.ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ.
ਅਙ੍ਗੁਤ੍ਤਰਨਿਕਾਯੇ
ਏਕਾਦਸਕਨਿਪਾਤ-ਅਟ੍ਠਕਥਾ
੧. ਨਿਸ੍ਸਯਵਗ੍ਗੋ
੧-੬. ਕਿਮਤ੍ਥਿਯਸੁਤ੍ਤਾਦਿਵਣ੍ਣਨਾ
੧-੬. ਏਕਾਦਸਕਨਿਪਾਤਸ੍ਸ ਪਠਮਾਦੀਨਿ ਹੇਟ੍ਠਾ ਵੁਤ੍ਤਨਯਾਨੇਵ. ਕੇਵਲਞ੍ਚੇਤ੍ਥ ਆਦਿਤੋ ਪਞ੍ਚਸੁ ਨਿਬ੍ਬਿਦਾਵਿਰਾਗਂ ਦ੍ਵਿਧਾ ਭਿਨ੍ਦਿਤ੍ਵਾ ਏਕਾਦਸਙ੍ਗਾਨਿ ਕਤਾਨਿ. ਛਟ੍ਠੇ ਸਿਕ੍ਖਾਪਚ੍ਚਕ੍ਖਾਨਂ ਅਧਿਕਂ.
੭-੮. ਪਠਮਸਞ੍ਞਾਸੁਤ੍ਤਾਦਿਵਣ੍ਣਨਾ
੭-੮. ਸਤ੍ਤਮੇ ਅਤ੍ਥੇਨ ਅਤ੍ਥੋਤਿ ਅਤ੍ਥੇਨ ਸਦ੍ਧਿਮਤ੍ਥੋ. ਬ੍ਯਞ੍ਜਨੇਨ ਬ੍ਯਞ੍ਜਨਨ੍ਤਿ ਬ੍ਯਞ੍ਜਨੇਨ ਸਦ੍ਧਿਂ ਬ੍ਯਞ੍ਜਨਂ. ਸਂਸਨ੍ਦਿਸ੍ਸਤੀਤਿ ਸਮ੍ਪਵਤ੍ਤਿਸ੍ਸਤਿ. ਸਮੇਸ੍ਸਤੀਤਿ ਸਮਾਨਂ ਭਵਿਸ੍ਸਤਿ. ਨ ਵਿਗ੍ਗਯ੍ਹਿਸ੍ਸਤੀਤਿ ਨ ਵਿਰਜ੍ਝਿਸ੍ਸਤਿ. ਅਗ੍ਗਪਦਸ੍ਮਿਨ੍ਤਿ ਨਿਬ੍ਬਾਨੇ. ਅਟ੍ਠਮੇ ਪਚ੍ਚਵੇਕ੍ਖਣਾ ਕਥਿਤਾ.
੯. ਸਦ੍ਧਸੁਤ੍ਤਵਣ੍ਣਨਾ
੯. ਨਵਮੇ ਦੋਣਿਯਾ ਬਦ੍ਧੋਤਿ ਯਵਸਸ੍ਸਦੋਣਿਯਾ ਸਮੀਪੇ ਬਦ੍ਧੋ. ਅਨ੍ਤਰਂ ਕਰਿਤ੍ਵਾਤਿ ਅਬ੍ਭਨ੍ਤਰੇ ਕਤ੍ਵਾ. ਝਾਯਤੀਤਿ ਚਿਨ੍ਤੇਤਿ. ਪਜ੍ਝਾਯਤੀਤਿ ਇਤੋ ਚਿਤੋ ਚ ਨਾਨਪ੍ਪਕਾਰਕਂ ਝਾਯਤਿ. ਨਿਜ੍ਝਾਯਤੀਤਿ ਨਿਰਨ੍ਤਰਵਸੇਨ ਨਿਬਦ੍ਧਂ ਝਾਯਤਿ. ਪਥਵਿਮ੍ਪਿ ਨਿਸ੍ਸਾਯ ਝਾਯਤੀਤਿ ਸਮਾਪਤ੍ਤਿਯਂ ਸਨਿਕਨ੍ਤਿਕਵਸੇਨੇਤਂ ਵੁਤ੍ਤਂ. ਸਮਾਪਤ੍ਤਿਯਞ੍ਹਿ ਸਨਿਕਨ੍ਤਿਕਤ੍ਤਾ ਏਸ ਖਲ਼ੁਙ੍ਕੋ ਨਾਮ ਕਤੋ. ਆਪਾਦੀਸੁਪਿ ਏਸੇਵ ਨਯੋ.
ਕਥਞ੍ਚ ਸਦ੍ਧ ਆਜਾਨੀਯਝਾਯਿਤਂ ਹੋਤੀਤਿ ਕਥਂ ਕਾਰਣਾਕਾਰਣਂ ਜਾਨਨ੍ਤਸ੍ਸ ਸਿਨ੍ਧਵਸ੍ਸ ਝਾਯਿਤਂ ਹੋਤਿ. ਯਥਾ ਇਣਨ੍ਤਿਆਦੀਸੁ ਇਣਸਦਿਸਂ ਬਨ੍ਧਨਸਦਿਸਂ ਧਨਜਾਨਿਸਦਿਸਂ ਕਲਿਸਙ੍ਖਾਤਮਹਾਪਰਾਧਸਦਿਸਞ੍ਚ ਕਤ੍ਵਾ ਅਤ੍ਤਨੋ ਅਭਿਮੁਖਸ੍ਸ ਪਤੋਦਸ੍ਸ ਅਜ੍ਝੋਹਰਣਸਙ੍ਖਾਤਂ ਪਤਨਂ ਵਿਪਸ੍ਸਤੀਤਿ ਅਤ੍ਥੋ. ਨੇਵ ਪਥਵਿਂ ਨਿਸ੍ਸਾਯ ਝਾਯਤੀਤਿ ਸਮਾਪਤ੍ਤਿਸੁਖਨਿਕਨ੍ਤਿਯਾ ਅਭਾਵੇਨ ਪਥਵਿਆਰਮ੍ਮਣਾਯ ਚਤੁਕ੍ਕਪਞ੍ਚਕਜ੍ਝਾਨਸਞ੍ਞਾਯ ਨ ਝਾਯਤਿ, ਨਿਯਨ੍ਤਿਯਾ ਅਭਾਵੇਨੇਵ ਸੋ ਆਜਾਨੀਯੋ ਨਾਮ ਹੋਤੀਤਿ. ਝਾਯਤਿ ਚ ਪਨਾਤਿ ਨਿਬ੍ਬਾਨਾਰਮ੍ਮਣਾਯ ਫਲਸਮਾਪਤ੍ਤਿਯਾ ਝਾਯਤਿ. ਪਥਵਿਯਂ ਪਥਵਿਸਞ੍ਞਾ ਵਿਭੂਤਾ ਹੋਤੀਤਿ ਪਥਵਾਰਮ੍ਮਣੇ ਉਪ੍ਪਨ੍ਨਾ ਚਤੁਕ੍ਕਪਞ੍ਚਕਜ੍ਝਾਨਸਞ੍ਞਾ ਵਿਭੂਤਾ ਪਾਕਟਾ ਹੋਤਿ. ‘‘ਵਿਭੂਤਾ, ਭਨ੍ਤੇ, ਰੂਪਸਞ੍ਞਾ ਅਵਿਭੂਤਾ ਅਟ੍ਠਿਕਸਞ੍ਞਾ’’ਤਿ ਇਮਸ੍ਮਿਞ੍ਹਿ ਸੁਤ੍ਤੇ ਸਮਤਿਕ੍ਕਮਸ੍ਸ ਅਤ੍ਥਿਤਾਯ ਵਿਭੂਤਤਾ ਵੁਤ੍ਤਾ, ਇਧ ਪਨ ਵਿਪਸ੍ਸਨਾਵਸੇਨ ਅਨਿਚ੍ਚਦੁਕ੍ਖਾਨਤ੍ਤਤੋ ਦਿਟ੍ਠਤ੍ਤਾ ਵਿਭੂਤਾ ਨਾਮ ਜਾਤਾ. ਆਪੋਸਞ੍ਞਾਦੀਸੁਪਿ ਏਸੇਵ ਨਯੋ. ਏਵਮੇਤ੍ਥ ਹੇਟ੍ਠਾ ਵਿਯ ਸਮਾਪਤ੍ਤਿਵਸੇਨ ਸਮਤਿਕ੍ਕਮਂ ਅਵਤ੍ਵਾ ਵਿਪਸ੍ਸਨਾਚਾਰਵਸੇਨ ਸਮਤਿਕ੍ਕਮੋ ਵੁਤ੍ਤੋ. ਏਵਂ ਝਾਯੀਤਿ ਏਵਂ ਵਿਪਸ੍ਸਨਾਪਟਿਪਾਟਿਯਾ ਆਗਨ੍ਤ੍ਵਾ ਉਪ੍ਪਾਦਿਤਾਯ ਫਲਸਮਾਪਤ੍ਤਿਯਾ ਝਾਯਨ੍ਤੋ.
੧੦. ਮੋਰਨਿਵਾਪਸੁਤ੍ਤਵਣ੍ਣਨਾ
੧੦. ਦਸਮੇ ਅਚ੍ਚਨ੍ਤਨਿਟ੍ਠੋਤਿ ਅਨ੍ਤਂ ਅਤੀਤਤ੍ਤਾ ਅਚ੍ਚਨ੍ਤਸਙ੍ਖਾਤਂ ਅਵਿਨਾਸਧਮ੍ਮਂ ਨਿਬ੍ਬਾਨਂ ਨਿਟ੍ਠਾ ਅਸ੍ਸਾਤਿ ਅਚ੍ਚਨ੍ਤਨਿਟ੍ਠੋ. ਇਮਿਨਾ ਨਯੇਨ ਸੇਸਪਦਾਨਿ ਵੇਦਿਤਬ੍ਬਾਨਿ. ਜਨੇਤਸ੍ਮਿਨ੍ਤਿ ਜਨਿਤਸ੍ਮਿਂ, ਪਜਾਯਾਤਿ ਅਤ੍ਥੋ. ਯੇ ਗੋਤ੍ਤਪਟਿਸਾਰਿਨੋਤਿ ਯੇ ਜਨਾ ਤਸ੍ਮਿਂ ਗੋਤ੍ਤੇ ਪਟਿਸਰਨ੍ਤਿ ‘‘ਅਹਂ ਗੋਤਮੋ, ਅਹਂ ਕਸ੍ਸਪੋ’’ਤਿ, ਤੇਸੁ ਲੋਕੇ ਗੋਤ੍ਤਪਟਿਸਾਰੀਸੁ ਖਤ੍ਤਿਯੋ ਸੇਟ੍ਠੋ. ਅਨੁਮਤਾ ਮਯਾਤਿ ਮਮ ਸਬ੍ਬਞ੍ਞੁਤਞ੍ਞਾਣੇਨ ਸਦ੍ਧਿਂ ਸਂਸਨ੍ਦੇਤ੍ਵਾ ਦੇਸਿਤਾ ਮਯਾ ਅਨੁਞ੍ਞਾਤਾ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.
ਨਿਸ੍ਸਯਵਗ੍ਗੋ ਪਠਮੋ.
੨. ਅਨੁਸ੍ਸਤਿਵਗ੍ਗੋ
੧-੨. ਮਹਾਨਾਮਸੁਤ੍ਤਦ੍ਵਯਵਣ੍ਣਨਾ
੧੧-੧੨. ਦੁਤਿਯਸ੍ਸ ਪਠਮੇ ਨਾਨਾਵਿਹਾਰੇਹਿ ਵਿਹਰਤਨ੍ਤਿ ਗਿਹੀਨਂ ਨਿਬਦ੍ਧੋ ਏਕੋ ਵਿਹਾਰੋ ਨਾਮ ਨਤ੍ਥਿ, ਤਸ੍ਮਾ ਅਮ੍ਹਾਕਂ ਅਨਿਬਦ੍ਧਵਿਹਾਰੇਨ ਵਿਹਰਨ੍ਤਾਨਂ ਕੇਨ ਵਿਹਾਰੇਨ ਕਤਰੇਨ ਨਿਬਦ੍ਧਵਿਹਾਰੇਨ ਵਿਹਾਤਬ੍ਬਨ੍ਤਿ ਪੁਚ੍ਛਤਿ. ਆਰਾਧਕੋਤਿ ਸਮ੍ਪਾਦਕੋ ਪਰਿਪੂਰਕੋ. ਧਮ੍ਮਸੋਤਸਮਾਪਨ੍ਨੋ ਬੁਦ੍ਧਾਨੁਸ੍ਸਤਿਂ ਭਾਵੇਤੀਤਿ ਧਮ੍ਮਸੋਤਸਮਾਪਨ੍ਨੋ ਹੁਤ੍ਵਾ ਬੁਦ੍ਧਾਨੁਸ੍ਸਤਿਂ ਭਾਵੇਤਿ. ਦੁਤਿਯੇ ਗਿਲਾਨਾ ਵੁਟ੍ਠਿਤੋਤਿ ਗਿਲਾਨੋ ਹੁਤ੍ਵਾ ਵੁਟ੍ਠਿਤੋ.
੩. ਨਨ੍ਦਿਯਸੁਤ੍ਤਵਣ੍ਣਨਾ
੧੩. ਤਤਿਯੇ ਕਲ੍ਯਾਣਮਿਤ੍ਤੇਤਿ ਸੁਮਿਤ੍ਤੇ. ਏਵਮੇਤ੍ਥ ਕਲ੍ਯਾਣਮਿਤ੍ਤਵਸੇਨ ਸਙ੍ਘਾਨੁਸ੍ਸਤਿ ਕਥਿਤਾ. ਕਬਲ਼ੀਕਾਰਾਹਾਰਭਕ੍ਖਾਨਨ੍ਤਿ ਕਾਮਾਵਚਰਦੇਵਾਨਂ. ਅਸਮਯਵਿਮੁਤ੍ਤੋਤਿ ਅਸਮਯਵਿਮੁਤ੍ਤਿਯਾ ਵਿਮੁਤ੍ਤੋ ਖੀਣਾਸਵੋ.
੪. ਸੁਭੂਤਿਸੁਤ੍ਤਵਣ੍ਣਨਾ
੧੪. ਚਤੁਤ੍ਥੇ ਕੋ ਨਾਮਾਯਂ ਸੁਭੂਤੀ ਭਿਕ੍ਖੂਤਿ ਜਾਨਨ੍ਤੋਪਿ ਸਤ੍ਥਾ ਕਥਾਸਮੁਟ੍ਠਾਪਨਤ੍ਥਂ ਪੁਚ੍ਛਤਿ. ਸੁਦਤ੍ਤਸ੍ਸ ਉਪਾਸਕਸ੍ਸ ਪੁਤ੍ਤੋਤਿ ਅਨਾਥਪਿਣ੍ਡਿਕਂ ਸਨ੍ਧਾਯਾਹ. ਅਨਾਥਪਿਣ੍ਡਿਕਸ੍ਸ ਹਿ ਪੁਤ੍ਤੋ ਅਤ੍ਤਨੋ ਚੂਲ਼ਪਿਤੁ ਸਨ੍ਤਿਕੇ ਪਬ੍ਬਜਿਤੋ, ਅਥ ਨਂ ਸੁਭੂਤਿਤ੍ਥੇਰੋ ਆਦਾਯ ਸਤ੍ਥੁ ਸਨ੍ਤਿਕਂ ਅਗਮਾਸਿ. ਸਦ੍ਧਾਪਦਾਨੇਸੂਤਿ ਸਦ੍ਧਾਨਂ ਪੁਗ੍ਗਲਾਨਂ ਅਪਦਾਨੇਸੁ ਲਕ੍ਖਣੇਸੁ.
੫. ਮੇਤ੍ਤਸੁਤ੍ਤਵਣ੍ਣਨਾ
੧੫. ਪਞ੍ਚਮੇ ਸੁਖਂ ਸੁਪਤੀਤਿ ਯਥਾ ਸੇਸਜਨਾ ਸਮ੍ਪਰਿਵਤ੍ਤਮਾਨਾ ਕਾਕਚ੍ਛਮਾਨਾ ਦੁਕ੍ਖਂ ਸੁਪਨ੍ਤਿ, ਏਵਂ ਅਸੁਪਿਤ੍ਵਾ ਸੁਖਂ ਸੁਪਤਿ. ਨਿਦ੍ਦਂ ਓਕ੍ਕਮਨ੍ਤੋਪਿ ਸਮਾਪਤ੍ਤਿਂ ਸਮਾਪਨ੍ਨੋ ਵਿਯ ਹੋਤਿ. ਸੁਖਂ ਪਟਿਬੁਜ੍ਝਤੀਤਿ ਯਥਾ ਅਞ੍ਞੇ ਨਿਤ੍ਥੁਨਨ੍ਤਾ ਵਿਜਮ੍ਭਮਾਨਾ ਸਮ੍ਪਰਿਵਤ੍ਤਨ੍ਤਾ ਦੁਕ੍ਖਂ ਪਟਿਬੁਜ੍ਝਨ੍ਤਿ, ਏਵਂ ਅਪ੍ਪਟਿਬੁਜ੍ਝਿਤ੍ਵਾ ਵਿਕਸਮਾਨਂ ਵਿਯ ਪਦੁਮਂ ਸੁਖਂ ਨਿਬ੍ਬਿਕਾਰੋ ਪਟਿਬੁਜ੍ਝਤਿ. ਨ ਪਾਪਕਂ ਸੁਪਿਨਂ ਪਸ੍ਸਤੀਤਿ ਸੁਪਿਨਂ ਪਸ੍ਸਨ੍ਤੋਪਿ ਭਦ੍ਦਕਮੇਵ ਸੁਪਿਨਂ ਪਸ੍ਸਤਿ, ਚੇਤਿਯਂ ਵਨ੍ਦਨ੍ਤੋ ਵਿਯ ਪੂਜਂ ਕਰੋਨ੍ਤੋ ਵਿਯ ਚ ਧਮ੍ਮਂ ਸੁਣਨ੍ਤੋ ਵਿਯ ਚ ਹੋਤਿ. ਯਥਾ ਪਨਞ੍ਞੇ ਅਤ੍ਤਾਨਂ ਚੋਰੇਹਿ ਸਮ੍ਪਰਿਵਾਰਿਤਂ ਵਿਯ ਵਾਲ਼ੇਹਿ ਉਪਦ੍ਦੁਤਂ ਵਿਯ ਪਪਾਤੇ ਪਤਨ੍ਤਂ ਵਿਯ ਚ ਪਸ੍ਸਨ੍ਤਿ, ਨ ਏਵਂ ਪਾਪਕਂ ਸੁਪਿਨਂ ਪਸ੍ਸਤਿ.
ਮਨੁਸ੍ਸਾਨਂ ਪਿਯੋ ਹੋਤੀਤਿ ਉਰੇ ਆਮੁਕ੍ਕਮੁਤ੍ਤਾਹਾਰੋ ਵਿਯ ਸੀਸੇ ਪਿਲ਼ਨ੍ਧਿਤਮਾਲਾ ਵਿਯ ਚ ਮਨੁਸ੍ਸਾਨਂ ਪਿਯੋ ਹੋਤਿ ਮਨਾਪੋ. ਅਮਨੁਸ੍ਸਾਨਂ ਪਿਯੋ ਹੋਤੀਤਿ ਯਥੇਵ ਮਨੁਸ੍ਸਾਨਂ, ਅਮਨੁਸ੍ਸਾਨਮ੍ਪਿ ਪਿਯੋ ਹੋਤਿ ਵਿਸਾਖਤ੍ਥੇਰੋ ਵਿਯ. ਵਤ੍ਥੁ ਵਿਸੁਦ੍ਧਿਮਗ੍ਗੇ (ਵਿਸੁਦ੍ਧਿ. ੧.੨੫੮) ਮੇਤ੍ਤਾਕਮ੍ਮਟ੍ਠਾਨਨਿਦ੍ਦੇਸੇ ਵਿਤ੍ਥਾਰਿਤਮੇਵ. ਦੇਵਤਾ ਰਕ੍ਖਨ੍ਤੀਤਿ ਪੁਤ੍ਤਮਿਵ ਮਾਤਾਪਿਤਰੋ ਦੇਵਤਾ ਰਕ੍ਖਨ੍ਤਿ. ਨਾਸ੍ਸ ਅਗ੍ਗਿ ਵਾ ਵਿਸਂ ਵਾ ਸਤ੍ਥਂ ਵਾ ਕਮਤੀਤਿ ਮੇਤ੍ਤਾਵਿਹਾਰਿਸ੍ਸ ਕਾਯੇ ਉਤ੍ਤਰਾਯ ਉਪਾਸਿਕਾਯ ਵਿਯ ਅਗ੍ਗਿ ਵਾ, ਸਂਯੁਤ੍ਤਭਾਣਕਚੂਲ਼ਸੀਵਤ੍ਥੇਰਸ੍ਸੇਵ ਵਿਸਂ ਵਾ, ਸਂਕਿਚ੍ਚਸਾਮਣੇਰਸ੍ਸੇਵ ਸਤ੍ਥਂ ਵਾ ਨ ਕਮਤਿ ਨਪ੍ਪਵਿਸਤਿ, ਨਾਸ੍ਸ ਕਾਯਂ ਵਿਕੋਪੇਤੀਤਿ ਵੁਤ੍ਤਂ ਹੋਤਿ. ਧੇਨੁਵਤ੍ਥੁਮ੍ਪਿ ਚੇਤ੍ਥ ਕਥਯਨ੍ਤਿ. ਏਕਾ ਕਿਰ ਧੇਨੁ ਵਚ੍ਛਕਸ੍ਸ ਖੀਰਧਾਰਂ ਮੁਞ੍ਚਮਾਨਾ ਅਟ੍ਠਾਸਿ. ਏਕੋ ਲੁਦ੍ਦਕੋ ‘‘ਤਂ ਵਿਜ੍ਝਿਸ੍ਸਾਮੀ’’ਤਿ ਹਤ੍ਥੇਨ ਸਮ੍ਪਰਿਵਤ੍ਤੇਤ੍ਵਾ ਦੀਘਦਣ੍ਡਂ ਸਤ੍ਤਿਂ ਮੁਞ੍ਚਿ. ਸਾ ਤਸ੍ਸਾ ਸਰੀਰਂ ਆਹਚ੍ਚ ਤਾਲਪਣ੍ਣਂ ਵਿਯ ਵਟ੍ਟਮਾਨਾ ਗਤਾ, ਨੇਵ ਉਪਚਾਰਬਲੇਨ ਨ ਅਪ੍ਪਨਾਬਲੇਨ, ਕੇਵਲਂ ਵਚ੍ਛਕੇ ਬਲਵਹਿਤਚਿਤ੍ਤਤਾਯ. ਏਵਂ ਮਹਾਨੁਭਾਵਾ ਮੇਤ੍ਤਾ.
ਤੁਵਟਂ ਚਿਤ੍ਤਂ ਸਮਾਧਿਯਤੀਤਿ ਮੇਤ੍ਤਾਵਿਹਾਰਿਨੋ ਖਿਪ੍ਪਮੇਵ ਚਿਤ੍ਤਂ ਸਮਾਧਿਯਤਿ, ਨਤ੍ਥਿ ਤਸ੍ਸ ਦਨ੍ਧਾਯਿਤਤ੍ਤਂ. ਮੁਖਵਣ੍ਣੋ ਵਿਪ੍ਪਸੀਦਤੀਤਿ ਬਨ੍ਧਨਾ ਪਵੁਤ੍ਤਤਾਲਪਕ੍ਕਂ ਵਿਯ ਚਸ੍ਸ ਵਿਪ੍ਪਸਨ੍ਨਵਣ੍ਣਂ ਮੁਖਂ ਹੋਤਿ. ਅਸਮ੍ਮੂਲ਼੍ਹੋ ਕਾਲਂ ਕਰੋਤੀਤਿ ਮੇਤ੍ਤਾਵਿਹਾਰਿਨੋ ਸਮ੍ਮੋਹਮਰਣਂ ਨਾਮ ਨਤ੍ਥਿ, ਅਸਮ੍ਮੂਲ਼੍ਹੋ ਪਨ ਨਿਦ੍ਦਂ ਓਕ੍ਕਮਨ੍ਤੋ ਵਿਯ ਕਾਲਂ ਕਰੋਤਿ. ਉਤ੍ਤਰਿ ਅਪ੍ਪਟਿਵਿਜ੍ਝਨ੍ਤੋਤਿ ਮੇਤ੍ਤਾਸਮਾਪਤ੍ਤਿਤੋ ਉਤ੍ਤਰਿ ਅਰਹਤ੍ਤਂ ਅਧਿਗਨ੍ਤੁਂ ਅਸਕ੍ਕੋਨ੍ਤੋ ਇਤੋ ਚਵਿਤ੍ਵਾ ਸੁਤ੍ਤਪ੍ਪਬੁਦ੍ਧੋ ਵਿਯ ਬ੍ਰਹ੍ਮਲੋਕਂ ਉਪਪਜ੍ਜਤੀਤਿ.
੬. ਅਟ੍ਠਕਨਾਗਰਸੁਤ੍ਤਵਣ੍ਣਨਾ
੧੬. ਛਟ੍ਠੇ ਦਸਮੋਤਿ ਜਾਤਿਗੋਤ੍ਤਵਸੇਨ ਚੇਵ ਸਾਰਪਤ੍ਤਕੁਲਗਣਨਾਯ ਚ ਦਸਮੇ ਠਾਨੇ ਗਣੀਯਤਿ, ਤੇਨਸ੍ਸ ਦਸਮੋਤ੍ਵੇਵ ਨਾਮਂ ਜਾਤਂ. ਅਟ੍ਠਕਨਾਗਰੋਤਿ ਅਟ੍ਠਕਨਗਰਵਾਸੀ. ਕੁਕ੍ਕੁਟਾਰਾਮੇਤਿ ਕੁਕ੍ਕੁਟਸੇਟ੍ਠਿਨਾ ਕਾਰਿਤੇ ਆਰਾਮੇ.
ਤੇਨ ਭਗਵਤਾ…ਪੇ… ਸਮ੍ਮਦਕ੍ਖਾਤੋਤਿ ਏਤ੍ਥ ਅਯਂ ਸਙ੍ਖੇਪਤ੍ਥੋ – ਯੋ ਸੋ ਭਗਵਾ ਸਮਤਿਂਸ ਪਾਰਮਿਯੋ ਪੂਰੇਤ੍ਵਾ ਸਬ੍ਬਕਿਲੇਸੇ ਭਞ੍ਜਿਤ੍ਵਾ ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਂ ਅਭਿਸਮ੍ਬੁਦ੍ਧੋ, ਤੇਨ ਭਗਵਤਾ ਤੇਸਂ ਤੇਸਂ ਸਤ੍ਤਾਨਂ ਆਸਯਾਨੁਸਯਂ ਜਾਨਤਾ, ਹਤ੍ਥਤਲੇ ਠਪਿਤਂ ਆਮਲਕਂ ਵਿਯ ਸਬ੍ਬਞੇਯ੍ਯਧਮ੍ਮੇ ਪਸ੍ਸਤਾ, ਅਪਿਚ ਪੁਬ੍ਬੇਨਿਵਾਸਾਦੀਹਿ ਜਾਨਤਾ, ਦਿਬ੍ਬੇਨ ਚਕ੍ਖੁਨਾ ਪਸ੍ਸਤਾ, ਤੀਹਿ ਵਾ ਵਿਜ੍ਜਾਹਿ ਛਹਿ ਵਾ ਪਨ ਅਭਿਞ੍ਞਾਹਿ ਜਾਨਤਾ, ਸਬ੍ਬਤ੍ਥ ਅਪ੍ਪਟਿਹਤੇਨ ਸਮਨ੍ਤਚਕ੍ਖੁਨਾ ਪਸ੍ਸਤਾ, ਸਬ੍ਬਧਮ੍ਮਜਾਨਨਸਮਤ੍ਥਾਯ ਪਞ੍ਞਾਯ ਜਾਨਤਾ, ਸਬ੍ਬਸਤ੍ਤਾਨਂ ਚਕ੍ਖੁਵਿਸਯਾਤੀਤਾਨਿ ਤਿਰੋਕੁਟ੍ਟਾਦਿਗਤਾਨਿ ਚਾਪਿ ਰੂਪਾਨਿ ਅਤਿਵਿਸੁਦ੍ਧੇਨ ਮਂਸਚਕ੍ਖੁਨਾ ਵਾ ਪਸ੍ਸਤਾ, ਅਤ੍ਤਹਿਤਸਾਧਿਕਾਯ ਸਮਾਧਿਪਦਟ੍ਠਾਨਾਯ ਪਟਿਵੇਧਪਞ੍ਞਾਯ ਜਾਨਤਾ, ਪਰਹਿਤਸਾਧਿਕਾਯ ਕਰੁਣਾਪਦਟ੍ਠਾਨਾਯ ਦੇਸਨਾਪਞ੍ਞਾਯ ਪਸ੍ਸਤਾ, ਅਨ੍ਤਰਾਯਿਕਧਮ੍ਮੇ ਵਾ ਜਾਨਤਾ, ਨਿਯ੍ਯਾਨਿਕਧਮ੍ਮੇ ਪਸ੍ਸਤਾ, ਅਰੀਨਂ ਹਤਤ੍ਤਾ ਅਰਹਤਾ, ਸਮ੍ਮਾ ਸਾਮਂ ਸਬ੍ਬਧਮ੍ਮਾਨਂ ਬੁਦ੍ਧਤ੍ਤਾ ਸਮ੍ਮਾਸਮ੍ਬੁਦ੍ਧੇਨਾਤਿ ਏਵਂ ਚਤੁਵੇਸਾਰਜ੍ਜਵਸੇਨ ਚਤੂਹਿ ਕਾਰਣੇਹਿ ਥੋਮਿਤੇਨ ਅਤ੍ਥਿ ਨੁ ਖੋ ਏਕੋ ਧਮ੍ਮੋ ਅਕ੍ਖਾਤੋਤਿ.
ਅਭਿਸਙ੍ਖਤਨ੍ਤਿ ਕਤਂ ਉਪ੍ਪਾਦਿਤਂ. ਅਭਿਸਞ੍ਚੇਤਯਿਤਨ੍ਤਿ ਚੇਤਯਿਤਂ ਕਪ੍ਪਯਿਤਂ. ਸੋ ਤਤ੍ਥ ਠਿਤੋਤਿ ਸੋ ਤਸ੍ਮਿਂ ਸਮਥਵਿਪਸ੍ਸਨਾਧਮ੍ਮੇ ਠਿਤੋ. ਧਮ੍ਮਰਾਗੇਨ ਧਮ੍ਮਨਨ੍ਦਿਯਾਤਿ ਪਦਦ੍ਵਯੇਨਪਿ ਸਮਥਵਿਪਸ੍ਸਨਾਸੁ ਛਨ੍ਦਰਾਗੋ ਵੁਤ੍ਤੋ. ਸਮਥਵਿਪਸ੍ਸਨਾਸੁ ਹਿ ਸਬ੍ਬੇਨ ਸਬ੍ਬਂ ਛਨ੍ਦਰਾਗਂ ਪਰਿਯਾਦਿਯਿਤੁਂ ਸਕ੍ਕੋਨ੍ਤੋ ਅਰਹਾ ਹੋਤਿ, ਅਸਕ੍ਕੋਨ੍ਤੋ ਅਨਾਗਾਮੀ ਹੋਤਿ. ਸੋ ਸਮਥਵਿਪਸ੍ਸਨਾਸੁ ਛਨ੍ਦਰਾਗਸ੍ਸ ਅਪ੍ਪਹੀਨਤ੍ਤਾ ਚਤੁਤ੍ਥਜ੍ਝਾਨਚੇਤਨਾਯ ਸੁਦ੍ਧਾਵਾਸੇ ਨਿਬ੍ਬਤ੍ਤਤਿ. ਅਯਂ ਆਚਰਿਯਾਨਂ ਸਮਾਨਤ੍ਥਕਥਾ.
ਵਿਤਣ੍ਡਵਾਦੀ ਪਨਾਹ – ‘‘ਤੇਨੇਵ ਧਮ੍ਮਰਾਗੇਨਾਤਿ ਵਚਨਤੋ ਅਕੁਸਲੇਨ ਸੁਦ੍ਧਾਵਾਸੇ ਨਿਬ੍ਬਤ੍ਤਤੀ’’ਤਿ. ਸੋ ‘‘ਸੁਤ੍ਤਂ ਆਹਰਾਹੀ’’ਤਿ ਵਤ੍ਤਬ੍ਬੋ. ਅਦ੍ਧਾ ਅਞ੍ਞਂ ਅਪਸ੍ਸਨ੍ਤੋ ਇਦਮੇਵ ਆਹਰਿਸ੍ਸਤਿ. ਤਤੋ ਵਤ੍ਤਬ੍ਬੋ ‘‘ਕਿਮ੍ਪਨਿਦਂ ਸੁਤ੍ਤਂ ਨੀਤਤ੍ਥਂ, ਉਦਾਹੁ ਨੇਯ੍ਯਤ੍ਥ’’ਨ੍ਤਿ. ਅਦ੍ਧਾ ‘‘ਨੀਤਤ੍ਥ’’ਨ੍ਤਿ ਵਕ੍ਖਤਿ. ਤਤੋ ਵਤ੍ਤਬ੍ਬੋ – ਏਵਂ ਸਨ੍ਤੇ ਅਨਾਗਾਮਿਫਲਤ੍ਥਿਕੇਨ ਸਮਥਵਿਪਸ੍ਸਨਾਸੁ ਛਨ੍ਦਰਾਗੋ ਕਤ੍ਤਬ੍ਬੋ ਭਵਿਸ੍ਸਤਿ, ਛਨ੍ਦਰਾਗੇ ਉਪ੍ਪਾਦਿਤੇ ਅਨਾਗਾਮਿਫਲਂ ਪਟਿਲਦ੍ਧਂ ਭਵਿਸ੍ਸਤਿ, ਮਾ ‘‘ਸੁਤ੍ਤਂ ਮੇ ਲਦ੍ਧ’’ਨ੍ਤਿ ਯਂ ਵਾ ਤਂ ਵਾ ਦੀਪੇਹਿ. ਪਞ੍ਹਂ ਕਥੇਨ੍ਤੇਨ ਹਿ ਆਚਰਿਯਸ੍ਸ ਸਨ੍ਤਿਕੇ ਉਗ੍ਗਹੇਤ੍ਵਾ ਅਤ੍ਥਰਸਂ ਪਟਿਵਿਜ੍ਝਿਤ੍ਵਾ ਕਥੇਤੁਂ ਵਟ੍ਟਤਿ. ਅਕੁਸਲੇਨ ਹਿ ਸਗ੍ਗੇ, ਕੁਸਲੇਨ ਚ ਅਪਾਯੇ ਪਟਿਸਨ੍ਧਿ ਨਾਮ ਨਤ੍ਥਿ. ਵੁਤ੍ਤਞ੍ਚੇਤਂ ਭਗਵਤਾ –
‘‘ਨ, ਭਿਕ੍ਖਵੇ, ਲੋਭਜੇਨ ਕਮ੍ਮੇਨ, ਦੋਸਜੇਨ ਕਮ੍ਮੇਨ, ਮੋਹਜੇਨ ਕਮ੍ਮੇਨ ਦੇਵਾ ਪਞ੍ਞਾਯਨ੍ਤਿ, ਮਨੁਸ੍ਸਾ ਪਞ੍ਞਾਯਨ੍ਤਿ, ਯਾ ਵਾ ਪਨਞ੍ਞਾਪਿ ਕਾਚਿ ਸੁਗਤਿਯੋ. ਅਥ ਖੋ, ਭਿਕ੍ਖਵੇ, ਲੋਭਜੇਨ ਕਮ੍ਮੇਨ, ਦੋਸਜੇਨ ਕਮ੍ਮੇਨ, ਮੋਹਜੇਨ ਕਮ੍ਮੇਨ ਨਿਰਯੋ ਪਞ੍ਞਾਯਤਿ, ਤਿਰਚ੍ਛਾਨਯੋਨਿ ਪਞ੍ਞਾਯਤਿ, ਪੇਤ੍ਤਿਵਿਸਯੋ ਪਞ੍ਞਾਯਤਿ, ਯਾ ਵਾ ਪਨਞ੍ਞਾਪਿ ਕਾਚਿ ਦੁਗ੍ਗਤਿਯੋ’’ਤਿ (ਅ. ਨਿ. ੬.੩੯) –
ਏਵਂ ਸਞ੍ਞਾਪੇਤਬ੍ਬੋ. ਸਚੇ ਸਞ੍ਜਾਨਾਤਿ, ਸਞ੍ਜਾਨਾਤੁ. ਨੋ ਚੇ ਸਞ੍ਜਾਨਾਤਿ, ‘‘ਗਚ੍ਛ ਪਾਤੋਵ ਵਿਹਾਰਂ ਪਵਿਸਿਤ੍ਵਾ ਯਾਗੁਂ ਪਿਵਾ’’ਤਿ ਉਯ੍ਯੋਜੇਤਬ੍ਬੋ.
ਅਯਂ ਖੋ, ਗਹਪਤਿ, ਏਕਧਮ੍ਮੋ ਅਕ੍ਖਾਤੋਤਿ ਏਕਂ ਧਮ੍ਮਂ ਪੁਚ੍ਛਿਤੇਨ ‘‘ਅਯਮ੍ਪਿ ਏਕਧਮ੍ਮੋ ਅਕ੍ਖਾਤੋ, ਅਯਮ੍ਪਿ ਏਕਧਮ੍ਮੋ ਅਕ੍ਖਾਤੋ’’ਤਿ ਏਵਂ ਪੁਚ੍ਛਾਵਸੇਨ ਕਥਿਤਤ੍ਤਾ ਏਕਾਦਸਪਿ ਧਮ੍ਮਾ ਏਕਧਮ੍ਮੋ ਨਾਮ ਕਤੋ. ਅਮਤੁਪ੍ਪਤ੍ਤਿਅਤ੍ਥੇਨ ਵਾ ਸਬ੍ਬੇਪਿ ਏਕਧਮ੍ਮੋਤਿ ਵਤ੍ਤੁਂ ਵਟ੍ਟਤਿ.
ਨਿਧਿਮੁਖਂ ਗਵੇਸਨ੍ਤੋਤਿ ਨਿਧਿਂ ਪਰਿਯੇਸਨ੍ਤੋ. ਸਕਿਦੇਵਾਤਿ ਏਕਪ੍ਪਯੋਗੇਨੇਵ. ਕਥਂ ਪਨ ਏਕਪ੍ਪਯੋਗੇਨੇਵ ਏਕਾਦਸਨ੍ਨਂ ਨਿਧੀਨਂ ਅਧਿਗਮੋ ਹੋਤੀਤਿ? ਇਧੇਕਚ੍ਚੋ ਅਰਞ੍ਞੇ ਜੀਵਿਤਵੁਤ੍ਤਿਂ ਗਵੇਸਮਾਨੋ ਚਰਤਿ. ਤਮੇਨਂ ਅਞ੍ਞਤਰੋ ਅਤ੍ਥਚਰਕੋ ਦਿਸ੍ਵਾ ‘‘ਕਿਂ, ਭੋ, ਚਰਸੀ’’ਤਿ ਪੁਚ੍ਛਤਿ. ਸੋ ‘‘ਜੀਵਿਤਵੁਤ੍ਤਿਂ ਪਰਿਯੇਸਾਮੀ’’ਤਿ ਆਹ. ਇਤਰੋ ‘‘ਤੇਨ ਹਿ ਸਮ੍ਮ ਆਗਚ੍ਛ, ਏਤਂ ਪਾਸਾਣਂ ਪਵਟ੍ਟੇਹੀ’’ਤਿ ਆਹ. ਸੋ ਤਂ ਪਵਟ੍ਟੇਤ੍ਵਾ ਉਪਰੂਪਰਿਟ੍ਠਿਤਾ ਵਾ ਕੁਚ੍ਛਿਯਾ ਕੁਚ੍ਛਿਂ ਆਹਚ੍ਚ ਠਿਤਾ ਵਾ ਏਕਾਦਸ ਕੁਮ੍ਭਿਯੋ ਪਸ੍ਸਤਿ. ਏਵਂ ਏਕਪ੍ਪਯੋਗੇਨ ਏਕਾਦਸਨ੍ਨਂ ਅਧਿਗਮੋ ਹੋਤਿ.
ਆਚਰਿਯਧਨਂ ਪਰਿਯੇਸਿਸ੍ਸਨ੍ਤੀਤਿ ਅਞ੍ਞਤਿਤ੍ਥਿਯਾ ਹਿ ਯਸ੍ਸ ਸਨ੍ਤਿਕੇ ਸਿਪ੍ਪਂ ਉਗ੍ਗਣ੍ਹਨ੍ਤਿ, ਤਸ੍ਸ ਸਿਪ੍ਪੁਗ੍ਗਹਣਤੋ ਪੁਰੇ ਵਾ ਪਚ੍ਛਾ ਵਾ ਅਨ੍ਤਰਨ੍ਤਰਾ ਵਾ ਗੇਹਤੋ ਨੀਹਰਿਤ੍ਵਾ ਧਨਂ ਦੇਨ੍ਤਿ. ਯੇਸਂ ਗੇਹੇ ਨਤ੍ਥਿ, ਤੇ ਞਾਤਿਸਭਾਗਤੋ ਪਰਿਯੇਸਨ੍ਤਿ. ਯੇਸਂ ਤਮ੍ਪਿ ਨਤ੍ਥਿ, ਤੇ ਸਭਾਗਤੋ ਪਰਿਯੇਸਨ੍ਤਿ. ਤਥਾ ਅਲਭਮਾਨਾ ਭਿਕ੍ਖਮ੍ਪਿ ਚਰਿਤ੍ਵਾ ਦੇਨ੍ਤਿਯੇਵ. ਤਂ ਸਨ੍ਧਾਯੇਤਂ ਵੁਤ੍ਤਂ.
ਕਿਂ ਪਨਾਹਨ੍ਤਿ ਬਾਹਿਰਕਾ ਤਾਵ ਅਨਿਯ੍ਯਾਨਿਕੇਪਿ ਸਾਸਨੇ ਸਿਪ੍ਪਮਤ੍ਤਦਾਯਕਸ੍ਸ ਧਨਂ ਪਰਿਯੇਸਨ੍ਤਿ, ਅਹਂ ਪਨ ਏਵਂਵਿਧੇ ਨਿਯ੍ਯਾਨਿਕਸਾਸਨੇ ਏਕਾਦਸਵਿਧਂ ਅਮਤੁਪ੍ਪਤ੍ਤਿਪਟਿਪਦਂ ਦੇਸੇਨ੍ਤਸ੍ਸ ਆਚਰਿਯਸ੍ਸ ਪੂਜਂ ਕਿਂ ਨ ਕਰਿਸ੍ਸਾਮਿ, ਕਰਿਸ੍ਸਾਮਿਯੇਵਾਤਿ ਵਦਤਿ. ਪਚ੍ਚੇਕਂ ਦੁਸ੍ਸਯੁਗੇਨ ਅਚ੍ਛਾਦੇਸੀਤਿ ਏਕਮੇਕਸ੍ਸ ਭਿਕ੍ਖੁਨੋ ਏਕੇਕਂ ਦੁਸ੍ਸਯੁਗਂ ਅਦਾਸੀਤਿ ਅਤ੍ਥੋ. ਸਮੁਦਾਚਾਰਵਚਨਂ ਪਨੇਤ੍ਥ ਏਵਰੂਪਂ ਹੋਤਿ, ਤਸ੍ਮਾ ਅਚ੍ਛਾਦੇਸੀਤਿ ਵੁਤ੍ਤਂ. ਪਞ੍ਚਸਤਂ ਵਿਹਾਰਨ੍ਤਿ ਪਞ੍ਚਸਤਗ੍ਘਨਿਕਂ ਪਣ੍ਣਸਾਲਂ ਕਾਰੇਸੀਤਿ ਅਤ੍ਥੋ.
੭. ਗੋਪਾਲਸੁਤ੍ਤਵਣ੍ਣਨਾ
੧੭. ਸਤ੍ਤਮੇ ਤਿਸ੍ਸੋ ਕਥਾ ਏਕਨਾਲ਼ਿਕਾ ਚਤੁਰਸ੍ਸਾ ਨਿਸਿਨ੍ਨਵਤ੍ਤਿਕਾਤਿ. ਤਤ੍ਥ ਪਾਲ਼ਿਂ ਵਤ੍ਵਾ ਏਕੇਕਸ੍ਸ ਪਦਸ੍ਸ ਅਤ੍ਥਕਥਨਂ ਏਕਨਾਲ਼ਿਕਾ ਨਾਮ. ਅਪਣ੍ਡਿਤਗੋਪਾਲਕਂ ਦਸ੍ਸੇਤ੍ਵਾ, ਅਪਣ੍ਡਿਤਭਿਕ੍ਖੁਂ ਦਸ੍ਸੇਤ੍ਵਾ, ਪਣ੍ਡਿਤਗੋਪਾਲਕਂ ਦਸ੍ਸੇਤ੍ਵਾ, ਪਣ੍ਡਿਤਭਿਕ੍ਖੁਂ ਦਸ੍ਸੇਤ੍ਵਾਤਿ ਚਤੁਕ੍ਕਂ ਬਨ੍ਧਿਤ੍ਵਾ ਕਥਨਂ ਚਤੁਰਸ੍ਸਾ ਨਾਮ. ਅਪਣ੍ਡਿਤਗੋਪਾਲਕਂ ਦਸ੍ਸੇਤ੍ਵਾ ਪਰਿਯੋਸਾਨਗਮਨਂ, ਅਪਣ੍ਡਿਤਭਿਕ੍ਖੁਂ ਦਸ੍ਸੇਤ੍ਵਾ ਪਰਿਯੋਸਾਨਗਮਨਂ, ਪਣ੍ਡਿਤਗੋਪਾਲਕਂ ਦਸ੍ਸੇਤ੍ਵਾ ਪਰਿਯੋਸਾਨਗਮਨਂ, ਪਣ੍ਡਿਤਭਿਕ੍ਖੁਂ ਦਸ੍ਸੇਤ੍ਵਾ ਪਰਿਯੋਸਾਨਗਮਨਨ੍ਤਿ ਅਯਂ ਨਿਸਿਨ੍ਨਵਤ੍ਤਿਕਾ ਨਾਮ. ਅਯਂ ਇਧ ਸਬ੍ਬਾਚਰਿਯਾਨਂ ਆਚਿਣ੍ਣਾ.
ਏਕਾਦਸਹਿ, ਭਿਕ੍ਖਵੇ, ਅਙ੍ਗੇਹੀਤਿ ਏਕਾਦਸਹਿ ਅਗੁਣਕੋਟ੍ਠਾਸੇਹਿ. ਗੋਗਣਨ੍ਤਿ ਗੋਮਣ੍ਡਲਂ. ਪਰਿਹਰਿਤੁਨ੍ਤਿ ਪਰਿਗ੍ਗਹੇਤ੍ਵਾ ਵਿਚਰਿਤੁਂ. ਫਾਤਿਂ ਕਾਤੁਨ੍ਤਿ ਵਡ੍ਢਿਂ ਆਪਾਦੇਤੁਂ. ਇਧਾਤਿ ਇਮਸ੍ਮਿਂ ਲੋਕੇ. ਨ ਰੂਪਞ੍ਞੂ ਹੋਤੀਤਿ ਗਣਨਤੋ ਵਾ ਵਣ੍ਣਤੋ ਵਾ ਰੂਪਂ ਨ ਜਾਨਾਤਿ. ਗਣਨਤੋ ਨ ਜਾਨਾਤਿ ਨਾਮ ਅਤ੍ਤਨੋ ਗੁਨ੍ਨਂ ਸਤਂ ਵਾ ਸਹਸ੍ਸਂ ਵਾਤਿ ਸਙ੍ਖ੍ਯਂ ਨ ਜਾਨਾਤਿ, ਸੋ ਗਾਵੀਸੁ ਹਟਾਸੁ ਵਾ ਪਲਾਤਾਸੁ ਵਾ ਗੋਗਣਂ ਗਣੇਤ੍ਵਾ ‘‘ਅਜ੍ਜ ਏਤ੍ਤਕਾ ਨ ਦਿਸ੍ਸਨ੍ਤੀ’’ਤਿ ਦ੍ਵੇ ਤੀਣਿ ਗਾਮਨ੍ਤਰਾਨਿ ਵਾ ਅਟਵਿਂ ਵਾ ਵਿਚਰਨ੍ਤੋ ਨ ਪਰਿਯੇਸਤਿ. ਅਞ੍ਞੇਸਂ ਗਾਵੀਸੁ ਅਤ੍ਤਨੋ ਗੋਗਣਂ ਪਵਿਟ੍ਠਾਸੁਪਿ ਗੋਗਣਂ ਗਣੇਤ੍ਵਾ ‘‘ਇਮਾ ਏਤ੍ਤਿਕਾ ਗਾਵੋ ਨ ਅਮ੍ਹਾਕ’’ਨ੍ਤਿ ਯਟ੍ਠਿਯਾ ਪੋਥੇਤ੍ਵਾ ਨ ਨੀਹਰਤਿ. ਤਸ੍ਸ ਨਟ੍ਠਾ ਗਾਵਿਯੋ ਨਟ੍ਠਾਵ ਹੋਨ੍ਤਿ. ਪਰਗਾਵਿਯੋ ਗਹੇਤ੍ਵਾ ਚਰਤਿ. ਗੋਸਾਮਿਕਾ ਦਿਸ੍ਵਾ ‘‘ਅਯਂ ਏਤ੍ਤਕਂ ਕਾਲਂ ਅਮ੍ਹਾਕਂ ਧੇਨੂ ਦੁਹੀ’’ਤਿ ਤਜ੍ਜੇਤ੍ਵਾ ਅਤ੍ਤਨੋ ਗਾਵਿਯੋ ਗਹੇਤ੍ਵਾ ਗਚ੍ਛਨ੍ਤਿ. ਤਸ੍ਸ ਗੋਗਣੋਪਿ ਪਰਿਹਾਯਤਿ, ਪਞ੍ਚ ਗੋਰਸਪਰਿਭੋਗਤੋਪਿ ਪਰਿਬਾਹਿਰੋ ਹੋਤਿ. ਵਣ੍ਣਤੋ ਨ ਜਾਨਾਤਿ ਨਾਮ ‘‘ਏਤ੍ਤਿਕਾ ਗਾਵੀ ਸੇਤਾ, ਏਤ੍ਤਿਕਾ ਰਤ੍ਤਾ, ਏਤ੍ਤਿਕਾ ਕਾਲ਼ਾ, ਏਤ੍ਤਿਕਾ ਓਦਾਤਾ, ਏਤ੍ਤਿਕਾ ਕਬਰਾ, ਏਤ੍ਤਿਕਾ ਨੀਲਾ’’ਤਿ ਨ ਜਾਨਾਤਿ. ਸੋ ਗਾਵੀਸੁ ਹਟਾਸੁ ਵਾ ਪਲਾਤਾਸੁ ਵਾ…ਪੇ… ਪਞ੍ਚਗੋਰਸਪਰਿਭੋਗਤੋਪਿ ਪਰਿਬਾਹਿਰੋ ਹੋਤਿ.
ਨ ਲਕ੍ਖਣਕੁਸਲੋਤਿ ਗਾਵੀਨਂ ਸਰੀਰੇ ਕਤਂ ਧਨੁਸਤ੍ਤਿਸੂਲਾਦਿਭੇਦਂ ਲਕ੍ਖਣਂ ਨ ਜਾਨਾਤਿ. ਸੋ ਗਾਵੀਸੁ ਹਟਾਸੁ ਵਾ ਪਲਾਤਾਸੁ ਵਾ ‘‘ਅਜ੍ਜ ਅਸੁਕਲਕ੍ਖਣਾ ਅਸੁਕਲਕ੍ਖਣਾ ਚ ਗਾਵੋ ਨ ਦਿਸ੍ਸਨ੍ਤੀ’’ਤਿ…ਪੇ… ਪਞ੍ਚਗੋਰਸਪਰਿਭੋਗਤੋਪਿ ਪਰਿਬਾਹਿਰੋ ਹੋਤਿ.
ਨ ਆਸਾਟਿਕਂ ਹਾਰੇਤਾਤਿ ਗੁਨ੍ਨਂ ਖਾਣੁਕਣ੍ਟਕਾਦੀਹਿ ਪਹਟਟ੍ਠਾਨੇਸੁ ਵਣੋ ਹੋਤਿ. ਤਤ੍ਥ ਨੀਲਮਕ੍ਖਿਕਾ ਅਣ੍ਡਕਾਨਿ ਠਪੇਨ੍ਤਿ, ਤੇਸਂ ਆਸਾਟਿਕਾਤਿ ਨਾਮਂ. ਤਾਨਿ ਦਣ੍ਡਕੇਨ ਅਪਨੇਤ੍ਵਾ ਭੇਸਜ੍ਜਂ ਦਾਤਬ੍ਬਂ ਹੋਤਿ, ਬਾਲੋ ਗੋਪਾਲਕੋ ਤਥਾ ਨ ਕਰੋਤਿ. ਤੇਨ ਵੁਤ੍ਤਂ – ‘‘ਨ ਆਸਾਟਿਕਂ ਹਾਰੇਤਾ ਹੋਤੀ’’ਤਿ. ਤਸ੍ਸ ਗੁਨ੍ਨਂ ਵਣਾ ਵਡ੍ਢਨ੍ਤਿ, ਗਮ੍ਭੀਰਾ ਹੋਨ੍ਤਿ, ਪਾਣਕਾ ਕੁਚ੍ਛਿਂ ਪਵਿਸਨ੍ਤਿ, ਗਾਵੋ ਗੇਲਞ੍ਞਾਭਿਭੂਤਾ ਨੇਵ ਯਾਵਦਤ੍ਥਂ ਤਿਣਂ ਖਾਦਿਤੁਂ ਨ ਪਾਨੀਯਂ ਪਾਤੁਂ ਸਕ੍ਕੋਨ੍ਤਿ. ਤਤ੍ਥ ਗੁਨ੍ਨਂ ਖੀਰਂ ਛਿਜ੍ਜਤਿ, ਗੋਣਾਨਂ ਜਵੋ ਹਾਯਤਿ, ਉਭਯੇਸਮ੍ਪਿ ਜੀਵਿਤਨ੍ਤਰਾਯੋ ਹੋਤਿ. ਏਵਮਸ੍ਸ ਗੋਗਣੋਪਿ ਪਰਿਹਾਯਤਿ…ਪੇ… ਪਞ੍ਚਗੋਰਸਤੋਪਿ ਪਰਿਬਾਹਿਰੋ ਹੋਤਿ.
ਨ ਵਣਂ ਪਟਿਚ੍ਛਾਦੇਤਾ ਹੋਤੀਤਿ ਗੁਨ੍ਨਂ ਵੁਤ੍ਤਨਯੇਨੇਵ ਸਞ੍ਜਾਤੋ ਵਣੋ ਭੇਸਜ੍ਜਂ ਦਤ੍ਵਾ ਵਾਕੇਨ ਵਾ ਚੀਰਕੇਨ ਵਾ ਬਨ੍ਧਿਤ੍ਵਾ ਪਟਿਚ੍ਛਾਦੇਤਬ੍ਬੋ ਹੋਤਿ. ਬਾਲਗੋਪਾਲਕੋ ਤਂ ਨ ਕਰੋਤਿ. ਅਥਸ੍ਸ ਗੁਨ੍ਨਂ ਵਣੇਹਿ ਯੂਸਾ ਪਗ੍ਘਰਨ੍ਤਿ, ਤਾ ਅਞ੍ਞਮਞ੍ਞਂ ਨਿਘਂਸਨ੍ਤਿ. ਤੇਨ ਅਞ੍ਞੇਸਮ੍ਪਿ ਵਣਾ ਜਾਯਨ੍ਤਿ. ਏਵਂ ਗਾਵੋ ਗੇਲਞ੍ਞਾਭਿਭੂਤਾ ਨੇਵ ਯਾਵਦਤ੍ਥਂ ਤਿਣਾਨਿ ਖਾਦਿਤੁਂ…ਪੇ… ਪਰਿਬਾਹਿਰੋ ਹੋਤਿ.
ਨ ਧੂਮਂ ਕਤ੍ਤਾ ਹੋਤੀਤਿ ਅਨ੍ਤੋਵਸ੍ਸੇ ਡਂਸਮਕਸਾਦੀਨਂ ਉਸ੍ਸਨ੍ਨਕਾਲੇ ਗੋਗਣੇ ਵਜਂ ਪਵਿਟ੍ਠੇ ਤਤ੍ਥ ਤਤ੍ਥ ਧੂਮੋ ਕਾਤਬ੍ਬੋ ਹੋਤਿ. ਅਪਣ੍ਡਿਤਗੋਪਾਲਕੋ ਤਂ ਨ ਕਰੋਤਿ, ਗੋਗਣੋ ਸਬ੍ਬਰਤ੍ਤਿਂ ਡਂਸਾਦੀਹਿ ਉਪਦ੍ਦੁਤੋ ਨਿਦ੍ਦਂ ਅਲਭਿਤ੍ਵਾ ਪੁਨਦਿਵਸੇ ਅਰਞ੍ਞੇ ਤਤ੍ਥ ਤਤ੍ਥ ਰੁਕ੍ਖਮੂਲਾਦੀਸੁ ਨਿਪਜ੍ਜਿਤ੍ਵਾ ਨਿਦ੍ਦਾਯਤਿ. ਨੇਵ ਯਾਵਦਤ੍ਥਂ ਤਿਣਾਨਿ ਖਾਦਿਤੁਂ…ਪੇ… ਪਰਿਬਾਹਿਰੋ ਹੋਤਿ.
ਨ ਤਿਤ੍ਥਂ ਜਾਨਾਤੀਤਿ ਤਿਤ੍ਥਮ੍ਪਿ ਸਮਨ੍ਤਿ ਵਾ ਵਿਸਮਨ੍ਤਿ ਵਾ ਸਗਾਹਨ੍ਤਿ ਵਾ ਨਿਗ੍ਗਾਹਨ੍ਤਿ ਵਾ ਨ ਜਾਨਾਤਿ. ਸੋ ਅਤਿਤ੍ਥੇਨ ਗਾਵਿਯੋ ਓਤਾਰੇਤਿ. ਤਾਸਂ ਵਿਸਮਤਿਤ੍ਥੇ ਪਾਸਾਣਾਦੀਨਿ ਅਕ੍ਕਮਨ੍ਤੀਨਂ ਪਾਦਾ ਭਿਜ੍ਜਨ੍ਤਿ. ਸਗਾਹਂ ਗਮ੍ਭੀਰਂ ਤਿਤ੍ਥਂ ਓਤਿਣ੍ਣੇ ਕੁਮ੍ਭੀਲਾਦਯੋ ਗਾਵੋ ਗਣ੍ਹਨ੍ਤਿ, ‘‘ਅਜ੍ਜ ਏਤ੍ਤਿਕਾ ਗਾਵੋ ਨਟ੍ਠਾ, ਅਜ੍ਜ ਏਤ੍ਤਿਕਾ’’ਤਿ ਵਤ੍ਤਬ੍ਬਤਂ ਆਪਜ੍ਜਨ੍ਤਿ. ਏਵਮਸ੍ਸ ਗੋ ਗਣੋਪਿ ਪਰਿਹਾਯਤਿ…ਪੇ… ਪਞ੍ਚਗੋਰਸਤੋਪਿ ਪਰਿਬਾਹਿਰੋ ਹੋਤਿ.
ਨ ਪੀਤਂ ਜਾਨਾਤੀਤਿ ਪੀਤਮ੍ਪਿ ਅਪੀਤਮ੍ਪਿ ਨ ਜਾਨਾਤਿ. ਗੋਪਾਲਕੇਨ ਹਿ ‘‘ਇਮਾਯ ਗਾਵਿਯਾ ਪੀਤਂ, ਇਮਾਯ ਨ ਪੀਤਂ, ਇਮਾਯ ਪਾਨੀਯਤਿਤ੍ਥੇ ਓਕਾਸੋ ਲਦ੍ਧੋ, ਇਮਾਯ ਨ ਲਦ੍ਧੋ’’ਤਿ ਏਵਂ ਪੀਤਾਪੀਤਂ ਜਾਨਿਤਬ੍ਬਂ ਹੋਤਿ. ਅਯਂ ਪਨ ਦਿਵਸਭਾਗੇ ਅਰਞ੍ਞੇ ਗੋਗਣਂ ਰਕ੍ਖਿਤ੍ਵਾ ‘‘ਪਾਨੀਯਂ ਪਾਯੇਸ੍ਸਾਮੀ’’ਤਿ ਨਦਿਂ ਵਾ ਤਲ਼ਾਕਂ ਵਾ ਓਗਾਹੇਤ੍ਵਾ ਗਚ੍ਛਤਿ. ਤਤ੍ਥ ਮਹਾਉਸਭਾ ਚ ਅਨੁਸਭਾ ਚ ਬਲਵਗਾਵਿਯੋ ਚ ਦੁਬ੍ਬਲਾਨਿ ਚੇਵ ਮਹਲ੍ਲਕਾਨਿ ਚ ਗੋਰੂਪਾਨਿ ਸਿਙ੍ਗੇਹਿ ਵਾ ਫਾਸੁਕਾਹਿ ਵਾ ਪਹਰਿਤ੍ਵਾ ਅਤ੍ਤਨੋ ਓਕਾਸਂ ਕਤ੍ਵਾ ਊਰੁਪ੍ਪਮਾਣਂ ਉਦਕਂ ਪਵਿਸਿਤ੍ਵਾ ਯਥਾਕਾਮਂ ਪਿਵਨ੍ਤਿ. ਅਵਸੇਸਾ ਓਕਾਸਂ ਅਲਭਮਾਨਾ ਤੀਰੇ ਠਤ੍ਵਾ ਕਲਲਮਿਸ੍ਸਕਂ ਉਦਕਂ ਪਿਵਨ੍ਤਿ ਵਾ ਅਪੀਤਾ ਏਵ ਵਾ ਹੋਨ੍ਤਿ. ਅਥ ਸੋ ਗੋਪਾਲਕੋ ਪਿਟ੍ਠਿਯਂ ਪਹਰਿਤ੍ਵਾ ਪੁਨ ਅਰਞ੍ਞਂ ਪਵੇਸੇਤਿ. ਤਤ੍ਥ ਅਪੀਤਾ ਗਾਵਿਯੋ ਪਿਪਾਸਾਯ ਸੁਸ੍ਸਮਾਨਾ ਯਾਵਦਤ੍ਥਂ ਤਿਣਾਨਿ ਖਾਦਿਤੁਂ ਨ ਸਕ੍ਕੋਨ੍ਤਿ. ਤਤ੍ਥ ਗੁਨ੍ਨਂ ਖੀਰਂ ਛਿਜ੍ਜਤਿ. ਗੋਣਾਨਂ ਜਵੋ ਹਾਯਤਿ…ਪੇ… ਪਰਿਬਾਹਿਰੋ ਹੋਤਿ.
ਨ ਵੀਥਿਂ ਜਾਨਾਤੀਤਿ ‘‘ਅਯਂ ਮਗ੍ਗੋ ਸਮੋ ਖੇਮੋ, ਅਯਂ ਵਿਸਮੋ ਸਾਸਙ੍ਕੋ ਸਪ੍ਪਟਿਭਯੋ’’ਤਿ ਨ ਜਾਨਾਤਿ. ਸੋ ਸਮਂ ਖੇਮਂ ਮਗ੍ਗਂ ਵਜ੍ਜੇਤ੍ਵਾ ਗੋਗਣਂ ਇਤਰਮਗ੍ਗਂ ਪਟਿਪਾਦੇਤਿ. ਤਤ੍ਥ ਗਾਵੋ ਸੀਹਬ੍ਯਗ੍ਘਾਦੀਨਂ ਗਨ੍ਧੇਨ ਚੋਰਪਰਿਸ੍ਸਯੇਨ ਚ ਅਭਿਭੂਤਾ ਭਨ੍ਤਮਿਗਸਪ੍ਪਟਿਭਾਗਾ ਗੀਵਂ ਉਕ੍ਖਿਪਿਤ੍ਵਾ ਤਿਟ੍ਠਨ੍ਤਿ, ਨੇਵ ਯਾਵਦਤ੍ਥਂ ਤਿਣਾਨਿ ਖਾਦਨ੍ਤਿ, ਨ ਪਾਨੀਯਂ ਪਿਵਨ੍ਤਿ. ਤਤ੍ਥ ਗੁਨ੍ਨਂ ਖੀਰਂ ਛਿਜ੍ਜਤਿ…ਪੇ… ਪਰਿਬਾਹਿਰੋ ਹੋਤਿ.
ਨ ਗੋਚਰਕੁਸਲੋ ਹੋਤੀਤਿ ਗੋਪਾਲਕੇਨ ਹਿ ਗੋਚਰਕੁਸਲੇਨ ਭਵਿਤਬ੍ਬਂ, ਪਞ੍ਚਾਹਿਕਚਾਰੋ ਵਾ ਸਤ੍ਤਾਹਿਕਚਾਰੋ ਵਾ ਜਾਨਿਤਬ੍ਬੋ. ਏਕਦਿਸਾਯ ਗੋਗਣਂ ਚਾਰੇਤ੍ਵਾ ਪੁਨਦਿਵਸੇ ਤਤ੍ਥ ਨ ਚਾਰੇਤਬ੍ਬੋ. ਮਹਤਾ ਹਿ ਗੋਗਣੇਨ ਚਿਣ੍ਣਟ੍ਠਾਨਂ ਭੇਰਿਤਲਂ ਵਿਯ ਸੁਦ੍ਧਂ ਹੋਤਿ ਨਿਤ੍ਤਿਣਂ, ਉਦਕਮ੍ਪਿ ਆਲੁਲੀਯਤਿ. ਤਸ੍ਮਾ ਪਞ੍ਚਮੇ ਵਾ ਸਤ੍ਤਮੇ ਵਾ ਦਿਵਸੇ ਪੁਨ ਤਤ੍ਥ ਚਾਰੇਤੁਂ ਵਟ੍ਟਤਿ. ਏਤ੍ਤਕੇਨ ਹਿ ਤਿਣਮ੍ਪਿ ਪਟਿਵਿਰੁਹਤਿ, ਉਦਕਮ੍ਪਿ ਪਸੀਦਤਿ, ਅਯਂ ਪਨ ਇਮਂ ਪਞ੍ਚਾਹਿਕਚਾਰਂ ਵਾ ਸਤ੍ਤਾਹਿਕਚਾਰਂ ਵਾ ਨ ਜਾਨਾਤਿ, ਦਿਵਸੇ ਦਿਵਸੇ ਰਕ੍ਖਿਤਟ੍ਠਾਨੇਯੇਵ ਰਕ੍ਖਤਿ. ਅਥਸ੍ਸ ਗੋਗਣੋ ਹਰਿਤਤਿਣਂ ਨ ਲਭਤਿ, ਸੁਕ੍ਖਤਿਣਂ ਖਾਦਨ੍ਤੋ ਕਲਲਮਿਸ੍ਸਕਂ ਉਦਕਂ ਪਿਵਤਿ. ਤਤ੍ਥ ਗੁਨ੍ਨਂ ਖੀਰਂ ਛਿਜ੍ਜਤਿ…ਪੇ… ਪਰਿਬਾਹਿਰੋ ਹੋਤਿ.
ਅਨਵਸੇਸਦੋਹੀ ਚ ਹੋਤੀਤਿ ਪਣ੍ਡਿਤਗੋਪਾਲਕੇਨ ਹਿ ਯਾਵ ਵਚ੍ਛਕਸ੍ਸ ਮਂਸਲੋਹਿਤਂ ਸਣ੍ਠਾਤਿ, ਤਾਵ ਏਕਂ ਦ੍ਵੇ ਥਨੇ ਠਪੇਤ੍ਵਾ ਸਾਵਸੇਸਦੋਹਿਨਾ ਭਵਿਤਬ੍ਬਂ. ਅਯਂ ਵਚ੍ਛਕਸ੍ਸ ਕਿਞ੍ਚਿ ਅਨਵਸੇਸੇਤ੍ਵਾ ਦੁਹਤਿ. ਖੀਰਪਕੋ ਵਚ੍ਛੋ ਖੀਰਪਿਪਾਸਾਯ ਸੁਸ੍ਸਤਿ, ਸਣ੍ਠਾਤੁਂ ਅਸਕ੍ਕੋਨ੍ਤੋ ਕਮ੍ਪਮਾਨੋ ਮਾਤੁ ਪੁਰਤੋ ਪਤਿਤ੍ਵਾ ਕਾਲਂ ਕਰੋਨ੍ਤਿ. ਮਾਤਾ ਪੁਤ੍ਤਕਂ ਦਿਸ੍ਵਾ, ‘‘ਮਯ੍ਹਂ ਪੁਤ੍ਤਕੋ ਅਤ੍ਤਨੋ ਮਾਤੁਖੀਰਂ ਪਾਤੁਂ ਨ ਲਭਤੀ’’ਤਿ ਪੁਤ੍ਤਸੋਕੇਨ ਨੇਵ ਯਾਵਦਤ੍ਥਂ ਤਿਣਾਨਿ ਖਾਦਿਤੁਂ ਨ ਪਾਨੀਯਂ ਪਾਤੁਂ ਸਕ੍ਕੋਤਿ, ਥਨੇਸੁ ਖੀਰਂ ਛਿਜ੍ਜਤਿ. ਏਵਮਸ੍ਸ ਗੋਗਣੋਪਿ ਪਰਿਹਾਯਤਿ…ਪੇ… ਪਞ੍ਚਗੋਰਸਤੋਪਿ ਪਰਿਬਾਹਿਰੋ ਹੋਤਿ.
ਗੁਨ੍ਨਂ ਪਿਤਿਟ੍ਠਾਨਂ ਕਰੋਨ੍ਤੀਤਿ ਗੋਪਿਤਰੋ. ਗਾਵੋ ਪਰਿਣਾਯਨ੍ਤਿ ਯਥਾਰੁਚਿਂ ਗਹੇਤ੍ਵਾ ਗਚ੍ਛਨ੍ਤੀਤਿ ਗੋਪਰਿਣਾਯਕਾ. ਤੇ ਨ ਅਤਿਰੇਕਪੂਜਾਯਾਤਿ ਪਣ੍ਡਿਤੋ ਹਿ ਗੋਪਾਲਕੋ ਏਵਰੂਪੇ ਉਸਭੇ ਅਤਿਰੇਕਪੂਜਾਯ ਪੂਜੇਤਿ, ਪਣੀਤਂ ਗੋਭਤ੍ਤਂ ਦੇਤਿ, ਗਨ੍ਧਪਞ੍ਚਙ੍ਗੁਲਿਕੇਹਿ ਮਣ੍ਡੇਤਿ, ਮਾਲਂ ਪਿਲ਼ਨ੍ਧੇਤਿ, ਸਿਙ੍ਗੇਸੁ ਸੁਵਣ੍ਣਰਜਤਕੋਸਕੇ ਚ ਧਾਰੇਤਿ, ਰਤ੍ਤਿਂ ਦੀਪਂ ਜਾਲੇਤ੍ਵਾ ਚੇਲਵਿਤਾਨਸ੍ਸ ਹੇਟ੍ਠਾ ਸਯਾਪੇਤਿ. ਅਯਂ ਪਨ ਤਤੋ ਏਕਸਕ੍ਕਾਰਮ੍ਪਿ ਨ ਕਰੋਤਿ. ਉਸਭਾ ਅਤਿਰੇਕਪੂਜਂ ਅਲਭਮਾਨਾ ਗੋਗਣਂ ਨ ਰਕ੍ਖਨ੍ਤਿ, ਪਰਿਸ੍ਸਯਂ ਨ ਵਾਰੇਨ੍ਤਿ. ਏਵਮਸ੍ਸ ਗੋਗਣੋਪਿ ਪਰਿਹਾਯਤਿ…ਪੇ… ਪਞ੍ਚਗੋਰਸਤੋਪਿ ਪਰਿਬਾਹਿਰੋ ਹੋਤਿ.
ਇਧਾਤਿ ਇਮਸ੍ਮਿਂ ਸਾਸਨੇ. ਨ ਰੂਪਞ੍ਞੂ ਹੋਤੀਤਿ ‘‘ਚਤ੍ਤਾਰਿ ਮਹਾਭੂਤਾਨਿ ਚਤੁਨ੍ਨਞ੍ਚ ਮਹਾਭੂਤਾਨਂ ਉਪਾਦਾਯਰੂਪ’’ਨ੍ਤਿ ਏਵਂ ਵੁਤ੍ਤਂ ਰੂਪਂ ਦ੍ਵੀਹਾਕਾਰੇਹਿ ਨ ਜਾਨਾਤਿ ਗਣਨਤੋ ਵਾ ਸਮੁਟ੍ਠਾਨਤੋ ਵਾ. ਗਣਨਤੋ ਨ ਜਾਨਾਤਿ ਨਾਮ – ‘‘ਚਕ੍ਖਾਯਤਨਂ ਸੋਤਾਯਤਨਂ ਘਾਨਾਯਤਨਂ ਜਿਵ੍ਹਾਕਾਯਰੂਪਸਦ੍ਦਗਨ੍ਧਰਸਫੋਟ੍ਠਬ੍ਬਾਯਤਨਂ, ਇਤ੍ਥਿਨ੍ਦ੍ਰਿਯਂ ਪੁਰਿਸਿਨ੍ਦ੍ਰਿਯਂ ਜੀਵਿਤਿਨ੍ਦ੍ਰਿਯਂ ਕਾਯਵਿਞ੍ਞਤ੍ਤਿ ਵਚੀਵਿਞ੍ਞਤ੍ਤਿ ਆਕਾਸਧਾਤੁ ਆਪੋਧਾਤੁ ਰੂਪਸ੍ਸ ਲਹੁਤਾ, ਮੁਦੁਤਾ, ਕਮ੍ਮਞ੍ਞਤਾ, ਉਪਚਯੋ, ਸਨ੍ਤਤਿ, ਜਰਤਾ, ਰੂਪਸ੍ਸ ਅਨਿਚ੍ਚਤਾ, ਕਬਲ਼ੀਕਾਰੋ ਆਹਾਰੋ’’ਤਿ (ਧ. ਸ. ੬੫੭-੬੬੫) ਏਵਂ ਪਾਲ਼ਿਯਾ ਆਗਤਾ ਪਞ੍ਚਵੀਸਤਿ ਰੂਪਕੋਟ੍ਠਾਸਾਤਿ ਨ ਜਾਨਾਤਿ. ਸੇਯ੍ਯਥਾਪਿ ਸੋ ਗੋਪਾਲਕੋ ਗਣਨਤੋ ਗੁਨ੍ਨਂ ਰੂਪਂ ਨ ਜਾਨਾਤਿ, ਤਥੂਪਮੋ ਅਯਂ ਭਿਕ੍ਖੁ. ਸੋ ਗਣਨਤੋ ਰੂਪਂ ਅਜਾਨਨ੍ਤੋ ਰੂਪਂ ਪਰਿਗ੍ਗਹੇਤ੍ਵਾ ਅਰੂਪਂ ਵਵਤ੍ਥਪੇਤ੍ਵਾ ਰੂਪਾਰੂਪਂ ਪਰਿਗ੍ਗਹੇਤ੍ਵਾ ਪਚ੍ਚਯਂ ਸਲ੍ਲਕ੍ਖੇਤ੍ਵਾ ਲਕ੍ਖਣਂ ਆਰੋਪੇਤ੍ਵਾ ਕਮ੍ਮਟ੍ਠਾਨਂ ਮਤ੍ਥਕਂ ਪਾਪੇਤੁਂ ਨ ਸਕ੍ਕੋਤਿ. ਸੋ ਯਥਾ ਤਸ੍ਸ ਗੋਪਾਲਕਸ੍ਸ ਗੋਗਣੋ ਨ ਵਡ੍ਢਤਿ, ਏਵਂ ਇਮਸ੍ਮਿਂ ਸਾਸਨੇ ਸੀਲਸਮਾਧਿਵਿਪਸ੍ਸਨਾਮਗ੍ਗਫਲਨਿਬ੍ਬਾਨੇਹਿ ਨ ਵਡ੍ਢਤਿ. ਯਥਾ ਚ ਸੋ ਗੋਪਾਲਕੋ ਪਞ੍ਚਹਿ ਗੋਰਸੇਹਿ ਪਰਿਬਾਹਿਰੋ ਹੋਤਿ, ਏਵਮੇਵਾਯਂ ਅਸੇਖੇਨ ਸੀਲਕ੍ਖਨ੍ਧੇਨ ਅਸੇਖੇਨ ਸਮਾਧਿਪਞ੍ਞਾਵਿਮੁਤ੍ਤਿ ਵਿਮੁਤ੍ਤਿਞਾਣਦਸ੍ਸਨਕ੍ਖਨ੍ਧੇਨਾਤਿ ਪਞ੍ਚਹਿ ਧਮ੍ਮਕ੍ਖਨ੍ਧੇਹਿ ਪਰਿਬਾਹਿਰੋ ਹੋਤਿ.
ਸਮੁਟ੍ਠਾਨਤੋ ਨ ਜਾਨਾਤਿ ਨਾਮ – ‘‘ਏਤ੍ਤਕਂ ਰੂਪਂ ਏਕਸਮੁਟ੍ਠਾਨਂ, ਏਤ੍ਤਕਂ ਦ੍ਵਿਸਮੁਟ੍ਠਾਨਂ, ਏਤ੍ਤਕਂ ਤਿਸਮੁਟ੍ਠਾਨਂ, ਏਤ੍ਤਕਂ ਚਤੁਸਮੁਟ੍ਠਾਨਂ, ਏਤ੍ਤਕਂ ਨਕੁਤੋਚਿ ਸਮੁਟ੍ਠਾਤੀ’’ਤਿ ਨ ਜਾਨਾਤਿ. ਸੇਯ੍ਯਥਾਪਿ ਸੋ ਗੋਪਾਲਕੋ ਵਣ੍ਣਤੋ ਗੁਨ੍ਨਂ ਰੂਪਂ ਨ ਜਾਨਾਤਿ, ਤਥੂਪਮੋ ਅਯਂ ਭਿਕ੍ਖੁ. ਸੋ ਸਮੁਟ੍ਠਾਨਤੋ ਰੂਪਂ ਅਜਾਨਨ੍ਤੋ ਰੂਪਂ ਪਰਿਗ੍ਗਹੇਤ੍ਵਾ…ਪੇ… ਪਰਿਬਾਹਿਰੋ ਹੋਤਿ.
ਨ ਲਕ੍ਖਣਕੁਸਲੋ ਹੋਤੀਤਿ ‘‘ਕਮ੍ਮਲਕ੍ਖਣੋ ਬਾਲੋ, ਕਮ੍ਮਲਕ੍ਖਣੋ ਪਣ੍ਡਿਤੋ’’ਤਿ ਏਵਂ ਵੁਤ੍ਤਂ ਕੁਸਲਾਕੁਸਲਕਮ੍ਮਂ ਪਣ੍ਡਿਤਬਾਲਲਕ੍ਖਣਨ੍ਤਿ ਨ ਜਾਨਾਤਿ. ਸੋ ਏਵਂ ਅਜਾਨਨ੍ਤੋ ਬਾਲੇ ਵਜ੍ਜੇਤ੍ਵਾ ਪਣ੍ਡਿਤੇ ਨ ਸੇਵਤਿ. ਬਾਲੇ ਵਜ੍ਜੇਤ੍ਵਾ ਪਣ੍ਡਿਤੇ ਅਸੇਵਨ੍ਤੋ ਕਪ੍ਪਿਯਾਕਪ੍ਪਿਯਂ ਕੁਸਲਾਕੁਸਲਂ ਸਾਵਜ੍ਜਾਨਵਜ੍ਜਂ ਗਰੁਕਲਹੁਕਂ ਸਤੇਕਿਚ੍ਛਾਤੇਕਿਚ੍ਛਂ ਕਾਰਣਾਕਾਰਣਂ ਨ ਜਾਨਾਤਿ. ਤਂ ਅਜਾਨਨ੍ਤੋ ਕਮ੍ਮਟ੍ਠਾਨਂ ਗਹੇਤ੍ਵਾ ਵਡ੍ਢੇਤੁਂ ਨ ਸਕ੍ਕੋਤਿ. ਸੋ ਯਥਾ ਤਸ੍ਸ ਗੋਪਾਲਕਸ੍ਸ ਗੋਗਣੋ ਨ ਵਡ੍ਢਤਿ, ਏਵਂ ਇਮਸ੍ਮਿਂ ਸਾਸਨੇ ਯਥਾਵੁਤ੍ਤੇਹਿ ਸੀਲਾਦੀਹਿ ਨ ਵਡ੍ਢਤਿ. ਸੋ ਗੋਪਾਲਕੋ ਵਿਯ ਚ ਪਞ੍ਚਹਿ ਗੋਰਸੇਹਿ, ਪਞ੍ਚਹਿ ਧਮ੍ਮਕ੍ਖਨ੍ਧੇਹਿ ਪਰਿਬਾਹਿਰੋ ਹੋਤਿ.
ਨ ਆਸਾਟਿਕਂ ਹਾਰੇਤਾ ਹੋਤੀਤਿ ‘‘ਉਪ੍ਪਨ੍ਨਂ ਕਾਮਵਿਤਕ੍ਕ’’ਨ੍ਤਿ ਏਵਂ ਵੁਤ੍ਤੇ ਕਾਮਵਿਤਕ੍ਕਾਦਯੋ ਨ ਵਿਨੋਦੇਤਿ. ਸੋ ਇਮਂ ਅਕੁਸਲਵਿਤਕ੍ਕਂ ਆਸਾਟਿਕਂ ਅਹਾਰੇਤ੍ਵਾ ਵਿਤਕ੍ਕਵਸਿਕੋ ਹੁਤ੍ਵਾ ਵਿਚਰਨ੍ਤੋ ਕਮ੍ਮਟ੍ਠਾਨਂ ਗਹੇਤ੍ਵਾ ਵਡ੍ਢੇਤੁਂ ਨ ਸਕ੍ਕੋਤਿ. ਸੋ ਯਥਾ ਤਸ੍ਸ ਗੋਪਾਲਕਸ੍ਸ…ਪੇ… ਪਰਿਬਾਹਿਰੋ ਹੋਤਿ.
ਨ ਵਣਂ ਪਟਿਚ੍ਛਾਦੇਤਾ ਹੋਤੀਤਿ ‘‘ਚਕ੍ਖੁਨਾ ਰੂਪਂ ਦਿਸ੍ਵਾ ਨਿਮਿਤ੍ਤਗ੍ਗਾਹੀ ਹੋਤੀ’’ਤਿਆਦਿਨਾ ਨਯੇਨ ਸਬ੍ਬਾਰਮ੍ਮਣੇਸੁ ਨਿਮਿਤ੍ਤਂ ਗਣ੍ਹਨ੍ਤੋ ਯਥਾ ਸੋ ਗੋਪਾਲਕੋ ਵਣਂ ਨ ਪਟਿਚ੍ਛਾਦੇਤਿ, ਏਵਂ ਸਂਵਰਂ ਨ ਸਮ੍ਪਾਦੇਤਿ. ਸੋ ਵਿਵਟਦ੍ਵਾਰੋ ਵਿਚਰਨ੍ਤੋ ਕਮ੍ਮਟ੍ਠਾਨਂ ਗਹੇਤ੍ਵਾ ਵਡ੍ਢੇਤੁਂ ਨ ਸਕ੍ਕੋਤਿ…ਪੇ… ਪਰਿਬਾਹਿਰੋ ਹੋਤਿ.
ਨ ਧੂਮਂ ਕਤ੍ਤਾ ਹੋਤੀਤਿ ਸੋ ਗੋਪਾਲਕੋ ਧੂਮਂ ਵਿਯ ਧਮ੍ਮਦੇਸਨਾਧੂਮਂ ਨ ਕਰੋਤਿ, ਧਮ੍ਮਕਥਂ ਵਾ ਸਰਭਞ੍ਞਂ ਵਾ ਉਪਨਿਸਿਨ੍ਨਕਕਥਂ ਵਾ ਅਨੁਮੋਦਨਂ ਵਾ ਨ ਕਰੋਤਿ, ਤਤੋ ਨਂ ਮਨੁਸ੍ਸਾ ‘‘ਬਹੁਸ੍ਸੁਤੋ ਗੁਣਵਾ’’ਤਿ ਨ ਜਾਨਨ੍ਤਿ. ਤੇ ਗੁਣਾਗੁਣਂ ਅਜਾਨਨ੍ਤੋ ਚਤੂਹਿ ਪਚ੍ਚਯੇਹਿ ਸਙ੍ਗਹਂ ਨ ਕਰੋਨ੍ਤਿ. ਸੋ ਪਚ੍ਚਯੇਹਿ ਕਿਲਮਮਾਨੋ ਬੁਦ੍ਧਵਚਨਂ ਸਜ੍ਝਾਯਂ ਕਾਤੁਂ ਵਤ੍ਤਪਟਿਵਤ੍ਤਂ ਪੂਰੇਤੁਂ ਕਮ੍ਮਟ੍ਠਾਨਂ ਗਹੇਤ੍ਵਾ ਵਡ੍ਢੇਤੁਂ ਨ ਸਕ੍ਕੋਤਿ…ਪੇ… ਪਰਿਬਾਹਿਰੋ ਹੋਤਿ.
ਨ ਤਿਤ੍ਥਂ ਜਾਨਾਤੀਤਿ ਤਿਤ੍ਥਭੂਤੇ ਬਹੁਸ੍ਸੁਤਭਿਕ੍ਖੂ ਨ ਉਪਸਙ੍ਕਮਤਿ. ਅਨੁਪਸਙ੍ਕਮਨ੍ਤੋ ‘‘ਇਦਂ, ਭਨ੍ਤੇ, ਬ੍ਯਞ੍ਜਨਂ ਕਥਂ ਰੋਪੇਤਬ੍ਬਂ? ਇਮਸ੍ਸ ਭਾਸਿਤਸ੍ਸ ਕੋ ਅਤ੍ਥੋ? ਇਮਸ੍ਮਿਂ ਠਾਨੇ ਪਾਲ਼ਿ ਕਿਂ ਵਦਤਿ? ਇਮਸ੍ਮਿਂ ਠਾਨੇ ਅਤ੍ਥੋ ਕਿਂ ਦੀਪੇਤੀ’’ਤਿ ਏਵਂ ਨ ਪਰਿਪੁਚ੍ਛਤਿ ਨ ਪਰਿਪਞ੍ਹਤਿ, ਨ ਜਾਨਾਪੇਤੀਤਿ ਅਤ੍ਥੋ. ਤਸ੍ਸ ਤੇ ਏਵਂ ਅਪਰਿਪੁਚ੍ਛਿਤਾ ਅਵਿਵਟਞ੍ਚੇਵ ਨ ਵਿਵਰਨ੍ਤਿ, ਭਾਜੇਤ੍ਵਾ ਨ ਦਸ੍ਸੇਨ੍ਤਿ, ਅਨੁਤ੍ਤਾਨੀਕਤਞ੍ਚ ਨ ਉਤ੍ਤਾਨਿਂ ਕਰੋਨ੍ਤਿ, ਅਪਾਕਟਂ ਨ ਪਾਕਟਂ ਕਰੋਨ੍ਤਿ. ਅਨੇਕਵਿਹਿਤੇਸੁ ਚ ਕਙ੍ਖਾਠਾਨਿਯੇਸੁ ਧਮ੍ਮੇਸੂਤਿ ਅਨੇਕਵਿਧਾਸੁ ਕਙ੍ਖਾਸੁ ਏਕਕਙ੍ਖਮ੍ਪਿ ਨ ਪਟਿਵਿਨੋਦੇਨ੍ਤਿ. ਕਙ੍ਖਾਯੇਵ ਹਿ ਕਙ੍ਖਾਠਾਨਿਯਾ ਧਮ੍ਮਾ ਨਾਮ. ਤਤ੍ਥ ਏਕਂ ਕਙ੍ਖਮ੍ਪਿ ਨ ਨੀਹਰਨ੍ਤੀਤਿ ਅਤ੍ਥੋ. ਸੋ ਏਵਂ ਬਹੁਸ੍ਸੁਤਤਿਤ੍ਥਂ ਅਨੁਪਸਙ੍ਕਮਿਤ੍ਵਾ ਸਕਙ੍ਖੋ ਕਮ੍ਮਟ੍ਠਾਨਂ ਗਹੇਤ੍ਵਾ ਵਡ੍ਢੇਤੁਂ ਨ ਸਕ੍ਕੋਤਿ. ਯਥਾ ਵਾ ਸੋ ਗੋਪਾਲਕੋ ਤਿਤ੍ਥਂ ਨ ਜਾਨਾਤਿ, ਏਵਂ ਅਯਮ੍ਪਿ ਭਿਕ੍ਖੁ ਧਮ੍ਮਤਿਤ੍ਥਂ ਨ ਜਾਨਾਤਿ. ਅਜਾਨਨ੍ਤੋ ਅਵਿਸਯੇ ਪਞ੍ਹਂ ਪੁਚ੍ਛਤਿ, ਆਭਿਧਮ੍ਮਿਕਂ ਉਪਸਙ੍ਕਮਿਤ੍ਵਾ ਕਪ੍ਪਿਯਾਕਪ੍ਪਿਯਂ ਪੁਚ੍ਛਤਿ, ਵਿਨਯਧਰਂ ਉਪਸਙ੍ਕਮਿਤ੍ਵਾ ਰੂਪਾਰੂਪਪਰਿਚ੍ਛੇਦਂ ਪੁਚ੍ਛਤਿ. ਤੇ ਅਵਿਸਯੇ ਪੁਟ੍ਠਾ ਕਥੇਤੁਂ ਨ ਸਕ੍ਕੋਨ੍ਤਿ. ਸੋ ਅਤ੍ਤਨਾ ਸਕਙ੍ਖੋ ਕਮ੍ਮਟ੍ਠਾਨਂ ਗਹੇਤ੍ਵਾ ਵਡ੍ਢੇਤੁਂ ਨ ਸਕ੍ਕੋਤਿ…ਪੇ… ਪਰਿਬਾਹਿਰੋ ਹੋਤਿ.
ਨ ਪੀਤਂ ਜਾਨਾਤੀਤਿ ਯਥਾ ਸੋ ਗੋਪਾਲਕੋ ਪੀਤਾਪੀਤਂ ਨ ਜਾਨਾਤਿ, ਏਵਂ ਧਮ੍ਮੂਪਸਞ੍ਹਿਤਂ ਪਾਮੋਜ੍ਜਂ ਨ ਜਾਨਾਤਿ ਨ ਲਭਤਿ. ਸਵਨਮਯਂ ਪੁਞ੍ਞਕਿਰਿਯਵਤ੍ਥੁਂ ਨਿਸ੍ਸਾਯ ਆਨਿਸਂਸਂ ਨ ਵਿਨ੍ਦਤਿ, ਧਮ੍ਮਸ੍ਸਵਨਗ੍ਗਂ ਗਨ੍ਤ੍ਵਾ ਸਕ੍ਕਚ੍ਚਂ ਨ ਸੁਣਾਤਿ, ਨਿਸਿਨ੍ਨੋ ਨਿਦ੍ਦਾਯਤਿ, ਕਥਂ ਕਥੇਤਿ, ਅਞ੍ਞਵਿਹਿਤਕੋ ਹੋਤਿ. ਸੋ ਸਕ੍ਕਚ੍ਚਂ ਧਮ੍ਮਂ ਅਸ੍ਸੁਣਨ੍ਤੋ ਕਮ੍ਮਟ੍ਠਾਨਂ ਗਹੇਤ੍ਵਾ ਵਡ੍ਢੇਤੁਂ ਨ ਸਕ੍ਕੋਤਿ…ਪੇ… ਪਰਿਬਾਹਿਰੋ ਹੋਤਿ.
ਨ ਵੀਥਿਂ ਜਾਨਾਤੀਤਿ ਸੋ ਗੋਪਾਲਕੋ ਮਗ੍ਗਾਮਗ੍ਗਂ ਵਿਯ ‘‘ਅਯਂ ਲੋਕਿਯੋ, ਅਯਂ ਲੋਕੁਤ੍ਤਰੋ’’ਤਿ ਅਰਿਯਂ ਅਟ੍ਠਙ੍ਗਿਕਂ ਮਗ੍ਗਂ ਯਥਾਭੂਤਂ ਨਪ੍ਪਜਾਨਾਤਿ. ਅਜਾਨਨ੍ਤੋ ਲੋਕਿਯਮਗ੍ਗੇ ਅਭਿਨਿਵਿਸਿਤ੍ਵਾ ਲੋਕੁਤ੍ਤਰਂ ਨਿਬ੍ਬਤ੍ਤੇਤੁਂ ਨ ਸਕ੍ਕੋਤਿ…ਪੇ… ਪਰਿਬਾਹਿਰੋ ਹੋਤਿ.
ਨ ਗੋਚਰਕੁਸਲੋ ਹੋਤੀਤਿ ਸੋ ਗੋਪਾਲਕੋ ਪਞ੍ਚਾਹਿਕਸਤ੍ਤਾਹਿਕਚਾਰੇ ਵਿਯ ਚਤ੍ਤਾਰੋ ਸਤਿਪਟ੍ਠਾਨੇ ‘‘ਇਮੇ ਲੋਕਿਯਾ, ਇਮੇ ਲੋਕੁਤ੍ਤਰਾ’’ਤਿ ਯਥਾਭੂਤਂ ਨਪ੍ਪਜਾਨਾਤਿ. ਅਜਾਨਨ੍ਤੋ ਸੁਖੁਮਟ੍ਠਾਨੇਸੁ ਅਤ੍ਤਨੋ ਞਾਣਂ ਚਰਾਪੇਤ੍ਵਾ ਲੋਕਿਯਸਤਿਪਟ੍ਠਾਨੇ ਅਭਿਨਿਵਿਸਿਤ੍ਵਾ ਲੋਕੁਤ੍ਤਰਂ ਨਿਬ੍ਬਤ੍ਤੇਤੁਂ ਨ ਸਕ੍ਕੋਤਿ…ਪੇ… ਪਰਿਬਾਹਿਰੋ ਹੋਤਿ.
ਅਨਵਸੇਸਦੋਹੀ ਹੋਤੀਤਿ ਪਟਿਗ੍ਗਹਣੇ ਮਤ੍ਤਂ ਅਜਾਨਨ੍ਤੋ ਅਨਵਸੇਸਂ ਦੁਹਤਿ. ਨਿਦ੍ਦੇਸਵਾਰੇ ਪਨਸ੍ਸ ਅਭਿਹਟ੍ਠੁਂ ਪਵਾਰੇਨ੍ਤੀਤਿ ਅਭਿਹਰਿਤ੍ਵਾ ਪਵਾਰੇਨ੍ਤਿ. ਏਤ੍ਥ ਦ੍ਵੇ ਅਭਿਹਾਰਾ ਵਾਚਾਭਿਹਾਰੋ ਚ, ਪਚ੍ਚਯਾਭਿਹਾਰੋ ਚ. ਵਾਚਾਭਿਹਾਰੋ ਨਾਮ ਮਨੁਸ੍ਸਾ ਭਿਕ੍ਖੁਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘‘ਵਦੇਯ੍ਯਾਥ, ਭਨ੍ਤੇ, ਯੇਨਤ੍ਥੋ’’ਤਿ ਪਵਾਰੇਨ੍ਤਿ. ਪਚ੍ਚਯਾਭਿਹਾਰੋ ਨਾਮ ਵਤ੍ਥਾਦੀਨਿ ਵਾ ਸਪ੍ਪਿਨਵਨੀਤਫਾਣਿਤਾਦੀਨਿ ਵਾ ਗਹੇਤ੍ਵਾ ਭਿਕ੍ਖੁਸ੍ਸ ਸਨ੍ਤਿਕਂ ਗਨ੍ਤ੍ਵਾ ‘‘ਗਣ੍ਹਥ, ਭਨ੍ਤੇ, ਯਾਵਤਕੇਨ ਅਤ੍ਥੋ’’ਤਿ ਵਦਨ੍ਤਿ. ਤਤ੍ਰ ਭਿਕ੍ਖੁ ਮਤ੍ਤਂ ਨ ਜਾਨਾਤੀਤਿ ਭਿਕ੍ਖੁ ਤੇਸੁ ਪਚ੍ਚਯੇਸੁ ਪਮਾਣਂ ਨ ਜਾਨਾਤਿ. ‘‘ਦਾਯਕਸ੍ਸ ਵਸੋ ਵੇਦਿਤਬ੍ਬੋ, ਦੇਯ੍ਯਧਮ੍ਮਸ੍ਸ ਵਸੋ ਵੇਦਿਤਬ੍ਬੋ, ਅਤ੍ਤਨੋ ਥਾਮੋ ਵੇਦਿਤਬ੍ਬੋ’’ਤਿ ਇਮਿਨਾ ਨਯੇਨ ਪਮਾਣਯੁਤ੍ਤਕਂ ਅਗ੍ਗਹੇਤ੍ਵਾ ਯਂ ਆਹਰਨ੍ਤਿ, ਤਂ ਸਬ੍ਬਂ ਗਣ੍ਹਾਤੀਤਿ ਅਤ੍ਥੋ. ਮਨੁਸ੍ਸਾ ਵਿਪ੍ਪਟਿਸਾਰਿਨੋ ਨ ਪੁਨ ਅਭਿਹਰਿਤ੍ਵਾ ਪਵਾਰੇਨ੍ਤਿ. ਸੋ ਪਚ੍ਚਯੇਹਿ ਕਿਲਮਨ੍ਤੋ ਕਮ੍ਮਟ੍ਠਾਨਂ ਗਹੇਤ੍ਵਾ ਵਡ੍ਢੇਤੁਂ ਨ ਸਕ੍ਕੋਤਿ…ਪੇ… ਪਰਿਬਾਹਿਰੋ ਹੋਤਿ.
ਤੇ ਨ ਅਤਿਰੇਕਪੂਜਾਯ ਪੂਜੇਤਾ ਹੋਤੀਤਿ ਸੋ ਗੋਪਾਲਕੋ ਮਹਾਉਸਭੇ ਵਿਯ ਥੇਰੇ ਭਿਕ੍ਖੂ ਇਮਾਯ ਆਵਿ ਚੇਵ ਰਹੋ ਚ ਮੇਤ੍ਤਾਕਾਯਕਮ੍ਮਾਦਿਕਾਯ ਅਤਿਰੇਕਪੂਜਾਯ ਨ ਪੂਜੇਤਿ. ਤਤੋ ਥੇਰਾ ‘‘ਇਮੇ ਅਮ੍ਹੇਸੁ ਗਰੁਚਿਤ੍ਤੀਕਾਰਂ ਨ ਕਰੋਨ੍ਤੀ’’ਤਿ ਨਵਕੇ ਭਿਕ੍ਖੂ ਦ੍ਵੀਹਿ ਸਙ੍ਗਹੇਹਿ ਨ ਸਙ੍ਗਣ੍ਹਨ੍ਤਿ, ਨੇਵ ਧਮ੍ਮਸਙ੍ਗਹੇਨ ਸਙ੍ਗਣ੍ਹਨ੍ਤਿ, ਨ ਆਮਿਸਸਙ੍ਗਹੇਨ, ਚੀਵਰੇਨ ਵਾ ਪਤ੍ਤੇਨ ਵਾ ਪਤ੍ਤਪਰਿਯਾਪਨ੍ਨੇਨ ਵਾ ਵਸਨਟ੍ਠਾਨੇਨ ਵਾ ਕਿਲਮਨ੍ਤੇਪਿ ਨਪ੍ਪਟਿਜਗ੍ਗਨ੍ਤਿ, ਪਾਲ਼ਿਂ ਵਾ ਅਟ੍ਠਕਥਂ ਵਾ ਧਮ੍ਮਕਥਾਬਨ੍ਧਂ ਵਾ ਗੁਲ਼੍ਹਗਨ੍ਥਂ ਵਾ ਨ ਸਿਕ੍ਖਾਪੇਨ੍ਤਿ. ਨਵਕਾ ਥੇਰਾਨਂ ਸਨ੍ਤਿਕਾ ਸਬ੍ਬਸੋ ਇਮੇ ਦ੍ਵੇ ਸਙ੍ਗਹੇ ਅਲਭਮਾਨਾ ਇਮਸ੍ਮਿਂ ਸਾਸਨੇ ਪਤਿਟ੍ਠਾਤੁਂ ਨ ਸਕ੍ਕੋਨ੍ਤਿ. ਯਥਾ ਤਸ੍ਸ ਗੋਪਾਲਕਸ੍ਸ ਗੋਗਣੋ ਨ ਵਡ੍ਢਤਿ, ਏਵਂ ਸੀਲਾਦੀਹਿ ਨ ਵਡ੍ਢਨ੍ਤਿ. ਯਥਾ ਚ ਸੋ ਗੋਪਾਲਕੋ ਪਞ੍ਚਹਿ ਗੋਰਸੇਹਿ, ਏਵਂ ਪਞ੍ਚਹਿ ਧਮ੍ਮਕ੍ਖਨ੍ਧੇਹਿ ਪਰਿਬਾਹਿਰਾ ਹੋਨ੍ਤਿ. ਸੁਕ੍ਕਪਕ੍ਖੋ ਕਣ੍ਹਪਕ੍ਖੇ ਵੁਤ੍ਤਵਿਪਲ੍ਲਾਸਵਸੇਨ ਯੋਜੇਤ੍ਵਾ ਵੇਦਿਤਬ੍ਬੋ.
ਅਨੁਸ੍ਸਤਿਵਗ੍ਗੋ ਦੁਤਿਯੋ.
ਮਨੋਰਥਪੂਰਣਿਯਾ ਅਙ੍ਗੁਤ੍ਤਰਨਿਕਾਯ-ਅਟ੍ਠਕਥਾਯ
ਏਕਾਦਸਕਨਿਪਾਤਸ੍ਸ ਸਂਵਣ੍ਣਨਾ ਨਿਟ੍ਠਿਤਾ.
ਨਿਗਮਨਕਥਾ
ਏਤ੍ਤਾਵਤਾ ਚ –
ਆਯਾਚਿਤੋ ਸੁਮਤਿਨਾ ਥੇਰੇਨ ਭਦਨ੍ਤਜੋਤਿਪਾਲੇਨ;
ਕਞ੍ਚਿਪੁਰਾਦੀਸੁ ਮਯਾ ਪੁਬ੍ਬੇ ਸਦ੍ਧਿਂ ਵਸਨ੍ਤੇਨ.
ਵਰਤਮ੍ਬਪਣ੍ਣਿਦੀਪੇ ਮਹਾਵਿਹਾਰਮ੍ਹਿ ਵਸਨਕਾਲੇਪਿ;
ਪਾਕਂ ਗਤੇ ਵਿਯ ਦੁਮੇ ਵਲਞ੍ਜਮਾਨਮ੍ਹਿ ਸਦ੍ਧਮ੍ਮੇ.
ਪਾਰਂ ਪਿਟਕਤ੍ਤਯਸਾਗਰਸ੍ਸ ਗਨ੍ਤ੍ਵਾ ਠਿਤੇਨ ਸੁਮਤਿਨਾ;
ਪਰਿਸੁਦ੍ਧਾਜੀਵੇਨਾਭਿਯਾਚਿਤੋ ਜੀਵਕੇਨਾਪਿ.
ਧਮ੍ਮਕਥਾਯ ਨਿਪੁਣਪਰਮਨਿਕਾਯਸ੍ਸਟ੍ਠਕਥਂ ਆਰਦ੍ਧੋ;
ਯਮਹਂ ਚਿਰਕਾਲਟ੍ਠਿਤਿਮਿਚ੍ਛਨ੍ਤੋ ਸਾਸਨਵਰਸ੍ਸ.
ਸਾ ਹਿ ਮਹਾਅਟ੍ਠਕਥਾਯ ਸਾਰਮਾਦਾਯ ਨਿਟ੍ਠਿਤਾ ਏਸਾ;
ਚਤੁਨਵੁਤਿਪਰਿਮਾਣਾਯ ਪਾਲ਼ਿਯਾ ਭਾਣਵਾਰੇਹਿ.
ਸਬ੍ਬਾਗਮਸਂਵਣ੍ਣਨਮਨੋਰਥੋ ਪੂਰਿਤੋ ਚ ਮੇ ਯਸ੍ਮਾ;
ਏਤਾਯ ਮਨੋਰਥਪੂਰਣੀਤਿ ਨਾਮਂ ਤਤੋ ਅਸ੍ਸਾ.
ਏਕੂਨਸਟ੍ਠਿਮਤ੍ਤੋ ਵਿਸੁਦ੍ਧਿਮਗ੍ਗੋਪਿ ਭਾਣਵਾਰੇਹਿ;
ਅਤ੍ਥਪ੍ਪਕਾਸਨਤ੍ਥਾਯ ਆਗਮਾਨਂ ਕਤੋ ਯਸ੍ਮਾ.
ਤਸ੍ਮਾ ਤੇਨ ਸਹਾਯਂ ਗਾਥਾਗਣਨਾਨਯੇਨ ਅਟ੍ਠਕਥਾ;
ਤੀਹਾਧਿਕਦਿਯਡ੍ਢਸਤਂ ਵਿਞ੍ਞੇਯ੍ਯਾ ਭਾਣਵਾਰਾਨਂ.
ਤੀਹਾਧਿਕਦਿਯਡ੍ਢਸਤਪ੍ਪਮਾਣਮਿਤਿ ਭਾਣਵਾਰਤੋ ਏਸਾ;
ਸਮਯਂ ਪਕਾਸਯਨ੍ਤੀ ਮਹਾਵਿਹਾਰਾਧਿਵਾਸੀਨਂ.
ਮੂਲਟ੍ਠਕਥਾਸਾਰਂ ਆਦਾਯ ਮਯਾ ਇਮਂ ਕਰੋਨ੍ਤੇਨ;
ਯਂ ਪੁਞ੍ਞਮੁਪਚਿਤਂ ਤੇਨ ਹੋਤੁ ਲੋਕੋ ਸਦਾ ਸੁਖਿਤੋਤਿ.
ਪਰਮਵਿਸੁਦ੍ਧਸਦ੍ਧਾਬੁਦ੍ਧਿਵੀਰਿਯਪ੍ਪਟਿਮਣ੍ਡਿਤੇਨ ਸੀਲਾਚਾਰਜ੍ਜਵਮਦ੍ਦਵਾਦਿਗੁਣਸਮੁਦਯਸਮੁਦਿਤੇਨ ਸਕਸਮਯਸਮਯਨ੍ਤਰਗਹਨਜ੍ਝੋਗਾਹਨਸਮਤ੍ਥੇਨ ਪਞ੍ਞਾਵੇਯ੍ਯਤ੍ਤਿਯਸਮਨ੍ਨਾਗਤੇਨ ਤਿਪਿਟਕਪਰਿਯਤ੍ਤਿਪ੍ਪਭੇਦੇ ਸਾਟ੍ਠਕਥੇ ਸਤ੍ਥੁ ਸਾਸਨੇ ਅਪ੍ਪਟਿਹਤਞਾਣਪ੍ਪਭਾਵੇਨ ਮਹਾਵੇਯ੍ਯਾਕਰਣੇਨ ਕਰਣਸਮ੍ਪਤ੍ਤਿਜਨਿਤਸੁਖਵਿਨਿਗ੍ਗਤਮਧੁਰੋਦਾਰਵਚਨਲਾਵਣ੍ਣਯੁਤ੍ਤੇਨ ਯੁਤ੍ਤਮੁਤ੍ਤਵਾਦਿਨਾ ਵਾਦੀਵਰੇਨ ਮਹਾਕਵਿਨਾ ਪਭਿਨ੍ਨਪਟਿਸਮ੍ਭਿਦਾਪਰਿਵਾਰੇ ਛਲ਼ਭਿਞ੍ਞਾਦਿਪ੍ਪਭੇਦਗੁਣਪ੍ਪਟਿਮਣ੍ਡਿਤੇ ਉਤ੍ਤਰਿਮਨੁਸ੍ਸਧਮ੍ਮੇ ਸੁਪ੍ਪਤਿਟ੍ਠਿਤਬੁਦ੍ਧੀਨਂ ਥੇਰਾਨਂ ਥੇਰਵਂਸਪ੍ਪਦੀਪਾਨਂ ਮਹਾਵਿਹਾਰਵਾਸੀਨਂ ਵਂਸਾਲਙ੍ਕਾਰਭੂਤੇਨ ਸੁਵਿਪੁਲਵਿਸੁਦ੍ਧਬੁਦ੍ਧਿਨਾ ਬੁਦ੍ਧਘੋਸੋਤਿ ਗਰੂਹਿ ਗਹਿਤਨਾਮਧੇਯ੍ਯੇਨ ਥੇਰੇਨ ਕਤਾ ਅਯਂ ਮਨੋਰਥਪੂਰਣੀ ਨਾਮ ਅਙ੍ਗੁਤ੍ਤਰਨਿਕਾਯਟ੍ਠਕਥਾ –
ਤਾਵ ਤਿਟ੍ਠਤੁ ਲੋਕਸ੍ਮਿਂ, ਲੋਕਨਿਤ੍ਥਰਣੇਸਿਨਂ;
ਦਸ੍ਸੇਨ੍ਤੀ ਕੁਲਪੁਤ੍ਤਾਨਂ, ਨਯਂ ਚਿਤ੍ਤਵਿਸੁਦ੍ਧਿਯਾ.
ਯਾਵ ਬੁਦ੍ਧੋਤਿ ਨਾਮਮ੍ਪਿ, ਸੁਦ੍ਧਚਿਤ੍ਤਸ੍ਸ ਤਾਦਿਨੋ;
ਲੋਕਮ੍ਹਿ ਲੋਕਜੇਟ੍ਠਸ੍ਸ, ਪਵਤ੍ਤਤਿ ਮਹੇਸਿਨੋਤਿ.
ਮਨੋਰਥਪੂਰਣੀ ਨਾਮ
ਅਙ੍ਗੁਤ੍ਤਰਨਿਕਾਯ-ਅਟ੍ਠਕਥਾ ਸਬ੍ਬਾਕਾਰੇਨ ਨਿਟ੍ਠਿਤਾ.