੪. ਸੀਲਾਨੁਸ੍ਸਤਿਕਥਾਵਣ੍ਣਨਾ

੧੫੮. ਅਹੋ ਵਤ ਸੀਲਾਨਿ ਅਖਣ੍ਡਾਨਿ, ਅਹੋ ਵਤ ਅਚ੍ਛਿਦ੍ਦਾਨੀਤਿ ਏਵਂ ਸਬ੍ਬਤ੍ਥ ਯੋਜੇਤਬ੍ਬਂ. ਅਹੋ ਵਤਾਤਿ ਚ ਸਮ੍ਭਾਵਨੇ ਨਿਪਾਤੋ. ਤੇਨਾਹ ‘‘ਅਖਣ੍ਡਤਾਦਿਗੁਣਵਸੇਨਾ’’ਤਿ. ਅਖਣ੍ਡਭਾਵਾਦਿਸਮ੍ਪਤ੍ਤਿਵਸੇਨਾਤਿ ਅਤ੍ਥੋ. ਪਰਸ੍ਸ ਸੀਲਾਨਿ ਅਨੁਸ੍ਸਰਿਯਮਾਨਾਨਿ ਪਿਯਮਨਾਪਭਾਵਾਵਹਨੇਨ ਕੇਵਲਂ ਮੇਤ੍ਤਾਯ ਪਦਟ੍ਠਾਨਂ ਹੋਨ੍ਤਿ, ਨ ਵਿਸੁਂ ਕਮ੍ਮਟ੍ਠਾਨਨ੍ਤਿ ਆਹ ‘‘ਅਤ੍ਤਨੋ ਸੀਲਾਨਿ ਅਨੁਸ੍ਸਰਿਤਬ੍ਬਾਨੀ’’ਤਿ. ਚਾਗਾਦੀਸੁਪਿ ਏਸੇਵ ਨਯੋ.

ਯੇਸਨ੍ਤਿ ਸੀਲਾਦੀਨਂ. ਪਟਿਪਾਟਿਯਾ ਸਮਾਦਾਨੇ ਸਮਾਦਾਨਕ੍ਕਮੇਨ, ਏਕਜ੍ਝਂ ਸਮਾਦਾਨੇ ਉਦ੍ਦੇਸਕ੍ਕਮੇਨ ਸੀਲਾਨਂ ਆਦਿਅਨ੍ਤਂ ਵੇਦਿਤਬ੍ਬਂ. ਪਰਿਯਨ੍ਤੇ ਛਿਨ੍ਨਸਾਟਕੋ ਵਿਯਾਤਿ ਵਤ੍ਥਨ੍ਤੇ, ਦਸਨ੍ਤੇ ਵਾ ਛਿਨ੍ਨਵਤ੍ਥਂ ਵਿਯ, ਵਿਸਦਿਸੂਦਾਹਰਣਂ ਚੇਤਂ. ਏਵਂ ਸੇਸਾਨਿਪਿ ਉਦਾਹਰਣਾਨਿ. ਵਿਨਿਵੇਧਵਸੇਨ ਛਿਨ੍ਨਸਾਟਕੋ ਵਿਨਿਵਿਦ੍ਧਸਾਟਕੋ. ਵਿਸਭਾਗਵਣ੍ਣੇਨ ਗਾਵੀ ਵਿਯਾਤਿ ਸਮ੍ਬਨ੍ਧੋ. ਸਬਲਰਹਿਤਾਨਿ ਵਾ ਅਸਬਲਾਨਿ. ਤਥਾ ਅਕਮ੍ਮਾਸਾਨਿ. ਸਤ੍ਤਵਿਧਮੇਥੁਨਸਂਯੋਗੋ ਹੇਟ੍ਠਾ ਸੀਲਕਥਾਯਂ ਵੁਤ੍ਤੋ ਏਵ. ਕੋਧੂਪਨਾਹਾਦੀਹੀਤਿ ਆਦਿ-ਸਦ੍ਦੇਨ ਮਕ੍ਖਪਲ਼ਾਸਇਸ੍ਸਾਮਚ੍ਛਰਿਯਮਾਯਾਸਾਠੇਯ੍ਯਮਾਨਾਤਿਮਾਨਾਦਯੋ ਗਹਿਤਾ. ਤਾਨਿਯੇਵ ਅਖਣ੍ਡਾਦਿਗੁਣਾਨਿ ਸੀਲਾਨਿ. ਸੀਲਸ੍ਸ ਤਣ੍ਹਾਦਾਸਬ੍ਯਤੋ ਮੋਚਨਂ ਵਿਵਟ੍ਟੂਪਨਿਸ੍ਸਯਭਾਵਾਪਾਦਨਂ. ਤਤੋ ਏਵ ਤਂਸਮਙ੍ਗੀਪੁਗ੍ਗਲੋ ਸੇਰੀ ਸਯਂਵਸੀ ਭੁਜਿਸ੍ਸੋ ਨਾਮ ਹੋਤਿ. ਤੇਨਾਹ ‘‘ਭੁਜਿਸ੍ਸਭਾਵਕਰਣੇਨ ਭੁਜਿਸ੍ਸਾਨੀ’’ਤਿ. ‘‘ਇਮਿਨਾਹਂ ਸੀਲੇਨ ਦੇਵੋ ਵਾ ਭਵੇਯ੍ਯਂ ਦੇਵਞ੍ਞਤਰੋ ਵਾ, ਤਤ੍ਥ ਨਿਚ੍ਚੋ ਧੁਵੋ ਸਸ੍ਸਤੋ’’ਤਿ, ‘‘ਸੀਲੇਨ ਸੁਦ੍ਧੀ’’ਤਿ ਚ ਏਵਮਾਦਿਨਾ ਤਣ੍ਹਾਦਿਟ੍ਠੀਹਿ ਅਪਰਾਮਟ੍ਠਤ੍ਤਾ ਅਯਂ ਤੇ ਸੀਲੇਸੁ ਦੋਸੋਤਿ ਚਤੂਸੁ ਵਿਪਤ੍ਤੀਸੁ ਯਾਯ ਕਾਯਚਿ ਵਿਪਤ੍ਤਿਯਾ ਦਸ੍ਸਨੇਨ ਪਰਾਮਟ੍ਠੁਂ ਅਨੁਦ੍ਧਂਸੇਤੁਂ. ਸਮਾਧਿਸਂਵਤ੍ਤਨਪ੍ਪਯੋਜਨਾਨਿ ਸਮਾਧਿਸਂਵਤ੍ਤਨਿਕਾਨਿ.

੧੫੯. ਸਿਕ੍ਖਾਯ ਸਗਾਰਵੋਤਿ ਸੀਲਧਨਂ ਨਿਸ੍ਸਾਯ ਪਟਿਲਦ੍ਧਸਮਾਦਾਨਤ੍ਤਾ ਸਾਤਿਸਯਂ ਸਿਕ੍ਖਾਯ ਸਗਾਰਵੋ ਸਪ੍ਪਤਿਸ੍ਸੋ ਹੋਤਿ. ਸਭਾਗਵੁਤ੍ਤੀਤਿ ਸਮ੍ਪਨ੍ਨਸੀਲੇਹਿ ਸਭਾਗਵੁਤ੍ਤਿਕੋ, ਤਾਯ ਏਵ ਵਾ ਸਿਕ੍ਖਾਯ ਸਭਾਗਵੁਤ੍ਤਿ. ਯੋ ਹਿ ਸਿਕ੍ਖਾਗਾਰਵਰਹਿਤੋ, ਸੋ ਤਾਯ ਵਿਸਭਾਗਵੁਤ੍ਤਿ ਨਾਮ ਹੋਤਿ ਵਿਲੋਮਨਤੋ. ਯਥਾ ਪਰੇਹਿ ਸਦ੍ਧਿਂ ਅਤ੍ਤਨੋ ਛਿਦ੍ਦਂ ਨ ਹੋਤਿ, ਏਵਂ ਧਮ੍ਮਾਮਿਸੇਹਿ ਪਟਿਸਨ੍ਥਰਣਂ ਪਟਿਸਨ੍ਥਾਰੋ. ਸਿਕ੍ਖਾਯ ਸਗਾਰਵਤ੍ਤਾ ਏਵ ਤਤ੍ਥ ਅਪ੍ਪਮਤ੍ਤੋ ਹੋਤਿ. ਅਤ੍ਤਾਨੁਵਾਦਭਯਂ ਪਰਾਨੁਵਾਦਭਯਂ ਦਣ੍ਡਭਯਂ ਦੁਗ੍ਗਤਿਭਯਨ੍ਤਿ ਏਵਮਾਦੀਨਿ ਭਯਾਨਿ ਇਮਸ੍ਸ ਦੂਰਸਮੁਸ੍ਸਾਰਿਤਾਨੀਤਿ ਆਹ ‘‘ਅਤ੍ਤਾਨੁਵਾਦਾਦਿਭਯਵਿਰਹਿਤੋ’’ਤਿ. ਸੇਸਂ ਸੁਵਿਞ੍ਞੇਯ੍ਯਮੇਵ.