੬. ਦੇਵਤਾਨੁਸ੍ਸਤਿਕਥਾਵਣ੍ਣਨਾ

੧੬੨. ਅਰਿਯਮਗ੍ਗਵਸੇਨਾਤਿ ਅਰਿਯਮਗ੍ਗਸ੍ਸ ਅਧਿਗਮਵਸੇਨ. ਸਮੁਦਾਗਤੇਹੀਤਿ ਸਮ੍ਮਦੇਵ ਤਦੁਪ੍ਪਤ੍ਤਿਤੋ ਉਦ੍ਧਂ ਆਗਤੇਹਿ. ਯਾਦਿਸਾ ਹਿ ਅਰਿਯਾਨਂ ਸਨ੍ਤਾਨੇ ਲੋਕਿਯਾਪਿ ਸਦ੍ਧਾਦਯੋ, ਨ ਤਾਦਿਸਾ ਕਦਾਚਿਪਿ ਪੋਥੁਜ੍ਜਨਿਕਾ ਸਦ੍ਧਾਦਯੋ. ਦਿਬ੍ਬਨ੍ਤੀਤਿ ਦੇਵਾ. ਚਤ੍ਤਾਰੋ ਮਹਾਰਾਜਾਨੋ ਏਤੇਸਨ੍ਤਿ ਚਤੁਮਹਾਰਾਜਾ, ਤੇ ਏਵ ਚਾਤੁਮਹਾਰਾਜਿਕਾ. ਤੇਤ੍ਤਿਂਸ ਸਹਪੁਞ੍ਞਕਾਰਿਨੋ ਤਤ੍ਥੂਪਪਨ੍ਨਾਤਿ ਤਂਸਹਚਰਿਤਂ ਠਾਨਂ ਤਾਵਤਿਂਸਂ, ਤਨ੍ਨਿਵਾਸਿਨੋਪਿ ਦੇਵਾ ਤਂਸਹਚਰਣਤੋ ਏਵ ਤਾਵਤਿਂਸਾ. ਦੁਕ੍ਖਤੋ ਯਾਤਾ ਅਪਯਾਤਾਤਿ ਯਾਮਾ. ਤੁਸਾਯ ਪੀਤਿਯਾ ਇਤਾ ਉਪਗਤਾਤਿ ਤੁਸਿਤਾ. ਭੋਗਾਨਂ ਨਿਮ੍ਮਾਨੇ ਰਤਿ ਏਤੇਸਨ੍ਤਿ ਨਿਮ੍ਮਾਨਰਤਿਨੋ. ਪਰਨਿਮ੍ਮਿਤੇਸੁ ਭੋਗੇਸੁ ਵਸਂ ਵਤ੍ਤੇਨ੍ਤੀਤਿ ਪਰਨਿਮ੍ਮਿਤਵਸਵਤ੍ਤਿਨੋ. ਬ੍ਰਹ੍ਮਾਨਂ ਕਾਯੋ ਸਮੂਹੋ ਬ੍ਰਹ੍ਮਕਾਯੋ, ਤਪ੍ਪਰਿਯਾਪਨ੍ਨਤਾਯ ਤਤ੍ਥ ਭਵਾਤਿ ਬ੍ਰਹ੍ਮਕਾਯਿਕਾ. ਤਤੁਤ੍ਤਰੀਤਿ ਤਤੋ ਬ੍ਰਹ੍ਮਕਾਯਿਕੇਹਿ ਉਤ੍ਤਰਿ, ਉਪਰਿ ਪਰਿਤ੍ਤਾਭਾਦਿਕੇ ਸਨ੍ਧਾਯ ਵਦਤਿ. ਦੇਵਤਾ ਸਕ੍ਖਿਟ੍ਠਾਨੇ ਠਪੇਤ੍ਵਾਤਿ ‘‘ਯਥਾਰੂਪਾਯ ਮਗ੍ਗੇਨਾਗਤਾਯ ਸਦ੍ਧਾਯ ਸਮਨ੍ਨਾਗਤਾ, ਸੀਲੇਨ ਸੁਤੇਨ ਚਾਗੇਨ ਪਞ੍ਞਾਯ ਸਮਨ੍ਨਾਗਤਾ ਇਤੋ ਚੁਤਾ ਤਤ੍ਥ ਉਪਪਨ੍ਨਾ ਤਾ ਦੇਵਤਾ, ਮਯ੍ਹਮ੍ਪਿ ਤਥਾਰੂਪਾ ਸਦ੍ਧਾ ਸੀਲਂ ਸੁਤਂ ਚਾਗੋ ਪਞ੍ਞਾ ਚ ਸਂਵਿਜ੍ਜਤੀ’’ਤਿ ਦੇਵਤਾ ਸਕ੍ਖਿਟ੍ਠਾਨੇ ਠਪੇਤ੍ਵਾ ਸਕ੍ਖਿਂ ਓਤਾਰੇਨ੍ਤੇਨ ਵਿਯ ਅਤ੍ਤਨੋ ਸਦ੍ਧਾਦਿਗੁਣਾ ਅਨੁਸ੍ਸਰਿਤਬ੍ਬਾ.

ਯਦਿ ਏਵਂ ਸੁਤ੍ਤੇ (ਅ. ਨਿ. ੬.੧੦) ਉਭਯਗੁਣਾਨੁਸ੍ਸਰਣਂ ਵੁਤ੍ਤਂ, ਤਂ ਕਥਨ੍ਤਿ ਅਨੁਯੋਗਂ ਮਨਸਿ ਕਤ੍ਵਾ ਆਹ ‘‘ਸੁਤ੍ਤੇ ਪਨਾ’’ਤਿਆਦਿ. ਤਤ੍ਥ ਕਿਞ੍ਚਾਪਿ ਵੁਤ੍ਤਨ੍ਤਿ ‘‘ਅਤ੍ਤਨੋ ਚ, ਤਾਸਞ੍ਚ ਦੇਵਤਾਨ’’ਨ੍ਤਿ ਉਭਯਂ ਸਮਧੁਰਂ ਵਿਯ ਸੁਤ੍ਤੇ (ਅ. ਨਿ. ੬.੧੦) ਕਿਞ੍ਚਾਪਿ ਵੁਤ੍ਤਂ. ਅਥ ਖੋ ਤਂ ‘‘ਦੇਵਤਾਨਂ ਸਦ੍ਧਞ੍ਚ ਸੀਲਞ੍ਚਾ’’ਤਿਆਦਿਵਚਨਂ. ਸਕ੍ਖਿਟ੍ਠਾਨੇ ਠਪੇਤਬ੍ਬਨ੍ਤਿ ‘‘ਵੁਤ੍ਤ’’ਨ੍ਤਿ ਪਰਤੋ ਪਦਂ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ਕਿਮਤ੍ਥਂ ਪਨ ਸਕ੍ਖਿਟ੍ਠਾਨੇ ਠਪਨਨ੍ਤਿ ਆਹ ‘‘ਦੇਵਤਾਨਂ ਅਤ੍ਤਨੋ ਸਦ੍ਧਾਦੀਹਿ ਸਮਾਨਗੁਣਦੀਪਨਤ੍ਥਨ੍ਤਿ ਵੇਦਿਤਬ੍ਬ’’ਨ੍ਤਿ. ਕਸ੍ਮਾ ਪਨ ਸੁਤ੍ਤੇ ਯਥਾਰੁਤਵਸੇਨ ਅਤ੍ਥਂ ਅਗ੍ਗਹੇਤ੍ਵਾ ਏਵਂ ਅਤ੍ਥੋ ਗਯ੍ਹਤੀਤਿ ਆਹ ‘‘ਅਟ੍ਠਕਥਾਯਞ੍ਹੀ’’ਤਿਆਦਿ.

੧੬੩. ਤਸ੍ਮਾਤਿ ਯਸ੍ਮਾ ਅਟ੍ਠਕਥਾਯਂ ਦੇਵਤਾ ਸਕ੍ਖਿਟ੍ਠਾਨੇ ਠਪੇਤ੍ਵਾ ਅਤ੍ਤਨੋ ਗੁਣਾਨੁਸ੍ਸਰਣਂ ਦਲ਼੍ਹਂ ਕਤ੍ਵਾ ਵੁਤ੍ਤਂ, ਸੀਲਚਾਗਾਨੁਸ੍ਸਤੀਸੁ ਵਿਯ ਇਧਾਪਿ ਅਤ੍ਤਨੋ ਗੁਣਾਨੁਸ੍ਸਰਣਂ ਝਾਨੁਪ੍ਪਤ੍ਤਿਨਿਮਿਤ੍ਤਂ ਯੁਤ੍ਤਂ, ਤਸ੍ਮਾ. ਪੁਬ੍ਬਭਾਗੇ ਭਾਵਨਾਰਮ੍ਭੇ. ਅਪਰਭਾਗੇਤਿ ਯਥਾ ਭਾਵੇਨ੍ਤਸ੍ਸ ਉਪਚਾਰਜ੍ਝਾਨਂ ਇਜ੍ਝਤਿ, ਤਥਾ ਭਾਵਨਾਕਾਲੇ. ਯਦਿ ਅਤ੍ਤਨੋ ਏਵ ਇਧ ਗੁਣਾ ਅਨੁਸ੍ਸਰਿਤਬ੍ਬਾ, ਕਥਮਯਂ ਦੇਵਤਾਨੁਸ੍ਸਤੀਤਿ ਆਹ ‘‘ਦੇਵਤਾਨਂ ਗੁਣਸਦਿਸਸਦ੍ਧਾਦਿਗੁਣਾਨੁਸ੍ਸਰਣਵਸੇਨਾ’’ਤਿ. ਤੇਨ ਸਦਿਸਕਪ੍ਪਨਾਯ ਅਯਂ ਭਾਵਨਾ ‘‘ਦੇਵਤਾਨੁਸ੍ਸਤੀ’’ਤਿ ਵੁਤ੍ਤਾ, ਨ ਦੇਵਤਾਨਂ, ਤਾਸਂ ਗੁਣਾਨਂ ਵਾ ਅਨੁਸ੍ਸਰਣੇਨਾਤਿ ਦਸ੍ਸੇਤਿ. ਪੁਬ੍ਬਭਾਗੇ ਵਾ ਪਵਤ੍ਤਂ ਦੇਵਤਾਗੁਣਾਨੁਸ੍ਸਰਣਂ ਉਪਾਦਾਯ ‘‘ਦੇਵਤਾਨੁਸ੍ਸਤੀ’’ਤਿ ਇਮਿਸ੍ਸਾ ਸਮਞ੍ਞਾ ਵੇਦਿਤਬ੍ਬਾ. ਤਥਾ ਹਿ ਵਕ੍ਖਤਿ ‘‘ਪੁਬ੍ਬਭਾਗੇ ਦੇਵਤਾ ਆਰਬ੍ਭ ਪਵਤ੍ਤਚਿਤ੍ਤਵਸੇਨਾ’’ਤਿ. ਸੇਸਂ ਸੁਵਿਞ੍ਞੇਯ੍ਯਮੇਵ.

ਪਕਿਣ੍ਣਕਕਥਾਵਣ੍ਣਨਾ

੧੬੪. ਏਤਾਸਨ੍ਤਿ ਏਤਾਸਂ ਬੁਦ੍ਧਾਨੁਸ੍ਸਤਿਆਦੀਨਂ ਛਨ੍ਨਂ ਅਨੁਸ੍ਸਤੀਨਂ. ਵਿਤ੍ਥਾਰਦੇਸਨਾਯਨ੍ਤਿ ਵਿਤ੍ਥਾਰਵਸੇਨ ਪਵਤ੍ਤਦੇਸਨਾਯਂ, ਮਹਾਨਾਮਸੁਤ੍ਤਂ (ਅ. ਨਿ. ੬.੧੦; ੧੧.੧੧) ਸਨ੍ਧਾਯ ਵਦਤਿ. ਭਗਵਾਤਿਆਦੀਨਂ ਅਤ੍ਥਨ੍ਤਿ ਭਗਵਾਤਿਆਦੀਨਂ ਪਦਾਨਂ ਅਤ੍ਥਂ. ਅਤ੍ਥਵੇਦਨ੍ਤਿ ਵਾ ਹੇਤੁਫਲਂ ਪਟਿਚ੍ਚ ਉਪ੍ਪਨ੍ਨਂ ਤੁਟ੍ਠਿਮਾਹ. ਧਮ੍ਮਵੇਦਨ੍ਤਿ ਹੇਤੁਂ ਪਟਿਚ੍ਚ ਉਪ੍ਪਨ੍ਨਂ ਤੁਟ੍ਠਿਂ. ‘‘ਆਰਕਤ੍ਤਾ ਅਰਹ’’ਨ੍ਤਿ ਅਨੁਸ੍ਸਰਨ੍ਤਸ੍ਸ ਹਿ ਯਂ ਤਂ ਭਗਵਤੋ ਕਿਲੇਸੇਹਿ ਆਰਕਤ੍ਤਂ, ਸੋ ਹੇਤੁ. ਞਾਪਕੋ ਚੇਤ੍ਥ ਹੇਤੁ ਅਧਿਪ੍ਪੇਤੋ, ਨ ਕਾਰਕੋ, ਸਮ੍ਪਾਪਕੋ ਵਾ. ਯੋਨੇਨ ਞਾਯਮਾਨੋ ਅਰਹਤ੍ਤਤ੍ਥੋ, ਤਂ ਫਲਂ. ਇਮਿਨਾ ਨਯੇਨ ਸੇਸਪਦੇਸੁਪਿ ਹੇਤੁਫਲਵਿਭਾਗੋ ਵੇਦਿਤਬ੍ਬੋ. ਧਮ੍ਮਾਨੁਸ੍ਸਤਿਆਦੀਸੁਪਿ ‘‘ਆਦਿਮਜ੍ਝਪਰਿਯੋਸਾਨਕਲ੍ਯਾਣਤ੍ਤਾ’’ਤਿਆਦਿਨਾ, ‘‘ਯਸ੍ਮਾ ਪਨ ਸਾ ਸਮ੍ਮਾਪਟਿਪਦਾ’’ਤਿਆਦਿਨਾ ਚ ਤਤ੍ਥ ਤਤ੍ਥ ਹੇਤੁਅਪਦੇਸੋ ਕਤੋਯੇਵਾਤਿ. ਧਮ੍ਮੂਪਸਂਹਿਤਨ੍ਤਿ ਯਥਾਵੁਤ੍ਤਹੇਤੁਹੇਤੁਫਲਸਙ੍ਖਾਤਗੁਣੂਪਸਂਹਿਤਂ. ਗੁਣੇਤਿ ਅਤ੍ਤਨੋ ਗੁਣੇ.

੧੬੫. ਅਰਿਯਸਾਵਕਾਨਞ੍ਞੇਵ ਇਜ੍ਝਨ੍ਤੀਤਿ ਅਰਿਯਸਾਵਕਾਨਂ ਇਜ੍ਝਨ੍ਤਿਯੇਵਾਤਿ ਉਤ੍ਤਰਪਦਾਵਧਾਰਣਂ ਦਟ੍ਠਬ੍ਬਂ, ਅਵਧਾਰਣਞ੍ਚ ਤੇਸਂ ਸੁਖਸਿਦ੍ਧਿਦਸ੍ਸਨਤ੍ਥਂ. ਤੇਨਾਹ ‘‘ਤੇਸਂ ਹੀ’’ਤਿਆਦਿ. ਨ ਪੁਥੁਜ੍ਜਨਾਨਂ ਸਬ੍ਬੇਨ ਸਬ੍ਬਂ ਇਜ੍ਝਨ੍ਤੀਤਿ. ਤਥਾ ਹਿ ਵਕ੍ਖਤਿ ‘‘ਏਵਂ ਸਨ੍ਤੇਪੀ’’ਤਿਆਦਿ. ਯਦਿ ਏਵਂ, ਕਸ੍ਮਾ ਮਹਾਨਾਮਸੁਤ੍ਤਾਦੀਸੁ (ਅ. ਨਿ. ੬.੧੦; ੧੧.੧੧) ਬਹੂਸੁ ਸੁਤ੍ਤੇਸੁ ਅਰਿਯਸਾਵਕਗ੍ਗਹਣਂ ਕਤਨ੍ਤਿ? ਤੇਸਂ ਬਹੁਲਵਿਹਾਰਤਾਯਾਤਿ ਆਚਰਿਯਾ.

ਨਿਕ੍ਖਨ੍ਤਨ੍ਤਿ ਨਿਗ੍ਗਤਂ ਨਿਸ੍ਸਟਂ. ਮੁਤ੍ਤਨ੍ਤਿ ਵਿਸ੍ਸਟ੍ਠਂ. ਵੁਟ੍ਠਿਤਨ੍ਤਿ ਅਪੇਤਂ. ਸਬ੍ਬਮੇਤਂ ਵਿਕ੍ਖਮ੍ਭਨਮੇਵ ਸਨ੍ਧਾਯ ਵਦਤਿ. ਗੇਧਮ੍ਹਾਤਿ ਪਲਿਬੋਧਤੋ. ਇਦਮ੍ਪੀਤਿ ਬੁਦ੍ਧਾਨੁਸ੍ਸਤਿਵਸੇਨ ਲਦ੍ਧਂ ਉਪਚਾਰਜ੍ਝਾਨਮਾਹ. ਆਰਮ੍ਮਣਂ ਕਰਿਤ੍ਵਾਤਿ ਪਚ੍ਚਯਂ ਕਤ੍ਵਾ, ਪਾਦਕਂ ਕਤ੍ਵਾਤਿ ਅਤ੍ਥੋ. ਵਿਸੁਜ੍ਝਨ੍ਤੀਤਿ ਪਰਮਤ੍ਥਵਿਸੁਦ੍ਧਿਂ ਪਾਪੁਣਨ੍ਤਿ.

ਸਮ੍ਬਾਧੇਤਿ ਤਣ੍ਹਾਸਂਕਿਲੇਸਾਦਿਨਾ ਸਮ੍ਪੀਲ਼ੇ ਸਂਕਟੇ ਘਰਾਵਾਸੇ. ਓਕਾਸਾਧਿਗਮੋ ਲੋਕੁਤ੍ਤਰਧਮ੍ਮਸ੍ਸ ਅਧਿਗਮਾਯ ਅਧਿਗਨ੍ਤਬ੍ਬਓਕਾਸੋ. ਅਨੁਸ੍ਸਤਿਯੋ ਏਵ ਅਨੁਸ੍ਸਤਿਟ੍ਠਾਨਾਨਿ. ਵਿਸੁਦ੍ਧਿਧਮ੍ਮਾਤਿ ਵਿਸੁਜ੍ਝਨਸਭਾਵਾ, ਵਿਸੁਜ੍ਝਿਤੁਂ ਵਾ ਭਬ੍ਬਾ. ਪਰਮਤ੍ਥਵਿਸੁਦ੍ਧਿਧਮ੍ਮਤਾਯਾਤਿ ਪਰਮਤ੍ਥਵਿਸੁਦ੍ਧਿਯਾ ਨਿਬ੍ਬਾਨਸ੍ਸ ਭਬ੍ਬਭਾਵੇਨ. ਉਪਕ੍ਕਮੇਨਾਤਿ ਪਯੋਗੇਨ. ਪਰਿਯੋਦਪਨਾਤਿ ਵਿਸੋਧਨਾ.

੧੬੬. ਏਵਂ ਸਨ੍ਤੇਪੀਤਿ ਏਵਂ ਮਹਾਨਾਮਸੁਤ੍ਤਾਦੀਸੁ ਅਨੇਕੇਸੁ ਸੁਤ੍ਤੇਸੁ ਅਰਿਯਸਾਵਕਸ੍ਸੇਵ ਵਸੇਨ ਛਸੁ ਅਨੁਸ੍ਸਤੀਸੁ ਦੇਸਿਤਾਸੁਪਿ. ਯਸ੍ਸਾਨੁਭਾਵੇਨਾਤਿ ਯਸ੍ਸ ਚਿਤ੍ਤਪ੍ਪਸਾਦਸ੍ਸ ਬਲੇਨ. ਪੀਤਿਂ ਪਟਿਲਭਿਤ੍ਵਾਤਿ ਅਨੁਸ੍ਸਵਵਸੇਨ ਬੁਦ੍ਧਾਰਮ੍ਮਣਂ ਪੀਤਿਂ ਉਪ੍ਪਾਦੇਤ੍ਵਾ.

ਛਅਨੁਸ੍ਸਤਿਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

ਇਤਿ ਸਤ੍ਤਮਪਰਿਚ੍ਛੇਦਵਣ੍ਣਨਾ.