੨੨. ਞਾਣਦਸ੍ਸਨਵਿਸੁਦ੍ਧਿਨਿਦ੍ਦੇਸਵਣ੍ਣਨਾ
ਪਠਮਮਗ੍ਗਞਾਣਕਥਾਵਣ੍ਣਨਾ
੮੦੬. ਇਦਾਨਿ ਞਾਣਦਸ੍ਸਨਵਿਸੁਦ੍ਧਿਯਾ ਨਿਦ੍ਦੇਸੇ ਅਨੁਪ੍ਪਤ੍ਤੇ ਸਾ ਯਸ੍ਸ ਞਾਣਸ੍ਸ ਅਨਨ੍ਤਰਂ ਉਪ੍ਪਜ੍ਜਤਿ, ਤਂ ਤਾਵ ਦਸ੍ਸੇਨ੍ਤੋ ‘‘ਇਤੋ ਪਰਂ ਗੋਤ੍ਰਭੁਞਾਣਂ ਹੋਤੀ’’ਤਿ ਆਹ. ਇਤੋ ਪਰਨ੍ਤਿ ਇਤੋ ਅਨੁਲੋਮਞਾਣਤੋ ਉਪਰਿ. ਤਨ੍ਤਿ ਗੋਤ੍ਰਭੁਞਾਣਂ. ਨੇਵ ਪਟਿਪਦਾਞਾਣਦਸ੍ਸਨਵਿਸੁਦ੍ਧਿਂ ਭਜਤਿ ਅਨਿਚ੍ਚਾਦਿਵਸੇਨ ਸਙ੍ਖਾਰਾਨਂ ਅਗ੍ਗਹਣਤੋ. ਨ ਞਾਣਦਸ੍ਸਨਵਿਸੁਦ੍ਧਿਂ ਭਜਤਿ ਸਤਿਪਿ ਨਿਬ੍ਬਾਨਾਰਮ੍ਮਣਤ੍ਤੇ ਕਿਲੇਸਾਨਂ ਅਖੇਪਨਤੋ. ਤਤੋ ਏਵੇਤਂ ਵਿਞ੍ਞਾਣਧਾਤੂਨਂ ਵਿਸਯਂ ਉਦ੍ਦੇਸਨ੍ਤਂ ਦਸ੍ਸਨਕਿਚ੍ਚਂ ਕਰੋਨ੍ਤਂ ਕਿਰਿਯਮਨੋਧਾਤੁ ਵਿਯ ਮਗ੍ਗਸ੍ਸ ਆਵਜ੍ਜਨਟ੍ਠਾਨਿਯਂ ਵੁਚ੍ਚਤਿ. ਅਨ੍ਤਰਾਤਿ ਛਟ੍ਠਸਤ੍ਤਮਵਿਸੁਦ੍ਧੀਨਂ ਵੇਮਜ੍ਝੇ. ਅਬ੍ਬੋਹਾਰਿਕਮੇਵ ਹੋਤਿ ਉਭਯਵਿਸੁਦ੍ਧਿਲਕ੍ਖਣਤਾਭਾਵਤੋ. ਤਥਾਪਿ ਵੁਟ੍ਠਾਨਗਾਮਿਨਿਯਾ ਪਰਿਯੋਸਾਨਤਾਯ ਵਿਪਸ੍ਸਨਾਪਕ੍ਖਿਕਂ. ਤੇਨੇਵਸ੍ਸ ਤਂਸੋਤਪਤਿਤਤਾ. ਤੇਨਾਹ ‘‘ਵਿਪਸ੍ਸਨਾਸੋਤੇ…ਪੇ… ਸਙ੍ਖਂ ਗਚ੍ਛਤੀ’’ਤਿ. ਏਤੇਨਸ੍ਸ ਪਟਿਪਦਾਞਾਣਦਸ੍ਸਨਵਿਸੁਦ੍ਧਿਭਜਨਂ ਦਸ੍ਸੇਤਿ. ਸੋਤਸ੍ਸ ਅਰਿਯਸ੍ਸਆਦਿਤੋ ਪਜ੍ਜਨਂ ਸੋਤਾਪਤ੍ਤਿ, ਸੋ ਏਵ ਮਗ੍ਗੋ, ਸੋਤਂ ਵਾ ਅਰਿਯਂ ਆਦਿਤੋ ਪਜ੍ਜਤਿ ਅਧਿਗਚ੍ਛਤੀਤਿ ਸੋਤਾਪਤ੍ਤਿ, ਪਠਮਕੋ. ਤਸ੍ਸ ਮਗ੍ਗੋ ਸੋਤਾਪਤ੍ਤਿਮਗ੍ਗੋ. ਪਟਿਸਨ੍ਧਿਵਸੇਨ ਸਕਿਦੇਵ ਇਮਂ ਮਨੁਸ੍ਸਲੋਕਂ ਆਗਚ੍ਛਤੀਤਿ ਸਕਦਾਗਾਮੀ, ਤਸ੍ਸ ਮਗ੍ਗੋ ਸਕਦਾਗਾਮਿਮਗ੍ਗੋ. ਪਟਿਸਨ੍ਧਿਵਸੇਨ ਕਾਮਭਵਂ ਨ ਆਗਚ੍ਛਤੀਤਿ ਅਨਾਗਾਮੀ, ਤਸ੍ਸ ਮਗ੍ਗੋ ਅਨਾਗਾਮਿਮਗ੍ਗੋ. ਕਿਲੇਸਾਦੀਨਂ ਹਨਨਾਦਿਨਾ ਅਰਹਂ, ਅਗ੍ਗਮਗ੍ਗਟ੍ਠੋ. ਤਸ੍ਸ ਭਾਵੋ ਅਰਹਤ੍ਤਂ, ਸੋ ਏਵ ਮਗ੍ਗੋਤਿ ਅਰਹਤ੍ਤਮਗ੍ਗੋ. ਚਤੂਸੁ ਮਗ੍ਗੇਸੁ ਞਾਣਂ ਏਕਜ੍ਝਂ ਗਹੇਤ੍ਵਾ ਞਾਣਦਸ੍ਸਨਵਿਸੁਦ੍ਧਿ ਨਾਮ.
ਤੇਹਿ ਤੀਹਿਪੀਤਿ ਹੇਟ੍ਠਾ ਤਿਣ੍ਣਂ ਅਨੁਲੋਮਞਾਣਾਨਂ ਵੁਤ੍ਤਤ੍ਤਾ ਵੁਤ੍ਤਂ, ਤੀਸੁ ਵਾ ਦ੍ਵਿਨ੍ਨਂ ਅਨ੍ਤੋਗਧਤ੍ਤਾ. ਤੀਹਿਪੀਤਿ ਵਾ ਵਿਕਪ੍ਪਨ੍ਤਰਸਮ੍ਪਿਣ੍ਡਨਤ੍ਥੋ ਪਿ-ਸਦ੍ਦੋ, ਤੇਨ ਤੀਹਿਪਿ ਦ੍ਵੀਹਿਪੀਤਿ ਵੁਤ੍ਤਂ ਹੋਤਿ. ਅਤ੍ਤਨੋ ਬਲਾਨੁਰੂਪੇਨਾਤਿ ਅਤ੍ਤਨੋ ਅਤ੍ਤਨੋ ਆਨੁਭਾਵਾਨੁਕੂਲਂ. ਪਠਮਞ੍ਹਿ ਅਨੁਲੋਮਞਾਣਂ ਸਬ੍ਬੋਲ਼ਾਰਿਕਂ, ਦੁਤਿਯਂ ਤਤੋ ਨਾਤਿਓਲ਼ਾਰਿਕਂ, ਤਤਿਯਂ ਤਤੋ ਨਾਤਿਓਲ਼ਾਰਿਕਂ ਤਮਂ ਅਨ੍ਤਰਧਾਪੇਤਿ. ਅਥ ਵਾ ਬਲਾਨੁਰੂਪੇਨਾਤਿ ਹੇਟ੍ਠਾ ਸਙ੍ਖਾਰੁਪੇਕ੍ਖਾਯ ਆਹਿਤਬਲਾਨੁਰੂਪੇਨ. ਪੁਬ੍ਬਾਭਿਸਙ੍ਖਾਰਵਸੇਨ ਹਿ ਅਨੁਲੋਮਞਾਣਸ੍ਸਾਪਿ ਮਗ੍ਗਞਾਣਸ੍ਸ ਵਿਯ ਸਦ੍ਧਾਵਿਮੁਤ੍ਤਦਿਟ੍ਠਿਪ੍ਪਤ੍ਤਾਨਂ ਪਵਤ੍ਤਿਆਕਾਰਸਿਦ੍ਧੋ ਅਤ੍ਥੇਵ ਮੁਦੁਤਿਕ੍ਖਤਾਵਿਸੇਸੋ. ਪਲਿਬੋਧਤੋ ਉਪਟ੍ਠਾਤਿ ਪਲਿਬੋਧਭਾਵਪਟਿਚ੍ਛਾਦਕਸ੍ਸ ਤਮਸ੍ਸ ਅਨ੍ਤਰਧਾਪਿਤਤ੍ਤਾ. ‘‘ਆਸੇਵਨਨ੍ਤੇ’’ਤਿ ਇਮਿਨਾ ਦੁਤਿਯਸ੍ਸ ਵਾ ਤਤਿਯਸ੍ਸ ਵਾ ਅਨੁਲੋਮਞਾਣਸ੍ਸ ਅਨਨ੍ਤਰਂ ਗੋਤ੍ਰਭੁਞਾਣੁਪ੍ਪਤ੍ਤਿ, ਨ ਪਠਮਸ੍ਸਾਤਿ ਦਸ੍ਸੇਤਿ ਤਸ੍ਸ ਅਨਾਸੇਵਨਤ੍ਤਾ. ਨ ਹਿ ਅਲਦ੍ਧਾਸੇਵਨਂ ਗੋਤ੍ਰਭੁਞਾਣਂ ਉਪ੍ਪਾਦੇਤੁਂ ਸਕ੍ਕੋਤਿ. ਨਿਮਿਤ੍ਤਾਦਿਵਿਰਹਤੋ, ਤਬ੍ਬਿਧੁਰਤੋ ਚ ‘‘ਅਨਿਮਿਤ੍ਤ’’ਨ੍ਤਿਆਦਿਨਾ ਨਿਬ੍ਬਾਨਂ ਵਿਸੇਸਿਤਂ. ਪੁਥੁਜ੍ਜਨਗੋਤ੍ਤਨ੍ਤਿ ਅਰਿਯੇਹਿ ਅਸਮ੍ਮਿਸ੍ਸਂ ਪੁਥੁਜ੍ਜਨਸਮਞ੍ਞਂ. ਗੋਤ੍ਤਨ੍ਤਿ ਹਿ ਏਕਵਂਸਜਾਨਂ ਸਮਾਨਾ ਸਮਞ੍ਞਾ, ਏਵਂ ਇਧਾਪੀਤਿ. ਪੁਥੁਜ੍ਜਨਸਙ੍ਖਨ੍ਤਿ ਤਸ੍ਸੇਵ ਵੇਵਚਨਂ, ਪੁਥੁਜ੍ਜਨਭੂਮਿਨ੍ਤਿ ਪੁਥੁਜ੍ਜਨਵਤ੍ਥੁਂ. ਏਕਨ੍ਤਿਕਤਾਯ ਏਕਵਾਰਮੇਵ ਚ ਉਪ੍ਪਜ੍ਜਨਤੋ ਅਪੁਨਰਾਵਟ੍ਟਕਂ.
ਬਹਿਦ੍ਧਾ ਵੁਟ੍ਠਾਨਵਿਵਟ੍ਟਨੇਤਿ ਅਸਙ੍ਖਤਧਾਤੁਯਾ ਬਹਿਭਾਵਤੋ ਬਹਿਦ੍ਧਾਸਞ੍ਞਿਤਾ ਸਙ੍ਖਾਰਗਤਾ ਵੁਟ੍ਠਾਨਭੂਤੇ ਵਿਵਟ੍ਟਨੇ ਨਿਪ੍ਫਜ੍ਜਮਾਨੇ ਪਞ੍ਞਾ. ਅਭਿਭੁਯ੍ਯਤੀਤਿ ਅਭਿਭਵਤਿ. ਪਕ੍ਖਨ੍ਦਤੀਤਿ ਅਨੁਪਵਿਸਤਿ. ਏਤ੍ਥ ਚ ‘‘ਉਪ੍ਪਾਦਂ ਅਭਿਭੁਯ੍ਯਤੀ’’ਤਿਆਦਿਨਾ ਪੁਥੁਜ੍ਜਨਗੋਤ੍ਤਾਭਿਭਵਨਂ ਤਦਤਿਕ੍ਕਮਨਮਾਹ. ‘‘ਅਨੁਪ੍ਪਾਦਂ ਪਕ੍ਖਨ੍ਦਤੀ’’ਤਿਆਦਿਨਾ ਅਰਿਯਗੋਤ੍ਤਭਾਵਨਂ ਤਦੁਭਯਭਾਵਤੋ.
੮੦੭. ਏਕਾਵਜ੍ਜਨਾਨਂ ਨਾਨਾਵੀਥਿਤਾ ਨਤ੍ਥੀਤਿ ਨ ਤਂਨਿਸੇਧਨਾਯ ਏਕਵੀਥਿਗ੍ਗਹਣਂ, ਅਥ ਖੋ ਨਾਨਾਰਮ੍ਮਣਾਨਮ੍ਪਿ ਏਕਾਵਜ੍ਜਨਾਨਂ ਨਾਨਾਵੀਥਿਤਾ ਨਤ੍ਥੀਤਿ ਦਸ੍ਸਨਤ੍ਥਨ੍ਤਿ ਦਟ੍ਠਬ੍ਬਂ. ਮਹਾਮਾਤਿਕਨ੍ਤਿ ਮਹਨ੍ਤਂ ਉਦਕਵਾਹਕਂ. ਲਙ੍ਘਿਤ੍ਵਾਤਿ ਅਨੋਤਰਨ੍ਤੋ ਏਵ ਅਤਿਕ੍ਕਮਿਤ੍ਵਾ. ਉਲ੍ਲਙ੍ਘਿਤ੍ਵਾਤਿ ਉਪਰਿਭਾਗੇਨੇਵ ਲਙ੍ਘਿਤ੍ਵਾ. ਨਿਨ੍ਨਪੋਣਪਬ੍ਭਾਰਤਾ ਉਤ੍ਤਰੁਤ੍ਤਰਵਿਸਿਟ੍ਠਾ ਨਿਨ੍ਨਤਾਵ.
ਅਟ੍ਠਹਿ ਞਾਣੇਹਿ ਅਨੁਕ੍ਕਮੇਨ ਆਹਿਤਵਿਸੇਸਂ ਅਨੁਲੋਮਞਾਣਂ ਨਿਬ੍ਬਾਨਾਰਮ੍ਮਣਸ੍ਸ ਞਾਣਸ੍ਸ ਪਚ੍ਚਯੋ ਭਵਿਤੁਂ ਸਮਤ੍ਥਂ ਜਾਤਨ੍ਤਿ ਆਹ ‘‘ਉਦਯਬ੍ਬਯਾਨੁਪਸ੍ਸਨਾਦਿਨਾ ਵੇਗੇਨ ਧਾਵਿਤ੍ਵਾ’’ਤਿ. ਰੂਪਂ ਅਨੇਕਸਨ੍ਤਤਿਸਮ੍ਬਨ੍ਧਤਾਯ ਅਨੇਕਵਟ੍ਟਰਚਿਤਾ ਰਜ੍ਜੁ ਵਿਯ ਹੋਤੀਤਿ ਵੁਤ੍ਤਂ ‘‘ਰੂਪਰਜ੍ਜੁਂ ਵਾ’’ਤਿ. ਅਤ੍ਤਭਾਵਸ੍ਸ ਰੁਕ੍ਖਟ੍ਠਾਨਿਯਤਾਯ ਵੁਤ੍ਤਤ੍ਤਾ ਤਂਸਮ੍ਬਨ੍ਧਦਣ੍ਡਟ੍ਠਾਨਿਯਤਾ ਵੇਦਨਾਦੀਸੁ ਏਕਸ੍ਸੇਵ ਯੁਤ੍ਤਾ, ਨ ਵੇਦਨਾਦਿਸਮੁਦਾਯਸ੍ਸਾਤਿ ਵੁਤ੍ਤਂ ‘‘ਵੇਦਨਾਦੀਸੁ ਅਞ੍ਞਤਰਦਣ੍ਡਂ ਵਾ’’ਤਿ. ਅਨੁਲੋਮਾਵਜ੍ਜਨੇਨਾਤਿ ਅਨੁਲੋਮਸ੍ਸ ਆਵਜ੍ਜਨੇਨ. ਯੇਨ ਆਵਜ੍ਜਨੇਨ ਅਨੁਲੋਮਞਾਣਂ ਉਪ੍ਪਜ੍ਜਤਿ, ਤੇਨ ਤਂ ਆਰਮ੍ਮਣਂ. ‘‘ਪਠਮੇਨ ਅਨੁਲੋਮਚਿਤ੍ਤੇਨ ਉਲ੍ਲਙ੍ਘਿਤ੍ਵਾ’’ਤਿ ਇਦਂ ਸਕ੍ਕਾਯਤੀਰਸ੍ਸ ਤਸ੍ਸ ਅਤਿਕ੍ਕਮਨਾਰਮ੍ਭਤਾਯ ਵੁਤ੍ਤਂ. ‘‘ਦੁਤਿਯੇਨ ਨਿਬ੍ਬਾਨਨਿਨ੍ਨਪੋਣਪਬ੍ਭਾਰਮਾਨਸੋ’’ਤਿ ਇਦਂ ਤਸ੍ਸ ਸਬ੍ਬਸਙ੍ਖਾਰਤੋ ਸਾਤਿਸਯਂ ਅਲਗ੍ਗਂ ਹੁਤ੍ਵਾ ਵਿਸਙ੍ਖਾਰੇ ਅਲ੍ਲੀਨਭਾਵਤੋ ਵੁਤ੍ਤਂ. ਨਿਬ੍ਬਾਨੇ ਆਰਮ੍ਮਣਕਰਣਵਸੇਨ ਪਤਤਿ ਯੋਗਾਵਚਰੋ. ਏਕਾਰਮ੍ਮਣੇਤਿ ਏਕਵਾਰਂਯੇਵ ਆਲਮ੍ਬਿਤੇ ਆਰਮ੍ਮਣੇ. ਤੇਨਾਹ ‘‘ਅਲਦ੍ਧਾਸੇਵਨਤਾਯਾ’’ਤਿ. ਤੇਨ ਏਕਾਰਮ੍ਮਣੇ ਆਸੇਵਨਾ ਉਪਕਾਰਵਤੀ, ਨ ਤਥਾ ਨਾਨਾਰਮ੍ਮਣੇਤਿ ਦਸ੍ਸੇਤਿ.
੮੦੮. ਤਤ੍ਰਾਤਿ ਅਨੁਲੋਮਗੋਤ੍ਰਭੂਨਂ ਇਤਰੀਤਰਕਿਚ੍ਚਾਕਰਣੇ. ਨਕ੍ਖਤ੍ਤਯੋਗਨ੍ਤਿ ਨਕ੍ਖਤ੍ਤੇਨ ਚਨ੍ਦਸ੍ਸ ਯੋਗਂ, ਨਕ੍ਖਤ੍ਤਯੋਗਵਿਭਾਵਨਿਯਂ ਵਾ ਕਾਲਂ, ਦਿਵਸਨ੍ਤਿ ਅਤ੍ਥੋ.
ਤਤ੍ਥਾਤਿਆਦਿ ਉਪਮਾਸਂਸਨ੍ਦਨਂ.
ਏਵਂ ਨਿਬ੍ਬਤ੍ਤਾਹੀਤਿ ਅਨੁਲੋਮਞਾਣਾਨਿ ਵਿਯ ਸਙ੍ਖਾਰੇ ਅਨਾਲਮ੍ਬਿਤ੍ਵਾ ਅਹਂ ਵਿਯ ਨਿਬ੍ਬਾਨਾਰਮ੍ਮਣੇ ਵਤ੍ਤਾਹੀਤਿ ਮਗ੍ਗਸ੍ਸ ਗੋਤ੍ਰਭੁਨਾ ਦਿਨ੍ਨਸਞ੍ਞਾਮੁਞ੍ਚਨਂ, ਅਨੁਬਨ੍ਧਨਞ੍ਚ ਨਿਬ੍ਬਾਨਾਰਮ੍ਮਣਕਰਣਮੇਵ ਸਨ੍ਧਾਯ ਵੁਤ੍ਤਂ.
੮੦੯. ਤਤ੍ਰਾਤਿ ਤਸ੍ਮਿਂ ਗੋਤ੍ਰਭੁਨਾ ਦਿਨ੍ਨਸਞ੍ਞਂ ਅਮੁਞ੍ਚਿਤ੍ਵਾ ਵਿਯ ਤੇਨ ਗਹਿਤਾਰਮ੍ਮਣੇਯੇਵ ਵਤ੍ਤਿਤ੍ਵਾ ਮਗ੍ਗਸ੍ਸ ਲੋਭਕ੍ਖਨ੍ਧਾਦਿਨਿਬ੍ਬਿਜ੍ਝਨੇ. ਉਸੁਂ ਅਸਤਿ ਖਿਪ੍ਪਤੀਤਿ ਇਸ੍ਸਾਸੋ, ਧਨੁਗ੍ਗਹੋ. ਸਰਗੋਚਰਟ੍ਠਾਨਂ ਨਾਮ ਅਟ੍ਠਉਸਭਮਤ੍ਤਂ. ਤਞ੍ਚ ਖੋ ਦੂਰੇ ਪਾਤਿਨੋ ਮਜ੍ਝਿਮਪੁਰਿਸਸ੍ਸ ਵਸੇਨ ਚਤੁਹਤ੍ਥਾਯ ਯਟ੍ਠਿਯਾ ਵੀਸਤਿਯਟ੍ਠਿ ਉਸਭਂ, ਤੇਨ ਅਟ੍ਠਉਸਭਮਤ੍ਤੇ ਪਦੇਸੇ ਹਤ੍ਥਵਸੇਨ ਚਤ੍ਤਾਰੀਸਾਧਿਕਛਸਤਹਤ੍ਥੇ ਪਦੇਸੇ. ਫਲਕਸਤਨ੍ਤਿ ਅਸਨਸਾਰਮਯਂ ਫਲਕਸਤਂ. ਕੁਮ੍ਭਕਾਰਚਕ੍ਕਸਦਿਸੇ ਚਕ੍ਕਯਨ੍ਤੇ. ਆਵਿਜ੍ਝਿਤ੍ਵਾਤਿ ਭਮੇਤ੍ਵਾ. ਦਣ੍ਡਕਘਟ੍ਟਨਾਯ ਉਪ੍ਪਾਦੇਤਬ੍ਬਸਦ੍ਦੋ ਦਣ੍ਡਕਸਞ੍ਞਾ. ਫਲਕਸਤਵਿਨਿਵਿਜ੍ਝਨਸ੍ਸ ਪਚ੍ਚਯਭੂਤਾ ਦਣ੍ਡਕਸਞ੍ਞਾ ਵਿਯ ਗੋਤ੍ਰਭੁਞਾਣਂ ਲੋਭਕ੍ਖਨ੍ਧਾਦਿਨਿਬ੍ਬਿਜ੍ਝਨਸ੍ਸ ਮਗ੍ਗਞਾਣਸ੍ਸ ਪਚ੍ਚਯਭਾਵਤੋ. ਇਸ੍ਸਾਸੋ ਵਿਯ ਮਗ੍ਗਞਾਣਂ ਨਿਬ੍ਬਿਜ੍ਝਿਤਬ੍ਬਨਿਵਿਜ੍ਝਨਤੋ.
੮੧੦. ਅਟ੍ਠਮਭਵਤੋ ਪਟ੍ਠਾਯ ਨਿਬ੍ਬਤ੍ਤਨਕਂ ਅਨਮਤਗ੍ਗਸਂਸਾਰਵਟ੍ਟਦੁਕ੍ਖਸਮੁਦ੍ਦਂ ਸੋਸੇਤਿ. ਸਦ੍ਧਾਧਨਂ ਸੀਲਧਨਂ ਹਿਰਿਧਨਂ ਓਤ੍ਤਪ੍ਪਧਨਂ ਸੁਤਧਨਂ ਚਾਗਧਨਂ ਪਞ੍ਞਾਧਨਨ੍ਤਿ ਇਮੇਸਂ ਸਤ੍ਤਨ੍ਨਂ ਅਰਿਯਧਨਾਨਂ. ਸਮ੍ਮੁਖੀਭਾਵਨ੍ਤਿ ਪਚ੍ਚਕ੍ਖਸਿਦ੍ਧਿਂ. ਪਾਣਾਤਿਪਾਤਾਦਿਪਞ੍ਚਵੇਰਾਨਿ ਚੇਵ ਪਞ੍ਚਵੀਸਤਿਮਹਾਭਯਾਨਿ ਚਾਤਿ ਸਬ੍ਬਵੇਰਭਯਾਨਿ. ਅਞ੍ਞੇਸਞ੍ਚ ਰਤਨਤ੍ਤਯੇ ਨਿਵਿਟ੍ਠਸਦ੍ਧਾਦੀਨਂ. ਸਮੁਦਾਯੇ ਪਵਤ੍ਤੋ ਸੋਤਾਪਤ੍ਤਿਮਗ੍ਗਸਦ੍ਦੋ ਤਦੇਕਦੇਸੇਪਿ ਪਵਤ੍ਤਤੀਤਿ ਆਹ ‘‘ਸੋਤਾਪਤ੍ਤਿਮਗ੍ਗੇਨ ਸਮ੍ਪਯੁਤ੍ਤਂ ਞਾਣ’’ਨ੍ਤਿ.
ਪਠਮਮਗ੍ਗਞਾਣਂ ਨਿਟ੍ਠਿਤਂ.
ਸੋਤਾਪਨ੍ਨਪੁਗ੍ਗਲਕਥਾਵਣ੍ਣਨਾ
੮੧੧. ਤਸ੍ਸੇਵ ਸੋਤਾਪਤ੍ਤਿਮਗ੍ਗਚਿਤ੍ਤਸ੍ਸ. ਕਾਮਞ੍ਚੇਤ੍ਥ ਨਾਤਿਤਿਕ੍ਖਪਞ੍ਞਸ੍ਸ ਦ੍ਵੇ, ਤਿਕ੍ਖਪਞ੍ਞਸ੍ਸ ਤੀਣਿ ਫਲਚਿਤ੍ਤਾਨਿ ਹੋਨ੍ਤਿ, ਅਵਿਸੇਸਤੋ ਪਨ ਗਹਿਤਸ੍ਸ ਮਗ੍ਗਸ੍ਸ ਵਸੇਨ ‘‘ਦ੍ਵੇ, ਤੀਣਿ ਵਾ’’ਤਿ ਵੁਤ੍ਤਂ. ਸਮਾਧਿਮਾਨਨ੍ਤਰਿਕਞ੍ਞਮਾਹੂਤਿ ਯਂ ਅਤ੍ਤਨੋ ਪਵਤ੍ਤਿਸਮਨਨ੍ਤਰਂ ਨਿਯਮੇਨੇਵ ਫਲਪ੍ਪਦਾਨਤੋ ਆਨਨ੍ਤਰਿਕਸਮਾਧੀਤਿ ਆਹੂਤਿ ਅਤ੍ਥੋ. ਅਨਨ੍ਤਰਮੇਵ ਪਵਤ੍ਤਨਕਂ ਫਲਂ ਅਨਨ੍ਤਰਂ, ਤਤ੍ਥ ਨਿਯੁਤ੍ਤੋ, ਤਂ ਵਾ ਪਯੋਜਨਂ ਏਤਸ੍ਸਾਤਿ ਆਨਨ੍ਤਰਿਕੋ, ਮਗ੍ਗੋ.
ਆਸੇਵਨਨ੍ਤੇਤਿ ਆਸੇਵਨਤੋ ਅਨ੍ਤੇ, ਆਸੇਵਨਲਾਭਿਨੋ ਅਨੁਲੋਮਞਾਣਸ੍ਸ ਅਨਨ੍ਤਰਨ੍ਤਿ ਅਤ੍ਥੋ. ਲਦ੍ਧਾਸੇਵਨਮੇਵ ਅਨੁਲੋਮਂ ਗੋਤ੍ਰਭੁਂ ਉਪ੍ਪਾਦੇਤਿ. ਉਪਰਿ ਪਨ ਛ, ਸਤ੍ਤ ਵਾ ਜਵਨਾਨਿ ਪਵਤ੍ਤਨ੍ਤਿ, ਤਸ੍ਮਾ ਚਤ੍ਤਾਰਿ ਫਲਚਿਤ੍ਤਾਨਿ ਹੋਨ੍ਤੀਤਿ ਵਦੇਯ੍ਯਾਤਿ ਆਹ ‘‘ਸਤ੍ਤਚਿਤ੍ਤਪਰਮਾ ਚ ਏਕਾਵਜ੍ਜਨਵੀਥੀ’’ਤਿ.
ਤਂ ਪਨ ਨ ਸਾਰਤੋ ਪਚ੍ਚੇਤਬ੍ਬਨ੍ਤਿ ਯੋਜਨਾ. ਯਂ ਪਨੇਤ੍ਥ ਵਤ੍ਤਬ੍ਬਂ, ਤਂ ਹੇਟ੍ਠਾ ਵੁਤ੍ਤਮੇਵ.
੮੧੨. ਏਤ੍ਤਾਵਤਾਤਿ ਪਠਮਮਗ੍ਗਾਨਨ੍ਤਰਂ ਫਲਸ੍ਸ ਉਪ੍ਪਤ੍ਤਿਮਕ੍ਕੇਨ. ਭੁਸਂ ਪਮਤ੍ਤੋਪੀਤਿ ਦੇਵਰਜ੍ਜਚਕ੍ਕਵਤ੍ਤਿਰਜ੍ਜਾਦਿਪਮਾਦਟ੍ਠਾਨਂ ਆਗਮ੍ਮ ਭੁਸਂ ਪਮਤ੍ਤੋਪਿ. ਯੇਸਂ ਯਥਾਵੁਤ੍ਤਆਵਜ੍ਜਨਜਵਨਚਿਤ੍ਤਾਨਂ ਉਪ੍ਪਤ੍ਤਿਯਾ ਏਸ ਸੋਤਾਪਨ੍ਨੋ ਪਚ੍ਚਵੇਕ੍ਖਤਿ ਨਾਮਾਤਿ ਅਧਿਪ੍ਪਾਯੋ.
ਏਤੇਨੇਵ ਪਸਙ੍ਗੇਨ ਸੇਸਾਨਂ ਅਰਿਯਾਨਂ ਪਚ੍ਚਵੇਕ੍ਖਣਾਨਿ ਦਸ੍ਸੇਤੁਂ ‘‘ਯਥਾ ਚਾ’’ਤਿਆਦਿ ਵੁਤ੍ਤਂ.
ਉਕ੍ਕਟ੍ਠਪਰਿਚ੍ਛੇਦੋਯੇਵ ਚੇਸੋ, ਯਦਿਦਂ ਪਞ੍ਚਨ੍ਨਂ, ਚਤੁਨ੍ਨਞ੍ਚ ਪਚ੍ਚਵੇਕ੍ਖਣਾਨਂ ਦਸ੍ਸਨਨ੍ਤਿ ਅਤ੍ਥੋ. ‘‘ਅਭਾਵੇਨੇਵਾ’’ਤਿ ਏਤੇਨ ਪਹੀਨਾਵਸਿਟ੍ਠਕਿਲੇਸਪਚ੍ਚਵੇਕ੍ਖਣਸਮਤ੍ਥਤਾ ਕਸ੍ਸਚਿ ਹੋਤਿ, ਕਸ੍ਸਚਿ ਨ ਹੋਤੀਤਿ ਦਸ੍ਸੇਤਿ. ਲੋਭੋ ਏਵ ਲੋਭਧਮ੍ਮੋ.
ਦੁਤਿਯਮਗ੍ਗਞਾਣਕਥਾਵਣ੍ਣਨਾ
੮੧੩. ਕਾਮਰਾਗਬ੍ਯਾਪਾਦਾਨਂ ਤਨੁਭਾਵਾਯਾਤਿ ਏਤੇਸਂ ਕਿਲੇਸਾਨਂ ਤਨੁਭਾਵਤ੍ਥਂ. ਤਤ੍ਥ ਦ੍ਵੀਹਿ ਕਾਰਣੇਹਿ ਤਨੁਭਾਵੋ ਅਧਿਚ੍ਚੁਪ੍ਪਤ੍ਤਿਯਾ, ਪਰਿਯੁਟ੍ਠਾਨਮਨ੍ਦਤਾਯ ਚ. ਸਕਦਾਗਾਮਿਸ੍ਸ ਹਿ ਵਟ੍ਟਾਨੁਸਾਰਿਮਹਾਜਨਸ੍ਸ ਵਿਯ ਕਿਲੇਸਾ ਅਭਿਣ੍ਹਂ ਨ ਉਪ੍ਪਜ੍ਜਨ੍ਤਿ, ਕਦਾਚਿ ਕਦਾਚਿ ਵਿਰਲ਼ਾਕਾਰਾ ਹੁਤ੍ਵਾ ਉਪ੍ਪਜ੍ਜਨ੍ਤਿ. ਤਥਾ ਉਪ੍ਪਜ੍ਜਨ੍ਤਾਪਿ ਮਦ੍ਦਨ੍ਤਾ ਛਾਦੇਨ੍ਤਾ ਅਨ੍ਧਕਾਰਂ ਕਰੋਨ੍ਤਾ ਨ ਉਪ੍ਪਜ੍ਜਨ੍ਤਿ, ਦ੍ਵੀਹਿ ਪਨ ਮਗ੍ਗੇਹਿ ਪਹੀਨਤ੍ਤਾ ਮਨ੍ਦਮਨ੍ਦਾ ਤਨੁਕਾਕਾਰਾ ਹੁਤ੍ਵਾ ਉਪ੍ਪਜ੍ਜਨ੍ਤਿ. ਕੇਚਿ ਪਨ ‘‘ਸਕਦਾਗਾਮਿਸ੍ਸਾਪਿ ਕਿਲੇਸਾ ਚਿਰੇਨ ਉਪ੍ਪਜ੍ਜਨ੍ਤਿ, ਉਪ੍ਪਜ੍ਜਨ੍ਤਾਪਿ ਬਹਲਾਵ ਉਪ੍ਪਜ੍ਜਨ੍ਤਿ. ਤਥਾ ਹਿਸ੍ਸ ਪੁਤ੍ਤਧੀਤਰੋ ਦਿਸ੍ਸਨ੍ਤੀ’’ਤਿ, ਤਂ ਅਕਾਰਣਂ ਵਤ੍ਥੁਪਟਿਸੇਵਨੇਨ ਵਿਨਾਪਿ ਗਬ੍ਭਗ੍ਗਹਣਸਬ੍ਭਾਵਤੋ. ਤਸ੍ਮਾ ਵੁਤ੍ਤਨਯੇਨੇਵ ਦ੍ਵੀਹਿ ਕਾਰਣੇਹਿ ਤੇਸਂ ਤਨੁਭਾਵੋ ਵੇਦਿਤਬ੍ਬੋ. ਦੁਤਿਯਾਯਾਤਿ ਗਣਨਵਸੇਨਪਿ ਦੁਤਿਯਾਯ, ਉਪ੍ਪਤ੍ਤਿਵਸੇਨਪਿ ਦੁਤਿਯਾਯ ਭੂਮਿਯਾ. ਪਤ੍ਤਿਯਾਤਿ ਸਾਮਞ੍ਞਫਲਸ੍ਸ ਪਟਿਲਾਭਾਯ. ਤਞ੍ਹਿ ਸਮ੍ਪਯੁਤ੍ਤਾਨਂ ਨਿਸ੍ਸਯਭਾਵਤੋ ਤੇ ਧਮ੍ਮਾ ਭਵਨ੍ਤਿ ਏਤ੍ਥਾਤਿ ਭੂਮਿ. ਯਸ੍ਮਾ ਵਾ ਸਮਾਨੇਪਿ ਲੋਕੁਤ੍ਤਰਭਾਵੇ ਸਯਮ੍ਪਿ ਭਵਤਿ ਉਪ੍ਪਜ੍ਜਤਿ, ਨ ਨਿਬ੍ਬਾਨਂ ਵਿਯ ਅਪਾਤੁਭੂਤਂ, ਤਸ੍ਮਾਪਿ ‘‘ਭੂਮੀ’’ਤਿ ਵੁਚ੍ਚਤਿ. ਯੋਗਂ ਕਰੋਤੀਤਿ ਵਿਪਸ੍ਸਨਾਭਿਯੋਗਂ ਕਰੋਤਿ. ‘‘ਨਵਹਾਕਾਰੇਹਿ ਇਨ੍ਦ੍ਰਿਯਾਨਿ ਤਿਕ੍ਖਾਨਿ ਭਵਨ੍ਤੀ’’ਤਿਆਦਿਨਾ (ਵਿਸੁਦ੍ਧਿ. ੨.੬੯੯) ਵੁਤ੍ਤਨਯੇਨੇਵ ਯਦਗ੍ਗੇਨ ਇਨ੍ਦ੍ਰਿਯਾਨਂ ਤਿਕ੍ਖਤਂ ਸਮ੍ਪਾਦੇਤਿ, ਤਦਗ੍ਗੇਨ ਬਲਾਨਿ, ਬੋਜ੍ਝਙ੍ਗਾਨਿ ਚ ਪਟੁਤਰਭਾਵਂ ਆਪਾਦੇਨ੍ਤੋ ਇਨ੍ਦ੍ਰਿਯਬਲਬੋਜ੍ਝਙ੍ਗਾਨਿ ਸਮੋਧਾਨੇਤ੍ਵਾ ਲਕ੍ਖਣਤ੍ਤਯਤੀਰਣਵਸੇਨ ਞਾਣੇਨ ਪਰਿਮਦ੍ਦਤਿ. ਤਤ੍ਥ ਅਪਰਾਪਰਂ ਞਾਣਂ ਚਾਰੇਨ੍ਤੋ ਪਰਿਵਤ੍ਤੇਤਿ. ਤੇਨਾਹ ‘‘ਵਿਪਸ੍ਸਨਾਵੀਥਿਂ ਓਗਾਹਤੀ’’ਤਿ. ਵੁਤ੍ਤਨਯੇਨੇਵਾਤਿ ਉਦਯਬ੍ਬਯਞਾਣਾਦੀਨਂ ਉਪ੍ਪਾਦਨੇ ਵੁਤ੍ਤਨਯੇਨ. ਗੋਤ੍ਰਭੁਅਨਨ੍ਤਰਨ੍ਤਿ ਏਤ੍ਥ ਗੋਤ੍ਰਭੁ ਵਿਯ ਗੋਤ੍ਰਭੁ. ਪਠਮਮਗ੍ਗਪੁਰੇਚਾਰਿਕਞਾਣਞ੍ਹਿ ਪੁਥੁਜ੍ਜਨਗੋਤ੍ਤਾਭਿਭਵਨਤੋ, ਅਰਿਯਗੋਤ੍ਤਭਵਨਤੋ ਚ ਨਿਪ੍ਪਰਿਯਾਯਤੋ ਗੋਤ੍ਰਭੂਤਿ ਵੁਚ੍ਚਤਿ, ਇਦਂ ਪਨ ਤਂਸਦਿਸਤਾਯ ਪਰਿਯਾਯਤੋ ਗੋਤ੍ਰਭੁ. ਏਕਚ੍ਚਸਂਕਿਲੇਸਵਿਸੁਦ੍ਧਿਯਾ, ਪਨ ਅਚ੍ਚਨ੍ਤਵਿਸੁਦ੍ਧਿਯਾ ਆਰਮ੍ਮਣਕਰਣਤੋ ਚ ਵੋਦਾਨਨ੍ਤਿ ਵੁਚ੍ਚਤਿ. ਤੇਨਾਹ ਪਟ੍ਠਾਨੇ ‘‘ਅਨੁਲੋਮਂ ਵੋਦਾਨਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ’’ਤਿ (ਪਟ੍ਠਾ ੧.੧.੪੧੭). ਯਸ੍ਮਾ ਪਨ ਪਟਿਸਮ੍ਭਿਦਾਮਗ੍ਗੇ ਉਪ੍ਪਾਦਾਦਿਅਭਿਭਵਨਤ੍ਥਂ ਉਪਾਦਾਯ ‘‘ਅਟ੍ਠ ਗੋਤ੍ਰਭੁਧਮ੍ਮਾ ਸਮਾਧਿਵਸੇਨ ਉਪ੍ਪਜ੍ਜਨ੍ਤਿ, ਦਸ ਗੋਤ੍ਰਭੁਧਮ੍ਮਾ ਵਿਪਸ੍ਸਨਾਵਸੇਨ ਉਪ੍ਪਜ੍ਜਨ੍ਤੀ’’ਤਿਆਦੀਸੁ (ਪਟਿ. ਮ. ੧.੬੦) ਗੋਤ੍ਰਭੁਨਾਮੇਨੇਵੇਤਂ ਆਗਤਂ, ਤਸ੍ਮਾ ਇਧਾਪਿ ‘‘ਗੋਤ੍ਰਭੁਅਨਨ੍ਤਰ’’ਨ੍ਤਿ ਵੁਤ੍ਤਨ੍ਤਿ ਦਟ੍ਠਬ੍ਬਂ.
ਦੁਤਿਯਞਾਣਂ ਨਿਟ੍ਠਿਤਂ.
ਤਤਿਯਮਗ੍ਗਞਾਣਕਥਾਵਣ੍ਣਨਾ
੮੧੪. ਸਕਿਦੇਵਾਤਿ ਏਕਵਾਰਂਯੇਵ. ‘‘ਇਮਂ ਲੋਕਂ ਆਗਨ੍ਤ੍ਵਾ’’ਤਿ ਇਮਿਨਾ ਪਞ੍ਚਸੁ ਸਕਦਾਗਾਮੀਸੁ ਚਤ੍ਤਾਰੋ ਵਜ੍ਜੇਤ੍ਵਾ ਏਕੋਵ ਗਹਿਤੋ. ਏਕਚ੍ਚੋ ਇਧ ਸਕਦਾਗਾਮਿਫਲਂ ਪਤ੍ਵਾ ਇਧੇਵ ਲੋਕੇ ਪਰਿਨਿਬ੍ਬਾਤਿ, ਏਕਚ੍ਚੋ ਇਧ ਪਤ੍ਵਾ ਦੇਵਲੋਕੇ ਪਰਿਨਿਬ੍ਬਾਤਿ, ਏਕਚ੍ਚੋ ਦੇਵਲੋਕੇ ਪਤ੍ਵਾ ਤਤ੍ਥੇਵ ਪਰਿਨਿਬ੍ਬਾਤਿ, ਏਕਚ੍ਚੋ ਦੇਵਲੋਕੇ ਪਤ੍ਵਾ ਇਧੂਪਪਜ੍ਜਿਤ੍ਵਾ ਪਰਿਨਿਬ੍ਬਾਤਿ. ਇਮੇ ਚਤ੍ਤਾਰੋਪਿ ਇਧ ਨ ਗਹਿਤਾ. ਯੋ ਪਨ ਇਧ ਪਤ੍ਵਾ ਦੇਵਲੋਕੇ ਯਾਵਤਾਯੁਕਂ ਵਸਿਤ੍ਵਾ ਪੁਨ ਇਧੂਪਪਜ੍ਜਿਤ੍ਵਾ ਪਰਿਨਿਬ੍ਬਾਤਿ, ਅਯਂ ਏਕੋਵ ਇਧ ਗਹਿਤੋਤਿ ਵੇਦਿਤਬ੍ਬੋ.
ਕਾਮਰਾਗਬ੍ਯਾਪਾਦਾਨਂ ਅਨਵਸੇਸਪ੍ਪਹਾਨਾਯਾਤਿ ਤੇਸਂਯੇਵ ਸਕਦਾਗਾਮਿਮਗ੍ਗੇਨ ਤਨੁਕਤਾਨਂ ਸਂਯੋਜਨਾਨਂ ਨਿਰਵਸੇਸਪ੍ਪਹਾਨਾਯ. ਪਟਿਸਨ੍ਧਿਵਸੇਨ ਕਾਮਭਵਸ੍ਸ ਅਨਾਗਮਨਤੋ ਅਨਾਗਾਮੀ.
ਤਤਿਯਞਾਣਂ ਨਿਟ੍ਠਿਤਂ.
ਚਤੁਤ੍ਥਮਗ੍ਗਞਾਣਕਥਾਵਣ੍ਣਨਾ
੮੧੫. ਓਪਪਾਤਿਕੋਤਿ ਉਪਪਾਤਯੋਨਿਕੋ. ਇਮਿਨਾਸ੍ਸ ਗਬ੍ਭਸੇਯ੍ਯਾ ਪਟਿਕ੍ਖਿਤ੍ਤਾ. ਤਤ੍ਥ ਪਰਿਨਿਬ੍ਬਾਯੀਤਿ ਤਤ੍ਥ ਸੁਦ੍ਧਾਵਾਸੇ ਪਰਿਨਿਬ੍ਬਾਯਿਤਾ. ਅਨਾਵਤ੍ਤਿਧਮ੍ਮੋ ਤਸ੍ਮਾ ਲੋਕਾਤਿ ਪਟਿਸਨ੍ਧਿਗ੍ਗਹਣਵਸੇਨ ਤਸ੍ਮਾ ਲੋਕਾ ਇਧ ਅਨਾਵਤ੍ਤਨਸਭਾਵੋ, ਬੁਦ੍ਧਦਸ੍ਸਨਧਮ੍ਮਸ੍ਸਵਨਾਨਂ ਪਨਤ੍ਥਾਯ ਆਗਮਨਂ ਹੋਤਿਯੇਵ.
ਰੂਪਰਾਗਅਰੂਪਰਾਗਮਾਨਉਦ੍ਧਚ੍ਚਅਵਿਜ੍ਜਾਨਂ ਅਨਵਸੇਸਪ੍ਪਹਾਨਾਯਾਤਿ ਏਤੇਸਂ ਪਞ੍ਚਨ੍ਨਂ ਉਦ੍ਧਮ੍ਭਾਗਿਯਸਂਯੋਜਨਾਨਂ ਨਿਸ੍ਸੇਸਪ੍ਪਜਹਨਤ੍ਥਾਯ. ਤਤ੍ਥ ਰੂਪਭਵੇ ਛਨ੍ਦਰਾਗੋ ਰੂਪਰਾਗੋ. ਅਰੂਪਭਵੇ ਛਨ੍ਦਰਾਗੋ ਅਰੂਪਰਾਗੋ. ਮਾਨੋ ਅਰਹਤ੍ਤਮਗ੍ਗਵਜ੍ਝਮਾਨੋ. ਤਥਾ ਉਦ੍ਧਚ੍ਚਾਵਿਜ੍ਜਾ.
ਚਤੁਤ੍ਥਞਾਣਂ ਨਿਟ੍ਠਿਤਂ.
ਅਰਹਨ੍ਤਪੁਗ੍ਗਲਕਥਾਵਣ੍ਣਨਾ
੮੧੬. ਮਹਾਖੀਣਾਸਵੋਤਿ ਮਹਾਨੁਭਾਵਤਾਨਿਬਨ੍ਧਨਂ ਪੂਜਾਵਚਨਮੇਤਂ, ਨ ਉਪਾਦਾਯਵਚਨਂ ਯਥਾ ‘‘ਮਹਾਮੋਗ੍ਗਲ੍ਲਾਨੋ’’ਤਿ. ਨ ਹਿ ਚੂਲ਼ਖੀਣਾਸਵੋ ਨਾਮ ਅਤ੍ਥਿ. ਅਨ੍ਤਿਮਦੇਹਂ ਧਾਰੇਤੀਤਿ ਅਨ੍ਤਿਮਦੇਹਧਾਰੀ. ਖਨ੍ਧਕਿਲੇਸਾਭਿਸਙ੍ਖਾਰਭਾਰਾਨਂ ਓਹਿਤਤ੍ਤਾ ਓਰੋਪਿਤਤ੍ਤਾ ਓਹਿਤਭਾਰੋ. ਅਨੁਪ੍ਪਤ੍ਤੋ ਸਦਤ੍ਥਂ ਸਕਤ੍ਥਨ੍ਤਿ ਅਨੁਪ੍ਪਤ੍ਤਸਦਤ੍ਥੋ. ਸਦਤ੍ਥੋਤਿ ਚ ਅਰਹਤ੍ਤਂ ਵੇਦਿਤਬ੍ਬਂ. ਤਞ੍ਹਿ ਅਤ੍ਤੁਪਨਿਬਨ੍ਧਨਟ੍ਠੇਨ, ਅਤ੍ਤਾਨਂ ਅਵਿਜਹਨਟ੍ਠੇਨ, ਅਤ੍ਤਨੋ ਪਰਮਤ੍ਥਟ੍ਠੇਨ ਚ ਅਤ੍ਤਨੋ ਅਤ੍ਥਤ੍ਤਾ ਸਕਤ੍ਥੋਤਿ ਵੁਚ੍ਚਤਿ. ਪਰਿਕ੍ਖੀਣਾਨਿ ਦਸਪਿ ਭਵਸਂਯੋਜਨਾਨਿ ਏਤਸ੍ਸਾਤਿ ਪਰਿਕ੍ਖੀਣਭਵਸਂਯੋਜਨੋ. ਖਨ੍ਧਾਦਿਅਤ੍ਥਂ ਸਮ੍ਮਾ ਅਞ੍ਞਾਯ ਵਿਮੁਤ੍ਤੋਤਿ ਸਮ੍ਮਦਞ੍ਞਾਵਿਮੁਤ੍ਤੋ. ਅਗ੍ਗੋ ਚ ਸੋ ਦਕ੍ਖਿਣੇਯ੍ਯੋ ਚ, ਅਗ੍ਗਦਕ੍ਖਿਣਂ ਵਾ ਅਰਹਤੀਤਿ ਅਗ੍ਗਦਕ੍ਖਿਣੇਯ੍ਯੋ.
ਬੋਧਿਪਕ੍ਖਿਯਕਥਾਵਣ੍ਣਨਾ
੮੧੭. ਚਤੁਨ੍ਨਂ ਮਗ੍ਗਞਾਣਾਨਂ ਵਸੇਨ ਚਤੁਞਾਣਾਯ. ਆਨੁਭਾਵਵਿਜਾਨਨਤ੍ਥਨ੍ਤਿ ਸਤਿਪਟ੍ਠਾਨਪਾਰਿਪੂਰਿਆਦਿਕਸ੍ਸ ਆਨੁਭਾਵਸ੍ਸ ਬੋਧਨਤ੍ਥਂ.
ਪਰਿਪੁਣ੍ਣਾ ਬੋਧਿਪਕ੍ਖਿਯਾ ਏਤਸ੍ਸਾਤਿ ਪਰਿਪੁਣ੍ਣਬੋਧਿਪਕ੍ਖਿਯੋ, ਮਗ੍ਗੋ. ਤਸ੍ਸ ਭਾਵੋ ਪਰਿਪੁਣ੍ਣਬੋਧਿਪਕ੍ਖਿਯਭਾਵੋ. ਵੁਟ੍ਠਾਨਬਲੇਹਿ ਸਮ੍ਪਯੁਤ੍ਤਤਾਵ ਵੁਟ੍ਠਾਨਬਲਸਮਾਯੋਗੋ, ਯੇ ਸਂਯੋਜਨਾਦਯੋ ਯੇਨ ਪਠਮਮਗ੍ਗਾਦਿਨਾ ਪਹਾਤਬ੍ਬਾ.
੮੧੮. ਬੁਜ੍ਝਨਟ੍ਠੇਨ ਵਾ ਬੋਧੋ, ਮਗ੍ਗਚਿਤ੍ਤੁਪ੍ਪਾਦੋ. ਤਸ੍ਸ ਬੁਜ੍ਝਨਕਿਰਿਯਾਯ ਅਨੁਗੁਣਭਾਵਤੋ ਪਕ੍ਖੇ ਭਵਾਤਿ ਬੋਧਿਪਕ੍ਖਿਯਾ.
੮੧੯. ਤੇਸੁ ਬੋਧਿਪਕ੍ਖਿਯੇਸੁ. ਆਰਮ੍ਮਣੇਸੂਤਿ ਕਾਯਾਦਿਆਰਮ੍ਮਣੇਸੁ. ਓਕ੍ਖਨ੍ਦਿਤ੍ਵਾਤਿ ਅਨੁਪਵਿਸਿਤ੍ਵਾ. ਪਕ੍ਖਨ੍ਦਿਤ੍ਵਾਤਿ ਤਸ੍ਸੇਵ ਵੇਵਚਨਂ. ਉਪਟ੍ਠਾਨਤੋਤਿ ਅਸੁਭਾਕਾਰਾਦਿਗ੍ਗਹਣਵਸੇਨ ਉਪਗਨ੍ਤ੍ਵਾ ਅਵਟ੍ਠਾਨਤੋ. ਕਾਯਾਦੀਸੁ ਅਸੁਭਾਕਾਰਾਦਿਗ੍ਗਹਣਂ ਪੁਬ੍ਬਭਾਗਸਤਿਪਟ੍ਠਾਨਵਸੇਨ ਸੁਭਸਞ੍ਞਾਦਿਪਹਾਨਕਿਚ੍ਚਸਾਧਨਂ ਮਗ੍ਗਸਤਿਪਟ੍ਠਾਨਵਸੇਨ ਵੇਦਿਤਬ੍ਬਂ. ਤਤ੍ਥ ਹਿ ਏਕਾਵ ਸਤਿ ਚਤੁਕਿਚ੍ਚਸਾਧਨਵਸੇਨ ਪਵਤ੍ਤਤਿ.
੮੨੦. ਪਦਹਨ੍ਤੀਤਿ ਵਾਯਮਨ੍ਤਿ, ਕਾਯਚਿਤ੍ਤਾਨਿ ਪਗ੍ਗਣ੍ਹਨ੍ਤਿ ਵਾ. ਅਸੋਭਾਹੇਤੂਨਂ ਸਂਕਿਲੇਸਧਮ੍ਮਾਨਂ ਪਜਹਨੇਨ, ਸੋਭਾਹੇਤੂਨਞ੍ਚ ਵੋਦਾਨਧਮ੍ਮਾਨਂ ਭਾਵਨੇਨ ਸੋਭਨਂ, ਸੁਨ੍ਦਰਨ੍ਤਿ ਅਤ੍ਥੋ. ਸੇਟ੍ਠਭਾਵਾਵਹਨਤੋਤਿ ਪਾਸਂਸਤਮਭਾਵਸਾਧਨਤੋ. ਪਧਾਨਭਾਵਕਾਰਣਤੋਤਿ ਉਤ੍ਤਮਭਾਵਹੇਤੁਤੋ.
੮੨੧. ਪੁਬ੍ਬੇ ਵੁਤ੍ਤੇਨਾਤਿ ਇਦ੍ਧਿਵਿਧਞਾਣਨਿਦ੍ਦੇਸੇ (ਵਿਸੁਦ੍ਧਿ. ੨.੩੬੯) ਵੁਤ੍ਤੇਨ. ਇਜ੍ਝਨਟ੍ਠੋ ਨਿਪ੍ਫਜ੍ਜਨਟ੍ਠੋ, ਪਟਿਲਾਭਸਮ੍ਪਦਾ ਵਾ, ਯੇਨ ਵਾ ਇਜ੍ਝਨ੍ਤਿ ਇਦ੍ਧਾ ਵੁਦ੍ਧਾ ਉਕ੍ਕਂਸਗਤਾ ਹੋਨ੍ਤਿ, ਤਂ ਇਜ੍ਝਨਂ. ਸਮਾਧਿਪਧਾਨਸਙ੍ਖਾਰਪਮੁਖਾ ਮਗ੍ਗਧਮ੍ਮਾ ਇਧ ‘‘ਇਦ੍ਧੀ’’ਤਿ ਅਧਿਪ੍ਪੇਤਾ. ਪੁਬ੍ਬਙ੍ਗਮਟ੍ਠੋ ਅਧਿਪਤਿਪਚ੍ਚਯਭਾਵੋ. ਤਸ੍ਮਾ ਸੋਤਾਪਤ੍ਤਿਮਗ੍ਗੋ ਇਜ੍ਝਤੀਤਿ ਇਦ੍ਧਿ, ਤਸ੍ਮਾ ਸਮ੍ਪਯੁਤ੍ਤਾ ਛਨ੍ਦਾਦਯੋ ਪੁਬ੍ਬਙ੍ਗਮਟ੍ਠੇਨ ਪਾਦੋ. ਤਸ੍ਸਾ ਏਵ ਫਲਭੂਤਾਯ ਵੁਟ੍ਠਾਨਗਾਮਿਨਿਯਾ ਛਨ੍ਦਾਦਯੋ ਪੁਬ੍ਬਭਾਗਕਾਰਣਟ੍ਠੇਨ ਪਾਦੋ. ਸੋਤਿ ਇਦ੍ਧਿਪਾਦੋ. ਇਮੇ ਲੋਕੁਤ੍ਤਰਾਵਾਤਿ ਇਮੇ ਯਥਾਵੁਤ੍ਤਾ ਛਨ੍ਦਾਦਯੋ ਉਤ੍ਤਰਚੂਲ਼ਭਾਜਨੀਯੇ ਆਗਤਨਯੇਨ ਲੋਕੁਤ੍ਤਰਾ ਵੇਦਿਤਬ੍ਬਾ. ਛਨ੍ਦਾਦਿਅਧਿਪਤਿਵਸੇਨ ਪਟਿਲਦ੍ਧਧਮ੍ਮਾਪਿ ਫਸ੍ਸਾਦਯੋ ਇਦ੍ਧਿਪਾਦਾ ਹੋਨ੍ਤੀਤਿ ਅਤ੍ਥੋ. ਕਾਮਞ੍ਚੇਤ੍ਥ ਇਦ੍ਧਿਪਾਦੋ ਨੋ ਅਧਿਪਤਿ, ਅਧਿਪਤਿ ਵਾ ਨੋ ਇਦ੍ਧਿਪਾਦੋ ਨਾਮ ਨਤ੍ਥਿ, ਯਥਾ ਪਨ ਏਕਸ੍ਮਿਂ ਰਜ੍ਜੇ ਰਜ੍ਜਾਰਹੇਸੁ ਚਤੂਸੁ ਰਾਜਕੁਮਾਰੇਸੁ ਏਕਸ੍ਮਿਂ ਕਾਲੇ ਏਕੋਵ ਰਜ੍ਜਮਨੁਸਾਸਤਿ, ਨ ਸਬ੍ਬੇ, ਏਵਂ ਏਕਮੇਕਸ੍ਮਿਂ ਚਿਤ੍ਤੁਪ੍ਪਾਦੇ ਏਕੋਵ ਅਧਿਪਤਿ, ਇਦ੍ਧਿਪਾਦੋ ਚ ਹੋਤੀਤਿ ਵੇਦਿਤਬ੍ਬੋ.
੮੨੨. ਅਸ੍ਸਦ੍ਧਿਯਂ ਸਦ੍ਧਾਪਟਿਪਕ੍ਖਾ ਅਕੁਸਲਾ ਧਮ੍ਮਾ, ਅਵਤ੍ਥੁਗਤੋ ਪਸਾਦਪਤਿਰੂਪਕੋ ਮਿਚ੍ਛਾਧਿਮੋਕ੍ਖੋ ਵਾ. ਕੋਸਜ੍ਜਂ ਥਿਨਮਿਦ੍ਧਪਧਾਨੋ ਅਕੁਸਲਚਿਤ੍ਤੁਪ੍ਪਾਦੋ. ਪਮਾਦੋ ਸਤਿਸਮ੍ਮੋਸੋ ਤਥਾਪਵਤ੍ਤਾ ਅਕੁਸਲਾ ਖਨ੍ਧਾ. ਅਭਿਭਵਨਸਙ੍ਖਾਤੇਨ ਅਧਿਪਤਿਯਟ੍ਠੇਨਾਤਿ ਅਸ੍ਸਦ੍ਧਿਯਾਦੀਨਂ ਅਭਿਭਵਨਤੋ ਅਭਿਭਵਨਨ੍ਤਿ ਵਤ੍ਤਬ੍ਬੇਨ ਅਧਿਮੋਕ੍ਖਪਗ੍ਗਹਉਪਟ੍ਠਾਨਅਵਿਕ੍ਖੇਪਪਜਾਨਨਸ੍ਸ ਏਕਲਕ੍ਖਣੇਨ ਸਮ੍ਪਯੁਤ੍ਤਧਮ੍ਮੇਸੁ ਅਧਿਪਤਿਯਟ੍ਠੇਨ. ਅਸ੍ਸਦ੍ਧਿਯਾਦੀਹਿ ਚਾਤਿ ਚ-ਸਦ੍ਦੋ ਸਮੁਚ੍ਚਯਤ੍ਥੋ ਅਟ੍ਠਾਨਪ੍ਪਯੁਤ੍ਤੋ, ਤਸ੍ਮਾ ਅਕਮ੍ਪਿਯਟ੍ਠੇਨ ਚ ਸਮ੍ਪਯੁਤ੍ਤਧਮ੍ਮੇਸੁ ਥਿਰਭਾਵੇਨ ਚ ਬਲਨ੍ਤਿ ਏਵਮੇਤ੍ਥ ਅਧਿਪ੍ਪਾਯੋ ਵੇਦਿਤਬ੍ਬੋ.
੮੨੩. ਬੁਜ੍ਝਨਕਸਤ੍ਤਸ੍ਸਾਤਿ ਚਤੁਨ੍ਨਂ ਅਰਿਯਸਚ੍ਚਾਨਂ ਪਟਿਵਿਜ੍ਝਨਕਸਤ੍ਤਸ੍ਸ. ਯੋ ਹੇਸੋ ਲੋਕੁਤ੍ਤਰਮਗ੍ਗਕ੍ਖਣੇ ਉਪ੍ਪਜ੍ਜਮਾਨਾਯ ਸਤਿਆਦਿਧਮ੍ਮਸਾਮਗ੍ਗਿਯਾ ਕਰਣਭੂਤਾਯ ਬੁਜ੍ਝਤਿ ਕਿਲੇਸਸਨ੍ਤਾਨਨਿਦ੍ਦਾਯ ਉਟ੍ਠਹਤਿ, ਚਤ੍ਤਾਰਿ ਵਾ ਅਰਿਯਸਚ੍ਚਾਨਿ ਪਟਿਵਿਜ੍ਝਤਿ, ਨਿਬ੍ਬਾਨਮੇਵ ਵਾ ਸਚ੍ਛਿਕਰੋਤੀਤਿ ਬੋਧੀਤਿ ਵੁਚ੍ਚਤਿ ਅਰਿਯਸਾਵਕੋ, ਤਸ੍ਸ ਬੋਧਿਸ੍ਸ ਬੁਜ੍ਝਨਕਸਤ੍ਤਸ੍ਸ ਅਙ੍ਗਾਤਿ ਬੋਜ੍ਝਙ੍ਗਾ. ਨਿਯ੍ਯਾਨਿਕਟ੍ਠੇਨਾਤਿ ਵਟ੍ਟਤੋ ਨਿਸ੍ਸਰਣਟ੍ਠੇਨ.
੮੨੪. ਪੁਬ੍ਬਭਾਗੇ ਨਾਨਾਚਿਤ੍ਤੇਸੁ ਲਬ੍ਭਨ੍ਤੀਤਿ ਸਮ੍ਬਨ੍ਧੋ. ਚੁਦ੍ਦਸਵਿਧੇਨਾਤਿ ਆਨਾਪਾਨਇਰਿਯਾਪਥਚਤੁਸਮ੍ਪਜਞ੍ਞਪਟਿਕ੍ਕੂਲਮਨਸਿਕਾਰਧਾਤੁਮਨਸਿਕਾਰਪਬ੍ਬਾਨਿ, ਨਵ ਸਿਵਥਿਕਪਬ੍ਬਾਨਿ ਚਾਤਿ ਏਵਂ ਚੁਦ੍ਦਸਵਿਧੇਨ. ਕਾਯਂ ਪਰਿਗ੍ਗਣ੍ਹਤੋ ਚ ਕਾਯਾਨੁਪਸ੍ਸਨਾਸਤਿਪਟ੍ਠਾਨਂ ਲਬ੍ਭਤਿ, ਨ ਵੇਦਨਾਦਯੋ ਪਰਿਗ੍ਗਣ੍ਹਤੋ. ਏਸ ਨਯੋ ਸੇਸੇਸੁਪਿ. ‘‘ਸੁਖਂ ਵੇਦਨ’’ਨ੍ਤਿਆਦਿਨਾਤਿ ਵਾ ‘‘ਸਾਮਿਸ’’ਨ੍ਤਿਆਦਿਨਾਤਿ ਵਾ ‘‘ਨਿਰਾਮਿਸ’’ਨ੍ਤਿਆਦਿਨਾਤਿ ਵਾ ਏਵਂ ਨਵਵਿਧੇਨ. ਸਰਾਗਦੋਸਮੋਹਸਂਖਿਤ੍ਤਮਹਗ੍ਗਤਸਮਾਹਿਤਸਉਤ੍ਤਰਵਿਮੁਤ੍ਤਪਦਾਨਂ ਸਪਟਿਪਕ੍ਖਾਨਂ ਵਸੇਨ ਸੋਲ਼ਸਵਿਧੇਨ. ਨੀਵਰਣੁਪਾਦਾਨਕ੍ਖਨ੍ਧਾਯਤਨਬੋਜ੍ਝਙ੍ਗਸਚ੍ਚਪਬ੍ਬਾਨਂ ਵਸੇਨ ਪਞ੍ਚਵਿਧੇਨ. ਇਮਸ੍ਮਿਂ ਅਤ੍ਤਭਾਵੇਤਿ ਪਚ੍ਚੁਪ੍ਪਨ੍ਨੇ ਅਤ੍ਤਭਾਵੇ. ਅਨੁਪ੍ਪਨ੍ਨਪੁਬ੍ਬਨ੍ਤਿ ਅਤ੍ਤਨੋ ਅਭੂਤਪੁਬ੍ਬਂ. ਪਰਸ੍ਸ ਉਪ੍ਪਨ੍ਨਂ ਅਕੁਸਲਂ ਦਿਸ੍ਵਾ ਤਨ੍ਨਿਮਿਤ੍ਤਞ੍ਚ ਵਧਬਨ੍ਧਾਰਹਾਦੀਨੀਤਿ ਅਧਿਪ੍ਪਾਯੋ. ਤਸ੍ਸਾਤਿ ਤਾਦਿਸਸ੍ਸ. ਭਵਤਿ ਹਿ ਤਂਸਦਿਸੇਪਿ ਤਬ੍ਬੋਹਾਰੋ ਯਥਾ ‘‘ਤਾਨਿਯੇਵ ਓਸਧਾਨੀ’’ਤਿ. ਤਸ੍ਸ ਪਹਾਨਾਯਾਤਿ ਏਤ੍ਥਾਪਿ ਏਸੇਵ ਨਯੋ. ਝਾਨਵਿਪਸ੍ਸਨਾ ਇਤੋ ਅਞ੍ਞਸ੍ਮਿਂ ਅਤ੍ਤਭਾਵੇ ਉਪ੍ਪਨ੍ਨਪੁਬ੍ਬਾਪਿ ਸਿਯੁਨ੍ਤਿ ਵੁਤ੍ਤਂ ‘‘ਇਮਸ੍ਮਿਂ ਅਤ੍ਤਭਾਵੇ ਅਨੁਪ੍ਪਨ੍ਨਪੁਬ੍ਬ’’ਨ੍ਤਿ, ਛਨ੍ਦਿਦ੍ਧਿਪਾਦਸਮ੍ਮਾਵਾਚਾਨਂਯੇਵ ਗਹਣਂ. ਤੇਸੁ ਵੁਤ੍ਤੇਸੁ ਸੇਸਿਦ੍ਧਿਪਾਦਸੇਸਵਿਰਤਿਯੋ ਅਤ੍ਥਤੋ ਵੁਤ੍ਤਾਵ ਹੋਨ੍ਤੀਤਿ ਲਕ੍ਖਣਹਾਰਵਸੇਨ ਅਯਮਤ੍ਥੋ ਵੇਦਿਤਬ੍ਬੋ. ਏਵਂ ਨਾਨਾਚਿਤ੍ਤੇਸੁ ਲਬ੍ਭਨ੍ਤਿ ਪੁਬ੍ਬਭਾਗੇ ਏਤੇ ਸਤਿਪਟ੍ਠਾਨਸਮ੍ਮਪ੍ਪਧਾਨਇਦ੍ਧਿਪਾਦਾ. ਚਤੁਨ੍ਨਂ ਞਾਣਾਨਨ੍ਤਿ ਚਤੁਨ੍ਨਂ ਅਰਿਯਮਗ੍ਗਞਾਣਾਨਂ. ਕਾਮਂ ਸਬ੍ਬੇਪਿ ਬੋਧਿਪਕ੍ਖਿਯਧਮ੍ਮਾ ਮਗ੍ਗਚਿਤ੍ਤੁਪ੍ਪਾਦਪਰਿਯਾਪਨ੍ਨਾਵ, ਤਥਾਪਿ ਸਾਤਿਸਯੋ ਸਮ੍ਮਪ੍ਪਧਾਨਬ੍ਯਾਪਾਰੋ ਮਗ੍ਗਕ੍ਖਣੇਤਿ ਵੁਤ੍ਤਂ ‘‘ਫਲਕ੍ਖਣੇ ਠਪੇਤ੍ਵਾ ਚਤ੍ਤਾਰੋ ਸਮ੍ਮਪ੍ਪਧਾਨੇ’’ਤਿ. ਅਵਸੇਸਾ ਤੇਤ੍ਤਿਂਸ ਲਬ੍ਭਨ੍ਤਿ, ਤੇ ਚ ਖੋ ਪਰਿਯਾਯਤੋ, ਨ ਨਿਪ੍ਪਰਿਯਾਯਤੋਤਿ ਅਧਿਪ੍ਪਾਯੋ.
੮੨੫. ਸੇਸੇਸੁ ਪਨਾਤਿ ਇਦ੍ਧਿਪਾਦਾਦੀਸੁ ਪਞ੍ਚਸੁ ਕੋਟ੍ਠਾਸੇਸੁ. ਯਥਾ ਸਤਿਵੀਰਿਯੇਸੁ ‘‘ਸਤਿਪਟ੍ਠਾਨਂ ਸਮ੍ਮਪ੍ਪਧਾਨ’’ਨ੍ਤਿ ਸਙ੍ਖਿਪਨਵਸੇਨ ਹਾਪਨਂ, ‘‘ਕਾਯਾਨੁਪਸ੍ਸਨਾ’’ਤਿਆਦਿਵਿਭਾਗਦਸ੍ਸਨਵਸੇਨ ਵਡ੍ਢਨਂ ਅਤ੍ਥਿ, ਈਦਿਸਂ ਹਾਪਨਵਡ੍ਢਨਂ ਨਤ੍ਥੀਤਿ ਅਤ੍ਥੋ.
੮੨੬. ਇਦਾਨਿ ਸਬ੍ਬੇਸੁ ਏਵ ਯਥਾਰਹਂ ਲਬ੍ਭਮਾਨਵਿਭਾਗਦਸ੍ਸਨਤ੍ਥਂ ‘‘ਅਪਿਚਾ’’ਤਿਆਦਿ ਆਰਦ੍ਧਂ. ਤਤ੍ਥ ਤੇਸੂਤਿ ਸਤ੍ਤਤਿਂਸਾਯ ਬੋਧਿਪਕ੍ਖਿਯਧਮ੍ਮੇਸੁ. ਛਦ੍ਧਾਤਿ ਏਕਧਾ ਦ੍ਵੇਧਾ ਚਤੁਧਾ ਪਞ੍ਚਧਾ ਅਟ੍ਠਧਾ ਨਵਧਾਤਿ ਏਵਂ ਛਪ੍ਪਕਾਰੇਨ ਤੇ ਭਵਨ੍ਤਿ.
ਛਨ੍ਦਿਦ੍ਧਿਪਾਦਾਦਿਵਸੇਨਾਤਿ ਛਨ੍ਦੋ ਛਨ੍ਦਿਦ੍ਧਿਪਾਦਵਸੇਨੇਵ, ਚਿਤ੍ਤਂ ਚਿਤ੍ਤਿਦ੍ਧਿਪਾਦਵਸੇਨੇਵ, ਪੀਤਿਪਸ੍ਸਦ੍ਧਿਉਪੇਕ੍ਖਾ ਬੋਜ੍ਝਙ੍ਗਵਸੇਨੇਵ, ਸਙ੍ਕਪ੍ਪਾਦਯੋ ਮਗ੍ਗਵਸੇਨੇਵਾਤਿ ਏਵਂ ਨਵ ਏਕਵਿਧਾਵ ਹੋਨ੍ਤਿ.
ਚੁਦ੍ਦਸੇਵ ਅਸਮ੍ਭਿਨ੍ਨਾਤਿ ਸਤਿ ਵੀਰਿਯਂ ਛਨ੍ਦੋ ਚਿਤ੍ਤਂ ਪਞ੍ਞਾ ਸਦ੍ਧਾ ਸਮਾਧਿ ਪੀਤਿ ਪਸ੍ਸਦ੍ਧਿ ਉਪੇਕ੍ਖਾ ਸਮ੍ਮਾਸਙ੍ਕਪ੍ਪੋ ਸਮ੍ਮਾਵਾਚਾ ਸਮ੍ਮਾਕਮ੍ਮਨ੍ਤੋ ਸਮ੍ਮਾਆਜੀਵੋਤਿ ਇਮੇ ਅਸਮ੍ਭਿਨ੍ਨਾ ਪਦਨ੍ਤਰਸਮ੍ਭੇਦੇਨ ਵਿਨਾ ਅਗ੍ਗਹਿਤਗ੍ਗਹਣੇਨ ਗਯ੍ਹਮਾਨਾ ਚੁਦ੍ਦਸੇਵ ਚ ਸਭਾਵਧਮ੍ਮਾ. ਚੁਦ੍ਦਸਾਤਿ ਚ ਉਕ੍ਕਂਸਪਰਿਚ੍ਛੇਦੇਨ ਵੁਤ੍ਤਂ. ਤਞ੍ਚ ਖੋ ਪਠਮਜ੍ਝਾਨਿਕਮਗ੍ਗਚਿਤ੍ਤੁਪ੍ਪਾਦਵਸੇਨ, ਦੁਤਿਯਜ੍ਝਾਨਿਕੇ ਪਨ ਸਮ੍ਮਾਸਙ੍ਕਪ੍ਪਾਭਾਵਤੋ ਤੇਰਸ, ਤਤਿਯਚਤੁਤ੍ਥਪਞ੍ਚਮਜ੍ਝਾਨਿਕੇਸੁ ਪੀਤਿਸਮ੍ਬੋਜ੍ਝਙ੍ਗਾਭਾਵਤੋ ਦ੍ਵਾਦਸ ਹੋਨ੍ਤਿ. ‘‘ਸਤ੍ਤਤਿਂਸਪ੍ਪਭੇਦਤੋ’’ਤਿ ਇਦਮ੍ਪਿ ਉਕ੍ਕਂਸਵਸੇਨੇਵ ਵੁਤ੍ਤਂ, ਅਵਕਂਸਤੋ ਪਨ ਵੁਤ੍ਤਨਯੇਨ ਏਕਸ੍ਮਿਂ ਖਣੇ ਛਤ੍ਤਿਂਸ, ਪਞ੍ਚਤਿਂਸ ਹੋਨ੍ਤਿ, ਚਤੁਨ੍ਨਂ ਅਧਿਪਤੀਨਂ ਏਕਜ੍ਝਂ ਅਨੁਪ੍ਪਜ੍ਜਨਤੋ ਏਕਸ੍ਮਿਂ ਖਣੇ ਏਕਸ੍ਸੇਵ ਇਦ੍ਧਿਪਾਦਸ੍ਸ ਸਮ੍ਭਵੋਤਿ ਦ੍ਵਤ੍ਤਿਂਸ ਚ ਹੋਨ੍ਤੀਤਿ ਵੇਦਿਤਬ੍ਬਂ.
ਸਤ੍ਤਤਿਂਸਪਭੇਦਤੋ ਕਥਨ੍ਤਿ ਆਹ ‘‘ਸਕਿਚ੍ਚਨਿਪ੍ਫਾਦਨਤੋ’’ਤਿਆਦਿ, ਏਕਚ੍ਚਸ੍ਸ ਸਭਾਵਤੋ ਏਕਸ੍ਸਾਪਿ ਅਤ੍ਤਨੋ ਆਨੁਭਾਵਾਨੁਰੂਪਕਾਯਾਨੁਪਸ੍ਸਨਾਦਿਤਂਤਂਕਿਚ੍ਚਸਾਧਨਤੋਤਿ ਅਤ੍ਥੋ. ਸਰੂਪੇਨ ਚ ਵੁਤ੍ਤਿਤੋਤਿ ਅਭੇਦਸ੍ਸ ਚਿਤ੍ਤਿਦ੍ਧਿਪਾਦਾਦਿਕਸ੍ਸ ਸਰੂਪੇਨੇਵ ਪਵਤ੍ਤਨਤੋ ਚ.
ਏਤ੍ਥਾਤਿ ਞਾਣਦਸ੍ਸਨਵਿਸੁਦ੍ਧਿਯਂ. ਕਸ੍ਮਾ ਪਨ ਬੋਧਿਪਕ੍ਖਿਯੇਸੁ ਝਾਨਕੋਟ੍ਠਾਸੋ ਨ ਗਹਿਤੋ, ਨਨੁ ਝਾਨਰਹਿਤੋ ਅਰਿਯਮਗ੍ਗੋ ਨਤ੍ਥੀਤਿ? ਸਚ੍ਚਂ ਨਤ੍ਥਿ, ਤਤੋ ਏਵ ਨ ਖੋ ਪਨੇਤਂ ਏਵਂ ਦਟ੍ਠਬ੍ਬਂ ‘‘ਬੋਧਿਪਕ੍ਖਿਯੇਸੁ ਝਾਨਂ ਨ ਗਹਿਤ’’ਨ੍ਤਿ ਲਕ੍ਖਣੂਪਨਿਜ੍ਝਾਨਲਕ੍ਖਣਸ੍ਸ ਝਾਨਸ੍ਸ ਮਗ੍ਗਗ੍ਗਹਣੇਨੇਵ ਗਹਿਤਤ੍ਤਾ. ਤਞ੍ਹਿ ਸਨ੍ਧਾਯ ‘‘ਯਸ੍ਮਿਂ ਸਮਯੇ ਲੋਕੁਤ੍ਤਰਂ ਝਾਨਂ ਭਾਵੇਤੀ’’ਤਿਆਦਿ (ਧ. ਸ. ੨੭੭, ੩੪੩ ਆਦਯੋ) ਵੁਤ੍ਤਂ. ਆਰਮ੍ਮਣੂਪਨਿਜ੍ਝਾਨਲਕ੍ਖਣਸ੍ਸ ਪਨੇਤ੍ਥ ਸਮ੍ਭਵੋ ਏਵ ਨਤ੍ਥਿ. ਅਪਰੋ ਨਯੋ – ਕਸ੍ਮਾ ਪਨ ਬੋਧਿਪਕ੍ਖਿਯੇਸੁ ਝਾਨਕੋਟ੍ਠਾਸੋ ਨ ਗਹਿਤੋ, ਨਨੁ ਝਾਨਰਹਿਤੋ ਅਰਿਯਮਗ੍ਗੋ ਨਤ੍ਥਿ, ਨ ਚ ਤਂ ਪਟਿਪਦਾ ਵਿਯ ਏਕਨ੍ਤਪੁਬ੍ਬਭਾਗਿਯਂ, ਨਾਪਿ ਏਕਚ੍ਚਪਟਿਸਮ੍ਭਿਦਾ ਵਿਯ ਮਗ੍ਗਨਿਸ੍ਸਨ੍ਦੋ, ਅਥ ਖੋ ਮਗ੍ਗਚਿਤ੍ਤੁਪ੍ਪਾਦਪਰਿਯਾਪਨ੍ਨੋ, ਯਤੋ ‘‘ਲੋਕੁਤ੍ਤਰਂ ਝਾਨਂ ਭਾਵੇਤੀ’’ਤਿ (ਧ. ਸ. ੨੭੭, ੩੪੩ ਆਦਯੋ) ਵੁਤ੍ਤਂ, ਮਗ੍ਗਮਗ੍ਗਪਰਿਵਾਰਧਮ੍ਮਾ ਚ ਬੋਧਿਪਕ੍ਖਿਯਧਮ੍ਮਾਤਿ? ਵੁਚ੍ਚਤੇ – ਯਂ ਤਾਵ ਵੁਤ੍ਤਂ ਝਾਨਰਹਿਤੋ ਅਰਿਯਮਗ੍ਗੋ ਨਤ੍ਥੀ’’ਤਿ, ਤਤ੍ਥ ਨ ਅਰਿਯਮਗ੍ਗਸਮ੍ਪਯੋਗਮਤ੍ਤੇਨ ਝਾਨਸ੍ਸ ਬੋਧਿਪਕ੍ਖਿਯਤਾ ਲਬ੍ਭਤਿ ਅਤਿਪ੍ਪਸਙ੍ਗਤੋ. ਆਹਾਰਾਦੀਨਮ੍ਪਿ ਹਿ ਬੋਧਿਪਕ੍ਖਿਯਤਾ ਆਪਜ੍ਜੇਯ੍ਯਾਤਿ. ਏਤੇਨ ਮਗ੍ਗਚਿਤ੍ਤੁਪ੍ਪਾਦਪਰਿਯਾਪਨ੍ਨਤਾ ਬੋਧਿਪਕ੍ਖਿਯਭਾਵਸ੍ਸ ਅਕਾਰਣਨ੍ਤਿ ਦਸ੍ਸਿਤਂ ਹੋਤਿ.
ਯਂ ਪਨ ਵੁਤ੍ਤਂ ‘‘ਮਗ੍ਗਮਗ੍ਗਪਰਿਵਾਰਧਮ੍ਮਾ ਚ ਬੋਧਿਪਕ੍ਖਿਯਾ’’ਤਿ, ਤਤ੍ਥ ਪਰਿਵਾਰਟ੍ਠੋ ਕਿਂ ਸਹਪਵਤ੍ਤਿਅਤ੍ਥੋ, ਉਦਾਹੁ ਪਰਿਕ੍ਖਾਰਟ੍ਠੋਤਿ? ਯਦਿ ਪੁਰਿਮੋ ਪਕ੍ਖੋ, ਸੋ ਪਗੇਵ ਨਿਲ੍ਲੋਚਿਤੋ. ਅਥ ਦੁਤਿਯੋ, ਇਦਂ ਵਿਚਾਰੇਤਬ੍ਬਂ. ਕਥਂ ਪਵਤ੍ਤਮਾਨਂ ਝਾਨਂ ਮਗ੍ਗਸ੍ਸ ਪਰਿਕ੍ਖਾਰੋ? ਯਦਿ ਸਹਜਾਤਾਦਿਪਚ੍ਚਯਭਾਵੇਨ, ਏਵਂ ਸਤਿ ਫਸ੍ਸਾਦੀਨਮ੍ਪਿ ਮਗ੍ਗਪਰਿਕ੍ਖਾਰਤਾ ਆਪਜ੍ਜਤਿ. ਅਥ ਪਟਿਪਕ੍ਖਵਿਧਂਸਨੇਨ, ਨ ਸਬ੍ਬੇ ਝਾਨਧਮ੍ਮਾ ਪਟਿਪਕ੍ਖਵਿਧਂਸਨਸਮਤ੍ਥਾ. ਨ ਹਿ ਵਿਚਾਰੋ, ਵੇਦਨਾ ਚ ਕਸ੍ਸਚਿ ਸਂਕਿਲੇਸਧਮ੍ਮਸ੍ਸ ਉਜੁਪਟਿਪਕ੍ਖਭਾਵੇਨ ਪਵਤ੍ਤਨ੍ਤਿ. ਯਂ ਪਨ ਪੇਟਕੇ ‘‘ਸੁਖਂ ਉਦ੍ਧਚ੍ਚਕੁਕ੍ਕੁਚ੍ਚਸ੍ਸ, ਵਿਚਾਰੋ ਵਿਚਿਕਿਚ੍ਛਾਯ ਪਟਿਪਕ੍ਖੋ’’ਤਿ ਵੁਤ੍ਤਂ, ਤਂ ਪਰਿਯਾਯੇਨ ਵੁਤ੍ਤਂ. ਨ ਹਿ ਸੁਖਂ ਸਯਂ ਉਦ੍ਧਚ੍ਚਕੁਕ੍ਕੁਚ੍ਚਸ੍ਸ ਪਟਿਪਕ੍ਖੋ, ਪਟਿਪਕ੍ਖਸ੍ਸ ਪਨ ਸਮਾਧਿਸ੍ਸ ਪਚ੍ਚਯਤਾਯ ਪਟਿਪਕ੍ਖੋ. ਨ ਚ ਵਿਚਾਰੋ ਪਞ੍ਞਾ ਵਿਯ, ਅਧਿਮੋਕ੍ਖੋ ਵਿਯ ਵਾ ਵਿਚਿਕਿਚ੍ਛਾਯ ਪਟਿਪਕ੍ਖੋ, ਪਟਿਪਕ੍ਖਸ੍ਸ ਪਟਿਰੂਪਤਾਯ ਪਨ ਪਟਿਪਕ੍ਖੋ ਵੁਤ੍ਤੋ. ਤਥਾ ਪੀਤਿਪਿ ਨ ਬ੍ਯਾਪਾਦਸ੍ਸ ਅਦੋਸੋ ਵਿਯ ਉਜੁਪਟਿਪਕ੍ਖੋ, ਅਦੋਸਸਮ੍ਪਯੋਗਤੋ ਪਨ ਪਟਿਪਕ੍ਖੋ ਵੁਤ੍ਤੋ. ਤੇਨ ਵੁਤ੍ਤਂ ‘‘ਤਂ ਪਰਿਯਾਯੇਨ ਵੁਤ੍ਤ’’ਨ੍ਤਿ. ਵਿਤਕ੍ਕਸਮਾਧਯੋ ਏਵ ਪਨ ਝਾਨਧਮ੍ਮੇਸੁ ਉਜੁਕਂ ਪਟਿਪਕ੍ਖਵਿਧਂਸਨਸਮਤ੍ਥਾਤਿ ਪਟਿਪਕ੍ਖਵਿਦ੍ਧਂਸਨਸਮਤ੍ਥਸ੍ਸ ਪਰਿਪੁਣ੍ਣਸ੍ਸ ਝਾਨਕੋਟ੍ਠਾਸਸ੍ਸ ਅਭਾਵਤੋ ਨ ਚਸ੍ਸ ਬੋਧਿਪਕ੍ਖਿਯੇਸੁ ਸਙ੍ਗਹੋ ਕਤੋ. ਯਸ੍ਮਾ ਪਨ ਸਮ੍ਮਾਸਙ੍ਕਪ੍ਪੋ, ਸਮ੍ਮਾਸਮਾਧਿ ਚ ਮਗ੍ਗਪਰਿਯਾਪਨ੍ਨਾ ਝਾਨਧਮ੍ਮਾ, ਤਸ੍ਮਾ ਤੇ ਸਨ੍ਧਾਯ ਤਂਸਮ੍ਪਯੁਤ੍ਤਤਾਯ ਵਾ ਇਤਰੇਪਿ ਗਹੇਤ੍ਵਾ ਪਰਿਯਾਯੇਨ ਵੁਤ੍ਤਂ ਪਾਲ਼ਿਯਂ ‘‘ਯਸ੍ਮਿਂ ਸਮਯੇ ਲੋਕੁਤ੍ਤਰਂ ਝਾਨਂ ਭਾਵੇਤਿ ਨਿਯ੍ਯਾਨਿਕ’’ਨ੍ਤਿਆਦਿ (ਧ. ਸ. ੨੭੭).
ਵੁਟ੍ਠਾਨਬਲਸਮਾਯੋਗਕਥਾਵਣ੍ਣਨਾ
੮੨੭. ਵੁਟ੍ਠਾਨਂ ਨਿਮਿਤ੍ਤਤੋ, ਪਵਤ੍ਤਤੋ ਚ ਵੁਟ੍ਠਾਨਂ. ਬਲਸਮਾਯੋਗੋ ਸਮਥਵਿਪਸ੍ਸਨਾਬਲੇਹਿ ਸਮ੍ਪਯੁਤ੍ਤਤਾ. ਪਰਿਞ੍ਞਾਭਿਸਮਯਾਦਿਵਸੇਨ ਦੁਕ੍ਖਾਦੀਸੁ ਵਿਸੇਸਦਸ੍ਸਨਟ੍ਠੇਨ ਮਗ੍ਗਪਞ੍ਞਾਪਿ ਵਿਪਸ੍ਸਨਾਤਿ ਵੁਚ੍ਚਤੀਤਿ ‘‘ਲੋਕਿਯਵਿਪਸ੍ਸਨਾ’’ਤਿ ਵਿਸੇਸੇਤ੍ਵਾ ਵੁਤ੍ਤਂ. ਤੇਨੇਵਾਹ ‘‘ਵੁਟ੍ਠਾਨਟ੍ਠੇਨ ਸਮਥਵਿਪਸ੍ਸਨਂ ਯੁਗਨਦ੍ਧਂ ਭਾਵੇਤੀ’’ਤਿ (ਪਟਿ. ਮ. ੨.੫). ਨਿਮਿਤ੍ਤਾਰਮ੍ਮਣਤ੍ਤਾ ਨੇਵਨਿਮਿਤ੍ਤਾ ਵੁਟ੍ਠਾਤਿ, ਪਵਤ੍ਤਿ…ਪੇ… ਛਿਨ੍ਦਨਤੋ ਨ ਪਵਤ੍ਤਾ ਵੁਟ੍ਠਾਤੀਤਿ ਯੋਜਨਾ. ਤਤ੍ਥ ਨਿਮਿਤ੍ਤਤੋ ਵੁਟ੍ਠਾਨਂ ਸਙ੍ਖਾਰਨਿਮਿਤ੍ਤਂ ਨਿਸ੍ਸਜ੍ਜਿਤ੍ਵਾ ਨਿਬ੍ਬਾਨਾਰਮ੍ਮਣਕਰਣਂ. ਪਵਤ੍ਤਤੋ ਵੁਟ੍ਠਾਨਂ ਹੇਤੁਨਿਰੋਧੇਨ ਆਯਤਿਂ ਵਿਪਾਕਪ੍ਪਵਤ੍ਤਸ੍ਸ ਅਨੁਪ੍ਪਵਤ੍ਤਿਧਮ੍ਮਤਾਪਾਦਨਂ. ਤੇਨਾਹ ‘‘ਸਮੁਦਯਸ੍ਸ ਅਸਮੁਚ੍ਛਿਨ੍ਦਨਤੋ ਪਵਤ੍ਤਾ ਨ ਵੁਟ੍ਠਾਤੀ’’ਤਿ.
ਦੁਭਤੋਤਿ ਉਭਤੋ, ਦ-ਕਾਰਾਗਮਂ ਕਤ੍ਵਾ ਏਵਂ ਵੁਤ੍ਤਂ. ਦੁਭਾਤਿ ਵਾ ਪਦਨ੍ਤਰਮੇਵੇਤਂ ਉਭਯਸਦ੍ਦੇਨ ਸਮਾਨਤ੍ਥਂ. ਦਸ੍ਸਨਟ੍ਠੇਨਾਤਿ ਪਰਿਞ੍ਞਾਭਿਸਮਯਾਦਿਲਕ੍ਖਣੇਨ ਚਤੁਸਚ੍ਚਦਸ੍ਸਨਟ੍ਠੇਨ. ਮਿਚ੍ਛਾਦਿਟ੍ਠਿਯਾਤਿ ਦ੍ਵਾਸਟ੍ਠਿਪ੍ਪਭੇਦਾਯਪਿ ਮਿਚ੍ਛਾਦਿਟ੍ਠਿਯਾ. ਤਦਨੁਵਤ੍ਤਕਕਿਲੇਸੇਹੀਤਿ ਅਪਾਯਗਮਨੀਯਤਾਯ ਤਸ੍ਸਾ ਮਿਚ੍ਛਾਦਿਟ੍ਠਿਯਾ ਅਨੁਵਤ੍ਤਕੇਹਿ ਵਿਚਿਕਿਚ੍ਛਾਦਿਕਿਲੇਸੇਹਿ. ਖਨ੍ਧੇਹੀਤਿ ਏਤ੍ਥਾਪਿ ਤਦਨੁਵਤ੍ਤਕਸਦ੍ਦੋ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬੋ. ਤੇ ਚ ਮਿਚ੍ਛਾਦਿਟ੍ਠਿਆਦਿਪਚ੍ਚਯਾ ਉਪ੍ਪਜ੍ਜਨਾਰਹਾ ਵੇਦਿਤਬ੍ਬਾ. ਮਿਚ੍ਛਾਸਙ੍ਕਪ੍ਪਾਤਿਆਦੀਸੁਪਿ ਤਦਨੁਵਤ੍ਤਕਕਿਲੇਸੇਹਿ ਚ ਖਨ੍ਧੇਹਿ ਚ ਵੁਟ੍ਠਾਤਿ. ਬਹਿਦ੍ਧਾ ਚ ਸਬ੍ਬਨਿਮਿਤ੍ਤੇਹਿ ਵੁਟ੍ਠਾਤੀਤਿ ਪਾਲ਼ਿ ਸਂਖਿਤ੍ਤਾ. ਯਥਾ ਮਿਚ੍ਛਾਦਿਟ੍ਠਿਮਿਚ੍ਛਾਸਙ੍ਕਪ੍ਪਾ, ਏਵਂ ਮਿਚ੍ਛਾਵਾਚਾਦਯੋਪਿ ਅਪਾਯਗਮਨੀਯਾ ਏਵ ਵੇਦਿਤਬ੍ਬਾ. ਮਿਚ੍ਛਾਵਾਚਾਕਮ੍ਮਨ੍ਤਾਜੀਵਾ ਚੇਤਨਾਸਭਾਵਾ. ਮਿਚ੍ਛਾਸਤਿ ਤਥਾਪਵਤ੍ਤਾ ਚਤ੍ਤਾਰੋ ਖਨ੍ਧਾ. ਉਪਰਿਮਗ੍ਗਤ੍ਤਯੇ ਸਮ੍ਮਾਦਿਟ੍ਠਿ ਤਂਤਂਮਗ੍ਗਵਜ੍ਝਾ ਮਾਨਤੋ ਵੁਟ੍ਠਾਤਿ. ਸੋ ਹਿ ‘‘ਅਹਮਸ੍ਮੀ’’ਤਿ ਪਵਤ੍ਤਿਯਾ ਦਿਟ੍ਠਿਟ੍ਠਾਨਿਯੋ, ਮਿਚ੍ਛਾਮਗ੍ਗਤੋ ਪਨੇਤ੍ਥ ਵੁਟ੍ਠਾਨਂ ਅਨੁਦ੍ਧਰਿਤ੍ਵਾ ਤਂਤਂਮਗ੍ਗਵਜ੍ਝਸਂਯੋਜਨਾਨੁਸਯੇਹੇਵ ਵੁਟ੍ਠਾਨਂ ਉਦ੍ਧਟਂ.
ਅਣੁਸਹਗਤਾਤਿ ਅਣੁਭਾਵਂ ਗਤਾ ਪਤ੍ਤਾ, ਤਨੁਭੂਤਾਤਿ ਅਤ੍ਥੋ.
੮੨੮. ਏਵਂ ਵੁਟ੍ਠਾਨਂ ਦਸ੍ਸੇਤ੍ਵਾ ਇਦਾਨਿ ਬਲਸਮਾਯੋਗਂ ਦਸ੍ਸੇਤੁਂ ‘‘ਲੋਕਿਯਾਨਞ੍ਚਾ’’ਤਿਆਦਿ ਵੁਤ੍ਤਂ. ਸਮਥਬਲਂ ਅਧਿਕਂ ਹੋਤਿ ਸਮਾਧਿਭਾਵਨਾਭਾਵਤੋ. ਵਿਪਸ੍ਸਨਾਬਲਂ ਅਧਿਕਂ ਹੋਤਿ ਞਾਣੁਤ੍ਤਰਤ੍ਤਾ ਵਿਪਸ੍ਸਨਾਭਾਵਨਾਯ. ਸਮਾਨਭਾਵੇਨ ਯੁਗੇ ਨਦ੍ਧਾ ਬਦ੍ਧਾ ਵਿਯ ਹੋਨ੍ਤੀਤਿ ਯੁਗਨਦ੍ਧਾ. ਤੇਨਾਹ ‘‘ਅਞ੍ਞਮਞ੍ਞਂ ਅਨਤਿਵਤ੍ਤਨਟ੍ਠੇਨਾ’’ਤਿ, ਕਿਚ੍ਚਤੋ ਅਨੂਨਾਧਿਕਭਾਵੇਨਾਤਿ ਅਤ੍ਥੋ. ਤਤੋ ਏਵ ਸਮਾਯੋਗੋਤਿ ਸਮਪਰਿਚ੍ਛੇਦਯੋਗੋਤਿ ਅਤ੍ਥੋ.
ਸਮਾਧਿਪਟਿਪਕ੍ਖਦਸ੍ਸਨਤ੍ਥਂ ‘‘ਉਦ੍ਧਚ੍ਚਸਹਗਤਕਿਲੇਸੇਹੀ’’ਤਿ ਵੁਤ੍ਤਂ, ਉਦ੍ਧਚ੍ਚਪਧਾਨੇਹਿ ਕਿਲੇਸੇਹੀਤਿ ਅਧਿਪ੍ਪਾਯੋ. ਅਵਿਕ੍ਖੇਪੋ ਸਮਾਧੀਤਿ ਸਮੁਚ੍ਛਿਨ੍ਦਨੇਨ ਵਿਕ੍ਖੇਪਸ੍ਸ ਉਜੁਪਟਿਪਕ੍ਖਭੂਤੋ ਸਮਾਧਿ. ਨਿਰੋਧਗੋਚਰੋਤਿ ਨਿਬ੍ਬਾਨਾਰਮ੍ਮਣੋ. ਵੁਟ੍ਠਾਨਟ੍ਠੇਨਾਤਿ ਵੁਟ੍ਠਾਨਕਭਾਵੇਨ ਨਿਮਿਤ੍ਤਤੋ, ਪਵਤ੍ਤਤੋ ਚ ਵੁਟ੍ਠਹਮਾਨਵਸੇਨ. ਏਕਰਸਾਤਿ ਸਮਾਨਕਿਚ੍ਚਾ.
ਪਹਾਤਬ੍ਬਧਮ੍ਮਪਹਾਨਕਥਾਵਣ੍ਣਨਾ
੮੨੯. ਯੇ ਧਮ੍ਮਾਤਿ ਯੇ ਸਂਕਿਲੇਸਧਮ੍ਮਾ. ਸਂਯੋਜਨਾਦੀਸੁ ਸਂਯੋਜਨਟ੍ਠੇਨ ਬਨ੍ਧਨਟ੍ਠੇਨ ਸਂਯੋਜਨਾਨਿ, ਵਿਬਾਧਨਟ੍ਠੇਨ, ਉਪਤਾਪਨਟ੍ਠੇਨ ਵਾ ਕਿਲੇਸਾ, ਮਿਚ੍ਛਾਸਭਾਵਾਤਿ ਮਿਚ੍ਛਤ੍ਤਾ, ਲੋਕੇ ਧਮ੍ਮਾ ਲੋਕਪਰਿਯਾਪਨ੍ਨਾ ਧਮ੍ਮਾਤਿ ਲੋਕਧਮ੍ਮਾ, ਮਚ੍ਛੇਰਸ੍ਸ ਭਾਵੋ, ਕਮ੍ਮਂ ਵਾਤਿ ਮਚ੍ਛਰਿਯਂ, ਵਿਪਰੀਤਟ੍ਠੇਨ ਵਿਪਲ੍ਲਾਸਾ, ਗਨ੍ਥਨਟ੍ਠੇਨ ਗਨ੍ਥਾ, ਅਯੁਤ੍ਤਾ ਗਤੀਤਿ ਅਗਤਿ, ਆਸਵਨ੍ਤੀਤਿ ਆਸਵਾ, ਓਹਨਨ੍ਤੀਤਿ ਓਘਾ, ਯੋਜਨਟ੍ਠੇਨ ਯੋਗਾ, ਨੀਵਰਨ੍ਤੀਤਿ ਨੀਵਰਣਾਨਿ, ਧਮ੍ਮਸਭਾਵਂ ਅਤਿਕ੍ਕਮ੍ਮ ਪਰਤੋ ਆਮਸਨ੍ਤੀਤਿ ਪਰਾਮਾਸਾ, ਭੁਸਂ ਆਦਿਯਨ੍ਤੀਤਿ ਉਪਾਦਾਨਾਨਿ, ਅਪ੍ਪਹੀਨਭਾਵੇਨ ਸਨ੍ਤਾਨੇ ਅਨੁ ਅਨੁ ਸੇਨ੍ਤੀਤਿ ਅਨੁਸਯਾ, ਮਲੀਨਭਾਵਕਰਣਟ੍ਠੇਨ ਮਲਾ, ਅਕੁਸਲਕਮ੍ਮਾਨਿ ਚ ਤਾਨਿ ਸੁਗਤਿਦੁਗ੍ਗਤੀਨਂ, ਤਤ੍ਥ ਨਿਬ੍ਬਤ੍ਤਨਕਸੁਖਦੁਕ੍ਖਾਨਞ੍ਚ ਪਥਾ ਚਾਤਿ ਅਕੁਸਲਕਮ੍ਮਪਥਾ, ਚਿਤ੍ਤਂ ਉਪ੍ਪਜ੍ਜਤਿ ਏਤ੍ਥਾਤਿ ਚਿਤ੍ਤੁਪ੍ਪਾਦੋ, ਚਿਤ੍ਤਚੇਤਸਿਕਰਾਸਿ, ਅਕੁਸਲੋ ਚ ਸੋ ਚਿਤ੍ਤੁਪ੍ਪਾਦੋ ਚਾਤਿ ਅਕੁਸਲਚਿਤ੍ਤੁਪ੍ਪਾਦੋਤਿ ਅਕੁਸਲਸਦ੍ਦਂ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ.
ਖਨ੍ਧੇਹਿ ਖਨ੍ਧਾਨਨ੍ਤਿ ਇਧਲੋਕਕ੍ਖਨ੍ਧੇਹਿ ਪਰਲੋਕਕ੍ਖਨ੍ਧਾਨਂ. ਯਾਵਞ੍ਹਿ ਤੇਤਿ ਤੇ ਰੂਪਰਾਗਾਦਯੋ ਯਾਵ ਪਵਤ੍ਤਨ੍ਤਿ ਨ ਸਮੁਚ੍ਛਿਜ੍ਜਨ੍ਤਿ, ਤਾਵ ਏਤੇਸਂ ਖਨ੍ਧਫਲਦੁਕ੍ਖਾਨਂ ਅਨੁਪਰਮੋ ਅਵਿਚ੍ਛੇਦੋਤਿ. ਏਤੇਨ ਤੇਸਂ ਸਂਯੋਜਨਤ੍ਥਂ ਵਿਭਾਵੇਤਿ. ਉਦ੍ਧਨ੍ਤਿ ਰੂਪਾਰੂਪਭਵੇਸੁ, ਤਤਿਯਮਗ੍ਗੁਪ੍ਪਤ੍ਤਿਯਾ ਵਾ ਉਦ੍ਧਂ. ਉਦ੍ਧਂ ਭਜਨ੍ਤੀਤਿ ਉਦ੍ਧਂਭਾਗਾ, ਰੂਪਾਰੂਪਭਵਾ, ਤੇਸਂ ਅਵਿਚ੍ਛੇਦਹੇਤੁਤਾਯ ਹਿਤਾਨਿ ਉਦ੍ਧਂਭਾਗਿਯਾਨਿ.
ਕਿਲਿਸ੍ਸਨ੍ਤਿ, ਕਿਲੇਸੇਨ੍ਤਿ ਚਾਤਿ ਦੁਵਿਧਮ੍ਪਿ ਅਤ੍ਥਂ ਦਸ੍ਸੇਨ੍ਤੋ ‘‘ਸਯਂ ਸਂਕਿਲਿਟ੍ਠਤ੍ਤਾ’’ਤਿਆਦਿਮਾਹ.
ਮਿਚ੍ਛਾਵਿਮੁਤ੍ਤਿ ‘‘ਲੋਕਥੂਪਿਕਾਦੀਸੁ ਮੋਕ੍ਖੋ’’ਤਿ ਪਵਤ੍ਤਮਿਚ੍ਛਾਵਿਮੋਕ੍ਖੋ. ਅਭਿਨਿਵਿਸਨਾਦਿਵਸੇਨ ਮਿਚ੍ਛਾ ਵਿਪਰੀਤਂ ਨ ਸਮ੍ਮਾ ਪਵਤ੍ਤਨਤੋ ਮਿਚ੍ਛਾਞਾਣਂ ਮੋਹੋਵ.
ਲੋਕਪ੍ਪਵਤ੍ਤਿਯਾਤਿ ਖਨ੍ਧਪ੍ਪਵਤ੍ਤਿਯਂ ਸਤਿ. ਅਨੁਪਰਮਧਮ੍ਮਕਤ੍ਤਾਤਿ ਪੁਞ੍ਞਪਾਪਵਸੇਨ ਅਪਰਾਪਰਂ ਅਵਿਚ੍ਛਿਜ੍ਜਨਤੋ. ‘‘ਲਾਭਹੇਤੁਕੋ ਲਾਭੋ’’ਤਿਆਦਿਨਾ ਕਾਰਣੋਪਚਾਰੇਨ.
ਆਵਾਸੇ ਮਚ੍ਛਰਿਯਂ, ਆਵਾਸਹੇਤੁਕਂ ਵਾ ਮਚ੍ਛਰਿਯਂ ਆਵਾਸਮਚ੍ਛਰਿਯਂ.
ਤਯੋਤਿ ਵਤ੍ਥੁਂ ਅਭਿਨ੍ਦਿਤ੍ਵਾ ਵੁਤ੍ਤਂ, ਭਿਨ੍ਦਿਤ੍ਵਾ ਪਨ ਵੁਚ੍ਚਮਾਨੇ ਦ੍ਵਾਦਸ ਹੋਨ੍ਤਿ.
ਗਨ੍ਥਕਰਣਂ ਕਾਰਣਭਾਵੇਨ ਪਟਿਬਦ੍ਧਤਾਕਰਣਂ ਗਨ੍ਥਨਨ੍ਤਿ ਤਂ ਰੂਪਕਾਯੇਪਿ ਲਬ੍ਭਤੀਤਿ ਆਹ ‘‘ਨਾਮਕਾਯਸ੍ਸ ਚੇਵ ਰੂਪਕਾਯਸ੍ਸ ਚਾ’’ਤਿ. ਤਤ੍ਥ ਬ੍ਯਾਪਾਦਸ੍ਸਾਪਿ ਅਭਿਸਜ੍ਜਨੁਪਨਯ੍ਹਵਸੇਨ ਪਵਤ੍ਤਨਤੋ ਗਨ੍ਥਨਟ੍ਠੋ ਵੇਦਿਤਬ੍ਬੋ, ਯਤੋ ਤਸ੍ਸ ਪਟਿਘਸਂਯੋਜਨਭਾਵੋ ਵੁਤ੍ਤੋ.
ਛਨ੍ਦਦੋਸਮੋਹਭਯੇਹੀਤਿ ਛਨ੍ਦਦੋਸਮੋਹਭਯਹੇਤੁ. ਤਞ੍ਹੀਤਿ ਅਕਤ੍ਤਬ੍ਬਕਰਣਂ, ਕਤ੍ਤਬ੍ਬਾਕਰਣਞ੍ਚ.
ਸਵਨਾਤਿ ਪਵਤ੍ਤਨਤੋ. ਸਵਨਤੋਤਿ ਕਿਲੇਸਾਸੁਚਿਭਾਵੇਨ ਵਿਸ੍ਸਨ੍ਦਨਤੋ. ਪੁਨ ਸਵਨਤੋਤਿ ਪਸਵਨਤੋ.
ਆਕਡ੍ਢਨਟ੍ਠੇਨ, ਦੁਰੁਤ੍ਤਰਣਟ੍ਠੇਨ ਚਾਤਿ ਏਤੇਨ ਓਘਾ ਵਿਯ ਓਘਾਤਿ ਦਸ੍ਸੇਤਿ. ਆਰਮ੍ਮਣੇਨ, ਦੁਕ੍ਖੇਨ ਚ ਵਿਯੋਗਸ੍ਸ ਅਪ੍ਪਦਾਨਸਙ੍ਖਾਤੇਨ ਯੋਜਨਟ੍ਠੇਨ ਯੋਗਾਤਿ ਦਸ੍ਸੇਤਿ, ਸਂਕਿਲੇਸਕਰਣਟ੍ਠੇਨਾਤਿ ਅਤ੍ਥੋ. ਤੇਸਞ੍ਞੇਵਾਤਿ ਕਾਮਰਾਗਾਦੀਨਂਯੇਵ. ਤੇ ਹਿ ਸੋਤਵਸੇਨ ਵਤ੍ਤਮਾਨਾ ਸੋਤੋ ਵਿਯ ਸੋਤਪਤਿਤੇ ਸਤ੍ਤੇ ਅਪਾਯਸਮੁਦ੍ਦਂ ਪਾਪੇਨ੍ਤਿ, ਸਂਸਾਰਸਮੁਦ੍ਦਤੋ ਚ ਸੀਸਂ ਉਕ੍ਖਿਪਿਤੁਂ ਨ ਦੇਨ੍ਤਿ, ਯਥਾਗਹਿਤਞ੍ਚ ਆਰਮ੍ਮਣਂ ਵਿਸ੍ਸਜ੍ਜਿਤੁਂ ਨ ਦੇਨ੍ਤਿ, ਯਾਦਿਸਞ੍ਚ ਪਾਪਂ ਕਤ੍ਵਾ ਦੁਕ੍ਖਪ੍ਪਤ੍ਤੇ ਪੁਨਪਿ ਤਾਦਿਸੇਨ ਯੋਜੇਨ੍ਤਿ.
ਚਿਤ੍ਤਸ੍ਸਾਤਿ ਕੁਸਲਚਿਤ੍ਤਸ੍ਸ, ਵਿਸੇਸਤੋ ਝਾਨਚਿਤ੍ਤਸ੍ਸ. ਆਦਿਤੋ ਵਰਣਂ ਆਵਰਣਂ. ਕਿਲੇਸਵਾਸਨਂ ਨੇਤ੍ਵਾ ਵਰਣਂ ਨੀਵਰਣਂ. ਕੁਟ੍ਟਕਵਾਟਾਦੀਹਿ ਵਿਯ ਪਿਦਹਨਂ ਪਟਿਚ੍ਛਾਦਨਂ, ਤਂ ਪਨ ਕੁਸਲਾਦੀਨਿ ਸਙ੍ਗਣ੍ਹਿਤੁਂ, ਪਰਿਞ੍ਞਾਤੁਂ, ਞਾਤੁਞ੍ਚ ਅਪ੍ਪਦਾਨਵਸੇਨ ਦਟ੍ਠਬ੍ਬਂ.
ਤਸ੍ਸ ਤਸ੍ਸ ਧਮ੍ਮਸ੍ਸ ਸਭਾਵਨ੍ਤਿ ਕਾਯਾਦਿਕਸ੍ਸ ਤਸ੍ਸ ਤਸ੍ਸ ਧਮ੍ਮਸ੍ਸ ਅਸੁਭਾਦਿਸਭਾਵਂ. ਅਭੂਤਂ ਸਭਾਵਨ੍ਤਿ ਸੁਭਾਦਿਸਭਾਵਂ.
ਥਾਮਗਤਟ੍ਠੇਨਾਤਿ ਥਾਮਗਤਭਾਵੇਨ. ਥਾਮਗਤਨ੍ਤਿ ਚ ਅਨਞ੍ਞਸਾਧਾਰਣੋ ਕਾਮਰਾਗਾਦੀਨਂ ਸਭਾਵੋ ਦਟ੍ਠਬ੍ਬੋ. ਯੇਨ ਤੇ ਏਵ ਭਗਵਤਾ ‘‘ਅਨੁਸਯਾ’’ਤਿ ਵੁਤ੍ਤਾ. ਅਨੁਸਯਨਞ੍ਚ ਮਗ੍ਗੇਨ ਅਪ੍ਪਹੀਨਭਾਵੇਨ ਪਚ੍ਚਯਸਮਵਾਯੇ ਉਪ੍ਪਜ੍ਜਨਾਰਹਤਾ. ਤੇਨਾਹ ‘‘ਪੁਨਪ੍ਪੁਨਂ ਕਾਮਰਾਗਾਦੀਨਂ ਉਪ੍ਪਤ੍ਤਿਹੇਤੁਭਾਵੇਨ ਅਨੁਸੇਨ੍ਤਿਯੇਵਾ’’ਤਿ.
ਦੁਮ੍ਮੋਚਨੀਯਭਾਵੇਨ ਪਵਤ੍ਤਿਂ ਸਨ੍ਧਾਯਾਹ ‘‘ਤੇਲਞ੍ਜਨਕਲਲਂ ਵਿਯਾ’’ਤਿ.
੮੩੦. ਸੇਸਾਤਿ ਅਨਪਾਯਗਮਨੀਯਾ. ਸੁਖੁਮਾ ਕਾਮਰਾਗਪਟਿਘਾਤਿ ਸਮ੍ਬਨ੍ਧੋ. ਚਤੁਤ੍ਥਞਾਣਵਜ੍ਝਾ ਏਵਾਤਿ ਅਵਧਾਰਣੇਨ ਪਠਮਞਾਣਾਦਿਵਜ੍ਝਤਾ ਨਿਵਤ੍ਤੀਯਤਿ. ਤਯਿਦਂ ਨਿਯਮਦਸ੍ਸਨਂ ਅਞ੍ਞਤ੍ਥਾਪਿ ਨੇਤਬ੍ਬਨ੍ਤਿ ਦਸ੍ਸੇਨ੍ਤੋ ‘‘ਪਰਤੋ’’ਤਿਆਦਿਮਾਹ. ਤਤ੍ਥ ‘‘ਨਿਯਮਂ ਨ ਕਰਿਸ੍ਸਾਮਾ’’ਤਿ ਏਤੇਨ ਨਿਯਮੇ ਅਕਤੇ ਹੇਟ੍ਠਿਮਮਗ੍ਗਵਜ੍ਝਤਾਪਿ ਅਨੁਞ੍ਞਾਤਾ ਏਵ ਹੋਤੀਤਿ.
ਲੋਭ…ਪੇ… ਚਤੁਤ੍ਥਞਾਣਵਜ੍ਝਾਨੀਤਿਆਦੀਸੁ ਪਠਮਞਾਣਾਦੀਹਿ ਹਤਾਪਾਯਗਮਨੀਯਾਦਿਭਾਵਾਨੀਤਿ ਅਧਿਪ੍ਪਾਯੋ ਵੇਦਿਤਬ੍ਬੋ. ਆਦਿਸਦ੍ਦੇਨ ਓਲ਼ਾਰਿਕਸੁਖੁਮਤਾ ਗਹਿਤਾ.
ਯਸੇਤਿ ਪਰਿਵਾਰੇ.
ਅਗਤੀਸੁ ਛਨ੍ਦਾਦਯੋ ਕਿਞ੍ਚਾਪਿ ਉਪਰਿਮਗ੍ਗਵਜ੍ਝਾ, ਤਥਾਪਿ ਤਂਮੂਲਕਸ੍ਸ ਅਕਤ੍ਤਬ੍ਬਕਰਣਸ੍ਸ, ਕਤ੍ਤਬ੍ਬਾਕਰਣਸ੍ਸ ਚ ਅਪਾਯਗਮਨੀਯਤਾਯ ਪਠਮਮਗ੍ਗਵਜ੍ਝਾ.
ਕਤਾਕਤਾਕੁਸਲਾਕੁਸਲਵਿਸਯਂ ਯਂ ਵਿਪ੍ਪਟਿਸਾਰਭੂਤਂ ਕੁਕ੍ਕੁਚ੍ਚਂ, ਤਂ ਇਧ ਤਤਿਯਞਾਣਵਜ੍ਝਂ ਵੁਤ੍ਤਂ. ਯਂ ਪਨ ‘‘ਕੁਕ੍ਕੁਚ੍ਚਪਕਤਤਾਯ ਆਪਤ੍ਤਿਮਾਪਜ੍ਜਤੀ’’ਤਿ (ਪਾਚਿ. ਅਟ੍ਠ. ੪੩੮; ਕਙ੍ਖਾ. ਅਟ੍ਠ. ਨਿਦਾਨਵਣ੍ਣਨਾ) ਵੁਤ੍ਤਂ ਕੁਕ੍ਕੁਚ੍ਚਂ, ਤਂ ਸਨ੍ਧਾਯ ‘‘ਕੁਕ੍ਕੁਚ੍ਚਵਿਚਿਕਿਚ੍ਛਾ ਸੋਤਾਪਤ੍ਤਿਮਗ੍ਗੇਨ ਪਹੀਯਨ੍ਤੀ’’ਤਿ (ਧ. ਸ. ਅਟ੍ਠ. ੧੧੭੬) ਅਟ੍ਠਸਾਲਿਨਿਯਂ ਵੁਤ੍ਤਂ. ਤਸ੍ਮਾ ਦ੍ਵਿਨ੍ਨਂ ਵਚਨਾਨਂ ਅਧਿਪ੍ਪਾਯੋ ਵੇਦਿਤਬ੍ਬੋ. ਅਞ੍ਞੇਸੁਪਿ ਏਦਿਸੇਸੁ ਠਾਨੇਸੁ ਅਧਿਪ੍ਪਾਯੋ ਮਗ੍ਗਿਤਬ੍ਬੋ, ਨ ਵਿਰੋਧਤੋ ਪਚ੍ਚੇਤਬ੍ਬੋ. ਓਲ਼ਾਰਿਕਾਨਵਸੇਸਪ੍ਪਹਾਨਂ ਵਾ ਸਨ੍ਧਾਯ ਕੁਕ੍ਕੁਚ੍ਚਸ੍ਸ ਪਠਮਤਤਿਯਞਾਣਵਜ੍ਝਤਾ ਵੁਤ੍ਤਾਤਿ ਵੇਦਿਤਬ੍ਬਂ. ‘‘ਭਗਵਤਾ ਪਟਿਕ੍ਖਿਤ੍ਤਂ ਅਨੁਵਸਿਤ੍ਵਾ ਅਨੁਵਸਿਤ੍ਵਾ ਆਵਸਥਪਿਣ੍ਡਂ ਭੁਞ੍ਜਿਤੁ’’ਨ੍ਤਿ, ‘‘ਕੁਕ੍ਕੁਚ੍ਚਾਯਨ੍ਤੋ ਨ ਪਟਿਗ੍ਗਹੇਸੀ’’ਤਿ (ਪਾਚਿ. ੨੦੪) ਪਨ ਆਗਤਂ ਕੁਕ੍ਕੁਚ੍ਚਂ, ਨ ਨੀਵਰਣਂ ਅਰਹਤੋ ਉਪ੍ਪਜ੍ਜਨਤੋ, ਨੀਵਰਣਪਟਿਰੂਪਕਂ ਪਨ ‘‘ਕਪ੍ਪਤਿ ਨ ਕਪ੍ਪਤੀ’’ਤਿ ਵੀਮਂਸਨਭੂਤਂ ਵਿਨਯਕੁਕ੍ਕੁਚ੍ਚਂ ਨਾਮ, ਤਂ ਤਥਾਪਵਤ੍ਤਚਿਤ੍ਤੁਪ੍ਪਾਦੋਵ.
ਕਾਮਰਾਗਪਟਿਘਾਨੁਸਯਾ ਅਣੁਸਹਗਤਾ ਤਤਿਯਞਾਣਵਜ੍ਝਾ. ਓਲ਼ਾਰਿਕਾਨਂ ਪਨ ਦੁਤਿਯਞਾਣਵਜ੍ਝਤਾ ਹੇਟ੍ਠਾ ਵੁਤ੍ਤਨਯਾਵ.
ਚਿਤ੍ਤੁਪ੍ਪਾਦਗ੍ਗਹਣੇਨ ਚੇਤ੍ਥ ਮਕ੍ਖਪਲ਼ਾਸਮਾਯਾਸਾਠੇਯ੍ਯਪਮਾਦਥਮ੍ਭਸਾਰਮ੍ਭਾਦੀਨਂ ਸਙ੍ਗਹੋ ਕਤੋਤਿ ਦਟ੍ਠਬ੍ਬਂ.
੮੩੧. ਅਫਲੋ ਵਾਯਾਮੋਤਿ ਏਤ੍ਥ ਅਤੀਤਾਨਂ ਤਾਵ ਪਜਹਨੇ ਅਫਲੋ ਹੋਤੁ ਵਾਯਾਮੋ ਨਿਰੁਦ੍ਧਤ੍ਤਾ, ਅਨਾਗਤਾਨਂ ਪਨ ਕਥਨ੍ਤਿ ਤੇਸਮ੍ਪਿ ਵਕ੍ਖਮਾਨਂ ਅਵਿਪਰੀਤਮਤ੍ਥਂ ਅਜਾਨਨ੍ਤੋ ਨਤ੍ਥਿਤਾਮਤ੍ਤਂ ਗਹੇਤ੍ਵਾ ਚੋਦੇਤਿ, ਤਥਾਪਿ ‘‘ਅਫਲੋ’’ਤਿ ਪੁਬ੍ਬੇ ਪਹਾਤਬ੍ਬਾਨਂ ਨਤ੍ਥਿਤਾਯ ਚੋਦਨਾ ਕਤਾ, ਇਦਾਨਿ ਪਹਾਨਸ੍ਸ. ਯਦਿ ਹਿ ਪਹਾਨਂ ਅਤ੍ਥਿ, ਕਥਂ ਪਹਾਤਬ੍ਬਾ ਸਨ੍ਤਿ? ਅਥ ਪਹਾਤਬ੍ਬਾ ਸਨ੍ਤਿ, ਕਥਂ ਪਹਾਨਂ ਹੋਤਿ? ਪਹਾਤਬ੍ਬਾ ਚ ਸਨ੍ਤਿ, ਪਹਾਨਞ੍ਚ ਹੋਤੀਤਿ ਵਿਪ੍ਪਟਿਸਿਦ੍ਧਮੇਤਂ. ਕਸ੍ਮਾ? ਪਹਾਤਬ੍ਬੇਸੁ ਸਨ੍ਤੇਸੁ ਪਹਾਨਸ੍ਸ ਅਸਮ੍ਭਵਤੋ ਤਦੁਪਗੋ ਵਾਯਾਮੋ ਅਫਲੋ ਆਲੋਕਤਮਾਨਂ ਸਹਾਵਟ੍ਠਾਨੇ ਸਤਿ ਆਲੋਕਸ੍ਸ ਅਫਲਤਾ ਵਿਯ. ਅਥਾਪਿ ਕਥਞ੍ਚਿ ਪਹਾਨਂ ਸਿਯਾ? ਸਂਕਿਲੇਸਿਕਾ ਚ ਮਗ੍ਗਭਾਵਨਾ ਆਪਜ੍ਜਤਿ ਪਹਾਤਬ੍ਬਪਹਾਯਕਾਨਂ ਸਹਾਵਟ੍ਠਾਨਤੋ. ਵਿਪ੍ਪਯੁਤ੍ਤਤਾ ਵਾ ਕਿਲੇਸਾਨਂ ਚਿਤ੍ਤਵਿਪ੍ਪਯੁਤ੍ਤਸਙ੍ਖਾਰਵਾਦੀਨਂ ਵਿਪ੍ਪਯੁਤ੍ਤਸਙ੍ਖਾਰਾਨਂ ਵਿਯਾਤਿ ਅਧਿਪ੍ਪਾਯੋ. ਤਂ ਪਨ ਨੇਸਂ ਵਾਦੀਨਂ ਯਥਾ ਮਤਿਮਤ੍ਤਂ, ਏਵਮਿਧਾਪੀਤਿ ਦਸ੍ਸੇਨ੍ਤੋ ਆਹ ‘‘ਨ ਚ ਪਚ੍ਚੁਪ੍ਪਨ੍ਨਕਿਲੇਸੋ ਚਿਤ੍ਤਵਿਪ੍ਪਯੁਤ੍ਤੋ ਨਾਮ ਅਤ੍ਥੀ’’ਤਿ. ਅਰੂਪਧਮ੍ਮਾ ਹਿ ਏਕਵਤ੍ਥੁਕਾਦਿਭਾਵੇਨ ਵਤ੍ਤਮਾਨਾ ਖਣਤ੍ਤਯਪਰਿਯਾਪਨ੍ਨਾ ਪਚ੍ਚੁਪ੍ਪਨ੍ਨਾ, ਤੇ ਕਥਂ ਚਿਤ੍ਤੇਨ ਵਿਪ੍ਪਯੁਤ੍ਤਾ ਨਾਮ ਸਿਯੁਂ, ਤਸ੍ਮਾ ਨਤ੍ਥੇਵ ਵਿਪ੍ਪਯੁਤ੍ਤਤਾ ਕਿਲੇਸਾਨਂ. ਆਵੇਣਿਕਾਤਿ ਅਸਾਧਾਰਣਾ, ਸਯਮੇਵ ਉਪ੍ਪਾਦਿਤਾ ਪਾਲ਼ਿ ਅਨਾਰੁਲ਼੍ਹਾਤਿ ਅਧਿਪ੍ਪਾਯੋ. ਪਾਲ਼ਿਯਂਯੇਵ ਹਿ ਪਟਿਕ੍ਖਿਤ੍ਤਨ੍ਤਿ ਸਮ੍ਬਨ੍ਧੋ. ਸ੍ਵਾਯਂ ਪੁਗ੍ਗਲੋ. ਹਞ੍ਚੀਤਿ ਯਦਿ.
ਵਿਨਿਬਦ੍ਧੋਤਿ ਮਾਨੇਨ ਪਤ੍ਥਦ੍ਧਚਿਤ੍ਤੋ. ਪਰਾਮਟ੍ਠੋਤਿ ਮਿਚ੍ਛਾਭਿਨਿਵਿਟ੍ਠੋ. ਥਾਮਗਤੋਤਿ ਥਾਮਗਤਕਿਲੇਸੋ ਥਿਰਭਾਵਗਤਾਨੁਸਯੋ. ਤੇਨ ਹਿ ਨਤ੍ਥਿ ਮਗ੍ਗਭਾਵਨਾਤਿ ਯਸ੍ਮਾ ਤੀਸੁਪਿ ਕਾਲੇਸੁ ਕਿਲੇਸਾਨਂ ਪਹਾਨਂ ਨ ਯੁਜ੍ਜਤਿ, ਤਿਕਾਲਿਕਾ ਚ ਕਿਲੇਸਾ, ਤਸ੍ਮਾ ਨਤ੍ਥਿ ਮਗ੍ਗਭਾਵਨਾ, ਤਾਯ ਸਾਧੇਤਬ੍ਬਂ ਕਿਚ੍ਚਂ ਨਤ੍ਥੀਤਿ ਅਤ੍ਥੋ. ‘‘ਨ ਹਿ ਨਤ੍ਥਿ ਮਗ੍ਗਭਾਵਨਾ’’ਤਿਆਦਿਨਾ ਚਤੁਕ੍ਖਤ੍ਤੁਂ ਵੁਤ੍ਤਸ੍ਸ ਪਟਿਕ੍ਖੇਪਸ੍ਸ ਪਟਿਕ੍ਖੇਪੋ. ਇਦਂ ਵੁਤ੍ਤਂ ‘‘ਪਾਲ਼ਿਯਂਯੇਵ ਹੀ’’ਤਿਆਦਿਂ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ.
ਏਵਮੇਵਾਤਿ ਯਥਾ ਅਜਾਤਫਲੇ ਤਰੁਣਰੁਕ੍ਖੇ ਮੂਲੇ ਛਿਨ੍ਨੇ ਅਸਤਿ ਛੇਦਨੇ ਆਯਤਿਂ ਉਪ੍ਪਜ੍ਜਨਾਰਹਾਨਿ ਛੇਦਨਪਚ੍ਚਯਾ ਅਨੁਪ੍ਪਜ੍ਜਮਾਨਾਨਿ ਵਿਨਟ੍ਠਾਨਿ ਨਾਮ ਹੋਨ੍ਤਿ, ਏਵਮੇਵ ਮਗ੍ਗਭਾਵਨਾਯ ਅਸਤਿ ਉਪ੍ਪਜ੍ਜਨਾਰਹਾ ਕਿਲੇਸਾ ਮਗ੍ਗਭਾਵਨਾਯ ਅਨੁਪ੍ਪਜ੍ਜਮਾਨਾ ‘‘ਪਹੀਨਾ’’ਤਿ ਵੁਚ੍ਚਨ੍ਤੀਤਿ ਉਪਮਾਸਂਸਨ੍ਦਨਂ ਵੇਦਿਤਬ੍ਬਂ. ਉਪ੍ਪਾਦੋਤਿ ਉਪ੍ਪਾਦਸੀਸੇਨ ਉਪ੍ਪਾਦਵਨ੍ਤੋ ਖਨ੍ਧਾ ਵੁਤ੍ਤਾ. ਅਨੁਪ੍ਪਾਦੇਤਿ ਨਿਬ੍ਬਾਨੇ. ਅਜਾਤਾਯੇਵ ਨ ਜਾਯਨ੍ਤਿ, ਤਸ੍ਮਾ ਪਹੀਨਾ ਨਾਮ ਹੋਨ੍ਤੀਤਿ ‘‘ਨਤ੍ਥਿ ਕਿਲੇਸਪ੍ਪਹਾਨ’’ਨ੍ਤਿ ਪਰਵਾਦਿਨਾ ਕਤੋ ਪਟਿਕ੍ਖੇਪੋ ‘‘ਨ ਹੀ’’ਤਿ ਪਟਿਕ੍ਖਿਤ੍ਤੋ. ਤੇ ਪਨ ਨੇਵ ਉਪ੍ਪਜ੍ਜਿਤ੍ਵਾ ਵਿਗਤਾ, ਨਾਪਿ ਭਵਿਸ੍ਸਨ੍ਤਿ, ਨ ਚ ਉਪ੍ਪਨ੍ਨਾਤਿ ‘‘ਅਤੀਤੇ ਕਿਲੇਸੇ ਪਜਹਤੀ’’ਤਿਆਦਿ ਨ ਵਤ੍ਤਬ੍ਬਨ੍ਤਿ ਦਸ੍ਸੇਤਿ. ਹੇਤੁਨਿਰੋਧਾਤਿ ਦੁਕ੍ਖਹੇਤੂਨਂ ਕਿਲੇਸਾਨਂ ਨਿਰੋਧਾ. ਦੁਕ੍ਖਨਿਰੋਧੋਤਿ ਆਯਤਿਂ ਉਪ੍ਪਜ੍ਜਨਕਦੁਕ੍ਖਸ੍ਸ ਨਿਰੋਧੋ. ਉਪ੍ਪਾਦਪਵਤ੍ਤਨਿਮਿਤ੍ਤਾਯੂਹਨਾ ਪਚ੍ਚੁਪ੍ਪਨ੍ਨਭਵਵਸੇਨ ਗਹਿਤਾ.
੮੩੨. ਏਤੇਨਾਤਿ ‘‘ਅਜਾਤਾਯੇਵ ਨ ਜਾਯਨ੍ਤੀ’’ਤਿਆਦਿਵਚਨੇਨ. ਵਿਪਸ੍ਸਨਾਯ ਆਰਮ੍ਮਣਭੂਤਂ ਉਪਾਦਾਨਕ੍ਖਨ੍ਧਪਞ੍ਚਕਸਙ੍ਖਾਤਂ ਭੂਮਿਪਵਤ੍ਤਿਟ੍ਠਾਨਂ ਲਦ੍ਧਵਨ੍ਤੋ ਭੂਮਿਲਦ੍ਧਾ ਯਥਾ ‘‘ਅਗ੍ਗਿਆਹਿਤੋ’’ਤਿ, ਲਦ੍ਧਭੂਮਿਕਾਤਿ ਅਤ੍ਥੋ. ਵਤ੍ਤਮਾਨਾਦਿਉਪ੍ਪਨ੍ਨਵਿਧੁਰਤਾਯ ਭੂਮਿਲਦ੍ਧੁਪ੍ਪਨ੍ਨਾ ਏਵ ਨਾਮ ਤੇਤਿ ਵੁਤ੍ਤਂ.
੮੩੩. ਅਨੁਭਵਿਤ੍ਵਾ, ਭਵਿਤ੍ਵਾ ਚ ਅਪਗਤਂ ਭੂਤਾਪਗਤਂ. ਅਨੁਭੂਤਭੂਤਾ ਹਿ ਭੂਤਤਾਸਾਮਞ੍ਞੇਨ ਭੂਤਸਦ੍ਦੇਨ ਵੁਤ੍ਤਾ. ਸਾਮਞ੍ਞਮੇਵ ਹਿ ਉਪਸਗ੍ਗੇਨ ਵਿਸੇਸੀਯਤੀਤਿ. ਅਨੁਭੂਤਸਦ੍ਦੋ ਚ ਕਮ੍ਮਵਚਨਿਚ੍ਛਾਯ ਅਭਾਵਤੋ ਅਨੁਭਾਵਕਵਾਚਕੋ ਦਟ੍ਠਬ੍ਬੋ. ਵਿਕਪ੍ਪਗਾਹਵਸੇਨ ਰਾਗਾਦੀਹਿ, ਤਬ੍ਬਿਪਕ੍ਖੇਹਿ ਚ ਅਕੁਸਲਂ, ਕੁਸਲਞ੍ਚ ਆਰਮ੍ਮਣਰਸਂ ਅਨੁਭਵਤਿ, ਨ ਵਿਪਾਕੋ ਕਮ੍ਮਵੇਗਕ੍ਖਿਤ੍ਤਤ੍ਤਾ, ਨਾਪਿ ਕਿਰਿਯਾ ਅਹੇਤੁਕਾਨਂ ਅਤਿਦੁਬ੍ਬਲਤਾਯ, ਸਹੇਤੁਕਾਨਞ੍ਚ ਖੀਣਕਿਲੇਸਸ੍ਸ ਛਲ਼ਙ੍ਗੁਪੇਕ੍ਖਾਵਤੋ ਉਪ੍ਪਜ੍ਜਮਾਨਾਨਂ ਅਤਿਸਨ੍ਤਵੁਤ੍ਤਿਤ੍ਤਾ. ਏਤ੍ਥ ਚ ਪੁਰਿਮਨਯੇ ਕੁਸਲਾਕੁਸਲਮੇਵ ਵਤ੍ਤੁਂ ਅਧਿਪ੍ਪਾਯਵਸੇਨ ‘‘ਭੂਤਾਪਗਤ’’ਨ੍ਤਿ ਵੁਤ੍ਤਂ. ਯਂ ‘‘ਉਪ੍ਪਨ੍ਨਾਨਂ ਅਕੁਸਲਾਨਂ ਧਮ੍ਮਾਨਂ ਪਹਾਨਾਯ ਉਪ੍ਪਨ੍ਨਾਨਂ ਕੁਸਲਾਨਂ ਧਮ੍ਮਾਨਂ ਠਿਤਿਯਾ’’ਤਿ (ਸਂ. ਨਿ. ੫.੬੫੧-੬੬੨; ਵਿਭ. ੩੯੦-੩੯੧) ਏਤ੍ਥ ‘‘ਉਪ੍ਪਨ੍ਨ’’ਨ੍ਤਿ ਗਹੇਤ੍ਵਾ ਤਂਸਦਿਸਾਨਂ ਪਹਾਨਂ, ਵੁਦ੍ਧਿ ਚ ਵੁਤ੍ਤਾ. ਪਚ੍ਛਿਮਨਯੇ ਚ-ਸਦ੍ਦੇਨ ਕੁਸਲਾਕੁਸਲਞ੍ਚ ਆਕਡ੍ਢਿਤ੍ਵਾ ਸਬ੍ਬਂ ਸਙ੍ਖਤਂ ਵੁਤ੍ਤਂ ਭੁਤ੍ਵਾਪਗਤਭਾਵਾਭਿਧਾਨਾਧਿਪ੍ਪਾਯੇਨ. ਵਿਪਚ੍ਚਿਤੁਂ ਓਕਾਸਕਰਣਵਸੇਨ ਉਪ੍ਪਤ੍ਤਿਤਂ ਅਤੀਤਂ ਕਮ੍ਮਞ੍ਚ ਤਤੋ ਉਪ੍ਪਜ੍ਜਿਤੁਂ ਆਰਦ੍ਧੋ ਵਿਪਾਕੋ ਚ ਅਨਾਗਤੋ ਓਕਾਸਕਤੁਪ੍ਪਨ੍ਨੋਤਿ ਵੁਤ੍ਤੋ ਓਕਾਸੋ ਕਤੋ ਏਤੇਨ, ਓਕਾਸੋ ਕਤੋ ਏਤਸ੍ਸਾਤਿ ਚ ਅਤ੍ਥਦ੍ਵਯਵਸੇਨ, ਯਂ ਉਪ੍ਪਨ੍ਨਸਦ੍ਦੇਨ ਵਿਨਾਪਿ ਵਿਞ੍ਞਾਯਮਾਨਂ ਉਪ੍ਪਨ੍ਨਂ ਸਨ੍ਧਾਯ ‘‘ਨਾਹਂ, ਭਿਕ੍ਖਵੇ, ਸਞ੍ਚੇਤਨਿਕਾਨਂ ਕਮ੍ਮਾਨ’’ਨ੍ਤਿਆਦਿ (ਅ. ਨਿ. ੧੦.੨੧੭, ੨੧੯) ਵੁਤ੍ਤਂ.
ਤਾਸੁ ਤਾਸੁ ਭੂਮੀਸੂਤਿ ਮਨੁਸ੍ਸਦੇਵਾਦਿਅਤ੍ਤਭਾਵਸਙ੍ਖਾਤੇਸੁ ਉਪਾਦਾਨਕ੍ਖਨ੍ਧੇਸੁ. ਤਸ੍ਮਿਂ ਤਸ੍ਮਿਂ ਸਨ੍ਤਾਨੇ ਅਨੁਪ੍ਪਤ੍ਤਿਧਮ੍ਮਤਂ ਅਨਾਪਾਦਿਤਤਾਯ ਅਸਮੂਹਤਂ. ਅਸਮੂਹਤਤ੍ਤਾਯੇਵ ਹਿਸ੍ਸ ਨਤ੍ਥੀਤਿ ਨਵਤ੍ਤਬ੍ਬਤਾਯ ਉਪ੍ਪਨ੍ਨਵੋਹਾਰੋ.
੮੩੪. ‘‘ਕਾ ਭੂਮਿ, ਕੋ ਵਾ ਭੂਮਿਲਦ੍ਧੋ’’ਤਿ ਆਸਙ੍ਕਂ ਨਿਵਤ੍ਤੇਤੁਂ ‘‘ਏਤ੍ਥ ਚਾ’’ਤਿਆਦਿ ਆਰਦ੍ਧਂ. ‘‘ਵਿਪਸ੍ਸਨਾਯ ਆਰਮ੍ਮਣਭੂਤਾ’’ਤਿ ਏਤੇਨ ਖਨ੍ਧਾਨਂ ਅਪਰਿਞ੍ਞਾਤਤਂ ਦਸ੍ਸੇਤਿ, ਨ ਆਰਮ੍ਮਣਭਾਵਮਤ੍ਤਂ ਤੇਭੂਮਕਗ੍ਗਹਣੇਨੇਵ ਤਸ੍ਸ ਸਿਦ੍ਧਤ੍ਤਾ. ਅਪਰਿਞ੍ਞਾਤਾ ਹਿ ਖਨ੍ਧਾ ਕਿਲੇਸਾਨਂ ਭੂਮੀਤਿ ਅਧਿਪ੍ਪੇਤਾ. ਖਨ੍ਧੇਸੁ ਵਤ੍ਥੁਭੂਤੇਸੁ. ਆਰਮ੍ਮਣਵਸੇਨਾਤਿ ਆਰਮ੍ਮਣਕਰਣਵਸੇਨ. ਅਤੀਤਾਨਾਗਤੇ, ਪਗੇਵ ਪਚ੍ਚੁਪ੍ਪਨ੍ਨੇਤਿ ਅਧਿਪ੍ਪਾਯੋ. ਤਨ੍ਤਿ ਤਂ ਅਞ੍ਞਸਨ੍ਤਾਨਗਤਂ ਕਿਲੇਸਜਾਤਂ. ਤਤੋ ਅਞ੍ਞਸ੍ਮਿਂ ਸਨ੍ਤਾਨੇ ਆਰਮ੍ਮਣਕਰਣਮਤ੍ਤੇਨ ਭੂਮਿਲਦ੍ਧਂ ਨਾਮ ਯਦਿ ਸਿਯਾਤਿ ਸਮ੍ਬਨ੍ਧੋ. ਤਸ੍ਸਾਤਿ ਕਿਲੇਸਜਾਤਸ੍ਸ. ਅਪ੍ਪਹੇਯ੍ਯਤੋ ਪਰਸਨ੍ਤਤਿਪਤਿਤਤ੍ਤਾ ਨ ਕੋਚਿ ਭਵਮੂਲਂ ਪਜਹੇਯ੍ਯ. ਭੂਮਿਲਦ੍ਧਞ੍ਹਿ ਅਨੁਸਯਿਤਂ ਨਾਮ ਹੋਤੀਤਿ ਅਧਿਪ੍ਪਾਯੋ. ਵਤ੍ਥੁਵਸੇਨਾਤਿ ਉਪ੍ਪਤ੍ਤਿਟ੍ਠਾਨਵਸੇਨ. ਯਤ੍ਥ ਯਤ੍ਥ ਭਵੇ, ਸਨ੍ਤਾਨੇ ਵਾ. ਪਰਿਞ੍ਞਾਤਾਨਂ ਅਭੂਮਿਭਾਵਤੋ ‘‘ਅਪਰਿਞ੍ਞਾਤਾ’’ਤਿ ਵੁਤ੍ਤਂ. ਉਪ੍ਪਾਦਤੋ ਪਭੁਤੀਤਿ ਤੇਸਂ ਖਨ੍ਧਾਨਂ ਉਪ੍ਪਜ੍ਜਨਤੋ ਪਟ੍ਠਾਯ. ਕਿਲੇਸਾਨਂ ਅਪ੍ਪਹੀਨਭਾਵਂ ਠਪੇਤ੍ਵਾ ਅਞ੍ਞਸ੍ਸ ਕਾਰਣਸ੍ਸ ਅਭਾਵਤੋ ਤੇਸੁ ਖਨ੍ਧੇਸੁ ਕਿਲੇਸਜਾਤਂ ਅਨੁਸੇਤਿ, ਤਸ੍ਮਾ ਤਂ ਅਨੁਸਯਿਤਂ ਕਿਲੇਸਜਾਤਂ, ਤੇਨੇਵ ਅਨੁਸਯਨਸਙ੍ਖਾਤੇਨ ਅਪ੍ਪਹੀਨਟ੍ਠੇਨ ਭੂਮਿਲਦ੍ਧਨ੍ਤਿ ਵੇਦਿਤਬ੍ਬਂ.
੮੩੫. ਤਤ੍ਥ ਚ ਭੂਮਿਭੂਤੇਸੁ ਖਨ੍ਧੇਸੁ ਨ ਸਬ੍ਬੇ ਸਬ੍ਬੇਸਂ ਵਤ੍ਥੂ ਹੋਨ੍ਤਿ, ਅਥ ਖੋ ਵਿਸੇਸੋ ਅਤ੍ਥੀਤਿ ਤਂ ਦਸ੍ਸੇਨ੍ਤੋ ਆਹ ‘‘ਯਸ੍ਸ ਯੇਸੂ’’ਤਿਆਦਿ. ਤਤ੍ਥ ਯਸ੍ਸਾਤਿ ਯਸ੍ਸ ਪੁਗ੍ਗਲਸ੍ਸ. ਯੇਸੂਤਿ ਸਤਿਪਿ ਅਜ੍ਝਤ੍ਤਭਾਵਸਾਮਞ੍ਞੇ ਯੇਸੁ ਅਤੀਤਾਦਿਕਾਮਾਵਚਰਾਦਿਭੇਦਭਿਨ੍ਨੇਸੁ ਖਨ੍ਧੇਸੁ. ਤੇ ਏਵ ਯਥਾਨੁਸਯਿਤਾ ਖਨ੍ਧਾ. ਕਿਂ ਪਨੇਤੇ ਕਿਲੇਸਾ ਆਰਮ੍ਮਣਂ ਕਰੋਨ੍ਤਾ ਵਿਯ ਪਰਿਚ੍ਛਿਜ੍ਜ ਪਰਿਚ੍ਛਿਜ੍ਜ ਅਨੁਸੇਨ੍ਤੀਤਿ? ਯਤੋ ਤੇ ਏਵ ਖਨ੍ਧਾ ਤੇਸਂ ਕਿਲੇਸਾਨਂ ਵਤ੍ਥੂਤਿ ਵੁਤ੍ਤਾ, ਨ ਹੇਵ ਖੋ ਅਨੁਸਯਾਨਂ ਵਤ੍ਥੁਂ ਪਰਿਚ੍ਛਿਜ੍ਜ ਪਵਤ੍ਤਿ ਅਤ੍ਥਿ. ਅਤੀਤਾਦਿਕਾਮਾਵਚਰਾਦਿਵਸੇਨ ਪਨ ਯਥਾਪਰਿਚ੍ਛਿਨ੍ਨੇ ਵਤ੍ਥੁਸ੍ਮਿਂ ਯੋ ਕਿਲੇਸਾਨਂ ਅਪ੍ਪਹੀਨਟ੍ਠੋ, ਸੋ ਪਰਿਚ੍ਛਿਜ੍ਜ ਪਵਤ੍ਤੋ ਵਿਯ ਹੋਤੀਤਿ ‘‘ਅਤੀਤਕ੍ਖਨ੍ਧੇਸੂ’’ਤਿਆਦਿ ਵੁਤ੍ਤਂ. ਤੇਨ ਵਤ੍ਥੁਵਸੇਨ ਭੂਮਿਲਦ੍ਧਂ ਹੋਤੀਤਿ ਵਤ੍ਥੁਭੇਦੇਨ ਸਿਯਾ ਤਸ੍ਸ ਭੇਦੋਤਿ ਦਸ੍ਸੇਤਿ. ਤਥਾਵਵਤ੍ਥਿਤਭਾਵਤੋ ਏਵ ਹਿ ‘‘ਅਞ੍ਞਤਰੋ ਲੋਲਜਾਤਿਕੋ ਤਂ ਰਸਪਥਵਿਂ ਅਙ੍ਗੁਲਿਯਾ ਸਾਯੀ’’ਤਿਆਦਿਵਚਨਂ (ਦੀ. ਨਿ. ੩.੧੨੦) ਕਾਮਾਵਚਰਕ੍ਖਨ੍ਧੇਸੁ ਅਨੁਸਯਿਤਾਨਂ ਰਸਤਣ੍ਹਾਦੀਨਂ ਰੂਪਾਰੂਪਾਵਚਰਕ੍ਖਨ੍ਧੇ ਅਤਿਕ੍ਕਮਿਤ੍ਵਾ ਪੁਨ ਕਾਮਾਵਚਰਕ੍ਖਨ੍ਧਵਤ੍ਥੁਕਤਂ ਵਿਭਾਵੇਤਿ. ਤੇਨਾਹ ‘‘ਤਥਾ ਕਾਮਾਵਚਰਕ੍ਖਨ੍ਧੇਸੂ’’ਤਿਆਦਿ. ਯਥਾ ਚੇਤ੍ਥ ਰੂਪਾਰੂਪਾਵਚਰਕ੍ਖਨ੍ਧੇ ਅਤਿਕ੍ਕਮਿਤ੍ਵਾ ਪਵਤ੍ਤਿ, ਏਵਂ ਕਾਮਾਵਚਰਕ੍ਖਨ੍ਧੇ ਅਤਿਕ੍ਕਮਿਤ੍ਵਾ ਪਵਤ੍ਤਿ ਹੋਤੀਤਿ ਆਹ ‘‘ਏਸ ਨਯੋ ਰੂਪਾਰੂਪਾਵਚਰੇਸੂ’’ਤਿ.
ਪਰਿਯੁਟ੍ਠਾਨਾਭਿਭਵਨਵਸੇਨ ਚ ਕਿਲੇਸਾਨਂ ਅਨੁਸਯਨਟ੍ਠੋ ਅਨੁਮੀਯਤਿ ਤਦਭਾਵੇ ਅਭਾਵਤੋ. ਯਸ੍ਸ ਯੇ ਅਨੁਸਯਾ ਪਹੀਨਾ, ਤੇਸਂ ਵਤ੍ਥੁ ਤੇਨ ਸਮਤਿਕ੍ਕਨ੍ਤਂ ਪਰਿਞ੍ਞਾਤਤ੍ਤਾਤਿ ਕੁਤੋ ਨੇਸਂ ਭੂਮਿਸਮਞ੍ਞਾਤਿ ਦਸ੍ਸੇਤੁਂ ਵੁਤ੍ਤਂ ‘‘ਸੋਤਾਪਨ੍ਨਾਦੀਸੁ ਪਨਾ’’ਤਿਆਦਿ. ਇਧ ਵਟ੍ਟਮੂਲਕਿਲੇਸਾਤਿ ਅਨੁਸਯਾ ਅਧਿਪ੍ਪੇਤਾ, ਨ ਅਵਿਜ੍ਜਾ, ਭਵਤਣ੍ਹਾ ਚ. ਯਂ ਕਿਞ੍ਚਿ ਚੇਤਨਾਚੇਤਸਿਕਭੇਦਂ, ਕਾਯਿਕਾਦਿਭੇਦਂ ਵਾ. ਇਤੀਤਿ ਏਵਂ, ਅਪ੍ਪਹੀਨਾਨੁਸਯਤ੍ਤਾਤਿ ਅਧਿਪ੍ਪਾਯੋ. ਅਸ੍ਸਾਤਿ ਪੁਥੁਜ੍ਜਨਸ੍ਸ. ਤੇ ਪਨੇਤੇ ਅਨੁਸਯਾ ਅਤੀਤਾਦਿਕਾਮਾਵਚਰਾਦਿਵਸੇਨ ਯਥਾਪਰਿਚ੍ਛਿਨ੍ਨੇ ਤਤ੍ਥ ਤਤ੍ਥ ਵਤ੍ਥੁਸ੍ਮਿਂ ਅਨੁਸਯਨ੍ਤਾਪਿ ਤੇ ਤੇ ਪਞ੍ਚੁਪਾਦਾਨਕ੍ਖਨ੍ਧੇ ਅਵਿਭਾਗੇਨੇਵ ਵਤ੍ਥੁਂ ਕਤ੍ਵਾ ਅਨੁਸੇਨ੍ਤੀਤਿ ਦਸ੍ਸੇਨ੍ਤੋ ‘‘ਤਸ੍ਸੇਤਂ ਵਟ੍ਟਮੂਲ’’ਨ੍ਤਿਆਦਿਮਾਹ.
੮੩੬. ਇਦਾਨਿ ਤਮਤ੍ਥਂ ਅਨ੍ਵਯਬ੍ਯਤਿਰੇਕਵਸੇਨ ਉਪਮਾਯ ਵਿਭਾਵੇਤੁਂ ‘‘ਪਥਵੀਰਸਾਦਿ ਵਿਯਾ’’ਤਿਆਦਿ ਵੁਤ੍ਤਂ. ਰੁਕ੍ਖਗਚ੍ਛਲਤਾਦੀਨਂ ਪਚ੍ਚਯਭੂਤੋ ਸਸਮ੍ਭਾਰਪਥਵਿਯਾ ਰਸੋ ਪਥਵੀਰਸੋ. ਆਪੋਰਸੇਪਿ ਏਸੇਵ ਨਯੋ. ਸਾਖਾ ਨਾਮ ਖੁਦ੍ਦਕਸਾਖਾ. ਪਸਾਖੋ ਵਿਟਪੋ. ਰੁਕ੍ਖਪਵੇਣਿਨ੍ਤਿ ਰੁਕ੍ਖਪਰਾਪਰਂ. ਸਨ੍ਤਾਨਯਮਾਨੇਤਿ ਅਪਰਾਪਰਂ ਅਨੁਪ੍ਪਬਨ੍ਧਨ੍ਤੇ.
ਮਣ੍ਡੂਕਕਣ੍ਟਕੋਤਿ ਏਕੋ ਮਚ੍ਛਕਣ੍ਟਕੋਤਿ ਵਦਨ੍ਤਿ. ਅਨੁਪਾਦਾਨੋਤਿ ਪਹੀਨਚਤੁਰੁਪਾਦਾਨੋ, ਰੂਪਾਦੀਸੁ ਵਾ ਕਿਞ੍ਚਿਪਿ ਅਗਣ੍ਹਨ੍ਤੋ.
੮੩੭. ਇਧ ਸਮੁਦਾਚਾਰੋ ਨਾਮ ਲਦ੍ਧਤ੍ਤਲਾਭਤਾਤਿ ਖਣਤ੍ਤਯਸਮਙ੍ਗਿਸਮੁਦਾਚਾਰੁਪ੍ਪਨ੍ਨਨ੍ਤਿ ਆਹ ‘‘ਵਤ੍ਤਮਾਨੁਪ੍ਪਨ੍ਨਮੇਵ ਸਮੁਦਾਚਾਰੁਪ੍ਪਨ੍ਨ’’ਨ੍ਤਿ. ਪੁਬ੍ਬਭਾਗੇ ਅਨੁਪ੍ਪਜ੍ਜਮਾਨਮ੍ਪੀਤਿ ਤਸ੍ਮਿਂ ਆਪਾਥਗਤੇ ਆਰਮ੍ਮਣੇ ਆਦਿਤੋ ਪਵਤ੍ਤਜਵਨਵਾਰੇਸੁ ਅਨੁਪ੍ਪਜ੍ਜਮਾਨਮ੍ਪਿ. ਅਧਿਗ੍ਗਹਿਤਤ੍ਤਾਤਿ ਅਯੋਨਿਸੋਮਨਸਿਕਾਰੇਨ ਅਭਿਰੁਯ੍ਹ ਗਹਿਤਤ੍ਤਾ, ਦਲ਼੍ਹਂ ਗਹਿਤਤ੍ਤਾਤਿ ਅਤ੍ਥੋ. ਅਪਰਭਾਗੇਤਿ ਅਪਰਸ੍ਮਿਂ ਕਾਲਭਾਗੇ, ਕਾਲਨ੍ਤਰੇਤਿ ਅਤ੍ਥੋ. ਏਕਨ੍ਤੇਨ ਉਪ੍ਪਤ੍ਤਿਤੋਤਿ ਪਚ੍ਚਯਸਮਵਾਯੇ ਸਤਿ ਤਥਾ ਅਯੋਨਿਸੋਮਨਸਿਕਾਰਸ੍ਸ ਤਤ੍ਥ ਨਿਬ੍ਬਤ੍ਤਤ੍ਤਾ ਨਿਯਮੇਨ ਉਪ੍ਪਜ੍ਜਨਤੋ. ਕਲ੍ਯਾਣਿਗਾਮੇਤਿ ਏਵਂਨਾਮਕੇ ਗਾਮੇ. ਰੋਹਣੇ ਕਿਰ ਅਭਿਰੂਪਾਨਂ ਇਤ੍ਥੀਨਂ ਉਪ੍ਪਤ੍ਤਿਟ੍ਠਾਨਤਾਯ ਸੋ ਗਾਮੋ ਤਥਾ ਵੁਚ੍ਚਤਿ. ਚਿਤ੍ਤਸਨ੍ਤਤਿਮਨਾਰੁਲ਼੍ਹਨ੍ਤਿ ਪਚ੍ਚੁਪ੍ਪਨ੍ਨਤਂ ਪਟਿਸੇਧੇਤਿ. ‘‘ਉਪ੍ਪਤ੍ਤਿਨਿਵਾਰਕਸ੍ਸ ਹੇਤੁਨੋ ਅਭਾਵਾ’’ਤਿ ਏਤੇਨ ਪਚ੍ਚਯੇ ਸਤਿ ਪਚ੍ਚਯਸਮਵਾਯੇ ਉਪ੍ਪਜ੍ਜਨਾਰਹਤਾਯ ਅਵਿਕ੍ਖਮ੍ਭਿਤਸ੍ਸ ਉਪ੍ਪਨ੍ਨਤਾਪਰਿਯਾਯੋਤਿ ਦਸ੍ਸੇਤਿ. ਨਨੁ ਚ ਅਸਮੂਹਤੁਪ੍ਪਨ੍ਨਮ੍ਪਿ ਪਚ੍ਚਯੇ ਸਤਿ ਉਪ੍ਪਜ੍ਜਨਾਰਹਮੇਵ? ਸਚ੍ਚਮੇਤਂ, ਪਹਾਨਵਿਸੇਸਭਾਵਕਤੋ ਪਨ ਨੇਸਂ ਭੇਦੋ. ਯਥਾ ਅਵਿਕ੍ਖਮ੍ਭਿਤਾਸਮੂਹਤਭੂਮਿਲਦ੍ਧੁਪ੍ਪਨ੍ਨਂ ਸਤਿ ਪਚ੍ਚਯਸਮਵਾਯੇ ਉਪ੍ਪਜ੍ਜਨਾਰਹਂ, ਏਵਂ ਆਰਮ੍ਮਣਾਧਿਗ੍ਗਹਿਤੁਪ੍ਪਨ੍ਨਮ੍ਪੀਤਿ ਤਿਵਿਧਸ੍ਸਾਪਿ ਭੂਮਿਲਦ੍ਧੇਨ ਏਕਸਙ੍ਗਹਤਾ ਵੁਤ੍ਤਾ.
੮੩੮. ਅਕੁਸਲਮ੍ਪਿ ਭੂਤਾਪਗਤੁਪ੍ਪਨ੍ਨਂ ਅਤੀਤਤ੍ਤਾ ਨ ਪਹਾਤਬ੍ਬਂ, ਤਥਾ ਏਕਚ੍ਚਂ ਓਕਾਸਕਤੁਪ੍ਪਨ੍ਨਂ ਇਤਰਂ ਅਪ੍ਪਹਾਤਬ੍ਬਤੋ, ਸੇਸਦ੍ਵਯਂ ਖਣਤ੍ਤਯਸਮਙ੍ਗਿਭਾਵਤੋਤਿ ਆਹ ‘‘ਅਮਗ੍ਗਵਜ੍ਝਤ੍ਤਾ’’ਤਿ. ਕੇਨਚੀਤਿ ਚਤੂਸੁ ਮਗ੍ਗਞਾਣੇਸੁ ਕੇਨਚਿ. ਤਸ੍ਸਾਤਿ ਯਥਾਵੁਤ੍ਤਸ੍ਸ ਚਤੁਬ੍ਬਿਧਸ੍ਸਪਿ ਉਪ੍ਪਨ੍ਨਸ੍ਸ. ਤਂ ਉਪ੍ਪਨ੍ਨਭਾਵਂ ਵਿਨਾਸਯਮਾਨਨ੍ਤਿ ਅਨੁਪ੍ਪਤ੍ਤਿਧਮ੍ਮਤਾਪਾਦਨੇਨ ਉਪ੍ਪਜ੍ਜਨਾਰਹਤਂ ਵਿਨਾਸੇਨ੍ਤਂ. ਪਠਮਂ ਲੋਕਿਯਞਾਣੇਨ ਯਥਾਬਲਂ ਪਹੀਨਮੇਵ ਲੋਕੁਤ੍ਤਰਞਾਣਂ ਪਜਹਤੀਤਿ ਲੋਕਿਯਗ੍ਗਹਣਂ ਕਤਂ.
ਪਰਿਞ੍ਞਾਦਿਕਿਚ੍ਚਕਥਾਵਣ੍ਣਨਾ
੮੩੯. ਸਚ੍ਚਾਭਿਸਮਯਕਾਲਸ੍ਮਿਨ੍ਤਿ ਚਤੁਨ੍ਨਂ ਅਰਿਯਸਚ੍ਚਾਨਂ ਪਟਿਵਿਜ੍ਝਨਕ੍ਖਣੇ. ਵੁਤ੍ਤਾਨੀਤਿ ‘‘ਦੁਕ੍ਖਂ ਪਰਿਞ੍ਞੇਯ੍ਯ’’ਨ੍ਤਿਆਦਿਨਾ (ਸਂ. ਨਿ. ੫.੧੦੯੯), ‘‘ਯੋ, ਭਿਕ੍ਖਵੇ, ਦੁਕ੍ਖਂ ਪਸ੍ਸਤੀ’’ਤਿਆਦਿਨਾ (ਸਂ. ਨਿ. ੫.੧੧੦੦) ਚ ਵੁਤ੍ਤਾਨਿ. ਯਥਾਸਭਾਵੇਨਾਤਿ ਅਵਿਪਰੀਤਸਭਾਵੇਨ. ‘‘ਜਾਨਿਤਬ੍ਬਾਨੀ’’ਤਿ ਵਤ੍ਵਾ ਤੇਸਂ ਜਾਨਨਵਿਧਿਂ ਉਪਮਾਵਸੇਨ ਅਟ੍ਠਕਥਾਯਂ ਤਾਵ ਵੁਤ੍ਤਨਯੇਨ ਦਸ੍ਸੇਤੁਂ ‘‘ਵੁਤ੍ਤਂ ਹੇਤ’’ਨ੍ਤਿਆਦਿ ਵੁਤ੍ਤਂ.
ਤਤ੍ਥ ਯਥਾ ਪਦੀਪੋਤਿਆਦਿ ਏਕਸ੍ਸ ਞਾਣਸ੍ਸ ਏਕਕ੍ਖਣੇ ਚਤ੍ਤਾਰਿ ਕਿਚ੍ਚਾਨਿ ਕਥਂ ਸਮ੍ਭਵਨ੍ਤਿ. ਨ ਹਿ ਤਾਦਿਸਂ ਕਿਞ੍ਚਿ ਲੋਕੇ ਦਿਟ੍ਠਂ ਅਤ੍ਥਿ, ਨ ਚ ਵਚਨਂ ਲਬ੍ਭਤੀਤਿ ਅਨ੍ਤੋਲੀਨਚੋਦਨਂ ਮਨਸਿ ਕਤ੍ਵਾ ਵੁਤ੍ਤਂ ‘‘ਪਰਿਞ੍ਞਾਭਿਸਮਯੇਨਾ’’ਤਿ. ਅਨਵਸੇਸਤੋ ਪਰਿਚ੍ਛਿਜ੍ਜ ਜਾਨਨਸਙ੍ਖਾਤੇਨ ਪਟਿਵਿਜ੍ਝਨੇਨ ਅਭਿਸਮੇਤਿ ਅਸਮ੍ਮੋਹਵਸੇਨ ਪਟਿਵਿਜ੍ਝਤਿ. ਪਹਾਨਾਭਿਸਮਯੇਨਾਤਿ ਸਮੁਚ੍ਛੇਦਪ੍ਪਹਾਨਸਙ੍ਖਾਤੇਨ ਪਟਿਵਿਜ੍ਝਨੇਨ ਅਸਮ੍ਮੋਹਤੋ ਅਭਿਸਮੇਤਿ. ਮਗ੍ਗਂ ਭਾਵਨਾਭਿਸਮਯੇਨਾਤਿ ਮਗ੍ਗਞਾਣਂ ਸਮ੍ਮਾਸਙ੍ਕਪ੍ਪਾਦਿਸੇਸਮਗ੍ਗਂ ਸਹਜਾਤਾਦਿਪਚ੍ਚਯਤਾਵਸੇਨ ਭਾਵਨਾਭਿਸਮਯੇਨ. ਅਭਿਸਮੇਤਿ ਪੁਬ੍ਬਭਾਗਭਾਵਨਾਸਮ੍ਭੂਤੇਨ ਅਰਿਯਮਗ੍ਗਭਾਵਨਾਸਙ੍ਖਾਤੇਨ ਪਟਿਵਿਜ੍ਝਨੇਨ ਅਭਿਸਮੇਤਿ ਅਟ੍ਠਙ੍ਗਿਕਂ ਮਗ੍ਗਂ ਅਸਮ੍ਮੋਹਤੋ ਪਟਿਵਿਜ੍ਝਤਿ. ਮਗ੍ਗਞਾਣਞ੍ਹਿ ਸਮ੍ਪਯੁਤ੍ਤਧਮ੍ਮੇਸੁ ਸਮ੍ਮੋਹਂ ਵਿਦ੍ਧਂਸੇਨ੍ਤਂ ਅਤ੍ਤਨਿਪਿ ਸਮ੍ਮੋਹਂ ਵਿਦ੍ਧਂਸੇਤਿਯੇਵ. ਨਿਰੋਧਨ੍ਤਿ ਨਿਬ੍ਬਾਨਂ. ਸਚ੍ਛਿਕਿਰਿਯਾਭਿਸਮਯੇਨਾਤਿ ਪਚ੍ਚਕ੍ਖਕਰਣਸਙ੍ਖਾਤੇਨ ਪਟਿਵਿਜ੍ਝਨੇਨ. ਪਾਪੁਣਾਤੀਤਿ ਅਧਿਗਚ੍ਛਤਿ. ਸ੍ਵਾਯਂ ਅਧਿਗਮੋ ਦਸ੍ਸਨਪਟਿਵੇਧੋਤਿ ਆਹ ‘‘ਪਸ੍ਸਤਿ ਪਟਿਵਿਜ੍ਝਤੀ’’ਤਿ.
‘‘ਨਿਰੋਧਂ…ਪੇ… ਪਟਿਵਿਜ੍ਝਤੀ’’ਤਿ ਏਤੇਨ ਨਿਰੋਧਸਚ੍ਚਮੇਕਂ ਆਰਮ੍ਮਣਪਟਿਵੇਧੇਨ ਚਤ੍ਤਾਰਿਪਿ ਸਚ੍ਚਾਨਿ ਅਸਮ੍ਮੋਹਪਟਿਵੇਧੇਨ ਮਗ੍ਗਞਾਣਂ ਪਟਿਵਿਜ੍ਝਤੀਤਿ ਏਵਂ ਯੁਤ੍ਤਿਵਸੇਨ ਵਿਭਾਵਿਤਂ ਏਕਪਟਿਵੇਧਂ ਆਗਮੇਨਪਿ ਸਾਧੇਤੁਂ ‘‘ਵੁਤ੍ਤਮ੍ਪਿ ਚੇਤ’’ਨ੍ਤਿਆਦਿ ਵੁਤ੍ਤਂ. ‘‘ਸਬ੍ਬਂ ਵੇਦਿਤਬ੍ਬ’’ਨ੍ਤਿ ਇਮਿਨਾ ‘‘ਯੋ ਦੁਕ੍ਖਸਮੁਦਯਂ ਪਸ੍ਸਤਿ, ਸੋ ਦੁਕ੍ਖਮ੍ਪਿ ਪਸ੍ਸਤੀ’’ਤਿਆਦਿਨਾ (ਸਂ. ਨਿ. ੫.੧੧੦੦) ਆਗਤਂ ਸਮੁਦਯਂ ਸਚ੍ਚਾਦਿਮੂਲਕਂ ਯੋਜਨਂ ਸਙ੍ਗਣ੍ਹਾਤਿ.
ਨ ਚੇਤਂ ਕਾਲਨ੍ਤਰਦਸ੍ਸਨਂ ਸਨ੍ਧਾਯ ਵੁਤ੍ਤਂ, ਅਥ ਖੋ ਏਕਪਟਿਵੇਧਮੇਵਾਤਿ ਦਸ੍ਸੇਨ੍ਤੇਨ ‘‘ਮਗ੍ਗਸਮਙ੍ਗਿਸ੍ਸ ਞਾਣਂ, ਦੁਕ੍ਖੇਪੇਤਂ ਞਾਣ’’ਨ੍ਤਿਆਦਿਨਾ (ਵਿਭ. ੭੯੪; ਪਟਿ. ਮ. ੧.੧੦੯) ਅਪਰਂ ਸੁਤ੍ਤਪਦਂ ਆਨੀਤਂ. ਤਥਾ ਹਿ ‘‘ਯੋ ਨੁ ਖੋ, ਆਵੁਸੋ, ਦੁਕ੍ਖਂ ਪਸ੍ਸਤਿ, ਦੁਕ੍ਖਸਮੁਦਯਮ੍ਪਿ ਸੋ ਪਸ੍ਸਤਿ…ਪੇ… ਪਟਿਪਦਮ੍ਪਿ ਸੋ ਪਸ੍ਸਤੀ’’ਤਿ (ਸਂ. ਨਿ. ੫.੧੧੦੦) ਏਕਸਚ੍ਚਦਸ੍ਸਨਸਮਙ੍ਗਿਨੋ ਅਞ੍ਞਸਚ੍ਚਦਸ੍ਸਨਸਮਙ੍ਗਿਭਾਵਵਿਚਾਰਣਾਯ ਤਮਤ੍ਥਂ ਸਾਧੇਤੁਂ ਆਯਸ੍ਮਤਾ ਗਵਮ੍ਪਤਿਤ੍ਥੇਰੇਨ ਵੁਤ੍ਤਂ, ਪਚ੍ਚੇਕਞ੍ਚ ਸਚ੍ਚਤ੍ਤਯਦਸ੍ਸਨਯੋਜਨਾ ਕਤਾ. ਅਞ੍ਞਥਾ ਕਮਾਭਿਸਮਯੇ ਪੁਰਿਮਦਿਟ੍ਠਸ੍ਸ ਪੁਨ ਅਦਸ੍ਸਨਤੋ ਸਮੁਦਯਾਦਿਂ ਪਸ੍ਸਤੋ ਦੁਕ੍ਖਾਦਿਦਸ੍ਸਨਂ ਪੁਨ ਅਵਤ੍ਤਬ੍ਬਂ ਸਿਯਾ, ਵੁਚ੍ਚਮਾਨੇ ਚ ਸਬ੍ਬਦਸ੍ਸਨਂ ਦਸ੍ਸਨਨ੍ਤਰਪਰਮਨ੍ਤਿ ਦਸ੍ਸਨਾਨੁਪਰਮੋ ਏਵ ਸਿਯਾਤਿ.
ਨਿਸ੍ਸਯਭਾਵਹੇਤੁਤਾਯ ਦੁਕ੍ਖਪਰਿਞ੍ਞਾਯ ਵਟ੍ਟਿਝਾਪਨਸਦਿਸਤਾ, ਪਟਿਪਕ੍ਖਵਿਦ੍ਧਂਸਨਤਾਯ ਸਮੁਦਯਪ੍ਪਹਾਨਸ੍ਸ ਅਨ੍ਧਕਾਰਵਿਧਮਨਸਦਿਸਤਾ, ਞਾਣਾਲੋਕਪਰਿਬ੍ਰੂਹਨਤਾਯ ਮਗ੍ਗਭਾਵਨਾਯ ਆਲੋਕਵਿਦ੍ਧਂਸਨਸਦਿਸਤਾ, ਤੇਨ ਤੇਨ ਮਗ੍ਗੇਨ ਯਥਾ ਯਥਾ ਨਿਰੋਧਸ੍ਸ ਸਚ੍ਛਿਕਿਰਿਯਾ, ਤਥਾ ਤਥਾ ਕਿਲੇਸਸ੍ਨੇਹਪਰਿਯਾਦਾਨਂ ਹੋਤੀਤਿ ਨਿਰੋਧਸਚ੍ਛਿਕਿਰਿਯਾਯ ਸ੍ਨੇਹਪਰਿਯਾਦਾਨਸਦਿਸਤਾ ਕਾਰਣੂਪਚਾਰੇਨ ਵੁਤ੍ਤਾ.
੮੪੦. ਓਭਾਸੇਤੀਤਿ ਪਕਾਸੇਤਿ. ਕਿਲੇਸਪਟਿਪ੍ਪਸ੍ਸਦ੍ਧਿਨ੍ਤਿ ਸਬ੍ਬਕਿਲੇਸਦਰਥਪਰਿਲ਼ਾਹਵੂਪਸਮਭਾਵਤੋ ਕਿਲੇਸਾਨਂ ਪਟਿਪ੍ਪਸ੍ਸਦ੍ਧਿਭੂਤਂ.
੮੪੧. ਅਪ੍ਪੇਤੀਤਿ ਪਪ੍ਪੋਤਿ. ਦੁਕ੍ਖਪਰਿਞ੍ਞਾਯ ਸਕ੍ਕਾਯਤੀਰਸਮਤਿਕ੍ਕਮਭਾਵਤੋ ਓਰਿਮਤੀਰਪ੍ਪਹਾਨਸਦਿਸਤਾ, ਮਗ੍ਗਭਾਵਨਾਯ ਸਤ੍ਤਤ੍ਤਿਂਸਬੋਧਿਪਕ੍ਖਿਯਧਮ੍ਮਾਵਹਨਤਾਯ ਭਣ੍ਡਵਹਨਸਦਿਸਤਾ.
੮੪੨. ਪਵਤ੍ਤਂ ਞਾਣਂ ਅਸ੍ਸਾਤਿ ਪਵਤ੍ਤਞਾਣੋ, ਮਗ੍ਗੋ. ਅਸ੍ਸ ਮਗ੍ਗਸ੍ਸ.
ਤਥਟ੍ਠੇਨਾਤਿ ਤਥਸਭਾਵੇਨ, ਪੀਲ਼ਨਾਦਿਅਵਿਪਰੀਤਸਭਾਵੇਨਾਤਿ ਅਤ੍ਥੋ. ਏਕਪਟਿਵੇਧਾਨੀਤਿ ਏਕਜ੍ਝਂ ਪਟਿਵਿਜ੍ਝਿਤਬ੍ਬਾਕਾਰਾਨਿ.
ਦੁਕ੍ਖਸ੍ਸ ਪੀਲ਼ਨਟ੍ਠੋਤਿਆਦੀਸੁ ਯਂ ਵਤ੍ਤਬ੍ਬਂ, ਤਂ ਹੇਟ੍ਠਾ ਬੁਦ੍ਧਾਨੁਸ੍ਸਤਿਵਣ੍ਣਨਾਯਂ (ਵਿਸੁਦ੍ਧਿ. ਮਹਾਟੀ. ੧.੧੪੪) ਵੁਤ੍ਤਮੇਵ. ਏਕਸਙ੍ਗਹਿਤਾਨੀਤਿ ਏਕੇਨੇਵ ਸਙ੍ਗਹਿਤਾਨਿ. ਕੇਨ? ਤਥਟ੍ਠੇਨ, ਸਚ੍ਚਟ੍ਠੇਨਾਤਿ ਅਤ੍ਥੋ. ਯਂ ਏਕਸਙ੍ਗਹਿਤਨ੍ਤਿਆਦਿ ਞਾਣਸ੍ਸ ਏਕਪਟਿਵੇਧਦਸ੍ਸਨਂ. ਮਗ੍ਗਞਾਣਞ੍ਹਿ ਨਿਰੋਧਮੇਵ ਆਰਮ੍ਮਣਂ ਕਰੋਨ੍ਤਮ੍ਪਿ ਯੋ ਸੋ ਦੁਕ੍ਖਾਦੀਸੁ ਤਚ੍ਛਾਵਿਪਲ੍ਲਾਸਭੂਤਭਾਵਸਙ੍ਖਾਤੋ ਸਚ੍ਚਟ੍ਠੋ, ਤਪ੍ਪਟਿਚ੍ਛਾਦਕਸਮ੍ਮੋਹਵਿਦ੍ਧਂਸਨੇਨ ਤਂ ਯਾਥਾਵਤੋ ਪਟਿਵਿਜ੍ਝਨ੍ਤਂ ਪਚ੍ਚਕ੍ਖਂ ਕਰੋਨ੍ਤਮੇਵ ਪਵਤ੍ਤਤਿ. ਯਤੋ ਅਪਰਭਾਗੇ ਪੀਲ਼ਨਾਦਯੋ ਸੋਲ਼ਸਪਿ ਸਚ੍ਚਟ੍ਠਾ ਅਰਿਯਸ੍ਸ ਹਤ੍ਥਾਮਲਕਂ ਵਿਯ ਯਾਥਾਵਤੋ ਉਪਟ੍ਠਹਨ੍ਤਿ.
੮੪੩. ਅਤ੍ਥਾਤਿ ਞਾਣੇਨ ਅਰਣੀਯਤੋ ਅਤ੍ਥਾਤਿ ਲਦ੍ਧਸਮਞ੍ਞਾ ਆਕਾਰਾ. ਅਞ੍ਞਸਚ੍ਚਦਸ੍ਸਨਵਸੇਨਾਤਿ ਸਮੁਦਯਾਦਿਸਚ੍ਚਨ੍ਤਰਦਸ੍ਸਨਵਸੇਨ. ਆਵਿਭਾਵਤੋਤਿ ਪਕਾਸਭਾਵਤੋ. ਇਦਂ ਵੁਤ੍ਤਂ ਹੋਤਿ – ਯੇ ਆਕਾਰਾ ਦੁਕ੍ਖਾਦੀਸੁ ਸਭਾਵਵਸੇਨ, ਸਚ੍ਚਨ੍ਤਰਦਸ੍ਸਨਵਸੇਨ ਚ ਆਵਿਭਵਨ੍ਤਿ, ਤੇ ਪੀਲ਼ਨਾਦਯੋ ਚਤ੍ਤਾਰੋਯੇਵਾਤਿ ਸੋਲ਼ਸੇਵ ਵੁਤ੍ਤਾ, ਨ ਅਞ੍ਞੇਤਿ. ਅਯਮਤ੍ਥੋ ਇਧਾਧਿਪ੍ਪੇਤੋਤਿ ਕਥਮਿਦਂ ਵਿਞ੍ਞਾਯਤੀਤਿ ਆਹ ‘‘ਤਤ੍ਥ ਕਤਮਂ ਦੁਕ੍ਖੇ ਞਾਣ’’ਨ੍ਤਿਆਦਿ. ਤੇਨੇਤਂ ਦਸ੍ਸੇਤਿ – ਯਸ੍ਮਾ ਪਾਲ਼ਿਯਂ ਵਿਸੁਂ ਵਿਸੁਂ ਆਰਮ੍ਮਣਕਰਣਵਸੇਨਪਿ ਸਚ੍ਚਞਾਣਂ ਵੁਤ੍ਤਂ ਕਿਚ੍ਚਨਿਬ੍ਬਤ੍ਤਿਵਸੇਨਪਿ, ਤਸ੍ਮਾ ਵਿਞ੍ਞਾਯਤਿ ‘‘ਸਭਾਵਤੋ, ਸਚ੍ਚਨ੍ਤਰਦਸ੍ਸਨਤੋ ਚ ਸਚ੍ਚਾਨਂ ਆਕਾਰਾ ਆਵਿਭਵਨ੍ਤੀ’’ਤਿ.
ਕਿਚ੍ਚਨਿਬ੍ਬਤ੍ਤਿਵਸੇਨ ਦਸ੍ਸਨਂ ਆਵਿਭਾਵਤੋ ਦਸ੍ਸਨਸਦਿਸਨ੍ਤਿ ਤਂ ਅਨਾਮਸਿਤ੍ਵਾ ਇਤਰਮੇਵ ਦਸ੍ਸੇਨ੍ਤੋ ‘‘ਤਤ੍ਥਾ’’ਤਿਆਦਿਮਾਹ. ਤਤ੍ਥਾਤਿ ਤੇਸੁ ਦ੍ਵੀਸੁ ਦਸ੍ਸਨੇਸੁ. ਆਯੂਹਿਤਨ੍ਤਿ ਪਿਣ੍ਡਵਸੇਨ ਨਿਬ੍ਬਤ੍ਤਿਤਂ. ਯਞ੍ਹਿ ਕਿਞ੍ਚਿ ਪਚ੍ਚਯੁਪ੍ਪਨ੍ਨਂ ਨਾਮ, ਸਬ੍ਬਂ ਤਂ ਸਮੁਦਿਤਮੇਵ ਨਿਬ੍ਬਤ੍ਤਤੀਤਿ. ਸਙ੍ਖਤਨ੍ਤਿ ਪਚ੍ਚਯਨ੍ਤਰੇਹਿ ਸਮੇਚ੍ਚ ਸਮ੍ਭੂਯ ਕਤਂ. ਰਾਸਿਕਤਨ੍ਤਿ ਪੁਞ੍ਜਕਤਂ. ਅਨੇਕਮੇਵ ਹਿ ਪਚ੍ਚਯੁਪ੍ਪਨ੍ਨਂ ਏਕਜ੍ਝਂ ਨਿਬ੍ਬਤ੍ਤਮਾਨਂ ਅਤ੍ਤਨੋ ਪਚ੍ਚਯੇਹਿ ਰਾਸਿਕਤਂ ਵਿਯ ਹੋਤੀਤਿ. ਤਸ੍ਮਾਤਿ ਸਮੁਦਯੇਨ ਆਯੂਹਿਤਤ੍ਤਾ. ਅਸ੍ਸਾਤਿ ਦੁਕ੍ਖਸਚ੍ਚਸ੍ਸ. ਯਸ੍ਮਿਂ ਸਨ੍ਤਾਨੇ ਉਪ੍ਪਨ੍ਨੋ, ਤਸ੍ਸ ਕਿਲੇਸਸਨ੍ਤਾਪਹਰੋ. ਸਯਮ੍ਪਿ ਕਿਲੇਸਪਰਿਲ਼ਾਹਾਭਾਵਤੋ ਸੁਸੀਤਲੋ. ਸਨ੍ਤਾਪਟ੍ਠੋ ਆਵਿਭਵਤਿ ਉਲ਼ਾਰਦਸ੍ਸਨੇਨ ਤਦਞ੍ਞਸ੍ਸ ਅਨੁਲ਼ਾਰਭਾਵੋ ਵਿਯਾਤਿ ਦਸ੍ਸੇਨ੍ਤੋ ਆਹ ‘‘ਆਯਸ੍ਮਤੋ’’ਤਿਆਦਿ. ਅਵਿਪਰਿਣਾਮਧਮ੍ਮਸ੍ਸ ਨਿਚ੍ਚਸਭਾਵਸ੍ਸ ਵਤ੍ਤਬ੍ਬਮੇਵ ਨਤ੍ਥਿ ਪਟਿਪਕ੍ਖਤੋ ਆਵਿਭਵਨਾਕਾਰਸ੍ਸ ਸੁਖਸਿਦ੍ਧਿਤੋ.
ਨਿਦਾਨਟ੍ਠੋ ਆਵਿਭਵਤਿ ਇਦਮਸ੍ਸ ਨਿਦਦਾਤੀਤਿ. ਸਂਯੋਗਪਲਿਬੋਧਟ੍ਠਾ ਪਟਿਪਕ੍ਖਵਸੇਨ ਆਵਿਭਵਨਾਕਾਰਾਤਿ ਦਸ੍ਸੇਨ੍ਤੋ ਆਹ ‘‘ਵਿਸਂਯੋਗਭੂਤਸ੍ਸਾ’’ਤਿਆਦਿ. ਕਿਲੇਸਦੁਕ੍ਖੇਹਿ ਸਂਯੋਜਨਟ੍ਠੋ ਸਂਯੋਗਟ੍ਠੋ. ਸਂਸਾਰਚਾਰਕੇ ਪਲਿਬੁਦ੍ਧਨਟ੍ਠੋ ਪਲਿਬੋਧਟ੍ਠੋ.
ਕਿਲੇਸਸਙ੍ਗਣਿਕਾਦਿਵਸੇਨ ਅਵਿਵੇਕਭੂਤਸ੍ਸ. ਵਿਵੇਕਟ੍ਠੋ ਉਪਧਿਵਿਵੇਕਤਾ. ਸਬ੍ਬਸਙ੍ਖਾਰਵਿਵਿਤ੍ਤਤਾ ਅਸਙ੍ਖਤਭਾਵੋਤਿ ਏਵਂ ਅਚ੍ਛਰਿਯਬ੍ਭੁਤਸਭਾਵੋਪਿ ਅਰਿਯਮਗ੍ਗੋ ਸਙ੍ਖਤੋ ਏਵ, ਅਯਮੇਵ ਚ ਏਕੋ ਅਸਙ੍ਖਤੋਤਿ ਨਿਰੋਧਸ੍ਸ ਅਸਙ੍ਖਤਭਾਵੋ ਸੁਪਾਕਟੋ ਹੋਤਿ. ਦੁਕ੍ਖਂ ਵਿਸਂ ਮਰਣਧਮ੍ਮਤੋ ਤਸ੍ਸ ਅਗਦਭੂਤਂ ਅਮਤਂ ਨਿਬ੍ਬਾਨਂ.
‘‘ਮਗ੍ਗੋ’’ਤਿ ਸਮ੍ਭਾਵੇਤਬ੍ਬਤਂ ਪਤ੍ਤੋ ਸੁਖੁਮਸਨ੍ਤਭਾਵੇਨ ਉਪਟ੍ਠਿਤੋ ਨਿਕਨ੍ਤਿਭੂਤੋਪਿ ਨਾਯਂ ਸਮੁਦਯੋ ਹੇਤੁ ਨਿਬ੍ਬਾਨਸ੍ਸ ਪਤ੍ਤਿਯਾ. ਅਯਂ ਅਰਿਯਮਗ੍ਗੋ ਹੇਤੂਤਿ ਮਗ੍ਗਾਮਗ੍ਗਞਾਣਦਸ੍ਸਨੇ ਵੁਤ੍ਤਨਯੇਨ ਮਗ੍ਗਸ੍ਸ ਹੇਤੁਟ੍ਠੋ ਆਵਿਭਵਤਿ. ਨਿਰੋਧਦਸ੍ਸਨੇਨਾਤਿ ਅਤਿਵਿਯ ਨਿਪੁਣਸ੍ਸ ਪਰਮਗਮ੍ਭੀਰਸ੍ਸ ਨਿਰੋਧਸਚ੍ਚਸ੍ਸ ਦਸ੍ਸਨੇਨ. ਤੇਨਾਹ ‘‘ਪਰਮਸੁਖੁਮਾਨੀ’’ਤਿਆਦਿ. ਦੁਕ੍ਖਦਸ੍ਸਨੇਨਾਤਿ ਅਤਿਵਿਯ ਆਦੀਨਵਪ੍ਪਤ੍ਤਿਯਾ ਵਿਪੁਲਤਰਾਦੀਨਵਸ੍ਸ ਦੁਕ੍ਖਸਚ੍ਚਸ੍ਸ ਦਸ੍ਸਨੇਨ. ਤਪ੍ਪਟਿਪਕ੍ਖਤੋ ਆਧਿਪਤੇਯ੍ਯਟ੍ਠੋ. ਤੇਨਾਹ ‘‘ਅਨੇਕਰੋਗਾਤੁਰ…ਪੇ… ਉਲ਼ਾਰਭਾਵੋ ਵਿਯਾ’’ਤਿ. ਏਵਮੇਤੇ ਯਥਾਰਹਂ ਅਨ੍ਵਯਤੋ, ਬ੍ਯਤਿਰੇਕਤੋ ਚ ਸਚ੍ਚੇਸੁ ਆਵਿਭਵਨਾਕਾਰਾ ਵਿਭਾਵਿਤਾ.
ਏਕੇਕਸ੍ਸਾਤਿ ਏਕੇਕਸ੍ਸ ਅਤ੍ਥਸ੍ਸ, ਪੀਲ਼ਨਾਯੂਹਨਨਿਸ੍ਸਰਣਨਿਯ੍ਯਾਨਟ੍ਠੇ ਸਨ੍ਧਾਯਾਹ. ਤਿਣ੍ਣਂ ਤਿਣ੍ਣਨ੍ਤਿ ਸਙ੍ਖਤਾਦਿਅਤ੍ਥੇ. ਯੇ ਪਨ ਵਾਦਿਨੋ. ਨਾਨਾਭਿਸਮਯਨ੍ਤਿ ਨਾਨਾਞਾਣੇਨ ਅਭਿਸਮਯਂ, ਚਤੁਨ੍ਨਂ ਸਚ੍ਚਾਨਂ ਨਾਨਾਕ੍ਖਣੇ ਨਾਨਾਞਾਣੇਨ ਪਟਿਵਿਜ੍ਝਨਨ੍ਤਿ ਅਤ੍ਥੋ. ਯਦਿ ਹਿ ਮਗ੍ਗਞਾਣਸ੍ਸ ਚਤੂਸੁ ਸਚ੍ਚੇਸੁ ਨਾਨਾਭਿਸਮਯੋ ਸਿਯਾ, ਦੁਕ੍ਖਦਸ੍ਸਨਾਦੀਹਿ ਪਠਮਮਗ੍ਗਾਦੀਹਿ ਪਹਾਤਬ੍ਬਾਨਂ ਸਂਯੋਜਨਤ੍ਤਯਾਦੀਨਂ ਏਕਦੇਸਪ੍ਪਹਾਨਂ ਆਪਜ੍ਜਤਿ. ਤਥਾ ਚ ਸਤਿ ਏਕਦੇਸਸੋਤਾਪਤ੍ਤਿਮਗ੍ਗਟ੍ਠਤਾਦਿਪ੍ਪਸਙ੍ਗੋ. ਤਂਤਂਦਸ੍ਸਨਾਨਨ੍ਤਰਞ੍ਚ ਤਂਤਂਫਲੇਨ ਭਵਿਤਬ੍ਬਨ੍ਤਿ ਤਂਤਂਪਹੇਯ੍ਯਕਿਲੇਸਪਟਿਪ੍ਪਸ੍ਸਦ੍ਧਿਭੂਤਾਨਂ ਫਲਾਨਂ ਮਗ੍ਗਾਨਂ ਵਿਯ ਚਤੁਕ੍ਕਤਾ ਸਿਯਾ. ਤਥਾ ਚ ਸਤਿ ਏਕਦੇਸਸੋਤਾਪਨ੍ਨਤਾਦਿਪ੍ਪਸਙ੍ਗੋ. ਕਿਞ੍ਚ ਭਿਯ੍ਯੋ – ਯਦਿ ਮਗ੍ਗਞਾਣਸ੍ਸ ਨਾਨਾਭਿਸਮਯੋ ਸਿਯਾ, ਅਞ੍ਞੇਨ ਞਾਣੇਨ ਦੁਕ੍ਖਂ ਪਸ੍ਸਤਿ. ਅਞ੍ਞੇਨ ਸਮੁਦਯਂ, ਅਞ੍ਞੇਨ ਨਿਰੋਧਂ, ਅਞ੍ਞੇਨ ਮਗ੍ਗਂ, ਏਵਂ ਸਤਿ ਮਗ੍ਗਕਿਚ੍ਚਂ ਅਪਰਿਪੁਣ੍ਣਮੇਵ ਸਿਯਾ. ਮਗ੍ਗਦਸ੍ਸਨੇਨ ਹਿ ਦ੍ਵਯਗਤਿ, ਤੇਨੇਵ ਵਾ ਤਸ੍ਸ ਦਸ੍ਸਨਂ, ਅਞ੍ਞੇਨ ਵਾਤਿ. ਤਤ੍ਥ ਪਠਮੋ ਤਾਵ ਪਕ੍ਖੋ ਨ ਯੁਜ੍ਜਤਿ ਅਤ੍ਤਨਿ ਪਵਤ੍ਤਿਯਾ ਅਸਮ੍ਭਵਤੋ. ਨ ਹਿ ਤੇਨੇਵ ਅਙ੍ਗੁਲਗ੍ਗੇਨ ਤਮੇਵ ਪਰਾਮਸਿਤੁਂ ਸਕ੍ਕਾ. ਅਥ ਅਞ੍ਞੇਨ ਅਨਵਟ੍ਠਾਨਪ੍ਪਸਙ੍ਗੋ ‘‘ਯੇਨ ਮਗ੍ਗਂ ਪਸ੍ਸਤਿ, ਸੋਪਿ ਮਗ੍ਗੋ. ਤਮ੍ਪਿ ਯੇਨ ਪਸ੍ਸਤਿ, ਸੋਪਿ ਮਗ੍ਗੋ’’ਤਿ. ਤਸ੍ਮਾ ਏਕਾਭਿਸਮਯਤੋ ਯਥਾਵੁਤ੍ਤੋ ਅਸਮ੍ਮੋਹਪਟਿਵੇਧੋਵ ਯੁਤ੍ਤੋ. ਅਪਿਚ ਪਰਿਚ੍ਛਿਨ੍ਦਿਤਬ੍ਬਂ, ਸਮੁਚ੍ਛਿਨ੍ਦਿਤਬ੍ਬਞ੍ਚ ਸਚ੍ਚਦ੍ਵਯਂ ਆਰਬ੍ਭ ਪਵਤ੍ਤਮਾਨਸ੍ਸ ਮਗ੍ਗਞਾਣਸ੍ਸ ਪਰਿਚ੍ਛਿਨ੍ਦਨਸਮੁਚ੍ਛਿਨ੍ਦਨਾਨਿ ਨ ਸਮ੍ਭਵਨ੍ਤਿ ਤਤੋ ਅਨਿਸ੍ਸਰਣਤੋ. ਨ ਹਿ ਦੁਕ੍ਖਪਰਿਞ੍ਞਾਸਮੁਦਯਪ੍ਪਹਾਨਾਨਿ ਦੁਕ੍ਖਸਮੁਦਯਸਚ੍ਚਾਰਮ੍ਮਣੇਨ ਞਾਣੇਨ ਕਾਤੁਂ ਸਕ੍ਕੁਣੇਯ੍ਯਾਨਿ. ਨਿਬ੍ਬਾਨਾਰਮ੍ਮਣੇਨ ਪਨ ਤਤ੍ਥ, ਇਤਰਦ੍ਵਯੇ ਚ ਸਮ੍ਮੋਹਂ ਵਿਦ੍ਧਂਸੇਨ੍ਤੇਨ ਸਕ੍ਕਾ ਕਾਤੁਨ੍ਤਿ ਏਕਾਭਿਸਮਯੋ ਏਵ ਯੁਤ੍ਤੋ. ਅਯਂ ਪਨ ਅਤ੍ਥੋ ਪਾਲ਼ਿਯਂ ਆਗਤੋ ਏਵਾਤਿ ‘‘ਤੇਸਂ ਉਤ੍ਤਰਂ ਅਭਿਧਮ੍ਮੇ ਕਥਾਵਤ੍ਥੁਸ੍ਮਿਂ ਵੁਤ੍ਤਮੇਵਾ’’ਤਿ.
ਪਰਿਞ੍ਞਾਦਿਪ੍ਪਭੇਦਕਥਾਵਣ੍ਣਨਾ
੮੪੫. ਅਭਿਞ੍ਞਾਪਞ੍ਞਾਤਿਆਦੀਨਂ ਅਤ੍ਥੋ ਹੇਟ੍ਠਾ ਵੁਤ੍ਤੋਯੇਵ. ਅਪਿਚ ਸੁਤਮਯਾਯ, ਚਿਨ੍ਤਾਮਯਾਯ, ਏਕਚ੍ਚਭਾਵਨਾਮਯਾਯ ਚ ਅਭਿਵਿਸਿਟ੍ਠਾਯ ਪਞ੍ਞਾਯ ਞਾਤਾ ਅਭਿਞ੍ਞਾਤਾ. ਆਵੇਣਿਕਾ ਭੂਮਿ ਪਰਿਞ੍ਞਨ੍ਤਰਾਨਂ ਅਵਿਸਯਭਾਵਤੋ. ਨ ਹਿ ਨਾਮਰੂਪਪਰਿਚ੍ਛੇਦਪਚ੍ਚਯਪਰਿਗ੍ਗਹਣਵਸੇਨ ਤੀਰਣਪਰਿਞ੍ਞਾਦੀਨਂ ਪਵਤ੍ਤਿ ਅਤ੍ਥਿ.
੮੪੬. ਅਨੁਲੋਮਞਾਣਮ੍ਪਿ ਅਨਿਚ੍ਚਾਦਿਵਸੇਨੇਵ ਸਙ੍ਖਾਰੇ ਆਰਬ੍ਭ ਪਵਤ੍ਤਤਿ, ਪਗੇਵ ਪਟਿਸਙ੍ਖਾਨੁਪਸ੍ਸਨਾਦਯੋਤਿ ਆਹ ‘‘ਯਾਵ ਅਨੁਲੋਮਾ ਆਵੇਣਿਕਾ ਭੂਮੀ’’ਤਿ. ਕਾਮਞ੍ਚੇਤ੍ਥ ਤੀਰਣਪਰਿਞ੍ਞਾਭੂਮਿਯਂ ਞਾਤਪ੍ਪਹਾਨਪਰਿਞ੍ਞਾਯੋਪਿ ਲਦ੍ਧਾਵਸਰਾ, ਤਤ੍ਥ ਪਨ ਯਥਾ ਤੀਰਣਪਰਿਞ੍ਞਾ ਸਾਤਿਸਯਂ ਕਿਚ੍ਚਕਾਰੀ, ਨ ਤਥਾ ਇਤਰਾਤਿ ਆਵੇਣਿਕਗ੍ਗਹਣਂ.
੮੪੭. ਨਿਪ੍ਪਰਿਯਾਯੇਨ ਪਹਾਨਪਰਿਞ੍ਞਾ ਨਾਮ ਮਗ੍ਗਞਾਣਨ੍ਤਿ ‘‘ਯਾਵ ਮਗ੍ਗਞਾਣਾ ਭੂਮੀ’’ਤਿ ਵੁਤ੍ਤਂ. ਅਯਂ ਇਧ ਅਧਿਪ੍ਪੇਤਾਤਿ ਇਧ ਅਭਿਸਮਯਕਾਲੇ ਕਿਚ੍ਚਵਿਚਾਰੇ ਅਯਂ ਪਹਾਨਪਰਿਞ੍ਞਾ ਅਧਿਪ੍ਪੇਤਾ ਤਦਤ੍ਥਤ੍ਤਾ ਸੇਸਪਰਿਞ੍ਞਾਨਂ. ਤੇਨਾਹ ‘‘ਯਸ੍ਮਾ ਵਾ’’ਤਿਆਦਿ.
ਤਦਤ੍ਥਾਯੇਵਾਤਿ ਪਹਾਨਪਰਿਞ੍ਞਤ੍ਥਾ ਏਵ. ਅਥ ਵਾ ਤਦਤ੍ਥਾਯੇਵਾਤਿ ਪਹਾਨਤ੍ਥਾ ਏਵ. ਅਥ ਵਾ ਤਦਤ੍ਥਾਯੇਵਾਤਿ ਮਗ੍ਗਤ੍ਥਾ ਏਵ. ਞਾਤਤੀਰਣਪਰਿਞ੍ਞਾ ਹਿ ਯਾਵਦੇਵ ਮਗ੍ਗਾਧਿਗਮਤ੍ਥਾਯ ਪਵਤ੍ਤਾ. ਨਿਯਮਤੋ ਞਾਤਾ ਚੇਵ ਤੀਰਿਤਾ ਚ ਹੋਨ੍ਤਿ ਞਾਤਤੀਰਿਤਭਾਵੇਹਿ ਵਿਨਾ ਪਹਾਨਾਭਾਵਤੋ, ਪਹਾਨਸਿਦ੍ਧਿਯਞ੍ਚ ਞਾਤਤੀਰਿਤਭਾਵਸਿਦ੍ਧਿਤੋ. ਮਗ੍ਗਞਾਣਞ੍ਹਿ ਦੁਕ੍ਖੇ ਪਰਿਞ੍ਞਾਭਿਸਮਯਵਸੇਨ ਪਵਤ੍ਤਮਾਨਂ ਤਸ੍ਸ ਸਭਾਵਲਕ੍ਖਣਂ ਵਿਯ ਸਾਮਞ੍ਞਲਕ੍ਖਣਮ੍ਪਿ ਪਟਿਵਿਜ੍ਝਤੀਤਿ ਵੁਚ੍ਚਤਿ ਤਪ੍ਪਟਿਚ੍ਛਾਦਕਸਮ੍ਮੋਹਵਿਦ੍ਧਂਸਨਤੋ. ਤੇਨਾਹ ‘‘ਪਰਿਞ੍ਞਤ੍ਤਯਮ੍ਪਿ…ਪੇ… ਵੇਦਿਤਬ੍ਬ’’ਨ੍ਤਿ.
੮੪੮. ਪਰਿਞ੍ਞਾ ਵਿਯਾਤਿ ਤਿਵਿਧਤਾਸਾਮਞ੍ਞਂ ਨਿਦਸ੍ਸੇਤਿ, ਨ ਪਰਿਞ੍ਞਾਪਹਾਤਬ੍ਬਤਾਸਾਮਞ੍ਞਂ ਵਿਕ੍ਖਮ੍ਭਨਪ੍ਪਹਾਨਸ੍ਸ ਅਰਿਪਞ੍ਞਾਕਿਚ੍ਚਭਾਵਤੋ. ਕਾਮਚ੍ਛਨ੍ਦਾਦਯੋ ਯਥਾ ਨ ਚਿਤ੍ਤਂ ਪਰਿਯੁਟ੍ਠਾਯ ਤਿਟ੍ਠਨ੍ਤਿ, ਏਵਂ ਪਰਿਯੁਟ੍ਠਾਨਸ੍ਸ ਨਿਸੇਧਨਂ ਅਪ੍ਪਵਤ੍ਤਿਕਰਣਂ ਵਿਕ੍ਖਮ੍ਭਨਂ, ਵਿਕ੍ਖਮ੍ਭਨਮੇਵ ਪਹਾਨਂ ਵਿਕ੍ਖਮ੍ਭਨਪ੍ਪਹਾਨਂ. ਪਾਕਟਤ੍ਤਾਤਿ ‘‘ਅਯਂ ਅਬ੍ਯਾਪਨ੍ਨਚਿਤ੍ਤੋ ਵਿਗਤਥਿਨਮਿਦ੍ਧੋ’’ਤਿਆਦਿਨਾ (ਅ. ਨਿ. ੪.੧੯੮) ਪਰੇਸਮ੍ਪਿ ਪਾਕਟਤ੍ਤਾ. ‘‘ਨ ਸਹਸਾ ਚਿਤ੍ਤਂ ਅਜ੍ਝੋਤ੍ਥਰਨ੍ਤੀ’’ਤਿ ਇਦਂ ਪਟਿਲਦ੍ਧਮਤ੍ਤਸ੍ਸ ਝਾਨਸ੍ਸ ਵਸੇਨ ਵੁਤ੍ਤਂ, ਸੁਭਾਵਿਤੇ ਪਨ ਪਗੁਣਜ੍ਝਾਨੇ ਯਾਵ ਚਰਿਮਕਚਿਤ੍ਤਮ੍ਪਿ ਨ ਅਜ੍ਝੋਤ੍ਥਰਨ੍ਤੇਵ. ਅਥ ਵਾ ਝਾਨਸ੍ਸ ਪੁਬ੍ਬਭਾਗੇਪੀਤਿ ਝਾਨਾਧਿਗਮਤ੍ਥਾਯ ਪੁਬ੍ਬਭਾਗਪਟਿਪਤ੍ਤਿਯਾ. ਪਚ੍ਛਾਭਾਗੇਪੀਤਿ ਝਾਨਂ ਲਭਿਤ੍ਵਾ ਅਞ੍ਞਕਿਚ੍ਚਪ੍ਪਸੁਤਸ੍ਸਪਿ. ਵਿਤਕ੍ਕਾਦਯੋਤਿ ਵਿਤਕ੍ਕਵਿਚਾਰਪੀਤਿਸੁਖਰੂਪਸਞ੍ਞਾਦਯੋ. ਦੁਤਿਯਜ੍ਝਾਨਾਦੀਨਂ ਪਟਿਪਕ੍ਖਾ ਦੁਤਿਯਾਦੀਸੁ ਅਪ੍ਪਿਤੇਸੁਯੇਵ ਵਿਕ੍ਖਮ੍ਭਨ੍ਤਿ, ਤਤੋ ਤਤੋ ਵੁਟ੍ਠਿਤਮਤ੍ਤਸ੍ਸ ਪਨ ਪਵਤ੍ਤਨ੍ਤਿ ਪਰਿਤ੍ਤਚਿਤ੍ਤਵਸੇਨੇਵ ਵੁਟ੍ਠਹਨਤੋ.
੮੪੯. ‘‘ਪਦੀਪੇਨ ਅਨ੍ਧਕਾਰਸ੍ਸ ਵਿਯਾ’’ਤਿ ਇਦਂ ਪਟਿਪਕ੍ਖੇਨ ਪਹੀਨਭਾਵਦਸ੍ਸਨਤ੍ਥਂ ਵੁਤ੍ਤਂ. ਪਟਿਪਕ੍ਖੋ ਹਿ ਪਦੀਪੋ ਅਨ੍ਧਕਾਰਸ੍ਸ, ਘਟਪ੍ਪਹਾਰੋ ਪਨ ਸੇਵਾਲਸ੍ਸ ਨ ਪਟਿਪਕ੍ਖੋ, ਕੇਵਲਂ ਪਵਤ੍ਤਿਨਿਵਾਰਣਮਤ੍ਤਮੇਵ ਕਰੋਤੀਤਿ. ਤੇਨ ਅਸਤਿਪਿ ਉਜੁਵਿਪਚ੍ਚਨੀਕਤਾਯ ਦੁਤਿਯਜ੍ਝਾਨਾਦੀਨਂ ਵਿਤਕ੍ਕਾਦੀਨਂ ਵਿਕ੍ਖਮ੍ਭਨਸ੍ਸ ਤਂ ਨਿਦਸ੍ਸਨਂ ਸੁਟ੍ਠੁਤਰਂ ਯੁਜ੍ਜਤਿ. ‘‘ਵਿਪਸ੍ਸਨਾਯ ਅਵਯਵਭੂਤੇਨਾ’’ਤਿ ਇਦਂ ਇਧਾਧਿਕਤਤਦਙ੍ਗਪ੍ਪਹਾਨਸ੍ਸ ਦਸ੍ਸਨਤ੍ਥਂ ਵੁਤ੍ਤਂ. ਸੀਲਵਿਸੋਧਨਾਦਿਨਾਪਿ ਹਿ ਤਦਙ੍ਗਪ੍ਪਹਾਨਂ ਹੋਤਿਯੇਵਾਤਿ. ਞਾਣਙ੍ਗੇਨਾਤਿ ਞਾਣਸਙ੍ਖਾਤੇਨ ਕਾਰਣੇਨ. ਤਦਙ੍ਗੇਨ ਤਦਙ੍ਗਸ੍ਸ ਪਹਾਨਂ ਤਦਙ੍ਗਪ੍ਪਹਾਨਂ. ਸਤਿ ਵਿਜ੍ਜਮਾਨੇ ਖਨ੍ਧਪਞ੍ਚਕਸਙ੍ਖਾਤੇ ਕਾਯੇ, ਸਯਂ ਵਾ ਤਤ੍ਥ ਸਤਿ ਦਿਟ੍ਠਿ ਸਕ੍ਕਾਯਦਿਟ੍ਠਿ, ‘‘ਰੂਪਂ ਅਤ੍ਤਤੋ ਸਮਨੁਪਸ੍ਸਤੀ’’ਤਿਆਦਿਨਾ (ਸਂ. ਨਿ. ੩.੮੧; ੪.੩੪੫) ਨਯੇਨ ਵੁਤ੍ਤਾ ਅਤ੍ਤਾਨੁਦਿਟ੍ਠਿ. ਸੋਲ਼ਸਵਤ੍ਥੁਕਾ, ਅਟ੍ਠਵਤ੍ਥੁਕਾ ਚ ਕਙ੍ਖਾਵ ਮਲਂ ਕਙ੍ਖਾਮਲਂ. ਸਮੂਹਗਾਹਸ੍ਸਾਤਿ ‘‘ਅਤ੍ਤਾ ਅਤ੍ਤਨਿਯ’’ਨ੍ਤਿ ਏਵਂ ਪਵਤ੍ਤਸਮੂਹਗਹਣਸ੍ਸ ਪਹਾਨਂ ਕਲਾਪਸਮ੍ਮਸਨੇਨ ਏਕਾਦਸਸੁ ਓਕਾਸੇਸੁ ਪਕ੍ਖਿਪਿਤ੍ਵਾ ਵਿਕਿਰਣਵਸੇਨ ਖਨ੍ਧਾਨਂ ਦਸ੍ਸਨਤੋ. ਅਸ੍ਸਾਦਸਞ੍ਞਾਯਾਤਿ ਪਞ੍ਚਕ੍ਖਨ੍ਧੇ ਅਸ੍ਸਾਦਨਵਸੇਨ ਪਵਤ੍ਤਮਿਚ੍ਛਾਸਞ੍ਞਾਯ. ਅਪ੍ਪਟਿਸਙ੍ਖਾਨਸ੍ਸਾਤਿ ਪਟਿਸਙ੍ਖਾਨਪਟਿਪਕ੍ਖਸ੍ਸ ਮੋਹਸ੍ਸ. ਅਨੁਪੇਕ੍ਖਨਸ੍ਸਾਤਿ ਅਪੇਕ੍ਖਾਯ. ਸਙ੍ਖਾਰੇਸੁ ਨਿਚ੍ਚਾਦਿਗਾਹੋ ਸਚ੍ਚਪਟਿਲੋਮਗਾਹੋ ਮਗ੍ਗਸਚ੍ਚਾਧਿਗਮਸ੍ਸ ਵਿਲੋਮਨਤੋ. ਸਾਦੀਨਵੇਸੁ ਅਨਾਦੀਨਵਸਞ੍ਞਿਤਾ, ਅਨਾਦੀਨਵੇ ਚ ਸਾਦੀਨਵਸਞ੍ਞਿਤਾ ਸਚ੍ਚਪਟਿਲੋਮਗਾਹੋਤਿ ਚ ਵਦਨ੍ਤਿ.
ਏਵਂ ਵਿਸੁਦ੍ਧਿਕ੍ਕਮੇਨ ਤਦਙ੍ਗਪ੍ਪਹਾਨਂ ਦਸ੍ਸੇਤ੍ਵਾ ਇਦਾਨਿ ਅਟ੍ਠਾਰਸਮਹਾਵਿਪਸ੍ਸਨਾਵਸੇਨਪਿ ਤਂ ਦਸ੍ਸੇਤੁਂ ‘‘ਯਂ ਵਾ ਪਨਾ’’ਤਿਆਦਿ ਵੁਤ੍ਤਂ. ਤਤ੍ਥ ਯਂ ਵਾ ਪਨ ਪਹਾਨਨ੍ਤਿ ਸਮ੍ਬਨ੍ਧੋ.
੮੫੦. ਵੁਤ੍ਤਮੇਵ ‘‘ਸਬ੍ਬਂ ਸਙ੍ਖਾਰਗਤਂ ਅਨਿਚ੍ਚਤੋ ਅਨੁਪਸ੍ਸਤੀ’’ਤਿਆਦਿਨਾ (ਵਿਸੁਦ੍ਧਿ. ੨.੭੪੨).
ਸਨ੍ਤਤਿਸਮੂਹਕਿਚ੍ਚਾਰਮ੍ਮਣਾਨਂ ਵਸੇਨ ਘਨਗ੍ਗਹਣਂ ਘਨਸਞ੍ਞਾ, ਤਸ੍ਸਾ ਘਨਸਞ੍ਞਾਯ.
ਨਿਰੋਧੇ ਅਧਿਮੁਤ੍ਤਤਾ, ਤਾਯਾਤਿ ਤਿਯਦ੍ਧਗਤਾਨਂ ਸਙ੍ਖਾਰਾਨਂ ਨਿਰੋਧਮੇਵ ਦਿਸ੍ਵਾ ਤਤ੍ਥ ਅਧਿਮੁਚ੍ਚਨਵਸੇਨ ਪਵਤ੍ਤਪਞ੍ਞਾ, ਤਾਯ. ਆਯੂਹਨਸ੍ਸਾਤਿ ਅਭਿਸਙ੍ਖਰਣਸ੍ਸ.
ਤਂ ਤਂ ਪਰਿਚ੍ਛੇਦਨ੍ਤਿ ਆਦਾਨਨਿਕ੍ਖੇਪਾਦਿਕਂ ਤਂ ਤਂ ਪਰਿਚ੍ਛੇਦਂ. ਅਞ੍ਞਥਾਪਵਤ੍ਤਿਦਸ੍ਸਨਨ੍ਤਿ ਵੁਤ੍ਤਪਰਿਚ੍ਛੇਦਤੋ ਪੁਬ੍ਬੇ, ਪਚ੍ਛਾ ਚ ਅਞ੍ਞਾਕਾਰਪ੍ਪਵਤ੍ਤਿਯਾ ਦਸ੍ਸਨਂ, ਅਵਤ੍ਥਾਵਿਸੇਸਪ੍ਪਵਤ੍ਤਿਦਸ੍ਸਨਂ ਵਾ. ਧੁਵਸਞ੍ਞਾਯਾਤਿ ਥਿਰਭਾਵਗ੍ਗਹਣਸ੍ਸ.
ਸਾਰਾਦਾਨਾਭਿਨਿਵੇਸਸ੍ਸਾਤਿ ਅਸਾਰੇਸੁ ਸਾਰਗਹਣਾਭਿਨਿਵੇਸਸ੍ਸ.
ਸਂਸਯਮਿਚ੍ਛਾਞਾਣਾਨਂ ਵਸੇਨ ਸਮ੍ਮੁਯ੍ਹਨਂ ਸਮ੍ਮੋਹੋ, ਸੋ ਏਵ ਅਭਿਨਿਵੇਸੋਤਿ ਸਮ੍ਮੋਹਾਭਿਨਿਵੇਸੋ. ਸਙ੍ਖਾਰੇਸੁ ਲੇਣਤਾਣਭਾਵਗ੍ਗਹਣਂ ਆਲਯਾਭਿਨਿਵੇਸੋ, ਅਤ੍ਥਤੋ ਭਵਨਿਕਨ੍ਤਿ.
ਯਥਾ ਚਿਤ੍ਤਂ ਸਙ੍ਖਾਰੇ ਮੁਞ੍ਚਿਤ੍ਵਾ ਵਿਵਟ੍ਟਂ ਨਿਬ੍ਬਾਨਂ ਪਕ੍ਖਨ੍ਦਤਿ, ਤਥਾ ਪਵਤ੍ਤਨਤੋ ਸਙ੍ਖਾਰੁਪੇਕ੍ਖਾ ਚ ਅਨੁਲੋਮਞ੍ਚ ‘‘ਵਿਵਟ੍ਟਾਨੁਪਸ੍ਸਨਾ’’ਤਿ ਵੁਤ੍ਤਂ. ਨਿਵਿਟ੍ਠਭਾਵੇਨ ਓਗਾਲ਼੍ਹਭਾਵੇਨ ਪਵਤ੍ਤਸਂਯੋਜਨਾਦਿਕਿਲੇਸਾ ਏਵ ਕਿਲੇਸਾਭਿਨਿਵੇਸੋ. ਨਿਬ੍ਬੇਧਭਾਗਿਯਂ ਸਮਾਧਿਨ੍ਤਿ ਵਿਪਸ੍ਸਨਾਸਮਾਧਿਮਾਹ.
੮੫੧. ਅਸਨਿਵਿਚਕ੍ਕਂ ਅਸਨਿਮਣ੍ਡਲਂ. ਏਵਂ ਪਹਾਨਨ੍ਤਿ ਅਨੁਪ੍ਪਤ੍ਤਿਧਮ੍ਮਤਾਪਾਦਨਮਾਹ. ਕਮ੍ਮਕਿਲੇਸਾਨਂ, ਸਬ੍ਬੇਸਮ੍ਪਿ ਵਾ ਸਙ੍ਖਾਰਾਨਂ ਖਯਂ ਨਿਰੋਧਂ ਗਚ੍ਛਤੀਤਿ ਖਯਗਾਮੀ, ਅਰਿਯਮਗ੍ਗੋ. ਲੋਕੁਤ੍ਤਰਗ੍ਗਹਣੇਨੇਵ ਸਿਦ੍ਧੇਪਿ ਖਯਗਾਮਿਗ੍ਗਹਣਂ ਵਣ੍ਣਭਣਨਤ੍ਥਂ. ਸਮੁਚ੍ਛੇਦਪ੍ਪਹਾਨਮੇਵਾਤਿ ਅਵਧਾਰਣਂ ਨਿਪ੍ਪਰਿਯਾਯਤਂ ਉਪਾਦਾਯ. ਤਦਤ੍ਥਾਨੇਵਾਤਿ ਸਮੁਚ੍ਛੇਦਪ੍ਪਹਾਨਤ੍ਥਾਨੇਵ. ਤੇਨ ਵਿਕ੍ਖਮ੍ਭਨਤਦਙ੍ਗਪ੍ਪਹਾਨਾਨਂ ਮਗ੍ਗਸਮ੍ਭਾਰਤਮਾਹ ਤੇਹਿ ਵਿਨਾ ਅਸਿਜ੍ਝਨਤੋ. ਅਥ ਵਾ ਤਦਤ੍ਥਾਨੇਵਾਤਿ ਮਗ੍ਗਤ੍ਥਾਨੇਵ. ਤੇਨ ਤਦਤ੍ਥਤਾਯ ਤੇਸਂ ਤਂਕਿਚ੍ਚਤਂ ਦਸ੍ਸੇਤਿ. ਤੇਨਾਹ ‘‘ਤਸ੍ਮਾ’’ਤਿਆਦਿ. ਤਮੇਵਤ੍ਥਂ ਉਪਮਾਯ ਦਸ੍ਸੇਤੁਂ ‘‘ਪਟਿਰਾਜਾਨਂ ਵਧਿਤ੍ਵਾ’’ਤਿਆਦਿ ਵੁਤ੍ਤਂ. ਯਮ੍ਪਿ ਤਤੋ ਪੁਬ੍ਬੇ ਕਤਨ੍ਤਿ ਯਂ ਤਤੋਰਜ੍ਜਪ੍ਪਤ੍ਤਿਤੋ ਪੁਬ੍ਬੇ ਕਤਂ ਪਚ੍ਚਨ੍ਤਸਾਧਨਦੁਗ੍ਗਵਿਦ੍ਧਂਸਨਾਦਿ. ਯਥਾ ਇਦਞ੍ਚਿਦਞ੍ਚ ਰਞ੍ਞਾ ਕਤਨ੍ਤਿਯੇਵ ਵੁਚ੍ਚਤਿ, ਏਵਂ ਲੋਕਿਯਞਾਣੇਨ ਸਾਧਿਤਾਨਿਪਿ ਵਿਕ੍ਖਮ੍ਭਨਤਦਙ੍ਗਪ੍ਪਹਾਨਾਨਿ ਸਮੁਚ੍ਛੇਦਪ੍ਪਹਾਨਵਸੇਨ ਪਵਤ੍ਤਸ੍ਸ ਮਗ੍ਗਸ੍ਸ ਕਿਚ੍ਚਭਾਵੇਨ ਵੁਚ੍ਚਨ੍ਤਿ, ਤਦਤ੍ਥਤਾਯ, ਤੇਸਂ ਤਂਸਨ੍ਤਤਿਪਤਿਤਤਾਯ ਚ ਮਗ੍ਗਸ੍ਸਾਤਿ ਵੇਦਿਤਬ੍ਬਾ.
੮੫੨. ਲੋਕਿਯਸ੍ਸ, ਲੋਕਿਯਾ ਵਾ ਸਚ੍ਛਿਕਿਰਿਯਾ ਲੋਕਿਯਸਚ੍ਛਿਕਿਰਿਯਾ. ਏਵਂ ਲੋਕੁਤ੍ਤਰਸਚ੍ਛਿਕਿਰਿਯਾ ਵੇਦਿਤਬ੍ਬਾ. ਲਾਭੀਮ੍ਹੀਤਿ ਲਾਭੀ ਅਮ੍ਹਿ. ਤਥਾ ਵਸੀਮ੍ਹੀਤਿ ਏਤ੍ਥਾਪਿ. ਪਚ੍ਚਕ੍ਖਤੋ ਞਾਣਫਸ੍ਸੇਨਾਤਿ ਪਚ੍ਚਕ੍ਖਤੋ ਆਰਮ੍ਮਣਕਰਣਸਙ੍ਖਾਤੇਨ ਞਾਣਫਸ੍ਸਨੇਨ. ‘‘ਪਚ੍ਚਕ੍ਖਤੋ’’ਤਿ ਚ ਇਮਿਨਾ ਅਨੁਮਾਨਤੋ ਆਰਮ੍ਮਣਕਰਣਂ ਨਿਵਤ੍ਤੇਤਿ, ‘‘ਈਦਿਸਮਿਦ’’ਨ੍ਤਿ ਪਚ੍ਚਵੇਕ੍ਖਣਵਸੇਨ ਪਚ੍ਚਕ੍ਖਤੋ ਜਾਨਨਂ ਹੇਤ੍ਥ ‘‘ਞਾਣਫਸ੍ਸੋ’’ਤਿ ਅਧਿਪ੍ਪੇਤੋ. ਫਸ੍ਸਿਤਾਤਿ ਞਾਣੇਨ ਫੁਟ੍ਠਾ.
ਝਾਨਮਗ੍ਗਫਲਾਨਿ ਵਿਯ ਅਤ੍ਤਨੋ ਸਨ੍ਤਾਨੇ ਅਨੁਪ੍ਪਾਦੇਤ੍ਵਾਪਿ ਤਪ੍ਪਟਿਚ੍ਛਾਦਕਸਮ੍ਮੋਹਵਿਦ੍ਧਂਸਨਵਸੇਨ ਤਥਾਵਿਦ੍ਧਂਸਨਪਵਤ੍ਤਞਾਣਂ ਅਪਰਪ੍ਪਚ੍ਚਯਞਾਣਂ.
ਪਸ੍ਸਨ੍ਤੋ ਪਚ੍ਚਕ੍ਖਤੋ ਜਾਨਨ੍ਤੋ. ਅਮਤੋਗਧਨ੍ਤਿ ਅਮਤਪਰਿਯਾਪਨ੍ਨਂ, ਅਮਤਸਙ੍ਖਾਤਨ੍ਤਿ ਅਤ੍ਥੋ.
ਸੋਤਾਪਤ੍ਤਿਮਗ੍ਗੋ ਪਠਮਂ ਨਿਬ੍ਬਾਨਦਸ੍ਸਨਤੋ ਦਸ੍ਸਨਂ, ਤੇਨ ਦਸ੍ਸਨੇਨ ਸਚ੍ਛਿਕਿਰਿਯਾ ਦਸ੍ਸਨਸਚ੍ਛਿਕਿਰਿਯਾ. ਕਿਞ੍ਚਾਪਿ ਗੋਤ੍ਰਭੁਞਾਣਂ ਤਤੋ ਪਠਮਤਰਂ ਨਿਬ੍ਬਾਨਂ ਪਸ੍ਸਤਿ, ਆਲਮ੍ਬਨਕਰਣਤੋ ਦਿਸ੍ਵਾ ਕਤ੍ਤਬ੍ਬਕਿਚ੍ਚਾਕਰਣਤੋ ਪਨ ਨ ਦਸ੍ਸਨਨ੍ਤਿ ਵੁਚ੍ਚਤਿ. ਸਾ ਦੁਵਿਧਾਪੀਤਿ ਸਾ ਦਸ੍ਸਨਭਾਵਨਾਵਸੇਨ ਦੁਵਿਧਾਪਿ ਸਚ੍ਛਿਕਿਰਿਯਾ. ਦਸ੍ਸਨਭਾਵਨਾਵਸੇਨਾਤਿ ਦਸ੍ਸਨਮਗ੍ਗਭਾਵਨਾਮਗ੍ਗਵਸੇਨ. ਤੇਨ ਅਮਗ੍ਗਵਸੇਨ ਪਵਤ੍ਤਨਿਬ੍ਬਾਨਸ੍ਸ ਪਚ੍ਚਵੇਕ੍ਖਣਸਚ੍ਛਿਕਿਰਿਯਂ ਨਿਵਤ੍ਤੇਤਿ. ਨਿਬ੍ਬਾਨਸ੍ਸਾਤਿ ਪਨ ਇਮਿਨਾ ਮਗ੍ਗਫਲੇਸੁ ਪਚ੍ਚਵੇਕ੍ਖਣਸਚ੍ਛਿਕਿਰਿਯਂ. ਇਮਸ੍ਸ ਞਾਣਸ੍ਸਾਤਿ ਇਮਸ੍ਸ ਯਥਾਧਿਗਤਸ੍ਸ ਲੋਕੁਤ੍ਤਰਞਾਣਸ੍ਸ.
੮੫੩. ਅਭਿਮਤਾਤਿ ਅਧਿਪ੍ਪੇਤਾ. ਭਾਵਨਾ ਨਾਮ ਉਪ੍ਪਾਦਨਾ, ਸਨ੍ਤਾਨਪਰਿਭਾਵਨਾ ਚਾਤਿ ਤਦੁਭਯਂ ਦਸ੍ਸੇਨ੍ਤੋ ‘‘ਲੋਕਿਯਾਨ’’ਨ੍ਤਿਆਦਿਮਾਹ. ਯਦਗ੍ਗੇਨ ਹਿ ਲੋਕਿਯਾ ਕੁਸਲਾਦਯੋ ਉਪ੍ਪਾਦਿਤਾ, ਵਡ੍ਢਿਤਾ ਚ, ਤਦਗ੍ਗੇਨਸ੍ਸ ਸੀਲਭਾਵਨਾ, ਕਾਯਭਾਵਨਾ, ਚਿਤ੍ਤਭਾਵਨਾ, ਪਞ੍ਞਾਭਾਵਨਾ ਚ ਲੋਕਿਯਾ ਨਿਪ੍ਫਾਦਿਤਾ ਹੋਤਿ, ਤਾਯ ਚ ਸਨ੍ਤਾਨੋਪਿ ਪਰਿਭਾਵਿਤੋਤਿ. ਤਾਸੁ ਲੋਕਿਯਲੋਕੁਤ੍ਤਰਭਾਵਨਾਸੁ ਇਧ ਞਾਣਦਸ੍ਸਨਵਿਸੁਦ੍ਧਿਕਥਾਯਂ ਲੋਕੁਤ੍ਤਰਭਾਵਨਾ ਅਧਿਪ੍ਪੇਤਾ, ਨ ਇਤਰਾ ਤਸ੍ਸਾ ਸਮ੍ਭਾਰਭਾਵਤੋ. ਚਤੁਬ੍ਬਿਧਮ੍ਪੇਤਂ ਞਾਣਨ੍ਤਿ ਏਤਂ ਚਤੁਬ੍ਬਿਧਮ੍ਪਿ ਅਰਿਯਮਗ੍ਗਞਾਣਂ ਲੋਕੁਤ੍ਤਰਾਨਿ ਸਮ੍ਮਾਵਾਚਾਦਿਭੇਦਾਨਿ ਸੀਲਾਦੀਨਿ ਉਪ੍ਪਾਦੇਤਿ. ਕਥਂ? ਸਹਜਾਤਾਦਿਪਚ੍ਚਯਤਾਯ. ਸੀਲਾਦੀਨੀਤਿ ਏਤ੍ਥ ਆਦਿ-ਸਦ੍ਦੇਨ ਸਮਾਧਿਸ੍ਸ ਗਹਣਂ, ਨ ਪਞ੍ਞਾਯ. ਨ ਹਿ ਤਦੇਵ ਤਂ ਉਪ੍ਪਾਦੇਤਿ, ਮਗ੍ਗਚਿਤ੍ਤੁਪ੍ਪਾਦੋ ਪਨ ਉਪ੍ਪਾਦੇਤਿ. ਤਦਨ੍ਤੋਗਧਭਾਵਾ ਸਮ੍ਮਾਸਙ੍ਕਪ੍ਪੋ. ਸੋ ਹਿ ਪਞ੍ਚਕ੍ਖਨ੍ਧਸਙ੍ਗਹਿਤੋਤਿ ਵਦਨ੍ਤਿ. ਸੀਲਾਦੀਨੀਤਿ ਵਾ ਫਲਸੀਲਾਦੀਨਮ੍ਪਿ ਗਹਣਨ੍ਤਿ ਪਞ੍ਞਾਯਪਿ ਗਹਣਂ ਯੁਜ੍ਜਤਿਯੇਵ. ਸਹਜਾਤਪਚ੍ਚਯਾਦਿਤਾਯਾਤਿ ਏਤ੍ਥ ਆਦਿ-ਸਦ੍ਦੇਨ ਅਨਨ੍ਤਰਪਚ੍ਚਯਾਦਿਤਾਯਪਿ ਸਙ੍ਗਹੋ ਦਟ੍ਠਬ੍ਬੋ. ਤੇਹਿ ਚ ਸਨ੍ਤਾਨਂ ਵਾਸੇਤੀਤਿ ਤੇਹਿ ਸਮੁਚ੍ਛਿਨ੍ਦਨਪਟਿਪਸ੍ਸਮ੍ਭਨਵਸੇਨ ਪਵਤ੍ਤੇਹਿ ਲੋਕੁਤ੍ਤਰੇਹਿ ਸੀਲਾਦੀਹਿ ਅਰਿਯਪੁਗ੍ਗਲੋ ਅਤ੍ਤਨੋ ਸਨ੍ਤਾਨਂ ਪਰਿਭਾਵੇਤਿ. ਯਂ ਨਿਸ੍ਸਾਯ ਪਰਾਵੁਤ੍ਤੀਤਿ ਵਦਨ੍ਤਿ. ਯਥਾ ਪਰਿਞ੍ਞਤ੍ਤਯਮ੍ਪਿ ਪਹਾਨਤ੍ਤਯਮ੍ਪਿ ਮਗ੍ਗਞਾਣਸ੍ਸ ਕਿਚ੍ਚਨ੍ਤਿ ਵੁਤ੍ਤਂ ਪਰਿਯਾਯੇਨ, ਨ ਏਵਮਿਧ. ਇਧ ਪਨ ਲੋਕੁਤ੍ਤਰਭਾਵਨਾਵ ਅਸ੍ਸ ਮਗ੍ਗਞਾਣਸ੍ਸ ਕਿਚ੍ਚਂ. ਨ ਹੇਤ੍ਥ ਭਾਵਨਾਯ ਪਰਿਯਾਯੋ ਲਬ੍ਭਤੀਤਿ ਅਵਧਾਰਣਂ. ਤੇਨ ਲੋਕਿਯਭਾਵਨਂ ਨਿਵਤ੍ਤੇਤਿ.
ਏਵਂ ਸਰੂਪੇਨੇਵ ਆਗਤਾਯਾਤਿ ‘‘ਚਿਤ੍ਤਂ ਭਾਵਯ’’ਨ੍ਤਿ ਸਮਾਧਿ ਵਿਯ ਚਿਤ੍ਤਸੀਸੇਨ ਅਨਾਗਨ੍ਤ੍ਵਾ ‘‘ਪਞ੍ਞਂ ਭਾਵਯ’’ਨ੍ਤਿ ਏਵਂ ਸਰੂਪੇਨੇਵ ਆਗਤਾਯ ਪਞ੍ਞਾਯ. ਯਂ ਵੁਤ੍ਤਂ ਉਦ੍ਦੇਸਵਸੇਨ. ਏਤ੍ਤਾਵਤਾ ਤਂ ਵਿਤ੍ਥਾਰਿਤਂ ਹੋਤਿ. ਅਯਞ੍ਚ ਪਞ੍ਹੋ ਵਿਸ੍ਸਜ੍ਜਿਤੋ ਹੋਤੀਤਿ ਸਮ੍ਬਨ੍ਧੋ.
ਞਾਣਦਸ੍ਸਨਵਿਸੁਦ੍ਧਿਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.
ਇਤਿ ਬਾਵੀਸਤਿਮਪਰਿਚ੍ਛੇਦਵਣ੍ਣਨਾ.