੨੩. ਪਞ੍ਞਾਭਾਵਨਾਨਿਸਂਸਨਿਦ੍ਦੇਸਵਣ੍ਣਨਾ

ਆਨਿਸਂਸਪਕਾਸਨਾਵਣ੍ਣਨਾ

੮੫੪. ਅਨੇਕਸਤਾਨਿਸਂਸਾ ਸਾਵਕਬੋਧਿਆਦਿਵਿਪੁਲੋਦਾਤਗੁਣਵਿਸੇਸਾਵਹਤ੍ਤਾ. ਵਿਤ੍ਥਾਰਤੋਤਿ ਨਯਦਸ੍ਸਨਂ ਅਕਤ੍ਵਾ ‘‘ਅਯਮ੍ਪਿ ਪਞ੍ਞਾਭਾਵਨਾਯ ਆਨਿਸਂਸੋ, ਅਯਮ੍ਪੀ’’ਤਿ ਅਨੁਪਦਦਸ੍ਸਨਵਸੇਨ ਵਿਤ੍ਥਾਰਤੋ ਪਕਾਸੇਤੁਂ ਨ ਸੁਕਰਂ ਅਤਿਬਹੁਭਾਵਤੋ. ਅਸ੍ਸਾਤਿ ਪਞ੍ਞਾਭਾਵਨਾਯ. ਨਾਨਾਕਿਲੇਸਵਿਦ੍ਧਂਸਨਨ੍ਤਿ ਸਕ੍ਕਾਯਦਿਟ੍ਠਿਵਿਚਿਕਿਚ੍ਛਾਦਿਵਸੇਨ ਨਾਨਾਵਿਧਾਨਂ ਕਿਲੇਸਧਮ੍ਮਾਨਂ ਤਦਙ੍ਗਾਦਿਵਸੇਨ ਪਜਹਨਂ. ਅਰਿਯਫਲਰਸਾਨੁਭਵਨਨ੍ਤਿ ਸੋਤਾਪਤ੍ਤਿਫਲਾਦਿਫਲਸੁਖਪਟਿਸਂਵੇਦਨਂ.

ਨਾਨਾਕਿਲੇਸਵਿਦ੍ਧਂਸਨਕਥਾਵਣ੍ਣਨਾ

੮੫੫. ‘‘ਅਰਿਯਫਲਰਸਾਨੁਭਵਨ’’ਨ੍ਤਿ ਏਤੇਨੇਵ ਕਿਲੇਸਾਨਂ ਪਟਿਪ੍ਪਸ੍ਸਦ੍ਧਿਪ੍ਪਹਾਨਂ ਦੀਪੀਯਤੀਤਿ ‘‘ਅਰਿਯਮਗ੍ਗਕ੍ਖਣੇ’’ਤਿ ਵਿਸੇਸਵਚਨਂ, ਤਬ੍ਭਾਵਭਾਵਤੋ ਵਾ. ਸਿਦ੍ਧੇ ਹਿ ਸਮੁਚ੍ਛੇਦਪ੍ਪਹਾਨੇ ਪਟਿਪ੍ਪਸ੍ਸਦ੍ਧਿਪ੍ਪਹਾਨਂ ਸਿਦ੍ਧਮੇਵ ਹੋਤੀਤਿ.

ਭੀਮਵੇਗਾਨੁਪਤਿਤਾਤਿ ਸਕਲਂ ਲੋਕਂ ਭਿਨ੍ਦਨ੍ਤੇਨ ਵਿਯ ਭੀਮੇਨ ਭਯਾਨਕੇਨ ਵੇਗੇਨ ਸਹਸਾ ਪਤਿਤਾ. ਸਿਲੁਚ੍ਚਯੇਤਿ ਪਬ੍ਬਤੇ ਸੇਲਪੁਥੁਲੇ. ਸਤੇਜੁਜ੍ਜਲਮਣ੍ਡਲੋਤਿ ਸਰਦਕਾਲਸਮਿਦ੍ਧੇਨ ਅਤ੍ਤਨੋ ਤੇਜਸਾ ਸਮੁਜ੍ਜਲਦੁਦ੍ਦਿਕ੍ਖਮਣ੍ਡਲੋ. ਵਧਬਨ੍ਧਨਾਦਿਦੁਗ੍ਗਤਿਪਰਿਪਕ੍ਕਿਲੇਸਾਦਿਜਾਤਿਆਦਿਸਬ੍ਬਾਨਤ੍ਥਵਿਧਾਯਕਂ. ਸਨ੍ਦਿਟ੍ਠਿਕਨ੍ਤਿ ਪਚ੍ਚਕ੍ਖਭੂਤਂ. ਜਞ੍ਞਾਤਿ ਜਾਨੇਯ੍ਯ. ਇਧਾਤਿ ਇਮਿਸ੍ਸਂ ਪਞ੍ਞਾਭਾਵਨਾਯਂ.

ਫਲਸਮਾਪਤ੍ਤਿਕਥਾਵਣ੍ਣਨਾ

੮੫੬. ਅਰਿਯਸ੍ਸ ਮਗ੍ਗਸ੍ਸ ਫਲਂ ਅਰਿਯਫਲਂ, ਅਰਿਯਞ੍ਚ ਤਂ ਵਿਸੁਦ੍ਧਤ੍ਤਾ ਫਲਞ੍ਚਾਤਿਪਿ ਅਰਿਯਫਲਂ, ਤਸ੍ਸ ਰਸੋ, ਪਟਿਪ੍ਪਸ੍ਸਦ੍ਧਿਵਿਮੁਤ੍ਤਿਸੁਖਂ, ਅਨੁਭਵਨਂ ਨਿਬ੍ਬਾਨਾਰਮ੍ਮਣਸ੍ਸ ਤਸ੍ਸ ਪਟਿਸੇਵਨਂ. ਤਤ੍ਰਾਤਿ ਤੇਸੁ ਦ੍ਵੀਸੁ ਆਕਾਰੇਸੁ. ਅਸ੍ਸਾਤਿ ਅਰਿਯਫਲਸ੍ਸ.

੮੫੭. ਸਂਯੋਜਨੇਸੁ ਪਹੀਨੇਸੁ ਸਬ੍ਬੇਪਿ ਕਿਲੇਸਾ ਪਹੀਨਾਯੇਵ ਹੋਨ੍ਤੀਤਿ ਸਂਯੋਜਨਾਨਂਯੇਵ ਗਹਣਂ. ਸਂਯੋਜਨਪ੍ਪਹਾਨਮਤ੍ਤਮੇਵ ਅਰਿਯਮਗ੍ਗਸ੍ਸ ਫਲਂ ਨਾਮ, ਨ ਅਞ੍ਞਂ ਕਿਞ੍ਚਿ ਅਤ੍ਥਨ੍ਤਰਂ ਵਿਪਾਕਭੂਤਨ੍ਤਿ ਅਧਿਪ੍ਪਾਯੋ. ਤੇਨਾਹ ‘‘ਫਲਂ ਨਾਮ ਨ ਕੋਚਿ ਅਞ੍ਞੋ ਧਮ੍ਮੋ ਅਤ੍ਥੀ’’ਤਿ. ਕੇ ਪਨੇਤਂ ਵਦਨ੍ਤੀਤਿ? ਅਨ੍ਧਕਾਦਯੋ. ਤੇ ਹਿ ‘‘ਅਰਹਤ੍ਤਂ ਅਰਹਤ੍ਤਨ੍ਤਿ, ਆਵੁਸੋ, ਵੁਚ੍ਚਤਿ…ਪੇ… ਮੋਹਕ੍ਖਯੋ’’ਤਿ (ਸਂ. ਨਿ. ੪.੩੧੫) ਸੁਤ੍ਤਪਦਸ੍ਸ ਅਤ੍ਥਂ ਅਞ੍ਞਥਾ ਗਹੇਤ੍ਵਾ ਨਿਪ੍ਪਰਿਯਾਯਤੋ ‘‘ਅਰਹਤ੍ਤਂ ਨਾਮ ਕਿਞ੍ਚਿ ਨਤ੍ਥਿ, ਕਿਲੇਸਪ੍ਪਹਾਨਮੇਵ ਤਥਾ ਵੋਹਰੀਯਤੀ’’ਤਿ ਵਦਨ੍ਤਾ ਸੇਸਫਲੇਪਿ ਪਟਿਕ੍ਖਿਪਨ੍ਤਿ. ਇਦਂ ਸੁਤ੍ਤਮ੍ਪੀਤਿ ਪਟਿਸਮ੍ਭਿਦਾਮਗ੍ਗਪਾਲ਼ਿਮਾਹ. ਪਕਟ੍ਠੋ ਉਕ੍ਕਟ੍ਠੋ ਯੋਗੋਤਿ ਪਯੋਗੋ, ਅਰਿਯਮਗ੍ਗੋ, ਪਯੋਗਨਿਮਿਤ੍ਤਂ ਜਾਤਕਿਲੇਸਾਨਂ ਪਟਿਪ੍ਪਸ੍ਸਦ੍ਧਿ ਪਯੋਗਪਟਿਪ੍ਪਸ੍ਸਦ੍ਧਿ. ਯਾ ਪਨ ਅਰਿਯਮਗ੍ਗਸ੍ਸ ਭਾਵਿਤਤ੍ਤਾ ਲਬ੍ਭਮਾਨਾਪਿ ਯਸ੍ਸਾ ਵਿਪਾਕਪਞ੍ਞਾਯ ਨਿਪ੍ਪਜ੍ਜਮਾਨਾਯ ਨਿਪ੍ਪਜ੍ਜਤਿ, ਸਾ ਪਟਿਪ੍ਪਸ੍ਸਦ੍ਧਿਯਂ ਨਿਪ੍ਫਾਦੇਤਬ੍ਬਾਯਂ ਪਞ੍ਞਾਤਿ ਪਟਿਪ੍ਪਸ੍ਸਦ੍ਧਿਪਞ੍ਞਾਤਿ ਵੁਤ੍ਤਾ. ਸਮ੍ਮਾਦਿਟ੍ਠਿ ਮਿਚ੍ਛਾਦਿਟ੍ਠਿਯਾ ਵੁਟ੍ਠਾਤੀਤਿ ਸਮ੍ਮਾਦਿਟ੍ਠਿਯਾ ਉਜੁਵਿਪਚ੍ਚਨੀਕਦਸ੍ਸਨਵਸੇਨ ਵਤ੍ਵਾ ਤਦਞ੍ਞਤੋਪਿ ਵੁਟ੍ਠਾਨਂ ਦਸ੍ਸੇਤੁਂ ‘‘ਤਦਨੁਵਤ੍ਤਕਕਿਲੇਸੇਹੀ’’ਤਿ ਵੁਤ੍ਤਂ, ਤਸ੍ਸਾ ਮਿਚ੍ਛਾਦਿਟ੍ਠਿਯਾ ਸਮ੍ਪਯੋਗਤੋ, ਉਪਨਿਸ੍ਸਯਤੋ ਚ ਅਨੁਵਤ੍ਤਕਕਿਲੇਸੇਹਿ. ਤੇਨ ਤਦੇਕਟ੍ਠਪ੍ਪਹਾਨਮਾਹ. ਖਨ੍ਧੇਹੀਤਿ ਤਦਨੁਵਤ੍ਤਕਕ੍ਖਨ੍ਧੇਹਿ, ਤਾਯ ਮਿਚ੍ਛਾਦਿਟ੍ਠਿਯਾ ਸਮ੍ਪਯੁਤ੍ਤਕ੍ਖਨ੍ਧੇਹਿ ਚੇਵ ਤਪ੍ਪਚ੍ਚਯਾ ਆਯਤਿਂ ਉਪ੍ਪਜ੍ਜਨਕ੍ਖਨ੍ਧੇਹਿ ਚਾਤਿ ਅਤ੍ਥੋ. ਬਹਿਦ੍ਧਾ ਚ ਸਬ੍ਬਨਿਮਿਤ੍ਤੇਹੀਤਿ ਯਥਾਵੁਤ੍ਤਕਿਲੇਸਕ੍ਖਨ੍ਧੇਹਿ ਬਹਿਦ੍ਧਾਭੂਤੇਹਿ ਵਿਪਸ੍ਸਨਾਯ ਗੋਚਰਭੂਤੇਹਿ ਸਬ੍ਬਸਙ੍ਖਾਰਨਿਮਿਤ੍ਤੇਹਿ.

ਏਵਂ ਮਗ੍ਗਕਿਚ੍ਚਂ ਦਸ੍ਸੇਤ੍ਵਾ ਇਦਾਨਿ ਤਸ੍ਸ ਵਸੇਨ ਫਲਂ ਦਸ੍ਸੇਤੁਂ ‘‘ਤਮ੍ਪਯੋਗਪਟਿਪ੍ਪਸ੍ਸਦ੍ਧਤ੍ਤਾ’’ਤਿਆਦਿ ਵੁਤ੍ਤਂ. ਤਤ੍ਥ ਤਮ੍ਪਯੋਗਪਟਿਪ੍ਪਸ੍ਸਦ੍ਧਤ੍ਤਾਤਿ ਤਸ੍ਸ ਅਜ੍ਝਤ੍ਤਬਹਿਦ੍ਧਾ ਵੁਟ੍ਠਾਨਾਦਿਪਯੋਗਸ੍ਸ ਪਟਿਪ੍ਪਸ੍ਸਦ੍ਧਤ੍ਤਾ. ਮਗ੍ਗੋ ਹਿ ਨਿਮਿਤ੍ਤਤੋ, ਪਵਤ੍ਤਤੋ ਚ ਵੁਟ੍ਠਹਨ੍ਤੋ ਕਿਲੇਸੇ ਪਜਹਤੀਤਿ ਅਤ੍ਤਨੋ ਖਣੇ ਤਂ ਪਯੋਗਂ ਕਰੋਤਿ ਨਾਮ, ਫਲਕ੍ਖਣੇ ਪਨਸ੍ਸ ਸੋ ਪਯੋਗੋ ਪਟਿਪ੍ਪਸ੍ਸਦ੍ਧੋ ਵੂਪਸਨ੍ਤੋ ਨਾਮ ਹੋਤਿ. ਤੇਨ ਵੁਤ੍ਤਂ ‘‘ਤਮ੍ਪਯੋਗਪਟਿਪ੍ਪਸ੍ਸਦ੍ਧਤ੍ਤਾ’’ਤਿ. ਉਪ੍ਪਜ੍ਜਤੀਤਿ ਮਗ੍ਗਾਨਨ੍ਤਰਂ ਦ੍ਵਿਕ੍ਖਤ੍ਤੁਂ ਵਾ ਤਿਕ੍ਖਤ੍ਤੁਂ ਵਾ ਉਪ੍ਪਜ੍ਜਤਿ. ਫਲਸਮਾਪਤ੍ਤਿਕਾਲੇ ਪਨ ਬਹੁਕ੍ਖਤ੍ਤੁਂ, ਨਿਰੋਧਾ ਵੁਟ੍ਠਹਨ੍ਤਸ੍ਸ ਦ੍ਵਿਕ੍ਖਤ੍ਤੁਂ ਉਪ੍ਪਜ੍ਜਤਿ. ਸਬ੍ਬਮ੍ਪਿ ਯਥਾਵੁਤ੍ਤਪਯੋਗਪਟਿਪ੍ਪਸ੍ਸਦ੍ਧਿਨਿਮਿਤ੍ਤਂ ਉਪ੍ਪਜ੍ਜਨਤੋ ‘‘ਤਮ੍ਪਯੋਗਪਟਿਪ੍ਪਸ੍ਸਦ੍ਧਤ੍ਤਾ ਉਪ੍ਪਜ੍ਜਤੀ’’ਤਿ ਵੁਤ੍ਤਂ. ਮਗ੍ਗਸ੍ਸੇਤਂ ਫਲਨ੍ਤਿ ਯਥਾਵੁਤ੍ਤਾ ਵਿਪਾਕਾ ਸਮ੍ਮਾਦਿਟ੍ਠਿ ਨਾਮ, ਏਤਂ ਅਰਿਯਮਗ੍ਗਸ੍ਸ ਫਲਨ੍ਤਿ ਵੇਦਿਤਬ੍ਬਂ. ਵਿਤ੍ਥਾਰੇਤਬ੍ਬਨ੍ਤਿ ‘‘ਸੋਤਾਪਤ੍ਤਿਮਗ੍ਗਕ੍ਖਣੇ ਅਭਿਨਿਰੋਪਨਟ੍ਠੇਨ ਸਮ੍ਮਾਸਙ੍ਕਪ੍ਪੋ ਮਿਚ੍ਛਾਸਙ੍ਕਪ੍ਪਾ’’ਤਿਆਦਿਨਾ (ਪਟਿ. ਮ. ੧.੬੩) ਸਙ੍ਕਪ੍ਪਾਦਿਵਸੇਨ, ਸੇਸਮਗ੍ਗਵਸੇਨ ਚ ਵਿਤ੍ਥਾਰਤੋ ਵੇਦਿਤਬ੍ਬਂ.

ਚਤ੍ਤਾਰਿ ਚ ਸਾਮਞ੍ਞਫਲਾਨਿ, ਇਮੇ ਧਮ੍ਮਾ ਅਪ੍ਪਮਾਣਾਰਮ੍ਮਣਾਤਿ ਅਪ੍ਪਮਾਣਾਰਮ੍ਮਣਤਾਯ ਮਗ੍ਗੇਹਿ ਨਿਬ੍ਬਿਸੇਸਤਾਯ. ਤਥਾ ਨੇਵਸਞ੍ਞਾਨਾਸਞ੍ਞਾਯਤਨਸਙ੍ਖਾਤੋ ਮਹਗ੍ਗਤੋ ਧਮ੍ਮੋ ਨਿਰੋਧਤੋ ਵੁਟ੍ਠਾਨਵੇਲਾਯਂ ਅਪ੍ਪਮਾਣਸ੍ਸ ਧਮ੍ਮਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋਤਿ ਅਰਿਯਫਲਸ੍ਸ ਅਨਨ੍ਤਰਪਚ੍ਚਯਤਾਯ ਚ ਦੀਪਨਾਤਿ ਏਵਮਾਦੀਨਿਪਿ ਏਤ੍ਥ ਅਰਿਯਫਲਸ੍ਸ ਸਭਾਵਧਮ੍ਮਭਾਵੇਨ ਅਤ੍ਥਿਤਾਯ ਸਾਧਕਾਨਿ, ਨ ਯਥਾਦਸ੍ਸਿਤਪਟਿਸਮ੍ਭਿਦਾਮਗ੍ਗਪਾਲ਼ਿਯੇਵਾਤਿ ਅਧਿਪ੍ਪਾਯੋ.

੮੫੮. ਫਲਸਮਾਪਤ੍ਤਿਯਨ੍ਤਿ ਫਲਪਵਤ੍ਤਿਸਙ੍ਖਾਤਾਯ ਸਮਾਪਤ੍ਤਿਯਂ. ਅਸ੍ਸਾਤਿ ਅਰਿਯਫਲਸ੍ਸ. ਸਰੂਪਕਤ੍ਤੁਕਾਰਣਾਕਾਰਟ੍ਠਿਤਿਵੁਟ੍ਠਾਨਾਨਨ੍ਤਰਵਸੇਨ ਇਦਂ ਪਞ੍ਹਾਕਮ੍ਮਂ.

੮੫੯. ਅਰਿਯਫਲਸ੍ਸ ਨਿਰੋਧੇ ਅਪ੍ਪਨਾਤਿ ਅਰਿਯਸ੍ਸ ਫਲਝਾਨਸ੍ਸ ਨਿਬ੍ਬਾਨੇ ਆਰਮ੍ਮਣਭੂਤੇ ਅਪ੍ਪਨਾਕਾਰੇਨ ਪਵਤ੍ਤਿ.

੮੬੦. ਸਬ੍ਬੇਪਿ ਪੁਥੁਜ੍ਜਨਾਤਿ ਝਾਨਸਮਾਪਤ੍ਤਿਲਾਭਿਨੋਪਿ ਪੁਥੁਜ੍ਜਨਾ ਨ ਸਮਾਪਜ੍ਜਨ੍ਤਿ, ਪਗੇਵ ਇਤਰੇ. ਅਰਿਯਾ ਸਬ੍ਬੇਪਿ ਫਲਸਮਾਪਤ੍ਤਿਂ ਸਮਾਪਜ੍ਜਨ੍ਤੀਤਿ ਕਾਮਂ ਸਾਮਞ੍ਞਜੋਤਨਾ, ਸਾ ਪਨ ਵਿਸੇਸਨਿਵਿਟ੍ਠਾਯੇਵ ਹੋਤਿ. ਅਧਿਗਤਤ੍ਤਾਤਿ ਪਨ ਹੇਤੁਕਿਤ੍ਤਨਂ. ਉਪਰਿਮਾਨਮ੍ਪਿ ਹੇਟ੍ਠਿਮਾਯ ਲੋਕਿਯਸਮਾਪਤ੍ਤਿਯਾ ਵਿਯ ਸਮਾਪਜ੍ਜਨਂ ਸਾਧੇਨ੍ਤਂ ਵਿਯ ਠਿਤਨ੍ਤਿ ਤਂ ਨਿਵਤ੍ਤੇਨ੍ਤੋ ‘‘ਉਪਰਿਮਾ ਪਨਾ’’ਤਿਆਦਿਮਾਹ. ਤਤ੍ਥ ਉਪਰਿਮਾਤਿ ਸਕਦਾਗਾਮਿਆਦਯੋ. ਹੇਟ੍ਠਿਮਨ੍ਤਿ ਸੋਤਾਪਤ੍ਤਿਫਲਾਦਿਂ. ਨ ਸਮਾਪਜ੍ਜਨ੍ਤਿ ਸਤਿਪਿ ਅਧਿਗਤਤ੍ਤੇ. ਕਸ੍ਮਾਤਿ ਚੇ? ਕਾਰਣਮਾਹ ‘‘ਪੁਗ੍ਗਲਨ੍ਤਰਭਾਵੂਪਗਮਨੇਨ ਪਟਿਪ੍ਪਸ੍ਸਦ੍ਧਤ੍ਤਾ’’ਤਿ. ਏਤੇਨ ਉਪਰਿਮੋ ਅਰਿਯੋ ਹੇਟ੍ਠਿਮਂ ਫਲਸਮਾਪਤ੍ਤਿਂ ਸਮਾਪਜ੍ਜਤਿ ਅਤ੍ਤਨਾ ਅਧਿਗਤਤ੍ਤਾ, ਯਥਾ ਤਂ ਲੋਕਿਯਸਮਾਪਤ੍ਤਿਨ੍ਤਿ, ਏਵਂ ਪਵਤ੍ਤਂ ਹੇਤੁਂ ਬ੍ਯਭਿਚਾਰੇਤਿ. ਨ ਹਿ ਲੋਕਿਯਜ੍ਝਾਨੇਸੁ ਪੁਗ੍ਗਲਨ੍ਤਰਭਾਵੂਪਗਮਨਂ ਨਾਮ ਅਤ੍ਥਿ ਵਿਸੇਸਾਭਾਵਤੋ. ਇਧ ਪਨ ਅਸਮੁਗ੍ਘਾਟਿਤਕਮ੍ਮਕਿਲੇਸਨਿਰੋਧਨੇਨ ਪੁਥੁਜ੍ਜਨੇਹਿ ਵਿਯ ਸੋਤਾਪਨ੍ਨਸ੍ਸ, ਸੋਤਾਪਨ੍ਨਾਦੀਹਿ ਸਕਦਾਗਾਮਿਆਦੀਨਂ ਪੁਗ੍ਗਲਨ੍ਤਰਭਾਵੂਪਗਮਨਂ ਅਤ੍ਥਿ. ਯਤੋ ਹੇਟ੍ਠਿਮਾ ਹੇਟ੍ਠਿਮਾ ਫਲਧਮ੍ਮਾ ਉਪਰੂਪਰਿ ਮਗ੍ਗਧਮ੍ਮੇਹਿ ਨਿਵਤ੍ਤਿਤਾ ਪਟਿਪਕ੍ਖੇਹਿ ਵਿਯ ਅਭਿਭੂਤਾ ਅਪ੍ਪਵਤ੍ਤਿਧਮ੍ਮਤਂਯੇਵ ਆਪਨ੍ਨਾ. ਤੇਨਾਹ ‘‘ਪਟਿਪ੍ਪਸ੍ਸਦ੍ਧਤ੍ਤਾ’’ਤਿ.

ਅਪਿਚ ਕੁਸਲਕਿਰਿਯਪਵਤ੍ਤਿ ਨਾਮ ਅਞ੍ਞਾਦਿਸੀ, ਵਿਪਾਕਪਵਤ੍ਤਿ ਚ ਅਞ੍ਞਾਦਿਸੀ, ਅਨਨ੍ਤਰਫਲਤ੍ਤਾ ਚ ਲੋਕੁਤ੍ਤਰਕੁਸਲਾਨਂ ਹੇਟ੍ਠਿਮਤੋ ਉਪਰਿਮੋ ਭਵਨ੍ਤਰਗਤੋ ਵਿਯ ਹੋਤਿ. ਤਂਤਂਫਲਵਸੇਨੇਵ ਹਿ ਅਰਿਯਾਨਂ ਸੋਤਾਪਨ੍ਨਾਦਿਨਾਮਲਾਭੋ. ਤੇ ਸਚੇ ਅਞ੍ਞਫਲਸਮਙ੍ਗਿਨੋਪਿ ਹੋਨ੍ਤਿ, ਸੋਤਾਪਨ੍ਨਾਦਿਨਾਮਮ੍ਪਿ ਤੇਸਂ ਅਵਟ੍ਠਿਤਂ ਸਿਯਾ, ਤੇਨ ਤੇਨ ਝਾਨੇਨ ਗਹਿਤਪਟਿਸਨ੍ਧਿਕੋ ਵਿਯਾਤਿ ਤਸ੍ਸ ਤਸ੍ਸ ਅਰਿਯਸ੍ਸ ਤਂ ਤਂ ਫਲਂ ਭਵਙ੍ਗਸਦਿਸਨ੍ਤਿ ਨ ਉਪਰਿਮਸ੍ਸ ਹੇਟ੍ਠਿਮਫਲਸਮਙ੍ਗਿਤਾਯ ਲੇਸੋਪਿ ਸਮ੍ਭਵਤਿ, ਕੁਤੋ ਤਸ੍ਸ ਸਮਾਪਜ੍ਜਨਨ੍ਤਿ ਦਟ੍ਠਬ੍ਬਂ. ਹੇਟ੍ਠਿਮਾ ਚ ਉਪਰਿਮਨ੍ਤਿ ਹੇਟ੍ਠਿਮਾ ਚ ਸੋਤਾਪਨ੍ਨਾਦਯੋ ਅਰਿਯਾ ਉਪਰਿਮਂ ਸਕਦਾਗਾਮਿਫਲਾਦਿਂ ਨ ਸਮਾਪਜ੍ਜਨ੍ਤੀਤਿ ਸਮ੍ਬਨ੍ਧੋ. ਤਤ੍ਥ ਕਾਰਣਮਾਹ ‘‘ਅਨਧਿਗਤਤ੍ਤਾ’’ਤਿ. ਨ ਹਿ ਅਨਧਿਗਤਸਮਾਪਤ੍ਤਿਂ ਸਮਾਪਜ੍ਜਿਤੁਂ ਸਕ੍ਕਾ.

‘‘ਅਤ੍ਤਨੋ ਅਤ੍ਤਨੋਯੇਵ ਪਨ ਫਲਂ ਸਮਾਪਜ੍ਜਨ੍ਤੀ’’ਤਿ ਇਮਿਨਾ ਸਬ੍ਬੇਪਿ ਅਰਿਯਾ ਅਤ੍ਤਨੋ ਅਤ੍ਤਨੋ ਫਲਸਮਾਪਤ੍ਤਿਂ ਸਮਾਪਜ੍ਜਨ੍ਤੀਤਿ ਅਤ੍ਥੇ ਆਪਨ੍ਨੇ ਤਤ੍ਥ ਕੇਸਞ੍ਚਿ ਮਤਿਭੇਦਂ ਦਸ੍ਸੇਤੁਂ ‘‘ਕੇਚਿ ਪਨਾ’’ਤਿਆਦਿ ਵੁਤ੍ਤਂ. ਏਤੇ ਹਿ ਸਮਾਧਿਸ੍ਮਿਂ ਪਰਿਪੂਰਕਾਰਿਨੋਤਿ ਯਸ੍ਮਾ ਹਿ ਤੇ ‘‘ਉਪਰਿਮਾ ਦ੍ਵੇ’’ਤਿ ਵੁਤ੍ਤਾ ਅਨਾਗਾਮਿਨੋ, ਅਰਹਨ੍ਤੋ ਚ ਸਮਾਧਿਸ੍ਮਿਂ ਪਰਿਪੂਰਕਾਰਿਨੋ, ਇਤਰੇ ਪਨ ਸੀਲੇਸੁ ਪਰਿਪੂਰਕਾਰਿਨੋ, ਤਸ੍ਮਾ ਦ੍ਵੇ ਏਵ ਫਲਸਮਾਪਤ੍ਤਿਂ ਸਮਾਪਜ੍ਜਨ੍ਤੀਤਿ. ਨ ਹਿ ਸਮਾਧਿਪਾਰਿਪੂਰਿਯਾ ਵਿਨਾ ਸਮਾਪਤ੍ਤਿਵਲ਼ਞ੍ਜਨਂ ਸਮ੍ਭਵਤੀਤਿ ਅਧਿਪ੍ਪਾਯੋ. ਤਨ੍ਤਿ ‘‘ਸਮਾਧਿਸ੍ਮਿਂ ਪਰਿਪੂਰਕਾਰਿਨੋ’’ਤਿ ਤੇਹਿ ਵੁਤ੍ਤਕਾਰਣਂ. ਅਕਾਰਣਮੇਵਾਤਿ ਅਯੁਤ੍ਤਿਯੇਵ. ਕਸ੍ਮਾਤਿ ਚੇ? ਆਹ ‘‘ਪੁਥੁਜ੍ਜਨਸ੍ਸਾਪੀ’’ਤਿਆਦਿ. ਤਸ੍ਸਤ੍ਥੋ – ਸਬ੍ਬਸੋ ਅਸਮੁਚ੍ਛਿਨ੍ਨਕਿਲੇਸਸ੍ਸ ਪੁਥੁਜ੍ਜਨਸ੍ਸਾਪਿ ਅਤ੍ਤਨਾ ਪਟਿਲਦ੍ਧਲੋਕਿਯਸਮਾਪਤ੍ਤਿਸਮਾਪਜ੍ਜਨਂ ਲਬ੍ਭਤਿ, ਕਿਮਙ੍ਗਂ ਪਨ ਸਮੁਚ੍ਛਿਨ੍ਨੇਕਚ੍ਚਕਿਲੇਸਾਨਂ ਹੇਟ੍ਠਿਮਾਨਂ ਅਰਿਯਾਨਂ, ਤਸ੍ਮਾ ਤੇਸਂ ਸਮਾਧਿਸ੍ਮਿਂ ਅਪਰਿਪੂਰਕਾਰਿਤਾ ਅਤ੍ਤਨੋ ਫਲਸਮਾਪਤ੍ਤਿਂ ਅਸਮਾਪਜ੍ਜਨਸ੍ਸ ਅਕਾਰਣਨ੍ਤਿ. ਯੁਤ੍ਤਿਚਿਨ੍ਤਾ ਨਾਮ ਪਾਲ਼ਿਅਨਾਰੁਲ਼੍ਹੇ ਅਤ੍ਥੇ ਯੁਤ੍ਤਾ, ਅਯਂ ਪਨਤ੍ਥੋ ਪਾਲ਼ਿਆਰੁਲ਼੍ਹੋਤਿ ਕਾਰਣਾਪਦੇਸੇ ਅਨਾਦਰਕਰਣਮੁਖੇਨ ਪਾਲ਼ਿਂ ਦਸ੍ਸੇਨ੍ਤੋ ‘‘ਕਿਞ੍ਚੇਤ੍ਥਾ’’ਤਿਆਦਿਮਾਹ. ਸੋਤਾਪਤ੍ਤਿਮਗ੍ਗਪਟਿਲਾਭਤ੍ਥਾਯਾਤਿ ਸੋਤਾਪਤ੍ਤਿਮਗ੍ਗਸ੍ਸ ਸਮਧਿਗਮਾਯ. ਸੋਤਾਪਤ੍ਤਿਫਲਸਮਾਪਤ੍ਤਤ੍ਥਾਯਾਤਿ ਸੋਤਾਪਤ੍ਤਿਫਲਸਮਾਪਤ੍ਤਿਯਾ ਸਮਾਪਜ੍ਜਨਤ੍ਥਂ. ਏਸ ਨਯੋ ਸੇਸੇਸੁਪਿ.

ਏਤ੍ਥ ਚ ‘‘ਸੁਞ੍ਞਤਵਿਹਾਰਸਮਾਪਤ੍ਤਤ੍ਥਾਯ ਅਨਿਮਿਤ੍ਤਵਿਹਾਰਸਮਾਪਤ੍ਤਤ੍ਥਾਯਾ’’ਤਿਆਦਿਨਾ ਸਰੂਪਤੋ ਉਦ੍ਧਟਤ੍ਤਾ ਤਤੋ ਪੁਬ੍ਬੇ ਆਗਤਾ ਮਗ੍ਗਫਲਵਾਰਾ ਅਪ੍ਪਣਿਹਿਤਵਸੇਨ ਵੁਤ੍ਤਾ. ਤਤ੍ਥ ਅਨਤ੍ਤਾਨੁਪਸ੍ਸਨਾਮੁਖੇਨ, ਅਨਿਚ੍ਚਾਨੁਪਸ੍ਸਨਾਮੁਖੇਨ ਚ ਪਵਤ੍ਤਾਨਂ ਫਲਸਮਾਪਤ੍ਤੀਨਂ ਪੁਰੇਚਰਾ ਗੋਤ੍ਰਭੁਧਮ੍ਮਾ ਨਵਦਸਭਾਵੇਨ ਵੁਤ੍ਤਾਤਿ ਵੇਦਿਤਬ੍ਬਾ. ‘‘ਸੋਤਾਪਤ੍ਤਿਫਲਸਮਾਪਤ੍ਤਤ੍ਥਾਯਾ’’ਤਿਆਦਿਨਾ ਪਨ ਚਤੂਸੁਪਿ ਫਲੇਸੁ ਏਕਸਦਿਸਂ ਦੇਸਨਾਯ ਆਗਤਤ੍ਤਾ ਸੋਤਾਪਨ੍ਨਸਕਦਾਗਾਮਿਨੋਪਿ ਅਤ੍ਤਨੋ ਫਲਂ ਸਮਾਪਜ੍ਜਨ੍ਤੀਤਿ ਵਿਞ੍ਞਾਯਤਿ. ਮਗ੍ਗਾਨਨ੍ਤਰਫਲਵਸੇਨ ਤਂ ਵੁਤ੍ਤਨ੍ਤਿ ਚ ਨ ਸਕ੍ਕਾ ਵਤ੍ਤੁਂ ਵਿਪਸ੍ਸਨਾਵਸੇਨ ਦਸਨ੍ਨਂ ਗੋਤ੍ਰਭੁਧਮ੍ਮਾਨਂ ਦਸ੍ਸਨਵਸੇਨ ਦੇਸਨਾਯ ਆਰਦ੍ਧਤ੍ਤਾ, ਮਗ੍ਗਵਾਰੇਨੇਵ ਚ ਤਦਤ੍ਥਸਿਦ੍ਧਿਤੋ. ਨ ਚ ਮਗ੍ਗਾਨਨ੍ਤਰਂ ਫਲਂ ‘‘ਫਲਸਮਾਪਤ੍ਤੀ’’ਤਿ ਵੁਚ੍ਚਤਿ ਵਿਸੁਂ ਪਰਿਕਮ੍ਮਾਭਾਵਤੋ. ਤਸ੍ਮਾ ਫਲਸਮਾਪਤ੍ਤਿਵਚਨੇਨੇਵ ਸੋਤਾਪਨ੍ਨਾਦੀਨਮ੍ਪਿ ਫਲਸਮਾਪਤ੍ਤਿਸਮਾਪਜ੍ਜਨਂ ਸਿਦ੍ਧਂ. ਤੇਨਾਹ ‘‘ਤਸ੍ਮਾ’’ਤਿਆਦਿ.

੮੬੧. ਪਯੋਜਨਮ੍ਪਿ ਤਦਤ੍ਥਾਯ ਪਟਿਪਤ੍ਤਿਯਾ ਕਾਰਣਂ ਹੋਤਿ ਤਨ੍ਨਿਮਿਤ੍ਤਂ ਪਟਿਪਜ੍ਜਨਤੋਤਿ ‘‘ਕਸ੍ਮਾ ਸਮਾਪਜ੍ਜਨ੍ਤੀ’’ਤਿ ਕਾਰਣਂ ਪੁਚ੍ਛਿਤ੍ਵਾ ‘‘ਦਿਟ੍ਠਧਮ੍ਮਸੁਖਵਿਹਾਰਤ੍ਥ’’ਨ੍ਤਿ ਪਯੋਜਨਂ ਵਿਸ੍ਸਜ੍ਜਿਤਂ. ਕਸ੍ਮਾਤਿ ਵਾ ਸਮ੍ਪਦਾਨੇ ਨਿਸ੍ਸਕ੍ਕਵਚਨਂ, ਕਿਸ੍ਸਾਤਿ ਵੁਤ੍ਤਂ ਹੋਤਿ. ਦਿਟ੍ਠਧਮ੍ਮਸੁਖਵਿਹਾਰਤ੍ਥਨ੍ਤਿ ਦਿਟ੍ਠੇਵ ਧਮ੍ਮੇ ਕਿਲੇਸਦਰਥਪਰਿਲ਼ਾਹਵੂਪਸਮੇਨ ਸਨ੍ਤੇਨ ਸੁਖਵਿਹਾਰੇਨ ਵਿਹਰਣਤ੍ਥਂ. ਸਤਿਪਿ ਵਿਪਾਕਭਾਵੇ ਪਰਿਕਮ੍ਮੇਨ ਵਿਨਾ ਅਨੁਪ੍ਪਜ੍ਜਨਤੋ ਫਲਸਮਾਪਤ੍ਤਿਧਮ੍ਮਾਨਂ ਤਸ੍ਸ ਤਸ੍ਸ ਅਰਿਯਸ੍ਸ ਰੁਚਿਵਸੇਨੇਵ ਪਵਤ੍ਤਿ, ਯਤੋ ਨੇਸਂ ਸਾਧਿਪਤਿਤਾਤਿ ਆਹ ‘‘ਅਦ੍ਧਾਨ…ਪੇ… ਸਮਾਪਜ੍ਜਨ੍ਤੀ’’ਤਿ.

੮੬੨. ਦ੍ਵੀਹਿ ਆਕਾਰੇਹੀਤਿ ਦ੍ਵੀਹਿ ਕਾਰਣੇਹਿ. ਯਥਾ ਹਿ ਲੋਕਿਯਜ੍ਝਾਨਾਨਂ ਸਮਧਿਗਮੋ ਸਮ੍ਪਯੋਗਸਮਙ੍ਗਿਭਾਵੇਨ ਸਿਜ੍ਝਮਾਨੋ ਪਹਾਨਙ੍ਗਸਮਤਿਕ੍ਕਮਮੁਖੇਨ ਵੁਚ੍ਚਤਿ ਤਥਾ ਸਮਧਿਗਨ੍ਤਬ੍ਬਤ੍ਤਾ, ਏਵਂ ਫਲਸਮਾਪਤ੍ਤਿਪਿ ਨਿਬ੍ਬਾਨਮਨਸਿਕਾਰੇਨ ਸਿਜ੍ਝਮਾਨਾ ਤਦਞ੍ਞਾਰਮ੍ਮਣਾਮਨਸਿਕਾਰਮੁਖੇਨ ਵੁਚ੍ਚਤਿ ਸਬ੍ਬਸਙ੍ਖਾਰਤੋ ਵਿਨਿਵਟ੍ਟਿਤਮਾਨਸਤਾਵਸੇਨ ਸਮਿਜ੍ਝਨਤੋ. ਤੇਨਾਹ ‘‘ਨਿਬ੍ਬਾਨਤੋ’’ਤਿਆਦਿ. ਉਦਯਬ੍ਬਯਞਾਣਾਦਿਞਾਣਪਰਮ੍ਪਰਵਸੇਨ ਹਿ ਸਬ੍ਬਫਲਚਿਤ੍ਤਂ ਸਙ੍ਖਾਰਤੋ ਸਬ੍ਬਸੋ ਨਿਬ੍ਬਿਨ੍ਨਵਿਰਤ੍ਤਚਿਤ੍ਤਸ੍ਸ ਤਤੋ ਵਿਨਿਸ੍ਸਟਨਿਬ੍ਬਾਨਾਰਮ੍ਮਣਂ ਪਵਤ੍ਤਤਿ. ਏਵਂ ਪਵਤ੍ਤਮਾਨਞ੍ਚ ਤਂ ਨਿਬ੍ਬਾਨਤੋ ਅਞ੍ਞਸ੍ਸ ਆਰਮ੍ਮਣਸ੍ਸ ਅਮਨਸਿਕਾਰਾ, ਨਿਬ੍ਬਾਨਸ੍ਸ ਚ ਮਨਸਿਕਾਰਾ ਪਵਤ੍ਤਤੀਤਿ ਵੁਚ੍ਚਤਿ.

ਅਨਿਮਿਤ੍ਤਾਯ ਚੇਤੋਵਿਮੁਤ੍ਤਿਯਾਤਿ ਅਨਿਮਿਤ੍ਤਵਿਮੋਕ੍ਖਦ੍ਵਯਾਯ ਫਲਸਮਾਪਤ੍ਤਿਯਾ, ਅਨਿਚ੍ਚਾਨੁਪਸ੍ਸਨਾਮੁਖੇਨ ਵਾ ਸਮਾਪਜ੍ਜਿਤਬ੍ਬਾਯ ਫਲਸਮਾਪਤ੍ਤਿਯਾ. ਸਮਾਪਤ੍ਤਿਯਾਤਿ ਸਮਾਪਜ੍ਜਨਤ੍ਥਾਯ. ਸਬ੍ਬਨਿਮਿਤ੍ਤਾਨਨ੍ਤਿ ਰੂਪਾਦਿਸਬ੍ਬਸਙ੍ਖਾਰਨਿਮਿਤ੍ਤਾਨਂ. ਅਮਨਸਿਕਾਰੋਤਿ ਆਦੀਨਵਤੋ ਦਿਸ੍ਵਾ ਵਿਸ੍ਸਟ੍ਠਤਾਯ ਅਨਾਵਜ੍ਜਨਂ ਅਸਮਨ੍ਨਾਹਾਰੋ. ਅਨਿਮਿਤ੍ਤਾਯ ਚ ਧਾਤੁਯਾ ਮਨਸਿਕਾਰੋਤਿ ਸਬ੍ਬਸਙ੍ਖਾਰਨਿਮਿਤ੍ਤਾਭਾਵਤੋ ਅਨਿਮਿਤ੍ਤਾਯ. ਕੇਹਿਚਿ ਪਚ੍ਚਯੇਹਿ ਨ ਸਙ੍ਖਤਤ੍ਤਾ ਚ ਅਸਙ੍ਖਤਾਤਿ ਲਦ੍ਧਨਾਮਾਯ ਅਸਙ੍ਖਤਾਯ ਧਾਤੁਯਾ ਫਲਸਮਾਪਤ੍ਤਿਸਹਜਾਤੇਨ ਮਨਸਿਕਾਰੇਨ ਮਨਸਿਕਰਣਂ, ਤਸ੍ਸਾ ਵਾ ਧਾਤੁਯਾ ਫਲਸਮਾਪਤ੍ਤਿਚਿਤ੍ਤਸਙ੍ਖਾਤੇ ਮਨਸਿਕਰਣਂ.

੮੬੩. ਉਦਯਬ੍ਬਯਾਦਿਵਸੇਨਾਤਿ ਉਦਯਬ੍ਬਯਭਙ੍ਗਭਯਤੁਪਟ੍ਠਾਨਾਦਿਵਸੇਨ ਪਵਤ੍ਤਨਕਾਨਂ ਨਵਨ੍ਨਮ੍ਪਿ ਞਾਣਾਨਂ ਬ੍ਯਾਪਾਰਂ ਵਦਤਿ. ਤੇਨਾਹ ‘‘ਪਵਤ੍ਤਾਨੁਪੁਬ੍ਬਵਿਪਸ੍ਸਨਸ੍ਸਾ’’ਤਿ. ਸਙ੍ਖਾਰਾਰਮ੍ਮਣਗੋਤ੍ਰਭੁਞਾਣਾਨਨ੍ਤਰਨ੍ਤਿ ਸਙ੍ਖਾਰਾਰਮ੍ਮਣਸ੍ਸ ‘‘ਵੋਦਾਨ’’ਨ੍ਤਿ ਲਦ੍ਧਨਾਮਸ੍ਸ ਗੋਤ੍ਰਭੁਞਾਣਸ੍ਸ ਅਨਨ੍ਤਰਂ. ਕਸ੍ਮਾ ਪਨੇਤ੍ਥ ਗੋਤ੍ਰਭੁਞਾਣਂ ਮਗ੍ਗਞਾਣਪੁਰੇਚਾਰਿਕਂ ਵਿਯ ਨਿਬ੍ਬਾਨਾਰਮ੍ਮਣਂ ਨ ਹੋਤੀਤਿ? ਫਲਧਮ੍ਮਾਨਂ ਅਨਿਯ੍ਯਾਨਿਕਭਾਵਤੋ. ਅਰਿਯਮਗ੍ਗਧਮ੍ਮਾ ਏਵ ਹਿ ਨਿਯ੍ਯਾਨਿਕਾ. ਵੁਤ੍ਤਞ੍ਹੇਤਂ ‘‘ਕਤਮੇ ਧਮ੍ਮਾ ਨਿਯ੍ਯਾਨਿਕਾ? ਚਤ੍ਤਾਰੋ ਮਗ੍ਗਾ ਅਪਰਿਯਾਪਨ੍ਨਾ’’ਤਿ (ਧ. ਸ. ੧੨੯੫, ੧੬੦੯). ਤਸ੍ਮਾ ਏਕਨ੍ਤੇਨ ਨਿਯ੍ਯਾਨਿਕਸਭਾਵਸ੍ਸ ਉਭਤੋਵੁਟ੍ਠਾਨਭਾਵੇਨ ਪਵਤ੍ਤਮਾਨਸ੍ਸ ਮਗ੍ਗਞਾਣਸ੍ਸ ਅਨਨ੍ਤਰਪਚ੍ਚਯਭੂਤੇਨ ਞਾਣੇਨ ਨਿਮਿਤ੍ਤਤੋ ਵੁਟ੍ਠਿਤੇਨੇਵ ਭਵਿਤਬ੍ਬਨ੍ਤਿ ਤਸ੍ਸ ਨਿਬ੍ਬਾਨਾਰਮ੍ਮਣਤਾ ਯੁਤ੍ਤਾ, ਨ ਪਨ ਅਰਿਯਮਗ੍ਗਸ੍ਸ ਭਾਵਿਤਤ੍ਤਾ ਤਸ੍ਸ ਵਿਪਾਕਭਾਵੇਨ ਪਵਤ੍ਤਮਾਨਾਨਂ ਕਿਲੇਸਾਨਂ ਅਸਮੁਚ੍ਛਿਨ੍ਦਨਤੋ ਅਨਿਯ੍ਯਾਨਿਕਤ੍ਤਾ ਅਵੁਟ੍ਠਾਨਸਭਾਵਾਨਂ ਫਲਞਾਣਾਨਂ ਪੁਰੇਚਾਰਿਕਞਾਣਸ੍ਸ ਕਦਾਚਿਪਿ ਨਿਬ੍ਬਾਨਾਰਮ੍ਮਣਤਾ ਉਭਯਤ੍ਥ ਅਨੁਲੋਮਞਾਣਾਨਂ ਅਤੁਲ੍ਯਾਕਾਰਤੋ. ਅਰਿਯਮਗ੍ਗਵੀਥਿਯਞ੍ਹਿ ਅਨੁਲੋਮਞਾਣਾਨਿ ਅਨਿਬ੍ਬਿਦ੍ਧਪੁਬ੍ਬਾਨਂ ਥੂਲਥੂਲਲੋਭਕ੍ਖਨ੍ਧਾਦੀਨਂ ਸਾਤਿਸਯਂ ਪਦਾਲਨੇਨ ਲੋਕਿਯਞਾਣੇਸੁ ਉਕ੍ਕਂਸਪਾਰਮਿਪ੍ਪਤ੍ਤਾਨਿ ਮਗ੍ਗਞਾਣਾਨੁਗੁਣਾਨਿ ਉਪ੍ਪਜ੍ਜਨ੍ਤਿ. ਫਲਸਮਾਪਤ੍ਤਿਵੀਥਿਯਂ ਪਨ ਤਾਨਿ ਤੇਨ ਤੇਨ ਮਗ੍ਗੇਨ ਤੇਸਂ ਤੇਸਂ ਕਿਲੇਸਾਨਂ ਸਮੁਚ੍ਛਿਨ੍ਨਤ੍ਤਾ ਤਤ੍ਥ ਕਿਲੇਸਵਿਕ੍ਖਮ੍ਭਨੇ ਨਿਰੁਸ੍ਸੁਕ੍ਕਾਨਿ ਕੇਵਲਂ ਅਰਿਯਾਨਂ ਫਲਸਮਾਪਤ੍ਤਿਸੁਖਸਮਙ੍ਗਿਭਾਵਸ੍ਸ ਪਰਿਕਮ੍ਮਮਤ੍ਤਾਨਿ ਹੁਤ੍ਵਾ ਉਪ੍ਪਜ੍ਜਨ੍ਤੀਤਿ ਨ ਤੇਸਂ ਕੁਤੋਚਿ ਵੁਟ੍ਠਾਨਸਮ੍ਭਵੋ, ਯਤੋ ਨੇਸਂ ਪਰਿਯੋਸਾਨਞਾਣਂ ਸਙ੍ਖਾਰਨਿਮਿਤ੍ਤਵੁਟ੍ਠਾਨਤੋ ਨਿਬ੍ਬਾਨਾਰਮ੍ਮਣਂ ਸਿਯਾ.

ਏਵਞ੍ਚ ਕਤ੍ਵਾ ‘‘ਸੇਕ੍ਖਸ੍ਸ ਅਤ੍ਤਨੋ ਫਲਸਮਾਪਤ੍ਤਿਵਲ਼ਞ੍ਜਨਤ੍ਥਾਯ ਉਦਯਬ੍ਬਯਾਦਿਵਸੇਨ ਸਙ੍ਖਾਰੇ ਸਮ੍ਮਸਨ੍ਤਸ੍ਸ ਵਿਪਸ੍ਸਨਾਞਾਣਾਨੁਪੁਬ੍ਬਿਯਾ ਫਲਮੇਵ ਉਪ੍ਪਜ੍ਜਤਿ, ਨ ਮਗ੍ਗੋ’’ਤਿ ਇਦਞ੍ਚ ਅਟ੍ਠਕਥਾਵਚਨਂ ਸਮਤ੍ਥਿਤਂ ਹੋਤਿ. ਤੇਨਾਹ ‘‘ਸੇਕ੍ਖਸ੍ਸਾਪਿ ਫਲਮੇਵ ਉਪ੍ਪਜ੍ਜਤਿ, ਨ ਮਗ੍ਗੋ’’ਤਿ. ਨਿਬ੍ਬਾਨਾਰਮ੍ਮਣੇ ਅਪ੍ਪਨਜ੍ਝਾਨਵਸੇਨ ਯਥਾਪਰਿਚ੍ਛਿਨ੍ਨਕਾਲਂ ਨਿਰਨ੍ਤਰਂ ਫਲਚਿਤ੍ਤਸ੍ਸੇਵ ਪਵਤ੍ਤਨਂ ਸਮਾਪਜ੍ਜਨਂ ਫਲਸਮਾਪਤ੍ਤੀਤਿ ਆਹ ‘‘ਫਲਸਮਾਪਤ੍ਤਿਵਸੇਨ ਨਿਰੋਧੇ ਚਿਤ੍ਤਂ ਅਪ੍ਪੇਤੀ’’ਤਿ. ਯਦਿ ਅਨੁਪੁਬ੍ਬਵਿਪਸ੍ਸਨਾਨਂ ਵਸੇਨ ਫਲਸਮਾਪਤ੍ਤਿਸਮਾਪਜ੍ਜਨਂ, ਤੇਨ ਨੀਹਾਰੇਨ ਸੇਕ੍ਖਸ੍ਸ ਉਪਰਿਮਗ੍ਗੇਨਾਪਿ ਭਵਿਤਬ੍ਬਨ੍ਤਿ ਅਨੁਯੋਗਂ ਸਨ੍ਧਾਯਾਹ ‘‘ਫਲਸਮਾਪਤ੍ਤਿਨਿਨ੍ਨਤਾਯਾ’’ਤਿਆਦਿ. ਤੇਨ ਅਞ੍ਞੋਯੇਵ ਵਿਪਸ੍ਸਨਾਚਾਰੋ ਅਰਿਯਮਗ੍ਗਾਵਹੋ, ਅਞ੍ਞੋ ਫਲਸਮਾਪਤ੍ਤਿਆਵਹੋਤਿ ਦਸ੍ਸੇਤਿ, ਸ੍ਵਾਯਂ ਵਿਪਸ੍ਸਨਾਯ ਵਿਭਾਗੋ ਵੁਤ੍ਤੋ ਏਵ. ਯੇ ਪਨਾਤਿ ਅਭਯਗਿਰਿਵਾਸਿਨੋ ਸਨ੍ਧਾਯਾਹ. ਤੇ ਹਿ ਮਗ੍ਗਫਲਵਿਪਸ੍ਸਨਾਯ ਆਲੋਲ਼ੇਤ੍ਵਾ ਵਦਨ੍ਤਿ. ਤੇਨੇਵ ਹਿ ‘‘ਏਵਂ ਸਤੀ’’ਤਿਆਦਿ ਵੁਤ੍ਤਂ. ਅਰਹਾ ਪਚ੍ਚੇਕਬੁਦ੍ਧੋ ਭਵਿਸ੍ਸਤਿ ਯਦਿ ਇਤਰਤ੍ਥਾਪਿ ਵਿਪਸ੍ਸਨਾ ਤਦਤ੍ਥਾਯ ਸਂਵਤ੍ਤੇਯ੍ਯਾਤਿ ਅਧਿਪ੍ਪਾਯੋ. ਪਾਲ਼ਿਵਸੇਨੇਵ ਚ ਪਟਿਕ੍ਖਿਤ੍ਤਨ੍ਤਿ ‘‘ਦਸ ਗੋਤ੍ਰਭੁਧਮ੍ਮਾ ਵਿਪਸ੍ਸਨਾਵਸੇਨ ਉਪ੍ਪਜ੍ਜਨ੍ਤੀ’’ਤਿ ਮਗ੍ਗਤ੍ਥਾ ਫਲਤ੍ਥਾ ਵਿਪਸ੍ਸਨਾ ਵਿਸੁਂ ਕਤ੍ਵਾ ਪਵਤ੍ਤਪਾਲ਼ਿਵਸੇਨੇਵ ਤੇਸਂ ਵਚਨਂ ਪਟਿਕ੍ਖਿਤ੍ਤਨ੍ਤਿਪਿ ਨ ਗਹੇਤਬ੍ਬਂ, ਅਞ੍ਞਥਾ ‘‘ਦਸ ਗੋਤ੍ਰਭੁਧਮ੍ਮਾ’’ਤਿ ਵਚਨਂ ਵਿਰੁਜ੍ਝੇਯ੍ਯਾਤਿ. ਇਦਮੇਵ ਪਨ ਗਹੇਤਬ੍ਬਨ੍ਤਿ ਵੁਤ੍ਤਸ੍ਸੇਵਤ੍ਥਸ੍ਸ ਨਿਗਮਨਂ. ਫਲਞ੍ਚਸ੍ਸਾਤਿਆਦਿ ਮਹਗ੍ਗਤਵਿਪਾਕਾਨਂ ਵਿਯ ਲੋਕੁਤ੍ਤਰਵਿਪਾਕਾਨਞ੍ਚ ਕੁਸਲਸਰਿਕ੍ਖਤਾਦਸ੍ਸਨਂ. ਝਾਨਤੋ ਸਰਿਕ੍ਖਤਾਦਸ੍ਸਨੇਨੇਵ ਚੇਤ੍ਥ ਬੋਜ੍ਝਙ੍ਗਮਗ੍ਗਙ੍ਗਵਸੇਨਾਪਿ ਸਰਿਕ੍ਖਤਾ ਦਸ੍ਸਿਤਾਯੇਵਾਤਿ ਵੇਦਿਤਬ੍ਬਂ.

੮੬੪. ਠਿਤਿਯਾਤਿ ਪਬਨ੍ਧਟ੍ਠਿਤਿਯਾ. ਯਥਾਪਰਿਚ੍ਛਿਨ੍ਨਕਾਲਞ੍ਹਿ ਸਮਾਪਤ੍ਤਿਯਾ ਪਬਨ੍ਧਵਸੇਨਾਵਟ੍ਠਾਨਂ ਇਧ ਠਿਤੀਤਿ. ‘‘ਚਨ੍ਦੇ ਵਾ ਸੂਰਿਯੇ ਵਾ ਏਤ੍ਤਕਂ ਠਾਨਂ ਗਤੇ ਵੁਟ੍ਠਹਿਸ੍ਸਾਮੀ’’ਤਿ ਕਾਲਾਵਧਿਗ੍ਗਹਣਵਸੇਨ ਸਮਾਪਜ੍ਜਨਂ ਚਿਤ੍ਤਸ੍ਸ ਅਭਿਸਙ੍ਖਰਣਂ ਅਭਿਸਙ੍ਖਾਰੋ.

੮੬੫. ਸਬ੍ਬਾਨੇਵੇਤਾਨੀਤਿ ਰੂਪਨਿਮਿਤ੍ਤਾਦਿਸਬ੍ਬਾਨੇਵ ਏਤਾਨਿ ਏਕਤੋ ਕਾਮਂ ਨ ਮਨਸਿ ਕਰੋਤਿ ਅਸਮ੍ਭਵਤੋ. ਸਬ੍ਬਸਙ੍ਗਾਹਿਕਵਸੇਨਾਤਿ ਅਨਵਸੇਸਪਰਿਯਾਦਾਨਵਸੇਨ. ਸਮੁਦਾਯਸਦ੍ਦਾ ਹਿ ਅਵਯਵੇਸੁਪਿ ਪਵਤ੍ਤਨ੍ਤਿ, ਅਵਯਵਬ੍ਯਤਿਰੇਕੇਨ ਚ ਸਮੁਦਾਯੋ ਨ ਲਬ੍ਭਤੀਤਿ ਅਵਯਵਗਤਮ੍ਪਿ ਕਿਚ੍ਚਂ ਸਮੁਦਾਯਵਸੇਨ ਵੁਤ੍ਤਂ. ਤਸ੍ਮਾਤਿ ਸਬ੍ਬੇਸਂ ਸਙ੍ਖਾਰਨਿਮਿਤ੍ਤਾਨਂ ਏਕਤੋ ਮਨਸਿਕਾਰਾਭਾਵਤੋ. ਯਸ੍ਮਾ ਭਵਙ੍ਗਚਿਤ੍ਤੇ ਉਪ੍ਪਨ੍ਨੇ ਫਲਸਮਾਪਤ੍ਤਿਤੋ ਵੁਟ੍ਠਿਤੋ ਨਾਮ ਹੋਤਿ, ਤਸ੍ਮਾ ਵੁਤ੍ਤਂ ‘‘ਯਂ ਭਵਙ੍ਗਸ੍ਸਾ’’ਤਿਆਦਿ. ਭਵਙ੍ਗਸ੍ਸ ਆਰਮ੍ਮਣਂ ਨਾਮ ਕਮ੍ਮਾਦਿ. ਮਨਸਿ ਕਰੋਤੋਤਿ ਭਵਙ੍ਗਸਹਗਤੇਨ ਮਨਸਿਕਾਰੇਨ ਮਨਸਿ ਕਰੋਤੋ, ਤਂ ਵਾ ਆਰਮ੍ਮਣਂ ਭਵਙ੍ਗਮਨਸਿ ਕਰੋਤੋ.

੮੬੬. ਫਲਸ੍ਸ ਫਲਮੇਵ ਵਾ ਅਨਨ੍ਤਰਂ ਹੋਤਿ ਪੁਰਿਮਸ੍ਸ ਪੁਰਿਮਸ੍ਸ ਪਚ੍ਛਿਮਂ ਪਚ੍ਛਿਮਂ. ਭਵਙ੍ਗਂ ਵਾ ਸਬ੍ਬਪਚ੍ਛਿਮਸ੍ਸ. ਫਲਾਨਨ੍ਤਰਂ ਮਗ੍ਗਵੀਥਿਯਂ, ਫਲਸਮਾਪਤ੍ਤਿਯਞ੍ਚ. ‘‘ਯੇਨ ਫਲੇਨ ਨਿਰੋਧਾ ਵੁਟ੍ਠਾਨਂ ਹੋਤੀ’’ਤਿ ਇਦਂ ਫਲੁਪ੍ਪਤ੍ਤਿਯਾ ਨਿਰੋਧਾ ਵੁਟ੍ਠਾਨਭਾਵਤੋ ਵੁਤ੍ਤਂ. ਤਨ੍ਤਿ ਨਿਰੋਧਾਵੁਟ੍ਠਾਨਭਾਵੇਨ ਵੁਤ੍ਤਂ ਅਨਾਗਾਮਿਫਲਂ ਵਾ ਅਗ੍ਗਫਲਂ ਵਾ. ਨੇਵਸਞ੍ਞਾਨਾਸਞ੍ਞਾਯਤਨਾਨਨ੍ਤਰਨ੍ਤਿ ਨੇਵਸਞ੍ਞਾਨਾਸਞ੍ਞਾਯਤਨਸ੍ਸ ਕੁਸਲਸ੍ਸ, ਕਿਰਿਯਸ੍ਸ ਵਾ ਅਨਨ੍ਤਰਂ ਸਤਿਪਿ ਸਤ੍ਤਾਹਾਤਿਕ੍ਕਮੇ ਵਿਜਾਤਿਯੇਨ ਅਨ੍ਤਰਿਕਤ੍ਤਾ.

ਪਟਿਪ੍ਪਸ੍ਸਦ੍ਧਦਰਥਨ੍ਤਿ ਸਬ੍ਬਸੋ ਪਸ੍ਸਦ੍ਧਕਿਲੇਸਦਰਥਂ. ਅਮਤਾਰਮ੍ਮਣਨ੍ਤਿ ਨਿਬ੍ਬਾਨਾਰਮ੍ਮਣਂ. ਸੁਭਨ੍ਤਿ ਅਸੋਭਨਤਾਯ ਕਿਲੇਸਸ੍ਸਾਪਿ ਅਭਾਵਤੋ ਸੋਭਨਂ. ਤਣ੍ਹਾਸਙ੍ਖਾਤਂ ਲੋਕਾਮਿਸਂ ਵਨ੍ਤਂ ਛਡ੍ਡਿਤਂ ਏਤੇਨਾਤਿ ਵਨ੍ਤਲੋਕਾਮਿਸਂ. ਵੂਪਸਨ੍ਤਕਿਲੇਸਤਾਯ, ਸੁਸਨ੍ਤਤਾਯ ਚ ਸਨ੍ਤਂ. ਯੇਨ ਧਮ੍ਮੇਨ ਯੋਗਤੋ ਸਮਣੋ ਨਾਮ ਹੋਤਿ, ਤਸ੍ਸ ਅਰਿਯਮਗ੍ਗਸਙ੍ਖਾਤਸ੍ਸ ਸਾਮਞ੍ਞਸ੍ਸ ਫਲਨ੍ਤਿ ਸਾਮਞ੍ਞਫਲਂ.

ਓਜਵਨ੍ਤੇਨਾਤਿ ਸਭਾਵਸਮ੍ਪਨ੍ਨੇਨ. ਸੁਚਿਨਾਤਿ ਕਿਲੇਸਾਸੁਚਿਵਿਰਹਤੋ ਪਰਿਸੁਦ੍ਧੇਨ. ਸੁਖੇਨਾਤਿ ਅਨੁਤ੍ਤਰਸੁਖੇਨ. ਅਭਿਸਨ੍ਦਿਤਨ੍ਤਿ ਸਬ੍ਬਸੋ ਲੂਖਭਾਵਾਪਗਮਨੇਨ ਸਿਨੇਹਿਤਂ. ਸਾਤਾਤਿਸਾਤੇਨਾਤਿ ਮਹਗ੍ਗਤਸਾਤਤੋ, ਲੋਕੁਤ੍ਤਰਕੁਸਲਸਾਤਤੋ ਚ ਅਤਿਵਿਯ ਸਾਤੇਨ ਮਧੁਰੇਨ. ਮਗ੍ਗਸੁਖਤੋਪਿ ਹਿ ਫਲਸੁਖਂ ਸਨ੍ਤਤਰਤਾਯ ਪਣੀਤਤਰਂ. ਅਮਤੇਨ ਸਮ੍ਮੋਦਿਤਂ. ‘‘ਮਧੁਂ ਵਿਯਾ’’ਤਿ ਇਮਿਨਾ ਸਾਤਾਤਿਸਾਤਤਂਯੇਵ ਵਿਭਾਵੇਤਿ.

ਤਸ੍ਸ ਅਰਿਯਸ੍ਸ ਫਲਸ੍ਸ ਰਸਭੂਤਂ ਸਾਰਭੂਤਂ ਤਂ ਸੁਖਂ ਪਞ੍ਞਂ ਭਾਵੇਤ੍ਵਾ ਯਸ੍ਮਾ ਪਣ੍ਡਿਤੋ ਵਿਨ੍ਦਤਿ ਪਟਿਲਭਤੀਤਿ ਯੋਜਨਾ.

ਨਿਰੋਧਸਮਾਪਤ੍ਤਿਕਥਾਵਣ੍ਣਨਾ

੮੬੭. ਤਤ੍ਰਾਤਿ ਤਸ੍ਮਿਂ ‘‘ਨਿਰੋਧਸਮਾਪਤ੍ਤਿਯਾ ਸਮਾਪਜ੍ਜਨਸਮਤ੍ਥਤਾ’’ਤਿ ਸਂਖਿਤ੍ਤਵਚਨੇ. ਇਦਂ ਸਰੂਪਾਦਿਵਸੇਨ ਪਞ੍ਹਾਕਮ੍ਮਂ. ਕਤ੍ਥਾਤਿ ਕਸ੍ਮਿਂ ਭਵੇ.

੮੬੮. ਅਨੁਪੁਬ੍ਬਨਿਰੋਧਵਸੇਨਾਤਿ ਵਿਪਸ੍ਸਨਾਨੁਗਤਾ ਅਟ੍ਠ ਸਮਾਪਤ੍ਤਿਯੋ ਆਰੋਹਨ੍ਤੇਨ ਤਂਤਂਪਟਿਪਕ੍ਖਨਿਰੋਧਮੁਖੇਨ ਤਿਣ੍ਣਂ ਸਙ੍ਖਾਰਾਨਂ ਅਨੁਪੁਬ੍ਬਤੋ ਨਿਰੋਧਵਸੇਨ. ਯਥਾਪਰਿਚ੍ਛਿਨ੍ਨਕਾਲਂ ਯਾ ਚਿਤ੍ਤਚੇਤਸਿਕਾਨਂ ਅਪ੍ਪਵਤ੍ਤਿ, ਅਯਂ ਨਿਰੋਧਸਮਾਪਤ੍ਤੀਤਿ ਅਤ੍ਥੋ. ਕੇ ਸਮਾਪਜ੍ਜਨ੍ਤਿ, ਕੇ ਨ ਸਮਾਪਜ੍ਜਨ੍ਤੀਤਿ ਕਾਮਂ ਸਮਾਪਜ੍ਜਨਸਮਤ੍ਥਾ ਪਧਾਨਤਾਯ ਪਠਮਂ ਪੁਚ੍ਛਿਤਾ, ਤਬ੍ਬਿਸ੍ਸਜ੍ਜਨਂ ਪਨ ਗਰੁਭਾਵਤੋ ਪਚ੍ਛਾ ਵਿਸ੍ਸਜ੍ਜੇਤੁਂ ਅਸਮਾਪਜ੍ਜਨਕੇ ਤਾਵ ਦਸ੍ਸੇਨ੍ਤੋ ‘‘ਸਬ੍ਬੇਪਿ…ਪੇ… ਨ ਸਮਾਪਜ੍ਜਨ੍ਤੀ’’ਤਿ ਆਹ ਯਥਾ ‘‘ਵਾਮਂ ਮੁਞ੍ਚ, ਦਕ੍ਖਿਣਂ ਗਣ੍ਹਾ’’ਤਿ. ਤਤ੍ਥ ‘‘ਸਬ੍ਬੇਪੀ’’ਤਿ ਇਦਂ ਪੁਥੁਜ੍ਜਨਾਦੀਨਂ ਤਿਣ੍ਣਂ ਵਿਸੇਸਨਂ. ਤੇ ਹਿ ਅਟ੍ਠਨ੍ਨਂ ਸਮਾਪਤ੍ਤੀਨਂ ਲਾਭਿਨੋਪਿ ਅਲਾਭਿਨੋ ਵਿਯ ਸਮਾਧਿਸ੍ਮਿਂ ਅਪਰਿਪੂਰਕਾਰਿਤਾਯ ਨਿਰੋਧਂ ਸਮਾਪਜ੍ਜਿਤੁਂ ਨ ਸਕ੍ਕੋਨ੍ਤਿ. ਕਾਮਚ੍ਛਨ੍ਦਾਦਿਸਮੁਚ੍ਛਿਨ੍ਦਨੇਨ ਹਿ ਸਮਾਧਿਸ੍ਮਿਂ ਪਰਿਪੂਰਕਾਰਿਤਾ, ਨ ਝਾਨਾਧਿਗਮਮਤ੍ਤੇਨ. ਅਨਾਗਾਮਿਨੋ, ਅਰਹਨ੍ਤੋਤਿ ਏਤ੍ਥ ਸੁਕ੍ਖਵਿਪਸ੍ਸਕਾ ਚ ਅਨਾਗਾਮਿਨੋ, ਸੁਕ੍ਖਵਿਪਸ੍ਸਕਾ ਚ ਅਰਹਨ੍ਤੋਤਿ ਸੁਕ੍ਖਵਿਪਸ੍ਸਕਸਦ੍ਦੋ ਪਚ੍ਚੇਕਂ ਯੋਜੇਤਬ੍ਬੋ. ਉਭਯੇਪਿ ਚੇਤੇ ਸਤਿਪਿ ਵਿਪਸ੍ਸਨਾਬਲੇ ਸਮਾਧਿਬਲਸ੍ਸ ਅਭਾਵਤੋ ਨਿਰੋਧਂ ਨ ਸਮਾਪਜ੍ਜਨ੍ਤਿ. ਅਨੁਪੁਬ੍ਬਵਿਹਾਰਸਮ੍ਭਵਤਞ੍ਞੇਵੇਤ੍ਥ ਸਮਾਧਿਬਲਂ ਇਚ੍ਛਿਤਬ੍ਬਂ. ਪੁਰਿਮਕਾ ਪਨ ਤਯੋ ਸਤਿਪਿ ਸਮਾਧਿਬਲੇ ਵਿਪਸ੍ਸਨਾਬਲਸ੍ਸ ਅਭਾਵਤੋ, ਅਪਰਿਪੁਣ੍ਣਤ੍ਤਾ ਚ ਸਮਾਪਜ੍ਜਿਤੁਂ ਨ ਸਕ੍ਕੋਨ੍ਤਿ. ਅਪਰਿਪੁਣ੍ਣਤਾ ਚਸ੍ਸ ਸਙ੍ਖਾਰਾਨਂ ਨ ਸਮ੍ਮਾ ਪਰਿਮਦ੍ਦਿਤਤ੍ਤਾ. ਅਟ੍ਠ ਸਮਾਪਤ੍ਤਿ…ਪੇ… ਸਮਾਪਜ੍ਜਨ੍ਤੀ’’ਤਿ ਵਤ੍ਵਾ ਤਤ੍ਥ ਕਾਰਣਂ ਪਾਲ਼ਿਵਸੇਨੇਵ ਦਸ੍ਸੇਤੁਂ ‘‘ਦ੍ਵੀਹਿ ਬਲੇਹੀ’’ਤਿਆਦਿ ਵੁਤ੍ਤਂ. ਤਯੋ ਚ ਸਙ੍ਖਾਰਾਨਨ੍ਤਿ ਏਤ੍ਥ ਤਯੋਤਿ ਸਾਮਿਅਤ੍ਥੇ ਪਚ੍ਚਤ੍ਤਵਚਨਂ, ਤਿਣ੍ਣਨ੍ਤਿ ਅਤ੍ਥੋ. ਞਾਣਚਰਿਯਾਹੀਤਿ ਞਾਣਪ੍ਪਵਤ੍ਤੀਹਿ. ਨਿਰੋਧਸਮਾਪਤ੍ਤਿਯਾਤਿ ਨਿਰੋਧਸਮਾਪਜ੍ਜਨਾਯ ਞਾਣਂ. ਅਯਞ੍ਚ ਸਮ੍ਪਦਾਤਿ ਅਯਂ ਬਲਦ੍ਵਯਸਮਨ੍ਨਾਗਮਾਦਿਕਾ ਯਥਾਵੁਤ੍ਤਨਿਰੋਧਸਮਾਪਤ੍ਤਿਆਵਹਾ ਸਮ੍ਪਤ੍ਤਿ. ਅਨਾਗਾਮਿਖੀਣਾਸਵੇਤਿ ਅਨਾਗਾਮਿਨੋ ਚੇਵ ਖੀਣਾਸਵੇ ਚ.

੮੬੯. ਸਮਥਬਲਨ੍ਤਿ ਕਾਮਚ੍ਛਨ੍ਦਾਦਿਕੇ ਪਚ੍ਚਨੀਕਧਮ੍ਮੇ ਸਮੇਤੀਤਿ ਸਮਥੋ, ਸੋ ਏਵ ਪਟਿਪਕ੍ਖੇਹਿ ਅਕਮ੍ਪਿਯਟ੍ਠੇਨ ਬਲਂ. ਅਨਿਚ੍ਚਾਦਿਵਸੇਨ ਵਿਵਿਧੇਹਿ ਆਕਾਰੇਹਿ ਪਸ੍ਸਤੀਤਿ ਵਿਪਸ੍ਸਨਾ, ਸਾ ਏਵ ਵੁਤ੍ਤਨਯੇਨ ਬਲਨ੍ਤਿ ਵਿਪਸ੍ਸਨਾਬਲਂ. ਨੇਕ੍ਖਮ੍ਮਵਸੇਨਾਤਿਆਦੀਸੁ ਕਾਮਚ੍ਛਨ੍ਦਵਿਕ੍ਖਮ੍ਭਨਸ੍ਸ ਨੇਕ੍ਖਮ੍ਮਸਙ੍ਕਪ੍ਪਸ੍ਸ, ਅਲੋਭਪਧਾਨਸ੍ਸ ਵਾ ਤਥਾਪਵਤ੍ਤਕੁਸਲਚਿਤ੍ਤੁਪ੍ਪਾਦਸ੍ਸ ਵਸੇਨ ਚਿਤ੍ਤਸ੍ਸ ਏਕਗ੍ਗਤਾਸਙ੍ਖਾਤੋ ਯੋ ਅਵਿਕ੍ਖੇਪੋ, ਤਂ ਸਮਥਬਲਂ. ਬ੍ਯਾਪਾਦਵਿਕ੍ਖਮ੍ਭਨਸ੍ਸ ਅਬ੍ਯਾਪਾਦਵਿਤਕ੍ਕਸ੍ਸ, ਅਦੋਸਪਧਾਨਸ੍ਸ ਵਾ ਤਥਾਪਵਤ੍ਤਕੁਸਲਚਿਤ੍ਤੁਪ੍ਪਾਦਸ੍ਸ ਵਸੇਨੇਵ. ਥਿਨਮਿਦ੍ਧਵਿਕ੍ਖਮ੍ਭਿਕਾਯ ਵਿਭੂਤਂ ਕਤ੍ਵਾ ਮਨਸਿਕਰਣੇਨ ਉਪਟ੍ਠਿਤਆਲੋਕਸਞ੍ਞਾਯ ਵਸੇਨ. ਉਦ੍ਧਚ੍ਚਵਿਕ੍ਖਮ੍ਭਨਸ੍ਸ ਅਵਿਕ੍ਖੇਪਸ੍ਸ ਸਮਾਧਾਨਸ੍ਸ ਵਸੇਨ. ਸਕਲਮਿਚ੍ਛਾਵਿਤਕ੍ਕਵਿਕ੍ਖਮ੍ਭਨਸ੍ਸ ਸਿਖਾਪਤ੍ਤਆਨਾਪਾਨਸ੍ਸਤਿਸਿਦ੍ਧਪਟਿਨਿਸ੍ਸਗ੍ਗਾਨੁਪਸ੍ਸਿਅਸ੍ਸਾਸਪਸ੍ਸਾਸਾਨਂ ਵਸੇਨ ਚਿਤ੍ਤਸ੍ਸ ਏਕਗ੍ਗਤਾਸਙ੍ਖਾਤੋ ਯੋ ਅਵਿਕ੍ਖੇਪੋ, ਤਂ ਸਮਥਬਲਨ੍ਤਿ ਅਤ੍ਥਯੋਜਨਾ.

ਏਵਂ ਉਪਚਾਰਸ੍ਸ ਝਾਨਸ੍ਸ ਵਸੇਨ ਸਮਥਬਲਂ ਦਸ੍ਸੇਤ੍ਵਾ ਇਦਾਨਿ ਤਂ ਅਟ੍ਠਨ੍ਨਂ ਸਮਾਪਤ੍ਤੀਨਂ ਵਸੇਨ ਪਟਿਪਕ੍ਖੇਹਿ ਅਨਭਿਭਵਨੀਯਤਾਯ ਚ ਬਲਪ੍ਪਤ੍ਤਿਵਸੇਨ ਦਸ੍ਸੇਤੁਂ ‘‘ਪਠਮਜ੍ਝਾਨੇਨਾ’’ਤਿਆਦਿ ਵੁਤ੍ਤਂ. ਤਤ੍ਥ ਨੀਵਰਣੇਤਿ ਨੀਵਰਣਨਿਮਿਤ੍ਤਂ ਨੀਵਰਣਪਚ੍ਚਯਾ. ਨ ਕਮ੍ਪਤਿ ਝਾਨਸਮਙ੍ਗਿਪੁਗ੍ਗਲੋ, ਝਾਨਸਮ੍ਪਯੁਤ੍ਤਸਮਾਧਿ ਵਾ. ਸੋ ਹਿ ਵਿਸੇਸਤੋ ਇਧ ‘‘ਸਮਥਬਲ’’ਨ੍ਤਿ ਅਧਿਪ੍ਪੇਤੋ. ਤਥਾ ਹਿ ਕੇਨਟ੍ਠੇਨ ਸਮਥਬਲਨ੍ਤਿ ਬਲਟ੍ਠੋ ਪੁਚ੍ਛਿਤੋ. ਉਦ੍ਧਚ੍ਚੇਤਿ ਉਦ੍ਧਚ੍ਚਨਿਮਿਤ੍ਤਂ. ਉਦ੍ਧਚ੍ਚਸਹਗਤਕਿਲੇਸੇਤਿ ਉਦ੍ਧਚ੍ਚੇਨ ਸਮ੍ਪਯੁਤ੍ਤਮੋਹਅਹਿਰਿਕਾਦਿਕਿਲੇਸਹੇਤੁ. ਖਨ੍ਧੇਤਿ ਉਦ੍ਧਚ੍ਚਸਮ੍ਪਯੁਤ੍ਤਚਤੁਕ੍ਖਨ੍ਧਨਿਮਿਤ੍ਤਂ. ਨ ਕਮ੍ਪਤੀਤਿਆਦੀਨਿ ਅਞ੍ਞਮਞ੍ਞਵੇਵਚਨਾਨਿ. ਕਮ੍ਪਨਂ ਵਾ ਠਾਨਾਪਗਮੋ. ਚਲਨਂ ਪਰਿਬ੍ਭਮਨਂ. ਵੇਧਨਂ ਸਨ੍ਧਾਵਨਂ. ਉਦ੍ਧਚ੍ਚੇ ਨ ਕਮ੍ਪਤਿ, ਉਦ੍ਧਚ੍ਚਸਹਗਤਕਿਲੇਸੇ ਨ ਚਲਤਿ, ਉਦ੍ਧਚ੍ਚਸਹਗਤਕ੍ਖਨ੍ਧੇ ਨ ਵੇਧਤੀਤਿ ਵਾ ਯੋਜੇਤਬ੍ਬਂ. ਉਦ੍ਧਚ੍ਚਗ੍ਗਹਣਞ੍ਚੇਤ੍ਥ ਸਮਥਸ੍ਸ ਉਜੁਪਟਿਪਕ੍ਖਤਾਯ ਤਦਭਿਭਵੇਨ ਬਲਪ੍ਪਤ੍ਤਿਦਸ੍ਸਨਤ੍ਥਂ. ਤੇਨੇਤਂ ਅਟ੍ਠਨ੍ਨਮ੍ਪਿ ਸਮਾਪਤ੍ਤੀਨਂ ਸਾਧਾਰਣਤੋ ਕਿਚ੍ਚਾਤਿਸਯਦਸ੍ਸਨਂ ਦਟ੍ਠਬ੍ਬਂ. ਇਦਂ ਸਮਥਬਲਨ੍ਤਿ ਯਾਯਂ ਨੇਕ੍ਖਮ੍ਮਾਦਿਵਸੇਨ ਲਦ੍ਧਾਯ ਚਿਤ੍ਤੇਕਗ੍ਗਤਾਯ ਨੀਵਰਣਾਦੀਹਿ ਅਕਮ੍ਪਨੀਯਤਾ, ਤਾਨਿ ਚ ਅਭਿਭਵਿਤ੍ਵਾ ਅਵਟ੍ਠਾਨਂ, ਇਦਂ ਸਮਥਬਲਂ.

ਇਦਾਨਿ ਵਿਪਸ੍ਸਨਾਬਲਂ ਨਿਦ੍ਦਿਸਨ੍ਤੋ ਯਸ੍ਮਾ ਵਿਪਸ੍ਸਨਾ ਸਙ੍ਖੇਪਤੋ ਸਤ੍ਤਹਿ ਅਨੁਪਸ੍ਸਨਾਹਿ ਸਙ੍ਗਹਿਤਾ, ਤਸ੍ਮਾ ਤਤੋ ਤਤੋ ਸਮਾਪਤ੍ਤਿਤੋ ਵੁਟ੍ਠਾਯ ਤਾਸਂ ਵਸੇਨ ਅਨੁਪਸ੍ਸਨਾ ਕਾਤਬ੍ਬਾ, ਤਤ੍ਤਕੇਨੇਵ ਚੇਤ੍ਥ ਅਨੁਪਸ੍ਸਨਾਕਿਚ੍ਚਂ ਪਰਿਪੁਣ੍ਣਂ ਹੋਤੀਤਿ ‘‘ਅਨਿਚ੍ਚਾਨੁਪਸ੍ਸਨਾ ਵਿਪਸ੍ਸਨਾਬਲਂ…ਪੇ… ਪਟਿਨਿਸ੍ਸਗ੍ਗਾਨੁਪਸ੍ਸਨਾ ਵਿਪਸ੍ਸਨਾਬਲ’’ਨ੍ਤਿ ਸਰੂਪਤੋ ਦਸ੍ਸੇਤ੍ਵਾ ਪੁਨ ਤਾ ਹੇਟ੍ਠਾ ਵੁਤ੍ਤਨਯੇਨ ਵਿਸਯਵਿਭਾਗੇਨ ਦਸ੍ਸੇਤੁਂ ‘‘ਰੂਪੇ ਅਨਿਚ੍ਚਾਨੁਪਸ੍ਸਨਾ’’ਤਿਆਦਿ ਵੁਤ੍ਤਂ. ਇਧਾਪਿ ਪਟਿਪਕ੍ਖੇਹਿ ਅਨਭਿਭਵਨੀਯਤਾਵ ਬਲਟ੍ਠੋਤਿ ਦਸ੍ਸੇਤੁਂ ‘‘ਕੇਨਟ੍ਠੇਨ ਵਿਪਸ੍ਸਨਾਬਲ’’ਨ੍ਤਿਆਦਿ ਆਰਦ੍ਧਂ. ਤਤ੍ਥ ਅਵਿਜ੍ਜਾਯਾਤਿ ਦ੍ਵਾਦਸਸੁ ਅਕੁਸਲਚਿਤ੍ਤੁਪ੍ਪਾਦੇਸੁ ਅਵਿਜ੍ਜਾਨਿਮਿਤ੍ਤਂ. ਅਵਿਜ੍ਜਾਸਹਗਤਕਿਲੇਸੇਤਿ ਅਵਿਜ੍ਜਾਯ ਸਮ੍ਪਯੁਤ੍ਤਲੋਭਦੋਸਾਦਿਕਿਲੇਸਵਤ੍ਥੁਨਿਮਿਤ੍ਤਂ. ਸੇਸਂ ਹੇਟ੍ਠਾ ਵੁਤ੍ਤਨਯਤ੍ਤਾ ਸੁਵਿਞ੍ਞੇਯ੍ਯਮੇਵ. ਅਵਿਜ੍ਜਗ੍ਗਹਣਞ੍ਚੇਤ੍ਥ ਵਿਪਸ੍ਸਨਾਯ ਉਜੁਪਟਿਪਕ੍ਖਤਾਯ ਤਦਭਿਭਵੇਨ ਬਲਪ੍ਪਤ੍ਤਿਦਸ੍ਸਨਤ੍ਥਂ. ਤੇਨੇਤਂ ਸਤ੍ਤਨ੍ਨਮ੍ਪਿ ਅਨੁਪਸ੍ਸਨਾਨਂ ਸਾਧਾਰਣਤੋ ਕਿਚ੍ਚਾਤਿਸਯਦਸ੍ਸਨਂ ਦਟ੍ਠਬ੍ਬਂ. ਇਦਂ ਵਿਪਸ੍ਸਨਾਬਲਨ੍ਤਿ ਯਾਯਂ ਅਨਿਚ੍ਚਾਨੁਪਸ੍ਸਨਾਦਿਵਸੇਨ ਲਦ੍ਧਸ੍ਸ ਵਿਪਸ੍ਸਨਾਞਾਣਸ੍ਸ ਨਿਚ੍ਚਸਞ੍ਞਾਦਿਨਿਮਿਤ੍ਤਂ ਅਕਮ੍ਪਨੀਯਤਾ, ਤਾ ਚ ਅਭਿਭਵਿਤ੍ਵਾ ਅਵਟ੍ਠਾਨਂ, ਇਦਂ ਵਿਪਸ੍ਸਨਾਬਲਂ.

ਵਿਤਕ੍ਕਵਿਚਾਰਾ ਵਚੀਸਙ੍ਖਾਰਾ ਵਾਚਂ ਸਙ੍ਖਰੋਨ੍ਤਿ ਪਵਤ੍ਤੇਨ੍ਤੀਤਿ ਕਤ੍ਵਾ. ਤੇਨਾਹ ‘‘ਪੁਬ੍ਬੇ ਖੋ, ਆਵੁਸੋ ਵਿਸਾਖ, ਵਿਤਕ੍ਕੇਤ੍ਵਾ ਵਿਚਾਰੇਤ੍ਵਾ ਪਚ੍ਛਾ ਵਾਚਂ ਭਿਨ੍ਦਤਿ, ਤਸ੍ਮਾ ਵਿਤਕ੍ਕਵਿਚਾਰਾ ਵਚੀਸਙ੍ਖਾਰੋ’’ਤਿ (ਮ. ਨਿ. ੧.੪੬੩; ਸਂ. ਨਿ. ੪.੩੪੮). ਤੇ ਪਨ ਦੁਤਿਯਜ੍ਝਾਨੇ ਵੂਪਸਨ੍ਤਾ ਹੋਨ੍ਤੀਤਿ ਆਹ ‘‘ਦੁਤਿਯਜ੍ਝਾਨਂ…ਪੇ… ਪਟਿਪ੍ਪਸ੍ਸਦ੍ਧਾ ਹੋਨ੍ਤੀ’’ਤਿ. ਕਾਯੇਨ ਸਙ੍ਖਰੀਯਨ੍ਤੀਤਿ ਕਾਯਸਙ੍ਖਾਰਾ, ਅਸ੍ਸਾਸਪਸ੍ਸਾਸਾ. ਤਥਾ ਹਿ ਵੁਤ੍ਤਂ ‘‘ਅਸ੍ਸਾਸਪਸ੍ਸਾਸਾ ਖੋ, ਆਵੁਸੋ ਵਿਸਾਖ, ਕਾਯਿਕਾ ਏਤੇ ਧਮ੍ਮਾ ਕਾਯਪ੍ਪਟਿਬਦ੍ਧਾ, ਤਸ੍ਮਾ ਅਸ੍ਸਾਸਪਸ੍ਸਾਸਾ ਕਾਯਸਙ੍ਖਾਰੋ’’ਤਿ (ਮ. ਨਿ. ੧.੪੬੩; ਸਂ. ਨਿ. ੪.੩੪੮). ਤੇ ਪਨ ਯਸ੍ਮਾ ਚਤੁਤ੍ਥਜ੍ਝਾਨੇ ਵੂਪਸਨ੍ਤਾ ਹੋਨ੍ਤਿ, ਤਸ੍ਮਾ ਆਹ ‘‘ਚਤੁਤ੍ਥਜ੍ਝਾਨਂ…ਪੇ… ਪਟਿਪ੍ਪਸ੍ਸਦ੍ਧਾ ਹੋਨ੍ਤੀ’’ਤਿ. ਚਿਤ੍ਤੇਨ ਸਙ੍ਖਰੀਯਨ੍ਤੀਤਿ ਚਿਤ੍ਤਸਙ੍ਖਾਰਾ, ਸਞ੍ਞਾ ਵੇਦਨਾ. ਤਥਾ ਹਿ ਵੁਤ੍ਤਂ ‘‘ਸਞ੍ਞਾ ਚ ਵੇਦਨਾ ਚ ਚੇਤਸਿਕਾ ਏਤੇ ਧਮ੍ਮਾ ਚਿਤ੍ਤਪ੍ਪਟਿਬਦ੍ਧਾ, ਤਸ੍ਮਾ ਸਞ੍ਞਾ ਚ ਵੇਦਨਾ ਚ ਚਿਤ੍ਤਸਙ੍ਖਾਰੋ’’ਤਿ (ਸਂ. ਨਿ. ੧.੪੬੩; ਸਂ. ਨਿ. ੪.੩੪੮). ਤੇ ਪਨ ਯਸ੍ਮਾ ਨਿਰੋਧਂ ਸਮਾਪਨ੍ਨਸ੍ਸ ਵੂਪਸਮਨ੍ਤਿ, ਤਸ੍ਮਾ ਵੁਤ੍ਤਂ ‘‘ਸਞ੍ਞਾਵੇਦਯਿਤ…ਪੇ… ਪਟਿਪ੍ਪਸ੍ਸਦ੍ਧਾ ਹੋਨ੍ਤੀ’’ਤਿ.

ਞਾਣਚਰਿਯਾਸੁ ਵਿਵਟ੍ਟਾਨੁਪਸ੍ਸਨਾਗ੍ਗਹਣੇਨੇਵ ਤਸ੍ਸ ਆਦਿਭੂਤਾ ਸੇਸਾਨੁਪਸ੍ਸਨਾਪਿ ਗਹਿਤਾਵ ਹੋਨ੍ਤਿ ਤਦਵਿਨਾਭਾਵਤੋ. ਮਗ੍ਗੋ ਞਾਣਚਰਿਯਾ, ਫਲਸਮਾਪਤ੍ਤਿ ਞਾਣਚਰਿਯਾਤਿ ਮਗ੍ਗਫਲਸਮਾਪਤ੍ਤੀਨਂ ਞਾਣਚਰਿਯਾਭਾਵਵਚਨਂ ਮਗ੍ਗਫਲਧਮ੍ਮਾਨਂ ਞਾਣਪਧਾਨਤ੍ਤਾ, ਞਾਣੇਨ ਵਾ ਇਨ੍ਦ੍ਰਿਯਾਧਿਪਤਿਹੇਤੁਮਗ੍ਗਪਚ੍ਚਯਾਦਿਵਸੇਨ ਸਾਤਿਸਯਪਚ੍ਚਯਭੂਤੇਨ ਸੇਸਾ ਮਗ੍ਗਫਲਧਮ੍ਮਾ ਚਰਿਤਾ ਪਵਤ੍ਤਿਤਾਤਿ ਕਤ੍ਵਾ ਤਥਾ ਵੁਤ੍ਤਂ. ਸਮਾਧਿਚਰਿਯਾਸੁਪਿ ਏਸੇਵ ਨਯੋ. ਇਮਾਹਿ ਸੋਲ਼ਸਹੀਤਿ ਅਟ੍ਠਨ੍ਨਂ ਅਨੁਪਸ੍ਸਨਾਨਂ, ਅਟ੍ਠਨ੍ਨਞ੍ਚ ਮਗ੍ਗਫਲਞਾਣਾਨਂ ਵਸੇਨ ਇਮਾਹਿ ਸੋਲ਼ਸਹਿ ਞਾਣਪਵਤ੍ਤੀਹਿ.

ਨਵਹਿ ਸਮਾਧਿਚਰਿਯਾਹੀਤਿ ਅਟ੍ਠ ਸਮਾਪਤ੍ਤਿਯੋ ਅਟ੍ਠ ਸਮਾਧਿਚਰਿਯਾ, ਤਾਸਂ ਉਪਚਾਰਸਮਾਧਿ ਉਪਚਾਰਸਮਾਧਿਭਾਵਨਾਸਾਮਞ੍ਞੇਨ ਏਕਾ ਸਮਾਧਿਚਰਿਯਾਤਿ ਏਵਂ ਨਵਹਿ ਸਮਾਧਿਚਰਿਯਾਹਿ. ਤੇਨਾਹ ‘‘ਪਠਮਜ੍ਝਾਨਂ ਸਮਾਧਿਚਰਿਯਾ’’ਤਿਆਦਿ. ਪਠਮਜ੍ਝਾਨਪਟਿਲਾਭਤ੍ਥਾਯ ਵਿਤਕ੍ਕੋ ਚਾਤਿਆਦਿ ਨਾਨਾਵਜ੍ਜਨੁਪਚਾਰਵਸੇਨ ਵੁਤ੍ਤਨ੍ਤਿ ਦਟ੍ਠਬ੍ਬਂ, ਉਪਰਿਸਮਾਪਤ੍ਤੀਨਮ੍ਪਿ ਉਪਚਾਰਸ੍ਸ ਤਥੇਵ ਵੁਤ੍ਤਤ੍ਤਾ. ਨ ਹਿ ਏਕਾਵਜ੍ਜਨੇ ਚਤੁਤ੍ਥਜ੍ਝਾਨਾਦਿਉਪਚਾਰੇ ਪੀਤਿਆਦਯੋ ਸਮ੍ਭਵਨ੍ਤਿ. ਏਤ੍ਥ ਚ ‘‘ਪਠਮਜ੍ਝਾਨਪਟਿਲਾਭਤ੍ਥਾਯਾ’’ਤਿਆਦਿਵਚਨੇਨ ਉਪਚਾਰਸਮਾਧਿਸ੍ਸਾਪਿ ਪਾਰਿਪੂਰੀ ਇਚ੍ਛਿਤਬ੍ਬਾਤਿ ਦਸ੍ਸੇਤਿ. ਕਿਂ ਪਨੇਤ੍ਥ ਸਮਥਬਲਸਮਾਧਿਚਰਿਯਾਨਂ ਨਾਨਤ੍ਤਂ, ਕਿਂ ਵਾ ਵਿਪਸ੍ਸਨਾਬਲਲੋਕਿਯਞਾਣਚਰਿਯਾਨਂ? ਯਥਾ ਸਮਥਬਲੇਪਿ ‘‘ਨੇਕ੍ਖਮ੍ਮਵਸੇਨਾ’’ਤਿਆਦਿਨਾ ਉਪਚਾਰਸਮਾਧਿਨਾ ਸਦ੍ਧਿਂ ਅਟ੍ਠਸੁ ਸਮਾਪਤ੍ਤੀਸੁ ਅਪ੍ਪਨਾਸਮਾਧਿਯੇਵ ਵੁਤ੍ਤੋ, ਤਥਾ ਸਮਾਧਿਚਰਿਯਾਸੁ, ਵਿਪਸ੍ਸਨਾਬਲਲੋਕਿਯਞਾਣਚਰਿਯਾਸੁ ਚ ਵਿਪਸ੍ਸਨਾਵ ਵੁਤ੍ਤਾਤਿ? ਕਿਞ੍ਚਾਪਿ ਵੁਤ੍ਤਾ, ਵਿਵਟ੍ਟਾਨੁਪਸ੍ਸਨਾ ਪਨ ਪੁਰੇਚਰਞਾਣਾਦਿਵਿਪਸ੍ਸਨਾਬਲੇ ਅਵੁਤ੍ਤਾ ਏਵ ਞਾਣਚਰਿਯਾਸੁ ਵੁਤ੍ਤਾ. ਅਪਿਚ ਪਟਿਪਕ੍ਖੇਹਿ ਅਕਮ੍ਪਿਯਟ੍ਠੋ ਬਲਟ੍ਠੋ, ਪਞ੍ਚਨ੍ਨਂ ਵਸੀਭਾਵਾਨਂ ਵਸੇਨ ਸੁਚਿਣ੍ਣਤਾ ਚਰਿਯਟ੍ਠੋ, ਏਤੇਨੇਵ ਸਮਥਬਲਸਮਾਧਿਚਰਿਯਾਨਮ੍ਪਿ ਨਾਨਤ੍ਤਂ ਸਂਵਣ੍ਣਿਤਨ੍ਤਿ ਦਟ੍ਠਬ੍ਬਂ.

ਵਸੀਭਾਵਤਾ ਪਞ੍ਞਾਤਿ ਏਤ੍ਥ ਵਸੋ ਏਤਸ੍ਸ ਅਤ੍ਥੀਤਿ ਵਸੀ, ਤਸ੍ਸ ਭਾਵੋ ਵਸੀਭਾਵੋ, ਸਾ ਏਵ ਵਸੀਭਾਵਤਾ. ‘‘ਵਸਿਯੋ’’ਤਿ ਪਨ ਪਾਲ਼ਿਯਂ ਇਤ੍ਥਿਲਿਙ੍ਗਵਸੇਨ ਵੁਤ੍ਤਤ੍ਤਾ ਤਾਯੋ ਦਸ੍ਸੇਤੁਂ ‘‘ਵਸੀਤਿ ਪਞ੍ਚ ਵਸਿਯੋ’’ਤਿਆਦਿ ਵੁਤ੍ਤਂ. ਤਤ੍ਥ ਝਾਨਂ ਆਵਜ੍ਜਨ੍ਤਸ੍ਸ ਨਿਰਨ੍ਤਰਂ ਝਾਨਙ੍ਗੇਸੁ ਚਿਤ੍ਤਪ੍ਪਵਤ੍ਤਨਸਮਤ੍ਥਤਾ ਆਵਜ੍ਜਨਵਸੀ. ਸਮਾਪਜ੍ਜਿਤੁਕਾਮਸ੍ਸ ਸੀਘਂ ਝਾਨਂ ਸਮਾਪਜ੍ਜਨਸਮਤ੍ਥਤਾ ਸਮਾਪਜ੍ਜਨਵਸੀ. ਅਚ੍ਛਰਾਮਤ੍ਤਂ ਵਾ ਕਤਿਪਯਚ੍ਛਰਾਮਤ੍ਤਂ ਵਾ ਖਣਂ ਝਾਨਂ ਠਪੇਤੁਂ ਸਮਤ੍ਥਤਾ ਅਧਿਟ੍ਠਾਨਵਸੀ. ਤਥੇਵ ਲਹੁਂ ਵੁਟ੍ਠਾਤੁਂ ਸਮਤ੍ਥਤਾ ਵੁਟ੍ਠਾਨਵਸੀ. ਪਚ੍ਚਵੇਕ੍ਖਣਵਸੀ ਪਨ ਆਵਜ੍ਜਨਵਸਿਯਾ ਏਵ ਸਿਜ੍ਝਤਿ. ਪਚ੍ਚਵੇਕ੍ਖਣਜਵਨਾਨੇਵ ਹਿ ਤਤ੍ਥ ਆਵਜ੍ਜਨਾਨਨ੍ਤਰਾਨੀਤਿ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਹੇਟ੍ਠਾ ਆਗਤੋ ਏਵ. ਅਯਞ੍ਚ ਵਸੀਭਾਵੋ ਸਮਾਧਿਚਰਿਯਾਨਂ ਵਸੇਨ ਵੁਤ੍ਤੋ. ਞਾਣਚਰਿਯਾਸੁ ਪਨ ਲੋਕੁਤ੍ਤਰਾਨਂ ਞਾਣਚਰਿਯਾਨਂ ਵਸੀਭਾਵਾਪਾਦਨਕਿਚ੍ਚਂ ਨਾਮ ਨਤ੍ਥਿ. ਪਟਿਪਕ੍ਖਸ੍ਸ ਸੁਵਿਹਤਤ੍ਤਾ ਸਭਾਵਸਿਦ੍ਧੋ ਤਤ੍ਥ ਵਸੀਭਾਵੋ, ਲੋਕਿਯਾਨਂ ਪਨ ਪਗੁਣਬਲਵਭਾਵਾਪਾਦਨੇਨ ਵਸੀਭਾਵੋ ਲਬ੍ਭਤੇਵ.

੮੭੦. ਉਕ੍ਕਟ੍ਠਨਿਦ੍ਦੇਸੋਤਿ ਅਨਵਸੇਸਨਿਦ੍ਦੇਸੋ. ਚੁਦ੍ਦਸਹਿ ਞਾਣਚਰਿਯਾਹਿ ਹੋਤਿ ਅਗ੍ਗਮਗ੍ਗਫਲਾਨਂ ਅਨਧਿਗਤਤ੍ਤਾਤਿ. ਯਦਿ ਏਵਨ੍ਤਿ ਯਦਿ ਉਕ੍ਕਟ੍ਠਨਿਦ੍ਦੇਸਵਸੇਨ ‘‘ਸੋਲ਼ਸਹਿ ਞਾਣਚਰਿਯਾਹੀ’’ਤਿ ਵੁਤ੍ਤਂ, ਤਤੋ ਅਵਕਂਸਵਸੇਨਪਿ ਇਚ੍ਛਿਤਬ੍ਬਂ, ਏਵਂ ਸਨ੍ਤੇ ਕਿਂ ਨ ਹੋਤਿ ਨਿਰੋਧਸਮਾਪਜ੍ਜਨਨ੍ਤਿ ਅਧਿਪ੍ਪਾਯੋ. ਪਞ੍ਚ ਕਾਮਗੁਣਾ ਵਤ੍ਥੁਭੂਤਾ ਏਤਸ੍ਸ ਸਨ੍ਤੀਤਿ ਪਞ੍ਚਕਾਮਗੁਣਿਕੋ, ਕਾਮਰਾਗੋ. ਅਪ੍ਪਹੀਨਤ੍ਤਾ ਅਸਮੁਚ੍ਛਿਨ੍ਨਤ੍ਤਾ. ਨ ਹਿ ਕਾਮਰਾਗਸ੍ਸ ਵਿਕ੍ਖਮ੍ਭਨਪ੍ਪਹਾਨਮਤ੍ਤਂ ਨਿਰੋਧਸ੍ਸ ਅਧਿਟ੍ਠਾਨਂ ਭਵਿਤੁਂ ਸਕ੍ਕੋਤਿ. ਤਸ੍ਮਾਤਿ ਸਮਾਧਿਪਾਰਿਪਨ੍ਥਿਕਸ੍ਸ ਕਾਮਰਾਗਸ੍ਸ ਸੁਪਹੀਨਤ੍ਤਾ. ਏਤੇਨ ਕਾਮਂ ਮਗ੍ਗਫਲਞਾਣਚਰਿਯਾ ਲੋਕਿਯਞਾਣਸਮਾਧਿਚਰਿਯਾ ਵਿਯ ਨਿਰੋਧਸਮਾਪਜ੍ਜਨੇ ਸਰੂਪੇਨ ਨ ਵਿਨਿਯੁਜ੍ਜਨ੍ਤਿ ਤਦਾ ਅਪ੍ਪਵਤ੍ਤਨਤੋ, ਤਸ੍ਸ ਤਸ੍ਸ ਪਨ ਪਟਿਪਕ੍ਖਸ੍ਸ ਸਮੁਚ੍ਛਿਨ੍ਦਨੇਨ ਬਲਚਰਿਯਾਨਂ ਵਿਸੇਸਪਚ੍ਚਯਤਾਯ ਨਿਰੋਧਸਮਾਪਤ੍ਤਿਯਾ ਅਧਿਟ੍ਠਾਨਂ ਹੋਤੀਤਿ ਦਸ੍ਸੇਤਿ. ਏਸਾਤਿ ਅਨਾਗਾਮੀ. ਇਦਞ੍ਹਿ ‘‘ਨਿਰੋਧਾ ਵੁਟ੍ਠਹਨ੍ਤਸ੍ਸਾ’’ਤਿਆਦਿਵਚਨਂ ਅਨਾਗਾਮਿਨੋਵ ਨਿਰੋਧਾ ਵੁਟ੍ਠਾਨਂ ਸਨ੍ਧਾਯ ਵੁਤ੍ਤਂ ‘‘ਨੇਵਸਞ੍ਞਾਨਾਸਞ੍ਞਾਯਤਨਕੁਸਲ’’ਨ੍ਤਿ (ਪਟ੍ਠਾ. ੧.੧.੪੧੭) ਵਚਨਤੋ, ਅਞ੍ਞਥਾ ‘‘ਨੇਵਸਞ੍ਞਾਨਾਸਞ੍ਞਾਯਤਨਕਿਰਿਯਾ’’ਤਿ (ਪਟ੍ਠਾ. ੧.੧.੪੧੭) ਵੁਚ੍ਚੇਯ੍ਯ.

੮੭੧. ‘‘ਪਞ੍ਚਵੋਕਾਰਭਵੇ’’ਤਿ ਕਸ੍ਮਾ ਵੁਤ੍ਤਂ, ਨਨੁ ਚਤੁਵੋਕਾਰਭਵੇਪਿ ਅਰੂਪਜ੍ਝਾਨਵਸੇਨ ਯਥਾਰਹਂ ਅਨੁਪੁਬ੍ਬਸਮਾਪਤ੍ਤਿ ਲਬ੍ਭਤੀਤਿ? ਕਾਮਂ ਲਬ੍ਭਤਿ, ਸਾ ਪਨ ‘‘ਅਨੁਪੁਬ੍ਬਸਮਾਪਤ੍ਤੀ’’ਤਿ ਨ ਵੁਚ੍ਚਤਿ ਏਕਦੇਸਭਾਵਤੋ. ਅਟ੍ਠਸਮਾਪਤ੍ਤਿਵਸੇਨੇਵ ਚ ‘‘ਅਨੁਪੁਬ੍ਬਸਮਾਪਤ੍ਤੀ’’ਤਿ ਵੁਚ੍ਚਤੀਤਿ ਦਸ੍ਸੇਨ੍ਤੋ ਆਹ ‘‘ਪਠਮਜ੍ਝਾਨਾਦੀਨਂ ਉਪ੍ਪਤ੍ਤਿ ਨਤ੍ਥੀ’’ਤਿ. ਵਤ੍ਥੁਸ੍ਸ ਅਭਾਵਾਤਿ ਹਦਯਵਤ੍ਥੁਨੋ ਅਭਾਵਾਤਿ ਵਦਨ੍ਤਿ, ਕਰਜਕਾਯਸਙ੍ਖਾਤਸ੍ਸ ਪਨ ਵਤ੍ਥੁਨੋ ਅਭਾਵਾਤਿ ਅਤ੍ਥੋ. ਯਦਿ ਹਿ ਆਰੁਪ੍ਪੇ ਨਿਰੋਧਂ ਸਮਾਪਜ੍ਜੇਯ੍ਯ, ਚਿਤ੍ਤਚੇਤਸਿਕਾਨਂ, ਅਞ੍ਞਸ੍ਸ ਚ ਕਸ੍ਸਚਿ ਅਭਾਵਤੋ ਅਪਞ੍ਞਤ੍ਤਿਕੋਵ ਭਵੇਯ੍ਯ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬੁਤਸਦਿਸੋ. ਕਿਞ੍ਚਾਯਂ ਉਪਾਦਾਯ ਨਿਰੋਧਂ ਸਮਾਪਨ੍ਨੋਤਿ ਵੁਚ੍ਚੇਯ੍ਯ, ਕਿਂ ਵਾ ਏਤਾਯ ਵਤ੍ਥੁਚਿਨ੍ਤਾਯ. ਅਙ੍ਗਵੇਕਲ੍ਲਤੋਵ ਨਤ੍ਥਿ ਆਰੁਪ੍ਪੇ ਨਿਰੋਧਸਮਾਪਤ੍ਤਿਸਮਾਪਜ੍ਜਨਂ.

੮੭੨. ਸਙ੍ਖਾਰਾਨਂ ਪਵਤ੍ਤਿਭੇਦੇਤਿ ਸਙ੍ਖਤਧਮ੍ਮਾਨਂ ਖਣੇ ਖਣੇ ਉਪ੍ਪਜ੍ਜਨੇ, ਭਿਜ੍ਜਨੇ ਚ, ਤੇਸਂ ਵਾ ਕੁਸਲਾਦਿਭੇਦਭਿਨ੍ਨੇ ਯਥਾਰਹਂ ਤੀਹਿ ਦੁਕ੍ਖਤਾਹਿ ਉਪਦ੍ਦੁਤੇ ਪਵਤ੍ਤਿਵਿਭਾਗੇ. ਚਿਤ੍ਤਚੇਤਸਿਕਵਿਗਮੇਹਿ ਰੂਪਧਮ੍ਮੇਸੁ ਲਬ੍ਭਮਾਨਾਪਿ ਸਙ੍ਖਾਰਦੁਕ੍ਖਤਾ ਅਬ੍ਬੋਹਾਰਿਕਤਂ ਆਪਜ੍ਜਤਿ. ਉਕ੍ਕਣ੍ਠਿਤ੍ਵਾਤਿ ਨਿਬ੍ਬਿਨ੍ਦਿਤ੍ਵਾ. ਨਿਬ੍ਬਾਨਂ ਪਤ੍ਵਾਤਿ ਅਨੁਪਾਦਿਸੇਸਨਿਬ੍ਬਾਨਂ ਪਤ੍ਵਾ ਵਿਯ. ਸੁਖਨ੍ਤਿ ਨਿਦ੍ਦੁਕ੍ਖਂ.

੮੭੩. ਸਮਥਵਿਪਸ੍ਸਨਾਵਸੇਨਾਤਿ ਯੁਗਨਦ੍ਧਾਨਂ ਵਿਯ ਅਞ੍ਞਮਞ੍ਞੂਪਕਾਰਿਤਾਯ ਸਹਿਤਾਨਂ ਵਸੇਨ. ਉਸ੍ਸਕ੍ਕਿਤ੍ਵਾਤਿ ਉਕ੍ਕਂਸਂ ਪਤ੍ਵਾ ਯਾਵ ਨੇਵਸਞ੍ਞਾਨਾਸਞ੍ਞਾਯਤਨਾ, ਯਾਵ ਚ ਅਨੁਲੋਮਞਾਣਾ ਆਰੁਹਿਤ੍ਵਾ. ਨਿਰੋਧਯਤੋਤਿ ਨੇਵਸਞ੍ਞਾਨਾਸਞ੍ਞਾਯਤਨਂ ਸਮਾਪਜ੍ਜਿਤ੍ਵਾ ਤਂ ਨਿਰੋਧੇਨ੍ਤਸ੍ਸ. ਅਞ੍ਞਸ੍ਸ ਕਸ੍ਸਚਿਪਿ ਚਿਤ੍ਤਸ੍ਸ ਅਨੁਪ੍ਪਜ੍ਜਨੇਨ ਏਵਮਸ੍ਸਾ ਨਿਰੋਧਸਮਾਪਤ੍ਤਿਯਾ ਸਮਾਪਜ੍ਜਨਂ ਹੋਤਿ. ‘‘ਯੋ ਹੀ’’ਤਿਆਦਿਨਾ ‘‘ਸਮਥਵਿਪਸ੍ਸਨਾਵਸੇਨਾ’’ਤਿ ਵੁਤ੍ਤਮੇਵਤ੍ਥਂ ਬ੍ਯਤਿਰੇਕਮੁਖੇਨ ਵਿਵਰਤਿ. ਨੇਵਸਞ੍ਞਾਨਾਸਞ੍ਞਾਯਤਨਸਮਾਪਤ੍ਤਿਂ ਪਤ੍ਵਾ ਤਿਟ੍ਠਤਿ ਤਦੁਦ੍ਧਂ ਸੁਦ੍ਧਸਮਥਵਿਪਸ੍ਸਨਾਯ ਅਭਾਵਤੋ. ਯੋ ਵਿਪਸ੍ਸਨਾਵਸੇਨੇਵ ਉਸ੍ਸਕ੍ਕਤਿ ਸਚੇ ਅਰਿਯੋ ਫਲਸਮਾਪਤ੍ਤਤ੍ਥਿਕੋ, ਸੋ ਅਤ੍ਤਨੋ ਫਲਸਮਾਪਤ੍ਤਿਂ ਪਤ੍ਵਾ ਤਿਟ੍ਠਤਿ. ਅਥ ਪੁਥੁਜ੍ਜਨੋ, ਸੇਖੋ ਵਾ ਮਗ੍ਗਤ੍ਥਿਕੋ ਤਾਯ ਚੇ ਵਿਪਸ੍ਸਨਾਯ ਮਗ੍ਗਂ ਪਤ੍ਵਾ ਫਲੇ ਠਿਤੋ, ਸੋਪਿ ਫਲਸਮਾਪਤ੍ਤਿਂ ਪਤ੍ਵਾ ਤਿਟ੍ਠਤਿਚ੍ਚੇਵ ਵੁਚ੍ਚਤਿ. ਸੋਤਿ ਉਭਯਵਸੇਨ ਪਟਿਪਨ੍ਨੋ. ਤਨ੍ਤਿ ਨਿਰੋਧਸਮਾਪਤ੍ਤਿਂ.

੮੭੪. ਯੇਨ ਫਲਦ੍ਵਯਸਮਨ੍ਨਾਗਮਾਦਿਨਾ ਨਿਰੋਧਂ ਸਮਾਪਜ੍ਜਿਤੁਂ ਸਮਤ੍ਥੋ ਹੋਤਿ, ਸੋ ਵਿਧਿ ਪਗੇਵ ਵਿਭਾਵਿਤੋਤਿ ਸਮਾਪਜ੍ਜਨਾਕਾਰਮੇਵ ਦਸ੍ਸੇਨ੍ਤੋ ‘‘ਕਤਭਤ੍ਤਕਿਚ੍ਚੋ’’ਤਿਆਦਿਮਾਹ. ਤਞ੍ਹਿ ਸਬ੍ਬਾਸਮ੍ਪਿ ਭਾਵਨਾਨਂ ਸਾਧਾਰਣਂ ਪੁਬ੍ਬਕਿਚ੍ਚਂ. ਤਤ੍ਥ ਸਙ੍ਖਾਰੇਤਿ ਤਸ੍ਮਿਂ ਪਠਮਜ੍ਝਾਨੇ, ਪਠਮਜ੍ਝਾਨਚਿਤ੍ਤੁਪ੍ਪਾਦੇ ਵਾ ਸਙ੍ਖਾਰੇ.

‘‘ਵਿਪਸ੍ਸਤੀ’’ਤਿ ਵੁਤ੍ਤਂ, ਕੀਦਿਸੀ ਪਨੇਤ੍ਥ ਵਿਪਸ੍ਸਨਾ ਇਚ੍ਛਿਤਬ੍ਬਾਤਿ ਤਂ ਨਿਦ੍ਧਾਰਣਤ੍ਥਂ ‘‘ਵਿਪਸ੍ਸਨਾ ਪਨੇਸਾ’’ਤਿਆਦਿਨਾ ਤਮੇਵ ਵਿਪਸ੍ਸਨਂ ਤਿਧਾ ਭਿਨ੍ਦਿਤ੍ਵਾ ਦਸ੍ਸੇਤਿ. ਮਨ੍ਦਾ ਚੇ ਵਿਪਸ੍ਸਨਾ, ਦਨ੍ਧਾਭਿਞ੍ਞਂ ਮਗ੍ਗਂ ਸਾਧੇਤਿ. ਤਿਕ੍ਖਾ ਚੇ, ਖਿਪ੍ਪਾਭਿਞ੍ਞਨ੍ਤਿ ਅਯਂ ਮਨ੍ਦਤਿਕ੍ਖਤਾਯ ਵਿਸੇਸੋ. ਲਕ੍ਖਣਪ੍ਪਤ੍ਤਾ ਪਨ ਵਿਪਸ੍ਸਨਾ ਮਗ੍ਗਸ੍ਸ ਪਚ੍ਚਯੋ ਹੋਤਿਯੇਵਾਤਿ ਇਮਮਤ੍ਥਂ ਦਸ੍ਸੇਨ੍ਤੋ ਆਹ ‘‘ਸਙ੍ਖਾਰ…ਪੇ… ਹੋਤਿਯੇਵਾ’’ਤਿ. ਤਿਕ੍ਖਾਵ ਵਟ੍ਟਤਿ ਸਙ੍ਖਾਰਾਰਮ੍ਮਣੇਪਿ ਸਤਿ ਸਬ੍ਬਸਙ੍ਖਾਰੇਹਿ ਵਿਵਟ੍ਟਨਾਕਾਰੇਨੇਵ ਪਵਤ੍ਤਨਤੋ, ਮਗ੍ਗੋ ਵਿਯ ਵਿਸਙ੍ਖਾਰਗਤਸ੍ਸ ਫਲਸ੍ਸ ਪਚ੍ਚਯਭਾਵਤੋ ਚ. ਤੇਨਾਹ ‘‘ਮਗ੍ਗਭਾਵਨਾਸਦਿਸਾ’’ਤਿ. ਯਸ੍ਮਾ ਅਤਿਮਨ੍ਦਾ ਸਮਥਾਦਿਕਾ ਸਙ੍ਖਾਰਾਨਂ ਨਿਰੋਧਨੇ ਅਸਮਤ੍ਥਾ ਸਮਥਨਿਟ੍ਠਾ ਹੋਤਿ, ਅਤਿਤਿਕ੍ਖਾ ਞਾਣਾਦਿਕਾ ਸਾਤਿਸਯਂ ਸਙ੍ਖਾਰੇਸੁ ਦੋਸਦਸ੍ਸਨੇ ਫਲਸਮਾਪਤ੍ਤਿਨਿਟ੍ਠਾ ਹੋਤਿ, ਤਸ੍ਮਾ ਵੁਤ੍ਤਂ ‘‘ਨਾਤਿਮਨ੍ਦਨਾਤਿਤਿਕ੍ਖਾ ਵਟ੍ਟਤੀ’’ਤਿ. ਏਸ ਨਿਰੋਧਸਮਾਪਜ੍ਜਨਕੋ. ਤੇ ਸਙ੍ਖਾਰੇਤਿ ਤੇ ਪਠਮਜ੍ਝਾਨਸਙ੍ਖਾਰੇ.

‘‘ਤਥੇਵਾ’’ਤਿ ਇਮਿਨਾ ‘‘ਨਾਤਿਮਨ੍ਦਾਯ ਨਾਤਿਤਿਕ੍ਖਾਯਾ’’ਤਿ ਇਮਮਤ੍ਥਂ ਆਕਡ੍ਢਤਿ. ਏਸ ਨਯੋ ਸੇਸੇਸੁਪਿ. ‘‘ਆਕਿਞ੍ਚਞ੍ਞਾਯਤਨਂ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ਤਤ੍ਥ ਸਙ੍ਖਾਰੇ ਤਥੇਵ ਵਿਪਸ੍ਸਤੀ’’ਤਿ ਵਤ੍ਤਬ੍ਬਂ, ਹੇਟ੍ਠਾ ਵੁਤ੍ਤਨਯਤ੍ਤਾ ਪਨ ਤਂ ਅਵਤ੍ਵਾ ‘‘ਚਤੁਬ੍ਬਿਧਂ ਪੁਬ੍ਬਕਿਚ੍ਚਂ ਕਰੋਤਿ’’ਚ੍ਚੇਵ ਵੁਤ੍ਤਨ੍ਤਿ ਕੇਚਿ, ਤਂ ਤੇਸਂ ਮਤਿਮਤ੍ਤਂ. ਵਿਪਸ੍ਸਨਾਚਾਰਤੋ ਹਿ ਸਮਾਧਿਚਾਰੋ, ਤਸ੍ਮਾ ਸਮਾਪਤ੍ਤਿਤੋ ਵੁਟ੍ਠਾਯ ਪੁਬ੍ਬਕਿਚ੍ਚਂ ਕਾਤਬ੍ਬਂ. ਤਥਾ ਹਿ ਪਰਤੋਪਿ ‘‘ਆਕਿਞ੍ਚਞ੍ਞਾਯਤਨਂ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ਇਮਂ ਪੁਬ੍ਬਕਿਚ੍ਚਂ ਕਤ੍ਵਾ’’ਤਿਆਦਿਂ (ਵਿਸੁਦ੍ਧਿ. ੨.੮੭੯) ਵਕ੍ਖਤਿ, ਨ ਪਨ ‘‘ਤਤ੍ਥ ਸਙ੍ਖਾਰੇ ਤਥੇਵ ਵਿਪਸ੍ਸਿਤ੍ਵਾ’’ਤਿ. ਨਾਨਾਬਦ੍ਧਅਵਿਕੋਪਨਨ੍ਤਿ ਅਤ੍ਤਨਾ ਅਸਮ੍ਬਦ੍ਧਸ੍ਸ ਪਰਿਕ੍ਖਾਰਸ੍ਸ ਅਵਿਨਾਸਨਂ. ਯਥਾ ਤਂ ਨ ਵਿਨਸ੍ਸਤਿ, ਤਥਾ ਅਧਿਟ੍ਠਾਨਂ. ਸਙ੍ਘਪਟਿਮਾਨਨਨ੍ਤਿ ਸਙ੍ਘਸ੍ਸ ਪਟਿਮਾਨਨਾਵਜ੍ਜਨਂ. ਸਤ੍ਥੁਪਕ੍ਕੋਸਨਨ੍ਤਿ ਸਤ੍ਥੁ ਪਕ੍ਕੋਸਨਾਵਜ੍ਜਨਂ. ਅਦ੍ਧਾਨਪਰਿਚ੍ਛੇਦਨ੍ਤਿ ਜੀਵਿਤਦ੍ਧਾਨਪਰਿਚ੍ਛੇਦਂ ਪੁਬ੍ਬਕਿਚ੍ਚਂ ਕਰੋਤੀਤਿ ਸਮ੍ਬਨ੍ਧੋ.

੮੭੫. ਅਧਿਟ੍ਠਾਤਬ੍ਬਨ੍ਤਿ ਚਿਤ੍ਤਂ ਉਪ੍ਪਾਦੇਤਬ੍ਬਂ. ਤਥਾ ਚਿਤ੍ਤੁਪ੍ਪਾਦਨਮੇਵ ਹੇਤ੍ਥ ਅਧਿਟ੍ਠਾਨਂ.

ਚਿਤ੍ਤਜਰੂਪਾਦੀਨਂ ਅਨੁਪ੍ਪਜ੍ਜਨਤੋ, ਪਚ੍ਛਾਜਾਤਪਚ੍ਚਯਾਦਿਉਪਤ੍ਥਮ੍ਭਾਭਾਵਤੋ ਚ ਸਤ੍ਤਾਹਮੇਵ ਤਥਾ ਸਰੀਰਂ ਪਵਤ੍ਤਤਿ, ਤਤੋ ਪਰਂ ਕਿਲਮਤੀਤਿ ਸਤ੍ਤਾਹਮੇਵ ਪਰਿਚ੍ਛਿਨ੍ਦਿਤ੍ਵਾ ਨਿਰੋਧਂ ਸਮਾਪਜ੍ਜਨ੍ਤੀਤਿ ਵਦਨ੍ਤਿ.

ਸਮਾਪਤ੍ਤਿਵਸੇਨੇਵਾਤਿ ਨਿਰੋਧਸਮਾਪਤ੍ਤਿਵਸੇਨੇਵ. ਨਂ ਅਗ੍ਗਿਆਦਿਅਨ੍ਤਰਾਯਂ ਰਕ੍ਖਤਿ ਸਮਾਪਨ੍ਨਕੋ ਅਧਿਟ੍ਠਾਨਵਸੇਨਾਤਿ ਅਧਿਪ੍ਪਾਯੋ. ਆਯਸ੍ਮਤੋ ਸਞ੍ਜੀਵਸ੍ਸਾਤਿਆਦੀਸੁ ਯਂ ਵਤ੍ਤਬ੍ਬਂ, ਤਂ ਹੇਟ੍ਠਾ ਇਦ੍ਧਿਕਥਾਯਂ (ਵਿਸੁਦ੍ਧਿ. ੨.੩੭੪) ਵੁਤ੍ਤਮੇਵ.

੮੭੬. ਏਤਸ੍ਸਾਤਿ ਨਿਰੋਧਂ ਸਮਾਪਜ੍ਜਨ੍ਤਸ੍ਸ, ਨਿਰੋਧਸਮਾਪਜ੍ਜਨਸ੍ਸ ਵਾ. ਤਸ੍ਮਿਂ ਸਮਯੇਤਿ ਤਸ੍ਮਿਂ ਤਸ੍ਸ ਭਿਕ੍ਖੁਨੋ ਉਪਸਙ੍ਕਮਨਸਮਯੇ ਵੁਟ੍ਠਾਤਿਯੇਵ. ਕਾਲਪਰਿਚ੍ਛੇਦਸਦਿਸਞ੍ਹੇਤਂ.

ਏਵਂ ਗਰੁਕਾਤਿ ਅਗ੍ਗਿਆਦੀਹਿਪਿ ਅਨਭਿਭਵਨੀਯਂ ਨਿਰੋਧਂ ਸਮਾਪਨ੍ਨਂ ਸਮਾਪਤ੍ਤਿਤੋ ਵੁਟ੍ਠਾਪਨਤੋ ਏਵਂ ਗਰੁਕਾ ਹਿ ਸਙ੍ਘਸ੍ਸ ਆਣਾ ਨਾਮ, ਤਸ੍ਮਾ ਅਤ੍ਤਨੋ ਹਿਤਸੁਖਂ ਆਕਙ੍ਖਨ੍ਤੇਨ ਜੀਵਿਤਹੇਤੁਪਿ ਸਙ੍ਘਸ੍ਸ ਆਣਾ ਨ ਅਤਿਕ੍ਕਮਿਤਬ੍ਬਾਤਿ ਅਧਿਪ੍ਪਾਯੋ.

੮੭੭. ਨ ਪਕ੍ਕੋਸਤਿ ‘‘ਸਤ੍ਥਾ ਤਂ, ਆਵੁਸੋ, ਆਮਨ੍ਤੇਤੀ’’ਤਿ. ‘‘ਵੁਟ੍ਠਹਿਸ੍ਸਾਮੀ’’ਤਿ ਆਵਜ੍ਜਿਤਬ੍ਬਨ੍ਤਿ ਸਮ੍ਬਨ੍ਧੋ.

੮੭੮. ਜੀਵਿਤਦ੍ਧਾਨਸ੍ਸਾਤਿ ਅਤ੍ਤਨੋ ਜੀਵਿਤਕਾਲਸ੍ਸ ਜੀਵਿਤਪ੍ਪਵਤ੍ਤਿਯਾ. ਆਯੁ ਏਵ ਆਯੁਸਙ੍ਖਾਰਾ. ‘‘ਆਯੁਉਸ੍ਮਾਵਿਞ੍ਞਾਣਾਨੀ’’ਤਿ ਚ ਵਦਨ੍ਤਿ, ਤੇ ਚਸ੍ਸ ਪਕਤਿਚਿਤ੍ਤਸ੍ਸੇਵ ਆਰਮ੍ਮਣਂ ਹੋਨ੍ਤਿ. ਅਨ੍ਤੋਨਿਰੋਧੇ ਮਰਣਂ ਨਤ੍ਥਿ ਚਰਿਮਭਵਙ੍ਗੇਨ ਮੀਯਨਤੋ. ਆਵਜ੍ਜਿਤ੍ਵਾਵ ਸਮਾਪਜ੍ਜਿਤਬ੍ਬਂ ‘‘ਸਹਸਾ ਮਰਣਂ ਮਾ ਅਹੋਸੀ’’ਤਿ. ਸਹਸਾ ਹਿ ਮਰਣੇ ਅਞ੍ਞਬ੍ਯਾਕਰਣਭਿਕ੍ਖੁਓਵਾਦਦਾਨਸਾਸਨਾਨੁਭਾਵਦੀਪਨਾਨਂ ਅਨਿਸ੍ਸਰੋ ਸਿਯਾ, ਅਨਾਗਾਮਿਨੋ ਵਾ ਅਗ੍ਗਮਗ੍ਗਾਨਧਿਗਮੋ ਸਿਯਾ. ਅਵਸੇਸਨ੍ਤਿ ਨਾਨਾਬਦ੍ਧਅਵਿਕੋਪਨਾਦਿਤਿਵਿਧਮ੍ਪਿ ਪੁਬ੍ਬਕਿਚ੍ਚਂ. ਵੁਤ੍ਤਂ ਅਟ੍ਠਕਥਾਯਂ.

੮੭੯. ਕਿਞ੍ਚਾਪਿ ‘‘ਏਕਂ ਵਾ ਦ੍ਵੇ ਵਾ’’ਤਿ ਅਨਿਯਮੇਤ੍ਵਾ ਵਿਯ ਵੁਤ੍ਤਂ, ਦ੍ਵੇ ਵਾਰੇ ਏਵ ਪਨ ਨਿਯਮਤੋ ਵਦਨ੍ਤਿ. ਚਿਤ੍ਤਵਾਰੇਤਿ ਨੇਵਸਞ੍ਞਾਨਾਸਞ੍ਞਾਯਤਨਚਿਤ੍ਤਵਾਰੇ. ਨਿਰੋਧਂ ਫੁਸਤੀਤਿ ਅਚਿਤ੍ਤਕਭਾਵਮੇਵਾਹ. ਨਿਰੋਧਸ੍ਸ ਪਯੋਗਤ੍ਤਾਤਿ ਚਿਤ੍ਤਨਿਰੋਧਾਯ ਪਯੋਗਭਾਵਤੋ, ਬਲਦ੍ਵਯਸਮ੍ਭਰਣਾਦਿਪਯੋਗਸ੍ਸ ਚਿਤ੍ਤਨਿਰੋਧਤ੍ਤਾਤਿ ਅਤ੍ਥੋ. ਸਮਥਵਿਪਸ੍ਸਨਾਬਲਸਮਨ੍ਨਾਗਮੋ, ਞਾਣਸਮਾਧਿਚਰਿਯਾਵਸੀਭਾਵੋ ਚੇਤ੍ਥ ਅਞ੍ਞਮਞ੍ਞਾਨਤਿਵਤ੍ਤਨਵਸੇਨੇਵ ਇਚ੍ਛਿਤਬ੍ਬੋਤਿ ਆਹ ‘‘ਦ੍ਵੇ ਸਮਥਵਿਪਸ੍ਸਨਾਧਮ੍ਮੇ ਯੁਗਨਦ੍ਧੇ ਕਤ੍ਵਾ’’ਤਿ. ਅਨੁਪੁਬ੍ਬਨਿਰੋਧਸ੍ਸ ਪਯੋਗੋਤਿ ਪਠਮਜ੍ਝਾਨਾਦੀਨਂ, ਤਦਨੁਪਸ੍ਸਨਾਨਞ੍ਚ ਅਨੁਪੁਬ੍ਬਤੋ ਨਿਰੋਧਨਸ੍ਸਾਯਂ ਪਯੋਗੋ. ਇਦਂ ਵੁਤ੍ਤਨਯੇਨ ਅਟ੍ਠਸਮਾਪਤ੍ਤਿਆਰੋਹਨਂ ਨ ਨੇਵਸਞ੍ਞਾਨਾਸਞ੍ਞਾਯਤਨਸਮਾਪਤ੍ਤਿਯਾ ਸਮਾਪਜ੍ਜਨਸ੍ਸ. ਤਸ੍ਮਾ ਦ੍ਵਿਨ੍ਨਂ ਚਿਤ੍ਤਾਨਂ ਉਪਰਿ ਚਿਤ੍ਤਾਨਿ ਨ ਪਵਤ੍ਤਨ੍ਤੀਤਿ ਯੋਜਨਾ.

ਪਰਤੋ ਅਚਿਤ੍ਤਕੋ ਭਵਿਤੁਂ ਨ ਸਕ੍ਕੋਤੀਤਿ ਸਕਲਂ ਯਥਾਪਰਿਚ੍ਛਿਨ੍ਨਕਾਲਂ ਅਚਿਤ੍ਤਕੋ ਭਵਿਤੁਂ ਨ ਸਕ੍ਕੋਤਿ. ਤਞ੍ਚ ਖੋ ਸਙ੍ਘਪਟਿਮਾਨਨਸਤ੍ਥੁਪਕ੍ਕੋਸਨਅਦ੍ਧਾਨਪਰਿਚ੍ਛੇਦਾਵਜ੍ਜਨਾਨਂ ਅਕਰਣੇਨ, ਨ ਨਾਨਾਬਦ੍ਧਅਵਿਕੋਪਨਸ੍ਸ. ਤਸ੍ਸ ਹਿ ਅਕਰਣੇਨ ਕਦਾਚਿ ਕੇਵਲਂ ਤਾਦਿਸਸ੍ਸ ਪਰਿਕ੍ਖਾਰਸ੍ਸ ਅਵਿਨਾਸੋ ਨ ਸਿਯਾ, ਨ ਨਿਰੋਧਸਮਾਪਤ੍ਤਿਵਿਬਨ੍ਧੋ. ਅਯਞ੍ਚ ਅਤ੍ਥੋ ਮਹਾਨਾਗਤ੍ਥੇਰਵਤ੍ਥੁਨਾ ਵਿਭਾਵਿਤੋ ਏਵ. ਏਵਂ ਸਨ੍ਤੇ ਤੀਹਿ ਆਕਾਰੇਹਿ ਨਿਰੋਧਸਮਾਪਤ੍ਤਿਯਾ ਵੁਟ੍ਠਾਨਂ ਹੋਤੀਤਿ ਆਪਜ੍ਜਤਿ, ਤਸ੍ਮਾ ਤਂ ਨ ਸਾਰਤੋ ਪਚ੍ਚੇਤਬ੍ਬਂ. ਪਟਿਨਿਵਤ੍ਤਿਤ੍ਵਾ ਪੁਨ ਆਕਿਞ੍ਚਞ੍ਞਾਯਤਨੇਯੇਵ ਪਤਿਟ੍ਠਾਤੀਤਿ ਇਮਿਨਾ ਸਮਾਪਤ੍ਤਿਯਾ ਵਿਬਨ੍ਧੇ ਜਾਤੇ ਏਵਂ ਹੋਤੀਤਿ ਦਸ੍ਸੇਤਿ, ਅਵਿਬਨ੍ਧੇਨੇਵ ਪਨ ਯਥਾਪਰਿਚ੍ਛਿਨ੍ਨਕਾਲਵੀਤਿਕ੍ਕਮਨੇ ਫਲਚਿਤ੍ਤੁਪ੍ਪਤ੍ਤਿਯਾ ਵੁਟ੍ਠਾਨਂ ਹੋਤਿ. ਏਵਞ੍ਚ ਕਤ੍ਵਾ ਗਮ੍ਭੀਰਕਨ੍ਦਰੋਰੁਲ਼੍ਹਤਤ੍ਤਪਾਸਾਣਕ੍ਕਨ੍ਤਪੁਰਿਸਨਿਦਸ੍ਸਨਮ੍ਪਿ ਸਮਤ੍ਥਿਤਂ ਹੋਤੀਤਿ ਕੇਚਿ ਵਦਨ੍ਤਿ. ਅਪਰੇ ਪਨ ‘‘ਪੁਬ੍ਬਕਿਚ੍ਚਸ੍ਸ ਅਕਤਤ੍ਤਾ ਨੇਵਸਞ੍ਞਾਨਾਸਞ੍ਞਾਯਤਨਂ ਸਮਾਪਨ੍ਨਮਤ੍ਤੋਵ ‘ਪਟਿਨਿਵਤ੍ਤਿਤ੍ਵਾ ਆਕਿਞ੍ਚਞ੍ਞਾਯਤਨੇ ਪਤਿਟ੍ਠਾਤੀ’ਤਿ ਵੁਤ੍ਤਤ੍ਤਾ ਸਙ੍ਘਪਟਿਮਾਨਨਾਦਿਏਕਚ੍ਚਪੁਬ੍ਬਕਿਚ੍ਚਾਕਰਣੇ ਅਙ੍ਗਵੇਕਲ੍ਲਤੋ ਨਿਰੋਧਸਮਾਪਤ੍ਤਿਸਮਾਪਜ੍ਜਨਂ ਨ ਇਜ੍ਝਤੇਵਾ’’ਤਿ ਵਦਨ੍ਤਿ. ਵਤ੍ਤਸਦਿਸਞ੍ਹੇਤਂ ਨਿਰੋਧਸਮਾਪਤ੍ਤਿਯਾ, ਯਦਿਦਂ ਪੁਬ੍ਬਕਿਚ੍ਚਕਰਣਂ. ਤਸ੍ਮਾ ਤਤ੍ਥ ਯਂ ਗਰੁਤਰਂ, ਤਸ੍ਸ ਅਕਰਣਂ ਸਮਾਪਜ੍ਜਨਂ ਵਿਬਨ੍ਧਤੀਤਿ ਅਪਰੇ. ਵੀਮਂਸਿਤ੍ਵਾ ਗਹੇਤਬ੍ਬਂ. ‘‘ਆਕਿਞ੍ਚਞ੍ਞਾਯਤਨੇ ਪਤਿਟ੍ਠਾਤੀ’’ਤਿ ਚ ਇਦਂ ਪੁਨ ਆਕਿਞ੍ਚਞ੍ਞਾਯਤਨਸ੍ਸ ਸਮਾਪਜ੍ਜਿਤਬ੍ਬਤ੍ਤਾ ਵੁਤ੍ਤਂ. ਸਮਾਪਜ੍ਜਿਤ੍ਵਾ ਹਿ ਵੁਟ੍ਠਾਯ ਪੁਬ੍ਬਕਿਚ੍ਚਸ੍ਸ ਕਾਤਬ੍ਬਤ੍ਤਾ.

ਯਥਾ ਪਨਾਤਿਆਦਿ ਕਤਪੁਬ੍ਬਕਿਚ੍ਚਤਾਸਾਮਞ੍ਞੇਨ ਉਪਮਾਸਂਸਨ੍ਦਨਂ.

੮੮੦. ਅਸ੍ਸਾਤਿ ਨਿਰੋਧਸਮਾਪਤ੍ਤਿਯਾ. ‘‘ਕਾਲਪਰਿਚ੍ਛੇਦਵਸੇਨਾ’’ਤਿਆਦਿਨਾ ਚਤੂਹਿ ਆਕਾਰੇਹਿ ਨਿਰੋਧਸਮਾਪਤ੍ਤਿਯਾ ਠਾਨਂ ਦਸ੍ਸੇਤਿ.

੮੮੨. ਵਿਵੇਕਨਿਨ੍ਨਨ੍ਤਿ ਨਿਸ੍ਸਰਣਵਿਵੇਕਨਿਨ੍ਨਂ, ਪਗੇਵ ਸਙ੍ਖਾਰਵਿਮੁਖਤਾਯ, ਫਲਚਿਤ੍ਤੁਪ੍ਪਤ੍ਤਿਯਾ ਚਾਤਿ ਵੇਦਿਤਬ੍ਬਂ.

੮੮੩. ਊਸਙ੍ਖਾਰਤ੍ਤਯਪਟਿਪ੍ਪਸ੍ਸਦ੍ਧਿਯਾ, ਅਵਸੇਸਚੇਤਸਿਕਵਿਞ੍ਞਾਣਾਭਾਵੇਨ ਰੂਪਧਮ੍ਮਮਤ੍ਤਾਵਸੇਸਤਾਯ ਚ ਮਤਨਿਰੋਧਸਮਾਪਨ੍ਨਾਨਂ ਅਵਿਸੇਸਂ ਗਹੇਤ੍ਵਾ ਪੁਚ੍ਛਾ ‘‘ਮਤਸ੍ਸ ਚ ਸਮਾਪਨ੍ਨਸ੍ਸ ਚ ਕੋ ਵਿਸੇਸੋ’’ਤਿ. ਕਾਮਂ ਨੇਸਂ ਸਙ੍ਖਾਰਤ੍ਤਯਪਟਿਪ੍ਪਸ੍ਸਦ੍ਧਿਆਦੀਹਿ ਅਵਿਸੇਸੋ, ਰੂਪਧਮ੍ਮਮਤ੍ਤਾਵਸੇਸਤਾਯ ਪਨ ਆਯੁਉਸ੍ਮਾਇਨ੍ਦ੍ਰਿਯਾਨਂ ਅਪਗਮਾਨਪਗਮਨਂ ਵਿਸੇਸੋਤਿ ਦਸ੍ਸੇਤੁਂ ‘‘ਯ੍ਵਾਯ’’ਨ੍ਤਿਆਦਿ ਵੁਤ੍ਤਂ.

੮੮੪. ਸਭਾਵਤੋਤਿ ਸਭਾਵਧਮ੍ਮਤੋ, ਪਰਮਤ੍ਥਤੋਤਿ ਅਤ੍ਥੋ. ਪਰਮਤ੍ਥਤੋ ਹਿ ਵਿਜ੍ਜਮਾਨਾਨਂ ਸਙ੍ਖਤਾਦਿਭਾਵੇਨ ਵਤ੍ਤਬ੍ਬਤਂ ਲਭਤਿ, ਨ ਅਵਿਜ੍ਜਮਾਨਂ. ਸਮਾਪਜ੍ਜਨ੍ਤਸ੍ਸ ਵਸੇਨਾਤਿ ਯਸ੍ਮਾ ਸਮਾਪਜ੍ਜਨ੍ਤਸ੍ਸ ਅਰਿਯਪੁਗ੍ਗਲਸ੍ਸ ਸਮਥਵਿਪਸ੍ਸਨਾਧਮ੍ਮੇ ਯੁਗਨਦ੍ਧੇ ਕਤ੍ਵਾ ਅਟ੍ਠ ਸਮਾਪਤ੍ਤਿਯੋ ਆਰੋਹਨ੍ਤਸ੍ਸ ਅਨੁਕ੍ਕਮੇਨ ਸਙ੍ਖਾਰਾਨਂ ਪਟਿਪ੍ਪਸ੍ਸਮ੍ਭਨਪਯੋਗਨਿਬ੍ਬਤ੍ਤਿਯਾ ਨਿਰੋਧਸਮਾਪਤ੍ਤਿ ਨਿਪ੍ਫਨ੍ਨਾ ਨਾਮ ਹੋਤਿ, ਤਸ੍ਮਾ ਤਂ ਪਯੋਗਨਿਬ੍ਬਤ੍ਤਿਂ ਉਪਾਦਾਯ ‘‘ਨਿਪ੍ਫਨ੍ਨਾ’’ਤਿ ਵਤ੍ਤੁਂ ਵਟ੍ਟਤਿ.

ਸਙ੍ਖਾਰਵੂਪਸਮਤੋ, ਸਨ੍ਤਧਮ੍ਮਸਮਨ੍ਵਯਤੋ ਚ ਸਨ੍ਤਂ. ਅਰਿਯੇਹਿ ਏਵ ਨਿਸੇਵਿਤਬ੍ਬਤ੍ਤਾ ਅਰਿਯਨਿਸੇਵਿਤਂ. ਤਿਸ੍ਸਨ੍ਨਮ੍ਪਿ ਦੁਕ੍ਖਤਾਨਂ ਨਿਬ੍ਬੁਤਭਾਵਤੋ ਨਿਬ੍ਬਾਨਮਿਤਿ ਸਙ੍ਖਂ ਉਪਾਗਤਂ. ਅਰਿਯਂ ਪਞ੍ਞਨ੍ਤਿ ਸੁਵਿਸੁਦ੍ਧਂ ਮਗ੍ਗਫਲਪਞ੍ਞਂ. ਇਮਿਸ੍ਸਾਪੀਤਿ ਨਿਰੋਧਸਮਾਪਤ੍ਤਿਯਾ. ਸਮਾਪਤ੍ਤਿਸਮਤ੍ਥਤਾਤਿ ਸਮਾਪਜ੍ਜਨਸਮਤ੍ਥਤਾ.

ਆਹੁਨੇਯ੍ਯਭਾਵਾਦਿਸਿਦ੍ਧਿਕਥਾਵਣ੍ਣਨਾ

੮੮੫. ਆਹੁਨੇਯ੍ਯਭਾਵਾਦਿਸਿਦ੍ਧੀਤਿ ਆਹੁਨੇਯ੍ਯਪਾਹੁਨੇਯ੍ਯਦਕ੍ਖਿਣੇਯ੍ਯਅਞ੍ਜਲਿਕਰਣੀਯਅਨੁਤ੍ਤਰਪੁਞ੍ਞਕ੍ਖੇਤ੍ਤਭਾਵਸਿਦ੍ਧਿ. ਅਵਿਸੇਸੇਨਾਤਿ ਦਸ੍ਸਨਮਗ੍ਗਪਞ੍ਞਾਦਿਵਿਸੇਸੇਨ ਵਿਨਾ, ਏਤਿਸ੍ਸਾ ਲੋਕੁਤ੍ਤਰਪਞ੍ਞਾਯ. ਆਨੇਤ੍ਵਾ ਹੁਨਿਤਬ੍ਬਨ੍ਤਿ ਆਹੁਨਂ, ਦੂਰਤੋਪਿ ਆਨੇਤ੍ਵਾ ਦਾਤਬ੍ਬਦਾਨਂ, ਤਂ ਪਟਿਗ੍ਗਹੇਤੁਂ ਯੁਤ੍ਤੋਤਿ ਆਹੁਨੇਯ੍ਯੋ. ਪਾਹੁਨਂ ਵੁਚ੍ਚਤਿ ਆਗਨ੍ਤੁਕਦਾਨਂ, ਤਂ ਪਟਿਗ੍ਗਹੇਤੁਂ ਯੁਤ੍ਤੋਤਿ ਪਾਹੁਨੇਯ੍ਯੋ. ਦਕ੍ਖਿਣਂ ਅਰਹਤੀਤਿ ਦਕ੍ਖਿਣੇਯ੍ਯੋ, ਅਞ੍ਜਲਿਕਰਣਂ ਅਞ੍ਜਲਿਕਮ੍ਮਂ, ਤਂ ਅਰਹਤੀਤਿ ਅਞ੍ਜਲਿਕਰਣੀਯੋ. ਅਨੁਤ੍ਤਰਂ ਉਤ੍ਤਮਂ ਸਤ੍ਤਾਨਂ ਪੁਞ੍ਞਵਿਰੁਹਨਟ੍ਠਾਨਨ੍ਤਿ ਅਨੁਤ੍ਤਰਂ ਪੁਞ੍ਞਕ੍ਖੇਤ੍ਤਂ ਲੋਕਸ੍ਸਾਤਿ ਅਯਮੇਤ੍ਥ ਸਙ੍ਖੇਪੋ. ਵਿਤ੍ਥਾਰੋ ਪਨ ਹੇਟ੍ਠਾ ਵੁਤ੍ਤੋਯੇਵ.

੮੮੬. ਮਨ੍ਦਾਯ ਵਿਪਸ੍ਸਨਾਯ ਆਗਤੋਤਿ ਅਤਿਕ੍ਖਾਯ ਵਿਪਸ੍ਸਨਾਯ ਵਸੇਨ ਪਠਮਮਗ੍ਗਪਞ੍ਞਂ ਭਾਵੇਤ੍ਵਾ ਸੋਤਾਪਨ੍ਨਭਾਵਂ ਆਗਤੋ. ਸਦ੍ਧਾਦੀਨਂ ਮੁਦੂਨਂ ਇਨ੍ਦ੍ਰਿਯਾਨਂ ਵਸੇਨ ਮੁਦਿਨ੍ਦ੍ਰਿਯੋਪਿ ਸਮਾਨੋ. ਸਤ੍ਤਕ੍ਖਤ੍ਤੁਪਰਮੋਤਿ ਸਤ੍ਤਕ੍ਖਤ੍ਤੁਂ ਪਰਮਾ ਭਵੂਪਪਤ੍ਤਿ ਅਤ੍ਤਭਾਵਗ੍ਗਹਣਂ, ਤਤੋ ਪਰਂ ਅਟ੍ਠਮਂ ਭਵਂ ਨਾਦਿਯਤੀਤਿ ਸਤ੍ਤਕ੍ਖਤ੍ਤੁਪਰਮੋ. ਸਂਸਰਿਤ੍ਵਾਤਿ ਪਟਿਸਨ੍ਧਿਗ੍ਗਹਣਵਸੇਨ ਅਪਰਾਪਰਂ ਗਨ੍ਤ੍ਵਾ. ਦੁਕ੍ਖਸ੍ਸਨ੍ਤਂ ਕਰੋਤੀਤਿ ਵਟ੍ਟਦੁਕ੍ਖਸ੍ਸ ਪਰਿਯਨ੍ਤਂ ਪਰਿਯੋਸਾਨਂ ਕਰੋਤਿ. ਅਯਂ ਕਾਲੇਨ ਦੇਵਲੋਕਸ੍ਸ, ਕਾਲੇਨ ਮਨੁਸ੍ਸਲੋਕਸ੍ਸਾਤਿ ਮਿਸ੍ਸਕਸ੍ਸ ਭਵਸ੍ਸ ਵਸੇਨ ‘‘ਸਤ੍ਤਸੁਗਤਿਭਵੇ ਸਂਸਰਿਤ੍ਵਾ’’ਤਿ ਵੁਤ੍ਤੋ. ਕੁਲਤੋ ਕੁਲਂ ਗਚ੍ਛਤੀਤਿ ਕੋਲਂਕੋਲੋ. ਸੋਤਾਪਤ੍ਤਿਫਲਸਚ੍ਛਿਕਿਰਿਯਤੋ ਪਟ੍ਠਾਯ ਹਿ ਨੀਚਕੁਲੇ ਉਪਪਤ੍ਤਿ ਨਾਮ ਨਤ੍ਥਿ, ਮਹਾਭੋਗਕੁਲੇਸੁਯੇਵ ਨਿਬ੍ਬਤ੍ਤਤੀਤਿ ਅਤ੍ਥੋ. ਦ੍ਵੇ ਵਾ ਤੀਣਿ ਵਾ ਕੁਲਾਨੀਤਿ ਦੇਵਮਨੁਸ੍ਸਵਸੇਨ ਦ੍ਵੇ ਵਾ ਤਯੋ ਵਾ ਭਵੇ. ਇਤਿ ਅਯਮ੍ਪਿ ਮਿਸ੍ਸਕਭਵੇਨੇਵ ਕਥਿਤੋ. ਦੇਸਨਾਮਤ੍ਤਮੇਵ ਚੇਤਂ ‘‘ਦ੍ਵੇ ਵਾ ਤੀਣਿ ਵਾ’’ਤਿ. ਯਾਵ ਛਟ੍ਠਭਵਾ ਸਂਸਰਨ੍ਤੋਪਿ ਕੋਲਂਕੋਲੋਵ ਹੋਤਿ. ਅਤ੍ਤਭਾਵਗ੍ਗਹਣਸਙ੍ਖਾਤਂ ਏਕਂਯੇਵ ਖਨ੍ਧਬੀਜਂ ਏਤਸ੍ਸ ਅਤ੍ਥੀਤਿ ਏਕਬੀਜੀ. ‘‘ਮਾਨੁਸਕਂ ਭਵ’’ਨ੍ਤਿ ਇਦਮ੍ਪਿ ਦੇਸਨਾਮਤ੍ਤਂ. ‘‘ਦੇਵਭਵਂ ਨਿਬ੍ਬਤ੍ਤੇਤੀ’’ਤਿਪਿ ਵਤ੍ਤੁਂ ਵਟ੍ਟਤਿਯੇਵ. ਕੋ ਪਨੇਤੇਸਂ ਇਮਂ ਪਭੇਦਂ ਨਿਯਮੇਤੀਤਿ? ਤਿਣ੍ਣਂ ਮਗ੍ਗਾਨਂ ਵਿਪਸ੍ਸਨਾ. ਸਚੇ ਹਿ ਉਪਰਿ ਤਿਣ੍ਣਂ ਮਗ੍ਗਾਨਂ ਵਿਪਸ੍ਸਨਾ ਬਲਵਤੀ ਹੋਤਿ, ਏਕਬੀਜੀ ਨਾਮ ਹੋਤਿ. ਤਤੋ ਮਨ੍ਦਾਯ ਕੋਲਂਕੋਲੋ, ਤਤੋ ਮਨ੍ਦਤਰਾਯ ਸਤ੍ਤਕ੍ਖਤ੍ਤੁਪਰਮੋ.

੮੮੭. ਪਟਿਸਨ੍ਧਿਵਸੇਨ ਸਕਿਂ ਆਗਚ੍ਛਤੀਤਿ ਸਕਦਾਗਾਮੀ. ਸਕਿਦੇਵਾਤਿ ਏਕਵਾਰਂਯੇਵ. ‘‘ਇਮਂ ਲੋਕਂ ਆਗਨ੍ਤ੍ਵਾ’’ਤਿ ਇਮਿਨਾ ਪਞ੍ਚਸੁ ਸਕਦਾਗਾਮੀਸੁ ਚਤ੍ਤਾਰੋ ਵਜ੍ਜੇਤ੍ਵਾ ਏਕੋਵ ਗਹਿਤੋ. ਏਕਚ੍ਚੋ ਹਿ ਇਧ ਸਕਦਾਗਾਮਿਫਲਂ ਪਤ੍ਵਾ ਇਧੇਵ ਪਰਿਨਿਬ੍ਬਾਤਿ, ਏਕਚ੍ਚੋ ਇਧ ਪਤ੍ਵਾ ਦੇਵਲੋਕੇ ਪਰਿਨਿਬ੍ਬਾਤਿ, ਏਕਚ੍ਚੋ ਦੇਵਲੋਕੇ ਪਤ੍ਵਾ ਤਤ੍ਥੇਵ ਪਰਿਨਿਬ੍ਬਾਤਿ, ਏਕਚ੍ਚੋ ਦੇਵਲੋਕੇ ਪਤ੍ਵਾ ਇਧੂਪਪਜ੍ਜਿਤ੍ਵਾ ਪਰਿਨਿਬ੍ਬਾਤਿ. ਇਮੇ ਚਤ੍ਤਾਰੋਪਿ ਇਧ ਨ ਗਹਿਤਾ. ਯੋ ਪਨ ਇਧ ਪਤ੍ਵਾ ਦੇਵਲੋਕੇ ਯਾਵਤਾਯੁਕਂ ਵਸਿਤ੍ਵਾ ਪੁਨ ਇਧੂਪਪਜ੍ਜਿਤ੍ਵਾ ਪਰਿਨਿਬ੍ਬਾਤਿ, ਅਯਂ ਇਧ ਗਹਿਤੋ.

੮੮੮. ਪਟਿਸਨ੍ਧਿਵਸੇਨ ਇਧ ਅਨਾਗਮਨਤੋ ਅਨਾਗਾਮੀ. ਇਨ੍ਦ੍ਰਿਯਵੇਮਤ੍ਤਤਾਵਸੇਨਾਤਿ ਸਦ੍ਧਾਦੀਨਂ ਵਿਮੁਤ੍ਤਿਪਰਿਪਾਚਕਇਨ੍ਦ੍ਰਿਯਾਨਂ ਪਰੋਪਰਿਯਤ੍ਤੇਨ. ਪਞ੍ਚਧਾ ਇਧ ਵਿਹਾਯ ਨਿਟ੍ਠੋ ਹੋਤੀਤਿ ਸੋ ਅਨਾਗਾਮੀ ਅਨ੍ਤਰਾਪਰਿਨਿਬ੍ਬਾਯਿਆਦਿਭਾਵੇਨ ਪਞ੍ਚਪਕਾਰੇਨ ਇਮਂ ਲੋਕਂ ਪਜਹਿਤ੍ਵਾ ਪਰਿਨਿਬ੍ਬਾਯਨਕੋ ਹੋਤਿ. ਆਯੁਵੇਮਜ੍ਝਸ੍ਸ ਅਨ੍ਤਰਾਯੇਵ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬਾਯਨਤੋ ਅਨ੍ਤਰਾਪਰਿਨਿਬ੍ਬਾਯੀ. ਉਪਹਚ੍ਚਾਤਿ ਵਾ ਉਪਗਨ੍ਤ੍ਵਾ ਕਾਲਕਿਰਿਯਂ. ਅਪ੍ਪਯੋਗੇਨਾਤਿ ਅਧਿਮਤ੍ਤਪਯੋਗੇਨ ਵਿਨਾ ਅਪ੍ਪਕਸਿਰੇਨੇਵ ਤਿਕ੍ਖਿਨ੍ਦ੍ਰਿਯਤਾਯ ਸੁਖੇਨੇਵ. ਸਪ੍ਪਯੋਗੇਨਾਤਿ ਏਤ੍ਥ ਵੁਤ੍ਤਵਿਪਰਿਯਾਯੇਨ ਅਤ੍ਥੋ ਵੇਦਿਤਬ੍ਬੋ. ਉਦ੍ਧਂ ਵਾ ਹਿ ਭਾਵੇਨ ਉਦ੍ਧਮਸ੍ਸ ਤਣ੍ਹਾਸੋਤਂ, ਵਟ੍ਟਸੋਤਂ ਵਾਤਿ ਉਦ੍ਧਂਸੋਤੋ. ਉਦ੍ਧਂ ਵਾ ਗਨ੍ਤ੍ਵਾ ਪਟਿਲਭਿਤਬ੍ਬਤੋ ਉਦ੍ਧਮਸ੍ਸ ਮਗ੍ਗਸੋਤਨ੍ਤਿ ਉਦ੍ਧਂਸੋਤੋ. ਪਟਿਸਨ੍ਧਿਵਸੇਨ ਅਕਨਿਟ੍ਠਭਵਂ ਗਚ੍ਛਤੀਤਿ ਅਕਨਿਟ੍ਠਗਾਮੀ.

ਯਤ੍ਥੁਪਪਨ੍ਨੋਤਿ ਅਵਿਹਾਦੀਸੁ ਯਤ੍ਥ ਯਤ੍ਥ ਉਪਪਨ੍ਨੋ. ਇਮੇਸਂ ਪਨ ਅਨਾਗਾਮੀਨਂ ਪਭੇਦਜਾਨਨਤ੍ਥਂ ਉਦ੍ਧਂਸੋਤਅਕਨਿਟ੍ਠਗਾਮਿਚਤੁਕ੍ਕਂ ਵੇਦਿਤਬ੍ਬਂ – ਯੋ ਹਿ ਅਵਿਹਤੋ ਪਟ੍ਠਾਯ ਚਤ੍ਤਾਰੋ ਦੇਵਲੋਕੇ ਸੋਧੇਤ੍ਵਾ ਅਕਨਿਟ੍ਠਂ ਗਨ੍ਤ੍ਵਾ ਪਰਿਨਿਬ੍ਬਾਤਿ, ਅਯਂ ਉਦ੍ਧਂਸੋਤੋ ਅਕਨਿਟ੍ਠਗਾਮੀ ਨਾਮ. ਯੋ ਪਨ ਹੇਟ੍ਠਾ ਤਯੋ ਦੇਵਲੋਕੇ ਸੋਧੇਤ੍ਵਾ ਸੁਦਸ੍ਸੀਦੇਵਲੋਕੇ ਠਤ੍ਵਾ ਪਰਿਨਿਬ੍ਬਾਤਿ, ਅਯਂ ਉਦ੍ਧਂਸੋਤੋ ਨਅਕਨਿਟ੍ਠਗਾਮੀ ਨਾਮ. ਯੋ ਇਤੋ ਅਕਨਿਟ੍ਠਮੇਵ ਗਨ੍ਤ੍ਵਾ ਪਰਿਨਿਬ੍ਬਾਤਿ, ਅਯਂ ਨਉਦ੍ਧਂਸੋਤੋ ਅਕਨਿਟ੍ਠਗਾਮੀ ਨਾਮ. ਯੋ ਪਨ ਹੇਟ੍ਠਾ ਚਤੂਸੁ ਦੇਵਲੋਕੇਸੁ ਤਤ੍ਥ ਤਤ੍ਥੇਵ ਪਰਿਨਿਬ੍ਬਾਤਿ, ਅਯਂ ਨਉਦ੍ਧਂਸੋਤੋ ਨਅਕਨਿਟ੍ਠਗਾਮੀ ਨਾਮ. ਏਤੇ ਪਨ ਅਵਿਹੇਸੁ ਉਪਪਨ੍ਨਸਮਨਨ੍ਤਰਾ ਆਯੁਵੇਮਜ੍ਝਂ ਅਪ੍ਪਤ੍ਵਾ, ਪਤ੍ਵਾ ਚ ਪਰਿਨਿਬ੍ਬਾਯਨਵਸੇਨ ਤਯੋ ਅਨ੍ਤਰਾਪਰਿਨਿਬ੍ਬਾਯਿਨੋ, ਏਕੋ ਉਪਹਚ੍ਚਪਰਿਨਿਬ੍ਬਾਯੀ, ਏਕੋ ਉਦ੍ਧਂਸੋਤੋਤਿ ਪਞ੍ਚ. ਤੇ ਅਸਙ੍ਖਾਰਸਸਙ੍ਖਾਰਪਰਿਨਿਬ੍ਬਾਯਿਵਿਭਾਗੇਨ ਦਸ ਹੋਨ੍ਤਿ. ਤਥਾ ਅਤਪ੍ਪਸੁਦਸ੍ਸਸੁਦਸ੍ਸੀਸੂਤਿ ਚਤ੍ਤਾਰੋ ਦਸਕਾ ਚਤ੍ਤਾਲੀਸਂ. ਅਕਨਿਟ੍ਠੇ ਪਨ ਉਦ੍ਧਂਸੋਤੋ ਨਤ੍ਥਿ. ਤਯੋ ਅਨ੍ਤਰਾਪਰਿਨਿਬ੍ਬਾਯਿਨੋ, ਏਕੋ ਉਪਹਚ੍ਚਪਰਿਨਿਬ੍ਬਾਯੀਤਿ ਚਤ੍ਤਾਰੋ. ਤੇ ਅਸਙ੍ਖਾਰਸਸਙ੍ਖਾਰਪਰਿਨਿਬ੍ਬਾਯਿਵਿਭਾਗੇਨ ਅਟ੍ਠਾਤਿ ਅਟ੍ਠਚਤ੍ਤਾਲੀਸਂ ਅਨਾਗਾਮਿਨੋ.

ਸੋਤਾਪਨ੍ਨਾ ਪਨ ਪਟਿਪਦਾਭੇਦੇਨ ਚਤ੍ਤਾਰੋ ਸਤ੍ਤਕ੍ਖਤ੍ਤੁਪਰਮਾ, ਚਤ੍ਤਾਰੋ ਕੋਲਂਕੋਲਾ, ਚਤ੍ਤਾਰੋ ਏਕਬੀਜਿਨੋਤਿ ਸਦ੍ਧਾਧੁਰੇਨ ਪਟਿਪਨ੍ਨਾ ਦ੍ਵਾਦਸ, ਤਥਾ ਪਞ੍ਞਾਧੁਰੇਨਾਤਿ ਚਤੁਵੀਸਤਿ.

ਸਕਦਾਗਾਮਿਨੋ ਸੁਞ੍ਞਤਵਿਮੋਕ੍ਖੇਨ ਵਿਮੁਤ੍ਤਾ ਪਟਿਪਦਾਵਸੇਨ ਚਤ੍ਤਾਰੋ, ਤਥਾ ਅਨਿਮਿਤ੍ਤਅਪ੍ਪਣਿਹਿਤਵਿਮੋਕ੍ਖੇਹੀਤਿ ਦ੍ਵਾਦਸ.

੮੮੯. ਤਥਾ ਅਰਹਨ੍ਤੋ. ਤੇ ਪਨ ਦ੍ਵਾਦਸ ਪਞ੍ਞਾਵਿਮੁਤ੍ਤਾ, ਦ੍ਵਾਦਸ ਉਭਤੋਭਾਗਵਿਮੁਤ੍ਤਾ, ਦ੍ਵਾਦਸ ਤੇਵਿਜ੍ਜਾ, ਦ੍ਵਾਦਸ ਛਲ਼ਭਿਞ੍ਞਾ, ਦ੍ਵਾਦਸ ਪਟਿਸਮ੍ਭਿਦਾਪ੍ਪਤ੍ਤਾਤਿ ਸਮਸਟ੍ਠਿ ਹੋਨ੍ਤਿ. ਏਵਮੇਤੇ ਸਦ੍ਧਿਂ ਪਚ੍ਚੇਕਸਮ੍ਬੁਦ੍ਧਸਮ੍ਮਾਸਮ੍ਬੁਦ੍ਧੇਹਿ ਛਚਤ੍ਤਾਲੀਸਾਧਿਕਸਤਂ ਅਰਿਯਾ. ਯਸ੍ਮਾ ਤੇਸਂ ਅਰਿਯਭਾਵਸਿਦ੍ਧਿ ਅਰਿਯਾਯ ਪਞ੍ਞਾਭਾਵਨਾਯ, ਤੇਨ ਵੁਤ੍ਤਂ ‘‘ਆਹੁਨੇਯ੍ਯਭਾਵਾਦਿਸਿਦ੍ਧਿਪਿ ਇਮਿਸ੍ਸਾ ਲੋਕੁਤ੍ਤਰਪਞ੍ਞਾਭਾਵਨਾਯ ਆਨਿਸਂਸੋ’’ਤਿ. ਲੋਕਿਯਵਿਜ੍ਜਾਭਿਞ੍ਞਾਹਿ ਵਿਨਾਪਿ ਉਭਤੋਭਾਗਵਿਮੁਤ੍ਤਤਾ ਹੋਤੀਤਿ ਉਭਤੋਭਾਗਵਿਮੁਤ੍ਤੋ ਵਿਸੁਂ ਗਹਿਤੋ. ਯਂ ਸਨ੍ਧਾਯ ਵੁਤ੍ਤਨ੍ਤਿ ਯਂ ਚਤੁਤ੍ਥਮਗ੍ਗਪਞ੍ਞਾਭਾਵਨਂ ਸਨ੍ਧਾਯ ਹੇਟ੍ਠਾ ਸਙ੍ਖੇਪਤੋ ਗਾਥਾਵਣ੍ਣਨਾਯਂ ਵੁਤ੍ਤਂ, ਤਂ ਪਨ ਵੁਤ੍ਤਾਕਾਰਂ ਨਿਗਮਨਵਸੇਨ ਦਸ੍ਸੇਤੁਂ ‘‘ਮਗ੍ਗਕ੍ਖਣੇ’’ਤਿਆਦਿ ਵੁਤ੍ਤਂ. ਕਾਮਂ ਚਤੂਸੁਪਿ ਮਗ੍ਗਕ੍ਖਣੇਸੁ ਤਂ ਜਟਂ ਵਿਜਟੇਤਿ ਨਾਮ, ਫਲਕ੍ਖਣੇਸੁਪਿ ਯਥਾਰਹਂ ਵਿਜਟਿਤਜਟੋ, ਅਗ੍ਗਫਲਕ੍ਖਣੇਯੇਵ ਪਨ ਸਬ੍ਬਸੋ ਵਿਜਟਿਤਜਟੋ, ਤਤੋ ਪਰਂ ਵਿਜਟੇਤਬ੍ਬਾਯ ਜਟਾਯ ਅਭਾਵਤੋ. ਤੇਨੇਤ੍ਥ ਹੇਟ੍ਠਾ ਹੇਟ੍ਠਿਮਮਗ੍ਗਪਞ੍ਞਾਭਾਵਨਾਨਿਸਂਸਸ੍ਸ ਵੁਤ੍ਤਤ੍ਤਾਵ ਚਤੁਤ੍ਥਮਗ੍ਗਪਞ੍ਞਾਭਾਵਨਾਵਸੇਨ ਅਤ੍ਥੋ ਵੁਤ੍ਤੋ.

ਰਤਿਨ੍ਤਿ ਅਭਿਰਤਿਂ, ਅਭਿਰੁਚਿਨ੍ਤਿ ਅਤ੍ਥੋ. ਤਤ੍ਥਾਤਿ ਅਰਿਯਾਯ ਪਞ੍ਞਾਭਾਵਨਾਯ.

੮੯੦. ਇਮਿਸ੍ਸਾ ਗਾਥਾਯਾਤਿ ਇਮਿਸ੍ਸਂ ਗਾਥਾਯਂ. ਗਾਥਾ ਹਿ ਅਤ੍ਤਨੋ ਅਤ੍ਥਭੂਤਸ੍ਸ ਵਿਸੁਦ੍ਧਿਮਗ੍ਗਸ੍ਸ ਆਧਾਰਭਾਵੇਨ ਵੁਤ੍ਤਾ, ਸਾਮਿਵਚਨਂ ਵਾ ਏਤਂ ਅਤ੍ਥਸ੍ਸ ਤਂਸਮ੍ਬਨ੍ਧਿਭਾਵਤੋ.

ਪਞ੍ਞਾਭਾਵਨਾਨਿਸਂਸਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

ਇਤਿ ਤੇਵੀਸਤਿਮਪਰਿਚ੍ਛੇਦਵਣ੍ਣਨਾ.

ਨਿਗਮਨਕਥਾਵਣ੍ਣਨਾ

੮੯੧. ਇਮਿਸ੍ਸਾ ਦਾਨਿ ਗਾਥਾਯਾਤਿਆਦੀਨਂ ਗਾਥਾਨਂ ਅਤ੍ਥੋ ਹੇਟ੍ਠਾ ਵੁਤ੍ਤੋ ਏਵ. ਸ੍ਵਾਯਂ ‘‘ਵਿਸੁਦ੍ਧਿਮਗ੍ਗਂ ਭਾਸਿਸ੍ਸ’’ਨ੍ਤਿ ਏਵਂ ਪਟਿਞ੍ਞਾਤੋ ਵਿਸੁਦ੍ਧਿਮਗ੍ਗੋ ਏਤ੍ਤਾਵਤਾ ਭਾਸਿਤੋ ਹੋਤੀਤਿ ਸਮ੍ਬਨ੍ਧੋ.

੮੯੨. ਤਤ੍ਥਾਤਿਆਦੀਸੁ ਅਯਂ ਪਦਸਮ੍ਬਨ੍ਧੇਨ ਸਦ੍ਧਿਂ ਸਙ੍ਖੇਪਤ੍ਥੋ – ਤੇਸਂ ‘‘ਸੀਲੇ ਪਤਿਟ੍ਠਾਯਾ’’ਤਿਗਾਥਾਯਂ ਵੁਤ੍ਤਾਨਂ ਸੀਲਾਦਿਪ੍ਪਭੇਦਾਨਂ ਅਤ੍ਥਾਨਂ ਪਞ੍ਚਨ੍ਨਮ੍ਪਿ ਮਹਾਨਿਕਾਯਾਨਂ ਅਟ੍ਠਕਥਾਨਯੇ ਅਟ੍ਠਕਥਾਤਨ੍ਤਿਯਂ ਤਤ੍ਥ ਤਤ੍ਥ ਵੁਤ੍ਤੋ ਯੋ ਵਿਨਿਚ੍ਛਯੋ, ਯੇਭੁਯ੍ਯੇਨ ਤਂ ਸਬ੍ਬਂ ਸਮਾਹਰਿਤ੍ਵਾ ਸਮਾਨੇਤ੍ਵਾ ਨਿਕਾਯਨ੍ਤਰਸ੍ਸ ਨਿਕਾਯਗਤਵਾਦਦੋਸਸਙ੍ਕਰੇਹਿ ਮੁਤ੍ਤੋ ਸੋ ਨਿਚ੍ਛਯੋ ਯਸ੍ਮਾ ਪਕਾਸਿਤੋ, ਤਸ੍ਮਾ ਵਿਸੁਦ੍ਧਿਕਾਮੇਹਿ ਯੋਗੀਹਿ ਏਤਸ੍ਮਿਂ ਵਿਸੁਦ੍ਧਿਮਗ੍ਗੇ ਆਦਰੋ ਕਰਣੀਯੋਯੇਵਾਤਿ.

ਨਿਗਮਨਗਾਥਾਯੋ

ਏਤ੍ਤਾਵਤਾ ਚ –

ਸੁਵਿਸੁਦ੍ਧਸਮਾਚਾਰੋ, ਵਿਸੁਦ੍ਧਨਯਮਣ੍ਡਿਤਂ;

ਵਿਸੁਦ੍ਧਿਮਗ੍ਗਂ ਲੋਕਸ੍ਸ, ਯਦਚ੍ਚਨ੍ਤਵਿਸੁਦ੍ਧਿਯਾ.

ਅਭਾਸਿ ਕਰੁਣਾਵੇਗ-ਸਮੁਸ੍ਸਾਹਿਤਮਾਨਸੋ;

ਮਹੇਸਿ ਵਿਪੁਲੋਦਾਤ-ਵਿਸੁਦ੍ਧਿਮਤਿਪਾਟਵੋ.

ਤਸ੍ਸ ਅਤ੍ਥਂ ਪਕਾਸੇਤੁਂ, ਕਥਾਮਗ੍ਗਂ ਪੁਰਾਤਨਂ;

ਨਿਸ੍ਸਾਯ ਯਾ ਸਮਾਰਦ੍ਧਾ, ਅਤ੍ਥਸਂਵਣ੍ਣਨਾ ਮਯਾ.

ਆਯਾਚਿਤੋ ਸਿਦ੍ਧਗਾਮ-ਪਰਿਵੇਣਨਿਵਾਸਿਨਾ;

ਥੇਰੇਨ ਦਾਠਨਾਗੇਨ, ਸੁਦ੍ਧਾਚਾਰੇਨ ਧੀਮਤਾ.

ਸਾ ਏਸਾ ਪਰਮਤ੍ਥਾਨਂ, ਤਤ੍ਥ ਤਤ੍ਥ ਯਥਾਰਹਂ;

ਨਿਧਾਨਤੋ ਪਰਮਤ੍ਥ-ਮਞ੍ਜੂਸਾ ਨਾਮ ਨਾਮਤੋ.

ਸਮ੍ਪਤ੍ਤਾ ਪਰਿਨਿਟ੍ਠਾਨਂ, ਅਨਾਕੁਲਵਿਨਿਚ੍ਛਯਾ;

ਅਟ੍ਠਾਸੀਤਿਪ੍ਪਮਾਣਾਯ, ਪਾਲ਼ਿਯਾ ਭਾਣਵਾਰਤੋ.

ਇਤਿ ਤਂ ਸਙ੍ਖਰੋਨ੍ਤੇਨ, ਯਂ ਤਂ ਅਧਿਗਤਂ ਮਯਾ;

ਪੁਞ੍ਞਂ ਤਸ੍ਸਾਨੁਭਾਵੇਨ, ਲੋਕਨਾਥਸ੍ਸ ਸਾਸਨੇ.

ਓਗਾਹੇਤ੍ਵਾ ਵਿਸੁਦ੍ਧਾਯ, ਸੀਲਾਦਿਪਟਿਪਤ੍ਤਿਯਾ;

ਸਬ੍ਬੇਪਿ ਦੇਹਿਨੋ ਹੋਨ੍ਤੁ, ਵਿਮੁਤ੍ਤਿਰਸਭਾਗਿਨੋ.

ਚਿਰਂ ਤਿਟ੍ਠਤੁ ਲੋਕਸ੍ਮਿਂ, ਸਮ੍ਮਾਸਮ੍ਬੁਦ੍ਧਸਾਸਨਂ;

ਤਸ੍ਮਿਂ ਸਗਾਰਵਾ ਨਿਚ੍ਚਂ, ਹੋਨ੍ਤੁ ਸਬ੍ਬੇਪਿ ਪਾਣਿਨੋ.

ਸਮ੍ਮਾ ਵਸ੍ਸਤੁ ਕਾਲੇਨ, ਦੇਵੋ ਰਾਜਾ ਮਹੀਪਤਿ;

ਸਦ੍ਧਮ੍ਮਨਿਰਤੋ ਲੋਕਂ, ਧਮ੍ਮੇਨੇਵ ਪਸਾਸਤੂਤਿ.

ਬਦਰਤਿਤ੍ਥਵਿਹਾਰਵਾਸਿਨਾ ਆਚਰਿਯਧਮ੍ਮਪਾਲੇਨ ਕਤਾ

ਪਰਮਤ੍ਥਮਞ੍ਜੂਸਾ ਨਾਮ ਵਿਸੁਦ੍ਧਿਮਗ੍ਗਮਹਾਟੀਕਾ ਸਮਤ੍ਤਾ.

ਵਿਸੁਦ੍ਧਿਮਗ੍ਗ-ਮਹਾਟੀਕਾ ਸਮਤ੍ਤਾ.