੯. ਕੋਕਾਲਿਕਸੁਤ੍ਤਵਣ੍ਣਨਾ
੮੯. ਨਵਮੇ ਕੋਕਾਲਿਕੋ ਭਿਕ੍ਖੁ ਯੇਨ ਭਗਵਾ ਤੇਨੁਪਸਙ੍ਕਮੀਤਿ ਕੋਯਂ ਕੋਕਾਲਿਕੋ, ਕਸ੍ਮਾ ਚ ਉਪਸਙ੍ਕਮਿ? ਅਯਂ ਕਿਰ ਕੋਕਾਲਿਕਰਟ੍ਠੇ ਕੋਕਾਲਿਕਨਗਰੇ ਕੋਕਾਲਿਕਸੇਟ੍ਠਿਸ੍ਸ ਪੁਤ੍ਤੋ ਪਬ੍ਬਜਿਤ੍ਵਾ ਪਿਤਰਾ ਕਾਰਿਤੇ ਵਿਹਾਰੇ ਵਸਤਿ ਚੂਲ਼ਕੋਕਾਲਿਕੋਤਿ ਨਾਮੇਨ, ਨ ਪਨ ਦੇਵਦਤ੍ਤਸ੍ਸ ਸਿਸ੍ਸੋ. ਸੋ ਹਿ ਬ੍ਰਾਹ੍ਮਣਪੁਤ੍ਤੋ ਮਹਾਕੋਕਾਲਿਕੋ ਨਾਮ. ਭਗਵਤਿ ਪਨ ਸਾਵਤ੍ਥਿਯਂ ਵਿਹਰਨ੍ਤੇ ਦ੍ਵੇ ਅਗ੍ਗਸਾਵਕਾ ਪਞ੍ਚਮਤ੍ਤੇਹਿ ਭਿਕ੍ਖੁਸਤੇਹਿ ਸਦ੍ਧਿਂ ਜਨਪਦਚਾਰਿਕਂ ਚਰਮਾਨਾ ਉਪਕਟ੍ਠਾਯ ਵਸ੍ਸੂਪਨਾਯਿਕਾਯ ਵਿਵੇਕਵਾਸਂ ਵਸਿਤੁਕਾਮਾ ਤੇ ਭਿਕ੍ਖੂ ਉਯ੍ਯੋਜੇਤ੍ਵਾ ਅਤ੍ਤਨੋ ਪਤ੍ਤਚੀਵਰਮਾਦਾਯ ਤਸ੍ਮਿਂ ਜਨਪਦੇ ਤਂ ਨਗਰਂ ਪਤ੍ਵਾ ਵਿਹਾਰਂ ਅਗਮਿਂਸੁ. ਤਤ੍ਥ ਨੇਸਂ ਕੋਕਾਲਿਕੋ ਵਤ੍ਤਂ ਅਕਾਸਿ. ਤੇਪਿ ਤੇਨ ਸਦ੍ਧਿਂ ਸਮ੍ਮੋਦਿਤ੍ਵਾ, ‘‘ਆਵੁਸੋ, ਮਯਂ ਇਧ ਤੇਮਾਸਂ ਵਸਿਸ੍ਸਾਮ, ਮਾ ਨੋ ਕਸ੍ਸਚਿ ਆਰੋਚੇਸੀ’’ਤਿ ਪਟਿਞ੍ਞਂ ਗਹੇਤ੍ਵਾ ਵਸਿਂਸੁ. ਵਸਿਤ੍ਵਾ ਪਵਾਰਣਾਦਿਵਸੇ ਪਵਾਰੇਤ੍ਵਾ ‘‘ਗਚ੍ਛਾਮ ਮਯਂ, ਆਵੁਸੋ’’ਤਿ ਕੋਕਾਲਿਕਂ ਆਪੁਚ੍ਛਿਂਸੁ. ਕੋਕਾਲਿਕੋ ‘‘ਅਜ੍ਜ, ਆਵੁਸੋ, ਏਕਦਿਵਸਂ ਵਸਿਤ੍ਵਾ ਸ੍ਵੇ ਗਮਿਸ੍ਸਥਾ’’ਤਿ ਵਤ੍ਵਾ ਦੁਤਿਯਦਿਵਸੇ ਨਗਰਂ ਪਵਿਸਿਤ੍ਵਾ ਮਨੁਸ੍ਸੇ ਆਮਨ੍ਤੇਸਿ – ‘‘ਆਵੁਸੋ, ਤੁਮ੍ਹੇ ਦ੍ਵੇ ਅਗ੍ਗਸਾਵਕੇ ਇਧ ਆਗਨ੍ਤ੍ਵਾ ਵਸਮਾਨੇਪਿ ਨ ਜਾਨਾਥ, ਨ ਤੇ ਕੋਚਿ ਪਚ੍ਚਯੇਨਪਿ ਨਿਮਨ੍ਤੇਤੀ’’ਤਿ. ਨਗਰਵਾਸਿਨੋ ‘‘ਕਹਂ, ਭਨ੍ਤੇ, ਥੇਰਾ, ਕਸ੍ਮਾ ਨੋ ਨਾਰੋਚਯਿਤ੍ਥਾ’’ਤਿ? ਕਿਂ, ਆਵੁਸੋ, ਆਰੋਚਿਤੇਨ, ਕਿਂ ਨ ਪਸ੍ਸਥ ਦ੍ਵੇ ਭਿਕ੍ਖੂ ਥੇਰਾਸਨੇ ਨਿਸੀਦਨ੍ਤੇ, ਏਤੇ ਅਗ੍ਗਸਾਵਕਾਤਿ. ਤੇ ਖਿਪ੍ਪਂ ਸਨ੍ਨਿਪਤਿਤ੍ਵਾ ਸਪ੍ਪਿਫਾਣਿਤਾਦੀਨਿ ਚੇਵ ਚੀਵਰਦੁਸ੍ਸਾਨਿ ਚ ਸਂਹਰਿਂਸੁ.
ਕੋਕਾਲਿਕੋ ਚਿਨ੍ਤੇਸਿ – ‘‘ਪਰਮਪ੍ਪਿਚ੍ਛਾ ਅਗ੍ਗਸਾਵਕਾ ਪਯੁਤ੍ਤਵਾਚਾਯ ਉਪ੍ਪਨ੍ਨਲਾਭਂ ਨ ਸਾਦਿਯਿਸ੍ਸਨ੍ਤਿ, ਅਸਾਦਿਯਨ੍ਤਾ ‘ਆਵਾਸਿਕਸ੍ਸ ਦੇਥਾ’ਤਿ ਵਕ੍ਖਨ੍ਤੀ’’ਤਿ ਤਂ ਲਾਭਂ ਗਾਹਾਪੇਤ੍ਵਾ ਥੇਰਾਨਂ ਸਨ੍ਤਿਕਂ ਅਗਮਾਸਿ. ਥੇਰਾ ਦਿਸ੍ਵਾਵ ‘‘ਇਮੇ ਪਚ੍ਚਯਾ ਨੇਵ ਅਮ੍ਹਾਕਂ, ਨ ਕੋਕਾਲਿਕਸ੍ਸ ਕਪ੍ਪਨ੍ਤੀ’’ਤਿ ਪਟਿਕ੍ਖਿਪਿਤ੍ਵਾ ਪਕ੍ਕਮਿਂਸੁ. ਕੋਕਾਲਿਕੋ ‘‘ਕਥਞ੍ਹਿ ਨਾਮ ਸਯਂ ਅਗ੍ਗਣ੍ਹਨ੍ਤਾ ਮਯ੍ਹਮ੍ਪਿ ਅਦਾਪੇਤ੍ਵਾ ਪਕ੍ਕਮਿਸ੍ਸਨ੍ਤੀ’’ਤਿ ਆਘਾਤਂ ਉਪ੍ਪਾਦੇਸਿ. ਤੇਪਿ ਭਗਵਤੋ ਸਨ੍ਤਿਕਂ ਗਨ੍ਤ੍ਵਾ ਭਗਵਨ੍ਤਂ ਵਨ੍ਦਿਤ੍ਵਾ ਪੁਨ ਅਤ੍ਤਨੋ ਪਰਿਸਂ ਆਦਾਯ ਜਨਪਦਚਾਰਿਕਂ ਚਰਨ੍ਤਾ ਅਨੁਪੁਬ੍ਬੇਨ ਤਸ੍ਮਿਂ ਰਟ੍ਠੇ ਤਮੇਵ ਨਗਰਂ ਪਚ੍ਚਾਗਮਿਂਸੁ. ਨਾਗਰਾ ਥੇਰੇ ਸਞ੍ਜਾਨਿਤ੍ਵਾ ਸਹ ਪਰਿਕ੍ਖਾਰੇਹਿ ਦਾਨਂ ਸਜ੍ਜੇਤ੍ਵਾ ਨਗਰਮਜ੍ਝੇ ਮਣ੍ਡਪਂ ਕਤ੍ਵਾ ਦਾਨਂ ਅਦਂਸੁ, ਥੇਰਾਨਞ੍ਚ ਪਰਿਕ੍ਖਾਰੇ ਉਪਨਾਮੇਸੁਂ. ਥੇਰਾ ਭਿਕ੍ਖੁਸਙ੍ਘਸ੍ਸ ਨਿਯ੍ਯਾਦਯਿਂਸੁ. ਤਂ ਦਿਸ੍ਵਾ ਕੋਕਾਲਿਕੋ ਚਿਨ੍ਤੇਸਿ – ‘‘ਇਮੇ ਪੁਬ੍ਬੇ ਅਪ੍ਪਿਚ੍ਛਾ ਅਹੇਸੁਂ, ਇਦਾਨਿ ਪਾਪਿਚ੍ਛਾ ਜਾਤਾ, ਪੁਬ੍ਬੇਪਿ ਅਪ੍ਪਿਚ੍ਛਸਨ੍ਤੁਟ੍ਠਪਵਿਵਿਤ੍ਤਸਦਿਸਾਵ ਮਞ੍ਞੇ’’ਤਿ ਥੇਰੇ ਉਪਸਙ੍ਕਮਿਤ੍ਵਾ, ‘‘ਆਵੁਸੋ, ਤੁਮ੍ਹੇ ਪੁਬ੍ਬੇ ਅਪ੍ਪਿਚ੍ਛਾ ਵਿਯ, ਇਦਾਨਿ ਪਨ ਪਾਪਭਿਕ੍ਖੂ ਜਾਤਤ੍ਥਾ’’ਤਿ ਵਤ੍ਵਾ ‘‘ਮੂਲਟ੍ਠਾਨੇਯੇਵ ਨੇਸਂ ਪਤਿਟ੍ਠਂ ਭਿਨ੍ਦਿਸ੍ਸਾਮੀ’’ਤਿ ਤਰਮਾਨਰੂਪੋ ਨਿਕ੍ਖਮਿਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ. ਅਯਮੇਸ ਕੋਕਾਲਿਕੋ, ਇਮਿਨਾ ਚ ਕਾਰਣੇਨ ਉਪਸਙ੍ਕਮੀਤਿ ਵੇਦਿਤਬ੍ਬੋ.
ਭਗਵਾ ਤਂ ਤੁਰਿਤਤੁਰਿਤਂ ਆਗਚ੍ਛਨ੍ਤਂ ਦਿਸ੍ਵਾਵ ਆਵਜ੍ਜੇਨ੍ਤੋ ਅਞ੍ਞਾਸਿ ‘‘ਅਯਂ ਅਗ੍ਗਸਾਵਕੇ ਅਕ੍ਕੋਸਿਤੁਕਾਮੋ ਆਗਤੋ, ਸਕ੍ਕਾ ਨੁ ਖੋ ਪਟਿਸੇਧੇਤੁ’’ਨ੍ਤਿ. ਤਤੋ ‘‘ਨ ਸਕ੍ਕਾ ਪਟਿਸੇਧੇਤੁਂ, ਥੇਰੇਸੁ ਅਪਰਜ੍ਝਿਤ੍ਵਾ ਆਗਤੋ, ਏਕਂਸੇਨ ਪਨ ਪਦੁਮਨਿਰਯੇ ਨਿਬ੍ਬਤ੍ਤਿਸ੍ਸਤੀ’’ਤਿ ਦਿਸ੍ਵਾ ‘‘ਸਾਰਿਪੁਤ੍ਤਮੋਗ੍ਗਲ੍ਲਾਨੇਪਿ ਨਾਮ ਗਰਹਨ੍ਤਂ ਸੁਤ੍ਵਾ ਨ ਨਿਸੇਧੇਤੀ’’ਤਿ ਵਾਦਮੋਚਨਤ੍ਥਂ ਅਰਿਯੂਪਵਾਦਸ੍ਸ ਚ ਮਹਾਸਾਵਜ੍ਜਭਾਵਦਸ੍ਸਨਤ੍ਥਂ ਮਾ ਹੇਵਨ੍ਤਿ ਤਿਕ੍ਖਤ੍ਤੁਂ ਪਟਿਸੇਧੇਸਿ. ਤਤ੍ਥ ਮਾ ਹੇਵਨ੍ਤਿ ਮਾ ਏਵਂ ਅਭਣਿ. ਸਦ੍ਧਾਯਿਕੋਤਿ ਸਦ੍ਧਾਯ ਆਗਮਕਰੋ ਪਸਾਦਾਵਹੋ, ਸਦ੍ਧਾਤਬ੍ਬਵਚਨੋ ਵਾ. ਪਚ੍ਚਯਿਕੋਤਿ ਪਤ੍ਤਿਯਾਯਿਤਬ੍ਬਵਚਨੋ.
ਪਕ੍ਕਾਮੀਤਿ ਕਮ੍ਮਾਨੁਭਾਵੇਨ ਚੋਦਿਯਮਾਨੋ ਪਕ੍ਕਾਮਿ. ਓਕਾਸਕਤਞ੍ਹਿ ਕਮ੍ਮਂ ਨ ਸਕ੍ਕਾ ਪਟਿਬਾਹਿਤੁਂ. ਅਚਿਰਪਕ੍ਕਨ੍ਤਸ੍ਸਾਤਿ ਪਕ੍ਕਨ੍ਤਸ੍ਸ ਸਤੋ ਨਚਿਰੇਨੇਵ. ਸਬ੍ਬੋ ਕਾਯੋ ਫੁਟੋ ਅਹੋਸੀਤਿ ਕੇਸਗ੍ਗਮਤ੍ਤਮ੍ਪਿ ਓਕਾਸਂ ਅਵਜ੍ਜੇਤ੍ਵਾ ਸਕਲਸਰੀਰਂ ਅਟ੍ਠੀਨਿ ਭਿਨ੍ਦਿਤ੍ਵਾ ਉਗ੍ਗਤਾਹਿ ਪੀਲ਼ਕਾਹਿ ਅਜ੍ਝੋਤ੍ਥਟਂ ਅਹੋਸਿ. ਯਸ੍ਮਾ ਪਨ ਬੁਦ੍ਧਾਨੁਭਾਵੇਨ ਤਥਾਰੂਪਂ ਕਮ੍ਮਂ ਬੁਦ੍ਧਾਨਂ ਸਮ੍ਮੁਖੀਭਾਵੇ ਵਿਪਾਕਂ ਦਾਤੁਂ ਨ ਸਕ੍ਕੋਤਿ, ਦਸ੍ਸਨੂਪਚਾਰੇ ਵਿਜਹਿਤਮਤ੍ਤੇ ਦੇਤਿ, ਤਸ੍ਮਾ ਤਸ੍ਸ ਅਚਿਰਪਕ੍ਕਨ੍ਤਸ੍ਸ ਪੀਲ਼ਕਾ ਉਟ੍ਠਹਿਂਸੁ. ਕਲਾਯਮਤ੍ਤਿਯੋਤਿ ਚਣਕਮਤ੍ਤਿਯੋ. ਬੇਲੁਵਸਲਾਟੁਕਮਤ੍ਤਿਯੋਤਿ ਤਰੁਣਬੇਲੁਵਮਤ੍ਤਿਯੋ. ਪਭਿਜ੍ਜਿਂਸੂਤਿ ਭਿਜ੍ਜਿਂਸੁ. ਤਾਸੁ ਭਿਨ੍ਨਾਸੁ ਸਕਲਸਰੀਰਂ ਪਨਸਪਕ੍ਕਂ ਵਿਯ ਅਹੋਸਿ. ਸੋ ਪਕ੍ਕੇਨ ਗਤ੍ਤੇਨ ਜੇਤਵਨਦ੍ਵਾਰਕੋਟ੍ਠਕੇ ਵਿਸਗਿਲਿਤੋ ਮਚ੍ਛੋ ਵਿਯ ਕਦਲਿਪਤ੍ਤੇਸੁ ਨਿਪਜ੍ਜਿ. ਅਥ ਧਮ੍ਮਸ੍ਸਵਨਤ੍ਥਂ ਆਗਤਾਗਤਾ ਮਨੁਸ੍ਸਾ ‘‘ਧਿ ਕੋਕਾਲਿਕ, ਧਿ ਕੋਕਾਲਿਕ, ਅਯੁਤ੍ਤਮਕਾਸਿ, ਅਤ੍ਤਨੋਯੇਵ ਮੁਖਂ ਨਿਸ੍ਸਾਯ ਅਨਯਬ੍ਯਸਨਂ ਪਤ੍ਤੋਸੀ’’ਤਿ ਆਹਂਸੁ. ਤੇਸਂ ਸਦ੍ਦਂ ਸੁਤ੍ਵਾ ਆਰਕ੍ਖਦੇਵਤਾ ਧਿਕ੍ਕਾਰਮਕਂਸੁ, ਆਰਕ੍ਖਦੇਵਤਾਨਂ ਆਕਾਸਦੇਵਤਾਤਿ ਇਮਿਨਾ ਉਪਾਯੇਨ ਯਾਵ ਅਕਨਿਟ੍ਠਭਵਨਾ ਏਕਧਿਕ੍ਕਾਰੋ ਉਦਪਾਦਿ.
ਤੁਰੂਤਿ ਕੋਕਾਲਿਕਸ੍ਸ ਉਪਜ੍ਝਾਯੋ ਤੁਰੁਤ੍ਥੇਰੋ ਨਾਮ ਅਨਾਗਾਮਿਫਲਂ ਵਤ੍ਵਾ ਬ੍ਰਹ੍ਮਲੋਕੇ ਨਿਬ੍ਬਤ੍ਤੋ. ਸੋ ਭੁਮ੍ਮਟ੍ਠਦੇਵਤਾ ਆਦਿਂ ਕਤ੍ਵਾ ‘‘ਅਯੁਤ੍ਤਂ ਕੋਕਾਲਿਕੇਨ ਕਤਂ ਅਗ੍ਗਸਾਵਕੇ ਅਨ੍ਤਿਮਵਤ੍ਥੁਨਾ ਅਬ੍ਭਾਚਿਕ੍ਖਨ੍ਤੇਨਾ’’ਤਿ ਪਰਮ੍ਪਰਾਯ ਬ੍ਰਹ੍ਮਲੋਕਸਮ੍ਪਤ੍ਤਂ ਤਂ ਸਦ੍ਦਂ ਸੁਤ੍ਵਾ ‘‘ਮਾ ਮਯ੍ਹਂ ਪਸ੍ਸਨ੍ਤਸ੍ਸੇਵ ਵਰਾਕੋ ਨਸ੍ਸਿ, ਓਵਦਿਸ੍ਸਾਮਿ ਨਂ ਥੇਰੇਸੁ ਚਿਤ੍ਤਪ੍ਪਸਾਦਤ੍ਥਾਯਾ’’ਤਿ ਆਗਨ੍ਤ੍ਵਾ ਤਸ੍ਸ ਪੁਰਤੋ ਅਟ੍ਠਾਸਿ. ਤਂ ਸਨ੍ਧਾਯੇਤਂ ਵੁਤ੍ਤਂ – ‘‘ਤੁਰੂ ਪਚ੍ਚੇਕਬ੍ਰਹ੍ਮਾ’’ਤਿ. ਪੇਸਲਾਤਿ ਪਿਯਸੀਲਾ. ਕੋਸਿ ਤ੍ਵਂ, ਆਵੁਸੋਤਿ ਨਿਸਿਨ੍ਨਕੋਵ ਕਬਰਕ੍ਖੀਨਿ ਉਮ੍ਮੀਲੇਤ੍ਵਾ ਏਵਮਾਹ. ਪਸ੍ਸ ਯਾਵਞ੍ਚ ਤੇ ਇਦਂ ਅਪਰਦ੍ਧਤਿ ਯਤ੍ਤਕਂ ਤਯਾ ਅਪਰਦ੍ਧਂ, ਅਤ੍ਤਨੋ ਨਲਾਟੇ ਮਹਾਗਣ੍ਡਂ ਅਪਸ੍ਸਨ੍ਤੋ ਸਾਸਪਮਤ੍ਤਾਯ ਪੀਲ਼ਕਾਯ ਮਂ ਚੋਦੇਤਬ੍ਬਂ ਮਞ੍ਞਸੀਤਿ ਆਹ.
ਅਥ ਨਂ ‘‘ਅਦਿਟ੍ਠਿਪ੍ਪਤ੍ਤੋ ਅਯਂ ਕੋਕਾਲਿਕੋ, ਗਿਲਿਤਵਿਸੋ ਵਿਯ ਨ ਕਸ੍ਸਚਿ ਵਚਨਂ ਨ ਕਰਿਸ੍ਸਤੀ’’ਤਿ ਞਤ੍ਵਾ ਪੁਰਿਸਸ੍ਸ ਹੀਤਿਆਦਿਮਾਹ. ਤਤ੍ਥ ਕੁਠਾਰੀਤਿ ਕੁਠਾਰਿਸਦਿਸਾ ਫਰੁਸਵਾਚਾ. ਛਿਨ੍ਦਤੀਤਿ ਕੁਸਲਮੂਲਸਙ੍ਖਾਤੇ ਮੂਲੇਯੇਵ ਨਿਕਨ੍ਤਤਿ. ਨਿਨ੍ਦਿਯਨ੍ਤਿ ਨਿਨ੍ਦਿਤਬ੍ਬਂ ਦੁਸ੍ਸੀਲਪੁਗ੍ਗਲਂ. ਪਸਂਸਤੀਤਿ ਉਤ੍ਤਮਤ੍ਥੇ ਸਮ੍ਭਾਵੇਤ੍ਵਾ ਖੀਣਾਸਵੋਤਿ ਵਦਤਿ. ਤਂ ਵਾ ਨਿਨ੍ਦਤਿ ਯੋ ਪਸਂਸਿਯੋਤਿ ਯੋ ਵਾ ਪਸਂਸਿਤਬ੍ਬੋ ਖੀਣਾਸਵੋ, ਤਂ ਅਨ੍ਤਿਮਵਤ੍ਥੁਨਾ ਚੋਦੇਨ੍ਤੋ ‘‘ਦੁਸ੍ਸੀਲੋ ਅਯ’’ਨ੍ਤਿ ਵਦਤਿ. ਵਿਚਿਨਾਤਿ ਮੁਖੇਨ ਸੋ ਕਲਿਨ੍ਤਿ ਸੋ ਤਂ ਅਪਰਾਧਂ ਮੁਖੇਨ ਵਿਚਿਨਾਤਿ ਨਾਮ. ਕਲਿਨਾ ਤੇਨਾਤਿ ਤੇਨ ਅਪਰਾਧੇਨ ਸੁਖਂ ਨ ਵਿਨ੍ਦਤਿ. ਨਿਨ੍ਦਿਯਪਸਂਸਾਯ ਹਿ ਪਸਂਸਿਯਨਿਨ੍ਦਾਯ ਚ ਸਮਕੋਵ ਵਿਪਾਕੋ.
ਸਬ੍ਬਸ੍ਸਾਪਿ ਸਹਾਪਿ ਅਤ੍ਤਨਾਤਿ ਸਬ੍ਬੇਨ ਸਕੇਨ ਧਨੇਨਪਿ ਅਤ੍ਤਨਾਪਿ ਸਦ੍ਧਿਂ ਯੋ ਅਕ੍ਖੇਸੁ ਧਨਪਰਾਜਯੋ ਨਾਮ, ਅਯਂ ਅਪ੍ਪਮਤ੍ਤਕੋ ਅਪਰਾਧੋ. ਯੋ ਸੁਗਤੇਸੂਤਿ ਯੋ ਪਨ ਸਮ੍ਮਗ੍ਗਤੇਸੁ ਪੁਗ੍ਗਲੇਸੁ ਚਿਤ੍ਤਂ ਦੂਸੇਯ੍ਯ, ਅਯਂ ਚਿਤ੍ਤਪਦੋਸੋਵ ਤਤੋ ਕਲਿਤੋ ਮਹਨ੍ਤਤਰੋ ਕਲਿ.
ਇਦਾਨਿ ਤਸ੍ਸ ਮਹਨ੍ਤਤਰਭਾਵਂ ਦਸ੍ਸੇਨ੍ਤੋ ਸਤਂ ਸਹਸ੍ਸਾਨਨ੍ਤਿਆਦਿਮਾਹ. ਤਤ੍ਥ ਸਤਂ ਸਹਸ੍ਸਾਨਨ੍ਤਿ ਨਿਰਬ੍ਬੁਦਗਣਨਾਯ ਸਤਸਹਸ੍ਸਞ੍ਚ. ਛਤ੍ਤਿਂਸਤੀਤਿ ਅਪਰਾਨਿ ਛਤ੍ਤਿਂਸਤਿ ਨਿਰਬ੍ਬੁਦਾਨਿ. ਪਞ੍ਚ ਚਾਤਿ ਅਬ੍ਬੁਦਗਣਨਾਯ ਪਞ੍ਚ ਅਬ੍ਬੁਦਾਨਿ. ਯਮਰਿਯਗਰਹੀਤਿ ਯਂ ਅਰਿਯੇ ਗਰਹਨ੍ਤੋ ਨਿਰਯਂ ਉਪਪਜ੍ਜਤਿ, ਤਤ੍ਥ ਏਤ੍ਤਕਂ ਆਯੁਪ੍ਪਮਾਣਨ੍ਤਿ ਅਤ੍ਥੋ.
ਕਾਲਮਕਾਸੀਤਿ ਉਪਜ੍ਝਾਯੇ ਪਕ੍ਕਨ੍ਤੇ ਕਾਲਂ ਅਕਾਸਿ. ਪਦੁਮਨਿਰਯਨ੍ਤਿ ਪਾਟਿਯੇਕ੍ਕੋ ਪਦੁਮਨਿਰਯੋ ਨਾਮ ਨਤ੍ਥਿ, ਅਵੀਚਿਮਹਾਨਿਰਯਸ੍ਮਿਂਯੇਵ ਪਨ ਪਦੁਮਗਣਨਾਯ ਪਚ੍ਚਿਤਬ੍ਬੇ ਏਕਸ੍ਮਿਂ ਠਾਨੇ ਨਿਬ੍ਬਤ੍ਤਿ.
ਵੀਸਤਿਖਾਰਿਕੋਤਿ ਮਾਗਧਕੇਨ ਪਤ੍ਥੇਨ ਚਤ੍ਤਾਰੋ ਪਤ੍ਥਾ, ਕੋਸਲਰਟ੍ਠੇ ਏਕੋ ਪਤ੍ਥੋ ਹੋਤਿ. ਤੇਨ ਪਤ੍ਥੇਨ ਚਤ੍ਤਾਰੋ ਪਤ੍ਥਾ ਆਲ਼੍ਹਕਂ, ਚਤ੍ਤਾਰਿ ਆਲ਼੍ਹਕਾਨਿ ਦੋਣਂ, ਚਤੁਦੋਣਾ ਮਾਨਿਕਾ, ਚਤੁਮਾਨਿਕਾ ਖਾਰੀ, ਤਾਯ ਖਾਰਿਯਾ ਵੀਸਤਿਖਾਰਿਕੋ. ਤਿਲਵਾਹੋਤਿ ਮਾਗਧਕਾਨਂ ਸੁਖੁਮਤਿਲਾਨਂ ਤਿਲਸਕਟਂ. ਅਬ੍ਬੁਦੋ ਨਿਰਯੋਤਿ ਅਬ੍ਬੁਦੋ ਨਾਮ ਪਾਟਿਯੇਕ੍ਕੋ ਨਿਰਯੋ ਨਤ੍ਥਿ, ਅਵੀਚਿਮ੍ਹਿਯੇਵ ਪਨ ਅਬ੍ਬੁਦਗਣਨਾਯ ਪਚ੍ਚਿਤਬ੍ਬਟ੍ਠਾਨਸ੍ਸੇਤਂ ਨਾਮਂ. ਨਿਰਬ੍ਬੁਦਾਦੀਸੁਪਿ ਏਸੇਵ ਨਯੋ.
ਵਸ੍ਸਗਣਨਾਪਿ ਪਨੇਤ੍ਥ ਏਵਂ ਵੇਦਿਤਬ੍ਬਾ – ਯਥੇਵ ਹਿ ਸਤਂ ਸਤਸਹਸ੍ਸਾਨਿ ਕੋਟਿ ਹੋਤਿ, ਏਵਂ ਸਤਂ ਸਤਸਹਸ੍ਸਕੋਟਿਯੋ ਪਕੋਟਿ ਨਾਮ ਹੋਤਿ, ਸਤਂ ਸਤਸਹਸ੍ਸਪਕੋਟਿਯੋ ਕੋਟਿਪਕੋਟਿ ਨਾਮ, ਸਤਂ ਸਤਸਹਸ੍ਸਕੋਟਿਪਕੋਟਿਯੋ ਨਹੁਤਂ, ਸਤਂ ਸਤਸਹਸ੍ਸਨਹੁਤਾਨਿ ਨਿਨ੍ਨਹੁਤਂ, ਸਤਂ ਸਤਸਹਸ੍ਸਨਿਨ੍ਨਹੁਤਾਨਿ ਏਕਂ ਅਬ੍ਬੁਦਂ, ਤਤੋ ਵੀਸਤਿਗੁਣਂ ਨਿਰਬ੍ਬੁਦਂ, ਏਸ ਨਯੋ ਸਬ੍ਬਤ੍ਥਾਤਿ. ਦਸਮਂ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.
ਥੇਰਵਗ੍ਗੋ ਚਤੁਤ੍ਥੋ.