੭. ਸਤ੍ਤਮਵਗ੍ਗੋ

(੭੨) ੧੦. ਵਿਪਾਕੋ ਵਿਪਾਕਧਮ੍ਮਧਮ੍ਮੋਤਿਕਥਾ

੫੦੧. ਵਿਪਾਕੋ ਵਿਪਾਕਧਮ੍ਮਧਮ੍ਮੋਤਿ? ਆਮਨ੍ਤਾ. ਤਸ੍ਸ ਵਿਪਾਕੋ ਵਿਪਾਕਧਮ੍ਮਧਮ੍ਮੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਤਸ੍ਸ ਵਿਪਾਕੋ ਵਿਪਾਕਧਮ੍ਮਧਮ੍ਮੋਤਿ? ਆਮਨ੍ਤਾ. ਤਸ੍ਸ ਤਸ੍ਸੇਵ ਨਤ੍ਥਿ ਦੁਕ੍ਖਸ੍ਸ ਅਨ੍ਤਕਿਰਿਯਾ ਨਤ੍ਥਿ ਵਟ੍ਟੁਪਚ੍ਛੇਦੋ ਨਤ੍ਥਿ ਅਨੁਪਾਦਾਪਰਿਨਿਬ੍ਬਾਨਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਵਿਪਾਕੋ ਵਿਪਾਕਧਮ੍ਮਧਮ੍ਮੋਤਿ? ਆਮਨ੍ਤਾ. ਵਿਪਾਕੋਤਿ ਵਾ ਵਿਪਾਕਧਮ੍ਮਧਮ੍ਮੋਤਿ ਵਾ ਵਿਪਾਕਧਮ੍ਮਧਮ੍ਮੋਤਿ ਵਾ ਵਿਪਾਕੋਤਿ ਵਾ ਏਸੇਸੇ ਏਕਟ੍ਠੇ ਸਮੇ ਸਮਭਾਗੇ ਤਜ੍ਜਾਤੇਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਵਿਪਾਕੋ ਵਿਪਾਕਧਮ੍ਮਧਮ੍ਮੋਤਿ? ਆਮਨ੍ਤਾ. ਵਿਪਾਕੋ ਚ ਵਿਪਾਕਧਮ੍ਮਧਮ੍ਮੋ ਚ ਵਿਪਾਕਧਮ੍ਮਧਮ੍ਮੋ ਚ ਵਿਪਾਕੋ ਚ ਸਹਗਤਾ ਸਹਜਾਤਾ ਸਂਸਟ੍ਠਾ ਸਮ੍ਪਯੁਤ੍ਤਾ ਏਕੁਪ੍ਪਾਦਾ ਏਕਨਿਰੋਧਾ ਏਕਵਤ੍ਥੁਕਾ ਏਕਾਰਮ੍ਮਣਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਵਿਪਾਕੋ ਵਿਪਾਕਧਮ੍ਮਧਮ੍ਮੋਤਿ? ਆਮਨ੍ਤਾ. ਤਞ੍ਞੇਵ ਅਕੁਸਲਂ ਸੋ ਅਕੁਸਲਸ੍ਸ ਵਿਪਾਕੋ, ਤਞ੍ਞੇਵ ਕੁਸਲਂ ਸੋ ਕੁਸਲਸ੍ਸ ਵਿਪਾਕੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਵਿਪਾਕੋ ਵਿਪਾਕਧਮ੍ਮਧਮ੍ਮੋਤਿ? ਆਮਨ੍ਤਾ. ਯੇਨੇਵ ਚਿਤ੍ਤੇਨ ਪਾਣਂ ਹਨਤਿ ਤੇਨੇਵ ਚਿਤ੍ਤੇਨ ਨਿਰਯੇ ਪਚ੍ਚਤਿ, ਯੇਨੇਵ ਚਿਤ੍ਤੇਨ ਦਾਨਂ ਦੇਤਿ ਤੇਨੇਵ ਚਿਤ੍ਤੇਨ ਸਗ੍ਗੇ ਮੋਦਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੫੦੨. ਨ ਵਤ੍ਤਬ੍ਬਂ – ‘‘ਵਿਪਾਕੋ ਵਿਪਾਕਧਮ੍ਮਧਮ੍ਮੋ’’ਤਿ? ਆਮਨ੍ਤਾ. ਨਨੁ ਵਿਪਾਕਾ ਚਤ੍ਤਾਰੋ ਖਨ੍ਧਾ ਅਰੂਪਿਨੋ ਅਞ੍ਞਮਞ੍ਞਪਚ੍ਚਯਾਤਿ? ਆਮਨ੍ਤਾ. ਹਞ੍ਚਿ ਵਿਪਾਕਾ ਚਤ੍ਤਾਰੋ ਖਨ੍ਧਾ ਅਰੂਪਿਨੋ ਅਞ੍ਞਮਞ੍ਞਪਚ੍ਚਯਾ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਵਿਪਾਕੋ ਵਿਪਾਕਧਮ੍ਮਧਮ੍ਮੋ’’ਤਿ.

ਵਿਪਾਕੋ ਵਿਪਾਕਧਮ੍ਮਧਮ੍ਮੋਤਿਕਥਾ ਨਿਟ੍ਠਿਤਾ.

ਸਤ੍ਤਮਵਗ੍ਗੋ.

ਤਸ੍ਸੁਦ੍ਦਾਨਂ –

ਸਙ੍ਗਹੋ, ਸਮ੍ਪਯੁਤ੍ਤੋ, ਚੇਤਸਿਕੋ ਧਮ੍ਮੋ, ਚੇਤਸਿਕਂ ਦਾਨਂ, ਪਰਿਭੋਗਮਯਂ ਪੁਞ੍ਞਂ ਵਡ੍ਢਤਿ, ਇਤੋ ਦਿਨ੍ਨੇਨ ਤਤ੍ਥ ਯਾਪੇਨ੍ਤਿ, ਪਥਵੀ ਕਮ੍ਮਵਿਪਾਕੋ, ਜਰਾਮਰਣਂ ਵਿਪਾਕੋ, ਨਤ੍ਥਿ ਅਰਿਯਧਮ੍ਮਵਿਪਾਕੋ, ਵਿਪਾਕੋ ਵਿਪਾਕਧਮ੍ਮਧਮ੍ਮੋਤਿ.