੧. ਵਿਭਙ੍ਗਵਾਰੋ

ਹੇਤੁਪਚ੍ਚਯੋ

੧. ਗਨ੍ਥਂ ਧਮ੍ਮਂ ਪਟਿਚ੍ਚ ਗਨ੍ਥੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ – ਸੀਲਬ੍ਬਤਪਰਾਮਾਸਂ ਕਾਯਗਨ੍ਥਂ ਪਟਿਚ੍ਚ ਅਭਿਜ੍ਝਾਕਾਯਗਨ੍ਥੋ, ਅਭਿਜ੍ਝਾਕਾਯਗਨ੍ਥਂ ਪਟਿਚ੍ਚ ਸੀਲਬ੍ਬਤਪਰਾਮਾਸੋ ਕਾਯਗਨ੍ਥੋ, ਇਦਂਸਚ੍ਚਾਭਿਨਿਵੇਸਂ ਕਾਯਗਨ੍ਥਂ ਪਟਿਚ੍ਚ ਅਭਿਜ੍ਝਾਕਾਯਗਨ੍ਥੋ, ਅਭਿਜ੍ਝਾਕਾਯਗਨ੍ਥਂ ਪਟਿਚ੍ਚ ਇਦਂਸਚ੍ਚਾਭਿਨਿਵੇਸੋ ਕਾਯਗਨ੍ਥੋ. (੧)

ਗਨ੍ਥਂ ਧਮ੍ਮਂ ਪਟਿਚ੍ਚ ਨੋਗਨ੍ਥੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ – ਗਨ੍ਥੇ ਪਟਿਚ੍ਚ ਸਮ੍ਪਯੁਤ੍ਤਕਾ ਖਨ੍ਧਾ ਚਿਤ੍ਤਸਮੁਟ੍ਠਾਨਞ੍ਚ ਰੂਪਂ. (੨)

ਗਨ੍ਥਂ ਧਮ੍ਮਂ ਪਟਿਚ੍ਚ ਗਨ੍ਥੋ ਚ ਨੋਗਨ੍ਥੋ ਚ ਧਮ੍ਮਾ ਉਪ੍ਪਜ੍ਜਨ੍ਤਿ ਹੇਤੁਪਚ੍ਚਯਾ – ਸੀਲਬ੍ਬਤਪਰਾਮਾਸਂ ਕਾਯਗਨ੍ਥਂ ਪਟਿਚ੍ਚ ਅਭਿਜ੍ਝਾਕਾਯਗਨ੍ਥੋ ਸਮ੍ਪਯੁਤ੍ਤਕਾ ਚ ਖਨ੍ਧਾ ਚਿਤ੍ਤਸਮੁਟ੍ਠਾਨਞ੍ਚ ਰੂਪਂ (ਚਕ੍ਕਂ). (੩)

੨. ਨੋਗਨ੍ਥਂ ਧਮ੍ਮਂ ਪਟਿਚ੍ਚ ਨੋਗਨ੍ਥੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ – ਨੋਗਨ੍ਥਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ ਚਿਤ੍ਤਸਮੁਟ੍ਠਾਨਞ੍ਚ ਰੂਪਂ…ਪੇ… ਦ੍ਵੇ ਖਨ੍ਧੇ…ਪੇ… ਪਟਿਸਨ੍ਧਿਕ੍ਖਣੇ…ਪੇ… ਖਨ੍ਧੇ ਪਟਿਚ੍ਚ ਵਤ੍ਥੁ, ਵਤ੍ਥੁਂ ਪਟਿਚ੍ਚ ਖਨ੍ਧਾ, ਏਕਂ ਮਹਾਭੂਤਂ…ਪੇ…. (੧)

ਨੋਗਨ੍ਥਂ ਧਮ੍ਮਂ ਪਟਿਚ੍ਚ ਗਨ੍ਥੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ – ਨੋਗਨ੍ਥੇ ਖਨ੍ਧੇ ਪਟਿਚ੍ਚ ਗਨ੍ਥਾ. (੨)

ਨੋਗਨ੍ਥਂ ਧਮ੍ਮਂ ਪਟਿਚ੍ਚ ਗਨ੍ਥੋ ਚ ਨੋਗਨ੍ਥੋ ਚ ਧਮ੍ਮਾ ਉਪ੍ਪਜ੍ਜਨ੍ਤਿ ਹੇਤੁਪਚ੍ਚਯਾ – ਨੋਗਨ੍ਥਂ ਏਕਂ ਖਨ੍ਧਂ ਪਟਿਚ੍ਚ ਤਯੋ ਖਨ੍ਧਾ ਗਨ੍ਥਾ ਚ ਚਿਤ੍ਤਸਮੁਟ੍ਠਾਨਞ੍ਚ ਰੂਪਂ…ਪੇ… ਦ੍ਵੇ ਖਨ੍ਧੇ…ਪੇ…. (੩)

੩. ਗਨ੍ਥਞ੍ਚ ਨੋਗਨ੍ਥਞ੍ਚ ਧਮ੍ਮਂ ਪਟਿਚ੍ਚ ਗਨ੍ਥੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ – ਸੀਲਬ੍ਬਤਪਰਾਮਾਸਂ ਕਾਯਗਨ੍ਥਞ੍ਚ ਸਮ੍ਪਯੁਤ੍ਤਕੇ ਚ ਖਨ੍ਧੇ ਪਟਿਚ੍ਚ ਅਭਿਜ੍ਝਾਕਾਯਗਨ੍ਥੋ (ਚਕ੍ਕਂ). (੧)

ਗਨ੍ਥਞ੍ਚ ਨੋਗਨ੍ਥਞ੍ਚ ਧਮ੍ਮਂ ਪਟਿਚ੍ਚ ਨੋਗਨ੍ਥੋ ਧਮ੍ਮੋ ਉਪ੍ਪਜ੍ਜਤਿ ਹੇਤੁਪਚ੍ਚਯਾ – ਨੋਗਨ੍ਥਂ ਏਕਂ ਖਨ੍ਧਞ੍ਚ ਗਨ੍ਥੇ ਚ ਪਟਿਚ੍ਚ ਤਯੋ ਖਨ੍ਧਾ ਚਿਤ੍ਤਸਮੁਟ੍ਠਾਨਞ੍ਚ ਰੂਪਂ…ਪੇ… ਦ੍ਵੇ ਖਨ੍ਧੇ ਚ…ਪੇ… ਗਨ੍ਥੇ ਚ ਸਮ੍ਪਯੁਤ੍ਤਕੇ ਖਨ੍ਧੇ ਚ ਪਟਿਚ੍ਚ ਚਿਤ੍ਤਸਮੁਟ੍ਠਾਨਂ ਰੂਪਂ. (੨)

ਗਨ੍ਥਞ੍ਚ ਨੋਗਨ੍ਥਞ੍ਚ ਧਮ੍ਮਂ ਪਟਿਚ੍ਚ ਗਨ੍ਥੋ ਚ ਨੋਗਨ੍ਥੋ ਚ ਧਮ੍ਮਾ ਉਪ੍ਪਜ੍ਜਨ੍ਤਿ ਹੇਤੁਪਚ੍ਚਯਾ – ਨੋਗਨ੍ਥਂ ਏਕਂ ਖਨ੍ਧਞ੍ਚ ਸੀਲਬ੍ਬਤਪਰਾਮਾਸਕਾਯਗਨ੍ਥਞ੍ਚ ਪਟਿਚ੍ਚ ਤਯੋ ਖਨ੍ਧਾ ਅਭਿਜ੍ਝਾਕਾਯਗਨ੍ਥੋ ਚਿਤ੍ਤਸਮੁਟ੍ਠਾਨਞ੍ਚ ਰੂਪਂ…ਪੇ… ਦ੍ਵੇ ਖਨ੍ਧੇ ਚ…ਪੇ…. (ਚਕ੍ਕਂ. ਸਂਖਿਤ੍ਤਂ.) (੩)

ਆਰਮ੍ਮਣਪਚ੍ਚਯਾ…ਪੇ… ਅਵਿਗਤਪਚ੍ਚਯਾ.