੪. ਚਤੁਤ੍ਥਵਗ੍ਗੋ

(੪੨) ੧੦. ਸਬ੍ਬਸਂਯੋਜਨਪ੍ਪਹਾਨਕਥਾ

੪੧੩. ਸਬ੍ਬਸਂਯੋਜਨਾਨਂ ਪਹਾਨਂ ਅਰਹਤ੍ਤਨ੍ਤਿ? ਆਮਨ੍ਤਾ. ਅਰਹਤ੍ਤਮਗ੍ਗੇਨ ਸਬ੍ਬੇ ਸਂਯੋਜਨਾ ਪਹੀਯਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਰਹਤ੍ਤਮਗ੍ਗੇਨ ਸਬ੍ਬੇ ਸਂਯੋਜਨਾ ਪਹੀਯਨ੍ਤੀਤਿ? ਆਮਨ੍ਤਾ. ਅਰਹਤ੍ਤਮਗ੍ਗੇਨ ਸਕ੍ਕਾਯਦਿਟ੍ਠਿਂ ਵਿਚਿਕਿਚ੍ਛਂ ਸੀਲਬ੍ਬਤਪਰਾਮਾਸਂ ਪਜਹਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਰਹਤ੍ਤਮਗ੍ਗੇਨ ਸਕ੍ਕਾਯਦਿਟ੍ਠਿਂ ਵਿਚਿਕਿਚ੍ਛਂ ਸੀਲਬ੍ਬਤਪਰਾਮਾਸਂ ਪਜਹਤੀਤਿ? ਆਮਨ੍ਤਾ. ਨਨੁ ਤਿਣ੍ਣਂ ਸਂਯੋਜਨਾਨਂ ਪਹਾਨਂ ਸੋਤਾਪਤ੍ਤਿਫਲਂ ਵੁਤ੍ਤਂ ਭਗਵਤਾਤਿ? ਆਮਨ੍ਤਾ. ਹਞ੍ਚਿ ਤਿਣ੍ਣਂ ਸਂਯੋਜਨਾਨਂ ਪਹਾਨਂ ਸੋਤਾਪਤ੍ਤਿਫਲਂ ਵੁਤ੍ਤਂ ਭਗਵਤਾ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਰਹਤ੍ਤਮਗ੍ਗੇਨ ਸਬ੍ਬੇ ਸਂਯੋਜਨਾ ਪਹੀਯਨ੍ਤੀ’’ਤਿ.

੪੧੪. ਅਰਹਤ੍ਤਮਗ੍ਗੇਨ ਸਬ੍ਬੇ ਸਂਯੋਜਨਾ ਪਹੀਯਨ੍ਤੀਤਿ? ਆਮਨ੍ਤਾ. ਅਰਹਤ੍ਤਮਗ੍ਗੇਨ ਓਲ਼ਾਰਿਕਂ ਕਾਮਰਾਗਂ ਓਲ਼ਾਰਿਕਂ ਬ੍ਯਾਪਾਦਂ ਪਜਹਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੪੧੫. ਅਰਹਤ੍ਤਮਗ੍ਗੇਨ ਓਲ਼ਾਰਿਕਂ ਕਾਮਰਾਗਂ ਓਲ਼ਾਰਿਕਂ ਬ੍ਯਾਪਾਦਂ ਪਜਹਤੀਤਿ? ਆਮਨ੍ਤਾ. ਨਨੁ ਕਾਮਰਾਗਬ੍ਯਾਪਾਦਾਨਂ ਤਨੁਭਾਵਂ ਸਕਦਾਗਾਮਿਫਲਂ ਵੁਤ੍ਤਂ ਭਗਵਤਾਤਿ? ਆਮਨ੍ਤਾ. ਹਞ੍ਚਿ ਕਾਮਰਾਗਬ੍ਯਾਪਾਦਾਨਂ ਤਨੁਭਾਵਂ ਸਕਦਾਗਾਮਿਫਲਂ ਵੁਤ੍ਤਂ ਭਗਵਤਾ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਰਹਤ੍ਤਮਗ੍ਗੇਨ ਸਬ੍ਬੇ ਸਂਯੋਜਨਾ ਪਹੀਯਨ੍ਤੀ’’ਤਿ.

ਅਰਹਤ੍ਤਮਗ੍ਗੇਨ ਸਬ੍ਬੇ ਸਂਯੋਜਨਾ ਪਹੀਯਨ੍ਤੀਤਿ? ਆਮਨ੍ਤਾ. ਅਰਹਤ੍ਤਮਗ੍ਗੇਨ ਅਣੁਸਹਗਤਂ ਕਾਮਰਾਗਂ ਅਣੁਸਹਗਤਂ ਬ੍ਯਾਪਾਦਂ ਪਜਹਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੪੧੬. ਅਰਹਤ੍ਤਮਗ੍ਗੇਨ ਅਣੁਸਹਗਤਂ ਕਾਮਰਾਗਂ ਅਣੁਸਹਗਤਂ ਬ੍ਯਾਪਾਦਂ ਪਜਹਤੀਤਿ? ਆਮਨ੍ਤਾ. ਨਨੁ ਕਾਮਰਾਗਬ੍ਯਾਪਾਦਾਨਂ ਅਨਵਸੇਸਪ੍ਪਹਾਨਂ ਅਨਾਗਾਮਿਫਲਂ ਵੁਤ੍ਤਂ ਭਗਵਤਾਤਿ? ਆਮਨ੍ਤਾ. ਹਞ੍ਚਿ ਕਾਮਰਾਗਬ੍ਯਾਪਾਦਾਨਂ ਅਨਵਸੇਸਪ੍ਪਹਾਨਂ ਅਨਾਗਾਮਿਫਲਂ ਵੁਤ੍ਤਂ ਭਗਵਤਾ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਰਹਤ੍ਤਮਗ੍ਗੇਨ ਸਬ੍ਬੇ ਸਂਯੋਜਨਾ ਪਹੀਯਨ੍ਤੀ’’ਤਿ.

ਅਰਹਤ੍ਤਮਗ੍ਗੇਨ ਸਬ੍ਬੇ ਸਂਯੋਜਨਾ ਪਹੀਯਨ੍ਤੀਤਿ? ਆਮਨ੍ਤਾ. ਨਨੁ ਰੂਪਰਾਗਅਰੂਪਰਾਗਮਾਨਉਦ੍ਧਚ੍ਚਅਵਿਜ੍ਜਾਯ ਅਨਵਸੇਸਪ੍ਪਹਾਨਂ ਅਰਹਤ੍ਤਂ ਵੁਤ੍ਤਂ ਭਗਵਤਾਤਿ? ਆਮਨ੍ਤਾ. ਹਞ੍ਚਿ ਰੂਪਰਾਗਅਰੂਪਰਾਗਮਾਨਉਦ੍ਧਚ੍ਚਅਵਿਜ੍ਜਾਯ ਅਨਵਸੇਸਪ੍ਪਹਾਨਂ ਅਰਹਤ੍ਤਂ ਵੁਤ੍ਤਂ ਭਗਵਤਾ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਰਹਤ੍ਤਮਗ੍ਗੇਨ ਸਬ੍ਬੇ ਸਂਯੋਜਨਾ ਪਹੀਯਨ੍ਤੀ’’ਤਿ.

੪੧੭. ਨ ਵਤ੍ਤਬ੍ਬਂ – ‘‘ਸਬ੍ਬਸਂਯੋਜਨਾਨਂ ਪਹਾਨਂ ਅਰਹਤ੍ਤ’’ਨ੍ਤਿ? ਆਮਨ੍ਤਾ. ਨਨੁ ਅਰਹਤੋ ਸਬ੍ਬੇ ਸਂਯੋਜਨਾ ਪਹੀਨਾਤਿ? ਆਮਨ੍ਤਾ. ਹਞ੍ਚਿ ਅਰਹਤੋ ਸਬ੍ਬੇ ਸਂਯੋਜਨਾ ਪਹੀਨਾ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਸਬ੍ਬਸਂਯੋਜਨਾਨਂ ਪਹਾਨਂ ਅਰਹਤ੍ਤ’’ਨ੍ਤਿ.

ਸਬ੍ਬਸਂਯੋਜਨਪ੍ਪਹਾਨਕਥਾ ਨਿਟ੍ਠਿਤਾ.

ਚਤੁਤ੍ਥਵਗ੍ਗੋ.

ਤਸ੍ਸੁਦ੍ਦਾਨਂ –

ਗਿਹਿਸ੍ਸ ਅਰਹਾ, ਸਹ ਉਪਪਤ੍ਤਿਯਾ ਅਰਹਾ, ਅਰਹਤੋ ਸਬ੍ਬੇ ਧਮ੍ਮਾ ਅਨਾਸਵਾ, ਅਰਹਾ ਚਤੂਹਿ ਫਲੇਹਿ ਸਮਨ੍ਨਾਗਤੋ, ਏਵਮੇਵਂ ਛਹਿ ਉਪੇਕ੍ਖਾਹਿ, ਬੋਧਿਯਾ ਬੁਦ੍ਧੋ, ਸਲਕ੍ਖਣਸਮਨ੍ਨਾਗਤੋ, ਬੋਧਿਸਤ੍ਤੋ ਓਕ੍ਕਨ੍ਤਨਿਯਾਮੋ ਚਰਿਤਬ੍ਰਹ੍ਮਚਰਿਯੋ, ਪਟਿਪਨ੍ਨਕੋ ਫਲੇਨ ਸਮਨ੍ਨਾਗਤੋ, ਸਬ੍ਬਸਂਯੋਜਨਾਨਂ ਪਹਾਨਂ ਅਰਹਤ੍ਤਨ੍ਤਿ.