੧੧. ਏਕਾਦਸਮਵਗ੍ਗੋ

(੧੦੬-੧੦੮) ੧-੩. ਤਿਸ੍ਸੋਪਿ ਅਨੁਸਯਕਥਾ

੬੦੫. ਅਨੁਸਯਾ ਅਬ੍ਯਾਕਤਾਤਿ? ਆਮਨ੍ਤਾ. ਵਿਪਾਕਾਬ੍ਯਾਕਤਾ ਕਿਰਿਯਾਬ੍ਯਾਕਤਾ ਰੂਪਂ ਨਿਬ੍ਬਾਨਂ ਚਕ੍ਖਾਯਤਨਂ…ਪੇ… ਫੋਟ੍ਠਬ੍ਬਾਯਤਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਕਾਮਰਾਗਾਨੁਸਯੋ ਅਬ੍ਯਾਕਤੋਤਿ? ਆਮਨ੍ਤਾ. ਕਾਮਰਾਗੋ ਕਾਮਰਾਗਪਰਿਯੁਟ੍ਠਾਨਂ ਕਾਮਰਾਗਸਂਯੋਜਨਂ ਕਾਮੋਘੋ ਕਾਮਯੋਗੋ ਕਾਮਚ੍ਛਨ੍ਦਨੀਵਰਣਂ ਅਬ੍ਯਾਕਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਕਾਮਰਾਗੋ ਕਾਮਰਾਗਪਰਿਯੁਟ੍ਠਾਨਂ…ਪੇ… ਕਾਮਚ੍ਛਨ੍ਦਨੀਵਰਣਂ ਅਕੁਸਲਨ੍ਤਿ? ਆਮਨ੍ਤਾ. ਕਾਮਰਾਗਾਨੁਸਯੋ ਅਕੁਸਲੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਪਟਿਘਾਨੁਸਯੋ ਅਬ੍ਯਾਕਤੋਤਿ? ਆਮਨ੍ਤਾ. ਪਟਿਘਂ ਪਟਿਘਪਰਿਯੁਟ੍ਠਾਨਂ ਪਟਿਘਸਂਯੋਜਨਂ ਅਬ੍ਯਾਕਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪਟਿਘਂ ਪਟਿਘਪਰਿਯੁਟ੍ਠਾਨਂ ਪਟਿਘਸਂਯੋਜਨਂ ਅਕੁਸਲਨ੍ਤਿ? ਆਮਨ੍ਤਾ. ਪਟਿਘਾਨੁਸਯੋ ਅਕੁਸਲੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਮਾਨਾਨੁਸਯੋ ਅਬ੍ਯਾਕਤੋਤਿ? ਆਮਨ੍ਤਾ. ਮਾਨੋ ਮਾਨਪਰਿਯੁਟ੍ਠਾਨਂ ਮਾਨਸਂਯੋਜਨਂ ਅਬ੍ਯਾਕਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ …ਪੇ… ਮਾਨੋ ਮਾਨਪਰਿਯੁਟ੍ਠਾਨਂ ਮਾਨਸਂਯੋਜਨਂ ਅਕੁਸਲਨ੍ਤਿ? ਆਮਨ੍ਤਾ. ਮਾਨਾਨੁਸਯੋ ਅਕੁਸਲੋਤਿ? ਨ ਹੇਵਂ ਵਤ੍ਤਬ੍ਬੇ …ਪੇ….

ਦਿਟ੍ਠਾਨੁਸਯੋ ਅਬ੍ਯਾਕਤੋਤਿ? ਆਮਨ੍ਤਾ. ਦਿਟ੍ਠਿ ਦਿਟ੍ਠੋਘੋ ਦਿਟ੍ਠਿਯੋਗੋ ਦਿਟ੍ਠਿਪਰਿਯੁਟ੍ਠਾਨਂ ਦਿਟ੍ਠਿਸਂਯੋਜਨਂ ਅਬ੍ਯਾਕਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਦਿਟ੍ਠਿ ਦਿਟ੍ਠੋਘੋ ਦਿਟ੍ਠਿਯੋਗੋ ਦਿਟ੍ਠਿਪਰਿਯੁਟ੍ਠਾਨਂ ਦਿਟ੍ਠਿਸਂਯੋਜਨਂ ਅਕੁਸਲਨ੍ਤਿ? ਆਮਨ੍ਤਾ. ਦਿਟ੍ਠਾਨੁਸਯੋ ਅਕੁਸਲੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਵਿਚਿਕਿਚ੍ਛਾਨੁਸਯੋ ਅਬ੍ਯਾਕਤੋਤਿ? ਆਮਨ੍ਤਾ. ਵਿਚਿਕਿਚ੍ਛਾ ਵਿਚਿਕਿਚ੍ਛਾਪਰਿਯੁਟ੍ਠਾਨਂ ਵਿਚਿਕਿਚ੍ਛਾਸਂਯੋਜਨਂ ਵਿਚਿਕਿਚ੍ਛਾਨੀਵਰਣਂ ਅਬ੍ਯਾਕਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਵਿਚਿਕਿਚ੍ਛਾ ਵਿਚਿਕਿਚ੍ਛਾਪਰਿਯੁਟ੍ਠਾਨਂ ਵਿਚਿਕਿਚ੍ਛਾਸਂਯੋਜਨਂ ਵਿਚਿਕਿਚ੍ਛਾਨੀਵਰਣਂ ਅਕੁਸਲਨ੍ਤਿ? ਆਮਨ੍ਤਾ. ਵਿਚਿਕਿਚ੍ਛਾਨੁਸਯੋ ਅਕੁਸਲੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਭਵਰਾਗਾਨੁਸਯੋ ਅਬ੍ਯਾਕਤੋਤਿ? ਆਮਨ੍ਤਾ. ਭਵਰਾਗੋ ਭਵਰਾਗਪਰਿਯੁਟ੍ਠਾਨਂ ਭਵਰਾਗਸਂਯੋਜਨਂ ਅਬ੍ਯਾਕਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਭਵਰਾਗੋ ਭਵਰਾਗਪਰਿਯੁਟ੍ਠਾਨਂ ਭਵਰਾਗਸਂਯੋਜਨਂ ਅਕੁਸਲਨ੍ਤਿ? ਆਮਨ੍ਤਾ. ਭਵਰਾਗਾਨੁਸਯੋ ਅਕੁਸਲੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਵਿਜ੍ਜਾਨੁਸਯੋ ਅਬ੍ਯਾਕਤੋਤਿ? ਆਮਨ੍ਤਾ. ਅਵਿਜ੍ਜਾ ਅਵਿਜ੍ਜੋਘੋ ਅਵਿਜ੍ਜਾਯੋਗੋ ਅਵਿਜ੍ਜਾਪਰਿਯੁਟ੍ਠਾਨਂ ਅਵਿਜ੍ਜਾਸਂਯੋਜਨਂ ਅਵਿਜ੍ਜਾਨੀਵਰਣਂ ਅਬ੍ਯਾਕਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਵਿਜ੍ਜਾ ਅਵਿਜ੍ਜੋਘੋ ਅਵਿਜ੍ਜਾਯੋਗੋ ਅਵਿਜ੍ਜਾਪਰਿਯੁਟ੍ਠਾਨਂ ਅਵਿਜ੍ਜਾਸਂਯੋਜਨਂ ਅਵਿਜ੍ਜਾਨੀਵਰਣਂ ਅਕੁਸਲਨ੍ਤਿ? ਆਮਨ੍ਤਾ. ਅਵਿਜ੍ਜਾਨੁਸਯੋ ਅਕੁਸਲੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੬੦੬. ਨ ਵਤ੍ਤਬ੍ਬਂ – ‘‘ਅਨੁਸਯਾ ਅਬ੍ਯਾਕਤਾ’’ਤਿ? ਆਮਨ੍ਤਾ. ਪੁਥੁਜ੍ਜਨੋ ਕੁਸਲਾਬ੍ਯਾਕਤੇ ਚਿਤ੍ਤੇ ਵਤ੍ਤਮਾਨੇ ‘‘ਸਾਨੁਸਯੋ’’ਤਿ ਵਤ੍ਤਬ੍ਬੋਤਿ? ਆਮਨ੍ਤਾ. ਕੁਸਲਾਕੁਸਲਾ ਧਮ੍ਮਾ ਸਮ੍ਮੁਖੀਭਾਵਂ ਆਗਚ੍ਛਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਤੇਨ ਹਿ ਅਨੁਸਯਾ ਅਬ੍ਯਾਕਤਾਤਿ. ਪੁਥੁਜ੍ਜਨੋ ਕੁਸਲਾਬ੍ਯਾਕਤੇ ਚਿਤ੍ਤੇ ਵਤ੍ਤਮਾਨੇ ‘‘ਸਰਾਗੋ’’ਤਿ ਵਤ੍ਤਬ੍ਬੋਤਿ? ਆਮਨ੍ਤਾ. ਕੁਸਲਾਕੁਸਲਾ ਧਮ੍ਮਾ ਸਮ੍ਮੁਖੀਭਾਵਂ ਆਗਚ੍ਛਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਤੇਨ ਹਿ ਰਾਗੋ ਅਬ੍ਯਾਕਤੋਤਿ.

੬੦੭. ਅਨੁਸਯਾ ਅਹੇਤੁਕਾਤਿ? ਆਮਨ੍ਤਾ. ਰੂਪਂ ਨਿਬ੍ਬਾਨਂ ਚਕ੍ਖਾਯਤਨਂ…ਪੇ… ਫੋਟ੍ਠਬ੍ਬਾਯਤਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਕਾਮਰਾਗਾਨੁਸਯੋ ਅਹੇਤੁਕੋਤਿ? ਆਮਨ੍ਤਾ. ਕਾਮਰਾਗੋ ਕਾਮਰਾਗਪਰਿਯੁਟ੍ਠਾਨਂ ਕਾਮਰਾਗਸਂਯੋਜਨਂ ਕਾਮਚ੍ਛਨ੍ਦਨੀਵਰਣਂ ਅਹੇਤੁਕਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਕਾਮਰਾਗੋ ਕਾਮਰਾਗਪਰਿਯੁਟ੍ਠਾਨਂ…ਪੇ… ਕਾਮਚ੍ਛਨ੍ਦਨੀਵਰਣਂ ਸਹੇਤੁਕਨ੍ਤਿ? ਆਮਨ੍ਤਾ. ਕਾਮਰਾਗਾਨੁਸਯੋ ਸਹੇਤੁਕੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪਟਿਘਾਨੁਸਯੋ…ਪੇ… ਮਾਨਾਨੁਸਯੋ… ਦਿਟ੍ਠਾਨੁਸਯੋ… ਵਿਚਿਕਿਚ੍ਛਾਨੁਸਯੋ… ਭਵਰਾਗਾਨੁਸਯੋ… ਅਵਿਜ੍ਜਾਨੁਸਯੋ ਅਹੇਤੁਕੋਤਿ? ਆਮਨ੍ਤਾ. ਅਵਿਜ੍ਜਾ ਅਵਿਜ੍ਜੋਘੋ ਅਵਿਜ੍ਜਾਯੋਗੋ ਅਵਿਜ੍ਜਾਪਰਿਯੁਟ੍ਠਾਨਂ ਅਵਿਜ੍ਜਾਸਂਯੋਜਨਂ ਅਵਿਜ੍ਜਾਨੀਵਰਣਂ ਅਹੇਤੁਕਨ੍ਤਿ? ਨ ਹੇਵਂ ਵਤ੍ਤਬ੍ਬੇ …ਪੇ… ਅਵਿਜ੍ਜਾ ਅਵਿਜ੍ਜੋਘੋ…ਪੇ… ਅਵਿਜ੍ਜਾਨੀਵਰਣਂ ਸਹੇਤੁਕਨ੍ਤਿ? ਆਮਨ੍ਤਾ. ਅਵਿਜ੍ਜਾਨੁਸਯੋ ਸਹੇਤੁਕੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੬੦੮. ਨ ਵਤ੍ਤਬ੍ਬਂ – ‘‘ਅਨੁਸਯਾ ਅਹੇਤੁਕਾ’’ਤਿ? ਆਮਨ੍ਤਾ. ਪੁਥੁਜ੍ਜਨੋ ਕੁਸਲਾਬ੍ਯਾਕਤੇ ਚਿਤ੍ਤੇ ਵਤ੍ਤਮਾਨੇ ‘‘ਸਾਨੁਸਯੋ’’ਤਿ ਵਤ੍ਤਬ੍ਬੋਤਿ? ਆਮਨ੍ਤਾ. ਅਨੁਸਯਾ ਤੇਨ ਹੇਤੁਨਾ ਸਹੇਤੁਕਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਤੇਨ ਹਿ ਅਨੁਸਯਾ ਅਹੇਤੁਕਾਤਿ. ਪੁਥੁਜ੍ਜਨੋ ਕੁਸਲਾਬ੍ਯਾਕਤੇ ਚਿਤ੍ਤੇ ਵਤ੍ਤਮਾਨੇ ‘‘ਸਰਾਗੋ’’ਤਿ ਵਤ੍ਤਬ੍ਬੋਤਿ? ਆਮਨ੍ਤਾ. ਰਾਗੋ ਤੇਨ ਹੇਤੁਨਾ ਸਹੇਤੁਕੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਤੇਨ ਹਿ ਰਾਗੋ ਅਹੇਤੁਕੋਤਿ.

੬੦੯. ਅਨੁਸਯਾ ਚਿਤ੍ਤਵਿਪ੍ਪਯੁਤ੍ਤਾਤਿ? ਆਮਨ੍ਤਾ. ਰੂਪਂ ਨਿਬ੍ਬਾਨਂ ਚਕ੍ਖਾਯਤਨਂ…ਪੇ… ਫੋਟ੍ਠਬ੍ਬਾਯਤਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਕਾਮਰਾਗਾਨੁਸਯੋ ਚਿਤ੍ਤਵਿਪ੍ਪਯੁਤ੍ਤੋਤਿ? ਆਮਨ੍ਤਾ. ਕਾਮਰਾਗੋ ਕਾਮਰਾਗਪਰਿਯੁਟ੍ਠਾਨਂ ਕਾਮਰਾਗਸਂਯੋਜਨਂ ਕਾਮੋਘੋ ਕਾਮਯੋਗੋ ਕਾਮਚ੍ਛਨ੍ਦਨੀਵਰਣਂ ਚਿਤ੍ਤਵਿਪ੍ਪਯੁਤ੍ਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਕਾਮਰਾਗੋ ਕਾਮਰਾਗਪਰਿਯੁਟ੍ਠਾਨਂ…ਪੇ… ਕਾਮਚ੍ਛਨ੍ਦਨੀਵਰਣਂ ਚਿਤ੍ਤਸਮ੍ਪਯੁਤ੍ਤਨ੍ਤਿ? ਆਮਨ੍ਤਾ. ਕਾਮਰਾਗਾਨੁਸਯੋ ਚਿਤ੍ਤਸਮ੍ਪਯੁਤ੍ਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੬੧੦. ਕਾਮਰਾਗਾਨੁਸਯੋ ਚਿਤ੍ਤਵਿਪ੍ਪਯੁਤ੍ਤੋਤਿ? ਆਮਨ੍ਤਾ. ਕਤਮਕ੍ਖਨ੍ਧਪਰਿਯਾਪਨ੍ਨੋਤਿ? ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨੋਤਿ. ਸਙ੍ਖਾਰਕ੍ਖਨ੍ਧੋ ਚਿਤ੍ਤਵਿਪ੍ਪਯੁਤ੍ਤੋਤਿ? ਨ ਹੇਵਂ ਵਤ੍ਤਬ੍ਬੇ. ਸਙ੍ਖਾਰਕ੍ਖਨ੍ਧੋ ਚਿਤ੍ਤਵਿਪ੍ਪਯੁਤ੍ਤੋਤਿ? ਆਮਨ੍ਤਾ. ਵੇਦਨਾਕ੍ਖਨ੍ਧੋ ਸਞ੍ਞਾਕ੍ਖਨ੍ਧੋ ਚਿਤ੍ਤਵਿਪ੍ਪਯੁਤ੍ਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਕਾਮਰਾਗਾਨੁਸਯੋ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨੋ ਚਿਤ੍ਤਵਿਪ੍ਪਯੁਤ੍ਤੋਤਿ? ਆਮਨ੍ਤਾ. ਕਾਮਰਾਗੋ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨੋ ਚਿਤ੍ਤਵਿਪ੍ਪਯੁਤ੍ਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਕਾਮਰਾਗੋ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨੋ ਚਿਤ੍ਤਸਮ੍ਪਯੁਤ੍ਤੋਤਿ? ਆਮਨ੍ਤਾ. ਕਾਮਰਾਗਾਨੁਸਯੋ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨੋ ਚਿਤ੍ਤਸਮ੍ਪਯੁਤ੍ਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਕਾਮਰਾਗਾਨੁਸਯੋ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨੋ ਚਿਤ੍ਤਵਿਪ੍ਪਯੁਤ੍ਤੋ, ਕਾਮਰਾਗੋ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨੋ ਚਿਤ੍ਤਸਮ੍ਪਯੁਤ੍ਤੋਤਿ? ਆਮਨ੍ਤਾ. ਸਙ੍ਖਾਰਕ੍ਖਨ੍ਧੋ ਏਕਦੇਸੋ ਚਿਤ੍ਤਸਮ੍ਪਯੁਤ੍ਤੋ ਏਕਦੇਸੋ ਚਿਤ੍ਤਵਿਪ੍ਪਯੁਤ੍ਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਙ੍ਖਾਰਕ੍ਖਨ੍ਧੋ ਏਕਦੇਸੋ ਚਿਤ੍ਤਸਮ੍ਪਯੁਤ੍ਤੋ ਏਕਦੇਸੋ ਚਿਤ੍ਤਵਿਪ੍ਪਯੁਤ੍ਤੋਤਿ? ਆਮਨ੍ਤਾ. ਵੇਦਨਾਕ੍ਖਨ੍ਧੋ ਸਞ੍ਞਾਕ੍ਖਨ੍ਧੋ ਏਕਦੇਸੋ ਚਿਤ੍ਤਸਮ੍ਪਯੁਤ੍ਤੋ ਏਕਦੇਸੋ ਚਿਤ੍ਤਵਿਪ੍ਪਯੁਤ੍ਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੬੧੧. ਪਟਿਘਾਨੁਸਯੋ ਮਾਨਾਨੁਸਯੋ ਦਿਟ੍ਠਾਨੁਸਯੋ ਵਿਚਿਕਿਚ੍ਛਾਨੁਸਯੋ ਭਵਰਾਗਾਨੁਸਯੋ ਅਵਿਜ੍ਜਾਨੁਸਯੋ ਚਿਤ੍ਤਵਿਪ੍ਪਯੁਤ੍ਤੋਤਿ? ਆਮਨ੍ਤਾ. ਅਵਿਜ੍ਜਾ ਅਵਿਜ੍ਜੋਘੋ ਅਵਿਜ੍ਜਾਯੋਗੋ ਅਵਿਜ੍ਜਾਨੀਵਰਣਂ ਚਿਤ੍ਤਵਿਪ੍ਪਯੁਤ੍ਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਵਿਜ੍ਜਾ ਅਵਿਜ੍ਜੋਘੋ ਅਵਿਜ੍ਜਾਯੋਗੋ ਅਵਿਜ੍ਜਾਨੀਵਰਣਂ ਚਿਤ੍ਤਸਮ੍ਪਯੁਤ੍ਤਨ੍ਤਿ? ਆਮਨ੍ਤਾ. ਅਵਿਜ੍ਜਾਨੁਸਯੋ ਚਿਤ੍ਤਸਮ੍ਪਯੁਤ੍ਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੬੧੨. ਅਵਿਜ੍ਜਾਨੁਸਯੋ ਚਿਤ੍ਤਵਿਪ੍ਪਯੁਤ੍ਤੋਤਿ? ਆਮਨ੍ਤਾ. ਕਤਮਕ੍ਖਨ੍ਧਪਰਿਯਾਪਨ੍ਨੋਤਿ? ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨੋਤਿ. ਸਙ੍ਖਾਰਕ੍ਖਨ੍ਧੋ ਚਿਤ੍ਤਵਿਪ੍ਪਯੁਤ੍ਤੋਤਿ? ਨ ਹੇਵਂ ਵਤ੍ਤਬ੍ਬੇ. ਸਙ੍ਖਾਰਕ੍ਖਨ੍ਧੋ ਚਿਤ੍ਤਵਿਪ੍ਪਯੁਤ੍ਤੋਤਿ? ਆਮਨ੍ਤਾ. ਵੇਦਨਾਕ੍ਖਨ੍ਧੋ ਸਞ੍ਞਾਕ੍ਖਨ੍ਧੋ ਚਿਤ੍ਤਵਿਪ੍ਪਯੁਤ੍ਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਵਿਜ੍ਜਾਨੁਸਯੋ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨੋ ਚਿਤ੍ਤਵਿਪ੍ਪਯੁਤ੍ਤੋਤਿ? ਆਮਨ੍ਤਾ. ਅਵਿਜ੍ਜਾ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਾ ਚਿਤ੍ਤਵਿਪ੍ਪਯੁਤ੍ਤਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਵਿਜ੍ਜਾ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਾ ਚਿਤ੍ਤਸਮ੍ਪਯੁਤ੍ਤਾਤਿ? ਆਮਨ੍ਤਾ. ਅਵਿਜ੍ਜਾਨੁਸਯੋ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨੋ ਚਿਤ੍ਤਸਮ੍ਪਯੁਤ੍ਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਵਿਜ੍ਜਾਨੁਸਯੋ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨੋ ਚਿਤ੍ਤਵਿਪ੍ਪਯੁਤ੍ਤੋ, ਅਵਿਜ੍ਜਾਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਾ ਚਿਤ੍ਤਸਮ੍ਪਯੁਤ੍ਤਾਤਿ? ਆਮਨ੍ਤਾ. ਸਙ੍ਖਾਰਕ੍ਖਨ੍ਧੋ ਏਕਦੇਸੋ ਚਿਤ੍ਤਸਮ੍ਪਯੁਤ੍ਤੋ ਏਕਦੇਸੋ ਚਿਤ੍ਤਵਿਪ੍ਪਯੁਤ੍ਤੋਤਿ? ਨ ਹੇਵਂ ਵਤ੍ਤਬ੍ਬੇ.

੬੧੩. ਨ ਵਤ੍ਤਬ੍ਬਂ – ‘‘ਅਨੁਸਯਾ ਚਿਤ੍ਤਵਿਪ੍ਪਯੁਤ੍ਤਾ’’ਤਿ? ਆਮਨ੍ਤਾ. ਪੁਥੁਜ੍ਜਨੋ ਕੁਸਲਾਬ੍ਯਾਕਤੇ ਚਿਤ੍ਤੇ ਵਤ੍ਤਮਾਨੇ ‘‘ਸਾਨੁਸਯੋ’’ਤਿ ਵਤ੍ਤਬ੍ਬੋਤਿ? ਆਮਨ੍ਤਾ. ਅਨੁਸਯਾ ਤੇਨ ਚਿਤ੍ਤੇਨ ਸਮ੍ਪਯੁਤ੍ਤਾਤਿ? ਨ ਹੇਵਂ ਵਤ੍ਤਬ੍ਬੇ. ਤੇਨ ਹਿ ਅਨੁਸਯਾ ਚਿਤ੍ਤਵਿਪ੍ਪਯੁਤ੍ਤਾਤਿ. ਪੁਥੁਜ੍ਜਨੋ ਕੁਸਲਾਬ੍ਯਾਕਤੇ ਚਿਤ੍ਤੇ ਵਤ੍ਤਮਾਨੇ ‘‘ਸਰਾਗੋ’’ਤਿ ਵਤ੍ਤਬ੍ਬੋਤਿ? ਆਮਨ੍ਤਾ. ਰਾਗੋ ਤੇਨ ਚਿਤ੍ਤੇਨ ਸਮ੍ਪਯੁਤ੍ਤੋਤਿ? ਨ ਹੇਵਂ ਵਤ੍ਤਬ੍ਬੇ. ਤੇਨ ਹਿ ਰਾਗੋ ਚਿਤ੍ਤਵਿਪ੍ਪਯੁਤ੍ਤੋਤਿ.

ਤਿਸ੍ਸੋਪਿ ਅਨੁਸਯਕਥਾ ਨਿਟ੍ਠਿਤਾ.

੧੧. ਏਕਾਦਸਮਵਗ੍ਗੋ

(੧੦੯) ੪. ਞਾਣਕਥਾ

੬੧੪. ਅਞ੍ਞਾਣੇ ਵਿਗਤੇ ਞਾਣਵਿਪ੍ਪਯੁਤ੍ਤੇ ਚਿਤ੍ਤੇ ਵਤ੍ਤਮਾਨੇ ਨ ਵਤ੍ਤਬ੍ਬਂ – ‘‘ਞਾਣੀ’’ਤਿ? ਆਮਨ੍ਤਾ. ਰਾਗੇ ਵਿਗਤੇ ਨ ਵਤ੍ਤਬ੍ਬਂ – ‘‘ਵੀਤਰਾਗੋ’’ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਞ੍ਞਾਣੇ ਵਿਗਤੇ ਞਾਣਵਿਪ੍ਪਯੁਤ੍ਤੇ ਚਿਤ੍ਤੇ ਵਤ੍ਤਮਾਨੇ ਨ ਵਤ੍ਤਬ੍ਬਂ – ‘‘ਞਾਣੀ’’ਤਿ? ਆਮਨ੍ਤਾ. ਦੋਸੇ ਵਿਗਤੇ… ਮੋਹੇ ਵਿਗਤੇ… ਕਿਲੇਸੇ ਵਿਗਤੇ ਨ ਵਤ੍ਤਬ੍ਬਂ – ‘‘ਨਿਕ੍ਕਿਲੇਸੋ’’ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਰਾਗੇ ਵਿਗਤੇ ਵਤ੍ਤਬ੍ਬਂ – ‘‘ਵੀਤਰਾਗੋ’’ਤਿ? ਆਮਨ੍ਤਾ. ਅਞ੍ਞਾਣੇ ਵਿਗਤੇ ਞਾਣਵਿਪ੍ਪਯੁਤ੍ਤੇ ਚਿਤ੍ਤੇ ਵਤ੍ਤਮਾਨੇ ਵਤ੍ਤਬ੍ਬਂ – ‘‘ਞਾਣੀ’’ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਦੋਸੇ ਵਿਗਤੇ… ਮੋਹੇ ਵਿਗਤੇ… ਕਿਲੇਸੇ ਵਿਗਤੇ ਵਤ੍ਤਬ੍ਬਂ – ‘‘ਨਿਕ੍ਕਿਲੇਸੋ’’ਤਿ? ਆਮਨ੍ਤਾ. ਅਞ੍ਞਾਣੇ ਵਿਗਤੇ ਞਾਣਵਿਪ੍ਪਯੁਤ੍ਤੇ ਚਿਤ੍ਤੇ ਵਤ੍ਤਮਾਨੇ ਵਤ੍ਤਬ੍ਬਂ – ‘‘ਞਾਣੀ’’ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੬੧੫. ਅਞ੍ਞਾਣੇ ਵਿਗਤੇ ਞਾਣਵਿਪ੍ਪਯੁਤ੍ਤੇ ਚਿਤ੍ਤੇ ਵਤ੍ਤਮਾਨੇ ਵਤ੍ਤਬ੍ਬਂ – ‘‘ਞਾਣੀ’’ਤਿ? ਆਮਨ੍ਤਾ. ਅਤੀਤੇਨ ਞਾਣੇਨ ਞਾਣੀ ਨਿਰੁਦ੍ਧੇਨ ਵਿਗਤੇਨ ਪਟਿਪਸ੍ਸਦ੍ਧੇਨ ਞਾਣੇਨ ਞਾਣੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਞਾਣਕਥਾ ਨਿਟ੍ਠਿਤਾ.

੧੧. ਏਕਾਦਸਮਵਗ੍ਗੋ

(੧੧੦) ੫. ਞਾਣਂ ਚਿਤ੍ਤਵਿਪ੍ਪਯੁਤ੍ਤਨ੍ਤਿਕਥਾ

੬੧੬. ਞਾਣਂ ਚਿਤ੍ਤਵਿਪ੍ਪਯੁਤ੍ਤਨ੍ਤਿ? ਆਮਨ੍ਤਾ. ਰੂਪਂ ਨਿਬ੍ਬਾਨਂ ਚਕ੍ਖਾਯਤਨਂ…ਪੇ… ਫੋਟ੍ਠਬ੍ਬਾਯਤਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਞਾਣਂ ਚਿਤ੍ਤਵਿਪ੍ਪਯੁਤ੍ਤਨ੍ਤਿ? ਆਮਨ੍ਤਾ. ਪਞ੍ਞਾ ਪਞ੍ਞਿਨ੍ਦ੍ਰਿਯਂ ਪਞ੍ਞਾਬਲਂ ਸਮ੍ਮਾਦਿਟ੍ਠਿ ਧਮ੍ਮਵਿਚਯਸਮ੍ਬੋਜ੍ਝਙ੍ਗੋ ਚਿਤ੍ਤਵਿਪ੍ਪਯੁਤ੍ਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪਞ੍ਞਾ ਪਞ੍ਞਿਨ੍ਦ੍ਰਿਯਂ ਪਞ੍ਞਾਬਲਂ ਸਮ੍ਮਾਦਿਟ੍ਠਿ ਧਮ੍ਮਵਿਚਯਸਮ੍ਬੋਜ੍ਝਙ੍ਗੋ ਚਿਤ੍ਤਸਮ੍ਪਯੁਤ੍ਤੋਤਿ? ਆਮਨ੍ਤਾ. ਞਾਣਂ ਚਿਤ੍ਤਸਮ੍ਪਯੁਤ੍ਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਞਾਣਂ ਚਿਤ੍ਤਵਿਪ੍ਪਯੁਤ੍ਤਨ੍ਤਿ? ਆਮਨ੍ਤਾ. ਕਤਮਕ੍ਖਨ੍ਧਪਰਿਯਾਪਨ੍ਨਨ੍ਤਿ? ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਨ੍ਤਿ. ਸਙ੍ਖਾਰਕ੍ਖਨ੍ਧੋ ਚਿਤ੍ਤਵਿਪ੍ਪਯੁਤ੍ਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਙ੍ਖਾਰਕ੍ਖਨ੍ਧੋ ਚਿਤ੍ਤਵਿਪ੍ਪਯੁਤ੍ਤੋਤਿ? ਆਮਨ੍ਤਾ. ਵੇਦਨਾਕ੍ਖਨ੍ਧੋ ਸਞ੍ਞਾਕ੍ਖਨ੍ਧੋ ਚਿਤ੍ਤਵਿਪ੍ਪਯੁਤ੍ਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਞਾਣਂ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਂ ਚਿਤ੍ਤਵਿਪ੍ਪਯੁਤ੍ਤਨ੍ਤਿ? ਆਮਨ੍ਤਾ. ਪਞ੍ਞਾ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਾ ਚਿਤ੍ਤਵਿਪ੍ਪਯੁਤ੍ਤਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪਞ੍ਞਾ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਾ ਚਿਤ੍ਤਸਮ੍ਪਯੁਤ੍ਤਾਤਿ? ਆਮਨ੍ਤਾ. ਞਾਣਂ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਂ ਚਿਤ੍ਤਸਮ੍ਪਯੁਤ੍ਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਞਾਣਂ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਂ ਚਿਤ੍ਤਵਿਪ੍ਪਯੁਤ੍ਤਂ, ਪਞ੍ਞਾ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਾ ਚਿਤ੍ਤਸਮ੍ਪਯੁਤ੍ਤਾਤਿ? ਆਮਨ੍ਤਾ. ਸਙ੍ਖਾਰਕ੍ਖਨ੍ਧੋ ਏਕਦੇਸੋ ਚਿਤ੍ਤਸਮ੍ਪਯੁਤ੍ਤੋ ਏਕਦੇਸੋ ਚਿਤ੍ਤਵਿਪ੍ਪਯੁਤ੍ਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਙ੍ਖਾਰਕ੍ਖਨ੍ਧੋ ਏਕਦੇਸੋ ਚਿਤ੍ਤਸਮ੍ਪਯੁਤ੍ਤੋ ਏਕਦੇਸੋ ਚਿਤ੍ਤਵਿਪ੍ਪਯੁਤ੍ਤੋਤਿ? ਆਮਨ੍ਤਾ. ਵੇਦਨਾਕ੍ਖਨ੍ਧੋ ਸਞ੍ਞਾਕ੍ਖਨ੍ਧੋ ਏਕਦੇਸੋ ਚਿਤ੍ਤਸਮ੍ਪਯੁਤ੍ਤੋ ਏਕਦੇਸੋ ਚਿਤ੍ਤਵਿਪ੍ਪਯੁਤ੍ਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੬੧੭. ਨ ਵਤ੍ਤਬ੍ਬਂ – ‘‘ਞਾਣਂ ਚਿਤ੍ਤਵਿਪ੍ਪਯੁਤ੍ਤ’’ਨ੍ਤਿ? ਆਮਨ੍ਤਾ. ਅਰਹਾ ਚਕ੍ਖੁਵਿਞ੍ਞਾਣਸਮਙ੍ਗੀ ‘‘ਞਾਣੀ’’ਤਿ ਵਤ੍ਤਬ੍ਬੋਤਿ? ਆਮਨ੍ਤਾ. ਞਾਣਂ ਤੇਨ ਚਿਤ੍ਤੇਨ ਸਮ੍ਪਯੁਤ੍ਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ. ਤੇਨ ਹਿ ਞਾਣਂ ਚਿਤ੍ਤਵਿਪ੍ਪਯੁਤ੍ਤਨ੍ਤਿ.

ਅਰਹਾ ਚਕ੍ਖੁਵਿਞ੍ਞਾਣਸਮਙ੍ਗੀ ‘‘ਪਞ੍ਞਵਾ’’ਤਿ ਵਤ੍ਤਬ੍ਬੋਤਿ [ਸਕਵਾਦੀਪੁਚ੍ਛਾ ਵਿਯ ਦਿਸ੍ਸਤਿ]? ਆਮਨ੍ਤਾ. ਪਞ੍ਞਾ ਤੇਨ ਚਿਤ੍ਤੇਨ ਸਮ੍ਪਯੁਤ੍ਤਾਤਿ? ਨ ਹੇਵਂ ਵਤ੍ਤਬ੍ਬੇ. ਤੇਨ ਹਿ ਪਞ੍ਞਾ ਚਿਤ੍ਤਵਿਪ੍ਪਯੁਤ੍ਤਾਤਿ.

ਞਾਣਂ ਚਿਤ੍ਤਵਿਪ੍ਪਯੁਤ੍ਤਨ੍ਤਿਕਥਾ ਨਿਟ੍ਠਿਤਾ.

੧੧. ਏਕਾਦਸਮਵਗ੍ਗੋ

(੧੧੧) ੬. ਇਦਂ ਦੁਕ੍ਖਨ੍ਤਿਕਥਾ

੬੧੮. ‘‘ਇਦਂ ਦੁਕ੍ਖ’’ਨ੍ਤਿ ਵਾਚਂ ਭਾਸਤੋ ‘‘ਇਦਂ ਦੁਕ੍ਖ’’ਨ੍ਤਿ ਞਾਣਂ ਪਵਤ੍ਤਤੀਤਿ? ਆਮਨ੍ਤਾ. ‘‘ਅਯਂ ਦੁਕ੍ਖਸਮੁਦਯੋ’’ਤਿ ਵਾਚਂ ਭਾਸਤੋ ‘‘ਅਯਂ ਦੁਕ੍ਖਸਮੁਦਯੋ’’ਤਿ ਞਾਣਂ ਪਵਤ੍ਤਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ‘‘ਇਦਂ ਦੁਕ੍ਖ’’ਨ੍ਤਿ ਵਾਚਂ ਭਾਸਤੋ ‘‘ਇਦਂ ਦੁਕ੍ਖ’’ਨ੍ਤਿ ਞਾਣਂ ਪਵਤ੍ਤਤੀਤਿ? ਆਮਨ੍ਤਾ. ‘‘ਅਯਂ ਦੁਕ੍ਖਨਿਰੋਧੋ’’ਤਿ ਵਾਚਂ ਭਾਸਤੋ ‘‘ਅਯਂ ਦੁਕ੍ਖਨਿਰੋਧੋ’’ਤਿ ਞਾਣਂ ਪਵਤ੍ਤਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ‘‘ਇਦਂ ਦੁਕ੍ਖ’’ਨ੍ਤਿ ਵਾਚਂ ਭਾਸਤੋ ‘‘ਇਦਂ ਦੁਕ੍ਖ’’ਨ੍ਤਿ ਞਾਣਂ ਪਵਤ੍ਤਤੀਤਿ? ਆਮਨ੍ਤਾ. ‘‘ਅਯਂ ਮਗ੍ਗੋ’’ਤਿ ਵਾਚਂ ਭਾਸਤੋ ‘‘ਅਯਂ ਮਗ੍ਗੋ’’ਤਿ ਞਾਣਂ ਪਵਤ੍ਤਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

‘‘ਅਯਂ ਸਮੁਦਯੋ’’ਤਿ ਵਾਚਂ ਭਾਸਤੋ ਨ ਚ ‘‘ਅਯਂ ਸਮੁਦਯੋ’’ਤਿ ਞਾਣਂ ਪਵਤ੍ਤਤੀਤਿ? ਆਮਨ੍ਤਾ. ‘‘ਇਦਂ ਦੁਕ੍ਖ’’ਨ੍ਤਿ ਵਾਚਂ ਭਾਸਤੋ ਨ ਚ ‘‘ਇਦਂ ਦੁਕ੍ਖ’’ਨ੍ਤਿ ਞਾਣਂ ਪਵਤ੍ਤਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ‘‘ਅਯਂ ਨਿਰੋਧੋ’’ਤਿ… ‘‘ਅਯਂ ਮਗ੍ਗੋ’’ਤਿ ਵਾਚਂ ਭਾਸਤੋ ਨ ਚ ‘‘ਅਯਂ ਮਗ੍ਗੋ’’ਤਿ ਞਾਣਂ ਪਵਤ੍ਤਤੀਤਿ? ਆਮਨ੍ਤਾ. ‘‘ਇਦਂ ਦੁਕ੍ਖ’’ਨ੍ਤਿ ਵਾਚਂ ਭਾਸਤੋ ਨ ਚ ‘‘ਇਦਂ ਦੁਕ੍ਖ’’ਨ੍ਤਿ ਞਾਣਂ ਪਵਤ੍ਤਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੬੧੯. ‘‘ਇਦਂ ਦੁਕ੍ਖ’’ਨ੍ਤਿ ਵਾਚਂ ਭਾਸਤੋ ‘‘ਇਦਂ ਦੁਕ੍ਖ’’ਨ੍ਤਿ ਞਾਣਂ ਪਵਤ੍ਤਤੀਤਿ? ਆਮਨ੍ਤਾ. ‘‘ਰੂਪਂ ਅਨਿਚ੍ਚ’’ਨ੍ਤਿ ਵਾਚਂ ਭਾਸਤੋ ‘‘ਰੂਪਂ ਅਨਿਚ੍ਚ’’ਨ੍ਤਿ ਞਾਣਂ ਪਵਤ੍ਤਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ‘‘ਇਦਂ ਦੁਕ੍ਖ’’ਨ੍ਤਿ ਵਾਚਂ ਭਾਸਤੋ ‘‘ਇਦਂ ਦੁਕ੍ਖ’’ਨ੍ਤਿ ਞਾਣਂ ਪਵਤ੍ਤਤੀਤਿ? ਆਮਨ੍ਤਾ. ਵੇਦਨਾ… ਸਞ੍ਞਾ… ਸਙ੍ਖਾਰਾ… ‘‘ਵਿਞ੍ਞਾਣਂ ਅਨਿਚ੍ਚ’’ਨ੍ਤਿ ਵਾਚਂ ਭਾਸਤੋ ‘‘ਵਿਞ੍ਞਾਣਂ ਅਨਿਚ੍ਚ’’ਨ੍ਤਿ ਞਾਣਂ ਪਵਤ੍ਤਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

‘‘ਇਦਂ ਦੁਕ੍ਖ’’ਨ੍ਤਿ ਵਾਚਂ ਭਾਸਤੋ ‘‘ਇਦਂ ਦੁਕ੍ਖ’’ਨ੍ਤਿ ਞਾਣਂ ਪਵਤ੍ਤਤੀਤਿ? ਆਮਨ੍ਤਾ. ‘‘ਰੂਪਂ ਅਨਤ੍ਤਾ’’ਤਿ ਵਾਚਂ ਭਾਸਤੋ ‘‘ਰੂਪਂ ਅਨਤ੍ਤਾ’’ਤਿ ਞਾਣਂ ਪਵਤ੍ਤਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ‘‘ਇਦਂ ਦੁਕ੍ਖ’’ਨ੍ਤਿ ਵਾਚਂ ਭਾਸਤੋ ‘‘ਇਦਂ ਦੁਕ੍ਖ’’ਨ੍ਤਿ ਞਾਣਂ ਪਵਤ੍ਤਤੀਤਿ? ਆਮਨ੍ਤਾ. ਵੇਦਨਾ … ਸਞ੍ਞਾ… ਸਙ੍ਖਾਰਾ… ‘‘ਵਿਞ੍ਞਾਣਂ ਅਨਤ੍ਤਾ’’ਤਿ ਵਾਚਂ ਭਾਸਤੋ ‘‘ਵਿਞ੍ਞਾਣਂ ਅਨਤ੍ਤਾ’’ਤਿ ਞਾਣਂ ਪਵਤ੍ਤਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

‘‘ਰੂਪਂ ਅਨਿਚ੍ਚ’’ਨ੍ਤਿ ਵਾਚਂ ਭਾਸਤੋ ਨ ਚ ‘‘ਰੂਪਂ ਅਨਿਚ੍ਚ’’ਨ੍ਤਿ ਞਾਣਂ ਪਵਤ੍ਤਤੀਤਿ? ਆਮਨ੍ਤਾ. ‘‘ਇਦਂ ਦੁਕ੍ਖ’’ਨ੍ਤਿ ਵਾਚਂ ਭਾਸਤੋ ਨ ਚ ‘‘ਇਦਂ ਦੁਕ੍ਖ’’ਨ੍ਤਿ ਞਾਣਂ ਪਵਤ੍ਤਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਵੇਦਨਾ… ਸਞ੍ਞਾ… ਸਙ੍ਖਾਰਾ… ‘‘ਵਿਞ੍ਞਾਣਂ ਅਨਿਚ੍ਚ’’ਨ੍ਤਿ ਵਾਚਂ ਭਾਸਤੋ ਨ ਚ ‘‘ਵਿਞ੍ਞਾਣਂ ਅਨਿਚ੍ਚ’’ਨ੍ਤਿ ਞਾਣਂ ਪਵਤ੍ਤਤੀਤਿ? ਆਮਨ੍ਤਾ. ‘‘ਇਦਂ ਦੁਕ੍ਖ’’ਨ੍ਤਿ ਵਾਚਂ ਭਾਸਤੋ ਨ ਚ ‘‘ਇਦਂ ਦੁਕ੍ਖ’’ਨ੍ਤਿ ਞਾਣਂ ਪਵਤ੍ਤਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

‘‘ਰੂਪਂ ਅਨਤ੍ਤਾ’’ਤਿ ਵਾਚਂ ਭਾਸਤੋ ਨ ਚ ‘‘ਰੂਪਂ ਅਨਤ੍ਤਾ’’ਤਿ ਞਾਣਂ ਪਵਤ੍ਤਤੀਤਿ? ਆਮਨ੍ਤਾ. ‘‘ਇਦਂ ਦੁਕ੍ਖ’’ਨ੍ਤਿ ਵਾਚਂ ਭਾਸਤੋ ਨ ਚ ‘‘ਇਦਂ ਦੁਕ੍ਖ’’ਨ੍ਤਿ ਞਾਣਂ ਪਵਤ੍ਤਤੀਤਿ? ਨ ਹੇਵਂ ਵਤ੍ਤਬ੍ਬੇ …ਪੇ… ਵੇਦਨਾ… ਸਞ੍ਞਾ… ਸਙ੍ਖਾਰਾ… ‘‘ਵਿਞ੍ਞਾਣਂ ਅਨਤ੍ਤਾ’’ਤਿ ਵਾਚਂ ਭਾਸਤੋ ਨ ਚ ‘‘ਵਿਞ੍ਞਾਣਂ ਅਨਤ੍ਤਾ’’ਤਿ ਞਾਣਂ ਪਵਤ੍ਤਤੀਤਿ? ਆਮਨ੍ਤਾ. ‘‘ਇਦਂ ਦੁਕ੍ਖ’’ਨ੍ਤਿ ਵਾਚਂ ਭਾਸਤੋ ਨ ਚ ‘‘ਦੁਕ੍ਖ’’ਨ੍ਤਿ ਞਾਣਂ ਪਵਤ੍ਤਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੬੨੦. ‘‘ਇਦਂ ਦੁਕ੍ਖ’’ਨ੍ਤਿ ਵਾਚਂ ਭਾਸਤੋ ‘‘ਇਦਂ ਦੁਕ੍ਖ’’ਨ੍ਤਿ ਞਾਣਂ ਪਵਤ੍ਤਤੀਤਿ? ਆਮਨ੍ਤਾ. ‘‘ਇ’’ਤਿ [ਈਤਿ (ਸ੍ਯਾ. ਪੀ.)] ਚ ‘‘ਦ’’ਨ੍ਤਿ ਚ ‘‘ਦੁ’’ਤਿ [ਦੂਤਿ (ਸ੍ਯਾ. ਪੀ.)] ਚ ‘‘ਖ’’ਨ੍ਤਿ ਚ ਞਾਣਂ ਪਵਤ੍ਤਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਇਦਂ ਦੁਕ੍ਖਨ੍ਤਿਕਥਾ ਨਿਟ੍ਠਿਤਾ.

੧੧. ਏਕਾਦਸਮਵਗ੍ਗੋ

(੧੧੨) ੭. ਇਦ੍ਧਿਬਲਕਥਾ

੬੨੧. ਇਦ੍ਧਿਬਲੇਨ ਸਮਨ੍ਨਾਗਤੋ ਕਪ੍ਪਂ ਤਿਟ੍ਠੇਯ੍ਯਾਤਿ? ਆਮਨ੍ਤਾ. ਇਦ੍ਧਿਮਯਿਕੋ ਸੋ ਆਯੁ, ਇਦ੍ਧਿਮਯਿਕਾ ਸਾ ਗਤਿ, ਇਦ੍ਧਿਮਯਿਕੋ ਸੋ ਅਤ੍ਤਭਾਵਪ੍ਪਟਿਲਾਭੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਇਦ੍ਧਿਬਲੇਨ ਸਮਨ੍ਨਾਗਤੋ ਕਪ੍ਪਂ ਤਿਟ੍ਠੇਯ੍ਯਾਤਿ? ਆਮਨ੍ਤਾ. ਅਤੀਤਂ ਕਪ੍ਪਂ ਤਿਟ੍ਠੇਯ੍ਯ, ਅਨਾਗਤਂ ਕਪ੍ਪਂ ਤਿਟ੍ਠੇਯ੍ਯਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਇਦ੍ਧਿਬਲੇਨ ਸਮਨ੍ਨਾਗਤੋ ਕਪ੍ਪਂ ਤਿਟ੍ਠੇਯ੍ਯਾਤਿ? ਆਮਨ੍ਤਾ. ਦ੍ਵੇ ਕਪ੍ਪੇ ਤਿਟ੍ਠੇਯ੍ਯ, ਤਯੋ ਕਪ੍ਪੇ ਤਿਟ੍ਠੇਯ੍ਯ, ਚਤ੍ਤਾਰੋ ਕਪ੍ਪੇ ਤਿਟ੍ਠੇਯ੍ਯਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਇਦ੍ਧਿਬਲੇਨ ਸਮਨ੍ਨਾਗਤੋ ਕਪ੍ਪਂ ਤਿਟ੍ਠੇਯ੍ਯਾਤਿ? ਆਮਨ੍ਤਾ. ਸਤਿ ਜੀਵਿਤੇ ਜੀਵਿਤਾਵਸੇਸੇ ਤਿਟ੍ਠੇਯ੍ਯ, ਅਸਤਿ ਜੀਵਿਤੇ ਜੀਵਿਤਾਵਸੇਸੇ ਤਿਟ੍ਠੇਯ੍ਯਾਤਿ? ਸਤਿ ਜੀਵਿਤੇ ਜੀਵਿਤਾਵਸੇਸੇ ਤਿਟ੍ਠੇਯ੍ਯਾਤਿ. ਹਞ੍ਚਿ ਸਤਿ ਜੀਵਿਤੇ ਜੀਵਿਤਾਵਸੇਸੇ ਤਿਟ੍ਠੇਯ੍ਯ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਇਦ੍ਧਿਬਲੇਨ ਸਮਨ੍ਨਾਗਤੋ ਕਪ੍ਪਂ ਤਿਟ੍ਠੇਯ੍ਯਾ’’ਤਿ. ਅਸਤਿ ਜੀਵਿਤੇ ਜੀਵਿਤਾਵਸੇਸੇ ਤਿਟ੍ਠੇਯ੍ਯਾਤਿ, ਮਤੋ ਤਿਟ੍ਠੇਯ੍ਯ, ਕਾਲਙ੍ਕਤੋ ਤਿਟ੍ਠੇਯ੍ਯਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੬੨੨. ਇਦ੍ਧਿਬਲੇਨ ਸਮਨ੍ਨਾਗਤੋ ਕਪ੍ਪਂ ਤਿਟ੍ਠੇਯ੍ਯਾਤਿ? ਆਮਨ੍ਤਾ. ਉਪ੍ਪਨ੍ਨੋ ਫਸ੍ਸੋ ਮਾ ਨਿਰੁਜ੍ਝੀਤਿ ਲਬ੍ਭਾ ਇਦ੍ਧਿਯਾ ਪਗ੍ਗਹੇਤੁਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਉਪ੍ਪਨ੍ਨਾ ਵੇਦਨਾ…ਪੇ… ਉਪ੍ਪਨ੍ਨਾ ਸਞ੍ਞਾ …ਪੇ… ਉਪ੍ਪਨ੍ਨਾ ਚੇਤਨਾ…ਪੇ… ਉਪ੍ਪਨ੍ਨਂ ਚਿਤ੍ਤਂ… ਉਪ੍ਪਨ੍ਨਾ ਸਦ੍ਧਾ… ਉਪ੍ਪਨ੍ਨਂ ਵੀਰਿਯਂ… ਉਪ੍ਪਨ੍ਨਾ ਸਤਿ… ਉਪ੍ਪਨ੍ਨੋ ਸਮਾਧਿ …ਪੇ… ਉਪ੍ਪਨ੍ਨਾ ਪਞ੍ਞਾ ਮਾ ਨਿਰੁਜ੍ਝੀਤਿ ਲਬ੍ਭਾ ਇਦ੍ਧਿਯਾ ਪਗ੍ਗਹੇਤੁਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਇਦ੍ਧਿਬਲੇਨ ਸਮਨ੍ਨਾਗਤੋ ਕਪ੍ਪਂ ਤਿਟ੍ਠੇਯ੍ਯਾਤਿ? ਆਮਨ੍ਤਾ. ਰੂਪਂ ਨਿਚ੍ਚਂ ਹੋਤੂਤਿ ਲਬ੍ਭਾ ਇਦ੍ਧਿਯਾ ਪਗ੍ਗਹੇਤੁਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਵੇਦਨਾ…ਪੇ… ਸਞ੍ਞਾ… ਸਙ੍ਖਾਰਾ… ਵਿਞ੍ਞਾਣਂ ਨਿਚ੍ਚਂ ਹੋਤੂਤਿ ਲਬ੍ਭਾ ਇਦ੍ਧਿਯਾ ਪਗ੍ਗਹੇਤੁਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਇਦ੍ਧਿਬਲੇਨ ਸਮਨ੍ਨਾਗਤੋ ਕਪ੍ਪਂ ਤਿਟ੍ਠੇਯ੍ਯਾਤਿ? ਆਮਨ੍ਤਾ. ਜਾਤਿਧਮ੍ਮਾ ਸਤ੍ਤਾ ਮਾ ਜਾਯਿਂਸੂਤਿ ਲਬ੍ਭਾ ਇਦ੍ਧਿਯਾ ਪਗ੍ਗਹੇਤੁਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਜਰਾਧਮ੍ਮਾ ਸਤ੍ਤਾ ਮਾ ਜੀਰਿਂਸੂਤਿ…ਪੇ… ਬ੍ਯਾਧਿਧਮ੍ਮਾ ਸਤ੍ਤਾ ਮਾ ਬ੍ਯਾਧਿਯਿਂਸੂਤਿ…ਪੇ… ਮਰਣਧਮ੍ਮਾ ਸਤ੍ਤਾ ਮਾ ਮੀਯਿਂਸੂਤਿ ਲਬ੍ਭਾ ਇਦ੍ਧਿਯਾ ਪਗ੍ਗਹੇਤੁਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੬੨੩. ਨ ਵਤ੍ਤਬ੍ਬਂ – ‘‘ਇਦ੍ਧਿਬਲੇਨ ਸਮਨ੍ਨਾਗਤੋ ਕਪ੍ਪਂ ਤਿਟ੍ਠੇਯ੍ਯਾ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਯਸ੍ਸ ਕਸ੍ਸਚਿ, ਆਨਨ੍ਦ, ਚਤ੍ਤਾਰੋ ਇਦ੍ਧਿਪਾਦਾ ਭਾਵਿਤਾ ਬਹੁਲੀਕਤਾ ਯਾਨੀਕਤਾ ਵਤ੍ਥੁਕਤਾ ਅਨੁਟ੍ਠਿਤਾ ਪਰਿਚਿਤਾ ਸੁਸਮਾਰਦ੍ਧਾ, ਸੋ ਆਕਙ੍ਖਮਾਨੋ ਕਪ੍ਪਂ ਵਾ ਤਿਟ੍ਠੇਯ੍ਯ ਕਪ੍ਪਾਵਸੇਸਂ ਵਾ’’ਤਿ [ਦੀ. ਨਿ. ੨.੧੬੬; ਸਂ. ਨਿ. ੫.੮੨੨; ਉਦਾ. ੫੧]! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਇਦ੍ਧਿਬਲੇਨ ਸਮਨ੍ਨਾਗਤੋ ਕਪ੍ਪਂ ਤਿਟ੍ਠੇਯ੍ਯਾਤਿ.

੬੨੪. ਇਦ੍ਧਿਬਲੇਨ ਸਮਨ੍ਨਾਗਤੋ ਕਪ੍ਪਂ ਤਿਟ੍ਠੇਯ੍ਯਾਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਚਤੁਨ੍ਨਂ, ਭਿਕ੍ਖਵੇ, ਧਮ੍ਮਾਨਂ ਨਤ੍ਥਿ ਕੋਚਿ ਪਾਟਿਭੋਗੋ ਸਮਣੋ ਵਾ ਬ੍ਰਾਹ੍ਮਣੋ ਵਾ ਦੇਵੋ ਵਾ ਮਾਰੋ ਵਾ ਬ੍ਰਹ੍ਮਾ ਵਾ ਕੋਚਿ ਵਾ ਲੋਕਸ੍ਮਿਂ! ਕਤਮੇਸਂ ਚਤੁਨ੍ਨਂ? ਜਰਾਧਮ੍ਮੋ ‘‘ਮਾ ਜੀਰੀ’’ਤਿ ਨਤ੍ਥਿ ਕੋਚਿ ਪਾਟਿਭੋਗੋ ਸਮਣੋ ਵਾ ਬ੍ਰਾਹ੍ਮਣੋ ਵਾ ਦੇਵੋ ਵਾ ਮਾਰੋ ਵਾ ਬ੍ਰਹ੍ਮਾ ਵਾ ਕੋਚਿ ਵਾ ਲੋਕਸ੍ਮਿਂ. ਬ੍ਯਾਧਿਧਮ੍ਮੋ ‘‘ਮਾ ਬ੍ਯਾਧਿਯੀ’’ਤਿ…ਪੇ… ਮਰਣਧਮ੍ਮੋ ‘‘ਮਾ ਮੀਯੀ’’ਤਿ…ਪੇ… ਯਾਨਿ ਖੋ ਪਨ ਤਾਨਿ ਪੁਬ੍ਬੇ ਕਤਾਨਿ ਪਾਪਕਾਨਿ ਕਮ੍ਮਾਨਿ ਸਂਕਿਲੇਸਿਕਾਨਿ ਪੋਨੋਬ੍ਭਵਿਕਾਨਿ [ਪੋਨੋਭਵਿਕਾਨਿ (ਸੀ. ਪੀ.)] ਸਦਰਾਨਿ [ਨਿਸ੍ਸਾਰਾਨਿ (ਸੀ. ਪੀ. ਕ.), ਦੁਕ੍ਖੁਦ੍ਰਯਾਨਿ (ਸ੍ਯਾ.)] ਦੁਕ੍ਖਵਿਪਾਕਾਨਿ ਆਯਤਿਂ ਜਾਤਿਜਰਾਮਰਣਿਯਾਨਿ ਤੇਸਂ ਵਿਪਾਕੋ ‘‘ਮਾ ਨਿਬ੍ਬਤ੍ਤੀ’’ਤਿ ਨਤ੍ਥਿ ਕੋਚਿ ਪਾਟਿਭੋਗੋ ਸਮਣੋ ਵਾ ਬ੍ਰਾਹ੍ਮਣੋ ਵਾ ਦੇਵੋ ਵਾ ਮਾਰੋ ਵਾ ਬ੍ਰਹ੍ਮਾ ਵਾ ਕੋਚਿ ਵਾ ਲੋਕਸ੍ਮਿਂ. ਇਮੇਸਂ ਖੋ, ਭਿਕ੍ਖਵੇ, ਚਤੁਨ੍ਨਂ ਧਮ੍ਮਾਨਂ ਨਤ੍ਥਿ ਕੋਚਿ ਪਾਟਿਭੋਗੋ ਸਮਣੋ ਵਾ ਬ੍ਰਾਹ੍ਮਣੋ ਵਾ ਦੇਵੋ ਵਾ ਮਾਰੋ ਵਾ ਬ੍ਰਹ੍ਮਾ ਵਾ ਕੋਚਿ ਵਾ ਲੋਕਸ੍ਮਿ’’ਨ੍ਤਿ [ਅ. ਨਿ. ੪.੧੮੨]. ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਨ ਵਤ੍ਤਬ੍ਬਂ – ‘‘ਇਦ੍ਧਿਬਲੇਨ ਸਮਨ੍ਨਾਗਤੋ ਕਪ੍ਪਂ ਤਿਟ੍ਠੇਯ੍ਯਾ’’ਤਿ.

ਇਦ੍ਧਿਬਲਕਥਾ ਨਿਟ੍ਠਿਤਾ.

੧੧. ਏਕਾਦਸਮਵਗ੍ਗੋ

(੧੧੩) ੮. ਸਮਾਧਿਕਥਾ

੬੨੫. ਚਿਤ੍ਤਸਨ੍ਤਤਿ ਸਮਾਧੀਤਿ? ਆਮਨ੍ਤਾ. ਅਤੀਤਾ ਚਿਤ੍ਤਸਨ੍ਤਤਿ ਸਮਾਧੀਤਿ? ਨ ਹੇਵਂ ਵਤ੍ਤਬ੍ਬੇ …ਪੇ… ਚਿਤ੍ਤਸਨ੍ਤਤਿ ਸਮਾਧੀਤਿ? ਆਮਨ੍ਤਾ. ਅਨਾਗਤਾ ਚਿਤ੍ਤਸਨ੍ਤਤਿ ਸਮਾਧੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਚਿਤ੍ਤਸਨ੍ਤਤਿ ਸਮਾਧੀਤਿ? ਆਮਨ੍ਤਾ. ਨਨੁ ਅਤੀਤਂ ਨਿਰੁਦ੍ਧਂ ਅਨਾਗਤਂ ਅਜਾਤਨ੍ਤਿ? ਆਮਨ੍ਤਾ. ਹਞ੍ਚਿ ਅਤੀਤਂ ਨਿਰੁਦ੍ਧਂ ਅਨਾਗਤਂ ਅਜਾਤਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਚਿਤ੍ਤਸਨ੍ਤਤਿ ਸਮਾਧੀ’’ਤਿ.

੬੨੬. ਏਕਚਿਤ੍ਤਕ੍ਖਣਿਕੋ ਸਮਾਧੀਤਿ? ਆਮਨ੍ਤਾ. ਚਕ੍ਖੁਵਿਞ੍ਞਾਣਸਮਙ੍ਗੀ ਸਮਾਪਨ੍ਨੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸੋਤਵਿਞ੍ਞਾਣਸਮਙ੍ਗੀ…ਪੇ… ਘਾਨਵਿਞ੍ਞਾਣਸਮਙ੍ਗੀ… ਜਿਵ੍ਹਾਵਿਞ੍ਞਾਣਸਮਙ੍ਗੀ… ਕਾਯਵਿਞ੍ਞਾਣਸਮਙ੍ਗੀ…ਪੇ… ਅਕੁਸਲਚਿਤ੍ਤਸਮਙ੍ਗੀ …ਪੇ… ਰਾਗਸਹਗਤਚਿਤ੍ਤਸਮਙ੍ਗੀ…ਪੇ… ਦੋਸਸਹਗਤਚਿਤ੍ਤਸਮਙ੍ਗੀ…ਪੇ… ਮੋਹਸਹਗਤਚਿਤ੍ਤਸਮਙ੍ਗੀ…ਪੇ… ਅਨੋਤ੍ਤਪ੍ਪਸਹਗਤਚਿਤ੍ਤਸਮਙ੍ਗੀ ਸਮਾਪਨ੍ਨੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਚਿਤ੍ਤਸਨ੍ਤਤਿ ਸਮਾਧੀਤਿ? ਆਮਨ੍ਤਾ. ਅਕੁਸਲਚਿਤ੍ਤਸਨ੍ਤਤਿ ਸਮਾਧੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਰਾਗਸਹਗਤਾ…ਪੇ… ਦੋਸਸਹਗਤਾ…ਪੇ… ਮੋਹਸਹਗਤਾ…ਪੇ… ਅਨੋਤ੍ਤਪ੍ਪਸਹਗਤਾ ਚਿਤ੍ਤਸਨ੍ਤਤਿ ਸਮਾਧੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਨ ਵਤ੍ਤਬ੍ਬਂ – ‘‘ਚਿਤ੍ਤਸਨ੍ਤਤਿ ਸਮਾਧੀ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਅਹਂ ਖੋ, ਆਵੁਸੋ ਨਿਗਣ੍ਠਾ, ਪਹੋਮਿ ਅਨਿਞ੍ਜਮਾਨੋ ਕਾਯੇਨ, ਅਭਾਸਮਾਨੋ ਵਾਚਂ, ਸਤ੍ਤ ਰਤ੍ਤਿਨ੍ਦਿਵਾਨਿ [ਰਤ੍ਤਿਦਿਵਾਨਿ (ਕ.)] ਏਕਨ੍ਤਸੁਖਂ ਪਟਿਸਂਵੇਦੀ ਵਿਹਰਿਤੁ’’ਨ੍ਤਿ [ਮ. ਨਿ. ੧.੧੮੦]! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਚਿਤ੍ਤਸਨ੍ਤਤਿ ਸਮਾਧੀਤਿ.

ਸਮਾਧਿਕਥਾ ਨਿਟ੍ਠਿਤਾ.

੧੧. ਏਕਾਦਸਮਵਗ੍ਗੋ

(੧੧੪) ੯. ਧਮ੍ਮਟ੍ਠਿਤਤਾਕਥਾ

੬੨੭. ਧਮ੍ਮਟ੍ਠਿਤਤਾ ਪਰਿਨਿਪ੍ਫਨ੍ਨਾਤਿ? ਆਮਨ੍ਤਾ. ਤਾਯ ਠਿਤਤਾ ਪਰਿਨਿਪ੍ਫਨ੍ਨਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਤਾਯ ਠਿਤਤਾ ਪਰਿਨਿਪ੍ਫਨ੍ਨਾਤਿ? ਆਮਨ੍ਤਾ. ਤਾਯ ਤਾਯੇਵ ਨਤ੍ਥਿ ਦੁਕ੍ਖਸ੍ਸਨ੍ਤਕਿਰਿਯਾ, ਨਤ੍ਥਿ ਵਟ੍ਟੁਪਚ੍ਛੇਦੋ, ਨਤ੍ਥਿ ਅਨੁਪਾਦਾਪਰਿਨਿਬ੍ਬਾਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਰੂਪਸ੍ਸ ਠਿਤਤਾ ਪਰਿਨਿਪ੍ਫਨ੍ਨਾਤਿ? ਆਮਨ੍ਤਾ. ਤਾਯ ਠਿਤਤਾ ਪਰਿਨਿਪ੍ਫਨ੍ਨਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਤਾਯ ਠਿਤਤਾ ਪਰਿਨਿਪ੍ਫਨ੍ਨਾਤਿ? ਆਮਨ੍ਤਾ. ਤਾਯ ਤਾਯੇਵ ਨਤ੍ਥਿ ਦੁਕ੍ਖਸ੍ਸਨ੍ਤਕਿਰਿਯਾ, ਨਤ੍ਥਿ ਵਟ੍ਟੁਪਚ੍ਛੇਦੋ, ਨਤ੍ਥਿ ਅਨੁਪਾਦਾਪਰਿਨਿਬ੍ਬਾਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਵੇਦਨਾਯ ਠਿਤਤਾ…ਪੇ… ਸਞ੍ਞਾਯ ਠਿਤਤਾ…ਪੇ… ਸਙ੍ਖਾਰਾਨਂ ਠਿਤਤਾ…ਪੇ… ਵਿਞ੍ਞਾਣਸ੍ਸ ਠਿਤਤਾ ਪਰਿਨਿਪ੍ਫਨ੍ਨਾਤਿ? ਆਮਨ੍ਤਾ. ਤਾਯ ਠਿਤਤਾ ਪਰਿਨਿਪ੍ਫਨ੍ਨਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਤਾਯ ਠਿਤਤਾ ਪਰਿਨਿਪ੍ਫਨ੍ਨਾਤਿ? ਆਮਨ੍ਤਾ. ਤਾਯ ਤਾਯੇਵ ਨਤ੍ਥਿ ਦੁਕ੍ਖਸ੍ਸਨ੍ਤਕਿਰਿਯਾ, ਨਤ੍ਥਿ ਵਟ੍ਟੁਪਚ੍ਛੇਦੋ, ਨਤ੍ਥਿ ਅਨੁਪਾਦਾਪਰਿਨਿਬ੍ਬਾਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਧਮ੍ਮਟ੍ਠਿਤਤਾਕਥਾ ਨਿਟ੍ਠਿਤਾ.

੧੧. ਏਕਾਦਸਮਵਗ੍ਗੋ

(੧੧੫) ੧੦. ਅਨਿਚ੍ਚਤਾਕਥਾ

੬੨੮. ਅਨਿਚ੍ਚਤਾ ਪਰਿਨਿਪ੍ਫਨ੍ਨਾਤਿ? ਆਮਨ੍ਤਾ. ਤਾਯ ਅਨਿਚ੍ਚਤਾਯ ਅਨਿਚ੍ਚਤਾ ਪਰਿਨਿਪ੍ਫਨ੍ਨਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਤਾਯ ਅਨਿਚ੍ਚਤਾਯ ਅਨਿਚ੍ਚਤਾ ਪਰਿਨਿਪ੍ਫਨ੍ਨਾਤਿ? ਆਮਨ੍ਤਾ. ਤਾਯ ਤਾਯੇਵ ਨਤ੍ਥਿ ਦੁਕ੍ਖਸ੍ਸਨ੍ਤਕਿਰਿਯਾ, ਨਤ੍ਥਿ ਵਟ੍ਟੁਪਚ੍ਛੇਦੋ, ਨਤ੍ਥਿ ਅਨੁਪਾਦਾਪਰਿਨਿਬ੍ਬਾਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ.

ਜਰਾ ਪਰਿਨਿਪ੍ਫਨ੍ਨਾਤਿ? ਆਮਨ੍ਤਾ. ਤਾਯ ਜਰਾਯ ਜਰਾ ਪਰਿਨਿਪ੍ਫਨ੍ਨਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਤਾਯ ਜਰਾਯ ਜਰਾ ਪਰਿਨਿਪ੍ਫਨ੍ਨਾਤਿ? ਆਮਨ੍ਤਾ. ਤਾਯ ਤਾਯੇਵ ਨਤ੍ਥਿ ਦੁਕ੍ਖਸ੍ਸਨ੍ਤਕਿਰਿਯਾ, ਨਤ੍ਥਿ ਵਟ੍ਟੁਪਚ੍ਛੇਦੋ, ਨਤ੍ਥਿ ਅਨੁਪਾਦਾਪਰਿਨਿਬ੍ਬਾਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਮਰਣਂ ਪਰਿਨਿਪ੍ਫਨ੍ਨਨ੍ਤਿ? ਆਮਨ੍ਤਾ. ਤਸ੍ਸ ਮਰਣਸ੍ਸ ਮਰਣਂ ਪਰਿਨਿਪ੍ਫਨ੍ਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ. ਤਸ੍ਸ ਮਰਣਸ੍ਸ ਮਰਣਂ ਪਰਿਨਿਪ੍ਫਨ੍ਨਨ੍ਤਿ? ਆਮਨ੍ਤਾ. ਤਸ੍ਸ ਤਸ੍ਸੇਵ ਨਤ੍ਥਿ ਦੁਕ੍ਖਸ੍ਸਨ੍ਤਕਿਰਿਯਾ, ਨਤ੍ਥਿ ਵਟ੍ਟੁਪਚ੍ਛੇਦੋ, ਨਤ੍ਥਿ ਅਨੁਪਾਦਾਪਰਿਨਿਬ੍ਬਾਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੬੨੯. ਰੂਪਂ ਪਰਿਨਿਪ੍ਫਨ੍ਨਂ, ਰੂਪਸ੍ਸ ਅਨਿਚ੍ਚਤਾ ਅਤ੍ਥੀਤਿ? ਆਮਨ੍ਤਾ. ਅਨਿਚ੍ਚਤਾ ਪਰਿਨਿਪ੍ਫਨ੍ਨਾ, ਅਨਿਚ੍ਚਤਾਯ ਅਨਿਚ੍ਚਤਾ ਅਤ੍ਥੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਰੂਪਂ ਪਰਿਨਿਪ੍ਫਨ੍ਨਂ, ਰੂਪਸ੍ਸ ਜਰਾ ਅਤ੍ਥੀਤਿ? ਆਮਨ੍ਤਾ. ਜਰਾ ਪਰਿਨਿਪ੍ਫਨ੍ਨਾ, ਜਰਾਯ ਜਰਾ ਅਤ੍ਥੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਰੂਪਂ ਪਰਿਨਿਪ੍ਫਨ੍ਨਂ, ਰੂਪਸ੍ਸ ਭੇਦੋ ਅਤ੍ਥਿ, ਅਨ੍ਤਰਧਾਨਂ ਅਤ੍ਥੀਤਿ? ਆਮਨ੍ਤਾ. ਮਰਣਂ ਪਰਿਨਿਪ੍ਫਨ੍ਨਂ, ਮਰਣਸ੍ਸ ਭੇਦੋ ਅਤ੍ਥਿ, ਅਨ੍ਤਰਧਾਨਂ ਅਤ੍ਥੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਵੇਦਨਾ …ਪੇ… ਸਞ੍ਞਾ… ਸਙ੍ਖਾਰਾ…ਪੇ… ਵਿਞ੍ਞਾਣਂ ਪਰਿਨਿਪ੍ਫਨ੍ਨਂ, ਵਿਞ੍ਞਾਣਸ੍ਸ ਅਨਿਚ੍ਚਤਾ ਅਤ੍ਥੀਤਿ? ਆਮਨ੍ਤਾ. ਅਨਿਚ੍ਚਤਾ ਪਰਿਨਿਪ੍ਫਨ੍ਨਾ, ਅਨਿਚ੍ਚਤਾਯ ਅਨਿਚ੍ਚਤਾ ਅਤ੍ਥੀਤਿ? ਨ ਹੇਵਂ ਵਤ੍ਤਬ੍ਬੇ …ਪੇ… ਵਿਞ੍ਞਾਣਂ ਪਰਿਨਿਪ੍ਫਨ੍ਨਂ, ਵਿਞ੍ਞਾਣਸ੍ਸ ਜਰਾ ਅਤ੍ਥੀਤਿ? ਆਮਨ੍ਤਾ. ਜਰਾ ਪਰਿਨਿਪ੍ਫਨ੍ਨਾ, ਜਰਾਯ ਜਰਾ ਅਤ੍ਥੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਵਿਞ੍ਞਾਣਂ ਪਰਿਨਿਪ੍ਫਨ੍ਨਂ, ਵਿਞ੍ਞਾਣਸ੍ਸ ਭੇਦੋ ਅਤ੍ਥਿ, ਅਨ੍ਤਰਧਾਨਂ ਅਤ੍ਥੀਤਿ? ਆਮਨ੍ਤਾ. ਮਰਣਂ ਪਰਿਨਿਪ੍ਫਨ੍ਨਂ, ਮਰਣਸ੍ਸ ਭੇਦੋ ਅਤ੍ਥਿ, ਅਨ੍ਤਰਧਾਨਂ ਅਤ੍ਥੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਨਿਚ੍ਚਤਾਕਥਾ ਨਿਟ੍ਠਿਤਾ.

ਏਕਾਦਸਮਵਗ੍ਗੋ.

ਤਸ੍ਸੁਦ੍ਦਾਨਂ –

ਅਨੁਸਯਾ ਅਬ੍ਯਾਕਤਾ, ਅਹੇਤੁਕਾ, ਚਿਤ੍ਤਵਿਪ੍ਪਯੁਤ੍ਤਾ, ਅਞ੍ਞਾਣੇ ਵਿਗਤੇ ਞਾਣੀ, ਞਾਣਂ ਚਿਤ੍ਤਵਿਪ੍ਪਯੁਤ੍ਤਂ, ਯਤ੍ਥ ਸਦ੍ਦੇ [ਯਤ੍ਥ ਸਦ੍ਦੋ (ਸੀ.), ਯਥਾਸਦ੍ਦਂ (?)] ਞਾਣਂ ਪਵਤ੍ਤਤਿ, ਇਦ੍ਧਿਬਲੇਨ ਸਮਨ੍ਨਾਗਤੋ ਕਪ੍ਪਂ ਤਿਟ੍ਠੇਯ੍ਯ, ਚਿਤ੍ਤਸਨ੍ਤਤਿ ਸਮਾਧਿ, ਧਮ੍ਮਟ੍ਠਿਤਤਾ, ਅਨਿਚ੍ਚਤਾਤਿ.