੮. ਅਟ੍ਠਮਵਗ੍ਗੋ

(੮੨) ੧੦. ਜੀਵਿਤਿਨ੍ਦ੍ਰਿਯਕਥਾ

੫੪੦. ਨਤ੍ਥਿ ਰੂਪਜੀਵਿਤਿਨ੍ਦ੍ਰਿਯਨ੍ਤਿ? ਆਮਨ੍ਤਾ. ਨਤ੍ਥਿ ਰੂਪੀਨਂ ਧਮ੍ਮਾਨਂ ਆਯੁ ਠਿਤਿ ਯਪਨਾ ਯਾਪਨਾ ਇਰਿਯਨਾ ਵਤ੍ਤਨਾ ਪਾਲਨਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਤ੍ਥਿ ਰੂਪੀਨਂ ਧਮ੍ਮਾਨਂ ਆਯੁ ਠਿਤਿ ਯਪਨਾ ਯਾਪਨਾ ਇਰਿਯਨਾ ਵਤ੍ਤਨਾ ਪਾਲਨਾਤਿ? ਆਮਨ੍ਤਾ. ਹਞ੍ਚਿ ਅਤ੍ਥਿ ਰੂਪੀਨਂ ਧਮ੍ਮਾਨਂ ਆਯੁ ਠਿਤਿ ਯਪਨਾ ਯਾਪਨਾ ਇਰਿਯਨਾ ਵਤ੍ਤਨਾ ਪਾਲਨਾ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਨਤ੍ਥਿ ਰੂਪਜੀਵਿਤਿਨ੍ਦ੍ਰਿਯ’’ਨ੍ਤਿ.

ਅਤ੍ਥਿ ਅਰੂਪੀਨਂ ਧਮ੍ਮਾਨਂ ਆਯੁ ਠਿਤਿ ਯਪਨਾ ਯਾਪਨਾ ਇਰਿਯਨਾ ਵਤ੍ਤਨਾ ਪਾਲਨਾ, ਅਤ੍ਥਿ ਅਰੂਪਜੀਵਿਤਿਨ੍ਦ੍ਰਿਯਨ੍ਤਿ? ਆਮਨ੍ਤਾ. ਅਤ੍ਥਿ ਰੂਪੀਨਂ ਧਮ੍ਮਾਨਂ ਆਯੁ ਠਿਤਿ ਯਪਨਾ ਯਾਪਨਾ ਇਰਿਯਨਾ ਵਤ੍ਤਨਾ ਪਾਲਨਾ, ਅਤ੍ਥਿ ਰੂਪਜੀਵਿਤਿਨ੍ਦ੍ਰਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਤ੍ਥਿ ਰੂਪੀਨਂ ਧਮ੍ਮਾਨਂ ਆਯੁ ਠਿਤਿ ਯਪਨਾ ਯਾਪਨਾ ਇਰਿਯਨਾ ਵਤ੍ਤਨਾ ਪਾਲਨਾ, ਨਤ੍ਥਿ ਰੂਪਜੀਵਿਤਿਨ੍ਦ੍ਰਿਯਨ੍ਤਿ? ਆਮਨ੍ਤਾ. ਅਤ੍ਥਿ ਅਰੂਪੀਨਂ ਧਮ੍ਮਾਨਂ ਆਯੁ ਠਿਤਿ ਯਪਨਾ ਯਾਪਨਾ ਇਰਿਯਨਾ ਵਤ੍ਤਨਾ ਪਾਲਨਾ, ਨਤ੍ਥਿ ਅਰੂਪਜੀਵਿਤਿਨ੍ਦ੍ਰਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਰੂਪੀਨਂ ਧਮ੍ਮਾਨਂ ਆਯੁ ਅਰੂਪਜੀਵਿਤਿਨ੍ਦ੍ਰਿਯਨ੍ਤਿ? ਆਮਨ੍ਤਾ. ਰੂਪੀਨਂ ਧਮ੍ਮਾਨਂ ਆਯੁ ਰੂਪਜੀਵਿਤਿਨ੍ਦ੍ਰਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਰੂਪੀਨਂ ਧਮ੍ਮਾਨਂ ਆਯੁ ਨ ਵਤ੍ਤਬ੍ਬਂ – ‘‘ਰੂਪਜੀਵਿਤਿਨ੍ਦ੍ਰਿਯ’’ਨ੍ਤਿ? ਆਮਨ੍ਤਾ. ਅਰੂਪੀਨਂ ਧਮ੍ਮਾਨਂ ਆਯੁ ਨ ਵਤ੍ਤਬ੍ਬਂ – ‘‘ਅਰੂਪਜੀਵਿਤਿਨ੍ਦ੍ਰਿਯ’’ਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੫੪੧. ਰੂਪੀਨਂ ਧਮ੍ਮਾਨਂ ਆਯੁ ਅਰੂਪਜੀਵਿਤਿਨ੍ਦ੍ਰਿਯਨ੍ਤਿ? ਆਮਨ੍ਤਾ. ਅਰੂਪੀਨਂ ਧਮ੍ਮਾਨਂ ਆਯੁ ਰੂਪਜੀਵਿਤਿਨ੍ਦ੍ਰਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਰੂਪੀਨਂ ਧਮ੍ਮਾਨਂ ਆਯੁ ਨ ਵਤ੍ਤਬ੍ਬਂ – ‘‘ਰੂਪਜੀਵਿਤਿਨ੍ਦ੍ਰਿਯ’’ਨ੍ਤਿ? ਆਮਨ੍ਤਾ. ਰੂਪੀਨਂ ਧਮ੍ਮਾਨਂ ਆਯੁ ਨ ਵਤ੍ਤਬ੍ਬਂ – ‘‘ਅਰੂਪਜੀਵਿਤਿਨ੍ਦ੍ਰਿਯ’’ਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਰੂਪੀਨਞ੍ਚ ਅਰੂਪੀਨਞ੍ਚ ਧਮ੍ਮਾਨਂ ਆਯੁ ਅਰੂਪਜੀਵਿਤਿਨ੍ਦ੍ਰਿਯਨ੍ਤਿ? ਆਮਨ੍ਤਾ. ਰੂਪੀਨਞ੍ਚ ਅਰੂਪੀਨਞ੍ਚ ਧਮ੍ਮਾਨਂ ਆਯੁ ਰੂਪਜੀਵਿਤਿਨ੍ਦ੍ਰਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਰੂਪੀਨਞ੍ਚ ਅਰੂਪੀਨਞ੍ਚ ਧਮ੍ਮਾਨਂ ਆਯੁ ਨ ਵਤ੍ਤਬ੍ਬਂ – ‘‘ਰੂਪਜੀਵਿਤਿਨ੍ਦ੍ਰਿਯ’’ਨ੍ਤਿ? ਆਮਨ੍ਤਾ. ਰੂਪੀਨਞ੍ਚ ਅਰੂਪੀਨਞ੍ਚ ਧਮ੍ਮਾਨਂ ਆਯੁ ਨ ਵਤ੍ਤਬ੍ਬਂ – ‘‘ਅਰੂਪਜੀਵਿਤਿਨ੍ਦ੍ਰਿਯ’’ਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਤ੍ਥਿ ਰੂਪਜੀਵਿਤਿਨ੍ਦ੍ਰਿਯਨ੍ਤਿ? ਆਮਨ੍ਤਾ. ਨਿਰੋਧਂ ਸਮਾਪਨ੍ਨਸ੍ਸ ਨਤ੍ਥਿ ਜੀਵਿਤਿਨ੍ਦ੍ਰਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੫੪੨. ਨਿਰੋਧਂ ਸਮਾਪਨ੍ਨਸ੍ਸ ਅਤ੍ਥਿ ਜੀਵਿਤਿਨ੍ਦ੍ਰਿਯਨ੍ਤਿ? ਆਮਨ੍ਤਾ. ਹਞ੍ਚਿ ਨਿਰੋਧਂ ਸਮਾਪਨ੍ਨਸ੍ਸ ਅਤ੍ਥਿ ਜੀਵਿਤਿਨ੍ਦ੍ਰਿਯਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਨਤ੍ਥਿ ਰੂਪਜੀਵਿਤਿਨ੍ਦ੍ਰਿਯ’’ਨ੍ਤਿ.

ਨਿਰੋਧਂ ਸਮਾਪਨ੍ਨਸ੍ਸ ਅਤ੍ਥਿ ਜੀਵਿਤਿਨ੍ਦ੍ਰਿਯਨ੍ਤਿ? ਆਮਨ੍ਤਾ. ਕਤਮਕ੍ਖਨ੍ਧਪਰਿਯਾਪਨ੍ਨਨ੍ਤਿ? ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਨ੍ਤਿ. ਨਿਰੋਧਂ ਸਮਾਪਨ੍ਨਸ੍ਸ ਅਤ੍ਥਿ ਸਙ੍ਖਾਰਕ੍ਖਨ੍ਧੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਨਿਰੋਧਂ ਸਮਾਪਨ੍ਨਸ੍ਸ ਅਤ੍ਥਿ ਸਙ੍ਖਾਰਕ੍ਖਨ੍ਧੋਤਿ? ਆਮਨ੍ਤਾ. ਨਿਰੋਧਂ ਸਮਾਪਨ੍ਨਸ੍ਸ ਅਤ੍ਥਿ ਵੇਦਨਾਕ੍ਖਨ੍ਧੋ…ਪੇ… ਸਞ੍ਞਾਕ੍ਖਨ੍ਧੋ…ਪੇ… ਵਿਞ੍ਞਾਣਕ੍ਖਨ੍ਧੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਨਿਰੋਧਂ ਸਮਾਪਨ੍ਨਸ੍ਸ ਅਤ੍ਥਿ ਵੇਦਨਾਕ੍ਖਨ੍ਧੋ…ਪੇ… ਸਞ੍ਞਾਕ੍ਖਨ੍ਧੋ…ਪੇ… ਵਿਞ੍ਞਾਣਕ੍ਖਨ੍ਧੋਤਿ? ਆਮਨ੍ਤਾ. ਨ ਨਿਰੋਧਂ ਸਮਾਪਨ੍ਨੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੫੪੩. ਨਤ੍ਥਿ ਰੂਪਜੀਵਿਤਿਨ੍ਦ੍ਰਿਯਨ੍ਤਿ? ਆਮਨ੍ਤਾ. ਅਸਞ੍ਞਸਤ੍ਤਾਨਂ ਨਤ੍ਥਿ ਜੀਵਿਤਿਨ੍ਦ੍ਰਿਯਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਸਞ੍ਞਸਤ੍ਤਾਨਂ ਅਤ੍ਥਿ ਜੀਵਿਤਿਨ੍ਦ੍ਰਿਯਨ੍ਤਿ? ਆਮਨ੍ਤਾ. ਹਞ੍ਚਿ ਅਸਞ੍ਞਸਤ੍ਤਾਨਂ ਅਤ੍ਥਿ ਜੀਵਿਤਿਨ੍ਦ੍ਰਿਯਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਨਤ੍ਥਿ ਰੂਪਜੀਵਿਤਿਨ੍ਦ੍ਰਿਯ’’ਨ੍ਤਿ. ਅਸਞ੍ਞਸਤ੍ਤਾਨਂ ਅਤ੍ਥਿ ਜੀਵਿਤਿਨ੍ਦ੍ਰਿਯਨ੍ਤਿ? ਆਮਨ੍ਤਾ. ਕਤਮਕ੍ਖਨ੍ਧਪਰਿਯਾਪਨ੍ਨਨ੍ਤਿ? ਸਙ੍ਖਾਰਕ੍ਖਨ੍ਧਪਰਿਯਾਪਨ੍ਨਨ੍ਤਿ. ਅਸਞ੍ਞਸਤ੍ਤਾਨਂ ਅਤ੍ਥਿ ਸਙ੍ਖਾਰਕ੍ਖਨ੍ਧੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਸਞ੍ਞਸਤ੍ਤਾਨਂ ਅਤ੍ਥਿ ਸਙ੍ਖਾਰਕ੍ਖਨ੍ਧੋਤਿ? ਆਮਨ੍ਤਾ. ਅਸਞ੍ਞਸਤ੍ਤਾਨਂ ਅਤ੍ਥਿ ਵੇਦਨਾਕ੍ਖਨ੍ਧੋ…ਪੇ… ਸਞ੍ਞਾਕ੍ਖਨ੍ਧੋ…ਪੇ… ਵਿਞ੍ਞਾਣਕ੍ਖਨ੍ਧੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਸਞ੍ਞਸਤ੍ਤਾਨਂ ਅਤ੍ਥਿ ਵੇਦਨਾਕ੍ਖਨ੍ਧੋ…ਪੇ… ਸਞ੍ਞਾਕ੍ਖਨ੍ਧੋ…ਪੇ… ਵਿਞ੍ਞਾਣਕ੍ਖਨ੍ਧੋਤਿ? ਆਮਨ੍ਤਾ. ਪਞ੍ਚਵੋਕਾਰਭਵੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੫੪੪. ਉਪਪਤ੍ਤੇਸਿਯੇਨ ਚਿਤ੍ਤੇਨ ਸਮੁਟ੍ਠਿਤਂ ਜੀਵਿਤਿਨ੍ਦ੍ਰਿਯਂ ਉਪਪਤ੍ਤੇਸਿਯੇ ਚਿਤ੍ਤੇ ਭਿਜ੍ਜਮਾਨੇ ਏਕਦੇਸਂ ਭਿਜ੍ਜਤੀਤਿ? ਆਮਨ੍ਤਾ. ਉਪਪਤ੍ਤੇਸਿਯੇਨ ਚਿਤ੍ਤੇਨ ਸਮੁਟ੍ਠਿਤੋ ਫਸ੍ਸੋ ਉਪਪਤ੍ਤੇਸਿਯੇ ਚਿਤ੍ਤੇ ਭਿਜ੍ਜਮਾਨੇ ਏਕਦੇਸੋ ਭਿਜ੍ਜਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਉਪਪਤ੍ਤੇਸਿਯੇਨ ਚਿਤ੍ਤੇਨ ਸਮੁਟ੍ਠਿਤੋ ਫਸ੍ਸੋ ਉਪਪਤ੍ਤੇਸਿਯੇ ਚਿਤ੍ਤੇ ਭਿਜ੍ਜਮਾਨੇ ਅਨਵਸੇਸੋ ਭਿਜ੍ਜਤੀਤਿ? ਆਮਨ੍ਤਾ. ਉਪਪਤ੍ਤੇਸਿਯੇਨ ਚਿਤ੍ਤੇਨ ਸਮੁਟ੍ਠਿਤਂ ਜੀਵਿਤਿਨ੍ਦ੍ਰਿਯਂ ਉਪਪਤ੍ਤੇਸਿਯੇ ਚਿਤ੍ਤੇ ਭਿਜ੍ਜਮਾਨੇ ਅਨਵਸੇਸਂ ਭਿਜ੍ਜਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੫੪੫. ਦ੍ਵੇ ਜੀਵਿਤਿਨ੍ਦ੍ਰਿਯਾਨੀਤਿ? ਆਮਨ੍ਤਾ. ਦ੍ਵੀਹਿ ਜੀਵਿਤੇਹਿ ਜੀਵਤਿ, ਦ੍ਵੀਹਿ ਮਰਣੇਹਿ ਮੀਯਤੀਤਿ? ਆਮਨ੍ਤਾ [ਨ ਹੇਵਂ ਵਤ੍ਤਬ੍ਬੇ (ਸ੍ਯਾ. ਕਂ. ਪੀ.)].

ਜੀਵਿਤਿਨ੍ਦ੍ਰਿਯਕਥਾ ਨਿਟ੍ਠਿਤਾ.