੫. ਚਾਗਾਨੁਸ੍ਸਤਿਕਥਾਵਣ੍ਣਨਾ

੧੬੦. ਪਕਤਿਯਾਤਿ ਸਭਾਵੇਨ. ਚਾਗਾਧਿਮੁਤ੍ਤੇਨਾਤਿ ਦੇਯ੍ਯਧਮ੍ਮਪਰਿਚ੍ਚਾਗੇ ਯੁਤ੍ਤਪ੍ਪਯੁਤ੍ਤੇਨ ਤਨ੍ਨਿਨ੍ਨੇਨ ਤਪ੍ਪੋਣੇਨ. ਨਿਚ੍ਚਂ ਸਦਾ ਪਵਤ੍ਤਾ ਦਾਨਸਂਵਿਭਾਗਾ ਯਸ੍ਸ ਸੋ ਨਿਚ੍ਚਪਵਤ੍ਤਦਾਨਸਂਵਿਭਾਗੋ, ਤੇਨ. ਇਧਾਪਿ ‘‘ਪਕਤਿਯਾ’’ਤਿ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ਯਂ ਪਰਸ੍ਸ ਪਟਿਯਤ੍ਤਂ ਦਿਯ੍ਯਤਿ, ਤਂ ਦਾਨਂ. ਯਂ ਅਤ੍ਤਨਾ ਪਰਿਭੁਞ੍ਜਿਤਬ੍ਬਤੋ ਸਂਵਿਭਜਤਿ, ਸੋ ਸਂਵਿਭਾਗੋ. ਇਤੋ ਦਾਨਿ ਪਭੁਤੀਤਿ ਇਤੋ ਪਟ੍ਠਾਯ ਦਾਨਿ ਅਜ੍ਜਤਗ੍ਗੇ ਅਜ੍ਜਦਿਵਸਂ ਆਦਿਂ ਕਤ੍ਵਾ. ਅਦਤ੍ਵਾ ਨ ਭੁਞ੍ਜਿਸ੍ਸਾਮੀਤਿ ਦਾਨਸਮਾਦਾਨਂ ਕਤ੍ਵਾ. ਤਂਦਿਵਸਨ੍ਤਿ ਤਸ੍ਮਿਂ ਭਾਵਨਾਰਮ੍ਭਦਿਵਸੇ. ਤਤ੍ਥ ਨਿਮਿਤ੍ਤਂ ਗਣ੍ਹਿਤ੍ਵਾਤਿ ਤਸ੍ਮਿਂ ਦਾਨੇ ਪਰਿਚ੍ਚਾਗਚੇਤਨਾਯ ਪਵਤ੍ਤਿਆਕਾਰਸ੍ਸ ਸਲ੍ਲਕ੍ਖਣਵਸੇਨ ਨਿਮਿਤ੍ਤਂ ਗਹੇਤ੍ਵਾ. ਵਿਗਤਮਲਮਚ੍ਛੇਰਤਾਦਿਗੁਣਵਸੇਨਾਤਿ ਵਿਗਤਾਨਿ ਮਲਮਚ੍ਛੇਰਾਨਿ ਏਤਸ੍ਮਾਤਿ ਵਿਗਤਮਲਮਚ੍ਛੇਰੋ, ਚਾਗੋ, ਤਸ੍ਸ ਭਾਵੋ ਵਿਗਤਮਲਮਚ੍ਛੇਰਤਾ. ਤਦਾਦੀਨਂ ਗੁਣਾਨਂ, ਸਮ੍ਪਤ੍ਤੀਨਂ, ਆਨਿਸਂਸਾਨਂ ਵਾ ਵਸੇਨ.

ਸਤਂ ਧਮ੍ਮਂ ਅਨੁਕ੍ਕਮਨ੍ਤਿ ਸਾਧੂਨਂ ਬੋਧਿਸਤ੍ਤਾਨਂ ਧਮ੍ਮਂ ਪਵੇਣਿਂ ਅਨੁ ਅਨੁ ਕਮਨ੍ਤੋ ਓਕ੍ਕਮਨ੍ਤੋ, ਅਵੋਕ੍ਕਮਨ੍ਤੋ ਵਾ. ਯੇ ਇਮੇ ਦਾਯਕਸ੍ਸ ਲਾਭਾ ਆਯੁਵਣ੍ਣਸੁਖਬਲਪਟਿਭਾਨਾਦਯੋ, ਪਿਯਭਾਵਾਦਯੋ ਚ ਭਗਵਤਾ ਸਂਵਣ੍ਣਿਤਾ ਪਕਿਤ੍ਤਿਤਾ. ਮਨੁਸ੍ਸਤ੍ਤਂ ਵਾਤਿ ਵਾ-ਸਦ੍ਦੋ ਅਵੁਤ੍ਤਵਿਕਪ੍ਪਤ੍ਥੋ, ਤੇਨ ਇਨ੍ਦ੍ਰਿਯਪਾਟਵਭਾਵਕਮ੍ਮਸ੍ਸਕਤਾਞਾਣਾਦੀਨਂ ਸਙ੍ਗਹੋ ਦਟ੍ਠਬ੍ਬੋ.

ਮਚ੍ਛੇਰਮਲੇਨਾਤਿ ਮਚ੍ਛੇਰਸਙ੍ਖਾਤੇਨ ਮਲੇਨ. ਅਥ ਵਾ ਮਚ੍ਛੇਰਞ੍ਚ ਮਲਞ੍ਚ ਮਚ੍ਛੇਰਮਲਂ, ਤੇਨ ਮਚ੍ਛੇਰੇਨ ਚੇਵ ਲੋਭਾਦਿਮਲੇਨ ਚਾਤਿ ਅਤ੍ਥੋ. ਪਜਾਯਨਵਸੇਨਾਤਿ ਯਥਾਸਕਂ ਕਮ੍ਮਨਿਬ੍ਬਤ੍ਤਨਵਸੇਨ. ਕਣ੍ਹਧਮ੍ਮਾਨਨ੍ਤਿ ਲੋਭਾਦਿਏਕਨ੍ਤਕਾਲ਼ਕਾਨਂ ਪਾਪਧਮ੍ਮਾਨਂ. ਵਿਗਤਤ੍ਤਾਤਿ ਪਹੀਨਤ੍ਤਾ. ਵਿਗਤਮਲਮਚ੍ਛੇਰੇਨ ਚੇਤਸਾਤਿ ਇਤ੍ਥਮ੍ਭੂਤਲਕ੍ਖਣੇ ਕਰਣਵਚਨਂ. ਸੋਤਾਪਨ੍ਨਸ੍ਸ ਸਤੋਤਿ ਗੇਹਂ ਆਵਸਨ੍ਤਸ੍ਸ ਸੋਤਾਪਨ੍ਨਸ੍ਸ ਸਮਾਨਸ੍ਸ. ਨਿਸ੍ਸਯਵਿਹਾਰਨ੍ਤਿ ਨਿਸ੍ਸਾਯ ਵਿਹਰਿਤਬ੍ਬਵਿਹਾਰਂ, ਦੇਵਸਿਕਂ ਵਲ਼ਞ੍ਜਨਕਕਮ੍ਮਟ੍ਠਾਨਨ੍ਤਿ ਅਤ੍ਥੋ. ਅਭਿਭਵਿਤ੍ਵਾਤਿ ਅਗਾਰਂ ਆਵਸਨ੍ਤਾਨਂ ਅਞ੍ਞੇਸਂ ਉਪ੍ਪਜ੍ਜਨਕਰਾਗਾਦਿਉਪਕ੍ਕਿਲੇਸੇ ਅਭਿਭੁਯ੍ਯ.

ਯੋ ਕਿਞ੍ਚਿ ਦੇਨ੍ਤੋਪਿ ਸਾਪੇਕ੍ਖੋਵ ਦੇਤਿ, ਸੋ ਮੁਤ੍ਤਚਾਗੋ ਨ ਹੋਤਿ, ਅਯਂ ਪਨ ਨ ਏਵਨ੍ਤਿ ‘‘ਮੁਤ੍ਤਚਾਗੋ’’ਤਿ ਵੁਤ੍ਤਂ. ਵਿਸ੍ਸਟ੍ਠਚਾਗੋਤਿ ਨਿਰਪੇਕ੍ਖਪਰਿਚ੍ਚਾਗੋਤਿ ਅਤ੍ਥੋ. ਯਥਾ ਪਾਣਾਤਿਪਾਤਬਹੁਲੋ ਪੁਗ੍ਗਲੋ ‘‘ਲੋਹਿਤਪਾਣੀ’’ਤਿ ਵੁਚ੍ਚਤਿ, ਏਵਂ ਦਾਨਬਹੁਲੋ ਪੁਗ੍ਗਲੋ ‘‘ਪਯਤਪਾਣੀ’’ਤਿ ਵੁਤ੍ਤੋਤਿ ਦਸ੍ਸੇਨ੍ਤੋ ‘‘ਦਾਤੁਂ ਸਦਾ ਧੋਤਹਤ੍ਥੋਯੇਵਾ’’ਤਿ ਆਹ. ਤਤ੍ਥ ਸਦਾਤਿ ਨਿਚ੍ਚਂ, ਅਭਿਣ੍ਹਨ੍ਤਿ ਅਤ੍ਥੋ. ਪਰਿਚ੍ਚਾਗੋਤਿ ਦੇਯ੍ਯਧਮ੍ਮਪਰਿਚ੍ਚਾਗੋਤਿ ਅਧਿਕਾਰਤੋ ਵਿਞ੍ਞਾਯਤਿ. ਯਂ ਯਂ ਦੇਯ੍ਯਧਮ੍ਮਂ ਪਰੇ ਯਾਚਨਕਾ. ਯਾਚਨੇ ਯੋਗੋ ਯਾਚਨਯੋਗੋ, ਪਰੇਹਿ ਯਾਚਿਤੁਂ ਯੁਤ੍ਤੋਤਿ ਅਤ੍ਥੋ. ਯਾਜੇਨ ਯੁਤ੍ਤੋਤਿ ਦਾਨੇਨ ਯੁਤ੍ਤੋ ਸਦਾ ਪਰਿਚ੍ਚਜਨਤੋ. ਉਭਯੇਤਿ ਯਥਾਵੁਤ੍ਤੇ ਦਾਨੇ, ਸਂਵਿਭਾਗੇ ਚ ਰਤੋ ਅਭਿਰਤੋ.

੧੬੧. ਯਥਾ ਪਰਿਸੁਦ੍ਧਸੀਲਸ੍ਸ ਪੁਗ੍ਗਲਸ੍ਸ ਅਖਣ੍ਡਤਾਦਿਗੁਣਵਸੇਨ ਅਤ੍ਤਨੋ ਸੀਲਸ੍ਸ ਅਨੁਸ੍ਸਰਨ੍ਤਸ੍ਸ ਸੀਲਾਨੁਸ੍ਸਤਿਭਾਵਨਾ ਇਜ੍ਝਤਿ, ਏਵਂ ਪਰਿਸੁਦ੍ਧਉਲ਼ਾਰਪਰਿਚ੍ਚਾਗਸ੍ਸ ਪੁਗ੍ਗਲਸ੍ਸ ਅਨੁਪਕ੍ਕਿਲਿਟ੍ਠਮੇਵ ਅਤ੍ਤਨੋ ਪਰਿਚ੍ਚਾਗਂ ਅਨੁਸ੍ਸਰਨ੍ਤਸ੍ਸ ਭਾਵਨਾ ਇਜ੍ਝਤੀਤਿ ਦਸ੍ਸੇਤੁਂ ‘‘ਵਿਗਤਮਲਮਚ੍ਛੇਰਤਾਦਿਗੁਣਵਸੇਨਾ’’ਤਿਆਦਿ ਵੁਤ੍ਤਂ, ਤਂ ਵੁਤ੍ਤਤ੍ਥਮੇਵ.

ਭਿਯ੍ਯੋਸੋਤਿ ਉਪਰਿਪਿ. ਮਤ੍ਤਾਯ ਪਮਾਣਸ੍ਸ ਮਹਤਿਯਾ ਮਤ੍ਤਾਯ, ਵਿਪੁਲੇਨ ਪਮਾਣੇਨਾਤਿ ਅਤ੍ਥੋ. ਚਾਗਾਧਿਮੁਤ੍ਤੋਤਿ ਪਰਿਚ੍ਚਾਗੇ ਅਧਿਮੁਤ੍ਤੋ ਨਿਨ੍ਨਪੋਣਪਬ੍ਭਾਰੋ. ਤਤੋ ਏਵ ਅਲੋਭਜ੍ਝਾਸਯੋ ਕਤ੍ਥਚਿਪਿ ਅਨਭਿਸਙ੍ਗਚਿਤ੍ਤੋ. ਪਟਿਗ੍ਗਾਹਕੇਸੁ ਮੇਤ੍ਤਾਯਨਵਸੇਨ ਪਰਿਚ੍ਚਾਗੋ ਹੋਤੀਤਿ ਮੇਤ੍ਤਾਯ ਮੇਤ੍ਤਾਭਾਵਨਾਯ ਅਨੁਲੋਮਕਾਰੀ ਅਨੁਰੂਪਪਟਿਪਤ੍ਤਿ. ਵਿਸਾਰਦੋਤਿ ਵਿਸਦੋ ਅਤ੍ਤਨੋਵ ਗੁਣੇਨ ਕਤ੍ਥਚਿਪਿ ਅਮਙ੍ਕੁਭੂਤੋ ਅਭਿਭੁਯ੍ਯ ਵਿਹਾਰੀ. ਸੇਸਂ ਸੁਵਿਞ੍ਞੇਯ੍ਯਮੇਵ.