੧੦. ਦਸਮਵਗ੍ਗੋ

(੧੦੫) ੧੧. ਅਵਿਞ੍ਞਤ੍ਤਿ ਦੁਸ੍ਸਿਲ੍ਯਨ੍ਤਿਕਥਾ

੬੦੩. ਅਵਿਞ੍ਞਤ੍ਤਿ ਦੁਸ੍ਸਿਲ੍ਯਨ੍ਤਿ? ਆਮਨ੍ਤਾ. ਪਾਣਾਤਿਪਾਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਦਿਨ੍ਨਾਦਾਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਕਾਮੇਸੁਮਿਚ੍ਛਾਚਾਰੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਮੁਸਾਵਾਦੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸੁਰਾਮੇਰਯਮਜ੍ਜਪਮਾਦਟ੍ਠਾਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਪਾਪਕਮ੍ਮਂ ਸਮਾਦਿਯਿਤ੍ਵਾ ਦਾਨਂ ਦਦਨ੍ਤਸ੍ਸ ਪੁਞ੍ਞਞ੍ਚ ਅਪੁਞ੍ਞਞ੍ਚ ਉਭੋ ਵਡ੍ਢਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪੁਞ੍ਞਞ੍ਚ ਅਪੁਞ੍ਞਞ੍ਚ ਉਭੋ ਵਡ੍ਢਨ੍ਤੀਤਿ? ਆਮਨ੍ਤਾ. ਦ੍ਵਿਨ੍ਨਂ ਫਸ੍ਸਾਨਂ…ਪੇ… ਦ੍ਵਿਨ੍ਨਂ ਚਿਤ੍ਤਾਨਂ ਸਮੋਧਾਨਂ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਦ੍ਵਿਨ੍ਨਂ ਫਸ੍ਸਾਨਂ…ਪੇ… ਦ੍ਵਿਨ੍ਨਂ ਚਿਤ੍ਤਾਨਂ ਸਮੋਧਾਨਂ ਹੋਤੀਤਿ? ਆਮਨ੍ਤਾ. ਕੁਸਲਾਕੁਸਲਾ ਸਾਵਜ੍ਜਾਨਵਜ੍ਜਾ ਹੀਨਪਣੀਤਾ ਕਣ੍ਹਸੁਕ੍ਕਸਪ੍ਪਟਿਭਾਗਾ ਧਮ੍ਮਾ ਸਮ੍ਮੁਖੀਭਾਵਂ ਆਗਚ੍ਛਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਕੁਸਲਾਕੁਸਲਾ ਸਾਵਜ੍ਜਾਨਵਜ੍ਜਾ ਹੀਨਪਣੀਤਾ ਕਣ੍ਹਸੁਕ੍ਕਸਪ੍ਪਟਿਭਾਗਾ ਧਮ੍ਮਾ ਸਮ੍ਮੁਖੀਭਾਵਂ ਆਗਚ੍ਛਨ੍ਤੀਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਚਤ੍ਤਾਰਿਮਾਨਿ, ਭਿਕ੍ਖਵੇ, ਸੁਵਿਦੂਰਵਿਦੂਰਾਨਿ! ਕਤਮਾਨਿ ਚਤ੍ਤਾਰਿ? ਨਭਞ੍ਚ, ਭਿਕ੍ਖਵੇ, ਪਥਵੀ ਚ – ਇਦਂ ਪਠਮਂ ਸੁਵਿਦੂਰਵਿਦੂਰਂ…ਪੇ… ਤਸ੍ਮਾ ਸਤਂ ਧਮ੍ਮੋ ਅਸਬ੍ਭਿ ਆਰਕਾ’’ਤਿ. ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਕੁਸਲਾਕੁਸਲਾ ਸਾਵਜ੍ਜਾਨਵਜ੍ਜਾ ਹੀਨਪਣੀਤਾ ਕਣ੍ਹਸੁਕ੍ਕਸਪ੍ਪਟਿਭਾਗਾ ਧਮ੍ਮਾ ਸਮ੍ਮੁਖੀਭਾਵਂ ਆਗਚ੍ਛਨ੍ਤੀ’’ਤਿ.

੬੦੪. ਨ ਵਤ੍ਤਬ੍ਬਂ – ‘‘ਅਵਿਞ੍ਞਤ੍ਤਿ ਦੁਸ੍ਸਿਲ੍ਯ’’ਨ੍ਤਿ? ਆਮਨ੍ਤਾ. ਨਨੁ ਪਾਪਕਮ੍ਮਂ ਸਮਾਦਿਨ੍ਨੋ ਆਸੀਤਿ? ਆਮਨ੍ਤਾ. ਹਞ੍ਚਿ ਪਾਪਕਮ੍ਮਂ ਸਮਾਦਿਨ੍ਨੋ ਆਸਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਅਵਿਞ੍ਞਤ੍ਤਿ ਦੁਸ੍ਸਿਲ੍ਯ’’ਨ੍ਤਿ.

ਅਵਿਞ੍ਞਤ੍ਤਿ ਦੁਸ੍ਸਿਲ੍ਯਨ੍ਤਿਕਥਾ ਨਿਟ੍ਠਿਤਾ.

ਦਸਮਵਗ੍ਗੋ.

ਤਸ੍ਸੁਦ੍ਦਾਨਂ –

ਉਪਪਤ੍ਤੇਸਿਯੇ ਪਞ੍ਚਕ੍ਖਨ੍ਧੇ ਅਨਿਰੁਦ੍ਧੇ ਕਿਰਿਯਾ ਪਞ੍ਚਕ੍ਖਨ੍ਧਾ ਉਪ੍ਪਜ੍ਜਨ੍ਤਿ, ਮਗ੍ਗਸਮਙ੍ਗਿਸ੍ਸ ਰੂਪਂ ਮਗ੍ਗੋ, ਪਞ੍ਚਵਿਞ੍ਞਾਣਸਮਙ੍ਗਿਸ੍ਸ ਅਤ੍ਥਿ ਮਗ੍ਗਭਾਵਨਾ, ਪਞ੍ਚਵਿਞ੍ਞਾਣਾ ਕੁਸਲਾਪਿ ਅਕੁਸਲਾਪਿ, ਪਞ੍ਚਵਿਞ੍ਞਾਣਾ ਸਾਭੋਗਾ, ਮਗ੍ਗਸਮਙ੍ਗੀ ਦ੍ਵੀਹਿ ਸੀਲੇਹਿ ਸਮਨ੍ਨਾਗਤੋ, ਸੀਲਂ ਅਚੇਤਸਿਕਂ, ਸੀਲਂ ਨ ਚਿਤ੍ਤਾਨੁਪਰਿਵਤ੍ਤਿ, ਸਮਾਦਾਨਹੇਤੁਕਂ ਸੀਲਂ ਵਡ੍ਢਤੀਤਿ, ਵਿਞ੍ਞਤ੍ਤਿਸੀਲਂ ਅਵਿਞ੍ਞਤ੍ਤਿ ਦੁਸ੍ਸਿਲ੍ਯਨ੍ਤਿ.

ਦੁਤਿਯੋ ਪਣ੍ਣਾਸਕੋ.

ਤਸ੍ਸੁਦ੍ਦਾਨਂ –

ਨਿਯਾਮਸਙ੍ਗਹਗਤਾਨਿਸਂਸਤਾ ਚ ਨਿਰੋਧੋਤਿ [ਨਿਯਾਮ ਸਙ੍ਗਹਗਤਾਨਿਸਂਸਤਾ ਅਤ੍ਥਿ ਪਞ੍ਚਵੋਕਾਰਭਵੋ ਨਿਰੋਧੋ ਮਗ੍ਗਸਮਙ੍ਗਿਸ੍ਸ ਪਞ੍ਚਵੋਕਾਰਭਵੋਤਿ (ਸੀ. ਸ੍ਯਾ. ਕ.), ਨਿਯਾਮ ਸਙ੍ਗਹ ਗਤਾਨਿਸਂਸਤਾ ਅਤ੍ਥਿ ਪਞ੍ਚਵੋਕਾਰਭਵੋ ਮਗ੍ਗਸਮਙ੍ਗਿਸ੍ਸ ਨੋ ਪਞ੍ਚਵੋਕਾਰਭਵੋ (ਪੀ.)].