੧੬. ਸੋਲ਼ਸਮਵਗ੍ਗੋ

(੧੫੮) ੩. ਸੁਖਾਨੁਪ੍ਪਦਾਨਕਥਾ

੭੪੭. ਪਰੋ ਪਰਸ੍ਸ ਸੁਖਂ ਅਨੁਪ੍ਪਦੇਤੀਤਿ? ਆਮਨ੍ਤਾ. ਪਰੋ ਪਰਸ੍ਸ ਦੁਕ੍ਖਂ ਅਨੁਪ੍ਪਦੇਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪਰੋ ਪਰਸ੍ਸ ਦੁਕ੍ਖਂ ਨ ਅਨੁਪ੍ਪਦੇਤੀਤਿ? ਆਮਨ੍ਤਾ. ਪਰੋ ਪਰਸ੍ਸ ਸੁਖਂ ਨ ਅਨੁਪ੍ਪਦੇਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪਰੋ ਪਰਸ੍ਸ ਸੁਖਂ ਅਨੁਪ੍ਪਦੇਤੀਤਿ? ਆਮਨ੍ਤਾ. ਪਰੋ ਪਰਸ੍ਸ ਅਤ੍ਤਨੋ ਸੁਖਂ ਅਨੁਪ੍ਪਦੇਤਿ, ਅਞ੍ਞੇਸਂ ਸੁਖਂ ਅਨੁਪ੍ਪਦੇਤਿ, ਤਸ੍ਸ ਸੁਖਂ ਅਨੁਪ੍ਪਦੇਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪਰੋ ਪਰਸ੍ਸ ਨੇਵਤ੍ਤਨੋ, ਨ ਅਞ੍ਞੇਸਂ, ਨ ਤਸ੍ਸ ਸੁਖਂ ਅਨੁਪ੍ਪਦੇਤੀਤਿ? ਆਮਨ੍ਤਾ. ਹਞ੍ਚਿ ਪਰੋ ਪਰਸ੍ਸ ਨੇਵਤ੍ਤਨੋ, ਨ ਅਞ੍ਞੇਸਂ, ਨ ਤਸ੍ਸ ਸੁਖਂ ਅਨੁਪ੍ਪਦੇਤਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਪਰੋ ਪਰਸ੍ਸ ਸੁਖਂ ਅਨੁਪ੍ਪਦੇਤੀ’’ਤਿ.

ਪਰੋ ਪਰਸ੍ਸ ਸੁਖਂ ਅਨੁਪ੍ਪਦੇਤੀਤਿ? ਆਮਨ੍ਤਾ. ਅਞ੍ਞੋ ਅਞ੍ਞਸ੍ਸ ਕਾਰਕੋ, ਪਰਙ੍ਕਤਂ ਸੁਖਂ ਦੁਕ੍ਖਂ ਅਞ੍ਞੋ ਕਰੋਤਿ ਅਞ੍ਞੋ ਪਟਿਸਂਵੇਦੇਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੭੪੮. ਨ ਵਤ੍ਤਬ੍ਬਂ – ‘‘ਪਰੋ ਪਰਸ੍ਸ ਸੁਖਂ ਅਨੁਪ੍ਪਦੇਤੀ’’ਤਿ? ਆਮਨ੍ਤਾ. ਨਨੁ ਆਯਸ੍ਮਾ ਉਦਾਯੀ ਏਤਦਵੋਚ – ‘‘ਬਹੂਨਂ ਵਤ ਨੋ ਭਗਵਾ ਦੁਕ੍ਖਧਮ੍ਮਾਨਂ ਅਪਹਤ੍ਤਾ, ਬਹੂਨਂ ਵਤ ਨੋ ਭਗਵਾ ਸੁਖਧਮ੍ਮਾਨਂ ਉਪਹਤ੍ਤਾ, ਬਹੂਨਂ ਵਤ ਨੋ ਭਗਵਾ ਅਕੁਸਲਾਨਂ ਧਮ੍ਮਾਨਂ ਅਪਹਤ੍ਤਾ, ਬਹੂਨਂ ਵਤ ਨੋ ਭਗਵਾ ਕੁਸਲਾਨਂ ਧਮ੍ਮਾਨਂ ਉਪਹਤ੍ਤਾ’’ਤਿ [ਮ. ਨਿ. ੨.੧੪੮ ਲਟੁਕਿਕੋਪਮੇ]! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਪਰੋ ਪਰਸ੍ਸ ਸੁਖਂ ਅਨੁਪ੍ਪਦੇਤੀਤਿ.

ਸੁਖਾਨੁਪ੍ਪਦਾਨਕਥਾ ਨਿਟ੍ਠਿਤਾ.