਸੀਲੋਤਿ ਅਨਵਜ੍ਜੇਹਿ ਸੀਲੇਹਿ ਸਮਨ੍ਨਾਗਤੋ. ਆਰਞ੍ਞਕੋਤਿ ਜਾਯਮਾਨੋਪਿ ਅਰਞ੍ਞੇ ਜਾਤੋ, ਅਭਿਸਮ੍ਬੁਜ੍ਝਮਾਨੋਪਿ ਅਰਞ੍ਞੇ ਅਭਿਸਮ੍ਬੁਦ੍ਧੋ, ਦੇਵਵਿਮਾਨਕਪ੍ਪਾਯ ਗਨ੍ਧਕੁਟਿਯਾ ਵਸਨ੍ਤੋਪਿ ਅਰਞ੍ਞੇਯੇਵ ਵਸੀਤਿ ਦਸ੍ਸੇਨ੍ਤੋ ਏਵਮਾਹ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.
ਮਹਾਵਗ੍ਗੋ ਤਤਿਯੋ.
੪. ਉਪਾਲਿਵਗ੍ਗੋ
੧. ਉਪਾਲਿਸੁਤ੍ਤਵਣ੍ਣਨਾ
੩੧. ਚਤੁਤ੍ਥਸ੍ਸ ਪਠਮੇ ਸਙ੍ਘਸੁਟ੍ਠੁਤਾਯਾਤਿਆਦੀਸੁ ਸਙ੍ਘਸੁਟ੍ਠੁਤਾ ਨਾਮ ਸਙ੍ਘਸ੍ਸ ਸੁਟ੍ਠੁਭਾਵੋ, ‘‘ਸੁਟ੍ਠੁ ਦੇਵਾ’’ਤਿ ਆਗਤਟ੍ਠਾਨੇ ਵਿਯ ‘‘ਸੁਟ੍ਠੁ, ਭਨ੍ਤੇ’’ਤਿ ਵਚਨਸਮ੍ਪਟਿਚ੍ਛਨਭਾਵੋ. ਯੋ ਚ ਤਥਾਗਤਸ੍ਸ ਵਚਨਂ ਸਮ੍ਪਟਿਚ੍ਛਤਿ, ਤਸ੍ਸ ਤਂ ਦੀਘਰਤ੍ਤਂ ਹਿਤਾਯ ਸੁਖਾਯ ਸਂਵਤ੍ਤਤਿ. ਤਸ੍ਮਾ ਸਙ੍ਘਸ੍ਸ ‘‘ਸੁਟ੍ਠੁ, ਭਨ੍ਤੇ’’ਤਿ ਵਚਨਸਮ੍ਪਟਿਚ੍ਛਨਤ੍ਥਂ ਪਞ੍ਞਤ੍ਤਂ, ਅਸਮ੍ਪਟਿਚ੍ਛਨੇ ਆਦੀਨਵਂ, ਸਮ੍ਪਟਿਚ੍ਛਨੇ ਆਨਿਸਂਸਂ ਦਸ੍ਸੇਤ੍ਵਾ, ਨ ਬਲਕ੍ਕਾਰੇਨ ਅਭਿਭਵਿਤ੍ਵਾਤਿ ਏਤਮਤ੍ਥਂ ਆਵਿਕਰੋਨ੍ਤੋ ਆਹ – ਸਙ੍ਘਸੁਟ੍ਠੁਤਾਯਾਤਿ. ਸਙ੍ਘਫਾਸੁਤਾਯਾਤਿ ਸਙ੍ਘਸ੍ਸ ਫਾਸੁਭਾਵਾਯ, ਸਹਜੀਵਿਤਾਯ ਸੁਖਵਿਹਾਰਤ੍ਥਾਯਾਤਿ ਅਤ੍ਥੋ.
ਦੁਮ੍ਮਙ੍ਕੂਨਂ ਪੁਗ੍ਗਲਾਨਂ ਨਿਗ੍ਗਹਾਯਾਤਿ ਦੁਮ੍ਮਙ੍ਕੂਨਾਮ ਦੁਸ੍ਸੀਲਪੁਗ੍ਗਲਾ, ਯੇ ਮਙ੍ਕੁਤਂ ਆਪਾਦਿਯਮਾਨਾਪਿ ਦੁਕ੍ਖੇਨ ਆਪਜ੍ਜਨ੍ਤਿ, ਵੀਤਿਕ੍ਕਮਂ ਕਰੋਨ੍ਤਾ ਵਾ ਕਤ੍ਵਾ ਵਾ ਨ ਲਜ੍ਜਨ੍ਤਿ, ਤੇਸਂ ਨਿਗ੍ਗਹਤ੍ਥਾਯ. ਤੇ ਹਿ ਸਿਕ੍ਖਾਪਦੇ ਅਸਤਿ ‘‘ਕਿਂ ਤੁਮ੍ਹੇਹਿ ਦਿਟ੍ਠਂ, ਕਿਂ ਸੁਤਂ, ਕਿਂ ਅਮ੍ਹੇਹਿ ਕਤਂ, ਕਤਮਸ੍ਮਿਂ ਵਤ੍ਥੁਸ੍ਮਿਂ ਕਤਮਂ ਆਪਤ੍ਤਿਂ ਰੋਪੇਤ੍ਵਾ ਅਮ੍ਹੇ ਨਿਗ੍ਗਣ੍ਹਥਾ’’ਤਿ ਸਙ੍ਘਂ ਵਿਹੇਠੇਯ੍ਯੁਂ. ਸਿਕ੍ਖਾਪਦੇ ਪਨ ਸਤਿ ਤੇ ਸਙ੍ਘੋ ਸਿਕ੍ਖਾਪਦਂ ਦਸ੍ਸੇਤ੍ਵਾ ਸਹ ਧਮ੍ਮੇਨ ਨਿਗ੍ਗਹੇਸ੍ਸਤਿ. ਤੇਨ ਵੁਤ੍ਤਂ – ‘‘ਦੁਮ੍ਮਙ੍ਕੂਨਂ ਪੁਗ੍ਗਲਾਨਂ ਨਿਗ੍ਗਹਾਯਾ’’ਤਿ.
ਪੇਸਲਾਨਨ੍ਤਿ ਪਿਯਸੀਲਾਨਂ ਭਿਕ੍ਖੂਨਂ ਫਾਸੁਵਿਹਾਰਤ੍ਥਾਯ. ਪਿਯਸੀਲਾ ਹਿ ਭਿਕ੍ਖੂ ਕਤ੍ਤਬ੍ਬਾਕਤ੍ਤਬ੍ਬਂ ਸਾਵਜ੍ਜਾਨਵਜ੍ਜਂ ਵੇਲਂ ਮਰਿਯਾਦਞ੍ਚ ਅਜਾਨਨ੍ਤਾ ਸਿਕ੍ਖਾਤ੍ਤਯਪਾਰਿਪੂਰਿਯਾ ਘਟਮਾਨਾ ਕਿਲਮਨ੍ਤਿ, ਤੇ ਪਨ ਸਾਵਜ੍ਜਾਨਵਜ੍ਜਂ ਵੇਲਂ ਮਰਿਯਾਦਞ੍ਚ ਞਤ੍ਵਾ ਸਿਕ੍ਖਾਪਾਰਿਪੂਰਿਯਾ ਘਟਮਾਨਾ ਨ ਕਿਲਮਨ੍ਤਿ. ਤੇਨ ਤੇਸਂ ਸਿਕ੍ਖਾਪਦਪਞ੍ਞਾਪਨਂ ਫਾਸੁਵਿਹਾਰਾਯ ਸਂਵਤ੍ਤਤਿਯੇਵ. ਯੋ ਵਾ ਦੁਮ੍ਮਙ੍ਕੂਨਂ ਪੁਗ੍ਗਲਾਨਂ ਨਿਗ੍ਗਹੋ, ਸ੍ਵੇਵ ਤੇਸਂ ਫਾਸੁਵਿਹਾਰੋ. ਦੁਸ੍ਸੀਲਪੁਗ੍ਗਲੇ ਨਿਸ੍ਸਾਯ ਹਿ ਉਪੋਸਥਪ੍ਪਵਾਰਣਾ ਨ ਤਿਟ੍ਠਨ੍ਤਿ, ਸਙ੍ਘਕਮ੍ਮਾਨਿ ਨਪ੍ਪਵਤ੍ਤਨ੍ਤਿ, ਸਾਮਗ੍ਗੀ ਨ ਹੋਤਿ, ਭਿਕ੍ਖੂ ਅਨੇਕਗ੍ਗਾ ਉਦ੍ਦੇਸਾਦੀਸੁ ਅਨੁਯੁਞ੍ਜਿਤੁਂ ਨ ਸਕ੍ਕੋਨ੍ਤਿ. ਦੁਸ੍ਸੀਲੇਸੁ ਪਨ ਨਿਗ੍ਗਹਿਤੇਸੁ ਸਬ੍ਬੋਪਿ ਅਯਂ ਉਪਦ੍ਦਵੋ ਨ ਹੋਤਿ, ਤਤੋ ਪੇਸਲਾ ਭਿਕ੍ਖੂ ਫਾਸੁ ਵਿਹਰਨ੍ਤਿ. ਏਵਂ ‘‘ਪੇਸਲਾਨਂ ਭਿਕ੍ਖੂਨਂ ਫਾਸੁਵਿਹਾਰਾਯਾ’’ਤਿ ਏਤ੍ਥ ਦ੍ਵਿਧਾ ਅਤ੍ਥੋ ਵੇਦਿਤਬ੍ਬੋ.
ਦਿਟ੍ਠਧਮ੍ਮਿਕਾਨਂ ਆਸਵਾਨਂ ਸਂਵਰਾਯਾਤਿ ਦਿਟ੍ਠਧਮ੍ਮਿਕਾ ਆਸਵਾ ਨਾਮ ਅਸਂਵਰੇ ਠਿਤੇਨ ਤਸ੍ਮਿਂਯੇਵ ਅਤ੍ਤਭਾਵੇ ਪਤ੍ਤਬ੍ਬਾ ਪਾਣਿਪ੍ਪਹਾਰਦਣ੍ਡਪ੍ਪਹਾਰਸਤ੍ਥਪ੍ਪਹਾਰਹਤ੍ਥਚ੍ਛੇਦਪਾਦਚ੍ਛੇਦਅਕਿਤ੍ਤਿਅਯਸਵਿਪ੍ਪਟਿਸਾਰਾਦਯੋ ਦੁਕ੍ਖਵਿਸੇਸੋ, ਤੇਸਂ ਸਂਵਰਾਯ ਪਿਦਹਨਾਯ ਆਗਮਨਮਗ੍ਗਥਕਨਾਯਾਤਿ ਅਤ੍ਥੋ. ਸਮ੍ਪਰਾਯਿਕਾਨਨ੍ਤਿ ਸਮ੍ਪਰਾਯਿਕਾ ਆਸਵਾ ਨਾਮ ਅਸਂਵਰੇ ਠਿਤੇਨ ਕਤਪਾਪਕਮ੍ਮਮੂਲਕਾ ਸਮ੍ਪਰਾਯੇ ਨਰਕਾਦੀਸੁ ਪਤ੍ਤਬ੍ਬਾ ਦੁਕ੍ਖਵਿਸੇਸਾ, ਤੇਸਂ ਪਟਿਘਾਤਤ੍ਥਾਯ ਵੂਪਸਮਤ੍ਥਾਯ.
ਅਪ੍ਪਸਨ੍ਨਾਨਨ੍ਤਿ ਸਿਕ੍ਖਾਪਦਪਞ੍ਞਤ੍ਤਿਯਾ ਹਿ ਸਤਿ ਸਿਕ੍ਖਾਪਦਪਞ੍ਞਤ੍ਤਿਂ ਞਤ੍ਵਾ ਵਾ, ਯਥਾਪਞ੍ਞਤ੍ਤਂ ਪਟਿਪਜ੍ਜਮਾਨੇ ਭਿਕ੍ਖੂ ਦਿਸ੍ਵਾ ਵਾ, ਯੇਪਿ ਅਪ੍ਪਸਨ੍ਨਾ ਪਣ੍ਡਿਤਮਨੁਸ੍ਸਾ, ਤੇ ‘‘ਯਾਨਿ ਵਤ ਲੋਕੇ ਮਹਾਜਨਸ੍ਸ ਰਜ੍ਜਨਦੁਸ੍ਸਨਮੁਯ੍ਹਨਟ੍ਠਾਨਾਨਿ, ਤੇਹਿ ਇਮੇ ਸਮਣਾ ਆਰਕਾ ਵਿਰਤਾ ਵਿਹਰਨ੍ਤਿ, ਦੁਕ੍ਕਰਂ ਵਤ ਕਰੋਨ੍ਤੀ’’ਤਿ ਪਸਾਦਂ ਆਪਜ੍ਜਨ੍ਤਿ ਵਿਨਯਪਿਟਕਪੋਤ੍ਥਕਂ ਦਿਸ੍ਵਾ ਮਿਚ੍ਛਾਦਿਟ੍ਠਿਕਤਵੇਦਿਬ੍ਰਾਹ੍ਮਣਾ ਵਿਯ. ਤੇਨ ਵੁਤ੍ਤਂ – ‘‘ਅਪ੍ਪਸਨ੍ਨਾਨਂ ਪਸਾਦਾਯਾ’’ਤਿ.
ਪਸਨ੍ਨਾਨਨ੍ਤਿ ਯੇਪਿ ਸਾਸਨੇ ਪਸਨ੍ਨਾ ਕੁਲਪੁਤ੍ਤਾ, ਤੇਪਿ ਸਿਕ੍ਖਾਪਦਪਞ੍ਞਤ੍ਤਿਂ ਵਾ ਞਤ੍ਵਾ, ਯਥਾਪਞ੍ਞਤ੍ਤਂ ਪਟਿਪਜ੍ਜਮਾਨੇ ਭਿਕ੍ਖੂ ਵਾ ਦਿਸ੍ਵਾ ‘‘ਅਹੋ ਅਯ੍ਯਾ ਦੁਕ੍ਕਰਂ ਕਰੋਨ੍ਤਿ, ਯੇ ਯਾਵਜੀਵਂ ਏਕਭਤ੍ਤਾ ਵਿਨਯਸਂਵਰਂ ਪਾਲੇਨ੍ਤੀ’’ਤਿ ਭਿਯ੍ਯੋ ਭਿਯ੍ਯੋ ਪਸੀਦਨ੍ਤਿ. ਤੇਨ ਵੁਤ੍ਤਂ – ‘‘ਪਸਨ੍ਨਾਨਂ ਭਿਯ੍ਯੋਭਾਵਾਯਾ’’ਤਿ.
ਸਦ੍ਧਮ੍ਮਟ੍ਠਿਤਿਯਾਤਿ ਤਿਵਿਧੋ ਸਦ੍ਧਮ੍ਮੋ ਪਰਿਯਤ੍ਤਿਸਦ੍ਧਮ੍ਮੋ ਪਟਿਪਤ੍ਤਿਸਦ੍ਧਮ੍ਮੋ ਅਧਿਗਮਸਦ੍ਧਮ੍ਮੋਤਿ. ਤਤ੍ਥ ਸਕਲਮ੍ਪਿ ਬੁਦ੍ਧਵਚਨਂ ਪਰਿਯਤ੍ਤਿਸਦ੍ਧਮ੍ਮੋ ਨਾਮ. ਤੇਰਸ ਧੁਤਗੁਣਾ ਚਾਰਿਤ੍ਤਵਾਰਿਤ੍ਤਸੀਲਸਮਾਧਿਵਿਪਸ੍ਸਨਾਤਿ ਅਯਂ ਪਟਿਪਤ੍ਤਿਸਦ੍ਧਮ੍ਮੋ ਨਾਮ. ਨਵਲੋਕੁਤ੍ਤਰਧਮ੍ਮੋ ਅਧਿਗਮਸਦ੍ਧਮ੍ਮੋ ਨਾਮ. ਸੋ ਸਬ੍ਬੋਪਿ ਯਸ੍ਮਾ ਸਿਕ੍ਖਾਪਦਪਞ੍ਞਤ੍ਤਿਯਾ ਸਤਿ ਭਿਕ੍ਖੂ ਸਿਕ੍ਖਾਪਦਞ੍ਚ ਤਸ੍ਸ ਵਿਭਙ੍ਗਞ੍ਚ ਤਦਤ੍ਥਜੋਤਨਤ੍ਥਂ ਅਞ੍ਞਞ੍ਚ ਬੁਦ੍ਧਵਚਨਂ ਪਰਿਯਾਪੁਣਨ੍ਤਿ, ਯਥਾਪਞ੍ਞਤ੍ਤਞ੍ਚ ਪਟਿਪਜ੍ਜਮਾਨਾ ਪਟਿਪਤ੍ਤਿਂ ਪੂਰੇਤ੍ਵਾ ਪਟਿਪਤ੍ਤਿਯਾ ਅਧਿਗਨ੍ਤਬ੍ਬਂ ਲੋਕੁਤ੍ਤਰਧਮ੍ਮਂ ਅਧਿਗਚ੍ਛਨ੍ਤਿ, ਤਸ੍ਮਾ ਸਿਕ੍ਖਾਪਦਪਞ੍ਞਤ੍ਤਿਯਾ ਸਦ੍ਧਮ੍ਮੋ ਚਿਰਟ੍ਠਿਤਿਕੋ ਹੋਤਿ. ਤੇਨ ਵੁਤ੍ਤਂ – ‘‘ਸਦ੍ਧਮ੍ਮਟ੍ਠਿਤਿਯਾ’’ਤਿ.
ਵਿਨਯਾਨੁਗ੍ਗਹਾਯਾਤਿ ਸਿਕ੍ਖਾਪਦਪਞ੍ਞਤ੍ਤਿਯਾ ਸਤਿ ਸਂਵਰਵਿਨਯੋ, ਪਹਾਨਵਿਨਯੋ, ਸਮਥਵਿਨਯੋ, ਪਞ੍ਞਤ੍ਤਿਵਿਨਯੋਤਿ ਚਤੁਬ੍ਬਿਧੋ ਵਿਨਯੋ ਅਨੁਗ੍ਗਹਿਤੋ ਹੋਤਿ ਸੂਪਤ੍ਥਮ੍ਭਿਤੋ. ਤੇਨ ਵੁਤ੍ਤਂ – ‘‘ਵਿਨਯਾਨੁਗ੍ਗਹਾਯਾ’’ਤਿ.
੨. ਪਾਤਿਮੋਕ੍ਖਟ੍ਠਪਨਾਸੁਤ੍ਤਵਣ੍ਣਨਾ
੩੨. ਦੁਤਿਯੇ ਪਾਰਾਜਿਕੋਤਿ ਪਾਰਾਜਿਕਾਪਤ੍ਤਿਂ ਆਪਨ੍ਨੋ. ਪਾਰਾਜਿਕਕਥਾ ਵਿਪ੍ਪਕਤਾ ਹੋਤੀਤਿ ‘‘ਅਸੁਕਪੁਗ੍ਗਲੋ ਪਾਰਾਜਿਕਂ ਆਪਨ੍ਨੋ ਨੁ ਖੋ ਨੋ’’ਤਿ ਏਵਂ ਕਥਾ ਆਰਭਿਤ੍ਵਾ ਅਨਿਟ੍ਠਾਪਿਤਾ ਹੋਤਿ. ਏਸ ਨਯੋ ਸਬ੍ਬਤ੍ਥ.
੩. ਉਬ੍ਬਾਹਿਕਾਸੁਤ੍ਤਵਣ੍ਣਨਾ
੩੩. ਤਤਿਯੇ ਉਬ੍ਬਾਹਿਕਾਯਾਤਿ ਸਮ੍ਪਤ੍ਤਅਧਿਕਰਣਂ ਵੂਪਸਮੇਤੁਂ ਸਙ੍ਘਤੋ ਉਬ੍ਬਾਹਿਤ੍ਵਾ ਉਦ੍ਧਰਿਤ੍ਵਾ ਗਹਣਤ੍ਥਾਯ. ਵਿਨਯੇ ਖੋ ਪਨ ਠਿਤੋ ਹੋਤੀਤਿ ਵਿਨਯਲਕ੍ਖਣੇ ਪਤਿਟ੍ਠਿਤੋ ਹੋਤਿ. ਅਸਂਹੀਰੋਤਿ ਨ ਅਞ੍ਞਸ੍ਸ ਵਚਨਮਤ੍ਤੇਨੇਵ ਅਤ੍ਤਨੋ ਲਦ੍ਧਿਂ ਵਿਸ੍ਸਜ੍ਜੇਤਿ. ਪਟਿਬਲੋਤਿ ਕਾਯਬਲੇਨਪਿ ਞਾਣਬਲੇਨਪਿ ਸਮਨ੍ਨਾਗਤੋ. ਸਞ੍ਞਾਪੇਤੁਨ੍ਤਿ ਜਾਨਾਪੇਤੁਂ. ਪਞ੍ਞਾਪੇਤੁਨ੍ਤਿ ਸਮ੍ਪਜਾਨਾਪੇਤੁਂ. ਨਿਜ੍ਝਾਪੇਤੁਨ੍ਤਿ ਓਲੋਕਾਪੇਤੁਂ. ਪੇਕ੍ਖਤੁਨ੍ਤਿ ਪਸ੍ਸਾਪੇਤੁਂ. ਪਸਾਦੇਤੁਨ੍ਤਿ ਸਞ੍ਜਾਤਪਸਾਦਂ ਕਾਤੁਂ. ਅਧਿਕਰਣਨ੍ਤਿ ਵਿਵਾਦਾਧਿਕਰਣਾਦਿਚਤੁਬ੍ਬਿਧਂ. ਅਧਿਕਰਣਸਮੁਦਯਨ੍ਤਿ ਵਿਵਾਦਮੂਲਾਦਿਕਂ ਅਧਿਕਰਣਕਾਰਕਂ. ਅਧਿਕਰਣਨਿਰੋਧਨ੍ਤਿ ਅਧਿਕਰਣਾਨਂ ਵੂਪਸਮਂ. ਅਧਿਕਰਣਨਿਰੋਧਗਾਮਿਨਿਂ ਪਟਿਪਦਨ੍ਤਿ ਸਤ੍ਤਵਿਧਅਧਿਕਰਣਸਮਥਂ.
੪. ਉਪਸਮ੍ਪਦਾਸੁਤ੍ਤਵਣ੍ਣਨਾ
੩੪. ਚਤੁਤ੍ਥੇ ਅਨਭਿਰਤਿਨ੍ਤਿ ਉਕ੍ਕਣ੍ਠਿਤਭਾਵਂ. ਵੂਪਕਾਸੇਤੁਨ੍ਤਿ ਵਿਨੇਤੁਂ. ਅਧਿਸੀਲੇਤਿ ਉਤ੍ਤਮਸੀਲੇ. ਚਿਤ੍ਤਪਞ੍ਞਾਸੁਪਿ ਏਸੇਵ ਨਯੋ.
੭. ਸਙ੍ਘਭੇਦਸੁਤ੍ਤਵਣ੍ਣਨਾ
੩੭. ਸਤ੍ਤਮੇ ਵਤ੍ਥੂਹੀਤਿ ਕਾਰਣੇਹਿ. ਅਵਕਸ੍ਸਨ੍ਤੀਤਿ ਪਰਿਸਂ ਆਕਡ੍ਢਨ੍ਤਿ ਵਿਜਟੇਨ੍ਤਿ ਏਕਮਨ੍ਤਂ ਉਸ੍ਸਾਰੇਨ੍ਤਿ. ਅਪਕਸ੍ਸਨ੍ਤੀਤਿ ਅਤਿਵਿਯ ਆਕਡ੍ਢਨ੍ਤਿ, ਯਥਾ ਵਿਸਂਸਟ੍ਠਾ ਹੋਨ੍ਤਿ, ਏਵਂ ਕਰੋਨ੍ਤਿ. ਆਵੇਨਿ ਕਮ੍ਮਾਨਿ ਕਰੋਨ੍ਤੀਤਿ ਵਿਸੁਂ ਸਙ੍ਘਕਮ੍ਮਾਨਿ ਕਰੋਨ੍ਤਿ.
੯-੧੦. ਆਨਨ੍ਦਸੁਤ੍ਤਦ੍ਵਯਵਣ੍ਣਨਾ
੩੯-੪੦. ਨਵਮੇ ਕਪ੍ਪਟ੍ਠਿਕਨ੍ਤਿ ਆਯੁਕਪ੍ਪਂ ਨਿਰਯਮ੍ਹਿ ਠਿਤਿਕਾਰਣਂ. ਕਿਬ੍ਬਿਸਂ ਪਸਵਤੀਤਿ ਪਾਪਂ ਪਟਿਲਭਤਿ. ਆਪਾਯਿਕੋਤਿ ਅਪਾਯਗਮਨੀਯੋ. ਨੇਰਯਿਕੋਤਿ ਨਿਰਯੇ ਨਿਬ੍ਬਤ੍ਤਨਕੋ. ਵਗ੍ਗਰਤੋਤਿ ਭੇਦਰਤੋ. ਯੋਗਕ੍ਖੇਮਾ ਪਧਂਸਤੀਤਿ ਯੋਗੇਹਿ ਖੇਮਤੋ ਅਰਹਤ੍ਤਤੋ ਧਂਸਤਿ ਵਿਗਚ੍ਛਤਿ. ਦਸਮੇ ਅਨੁਗ੍ਗਹੋਤਿ ਅਞ੍ਞਮਞ੍ਞਸ੍ਸ ਸਙ੍ਗਹਾਨੁਗ੍ਗਹੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.
ਉਪਾਲਿਵਗ੍ਗੋ ਚਤੁਤ੍ਥੋ.
੫. ਅਕ੍ਕੋਸਵਗ੍ਗੋ
੪. ਕੁਸਿਨਾਰਸੁਤ੍ਤਵਣ੍ਣਨਾ
੪੪. ਪਞ੍ਚਮਸ੍ਸ ਚਤੁਤ੍ਥੇ ਕੁਸਿਨਾਰਾਯਨ੍ਤਿ ਏਵਂਨਾਮਕੇ ਨਗਰੇ. ਦੇਵਤਾਨਂ ਅਤ੍ਥਾਯ ਬਲਿਂ ਹਰਨ੍ਤਿ ਏਤ੍ਥਾਤਿ ਬਲਿਹਰਣੋ, ਤਸ੍ਮਿਂ ਬਲਿਹਰਣੇ. ਅਚ੍ਛਿਦ੍ਦੇਨ ਅਪ੍ਪਟਿਮਂਸੇਨਾਤਿਆਦੀਸੁ ਯੇਨ ਕੇਨਚਿਦੇਵ ਪਹਟੋ ਵਾ ਹੋਤਿ, ਵੇਜ੍ਜਕਮ੍ਮਾਦੀਨਿ ਵਾ ਕਤਾਨਿ, ਤਸ੍ਸ ਕਾਯਸਮਾਚਾਰੋ ਉਪਚਿਕਾਦੀਹਿ ਖਾਯਿਤਤਾਲਪਣ੍ਣਂ ਵਿਯ ਛਿਦ੍ਦੋ ਚ, ਪਟਿਮਸਿਤੁਂ ਯਤ੍ਥ ਕਤ੍ਥਚਿ ਗਹੇਤ੍ਵਾ ਆਕਡ੍ਢਿਤੁਂ ਸਕ੍ਕੁਣੇਯ੍ਯਤਾਯ ਪਟਿਮਂਸੋ ਚ ਹੋਤਿ, ਵਿਪਰੀਤੋ ਅਚ੍ਛਿਦ੍ਦੋ ਅਪ੍ਪਟਿਮਂਸੋ ਨਾਮ. ਵਚੀਸਮਾਚਾਰੋ ਪਨ ਮੁਸਾਵਾਦਓਮਸਵਾਦਪੇਸੁਞ੍ਞਅਮੂਲਕਾਨੁਦ੍ਧਂਸਨਾਦੀਹਿ ਛਿਦ੍ਦੋ ਸਪ੍ਪਟਿਮਂਸੋ ਚ ਹੋਤਿ, ਵਿਪਰੀਤੋ ਅਚ੍ਛਿਦ੍ਦੋ ਅਪ੍ਪਟਿਮਂਸੋ. ਮੇਤ੍ਤਂ ਨੁ ਖੋ ਮੇ ਚਿਤ੍ਤਨ੍ਤਿ ਪਲਿਬੋਧਂ ਛਿਨ੍ਦਿਤ੍ਵਾ ਕਮ੍ਮਟ੍ਠਾਨਭਾਵਨਾਨੁਯੋਗੇਨ ਅਧਿਗਤਂ ਮੇ ਮੇਤ੍ਤਚਿਤ੍ਤਂ. ਅਨਾਘਾਤਨ੍ਤਿ ਆਘਾਤਵਿਰਹਿਤਂ, ਵਿਕ੍ਖਮ੍ਭਨੇਨ ਵਿਹਤਾਘਾਤਨ੍ਤਿ ਅਤ੍ਥੋ. ਕਤ੍ਥ ਵੁਤ੍ਤਨ੍ਤਿ ਇਦਂ ਸਿਕ੍ਖਾਪਦਂ ਕਿਸ੍ਮਿਂ ਨਗਰੇ ਵੁਤ੍ਤਂ.
ਕਾਲੇਨ ਵਕ੍ਖਾਮੀਤਿਆਦੀਸੁ ਏਕੋ ਏਕਂ ਓਕਾਸਂ ਕਾਰੇਤ੍ਵਾ ਚੋਦੇਨ੍ਤੋ ਕਾਲੇਨ ਵਦਤਿ ਨਾਮ. ਸਙ੍ਘਮਜ੍ਝੇ ਵਾ ਗਣਮਜ੍ਝੇ ਵਾ ਸਲਾਕਗ੍ਗਯਾਗਗ੍ਗਵਿਤਕ੍ਕਮਾਲ਼ਕਭਿਕ੍ਖਾਚਾਰਮਗ੍ਗਆਸਨਸਾਲਾਦੀਸੁ ਵਾ ਉਪਟ੍ਠਾਕੇਹਿ ਪਰਿਵਾਰਿਤਕ੍ਖਣੇ ਵਾ ਚੋਦੇਨ੍ਤੋ ਅਕਾਲੇਨ ਵਦਤਿ ਨਾਮ. ਤਚ੍ਛੇਨ ਵਦਨ੍ਤੋ ਭੂਤੇਨ ਵਦਤਿ ਨਾਮ. ‘‘ਦਹਰਮਹਲ੍ਲਕਪਰਿਸਾਵਚਰਕਪਂਸੁਕੂਲਿਕਧਮ੍ਮਕਥਿਕਪਤਿਰੂਪਂ ਤਵ ਇਦ’’ਨ੍ਤਿ ਵਦਨ੍ਤੋ ਫਰੁਸੇਨ ਵਦਤਿ ਨਾਮ. ਕਾਰਣਨਿਸ੍ਸਿਤਂ ਪਨ ਕਤ੍ਵਾ, ‘‘ਭਨ੍ਤੇ ਮਹਲ੍ਲਕਤ੍ਥ, ਪਰਿਸਾਵਚਰਕਤ੍ਥ, ਪਂਸੁਕੂਲਿਕਤ੍ਥ, ਧਮ੍ਮਕਥਿਕਤ੍ਥਪਤਿਰੂਪਂ ਤੁਮ੍ਹਾਕਮਿਦ’’ਨ੍ਤਿ ਵਦਨ੍ਤੋ ਸਣ੍ਹੇਨ ਵਦਤਿ ਨਾਮ. ਕਾਰਣਨਿਸ੍ਸਿਤਂ ਕਤ੍ਵਾ ਵਦਨ੍ਤੋ ਅਤ੍ਥਸਂਹਿਤੇਨ ਵਦਤਿ ਨਾਮ. ਮੇਤ੍ਤਚਿਤ੍ਤੋ ਵਕ੍ਖਾਮਿ ਨੋ ਦੋਸਨ੍ਤਰੋਤਿ ਮੇਤ੍ਤਚਿਤ੍ਤਂ ਪਚ੍ਚੁਪਟ੍ਠਪੇਤ੍ਵਾ ਵਕ੍ਖਾਮਿ, ਨ ਦੁਟ੍ਠਚਿਤ੍ਤੋ ਹੁਤ੍ਵਾ.
੫. ਰਾਜਨ੍ਤੇਪੁਰਪ੍ਪਵੇਸਨਸੁਤ੍ਤਵਣ੍ਣਨਾ
੪੫. ਪਞ੍ਚਮੇ ਕਤਂ ਵਾ ਕਰਿਸ੍ਸਨ੍ਤਿ ਵਾਤਿ ਮੇਥੁਨਵੀਤਿਕ੍ਕਮਂ ਕਰਿਂਸੁ ਵਾ ਕਰਿਸ੍ਸਨ੍ਤਿ ਵਾ. ਰਤਨਨ੍ਤਿ ਮਣਿਰਤਨਾਦੀਸੁ ਯਂਕਿਞ੍ਚਿ. ਪਤ੍ਥੇਤੀਤਿ ਮਾਰੇਤੁਂ ਇਚ੍ਛਤਿ. ਹਤ੍ਥਿਸਮ੍ਬਾਧਨ੍ਤਿ ਹਤ੍ਥੀਹਿ ਸਮ੍ਬਾਧਂ. ਹਤ੍ਥਿਸਮ੍ਮਦ੍ਦਨ੍ਤਿ ਵਾ ਪਾਠੋ, ਤਸ੍ਸਤ੍ਥੋ – ਹਤ੍ਥੀਹਿ ਸਮ੍ਮਦ੍ਦੋ ਏਤ੍ਥਾਤਿ ਹਤ੍ਥਿਸਮ੍ਮਦ੍ਦਂ. ਸੇਸੇਸੁਪਿ ਏਸੇਵ ਨਯੋ. ਰਜਨੀਯਾਨਿ ਰੂਪਸਦ੍ਦਗਨ੍ਧਰਸਫੋਟ੍ਠਬ੍ਬਾਨੀਤਿ ਏਤਾਨਿ ਰਾਗਜਨਕਾਨਿ ਰੂਪਾਦੀਨਿ ਤਤ੍ਥ ਪਰਿਪੂਰਾਨਿ ਹੋਨ੍ਤਿ.
੬. ਸਕ੍ਕਸੁਤ੍ਤਵਣ੍ਣਨਾ
੪੬. ਛਟ੍ਠੇ ਸੋਕਸਭਯੇਤਿ ਸੋਕੇਨ ਸਭਯੇ. ਸੋਕਭਯੇਤਿ ਵਾ ਪਾਠੋ, ਅਯਮੇਵਤ੍ਥੋ. ਦੁਤਿਯਪਦੇਪਿ ਏਸੇਵ ਨਯੋ. ਯੇਨ ਕੇਨਚਿ ਕਮ੍ਮਟ੍ਠਾਨੇਨਾਤਿ ਕਸਿਵਣਿਜ੍ਜਾਦਿਕਮ੍ਮੇਸੁ ਯੇਨ ਕੇਨਚਿ ਕਮ੍ਮੇਨ. ਅਨਾਪਜ੍ਜ ਅਕੁਸਲਨ੍ਤਿ ਕਿਞ੍ਚਿ ਅਕੁਸਲਂ ਅਨਾਪਜ੍ਜਿਤ੍ਵਾ. ਨਿਬ੍ਬਿਸੇਯ੍ਯਾਤਿ ਉਪ੍ਪਾਦੇਯ੍ਯ ਆਚਿਨੇਯ੍ਯ. ਦਕ੍ਖੋਤਿ ਛੇਕੋ. ਉਟ੍ਠਾਨਸਮ੍ਪਨ੍ਨੋਤਿ ਉਟ੍ਠਾਨਵੀਰਿਯੇਨ ਸਮਨ੍ਨਾਗਤੋ. ਅਲਂ ਵਚਨਾਯਾਤਿ ਯੁਤ੍ਤੋ ਵਚਨਾਯ. ਏਕਨ੍ਤਸੁਖਪ੍ਪਟਿਸਂਵੇਦੀ ਵਿਹਰੇਯ੍ਯਾਤਿ ਏਕਨ੍ਤਮੇਵ ਕਾਯਿਕਚੇਤਸਿਕਸੁਖਂ ਞਾਣੇਨ ਪਟਿਸਂਵੇਦੇਨ੍ਤੋ ਵਿਹਰੇਯ੍ਯ. ਅਨਿਚ੍ਚਾਤਿ ਹੁਤ੍ਵਾ ਅਭਾਵਤੋ. ਤੁਚ੍ਛਾਤਿ ਸਾਰਰਹਿਤਾ. ਮੁਸਾਤਿ ਨਿਚ੍ਚਸੁਭਸੁਖਾ ਵਿਯ ਖਾਯਮਾਨਾਪਿ ਤਥਾ ਨ ਹੋਨ੍ਤੀਤਿ ਮੁਸਾ. ਮੋਸਧਮ੍ਮਾਤਿ ਨਸ੍ਸਨਸਭਾਵਾ. ਤਸ੍ਮਾ ਤੇ ਪਟਿਚ੍ਚ ਦੁਕ੍ਖਂ ਉਪ੍ਪਜ੍ਜਤੀਤਿ ਸਨ੍ਦਸ੍ਸੇਤਿ. ਇਧ ਪਨ ਵੋਤਿ ਏਤ੍ਥ ਵੋ ਤਿ ਨਿਪਾਤਮਤ੍ਤਂ. ਅਪਣ੍ਣਕਂ ਵਾ ਸੋਤਾਪਨ੍ਨੋਤਿ ਅਵਿਰਾਧਿਤਂ ਏਕਂਸੇਨ ਸੋਤਾਪਨ੍ਨੋ ਵਾ ਹੋਤਿ. ਸੋਪਿ ਝਾਨਂ ਨਿਬ੍ਬਤ੍ਤੇਤਿ, ਬ੍ਰਹ੍ਮਲੋਕਂ ਵਾ ਗਨ੍ਤ੍ਵਾ ਛਸੁ ਵਾ ਕਾਮਸਗ੍ਗੇਸੁ ਏਕਨ੍ਤਸੁਖਪ੍ਪਟਿਸਂਵੇਦੀ ਹੁਤ੍ਵਾ ਵਿਹਰੇਯ੍ਯ. ਇਮਸ੍ਮਿਂ ਸੁਤ੍ਤੇ ਸਤ੍ਥਾ ਅਟ੍ਠਙ੍ਗੁਪੋਸਥਸ੍ਸ ਗੁਣਂ ਕਥੇਸਿ.
੭. ਮਹਾਲਿਸੁਤ੍ਤਵਣ੍ਣਨਾ
੪੭. ਸਤ੍ਤਮੇ ਮਿਚ੍ਛਾਪਣਿਹਿਤਨ੍ਤਿ ਮਿਚ੍ਛਾ ਠਪਿਤਂ. ਅਧਮ੍ਮਚਰਿਯਾਵਿਸਮਚਰਿਯਾਤਿ ਅਕੁਸਲਕਮ੍ਮਪਥਵਸੇਨ ਅਧਮ੍ਮਚਰਿਯਸਙ੍ਖਾਤਾ ਵਿਸਮਚਰਿਯਾ. ਕੁਸਲਕਮ੍ਮਪਥਵਸੇਨ ਇਤਰਾ ਵੇਦਿਤਬ੍ਬਾ. ਏਵਮਿਧ ਵਟ੍ਟਮੇਵ ਕਥਿਤਂ.
੮. ਪਬ੍ਬਜਿਤਅਭਿਣ੍ਹਸੁਤ੍ਤਵਣ੍ਣਨਾ
੪੮. ਅਟ੍ਠਮੇ ਪਬ੍ਬਜਿਤੇਨਾਤਿ ਘਰਾਵਾਸਂ ਪਹਾਯ ਸਾਸਨੇ ਪਬ੍ਬਜ੍ਜਂ ਉਪਗਤੇਨ. ਅਭਿਣ੍ਹਨ੍ਤਿ ਅਭਿਕ੍ਖਣਂ ਪੁਨਪ੍ਪੁਨਂ, ਪਚ੍ਚਵੇਕ੍ਖਿਤਬ੍ਬਾ ਓਲੋਕੇਤਬ੍ਬਾ ਸਲ੍ਲਕ੍ਖੇਤਬ੍ਬਾ. ਵੇਵਣ੍ਣਿਯਨ੍ਤਿ ਵਿਵਣ੍ਣਭਾਵਂ. ਤਂ ਪਨੇਤਂ ਵੇਵਣ੍ਣਿਯਂ ਦੁਵਿਧਂ ਹੋਤਿ ਸਰੀਰਵੇਵਣ੍ਣਿਯਂ ਪਰਿਕ੍ਖਾਰਵੇਵਣ੍ਣਿਯਞ੍ਚ. ਤਤ੍ਥ ਕੇਸਮਸ੍ਸੁਓਰੋਪਨੇਨ ਸਰੀਰਵੇਵਣ੍ਣਿਯਂ ਵੇਦਿਤਬ੍ਬਂ. ਪੁਬ੍ਬੇ ਪਨ ਨਾਨਾਵਿਰਾਗਾਨਿ ਸੁਖੁਮਵਤ੍ਥਾਨਿ ਨਿਵਾਸੇਤ੍ਵਾਪਿ ਨਾਨਗ੍ਗਰਸਭੋਜਨਂ ਸੁਵਣ੍ਣਰਜਤਭਾਜਨੇਸੁ ਭੁਞ੍ਜਿਤ੍ਵਾਪਿ ਸਿਰਿਗਬ੍ਭੇ ਵਰਸਯਨਾਸਨੇਸੁ ਨਿਪਜ੍ਜਿਤ੍ਵਾਪਿ ਨਿਸੀਦਿਤ੍ਵਾਪਿ ਸਪ੍ਪਿਨਵਨੀਤਾਦੀਹਿ ਭੇਸਜ੍ਜਂ ਕਤ੍ਵਾਪਿ ਪਬ੍ਬਜਿਤਕਾਲਤੋ ਪਟ੍ਠਾਯ ਛਿਨ੍ਨਸਙ੍ਘਟਿਤਕਸਾਵਰਸਪੀਤਾਨਿ ਵਤ੍ਥਾਨਿ ਨਿਵਾਸੇਤਬ੍ਬਾਨਿ, ਅਯਪਤ੍ਤੇ ਵਾ ਮਤ੍ਤਿਕਪਤ੍ਤੇ ਵਾ ਮਿਸ੍ਸਕੋਦਨੋ ਭੁਞ੍ਜਿਤਬ੍ਬੋ, ਰੁਕ੍ਖਮੂਲਾਦਿਸੇਨਾਸਨੇ ਮੁਞ੍ਜਤਿਣਸਨ੍ਥਰਣਾਦੀਸੁ ਨਿਪਜ੍ਜਿਤਬ੍ਬਂ, ਚਮ੍ਮਖਣ੍ਡਤਟ੍ਟਿਕਾਦੀਸੁ ਨਿਸੀਦਿਤਬ੍ਬਂ, ਪੂਤਿਮੁਤ੍ਤਾਦੀਹਿ ਭੇਸਜ੍ਜਂ ਕਤ੍ਤਬ੍ਬਂ ਹੋਤਿ. ਏਵਮੇਤ੍ਥ ਪਰਿਕ੍ਖਾਰਵੇਵਣ੍ਣਿਯਂ ਵੇਦਿਤਬ੍ਬਂ. ਏਵਂ ਪਚ੍ਚਵੇਕ੍ਖਤੋ ਕੋਪੋ ਚ ਮਾਨੋ ਚ ਪਹੀਯਤਿ.
ਪਰਪਟਿਬਦ੍ਧਾ ਮੇ ਜੀਵਿਕਾਤਿ ਮਯ੍ਹਂ ਪਰੇਸੁ ਪਟਿਬਦ੍ਧਾ ਪਰਾਯਤ੍ਤਾ ਚਤੁਪਚ੍ਚਯਜੀਵਿਕਾਤਿ. ਏਵਂ ਪਚ੍ਚਵੇਕ੍ਖਤੋ ਹਿ ਆਜੀਵੋ ਪਰਿਸੁਜ੍ਝਤਿ, ਪਿਣ੍ਡਪਾਤੋ ਚ ਅਪਚਿਤੋ ਹੋਤਿ, ਚਤੂਸੁ ਪਚ੍ਚਯੇਸੁ ਅਪਚ੍ਚਵੇਕ੍ਖਿਤਪਰਿਭੋਗੋ ਨਾਮ ਨ ਹੋਤਿ. ਅਞ੍ਞੋ ਮੇ ਆਕਪ੍ਪੋ ਕਰਣੀਯੋਤਿ ਯੋ ਗਿਹੀਨਂ ਉਰਂ ਅਭਿਨੀਹਰਿਤ੍ਵਾ ਗੀਵਂ ਪਗ੍ਗਹੇਤ੍ਵਾ ਲਲਿਤੇਨਾਕਾਰੇਨ ਅਨਿਯਤਪਦਵੀਤਿਹਾਰੇਨ ਗਮਨਾਕਪ੍ਪੋ ਹੋਤਿ, ਤਤੋ ਅਞ੍ਞੋਵ ਆਕਪ੍ਪੋ ਮਯਾ ਕਰਣੀਯੋ, ਸਨ੍ਤਿਨ੍ਦ੍ਰਿਯੇਨ ਸਨ੍ਤਮਾਨਸੇਨ ਯੁਗਮਤ੍ਤਦਸ੍ਸਿਨਾ ਵਿਸਮਟ੍ਠਾਨੇ ਉਦਕਸਕਟੇਨੇਵ ਮਨ੍ਦਮਿਤਪਦਵੀਤਿਹਾਰੇਨ ਹੁਤ੍ਵਾ ਗਨ੍ਤਬ੍ਬਨ੍ਤਿ ਪਚ੍ਚਵੇਕ੍ਖਿਤਬ੍ਬਂ. ਏਵਂ ਪਚ੍ਚਵੇਕ੍ਖਤੋ ਹਿ ਇਰਿਯਾਪਥੋ ਸਾਰੁਪ੍ਪੋ ਹੋਤਿ, ਤਿਸ੍ਸੋ ਸਿਕ੍ਖਾ ਪਰਿਪੂਰੇਨ੍ਤਿ. ਕਚ੍ਚਿਨੁਖੋਤਿ ਸਲਕ੍ਖਣੇ ਨਿਪਾਤਸਮੁਦਾਯੋ. ਅਤ੍ਤਾਤਿ ਚਿਤ੍ਤਂ. ਸੀਲਤੋ ਨ ਉਪਵਦਤੀਤਿ ਅਪਰਿਸੁਦ੍ਧਂ ਤੇ ਸੀਲਨ੍ਤਿ ਸੀਲਪਚ੍ਚਯੋ ਨ ਉਪਵਦਤਿ. ਏਵਂ ਪਚ੍ਚਵੇਕ੍ਖਤੋ ਹਿ ਅਜ੍ਝਤ੍ਤਂ ਹਿਰੀ ਸਮੁਟ੍ਠਾਤਿ, ਸਾ ਤੀਸੁ ਦ੍ਵਾਰੇਸੁ ਸਂਵਰਂ ਸਾਧੇਤਿ, ਤੀਸੁ ਦ੍ਵਾਰੇਸੁ ਸਂਵਰੋ ਚਤੁਪਾਰਿਸੁਦ੍ਧਿਸੀਲਂ ਹੋਤਿ, ਚਤੁਪਾਰਿਸੁਦ੍ਧਿਸੀਲੇ ਠਿਤੋ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਗਣ੍ਹਾਤਿ. ਅਨੁਵਿਚ੍ਚ ਵਿਞ੍ਞੂ ਸਬ੍ਰਹ੍ਮਚਾਰੀਤਿ ਪਣ੍ਡਿਤਾ ਸਬ੍ਰਹ੍ਮਚਾਰਿਨੋ ਅਨੁਵਿਚਾਰੇਤ੍ਵਾ. ਏਵਂ ਪਚ੍ਚਵੇਕ੍ਖਤੋ ਹਿ ਬਹਿਦ੍ਧਾ ਓਤ੍ਤਪ੍ਪਂ ਸਣ੍ਠਾਤਿ, ਤਂ ਤੀਸੁ ਦ੍ਵਾਰੇਸੁ ਸਂਵਰਂ ਸਾਧੇਤੀਤਿ ਅਨਨ੍ਤਰਨਯੇਨੇਵ ਵੇਦਿਤਬ੍ਬਂ.
ਨਾਨਾਭਾਵੋ ਵਿਨਾਭਾਵੋਤਿ ਜਾਤਿਯਾ ਨਾਨਾਭਾਵੋ, ਮਰਣੇਨ ਵਿਨਾਭਾਵੋ. ਏਵਂ ਪਚ੍ਚਵੇਕ੍ਖਤੋ ਹਿ ਤੀਸੁ ਦ੍ਵਾਰੇਸੁ ਅਸਂਵੁਤਾਕਾਰੋ ਨਾਮ ਨ ਹੋਤਿ, ਮਰਣਸ੍ਸਤਿ ਸੂਪਟ੍ਠਿਤਾ ਹੋਤਿ. ਕਮ੍ਮਸ੍ਸਕੋਮ੍ਹੀਤਿਆਦੀਸੁ ਕਮ੍ਮਂ ਮਯ੍ਹਂ ਸਕਂ ਅਤ੍ਤਨੋ ਸਨ੍ਤਕਨ੍ਤਿ ਕਮ੍ਮਸ੍ਸਕਾ. ਕਮ੍ਮੇਨ ਦਾਤਬ੍ਬਂ ਫਲਂ ਦਾਯਂ, ਕਮ੍ਮਸ੍ਸ ਦਾਯਂ ਕਮ੍ਮਦਾਯਂ, ਤਂ ਆਦੀਯਾਮੀਤਿ ਕਮ੍ਮਦਾਯਾਦੋ. ਕਮ੍ਮਂ ਮਯ੍ਹਂ ਯੋਨਿ ਕਾਰਣਨ੍ਤਿ ਕਮ੍ਮਯੋਨਿ. ਕਮ੍ਮਂ ਮਯ੍ਹਂ ਬਨ੍ਧੁ ਞਾਤਕੋਤਿ ਕਮ੍ਮਬਨ੍ਧੁ. ਕਮ੍ਮਂ ਮਯ੍ਹਂ ਪਟਿਸਰਣਂ ਪਤਿਟ੍ਠਾਤਿ ਕਮ੍ਮਪਟਿਸਰਣੋ. ਤਸ੍ਸ ਦਾਯਾਦੋ ਭਵਿਸ੍ਸਾਮੀਤਿ ਤਸ੍ਸ ਕਮ੍ਮਸ੍ਸ ਦਾਯਾਦੋ ਤੇਨ ਦਿਨ੍ਨਫਲਂ ਪਟਿਗ੍ਗਾਹਕੋ ਭਵਿਸ੍ਸਾਮਿ. ਏਵਂ ਕਮ੍ਮਸ੍ਸਕਤਂ ਪਨ ਪਚ੍ਚਵੇਕ੍ਖਤੋ ਪਾਪਕਰਣਂ ਨਾਮ ਨ ਹੋਤਿ. ਕਥਂਭੂਤਸ੍ਸ ਮੇ ਰਤ੍ਤਿਨ੍ਦਿਵਾ ਵੀਤਿਵਤ੍ਤਨ੍ਤੀਤਿ ਕਿਨ੍ਨੁ ਖੋ ਮੇ ਵਤ੍ਤਪ੍ਪਟਿਪਤ੍ਤਿਂ ਕਰੋਨ੍ਤਸ੍ਸ, ਉਦਾਹੁ ਅਕਰੋਨ੍ਤਸ੍ਸ, ਬੁਦ੍ਧਵਚਨਂ ਸਜ੍ਝਾਯਨ੍ਤਸ੍ਸ, ਉਦਾਹੁ ਅਸਜ੍ਝਾਯਨ੍ਤਸ੍ਸ, ਯੋਨਿਸੋਮਨਸਿਕਾਰੇ ਕਮ੍ਮਂ ਕਰੋਨ੍ਤਸ੍ਸ, ਉਦਾਹੁ ਅਕਰੋਨ੍ਤਸ੍ਸਾਤਿ ਕਥਂਭੂਤਸ੍ਸ ਮੇ ਰਤ੍ਤਿਨ੍ਦਿਵਾ ਵੀਤਿਵਤ੍ਤਨ੍ਤਿ, ਪਰਿਵਤ੍ਤਨ੍ਤੀਤਿ ਅਤ੍ਥੋ. ਏਵਂ ਪਚ੍ਚਵੇਕ੍ਖਤੋ ਹਿ ਅਪ੍ਪਮਾਦੋ ਪਰਿਪੂਰਤਿ.
ਸੁਞ੍ਞਾਗਾਰੇ ਅਭਿਰਮਾਮੀਤਿ ਵਿਵਿਤ੍ਤੋਕਾਸੇ ਸਬ੍ਬਿਰਿਯਾਪਥੇਸੁ ਏਕਕੋਵ ਹੁਤ੍ਵਾ ਕਚ੍ਚਿ ਨੁ ਖੋ ਅਭਿਰਮਾਮੀਤਿ ਅਤ੍ਥੋ. ਏਵਂ ਪਚ੍ਚਵੇਕ੍ਖਤੋ ਕਾਯਵਿਵੇਕੋ ਪਰਿਪੂਰਤਿ. ਉਤ੍ਤਰਿਮਨੁਸ੍ਸਧਮ੍ਮੋਤਿ ਉਤ੍ਤਰਿਮਨੁਸ੍ਸਾਨਂ ਉਕ੍ਕਟ੍ਠਮਨੁਸ੍ਸਭੂਤਾਨਂ ਝਾਯੀਨਞ੍ਚੇਵ ਅਰਿਯਾਨਞ੍ਚ ਝਾਨਾਦਿਧਮ੍ਮੋ, ਦਸਕੁਸਲਕਮ੍ਮਪਥਸਙ੍ਖਾਤਮਨੁਸ੍ਸਧਮ੍ਮਤੋ ਵਾ ਉਤ੍ਤਰਿਤਰੋ ਵਿਸਿਟ੍ਠਤਰੋ ਧਮ੍ਮੋ ਮੇ ਮਮ ਸਨ੍ਤਾਨੇ ਅਤ੍ਥਿ ਨੁ ਖੋ, ਸਨ੍ਤਿ ਨੁ ਖੋਤਿ ਅਤ੍ਥੋ. ਅਲਮਰਿਯਞਾਣਦਸ੍ਸਨਵਿਸੇਸੋਤਿ ਮਹਗ੍ਗਤਲੋਕੁਤ੍ਤਰਪਞ੍ਞਾ ਪਜਾਨਨਟ੍ਠੇਨ ਞਾਣਂ, ਚਕ੍ਖੁਨਾ ਦਿਟ੍ਠਮਿਵ ਧਮ੍ਮਂ ਪਚ੍ਚਕ੍ਖਕਰਣਤੋ ਦਸ੍ਸਨਟ੍ਠੇਨ ਦਸ੍ਸਨਨ੍ਤਿ ਞਾਣਦਸ੍ਸਨਂ, ਅਰਿਯਂ ਵਿਸੁਦ੍ਧਂ ਉਤ੍ਤਮਂ ਞਾਣਦਸ੍ਸਨਨ੍ਤਿ ਅਰਿਯਞਾਣਦਸ੍ਸਨਂ, ਅਲਂ ਪਰਿਯਤ੍ਤਕਂ ਕਿਲੇਸਵਿਦ੍ਧਂਸਨਸਮਤ੍ਥਂ ਅਰਿਯਞਾਣਦਸ੍ਸਨਮੇਤ੍ਥ, ਅਸ੍ਸ ਵਾਤਿ ਅਲਮਰਿਯਞਾਣਦਸ੍ਸਨੋ, ਝਾਨਾਦਿਭੇਦੋ ਉਤ੍ਤਰਿਮਨੁਸ੍ਸਧਮ੍ਮੋ ਅਲਮਰਿਯਞਾਣਦਸ੍ਸਨੋ ਚ ਸੋ ਵਿਸੇਸੋ ਚਾਤਿ ਅਲਮਰਿਯਞਾਣਦਸ੍ਸਨਵਿਸੇਸੋ. ਅਥ ਵਾ ਤਮੇਵ ਕਿਲੇਸਵਿਦ੍ਧਂਸਨਸਮਤ੍ਥਂ ਵਿਸੁਦ੍ਧਂ ਞਾਣਦਸ੍ਸਨਮੇਵ ਵਿਸੇਸੋਤਿ ਅਲਮਰਿਯਞਾਣਦਸ੍ਸਨਵਿਸੇਸੋ ਵਾ. ਅਧਿਗਤੋਤਿ ਪਟਿਲਦ੍ਧੋ ਮੇ ਅਤ੍ਥਿ ਨੁ ਖੋ. ਸੋਹਨ੍ਤਿ ਪਟਿਲਦ੍ਧਵਿਸੇਸੋ ਸੋ ਅਹਂ. ਪਚ੍ਛਿਮੇ ਕਾਲੇਤਿ ਮਰਣਮਞ੍ਚੇ ਨਿਪਨ੍ਨਕਾਲੇ. ਪੁਟ੍ਠੋਤਿ ਸਬ੍ਰਹ੍ਮਚਾਰੀਹਿ ਅਧਿਗਤਗੁਣਵਿਸੇਸਂ ਪੁਚ੍ਛਿਤੋ. ਨ ਮਙ੍ਕੁ ਭਵਿਸ੍ਸਾਮੀਤਿ ਪਤਿਤਕ੍ਖਨ੍ਧੋ ਨਿਤ੍ਤੇਜੋ ਨ ਹੇਸ੍ਸਾਮੀਤਿ. ਏਵਂ ਪਚ੍ਚਵੇਕ੍ਖਨ੍ਤਸ੍ਸ ਹਿ ਮੋਘਕਾਲਕਿਰਿਯਾ ਨਾਮ ਨ ਹੋਤਿ.
੯-੧੦. ਸਰੀਰਟ੍ਠਧਮ੍ਮਸੁਤ੍ਤਾਦਿਵਣ੍ਣਨਾ
੪੯-੫੦. ਨਵਮੇ ਪੋਨੋਬ੍ਭਵਿਕੋਤਿ ਪੁਨਬ੍ਭਵਨਿਬ੍ਬਤ੍ਤਕੋ. ਭਵਸਙ੍ਖਾਰੋਤਿ ਭਵਸਙ੍ਖਰਣਕਮ੍ਮਂ. ਇਮਸ੍ਮਿਂ ਸੁਤ੍ਤੇ ਵਟ੍ਟਮੇਵ ਕਥਿਤਂ. ਦਸਮੇ ਸੀਲਬਾਹੁਸਚ੍ਚਵੀਰਿਯਸਤਿਪਞ੍ਞਾ ਲੋਕਿਯਲੋਕੁਤ੍ਤਰਾਮਿਸ੍ਸਿਕਾ ਕਥਿਤਾ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.
ਅਕ੍ਕੋਸਵਗ੍ਗੋ ਪਞ੍ਚਮੋ.
ਪਠਮਪਣ੍ਣਾਸਕਂ ਨਿਟ੍ਠਿਤਂ.
੨. ਦੁਤਿਯਪਣ੍ਣਾਸਕਂ
(੬) ੧. ਸਚਿਤ੍ਤਵਗ੍ਗੋ
੧-੪. ਸਚਿਤ੍ਤਸੁਤ੍ਤਾਦਿਵਣ੍ਣਨਾ
੫੧-੫੪. ਦੁਤਿਯਸ੍ਸ ਪਠਮੇ ਸਚਿਤ੍ਤਪਰਿਯਾਯਕੁਸਲੋਤਿ ਅਤ੍ਤਨੋ ਚਿਤ੍ਤਵਾਰਕੁਸਲੋ. ਰਜਨ੍ਤਿ ਆਗਨ੍ਤੁਕਉਪਕ੍ਕਿਲੇਸਂ. ਅਙ੍ਗਣਨ੍ਤਿ ਤਤ੍ਥਜਾਤਕਅਙ੍ਗਕਾਲ਼ਤਿਲਕਾਦਿਂ. ਆਸਵਾਨਂ ਖਯਾਯਾਤਿ ਅਰਹਤ੍ਤਤ੍ਥਾਯ. ਤਤਿਯੇ ਪਟਿਭਾਨੇਨਾਤਿ ਵਚਨਸਣ੍ਠਾਨੇਨ. ਚਤੁਤ੍ਥੇ ਅਧਿਪਞ੍ਞਾਧਮ੍ਮਵਿਪਸ੍ਸਨਾਯਾਤਿ ਸਙ੍ਖਾਰਪਰਿਗ੍ਗਾਹਕਵਿਪਸ੍ਸਨਾਯ.
੮. ਮੂਲਕਸੁਤ੍ਤਵਣ੍ਣਨਾ
੫੮. ਅਟ੍ਠਮੇ ਅਮਤੋਗਧਾਤਿ ਏਤ੍ਥ ਸਉਪਾਦਿਸੇਸਾ ਨਿਬ੍ਬਾਨਧਾਤੁ ਕਥਿਤਾ, ਨਿਬ੍ਬਾਨਪਰਿਯੋਸਾਨਾਤਿ ਏਤ੍ਥ ਅਨੁਪਾਦਿਸੇਸਾ. ਅਨੁਪਾਦਿਸੇਸਂ ਪਤ੍ਤਸ੍ਸ ਹਿ ਸਬ੍ਬੇ ਧਮ੍ਮਾ ਪਰਿਯੋਸਾਨਪ੍ਪਤ੍ਤਾ ਨਾਮ ਹੋਨ੍ਤਿ. ਸੇਸਪਦਾਨਿ ਹੇਟ੍ਠਾ ਵੁਤ੍ਤਤ੍ਥਾਨੇਵ.
੯. ਪਬ੍ਬਜ੍ਜਾਸੁਤ੍ਤਵਣ੍ਣਨਾ
੫੯. ਨਵਮੇ ਤਸ੍ਮਾਤਿ ਯਸ੍ਮਾ ਏਵਂ ਅਪਰਿਚਿਤਚਿਤ੍ਤਸ੍ਸ ਸਾਮਞ੍ਞਤ੍ਥੋ ਨ ਸਮ੍ਪਜ੍ਜਤਿ, ਤਸ੍ਮਾ. ਯਥਾਪਬ੍ਬਜ੍ਜਾਪਰਿਚਿਤਞ੍ਚ ਨੋ ਚਿਤ੍ਤਂ ਭਵਿਸ੍ਸਤੀਤਿ ਯਥਾ ਪਬ੍ਬਜ੍ਜਾਨੁਰੂਪੇਨ ਪਰਿਚਿਤਂ. ਯੇ ਹਿ ਕੇਚਿ ਪਬ੍ਬਜਨ੍ਤਿ ਨਾਮ, ਸਬ੍ਬੇ ਤੇ ਅਰਹਤ੍ਤਂ ਪਤ੍ਥੇਤ੍ਵਾ. ਤਸ੍ਮਾ ਯਂ ਚਿਤ੍ਤਂ ਅਰਹਤ੍ਤਾਧਿਗਮਤ੍ਥਾਯ ਪਰਿਚਿਤਂ ਵਡ੍ਢਿਤਂ, ਤਂ ਯਥਾਪਬ੍ਬਜ੍ਜਾਪਰਿਚਿਤਂ ਨਾਮਾਤਿ ਵੇਦਿਤਬ੍ਬਂ. ਏਵਰੂਪਂ ਪਨ ਚਿਤ੍ਤਂ ਭਵਿਸ੍ਸਤੀਤਿ ਸਿਕ੍ਖਿਤਬ੍ਬਂ. ਲੋਕਸ੍ਸ ਸਮਞ੍ਚ ਵਿਸਮਞ੍ਚਾਤਿ ਸਤ੍ਤਲੋਕਸ੍ਸ ਸੁਚਰਿਤਦੁਚ੍ਚਰਿਤਾਨਿ. ਲੋਕਸ੍ਸ ਭਵਞ੍ਚ ਵਿਭਵਞ੍ਚਾਤਿ ਤਸ੍ਸ ਵਡ੍ਢਿਞ੍ਚ ਵਿਨਾਸਞ੍ਚ, ਤਥਾ ਸਮ੍ਪਤ੍ਤਿਞ੍ਚ ਵਿਪਤ੍ਤਿਞ੍ਚ. ਲੋਕਸ੍ਸ ਸਮੁਦਯਞ੍ਚ ਅਤ੍ਥਙ੍ਗਮਞ੍ਚਾਤਿ ਪਨ ਸਙ੍ਖਾਰਲੋਕਂ ਸਨ੍ਧਾਯ ਵੁਤ੍ਤਂ, ਖਨ੍ਧਾਨਂ ਨਿਬ੍ਬਤ੍ਤਿਞ੍ਚ ਭੇਦਞ੍ਚਾਤਿ ਅਤ੍ਥੋ.
੧੦. ਗਿਰਿਮਾਨਨ੍ਦਸੁਤ੍ਤਵਣ੍ਣਨਾ
੬੦. ਦਸਮੇ ਅਨੁਕਮ੍ਪਂ ਉਪਾਦਾਯਾਤਿ ਗਿਰਿਮਾਨਨ੍ਦਤ੍ਥੇਰੇ ਅਨੁਕਮ੍ਪਂ ਪਟਿਚ੍ਚ. ਚਕ੍ਖੁਰੋਗੋਤਿਆਦਯੋ ਵਤ੍ਥੁਵਸੇਨ ਵੇਦਿਤਬ੍ਬਾ. ਨਿਬ੍ਬਤ੍ਤਿਤਪ੍ਪਸਾਦਾਨਞ੍ਹਿ ਰੋਗੋ ਨਾਮ ਨਤ੍ਥਿ. ਕਣ੍ਣਰੋਗੋਤਿ ਬਹਿਕਣ੍ਣੇ ਰੋਗੋ. ਪਿਨਾਸੋਤਿ ਬਹਿਨਾਸਿਕਾਯ ਰੋਗੋ. ਨਖਸਾਤਿ ਨਖੇਹਿ ਵਿਲੇਖਿਤਟ੍ਠਾਨੇ ਰੋਗੋ. ਪਿਤ੍ਤਸਮੁਟ੍ਠਾਨਾਤਿ ਪਿਤ੍ਤਸਮੁਟ੍ਠਿਤਾ. ਤੇ ਕਿਰ ਦ੍ਵਤ੍ਤਿਂਸ ਹੋਨ੍ਤਿ. ਸੇਮ੍ਹਸਮੁਟ੍ਠਾਨਾਦੀਸੁਪਿ ਏਸੇਵ ਨਯੋ. ਉਤੁਪਰਿਣਾਮਜਾਤਿ ਉਤੁਪਰਿਣਾਮੇਨ ਅਚ੍ਚੁਣ੍ਹਾਤਿਸੀਤੇਨ ਉਪ੍ਪਜ੍ਜਨਕਰੋਗਾ. ਵਿਸਮਪਰਿਹਾਰਜਾਤਿ ਅਤਿਚਿਰਟ੍ਠਾਨਨਿਸਜ੍ਜਾਦਿਨਾ ਵਿਸਮਪਰਿਹਾਰੇਨ ਜਾਤਾ. ਓਪਕ੍ਕਮਿਕਾਤਿ ਵਧਬਨ੍ਧਨਾਦਿਨਾ ਉਪਕ੍ਕਮੇਨ ਜਾਤਾ. ਕਮ੍ਮਵਿਪਾਕਜਾਤਿ ਬਲਵਕਮ੍ਮਵਿਪਾਕਸਮ੍ਭੂਤਾ. ਸਨ੍ਤਨ੍ਤਿ ਰਾਗਾਦਿਸਨ੍ਤਤਾਯ ਸਨ੍ਤਂ. ਅਤਪ੍ਪਕਟ੍ਠੇਨ ਪਣੀਤਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.
ਸਚਿਤ੍ਤਵਗ੍ਗੋ ਪਠਮੋ.