੫. ਪਞ੍ਚਮਵਗ੍ਗੋ

(੪੩) ੧. ਵਿਮੁਤ੍ਤਿਕਥਾ

੪੧੮. ਵਿਮੁਤ੍ਤਿਞਾਣਂ ਵਿਮੁਤ੍ਤਨ੍ਤਿ? ਆਮਨ੍ਤਾ. ਯਂ ਕਿਞ੍ਚਿ ਵਿਮੁਤ੍ਤਿਞਾਣਂ ਸਬ੍ਬਂ ਤਂ ਵਿਮੁਤ੍ਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ…. ਵਿਮੁਤ੍ਤਿਞਾਣਂ ਵਿਮੁਤ੍ਤਨ੍ਤਿ? ਆਮਨ੍ਤਾ. ਪਚ੍ਚਵੇਕ੍ਖਣਞਾਣਂ ਵਿਮੁਤ੍ਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਵਿਮੁਤ੍ਤਿਞਾਣਂ ਵਿਮੁਤ੍ਤਨ੍ਤਿ? ਆਮਨ੍ਤਾ. ਗੋਤ੍ਰਭੁਨੋ ਪੁਗ੍ਗਲਸ੍ਸ ਵਿਮੁਤ੍ਤਿਞਾਣਂ ਵਿਮੁਤ੍ਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨਸ੍ਸ ਪੁਗ੍ਗਲਸ੍ਸ ਵਿਮੁਤ੍ਤਿਞਾਣਂ ਵਿਮੁਤ੍ਤਨ੍ਤਿ? ਆਮਨ੍ਤਾ. ਸੋਤਾਪਨ੍ਨਸ੍ਸ ਞਾਣਂ, ਸੋਤਾਪਤ੍ਤਿਫਲਂ ਪਤ੍ਤਸ੍ਸ ਪਟਿਲਦ੍ਧਸ੍ਸ ਅਧਿਗਤਸ੍ਸ ਸਚ੍ਛਿਕਤਸ੍ਸ ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਕਦਾਗਾਮਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨਸ੍ਸ ਪੁਗ੍ਗਲਸ੍ਸ ਵਿਮੁਤ੍ਤਿਞਾਣਂ ਵਿਮੁਤ੍ਤਨ੍ਤਿ? ਆਮਨ੍ਤਾ. ਸਕਦਾਗਾਮਿਸ੍ਸ ਞਾਣਂ, ਸਕਦਾਗਾਮਿਫਲਂ ਪਤ੍ਤਸ੍ਸ ਪਟਿਲਦ੍ਧਸ੍ਸ ਅਧਿਗਤਸ੍ਸ ਸਚ੍ਛਿਕਤਸ੍ਸ ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਨਾਗਾਮਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨਸ੍ਸ ਪੁਗ੍ਗਲਸ੍ਸ ਵਿਮੁਤ੍ਤਿਞਾਣਂ ਵਿਮੁਤ੍ਤਨ੍ਤਿ? ਆਮਨ੍ਤਾ. ਅਨਾਗਾਮਿਸ੍ਸ ਞਾਣਂ, ਅਨਾਗਾਮਿਫਲਂ ਪਤ੍ਤਸ੍ਸ ਪਟਿਲਦ੍ਧਸ੍ਸ ਅਧਿਗਤਸ੍ਸ ਸਚ੍ਛਿਕਤਸ੍ਸ ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਰਹਤ੍ਤਸਚ੍ਛਿਕਿਰਿਯਾਯ ਪਟਿਪਨ੍ਨਸ੍ਸ ਪੁਗ੍ਗਲਸ੍ਸ ਵਿਮੁਤ੍ਤਿਞਾਣਂ ਵਿਮੁਤ੍ਤਨ੍ਤਿ? ਆਮਨ੍ਤਾ. ਅਰਹਤੋ ਞਾਣਂ, ਅਰਹਤ੍ਤਂ ਪਤ੍ਤਸ੍ਸ ਪਟਿਲਦ੍ਧਸ੍ਸ ਅਧਿਗਤਸ੍ਸ ਸਚ੍ਛਿਕਤਸ੍ਸ ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੪੧੯. ਸੋਤਾਪਤ੍ਤਿਫਲਸਮਙ੍ਗਿਸ੍ਸ ਪੁਗ੍ਗਲਸ੍ਸ ਵਿਮੁਤ੍ਤਿਞਾਣਂ ਵਿਮੁਤ੍ਤਨ੍ਤਿ? ਆਮਨ੍ਤਾ. ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨਸ੍ਸ ਪੁਗ੍ਗਲਸ੍ਸ ਵਿਮੁਤ੍ਤਿਞਾਣਂ ਵਿਮੁਤ੍ਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਕਦਾਗਾਮਿਫਲਸਮਙ੍ਗਿਸ੍ਸ ਪੁਗ੍ਗਲਸ੍ਸ ਵਿਮੁਤ੍ਤਿਞਾਣਂ ਵਿਮੁਤ੍ਤਨ੍ਤਿ? ਆਮਨ੍ਤਾ. ਸਕਦਾਗਾਮਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨਸ੍ਸ ਪੁਗ੍ਗਲਸ੍ਸ ਵਿਮੁਤ੍ਤਿਞਾਣਂ ਵਿਮੁਤ੍ਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਨਾਗਾਮਿਫਲਸਮਙ੍ਗਿਸ੍ਸ ਪੁਗ੍ਗਲਸ੍ਸ ਵਿਮੁਤ੍ਤਿਞਾਣਂ ਵਿਮੁਤ੍ਤਨ੍ਤਿ? ਆਮਨ੍ਤਾ. ਅਨਾਗਾਮਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨਸ੍ਸ ਪੁਗ੍ਗਲਸ੍ਸ ਵਿਮੁਤ੍ਤਿਞਾਣਂ ਵਿਮੁਤ੍ਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਰਹਤ੍ਤਫਲਸਮਙ੍ਗਿਸ੍ਸ ਪੁਗ੍ਗਲਸ੍ਸ ਵਿਮੁਤ੍ਤਿਞਾਣਂ ਵਿਮੁਤ੍ਤਨ੍ਤਿ? ਆਮਨ੍ਤਾ. ਅਰਹਤ੍ਤਸਚ੍ਛਿਕਿਰਿਯਾਯ ਪਟਿਪਨ੍ਨਸ੍ਸ ਪੁਗ੍ਗਲਸ੍ਸ ਵਿਮੁਤ੍ਤਿਞਾਣਂ ਵਿਮੁਤ੍ਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੪੨੦. ਸੋਤਾਪਤ੍ਤਿਫਲਸਮਙ੍ਗਿਸ੍ਸ ਪੁਗ੍ਗਲਸ੍ਸ ਵਿਮੁਤ੍ਤਿਞਾਣਂ ਵਿਮੁਤ੍ਤਂ ਤਞ੍ਚ ਫਲਂ ਪਤ੍ਤਸ੍ਸ ਞਾਣਨ੍ਤਿ? ਆਮਨ੍ਤਾ. ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨਸ੍ਸ ਪੁਗ੍ਗਲਸ੍ਸ ਵਿਮੁਤ੍ਤਿਞਾਣਂ ਵਿਮੁਤ੍ਤਂ ਤਞ੍ਚ ਫਲਂ ਪਤ੍ਤਸ੍ਸ ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਕਦਾਗਾਮਿਫਲਸਮਙ੍ਗਿਸ੍ਸ ਪੁਗ੍ਗਲਸ੍ਸ ਵਿਮੁਤ੍ਤਿਞਾਣਂ ਵਿਮੁਤ੍ਤਂ ਤਞ੍ਚ ਫਲਂ ਪਤ੍ਤਸ੍ਸ ਞਾਣਨ੍ਤਿ? ਆਮਨ੍ਤਾ. ਸਕਦਾਗਾਮਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨਸ੍ਸ ਪੁਗ੍ਗਲਸ੍ਸ ਵਿਮੁਤ੍ਤਿਞਾਣਂ ਵਿਮੁਤ੍ਤਂ ਤਞ੍ਚ ਫਲਂ ਪਤ੍ਤਸ੍ਸ ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਨਾਗਾਮਿਫਲਸਮਙ੍ਗਿਸ੍ਸ ਪੁਗ੍ਗਲਸ੍ਸ ਵਿਮੁਤ੍ਤਿਞਾਣਂ ਵਿਮੁਤ੍ਤਂ ਤਞ੍ਚ ਫਲਂ ਪਤ੍ਤਸ੍ਸ ਞਾਣਨ੍ਤਿ? ਆਮਨ੍ਤਾ. ਅਨਾਗਾਮਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨਸ੍ਸ ਪੁਗ੍ਗਲਸ੍ਸ ਵਿਮੁਤ੍ਤਿਞਾਣਂ ਵਿਮੁਤ੍ਤਂ ਤਞ੍ਚ ਫਲਂ ਪਤ੍ਤਸ੍ਸ ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਰਹਤ੍ਤਫਲਸਮਙ੍ਗਿਸ੍ਸ ਪੁਗ੍ਗਲਸ੍ਸ ਵਿਮੁਤ੍ਤਿਞਾਣਂ ਵਿਮੁਤ੍ਤਂ ਤਞ੍ਚ ਫਲਂ ਪਤ੍ਤਸ੍ਸ ਞਾਣਨ੍ਤਿ? ਆਮਨ੍ਤਾ. ਅਰਹਤ੍ਤਸਚ੍ਛਿਕਿਰਿਯਾਯ ਪਟਿਪਨ੍ਨਸ੍ਸ ਪੁਗ੍ਗਲਸ੍ਸ ਵਿਮੁਤ੍ਤਿਞਾਣਂ ਵਿਮੁਤ੍ਤਂ ਤਞ੍ਚ ਫਲਂ ਪਤ੍ਤਸ੍ਸ ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਵਿਮੁਤ੍ਤਿਕਥਾ ਨਿਟ੍ਠਿਤਾ.

੫. ਪਞ੍ਚਮਵਗ੍ਗੋ

(੪੪) ੨. ਅਸੇਖਞਾਣਕਥਾ

੪੨੧. ਸੇਖਸ੍ਸ ਅਸੇਖਂ ਞਾਣਂ ਅਤ੍ਥੀਤਿ? ਆਮਨ੍ਤਾ. ਸੇਖੋ ਅਸੇਖਂ ਧਮ੍ਮਂ ਜਾਨਾਤਿ ਪਸ੍ਸਤਿ, ਦਿਟ੍ਠਂ ਵਿਦਿਤਂ ਸਚ੍ਛਿਕਤਂ ਉਪਸਮ੍ਪਜ੍ਜ ਵਿਹਰਤਿ, ਕਾਯੇਨ ਫੁਸਿਤ੍ਵਾ ਵਿਹਰਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਸੇਖੋ ਅਸੇਖਂ ਧਮ੍ਮਂ ਨ ਜਾਨਾਤਿ ਨ ਪਸ੍ਸਤਿ, ਅਦਿਟ੍ਠਂ ਅਵਿਦਿਤਂ ਅਸਚ੍ਛਿਕਤਂ ਨ ਉਪਸਮ੍ਪਜ੍ਜ ਵਿਹਰਤਿ, ਨ ਕਾਯੇਨ ਫੁਸਿਤ੍ਵਾ ਵਿਹਰਤੀਤਿ? ਆਮਨ੍ਤਾ. ਹਞ੍ਚਿ ਸੇਖੋ ਅਸੇਖਂ ਧਮ੍ਮਂ ਨ ਜਾਨਾਤਿ ਨ ਪਸ੍ਸਤਿ, ਅਦਿਟ੍ਠਂ ਅਵਿਦਿਤਂ ਅਸਚ੍ਛਿਕਤਂ ਨ ਉਪਸਮ੍ਪਜ੍ਜ ਵਿਹਰਤਿ, ਨ ਕਾਯੇਨ ਫੁਸਿਤ੍ਵਾ ਵਿਹਰਤਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਸੇਖਸ੍ਸ ਅਸੇਖਂ ਞਾਣਂ ਅਤ੍ਥੀ’’ਤਿ.

ਅਸੇਖਸ੍ਸ ਅਸੇਖਂ ਞਾਣਂ ਅਤ੍ਥਿ, ਅਸੇਖੋ ਅਸੇਖਂ ਧਮ੍ਮਂ ਜਾਨਾਤਿ ਪਸ੍ਸਤਿ, ਦਿਟ੍ਠਂ ਵਿਦਿਤਂ ਸਚ੍ਛਿਕਤਂ ਉਪਸਮ੍ਪਜ੍ਜ ਵਿਹਰਤਿ, ਕਾਯੇਨ ਫੁਸਿਤ੍ਵਾ ਵਿਹਰਤੀਤਿ? ਆਮਨ੍ਤਾ. ਸੇਖਸ੍ਸ ਅਸੇਖਂ ਞਾਣਂ ਅਤ੍ਥਿ, ਸੇਖੋ ਅਸੇਖਂ ਧਮ੍ਮਂ ਜਾਨਾਤਿ ਪਸ੍ਸਤਿ, ਦਿਟ੍ਠਂ ਵਿਦਿਤਂ ਸਚ੍ਛਿਕਤਂ ਉਪਸਮ੍ਪਜ੍ਜ ਵਿਹਰਤਿ, ਕਾਯੇਨ ਫੁਸਿਤ੍ਵਾ ਵਿਹਰਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੪੨੨. ਸੇਖਸ੍ਸ ਅਸੇਖਂ ਞਾਣਂ ਅਤ੍ਥਿ, ਸੇਖੋ ਅਸੇਖਂ ਧਮ੍ਮਂ ਨ ਜਾਨਾਤਿ ਨ ਪਸ੍ਸਤਿ, ਅਦਿਟ੍ਠਂ ਅਵਿਦਿਤਂ ਅਸਚ੍ਛਿਕਤਂ ਨ ਉਪਸਮ੍ਪਜ੍ਜ ਵਿਹਰਤਿ, ਨ ਕਾਯੇਨ ਫੁਸਿਤ੍ਵਾ ਵਿਹਰਤੀਤਿ? ਆਮਨ੍ਤਾ. ਅਸੇਖਸ੍ਸ ਅਸੇਖਂ ਞਾਣਂ ਅਤ੍ਥਿ, ਅਸੇਖੋ ਅਸੇਖਂ ਧਮ੍ਮਂ ਨ ਜਾਨਾਤਿ ਨ ਪਸ੍ਸਤਿ, ਅਦਿਟ੍ਠਂ ਅਵਿਦਿਤਂ ਅਸਚ੍ਛਿਕਤਂ ਨ ਉਪਸਮ੍ਪਜ੍ਜ ਵਿਹਰਤਿ, ਨ ਕਾਯੇਨ ਫੁਸਿਤ੍ਵਾ ਵਿਹਰਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸੇਖਸ੍ਸ ਅਸੇਖਂ ਞਾਣਂ ਅਤ੍ਥੀਤਿ? ਆਮਨ੍ਤਾ. ਗੋਤ੍ਰਭੁਨੋ ਪੁਗ੍ਗਲਸ੍ਸ ਸੋਤਾਪਤ੍ਤਿਮਗ੍ਗੇ ਞਾਣਂ ਅਤ੍ਥੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨਸ੍ਸ ਪੁਗ੍ਗਲਸ੍ਸ ਸੋਤਾਪਤ੍ਤਿਫਲੇ ਞਾਣਂ ਅਤ੍ਥੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਕਦਾਗਾਮਿਫਲ… ਅਨਾਗਾਮਿਫਲ… ਅਰਹਤ੍ਤਸਚ੍ਛਿਕਿਰਿਯਾਯ ਪਟਿਪਨ੍ਨਸ੍ਸ ਪੁਗ੍ਗਲਸ੍ਸ ਅਰਹਤ੍ਤੇ ਞਾਣਂ ਅਤ੍ਥੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੪੨੩. ਨ ਵਤ੍ਤਬ੍ਬਂ – ‘‘ਸੇਖਸ੍ਸ ਅਸੇਖਂ ਞਾਣਂ ਅਤ੍ਥੀ’’ਤਿ? ਆਮਨ੍ਤਾ. ਨਨੁ ਆਯਸ੍ਮਾ ਆਨਨ੍ਦੋ ਸੇਖੋ – ‘‘ਭਗਵਾ ਉਲ਼ਾਰੋ’’ਤਿ ਜਾਨਾਤਿ, ‘‘ਸਾਰਿਪੁਤ੍ਤੋ ਥੇਰੋ, ਮਹਾਮੋਗ੍ਗਲ੍ਲਾਨੋ ਥੇਰੋ ਉਲ਼ਾਰੋ’’ਤਿ ਜਾਨਾਤੀਤਿ? ਆਮਨ੍ਤਾ. ਹਞ੍ਚਿ ਆਯਸ੍ਮਾ ਆਨਨ੍ਦੋ ਸੇਖੋ – ‘‘ਭਗਵਾ ਉਲ਼ਾਰੋ’’ਤਿ ਜਾਨਾਤਿ, ‘‘ਸਾਰਿਪੁਤ੍ਤੋ ਥੇਰੋ, ਮਹਾਮੋਗ੍ਗਲ੍ਲਾਨੋ ਥੇਰੋ ਉਲ਼ਾਰੋ’’ਤਿ ਜਾਨਾਤਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਸੇਖਸ੍ਸ ਅਸੇਖਂ ਞਾਣਂ ਅਤ੍ਥੀ’’ਤਿ.

ਅਸੇਖਞਾਣਕਥਾ ਨਿਟ੍ਠਿਤਾ.

੫. ਪਞ੍ਚਮਵਗ੍ਗੋ

(੪੫) ੩. ਵਿਪਰੀਤਕਥਾ

੪੨੪. ਪਥਵੀਕਸਿਣਂ ਸਮਾਪਤ੍ਤਿਂ [ਪਥਵੀਕਸਿਣਸਮਾਪਤ੍ਤਿਂ (ਸੀ. ਕ.)] ਸਮਾਪਨ੍ਨਸ੍ਸ ਵਿਪਰੀਤੇ ਞਾਣਨ੍ਤਿ? ਆਮਨ੍ਤਾ. ਅਨਿਚ੍ਚੇ ਨਿਚ੍ਚਨ੍ਤਿ ਵਿਪਰਿਯੇਸੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਦੁਕ੍ਖੇ ਸੁਖਨ੍ਤਿ…ਪੇ… ਅਨਤ੍ਤਨਿ ਅਤ੍ਤਾਤਿ…ਪੇ… ਅਸੁਭੇ ਸੁਭਨ੍ਤਿ ਵਿਪਰਿਯੇਸੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਪਥਵੀਕਸਿਣਂ ਸਮਾਪਤ੍ਤਿਂ ਸਮਾਪਨ੍ਨਸ੍ਸ ਵਿਪਰੀਤੇ ਞਾਣਨ੍ਤਿ? ਆਮਨ੍ਤਾ. ਅਕੁਸਲਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਨੁ ਕੁਸਲਨ੍ਤਿ? ਆਮਨ੍ਤਾ. ਹਞ੍ਚਿ ਕੁਸਲਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਪਥਵੀਕਸਿਣਂ ਸਮਾਪਤ੍ਤਿਂ ਸਮਾਪਨ੍ਨਸ੍ਸ ਵਿਪਰੀਤੇ ਞਾਣ’’ਨ੍ਤਿ.

ਅਨਿਚ੍ਚੇ ਨਿਚ੍ਚਨ੍ਤਿ ਵਿਪਰਿਯੇਸੋ, ਸੋ ਚ ਅਕੁਸਲੋਤਿ? ਆਮਨ੍ਤਾ. ਪਥਵੀਕਸਿਣਂ ਸਮਾਪਤ੍ਤਿਂ ਸਮਾਪਨ੍ਨਸ੍ਸ ਵਿਪਰੀਤੇ ਞਾਣਂ, ਤਞ੍ਚ ਅਕੁਸਲਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਦੁਕ੍ਖੇ ਸੁਖਨ੍ਤਿ…ਪੇ… ਅਨਤ੍ਤਨਿ ਅਤ੍ਤਾਤਿ…ਪੇ… ਅਸੁਭੇ ਸੁਭਨ੍ਤਿ ਵਿਪਰਿਯੇਸੋ, ਸੋ ਚ ਅਕੁਸਲੋਤਿ? ਆਮਨ੍ਤਾ. ਪਥਵੀਕਸਿਣਂ ਸਮਾਪਤ੍ਤਿਂ ਸਮਾਪਨ੍ਨਸ੍ਸ ਵਿਪਰੀਤੇ ਞਾਣਂ, ਤਞ੍ਚ ਅਕੁਸਲਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੪੨੫. ਪਥਵੀਕਸਿਣਂ ਸਮਾਪਤ੍ਤਿਂ ਸਮਾਪਨ੍ਨਸ੍ਸ ਵਿਪਰੀਤੇ ਞਾਣਂ, ਤਞ੍ਚ ਅਕੁਸਲਨ੍ਤਿ? ਆਮਨ੍ਤਾ. ਅਨਿਚ੍ਚੇ ਨਿਚ੍ਚਨ੍ਤਿ ਵਿਪਰਿਯੇਸੋ, ਸੋ ਚ ਕੁਸਲੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪਥਵੀਕਸਿਣਂ ਸਮਾਪਤ੍ਤਿਂ ਸਮਾਪਨ੍ਨਸ੍ਸ ਵਿਪਰੀਤੇ ਞਾਣਂ, ਤਞ੍ਚ ਅਕੁਸਲਨ੍ਤਿ? ਆਮਨ੍ਤਾ. ਦੁਕ੍ਖੇ ਸੁਖਨ੍ਤਿ…ਪੇ… ਅਨਤ੍ਤਨਿ ਅਤ੍ਤਾਤਿ…ਪੇ… ਅਸੁਭੇ ਸੁਭਨ੍ਤਿ ਵਿਪਰਿਯੇਸੋ, ਸੋ ਚ ਕੁਸਲੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੪੨੬. ਪਥਵੀਕਸਿਣਂ ਸਮਾਪਤ੍ਤਿਂ ਸਮਾਪਨ੍ਨਸ੍ਸ ਵਿਪਰੀਤੇ ਞਾਣਨ੍ਤਿ? ਆਮਨ੍ਤਾ. ਅਰਹਾ ਪਥਵੀਕਸਿਣਂ ਸਮਾਪਤ੍ਤਿਂ ਸਮਾਪਜ੍ਜੇਯ੍ਯਾਤਿ? ਆਮਨ੍ਤਾ. ਹਞ੍ਚਿ ਅਰਹਾ ਪਥਵੀਕਸਿਣਂ ਸਮਾਪਤ੍ਤਿਂ ਸਮਾਪਜ੍ਜੇਯ੍ਯ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਪਥਵੀਕਸਿਣਂ ਸਮਾਪਤ੍ਤਿਂ ਸਮਾਪਨ੍ਨਸ੍ਸ ਵਿਪਰੀਤੇ ਞਾਣ’’ਨ੍ਤਿ.

ਪਥਵੀਕਸਿਣਂ ਸਮਾਪਤ੍ਤਿਂ ਸਮਾਪਨ੍ਨਸ੍ਸ ਵਿਪਰੀਤੇ ਞਾਣਂ, ਅਰਹਾ ਪਥਵੀਕਸਿਣਂ ਸਮਾਪਤ੍ਤਿਂ ਸਮਾਪਜ੍ਜੇਯ੍ਯਾਤਿ? ਆਮਨ੍ਤਾ. ਅਤ੍ਥਿ ਅਰਹਤੋ ਵਿਪਰਿਯੇਸੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਤ੍ਥਿ ਅਰਹਤੋ ਵਿਪਰਿਯੇਸੋਤਿ? ਆਮਨ੍ਤਾ. ਅਤ੍ਥਿ ਅਰਹਤੋ ਸਞ੍ਞਾਵਿਪਰਿਯੇਸੋ ਚਿਤ੍ਤਵਿਪਰਿਯੇਸੋ ਦਿਟ੍ਠਿਵਿਪਰਿਯੇਸੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਨਤ੍ਥਿ ਅਰਹਤੋ ਸਞ੍ਞਾਵਿਪਰਿਯੇਸੋ ਚਿਤ੍ਤਵਿਪਰਿਯੇਸੋ ਦਿਟ੍ਠਿਵਿਪਰਿਯੇਸੋਤਿ? ਆਮਨ੍ਤਾ. ਹਞ੍ਚਿ ਨਤ੍ਥਿ ਅਰਹਤੋ ਸਞ੍ਞਾਵਿਪਰਿਯੇਸੋ ਚਿਤ੍ਤਵਿਪਰਿਯੇਸੋ ਦਿਟ੍ਠਿਵਿਪਰਿਯੇਸੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਅਤ੍ਥਿ ਅਰਹਤੋ ਵਿਪਰਿਯੇਸੋ’’ਤਿ.

੪੨੭. ਨ ਵਤ੍ਤਬ੍ਬਂ – ਪਥਵੀਕਸਿਣਂ ਸਮਾਪਤ੍ਤਿਂ ਸਮਾਪਨ੍ਨਸ੍ਸ ਵਿਪਰੀਤੇ ਞਾਣਨ੍ਤਿ? ਆਮਨ੍ਤਾ. ਪਥਵੀਕਸਿਣਂ ਸਮਾਪਤ੍ਤਿਂ ਸਮਾਪਜ੍ਜਨ੍ਤਸ੍ਸ ਸਬ੍ਬੇਵ ਪਥਵੀਤਿ? ਨ ਹੇਵਂ ਵਤ੍ਤਬ੍ਬੇ. ਤੇਨ ਹਿ ਪਥਵੀਕਸਿਣਂ ਸਮਾਪਤ੍ਤਿਂ ਸਮਾਪਨ੍ਨਸ੍ਸ ਵਿਪਰੀਤੇ ਞਾਣਨ੍ਤਿ.

ਪਥਵੀਕਸਿਣਂ ਸਮਾਪਤ੍ਤਿਂ ਸਮਾਪਨ੍ਨਸ੍ਸ ਵਿਪਰੀਤੇ ਞਾਣਨ੍ਤਿ? ਆਮਨ੍ਤਾ. ਨਨੁ ਪਥਵੀ ਅਤ੍ਥਿ, ਅਤ੍ਥਿ ਚ ਕੋਚਿ ਪਥਵਿਂ ਪਥਵਿਤੋ ਸਮਾਪਜ੍ਜਤੀਤਿ? ਆਮਨ੍ਤਾ. ਹਞ੍ਚਿ ਪਥਵੀ ਅਤ੍ਥਿ, ਅਤ੍ਥਿ ਚ ਕੋਚਿ ਪਥਵਿਂ ਪਥਵਿਤੋ ਸਮਾਪਜ੍ਜਤਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਪਥਵੀਕਸਿਣਂ ਸਮਾਪਤ੍ਤਿਂ ਸਮਾਪਨ੍ਨਸ੍ਸ ਵਿਪਰੀਤੇ ਞਾਣ’’ਨ੍ਤਿ.

ਪਥਵੀ ਅਤ੍ਥਿ, ਪਥਵਿਂ ਪਥਵਿਤੋ ਸਮਾਪਜ੍ਜਨ੍ਤਸ੍ਸ ਵਿਪਰੀਤਂ ਹੋਤੀਤਿ? ਆਮਨ੍ਤਾ. ਨਿਬ੍ਬਾਨਂ ਅਤ੍ਥਿ, ਨਿਬ੍ਬਾਨਂ ਨਿਬ੍ਬਾਨਤੋ ਸਮਾਪਜ੍ਜਨ੍ਤਸ੍ਸ ਵਿਪਰੀਤਂ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਤੇਨ ਹਿ ਨ ਵਤ੍ਤਬ੍ਬਂ – ‘‘ਪਥਵੀਕਸਿਣਂ ਸਮਾਪਤ੍ਤਿਂ ਸਮਾਪਨ੍ਨਸ੍ਸ ਵਿਪਰੀਤੇ ਞਾਣ’’ਨ੍ਤਿ.

ਵਿਪਰੀਤਕਥਾ ਨਿਟ੍ਠਿਤਾ.

੫. ਪਞ੍ਚਮਵਗ੍ਗੋ

(੪੬) ੪. ਨਿਯਾਮਕਥਾ

੪੨੮. ਅਨਿਯਤਸ੍ਸ ਨਿਯਾਮਗਮਨਾਯ ਅਤ੍ਥਿ ਞਾਣਨ੍ਤਿ? ਆਮਨ੍ਤਾ. ਨਿਯਤਸ੍ਸ ਅਨਿਯਾਮਗਮਨਾਯ ਅਤ੍ਥਿ ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਨਿਯਤਸ੍ਸ ਅਨਿਯਾਮਗਮਨਾਯ ਨਤ੍ਥਿ ਞਾਣਨ੍ਤਿ? ਆਮਨ੍ਤਾ. ਅਨਿਯਤਸ੍ਸ ਨਿਯਾਮਗਮਨਾਯ ਨਤ੍ਥਿ ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਨਿਯਤਸ੍ਸ ਨਿਯਾਮਗਮਨਾਯ ਅਤ੍ਥਿ ਞਾਣਨ੍ਤਿ? ਆਮਨ੍ਤਾ. ਨਿਯਤਸ੍ਸ ਨਿਯਾਮਗਮਨਾਯ ਅਤ੍ਥਿ ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਨਿਯਤਸ੍ਸ ਨਿਯਾਮਗਮਨਾਯ ਨਤ੍ਥਿ ਞਾਣਨ੍ਤਿ? ਆਮਨ੍ਤਾ. ਅਨਿਯਤਸ੍ਸ ਨਿਯਾਮਗਮਨਾਯ ਨਤ੍ਥਿ ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਨਿਯਤਸ੍ਸ ਨਿਯਾਮਗਮਨਾਯ ਅਤ੍ਥਿ ਞਾਣਨ੍ਤਿ? ਆਮਨ੍ਤਾ. ਅਨਿਯਤਸ੍ਸ ਅਨਿਯਾਮਗਮਨਾਯ ਅਤ੍ਥਿ ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਨਿਯਤਸ੍ਸ ਅਨਿਯਾਮਗਮਨਾਯ ਨਤ੍ਥਿ ਞਾਣਨ੍ਤਿ? ਆਮਨ੍ਤਾ. ਅਨਿਯਤਸ੍ਸ ਨਿਯਾਮਗਮਨਾਯ ਨਤ੍ਥਿ ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੪੨੯. ਅਨਿਯਤਸ੍ਸ ਨਿਯਾਮਗਮਨਾਯ ਅਤ੍ਥਿ ਞਾਣਨ੍ਤਿ? ਆਮਨ੍ਤਾ. ਅਨਿਯਤਸ੍ਸ ਨਿਯਾਮਗਮਨਾਯ ਅਤ੍ਥਿ ਨਿਯਾਮੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਨਿਯਤਸ੍ਸ ਨਿਯਾਮਗਮਨਾਯ ਅਤ੍ਥਿ ਞਾਣਨ੍ਤਿ? ਆਮਨ੍ਤਾ. ਅਨਿਯਤਸ੍ਸ ਨਿਯਾਮਗਮਨਾਯ ਅਤ੍ਥਿ ਸਤਿਪਟ੍ਠਾਨਾ… ਸਮ੍ਮਪ੍ਪਧਾਨਾ… ਇਦ੍ਧਿਪਾਦਾ… ਇਨ੍ਦ੍ਰਿਯਾ… ਬਲਾ… ਬੋਜ੍ਝਙ੍ਗਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਨਿਯਤਸ੍ਸ ਨਿਯਾਮਗਮਨਾਯ ਨਤ੍ਥਿ ਨਿਯਾਮੋਤਿ? ਆਮਨ੍ਤਾ. ਹਞ੍ਚਿ ਅਨਿਯਤਸ੍ਸ ਨਿਯਾਮਗਮਨਾਯ ਨਤ੍ਥਿ ਨਿਯਾਮੋ, ਨੋ ਵਤ ਰੇ ਵਤ੍ਤਬ੍ਬੇ – ‘‘ਅਨਿਯਤਸ੍ਸ ਨਿਯਾਮਗਮਨਾਯ ਅਤ੍ਥਿ ਞਾਣ’’ਨ੍ਤਿ.

ਅਨਿਯਤਸ੍ਸ ਨਿਯਾਮਗਮਨਾਯ ਨਤ੍ਥਿ ਸਤਿਪਟ੍ਠਾਨਾ…ਪੇ… ਬੋਜ੍ਝਙ੍ਗਾਤਿ? ਆਮਨ੍ਤਾ. ਹਞ੍ਚਿ ਅਨਿਯਤਸ੍ਸ ਨਿਯਾਮਗਮਨਾਯ ਨਤ੍ਥਿ ਬੋਜ੍ਝਙ੍ਗਾ, ਨੋ ਵਤ ਰੇ ਵਤ੍ਤਬ੍ਬੇ – ‘‘ਅਨਿਯਤਸ੍ਸ ਨਿਯਾਮਗਮਨਾਯ ਅਤ੍ਥਿ ਞਾਣ’’ਨ੍ਤਿ.

੪੩੦. ਅਨਿਯਤਸ੍ਸ ਨਿਯਾਮਗਮਨਾਯ ਅਤ੍ਥਿ ਞਾਣਨ੍ਤਿ? ਆਮਨ੍ਤਾ. ਗੋਤ੍ਰਭੁਨੋ ਪੁਗ੍ਗਲਸ੍ਸ ਸੋਤਾਪਤ੍ਤਿਮਗ੍ਗੇ ਞਾਣਂ ਅਤ੍ਥੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨਸ੍ਸ ਪੁਗ੍ਗਲਸ੍ਸ ਸੋਤਾਪਤ੍ਤਿਫਲੇ ਞਾਣਂ ਅਤ੍ਥੀਤਿ? ਨ ਹੇਵਂ ਵਤ੍ਤਬ੍ਬੇ …ਪੇ… ਅਰਹਤ੍ਤਸਚ੍ਛਿਕਿਰਿਯਾਯ ਪਟਿਪਨ੍ਨਸ੍ਸ ਪੁਗ੍ਗਲਸ੍ਸ ਅਰਹਤ੍ਤੇ ਞਾਣਂ ਅਤ੍ਥੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੪੩੧. ਨ ਵਤ੍ਤਬ੍ਬਂ – ‘‘ਅਨਿਯਤਸ੍ਸ ਨਿਯਾਮਗਮਨਾਯ ਅਤ੍ਥਿ ਞਾਣ’’ਨ੍ਤਿ? ਆਮਨ੍ਤਾ. ਨਨੁ ਭਗਵਾ ਜਾਨਾਤਿ – ‘‘ਅਯਂ ਪੁਗ੍ਗਲੋ ਸਮ੍ਮਤ੍ਤਨਿਯਾਮਂ ਓਕ੍ਕਮਿਸ੍ਸਤਿ, ਭਬ੍ਬੋ ਅਯਂ ਪੁਗ੍ਗਲੋ ਧਮ੍ਮਂ ਅਭਿਸਮੇਤੁ’’ਨ੍ਤਿ? ਆਮਨ੍ਤਾ. ਹਞ੍ਚਿ ਭਗਵਾ ਜਾਨਾਤਿ – ‘‘ਅਯਂ ਪੁਗ੍ਗਲੋ ਸਮ੍ਮਤ੍ਤਨਿਯਾਮਂ ਓਕ੍ਕਮਿਸ੍ਸਤਿ, ਭਬ੍ਬੋ ਅਯਂ ਪੁਗ੍ਗਲੋ ਧਮ੍ਮਂ ਅਭਿਸਮੇਤੁਂ,’’ ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਅਨਿਯਤਸ੍ਸ ਨਿਯਾਮਗਮਨਾਯ ਅਤ੍ਥਿ ਞਾਣ’’ਨ੍ਤਿ.

ਨਿਯਾਮਕਥਾ ਨਿਟ੍ਠਿਤਾ.

੫. ਪਞ੍ਚਮਵਗ੍ਗੋ

(੪੭) ੫. ਪਟਿਸਮ੍ਭਿਦਾਕਥਾ

੪੩੨. ਸਬ੍ਬਂ ਞਾਣਂ ਪਟਿਸਮ੍ਭਿਦਾਤਿ? ਆਮਨ੍ਤਾ. ਸਮ੍ਮੁਤਿਞਾਣਂ ਪਟਿਸਮ੍ਭਿਦਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਮ੍ਮੁਤਿਞਾਣਂ ਪਟਿਸਮ੍ਭਿਦਾਤਿ? ਆਮਨ੍ਤਾ. ਯੇ ਕੇਚਿ ਸਮ੍ਮੁਤਿਂ ਜਾਨਨ੍ਤਿ, ਸਬ੍ਬੇ ਤੇ ਪਟਿਸਮ੍ਭਿਦਾਪਤ੍ਤਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਬ੍ਬਂ ਞਾਣਂ ਪਟਿਸਮ੍ਭਿਦਾਤਿ? ਆਮਨ੍ਤਾ. ਚੇਤੋਪਰਿਯਾਯੇ ਞਾਣਂ ਪਟਿਸਮ੍ਭਿਦਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਚੇਤੋਪਰਿਯਾਯੇ ਞਾਣਂ ਪਟਿਸਮ੍ਭਿਦਾਤਿ? ਆਮਨ੍ਤਾ. ਯੇ ਕੇਚਿ ਪਰਚਿਤ੍ਤਂ ਜਾਨਨ੍ਤਿ, ਸਬ੍ਬੇ ਤੇ ਪਟਿਸਮ੍ਭਿਦਾਪਤ੍ਤਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਬ੍ਬਂ ਞਾਣਂ ਪਟਿਸਮ੍ਭਿਦਾਤਿ? ਆਮਨ੍ਤਾ. ਸਬ੍ਬਾ ਪਞ੍ਞਾ ਪਟਿਸਮ੍ਭਿਦਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਬ੍ਬਾ ਪਞ੍ਞਾ ਪਟਿਸਮ੍ਭਿਦਾਤਿ? ਆਮਨ੍ਤਾ. ਪਥਵੀਕਸਿਣਂ ਸਮਾਪਤ੍ਤਿਂ ਸਮਾਪਨ੍ਨਸ੍ਸ ਅਤ੍ਥਿ ਪਞ੍ਞਾ, ਸਾ ਪਞ੍ਞਾ ਪਟਿਸਮ੍ਭਿਦਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਆਪੋਕਸਿਣਂ…ਪੇ… ਤੇਜੋਕਸਿਣਂ…ਪੇ… ਵਾਯੋਕਸਿਣਂ…ਪੇ… ਨੀਲਕਸਿਣਂ…ਪੇ… ਪੀਤਕਸਿਣਂ…ਪੇ… ਲੋਹਿਤਕਸਿਣਂ…ਪੇ… ਓਦਾਤਕਸਿਣਂ…ਪੇ… ਆਕਾਸਾਨਞ੍ਚਾਯਤਨਂ…ਪੇ… ਵਿਞ੍ਞਾਣਞ੍ਚਾਯਤਨਂ…ਪੇ… ਆਕਿਞ੍ਚਞ੍ਞਾਯਤਨਂ…ਪੇ… ਨੇਵਸਞ੍ਞਾਨਾਸਞ੍ਞਾਯਤਨਂ ਸਮਾਪਨ੍ਨਸ੍ਸ…ਪੇ… ਦਾਨਂ ਦਦਨ੍ਤਸ੍ਸ…ਪੇ… ਚੀਵਰਂ ਦਦਨ੍ਤਸ੍ਸ…ਪੇ… ਪਿਣ੍ਡਪਾਤਂ ਦਦਨ੍ਤਸ੍ਸ…ਪੇ… ਸੇਨਾਸਨਂ ਦਦਨ੍ਤਸ੍ਸ…ਪੇ… ਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਂ ਦਦਨ੍ਤਸ੍ਸ ਅਤ੍ਥਿ ਪਞ੍ਞਾ, ਸਾ ਪਞ੍ਞਾ ਪਟਿਸਮ੍ਭਿਦਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੪੩੩. ਨ ਵਤ੍ਤਬ੍ਬਂ – ‘‘ਸਬ੍ਬਂ ਞਾਣਂ ਪਟਿਸਮ੍ਭਿਦਾ’’ਤਿ? ਆਮਨ੍ਤਾ. ਅਤ੍ਥਿ ਲੋਕੁਤ੍ਤਰਾ ਪਞ੍ਞਾ, ਸਾ ਪਞ੍ਞਾ ਨ ਪਟਿਸਮ੍ਭਿਦਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਤੇਨ ਹਿ ਸਬ੍ਬਂ ਞਾਣਂ ਪਟਿਸਮ੍ਭਿਦਾਤਿ.

ਪਟਿਸਮ੍ਭਿਦਾਕਥਾ ਨਿਟ੍ਠਿਤਾ.

੫. ਪਞ੍ਚਮਵਗ੍ਗੋ

(੪੮) ੬. ਸਮ੍ਮੁਤਿਞਾਣਕਥਾ

੪੩੪. ਨ ਵਤ੍ਤਬ੍ਬਂ – ‘‘ਸਮ੍ਮੁਤਿਞਾਣਂ ਸਚ੍ਚਾਰਮ੍ਮਣਞ੍ਞੇਵ ਨ ਅਞ੍ਞਾਰਮ੍ਮਣ’’ਨ੍ਤਿ? ਆਮਨ੍ਤਾ. ਨਨੁ ਪਥਵੀਕਸਿਣਂ ਸਮਾਪਤ੍ਤਿਂ ਸਮਾਪਨ੍ਨਸ੍ਸ ਅਤ੍ਥਿ ਞਾਣਂ, ਪਥਵੀਕਸਿਣਞ੍ਚ ਸਮ੍ਮੁਤਿਸਚ੍ਚਮ੍ਹੀਤਿ? ਆਮਨ੍ਤਾ. ਹਞ੍ਚਿ ਪਥਵੀਕਸਿਣਂ ਸਮਾਪਤ੍ਤਿਂ ਸਮਾਪਨ੍ਨਸ੍ਸ ਅਤ੍ਥਿ ਞਾਣਂ, ਪਥਵੀਕਸਿਣਞ੍ਚ ਸਮ੍ਮੁਤਿਸਚ੍ਚਮ੍ਹਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਸਮ੍ਮੁਤਿਞਾਣਂ ਸਚ੍ਚਾਰਮ੍ਮਣਞ੍ਞੇਵ ਨ ਅਞ੍ਞਾਰਮ੍ਮਣ’’ਨ੍ਤਿ.

ਨ ਵਤ੍ਤਬ੍ਬਂ – ‘‘ਸਮ੍ਮੁਤਿਞਾਣਂ ਸਚ੍ਚਾਰਮ੍ਮਣਞ੍ਞੇਵ ਨ ਅਞ੍ਞਾਰਮ੍ਮਣ’’ਨ੍ਤਿ? ਆਮਨ੍ਤਾ…ਪੇ… ਨਨੁ ਆਪੋਕਸਿਣਂ…ਪੇ… ਤੇਜੋਕਸਿਣਂ…ਪੇ… ਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਂ ਦਦਨ੍ਤਸ੍ਸ ਅਤ੍ਥਿ ਞਾਣਂ, ਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰੋ ਚ ਸਮ੍ਮੁਤਿਸਚ੍ਚਮ੍ਹੀਤਿ? ਆਮਨ੍ਤਾ. ਹਞ੍ਚਿ ਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਂ ਦਦਨ੍ਤਸ੍ਸ ਅਤ੍ਥਿ ਞਾਣਂ, ਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰੋ ਚ ਸਮ੍ਮੁਤਿਸਚ੍ਚਮ੍ਹਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਸਮ੍ਮੁਤਿਞਾਣਂ ਸਚ੍ਚਾਰਮ੍ਮਣਞ੍ਞੇਵ ਨ ਅਞ੍ਞਾਰਮ੍ਮਣ’’ਨ੍ਤਿ.

੪੩੫. ਸਮ੍ਮੁਤਿਞਾਣਂ ਸਚ੍ਚਾਰਮ੍ਮਣਞ੍ਞੇਵ ਨ ਅਞ੍ਞਾਰਮ੍ਮਣਨ੍ਤਿ? ਆਮਨ੍ਤਾ. ਤੇਨ ਞਾਣੇਨ ਦੁਕ੍ਖਂ ਪਰਿਜਾਨਾਤਿ, ਸਮੁਦਯਂ ਪਜਹਤਿ, ਨਿਰੋਧਂ ਸਚ੍ਛਿਕਰੋਤਿ, ਮਗ੍ਗਂ ਭਾਵੇਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਮ੍ਮੁਤਿਞਾਣਕਥਾ ਨਿਟ੍ਠਿਤਾ.

੫. ਪਞ੍ਚਮਵਗ੍ਗੋ

(੪੯) ੭. ਚਿਤ੍ਤਾਰਮ੍ਮਣਕਥਾ

੪੩੬. ਚੇਤੋਪਰਿਯਾਯੇ ਞਾਣਂ ਚਿਤ੍ਤਾਰਮ੍ਮਣਞ੍ਞੇਵ ਨ ਅਞ੍ਞਾਰਮ੍ਮਣਨ੍ਤਿ? ਆਮਨ੍ਤਾ. ਨਨੁ ਅਤ੍ਥਿ ਕੋਚਿ ‘‘ਸਰਾਗਂ ਚਿਤ੍ਤਂ ਸਰਾਗਂ ਚਿਤ੍ਤ’’ਨ੍ਤਿ ਪਜਾਨਾਤੀਤਿ? ਆਮਨ੍ਤਾ. ਹਞ੍ਚਿ ਅਤ੍ਥਿ ਕੋਚਿ ‘‘ਸਰਾਗਂ ਚਿਤ੍ਤਂ ਸਰਾਗਂ ਚਿਤ੍ਤ’’ਨ੍ਤਿ ਪਜਾਨਾਤਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਚੇਤੋਪਰਿਯਾਯੇ ਞਾਣਂ ਚਿਤ੍ਤਾਰਮ੍ਮਣਞ੍ਞੇਵ ਨ ਅਞ੍ਞਾਰਮ੍ਮਣ’’ਨ੍ਤਿ.

ਨਨੁ ਅਤ੍ਥਿ ਕੋਚਿ ਵੀਤਰਾਗਂ ਚਿਤ੍ਤਂ…ਪੇ… ਸਦੋਸਂ ਚਿਤ੍ਤਂ… ਵੀਤਦੋਸਂ ਚਿਤ੍ਤਂ… ਸਮੋਹਂ ਚਿਤ੍ਤਂ… ਵੀਤਮੋਹਂ ਚਿਤ੍ਤਂ… ਸਂਖਿਤ੍ਤਂ ਚਿਤ੍ਤਂ… ਵਿਕ੍ਖਿਤ੍ਤਂ ਚਿਤ੍ਤਂ… ਮਹਗ੍ਗਤਂ ਚਿਤ੍ਤਂ… ਅਮਹਗ੍ਗਤਂ ਚਿਤ੍ਤਂ… ਸਉਤ੍ਤਰਂ ਚਿਤ੍ਤਂ… ਅਨੁਤ੍ਤਰਂ ਚਿਤ੍ਤਂ… ਸਮਾਹਿਤਂ ਚਿਤ੍ਤਂ… ਅਸਮਾਹਿਤਂ ਚਿਤ੍ਤਂ… ਵਿਮੁਤ੍ਤਂ ਚਿਤ੍ਤਂ…ਪੇ… ਅਵਿਮੁਤ੍ਤਂ ਚਿਤ੍ਤਂ ‘‘ਅਵਿਮੁਤ੍ਤਂ ਚਿਤ੍ਤ’’ਨ੍ਤਿ ਪਜਾਨਾਤੀਤਿ? ਆਮਨ੍ਤਾ. ਹਞ੍ਚਿ ਅਤ੍ਥਿ ਕੋਚਿ ‘‘ਅਵਿਮੁਤ੍ਤਂ ਚਿਤ੍ਤਂ ਅਵਿਮੁਤ੍ਤਂ ਚਿਤ੍ਤ’’ਨ੍ਤਿ ਪਜਾਨਾਤਿ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਚੇਤੋਪਰਿਯਾਯੇ ਞਾਣਂ ਚਿਤ੍ਤਾਰਮ੍ਮਣਞ੍ਞੇਵ ਨ ਅਞ੍ਞਾਰਮ੍ਮਣ’’ਨ੍ਤਿ.

੪੩੭. ਫਸ੍ਸਾਰਮ੍ਮਣੇ ਞਾਣਂ ਵਤ੍ਤਬ੍ਬਂ – ‘‘ਚੇਤੋਪਰਿਯਾਯੇ ਞਾਣ’’ਨ੍ਤਿ? ਆਮਨ੍ਤਾ. ਹਞ੍ਚਿ ਫਸ੍ਸਾਰਮ੍ਮਣੇ ਞਾਣਂ ਵਤ੍ਤਬ੍ਬਂ ਚੇਤੋਪਰਿਯਾਯੇ ਞਾਣਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਚੇਤੋਪਰਿਯਾਯੇ ਞਾਣਂ ਚਿਤ੍ਤਾਰਮ੍ਮਣਞ੍ਞੇਵ ਨ ਅਞ੍ਞਾਰਮ੍ਮਣ’’ਨ੍ਤਿ. ਵੇਦਨਾਰਮ੍ਮਣੇ ਞਾਣਂ…ਪੇ… ਸਞ੍ਞਾਰਮ੍ਮਣੇ ਞਾਣਂ… ਚੇਤਨਾਰਮ੍ਮਣੇ ਞਾਣਂ… ਚਿਤ੍ਤਾਰਮ੍ਮਣੇ ਞਾਣਂ… ਸਦ੍ਧਾਰਮ੍ਮਣੇ ਞਾਣਂ… ਵੀਰਿਯਾਰਮ੍ਮਣੇ ਞਾਣਂ… ਸਤਾਰਮ੍ਮਣੇ ਞਾਣਂ… ਸਮਾਧਾਰਮ੍ਮਣੇ ਞਾਣਂ… ਪਞ੍ਞਾਰਮ੍ਮਣੇ ਞਾਣਂ… ਰਾਗਾਰਮ੍ਮਣੇ ਞਾਣਂ … ਦੋਸਾਰਮ੍ਮਣੇ ਞਾਣਂ… ਮੋਹਾਰਮ੍ਮਣੇ ਞਾਣਂ…ਪੇ… ਅਨੋਤ੍ਤਪ੍ਪਾਰਮ੍ਮਣੇ ਞਾਣਂ ਵਤ੍ਤਬ੍ਬਂ – ‘‘ਚੇਤੋਪਰਿਯਾਯੇ ਞਾਣ’’ਨ੍ਤਿ? ਆਮਨ੍ਤਾ. ਹਞ੍ਚਿ ਅਨੋਤ੍ਤਪ੍ਪਾਰਮ੍ਮਣੇ ਞਾਣਂ ਵਤ੍ਤਬ੍ਬਂ ਚੇਤੋਪਰਿਯਾਯੇ ਞਾਣਂ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਚੇਤੋਪਰਿਯਾਯੇ ਞਾਣਂ ਚਿਤ੍ਤਾਰਮ੍ਮਣਞ੍ਞੇਵ ਨ ਅਞ੍ਞਾਰਮ੍ਮਣ’’ਨ੍ਤਿ.

ਫਸ੍ਸਾਰਮ੍ਮਣੇ ਞਾਣਂ ਨ ਵਤ੍ਤਬ੍ਬਂ – ‘‘ਚੇਤੋਪਰਿਯਾਯੇ ਞਾਣ’’ਨ੍ਤਿ? ਆਮਨ੍ਤਾ. ਫਸ੍ਸਪਰਿਯਾਯੇ ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਵੇਦਨਾਰਮ੍ਮਣੇ ਞਾਣਂ…ਪੇ… ਸਞ੍ਞਾਰਮ੍ਮਣੇ ਞਾਣਂ…ਪੇ… ਅਨੋਤ੍ਤਪ੍ਪਾਰਮ੍ਮਣੇ ਞਾਣਂ ਨ ਵਤ੍ਤਬ੍ਬਂ – ‘‘ਚੇਤੋਪਰਿਯਾਯੇ ਞਾਣ’’ਨ੍ਤਿ? ਆਮਨ੍ਤਾ. ਅਨੋਤ੍ਤਪ੍ਪਪਰਿਯਾਯੇ ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੪੩੮. ਨ ਵਤ੍ਤਬ੍ਬਂ – ‘‘ਚੇਤੋਪਰਿਯਾਯੇ ਞਾਣਂ ਚਿਤ੍ਤਾਰਮ੍ਮਣਞ੍ਞੇਵ ਨ ਅਞ੍ਞਾਰਮ੍ਮਣ’’ਨ੍ਤਿ? ਆਮਨ੍ਤਾ. ਨਨੁ ਚੇਤੋਪਰਿਯਾਯੇ ਞਾਣਨ੍ਤਿ? ਆਮਨ੍ਤਾ. ਹਞ੍ਚਿ ਚੇਤੋਪਰਿਯਾਯੇ ਞਾਣਂ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਚੇਤੋਪਰਿਯਾਯੇ ਞਾਣਂ ਚਿਤ੍ਤਾਰਮ੍ਮਣਞ੍ਞੇਵ ਨ ਅਞ੍ਞਾਰਮ੍ਮਣ’’ਨ੍ਤਿ.

ਚਿਤ੍ਤਾਰਮ੍ਮਣਕਥਾ ਨਿਟ੍ਠਿਤਾ.

੫. ਪਞ੍ਚਮਵਗ੍ਗੋ

(੫੦) ੮. ਅਨਾਗਤਞਾਣਕਥਾ

੪੩੯. ਅਨਾਗਤੇ ਞਾਣਂ ਅਤ੍ਥੀਤਿ? ਆਮਨ੍ਤਾ. ਅਨਾਗਤਂ ਮੂਲਤੋ ਜਾਨਾਤਿ, ਹੇਤੁਤੋ ਜਾਨਾਤਿ, ਨਿਦਾਨਤੋ ਜਾਨਾਤਿ, ਸਮ੍ਭਵਤੋ ਜਾਨਾਤਿ, ਪਭਵਤੋ ਜਾਨਾਤਿ, ਸਮੁਟ੍ਠਾਨਤੋ ਜਾਨਾਤਿ, ਆਹਾਰਤੋ ਜਾਨਾਤਿ, ਆਰਮ੍ਮਣਤੋ ਜਾਨਾਤਿ, ਪਚ੍ਚਯਤੋ ਜਾਨਾਤਿ, ਸਮੁਦਯਤੋ ਜਾਨਾਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਨਾਗਤੇ ਞਾਣਂ ਅਤ੍ਥੀਤਿ? ਆਮਨ੍ਤਾ. ਅਨਾਗਤਂ ਹੇਤੁਪਚ੍ਚਯਤਂ ਜਾਨਾਤਿ, ਆਰਮ੍ਮਣਪਚ੍ਚਯਤਂ ਜਾਨਾਤਿ, ਅਧਿਪਤਿਪਚ੍ਚਯਤਂ ਜਾਨਾਤਿ, ਅਨਨ੍ਤਰਪਚ੍ਚਯਤਂ ਜਾਨਾਤਿ, ਸਮਨਨ੍ਤਰਪਚ੍ਚਯਤਂ ਜਾਨਾਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਅਨਾਗਤੇ ਞਾਣਂ ਅਤ੍ਥੀਤਿ? ਆਮਨ੍ਤਾ. ਗੋਤ੍ਰਭੁਨੋ ਪੁਗ੍ਗਲਸ੍ਸ ਸੋਤਾਪਤ੍ਤਿਮਗ੍ਗੇ ਞਾਣਂ ਅਤ੍ਥੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ…. ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨਸ੍ਸ ਪੁਗ੍ਗਲਸ੍ਸ ਸੋਤਾਪਤ੍ਤਿਫਲੇ ਞਾਣਂ ਅਤ੍ਥੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਕਦਾਗਾਮਿ…ਪੇ… ਅਨਾਗਾਮਿ …ਪੇ… ਅਰਹਤ੍ਤਸਚ੍ਛਿਕਿਰਿਯਾਯ ਪਟਿਪਨ੍ਨਸ੍ਸ ਪੁਗ੍ਗਲਸ੍ਸ ਅਰਹਤ੍ਤੇ ਞਾਣਂ ਅਤ੍ਥੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੪੪੦. ਨ ਵਤ੍ਤਬ੍ਬਂ – ‘‘ਅਨਾਗਤੇ ਞਾਣਂ ਅਤ੍ਥੀ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਪਾਟਲਿਪੁਤ੍ਤਸ੍ਸ ਖੋ, ਆਨਨ੍ਦ, ਤਯੋ ਅਨ੍ਤਰਾਯਾ ਭਵਿਸ੍ਸਨ੍ਤਿ – ਅਗ੍ਗਿਤੋ ਵਾ ਉਦਕਤੋ ਵਾ ਮਿਥੁਭੇਦਾ ਵਾ’’ਤਿ [ਮਹਾਵ. ੨੮੬; ਦੀ. ਨਿ. ੨.੧੫੨; ਉਦਾ. ੭੬]! ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਅਨਾਗਤੇ ਞਾਣਂ ਅਤ੍ਥੀਤਿ.

ਅਨਾਗਤਞਾਣਕਥਾ ਨਿਟ੍ਠਿਤਾ.

੫. ਪਞ੍ਚਮਵਗ੍ਗੋ

(੫੧) ੯. ਪਟੁਪ੍ਪਨ੍ਨਕਥਾ

੪੪੧. ਪਟੁਪ੍ਪਨ੍ਨੇ [ਪਚ੍ਚੁਪ੍ਪਨ੍ਨੇ (ਸੀ. ਸ੍ਯਾ.)] ਞਾਣਂ ਅਤ੍ਥੀਤਿ? ਆਮਨ੍ਤਾ. ਤੇਨ ਞਾਣੇਨ ਤਂ ਞਾਣਂ ਜਾਨਾਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਤੇਨ ਞਾਣੇਨ ਤਂ ਞਾਣਂ ਜਾਨਾਤੀਤਿ? ਆਮਨ੍ਤਾ. ਤੇਨ ਞਾਣੇਨ ਤਂ ਞਾਣਂ ‘‘ਞਾਣ’’ਨ੍ਤਿ ਜਾਨਾਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਤੇਨ ਞਾਣੇਨ ਤਂ ਞਾਣਂ ‘‘ਞਾਣ’’ਨ੍ਤਿ ਜਾਨਾਤੀਤਿ? ਆਮਨ੍ਤਾ. ਤਂ ਞਾਣਂ ਤਸ੍ਸ ਞਾਣਸ੍ਸ ਆਰਮ੍ਮਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਤਂ ਞਾਣਂ ਤਸ੍ਸ ਞਾਣਸ੍ਸ ਆਰਮ੍ਮਣਨ੍ਤਿ? ਆਮਨ੍ਤਾ. ਤੇਨ ਫਸ੍ਸੇਨ ਤਂ ਫਸ੍ਸਂ ਫੁਸਤਿ, ਤਾਯ ਵੇਦਨਾਯ ਤਂ ਵੇਦਨਂ ਵੇਦੇਤਿ, ਤਾਯ ਸਞ੍ਞਾਯ ਤਂ ਸਞ੍ਞਂ ਸਞ੍ਜਾਨਾਤਿ, ਤਾਯ ਚੇਤਨਾਯ ਤਂ ਚੇਤਨਂ ਚੇਤੇਤਿ, ਤੇਨ ਚਿਤ੍ਤੇਨ ਤਂ ਚਿਤ੍ਤਂ ਚਿਨ੍ਤੇਤਿ, ਤੇਨ ਵਿਤਕ੍ਕੇਨ ਤਂ ਵਿਤਕ੍ਕਂ ਵਿਤਕ੍ਕੇਤਿ, ਤੇਨ ਵਿਚਾਰੇਨ ਤਂ ਵਿਚਾਰਂ ਵਿਚਾਰੇਤਿ, ਤਾਯ ਪੀਤਿਯਾ ਤਂ ਪੀਤਿਂ ਪਿਯਾਯਤਿ, ਤਾਯ ਸਤਿਯਾ ਤਂ ਸਤਿਂ ਸਰਤਿ, ਤਾਯ ਪਞ੍ਞਾਯ ਤਂ ਪਞ੍ਞਂ ਪਜਾਨਾਤਿ, ਤੇਨ ਖਗ੍ਗੇਨ ਤਂ ਖਗ੍ਗਂ ਛਿਨ੍ਦਤਿ, ਤੇਨ ਫਰਸੁਨਾ ਤਂ ਫਰਸੁਂ ਤਚ੍ਛਤਿ, ਤਾਯ ਕੁਧਾਰਿਯਾ ਤਂ ਕੁਧਾਰਿਂ ਤਚ੍ਛਤਿ, ਤਾਯ ਵਾਸਿਯਾ ਤਂ ਵਾਸਿਂ ਤਚ੍ਛਤਿ, ਤਾਯ ਸੂਚਿਯਾ ਤਂ ਸੂਚਿਂ ਸਿਬ੍ਬੇਤਿ, ਤੇਨ ਅਙ੍ਗੁਲਗ੍ਗੇਨ ਤਂ ਅਙ੍ਗੁਲਗ੍ਗਂ ਪਰਾਮਸਤਿ, ਤੇਨ ਨਾਸਿਕਗ੍ਗੇਨ ਤਂ ਨਾਸਿਕਗ੍ਗਂ ਪਰਾਮਸਤਿ, ਤੇਨ ਮਤ੍ਥਕੇਨ ਤਂ ਮਤ੍ਥਕਂ ਪਰਾਮਸਤਿ, ਤੇਨ ਗੂਥੇਨ ਤਂ ਗੂਥਂ ਧੋਵਤਿ, ਤੇਨ ਮੁਤ੍ਤੇਨ ਤਂ ਮੁਤ੍ਤਂ ਧੋਵਤਿ, ਤੇਨ ਖੇਲ਼ੇਨ ਤਂ ਖੇਲ਼ਂ ਧੋਵਤਿ, ਤੇਨ ਪੁਬ੍ਬੇਨ ਤਂ ਪੁਬ੍ਬਂ ਧੋਵਤਿ, ਤੇਨ ਲੋਹਿਤੇਨ ਤਂ ਲੋਹਿਤਂ ਧੋਵਤੀਤਿ? ਨ ਹੇਵਂ ਵਤ੍ਤਬ੍ਬੇ …ਪੇ….

੪੪੨. ਨ ਵਤ੍ਤਬ੍ਬਂ – ‘‘ਪਟੁਪ੍ਪਨ੍ਨੇ ਞਾਣਂ ਅਤ੍ਥੀ’’ਤਿ? ਆਮਨ੍ਤਾ. ਨਨੁ ਸਬ੍ਬਸਙ੍ਖਾਰੇ ਅਨਿਚ੍ਚਤੋ ਦਿਟ੍ਠੇ ਤਮ੍ਪਿ ਞਾਣਂ ਅਨਿਚ੍ਚਤੋ ਦਿਟ੍ਠਂ ਹੋਤੀਤਿ? ਆਮਨ੍ਤਾ. ਹਞ੍ਚਿ ਸਬ੍ਬਸਙ੍ਖਾਰੇ ਅਨਿਚ੍ਚਤੋ ਦਿਟ੍ਠੇ ਤਮ੍ਪਿ ਞਾਣਂ ਅਨਿਚ੍ਚਤੋ ਦਿਟ੍ਠਂ ਹੋਤਿ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਪਟੁਪ੍ਪਨ੍ਨੇ ਞਾਣਂ ਅਤ੍ਥੀ’’ਤਿ.

ਪਟੁਪ੍ਪਨ੍ਨਞਾਣਕਥਾ [ਪਚ੍ਚੁਪ੍ਪਨ੍ਨਕਥਾ (ਸੀ.)] ਨਿਟ੍ਠਿਤਾ.

੫. ਪਞ੍ਚਮਵਗ੍ਗੋ

(੫੨) ੧੦. ਫਲਞਾਣਕਥਾ

੪੪੩. ਸਾਵਕਸ੍ਸ ਫਲੇ ਞਾਣਂ ਅਤ੍ਥੀਤਿ? ਆਮਨ੍ਤਾ. ਸਾਵਕੋ ਫਲਸ੍ਸ ਕਤਂ ਪਞ੍ਞਾਪੇਤੀਤਿ? ਨ ਹੇਵਂ ਵਤ੍ਤਬ੍ਬ…ਪੇ….

ਸਾਵਕਸ੍ਸ ਫਲੇ ਞਾਣਂ ਅਤ੍ਥੀਤਿ? ਆਮਨ੍ਤਾ. ਅਤ੍ਥਿ ਸਾਵਕਸ੍ਸ ਫਲਪਰੋਪਰਿਯਤ੍ਤਿ ਇਨ੍ਦ੍ਰਿਯਪਰੋਪਰਿਯਤ੍ਤਿ ਪੁਗ੍ਗਲਪਰੋਪਰਿਯਤ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਾਵਕਸ੍ਸ ਫਲੇ ਞਾਣਂ ਅਤ੍ਥੀਤਿ? ਆਮਨ੍ਤਾ. ਅਤ੍ਥਿ ਸਾਵਕਸ੍ਸ ਖਨ੍ਧਪਞ੍ਞਤ੍ਤਿ ਆਯਤਨਪਞ੍ਞਤ੍ਤਿ ਧਾਤੁਪਞ੍ਞਤ੍ਤਿ ਸਚ੍ਚਪਞ੍ਞਤ੍ਤਿ ਇਨ੍ਦ੍ਰਿਯਪਞ੍ਞਤ੍ਤਿ ਪੁਗ੍ਗਲਪਞ੍ਞਤ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਾਵਕਸ੍ਸ ਫਲੇ ਞਾਣਂ ਅਤ੍ਥੀਤਿ? ਆਮਨ੍ਤਾ. ਸਾਵਕੋ ਜਿਨੋ ਸਤ੍ਥਾ ਸਮ੍ਮਾਸਮ੍ਬੁਦ੍ਧੋ ਸਬ੍ਬਞ੍ਞੂ ਸਬ੍ਬਦਸ੍ਸਾਵੀ ਧਮ੍ਮਸ੍ਸਾਮੀ ਧਮ੍ਮਪ੍ਪਟਿਸਰਣੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

ਸਾਵਕਸ੍ਸ ਫਲੇ ਞਾਣਂ ਅਤ੍ਥੀਤਿ? ਆਮਨ੍ਤਾ. ਸਾਵਕੋ ਅਨੁਪ੍ਪਨ੍ਨਸ੍ਸ ਮਗ੍ਗਸ੍ਸ ਉਪ੍ਪਾਦੇਤਾ ਅਸਞ੍ਜਾਤਸ੍ਸ ਮਗ੍ਗਸ੍ਸ ਸਞ੍ਜਨੇਤਾ ਅਨਕ੍ਖਾਤਸ੍ਸ ਮਗ੍ਗਸ੍ਸ ਅਕ੍ਖਾਤਾ ਮਗ੍ਗਞ੍ਞੂ ਮਗ੍ਗਵਿਦੂ ਮਗ੍ਗਕੋਵਿਦੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….

੪੪੪. ਨ ਵਤ੍ਤਬ੍ਬਂ – ‘‘ਸਾਵਕਸ੍ਸ ਫਲੇ ਞਾਣਂ ਅਤ੍ਥੀ’’ਤਿ? ਆਮਨ੍ਤਾ. ਸਾਵਕੋ ਅਞ੍ਞਾਣੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਤੇਨ ਹਿ ਸਾਵਕਸ੍ਸ ਫਲੇ ਞਾਣਂ ਅਤ੍ਥੀਤਿ…ਪੇ….

ਫਲਞਾਣਕਥਾ ਨਿਟ੍ਠਿਤਾ.

ਪਞ੍ਚਮਵਗ੍ਗੋ.

ਤਸ੍ਸੁਦ੍ਦਾਨਂ –

ਵਿਮੁਤ੍ਤਿਞਾਣਂ ਵਿਮੁਤ੍ਤਂ, ਸੇਖਸ੍ਸ ਅਸੇਖਂ ਞਾਣਂ, ਵਿਪਰੀਤੇ ਞਾਣਂ, ਅਨਿਯਤਸ੍ਸ ਨਿਯਾਮਗਮਨਾਯ ਅਤ੍ਥਿ ਞਾਣਂ, ਸਬ੍ਬਂ ਞਾਣਂ ਪਟਿਸਮ੍ਭਿਦਾਤਿ, ਸਮ੍ਮੁਤਿਞਾਣਂ, ਚੇਤੋਪਰਿਯਾਯੇ ਞਾਣਂ, ਅਨਾਗਤੇ ਞਾਣਂ, ਪਟੁਪ੍ਪਨ੍ਨੇ ਞਾਣਂ, ਸਾਵਕਸ੍ਸ ਫਲੇ ਞਾਣਨ੍ਤਿ.

ਮਹਾਪਣ੍ਣਾਸਕੋ.

ਤਸ੍ਸਾਪਿ ਉਦ੍ਦਾਨਂ –

ਸਤ੍ਤੁਪਲਦ੍ਧਿਂ, ਉਪਹਰਤੋ, ਬਲਂ, ਗਿਹਿਸ੍ਸ ਅਰਹਾ ਚ, ਵਿਮੁਤ੍ਤਿਪਞ੍ਚਮਨ੍ਤਿ.