੯. ਨਵਮਵਗ੍ਗੋ

(੮੪) ੧. ਆਨਿਸਂਸਦਸ੍ਸਾਵੀਕਥਾ

੫੪੭. ਆਨਿਸਂਸਦਸ੍ਸਾਵਿਸ੍ਸ ਸਂਯੋਜਨਾਨਂ ਪਹਾਨਨ੍ਤਿ? ਆਮਨ੍ਤਾ. ਨਨੁ ਸਙ੍ਖਾਰੇ ਅਨਿਚ੍ਚਤੋ ਮਨਸਿਕਰੋਤੋ ਸਂਯੋਜਨਾ ਪਹੀਯਨ੍ਤੀਤਿ? ਆਮਨ੍ਤਾ. ਹਞ੍ਚਿ ਸਙ੍ਖਾਰੇ ਅਨਿਚ੍ਚਤੋ ਮਨਸਿਕਰੋਤੋ ਸਂਯੋਜਨਾ ਪਹੀਯਨ੍ਤਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਆਨਿਸਂਸਦਸ੍ਸਾਵਿਸ੍ਸ ਸਂਯੋਜਨਾਨਂ ਪਹਾਨ’’ਨ੍ਤਿ.

ਨਨੁ ਸਙ੍ਖਾਰੇ ਦੁਕ੍ਖਤੋ…ਪੇ… ਰੋਗਤੋ… ਗਣ੍ਡਤੋ… ਸਲ੍ਲਤੋ… ਅਘਤੋ… ਆਬਾਧਤੋ… ਪਰਤੋ… ਪਲੋਕਤੋ… ਈਤਿਤੋ… ਉਪਦ੍ਦਵਤੋ… ਭਯਤੋ… ਉਪਸਗ੍ਗਤੋ… ਚਲਤੋ… ਪਭਙ੍ਗੁਤੋ… ਅਦ੍ਧੁਵਤੋ… ਅਤਾਣਤੋ… ਅਲੇਣਤੋ… ਅਸਰਣਤੋ… ਅਸਰਣੀਭੂਤਤੋ… ਰਿਤ੍ਤਤੋ… ਤੁਚ੍ਛਤੋ… ਸੁਞ੍ਞਤੋ… ਅਨਤ੍ਤਤੋ… ਆਦੀਨਵਤੋ…ਪੇ… ਵਿਪਰਿਣਾਮਧਮ੍ਮਤੋ ਮਨਸਿਕਰੋਤੋ ਸਂਯੋਜਨਾ ਪਹੀਯਨ੍ਤੀਤਿ? ਆਮਨ੍ਤਾ. ਹਞ੍ਚਿ ਸਙ੍ਖਾਰੇ ਵਿਪਰਿਣਾਮਧਮ੍ਮਤੋ ਮਨਸਿਕਰੋਤੋ ਸਂਯੋਜਨਾ ਪਹੀਯਨ੍ਤਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਆਨਿਸਂਸਦਸ੍ਸਾਵਿਸ੍ਸ ਸਂਯੋਜਨਾਨਂ ਪਹਾਨ’’ਨ੍ਤਿ.

ਸਙ੍ਖਾਰੇ ਚ ਅਨਿਚ੍ਚਤੋ ਮਨਸਿ ਕਰੋਤਿ ਨਿਬ੍ਬਾਨੇ ਚ ਆਨਿਸਂਸਦਸ੍ਸਾਵੀ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਙ੍ਖਾਰੇ ਚ ਅਨਿਚ੍ਚਤੋ ਮਨਸਿ ਕਰੋਤਿ ਨਿਬ੍ਬਾਨੇ ਚ ਆਨਿਸਂਸਦਸ੍ਸਾਵੀ ਹੋਤੀਤਿ? ਆਮਨ੍ਤਾ. ਦ੍ਵਿਨ੍ਨਂ ਫਸ੍ਸਾਨਂ…ਪੇ… ਦ੍ਵਿਨ੍ਨਂ ਚਿਤ੍ਤਾਨਂ ਸਮੋਧਾਨਂ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਙ੍ਖਾਰੇ ਚ ਦੁਕ੍ਖਤੋ…ਪੇ… ਵਿਪਰਿਣਾਮਧਮ੍ਮਤੋ ਮਨਸਿ ਕਰੋਤਿ ਨਿਬ੍ਬਾਨੇ ਚ ਆਨਿਸਂਸਦਸ੍ਸਾਵੀ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਙ੍ਖਾਰੇ ਚ ਵਿਪਰਿਣਾਮਧਮ੍ਮਤੋ ਮਨਸਿ ਕਰੋਤਿ ਨਿਬ੍ਬਾਨੇ ਚ ਆਨਿਸਂਸਦਸ੍ਸਾਵੀ ਹੋਤੀਤਿ? ਆਮਨ੍ਤਾ. ਦ੍ਵਿਨ੍ਨਂ ਫਸ੍ਸਾਨਂ…ਪੇ… ਦ੍ਵਿਨ੍ਨਂ ਚਿਤ੍ਤਾਨਂ ਸਮੋਧਾਨਂ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੫੪੮. ਨ ਵਤ੍ਤਬ੍ਬਂ – ‘‘ਆਨਿਸਂਸਦਸ੍ਸਾਵਿਸ੍ਸ ਸਂਯੋਜਨਾਨਂ ਪਹਾਨ’’ਨ੍ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਇਧ, ਭਿਕ੍ਖਵੇ, ਭਿਕ੍ਖੁ ਨਿਬ੍ਬਾਨੇ ਸੁਖਾਨੁਪਸ੍ਸੀ ਵਿਹਰਤਿ ਸੁਖਸਞ੍ਞੀ ਸੁਖਪਟਿਸਂਵੇਦੀ, ਸਤਤਂ ਸਮਿਤਂ ਅਬ੍ਬੋਕਿਣ੍ਣਂ ਚੇਤਸਾ ਅਧਿਮੁਚ੍ਚਮਾਨੋ ਪਞ੍ਞਾਯ ਪਰਿਯੋਗਾਹਮਾਨੋ’’ਤਿ [ਅ. ਨਿ. ੭.੧੯]! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਆਨਿਸਂਸਦਸ੍ਸਾਵਿਸ੍ਸ ਸਂਯੋਜਨਾਨਂ ਪਹਾਨਨ੍ਤਿ.

ਆਨਿਸਂਸਦਸ੍ਸਾਵੀਕਥਾ ਨਿਟ੍ਠਿਤਾ.

੯. ਨਵਮਵਗ੍ਗੋ

(੮੫) ੨. ਅਮਤਾਰਮ੍ਮਣਕਥਾ

੫੪੯. ਅਮਤਾਰਮ੍ਮਣਂ ਸਂਯੋਜਨਨ੍ਤਿ? ਆਮਨ੍ਤਾ. ਅਮਤਂ ਸਂਯੋਜਨਿਯਂ ਗਨ੍ਥਨਿਯਂ ਓਘਨਿਯਂ ਯੋਗਨਿਯਂ ਨੀਵਰਣਿਯਂ ਪਰਾਮਟ੍ਠਂ ਉਪਾਦਾਨਿਯਂ ਸਂਕਿਲੇਸਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਅਮਤਂ ਅਸਂਯੋਜਨਿਯਂ ਅਗਨ੍ਥਨਿਯਂ…ਪੇ… ਅਸਂਕਿਲੇਸਿਯਨ੍ਤਿ? ਆਮਨ੍ਤਾ. ਹਞ੍ਚਿ ਅਮਤਂ ਅਸਂਯੋਜਨਿਯਂ…ਪੇ… ਅਸਂਕਿਲੇਸਿਯਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਮਤਾਰਮ੍ਮਣਂ ਸਂਯੋਜਨ’’ਨ੍ਤਿ.

ਅਮਤਂ ਆਰਬ੍ਭ ਰਾਗੋ ਉਪ੍ਪਜ੍ਜਤੀਤਿ? ਆਮਨ੍ਤਾ. ਅਮਤਂ ਰਾਗਟ੍ਠਾਨਿਯਂ ਰਜਨਿਯਂ ਕਮਨਿਯਂ ਮਦਨਿਯਂ ਬਨ੍ਧਨਿਯਂ ਮੁਚ੍ਛਨਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਅਮਤਂ ਨ ਰਾਗਟ੍ਠਾਨਿਯਂ ਨ ਰਜਨਿਯਂ ਨ ਕਮਨਿਯਂ ਨ ਮਦਨਿਯਂ ਨ ਬਨ੍ਧਨਿਯਂ ਨ ਮੁਚ੍ਛਨਿਯਨ੍ਤਿ? ਆਮਨ੍ਤਾ. ਹਞ੍ਚਿ ਅਮਤਂ ਨ ਰਾਗਟ੍ਠਾਨਿਯਂ ਨ ਰਜਨਿਯਂ ਨ ਕਮਨਿਯਂ ਨ ਮਦਨਿਯਂ ਨ ਬਨ੍ਧਨਿਯਂ ਨ ਮੁਚ੍ਛਨਿਯਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਮਤਂ ਆਰਬ੍ਭ ਰਾਗੋ ਉਪ੍ਪਜ੍ਜਤੀ’’ਤਿ.

ਅਮਤਂ ਆਰਬ੍ਭ ਦੋਸੋ ਉਪ੍ਪਜ੍ਜਤੀਤਿ? ਆਮਨ੍ਤਾ. ਅਮਤਂ ਦੋਸਟ੍ਠਾਨਿਯਂ ਕੋਪਟ੍ਠਾਨਿਯਂ ਪਟਿਘਟ੍ਠਾਨਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਅਮਤਂ ਨ ਦੋਸਟ੍ਠਾਨਿਯਂ ਨ ਕੋਪਟ੍ਠਾਨਿਯਂ ਨ ਪਟਿਘਟ੍ਠਾਨਿਯਨ੍ਤਿ? ਆਮਨ੍ਤਾ. ਹਞ੍ਚਿ ਅਮਤਂ ਨ ਦੋਸਟ੍ਠਾਨਿਯਂ ਨ ਕੋਪਟ੍ਠਾਨਿਯਂ ਨ ਪਟਿਘਟ੍ਠਾਨਿਯਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਮਤਂ ਆਰਬ੍ਭ ਦੋਸੋ ਉਪ੍ਪਜ੍ਜਤੀ’’ਤਿ.

ਅਮਤਂ ਆਰਬ੍ਭ ਮੋਹੋ ਉਪ੍ਪਜ੍ਜਤੀਤਿ? ਆਮਨ੍ਤਾ. ਅਮਤਂ ਮੋਹਟ੍ਠਾਨਿਯਂ ਅਞ੍ਞਾਣਕਰਣਂ ਅਚਕ੍ਖੁਕਰਣਂ ਪਞ੍ਞਾਨਿਰੋਧਿਯਂ ਵਿਘਾਤਪਕ੍ਖਿਯਂ ਅਨਿਬ੍ਬਾਨਸਂਵਤ੍ਤਨਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਅਮਤਂ ਨ ਮੋਹਟ੍ਠਾਨਿਯਂ ਨ ਅਞ੍ਞਾਣਕਰਣਂ ਨ ਅਚਕ੍ਖੁਕਰਣਂ ਪਞ੍ਞਾਬੁਦ੍ਧਿਯਂ ਅਵਿਘਾਤਪਕ੍ਖਿਯਂ ਨਿਬ੍ਬਾਨਸਂਵਤ੍ਤਨਿਯਨ੍ਤਿ? ਆਮਨ੍ਤਾ. ਹਞ੍ਚਿ ਅਮਤਂ ਨ ਮੋਹਟ੍ਠਾਨਿਯਂ ਨ ਅਞ੍ਞਾਣਕਰਣਂ…ਪੇ… ਨਿਬ੍ਬਾਨਸਂਵਤ੍ਤਨਿਯਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਮਤਂ ਆਰਬ੍ਭ ਮੋਹੋ ਉਪ੍ਪਜ੍ਜਤੀ’’ਤਿ.

੫੫੦. ਰੂਪਂ ਆਰਬ੍ਭ ਸਂਯੋਜਨਾ ਉਪ੍ਪਜ੍ਜਨ੍ਤਿ, ਰੂਪਂ ਸਂਯੋਜਨਿਯਂ ਗਨ੍ਥਨਿਯਂ…ਪੇ… ਸਂਕਿਲੇਸਿਯਨ੍ਤਿ? ਆਮਨ੍ਤਾ. ਅਮਤਂ ਆਰਬ੍ਭ ਸਂਯੋਜਨਾ ਉਪ੍ਪਜ੍ਜਨ੍ਤਿ, ਅਮਤਂ ਸਂਯੋਜਨਿਯਂ…ਪੇ… ਸਂਕਿਲੇਸਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਰੂਪਂ ਆਰਬ੍ਭ ਰਾਗੋ ਉਪ੍ਪਜ੍ਜਤਿ, ਰੂਪਂ ਰਾਗਟ੍ਠਾਨਿਯਂ ਰਜਨਿਯਂ ਕਮਨਿਯਂ ਮਦਨਿਯਂ ਬਨ੍ਧਨਿਯਂ ਮੁਚ੍ਛਨਿਯਨ੍ਤਿ? ਆਮਨ੍ਤਾ. ਅਮਤਂ ਆਰਬ੍ਭ ਰਾਗੋ ਉਪ੍ਪਜ੍ਜਤਿ, ਅਮਤਂ ਰਾਗਟ੍ਠਾਨਿਯਂ…ਪੇ… ਮੁਚ੍ਛਨਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਰੂਪਂ ਆਰਬ੍ਭ ਦੋਸੋ ਉਪ੍ਪਜ੍ਜਤਿ, ਰੂਪਂ ਦੋਸਟ੍ਠਾਨਿਯਂ ਕੋਪਟ੍ਠਾਨਿਯਂ ਪਟਿਘਟ੍ਠਾਨਿਯਨ੍ਤਿ? ਆਮਨ੍ਤਾ. ਅਮਤਂ ਆਰਬ੍ਭ ਦੋਸੋ ਉਪ੍ਪਜ੍ਜਤਿ, ਅਮਤਂ ਦੋਸਟ੍ਠਾਨਿਯਂ ਕੋਪਟ੍ਠਾਨਿਯਂ ਪਟਿਘਟ੍ਠਾਨਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਰੂਪਂ ਆਰਬ੍ਭ ਮੋਹੋ ਉਪ੍ਪਜ੍ਜਤਿ, ਰੂਪਂ ਮੋਹਟ੍ਠਾਨਿਯਂ ਅਞ੍ਞਾਣਕਰਣਂ…ਪੇ… ਅਨਿਬ੍ਬਾਨਸਂਵਤ੍ਤਨਿਯਨ੍ਤਿ? ਆਮਨ੍ਤਾ. ਅਮਤਂ ਆਰਬ੍ਭ ਮੋਹੋ ਉਪ੍ਪਜ੍ਜਤਿ, ਅਮਤਂ ਮੋਹਟ੍ਠਾਨਿਯਂ ਅਞ੍ਞਾਣਕਰਣਂ…ਪੇ… ਅਨਿਬ੍ਬਾਨਸਂਵਤ੍ਤਨਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਮਤਂ ਆਰਬ੍ਭ ਸਂਯੋਜਨਾ ਉਪ੍ਪਜ੍ਜਨ੍ਤਿ, ਅਮਤਂ ਅਸਂਯੋਜਨਿਯਂ ਅਗਨ੍ਥਨਿਯਂ ਅਨੋਘਨਿਯਂ ਅਯੋਗਨਿਯਂ ਅਨੀਵਰਣਿਯਂ ਅਪਰਾਮਟ੍ਠਂ ਅਨੁਪਾਦਾਨਿਯਂ ਅਸਂਕਿਲੇਸਿਯਨ੍ਤਿ? ਆਮਨ੍ਤਾ. ਰੂਪਂ ਆਰਬ੍ਭ ਸਂਯੋਜਨਾ ਉਪ੍ਪਜ੍ਜਨ੍ਤਿ, ਰੂਪਂ ਅਸਂਯੋਜਨਿਯਂ ਅਗਨ੍ਥਨਿਯਂ…ਪੇ… ਅਸਂਕਿਲੇਸਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਮਤਂ ਆਰਬ੍ਭ ਰਾਗੋ ਉਪ੍ਪਜ੍ਜਤਿ, ਅਮਤਂ ਨ ਰਾਗਟ੍ਠਾਨਿਯਂ ਨ ਰਜਨਿਯਂ ਨ ਕਮਨਿਯਂ ਨ ਮਦਨਿਯਂ ਨ ਬਨ੍ਧਨਿਯਂ ਨ ਮੁਚ੍ਛਨਿਯਨ੍ਤਿ? ਆਮਨ੍ਤਾ. ਰੂਪਂ ਆਰਬ੍ਭ ਰਾਗੋ ਉਪ੍ਪਜ੍ਜਤਿ, ਰੂਪਂ ਨ ਰਾਗਟ੍ਠਾਨਿਯਂ…ਪੇ… ਨ ਮੁਚ੍ਛਨਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਮਤਂ ਆਰਬ੍ਭ ਦੋਸੋ ਉਪ੍ਪਜ੍ਜਤਿ, ਅਮਤਂ ਨ ਦੋਸਟ੍ਠਾਨਿਯਂ ਨ ਕੋਪਟ੍ਠਾਨਿਯਂ ਨ ਪਟਿਘਟ੍ਠਾਨਿਯਨ੍ਤਿ? ਆਮਨ੍ਤਾ. ਰੂਪਂ ਆਰਬ੍ਭ ਦੋਸੋ ਉਪ੍ਪਜ੍ਜਤਿ, ਰੂਪਂ ਨ ਦੋਸਟ੍ਠਾਨਿਯਂ ਨ ਕੋਪਟ੍ਠਾਨਿਯਂ ਨ ਪਟਿਘਟ੍ਠਾਨਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਮਤਂ ਆਰਬ੍ਭ ਮੋਹੋ ਉਪ੍ਪਜ੍ਜਤਿ, ਅਮਤਂ ਨ ਮੋਹਟ੍ਠਾਨਿਯਂ ਨ ਅਞ੍ਞਾਣਕਰਣਂ…ਪੇ… ਨਿਬ੍ਬਾਨਸਂਵਤ੍ਤਨਿਯਨ੍ਤਿ? ਆਮਨ੍ਤਾ. ਰੂਪਂ ਆਰਬ੍ਭ ਮੋਹੋ ਉਪ੍ਪਜ੍ਜਤਿ, ਰੂਪਂ ਨ ਮੋਹਟ੍ਠਾਨਿਯਂ ਨ ਅਞ੍ਞਾਣਕਰਣਂ…ਪੇ… ਨਿਬ੍ਬਾਨਸਂਵਤ੍ਤਨਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੫੫੧. ਨ ਵਤ੍ਤਬ੍ਬਂ – ‘‘ਅਮਤਾਰਮ੍ਮਣਂ ਸਂਯੋਜਨ’’ਨ੍ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਨਿਬ੍ਬਾਨਂ ਨਿਬ੍ਬਾਨਤੋ ਸਞ੍ਜਾਨਾਤਿ, ਨਿਬ੍ਬਾਨਂ ਨਿਬ੍ਬਾਨਤੋ ਸਞ੍ਜਾਨਿਤ੍ਵਾ ਨਿਬ੍ਬਾਨਂ ਮਞ੍ਞਤਿ, ਨਿਬ੍ਬਾਨਸ੍ਮਿਂ ਮਞ੍ਞਤਿ, ਨਿਬ੍ਬਾਨਤੋ ਮਞ੍ਞਤਿ, ਨਿਬ੍ਬਾਨਂ ਮੇਤਿ ਮਞ੍ਞਤਿ, ਨਿਬ੍ਬਾਨਂ ਅਭਿਨਨ੍ਦਤੀ’’ਤਿ [ਮ. ਨਿ. ੧.੬]! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਅਮਤਾਰਮ੍ਮਣਂ ਸਂਯੋਜਨਨ੍ਤਿ.

ਅਮਤਾਰਮ੍ਮਣਕਥਾ ਨਿਟ੍ਠਿਤਾ.

੯. ਨਵਮਵਗ੍ਗੋ

(੮੬) ੩. ਰੂਪਂ ਸਾਰਮ੍ਮਣਨ੍ਤਿਕਥਾ

੫੫੨. ਰੂਪਂ ਸਾਰਮ੍ਮਣਨ੍ਤਿ? ਆਮਨ੍ਤਾ. ਅਤ੍ਥਿ ਤਸ੍ਸ ਆਵਟ੍ਟਨਾ ਆਭੋਗੋ ਸਮਨ੍ਨਾਹਾਰੋ ਮਨਸਿਕਾਰੋ ਚੇਤਨਾ ਪਤ੍ਥਨਾ ਪਣਿਧੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਨਤ੍ਥਿ ਤਸ੍ਸ ਆਵਟ੍ਟਨਾ ਆਭੋਗੋ…ਪੇ… ਪਣਿਧੀਤਿ? ਆਮਨ੍ਤਾ. ਹਞ੍ਚਿ ਨਤ੍ਥਿ ਤਸ੍ਸ ਆਵਟ੍ਟਨਾ ਆਭੋਗੋ…ਪੇ… ਪਣਿਧਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਰੂਪਂ ਸਾਰਮ੍ਮਣ’’ਨ੍ਤਿ.

ਫਸ੍ਸੋ ਸਾਰਮ੍ਮਣੋ, ਅਤ੍ਥਿ ਤਸ੍ਸ ਆਵਟ੍ਟਨਾ ਆਭੋਗੋ…ਪੇ… ਪਣਿਧੀਤਿ? ਆਮਨ੍ਤਾ. ਰੂਪਂ ਸਾਰਮ੍ਮਣਂ, ਅਤ੍ਥਿ ਤਸ੍ਸ ਆਵਟ੍ਟਨਾ ਆਭੋਗੋ…ਪੇ… ਪਣਿਧੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਵੇਦਨਾ…ਪੇ… ਸਞ੍ਞਾ ਚੇਤਨਾ ਚਿਤ੍ਤਂ ਸਦ੍ਧਾ ਵੀਰਿਯਂ ਸਤਿ ਸਮਾਧਿ ਪਞ੍ਞਾ ਰਾਗੋ ਦੋਸੋ ਮੋਹੋ ਮਾਨੋ ਦਿਟ੍ਠਿ ਵਿਚਿਕਿਚ੍ਛਾ ਥਿਨਂ ਉਦ੍ਧਚ੍ਚਂ ਅਹਿਰਿਕਂ…ਪੇ… ਅਨੋਤ੍ਤਪ੍ਪਂ ਸਾਰਮ੍ਮਣਂ, ਅਤ੍ਥਿ ਤਸ੍ਸ ਆਵਟ੍ਟਨਾ ਆਭੋਗੋ…ਪੇ… ਪਣਿਧੀਤਿ? ਆਮਨ੍ਤਾ. ਰੂਪਂ ਸਾਰਮ੍ਮਣਂ, ਅਤ੍ਥਿ ਤਸ੍ਸ ਆਵਟ੍ਟਨਾ ਆਭੋਗੋ…ਪੇ… ਪਣਿਧੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਰੂਪਂ ਸਾਰਮ੍ਮਣਂ, ਨਤ੍ਥਿ ਤਸ੍ਸ ਆਵਟ੍ਟਨਾ ਆਭੋਗੋ…ਪੇ… ਪਣਿਧੀਤਿ? ਆਮਨ੍ਤਾ. ਫਸ੍ਸੋ ਸਾਰਮ੍ਮਣੋ, ਨਤ੍ਥਿ ਤਸ੍ਸ ਆਵਟ੍ਟਨਾ ਆਭੋਗੋ…ਪੇ… ਪਣਿਧੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਰੂਪਂ ਸਾਰਮ੍ਮਣਂ, ਨਤ੍ਥਿ ਤਸ੍ਸ ਆਵਟ੍ਟਨਾ ਆਭੋਗੋ…ਪੇ… ਪਣਿਧੀਤਿ? ਆਮਨ੍ਤਾ. ਵੇਦਨਾ…ਪੇ… ਅਨੋਤ੍ਤਪ੍ਪਂ ਸਾਰਮ੍ਮਣਂ, ਨਤ੍ਥਿ ਤਸ੍ਸ ਆਵਟ੍ਟਨਾ ਆਭੋਗੋ…ਪੇ… ਪਣਿਧੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੫੫੩. ਨ ਵਤ੍ਤਬ੍ਬਂ – ‘‘ਰੂਪਂ ਸਾਰਮ੍ਮਣ’’ਨ੍ਤਿ? ਆਮਨ੍ਤਾ. ਨਨੁ ਰੂਪਂ ਸਪ੍ਪਚ੍ਚਯਨ੍ਤਿ? ਆਮਨ੍ਤਾ. ਹਞ੍ਚਿ ਰੂਪਂ ਸਪ੍ਪਚ੍ਚਯਂ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਰੂਪਂ ਸਾਰਮ੍ਮਣ’’ਨ੍ਤਿ.

ਰੂਪਂ ਸਾਰਮ੍ਮਣਨ੍ਤਿਕਥਾ ਨਿਟ੍ਠਿਤਾ.

੯. ਨਵਮਵਗ੍ਗੋ

(੮੭) ੪. ਅਨੁਸਯਾ ਅਨਾਰਮ੍ਮਣਕਥਾ

੫੫੪. ਅਨੁਸਯਾ ਅਨਾਰਮ੍ਮਣਾਤਿ? ਆਮਨ੍ਤਾ. ਰੂਪਂ ਨਿਬ੍ਬਾਨਂ ਚਕ੍ਖਾਯਤਨਂ…ਪੇ… ਫੋਟ੍ਠਬ੍ਬਾਯਤਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਕਾਮਰਾਗਾਨੁਸਯੋ ਅਨਾਰਮ੍ਮਣੋਤਿ? ਆਮਨ੍ਤਾ. ਕਾਮਰਾਗੋ ਕਾਮਰਾਗਪਰਿਯੁਟ੍ਠਾਨਂ ਕਾਮਰਾਗਸਂਯੋਜਨਂ ਕਾਮੋਘੋ ਕਾਮਯੋਗੋ ਕਾਮਚ੍ਛਨ੍ਦਨੀਵਰਣਂ ਅਨਾਰਮ੍ਮਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਕਾਮਰਾਗੋ ਕਾਮਰਾਗਪਰਿਯੁਟ੍ਠਾਨਂ ਕਾਮਰਾਗਸਂਯੋਜਨਂ ਕਾਮੋਘੋ ਕਾਮਯੋਗੋ ਕਾਮਚ੍ਛਨ੍ਦਨੀਵਰਣਂ ਸਾਰਮ੍ਮਣਨ੍ਤਿ? ਆਮਨ੍ਤਾ. ਕਾਮਰਾਗਾਨੁਸਯੋ ਸਾਰਮ੍ਮਣੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਕਾਮਰਾਗਾਨੁਸਯੋ ਅਨਾਰਮ੍ਮਣੋਤਿ? ਆਮਨ੍ਤਾ. ਕਤਮਕ੍ਖਨ੍ਧਪਰਿਯਾਪਨ੍ਨੋਤਿ? ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨੋਤਿ. ਸਙ੍ਖਾਰਕ੍ਖਨ੍ਧੋ ਅਨਾਰਮ੍ਮਣੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਙ੍ਖਾਰਕ੍ਖਨ੍ਧੋ ਅਨਾਰਮ੍ਮਣੋਤਿ? ਆਮਨ੍ਤਾ. ਵੇਦਨਾਕ੍ਖਨ੍ਧੋ ਸਞ੍ਞਾਕ੍ਖਨ੍ਧੋ ਵਿਞ੍ਞਾਣਕ੍ਖਨ੍ਧੋ ਅਨਾਰਮ੍ਮਣੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਕਾਮਰਾਗਾਨੁਸਯੋ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨੋ ਅਨਾਰਮ੍ਮਣੋਤਿ? ਆਮਨ੍ਤਾ. ਕਾਮਰਾਗੋ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨੋ ਅਨਾਰਮ੍ਮਣੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਕਾਮਰਾਗੋ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨੋ ਸਾਰਮ੍ਮਣੋਤਿ? ਆਮਨ੍ਤਾ. ਕਾਮਰਾਗਾਨੁਸਯੋ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨੋ ਸਾਰਮ੍ਮਣੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਕਾਮਰਾਗਾਨੁਸਯੋ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨੋ ਅਨਾਰਮ੍ਮਣੋ, ਕਾਮਰਾਗੋ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨੋ ਸਾਰਮ੍ਮਣੋਤਿ? ਆਮਨ੍ਤਾ. ਸਙ੍ਖਾਰਕ੍ਖਨ੍ਧੋ ਏਕਦੇਸੋ ਸਾਰਮ੍ਮਣੋ ਏਕਦੇਸੋ ਅਨਾਰਮ੍ਮਣੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਙ੍ਖਾਰਕ੍ਖਨ੍ਧੋ ਏਕਦੇਸੋ ਸਾਰਮ੍ਮਣੋ ਏਕਦੇਸੋ ਅਨਾਰਮ੍ਮਣੋਤਿ? ਆਮਨ੍ਤਾ. ਵੇਦਨਾਕ੍ਖਨ੍ਧੋ ਸਞ੍ਞਾਕ੍ਖਨ੍ਧੋ ਵਿਞ੍ਞਾਣਕ੍ਖਨ੍ਧੋ ਏਕਦੇਸੋ ਸਾਰਮ੍ਮਣੋ ਏਕਦੇਸੋ ਅਨਾਰਮ੍ਮਣੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੫੫੫. ਪਟਿਘਾਨੁਸਯੋ ਮਾਨਾਨੁਸਯੋ ਦਿਟ੍ਠਾਨੁਸਯੋ ਵਿਚਿਕਿਚ੍ਛਾਨੁਸਯੋ ਭਵਰਾਗਾਨੁਸਯੋ ਅਵਿਜ੍ਜਾਨੁਸਯੋ ਅਨਾਰਮ੍ਮਣੋਤਿ? ਆਮਨ੍ਤਾ. ਅਵਿਜ੍ਜਾ ਅਵਿਜ੍ਜੋਘੋ ਅਵਿਜ੍ਜਾਯੋਗੋ ਅਵਿਜ੍ਜਾਨੁਸਯੋ ਅਵਿਜ੍ਜਾਪਰਿਯੁਟ੍ਠਾਨਂ ਅਵਿਜ੍ਜਾਸਂਯੋਜਨਂ ਅਵਿਜ੍ਜਾਨੀਵਰਣਂ ਅਨਾਰਮ੍ਮਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਵਿਜ੍ਜਾ ਅਵਿਜ੍ਜੋਘੋ…ਪੇ… ਅਵਿਜ੍ਜਾਨੀਵਰਣਂ ਸਾਰਮ੍ਮਣਨ੍ਤਿ? ਆਮਨ੍ਤਾ. ਅਵਿਜ੍ਜਾਨੁਸਯੋ ਸਾਰਮ੍ਮਣੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਵਿਜ੍ਜਾਨੁਸਯੋ ਅਨਾਰਮ੍ਮਣੋਤਿ? ਆਮਨ੍ਤਾ. ਕਤਮਕ੍ਖਨ੍ਧਪਰਿਯਾਪਨ੍ਨੋਤਿ? ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨੋਤਿ. ਸਙ੍ਖਾਰਕ੍ਖਨ੍ਧੋ ਅਨਾਰਮ੍ਮਣੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਙ੍ਖਾਰਕ੍ਖਨ੍ਧੋ ਅਨਾਰਮ੍ਮਣੋਤਿ? ਆਮਨ੍ਤਾ. ਵੇਦਨਾਕ੍ਖਨ੍ਧੋ ਸਞ੍ਞਾਕ੍ਖਨ੍ਧੋ ਵਿਞ੍ਞਾਣਕ੍ਖਨ੍ਧੋ ਅਨਾਰਮ੍ਮਣੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਵਿਜ੍ਜਾਨੁਸਯੋ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨੋ ਅਨਾਰਮ੍ਮਣੋਤਿ? ਆਮਨ੍ਤਾ. ਅਵਿਜ੍ਜਾ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਾ ਅਨਾਰਮ੍ਮਣਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਵਿਜ੍ਜਾ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਾ ਸਾਰਮ੍ਮਣਾਤਿ? ਆਮਨ੍ਤਾ. ਅਵਿਜ੍ਜਾਨੁਸਯੋ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨੋ ਸਾਰਮ੍ਮਣੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਵਿਜ੍ਜਾਨੁਸਯੋ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨੋ ਅਨਾਰਮ੍ਮਣੋ, ਅਵਿਜ੍ਜਾ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਾ ਸਾਰਮ੍ਮਣਾਤਿ? ਆਮਨ੍ਤਾ. ਸਙ੍ਖਾਰਕ੍ਖਨ੍ਧੋ ਏਕਦੇਸੋ ਸਾਰਮ੍ਮਣੋ ਏਕਦੇਸੋ ਅਨਾਰਮ੍ਮਣੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਙ੍ਖਾਰਕ੍ਖਨ੍ਧੋ ਏਕਦੇਸੋ ਸਾਰਮ੍ਮਣੋ ਏਕਦੇਸੋ ਅਨਾਰਮ੍ਮਣੋਤਿ? ਆਮਨ੍ਤਾ. ਵੇਦਨਾਕ੍ਖਨ੍ਧੋ ਸਞ੍ਞਾਕ੍ਖਨ੍ਧੋ ਵਿਞ੍ਞਾਣਕ੍ਖਨ੍ਧੋ ਏਕਦੇਸੋ ਸਾਰਮ੍ਮਣੋ ਏਕਦੇਸੋ ਅਨਾਰਮ੍ਮਣੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੫੫੬. ਨ ਵਤ੍ਤਬ੍ਬਂ – ‘‘ਅਨੁਸਯਾ ਅਨਾਰਮ੍ਮਣਾ’’ਤਿ? ਆਮਨ੍ਤਾ. ਪੁਥੁਜ੍ਜਨੋ ਕੁਸਲਾਬ੍ਯਾਕਤੇ ਚਿਤ੍ਤੇ ਵਤ੍ਤਮਾਨੇ ਸਾਨੁਸਯੋਤਿ ਵਤ੍ਤਬ੍ਬੋਤਿ? ਆਮਨ੍ਤਾ. ਅਤ੍ਥਿ ਤੇਸਂ ਅਨੁਸਯਾਨਂ ਆਰਮ੍ਮਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਤੇਨ ਹਿ ਅਨੁਸਯਾ ਅਨਾਰਮ੍ਮਣਾਤਿ. ਪੁਥੁਜ੍ਜਨੋ ਕੁਸਲਾਬ੍ਯਾਕਤੇ ਚਿਤ੍ਤੇ ਵਤ੍ਤਮਾਨੇ ਸਰਾਗੋਤਿ ਵਤ੍ਤਬ੍ਬੋਤਿ? ਆਮਨ੍ਤਾ. ਅਤ੍ਥਿ ਤਸ੍ਸ ਰਾਗਸ੍ਸ ਆਰਮ੍ਮਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ…. ਤੇਨ ਹਿ ਰਾਗੋ ਅਨਾਰਮ੍ਮਣੋਤਿ.

ਅਨੁਸਯਾ ਅਨਾਰਮ੍ਮਣਾਤਿਕਥਾ ਨਿਟ੍ਠਿਤਾ.

੯. ਨਵਮਵਗ੍ਗੋ

(੮੮) ੫. ਞਾਣਂ ਅਨਾਰਮ੍ਮਣਨ੍ਤਿਕਥਾ

੫੫੭. ਞਾਣਂ ਅਨਾਰਮ੍ਮਣਨ੍ਤਿ? ਆਮਨ੍ਤਾ. ਰੂਪਂ ਨਿਬ੍ਬਾਨਂ ਚਕ੍ਖਾਯਤਨਂ…ਪੇ… ਫੋਟ੍ਠਬ੍ਬਾਯਤਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਞਾਣਂ ਅਨਾਰਮ੍ਮਣਨ੍ਤਿ? ਆਮਨ੍ਤਾ. ਪਞ੍ਞਾ ਪਞ੍ਞਿਨ੍ਦ੍ਰਿਯਂ ਪਞ੍ਞਾਬਲਂ ਸਮ੍ਮਾਦਿਟ੍ਠਿ ਧਮ੍ਮਵਿਚਯਸਮ੍ਬੋਜ੍ਝਙ੍ਗੋ ਅਨਾਰਮ੍ਮਣੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪਞ੍ਞਾ ਪਞ੍ਞਿਨ੍ਦ੍ਰਿਯਂ ਪਞ੍ਞਾਬਲਂ ਸਮ੍ਮਾਦਿਟ੍ਠਿ ਧਮ੍ਮਵਿਚਯਸਮ੍ਬੋਜ੍ਝਙ੍ਗੋ ਸਾਰਮ੍ਮਣੋਤਿ? ਆਮਨ੍ਤਾ. ਞਾਣਂ ਸਾਰਮ੍ਮਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਞਾਣਂ ਅਨਾਰਮ੍ਮਣਨ੍ਤਿ? ਆਮਨ੍ਤਾ. ਕਤਮਕ੍ਖਨ੍ਧਪਰਿਯਾਪਨ੍ਨਨ੍ਤਿ? ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਨ੍ਤਿ. ਸਙ੍ਖਾਰਕ੍ਖਨ੍ਧੋ ਅਨਾਰਮ੍ਮਣੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਙ੍ਖਾਰਕ੍ਖਨ੍ਧੋ ਅਨਾਰਮ੍ਮਣੋਤਿ? ਆਮਨ੍ਤਾ. ਵੇਦਨਾਕ੍ਖਨ੍ਧੋ ਸਞ੍ਞਾਕ੍ਖਨ੍ਧੋ ਵਿਞ੍ਞਾਣਕ੍ਖਨ੍ਧੋ ਅਨਾਰਮ੍ਮਣੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਞਾਣਂ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਂ ਅਨਾਰਮ੍ਮਣਨ੍ਤਿ? ਆਮਨ੍ਤਾ. ਪਞ੍ਞਾ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਾ ਅਨਾਰਮ੍ਮਣਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪਞ੍ਞਾ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਾ ਸਾਰਮ੍ਮਣਾਤਿ? ਆਮਨ੍ਤਾ. ਞਾਣਂ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਂ ਸਾਰਮ੍ਮਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਞਾਣਂ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਂ ਅਨਾਰਮ੍ਮਣਂ, ਪਞ੍ਞਾ ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਾ ਸਾਰਮ੍ਮਣਾਤਿ? ਆਮਨ੍ਤਾ. ਸਙ੍ਖਾਰਕ੍ਖਨ੍ਧੋ ਏਕਦੇਸੋ ਸਾਰਮ੍ਮਣੋ ਏਕਦੇਸੋ ਅਨਾਰਮ੍ਮਣੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਙ੍ਖਾਰਕ੍ਖਨ੍ਧੋ ਏਕਦੇਸੋ ਸਾਰਮ੍ਮਣੋ ਏਕਦੇਸੋ ਅਨਾਰਮ੍ਮਣੋਤਿ? ਆਮਨ੍ਤਾ. ਵੇਦਨਾਕ੍ਖਨ੍ਧੋ ਸਞ੍ਞਾਕ੍ਖਨ੍ਧੋ ਵਿਞ੍ਞਾਣਕ੍ਖਨ੍ਧੋ ਏਕਦੇਸੋ ਸਾਰਮ੍ਮਣੋ ਏਕਦੇਸੋ ਅਨਾਰਮ੍ਮਣੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੫੫੮. ਨ ਵਤ੍ਤਬ੍ਬਂ – ‘‘ਞਾਣਂ ਅਨਾਰਮ੍ਮਣ’’ਨ੍ਤਿ? ਆਮਨ੍ਤਾ. ਅਰਹਾ ਚਕ੍ਖੁਵਿਞ੍ਞਾਣਸਮਙ੍ਗੀ ਞਾਣੀਤਿ ਵਤ੍ਤਬ੍ਬੋਤਿ? ਆਮਨ੍ਤਾ. ਅਤ੍ਥਿ ਤਸ੍ਸ ਞਾਣਸ੍ਸ ਆਰਮ੍ਮਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਤੇਨ ਹਿ ਞਾਣਂ ਅਨਾਰਮ੍ਮਣਨ੍ਤਿ. ਅਰਹਾ ਚਕ੍ਖੁਵਿਞ੍ਞਾਣਸਮਙ੍ਗੀ ਪਞ੍ਞਵਾਤਿ ਵਤ੍ਤਬ੍ਬੋਤਿ? ਆਮਨ੍ਤਾ. ਅਤ੍ਥਿ ਤਾਯ ਪਞ੍ਞਾਯ ਆਰਮ੍ਮਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ…. ਤੇਨ ਹਿ ਪਞ੍ਞਾ ਅਨਾਰਮ੍ਮਣਾਤਿ.

ਞਾਣਂ ਅਨਾਰਮ੍ਮਣਨ੍ਤਿਕਥਾ ਨਿਟ੍ਠਿਤਾ.

੯. ਨਵਮਵਗ੍ਗੋ

(੮੯) ੬. ਅਤੀਤਾਨਾਗਤਾਰਮ੍ਮਣਕਥਾ

੫੫੯. ਅਤੀਤਾਰਮ੍ਮਣਂ ਚਿਤ੍ਤਂ ਅਨਾਰਮ੍ਮਣਨ੍ਤਿ? ਆਮਨ੍ਤਾ. ਨਨੁ ਅਤੀਤਾਰਮ੍ਮਣਨ੍ਤਿ? ਆਮਨ੍ਤਾ. ਹਞ੍ਚਿ ਅਤੀਤਾਰਮ੍ਮਣਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਤੀਤਾਰਮ੍ਮਣਂ ਚਿਤ੍ਤਂ ਅਨਾਰਮ੍ਮਣ’’ਨ੍ਤਿ. ਅਤੀਤਾਰਮ੍ਮਣਂ ਚਿਤ੍ਤਂ ਅਨਾਰਮ੍ਮਣਨ੍ਤਿ ਮਿਚ੍ਛਾ. ਹਞ੍ਚਿ ਵਾ ਪਨ ਅਨਾਰਮ੍ਮਣਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਤੀਤਾਰਮ੍ਮਣ’’ਨ੍ਤਿ. ਅਨਾਰਮ੍ਮਣਂ ਅਤੀਤਾਰਮ੍ਮਣਨ੍ਤਿ ਮਿਚ੍ਛਾ.

ਅਤੀਤਾਰਮ੍ਮਣਂ ਚਿਤ੍ਤਂ ਅਨਾਰਮ੍ਮਣਨ੍ਤਿ? ਆਮਨ੍ਤਾ. ਨਨੁ ਅਤੀਤਂ ਆਰਬ੍ਭ ਅਤ੍ਥਿ ਆਵਟ੍ਟਨਾ…ਪੇ… ਪਣਿਧੀਤਿ? ਆਮਨ੍ਤਾ. ਹਞ੍ਚਿ ਅਤੀਤਂ ਆਰਬ੍ਭ ਅਤ੍ਥਿ ਆਵਟ੍ਟਨਾ…ਪੇ… ਪਣਿਧਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਤੀਤਾਰਮ੍ਮਣਂ ਚਿਤ੍ਤਂ ਅਨਾਰਮ੍ਮਣ’’ਨ੍ਤਿ.

੫੬੦. ਅਨਾਗਤਾਰਮ੍ਮਣਂ ਚਿਤ੍ਤਂ ਅਨਾਰਮ੍ਮਣਨ੍ਤਿ? ਆਮਨ੍ਤਾ. ਨਨੁ ਅਨਾਗਤਾਰਮ੍ਮਣਨ੍ਤਿ? ਆਮਨ੍ਤਾ. ਹਞ੍ਚਿ ਅਨਾਗਤਾਰਮ੍ਮਣਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਨਾਗਤਾਰਮ੍ਮਣਂ ਚਿਤ੍ਤਂ ਅਨਾਰਮ੍ਮਣ’’ਨ੍ਤਿ. ਅਨਾਗਤਾਰਮ੍ਮਣਂ ਚਿਤ੍ਤਂ ਅਨਾਰਮ੍ਮਣਨ੍ਤਿ ਮਿਚ੍ਛਾ. ਹਞ੍ਚਿ ਵਾ ਪਨ ਅਨਾਰਮ੍ਮਣਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਨਾਗਤਾਰਮ੍ਮਣ’’ਨ੍ਤਿ. ਅਨਾਰਮ੍ਮਣਂ ਅਨਾਗਤਾਰਮ੍ਮਣਨ੍ਤਿ ਮਿਚ੍ਛਾ.

ਅਨਾਗਤਾਰਮ੍ਮਣਂ ਚਿਤ੍ਤਂ ਅਨਾਰਮ੍ਮਣਨ੍ਤਿ? ਆਮਨ੍ਤਾ. ਨਨੁ ਅਨਾਗਤਂ ਆਰਬ੍ਭ ਅਤ੍ਥਿ ਆਵਟ੍ਟਨਾ…ਪੇ… ਪਣਿਧੀਤਿ? ਆਮਨ੍ਤਾ. ਹਞ੍ਚਿ ਅਨਾਗਤਂ ਆਰਬ੍ਭ ਅਤ੍ਥਿ ਆਵਟ੍ਟਨਾ…ਪੇ… ਪਣਿਧਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਨਾਗਤਾਰਮ੍ਮਣਂ ਚਿਤ੍ਤਂ ਅਨਾਰਮ੍ਮਣ’’ਨ੍ਤਿ.

ਪਚ੍ਚੁਪ੍ਪਨ੍ਨਂ ਆਰਬ੍ਭ ਅਤ੍ਥਿ ਆਵਟ੍ਟਨਾ…ਪੇ… ਪਣਿਧਿ, ਪਚ੍ਚੁਪ੍ਪਨ੍ਨਾਰਮ੍ਮਣਂ ਚਿਤ੍ਤਂ ਸਾਰਮ੍ਮਣਨ੍ਤਿ? ਆਮਨ੍ਤਾ. ਅਤੀਤਂ ਆਰਬ੍ਭ ਅਤ੍ਥਿ ਆਵਟ੍ਟਨਾ…ਪੇ… ਪਣਿਧਿ, ਅਤੀਤਾਰਮ੍ਮਣਂ ਚਿਤ੍ਤਂ ਸਾਰਮ੍ਮਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪਚ੍ਚੁਪ੍ਪਨ੍ਨਂ ਆਰਬ੍ਭ ਅਤ੍ਥਿ ਆਵਟ੍ਟਨਾ…ਪੇ… ਪਣਿਧਿ, ਪਚ੍ਚੁਪ੍ਪਨ੍ਨਾਰਮ੍ਮਣਂ ਚਿਤ੍ਤਂ ਸਾਰਮ੍ਮਣਨ੍ਤਿ? ਆਮਨ੍ਤਾ. ਅਨਾਗਤਂ ਆਰਬ੍ਭ ਅਤ੍ਥਿ ਆਵਟ੍ਟਨਾ…ਪੇ… ਪਣਿਧਿ, ਅਨਾਗਤਾਰਮ੍ਮਣਂ ਚਿਤ੍ਤਂ ਸਾਰਮ੍ਮਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਤੀਤਂ ਆਰਬ੍ਭ ਅਤ੍ਥਿ ਆਵਟ੍ਟਨਾ…ਪੇ… ਪਣਿਧਿ, ਅਤੀਤਾਰਮ੍ਮਣਂ ਚਿਤ੍ਤਂ ਅਨਾਰਮ੍ਮਣਨ੍ਤਿ? ਆਮਨ੍ਤਾ. ਪਚ੍ਚੁਪ੍ਪਨ੍ਨਂ ਆਰਬ੍ਭ ਅਤ੍ਥਿ ਆਵਟ੍ਟਨਾ…ਪੇ… ਪਣਿਧਿ, ਪਚ੍ਚੁਪ੍ਪਨ੍ਨਾਰਮ੍ਮਣਂ ਚਿਤ੍ਤਂ ਅਨਾਰਮ੍ਮਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਨਾਗਤਂ ਆਰਬ੍ਭ ਅਤ੍ਥਿ ਆਵਟ੍ਟਨਾ…ਪੇ… ਪਣਿਧਿ, ਅਨਾਗਤਾਰਮ੍ਮਣਂ ਚਿਤ੍ਤਂ ਅਨਾਰਮ੍ਮਣਨ੍ਤਿ? ਆਮਨ੍ਤਾ. ਪਚ੍ਚੁਪ੍ਪਨ੍ਨਂ ਆਰਬ੍ਭ ਅਤ੍ਥਿ ਆਵਟ੍ਟਨਾ…ਪੇ… ਪਣਿਧਿ, ਪਚ੍ਚੁਪ੍ਪਨ੍ਨਾਰਮ੍ਮਣਂ ਚਿਤ੍ਤਂ ਅਨਾਰਮ੍ਮਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੫੬੧. ਨ ਵਤ੍ਤਬ੍ਬਂ – ‘‘ਅਤੀਤਾਨਾਗਤਾਰਮ੍ਮਣਂ ਚਿਤ੍ਤਂ ਅਨਾਰਮ੍ਮਣ’’ਨ੍ਤਿ? ਆਮਨ੍ਤਾ. ਨਨੁ ਅਤੀਤਾਨਾਗਤਂ ਨਤ੍ਥੀਤਿ? ਆਮਨ੍ਤਾ. ਹਞ੍ਚਿ ਅਤੀਤਾਨਾਗਤਂ ਨਤ੍ਥਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਅਤੀਤਾਨਾਗਤਾਰਮ੍ਮਣਂ ਚਿਤ੍ਤਂ ਅਨਾਰਮ੍ਮਣ’’ਨ੍ਤਿ…ਪੇ….

ਅਤੀਤਾਨਾਗਤਾਰਮ੍ਮਣਕਥਾ ਨਿਟ੍ਠਿਤਾ.

੯. ਨਵਮਵਗ੍ਗੋ

(੯੦) ੭. ਵਿਤਕ੍ਕਾਨੁਪਤਿਤਕਥਾ

੫੬੨. ਸਬ੍ਬਂ ਚਿਤ੍ਤਂ ਵਿਤਕ੍ਕਾਨੁਪਤਿਤਨ੍ਤਿ? ਆਮਨ੍ਤਾ. ਸਬ੍ਬਂ ਚਿਤ੍ਤਂ ਵਿਚਾਰਾਨੁਪਤਿਤਂ ਪੀਤਾਨੁਪਤਿਤਂ ਸੁਖਾਨੁਪਤਿਤਂ ਦੁਕ੍ਖਾਨੁਪਤਿਤਂ ਸੋਮਨਸ੍ਸਾਨੁਪਤਿਤਂ ਦੋਮਨਸ੍ਸਾਨੁਪਤਿਤਂ ਉਪੇਕ੍ਖਾਨੁਪਤਿਤਂ ਸਦ੍ਧਾਨੁਪਤਿਤਂ ਵੀਰਿਯਾਨੁਪਤਿਤਂ ਸਤਾਨੁਪਤਿਤਂ ਸਮਾਧਾਨੁਪਤਿਤਂ ਪਞ੍ਞਾਨੁਪਤਿਤਂ ਰਾਗਾਨੁਪਤਿਤਂ ਦੋਸਾਨੁਪਤਿਤਂ…ਪੇ… ਅਨੋਤ੍ਤਪ੍ਪਾਨੁਪਤਿਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਬ੍ਬਂ ਚਿਤ੍ਤਂ ਵਿਤਕ੍ਕਾਨੁਪਤਿਤਨ੍ਤਿ? ਆਮਨ੍ਤਾ. ਨਨੁ ਅਤ੍ਥਿ ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧੀਤਿ? ਆਮਨ੍ਤਾ. ਹਞ੍ਚਿ ਅਤ੍ਥਿ ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਸਬ੍ਬਂ ਚਿਤ੍ਤਂ ਵਿਤਕ੍ਕਾਨੁਪਤਿਤ’’ਨ੍ਤਿ.

ਸਬ੍ਬਂ ਚਿਤ੍ਤਂ ਵਿਤਕ੍ਕਾਨੁਪਤਿਤਨ੍ਤਿ? ਆਮਨ੍ਤਾ. ਨਨੁ ਅਤ੍ਥਿ ਅਵਿਤਕ੍ਕੋ ਅਵਿਚਾਰੋ ਸਮਾਧੀਤਿ? ਆਮਨ੍ਤਾ. ਹਞ੍ਚਿ ਅਤ੍ਥਿ ਅਵਿਤਕ੍ਕੋ ਅਵਿਚਾਰੋ ਸਮਾਧਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਸਬ੍ਬਂ ਚਿਤ੍ਤਂ ਵਿਤਕ੍ਕਾਨੁਪਤਿਤ’’ਨ੍ਤਿ. ਸਬ੍ਬਂ ਚਿਤ੍ਤਂ ਵਿਤਕ੍ਕਾਨੁਪਤਿਤਨ੍ਤਿ? ਆਮਨ੍ਤਾ. ਨਨੁ ਤਯੋ ਸਮਾਧੀ ਵੁਤ੍ਤਾ ਭਗਵਤਾ – ਸਵਿਤਕ੍ਕੋ ਸਵਿਚਾਰੋ ਸਮਾਧਿ, ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧਿ, ਅਵਿਤਕ੍ਕੋ ਅਵਿਚਾਰੋ ਸਮਾਧੀਤਿ [ਦੀ. ਨਿ. ੩.੩੦੫, ੩੫੩]? ਆਮਨ੍ਤਾ. ਹਞ੍ਚਿ ਤਯੋ ਸਮਾਧੀ ਵੁਤ੍ਤਾ ਭਗਵਤਾ – ਸਵਿਤਕ੍ਕੋ ਸਵਿਚਾਰੋ ਸਮਾਧਿ, ਅਵਿਤਕ੍ਕੋ ਵਿਚਾਰਮਤ੍ਤੋ ਸਮਾਧਿ, ਅਵਿਤਕ੍ਕੋ ਅਵਿਚਾਰੋ ਸਮਾਧਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਸਬ੍ਬਂ ਚਿਤ੍ਤਂ ਵਿਤਕ੍ਕਾਨੁਪਤਿਤ’’ਨ੍ਤਿ.

ਵਿਤਕ੍ਕਾਨੁਪਤਿਤਕਥਾ ਨਿਟ੍ਠਿਤਾ.

੯. ਨਵਮਵਗ੍ਗੋ

(੯੧) ੮. ਵਿਤਕ੍ਕਵਿਪ੍ਫਾਰਸਦ੍ਦਕਥਾ

੫੬੩. ਸਬ੍ਬਸੋ ਵਿਤਕ੍ਕਯਤੋ ਵਿਚਾਰਯਤੋ ਵਿਤਕ੍ਕਵਿਪ੍ਫਾਰੋ ਸਦ੍ਦੋਤਿ? ਆਮਨ੍ਤਾ. ਸਬ੍ਬਸੋ ਫੁਸਯਤੋ ਫਸ੍ਸਵਿਪ੍ਫਾਰੋ ਸਦ੍ਦੋ, ਸਬ੍ਬਸੋ ਵੇਦਯਤੋ ਵੇਦਨਾਵਿਪ੍ਫਾਰੋ ਸਦ੍ਦੋ, ਸਬ੍ਬਸੋ ਸਞ੍ਜਾਨਤੋ ਸਞ੍ਞਾਵਿਪ੍ਫਾਰੋ ਸਦ੍ਦੋ, ਸਬ੍ਬਸੋ ਚੇਤਯਤੋ ਚੇਤਨਾਵਿਪ੍ਫਾਰੋ ਸਦ੍ਦੋ, ਸਬ੍ਬਸੋ ਚਿਨ੍ਤਯਤੋ ਚਿਤ੍ਤਵਿਪ੍ਫਾਰੋ ਸਦ੍ਦੋ, ਸਬ੍ਬਸੋ ਸਰਤੋ ਸਤਿਵਿਪ੍ਫਾਰੋ ਸਦ੍ਦੋ, ਸਬ੍ਬਸੋ ਪਜਾਨਤੋ ਪਞ੍ਞਾਵਿਪ੍ਫਾਰੋ ਸਦ੍ਦੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਬ੍ਬਸੋ ਵਿਤਕ੍ਕਯਤੋ ਵਿਚਾਰਯਤੋ ਵਿਤਕ੍ਕਵਿਪ੍ਫਾਰੋ ਸਦ੍ਦੋਤਿ? ਆਮਨ੍ਤਾ. ਵਿਤਕ੍ਕਵਿਪ੍ਫਾਰੋ ਸਦ੍ਦੋ ਸੋਤਵਿਞ੍ਞੇਯ੍ਯੋ ਸੋਤਸ੍ਮਿਂ ਪਟਿਹਞ੍ਞਤਿ ਸੋਤਸ੍ਸ ਆਪਾਥਂ ਆਗਚ੍ਛਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ…. ਨਨੁ ਵਿਤਕ੍ਕਵਿਪ੍ਫਾਰੋ ਸਦ੍ਦੋ ਨ ਸੋਤਵਿਞ੍ਞੇਯ੍ਯੋ ਨ ਸੋਤਸ੍ਮਿਂ ਪਟਿਹਞ੍ਞਤਿ ਨ ਸੋਤਸ੍ਸ ਆਪਾਥਂ ਆਗਚ੍ਛਤੀਤਿ? ਆਮਨ੍ਤਾ. ਹਞ੍ਚਿ ਵਿਤਕ੍ਕਵਿਪ੍ਫਾਰੋ ਸਦ੍ਦੋ ਨ ਸੋਤਵਿਞ੍ਞੇਯ੍ਯੋ ਨ ਸੋਤਸ੍ਮਿਂ ਪਟਿਹਞ੍ਞਤਿ ਨ ਸੋਤਸ੍ਸ ਆਪਾਥਂ ਆਗਚ੍ਛਤਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਸਬ੍ਬਸੋ ਵਿਤਕ੍ਕਯਤੋ ਵਿਚਾਰਯਤੋ ਵਿਤਕ੍ਕਵਿਪ੍ਫਾਰੋ ਸਦ੍ਦੋ’’ਤਿ.

ਵਿਤਕ੍ਕਵਿਪ੍ਫਾਰਸਦ੍ਦਕਥਾ ਨਿਟ੍ਠਿਤਾ.

੯. ਨਵਮਵਗ੍ਗੋ

(੯੨) ੯. ਨ ਯਥਾਚਿਤ੍ਤਸ੍ਸ ਵਾਚਾਤਿਕਥਾ

੫੬੪. ਨ ਯਥਾਚਿਤ੍ਤਸ੍ਸ ਵਾਚਾਤਿ? ਆਮਨ੍ਤਾ. ਅਫਸ੍ਸਕਸ੍ਸ ਵਾਚਾ ਅਵੇਦਨਕਸ੍ਸ ਵਾਚਾ ਅਸਞ੍ਞਕਸ੍ਸ ਵਾਚਾ ਅਚੇਤਨਕਸ੍ਸ ਵਾਚਾ ਅਚਿਤ੍ਤਕਸ੍ਸ ਵਾਚਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਸਫਸ੍ਸਕਸ੍ਸ ਵਾਚਾ ਸਵੇਦਨਕਸ੍ਸ ਵਾਚਾ ਸਸਞ੍ਞਕਸ੍ਸ ਵਾਚਾ ਸਚੇਤਨਕਸ੍ਸ ਵਾਚਾ ਸਚਿਤ੍ਤਕਸ੍ਸ ਵਾਚਾਤਿ? ਆਮਨ੍ਤਾ. ਹਞ੍ਚਿ ਸਫਸ੍ਸਕਸ੍ਸ ਵਾਚਾ…ਪੇ… ਸਚਿਤ੍ਤਕਸ੍ਸ ਵਾਚਾ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਨ ਯਥਾਚਿਤ੍ਤਸ੍ਸ ਵਾਚਾ’’ਤਿ.

ਨ ਯਥਾਚਿਤ੍ਤਸ੍ਸ ਵਾਚਾਤਿ? ਆਮਨ੍ਤਾ. ਅਨਾਵਟ੍ਟੇਨ੍ਤਸ੍ਸ [ਅਨਾਵਟ੍ਟਨ੍ਤਸ੍ਸ (ਪੀ.), ਅਨਾਵਜ੍ਜਨ੍ਤਸ੍ਸ (ਸੀ. ਸ੍ਯਾ. ਕ.) ਕਥਾ. ੪੮੪ ਪਸ੍ਸਿਤਬ੍ਬਂ] ਵਾਚਾ…ਪੇ… ਅਨਾਭੋਗਸ੍ਸ ਵਾਚਾ…ਪੇ… ਅਪ੍ਪਣਿਦਹਨ੍ਤਸ੍ਸ ਵਾਚਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਆਵਟ੍ਟੇਨ੍ਤਸ੍ਸ ਵਾਚਾ ਆਭੋਗਸ੍ਸ ਵਾਚਾ…ਪੇ… ਪਣਿਦਹਨ੍ਤਸ੍ਸ ਵਾਚਾਤਿ? ਆਮਨ੍ਤਾ. ਹਞ੍ਚਿ ਆਵਟ੍ਟੇਨ੍ਤਸ੍ਸ ਵਾਚਾ ਆਭੋਗਸ੍ਸ ਵਾਚਾ ਪਣਿਦਹਨ੍ਤਸ੍ਸ ਵਾਚਾ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਨ ਯਥਾਚਿਤ੍ਤਸ੍ਸ ਵਾਚਾ’’ਤਿ.

ਨ ਯਥਾਚਿਤ੍ਤਸ੍ਸ ਵਾਚਾਤਿ? ਆਮਨ੍ਤਾ. ਨਨੁ ਵਾਚਾ ਚਿਤ੍ਤਸਮੁਟ੍ਠਾਨਾ ਚਿਤ੍ਤੇਨ ਸਹਜਾਤਾ ਚਿਤ੍ਤੇਨ ਸਹ ਏਕੁਪ੍ਪਾਦਾਤਿ? ਆਮਨ੍ਤਾ. ਹਞ੍ਚਿ ਵਾਚਾ ਚਿਤ੍ਤਸਮੁਟ੍ਠਾਨਾ ਚਿਤ੍ਤੇਨ ਸਹਜਾਤਾ ਚਿਤ੍ਤੇਨ ਸਹ ਏਕੁਪ੍ਪਾਦਾ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਨ ਯਥਾਚਿਤ੍ਤਸ੍ਸ ਵਾਚਾ’’ਤਿ.

ਨ ਯਥਾਚਿਤ੍ਤਸ੍ਸ ਵਾਚਾਤਿ? ਆਮਨ੍ਤਾ. ਨ ਭਣਿਤੁਕਾਮੋ ਭਣਤਿ, ਨ ਕਥੇਤੁਕਾਮੋ ਕਥੇਤਿ, ਨ ਆਲਪਿਤੁਕਾਮੋ ਆਲਪਤਿ, ਨ ਵੋਹਰਿਤੁਕਾਮੋ ਵੋਹਰਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਭਣਿਤੁਕਾਮੋ ਭਣਤਿ, ਕਥੇਤੁਕਾਮੋ ਕਥੇਤਿ, ਆਲਪਿਤੁਕਾਮੋ ਆਲਪਤਿ, ਵੋਹਰਿਤੁਕਾਮੋ ਵੋਹਰਤੀਤਿ? ਆਮਨ੍ਤਾ. ਹਞ੍ਚਿ ਭਣਿਤੁਕਾਮੋ ਭਣਤਿ, ਕਥੇਤੁਕਾਮੋ ਕਥੇਤਿ, ਆਲਪਿਤੁਕਾਮੋ ਆਲਪਤਿ, ਵੋਹਰਿਤੁਕਾਮੋ ਵੋਹਰਤਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਨ ਯਥਾਚਿਤ੍ਤਸ੍ਸ ਵਾਚਾ’’ਤਿ.

੫੬੫. ਨ ਵਤ੍ਤਬ੍ਬਂ – ‘‘ਨ ਯਥਾਚਿਤ੍ਤਸ੍ਸ ਵਾਚਾ’’ਤਿ? ਆਮਨ੍ਤਾ. ਨਨੁ ਅਤ੍ਥਿ ਕੋਚਿ ‘‘ਅਞ੍ਞਂ ਭਣਿਸ੍ਸਾਮੀ’’ਤਿ ਅਞ੍ਞਂ ਭਣਤਿ, ‘‘ਅਞ੍ਞਂ ਕਥੇਸ੍ਸਾਮੀ’’ਤਿ ਅਞ੍ਞਂ ਕਥੇਤਿ, ‘‘ਅਞ੍ਞਂ ਆਲਪਿਸ੍ਸਾਮੀ’’ਤਿ ਅਞ੍ਞਂ ਆਲਪਤਿ, ‘‘ਅਞ੍ਞਂ ਵੋਹਰਿਸ੍ਸਾਮੀ’’ਤਿ ਅਞ੍ਞਂ ਵੋਹਰਤੀਤਿ? ਆਮਨ੍ਤਾ. ਹਞ੍ਚਿ ਅਤ੍ਥਿ ਕੋਚਿ ‘‘ਅਞ੍ਞਂ ਭਣਿਸ੍ਸਾਮੀ’’ਤਿ ਅਞ੍ਞਂ ਭਣਤਿ,…ਪੇ… ‘‘ਅਞ੍ਞਂ ਵੋਹਰਿਸ੍ਸਾਮੀ’’ਤਿ ਅਞ੍ਞਂ ਵੋਹਰਤਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਨ ਯਥਾਚਿਤ੍ਤਸ੍ਸ ਵਾਚਾ’’ਤਿ.

ਨ ਯਥਾਚਿਤ੍ਤਸ੍ਸ ਵਾਚਾਤਿਕਥਾ ਨਿਟ੍ਠਿਤਾ.

੯. ਨਵਮਵਗ੍ਗੋ

(੯੩) ੧੦. ਨ ਯਥਾਚਿਤ੍ਤਸ੍ਸ ਕਾਯਕਮ੍ਮਨ੍ਤਿਕਥਾ

੫੬੬. ਨ ਯਥਾਚਿਤ੍ਤਸ੍ਸ ਕਾਯਕਮ੍ਮਨ੍ਤਿ? ਆਮਨ੍ਤਾ. ਅਫਸ੍ਸਕਸ੍ਸ ਕਾਯਕਮ੍ਮਂ…ਪੇ… ਅਚਿਤ੍ਤਕਸ੍ਸ ਕਾਯਕਮ੍ਮਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਸਫਸ੍ਸਕਸ੍ਸ ਕਾਯਕਮ੍ਮਂ…ਪੇ… ਸਚਿਤ੍ਤਕਸ੍ਸ ਕਾਯਕਮ੍ਮਨ੍ਤਿ? ਆਮਨ੍ਤਾ. ਹਞ੍ਚਿ ਸਫਸ੍ਸਕਸ੍ਸ ਕਾਯਕਮ੍ਮਂ…ਪੇ… ਸਚਿਤ੍ਤਕਸ੍ਸ ਕਾਯਕਮ੍ਮਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਨ ਯਥਾਚਿਤ੍ਤਸ੍ਸ ਕਾਯਕਮ੍ਮ’’ਨ੍ਤਿ.

ਨ ਯਥਾਚਿਤ੍ਤਸ੍ਸ ਕਾਯਕਮ੍ਮਨ੍ਤਿ? ਆਮਨ੍ਤਾ. ਅਨਾਵਟ੍ਟੇਨ੍ਤਸ੍ਸ ਕਾਯਕਮ੍ਮਂ…ਪੇ… ਅਪ੍ਪਣਿਦਹਨ੍ਤਸ੍ਸ ਕਾਯਕਮ੍ਮਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਆਵਟ੍ਟੇਨ੍ਤਸ੍ਸ ਕਾਯਕਮ੍ਮਂ…ਪੇ… ਪਣਿਦਹਨ੍ਤਸ੍ਸ ਕਾਯਕਮ੍ਮਨ੍ਤਿ? ਆਮਨ੍ਤਾ. ਹਞ੍ਚਿ ਆਵਟ੍ਟੇਨ੍ਤਸ੍ਸ ਕਾਯਕਮ੍ਮਂ…ਪੇ… ਪਣਿਦਹਨ੍ਤਸ੍ਸ ਕਾਯਕਮ੍ਮਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਨ ਯਥਾਚਿਤ੍ਤਸ੍ਸ ਕਾਯਕਮ੍ਮ’’ਨ੍ਤਿ.

ਨ ਯਥਾਚਿਤ੍ਤਸ੍ਸ ਕਾਯਕਮ੍ਮਨ੍ਤਿ? ਆਮਨ੍ਤਾ. ਨਨੁ ਕਾਯਕਮ੍ਮਂ ਚਿਤ੍ਤਸਮੁਟ੍ਠਾਨਂ ਚਿਤ੍ਤੇਨ ਸਹਜਾਤਂ ਚਿਤ੍ਤੇਨ ਸਹ ਏਕੁਪ੍ਪਾਦਨ੍ਤਿ? ਆਮਨ੍ਤਾ. ਹਞ੍ਚਿ ਕਾਯਕਮ੍ਮਂ ਚਿਤ੍ਤਸਮੁਟ੍ਠਾਨਂ ਚਿਤ੍ਤੇਨ ਸਹਜਾਤਂ ਚਿਤ੍ਤੇਨ ਸਹ ਏਕੁਪ੍ਪਾਦਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਨ ਯਥਾਚਿਤ੍ਤਸ੍ਸ ਕਾਯਕਮ੍ਮ’’ਨ੍ਤਿ.

ਨ ਯਥਾਚਿਤ੍ਤਸ੍ਸ ਕਾਯਕਮ੍ਮਨ੍ਤਿ? ਆਮਨ੍ਤਾ. ਨ ਅਭਿਕ੍ਕਮਿਤੁਕਾਮੋ ਅਭਿਕ੍ਕਮਤਿ, ਨ ਪਟਿਕ੍ਕਮਿਤੁਕਾਮੋ ਪਟਿਕ੍ਕਮਤਿ, ਨ ਆਲੋਕੇਤੁਕਾਮੋ ਆਲੋਕੇਤਿ, ਨ ਵਿਲੋਕੇਤੁਕਾਮੋ ਵਿਲੋਕੇਤਿ, ਨ ਸਮਿਞ੍ਜਿਤੁਕਾਮੋ ਸਮਿਞ੍ਜੇਤਿ, ਨ ਪਸਾਰੇਤੁਕਾਮੋ ਪਸਾਰੇਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ…. ਨਨੁ ਅਭਿਕ੍ਕਮਿਤੁਕਾਮੋ ਅਭਿਕ੍ਕਮਤਿ, ਪਟਿਕ੍ਕਮਿਤੁਕਾਮੋ ਪਟਿਕ੍ਕਮਤਿ, ਆਲੋਕੇਤੁਕਾਮੋ ਆਲੋਕੇਤਿ, ਵਿਲੋਕੇਤੁਕਾਮੋ ਵਿਲੋਕੇਤਿ, ਸਮਿਞ੍ਜਿਤੁਕਾਮੋ ਸਮਿਞ੍ਜੇਤਿ, ਪਸਾਰੇਤੁਕਾਮੋ ਪਸਾਰੇਤੀਤਿ? ਆਮਨ੍ਤਾ. ਹਞ੍ਚਿ ਅਭਿਕ੍ਕਮਿਤੁਕਾਮੋ ਅਭਿਕ੍ਕਮਤਿ…ਪੇ… ਪਸਾਰੇਤੁਕਾਮੋ ਪਸਾਰੇਤਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਨ ਯਥਾਚਿਤ੍ਤਸ੍ਸ ਕਾਯਕਮ੍ਮ’’ਨ੍ਤਿ.

੫੬੭. ਨ ਵਤ੍ਤਬ੍ਬਂ – ‘‘ਨ ਯਥਾਚਿਤ੍ਤਸ੍ਸ ਕਾਯਕਮ੍ਮ’’ਨ੍ਤਿ? ਆਮਨ੍ਤਾ. ਨਨੁ ਅਤ੍ਥਿ ਕੋਚਿ ‘‘ਅਞ੍ਞਤ੍ਰ ਗਚ੍ਛਿਸ੍ਸਾਮੀ’’ਤਿ ਅਞ੍ਞਤ੍ਰ ਗਚ੍ਛਤਿ…ਪੇ… ‘‘ਅਞ੍ਞਂ ਪਸਾਰੇਸ੍ਸਾਮੀ’’ਤਿ ਅਞ੍ਞਂ ਪਸਾਰੇਤੀਤਿ? ਆਮਨ੍ਤਾ. ਹਞ੍ਚਿ ਅਤ੍ਥਿ ਕੋਚਿ ‘‘ਅਞ੍ਞਤ੍ਰ ਗਚ੍ਛਿਸ੍ਸਾਮੀ’’ਤਿ ਅਞ੍ਞਤ੍ਰ ਗਚ੍ਛਤਿ…ਪੇ… ‘‘ਅਞ੍ਞਂ ਪਸਾਰੇਸ੍ਸਾਮੀ’’ਤਿ ਅਞ੍ਞਂ ਪਸਾਰੇਤਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਨ ਯਥਾਚਿਤ੍ਤਸ੍ਸ ਕਾਯਕਮ੍ਮ’’ਨ੍ਤਿ.

ਨ ਯਥਾਚਿਤ੍ਤਸ੍ਸ ਕਾਯਕਮ੍ਮਨ੍ਤਿਕਥਾ ਨਿਟ੍ਠਿਤਾ.

੯. ਨਵਮਵਗ੍ਗੋ

(੯੪) ੧੧. ਅਤੀਤਾਨਾਗਤਸਮਨ੍ਨਾਗਤਕਥਾ

੫੬੮. ਅਤੀਤੇਨ ਸਮਨ੍ਨਾਗਤੋਤਿ? ਆਮਨ੍ਤਾ. ਨਨੁ ਅਤੀਤਂ ਨਿਰੁਦ੍ਧਂ ਵਿਗਤਂ ਵਿਪਰਿਣਤਂ ਅਤ੍ਥਙ੍ਗਤਂ ਅਬ੍ਭਤ੍ਥਙ੍ਗਤਨ੍ਤਿ? ਆਮਨ੍ਤਾ. ਹਞ੍ਚਿ ਅਤੀਤਂ ਨਿਰੁਦ੍ਧਂ ਵਿਗਤਂ ਵਿਪਰਿਣਤਂ ਅਤ੍ਥਙ੍ਗਤਂ ਅਬ੍ਭਤ੍ਥਙ੍ਗਤਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਤੀਤੇਨ ਸਮਨ੍ਨਾਗਤੋ’’ਤਿ.

ਅਨਾਗਤੇਨ ਸਮਨ੍ਨਾਗਤੋਤਿ? ਆਮਨ੍ਤਾ. ਨਨੁ ਅਨਾਗਤਂ ਅਜਾਤਂ ਅਭੂਤਂ ਅਸਞ੍ਜਾਤਂ ਅਨਿਬ੍ਬਤ੍ਤਂ ਅਨਭਿਨਿਬ੍ਬਤ੍ਤਂ ਅਪਾਤੁਭੂਤਨ੍ਤਿ? ਆਮਨ੍ਤਾ. ਹਞ੍ਚਿ ਅਨਾਗਤਂ ਅਜਾਤਂ ਅਭੂਤਂ ਅਸਞ੍ਜਾਤਂ ਅਨਿਬ੍ਬਤ੍ਤਂ ਅਨਭਿਨਿਬ੍ਬਤ੍ਤਂ ਅਪਾਤੁਭੂਤਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਨਾਗਤੇਨ ਸਮਨ੍ਨਾਗਤੋ’’ਤਿ.

੫੬੯. ਅਤੀਤੇਨ ਰੂਪਕ੍ਖਨ੍ਧੇਨ ਸਮਨ੍ਨਾਗਤੋ, ਅਨਾਗਤੇਨ ਰੂਪਕ੍ਖਨ੍ਧੇਨ ਸਮਨ੍ਨਾਗਤੋ, ਪਚ੍ਚੁਪ੍ਪਨ੍ਨੇਨ ਰੂਪਕ੍ਖਨ੍ਧੇਨ ਸਮਨ੍ਨਾਗਤੋਤਿ? ਆਮਨ੍ਤਾ. ਤੀਹਿ ਰੂਪਕ੍ਖਨ੍ਧੇਹਿ ਸਮਨ੍ਨਾਗਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਤੀਤੇਹਿ ਪਞ੍ਚਹਿ ਖਨ੍ਧੇਹਿ ਸਮਨ੍ਨਾਗਤੋ, ਅਨਾਗਤੇਹਿ ਪਞ੍ਚਹਿ ਖਨ੍ਧੇਹਿ ਸਮਨ੍ਨਾਗਤੋ, ਪਚ੍ਚੁਪ੍ਪਨ੍ਨੇਹਿ ਪਞ੍ਚਹਿ ਖਨ੍ਧੇਹਿ ਸਮਨ੍ਨਾਗਤੋਤਿ? ਆਮਨ੍ਤਾ. ਪਨ੍ਨਰਸਹਿ ਖਨ੍ਧੇਹਿ ਸਮਨ੍ਨਾਗਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਤੀਤੇਨ ਚਕ੍ਖਾਯਤਨੇਨ ਸਮਨ੍ਨਾਗਤੋ, ਅਨਾਗਤੇਨ ਚਕ੍ਖਾਯਤਨੇਨ ਸਮਨ੍ਨਾਗਤੋ, ਪਚ੍ਚੁਪ੍ਪਨ੍ਨੇਨ ਚਕ੍ਖਾਯਤਨੇਨ ਸਮਨ੍ਨਾਗਤੋਤਿ? ਆਮਨ੍ਤਾ. ਤੀਹਿ ਚਕ੍ਖਾਯਤਨੇਹਿ ਸਮਨ੍ਨਾਗਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਤੀਤੇਹਿ ਦ੍ਵਾਦਸਹਿ ਆਯਤਨੇਹਿ ਸਮਨ੍ਨਾਗਤੋ, ਅਨਾਗਤੇਹਿ ਦ੍ਵਾਦਸਹਿ ਆਯਤਨੇਹਿ ਸਮਨ੍ਨਾਗਤੋ, ਪਚ੍ਚੁਪ੍ਪਨ੍ਨੇਹਿ ਦ੍ਵਾਦਸਹਿ ਆਯਤਨੇਹਿ ਸਮਨ੍ਨਾਗਤੋਤਿ? ਆਮਨ੍ਤਾ. ਛਤ੍ਤਿਂਸਾਯਤਨੇਹਿ ਸਮਨ੍ਨਾਗਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਤੀਤਾਯ ਚਕ੍ਖੁਧਾਤੁਯਾ ਸਮਨ੍ਨਾਗਤੋ, ਅਨਾਗਤਾਯ ਚਕ੍ਖੁਧਾਤੁਯਾ ਸਮਨ੍ਨਾਗਤੋ, ਪਚ੍ਚੁਪ੍ਪਨ੍ਨਾਯ ਚਕ੍ਖੁਧਾਤੁਯਾ ਸਮਨ੍ਨਾਗਤੋਤਿ? ਆਮਨ੍ਤਾ. ਤੀਹਿ ਚਕ੍ਖੁਧਾਤੂਹਿ ਸਮਨ੍ਨਾਗਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਤੀਤਾਹਿ ਅਟ੍ਠਾਰਸਹਿ ਧਾਤੂਹਿ ਸਮਨ੍ਨਾਗਤੋ, ਅਨਾਗਤਾਹਿ ਅਟ੍ਠਾਰਸਹਿ ਧਾਤੂਹਿ ਸਮਨ੍ਨਾਗਤੋ, ਪਚ੍ਚੁਪ੍ਪਨ੍ਨਾਹਿ ਅਟ੍ਠਾਰਸਹਿ ਧਾਤੂਹਿ ਸਮਨ੍ਨਾਗਤੋਤਿ? ਆਮਨ੍ਤਾ. ਚਤੁਪਞ੍ਞਾਸਧਾਤੂਹਿ ਸਮਨ੍ਨਾਗਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਤੀਤੇਨ ਚਕ੍ਖੁਨ੍ਦ੍ਰਿਯੇਨ ਸਮਨ੍ਨਾਗਤੋ, ਅਨਾਗਤੇਨ ਚਕ੍ਖੁਨ੍ਦ੍ਰਿਯੇਨ ਸਮਨ੍ਨਾਗਤੋ, ਪਚ੍ਚੁਪ੍ਪਨ੍ਨੇਨ ਚਕ੍ਖੁਨ੍ਦ੍ਰਿਯੇਨ ਸਮਨ੍ਨਾਗਤੋਤਿ? ਆਮਨ੍ਤਾ. ਤੀਹਿ ਚਕ੍ਖੁਨ੍ਦ੍ਰਿਯੇਹਿ ਸਮਨ੍ਨਾਗਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਤੀਤੇਹਿ ਬਾਵੀਸਤਿਨ੍ਦ੍ਰਿਯੇਹਿ ਸਮਨ੍ਨਾਗਤੋ, ਅਨਾਗਤੇਹਿ ਬਾਵੀਸਤਿਨ੍ਦ੍ਰਿਯੇਹਿ ਸਮਨ੍ਨਾਗਤੋ, ਪਚ੍ਚੁਪ੍ਪਨ੍ਨੇਹਿ ਬਾਵੀਸਤਿਨ੍ਦ੍ਰਿਯੇਹਿ ਸਮਨ੍ਨਾਗਤੋਤਿ? ਆਮਨ੍ਤਾ. ਛਸਟ੍ਠਿਨ੍ਦ੍ਰਿਯੇਹਿ ਸਮਨ੍ਨਾਗਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੫੭੦. ਨ ਵਤ੍ਤਬ੍ਬਂ – ‘‘ਅਤੀਤਾਨਾਗਤੇਹਿ ਸਮਨ੍ਨਾਗਤੋ’’ਤਿ? ਆਮਨ੍ਤਾ. ਨਨੁ ਅਤ੍ਥਿ ਅਟ੍ਠਵਿਮੋਕ੍ਖਝਾਯੀ ਚਤੁਨ੍ਨਂ ਝਾਨਾਨਂ ਨਿਕਾਮਲਾਭੀ ਨਵਨ੍ਨਂ ਅਨੁਪੁਬ੍ਬਵਿਹਾਰਸਮਾਪਤ੍ਤੀਨਂ ਲਾਭੀਤਿ? ਆਮਨ੍ਤਾ. ਹਞ੍ਚਿ ਅਤ੍ਥਿ ਅਟ੍ਠਵਿਮੋਕ੍ਖਝਾਯੀ ਚਤੁਨ੍ਨਂ ਝਾਨਾਨਂ ਨਿਕਾਮਲਾਭੀ ਨਵਨ੍ਨਂ ਅਨੁਪੁਬ੍ਬਵਿਹਾਰਸਮਾਪਤ੍ਤੀਨਂ ਲਾਭੀ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਅਤੀਤਾਨਾਗਤੇਹਿ ਸਮਨ੍ਨਾਗਤੋ’’ਤਿ.

ਅਤੀਤਾਨਾਗਤਸਮਨ੍ਨਾਗਤਕਥਾ ਨਿਟ੍ਠਿਤਾ.

ਨਵਮਵਗ੍ਗੋ.

ਤਸ੍ਸੁਦ੍ਦਾਨਂ –

ਆਨਿਸਂਸਦਸ੍ਸਾਵਿਸ੍ਸ ਸਂਯੋਜਨਾਨਂ ਪਹਾਨਂ, ਅਮਤਾਰਮ੍ਮਣਂ ਸਂਯੋਜਨਂ, ਰੂਪਂ ਸਾਰਮ੍ਮਣਂ, ਅਨੁਸਯਾ ਅਨਾਰਮ੍ਮਣਾ, ਏਵਮੇਵਂ ਞਾਣਂ, ਅਤੀਤਾਨਾਗਤਾਰਮ੍ਮਣਂ ਚਿਤ੍ਤਂ, ਸਬ੍ਬਂ ਚਿਤ੍ਤਂ ਵਿਤਕ੍ਕਾਨੁਪਤਿਤਂ, ਸਬ੍ਬਸੋ ਵਿਤਕ੍ਕਯਤੋ ਵਿਚਾਰਯਤੋ ਵਿਤਕ੍ਕਵਿਪ੍ਫਾਰੋ ਸਦ੍ਦੋ, ਨ ਯਥਾਚਿਤ੍ਤਸ੍ਸ ਵਾਚਾ, ਤਥੇਵ ਕਾਯਕਮ੍ਮਂ ਅਤੀਤਾਨਾਗਤੇਹਿ ਸਮਨ੍ਨਾਗਤੋਤਿ.