੮. ਅਟ੍ਠਮਵਗ੍ਗੋ

(੮੩) ੧੧. ਕਮ੍ਮਹੇਤੁਕਥਾ

੫੪੬. ਕਮ੍ਮਹੇਤੁ ਅਰਹਾ ਅਰਹਤ੍ਤਾ ਪਰਿਹਾਯਤੀਤਿ? ਆਮਨ੍ਤਾ. ਕਮ੍ਮਹੇਤੁ ਸੋਤਾਪਨ੍ਨੋ ਸੋਤਾਪਤ੍ਤਿਫਲਾ ਪਰਿਹਾਯਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਕਮ੍ਮਹੇਤੁ ਅਰਹਾ ਅਰਹਤ੍ਤਾ ਪਰਿਹਾਯਤੀਤਿ? ਆਮਨ੍ਤਾ. ਕਮ੍ਮਹੇਤੁ ਸਕਦਾਗਾਮੀ…ਪੇ… ਅਨਾਗਾਮੀ ਅਨਾਗਾਮਿਫਲਾ ਪਰਿਹਾਯਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਕਮ੍ਮਹੇਤੁ ਸੋਤਾਪਨ੍ਨੋ ਸੋਤਾਪਤ੍ਤਿਫਲਾ ਨ ਪਰਿਹਾਯਤੀਤਿ? ਆਮਨ੍ਤਾ. ਕਮ੍ਮਹੇਤੁ ਅਰਹਾ ਅਰਹਤ੍ਤਾ ਨ ਪਰਿਹਾਯਤੀਤਿ? ਨ ਹੇਵਂ ਵਤ੍ਤਬ੍ਬੇ …ਪੇ… ਕਮ੍ਮਹੇਤੁ ਸਕਦਾਗਾਮੀ…ਪੇ… ਅਨਾਗਾਮੀ ਅਨਾਗਾਮਿਫਲਾ ਨ ਪਰਿਹਾਯਤੀਤਿ? ਆਮਨ੍ਤਾ. ਕਮ੍ਮਹੇਤੁ ਅਰਹਾ ਅਰਹਤ੍ਤਾ ਨ ਪਰਿਹਾਯਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਕਮ੍ਮਹੇਤੁ ਅਰਹਾ ਅਰਹਤ੍ਤਾ ਪਰਿਹਾਯਤੀਤਿ? ਆਮਨ੍ਤਾ. ਪਾਣਾਤਿਪਾਤਕਮ੍ਮਸ੍ਸ ਹੇਤੂਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਦਿਨ੍ਨਾਦਾਨਕਮ੍ਮਸ੍ਸ ਹੇਤੁ…ਪੇ… ਕਾਮੇਸੁਮਿਚ੍ਛਾਚਾਰਕਮ੍ਮਸ੍ਸ ਹੇਤੁ… ਮੁਸਾਵਾਦਕਮ੍ਮਸ੍ਸ ਹੇਤੁ… ਪਿਸੁਣਵਾਚਾਕਮ੍ਮਸ੍ਸ ਹੇਤੁ… ਫਰੁਸਵਾਚਾਕਮ੍ਮਸ੍ਸ ਹੇਤੁ… ਸਮ੍ਫਪ੍ਪਲਾਪਕਮ੍ਮਸ੍ਸ ਹੇਤੁ… ਮਾਤੁਘਾਤਕਮ੍ਮਸ੍ਸ [ਮਾਤੁਘਾਤਕਕਮ੍ਮਸ੍ਸ (ਸ੍ਯਾ.), ਮਾਤੁਘਾਤਿਕਮ੍ਮਸ੍ਸ (ਕ.) ਤਥਾ ਪਿਤੁਘਾਤਅਰਹਨ੍ਤਘਾਤਕਮ੍ਮਸ੍ਸਾਤਿਪਦੇਸੁ] ਹੇਤੁ… ਪਿਤੁਘਾਤਕਮ੍ਮਸ੍ਸ ਹੇਤੁ… ਅਰਹਨ੍ਤਘਾਤਕਮ੍ਮਸ੍ਸ ਹੇਤੁ… ਰੁਹਿਰੁਪ੍ਪਾਦਕਮ੍ਮਸ੍ਸ ਹੇਤੁ…ਪੇ… ਸਙ੍ਘਭੇਦਕਮ੍ਮਸ੍ਸ ਹੇਤੂਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਕਤਮਸ੍ਸ ਕਮ੍ਮਸ੍ਸ ਹੇਤੂਤਿ? ਹਨ੍ਦ ਹਿ ਅਰਹਨ੍ਤਾਨਂ ਅਬ੍ਭਾਚਿਕ੍ਖਤੀਤਿ. ਅਰਹਨ੍ਤਾਨਂ ਅਬ੍ਭਾਚਿਕ੍ਖਨਕਮ੍ਮਸ੍ਸ ਹੇਤੁ ਅਰਹਾ ਅਰਹਤ੍ਤਾ ਪਰਿਹਾਯਤੀਤਿ? ਆਮਨ੍ਤਾ. ਯੇ ਕੇਚਿ ਅਰਹਨ੍ਤਾਨਂ ਅਬ੍ਭਾਚਿਕ੍ਖਨ੍ਤਿ, ਸਬ੍ਬੇ ਤੇ ਅਰਹਤ੍ਤਂ ਸਚ੍ਛਿਕਰੋਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਕਮ੍ਮਹੇਤੁਕਥਾ ਨਿਟ੍ਠਿਤਾ.

ਅਟ੍ਠਮਵਗ੍ਗੋ.

ਤਸ੍ਸੁਦ੍ਦਾਨਂ –

ਛ ਗਤਿਯੋ, ਅਨ੍ਤਰਾਭਵੋ, ਪਞ੍ਚੇਵ ਕਾਮਗੁਣਾ ਕਾਮਧਾਤੁ, ਪਞ੍ਚੇਵ ਆਯਤਨਾ ਕਾਮਾ, ਰੂਪਿਨੋ ਧਮ੍ਮਾ ਰੂਪਧਾਤੁ, ਅਰੂਪਿਨੋ ਧਮ੍ਮਾ ਅਰੂਪਧਾਤੁ, ਸਲ਼ਾਯਤਨਿਕੋ ਅਤ੍ਤਭਾਵੋ ਰੂਪਧਾਤੁਯਾ, ਅਤ੍ਥਿ ਰੂਪਂ ਅਰੂਪੇਸੁ, ਰੂਪਂ ਕਮ੍ਮਂ, ਰੂਪਂ ਜੀਵਿਤਂ, ਕਮ੍ਮਹੇਤੁਕਾ ਪਰਿਹਾਯਤੀਤਿ.