(੨) ਮੂਲਮੂਲਨਯੋ

੬੫. (ਕ) ਯੇ ਕੇਚਿ ਅਕੁਸਲਾ ਧਮ੍ਮਾ, ਸਬ੍ਬੇ ਤੇ ਅਕੁਸਲਮੂਲਮੂਲਾਤਿ?

ਤੀਣੇਵ ਅਕੁਸਲਮੂਲਮੂਲਾਨਿ. ਅਵਸੇਸਾ ਅਕੁਸਲਾ ਧਮ੍ਮਾ ਨ ਅਕੁਸਲਮੂਲਮੂਲਾ.

(ਖ) ਯੇ ਵਾ ਪਨ ਅਕੁਸਲਮੂਲਮੂਲਾ, ਸਬ੍ਬੇ ਤੇ ਧਮ੍ਮਾ ਅਕੁਸਲਾਤਿ? ਆਮਨ੍ਤਾ.

੬੬. (ਕ) ਯੇ ਕੇਚਿ ਅਕੁਸਲਾ ਧਮ੍ਮਾ, ਸਬ੍ਬੇ ਤੇ ਅਕੁਸਲਮੂਲੇਨ ਏਕਮੂਲਮੂਲਾਤਿ?

ਅਹੇਤੁਕਂ ਅਕੁਸਲਂ ਅਕੁਸਲਮੂਲੇਨ ਨ ਏਕਮੂਲਮੂਲਂ. ਸਹੇਤੁਕਂ ਅਕੁਸਲਂ ਅਕੁਸਲਮੂਲੇਨ ਏਕਮੂਲਮੂਲਂ.

(ਖ) ਯੇ ਵਾ ਪਨ ਅਕੁਸਲਮੂਲੇਨ ਏਕਮੂਲਮੂਲਾ, ਸਬ੍ਬੇ ਤੇ ਧਮ੍ਮਾ ਅਕੁਸਲਾਤਿ?

ਅਕੁਸਲਸਮੁਟ੍ਠਾਨਂ ਰੂਪਂ ਅਕੁਸਲਮੂਲੇਨ ਏਕਮੂਲਮੂਲਂ, ਨ ਅਕੁਸਲਂ. ਅਕੁਸਲਂ ਅਕੁਸਲਮੂਲੇਨ ਏਕਮੂਲਮੂਲਞ੍ਚੇਵ ਅਕੁਸਲਞ੍ਚ.

੬੭. (ਕ) ਯੇ ਕੇਚਿ ਅਕੁਸਲਮੂਲੇਨ ਏਕਮੂਲਮੂਲਾ ਧਮ੍ਮਾ, ਸਬ੍ਬੇ ਤੇ ਅਕੁਸਲਮੂਲੇਨ ਅਞ੍ਞਮਞ੍ਞਮੂਲਮੂਲਾਤਿ?

ਮੂਲਾਨਿ ਯਾਨਿ ਏਕਤੋ ਉਪ੍ਪਜ੍ਜਨ੍ਤਿ ਅਕੁਸਲਮੂਲਾਨਿ ਏਕਮੂਲਮੂਲਾਨਿ ਚੇਵ ਅਞ੍ਞਮਞ੍ਞਮੂਲਮੂਲਾਨਿ ਚ. ਅਵਸੇਸਾ ਅਕੁਸਲਮੂਲਸਹਜਾਤਾ ਧਮ੍ਮਾ ਅਕੁਸਲਮੂਲੇਨ ਏਕਮੂਲਮੂਲਾ, ਨ ਚ ਅਞ੍ਞਮਞ੍ਞਮੂਲਮੂਲਾ.

(ਖ) ਯੇ ਵਾ ਪਨ ਅਕੁਸਲਮੂਲੇਨ ਅਞ੍ਞਮਞ੍ਞਮੂਲਮੂਲਾ, ਸਬ੍ਬੇ ਤੇ ਧਮ੍ਮਾ ਅਕੁਸਲਾਤਿ? ਆਮਨ੍ਤਾ.