੩. ਸਙ੍ਘਾਨੁਸ੍ਸਤਿਕਥਾਵਣ੍ਣਨਾ

੧੫੪. ਅਰਿਯਸਙ੍ਘਗੁਣਾਤਿ ਆਰਕਤ੍ਤਾ ਕਿਲੇਸੇਹਿ, ਅਨਯੇ ਨ ਇਰਿਯਨਤੋ, ਅਯੇ ਚ ਇਰਿਯਨਤੋ, ਸਦੇਵਕੇਨ ਚ ਲੋਕੇਨ ‘‘ਸਰਣ’’ਨ੍ਤਿ ਅਰਣੀਯਤੋ ਅਰਿਯੋ ਚ ਸੋ ਸਙ੍ਘੋ ਚ, ਅਰਿਯਾਨਂ ਵਾ ਸਙ੍ਘੋ ਅਰਿਯਸਙ੍ਘੋ, ਤਸ੍ਸ ਗੁਣਾ.

੧੫੫. ਯਂ ਸਮ੍ਮਾਪਟਿਪਦਂ ਪਟਿਪਨ੍ਨੋ ‘‘ਸੁਟ੍ਠੁ ਪਟਿਪਨ੍ਨੋ’’ਤਿ ਵੁਚ੍ਚਤਿ. ਸਾ ਅਰਿਯਮਗ੍ਗਪਟਿਪਦਾ ਪਟਿਪਕ੍ਖਧਮ੍ਮੇ ਅਨਿਵਤ੍ਤਿਧਮ੍ਮੇ ਕਤ੍ਵਾ ਪਜਹਨਤੋ ਪਯੋਜਨਾਭਾਵਾ ਸਯਮ੍ਪਿ ਅਨਿਵਤ੍ਤਿਧਮ੍ਮਾ, ਅਧਿਗਨ੍ਤਬ੍ਬਸ੍ਸ ਚ ਨਿਬ੍ਬਾਨਸ੍ਸ ਏਕਂਸਤੋ ਅਨੁਲੋਮੀਤਿ. ਤਤੋ ਏਵ ਅਪਚ੍ਚਨੀਕਾ, ਅਨੁਧਮ੍ਮਭੂਤਾ ਚ, ਤਸ੍ਸਾ ਚ ਪਟਿਪਨ੍ਨਤ੍ਤਾ ਅਰਿਯਸਙ੍ਘੋ ‘‘ਸੁਪ੍ਪਟਿਪਨ੍ਨੋ’’ਤਿ ਵੁਤ੍ਤੋਤਿ ਦਸ੍ਸੇਤੁਂ ‘‘ਸੁਟ੍ਠੁ ਪਟਿਪਨ੍ਨੋ’’ਤਿਆਦਿ ਵੁਤ੍ਤਂ. ਤਤ੍ਥ ‘‘ਅਨਿਵਤ੍ਤਿਪਟਿਪਦ’’ਨ੍ਤਿ ਇਮਿਨਾ ਉਜੁਪ੍ਪਟਿਪਤ੍ਤਿਂ ਦਸ੍ਸੇਤਿ. ਪੁਨਪ੍ਪੁਨਂ ਨਿਵਤ੍ਤਨੇ ਹਿ ਸਤਿ ਉਜੁਪ੍ਪਟਿਪਤ੍ਤਿ ਨ ਹੋਤਿ. ‘‘ਅਨੁਲੋਮਪਟਿਪਦਂ ਅਪਚ੍ਚਨੀਕਪਟਿਪਦ’’ਨ੍ਤਿ ਇਮਿਨਾ ਞਾਯਪ੍ਪਟਿਪਤ੍ਤਿਂ. ਪਟਿਪਜ੍ਜਿਤਬ੍ਬਸ੍ਸ ਹਿ ਨਿਬ੍ਬਾਨਸ੍ਸ ਅਨੁਲੋਮਨੇਨ, ਅਪਚ੍ਚਨੀਕਤਾਯ ਚਸ੍ਸਾ ਞਾਯਤੋ. ‘‘ਧਮ੍ਮਾਨੁਧਮ੍ਮਪਟਿਪਦ’’ਨ੍ਤਿ ਇਮਿਨਾ ਸਾਮੀਚਿਪ੍ਪਟਿਪਤ੍ਤਿਂ ਅਨੁਚ੍ਛਵਿਕਭਾਵਦੀਪਨਤੋ. ਏਤੇਨ ਪਠਮਪਦਸ੍ਸ ਪਪਞ੍ਚਨਿਦ੍ਦੇਸੋ, ਇਤਰਾਨਿ ਤੀਣਿ ਪਦਾਨੀਤਿ ਦਸ੍ਸੇਤਿ. ਤੇਨਾਹ ‘‘ਯਸ੍ਮਾ ਪਨਾ’’ਤਿਆਦਿ.

ਯਥਾਨੁਸਿਟ੍ਠਂ ਪਟਿਪਜ੍ਜਨੇਨ ਕਿਚ੍ਚਸਿਦ੍ਧਿਤੋ ਅਰਿਯਭਾਵਾਵਹਂ ਸਵਨਂ ਸਕ੍ਕਚ੍ਚਸਵਨਂ ਨਾਮਾਤਿ ਵੁਤ੍ਤਂ ‘‘ਸਕ੍ਕਚ੍ਚਂ ਸੁਣਨ੍ਤੀਤਿ ਸਾਵਕਾ’’ਤਿ, ਤੇਨ ਅਰਿਯਾ ਏਵ ਨਿਪ੍ਪਰਿਯਾਯਤੋ ਸਤ੍ਥੁ ਸਾਵਕਾ ਨਾਮਾਤਿ ਦਸ੍ਸੇਤਿ. ਸੀਲਦਿਟ੍ਠਿਸਾਮਞ੍ਞਤਾਯਾਤਿ ਅਰਿਯੇਨ ਸੀਲੇਨ, ਅਰਿਯਾਯ ਚ ਦਿਟ੍ਠਿਯਾ ਸਮਾਨਭਾਵੇਨ. ਅਰਿਯਾਨਞ੍ਹਿ ਸੀਲਦਿਟ੍ਠਿਯੋ ਮਜ੍ਝੇ ਭਿਨ੍ਨਸੁਵਣ੍ਣਂ ਵਿਯ ਨਿਨ੍ਨਾਨਾਕਰਣਂ ਮਗ੍ਗੇਨਾਗਤਤ੍ਤਾ. ਤੇਨ ਤੇ ਯਤ੍ਥ ਕਤ੍ਥਚਿ ਠਿਤਾਪਿ ਸਂਹਤਾਵ. ਤੇਨਾਹ ‘‘ਸਙ੍ਘਾਤਭਾਵਮਾਪਨ੍ਨੋ’’ਤਿ. ਮਾਯਾਸਾਠੇਯ੍ਯਾਦਿਪਾਪਧਮ੍ਮਸਮੁਚ੍ਛੇਦੇਨ ਉਜੁ. ਤਤੋ ਏਵ ਗੋਮੁਤ੍ਤਵਙ੍ਕਾਭਾਵੇਨ ਅਵਙ੍ਕਾ. ਚਨ੍ਦਲੇਖਾਵਙ੍ਕਾਭਾਵੇਨ ਅਕੁਟਿਲਾ. ਨਙ੍ਗਲਕੋਟਿਵਙ੍ਕਾਭਾਵੇਨ ਅਜਿਮ੍ਹਾ. ਅਵਙ੍ਕਾਦਿਭਾਵੇਨ ਵਾ ਉਜੁ. ਪਰਿਸੁਦ੍ਧਟ੍ਠੇਨ ਅਰਿਯਾ. ਅਪਣ੍ਣਕਭਾਵੇਨ ਞਾਯਤਿ ਕਮਤਿ ਨਿਬ੍ਬਾਨਂ, ਤਂ ਵਾ ਞਾਯਤਿ ਪਟਿਵਿਜ੍ਝੀਯਤਿ ਏਤੇਨਾਤਿ ਞਾਯੋ. ਵਟ੍ਟਦੁਕ੍ਖਨਿਯ੍ਯਾਨਾਯ ਅਨੁਚ੍ਛਵਿਕਤ੍ਤਾ. ਅਨੁਰੂਪਤ੍ਤਾ ਸਾਮੀਚਿ ਓਪਾਯਿਕਾਤਿਪਿ ਸਙ੍ਖਂ ਸਮਞ੍ਞਂ ਗਤਾ ਸਮ੍ਮਾਪਟਿਪਤ੍ਤਿ, ਤਾਯ ਸਮਙ੍ਗਿਤਾਯ ਸੁਪ੍ਪਟਿਪਨ੍ਨਾ ‘‘ਸਮ੍ਮਾ ਪਟਿਪਜ੍ਜਨ੍ਤੀ’’ਤਿ ਕਤ੍ਵਾ. ਵਤ੍ਤਮਾਨਤ੍ਥੋ ਹਿ ਅਯਂ ਪਟਿਪਨ੍ਨ-ਸਦ੍ਦੋ ਯਥਾ ‘‘ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨੋ’’ਤਿ (ਪੁ. ਪ. ੨੦੬). ਅਤੀਤਂ ਪਟਿਪਦਨ੍ਤਿ ਯਥਾਵੁਤ੍ਤਮਗ੍ਗਸਮ੍ਮਾਪਟਿਪਤ੍ਤਿਂ ਵਦਤਿ. ਉਭਯੇਨ ਚ ਸਾਮਞ੍ਞਨਿਦ੍ਦੇਸੇਨ, ‘‘ਸੁਪ੍ਪਟਿਪਨ੍ਨਾ ਚ ਸੁਪ੍ਪਟਿਪਨ੍ਨਾ ਚ ਸੁਪ੍ਪਟਿਪਨ੍ਨਾ’’ਤਿ ਏਕਸੇਸਨਯੇਨ ਵਾ ਗਹਿਤਾਨਂ ਸਮੂਹੋ ‘‘ਸੁਪ੍ਪਟਿਪਨ੍ਨੋ’’ਤਿ ਵੁਤ੍ਤੋਤਿ ਦਸ੍ਸੇਤਿ.

ਏਵਂ ਆਦਿਪਦਤ੍ਥਨਿਦ੍ਦੇਸਭਾਵੇਨ ਇਤਰਪਦਾਨਂ ਅਤ੍ਥਂ ਵਤ੍ਵਾ ਇਦਾਨਿ ਚਤੁਨ੍ਨਮ੍ਪਿ ਪਦਾਨਂ ਅਵੋਮਿਸ੍ਸਕਂ ਅਤ੍ਥਂ ਦਸ੍ਸੇਤੁਂ ‘‘ਅਪਿਚਾ’’ਤਿਆਦਿ ਵੁਤ੍ਤਂ. ਤਤ੍ਥ ਯਥਾਨੁਸਿਟ੍ਠਨ੍ਤਿ ਸਤ੍ਥਾਰਾ ਯਥਾ ਅਨੁਸਿਟ੍ਠਂ, ਤਥਾ ਅਨੁਸਾਸਨੀਅਨੁਰੂਪਨ੍ਤਿ ਅਤ੍ਥੋ. ਅਪਣ੍ਣਕਪਟਿਪਦਨ੍ਤਿ ਅਵਿਰਜ੍ਝਨਕਪਟਿਪਦਂ, ਅਨਵਜ੍ਜਪਟਿਪਤ੍ਤਿਨ੍ਤਿ ਅਤ੍ਥੋ. ਏਤ੍ਥ ਚ ਸ੍ਵਾਕ੍ਖਾਤੇ ਧਮ੍ਮਵਿਨਯੇ ਅਪਣ੍ਣਕਪਟਿਪਦਂ ਪਟਿਪਨ੍ਨਤ੍ਤਾਤਿ ਏਵਂ ਸਮ੍ਬਨ੍ਧਿਤਬ੍ਬਂ. ਪੁਰਿਮਪਦੇਨ ਸਮ੍ਬਨ੍ਧੇ ਦੁਤਿਯਪਦਂ ਨ ਵਤ੍ਤਬ੍ਬਂ ਸਿਯਾ, ਨਨੁ ਚ ਦੁਤਿਯਪਦੇਨ ਸਮ੍ਬਨ੍ਧੇਪਿ ਪਠਮਂ ਪਦਂ ਨ ਵਤ੍ਤਬ੍ਬਂ ਸਿਯਾਤਿ? ਨ ਤਸ੍ਸ ਪਠਮਂ ਅਪੇਕ੍ਖਿਤਤ੍ਤਾ. ਸਾ ਪਨ ਸਾਵਕਾਨਂ ਅਪਣ੍ਣਕਪਟਿਪਦਾ ਯਥਾਨੁਸਿਟ੍ਠਂ ਪਟਿਪਦਾਤਿ ਦਸ੍ਸਨਤ੍ਥਂ ‘‘ਯਥਾਨੁਸਿਟ੍ਠਂ ਪਟਿਪਨ੍ਨਤ੍ਤਾ’’ਤਿ ਵਤ੍ਤਬ੍ਬਂ. ਉਭਯਸ੍ਸਾਪਿ ਵਾ ਸੁਪ੍ਪਟਿਪਨ੍ਨਭਾਵਸਾਧਨਤ੍ਤਾ ਉਭਯਂ ਵੁਤ੍ਤਂ. ਤਥਾ ਹਿ ਪਿ-ਸਦ੍ਦੇਨ ਉਭਯਂ ਸਮੁਚ੍ਚਿਨੋਤਿ.

ਕਿਲੇਸਜਿਮ੍ਹਵਸੇਨ ਅਨ੍ਤਦ੍ਵਯਗਾਹੋਤਿ ਸਬ੍ਬਸੋ ਤਂ ਪਹਾਯ ਸਮ੍ਮਾਪਟਿਪਦਾ ਕਾਯਾਦਿਵਙ੍ਕਪ੍ਪਹਾਯਿਨੀ ਉਜੁਪ੍ਪਟਿਪਤ੍ਤਿ ਹੋਤੀਤਿ ਆਹ ‘‘ਮਜ੍ਝਿਮਾਯ ਪਟਿਪਦਾਯ…ਪੇ… ਉਜੁਪ੍ਪਟਿਪਨ੍ਨੋ’’ਤਿ.

ਞਾਯੋ ਨਾਮ ਯੁਤ੍ਤਪ੍ਪਤ੍ਤਪਟਿਪਤ੍ਤਿ, ਨਿਬ੍ਬਾਨਞ੍ਚ, ਸਬ੍ਬਸਙ੍ਖਾਰਸਮਥਤਾਯ ਆਦਿਤ੍ਤਂ ਚੇਲਂ, ਸੀਸਂ ਵਾ ਅਜ੍ਝੁਪੇਕ੍ਖਿਤ੍ਵਾਪਿ ਪਟਿਪਜ੍ਜਿਤਬ੍ਬਮੇਵਾਤਿ ਆਹ ‘‘ਞਾਯੋ ਵੁਚ੍ਚਤਿ ਨਿਬ੍ਬਾਨ’’ਨ੍ਤਿ. ਨਿਬ੍ਬਾਯਨਕਿਰਿਯਾਮੁਖੇਨ ਚੇਤ੍ਥ ਨਿਬ੍ਬਾਨਂ ਵੁਤ੍ਤਨ੍ਤਿ ਦਟ੍ਠਬ੍ਬਂ, ਮਗ੍ਗਞਾਣਾਦੀਹਿ ਵਾ ਞਾਯਤਿ ਪਟਿਵਿਜ੍ਝੀਯਤਿ ਸਚ੍ਛਿਕਰੀਯਤਿ ਚਾਤਿ ਞਾਯੋ ਨਿਬ੍ਬਾਨਨ੍ਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ.

ਗੁਣਸਮ੍ਭਾਵਨਾਯ ਪਰੇਹਿ ਕਯਿਰਮਾਨਂ ਪਚ੍ਚੁਪਟ੍ਠਾਨਾਦਿਸਾਮੀਚਿਕਮ੍ਮਂ ਅਰਹਨ੍ਤੀਤਿ ਸਾਮੀਚਿਕਮ੍ਮਾਰਹਾ.

੧੫੬. ਯਦਿਦਨ੍ਤਿ ਅਨ੍ਤੋਗਧਲਿਙ੍ਗਵਚਨਭੇਦੋ ਨਿਪਾਤੋਤਿ ਤਸ੍ਸ ਵਚਨਭੇਦੇਨ ਅਤ੍ਥਮਾਹ ‘‘ਯਾ ਇਮਾਨੀ’’ਤਿ. ਏਵਨ੍ਤਿ ਪਕਾਰਤ੍ਥੇ ਨਿਪਾਤੋ, ਇਮਿਨਾ ਪਕਾਰੇਨਾਤਿ ਅਤ੍ਥੋ. ਤੇਨ ਇਤਰਾਨਿ ਤੀਣਿ ਯੁਗਲ਼ਾਨਿ ਦਸ੍ਸਿਤਾਨਿ ਹੋਨ੍ਤੀਤਿ ਆਹ ‘‘ਏਵਂ ਚਤ੍ਤਾਰਿ ਪੁਰਿਸਯੁਗਲ਼ਾਨਿ ਹੋਨ੍ਤੀ’’ਤਿ. ਏਤਨ੍ਤਿ ਏਤਂ ‘‘ਪੁਰਿਸਪੁਗ੍ਗਲਾ’’ਤਿ ਬਹੁਵਚਨਵਸੇਨ ਵੁਤ੍ਤਂ ਪਦਂ. ਪੁਰਿਸਾ ਚ ਤੇ ਪੁਗ੍ਗਲਾ ਚ ਪੁਰਿਸਪੁਗ੍ਗਲਾ. ਤਤ੍ਥ ‘‘ਪੁਰਿਸਾ’’ਤਿ ਇਮਿਨਾ ਪਠਮਾਯ ਪਕਤਿਯਾ ਗਹਣਂ, ‘‘ਪੁਗ੍ਗਲਾ’’ਤਿ ਪਨ ਦੁਤਿਯਾਯਪਿ ਸਤ੍ਤਸਾਮਞ੍ਞੇਨਾਤਿ ਏਵਂ ਵਾ ਏਤ੍ਥ ਅਤ੍ਥੋ ਦਟ੍ਠਬ੍ਬੋ. ਚਤੁਨ੍ਨਂ ਪਚ੍ਚਯਾਨਂ ਕੀਦਿਸਾਨਂ? ਆਨੇਤ੍ਵਾ ਹੁਨਿਤਬ੍ਬਾਨਨ੍ਤਿ ਅਧਿਕਾਰਤੋ ਪਾਕਟੋਯਮਤ੍ਥੋ. ਦਾਤਬ੍ਬਨ੍ਤਿ ਵਾ ਪਚ੍ਚਤ੍ਤਵਚਨਂ ‘‘ਚਤੁਨ੍ਨਂ ਪਚ੍ਚਯਾਨ’’ਨ੍ਤਿ ਪਦਂ ਅਪੇਕ੍ਖਿਤ੍ਵਾ ਸਾਮਿਵਸੇਨ ਪਰਿਣਾਮੇਤਬ੍ਬਂ, ਅਞ੍ਞਥਾ ਯੇਸਂ ਕੇਸਞ੍ਚਿ ਚਤੁਨ੍ਨਂ ਪਚ੍ਚਯਾਨਂ ‘‘ਆਹੁਨ’’ਨ੍ਤਿ ਸਮਞ੍ਞਾ ਸਿਯਾ. ਆਹੁਨਂ ਅਰਹਤੀਤਿ ਵਾ ਆਹੁਨੇਯ੍ਯੋ. ਸਕ੍ਕਾਦੀਨਮ੍ਪਿ ਵਾ ਆਹਵਨਨ੍ਤਿ ਸਕ੍ਕਾਦੀਹਿਪਿ ਦਿਯ੍ਯਮਾਨਂ ਦਾਨਂ. ਯਤ੍ਥ ਹੁਤਂ ਮਹਪ੍ਫਲਨ੍ਤਿ ਯਸ੍ਮਿਂ ਆਵਹਨੀਯਗ੍ਗਿਮ੍ਹਿ ਹੁਤਂ ਦਧਿਆਦਿ ਆਹੁਨੇਯ੍ਯਗ੍ਗਿਗਹਪਤਗ੍ਗਿਦਕ੍ਖਿਣੇਯ੍ਯਗ੍ਗੀਸੁ ਹੁਤਤੋ ਉਲ਼ਾਰਫਲਨ੍ਤਿ ਤੇਸਂ ਬ੍ਰਾਹ੍ਮਣਾਨਂ ਲਦ੍ਧਿ. ਹੁਤਨ੍ਤਿ ਦਿਨ੍ਨਂ. ਨਿਕਾਯਨ੍ਤਰੇਤਿ ਸਬ੍ਬਤ੍ਥਿਕਵਾਦਿਨਿਕਾਯੇ.

ਠਪੇਤ੍ਵਾ ੧੬੫ ਤੇਤਿ ਤੇ ਪਿਯਮਨਾਪੇ ਞਾਤਿਮਿਤ੍ਤੇ ਅਪਨੇਤ੍ਵਾ, ਤੇਸਂ ਅਦਤ੍ਵਾਤਿ ਅਧਿਪ੍ਪਾਯੋ. ਏਸ ਏਸੋ. ਏਕਬੁਦ੍ਧਨ੍ਤਰੇ ਚ ਦਿਸ੍ਸਤੀਤਿ ਏਕਸ੍ਮਿਂ ਬੁਦ੍ਧਨ੍ਤਰੇ ਵੀਤਿਵਤ੍ਤੇ ਦਿਸ੍ਸਤਿ. ਚ-ਸਦ੍ਦੇਨ ਕਦਾਚਿ ਅਸਙ੍ਖ੍ਯੇਯ੍ਯੇਪਿ ਕਪ੍ਪੇ ਵੀਤਿਵਤ੍ਤੇਤਿ ਦਸ੍ਸੇਤਿ. ਅਬ੍ਬੋਕਿਣ੍ਣਨ੍ਤਿ ਪਟਿਪਕ੍ਖੇਹਿ ਅਵੋਮਿਸ੍ਸਂ, ਕਿਰਿਯਾਵਿਸੇਸਕਞ੍ਚੇਤਂ. ਪਿਯਮਨਾਪਤ੍ਤਕਰਧਮ੍ਮਾ ਨਾਮ ਸੀਲਾਦਯੋ, ਤੇ ਅਰਿਯਸਙ੍ਘੇ ਸੁਪ੍ਪਤਿਟ੍ਠਿਤਾ. ਅਯਂ ਹੇਤ੍ਥ ਅਧਿਪ੍ਪਾਯੋ – ਞਾਤਿਮਿਤ੍ਤਾ ਵਿਪ੍ਪਯੁਤ੍ਤਾ ਨ ਚਿਰਸ੍ਸੇਵ ਸਮਾਗਚ੍ਛਨ੍ਤਿ, ਅਨਵਟ੍ਠਿਤਾ ਚ ਤੇਸੁ ਪਿਯਮਨਾਪਤਾ, ਨ ਏਵਮਰਿਯਸਙ੍ਘੋ. ਤਸ੍ਮਾ ਸਙ੍ਘੋਵ ਪਾਹੁਨੇਯ੍ਯੋਤਿ. ਪੁਬ੍ਬਕਾਰਨ੍ਤਿ ਅਗ੍ਗਕਿਰਿਯਂ. ਸਬ੍ਬਪ੍ਪਕਾਰੇਨਾਤਿ ਆਦਰਗਾਰਵਬਹੁਮਾਨਾਦਿਨਾ, ਦੇਯ੍ਯਧਮ੍ਮਸ੍ਸ ਸਕ੍ਕਚ੍ਚਕਰਣਾਦਿਨਾ ਚ ਸਬ੍ਬੇਨ ਪਕਾਰੇਨ. ਸ੍ਵਾਯਂ ਪਾਹਵਨੀਯ-ਸਦ੍ਦੋ ‘‘ਪਾਹੁਨੇਯ੍ਯੋ’’ਤਿ ਵੁਚ੍ਚਤਿ ਪਰਿਯਾਯਭਾਵੇਨ.

ਦਕ੍ਖਨ੍ਤਿ ਏਤਾਯ ਸਤ੍ਤਾ ਯਥਾਧਿਪ੍ਪੇਤਾਹਿ ਸਮ੍ਪਤ੍ਤੀਹਿ ਵਡ੍ਢਨ੍ਤੀਤਿ ਦਕ੍ਖਿਣਾ. ਤਥਾਭਾਵਕਰਣੇਨ ਦਕ੍ਖਿਣਂ ਅਰਹਤਿ. ਯਥਾ ਉਲ਼ਾਰਾਤਿਵਿਪੁਲੁਦ੍ਰਯਲਾਭੇਨ ਵਿਸੋਧਿਤਂ ਨਾਮ ਹੋਤਿ, ਏਵਂ ਦਕ੍ਖਿਣਾ ਵਿਪੁਲਫਲਤਾਯਾਤਿ ਵੁਤ੍ਤਂ ‘‘ਮਹਪ੍ਫਲਕਰਣਤਾਯ ਵਿਸੋਧੇਤੀ’’ਤਿ.

ਪੁਞ੍ਞਤ੍ਥਿਕੇਹਿ ਅਞ੍ਜਲਿ ਕਰਣੀਯਾ ਏਤ੍ਥਾਤਿ ਅਞ੍ਜਲਿਕਰਣੀਯੋ.

ਯਦਿਪਿ ਪਾਲ਼ਿਯਂ ‘‘ਅਨੁਤ੍ਤਰ’’ਨ੍ਤਿ ਵੁਤ੍ਤਂ. ਨਤ੍ਥਿ ਇਤੋ ਉਤ੍ਤਰਂ ਵਿਸਿਟ੍ਠਨ੍ਤਿ ਹਿ ਅਨੁਤ੍ਤਰਂ. ਸਮਮ੍ਪਿਸ੍ਸ ਪਨ ਨਤ੍ਥੀਤਿ ਦਸ੍ਸੇਨ੍ਤੋ ‘‘ਅਸਦਿਸ’’ਨ੍ਤਿ ਆਹ. ਖਿਤ੍ਤਂ ਵੁਤ੍ਤਂ ਬੀਜਂ ਮਹਪ੍ਫਲਭਾਵਕਰਣੇਨ ਤਾਯਤਿ ਰਕ੍ਖਤਿ, ਖਿਪਨ੍ਤਿ ਵਪਨ੍ਤਿ ਏਤ੍ਥ ਬੀਜਾਨੀਤਿ ਵਾ ਖੇਤ੍ਤਂ, ਕੇਦਾਰਾਦਿ, ਖੇਤ੍ਤਂ ਵਿਯ ਖੇਤ੍ਤਂ, ਪੁਞ੍ਞਾਨਂ ਖੇਤ੍ਤਂ ਪੁਞ੍ਞਕ੍ਖੇਤ੍ਤਂ. ਸੇਸਂ ਬੁਦ੍ਧਾਨੁਸ੍ਸਤਿਯਂ ਵੁਤ੍ਤਨਯਾਨੁਸਾਰੇਨ ਵੇਦਿਤਬ੍ਬਂ.