੬. ਛਟ੍ਠਵਗ੍ਗੋ
(੫੩) ੧. ਨਿਯਾਮਕਥਾ
੪੪੫. ਨਿਯਾਮੋ ਅਸਙ੍ਖਤੋਤਿ? ਆਮਨ੍ਤਾ. ਨਿਬ੍ਬਾਨਂ ਤਾਣਂ ਲੇਣਂ ਸਰਣਂ ਪਰਾਯਨਂ ਅਚ੍ਚੁਤਂ ਅਮਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਨਿਯਾਮੋ ਅਸਙ੍ਖਤੋ, ਨਿਬ੍ਬਾਨਂ ਅਸਙ੍ਖਤਨ੍ਤਿ? ਆਮਨ੍ਤਾ. ਦ੍ਵੇ ਅਸਙ੍ਖਤਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਦ੍ਵੇ ਅਸਙ੍ਖਤਾਨੀਤਿ? ਆਮਨ੍ਤਾ. ਦ੍ਵੇ ਤਾਣਾਨਿ ਦ੍ਵੇ ਲੇਣਾਨਿ ਦ੍ਵੇ ਸਰਣਾਨਿ ਦ੍ਵੇ ਪਰਾਯਨਾਨਿ ਦ੍ਵੇ ਅਚ੍ਚੁਤਾਨਿ ਦ੍ਵੇ ਅਮਤਾਨਿ ਦ੍ਵੇ ਨਿਬ੍ਬਾਨਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਦ੍ਵੇ ਨਿਬ੍ਬਾਨਾਨੀਤਿ? ਆਮਨ੍ਤਾ. ਅਤ੍ਥਿ ਦ੍ਵਿਨ੍ਨਂ ਨਿਬ੍ਬਾਨਾਨਂ ਉਚ੍ਚਨੀਚਤਾ ਹੀਨਪਣੀਤਤਾ ਉਕ੍ਕਂਸਾਵਕਂਸੋ ਸੀਮਾ ਵਾ ਭੇਦੋ ਵਾ ਰਾਜਿ ਵਾ ਅਨ੍ਤਰਿਕਾ ਵਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਨਿਯਾਮੋ ਅਸਙ੍ਖਤੋਤਿ? ਆਮਨ੍ਤਾ. ਅਤ੍ਥਿ ਕੇਚਿ ਨਿਯਾਮਂ ਓਕ੍ਕਮਨ੍ਤਿ ਪਟਿਲਭਨ੍ਤਿ ਉਪ੍ਪਾਦੇਨ੍ਤਿ ਸਮੁਪ੍ਪਾਦੇਨ੍ਤਿ ਉਟ੍ਠਾਪੇਨ੍ਤਿ ਸਮੁਟ੍ਠਾਪੇਨ੍ਤਿ ਨਿਬ੍ਬਤ੍ਤੇਨ੍ਤਿ ਅਭਿਨਿਬ੍ਬਤ੍ਤੇਨ੍ਤਿ ਜਨੇਨ੍ਤਿ ਸਞ੍ਜਨੇਨ੍ਤੀਤਿ? ਆਮਨ੍ਤਾ. ਅਤ੍ਥਿ ਕੇਚਿ ਅਸਙ੍ਖਤਂ ਓਕ੍ਕਮਨ੍ਤਿ ਪਟਿਲਭਨ੍ਤਿ ਉਪ੍ਪਾਦੇਨ੍ਤਿ ਸਮੁਪ੍ਪਾਦੇਨ੍ਤਿ ਉਟ੍ਠਾਪੇਨ੍ਤਿ ਸਮੁਟ੍ਠਾਪੇਨ੍ਤਿ ਨਿਬ੍ਬਤ੍ਤੇਨ੍ਤਿ ਅਭਿਨਿਬ੍ਬਤ੍ਤੇਨ੍ਤਿ ਜਨੇਨ੍ਤਿ ਸਞ੍ਜਨੇਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੪੪੬. ਨਿਯਾਮੋ ਅਸਙ੍ਖਤੋਤਿ? ਆਮਨ੍ਤਾ. ਮਗ੍ਗੋ ਅਸਙ੍ਖਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਮਗ੍ਗੋ ਸਙ੍ਖਤੋਤਿ? ਆਮਨ੍ਤਾ. ਨਿਯਾਮੋ ਸਙ੍ਖਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਸੋਤਾਪਤ੍ਤਿਨਿਯਾਮੋ ਅਸਙ੍ਖਤੋਤਿ? ਆਮਨ੍ਤਾ. ਸੋਤਾਪਤ੍ਤਿਮਗ੍ਗੋ ਅਸਙ੍ਖਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਸੋਤਾਪਤ੍ਤਿਮਗ੍ਗੋ ਸਙ੍ਖਤੋਤਿ? ਆਮਨ੍ਤਾ. ਸੋਤਾਪਤ੍ਤਿਨਿਯਾਮੋ ਸਙ੍ਖਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਸਕਦਾਗਾਮਿਨਿਯਾਮੋ…ਪੇ… ਅਨਾਗਾਮਿਨਿਯਾਮੋ…ਪੇ… ਅਰਹਤ੍ਤਨਿਯਾਮੋ ਅਸਙ੍ਖਤੋਤਿ? ਆਮਨ੍ਤਾ. ਅਰਹਤ੍ਤਮਗ੍ਗੋ ਅਸਙ੍ਖਤੋਤਿ? ਨ ਹੇਵਂ ਵਤ੍ਤਬ੍ਬੇ …ਪੇ… ਅਰਹਤ੍ਤਮਗ੍ਗੋ ਸਙ੍ਖਤੋਤਿ? ਆਮਨ੍ਤਾ. ਅਰਹਤ੍ਤਨਿਯਾਮੋ ਸਙ੍ਖਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਸੋਤਾਪਤ੍ਤਿਨਿਯਾਮੋ ਅਸਙ੍ਖਤੋ…ਪੇ… ਅਰਹਤ੍ਤਨਿਯਾਮੋ ਅਸਙ੍ਖਤੋ, ਨਿਬ੍ਬਾਨਂ ਅਸਙ੍ਖਤਨ੍ਤਿ? ਆਮਨ੍ਤਾ. ਪਞ੍ਚ ਅਸਙ੍ਖਤਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪਞ੍ਚ ਅਸਙ੍ਖਤਾਨੀਤਿ? ਆਮਨ੍ਤਾ. ਪਞ੍ਚ ਤਾਣਾਨਿ…ਪੇ… ਅਨ੍ਤਰਿਕਾ ਵਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਨਿਯਾਮੋ ਅਸਙ੍ਖਤੋਤਿ? ਆਮਨ੍ਤਾ. ਮਿਚ੍ਛਤ੍ਤਨਿਯਾਮੋ ਅਸਙ੍ਖਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਮਿਚ੍ਛਤ੍ਤਨਿਯਾਮੋ ਸਙ੍ਖਤੋਤਿ? ਆਮਨ੍ਤਾ. ਸਮ੍ਮਤ੍ਤਨਿਯਾਮੋ ਸਙ੍ਖਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੪੪੭. ਨ ਵਤ੍ਤਬ੍ਬਂ – ‘‘ਨਿਯਾਮੋ ਅਸਙ੍ਖਤੋ’’ਤਿ? ਆਮਨ੍ਤਾ. ਨਿਯਾਮੇ ਉਪ੍ਪਜ੍ਜ ਨਿਰੁਦ੍ਧੇ ਅਨਿਯਤੋ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ…. ਤੇਨ ਹਿ ਨਿਯਾਮੋ ਅਸਙ੍ਖਤੋਤਿ. ਮਿਚ੍ਛਤ੍ਤਨਿਯਾਮੇ ਉਪ੍ਪਜ੍ਜ ਨਿਰੁਦ੍ਧੇ ਅਨਿਯਤੋ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਤੇਨ ਹਿ ਮਿਚ੍ਛਤ੍ਤਨਿਯਾਮੋ ਅਸਙ੍ਖਤੋਤਿ.
ਨਿਯਾਮਕਥਾ ਨਿਟ੍ਠਿਤਾ.
੬. ਛਟ੍ਠਵਗ੍ਗੋ
(੫੪) ੨. ਪਟਿਚ੍ਚਸਮੁਪ੍ਪਾਦਕਥਾ
੪੪੮. ਪਟਿਚ੍ਚਸਮੁਪ੍ਪਾਦੋ ਅਸਙ੍ਖਤੋਤਿ? ਆਮਨ੍ਤਾ. ਨਿਬ੍ਬਾਨਂ ਤਾਣਂ ਲੇਣਂ ਸਰਣਂ ਪਰਾਯਨਂ ਅਚ੍ਚੁਤਂ ਅਮਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪਟਿਚ੍ਚਸਮੁਪ੍ਪਾਦੋ ਅਸਙ੍ਖਤੋ, ਨਿਬ੍ਬਾਨਂ ਅਸਙ੍ਖਤਨ੍ਤਿ? ਆਮਨ੍ਤਾ. ਦ੍ਵੇ ਅਸਙ੍ਖਤਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਦ੍ਵੇ ਅਸਙ੍ਖਤਾਨੀਤਿ? ਆਮਨ੍ਤਾ. ਦ੍ਵੇ ਤਾਣਾਨਿ ਦ੍ਵੇ ਲੇਣਾਨਿ ਦ੍ਵੇ ਸਰਣਾਨਿ ਦ੍ਵੇ ਪਰਾਯਨਾਨਿ ਦ੍ਵੇ ਅਚ੍ਚੁਤਾਨਿ ਦ੍ਵੇ ਅਮਤਾਨਿ ਦ੍ਵੇ ਨਿਬ੍ਬਾਨਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਦ੍ਵੇ ਨਿਬ੍ਬਾਨਾਨੀਤਿ? ਆਮਨ੍ਤਾ. ਅਤ੍ਥਿ ਦ੍ਵਿਨ੍ਨਂ ਨਿਬ੍ਬਾਨਾਨਂ ਉਚ੍ਚਨੀਚਤਾ ਹੀਨਪਣੀਤਤਾ ਉਕ੍ਕਂਸਾਵਕਂਸੋ ਸੀਮਾ ਵਾ ਭੇਦੋ ਵਾ ਰਾਜਿ ਵਾ ਅਨ੍ਤਰਿਕਾ ਵਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੪੪੯. ਪਟਿਚ੍ਚਸਮੁਪ੍ਪਾਦੋ ਅਸਙ੍ਖਤੋਤਿ? ਆਮਨ੍ਤਾ. ਅਵਿਜ੍ਜਾ ਅਸਙ੍ਖਤਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਵਿਜ੍ਜਾ ਸਙ੍ਖਤਾਤਿ? ਆਮਨ੍ਤਾ. ਪਟਿਚ੍ਚਸਮੁਪ੍ਪਾਦੋ ਸਙ੍ਖਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪਟਿਚ੍ਚਸਮੁਪ੍ਪਾਦੋ ਅਸਙ੍ਖਤੋਤਿ? ਆਮਨ੍ਤਾ. ਅਵਿਜ੍ਜਾਪਚ੍ਚਯਾ ਸਙ੍ਖਾਰਾ ਅਸਙ੍ਖਤਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਵਿਜ੍ਜਾਪਚ੍ਚਯਾ ਸਙ੍ਖਾਰਾ ਸਙ੍ਖਤਾਤਿ? ਆਮਨ੍ਤਾ. ਪਟਿਚ੍ਚਸਮੁਪ੍ਪਾਦੋ ਸਙ੍ਖਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪਟਿਚ੍ਚਸਮੁਪ੍ਪਾਦੋ ਅਸਙ੍ਖਤੋਤਿ? ਆਮਨ੍ਤਾ. ਸਙ੍ਖਾਰਪਚ੍ਚਯਾ ਵਿਞ੍ਞਾਣਂ ਅਸਙ੍ਖਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਙ੍ਖਾਰਪਚ੍ਚਯਾ ਵਿਞ੍ਞਾਣਂ ਸਙ੍ਖਤਨ੍ਤਿ? ਆਮਨ੍ਤਾ. ਪਟਿਚ੍ਚਸਮੁਪ੍ਪਾਦੋ ਸਙ੍ਖਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪਟਿਚ੍ਚਸਮੁਪ੍ਪਾਦੋ ਅਸਙ੍ਖਤੋਤਿ? ਆਮਨ੍ਤਾ. ਵਿਞ੍ਞਾਣਪਚ੍ਚਯਾ ਨਾਮਰੂਪਂ ਅਸਙ੍ਖਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਵਿਞ੍ਞਾਣਪਚ੍ਚਯਾ ਨਾਮਰੂਪਂ ਸਙ੍ਖਤਨ੍ਤਿ? ਆਮਨ੍ਤਾ. ਪਟਿਚ੍ਚਸਮੁਪ੍ਪਾਦੋ ਸਙ੍ਖਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਪਟਿਚ੍ਚਸਮੁਪ੍ਪਾਦੋ ਅਸਙ੍ਖਤੋਤਿ? ਆਮਨ੍ਤਾ. ਜਾਤਿਪਚ੍ਚਯਾ ਜਰਾਮਰਣਂ ਅਸਙ੍ਖਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਜਾਤਿਪਚ੍ਚਯਾ ਜਰਾਮਰਣਂ ਸਙ੍ਖਤਨ੍ਤਿ? ਆਮਨ੍ਤਾ. ਪਟਿਚ੍ਚਸਮੁਪ੍ਪਾਦੋ ਸਙ੍ਖਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੪੫੦. ਨ ਵਤ੍ਤਬ੍ਬਂ – ‘‘ਪਟਿਚ੍ਚਸਮੁਪ੍ਪਾਦੋ ਅਸਙ੍ਖਤੋ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਜਾਤਿਪਚ੍ਚਯਾ, ਭਿਕ੍ਖਵੇ, ਜਰਾਮਰਣਂ. ਉਪ੍ਪਾਦਾ ਵਾ ਤਥਾਗਤਾਨਂ ਅਨੁਪ੍ਪਾਦਾ ਵਾ ਤਥਾਗਤਾਨਂ ਠਿਤਾਵ ਸਾ ਧਾਤੁ ਧਮ੍ਮਟ੍ਠਿਤਤਾ ਧਮ੍ਮਨਿਯਾਮਤਾ ਇਦਪ੍ਪਚ੍ਚਯਤਾ. ਤਂ ਤਥਾਗਤੋ ਅਭਿਸਮ੍ਬੁਜ੍ਝਤਿ ਅਭਿਸਮੇਤਿ. ਅਭਿਸਮ੍ਬੁਜ੍ਝਿਤ੍ਵਾ ਅਭਿਸਮੇਤ੍ਵਾ ਆਚਿਕ੍ਖਤਿ ਦੇਸੇਤਿ ਪਞ੍ਞਾਪੇਤਿ ਪਟ੍ਠਪੇਤਿ ਵਿਵਰਤਿ ਵਿਭਜਤਿ ਉਤ੍ਤਾਨਿਂ ਕਰੋਤਿ. ‘ਪਸ੍ਸਥਾ’ਤਿ ਚਾਹ – ਜਾਤਿਪਚ੍ਚਯਾ, ਭਿਕ੍ਖਵੇ, ਜਰਾਮਰਣਂ. ਭਵਪਚ੍ਚਯਾ, ਭਿਕ੍ਖਵੇ, ਜਾਤਿ…ਪੇ… ਅਵਿਜ੍ਜਾਪਚ੍ਚਯਾ, ਭਿਕ੍ਖਵੇ, ਸਙ੍ਖਾਰਾ. ਉਪ੍ਪਾਦਾ ਵਾ ਤਥਾਗਤਾਨਂ ਅਨੁਪ੍ਪਾਦਾ ਵਾ ਤਥਾਗਤਾਨਂ ਠਿਤਾਵ ਸਾ ਧਾਤੁ…ਪੇ… ‘ਪਸ੍ਸਥਾ’ਤਿ ਚਾਹ – ਅਵਿਜ੍ਜਾਪਚ੍ਚਯਾ, ਭਿਕ੍ਖਵੇ, ਸਙ੍ਖਾਰਾ. ਇਤਿ ਖੋ, ਭਿਕ੍ਖਵੇ, ਯਾ ਤਤ੍ਰ ਤਥਤਾ ਅਵਿਤਥਤਾ ਅਨਞ੍ਞਥਤਾ ਇਦਪ੍ਪਚ੍ਚਯਤਾ – ਅਯਂ ਵੁਚ੍ਚਤਿ, ਭਿਕ੍ਖਵੇ, ਪਟਿਚ੍ਚਸਮੁਪ੍ਪਾਦੋ’’ਤਿ [ਸਂ. ਨਿ. ੨.੨੦]. ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਪਟਿਚ੍ਚਸਮੁਪ੍ਪਾਦੋ ਅਸਙ੍ਖਤੋਤਿ.
੪੫੧. ਅਵਿਜ੍ਜਾਪਚ੍ਚਯਾ ਸਙ੍ਖਾਰਾਤਿ ਯਾ ਤਤ੍ਥ ਧਮ੍ਮਟ੍ਠਿਤਤਾ ਧਮ੍ਮਨਿਯਾਮਤਾ ਅਸਙ੍ਖਤਾ, ਨਿਬ੍ਬਾਨਂ ਅਸਙ੍ਖਤਨ੍ਤਿ? ਆਮਨ੍ਤਾ. ਦ੍ਵੇ ਅਸਙ੍ਖਤਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਦ੍ਵੇ ਅਸਙ੍ਖਤਾਨੀਤਿ? ਆਮਨ੍ਤਾ. ਦ੍ਵੇ ਤਾਣਾਨਿ…ਪੇ… ਅਨ੍ਤਰਿਕਾ ਵਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਅਵਿਜ੍ਜਾਪਚ੍ਚਯਾ ਸਙ੍ਖਾਰਾਤਿ ਯਾ ਤਤ੍ਥ ਧਮ੍ਮਟ੍ਠਿਤਤਾ ਧਮ੍ਮਨਿਯਾਮਤਾ ਅਸਙ੍ਖਤਾ, ਸਙ੍ਖਾਰਪਚ੍ਚਯਾ ਵਿਞ੍ਞਾਣਨ੍ਤਿ ਯਾ ਤਤ੍ਥ ਧਮ੍ਮਟ੍ਠਿਤਤਾ ਧਮ੍ਮਨਿਯਾਮਤਾ ਅਸਙ੍ਖਤਾ, ਨਿਬ੍ਬਾਨਂ ਅਸਙ੍ਖਤਨ੍ਤਿ? ਆਮਨ੍ਤਾ. ਤੀਣਿ ਅਸਙ੍ਖਤਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ…. ਤੀਣਿ ਅਸਙ੍ਖਤਾਨੀਤਿ? ਆਮਨ੍ਤਾ. ਤੀਣਿ ਤਾਣਾਨਿ…ਪੇ… ਅਨ੍ਤਰਿਕਾ ਵਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਅਵਿਜ੍ਜਾਪਚ੍ਚਯਾ ਸਙ੍ਖਾਰਾਤਿ ਯਾ ਤਤ੍ਥ ਧਮ੍ਮਟ੍ਠਿਤਤਾ ਧਮ੍ਮਨਿਯਾਮਤਾ ਅਸਙ੍ਖਤਾ, ਸਙ੍ਖਾਰਪਚ੍ਚਯਾ ਵਿਞ੍ਞਾਣਨ੍ਤਿ ਯਾ ਤਤ੍ਥ ਧਮ੍ਮਟ੍ਠਿਤਤਾ ਧਮ੍ਮਨਿਯਾਮਤਾ ਅਸਙ੍ਖਤਾ…ਪੇ… ਜਾਤਿਪਚ੍ਚਯਾ ਜਰਾਮਰਣਨ੍ਤਿ ਯਾ ਤਤ੍ਥ ਧਮ੍ਮਟ੍ਠਿਤਤਾ ਧਮ੍ਮਨਿਯਾਮਤਾ ਅਸਙ੍ਖਤਾ, ਨਿਬ੍ਬਾਨਂ ਅਸਙ੍ਖਤਨ੍ਤਿ? ਆਮਨ੍ਤਾ. ਦ੍ਵਾਦਸ ਅਸਙ੍ਖਤਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਦ੍ਵਾਦਸ ਅਸਙ੍ਖਤਾਨੀਤਿ? ਆਮਨ੍ਤਾ. ਦ੍ਵਾਦਸ ਤਾਣਾਨਿ ਦ੍ਵਾਦਸ ਲੇਣਾਨਿ…ਪੇ… ਅਨ੍ਤਰਿਕਾ ਵਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਪਟਿਚ੍ਚਸਮੁਪ੍ਪਾਦਕਥਾ ਨਿਟ੍ਠਿਤਾ.
੬. ਛਟ੍ਠਵਗ੍ਗੋ
(੫੫) ੩. ਸਚ੍ਚਕਥਾ
੪੫੨. ਚਤ੍ਤਾਰਿ ਸਚ੍ਚਾਨਿ ਅਸਙ੍ਖਤਾਨੀਤਿ? ਆਮਨ੍ਤਾ. ਚਤ੍ਤਾਰਿ ਤਾਣਾਨਿ ਚਤ੍ਤਾਰਿ ਲੇਣਾਨਿ ਚਤ੍ਤਾਰਿ ਸਰਣਾਨਿ ਚਤ੍ਤਾਰਿ ਪਰਾਯਨਾਨਿ ਚਤ੍ਤਾਰਿ ਅਚ੍ਚੁਤਾਨਿ ਚਤ੍ਤਾਰਿ ਅਮਤਾਨਿ ਚਤ੍ਤਾਰਿ ਨਿਬ੍ਬਾਨਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਚਤ੍ਤਾਰਿ ਨਿਬ੍ਬਾਨਾਨੀਤਿ? ਆਮਨ੍ਤਾ. ਅਤ੍ਥਿ ਚਤੁਨ੍ਨਂ ਨਿਬ੍ਬਾਨਾਨਂ ਉਚ੍ਚਨੀਚਤਾ ਹੀਨਪਣੀਤਤਾ ਉਕ੍ਕਂਸਾਵਕਂਸੋ ਸੀਮਾ ਵਾ ਭੇਦੋ ਵਾ ਰਾਜਿ ਵਾ ਅਨ੍ਤਰਿਕਾ ਵਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਦੁਕ੍ਖਸਚ੍ਚਂ ਅਸਙ੍ਖਤਨ੍ਤਿ? ਆਮਨ੍ਤਾ. ਦੁਕ੍ਖਂ ਅਸਙ੍ਖਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਦੁਕ੍ਖਸਚ੍ਚਂ ਅਸਙ੍ਖਤਨ੍ਤਿ? ਆਮਨ੍ਤਾ. ਕਾਯਿਕਂ ਦੁਕ੍ਖਂ ਚੇਤਸਿਕਂ ਦੁਕ੍ਖਂ ਸੋਕਪਰਿਦੇਵਦੁਕ੍ਖਦੋਮਨਸ੍ਸਉਪਾਯਾਸਾ ਅਸਙ੍ਖਤਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਮੁਦਯਸਚ੍ਚਂ ਅਸਙ੍ਖਤਨ੍ਤਿ? ਆਮਨ੍ਤਾ. ਸਮੁਦਯੋ ਅਸਙ੍ਖਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਮੁਦਯਸਚ੍ਚਂ ਅਸਙ੍ਖਤਨ੍ਤਿ? ਆਮਨ੍ਤਾ. ਕਾਮਤਣ੍ਹਾ ਭਵਤਣ੍ਹਾ ਵਿਭਵਤਣ੍ਹਾ ਅਸਙ੍ਖਤਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਮਗ੍ਗਸਚ੍ਚਂ ਅਸਙ੍ਖਤਨ੍ਤਿ? ਆਮਨ੍ਤਾ. ਮਗ੍ਗੋ ਅਸਙ੍ਖਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਮਗ੍ਗਸਚ੍ਚਂ ਅਸਙ੍ਖਤਨ੍ਤਿ? ਆਮਨ੍ਤਾ. ਸਮ੍ਮਾਦਿਟ੍ਠਿ…ਪੇ… ਸਮ੍ਮਾਸਮਾਧਿ ਅਸਙ੍ਖਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਦੁਕ੍ਖਂ ਸਙ੍ਖਤਨ੍ਤਿ? ਆਮਨ੍ਤਾ. ਦੁਕ੍ਖਸਚ੍ਚਂ ਸਙ੍ਖਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਕਾਯਿਕਂ ਦੁਕ੍ਖਂ ਚੇਤਸਿਕਂ ਦੁਕ੍ਖਂ ਸੋਕਪਰਿਦੇਵਦੁਕ੍ਖਦੋਮਨਸ੍ਸਉਪਾਯਾਸਾ ਸਙ੍ਖਤਾਤਿ? ਆਮਨ੍ਤਾ. ਦੁਕ੍ਖਸਚ੍ਚਂ ਸਙ੍ਖਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਮੁਦਯੋ ਸਙ੍ਖਤੋਤਿ? ਆਮਨ੍ਤਾ. ਸਮੁਦਯਸਚ੍ਚਂ ਸਙ੍ਖਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਕਾਮਤਣ੍ਹਾ ਭਵਤਣ੍ਹਾ ਵਿਭਵਤਣ੍ਹਾ ਸਙ੍ਖਤਾਤਿ? ਆਮਨ੍ਤਾ. ਸਮੁਦਯਸਚ੍ਚਂ ਸਙ੍ਖਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਮਗ੍ਗੋ ਸਙ੍ਖਤੋਤਿ? ਆਮਨ੍ਤਾ. ਮਗ੍ਗਸਚ੍ਚਂ ਸਙ੍ਖਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਮ੍ਮਾਦਿਟ੍ਠਿ…ਪੇ… ਸਮ੍ਮਾਸਮਾਧਿ ਸਙ੍ਖਤੋਤਿ? ਆਮਨ੍ਤਾ. ਮਗ੍ਗਸਚ੍ਚਂ ਸਙ੍ਖਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੪੫੩. ਨਿਰੋਧਸਚ੍ਚਂ ਅਸਙ੍ਖਤਂ, ਨਿਰੋਧੋ ਅਸਙ੍ਖਤੋਤਿ? ਆਮਨ੍ਤਾ. ਦੁਕ੍ਖਸਚ੍ਚਂ ਅਸਙ੍ਖਤਂ, ਦੁਕ੍ਖਂ ਅਸਙ੍ਖਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਿਰੋਧਸਚ੍ਚਂ ਅਸਙ੍ਖਤਂ, ਨਿਰੋਧੋ ਅਸਙ੍ਖਤੋਤਿ? ਆਮਨ੍ਤਾ. ਸਮੁਦਯਸਚ੍ਚਂ ਅਸਙ੍ਖਤਂ, ਸਮੁਦਯੋ ਅਸਙ੍ਖਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਿਰੋਧਸਚ੍ਚਂ ਅਸਙ੍ਖਤਂ, ਨਿਰੋਧੋ ਅਸਙ੍ਖਤੋਤਿ? ਆਮਨ੍ਤਾ. ਮਗ੍ਗਸਚ੍ਚਂ ਅਸਙ੍ਖਤਂ, ਮਗ੍ਗੋ ਅਸਙ੍ਖਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਦੁਕ੍ਖਸਚ੍ਚਂ ਅਸਙ੍ਖਤਂ, ਦੁਕ੍ਖਂ ਸਙ੍ਖਤਨ੍ਤਿ? ਆਮਨ੍ਤਾ. ਨਿਰੋਧਸਚ੍ਚਂ ਅਸਙ੍ਖਤਂ, ਨਿਰੋਧੋ ਸਙ੍ਖਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਸਮੁਦਯਸਚ੍ਚਂ ਅਸਙ੍ਖਤਂ, ਸਮੁਦਯੋ ਸਙ੍ਖਤੋਤਿ? ਆਮਨ੍ਤਾ. ਨਿਰੋਧਸਚ੍ਚਂ ਅਸਙ੍ਖਤਂ, ਨਿਰੋਧੋ ਸਙ੍ਖਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਮਗ੍ਗਸਚ੍ਚਂ ਅਸਙ੍ਖਤਂ, ਮਗ੍ਗੋ ਸਙ੍ਖਤੋਤਿ? ਆਮਨ੍ਤਾ. ਨਿਰੋਧਸਚ੍ਚਂ ਅਸਙ੍ਖਤਂ, ਨਿਰੋਧੋ ਸਙ੍ਖਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੪੫੪. ਨ ਵਤ੍ਤਬ੍ਬਂ – ‘‘ਚਤ੍ਤਾਰਿ ਸਚ੍ਚਾਨਿ ਅਸਙ੍ਖਤਾਨੀ’’ਤਿ? ਆਮਨ੍ਤਾ. ਨਨੁ ਵੁਤ੍ਤਂ ਭਗਵਤਾ – ‘‘ਚਤ੍ਤਾਰਿਮਾਨਿ, ਭਿਕ੍ਖਵੇ, ਤਥਾਨਿ ਅਵਿਤਥਾਨਿ ਅਨਞ੍ਞਥਾਨਿ! ਕਤਮਾਨਿ ਚਤ੍ਤਾਰਿ? ‘ਇਦਂ ਦੁਕ੍ਖ’ਨ੍ਤਿ, ਭਿਕ੍ਖਵੇ, ਤਥਮੇਤਂ ਅਵਿਤਥਮੇਤਂ ਅਨਞ੍ਞਥਮੇਤਂ…ਪੇ… ‘ਅਯਂ ਦੁਕ੍ਖਸਮੁਦਯੋ’ਤਿ…ਪੇ… ‘ਅਯਂ ਦੁਕ੍ਖਨਿਰੋਧੋ’ਤਿ…ਪੇ… ‘ਅਯਂ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ’ਤਿ ਤਥਮੇਤਂ ਅਵਿਤਥਮੇਤਂ ਅਨਞ੍ਞਥਮੇਤਂ. ਇਮਾਨਿ ਖੋ, ਭਿਕ੍ਖਵੇ, ਚਤ੍ਤਾਰਿ ਤਥਾਨਿ ਅਵਿਤਥਾਨਿ ਅਨਞ੍ਞਥਾਨੀ’’ਤਿ [ਸਂ. ਨਿ. ੫.੧੦੯੦]. ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਤੇਨ ਹਿ ਚਤ੍ਤਾਰਿ ਸਚ੍ਚਾਨਿ ਅਸਙ੍ਖਤਾਨੀਤਿ.
ਸਚ੍ਚਕਥਾ ਨਿਟ੍ਠਿਤਾ.
੬. ਛਟ੍ਠਵਗ੍ਗੋ
(੫੬) ੪. ਆਰੁਪ੍ਪਕਥਾ
੪੫੫. ਆਕਾਸਾਨਞ੍ਚਾਯਤਨਂ ਅਸਙ੍ਖਤਨ੍ਤਿ? ਆਮਨ੍ਤਾ. ਨਿਬ੍ਬਾਨਂ ਤਾਣਂ ਲੇਣਂ ਸਰਣਂ ਪਰਾਯਨਂ ਅਚ੍ਚੁਤਂ ਅਮਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਆਕਾਸਾਨਞ੍ਚਾਯਤਨਂ ਅਸਙ੍ਖਤਂ, ਨਿਬ੍ਬਾਨਂ ਅਸਙ੍ਖਤਨ੍ਤਿ? ਆਮਨ੍ਤਾ. ਦ੍ਵੇ ਅਸਙ੍ਖਤਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਦ੍ਵੇ ਅਸਙ੍ਖਤਾਨੀਤਿ? ਆਮਨ੍ਤਾ. ਦ੍ਵੇ ਤਾਣਾਨਿ…ਪੇ… ਅਨ੍ਤਰਿਕਾ ਵਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਆਕਾਸਾਨਞ੍ਚਾਯਤਨਂ ਅਸਙ੍ਖਤਨ੍ਤਿ? ਆਮਨ੍ਤਾ. ਆਕਾਸਾਨਞ੍ਚਾਯਤਨਂ ਭਵੋ ਗਤਿ ਸਤ੍ਤਾਵਾਸੋ ਸਂਸਾਰੋ ਯੋਨਿ ਵਿਞ੍ਞਾਣਟ੍ਠਿਤਿ ਅਤ੍ਤਭਾਵਪਟਿਲਾਭੋਤਿ? ਆਮਨ੍ਤਾ. ਅਸਙ੍ਖਤਂ ਭਵੋ ਗਤਿ ਸਤ੍ਤਾਵਾਸੋ ਸਂਸਾਰੋ ਯੋਨਿ ਵਿਞ੍ਞਾਣਟ੍ਠਿਤਿ ਅਤ੍ਤਭਾਵਪਟਿਲਾਭੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਅਤ੍ਥਿ ਆਕਾਸਾਨਞ੍ਚਾਯਤਨੂਪਗਂ ਕਮ੍ਮਨ੍ਤਿ? ਆਮਨ੍ਤਾ. ਅਤ੍ਥਿ ਅਸਙ੍ਖਤੂਪਗਂ ਕਮ੍ਮਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਤ੍ਥਿ ਆਕਾਸਾਨਞ੍ਚਾਯਤਨੂਪਗਾ ਸਤ੍ਤਾਤਿ? ਆਮਨ੍ਤਾ. ਅਤ੍ਥਿ ਅਸਙ੍ਖਤੂਪਗਾ ਸਤ੍ਤਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਆਕਾਸਾਨਞ੍ਚਾਯਤਨੇ ਸਤ੍ਤਾ ਜਾਯਨ੍ਤਿ ਜੀਯਨ੍ਤਿ ਮੀਯਨ੍ਤਿ ਚਵਨ੍ਤਿ ਉਪਪਜ੍ਜਨ੍ਤੀਤਿ? ਆਮਨ੍ਤਾ. ਅਸਙ੍ਖਤੇ ਸਤ੍ਤਾ ਜਾਯਨ੍ਤਿ ਜੀਯਨ੍ਤਿ ਮੀਯਨ੍ਤਿ ਚਵਨ੍ਤਿ ਉਪਪਜ੍ਜਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਆਕਾਸਾਨਞ੍ਚਾਯਤਨੇ ਅਤ੍ਥਿ ਵੇਦਨਾ ਸਞ੍ਞਾ ਸਙ੍ਖਾਰਾ ਵਿਞ੍ਞਾਣਨ੍ਤਿ? ਆਮਨ੍ਤਾ. ਅਸਙ੍ਖਤੇ ਅਤ੍ਥਿ ਵੇਦਨਾ ਸਞ੍ਞਾ ਸਙ੍ਖਾਰਾ ਵਿਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਆਕਾਸਾਨਞ੍ਚਾਯਤਨਂ ਚਤੁਵੋਕਾਰਭਵੋਤਿ? ਆਮਨ੍ਤਾ. ਅਸਙ੍ਖਤਂ ਚਤੁਵੋਕਾਰਭਵੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੪੫੬. ਨ ਵਤ੍ਤਬ੍ਬਂ – ‘‘ਚਤ੍ਤਾਰੋ ਆਰੁਪ੍ਪਾ ਅਸਙ੍ਖਤਾ’’ਤਿ? ਆਮਨ੍ਤਾ. ਨਨੁ ਚਤ੍ਤਾਰੋ ਆਰੁਪ੍ਪਾ ਅਨੇਜਾ ਵੁਤ੍ਤਾ ਭਗਵਤਾਤਿ? ਆਮਨ੍ਤਾ. ਹਞ੍ਚਿ ਚਤ੍ਤਾਰੋ ਆਰੁਪ੍ਪਾ ਅਨੇਜਾ ਵੁਤ੍ਤਾ ਭਗਵਤਾ, ਤੇਨ ਵਤ ਰੇ ਵਤ੍ਤਬ੍ਬੇ ‘‘ਚਤ੍ਤਾਰੋ ਆਰੁਪ੍ਪਾ ਅਸਙ੍ਖਤਾ’’ਤਿ.
ਆਰੁਪ੍ਪਕਥਾ ਨਿਟ੍ਠਿਤਾ.
੬. ਛਟ੍ਠਵਗ੍ਗੋ
(੫੭) ੫. ਨਿਰੋਧਸਮਾਪਤ੍ਤਿਕਥਾ
੪੫੭. ਨਿਰੋਧਸਮਾਪਤ੍ਤਿ ਅਸਙ੍ਖਤਾਤਿ? ਆਮਨ੍ਤਾ. ਨਿਬ੍ਬਾਨਂ ਤਾਣਂ ਲੇਣਂ ਸਰਣਂ ਪਰਾਯਨਂ ਅਚ੍ਚੁਤਂ ਅਮਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਿਰੋਧਸਮਾਪਤ੍ਤਿ ਅਸਙ੍ਖਤਾ, ਨਿਬ੍ਬਾਨਂ ਅਸਙ੍ਖਤਨ੍ਤਿ? ਆਮਨ੍ਤਾ. ਦ੍ਵੇ ਅਸਙ੍ਖਤਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਦ੍ਵੇ ਅਸਙ੍ਖਤਾਨੀਤਿ? ਆਮਨ੍ਤਾ. ਦ੍ਵੇ ਤਾਣਾਨਿ…ਪੇ… ਅਨ੍ਤਰਿਕਾ ਵਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਨਿਰੋਧਸਮਾਪਤ੍ਤਿ ਅਸਙ੍ਖਤਾਤਿ? ਆਮਨ੍ਤਾ. ਅਤ੍ਥਿ ਕੇਚਿ ਨਿਰੋਧਂ ਸਮਾਪਜ੍ਜਨ੍ਤਿ ਪਟਿਲਭਨ੍ਤਿ ਉਪ੍ਪਾਦੇਨ੍ਤਿ ਸਮੁਪ੍ਪਾਦੇਨ੍ਤਿ ਉਟ੍ਠਪੇਨ੍ਤਿ ਸਮੁਟ੍ਠਪੇਨ੍ਤਿ ਨਿਬ੍ਬਤ੍ਤੇਨ੍ਤਿ ਅਭਿਨਿਬ੍ਬਤ੍ਤੇਨ੍ਤਿ ਜਨੇਨ੍ਤਿ ਸਞ੍ਜਨੇਨ੍ਤੀਤਿ? ਆਮਨ੍ਤਾ. ਅਤ੍ਥਿ ਕੇਚਿ ਅਸਙ੍ਖਤਂ ਸਮਾਪਜ੍ਜਨ੍ਤਿ ਪਟਿਲਭਨ੍ਤਿ ਉਪ੍ਪਾਦੇਨ੍ਤਿ ਸਮੁਪ੍ਪਾਦੇਨ੍ਤਿ ਉਟ੍ਠਪੇਨ੍ਤਿ ਸਮੁਟ੍ਠਪੇਨ੍ਤਿ ਨਿਬ੍ਬਤ੍ਤੇਨ੍ਤਿ ਅਭਿਨਿਬ੍ਬਤ੍ਤੇਨ੍ਤਿ ਜਨੇਨ੍ਤਿ ਸਞ੍ਜਨੇਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੪੫੮. ਨਿਰੋਧਾ ਵੋਦਾਨਂ ਵੁਟ੍ਠਾਨਂ ਪਞ੍ਞਾਯਤੀਤਿ? ਆਮਨ੍ਤਾ. ਅਸਙ੍ਖਤਾ ਵੋਦਾਨਂ ਵੁਟ੍ਠਾਨਂ ਪਞ੍ਞਾਯਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਿਰੋਧਂ ਸਮਾਪਜ੍ਜਨ੍ਤਸ੍ਸ ਪਠਮਂ ਨਿਰੁਜ੍ਝਤਿ ਵਚੀਸਙ੍ਖਾਰੋ, ਤਤੋ ਕਾਯਸਙ੍ਖਾਰੋ, ਤਤੋ ਚਿਤ੍ਤਸਙ੍ਖਾਰੋਤਿ? ਆਮਨ੍ਤਾ. ਅਸਙ੍ਖਤਂ ਸਮਾਪਜ੍ਜਨ੍ਤਸ੍ਸ ਪਠਮਂ ਨਿਰੁਜ੍ਝਤਿ ਵਚੀਸਙ੍ਖਾਰੋ, ਤਤੋ ਕਾਯਸਙ੍ਖਾਰੋ, ਤਤੋ ਚਿਤ੍ਤਸਙ੍ਖਾਰੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਨਿਰੋਧਾ ਵੁਟ੍ਠਹਨ੍ਤਸ੍ਸ ਪਠਮਂ ਉਪ੍ਪਜ੍ਜਤਿ ਚਿਤ੍ਤਸਙ੍ਖਾਰੋ, ਤਤੋ ਕਾਯਸਙ੍ਖਾਰੋ, ਤਤੋ ਵਚੀਸਙ੍ਖਾਰੋਤਿ? ਆਮਨ੍ਤਾ. ਅਸਙ੍ਖਤਾ ਵੁਟ੍ਠਹਨ੍ਤਸ੍ਸ ਪਠਮਂ ਉਪ੍ਪਜ੍ਜਤਿ ਚਿਤ੍ਤਸਙ੍ਖਾਰੋ, ਤਤੋ ਕਾਯਸਙ੍ਖਾਰੋ, ਤਤੋ ਵਚੀਸਙ੍ਖਾਰੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਨਿਰੋਧਾ ਵੁਟ੍ਠਿਤਂ ਤਯੋ ਫਸ੍ਸਾ ਫੁਸਨ੍ਤਿ – ਸੁਞ੍ਞਤੋ ਫਸ੍ਸੋ, ਅਨਿਮਿਤ੍ਤੋ ਫਸ੍ਸੋ, ਅਪ੍ਪਣਿਹਿਤੋ ਫਸ੍ਸੋਤਿ? ਆਮਨ੍ਤਾ. ਅਸਙ੍ਖਤਾ ਵੁਟ੍ਠਿਤਂ ਤਯੋ ਫਸ੍ਸਾ ਫੁਸਨ੍ਤਿ – ਸੁਞ੍ਞਤੋ ਫਸ੍ਸੋ, ਅਨਿਮਿਤ੍ਤੋ ਫਸ੍ਸੋ, ਅਪ੍ਪਣਿਹਿਤੋ ਫਸ੍ਸੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਨਿਰੋਧਾ ਵੁਟ੍ਠਿਤਸ੍ਸ ਵਿਵੇਕਨਿਨ੍ਨਂ ਚਿਤ੍ਤਂ ਹੋਤਿ ਵਿਵੇਕਪੋਣਂ ਵਿਵੇਕਪਬ੍ਭਾਰਨ੍ਤਿ? ਆਮਨ੍ਤਾ. ਅਸਙ੍ਖਤਾ ਵੁਟ੍ਠਿਤਸ੍ਸ ਵਿਵੇਕਨਿਨ੍ਨਂ ਚਿਤ੍ਤਂ ਹੋਤਿ ਵਿਵੇਕਪੋਣਂ ਵਿਵੇਕਪਬ੍ਭਾਰਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੪੫੯. ਨ ਵਤ੍ਤਬ੍ਬਂ – ‘‘ਨਿਰੋਧਸਮਾਪਤ੍ਤਿ ਅਸਙ੍ਖਤਾ’’ਤਿ? ਆਮਨ੍ਤਾ. ਸਙ੍ਖਤਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਤੇਨ ਹਿ ਨਿਰੋਧਸਮਾਪਤ੍ਤਿ ਅਸਙ੍ਖਤਾਤਿ.
ਨਿਰੋਧਸਮਾਪਤ੍ਤਿਕਥਾ ਨਿਟ੍ਠਿਤਾ.
੬. ਛਟ੍ਠਵਗ੍ਗੋ
(੫੮) ੬. ਆਕਾਸਕਥਾ
੪੬੦. ਆਕਾਸੋ ਅਸਙ੍ਖਤੋਤਿ? ਆਮਨ੍ਤਾ. ਨਿਬ੍ਬਾਨਂ ਤਾਣਂ ਲੇਣਂ ਸਰਣਂ ਪਰਾਯਨਂ ਅਚ੍ਚੁਤਂ ਅਮਤਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਆਕਾਸੋ ਅਸਙ੍ਖਤੋ, ਨਿਬ੍ਬਾਨਂ ਅਸਙ੍ਖਤਨ੍ਤਿ? ਆਮਨ੍ਤਾ. ਦ੍ਵੇ ਅਸਙ੍ਖਤਾਨੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ…. ਦ੍ਵੇ ਅਸਙ੍ਖਤਾਨੀਤਿ? ਆਮਨ੍ਤਾ. ਦ੍ਵੇ ਤਾਣਾਨਿ…ਪੇ… ਅਨ੍ਤਰਿਕਾ ਵਾਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਆਕਾਸੋ ਅਸਙ੍ਖਤੋਤਿ? ਆਮਨ੍ਤਾ. ਅਤ੍ਥਿ ਕੇਚਿ ਅਨਾਕਾਸਂ ਆਕਾਸਂ ਕਰੋਨ੍ਤੀਤਿ? ਆਮਨ੍ਤਾ. ਅਤ੍ਥਿ ਕੇਚਿ ਸਙ੍ਖਤਂ ਅਸਙ੍ਖਤਂ ਕਰੋਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਅਤ੍ਥਿ ਕੇਚਿ ਆਕਾਸਂ ਅਨਾਕਾਸਂ ਕਰੋਨ੍ਤੀਤਿ? ਆਮਨ੍ਤਾ. ਅਤ੍ਥਿ ਕੇਚਿ ਅਸਙ੍ਖਤਂ ਸਙ੍ਖਤਂ ਕਰੋਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਆਕਾਸੇ ਪਕ੍ਖਿਨੋ ਗਚ੍ਛਨ੍ਤਿ, ਚਨ੍ਦਿਮਸੂਰਿਯਾ ਗਚ੍ਛਨ੍ਤਿ, ਤਾਰਕਰੂਪਾਨਿ ਗਚ੍ਛਨ੍ਤਿ, ਇਦ੍ਧਿਂ ਵਿਕੁਬ੍ਬਨ੍ਤਿ, ਬਾਹੁਂ ਚਾਲੇਨ੍ਤਿ, ਪਾਣਿਂ ਚਾਲੇਨ੍ਤਿ, ਲੇਡ੍ਡੁਂ ਖਿਪਨ੍ਤਿ, ਲਗੁਲ਼ਂ ਖਿਪਨ੍ਤਿ, ਇਦ੍ਧਿਂ [ਸਤ੍ਤਿਂ (?)] ਖਿਪਨ੍ਤਿ, ਉਸੁਂ ਖਿਪਨ੍ਤੀਤਿ? ਆਮਨ੍ਤਾ. ਅਸਙ੍ਖਤੇ ਪਕ੍ਖਿਨੋ ਗਚ੍ਛਨ੍ਤਿ, ਚਨ੍ਦਿਮਸੂਰਿਯਾ ਗਚ੍ਛਨ੍ਤਿ, ਤਾਰਕਰੂਪਾਨਿ ਗਚ੍ਛਨ੍ਤਿ, ਇਦ੍ਧਿਂ ਵਿਕੁਬ੍ਬਨ੍ਤਿ, ਬਾਹੁਂ ਚਾਲੇਨ੍ਤਿ, ਪਾਣਿਂ ਚਾਲੇਨ੍ਤਿ, ਲੇਡ੍ਡੁਂ ਖਿਪਨ੍ਤਿ, ਲਗੁਲ਼ਂ ਖਿਪਨ੍ਤਿ, ਇਦ੍ਧਿਂ ਖਿਪਨ੍ਤਿ, ਉਸੁਂ ਖਿਪਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੪੬੧. ਆਕਾਸਂ ਪਰਿਵਾਰੇਤ੍ਵਾ ਘਰਾਨਿ ਕਰੋਨ੍ਤਿ ਕੋਟ੍ਠਾਨਿ ਕਰੋਨ੍ਤੀਤਿ? ਆਮਨ੍ਤਾ. ਅਸਙ੍ਖਤਂ ਪਰਿਵਾਰੇਤ੍ਵਾ ਘਰਾਨਿ ਕਰੋਨ੍ਤਿ ਕੋਟ੍ਠਾਨਿ ਕਰੋਨ੍ਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਉਦਪਾਨੇ ਖਞ੍ਞਮਾਨੇ ਅਨਾਕਾਸੋ ਆਕਾਸੋ ਹੋਤੀਤਿ? ਆਮਨ੍ਤਾ. ਸਙ੍ਖਤਂ ਅਸਙ੍ਖਤਂ ਹੋਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਤੁਚ੍ਛਉਦਪਾਨੇ ਪੂਰਿਯਮਾਨੇ, ਤੁਚ੍ਛਕੋਟ੍ਠੇ ਪੂਰਿਯਮਾਨੇ, ਤੁਚ੍ਛਕੁਮ੍ਭਿਯਾ ਪੂਰਿਯਮਾਨਾਯ ਆਕਾਸੋ ਅਨ੍ਤਰਧਾਯਤੀਤਿ? ਆਮਨ੍ਤਾ. ਅਸਙ੍ਖਤਂ ਅਨ੍ਤਰਧਾਯਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
੪੬੨. ਨ ਵਤ੍ਤਬ੍ਬਂ – ‘‘ਆਕਾਸੋ ਅਸਙ੍ਖਤੋ’’ਤਿ? ਆਮਨ੍ਤਾ. ਆਕਾਸੋ ਸਙ੍ਖਤੋਤਿ? ਨ ਹੇਵਂ ਵਤ੍ਤਬ੍ਬੇ…ਪੇ… ਤੇਨ ਹਿ ਆਕਾਸੋ ਅਸਙ੍ਖਤੋਤਿ.
ਆਕਾਸਕਥਾ ਨਿਟ੍ਠਿਤਾ.
੬. ਛਟ੍ਠਵਗ੍ਗੋ
(੫੯) ੭. ਆਕਾਸੋ ਸਨਿਦਸ੍ਸਨੋਤਿਕਥਾ
੪੬੩. ਆਕਾਸੋ ਸਨਿਦਸ੍ਸਨੋਤਿ? ਆਮਨ੍ਤਾ. ਰੂਪਂ ਰੂਪਾਯਤਨਂ ਰੂਪਧਾਤੁ ਨੀਲਂ ਪੀਤਕਂ ਲੋਹਿਤਕਂ ਓਦਾਤਂ ਚਕ੍ਖੁਵਿਞ੍ਞੇਯ੍ਯਂ ਚਕ੍ਖੁਸ੍ਮਿਂ ਪਟਿਹਞ੍ਞਤਿ ਚਕ੍ਖੁਸ੍ਸ ਆਪਾਥਂ ਆਗਚ੍ਛਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਆਕਾਸੋ ਸਨਿਦਸ੍ਸਨੋਤਿ? ਆਮਨ੍ਤਾ. ਚਕ੍ਖੁਞ੍ਚ ਪਟਿਚ੍ਚ ਆਕਾਸਞ੍ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ …ਪੇ….
ਚਕ੍ਖੁਞ੍ਚ ਪਟਿਚ੍ਚ ਆਕਾਸਞ੍ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣਨ੍ਤਿ? ਆਮਨ੍ਤਾ. ‘‘ਚਕ੍ਖੁਞ੍ਚ ਪਟਿਚ੍ਚ ਆਕਾਸਞ੍ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣ’’ਨ੍ਤਿ – ਅਤ੍ਥੇਵ [ਅਤ੍ਥਿ (?)] ਸੁਤ੍ਤਨ੍ਤੋਤਿ? ਨਤ੍ਥਿ. ‘‘ਚਕ੍ਖੁਞ੍ਚ ਪਟਿਚ੍ਚ ਰੂਪੇ ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣ’’ਨ੍ਤਿ [ਮ. ਨਿ. ੧.੪੦੦; ੩.੪੨੧; ਸਂ. ਨਿ. ੪.੬੦] – ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਹਞ੍ਚਿ ‘‘ਚਕ੍ਖੁਞ੍ਚ ਪਟਿਚ੍ਚ ਰੂਪੇ ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣ’’ਨ੍ਤਿ – ਅਤ੍ਥੇਵ ਸੁਤ੍ਤਨ੍ਤੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਚਕ੍ਖੁਞ੍ਚ ਪਟਿਚ੍ਚ ਆਕਾਸਞ੍ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣ’’ਨ੍ਤਿ.
੪੬੪. ਨ ਵਤ੍ਤਬ੍ਬਂ – ‘‘ਆਕਾਸੋ ਸਨਿਦਸ੍ਸਨੋ’’ਤਿ? ਆਮਨ੍ਤਾ. ਨਨੁ ਪਸ੍ਸਤਿ ਦ੍ਵਿਨ੍ਨਂ ਰੁਕ੍ਖਾਨਂ ਅਨ੍ਤਰਂ, ਦ੍ਵਿਨ੍ਨਂ ਥਮ੍ਭਾਨਂ ਅਨ੍ਤਰਂ, ਤਾਲ਼ਚ੍ਛਿਦ੍ਦਂ ਵਾਤਪਾਨਚ੍ਛਿਦ੍ਦਨ੍ਤਿ? ਆਮਨ੍ਤਾ. ਹਞ੍ਚਿ ਪਸ੍ਸਤਿ ਦ੍ਵਿਨ੍ਨਂ ਰੁਕ੍ਖਾਨਂ ਅਨ੍ਤਰਂ, ਦ੍ਵਿਨ੍ਨਂ ਥਮ੍ਭਾਨਂ ਅਨ੍ਤਰਂ, ਤਾਲ਼ਚ੍ਛਿਦ੍ਦਂ ਵਾਤਪਾਨਚ੍ਛਿਦ੍ਦਂ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਆਕਾਸੋ ਸਨਿਦਸ੍ਸਨੋ’’ਤਿ.
ਆਕਾਸੋ ਸਨਿਦਸ੍ਸਨੋਤਿਕਥਾ ਨਿਟ੍ਠਿਤਾ.
੬. ਛਟ੍ਠਵਗ੍ਗੋ
(੬੦) ੮. ਪਥਵੀਧਾਤੁ ਸਨਿਦਸ੍ਸਨਾਤਿਆਦਿਕਥਾ
੪੬੫. ਪਥਵੀਧਾਤੁ ਸਨਿਦਸ੍ਸਨਾਤਿ? ਆਮਨ੍ਤਾ. ਰੂਪਂ ਰੂਪਾਯਤਨਂ ਰੂਪਧਾਤੁ ਨੀਲਂ ਪੀਤਕਂ ਲੋਹਿਤਕਂ ਓਦਾਤਂ ਚਕ੍ਖੁਵਿਞ੍ਞੇਯ੍ਯਂ ਚਕ੍ਖੁਸ੍ਮਿਂ ਪਟਿਹਞ੍ਞਤਿ ਚਕ੍ਖੁਸ੍ਸ ਆਪਾਥਂ ਆਗਚ੍ਛਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਪਥਵੀਧਾਤੁ ਸਨਿਦਸ੍ਸਨਾਤਿ? ਆਮਨ੍ਤਾ. ਚਕ੍ਖੁਞ੍ਚ ਪਟਿਚ੍ਚ ਪਥਵੀਧਾਤੁਞ੍ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਚਕ੍ਖੁਞ੍ਚ ਪਟਿਚ੍ਚ ਪਥਵੀਧਾਤੁਞ੍ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣਨ੍ਤਿ? ਆਮਨ੍ਤਾ. ‘‘ਚਕ੍ਖੁਞ੍ਚ ਪਟਿਚ੍ਚ ਪਥਵੀਧਾਤੁਞ੍ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣ’’ਨ੍ਤਿ – ਅਤ੍ਥੇਵ ਸੁਤ੍ਤਨ੍ਤੋਤਿ? ਨਤ੍ਥਿ. ‘‘ਚਕ੍ਖੁਞ੍ਚ ਪਟਿਚ੍ਚ ਰੂਪੇ ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣ’’ਨ੍ਤਿ – ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਹਞ੍ਚਿ ‘‘ਚਕ੍ਖੁਞ੍ਚ ਪਟਿਚ੍ਚ ਰੂਪੇ ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣ’’ਨ੍ਤਿ – ਅਤ੍ਥੇਵ ਸੁਤ੍ਤਨ੍ਤੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਚਕ੍ਖੁਞ੍ਚ ਪਟਿਚ੍ਚ ਪਥਵੀਧਾਤੁਞ੍ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣ’’ਨ੍ਤਿ.
੪੬੬. ਨ ਵਤ੍ਤਬ੍ਬਂ – ‘‘ਪਥਵੀਧਾਤੁ ਸਨਿਦਸ੍ਸਨਾ’’ਤਿ? ਆਮਨ੍ਤਾ. ਨਨੁ ਪਸ੍ਸਤਿ ਭੂਮਿਂ ਪਾਸਾਣਂ ਪਬ੍ਬਤਨ੍ਤਿ? ਆਮਨ੍ਤਾ. ਹਞ੍ਚਿ ਪਸ੍ਸਤਿ [ਪਸ੍ਸਸਿ (ਸੀ. ਸ੍ਯਾ. ਕ.) ਏਵਮੁਪਰਿਪਿ] ਭੂਮਿਂ ਪਾਸਾਣਂ ਪਬ੍ਬਤਂ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਪਥਵੀਧਾਤੁ ਸਨਿਦਸ੍ਸਨਾ’’ਤਿ…ਪੇ….
ਨ ਵਤ੍ਤਬ੍ਬਂ – ‘‘ਆਪੋਧਾਤੁ ਸਨਿਦਸ੍ਸਨਾ’’ਤਿ? ਆਮਨ੍ਤਾ. ਨਨੁ ਪਸ੍ਸਤਿ ਉਦਕਨ੍ਤਿ? ਆਮਨ੍ਤਾ. ਹਞ੍ਚਿ ਪਸ੍ਸਤਿ ਉਦਕਂ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਆਪੋਧਾਤੁ ਸਨਿਦਸ੍ਸਨਾਤਿ…ਪੇ….
ਨ ਵਤ੍ਤਬ੍ਬਂ – ਤੇਜੋਧਾਤੁ ਸਨਿਦਸ੍ਸਨਾਤਿ? ਆਮਨ੍ਤਾ. ਨਨੁ ਪਸ੍ਸਤਿ ਅਗ੍ਗਿਂ ਜਲਨ੍ਤਨ੍ਤਿ? ਆਮਨ੍ਤਾ. ਹਞ੍ਚਿ ਪਸ੍ਸਤਿ ਅਗ੍ਗਿਂ ਜਲਨ੍ਤਂ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਤੇਜੋਧਾਤੁ ਸਨਿਦਸ੍ਸਨਾ’’ਤਿ…ਪੇ….
ਨ ਵਤ੍ਤਬ੍ਬਂ – ‘‘ਵਾਯੋਧਾਤੁ ਸਨਿਦਸ੍ਸਨਾ’’ਤਿ? ਆਮਨ੍ਤਾ. ਨਨੁ ਪਸ੍ਸਤਿ ਵਾਤੇਨ ਰੁਕ੍ਖੇ ਸਞ੍ਚਾਲਿਯਮਾਨੇਤਿ? ਆਮਨ੍ਤਾ. ਹਞ੍ਚਿ ਪਸ੍ਸਤਿ ਵਾਤੇਨ ਰੁਕ੍ਖੇ ਸਞ੍ਚਾਲਿਯਮਾਨੇ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਵਾਯੋਧਾਤੁ ਸਨਿਦਸ੍ਸਨਾ’’ਤਿ…ਪੇ….
ਪਥਵੀਧਾਤੁ ਸਨਿਦਸ੍ਸਨਾਤਿਆਦਿਕਥਾ ਨਿਟ੍ਠਿਤਾ.
੬. ਛਟ੍ਠਵਗ੍ਗੋ
(੬੧) ੯. ਚਕ੍ਖੁਨ੍ਦ੍ਰਿਯਂ ਸਨਿਦਸ੍ਸਨਨ੍ਤਿਆਦਿਕਥਾ
੪੬੭. ਚਕ੍ਖੁਨ੍ਦ੍ਰਿਯਂ ਸਨਿਦਸ੍ਸਨਨ੍ਤਿ? ਆਮਨ੍ਤਾ. ਰੂਪਂ ਰੂਪਾਯਤਨਂ ਰੂਪਧਾਤੁ…ਪੇ… ਚਕ੍ਖੁਸ੍ਸ ਆਪਾਥਂ ਆਗਚ੍ਛਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਚਕ੍ਖੁਨ੍ਦ੍ਰਿਯਂ ਸਨਿਦਸ੍ਸਨਨ੍ਤਿ? ਆਮਨ੍ਤਾ. ਚਕ੍ਖੁਞ੍ਚ ਪਟਿਚ੍ਚ ਚਕ੍ਖੁਨ੍ਦ੍ਰਿਯਞ੍ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਚਕ੍ਖੁਞ੍ਚ ਪਟਿਚ੍ਚ ਚਕ੍ਖੁਨ੍ਦ੍ਰਿਯਞ੍ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣਨ੍ਤਿ? ਆਮਨ੍ਤਾ. ‘‘ਚਕ੍ਖੁਞ੍ਚ ਪਟਿਚ੍ਚ ਚਕ੍ਖੁਨ੍ਦ੍ਰਿਯਞ੍ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣ’’ਨ੍ਤਿ – ਅਤ੍ਥੇਵ ਸੁਤ੍ਤਨ੍ਤੋਤਿ? ਨਤ੍ਥਿ. ‘‘ਚਕ੍ਖੁਞ੍ਚ ਪਟਿਚ੍ਚ ਰੂਪੇ ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣ’’ਨ੍ਤਿ – ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਹਞ੍ਚਿ ‘‘ਚਕ੍ਖੁਞ੍ਚ ਪਟਿਚ੍ਚ ਰੂਪੇ ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣ’’ਨ੍ਤਿ – ਅਤ੍ਥੇਵ ਸੁਤ੍ਤਨ੍ਤੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਚਕ੍ਖੁਞ੍ਚ ਪਟਿਚ੍ਚ ਚਕ੍ਖੁਨ੍ਦ੍ਰਿਯਞ੍ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣ’’ਨ੍ਤਿ.
੪੬੮. ਨ ਵਤ੍ਤਬ੍ਬਂ – ‘‘ਪਞ੍ਚਿਨ੍ਦ੍ਰਿਯਾਨਿ ਸਨਿਦਸ੍ਸਨਾਨੀ’’ਤਿ? ਆਮਨ੍ਤਾ. ਨਨੁ ਪਸ੍ਸਤਿ ਚਕ੍ਖੁਂ ਸੋਤਂ ਘਾਨਂ ਜਿਵ੍ਹਂ ਕਾਯਨ੍ਤਿ? ਆਮਨ੍ਤਾ. ਹਞ੍ਚਿ ਪਸ੍ਸਤਿ ਚਕ੍ਖੁਂ ਸੋਤਂ ਘਾਨਂ ਜਿਵ੍ਹਂ ਕਾਯਂ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਪਞ੍ਚਿਨ੍ਦ੍ਰਿਯਾਨਿ ਸਨਿਦਸ੍ਸਨਾਨੀ’’ਤਿ…ਪੇ….
ਚਕ੍ਖੁਨ੍ਦ੍ਰਿਯਂ ਸਨਿਦਸ੍ਸਨਨ੍ਤਿਆਦਿਕਥਾ ਨਿਟ੍ਠਿਤਾ.
੬. ਛਟ੍ਠਵਗ੍ਗੋ
(੬੨) ੧੦. ਕਾਯਕਮ੍ਮਂ ਸਨਿਦਸ੍ਸਨਨ੍ਤਿਕਥਾ
੪੬੯. ਕਾਯਕਮ੍ਮਂ ਸਨਿਦਸ੍ਸਨਨ੍ਤਿ? ਆਮਨ੍ਤਾ. ਰੂਪਂ ਰੂਪਾਯਤਨਂ ਰੂਪਧਾਤੁ ਨੀਲਂ ਪੀਤਕਂ ਲੋਹਿਤਕਂ ਓਦਾਤਂ ਚਕ੍ਖੁਵਿਞ੍ਞੇਯ੍ਯਂ ਚਕ੍ਖੁਸ੍ਮਿਂ ਪਟਿਹਞ੍ਞਤਿ ਚਕ੍ਖੁਸ੍ਸ ਆਪਾਥਂ ਆਗਚ੍ਛਤੀਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਕਾਯਕਮ੍ਮਂ ਸਨਿਦਸ੍ਸਨਨ੍ਤਿ? ਆਮਨ੍ਤਾ. ਚਕ੍ਖੁਞ੍ਚ ਪਟਿਚ੍ਚ ਕਾਯਕਮ੍ਮਞ੍ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣਨ੍ਤਿ? ਨ ਹੇਵਂ ਵਤ੍ਤਬ੍ਬੇ…ਪੇ….
ਚਕ੍ਖੁਞ੍ਚ ਪਟਿਚ੍ਚ ਕਾਯਕਮ੍ਮਞ੍ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣਨ੍ਤਿ? ਆਮਨ੍ਤਾ. ‘‘ਚਕ੍ਖੁਞ੍ਚ ਪਟਿਚ੍ਚ ਕਾਯਕਮ੍ਮਞ੍ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣ’’ਨ੍ਤਿ – ਅਤ੍ਥੇਵ ਸੁਤ੍ਤਨ੍ਤੋਤਿ? ਨਤ੍ਥਿ. ‘‘ਚਕ੍ਖੁਞ੍ਚ ਪਟਿਚ੍ਚ ਰੂਪੇ ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣ’’ਨ੍ਤਿ – ਅਤ੍ਥੇਵ ਸੁਤ੍ਤਨ੍ਤੋਤਿ? ਆਮਨ੍ਤਾ. ਹਞ੍ਚਿ ‘‘ਚਕ੍ਖੁਞ੍ਚ ਪਟਿਚ੍ਚ ਰੂਪੇ ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣ’’ਨ੍ਤਿ – ਅਤ੍ਥੇਵ ਸੁਤ੍ਤਨ੍ਤੋ, ਨੋ ਚ ਵਤ ਰੇ ਵਤ੍ਤਬ੍ਬੇ – ‘‘ਚਕ੍ਖੁਞ੍ਚ ਪਟਿਚ੍ਚ ਕਾਯਕਮ੍ਮਞ੍ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣ’’ਨ੍ਤਿ.
੪੭੦. ਨ ਵਤ੍ਤਬ੍ਬਂ – ‘‘ਕਾਯਕਮ੍ਮਂ ਸਨਿਦਸ੍ਸਨ’’ਨ੍ਤਿ? ਆਮਨ੍ਤਾ. ਨਨੁ ਪਸ੍ਸਤਿ ਅਭਿਕ੍ਕਮਨ੍ਤਂ ਪਟਿਕ੍ਕਮਨ੍ਤਂ ਆਲੋਕੇਨ੍ਤਂ ਵਿਲੋਕੇਨ੍ਤਂ ਸਮਿਞ੍ਜੇਨ੍ਤਂ ਪਸਾਰੇਨ੍ਤਨ੍ਤਿ? ਆਮਨ੍ਤਾ. ਹਞ੍ਚਿ ਪਸ੍ਸਤਿ ਅਭਿਕ੍ਕਮਨ੍ਤਂ ਪਟਿਕ੍ਕਮਨ੍ਤਂ ਆਲੋਕੇਨ੍ਤਂ ਵਿਲੋਕੇਨ੍ਤਂ ਸਮਿਞ੍ਜੇਨ੍ਤਂ ਪਸਾਰੇਨ੍ਤਂ, ਤੇਨ ਵਤ ਰੇ ਵਤ੍ਤਬ੍ਬੇ – ‘‘ਕਾਯਕਮ੍ਮਂ ਸਨਿਦਸ੍ਸਨ’’ਨ੍ਤਿ.
ਕਾਯਕਮ੍ਮਂ ਸਨਿਦਸ੍ਸਨਨ੍ਤਿਕਥਾ ਨਿਟ੍ਠਿਤਾ.
ਛਟ੍ਠਵਗ੍ਗੋ.
ਤਸ੍ਸੁਦ੍ਦਾਨਂ –
ਨਿਯਮੋ ਅਸਙ੍ਖਤੋ, ਪਟਿਚ੍ਚਸਮੁਪ੍ਪਾਦੋ ਅਸਙ੍ਖਤੋ, ਚਤ੍ਤਾਰਿ ਸਚ੍ਚਾਨਿ ਅਸਙ੍ਖਤਾਨਿ, ਚਤ੍ਤਾਰੋ ਆਰੁਪ੍ਪਾ ਅਸਙ੍ਖਤਾ, ਨਿਰੋਧਸਮਾਪਤ੍ਤਿ ਅਸਙ੍ਖਤਾ, ਆਕਾਸੋ ਅਸਙ੍ਖਤੋ, ਆਕਾਸੋ ਸਨਿਦਸ੍ਸਨੋ, ਚਤ੍ਤਾਰੋ ਮਹਾਭੂਤਾ, ਪਞ੍ਚਿਨ੍ਦ੍ਰਿਯਾਨਿ, ਤਥੇਵ ਕਾਯਕਮ੍ਮਨ੍ਤਿ.