੧੬. ਸੋਲ਼ਸਮਵਗ੍ਗੋ

(੧੫੭) ੨. ਪਗ੍ਗਹਕਥਾ

੭੪੫. ਪਰੋ ਪਰਸ੍ਸ ਚਿਤ੍ਤਂ ਪਗ੍ਗਣ੍ਹਾਤੀਤਿ? ਆਮਨ੍ਤਾ. ਪਰੋ ਪਰਸ੍ਸ ਚਿਤ੍ਤਂ ‘‘ਮਾ ਰਜ੍ਜਿ,’’‘‘ਮਾ ਦੁਸ੍ਸਿ,’’‘‘ਮਾ ਮੁਯ੍ਹਿ,’’‘‘ਮਾ ਕਿਲਿਸ੍ਸੀ’’ਤਿ ਪਗ੍ਗਣ੍ਹਾਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪਰੋ ਪਰਸ੍ਸ ਚਿਤ੍ਤਂ ਪਗ੍ਗਣ੍ਹਾਤੀਤਿ? ਆਮਨ੍ਤਾ. ਪਰੋ ਪਰਸ੍ਸ ਅਲੋਭਂ ਕੁਸਲਮੂਲਂ ਜਨੇਤਿ… ਅਦੋਸਂ ਕੁਸਲਮੂਲਂ ਜਨੇਤਿ… ਅਮੋਹਂ ਕੁਸਲਮੂਲਂ ਜਨੇਤਿ… ਸਦ੍ਧਂ ਜਨੇਤਿ… ਵੀਰਿਯਂ ਜਨੇਤਿ… ਸਤਿਂ ਜਨੇਤਿ… ਸਮਾਧਿਂ ਜਨੇਤਿ… ਪਞ੍ਞਂ ਜਨੇਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪਰੋ ਪਰਸ੍ਸ ਚਿਤ੍ਤਂ ਪਗ੍ਗਣ੍ਹਾਤੀਤਿ? ਆਮਨ੍ਤਾ. ਪਰੋ ਪਰਸ੍ਸ ਉਪ੍ਪਨ੍ਨੋ ਫਸ੍ਸੋ ‘‘ਮਾ ਨਿਰੁਜ੍ਝੀ’’ਤਿ ਪਗ੍ਗਣ੍ਹਾਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪਰੋ ਪਰਸ੍ਸ ਉਪ੍ਪਨ੍ਨਾ ਵੇਦਨਾ…ਪੇ… ਉਪ੍ਪਨ੍ਨਾ ਪਞ੍ਞਾ ‘‘ਮਾ ਨਿਰੁਜ੍ਝੀ’’ਤਿ ਪਗ੍ਗਣ੍ਹਾਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਪਰੋ ਪਰਸ੍ਸ ਚਿਤ੍ਤਂ ਪਗ੍ਗਣ੍ਹਾਤੀਤਿ? ਆਮਨ੍ਤਾ. ਪਰੋ ਪਰਸ੍ਸ ਅਤ੍ਥਾਯ ਰਾਗਂ ਪਜਹਤਿ… ਦੋਸਂ ਪਜਹਤਿ… ਮੋਹਂ ਪਜਹਤਿ…ਪੇ… ਅਨੋਤ੍ਤਪ੍ਪਂ ਪਜਹਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਪਰੋ ਪਰਸ੍ਸ ਚਿਤ੍ਤਂ ਪਗ੍ਗਣ੍ਹਾਤੀਤਿ? ਆਮਨ੍ਤਾ. ਪਰੋ ਪਰਸ੍ਸ ਅਤ੍ਥਾਯ ਮਗ੍ਗਂ ਭਾਵੇਤਿ… ਸਤਿਪਟ੍ਠਾਨਂ ਭਾਵੇਤਿ…ਪੇ… ਬੋਜ੍ਝਙ੍ਗਂ ਭਾਵੇਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਪਰੋ ਪਰਸ੍ਸ ਚਿਤ੍ਤਂ ਪਗ੍ਗਣ੍ਹਾਤੀਤਿ? ਆਮਨ੍ਤਾ. ਪਰੋ ਪਰਸ੍ਸ ਅਤ੍ਥਾਯ ਦੁਕ੍ਖਂ ਪਰਿਜਾਨਾਤਿ…ਪੇ… ਮਗ੍ਗਂ ਭਾਵੇਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਪਰੋ ਪਰਸ੍ਸ ਚਿਤ੍ਤਂ ਪਗ੍ਗਣ੍ਹਾਤੀਤਿ? ਆਮਨ੍ਤਾ. ਅਞ੍ਞੋ ਅਞ੍ਞਸ੍ਸ ਕਾਰਕੋ, ਪਰਙ੍ਕਤਂ ਸੁਖਂ ਦੁਕ੍ਖਂ ਅਞ੍ਞੋ ਕਰੋਤਿ ਅਞ੍ਞੋ ਪਟਿਸਂਵੇਦੇਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਪਰੋ ਪਰਸ੍ਸ ਚਿਤ੍ਤਂ ਪਗ੍ਗਣ੍ਹਾਤੀਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਅਤ੍ਤਨਾਵ ਕਤਂ ਪਾਪਂ…ਪੇ… ਨਾਞ੍ਞੋ ਅਞ੍ਞਂ ਵਿਸੋਧਯੇ’’ਤਿ. ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਪਰੋ ਪਰਸ੍ਸ ਚਿਤ੍ਤਂ ਪਗ੍ਗਣ੍ਹਾਤੀ’’ਤਿ.

੭੪੬. ਨ ਵਤ੍ਤਬ੍ਬਂ – ‘‘ਪਰੋ ਪਰਸ੍ਸ ਚਿਤ੍ਤਂ ਪਗ੍ਗਣ੍ਹਾਤੀ’’ਤਿ? ਆਮਨ੍ਤਾ. ਨਨੁ ਅਤ੍ਥਿ ਬਲਪ੍ਪਤ੍ਤਾ, ਅਤ੍ਥਿ ਵਸੀਭੂਤਾਤਿ? ਆਮਨ੍ਤਾ. ਹਞ੍ਚਿ ਅਤ੍ਥਿ ਬਲਪ੍ਪਤ੍ਤਾ, ਅਤ੍ਥਿ ਵਸੀਭੂਤਾ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਪਰੋ ਪਰਸ੍ਸ ਚਿਤ੍ਤਂ ਪਗ੍ਗਣ੍ਹਾਤੀ’’ਤਿ.

ਪਗ੍ਗਹਕਥਾ ਨਿਟ੍ਠਿਤਾ.