੧੮. ਦਿਟ੍ਠਿਵਿਸੁਦ੍ਧਿਨਿਦ੍ਦੇਸਵਣ੍ਣਨਾ

ਨਾਮਰੂਪਪਰਿਗ੍ਗਹਕਥਾਵਣ੍ਣਨਾ

੬੬੨. ਯਾ ਵਿਸੁਦ੍ਧਿਯੋ ਸਮ੍ਪਾਦੇਤਬ੍ਬਾਤਿ ਸਮ੍ਬਨ੍ਧੋ. ਇਮੇਸੁ ਯਥਾਵਿਚਾਰਿਤੇਸੁ ਖਨ੍ਧਾਦੀਸੁ ਵਿਪਸ੍ਸਨਾਯ ਭੂਮਿਭੂਤੇਸੁ ਧਮ੍ਮੇਸੁ. ਗਨ੍ਥਸ੍ਸ ਉਗ੍ਗਣ੍ਹਨਂ ਵਾਚੁਗ੍ਗਤਕਰਣਂ ਉਗ੍ਗਹੋ, ਪਰਿਤੋ ਸਬ੍ਬਥਾਪਿ ਅਤ੍ਥਸ੍ਸ ਞਾਤੁਮਿਚ੍ਛਾ ਪਰਿਪੁਚ੍ਛਾ, ਸਵਨੁਪਪਰਿਕ੍ਖਾਦਿਵਸੇਨ ਤਦਤ੍ਥਸ੍ਸ ਮਨਸਿਕਾਰਵਿਧਿ, ਤਦੁਭਯਵਸੇਨ ਯਸ੍ਮਾ ਤਤ੍ਥਪਿ ਞਾਣਂ ਸ੍ਵਾਸੇਵਿਤਂ ਹੋਤਿ, ਤਸ੍ਮਾ ਵੁਤ੍ਤਂ ‘‘ਉਗ੍ਗਹਪਰਿਪੁਚ੍ਛਾਵਸੇਨ ਞਾਣਪਰਿਚਯਂ ਕਤ੍ਵਾ’’ਤਿ, ਖਨ੍ਧਾਦੀਸੁ ਸੁਤਮਯਂ ਞਾਣਂ ਉਪ੍ਪਾਦੇਤ੍ਵਾਤਿ ਅਤ੍ਥੋ. ਵਿਤ੍ਥਾਰਿਤਮੇਵ, ਤਸ੍ਮਾ ਤਤ੍ਥ ਵਿਤ੍ਥਾਰਿਤਨਯਾਨੁਸਾਰੇਨ ਸੀਲਵਿਸੁਦ੍ਧਿ ਸਮ੍ਪਾਦੇਤਬ੍ਬਾਤਿ ਅਧਿਪ੍ਪਾਯੋ. ਉਪਚਾਰਸਮਾਧਿਪਿ ਅਪ੍ਪਨਾਸਮਾਧਿ ਵਿਯ ਵਿਪਸ੍ਸਨਾਯ ਅਧਿਟ੍ਠਾਨਭਾਵਤੋ ਚਿਤ੍ਤਵਿਸੁਦ੍ਧਿਯੇਵਾਤਿ ਆਹ ‘‘ਸਉਪਚਾਰਾ’’ਤਿ. ਵੇਦਿਤਬ੍ਬਾਤਿ ਅਤ੍ਤਨੋ ਸਨ੍ਤਾਨੇ ਨਿਬ੍ਬਤ੍ਤਨਵਸੇਨੇਵ ਵੇਦਿਤਬ੍ਬਾ. ਏਵਞ੍ਹਿ ਤਾ ਪਚ੍ਚਕ੍ਖਤੋ ਵਿਦਿਤਾ ਨਾਮ ਹੋਨ੍ਤਿ, ਤਸ੍ਮਾ ਵੇਦਿਤਬ੍ਬਾ ਸਮ੍ਪਾਦੇਤਬ੍ਬਾਤਿ ਵੁਤ੍ਤਂ ਹੋਤਿ. ਵੇਦਿਤਬ੍ਬਾਤਿ ਵਾ ਸਮਾਪਤ੍ਤਿਸੁਖਾਧਿਗਮਵਸੇਨ ਅਨੁਭਵਿਤਬ੍ਬਾਤਿ ਅਤ੍ਥੋ. ਨ ਹਿ ਕੇਵਲੇਨ ਜਾਨਨਮਤ੍ਤੇਨ ਚਿਤ੍ਤਵਿਸੁਦ੍ਧਿਯਂ ਪਤਿਟ੍ਠਿਤੋ ਨਾਮ ਹੋਤਿ, ਨ ਚ ਤਤ੍ਥ ਅਪਤਿਟ੍ਠਾਯ ਉਪਰਿਵਿਸੁਦ੍ਧਿਂ ਸਮ੍ਪਾਦੇਤੁਂ ਸਕ੍ਕਾਤਿ.

ਨਾਮਰੂਪਾਨਂ ਯਾਥਾਵਦਸ੍ਸਨਨ੍ਤਿ ਨਾਮਸ੍ਸ, ਰੂਪਸ੍ਸ ਚ ਵਿਭਜ੍ਜ ਯਥਾਭੂਤਸਭਾਵਦਸ੍ਸਨਂ. ਨਾਮਗ੍ਗਹਣੇਨ ਚੇਤ੍ਥ ਵੇਦਨਾਦੀਨਂ ਚਤੁਨ੍ਨਂ ਤੇਭੂਮਕਾਨਂ ਖਨ੍ਧਾਨਂ ਗਹਣਂ, ਨ ‘‘ਵਿਞ੍ਞਾਣਪਚ੍ਚਯਾ ਨਾਮਰੂਪ’’ਨ੍ਤਿ ਏਤ੍ਥ ਵਿਯ ਵਿਞ੍ਞਾਣਂ ਵਿਨਾ, ਨਾਪਿ ‘‘ਨਾਮਞ੍ਚ ਰੂਪਞ੍ਚਾ’’ਤਿ (ਦੀ. ਨਿ. ੩.੩੦੪, ੩੫੨; ਧ. ਸ. ਦੁਕਮਾਤਿਕਾ ੧੦੯) ਏਤ੍ਥ ਵਿਯ ਸਨਿਬ੍ਬਾਨੇਹਿ ਲੋਕੁਤ੍ਤਰਕ੍ਖਨ੍ਧੇਹਿ ਸਦ੍ਧਿਨ੍ਤਿ ਦਟ੍ਠਬ੍ਬਂ.

੬੬੩. ਯਾਤਿ ਪਜ੍ਜਤਿ ਏਤੇਨਾਤਿ ਯਾਨਂ, ਸਮਥੋਵ ਯਾਨਂ ਸਮਥਯਾਨਂ, ਤਂ ਏਤਸ੍ਸ ਅਤ੍ਥੀਤਿ ਸਮਥਯਾਨਿਕੋ. ਝਾਨੇ, ਝਾਨੂਪਚਾਰੇ ਵਾ ਪਤਿਟ੍ਠਾਯ ਵਿਪਸ੍ਸਨਂ ਅਨੁਯੁਞ੍ਜਨ੍ਤਸ੍ਸੇਤਂ ਨਾਮਂ, ਤੇਨ ਸਮਥਯਾਨਿਕੇਨ. ‘‘ਠਪੇਤ੍ਵਾ ਨੇਵਸਞ੍ਞਾਨਾਸਞ੍ਞਾਯਤਨ’’ਨ੍ਤਿ ਇਦਂ ਭਵਗ੍ਗਧਮ੍ਮਾਨਂ ਆਦਿਕਮ੍ਮਿਕਸ੍ਸ ਦੁਪ੍ਪਰਿਗ੍ਗਹਤਾਯ ਵੁਤ੍ਤਂ. ਲਕ੍ਖਣਰਸਾਦਿਵਸੇਨ ਪਰਿਗ੍ਗਹੇਤਬ੍ਬਾ ਞਾਣੇਨ ਪਰਿਚ੍ਛਿਜ੍ਜ ਗਹੇਤਬ੍ਬਾ, ਪਰਿਗ੍ਗਹਵਿਧਿ ਪਨ ਖਨ੍ਧਨਿਦ੍ਦੇਸੇ (ਵਿਸੁਦ੍ਧਿ. ੨.੪੨੧ ਆਦਯੋ) ਵੁਤ੍ਤਾ ਏਵਾਤਿ ਅਧਿਪ੍ਪਾਯੋ. ਆਰਮ੍ਮਣਾਭਿਮੁਖਨਮਨਂ ਆਰਮ੍ਮਣੇਨ ਵਿਨਾ ਅਪ੍ਪਵਤ੍ਤਿ, ਤੇਨ ਨਮਨਟ੍ਠੇਨ, ਨਾਮਕਰਣਟ੍ਠੇਨ ਵਾ. ਵੇਦਨਾਦਯੋ ਹਿ ਅਰੂਪਧਮ੍ਮਾ ਸਬ੍ਬਦਾਪਿ ਚ ਫਸ੍ਸਾਦਿਨਾਮਕਤ੍ਤਾ ਪਥਵੀਆਦਯੋ ਵਿਯ ਕੇਸਕੁਮ੍ਭਾਦਿਨਾਮਨ੍ਤਰਾਨਾਪਜ੍ਜਨਤੋ ਅਤ੍ਤਨਾਵ ਕਤਨਾਮਤਾਯ ਨਾਮਕਰਣਟ੍ਠੇਨ ‘‘ਨਾਮ’’ਨ੍ਤਿ ਵੁਚ੍ਚਨ੍ਤਿ. ਅਥ ਵਾ ਅਧਿਵਚਨਸਮ੍ਫਸ੍ਸੋ ਵਿਯ ਅਧਿਵਚਨਂ ਨਾਮਂ ਅਨ੍ਤਰੇਨ ਅਨੁਪਚਿਤਸਮ੍ਭਾਰਾਨਂ ਗਹਣਂ ਨ ਗਚ੍ਛਨ੍ਤੀਤਿ ਨਾਮਾਯਤ੍ਤਗ੍ਗਹਣਤਾਯ ਵੇਦਨਾਦਯੋ ‘‘ਨਾਮ’’ਨ੍ਤਿ ਵੁਚ੍ਚਨ੍ਤਿ, ਰੂਪਂ ਪਨ ਵਿਨਾਪਿ ਨਾਮਸਵਨਂ ਅਤ੍ਤਨੋ ਰੁਪ੍ਪਨਸਭਾਵੇਨੇਵ ਗਹਣਂ ਗਚ੍ਛਤਿ. ਵਵਤ੍ਥਾਪੇਤਬ੍ਬਨ੍ਤਿ ਅਸਙ੍ਕਰਤੋ ਠਪੇਤਬ੍ਬਂ, ਅਞ੍ਞਮਞ੍ਞਂ, ਰੂਪੇਨ ਚ ਅਮਿਸ੍ਸਿਤਂ ਕਤ੍ਵਾ ਚਿਤ੍ਤੇ ਠਪੇਤਬ੍ਬਨ੍ਤਿ ਅਤ੍ਥੋ.

ਨਾਮਰੂਪਪਰਿਗ੍ਗਹੋ ਚ ਨਾਮ ਯਾਵਦੇਵ ਤਸ੍ਸ ਪਟਿਨਿਸ੍ਸਜ੍ਜਨਤ੍ਥਨ੍ਤਿ ਤਦਨੁਰੂਪਮੇਵ ਨਿਦਸ੍ਸਨਂ ਦਸ੍ਸੇਨ੍ਤੋ ‘‘ਯਥਾ ਨਾਮਾ’’ਤਿਆਦਿਮਾਹ. ਰੁਪ੍ਪਨਤੋਤਿ ਏਤ੍ਥ ਰੁਪ੍ਪਨਟ੍ਠੋ ‘‘ਸੀਤਾਦਿਵਿਰੋਧਿਪਚ੍ਚਯਸਨ੍ਨਿਪਾਤੇ ਵਿਸਦਿਸੁਪ੍ਪਤ੍ਤੀ’’ਤਿਆਦਿਨਾ (ਵਿਸੁਦ੍ਧਿ. ਮਹਾਟੀ. ੨.੪੩੨) ਖਨ੍ਧਨਿਦ੍ਦੇਸਵਣ੍ਣਨਾਯਂ ਵੁਤ੍ਤੋਯੇਵ. ਏਵਂ ਵਿਸੁਂ ਨਾਮਪਰਿਗ੍ਗਹਂ, ਰੂਪਪਰਿਗ੍ਗਹਞ੍ਚ ਦਸ੍ਸੇਤ੍ਵਾ ਇਦਾਨਿ ਏਕਜ੍ਝਂ ਨਾਮਰੂਪਪਰਿਗ੍ਗਹਂ ਦਸ੍ਸੇਤੁਂ ‘‘ਤਤੋ ਨਮਨਲਕ੍ਖਣ’’ਨ੍ਤਿਆਦਿ ਵੁਤ੍ਤਂ.

੬੬੪. ਇਤਿ ਅਰੂਪਮੁਖੇਨ ਵਿਪਸ੍ਸਨਾਭਿਨਿਵੇਸਂ ਦਸ੍ਸੇਤ੍ਵਾ ਇਦਾਨਿ ਰੂਪਮੁਖੇਨ ਤਂ ਦਸ੍ਸੇਨ੍ਤੋ ‘‘ਸੁਦ੍ਧਵਿਪਸ੍ਸਨਾਯਾਨਿਕੋ ਪਨਾ’’ਤਿਆਦਿਮਾਹ. ਤਤ੍ਥ ਸਮਥਯਾਨਿਕਸ੍ਸ ਸਮਥਮੁਖੇਨ ਵਿਪਸ੍ਸਨਾਭਿਨਿਵੇਸੋ, ਵਿਪਸ੍ਸਨਾਯਾਨਿਕਸ੍ਸ ਪਨ ਸਮਥਂ ਅਨਿਸ੍ਸਾਯਾਤਿ ਆਹ ‘‘ਸੁਦ੍ਧਵਿਪਸ੍ਸਨਾਯਾਨਿਕੋ’’ਤਿ, ਸਮਥਭਾਵਨਾਯ ਅਮਿਸ੍ਸਿਤਵਿਪਸ੍ਸਨਾਯਾਨਵਾਤਿ ਅਤ੍ਥੋ. ਅਯਮੇਵ ਵਾ ਸਮਥਯਾਨਿਕੋਤਿ ਯਥਾਵੁਤ੍ਤੋ ਸਮਥਯਾਨਿਕੋ ਏਵ ਵਾ. ਤੇਨ ਸਮਥਯਾਨਿਕਸ੍ਸਾਪਿ ਰੂਪਮੁਖੇਨ ਵਿਪਸ੍ਸਨਾਭਿਨਿਵੇਸੋ ਲਬ੍ਭਤਿ, ਨ ਅਰੂਪਮੁਖੇਨੇਵਾਤਿ ਦਸ੍ਸੇਤਿ. ਤੇਸਂ ਤੇਸਂ ਧਾਤੁਪਰਿਗ੍ਗਹਮੁਖਾਨਨ੍ਤਿ ‘‘ਯਂ ਥਦ੍ਧਲਕ੍ਖਣਂ, ਅਯਂ ਪਥਵੀਧਾਤੂ’’ਤਿਆਦਿਨਾ (ਵਿਸੁਦ੍ਧਿ. ੧.੩੦੮) ਸਙ੍ਖੇਪਮਨਸਿਕਾਰਾਦਿਵਸੇਨ ਵੁਤ੍ਤੇਸੁ ਤੇਰਸਸੁ ਧਾਤੁਪਰਿਗ੍ਗਹਮੁਖੇਸੁ. ਕਮ੍ਮਸਮੁਟ੍ਠਾਨੋ ਨਾਮ ਕੇਸੋ ਚਮ੍ਮਬ੍ਭਨ੍ਤਰਗਤੋ. ਤਤ੍ਥੇਵਾਤਿ ਤਸ੍ਮਿਂਯੇਵ ਕਮ੍ਮਸਮੁਟ੍ਠਾਨੇ ਕੇਸੇ. ਕਾਯਪ੍ਪਸਾਦਸ੍ਸ ਵਿਯ ਭਾਵਸ੍ਸਾਪਿ ਸਕਲਸਰੀਰਬ੍ਯਾਪਿਤਾਯ ‘‘ਭਾਵਸ੍ਸ ਅਤ੍ਥਿਤਾਯਾ’’ਤਿ ਵੁਤ੍ਤਂ. ਪੁਨ ਤਤ੍ਥੇਵਾਤਿ ਤਸ੍ਮਿਂਯੇਵ ਕੇਸਸਞ੍ਞਿਤੇ ਰੂਪਸਮੁਦਾਯੇ. ਅਪਰਾਨਿਪੀਤਿ ਪੁਬ੍ਬੇ ਵੁਤ੍ਤਾਨਿ ਕਮ੍ਮਸਮੁਟ੍ਠਾਨਾਨਿ ਵੀਸਤਿ, ਇਮਾਨਿ ਆਹਾਰਸਮੁਟ੍ਠਾਨਾਦੀਨਿ ਚਤੁਵੀਸਤਿ ਰੂਪਾਨੀਤਿ ਸਬ੍ਬਾਨਿਪਿ ਚਤੁਚਤ੍ਤਾਲੀਸ, ਤਞ੍ਚ ਖੋ ਤਤ੍ਥ ਲਬ੍ਭਮਾਨਸਨ੍ਤਤਿਸੀਸਸਾਮਞ੍ਞੇਨ ਵੇਦਿਤਬ੍ਬਂ. ‘‘ਚਤੁਚਤ੍ਤਾਲੀਸਾ’’ਤਿ ਚ ਇਦਂ ਸਦ੍ਦਸ੍ਸ ਅਨਿਯਤਤ੍ਤਾ ਵੁਤ੍ਤਂ. ਨ ਹਿ ਸਬ੍ਬਕਾਲਂ ਉਤੁਚਿਤ੍ਤਤੋ ਰੂਪਂ ਉਪ੍ਪਜ੍ਜਨ੍ਤਂ ਸਸਦ੍ਦਮੇਵ ਉਪ੍ਪਜ੍ਜਤੀਤਿ. ਏਵਨ੍ਤਿ ਯਥਾ ਕੇਸੇ, ਏਵਂ ਲੋਮਾਦੀਸੁ ਚਤੁਸਮੁਟ੍ਠਾਨਿਕੇਸੁ. ਚਤੁਵੀਸਤਿਕੋਟ੍ਠਾਸੇਸੂਤਿ ਦ੍ਵਤ੍ਤਿਂਸਾਯ ਕੋਟ੍ਠਾਸੇਸੁ ਵਕ੍ਖਮਾਨੇ ਅਟ੍ਠ ਕੋਟ੍ਠਾਸੇ ਅਪਨੇਤ੍ਵਾ ਚਤੁਵੀਸਤਿਕੋਟ੍ਠਾਸੇਸੁ. ਸੇਦਾਦੀਨਂ ਆਤਪੂਪਤਾਪਾਦਿਨਾ, ਚਿਤ੍ਤਵਿਕਾਰੇਨ ਚ ਉਪ੍ਪਜ੍ਜਨਤੋ ਤੇ ਉਤੁਚਿਤ੍ਤਸਮੁਟ੍ਠਾਨਾ ਵੁਤ੍ਤਾ.

ਦ੍ਵਤ੍ਤਿਂਸਕੋਟ੍ਠਾਸਗਤੇਸੁ ਰੂਪੇਸੁ ਪਾਕਟੇਸੁ ਜਾਤੇਸੁ ਤਦਞ੍ਞਾਨਿਪਿ ਪਾਕਟਾਨਿ ਹੋਨ੍ਤੀਤਿ ਤਾਨਿਪਿ ਦਸ੍ਸੇਤੁਂ ‘‘ਅਪਰੇ’’ਤਿਆਦਿ ਵੁਤ੍ਤਂ. ਤਤ੍ਥ ਅਪਰੇ ਦਸ ਆਕਾਰਾਤਿ ਤੇਜੋਵਾਯੋਕੋਟ੍ਠਾਸਵਸੇਨ ਅਪਰੇ ਦਸ ਆਕਾਰਾ. ਕਮ੍ਮਜੇਤਿ ਭੂਤਕਥਨਂ, ਨ ਵਿਸੇਸਨਂ ਅਸਿਤਾਦਿਪਰਿਪਾਚਕਸ੍ਸ ਤੇਜਸ੍ਸ ਅਕਮ੍ਮਜਸ੍ਸ ਅਭਾਵਤੋ. ਤਥਾ ਚਿਤ੍ਤਜੇਤਿ ਚ ਏਕਨ੍ਤਚਿਤ੍ਤਸਮੁਟ੍ਠਾਨਤ੍ਤਾ ਅਸ੍ਸਾਸਪਸ੍ਸਾਸਾਨਨ੍ਤਿ ਕੇਚਿ, ਤਂ ਨ, ਅਚਿਤ੍ਤਜਸਨ੍ਤਾਨੇ ਪਵਤ੍ਤਾਨਂ ਉਤੁਜਭਾਵਤੋ. ਅਬ੍ਭਨ੍ਤਰਟ੍ਠਾ ਏਵ ਹਿ ਤੇ ਚਿਤ੍ਤਜਾ, ਨ ਬਹਿਦ੍ਧਾ, ਤਸ੍ਮਾ ਤਤ੍ਥ ‘‘ਚਿਤ੍ਤਜੇ’’ਤਿ ਇਦਂ ਵਿਸੇਸਨਮੇਵ, ਅਯਞ੍ਚ ਅਤ੍ਥੋ ਹੇਟ੍ਠਾ ਆਨਾਪਾਨਕਥਾਯਂ ਵੁਤ੍ਤੋਯੇਵ. ਸੇਸੇਸੂਤਿ ਸਨ੍ਤਪ੍ਪਨਾਦਿਵਸੇਨ ਚੇਵ ਉਦ੍ਧਙ੍ਗਮਾਦਿਵਸੇਨ ਚ ਪਵਤ੍ਤੇਸੁ ਤੇਜੋਵਾਯੋਕੋਟ੍ਠਾਸੇਸੁ.

ਚਕ੍ਖੁਦਸਕਾਦੀਸੁ ਪਧਾਨਰੂਪਂ ਚਕ੍ਖਾਦਯੋਤਿ ਤੇਸੁ ਲਬ੍ਭਮਾਨਂ ਵਤ੍ਥੁਦ੍ਵਾਰਭਾਵਂ ਅਵਯਵਕਿਚ੍ਚਂ ਸਮੁਦਾਯੇ ਆਰੋਪੇਤ੍ਵਾ ਵੁਤ੍ਤਂ ‘‘ਵਤ੍ਥੁਦ੍ਵਾਰਵਸੇਨ ਪਞ੍ਚ ਚਕ੍ਖੁਦਸਕਾਦਯੋ’’ਤਿ. ਵਤ੍ਥੁਵਸੇਨ ਹਦਯਵਤ੍ਥੁਦਸਕਞ੍ਚਾਤਿ ਯੋਜੇਤਬ੍ਬਂ, ਏਕਯੋਗਨਿਦ੍ਦਿਟ੍ਠਾਨਮ੍ਪਿ ਏਕਦੇਸੋ ਅਨੁਵਤ੍ਤਤੀਤਿ. ਸਬ੍ਬਾਨਿਪੀਤਿ ਯਥਾਵੁਤ੍ਤਗਣਨਾਯਂ ਚਤੁਨ੍ਨਵੁਤਿਚਤੁਸਤਾਧਿਕਾਨਿ ਸਹਸ੍ਸਰੂਪਰੂਪਾਨਿ. ਕੋਟ੍ਠਾਸਾਵਯਵਾਨਂ ਪਨ ਤਦਵਯਵਕਲਾਪਾਨਞ੍ਚ ਭੇਦੇ ਗਯ੍ਹਮਾਨੇ ਅਤਿਵਿਯ ਤਤੋ ਬਹੁਤਰੋ ਰੂਪਭੇਦੋ ਹੋਤਿ, ਸੋ ਪਨ ਭੇਦੋ ਇਧ ਆਦਿਕਮ੍ਮਿਕਸ੍ਸ ਦੁਪ੍ਪਰਿਗ੍ਗਹੋਤਿ ਨ ਗਹੇਤਬ੍ਬੋ.

ਕਾਮਂ ਵਤ੍ਥੁਵਸੇਨਾਪਿ ਅਰੂਪਧਮ੍ਮਾ ਪਾਕਟਾ ਹੋਨ੍ਤਿ, ਦ੍ਵਾਰਵਸੇਨ ਪਨ ਪਰਿਗ੍ਗਹੋ ਅਨਾਕੁਲੋਤਿ ਕਤ੍ਵਾ ਵੁਤ੍ਤਂ ‘‘ਦ੍ਵਾਰਵਸੇਨ ਅਰੂਪਧਮ੍ਮਾ ਪਾਕਟਾਹੋਨ੍ਤੀ’’ਤਿ. ਸਬ੍ਬਸਙ੍ਗਾਹਿਕਵਸੇਨ ‘‘ਏਕਾਸੀਤਿ ਲੋਕਿਯਚਿਤ੍ਤਾਨੀ’’ਤਿ ਵੁਤ੍ਤਂ, ਲਾਭਿਨੋ ਏਵ ਪਨ ਮਹਗ੍ਗਤਚਿਤ੍ਤਾਨਿ ਸੁਪਾਕਟਾਨਿ ਹੋਨ੍ਤਿ. ਅਵਿਸੇਸੇਨਾਤਿ ਸਾਧਾਰਣਤੋ. ਫਸ੍ਸਾਦਯੋ ਹਿ ਸਤ੍ਤ ਚੇਤਸਿਕਾ ਚਕ੍ਖੁਵਿਞ੍ਞਾਣਾਦੀਹਿਪਿ ਉਪ੍ਪਜ੍ਜਨਤੋ ਸਬ੍ਬਚਿਤ੍ਤੁਪ੍ਪਾਦਸਾਧਾਰਣਾ. ਸਬ੍ਬੇਪਿ ਤੇਤਿ ਏਕਾਸੀਤਿ ਲੋਕਿਯਚਿਤ੍ਤਾਨਿ, ਤਂਸਮ੍ਪਯੁਤ੍ਤਫਸ੍ਸਾਦਯੋਤਿ ਸਬ੍ਬੇਪਿ ਤੇ ਅਰੂਪਧਮ੍ਮੇ. ਆਰਮ੍ਮਣਾਦਿਵਿਭਾਗੇਨ ਪਨ ਚਿਤ੍ਤੁਪ੍ਪਾਦਭੇਦੇ ਗਯ੍ਹਮਾਨੇ ਤਤੋ ਬਹੁਤਰੋ ਏਵ ਹੋਤਿ, ਸੋ ਪਨ ਇਧ ਨਾਧਿਪ੍ਪੇਤੋ.

੬੬੫. ਅਸ੍ਸ ਚਕ੍ਖੁਪਸਾਦਸ੍ਸ ਨਿਸ੍ਸਯਭੂਤਾ ਪਨ ਚਤਸ੍ਸੋ ਧਾਤੁਯੋਤਿ ਸਮ੍ਬਨ੍ਧੋ. ਸਹਜਾਤਰੂਪਾਨਿ ਤਸ੍ਸ ਚਕ੍ਖੁਪਸਾਦਸ੍ਸ ਇਚ੍ਚੇਵ ਸਮ੍ਬਨ੍ਧੋ. ਤਤ੍ਥੇਵਾਤਿ ਤਸ੍ਮਿਂਯੇਵ ਸਸਮ੍ਭਾਰਚਕ੍ਖੁਪਦੇਸੇ. ਅਨੁਪਾਦਿਨ੍ਨਰੂਪਾਨੀਤਿ ਪੁਬ੍ਬੇ ਵੁਤ੍ਤਰੂਪਾਨਂ ਉਪਾਦਿਨ੍ਨਰੂਪਤ੍ਤਾ ਵੁਤ੍ਤਂ, ਅਕਮ੍ਮਜਰੂਪਾਨੀਤਿ ਅਤ੍ਥੋ. ਸੇਸਾਨੀਤਿ ਪਠਮਂ ਚਕ੍ਖੁਨੋ ਵੁਤ੍ਤਤ੍ਤਾ ਤਤੋ ਸੇਸਾਨਿ, ਤੇਨ ਪਨ ਸਦ੍ਧਿਂ ਚਤੁਪਞ੍ਞਾਸ ਰੂਪਾਨਿ ਹੋਨ੍ਤਿ. ਚਕ੍ਖੁਦਸਕਾਦੀਸੁ ਏਕਸ੍ਸਪਿ ਅਗ੍ਗਹੇਤਬ੍ਬਤੋ ‘‘ਅਵਸੇਸਾਨਿ ਤੇਚਤ੍ਤਾਲੀਸ ਰੂਪਾਨੀ’’ਤਿ ਵੁਤ੍ਤਂ. ਸਦ੍ਦਸ੍ਸ ਅਨਿਯਤਤ੍ਤਾ ਤਂ ਅਗ੍ਗਹੇਤ੍ਵਾ ‘‘ਤੇਚਤ੍ਤਾਲੀਸ ਰੂਪਾਨੀ’’ਤਿ ਵਤ੍ਵਾ ਪੁਨ ਉਤੁਚਿਤ੍ਤਸਮੁਟ੍ਠਾਨੇ ਦ੍ਵੇ ਸਦ੍ਦੇ ਗਹੇਤ੍ਵਾ ‘‘ਪਞ੍ਚਚਤ੍ਤਾਲੀਸਾ’’ਤਿ ਕੇਚਿਵਾਦੋ ਦਸ੍ਸਿਤੋ.

ਅਵਸੇਸਰੂਪਾਨੀਤਿ ‘‘ਦਸ ਧਾਤੁਯੋ’’ਤਿ ਵੁਤ੍ਤੇ ਦ੍ਵਾਦਸ ਰੂਪਧਮ੍ਮੇ ਠਪੇਤ੍ਵਾ ਅਵਸੇਸਾਨਿ ਛ ਨਿਪ੍ਫਨ੍ਨਰੂਪਾਨਿ. ਰੂਪਰੂਪਾਨੇਵ ਹਿ ਇਧ ਪਰਿਗ੍ਗਯ੍ਹਨ੍ਤਿ, ਨ ਰੂਪਪਰਿਚ੍ਛੇਦਵਿਕਾਰਲਕ੍ਖਣਾਨਿ. ਚਕ੍ਖੁਸਨ੍ਨਿਸ੍ਸਯਰੂਪਾਰਮ੍ਮਣਭਾਵਸਾਮਞ੍ਞੇਨ, ਚਿਤ੍ਤਭਾਵਸਾਮਞ੍ਞੇਨ ਚ ਕੁਸਲਾਕੁਸਲਵਿਪਾਕਤਾਯ ਦੁਵਿਧਮ੍ਪਿ ਚਕ੍ਖੁਵਿਞ੍ਞਾਣਂ ਚਿਤ੍ਤਨ੍ਤ੍ਵੇਵ ਵੁਤ੍ਤਂ. ਏਵਨ੍ਤਿ ਇਮਿਨਾ ‘‘ਚਕ੍ਖੁਂ ਨਿਸ੍ਸਾਯਾ’’ਤਿਆਦਿਨਾ ਵੁਤ੍ਤਂ, ਅਵੁਤ੍ਤਞ੍ਚ ‘‘ਸੋਤਂ ਨਿਸ੍ਸਾਯਾ’’ਤਿਆਦਿਕਂ ਸਙ੍ਗਣ੍ਹਾਤਿ. ਮਨੋਵਿਞ੍ਞਾਣਧਾਤੂਤਿ ਏਤ੍ਥਪਿ ‘‘ਏਕਾ’’ਤਿ ਪਦਂ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ ‘‘ਏਕਾ ਮਨੋਵਿਞ੍ਞਾਣਧਾਤੂ’’ਤਿ. ਅਡ੍ਢੇਨ ਏਕਾਦਸ ਅਡ੍ਢੇਕਾਦਸ, ਅਡ੍ਢਂ ਵਾ ਏਕਾਦਸਮਂ ਏਤਾਸਨ੍ਤਿ ਅਡ੍ਢੇਕਾਦਸ. ਅਡ੍ਢਟ੍ਠਮਾਤਿ ਏਤ੍ਥਾਪਿ ਏਸੇਵ ਨਯੋ.

੬੬੬. ਚਕ੍ਖੁਧਾਤੁਯਂ ਵੁਤ੍ਤਨਯੇਨੇਵਾਤਿ ‘‘ਯਂ ਲੋਕੋ ਸੇਤਕਣ੍ਹਮਣ੍ਡਲਵਿਚਿਤ੍ਤ’’ਨ੍ਤਿਆਦਿਨਾ (ਵਿਸੁਦ੍ਧਿ. ੨.੬੬੫) ਵੁਤ੍ਤਨਯੇਨ.

੬੬੭. ਇਧ ਭਿਕ੍ਖੁ ਇਮਸ੍ਮਿਂ ਸਰੀਰੇਤਿ ਅਜ੍ਝਤ੍ਤਂ ਵਿਪਸ੍ਸਨਾਭਿਨਿਵੇਸਦਸ੍ਸਨਵਸੇਨ ਵੁਤ੍ਤਂ. ਤੇਨੇਵ ਹਿ ਏਕਸ੍ਸੇਵ ਭਾਵਸ੍ਸ ਗਹਿਤਤ੍ਤਾ ‘‘ਸਤ੍ਤਰਸ ਰੂਪਾਨਿ ਸਮ੍ਮਸਨੁਪਗਾਨੀ’’ਤਿ ਆਹ. ਸਮ੍ਮਸਿਤੁਂ ਸਕ੍ਕੁਣੇਯ੍ਯਾਨਿ ਸਮ੍ਮਸਨਂ ਉਪਗਚ੍ਛਨ੍ਤੀਤਿ ਸਮ੍ਮਸਨੁਪਗਾਨਿ, ਸਮ੍ਮਸਨੀਯਾਨੀਤਿ ਅਤ੍ਥੋ. ਆਕਾਰ-ਗ੍ਗਹਣੇਨ ਵਿਞ੍ਞਤ੍ਤਿਦ੍ਵਯਂ ਵੁਤ੍ਤਂ, ਵਿਕਾਰ-ਗ੍ਗਹਣੇਨ ਲਹੁਤਾਦਿਤ੍ਤਯਂ, ਇਤਰੇਨ ਆਕਾਸਧਾਤੂਤਿ ਵਦਨ੍ਤਿ. ਆਕਾਰ-ਗ੍ਗਹਣੇਨ ਪਨ ਵਿਞ੍ਞਤ੍ਤਿਦ੍ਵਯੇਨ ਸਦ੍ਧਿਂ ਲਕ੍ਖਣਰੂਪਮਾਹ. ਤਮ੍ਪਿ ਹਿ ਰੂਪਾਨਂ ਉਪ੍ਪਜ੍ਜਨਾਦਿਆਕਾਰਮਤ੍ਤਨ੍ਤਿ. ਅਨ੍ਤਰਪਰਿਚ੍ਛੇਦੋਤਿ ਤਂਤਂਕਲਾਪਾਨਂ ਅਸਙ੍ਕਰਕਾਰਣਤਾਯ ਅਨ੍ਤਰਭੂਤੋ ਪਰਿਚ੍ਛੇਦੋ. ਯਦਿ ਨ ਸਮ੍ਮਸਨੁਪਗਾਨਿ, ਆਕਾਰਾਦਿਮਤ੍ਤਾਨਿ ਚ, ਕਥਂ ਰੂਪਾਨੀਤਿ ਆਹ ‘‘ਅਪਿਚ ਖੋ’’ਤਿਆਦਿ.

੬੬੮. ਏਵਂ ਦ੍ਵਾਚਤ੍ਤਾਲੀਸਾਯ ਕੋਟ੍ਠਾਸਾਨਂ ਵਸੇਨ ਵਿਤ੍ਥਾਰਤੋ ਰੂਪਪਰਿਗ੍ਗਹਂ ਤਦਨੁਸਾਰੇਨ ਵਿਤ੍ਥਾਰਤੋ ਏਵ ਨਾਮਪਰਿਗ੍ਗਹਂ ਵਿਭਾਵੇਤ੍ਵਾ ਤਤੋ ਸਂਖਿਤ੍ਤਸਂਖਿਤ੍ਤਤਰਸਂਖਿਤ੍ਤਤਮਵਸੇਨ, ਅਟ੍ਠਾਰਸਧਾਤੁਵਸੇਨ, ਦ੍ਵਾਦਸਾਯਤਨਵਸੇਨ, ਪਞ੍ਚਕ੍ਖਨ੍ਧਵਸੇਨ ਚ ਰੂਪਾਰੂਪਪਰਿਗ੍ਗਹਂ ਦਸ੍ਸੇਤ੍ਵਾ ਅਤਿਸਂਖਿਤ੍ਤਨਯੇਨਾਪਿ ਦਸ੍ਸੇਤੁਂ ‘‘ਯਂ ਕਿਞ੍ਚਿ ਰੂਪ’’ਨ੍ਤਿਆਦਿ ਵੁਤ੍ਤਂ.

ਯਥਾ ਚ ਧਾਤੁਆਦਿਵਸੇਨ, ਏਵਂ ਇਨ੍ਦ੍ਰਿਯਸਚ੍ਚਪਟਿਚ੍ਚਸਮੁਪ੍ਪਾਦਵਸੇਨਪਿ ਰੂਪਾਰੂਪਪਰਿਗ੍ਗਹੋ ਵੇਦਿਤਬ੍ਬੋ. ਕਥਂ? ਇਨ੍ਦ੍ਰਿਯਵਸੇਨ ਤਾਵ ਚਕ੍ਖਾਦੀਨਿ ਪਞ੍ਚ, ਇਤ੍ਥਿਪੁਰਿਸਿਨ੍ਦ੍ਰਿਯਾਨਿ ਚਾਤਿ ਸਤ੍ਤ ਇਨ੍ਦ੍ਰਿਯਾਨਿ ਰੂਪਂ, ਮਨਿਨ੍ਦ੍ਰਿਯਂ, ਪਞ੍ਚ ਵੇਦਨਿਨ੍ਦ੍ਰਿਯਾਨਿ, ਸਦ੍ਧਾਦੀਨਿ ਪਞ੍ਚ ਚਾਤਿ ਏਕਾਦਸ ਨਾਮਂ, ਜੀਵਿਤਿਨ੍ਦ੍ਰਿਯਂ ਨਾਮਞ੍ਚ ਰੂਪਞ੍ਚ, ਪਚ੍ਛਿਮਾਨਿ ਤੀਣਿ ਇਧ ਅਨਧਿਪ੍ਪੇਤਾਨਿ ਲੋਕੁਤ੍ਤਰਤ੍ਤਾ. ਦੁਕ੍ਖਸਚ੍ਚਂ ਨਾਮਞ੍ਚ ਰੂਪਞ੍ਚ, ਸਮੁਦਯਸਚ੍ਚਂ ਨਾਮਂ, ਇਤਰਾਨਿ ਇਧ ਨਾਧਿਪ੍ਪੇਤਾਨਿ ਲੋਕੁਤ੍ਤਰਤ੍ਤਾ. ਪਚ੍ਚਯਾਕਾਰੇ ਆਦਿਤੋ ਤੀਣਿ ਅਙ੍ਗਾਨਿ ਨਾਮਂ, ਚਤੁਤ੍ਥਪਞ੍ਚਮਾਨਿ ਨਾਮਞ੍ਚ ਰੂਪਞ੍ਚ, ਛਟ੍ਠਸਤ੍ਤਮਅਟ੍ਠਮਨਵਮਾਨਿ ਨਾਮਂ, ਦਸਮਂ ਨਾਮਞ੍ਚੇਵ ਨਾਮਰੂਪਞ੍ਚ, ਪਚ੍ਛਿਮਾਨਿ ਦ੍ਵੇ ਪਚ੍ਚੇਕਂ ਨਾਮਞ੍ਚ ਰੂਪਞ੍ਚਾਤਿ ਏਵਂ ਤਤ੍ਥ ਤਤ੍ਥ ਵੁਤ੍ਤਨਯਾਨੁਸਾਰੇਨ ਇਨ੍ਦ੍ਰਿਯਸਚ੍ਚਪਚ੍ਚਯਾਕਾਰਵਸੇਨਪਿ ਨਾਮਰੂਪਪਰਿਗ੍ਗਹੋ ਕਾਤਬ੍ਬੋ. ਏਵਂ ਪਨ ਨਾਮਰੂਪਪਰਿਗ੍ਗਹਸ੍ਸ ਵਿਭਾਗੇਨ ਕਥਨੇ ਪਯੋਜਨਂ ਹੇਟ੍ਠਾ ਵੁਤ੍ਤਮੇਵ.

੬੬੯. ਕਾਮਂ ਵੇਦਨਾਦੀਸੁ ਅਰੂਪਧਮ੍ਮੇਸੁ ਨ ਉਤ੍ਤਰੁਤ੍ਤਰਾ ਵਿਯ ਪੁਰਿਮਪੁਰਿਮਾ ਸੁਖੁਮਾ, ਤਥਾਪਿ ਸਙ੍ਘਟ੍ਟਨੇਨ ਵਿਕਾਰਆਪਜ੍ਜਨਕੇ ਰੂਪਧਮ੍ਮੇ ਉਪਾਦਾਯ ਸਬ੍ਬੇਪਿ ਤੇ ਸੁਖੁਮਾ ਏਵਾਤਿ ਆਹ ‘‘ਸੁਖੁਮਤ੍ਤਾ ਅਰੂਪਂ ਨ ਉਪਟ੍ਠਾਤੀ’’ਤਿ. ਸਮ੍ਮਸਿਤਬ੍ਬਨ੍ਤਿ ਸਮ੍ਮਦੇਵ ਲਕ੍ਖਣਾਦਿਤੋ ਵੀਮਂਸਿਤਬ੍ਬਂ. ਮਨਸਿਕਾਤਬ੍ਬਨ੍ਤਿ ਤਥਾ ਚਿਤ੍ਤੇ ਠਪੇਤਬ੍ਬਂ. ਪਰਿਗ੍ਗਹੇਤਬ੍ਬਨ੍ਤਿ ਪਰਿਚ੍ਛੇਦਕਾਰਿਕਾਯ ਪਞ੍ਞਾਯ ਪਰਿਚ੍ਛਿਜ੍ਜ ਗਹੇਤਬ੍ਬਂ. ਵਵਤ੍ਥਪੇਤਬ੍ਬਨ੍ਤਿ ਅਞ੍ਞਮਞ੍ਞਂ ਅਸਙ੍ਕਰਤੋ ਵਿਨਿਚ੍ਛਿਤਬ੍ਬਂ. ਅਸ੍ਸਾਤਿ ਯੋਗਿਨੋ. ਸੁਵਿਕ੍ਖਾਲਿਤਨ੍ਤਿ ਸੁਵਿਸੋਧਿਤਂ. ਆਦਿਕਮ੍ਮਿਕਸ੍ਸ ਹਿ ਕਮ੍ਮਟ੍ਠਾਨਂ ਪਰਿਗ੍ਗਣ੍ਹਨ੍ਤਸ੍ਸ ਯਾਵ ਧਮ੍ਮਾ ਸੁਪਰਿਬ੍ਯਤ੍ਤਂ ਨ ਉਪਤਿਟ੍ਠਨ੍ਤਿ, ਤਾਵ ਤੇ ਤਪ੍ਪਟਿਚ੍ਛਾਦਕਸਮ੍ਮੋਹਬਲੇਨ ਅਭਿਭੂਤਾ ਅਵਿਸੁਦ੍ਧਾ ਨਾਮ ਹੋਨ੍ਤਿ, ਅਸਙ੍ਕਰਤੋ ਉਪਟ੍ਠਾਨਾਭਾਵਤੋ ਅਞ੍ਞਮਞ੍ਞਞ੍ਚ ਜਟਿਤਾ. ਯਦਾ ਪਨ ਸਮ੍ਮਸਨਾਦਿਵਿਧਿਨਾ ਤਂ ਵਿਭੂਤਂ ਹੋਤਿ, ਤਦਾ ਤੇ ਸੁਵਿਕ੍ਖਾਲਿਤਾ, ਨਿਜ੍ਜਟਾ ਚ ਨਾਮ ਹੋਨ੍ਤਿ. ਤੇਨਾਹ ‘‘ਯਥਾ ਯਥਾ ਹੀ’’ਤਿਆਦਿ. ਆਦਿਕਮ੍ਮਿਕਸ੍ਸ ਅਰੂਪਧਮ੍ਮਾ ਯੇਭੁਯ੍ਯੇਨ ਰੂਪਧਮ੍ਮੇ ਆਰਬ੍ਭ ਪਵਤ੍ਤਨਾਕਾਰੇਨ ਗਹਣਂ ਗਚ੍ਛਨ੍ਤੀਤਿ ਕਤ੍ਵਾ ਵੁਤ੍ਤਂ ‘‘ਤਦਾਰਮ੍ਮਣਾ ਅਰੂਪਧਮ੍ਮਾ’’ਤਿ. ਤੇਨੇਵ ਹਿ ਹੇਟ੍ਠਾ ‘‘ਤਸ੍ਸੇਵਂ ਪਰਿਗ੍ਗਹਿਤਰੂਪਸ੍ਸ ਦ੍ਵਾਰਵਸੇਨ ਅਰੂਪਧਮ੍ਮਾ ਪਾਕਟਾ ਹੋਨ੍ਤੀ’’ਤਿ ਵੁਤ੍ਤਂ, ਨ ਵਤ੍ਥੁਵਸੇਨਾਤਿ.

ਇਦਾਨਿ ਰੂਪਪਰਿਗ੍ਗਹੋ ਅਰੂਪਪਰਿਗ੍ਗਹਸ੍ਸ ਉਪਾਯੋ, ਉਪਤ੍ਥਮ੍ਭੋ ਚਾਤਿ ਯਥਾਵੁਤ੍ਤਮਤ੍ਥਂ ਉਪਮਾਹਿ ਪਕਾਸੇਤੁਂ ‘‘ਯਥਾ ਹੀ’’ਤਿਆਦਿ ਵੁਤ੍ਤਂ. ਮੁਖਨਿਮਿਤ੍ਤਨ੍ਤਿ ਮੁਖਸ੍ਸ ਪਟਿਬਿਮ੍ਬਂ. ਤਤ੍ਰਿਦਂ ਉਪਮਾਸਂਸਨ੍ਦਨਂ – ਚਕ੍ਖੁਮਾ ਪੁਰਿਸੋ ਵਿਯ ਯੋਗਾਵਚਰੋ, ਤਸ੍ਸ ਚਕ੍ਖੁ ਵਿਯ ਯੋਗਿਨੋ ਕਮ੍ਮਟ੍ਠਾਨਪਰਿਗ੍ਗਾਹਕਞਾਣਂ, ਆਦਾਸਂ ਵਿਯ ਰੂਪਪਰਿਗ੍ਗਹੋ, ਮੁਖਨਿਮਿਤ੍ਤਂ ਵਿਯ ਅਰੂਪਪਰਿਗ੍ਗਹੋ, ਆਦਾਸਸ੍ਸ ਅਪਰਿਸੁਦ੍ਧਕਾਲੋ ਵਿਯ ਰੂਪਪਰਿਗ੍ਗਹਸ੍ਸ ਅਵਿਕ੍ਖਾਲਿਤਕਾਲੋ, ਤਦਾ ਮੁਖਨਿਮਿਤ੍ਤਸ੍ਸ ਅਪਞ੍ਞਾਯਨਂ ਵਿਯ ਰੂਪਪਰਿਗ੍ਗਹਸ੍ਸ ਅਵਿਸੁਦ੍ਧਤਾਯ ਅਰੂਪਧਮ੍ਮਾਨਂ ਅਨੁਪਟ੍ਠਾਨਂ, ਆਦਾਸਸ੍ਸ ਪੁਨਪ੍ਪੁਨਂ ਪਰਿਮਜ੍ਜਨਂ ਵਿਯ ਰੂਪਪਰਿਗ੍ਗਹਸ੍ਸ ਪੁਨਪ੍ਪੁਨਂ ਵਿਸੋਧਨਂ, ਸੁਪਰਿਮਜ੍ਜਿਤੇ ਆਦਾਸੇ ਸੁਬ੍ਯਤ੍ਤਂ ਮੁਖਨਿਮਿਤ੍ਤਸ੍ਸ ਪਞ੍ਞਾਯਨਂ ਵਿਯ ਸੁਵਿਕ੍ਖਾਲਿਤੇ ਨਿਜ੍ਜਟੇ ਰੂਪਪਰਿਗ੍ਗਹੇ ਅਰੂਪਧਮ੍ਮਾਨਂ ਸੁਟ੍ਠੁ ਉਪਟ੍ਠਾਨਨ੍ਤਿ. ਇਮਿਨਾ ਨਯੇਨ ਤੇਲਤ੍ਥਿਕੋਪਮਾਦੀਸੁਪਿ ਯਥਾਰਹਂ ਉਪਮਾਸਂਸਨ੍ਦਨਂ ਵੇਦਿਤਬ੍ਬਂ. ਤਿਲਪਿਟ੍ਠਨ੍ਤਿ ਤਿਲਚੁਣ੍ਣਂ. ਕਤਕਟ੍ਠਿਨ੍ਤਿ ਕਤਕਬੀਜਂ. ਕਲਲਕਦ੍ਦਮਨ੍ਤਿ ਤਨੁਕਦ੍ਦਮਂ.

ਤਪ੍ਪਚ੍ਚਨੀਕਕਿਲੇਸਾਤਿ ਤਸ੍ਸ ਅਰੂਪਧਮ੍ਮਪਰਿਗ੍ਗਾਹਕਞਾਣਸ੍ਸ ਵਿਬਨ੍ਧਭਾਵੇਨ ਪਟਿਪਕ੍ਖਭੂਤਾ ਸਮ੍ਮੋਹਾਦਿਕਿਲੇਸਾ. ਉਚ੍ਛੁਆਦਿਉਪਮਾਸੁ ਇਦਂ ਮੁਖਮਤ੍ਤਸ੍ਸ ਦਸ੍ਸਨਂ – ਯਥਾ ਉਚ੍ਛੁਰਸਂ ਗਹੇਤੁਕਾਮੋ ਉਚ੍ਛੂਨਿ ਉਚ੍ਛੁਯਨ੍ਤੇ ਪਕ੍ਖਿਪਿਤ੍ਵਾ ਏਕਵਾਰਂ ਦ੍ਵਿਵਾਰਂ ਯਨ੍ਤਕ੍ਕਮਨਮਤ੍ਤੇਨ ਉਚ੍ਛੁਰਸੇ ਅਨਿਕ੍ਖਮਨ੍ਤੇ ਨ ਉਚ੍ਛੂਨਿ ਛਡ੍ਡੇਤ੍ਵਾ ਗਚ੍ਛਤਿ, ਯਥਾ ਵਾ ਚੋਰੇ ਗਹੇਤ੍ਵਾ ਤੇਹਿ ਕਤਕਮ੍ਮਂ ਜਾਨਿਤੁਕਾਮੋ ਦ੍ਵਤ੍ਤਿਪ੍ਪਹਾਰਮਤ੍ਤੇਨ ਤੇਸੁ ਤਮਤ੍ਥਂ ਅਕਥੇਨ੍ਤੇਸੁ ਨ ਤੇ ਮੁਞ੍ਚਤਿ, ਯਥਾ ਵਾ ਪਨ ਗੋਦਮ੍ਮਕੋ ਗੋਣਂ ਦਮੇਤੁਕਾਮੋ ਧੁਰੇ ਤਂ ਯੋਜੇਤ੍ਵਾ ਏਕਵਾਰਂ ਦ੍ਵਿਵਾਰਂ ਤਸ੍ਮਿਂ ਪਥੇਨ ਅਗਚ੍ਛਨ੍ਤੇ ਨ ਵਿਸ੍ਸਜ੍ਜੇਤਿ, ਯਥਾ ਚ ਦਧਿਂ ਮਨ੍ਥੇਤ੍ਵਾ ਨਵਨੀਤਂ ਗਹੇਤੁਕਾਮੋ ਦਧਿਕਲਸਿਯਂ ਮਨ੍ਥਂ ਪਕ੍ਖਿਪਿਤ੍ਵਾ ਸਕਿਂ, ਦ੍ਵਿਕ੍ਖਤ੍ਤੁਂ ਵਾ ਮਨ੍ਥਸ੍ਸ ਭਮਨਮਤ੍ਤੇਨ ਨਵਨੀਤੇ ਅਨੁਪ੍ਪਜ੍ਜਨ੍ਤੇ ਨ ਦਧਿਂ ਛਡ੍ਡੇਤਿ, ਯਥਾ ਵਾ ਪਨ ਮਚ੍ਛੇ ਪਚਿਤ੍ਵਾ ਖਾਦਿਤੁਕਾਮੋ ਏਕਵਾਰਂ ਦ੍ਵਿਵਾਰਂ ਅਗ੍ਗਿਦਾਨਮਤ੍ਤੇਨ ਮਚ੍ਛੇਸੁ ਅਪਚ੍ਚਨ੍ਤੇਸੁ ਨ ਤੇ ਛਡ੍ਡੇਤਿ. ‘‘ਅਥ ਖੋ ਨਂ ਪੁਨਪ੍ਪੁਨਂ ਪਰਿਮਜ੍ਜਤੀ’’ਤਿ ਏਤ੍ਥ ਵੁਤ੍ਤਨਯਾਨੁਸਾਰੇਨ ‘‘ਅਥ ਖੋ ਨਂ ਉਚ੍ਛੁਯਨ੍ਤੇ ਪੁਨਪ੍ਪੁਨਂ ਉਪ੍ਪੀਲ਼ੇਤੀ’’ਤਿਆਦਿਨਾ ਸਬ੍ਬਤ੍ਥ ਉਪਮਤ੍ਥੋ ਯੋਜੇਤਬ੍ਬੋ.

ਅਰੂਪਧਮ੍ਮਾਨਂ ਉਪਟ੍ਠਾਨਾਕਾਰਕਥਾਵਣ੍ਣਨਾ

੬੭੦. ਆਕਿਰੀਯਨ੍ਤਿ ਅਭਿਮੁਖਾ ਹੋਨ੍ਤਿ ਏਤੇਹੀਤਿ ਆਕਾਰਾ, ਅਰੂਪਧਮ੍ਮਾਨਂ ਉਪਟ੍ਠਾਨਸ੍ਸ ਮੁਖਭੂਤਾ ਫੁਸਨਾਨੁਭਵਨਵਿਜਾਨਨਪ੍ਪਕਾਰਾਤਿ ਆਹ ‘‘ਅਰੂਪਧਮ੍ਮਾ ਤੀਹਿ ਆਕਾਰੇਹਿ ਉਪਟ੍ਠਹਨ੍ਤੀ’’ਤਿਆਦਿ. ਆਰਮ੍ਮਣੇ ਪਵਤ੍ਤਮਾਨੇਸੁ ਚਿਤ੍ਤਚੇਤਸਿਕੇਸੁ ਅਸਤਿਪਿ ਪੁਬ੍ਬਾਪਰਿਯੇ ਫੁਸਨਲਕ੍ਖਣੋ ਫਸ੍ਸੋ, ਤਤ੍ਥ ਸਬ੍ਬਪਠਮਂ ਅਭਿਨਿਪਤਨ੍ਤੋ ਵਿਯ ਹੋਤੀਤਿ ਵੁਤ੍ਤਂ ‘‘ਪਠਮਾਭਿਨਿਪਾਤੋ ਫਸ੍ਸੋ’’ਤਿ. ਤੇਨਸ੍ਸ ਫੁਸਨਾਕਾਰੇਨ ਸੁਪਾਕਟਭਾਵੇਨ ਉਪਟ੍ਠਾਨਂ ਦਸ੍ਸੇਤਿ. ਫਸ੍ਸੇ ਪਨ ਉਪਟ੍ਠਿਤੇ ਯਸ੍ਮਿਂ ਆਰਮ੍ਮਣੇ ਸੋ ਫਸ੍ਸੋ, ਤਸ੍ਸ ਅਨੁਭਵਨਲਕ੍ਖਣਾ ਵੇਦਨਾ, ਸਞ੍ਜਾਨਨਲਕ੍ਖਣਾ ਸਞ੍ਞਾ, ਆਯੂਹਨਲਕ੍ਖਣਾ ਚੇਤਨਾ, ਪਟਿਵਿਜਾਨਨਲਕ੍ਖਣਂ ਵਿਞ੍ਞਾਣਨ੍ਤਿ ਇਮੇਪਿ ਪਾਕਟਾ ਹੋਨ੍ਤੀਤਿ ਆਹ ‘‘ਤਂਸਮ੍ਪਯੁਤ੍ਤਾ ਵੇਦਨਾ’’ਤਿਆਦਿ. ਏਵਂ ਸਲਕ੍ਖਣਸਙ੍ਖੇਪਤੋ ਚਤੁਧਾਤੁਵਵਤ੍ਥਾਨਵਸੇਨ ਫਸ੍ਸਮੁਖੇਨ ਅਰੂਪਪਰਿਗ੍ਗਹਂ ਦਸ੍ਸੇਤ੍ਵਾ ਇਦਾਨਿ ਵਿਤ੍ਥਾਰਤੋ ਚਤੁਧਾਤੁਵਵਤ੍ਥਾਨਵਸੇਨ ਤਂ ਦਸ੍ਸੇਤੁਂ ‘‘ਤਥਾ ਕੇਸੇ’’ਤਿਆਦਿ ਵੁਤ੍ਤਂ. ਤਤ੍ਥ ਕੇਸੇ ਪਥਵੀਧਾਤੂਤਿ ਕੇਸਸਙ੍ਖਾਤੇ ਪਥਵੀਕੋਟ੍ਠਾਸੇ ਪਥਵੀਧਾਤੁ. ਲਕ੍ਖਣਵਿਭਤ੍ਤਿਤੋ ਹਿ ਧਾਤੁਵਵਤ੍ਥਾਨਦਸ੍ਸਨਮੇਤਂ.

ਪੁਨਪਿ ਦ੍ਵਿਨ੍ਨਂ ਧਾਤੁਵਵਤ੍ਥਾਨਾਨਂ ਵਸੇਨ ਵੇਦਨਾਮੁਖੇਨ ਅਰੂਪਪਰਿਗ੍ਗਹਂ ਦਸ੍ਸੇਤੁਂ ‘‘ਏਕਸ੍ਸਾ’’ਤਿਆਦਿ ਵੁਤ੍ਤਂ. ਤਤ੍ਥ ਤਸ੍ਸ ਰਸਾਨੁਭਵਨਕਵੇਦਨਾਤਿ ਥਦ੍ਧਭਾਵਸਙ੍ਖਾਤਸ੍ਸ ਫੋਟ੍ਠਬ੍ਬਸਭਾਵਸ੍ਸ ਅਨੁਭਵਨਵਸੇਨ ਪਵਤ੍ਤਵੇਦਨਾ.

ਅਪਰਸ੍ਸਾਤਿ ਏਤ੍ਥਾਪਿ ਵੁਤ੍ਤਨਯੇਨੇਵ ਸਮ੍ਬਨ੍ਧੋ ਵੇਦਿਤਬ੍ਬੋ. ਤਤ੍ਥ ਆਰਮ੍ਮਣਪਟਿਵਿਜਾਨਨਨ੍ਤਿ ਥਦ੍ਧਤਾਸਙ੍ਖਾਤਫੋਟ੍ਠਬ੍ਬਾਰਮ੍ਮਣਪਟਿਵਿਜਾਨਨਂ. ਕਾਯਦ੍ਵਾਰਾਭਿਨਿਹਤਂ, ਕੇਵਲਂ ਵਾ ਮਨੋਦ੍ਵਾਰਿਕਜਵਨਵਿਞ੍ਞਾਣਮਾਹ. ਤਞ੍ਹਿ ‘‘ਪਥਵੀਧਾਤੁ ਕਕ੍ਖਲ਼ਲਕ੍ਖਣਾ’’ਤਿ ਪਟਿਵਿਜਾਨਾਤਿ, ਇਤਰਂ ਪਨ ਕਕ੍ਖਲ਼ਲਕ੍ਖਣਪਟਿਵਿਜਾਨਨਮਤ੍ਤਮੇਵਾਤਿ.

ਏਤੇਨੇਵ ਉਪਾਯੇਨਾਤਿ ਯ੍ਵਾਯਂ ਸਲਕ੍ਖਣਸਙ੍ਖੇਪਤੋ, ਸਲਕ੍ਖਣਵਿਭਤ੍ਤਿਤੋ ਚ ਧਾਤੁਵਵਤ੍ਥਾਨਵਸੇਨ ਰੂਪਪਰਿਗ੍ਗਹਂ ਦਸ੍ਸੇਤ੍ਵਾ ਤਤ੍ਥ ਠਿਤਸ੍ਸ ਫਸ੍ਸਾਦਿਮੁਖੇਨ ਅਰੂਪਪਰਿਗ੍ਗਣ੍ਹਨੁਪਾਯੋ ਦਸ੍ਸਿਤੋ, ਏਤੇਨੇਵ ਉਪਾਯੇਨ. ਕਮ੍ਮਸਮੁਟ੍ਠਾਨਕੇਸੇਤਿ ਚਤੁਸਮੁਟ੍ਠਾਨਕੇਸਤੋ ਨਿਦ੍ਧਾਰਿਤੇ ਕਮ੍ਮਸਮੁਟ੍ਠਾਨਕੇਸੇ. ਕਕ੍ਖਲ਼ਲਕ੍ਖਣਾਤਿਆਦਿਨਾ ਨਯੇਨਾਤਿ ਆਦਿ-ਸਦ੍ਦੇਨ ਨ ਕੇਵਲਂ ‘‘ਪਗ੍ਘਰਣਲਕ੍ਖਣਾ ਆਪੋਧਾਤੂ’’ਤਿਆਦਿਨਾ ਲਕ੍ਖਣਵਿਸੇਸੇਨ ਸਦ੍ਧਿਂ ਧਾਤ੍ਵਨ੍ਤਰਾਨਿਯੇਵ, ਅਥ ਖੋ ਏਕਸਮੁਟ੍ਠਾਨਾਦਿਭੇਦਾਨਿ ਕੋਟ੍ਠਾਸਨ੍ਤਰਾਨਿਪੀਤਿ ਦਟ੍ਠਬ੍ਬਂ. ਤੇਨੇਵਾਹ ‘‘ਦ੍ਵਾਚਤ੍ਤਾਲੀਸਾਯ ਧਾਤੁਕੋਟ੍ਠਾਸੇਸੂ’’ਤਿ. ਸਬ੍ਬਂ ਨਯਭੇਦਂ ਅਨੁਗਨ੍ਤ੍ਵਾਤਿ ਯ੍ਵਾਯਂ ਦ੍ਵਾਚਤ੍ਤਾਲੀਸਾਯ ਧਾਤੁਕੋਟ੍ਠਾਸੇਸੁ ਪਥਵੀਧਾਤੁਆਦੀਨਂ ਲਕ੍ਖਣਾਦਿਤੋ ਵਵਤ੍ਥਾਪਨਵਸੇਨ ਨਾਨਾਵਿਧੋ ਰੂਪਪਰਿਗ੍ਗਹਨਯੋ ਵੁਤ੍ਤੋ, ਤਂ ਸਬ੍ਬਂ ਨਯਭੇਦਂ ਨਯਵਿਸੇਸਂ ਅਨੁਗਨ੍ਤ੍ਵਾ, ਚਕ੍ਖੁਧਾਤੁਆਦੀਸੁ ਰੂਪਪਰਿਗ੍ਗਹਮੁਖੇਸੁ ਅਰੂਪਪਰਿਗ੍ਗਹਦਸ੍ਸਨਵਸੇਨ ਯੋਜਨਾ ਕਾਤਬ੍ਬਾਤਿ ਅਧਿਪ੍ਪਾਯੋ. ਤਤ੍ਰਿਦਂ ਯੋਜਨਾਮੁਖਮਤ੍ਤਦਸ੍ਸਨਂ – ਏਕਸ੍ਸ ਤਾਵ ‘‘ਚਕ੍ਖੁਧਾਤੁ ਰੂਪਾਭਿਘਾਤਾਰਹਭੂਤਪ੍ਪਸਾਦਲਕ੍ਖਣਾ, ਦਟ੍ਠੁਕਾਮਤਾਨਿਦਾਨਕਮ੍ਮਸਮੁਟ੍ਠਾਨਭੂਤਪ੍ਪਸਾਦਲਕ੍ਖਣਾ ਵਾ’’ਤਿਆਦਿਨਾ (ਧ. ਸ. ਅਟ੍ਠ. ੬੦੦) ਨਯੇਨ ਧਾਤੁਯੋ ਪਰਿਗ੍ਗਣ੍ਹਨ੍ਤਸ੍ਸ ‘‘ਪਠਮਾਭਿਨਿਪਾਤੋ ਫਸ੍ਸੋ, ਤਂਸਮ੍ਪਯੁਤ੍ਤਾ ਵੇਦਨਾ’’ਤਿ ਸਬ੍ਬਂ ਯੋਜੇਤਬ੍ਬਂ. ਤਥਾ ‘‘ਯਥਾਵੁਤ੍ਤਲਕ੍ਖਣਾਯ ਚਕ੍ਖੁਧਾਤੁਯਾ ਰਸਾਨੁਭਵਨਕਵੇਦਨਾ ਵੇਦਨਾਕ੍ਖਨ੍ਧੋ’’ਤਿਆਦਿ ਯੋਜੇਤਬ੍ਬਂ. ਤਥਾ ‘‘ਯਥਾਵੁਤ੍ਤਲਕ੍ਖਣਾ ਚਕ੍ਖੁਧਾਤੂ’’ਤਿ, ‘‘ਆਰਮ੍ਮਣਪਟਿਵਿਜਾਨਨਂ ਵਿਞ੍ਞਾਣਂ ਵਿਞ੍ਞਾਣਕ੍ਖਨ੍ਧੋ’’ਤਿਆਦਿਨਾ ਸਬ੍ਬਂ ਯੋਜੇਤਬ੍ਬਂ. ਆਯਤਨਾਦਿਵਸੇਨ ਰੂਪਪਰਿਗ੍ਗਹਮੁਖੇਸੁਪਿ ਏਸੇਵ ਨਯੋ.

੬੭੧. ਯਥਾ ਨਾਮ ਹੇਟ੍ਠਿਮਝਾਨਂ ਸੁਭਾਵਿਤਂ ਵਸੀਭਾਵਂ ਪਾਪਿਤਮੇਵ ਉਪਰਿਝਾਨਸ੍ਸ ਪਾਦਕਂ ਪਦਟ੍ਠਾਨਂ ਹੋਤਿ, ਨ ਪਟਿਲਦ੍ਧਮਤ੍ਤਂ, ਏਵਂ ਰੂਪਪਰਿਗ੍ਗਹੋ ਸੁਵਿਸੁਦ੍ਧੋ ਨਿਜ੍ਜਟੋ ਨਿਗ੍ਗੁਮ੍ਬੋ ਏਵ ਅਰੂਪਪਰਿਗ੍ਗਹਸ੍ਸ ਪਾਦਕਂ ਪਦਟ੍ਠਾਨਂ ਹੋਤਿ, ਨ ਅਵਿਸੁਦ੍ਧੋ, ਤਸ੍ਮਾ ਰੂਪਾਰੂਪਸ੍ਸ ਏਕਦੇਸੇਪਿ ਅਨੁਪਟ੍ਠਿਤੇ ਸੋ ਅਵਿਸੁਦ੍ਧੋ ਏਵ ਨਾਮ ਹੋਤਿ, ਪਗੇਵ ਬਹੂਸੁ ਅਨੁਪਟ੍ਠਿਤੇਸੂਤਿ ਦਸ੍ਸੇਨ੍ਤੋ ਆਹ ‘‘ਸਚੇ ਹੀ’’ਤਿਆਦਿ. ਪਬ੍ਬਤੇਯ੍ਯਾ ਗਾਵੀ ਵਿਯ ਬਾਲਾ ਅਬ੍ਯਤ੍ਤਾ ਅਖੇਤ੍ਤਞ੍ਞੂ.

ਖਗ੍ਗੇਨਾਤਿ ਖਗ੍ਗਗ੍ਗੇਨ. ਸਮੁਗ੍ਗਨ੍ਤਿ ਮਞ੍ਜੂਸਾਸਦਿਸਂ ਮਹਾਸਮੁਗ੍ਗਂ. ਅਪਰਿਗ੍ਗਹਿਤਕਮ੍ਮਟ੍ਠਾਨਸ੍ਸ ਅਵਿਭਤ੍ਤਂ ਵਿਯ ਉਪਟ੍ਠਹਨ੍ਤਮ੍ਪਿ ਨਾਮਰੂਪਂ ਵਿਭਤ੍ਤਸਭਾਵਮੇਵ, ਤਸ੍ਸ ਚ ਵਿਭਾਗੋ ਕਮ੍ਮਟ੍ਠਾਨਪਰਿਗ੍ਗਹੇਸੁ ਪਾਕਟੋ ਹੋਤੀਤਿ ਚ ਦਸ੍ਸਨਤ੍ਥਂ ਸਮੁਗ੍ਗਵਿਵਰਣਂ, ਯਮਕਤਾਲਕਨ੍ਦਫਾਲਨਞ੍ਚ ਨਿਦਸ੍ਸਨਭਾਵੇਨ ਵੁਤ੍ਤਂ. ਯਮਕਤਾਲਕਨ੍ਦਞ੍ਹਿ ਭਿਨ੍ਨਸਨ੍ਤਾਨਮ੍ਪਿ ਅਭਿਨ੍ਨਂ ਵਿਯ ਉਪਟ੍ਠਾਤਿ, ਏਵਂ ਰੂਪਾਰੂਪਧਮ੍ਮਾਤਿ. ਸਬ੍ਬੇਪਿ ਤੇਭੂਮਕੇ ਧਮ੍ਮੇ ਨਾਮਞ੍ਚ ਰੂਪਞ੍ਚਾਤਿ ਦ੍ਵੇਧਾ ਵਵਤ੍ਥਪੇਤੀਤਿ ਏਤ੍ਥ ਕਿਞ੍ਚਾਪਿ ਸਬ੍ਬ-ਸਦ੍ਦੋ ਅਨਵਸੇਸਪਰਿਯਾਦਾਯਕੋ, ਨਾਮਰੂਪਭਾਵੋ ਪਨ ਅਞ੍ਞਮਞ੍ਞਵਿਧੁਰੋਤਿ ਨ ਤਦੁਭਯਂ ਸਮੁਦਾਯਵਸੇਨ ਪਰਿਸਮਾਪਯੇਤਬ੍ਬਂ, ਤਸ੍ਮਾ ‘‘ਯਦੇਤ੍ਥ ਨਮਨਲਕ੍ਖਣਂ, ਤਂ ਨਾਮਂ. ਯਂ ਰੁਪ੍ਪਨਲਕ੍ਖਣਂ, ਤਂ ਰੂਪ’’ਨ੍ਤਿ ਏਵਂ ਦ੍ਵੇਧਾ ਵਵਤ੍ਥਪੇਤੀਤਿ ਅਤ੍ਥੋ. ਏਵਂ ਵਵਤ੍ਥਪੇਨ੍ਤੋਯੇਵ ਚ ਤਦੁਭਯਵਿਨਿਮੁਤ੍ਤਸ੍ਸ ਤੇਭੂਮਕਧਮ੍ਮੇਸੁ ਕਸ੍ਸਚਿ ਧਮ੍ਮਸ੍ਸ ਅਭਾਵਤੋ ‘‘ਸਬ੍ਬੇਪਿ ਤੇਭੂਮਕਧਮ੍ਮੇ ਨਾਮਞ੍ਚ ਰੂਪਞ੍ਚਾਤਿ ਦ੍ਵੇਧਾ ਵਵਤ੍ਥਪੇਤੀ’’ਤਿ ਵੁਚ੍ਚਤਿ. ‘‘ਨਾਮਞ੍ਚ ਰੂਪਞ੍ਚਾ’’ਤਿ ਏਤੇਨੇਵ ਤਸ੍ਸ ਦੁਵਿਧਭਾਵੇ ਸਿਦ੍ਧੇ ‘‘ਦ੍ਵੇਧਾ ਵਵਤ੍ਥਪੇਤੀ’’ਤਿ ਇਦਂ ਨਾਮਰੂਪਵਿਨਿਮੁਤ੍ਤਸ੍ਸ ਅਞ੍ਞਸ੍ਸ ਅਭਾਵਦਸ੍ਸਨਤ੍ਥਂ. ਤੇਨੇਵਾਹ ‘‘ਨਾਮਰੂਪਮਤ੍ਤਤੋ ਉਦ੍ਧ’’ਨ੍ਤਿਆਦਿ. ‘‘ਸਬ੍ਬੇਪਿ ਤੇਭੂਮਕੇ ਧਮ੍ਮੇ’’ਤਿ ਪਨ ਸਬ੍ਬਗ੍ਗਹਣਞ੍ਚੇਤ੍ਥ ਸਮ੍ਮਸਮਨੁਪਗਸ੍ਸ ਧਮ੍ਮਸ੍ਸ ਅਨਵਸੇਸੇਤਬ੍ਬਤਾਯ ਵੁਤ੍ਤਂ. ਤਞ੍ਹਿ ਅਨਵਸੇਸਤੋ ਪਰਿਞ੍ਞੇਯ੍ਯਂ ਏਕਂਸਤੋ ਵਿਰਜ੍ਜਿਤਬ੍ਬਂ, ਤਤੋ ਚ ਚਿਤ੍ਤਂ ਵਿਰਾਜਯਂ ਪਮੋਚੇਤਬ੍ਬਂ. ਤੇਨਾਹ ਭਗਵਾ –

‘‘ਸਬ੍ਬਂ, ਭਿਕ੍ਖਵੇ, ਅਨਭਿਜਾਨਂ ਅਪਰਿਜਾਨਂ ਤਤ੍ਥ ਚਿਤ੍ਤਂ ਅਵਿਰਾਜਯਂ ਅਪ੍ਪਜਹਂ ਅਭਬ੍ਬੋ ਦੁਕ੍ਖਕ੍ਖਯਾਯ. ਸਬ੍ਬਞ੍ਚ ਖੋ, ਭਿਕ੍ਖਵੇ, ਅਭਿਜਾਨਂ ਪਰਿਜਾਨਂ ਤਤ੍ਥ ਚਿਤ੍ਤਂ ਵਿਰਾਜਯਂ ਪਜਹਂ ਭਬ੍ਬੋ ਦੁਕ੍ਖਕ੍ਖਯਾਯਾ’’ਤਿ (ਸਂ. ਨਿ. ੪.੨੬-੨੭).

ਯਦਿ ਤੇਭੂਮਕਂ ਧਮ੍ਮਜਾਤਂ ਅਨਵਸੇਸਤੋ ਗਹਿਤਂ ‘‘ਨਾਮਰੂਪ’’ਨ੍ਤਿ, ਯਂ ਇਤੋ ਬਾਹਿਰਕੇਹਿ ਪਦਤ੍ਥਭਾਵੇਨ ਪਰਿਕਪ੍ਪਿਤਂ, ਸੇਯ੍ਯਥਿਦਂ – ਪਕਤਿਆਦਿ ਦ੍ਰਬ੍ਯਾਦਿ ਜੀਵਾਦਿ ਕਾਯਾਦਿ. ਤਤ੍ਥ ਕਥਂ ਪਟਿਪਜ੍ਜਿਤਬ੍ਬਨ੍ਤਿ? ਉਮ੍ਮਤ੍ਤਕਵਿਪਲ੍ਲਾਸਸਦਿਸੇ ਅਸਮ੍ਮਾਸਮ੍ਬੁਦ੍ਧਪਵੇਦਿਤੇ ਕਾ ਤਤ੍ਥ ਅਞ੍ਞਾ ਪਟਿਪਤ੍ਤਿ ਅਞ੍ਞਤ੍ਰ ਅਜ੍ਝੁਪੇਕ੍ਖਨਤੋ. ਅਥ ਵਾ ਤੇਪਿ ਨਾਮਰੂਪਨ੍ਤੋਗਧਭਾਵਾਭਾਵਵਸੇਨ ਨਿਚ੍ਛਿਤਾ ਏਵਾਤਿ ਵੇਦਿਤਬ੍ਬਾ. ਕਥਂ? ਪਕਤਿ, ਮਹਾ, ਅਹਂਕਾਰੋ, ਤਮ੍ਮਤ੍ਤਾਨਿ, ਇਨ੍ਦ੍ਰਿਯਾਨਿ, ਭੂਤਾਨਿ, ਪੁਰਿਸੋਤਿ ਏਤੇ ਪਕਤਿਆਦਯੋ. ਤਤ੍ਥ ਸਮਭਾਵੇਨ ਪਵਤ੍ਤਮਾਨਾਨਂ ਸਤ੍ਤਰਜਤਮਸਙ੍ਖਾਤਾਨਂ ਸੁਖਦੁਕ੍ਖਮੋਹਾਨਂ ਸਮੁਦਾਯੋ ਪਕਤਿ, ਪਧਾਨਨ੍ਤਿ ਚ ਵੁਚ੍ਚਤਿ. ਸਤ੍ਤਮਤ੍ਤਸਮ੍ਪਵੇਦਨੀਯੋ ਮਹਾ, ਬੁਦ੍ਧੀਤਿ ਕੇਚਿ. ਸਤ੍ਤਰਜਾਦੀਸੁ ਅਭਿਮਾਨੋ ਅਹਂਕਾਰੋ, ਅਸ੍ਮਿਮਤ੍ਤਾਤਿ ਕੇਚਿ. ਸਦ੍ਦਫਸ੍ਸਰੂਪਰਸਗਨ੍ਧਾ ਤਮ੍ਮਤ੍ਤਾਨਿ ਅਞ੍ਞਮਞ੍ਞਵਿਸਿਟ੍ਠਾਨਂ ਪਥਵੀਆਦੀਨਂ ਏਕੁਤ੍ਤਰਤਾਦਸ੍ਸਨਤੋ ਏਕੁਤ੍ਤਰਾਨਿ ਤਮ੍ਮਤ੍ਤਾਨੀਤਿ ਵਿਜ੍ਝਵਾਸਿਏਕਲਕ੍ਖਣੇਹਿ ਤਮ੍ਮਤ੍ਤੇਹਿ ਏਕਲਕ੍ਖਣਾ ਵਿਸੇਸਾ ਸਜਿਯਨ੍ਤਿ, ਸੁਖੁਮਭਾਵੇਨ ਪਨ ਨੇਸਂ ਸਮ੍ਪਵੇਸਨਤੋ ਏਕੁਤ੍ਤਰਤਾਤਿ ਕੇਚਿ. ਸੋਤਾਦੀਨਿ ਪਞ੍ਚ ਸਵਨਾਦਿਵੁਤ੍ਤਿਕਾਨਿ ਬੁਦ੍ਧਿਨ੍ਦ੍ਰਿਯਾਨਿ, ਵਚਨਾਦਾਨਵਿਚਰਣੁਸ੍ਸਗ੍ਗਾਨਨ੍ਦਕਿਚ੍ਚਾਨਿ ਵਾਚਾਦੀਨਿ ਪਞ੍ਚ ਕਮ੍ਮਿਨ੍ਦ੍ਰਿਯਾਨਿ. ਮਨੋ ਅਨ੍ਤੋਕਰਣਂ, ਇਤਰਂ ਬਾਹਿਰਕਰਣਂ. ਗਨ੍ਧਾਦੀਹਿ ਆਰਦ੍ਧਾਨਿ ਪਥਵੀਉਦਕਅਗ੍ਗਿਵਾਯੁਆਕਾਸਾਨਿ ਭੂਤਾਨਿ, ਚੇਤਨਾਸਭਾਵੋ ਪੁਰਿਸੋਤਿ ਏਵਂ ਪਕਤਿਆਦੀਨਿ ਸਰੂਪਤੋ ਵੇਦਿਤਬ੍ਬਾਨਿ.

ਤਤ੍ਥ ਹਿ ਪਕਤਿ ਤਾਵ ਸੁਖਦੁਕ੍ਖਮੋਹਮਤ੍ਤਤਾਯ ਨਾਮਂ, ਸਮਵਿਸਮਭਾਵਾਪਤ੍ਤਿਤੋ ਅਨਿਚ੍ਚਾ, ਦੁਕ੍ਖਾ, ਸਙ੍ਖਤਾ ਚ ਆਪਨ੍ਨਾ. ਮਹਾਪਿ ‘‘ਤਸ੍ਮਾ ਅਲਿਙ੍ਗਤੋ ਲਿਙ੍ਗਵਿਸੇਸਾਮਤ੍ਤੋ ਮਹਾ ਉਪ੍ਪਜ੍ਜਤੀ’’ਤਿ ਵਚਨਤੋ, ਬੁਦ੍ਧਿਭਾਵਾਨੁਜਾਨਨਤੋ ਚ ਨਾਮਂ, ਅਨਿਚ੍ਚਂ, ਸਙ੍ਖਤਮੇਵ ਚ ਆਪਨ੍ਨਂ. ‘‘ਤਸ੍ਮਾ ਮਹਤੋ ਛ ਵਿਸੇਸਾ ਸਜਿਯਨ੍ਤੀ’’ਤਿ ਸਕ੍ਕਤੇ ਵਚਨਤੋ ‘‘ਅਸ੍ਮੀ’’ਤਿ ਗਹਣਨਿਮਿਤ੍ਤਭਾਵਾਨੁਜਾਨਨੇਨ ਅਹਂਕਾਰੋ ਅਭਿਮਾਨੋਤਿ ਕਤ੍ਵਾ ਨਾਮਂ, ਤਤੋ ਏਵ ਅਨਿਚ੍ਚਸਙ੍ਖਤਭਾਵਾਪਤ੍ਤਿ ਚਸ੍ਸ ਸਿਦ੍ਧਾ. ਇਤਰਂ ਤਮ੍ਮਤ੍ਤਪਞ੍ਚਕਂ ਗਨ੍ਧਰਸਰੂਪਫਸ੍ਸਸਦ੍ਦਭਾਵਾਨੁਜਾਨਨਤੋ ਰੂਪਂ, ਅਰੂਪਨ੍ਤਿ ਪਨ ਕਾਪਿਲਾਨਂ ਮਿਚ੍ਛਾਭਿਨਿਵੇਸਮਤ੍ਤਂ. ਤੇ ਹਿ ਸੋਲ਼ਸ ਵਿਸੇਸਾ ਪਞ੍ਚ ਭੂਤਾਨਿ, ਏਕਾਦਸਿਨ੍ਦ੍ਰਿਯਾਨਿ ਭੂਤੇਹਿ ਭੂਤਵਿਸੇਸਾਨੀਤਿ ਗਨ੍ਧਾਦਿਤਮ੍ਮਤ੍ਤੇਹਿ ਤਨ੍ਨਿਸ੍ਸਯਾਨਿ ਪਥਵੀਆਪੋਤੇਜੋਵਾਯੋਆਕਾਸਸਙ੍ਖਾਤਾਨਿ ਭੂਤਾਨਿ ਇਚ੍ਛਿਤਾਨਿ. ‘‘ਤਬ੍ਬਿਸੇਸਾ ਚ ਨਾਨਾਜਾਤਿਕਾ ਅਹਂਕਾਰਤੋ ਚ ਇਨ੍ਦ੍ਰਿਯਾਨੀ’’ਤਿ ਵਚਨਤੋ ਸੋਤਕਾਯਚਕ੍ਖੁਜਿਵ੍ਹਾਘਾਨਵਾਚਾਪਾਣਿਪਾਦਪਾਯੂਪਤ੍ਥਾਨਿ ਚੇਵ ਮਨੋ ਚਾਤਿ ਏਕਾਦਸਿਨ੍ਦ੍ਰਿਯਾਨਿ.

ਤਤ੍ਥ ਮਨੋ ਨਾਮਂ, ਇਤਰਾਨਿ ਸਬ੍ਬਾਨਿ ਰੂਪਂ. ਵਾਚਾਤਿ ਚੇਤ੍ਥ ਅਤ੍ਥਾਵਜੋਤਕਸ੍ਸ ਅਕ੍ਖਰਸਮੁਦਾਯਸ੍ਸ ਗਹਣਂ. ਇਮੇਸਂ ਪਨ ਧਮ੍ਮਿਨੋ ਧਮ੍ਮਸ੍ਸ ਅਨਞ੍ਞਤ੍ਥਸ੍ਸ ਇਚ੍ਛਿਤਤ੍ਤਾ ਸਿਦ੍ਧਾਵ ਅਨਿਚ੍ਚਤਾ ਪਰਿਣਾਮਪਕ੍ਖੇ, ਅਭਿਬ੍ਯਤ੍ਤਿਪਕ੍ਖੇਪਿ ਯਦਿ ਤਬ੍ਬਿਸਯਞਾਣੁਪ੍ਪਾਦੇਨ ਅਭਿਬ੍ਯਞ੍ਜਨਂ ਸਿਦ੍ਧਾਵ ਅਨਿਚ੍ਚਤਾ, ਅਥ ਤਤੋ ਪੁਬ੍ਬੇਪਿ ਞਾਣਂ ਅਤ੍ਥੇਵ. ਅਕ੍ਖਬ੍ਯਤ੍ਤਿਵਾਦੋ ਪਨ ਸਿਯਾਤਿ ਇਦਮੇਤ੍ਥ ਦਿਸਾਮਤ੍ਤਂ. ਦ੍ਰਬ੍ਯਗੁਣਕਮ੍ਮਸਾਮਞ੍ਞਵਿਸੇਸਸਮਵਾਯਾ ਦ੍ਰਬ੍ਯਾਦਿਕਾ. ਤਤ੍ਥ ਪਥਵੀ ਆਪੋ ਤੇਜੋ ਵਾਯੁ ਆਕਾਸੋ ਕਾਲੋ ਦਿਸਾ ਅਤ੍ਤਾ ਮਨੋਤਿ ਨਵ ਦ੍ਰਬ੍ਯਾਨਿ. ਸਦ੍ਦ ਰੂਪ ਰਸ ਗਨ੍ਧ ਫਸ੍ਸ ਸਙ੍ਖਾ ਪਰਿਮਾਣਾਨਿ ਪੁਥੂਤ੍ਵ ਸਂਯੋਗ ਵਿਯੋਗ ਪਰਤ੍ਵਾ ਪਰਤ੍ਵ ਬੁਦ੍ਧਿ ਸੁਖ ਦੁਕ੍ਖ ਇਚ੍ਛਾ ਦੋਸ ਪਯਤ੍ਤ ਗੁਰੁਤ੍ਵ ਦ੍ਰਵਤ੍ਵ ਸ੍ਨੇਹ ਵੇਗਾ ਸਙ੍ਖਾਰਾ ਦਿਟ੍ਠਾ ਚੇਤਿ ਏਵਮੇਤੇ ਤੇਵੀਸਤਿ ਗੁਣਾ. ਉਕ੍ਖੇਪਨਂ ਅਵਕ੍ਖੇਪਨਮਾਕੁਚਨਂ ਪਸਾਰਣਂ ਗਮਨਮਿਤਿ ਪਞ੍ਚ ਕਮ੍ਮਾਨਿ. ਅਞ੍ਞਮਞ੍ਞਵਿਸਿਟ੍ਠੇਸੁ ਅਵਿਸਿਟ੍ਠਮਭਿਧਾਨਂ ਪਚ੍ਚਯੋ ਹੋਤਿ. ਸਂ-ਇਤਿ ਯਤੋ ਦ੍ਰਬ੍ਯਗੁਣਕਮ੍ਮੇਸੁ ਸਾ ਅਤ੍ਥਿ ਏਵਾਤਿ ਏਤਂ ਮਹਾਸਾਮਞ੍ਞਂ. ਪਥਵੀਆਦੀਸੁ ਅਨੁਵਤ੍ਤਿਬ੍ਯਾਵੁਤ੍ਤਿਬੁਦ੍ਧਿਨਿਮਿਤ੍ਤਂ ਦ੍ਰਬ੍ਯਤ੍ਵਾਦਿ, ਤਂ ਯਥਾ ਦ੍ਰਬ੍ਯਤ੍ਵ ਗੁਣਤ੍ਵ ਕਮ੍ਮਤ੍ਵ ਘਟਤ੍ਵਾਦਿ, ਏਸੋ ਸਾਮਞ੍ਞਵਿਸੇਸੋ. ਇਹ ਤਨ੍ਤੇਸੁ ਪਟੋ, ਕਪਾਲੇਸੁ ਘਟੋਤਿ ਇਹੇਤਿ ਯਤੋ ਹੇਤੁਹੇਤੁਫਲਾਨਂ ਸਮ੍ਬਨ੍ਧੋ ਸਮਵਾਯੋਤਿ ਵੁਤ੍ਤੋ, ਸਮਵਾਯੋਤਿ ਏਵਮੇਤੇ ਦ੍ਰਬ੍ਯਾਦਿਕਾ.

ਤਤ੍ਥ ਪਥਵੀ ਆਪ ਤੇਜ ਵਾਯੂ ਭੂਤਰੂਪਂ, ਆਕਾਸਂ ਤੇਸਂ ਅਭਾਵਮਤ੍ਤਂ, ਪਰਿਚ੍ਛੇਦੋ ਵਾ, ਚਨ੍ਦਸੂਰਿਯਾਦਿਪਰਿਵਤ੍ਤਨਂ, ਧਮ੍ਮਪ੍ਪਵਤ੍ਤਿਞ੍ਚ ਉਪਾਦਾਯ ਪਞ੍ਞਤ੍ਤਿਮਤ੍ਤਂ ਕਾਲੋ. ਤਥਾ ਦਿਸਾ, ਅਤ੍ਤਾ ਚ. ਮਨੋ ਨਾਮਂ. ਸਦ੍ਦਰੂਪਰਸਗਨ੍ਧਾ ਰੂਪਮੇਵ. ਤਥਾ ਫਸ੍ਸੋ ਭੂਤਤ੍ਤਯਸਭਾਵਤੋ. ਸਙ੍ਖਾ ਏਕਾਦਿਕਾ ਤਂ ਤਂ ਉਪਾਦਾਯ ਪਞ੍ਞਤ੍ਤਿਮਤ੍ਤਂ. ਤਥਾ ਅਵਯਵਸਮੁਦਾਯੇ ਗੁਣਵਿਸੇਸਵਸੇਨ, ਸਣ੍ਠਾਨਵਿਸੇਸਵਸੇਨ ਵਾ ਮਹਨ੍ਤਂ ਦੀਘਂ, ਤਬ੍ਬਿਪਰਿਯਾਯਤੋ ਅਣੁ ਰਸ੍ਸਨ੍ਤਿ ਭਿਨ੍ਨਲਕ੍ਖਣਦੇਸੇਸੁ ਪੁਥੁਤ੍ਵਨ੍ਤਿ. ਭਿਨ੍ਨਦੇਸਜਾਨਂ ਸਹਭਾਵੇ ਸਂਯੋਗੋਤਿ. ਤਦਪਾਯੇ ਵਿਯੋਗੋਤਿ. ਸਮਾਨਦਿਸਾਦੇਸਗਤਾਨਂ ਰੂਪਾਨਂ ਮਹਦਬ੍ਬਨ੍ਤਰਾਨਂ ਵਸੇਨ ਪਰਮਪਰਨ੍ਤਿ ਪਞ੍ਞਤ੍ਤਿਮਤ੍ਤਂ. ਬੁਦ੍ਧਿਸੁਖਦੁਕ੍ਖਇਚ੍ਛਾਦੋਸਪਯਤ੍ਤਾ ਨਾਮਮੇਵ. ਗੁਰੁਤ੍ਵ ਦ੍ਰਵਤ੍ਵ ਸ੍ਨੇਹਵੇਗਾ ਰੂਪਧਮ੍ਮਾਨਂ ਪਵਤ੍ਤਿਵਿਸੇਸਤੋ ਗਹੇਤਬ੍ਬਾਕਾਰਾ. ਇਤਰੋ ਸਙ੍ਖਾਰੋ ਞਾਣਸ੍ਸ ਪਵਤ੍ਤਿਵਿਸੇਸੋ. ਅਦਿਟ੍ਠੋਪਿ ਧਮ੍ਮਾਧਮ੍ਮਭਾਵਤੋ ਨਾਮਮੇਵ. ਉਕ੍ਖੇਪਨਂ ਅਵਕ੍ਖੇਪਨਂ ਆਕੁਚਨਂ ਪਸਾਰਣਂ ਗਮਨਨ੍ਤਿ ਰੂਪਧਮ੍ਮਾਨਂ ਪਵਤ੍ਤਿਮਤ੍ਤਂ. ਸਦਿਸਾਸਦਿਸਤਾਯਂ ਸਾਮਞ੍ਞਵਿਸੇਸਸਞ੍ਞਾ, ਅਯੁਤ੍ਤਸਮ੍ਬਨ੍ਧੇ ਸਮਵਾਯਸਮਞ੍ਞਾਤਿ ਦ੍ਰਬ੍ਯਾਦੀਨਮ੍ਪਿ ਨਾਮਰੂਪਨ੍ਤੋਗਧਤਾ ਦਟ੍ਠਬ੍ਬਾ.

ਜੀਵਾਜੀਵਬਨ੍ਧ ਪੁਞ੍ਞ ਪਾਪਾਸਵ ਸਂਵਰਨਿਜ੍ਜਰਵਿਮੋਕ੍ਖਾ ਜੀਵਾਦਿਕਾ. ਤਤ੍ਥ ਜੀਵੋਤਿ ਅਤ੍ਤਾ. ਪੁਗ੍ਗਲਧਮ੍ਮਾਧਮ੍ਮਾਕਾਸਕਾਲੇਸੁ ਅਜੀਵਸਞ੍ਞਾ. ਤੇਸੁ ਸਦ੍ਦਫਸ੍ਸਰੂਪਰਸਗਨ੍ਧਸਣ੍ਠਾਨਬਨ੍ਧਭੇਦਸੁਖੁਮਪਰਅਪਰਾਘਾਤਪ੍ਪਭਾਚ੍ਛਾਯੋਜ੍ਜਾਕਤਮਾਨਿ ਪੁਗ੍ਗਲਲਕ੍ਖਣਨ੍ਤਿ ਪੁਗ੍ਗਲੋ ਰੂਪਂ ਰੂਪਧਮ੍ਮਾਨਂ ਪਵਤ੍ਤਿਆਕਾਰਮਤ੍ਤਤੋ. ਧਮ੍ਮਾਧਮ੍ਮਾ ਜੀਵਪੁਗ੍ਗਲਾਨਂ ਗਤਿਟ੍ਠਿਤਿਮਤ੍ਤਤਾਯ ਤਦਵਿਸਿਟ੍ਠਾ. ਆਕਾਸਕਾਲਾ ਪਞ੍ਞਤ੍ਤਿਮਤ੍ਤਂ. ਬਨ੍ਧੋ ‘‘ਕਮ੍ਮਪੁਗ੍ਗਲਨ੍ਤਰਸਂਯੋਗੋ’’ਤਿ ਵਚਨਤੋ ਤੇਹਿ ਅਨਞ੍ਞੋ. ਪੁਞ੍ਞਪਾਪਾਨਿ ਨਾਮਨ੍ਤਿ ਪਾਕਟਮੇਵ. ‘‘ਕਮ੍ਮਪੁਗ੍ਗਲਾਨਮਾਸਵੋ’’ਤਿ ਵਚਨਤੋ ਪੁਞ੍ਞਾਪੁਞ੍ਞਸਮ੍ਭਵੇ ਆਸਵਸਮਞ੍ਞਾਤਿ ਤਤੋ ਅਵਿਸਿਟ੍ਠੋ ਆਸਵੋ. ‘‘ਆਸਵਨਿਰੋਧੋ ਸਂਵਰੋ’’ਤਿ ਵਚਨਤੋ ਪਟਿਪਕ੍ਖੇਨ ਪੁਞ੍ਞਾਪੁਞ੍ਞਨਿਰੋਧੋ ਸਂਵਰੋ. ‘‘ਕਮ੍ਮਫਲਪ੍ਪਵਤ੍ਤਿਯਾ ਪਕਤਿਯਾ ਅਪ੍ਪਵਤ੍ਤਿ ਨਿਜ੍ਜਰੋ’’ਤਿ ਵਚਨਤੋ ਵਿਪਾਕਨਿਰੋਧਨਿਮਿਤ੍ਤਂ ਨਿਜ੍ਜਰੋ. ਮੋਕ੍ਖੋਪਿ ‘‘ਸਬ੍ਬਕਮ੍ਮਵਿਮੋਕ੍ਖੋ’’ਤਿ ਵਚਨਤੋ ਕਮ੍ਮਪੁਗ੍ਗਲਜੀਵਵਿਯੋਗੋ. ਤਤ੍ਥ ਕਮ੍ਮਪੁਗ੍ਗਲਾਨਂ ਸਦ੍ਦਾਦਿਲਕ੍ਖਣਤਾਯ ਰੂਪਮਤ੍ਤਤਾ ਪੁਞ੍ਞਾਪੁਞ੍ਞਮਤ੍ਤਤਾਯ ਅਰੂਪਤਾ. ਜੀਵੋ ਚ ਅਰੂਪਮਤ੍ਤਮੇਵਾਤਿ ਅਯਂ ਦ੍ਰਬ੍ਯਮੋਕ੍ਖੋ. ਭਾਵਮੋਕ੍ਖੋ ਪਨ ਜੀਵਸ੍ਸ ਰਾਗਾਦਿਭਾਵਾਪਰਿਣਾਮੋ ਰਾਗਾਦਯੋ ਨਾਮਮੇਵਾਤਿ ਜੀਵਾਦਯੋਪਿ ਨਾਮਰੂਪਨ੍ਤੋਗਧਾ ਏਵ.

ਕਾਯਪ੍ਪਵਤ੍ਤਿਗਤਿਜਾਤਿਬਨ੍ਧਾਪਵਗ੍ਗਾ ਕਾਯਾਦਿਕਾ. ਤਤ੍ਥ ਪਥਵੀਆਪਤੇਜਵਾਯੁਅਤ੍ਤਸੁਖਦੁਕ੍ਖੇਸੁ ਕਾਯਸਮਞ੍ਞਾ. ਤਦਵਿਸਿਟ੍ਠਾ ਪਵਤ੍ਤਿਗਤਿਜਾਤਿਬਨ੍ਧਾਪਵਗ੍ਗਾ, ‘‘ਭਾਵੋਤਿ ਅਤ੍ਥੋ, ਕਾਯੋਤਿ ਅਨਤ੍ਥਨ੍ਤਰ’’ਨ੍ਤਿ ਵਚਨਤੋ ਕਾਯਤੋ ਅਞ੍ਞਂ ਕਿਞ੍ਚਿ ਨਤ੍ਥਿ. ‘‘ਪਵਤ੍ਤਿਸਞ੍ਞਾ ਕਿਰਿਯਾਸਂਯੋਗਵਿਭਾਗੇਸੂ’’ਤਿ ਵਚਨਤੋ ਗਤਿਆਦਿਪ੍ਪਕਾਰੇਨ ਪਵਤ੍ਤਾ ਪਥਵੀਆਦਯੋ ਏਵ ਪਵਤ੍ਤਿ ਉਪਚਾਰੋ. ‘‘ਤਸ੍ਮਿਂ ਅਨਤ੍ਥਨ੍ਤਰ’’ਨ੍ਤਿ ਵਚਨਤੋ ਕਾਯਤੋ ਅਨਞ੍ਞਾ ਸੁਰਮਨੁਜਪੇਤਤਿਰਚ੍ਛਾਨਨਰਕੂਪਪਤ੍ਤਿਯੋ ਗਤਿਯੋ. ਤਾਸੁ ਪੁਰਿਮਾਪੁਰਿਮਾਵਿਸਿਟ੍ਠੋ ਗਤੀਸੁ ਜਾਤਸ੍ਸ ਨਿਚ੍ਛਯੋਪਿ ਪਵਤ੍ਤਿਮਤ੍ਤਨ੍ਤਿ ਤਤੋ ਅਨਞ੍ਞਾ ਕਣ੍ਹਨੀਲਰਤ੍ਤਪੀਤਸੁਕ੍ਕਅਤਿਸੁਕ੍ਕਸਙ੍ਖਾਤਾ ਜਾਤਿਯੋ. ਤਾ ਉਤ੍ਤਰੁਤ੍ਤਰਵਿਸਿਟ੍ਠਾ ਅਞ੍ਞਾਣਮੋਹਰਾਗਦੋਸਤਤ੍ਵਾਸਨ੍ਦਸ੍ਸਨਪ੍ਪਾਯਾ ਸੁਕ੍ਕਜਾਤਿ, ਅਨ੍ਤਾ ਅਚ੍ਚਨ੍ਤਵਿਮੁਤ੍ਤਾ ਅਵਗਾਹਿਤਤ੍ਵਾ ਚਾਤਿ ਸੁਕ੍ਕਜਾਤਿ. ‘‘ਦੋਸੇਸੁ ਬਨ੍ਧਸਮਞ੍ਞਾ’’ਤਿ ਵਚਨਤੋ ਅਞ੍ਞਾਣਾਦਿਲਕ੍ਖਣਸ੍ਸ ਬਨ੍ਧਸ੍ਸ ਜੀਵਤੋ ਅਨਞ੍ਞਤਾ. ਅਞ੍ਞਾਣਾਦਿਦੋਸਾਭਾਵਤੋ ਅਪਵਗ੍ਗਸਿਦ੍ਧੀਤਿ ਕਾਯਾਦਯੋਪਿ ਨਾਮਰੂਪਮਤ੍ਤਮੇਵ.

ਯੋਪਿ ਤਤ੍ਥ ਤਤ੍ਥ ‘‘ਪੁਰਿਸੋ ਅਤ੍ਤਾ ਜੀਵੋ’’ਤਿਆਦਿਪਰਿਯਾਯੇਹਿ ਵੁਤ੍ਤੋ ਅਤ੍ਤਪਦਤ੍ਥੋ, ਸੋਪਿ ਯਥਾਰਹਂ ਨਾਮਰੂਪਮਤ੍ਤਂ ਉਪਾਦਾਯ ਪਞ੍ਞਤ੍ਤੋ, ਨਾਮਰੂਪਮਤ੍ਤਮੇਵ ਵਾ. ਤੇਨ ਵੁਤ੍ਤਂ ‘‘ਤੇਪਿ ਨਾਮਰੂਪਨ੍ਤੋਗਧਭਾਵਾਭਾਵਵਸੇਨ ਨਿਚ੍ਛਿਤਾ ਏਵਾ’’ਤਿ.

ਸਮ੍ਬਹੁਲਸੁਤ੍ਤਨ੍ਤਸਂਸਨ੍ਦਨਾਕਥਾਵਣ੍ਣਨਾ

੬੭੨. ਸੋਤਿ ਸੋ ਵਿਪਸ੍ਸਨਾਕਮ੍ਮਿਕੋ ਯੋਗਾਵਚਰੋ. ਏਵਨ੍ਤਿ ਵੁਤ੍ਤਪ੍ਪਕਾਰਪਰਾਮਸਨਂ. ਯਾਥਾਵਸਰਸਤੋਤਿ ਯਥਾਭੂਤਸਭਾਵਤੋ. ਨਾਮਰੂਪਂ ਵਵਤ੍ਥਪੇਤ੍ਵਾ ਏਤਮਤ੍ਥਂ ਸਂਸਨ੍ਦੇਤ੍ਵਾ ਵਵਤ੍ਥਪੇਤੀਤਿ ਸਮ੍ਬਨ੍ਧੋ. ਲੋਕਸਮਞ੍ਞਾਯਪਿ ਪਹਾਨਤ੍ਥਾਯ, ਪਗੇਵ ‘‘ਸਤ੍ਤੋ ਜੀਵੋ’’ਤਿ ਪਵਤ੍ਤਨਕਮਿਚ੍ਛਾਭਿਨਿਵੇਸਸ੍ਸਾਤਿ ਅਧਿਪ੍ਪਾਯੋ. ਨਾਮਰੂਪਮਤ੍ਤਤਾਯ ਅਵਿਨਿਚ੍ਛਤਤ੍ਤਾ, ਸਨ੍ਤਾਨਾਦਿਘਨਭੇਦਸ੍ਸ ਚ ਅਕਤਤ੍ਤਾ ਅਭਿਨਿਵੇਸੇਨ ਵਿਨਾ ਸਮੂਹੇਕਤ੍ਤਗ੍ਗਹਣਵਸੇਨ ‘‘ਸਤ੍ਤੋ’’ਤਿ ਪਵਤ੍ਤੋ ਸਮ੍ਮੋਹੋ ਸਤ੍ਤਸਮ੍ਮੋਹੋ. ਤਸ੍ਸ ਵਿਕ੍ਖਮ੍ਭਨਾ ਅਸਮ੍ਮੋਹਭੂਮਿ. ਸਮ੍ਬਹੁਲਸੁਤ੍ਤਨ੍ਤਵਸੇਨਾਤਿ ‘‘ਯਥਾਪੀ’’ਤਿਆਦਿਨਾ ਇਧ ਵੁਤ੍ਤਾਨਂ, ਅਵੁਤ੍ਤਾਨਞ੍ਚ ‘‘ਰੂਪਞ੍ਚ ਹਿਦਂ, ਮਹਾਲਿ, ਅਤ੍ਤਾ ਅਭਵਿਸ੍ਸ, ਨਯਿਦਂ ਰੂਪਂ ਆਬਾਧਾਯ ਸਂਵਤ੍ਤੇਯ੍ਯਾ’’ਤਿ (ਸਂ. ਨਿ. ੩.੫੯; ਮਹਾਵ. ੨੦) ਏਵਮਾਦਿਨਾ ਸਮ੍ਬਹੁਲਾਨਂ ਸੁਤ੍ਤਨ੍ਤਾਨਂ ਵਸੇਨ. ‘‘ਨਾਮਰੂਪਮਤ੍ਤਮੇਵਾ’’ਤਿਆਦਿਨਾ ਵੁਤ੍ਤਮੇਵਤ੍ਥਂ ਸਨ੍ਧਾਯਾਹ ‘‘ਏਤਮਤ੍ਥ’’ਨ੍ਤਿ.

ਅਙ੍ਗਸਮ੍ਭਾਰਾਤਿ ਅਙ੍ਗਸਮ੍ਭਾਰਹੇਤੁ. ਤਨ੍ਨਿਮਿਤ੍ਤਂ ਤਂ ਅਮੁਞ੍ਚਿਤ੍ਵਾ ਸਤਿ ਏਵ ਤਸ੍ਮਿਂ ‘‘ਸਤ੍ਤੋ’’ਤਿ ਵੋਹਾਰੋ.

ਅਗਾਰਨ੍ਤ੍ਵੇਵਾਤਿ ਯਥਾ ਕਟ੍ਠਾਦੀਨਿ ਪਟਿਚ੍ਚ ਉਪਾਦਾਯ ਤੇਸਂ ਨਾਮਂ ਵਿਸ੍ਸਜ੍ਜੇਤ੍ਵਾ ਅਗਾਰਮਿਚ੍ਚੇਵ ਸਙ੍ਖਂ ਸਮਞ੍ਞਂ ਗਚ੍ਛਤਿ, ਏਵਂ ਅਟ੍ਠਿਆਦੀਨਿ ਪਟਿਚ੍ਚ ਉਪਾਦਾਯ ਤੇਸਂ ਨਾਮਂ ਵਿਸ੍ਸਜ੍ਜੇਤ੍ਵਾ ਰੂਪਂ ਸਰੀਰਮਿਚ੍ਚੇਵ ਸਙ੍ਖਂ ਗਚ੍ਛਤੀਤਿ ਯੋਜਨਾ.

ਦੁਕ੍ਖਮੇਵ ਸਮ੍ਭੋਤੀਤਿ ਦੁਕ੍ਖਦੁਕ੍ਖਤਾਦਿਭੇਦਂ ਤਿਵਿਧਂ ਦੁਕ੍ਖਮੇਵ ਸਮ੍ਭਵਤਿ, ਯਥਾਪਚ੍ਚਯਂ ਉਪ੍ਪਜ੍ਜਤਿ, ਤਦੇਵ ਦੁਕ੍ਖਂ ਖਣਟ੍ਠਿਤਿਪਬਨ੍ਧਟ੍ਠਿਤਿਵਸੇਨ ਤਿਟ੍ਠਤਿ ਚੇਵ ਖਣਨਿਰੋਧਆਯੁਕ੍ਖਯਨਿਰੋਧਾਦਿਵਸੇਨ ਨਿਰੁਜ੍ਝਤਿ ਚਾਤਿ ਅਤ੍ਥੋ. ਇਦਾਨਿ ਦੁਕ੍ਖਮੇਵਾਤਿ ਏਵਕਾਰੇਨ ਨਿਵਤ੍ਤਿਤਮਤ੍ਥਂ ਦਸ੍ਸੇਤੁਂ ‘‘ਨਾਞ੍ਞਤ੍ਰਾ’’ਤਿਆਦਿ ਵੁਤ੍ਤਂ. ਤਸ੍ਸਤ੍ਥੋ – ਯਥਾਵੁਤ੍ਤਂ ਦੁਕ੍ਖਂ ਠਪੇਤ੍ਵਾ ਤਤੋ ਅਞ੍ਞਂ ਕਿਞ੍ਚਿ ਧਮ੍ਮਜਾਤਂ ਨ ਸਮ੍ਭਵਤਿ, ਯੋ ‘‘ਸਤ੍ਤੋ’’ਤਿ ਵਾ ‘‘ਜੀਵੋ’’ਤਿ ਵਾ ਵੁਚ੍ਚੇਯ੍ਯ, ਸਬ੍ਬੇਨ ਸਬ੍ਬਂ ਅਭਾਵਾ ਕੁਤੋ ਤਸ੍ਸ ਨਿਰੋਧੋਤਿ.

ਉਪਮਾਹਿਨਾਮਰੂਪਵਿਭਾਵਨਾਕਥਾਵਣ੍ਣਨਾ

੬੭੩. ਏਕੇਨਾਕਾਰੇਨ ਸਣ੍ਠਿਤੇਸੂਤਿ ਯੇਨ ਪਕਾਰੇਨ ਅਕ੍ਖਾਦੀਸੁ ਸਨ੍ਨਿਵਿਟ੍ਠੇਸੁ ਰਥਸਮਞ੍ਞਾ, ਤੇਨ ਏਕੇਨ ਆਕਾਰੇਨ ਸਮਵਟ੍ਠਿਤੇਸੁ ਏਕਜ੍ਝਂ ਰਾਸਿਕਤੇਸੁ. ਏਵਮੇਵਨ੍ਤਿ ਸਨ੍ਨਿਵੇਸਵਿਸਿਟ੍ਠੇ ਅਵਯਵਸਮੁਦਾਯੇ ਸਨ੍ਤਾਨਵਸੇਨ ਪਵਤ੍ਤਮਾਨੇ ਯਥਾ ‘‘ਰਥੋ ਗੇਹਂ ਮੁਟ੍ਠਿ ਵੀਣਾ ਸੇਨਾ ਨਗਰਂ ਰੁਕ੍ਖੋ’’ਤਿ ਵੋਹਾਰਮਤ੍ਤਂ, ਪਰਮਤ੍ਥਤੋ ਪਨ ਰਥਾਦਿ ਨਾਮ ਕਿਞ੍ਚਿ ਨਤ੍ਥਿ, ਏਵਮੇਵਂ. ਉਪਾਦਾਨਕ੍ਖਨ੍ਧੇਸੂਤਿ ਉਪਾਦਾਨਕ੍ਖਨ੍ਧਸਞ੍ਞਿਤੇਸੁ ਰੂਪਾਰੂਪਧਮ੍ਮੇਸੁ ਸਮੁਦਿਤੇਸੁ ਸਨ੍ਤਾਨਵਸੇਨ ਪਵਤ੍ਤਮਾਨੇਸੁ ‘‘ਸਤ੍ਤੋ ਜੀਵੋ’’ਤਿ ਵੋਹਾਰਮਤ੍ਤਂ, ਪਰਮਤ੍ਥਤੋ ਪਨ ਸਤ੍ਤੋ ਵਾ ਜੀਵੋ ਵਾ ਨਤ੍ਥੀਤਿ ਯਾਥਾਵਤੋ ਜਾਨਨਂ. ਇਦਂ ਯਥਾਭੂਤਦਸ੍ਸਨਂ ‘‘ਦਿਟ੍ਠਿਵਿਸੁਦ੍ਧੀ’’ਤਿ ਵੁਚ੍ਚਤਿ.

੬੭੪. ਤਸ੍ਸਾਤਿ ਸਤ੍ਤੋਤਿ ਗਹਿਤਸ੍ਸ ਅਤ੍ਤਨੋ. ਵਿਨਾਸਨ੍ਤਿ ਨਿਰੁਦ੍ਧਸ੍ਸ ਵਿਨਾਸਂ. ਅਵਿਨਾਸਨ੍ਤਿ ਅਵਿਨਸ੍ਸਨਂ, ਨਿਚ੍ਚਤਨ੍ਤਿ ਅਤ੍ਥੋ. ਦ੍ਵਯਵਸੇਨੇਵ ਹਿ ਅਤ੍ਤਵਾਦਿਨੋ ਠਿਤਾ, ਸਸ੍ਸਤੋ ਅਤ੍ਤਾ, ਉਚ੍ਛਿਜ੍ਜਤੀਤਿ ਵਾ, ਏਕਚ੍ਚਸਸ੍ਸਤਵਾਦੋਪਿ ਏਤ੍ਥੇਵ ਸਮਵਰੁਦ੍ਧੋਤਿ. ਅਵਿਨਾਸਂ ਅਨੁਜਾਨਨ੍ਤੋਤਿ ਬੁਦ੍ਧਿਆਦੀਨਂ ਧਮ੍ਮਾਨਂ ਵਿਨਾਸਂ ਇਚ੍ਛਨ੍ਤੋਪਿ ‘‘ਧਮ੍ਮੀ ਨਿਚ੍ਚੋ ਕੂਟਟ੍ਠੋ’’ਤਿ ਅਤ੍ਤਨੋ ਵਿਨਾਸਾਭਾਵਂ ਅਨੁਜਾਨਨ੍ਤੋ. ਸਸ੍ਸਤੇਤਿ ਸਸ੍ਸਤਗਾਹੇ. ਪਤਤਿ ਕਤਵਿਨਾਸਅਕਤਬ੍ਭਾਗਮਾਦਿਦੋਸਪ੍ਪਸਙ੍ਗਤੋਤਿ ਅਧਿਪ੍ਪਾਯੋ. ਖੀਰਨ੍ਵਯਸ੍ਸਾਤਿ ਖੀਰਸ੍ਸ ਅਨ੍ਵਯਭੂਤਸ੍ਸ, ਫਲਭੂਤਸ੍ਸਾਤਿ ਅਤ੍ਥੋ. ਤਦਨ੍ਵਯਸ੍ਸਾਤਿ ਤਸ੍ਸ ਅਤ੍ਤਨੋ ਅਨ੍ਵਯਭੂਤਸ੍ਸ ਅਞ੍ਞਸ੍ਸ ਕਸ੍ਸਚਿ ਅਭਾਵਤੋ. ਓਲੀਯਤਿ ਨਾਮਾਤਿ ‘‘ਸਸ੍ਸਤੋ ਅਤ੍ਤਾ’’ਤਿ ਅਭਿਨਿਵੇਸੇਨ ਭਵਾਭਿਰਤੋ ਹੁਤ੍ਵਾ ਭਵਨਿਰੋਧਤੋ ਸਙ੍ਕੋਚਨਂ ਆਪਜ੍ਜਨ੍ਤੋ ਭਵੇਯੇਵ ਨਿਲੀਯਤਿ ਨਾਮ. ਅਤਿਧਾਵਤਿ ਨਾਮਾਤਿ ਤਤ੍ਥ ਤਤ੍ਥੇਵ ਹਿ ਭਵੇ ਅਤ੍ਤਾ ਉਚ੍ਛਿਜ੍ਜਤੀਤਿ ਉਚ੍ਛੇਦਵਾਦੀ ‘‘ਉਚ੍ਛਿਜ੍ਜਤਿ ਅਤ੍ਤਾ’’ਤਿ ਗਣ੍ਹਨ੍ਤੋ ਪਰਂ ਮਰਣਾ ਸਨ੍ਤਂ ਭਵਂ ‘‘ਨਤ੍ਥੀ’’ਤਿ ਅਤਿਕ੍ਕਮਨ੍ਤੋ ਅਤਿਧਾਵਤਿ ਨਾਮਾਤਿ ਵਦਨ੍ਤਿ. ਕਿਲੇਸਨਿਰੋਧੇ ਪਨ ਕਮ੍ਮਸ੍ਸ ਅਵਿਪਚ੍ਚਨਤੋ ਭਵਨਿਰੋਧੇ ਇਚ੍ਛਿਤਬ੍ਬੇ ਤਥਾ ਅਗ੍ਗਹੇਤ੍ਵਾ ‘‘ਤਂ ਤਂ ਭਵਵਿਸੇਸਂ ਆਗਮ੍ਮ ਅਤ੍ਤਾ ਉਚ੍ਛਿਜ੍ਜਤੀਤਿ ਏਵਂ ਭਵਨਿਰੋਧੋ ਹੋਤੀ’’ਤਿ ਗਣ੍ਹਨ੍ਤੋ ਤਂ ਅਤਿਧਾਵਤਿ ਨਾਮ.

ਪਰਿਯੁਟ੍ਠਿਤਾਤਿ ਅਭਿਭੂਤਾ. ਚਕ੍ਖੁਮਨ੍ਤੋਤਿ ਯਥਾਭੂਤਦਸ੍ਸਨਸਙ੍ਖਾਤੇਨ ਞਾਣਚਕ੍ਖੁਨਾ ਚਕ੍ਖੁਮਨ੍ਤੋ.

ਕਾਮਭਵਾਦਿਭੇਦੋ ਭਵੋ ਆਰਮਿਤਬ੍ਬਟ੍ਠੇਨ ਆਰਾਮੋ ਏਤੇਸਨ੍ਤਿ ਭਵਾਰਾਮਾ. ਤਸ੍ਮਿਂ ਭਵੇ ਰਤਾ ਅਭਿਰਤਾਤਿ ਭਵਰਤਾ. ਭਵੇ ਸਮ੍ਮੋਦਂ ਆਪਨ੍ਨਾਤਿ ਭਵਸਮ੍ਮੁਦਿਤਾ. ਤੀਹਿਪਿ ਪਦੇਹਿ ਭਵਸ੍ਸਾਦਗਧਿਤਤਾਵ ਵੁਤ੍ਤਾ. ਚਿਤ੍ਤਂ ਨ ਪਕ੍ਖਨ੍ਦਤੀਤਿ ਭਵਸ੍ਸਾਦਗਧਿਤਤ੍ਤਾ ਏਵ ਭਵਨਿਰੋਧਾਵਹੇ ਧਮ੍ਮੇ ਚਿਤ੍ਤਂ ਨ ਅਨੁਪ੍ਪਵਿਸਤਿ. ਨਪ੍ਪਸੀਦਤੀਤਿ ਨ ਓਕਪ੍ਪਤਿ. ਨ ਸਨ੍ਤਿਟ੍ਠਤੀਤਿ ਨ ਪਤਿਟ੍ਠਹਤਿ. ਨਾਧਿਮੁਚ੍ਚਤੀਤਿ ਨ ਅਧਿਮੁਚ੍ਚਤਿ.

ਅਟ੍ਟੀਯਮਾਨਾਤਿ ਦੁਕ੍ਖਾਪਿਯਮਾਨਾ. ਹਰਾਯਮਾਨਾਤਿ ਲਜ੍ਜਮਾਨਾ. ਜਿਗੁਚ੍ਛਮਾਨਾਤਿ ਹੀਲ਼ੇਨ੍ਤਾ. ਵਿਭਵਨ੍ਤਿ ਉਚ੍ਛੇਦਂ. ਅਭਿਨਨ੍ਦਨ੍ਤੀਤਿ ਵੁਤ੍ਤਅਭਿਨਨ੍ਦਨਾਕਾਰਦਸ੍ਸਨਂ ‘‘ਯਤੋ ਕਿਰ ਭੋ’’ਤਿਆਦਿ.

ਭੂਤਨ੍ਤਿ ਖਨ੍ਧਪਞ੍ਚਕਂ. ਤਞ੍ਹਿ ਯਥਾਸਕਂ ਪਚ੍ਚਯੇਹਿ ਜਾਤਤ੍ਤਾ, ਪਰਮਤ੍ਥਤੋ ਵਿਜ੍ਜਮਾਨਤ੍ਤਾ ਚ ਭੂਤਨ੍ਤਿ ਵੁਚ੍ਚਤਿ. ਭੂਤਤੋਤਿ ਯਥਾਭੂਤਸਭਾਵਤੋ, ਸਲਕ੍ਖਣਤੋ, ਸਾਮਞ੍ਞਲਕ੍ਖਣਤੋ ਚ.

੬੭੫. ਏਵਂ ਸਤ੍ਤਗਾਹਤੋ ਅਵਲੀਯਨਾਤਿਧਾਵਨਦੋਸੇ, ਯਥਾਭੂਤਦਸ੍ਸਨਤੋ ਨਿਬ੍ਬਿਦਾਦਿਗੁਣੇ ਚ ਸੁਤ੍ਤਵਸੇਨੇਵ ਦਸ੍ਸੇਤ੍ਵਾ ਇਦਾਨਿ ਨਾਮਰੂਪਮਤ੍ਤੇਪਿ ਗਮਨਾਦਿਅਤ੍ਤਕਿਚ੍ਚਸਿਦ੍ਧਿਂ ਦਸ੍ਸੇਤੁਂ ‘‘ਤਸ੍ਮਾ’’ਤਿਆਦਿ ਵੁਤ੍ਤਂ. ਤਤ੍ਥ ਤਸ੍ਮਾਤਿ ਯਸ੍ਮਾ ‘‘ਅਸ੍ਮੀ’’ਤਿ ਵਾ ‘‘ਅਹ’’ਨ੍ਤਿ ਵਾ ਗਾਹਸ੍ਸ ਵਤ੍ਥੁਭੂਤੋ ਸਤ੍ਤੋ ਨਾਮ ਨਤ੍ਥਿ, ਪਰਮਤ੍ਥਤੋ ਨਾਮਰੂਪਮਤ੍ਤਮੇਵ, ਤਸ੍ਮਾ. ਸਚੇ ਕੋਚਿ ਅਤ੍ਤਾ ਨਾਮ ਨਤ੍ਥਿ, ਕਥਮਿਧ ਨਾਮਰੂਪਮਤ੍ਤੇ ਗਮਨਾਦਿਅਤ੍ਤਕਿਚ੍ਚਸਿਦ੍ਧੀਤਿ ਚੋਦਨਂ ਸਨ੍ਧਾਯਾਹ ‘‘ਦਾਰੁਯਨ੍ਤ’’ਨ੍ਤਿਆਦਿ. ‘‘ਖਾਯਤੀ’’ਤਿ ਏਤੇਨ ਯਥਾ ਨਿਜ੍ਜੀਵੇ ਦਾਰੁਮਯਯਨ੍ਤੇ ਅਬ੍ਭਨ੍ਤਰੇ ਵਤ੍ਤਮਾਨਸ੍ਸ ਜੀਵਸ੍ਸ ਵਸੇਨ ਸਈਹਸ੍ਸ ਸਬ੍ਯਾਪਾਰਸ੍ਸ ਵਿਯ ਉਪਟ੍ਠਾਨਮਤ੍ਤਂ ਪਚ੍ਚਯਵਿਸੇਸਤੋ, ਏਵਂ ਨਿਜ੍ਜੀਵੇ ਨਾਮਰੂਪਮਤ੍ਤੇ ਪਚ੍ਚਯਵਿਸੇਸਤੋ ਗਮਨਾਦਿਅਤ੍ਤਕਿਚ੍ਚਸਿਦ੍ਧੀਤਿ ਸਈਹਸ੍ਸ ਸਬ੍ਯਾਪਾਰਸ੍ਸ ਵਿਯ ਉਪਟ੍ਠਾਨਨ੍ਤਿ ਦਸ੍ਸੇਤਿ.

ਸਚ੍ਚਤੋਤਿ ਭੂਤਤੋ, ਪਰਮਤ੍ਥਤੋਤਿ ਅਤ੍ਥੋ. ਸੁਞ੍ਞਂ ਜੀਵੇਨ ਯਨ੍ਤਮਿਵ ਅਭਿਸਙ੍ਖਤਂ ਪਚ੍ਚਯਵਸੇਨ ਪਵਤ੍ਤੀਤਿ ਅਧਿਪ੍ਪਾਯੋ. ਦੁਕ੍ਖਸ੍ਸ ਪੁਞ੍ਜੋ ਨਿਚ੍ਚਾਤੁਰਤਾਯ ਤਿਣਕਟ੍ਠਸਦਿਸੋ ਅਤ੍ਤਸੁਞ੍ਞਤਾਯਾਤਿ ਅਤ੍ਥੋ. ਏਤਂ ਨਾਮਰੂਪਂ.

ਯਮਕਨ੍ਤਿ ਯੁਗਲ਼ਕਂ. ਸੋ ਚ ਖੋ ਯਮਕਭਾਵੋ ਅਞ੍ਞਮਞ੍ਞਸਨ੍ਨਿਸ੍ਸਿਤਭਾਵੇਨਾਤਿ ਆਹ ‘‘ਉਭੋ ਅਞ੍ਞੋਞ੍ਞਨਿਸ੍ਸਿਤਾ’’ਤਿ. ਤਤੋ ਏਵ ਚ ਏਕਸ੍ਮਿਂ ਭਿਜ੍ਜਮਾਨਸ੍ਮਿਂ ਉਭੋ ਭਿਜ੍ਜਨ੍ਤਿ. ਨ ਹਿ ਕਦਾਚਿ ਪਞ੍ਚਵੋਕਾਰਭਵੇ ਰੂਪੇ ਨਿਰੁਜ੍ਝਨ੍ਤੇ ਅਰੂਪਂ ਅਨਿਰੁਜ੍ਝਨ੍ਤਂ, ਅਰੂਪੇ ਵਾ ਨਿਰੁਜ੍ਝਨ੍ਤੇ ਰੂਪਂ ਅਨਿਰੁਜ੍ਝਨ੍ਤਂ ਅਤ੍ਥਿ. ਸ੍ਵਾਯਂ ਭਙ੍ਗੋ ਪਚ੍ਚਯਾ ਪਚ੍ਚਯਨਿਰੋਧੇਨੇਵ, ਨਾਮਰੂਪਨਿਰੋਧੋਤਿ ਅਤ੍ਥੋ. ਪਚ੍ਚਯਾਤਿ ਵਾ ਪਚ੍ਚਯਭੂਤਾ, ਅਞ੍ਞਮਞ੍ਞਸ੍ਸ ਪਚ੍ਚਯਾ ਹੋਨ੍ਤਾਪਿ ਉਭੋ ਭਿਜ੍ਜਨ੍ਤਿਯੇਵਾਤਿ ਅਤ੍ਥੋ.

੬੭੬. ਦਣ੍ਡਾਭਿਹਤਨ੍ਤਿ ਵਿਸੇਸਨੇਨ ਦਣ੍ਡਂ, ਦਣ੍ਡਾਭਿਘਾਤਸ੍ਸ ਪਚ੍ਚਯਂ ਪੁਰਿਸਵਾਯਾਮਞ੍ਚ ਦਸ੍ਸੇਤਿ, ਭੇਰਿਯਾ ਪਨ ਵਿਸੇਸਿਤਬ੍ਬਤਾ ਸਦ੍ਦਸ੍ਸ ਅਸਾਧਾਰਣਕਾਰਣਤਾਯ. ਤੇਨੇਵ ਹਿ ‘‘ਅਞ੍ਞਾ ਭੇਰੀ’’ਤਿ ਭੇਰੀਯੇਵ ਗਹਿਤਾ, ਨ ਦਣ੍ਡਾਦਯੋ. ਅਦਿਸ੍ਸਮਾਨਰੂਪਤਾਯ ਸਦ੍ਦਂ ਨਾਮਟ੍ਠਾਨਿਯਂ ਕਤ੍ਵਾ ‘‘ਏਵਮੇਵ’’ਨ੍ਤਿਆਦਿਨਾ ਉਪਮਾਸਂਸਨ੍ਦਨਂ ਕਰੋਤਿ.

ਨ ਚਕ੍ਖੁਤੋ ਜਾਯਰੇਤਿ ਨ ਚਕ੍ਖਾਯਤਨਤੋ ਨਿਗ੍ਗਚ੍ਛਨਵਸੇਨ ਜਾਯਨ੍ਤਿ. ਨ ਹਿ ਚਕ੍ਖਾਯਤਨਸ੍ਸ ਪਚ੍ਚਯਭਾਵੂਪਗਮਨਤੋ ਪੁਬ੍ਬੇ ਫਸ੍ਸਪਞ੍ਚਮਕਾ ਲਬ੍ਭਨ੍ਤਿ, ਨ ਚ ਪਦੇਸਵਨ੍ਤੋ, ਯੇਨ ਤੇ ਤਤੋ ਨਿਗ੍ਗਚ੍ਛੇਯ੍ਯੁਂ. ਤੇਨੇਵਾਹ ‘‘ਪੁਞ੍ਜੋ ਨਤ੍ਥਿ ਅਨਾਗਤੇ’’ਤਿ (ਮਹਾਨਿ. ੧੦). ਨ ਰੂਪਤੋਤਿ ਏਤ੍ਥਾਪਿ ਏਸੇਵ ਨਯੋ. ‘‘ਨੋ ਚ ਉਭਿਨ੍ਨਮਨ੍ਤਰਾ’’ਤਿ ਇਦਂ ਪਨ ਤੇਸਂ ਅਰੂਪਧਮ੍ਮਤ੍ਤਾ ਅਪ੍ਪਦੇਸਤਾਯ ਵੁਤ੍ਤਂ. ਕੇਵਲਂ ਪਨ ਯਸ੍ਮਿਂ ਖਣੇ ਪਚ੍ਚਯਸਮਵਾਯੋ, ਤਦਾ ਉਪ੍ਪਜ੍ਜਨਮਤ੍ਤਮੇਵਾਤਿ ਆਹ ‘‘ਹੇਤੁਂ ਪਟਿਚ੍ਚ ਪਭਵਨ੍ਤਿ ਸਙ੍ਖਤਾ’’ਤਿ, ਚਕ੍ਖੁਰੂਪਾਲੋਕਮਨਸਿਕਾਰਾਦਿਭੇਦਂ ਧਮ੍ਮਜਾਤਂ ਨਿਸ੍ਸਾਯ ਪਚ੍ਚਯਭੂਤਂ ਕਾਰਣਂ ਲਭਿਤ੍ਵਾ ਤੇਹਿ ਸਮੇਚ੍ਚ ਸਮ੍ਭੂਯ ਕਤਤ੍ਤਾ ਸਙ੍ਖਤਾ ਫਸ੍ਸਾਦਯੋ ਧਮ੍ਮਾ ਉਪ੍ਪਜ੍ਜਨ੍ਤੀਤਿ ਅਤ੍ਥੋ. ਤਸ੍ਸਾ ਪਨ ਧਮ੍ਮਾਨਂ ਉਪ੍ਪਤ੍ਤਿਯਾ ਪਾਕਟਂ ਰੂਪਧਮ੍ਮਪਵਤ੍ਤਿਂ ਦਸ੍ਸੇਨ੍ਤੋ ‘‘ਯਥਾਪਿ ਸਦ੍ਦੋ ਪਹਟਾਯ ਭੇਰਿਯਾ’’ਤਿ ਆਹ. ਫਸ੍ਸਪਞ੍ਚਮਗ੍ਗਹਣਞ੍ਚੇਤ੍ਥ ਪਾਕਟਅਰੂਪਧਮ੍ਮਾਨਂ ਦਸ੍ਸਨਂ. ਸੇਸਗਾਥਾਸੁਪਿ ਏਸੇਵ ਨਯੋ.

ਵਤ੍ਥੁਰੂਪਾਤਿ ਹਦਯਵਤ੍ਥੁਤੋ. ਤਨ੍ਨਿਸ੍ਸਯਾਨਂ ਅਰੂਪਧਮ੍ਮਾਨਂ ਬਹੁਭੇਦਤ੍ਤਾ ਸਾਮਞ੍ਞਵੋਹਾਰੇਨ ਤੇ ਦਸ੍ਸੇਤੁਂ ‘‘ਸਙ੍ਖਤਾ’’ਤਿ ਵੁਤ੍ਤਂ.

੬੭੭. ਨਿਤ੍ਤੇਜਨ੍ਤਿ ਤੇਜਹੀਨਂ ਆਨੁਭਾਵਰਹਿਤਂ. ਯਥਾ ਪਨ ਤਂ ਨਿਤ੍ਤੇਜਂ, ਤਂ ਦਸ੍ਸੇਤੁਂ ‘‘ਨ ਖਾਦਤੀ’’ਤਿਆਦਿ ਵੁਤ੍ਤਂ. ਨ ਹਿ ਅਞ੍ਞਥਾ ਸਦ੍ਦਹਨੁਸ੍ਸਹਨਾਦੀਸੁ ਨਾਮਂ ‘‘ਨਿਤ੍ਤੇਜ’’ਨ੍ਤਿ ਸਕ੍ਕਾ ਵਤ੍ਤੁਂ, ਨਾਪਿ ਰੂਪਂ ਸਨ੍ਧਾਰਣਾਬਨ੍ਧਨਾਦੀਸੁ. ਤੇਨੇਵ ਹਿ ‘‘ਰੂਪਂ ਨਿਤ੍ਤੇਜ’’ਨ੍ਤਿ ਵਤ੍ਵਾ ‘‘ਨ ਹਿ ਤਸ੍ਸ ਖਾਦਿਤੁਕਾਮਤਾ’’ਤਿਆਦਿ ਵੁਤ੍ਤਂ. ‘‘ਅਥ ਖੋ’’ਤਿਆਦਿਨਾ ਬ੍ਯਤਿਰੇਕਵਸੇਨਾਪਿ ਨਾਮਰੂਪਾਨਂ ਨਿਤ੍ਤੇਜਤਂਯੇਵ ਵਿਭਾਵੇਤਿ. ਅਞ੍ਞਮਞ੍ਞਸਨ੍ਨਿਸ੍ਸਯੇਨ ਹਿ ਨਾਮਰੂਪਸ੍ਸ ਅਤ੍ਤਕਿਚ੍ਚਸਿਦ੍ਧਿਪਿ ਪਚ੍ਚੇਕਂ ਅਸਮਤ੍ਥਤਾਵਿਭਾਵਨਮੇਵ. ਤਥਾ ਹਿ ਨਾਮਰੂਪਸ੍ਸ ਅਤ੍ਤਸੁਞ੍ਞਤਾ, ਨਿਰੀਹਤਾ, ਬ੍ਯਾਪਾਰਵਿਰਹਤਾ ਚ ਸੁਟ੍ਠੁਤਰਂ ਪਾਕਟਾ ਹੋਨ੍ਤਿ.

ਕਥਂ ਪਨ ਪਚ੍ਚੇਕਂ ਅਸਮਤ੍ਥਾਨਂ ਸਮੁਦਿਤਭਾਵੇ ਸਮਤ੍ਥਤਾ ਹੋਤਿ? ਅਸਾਮਗ੍ਗਿਯਂ ਅਹੇਤੂਨਂ ਸਾਮਗ੍ਗਿਯਮ੍ਪਿ ਅਹੇਤੁਭਾਵਾਪਤ੍ਤਿਤੋ. ਨ ਹਿ ਪਚ੍ਚੇਕਂ ਦਟ੍ਠੁਂ ਅਸਕ੍ਕੋਨ੍ਤਾਨਂ ਅਨ੍ਧਾਨਂ ਸਤਮ੍ਪਿ ਸਹਸ੍ਸਮ੍ਪਿ ਸਮੁਦਿਤਂ ਦਟ੍ਠੁਂ ਸਕ੍ਕੋਤੀਤਿ ਚੋਦਨਂ ਸਨ੍ਧਾਯਾਹ ‘‘ਇਮਸ੍ਸ ਪਨਤ੍ਥਸ੍ਸਾ’’ਤਿਆਦਿ. ਇਮਂ ਉਪਮਂ ਉਦਾਹਰਨ੍ਤਿ ਅਟ੍ਠਕਥਾਚਰਿਯਾ ਉਪਮਾਯਪਿ ਅਸਿਦ੍ਧਸ੍ਸ ਅਤ੍ਥਸ੍ਸ ਸਾਧੇਤਬ੍ਬਤੋ. ਤੇਨੇਵਾਹ ‘‘ਉਪਮਂ ਤੇ ਕਰਿਸ੍ਸਾਮਿ, ਉਪਮਾਯਪਿਧੇਕਚ੍ਚੇ ਵਿਞ੍ਞੂ ਪੁਰਿਸਾ ਭਾਸਿਤਸ੍ਸ ਅਤ੍ਥਂ ਜਾਨਨ੍ਤੀ’’ਤਿ (ਸਂ. ਨਿ. ੨.੬੭). ਤੁਟ੍ਠਹਟ੍ਠੋਤਿ ਯਦਿਪਾਹਂ ਚਕ੍ਖੁਕਰਣੀਯਂ ਕਾਤੁਂ ਨ ਸਕ੍ਕੋਮਿ, ਪਾਦਕਰਣੀਯਂ ਪਨ ਕਾਤੁਂ ਸਕ੍ਕੋਮਿ, ਤ੍ਵਞ੍ਚ ਚਕ੍ਖੁਕਰਣੀਯਂ, ਤਸ੍ਮਾ ਅਮ੍ਹਾਕਂ ਉਭਿਨ੍ਨਂ ਸਹਿਤਾਨਞ੍ਚ ਵਸੇਨ ਇਚ੍ਛਿਤਦੇਸਸਮ੍ਪਤ੍ਤਿ ਸਿਜ੍ਝਤੀਤਿ ਤੁਟ੍ਠਹਟ੍ਠੋ ਜਚ੍ਚਨ੍ਧੋ. ਤਤ੍ਥ ਜਚ੍ਚਨ੍ਧੋਤਿਆਦਿ ਉਪਮੋਪਮੇਯ੍ਯਸਂਸਨ੍ਦਨਂ. ਧਮ੍ਮਾਨਂ ਅਤ੍ਤਲਾਭੋ ਪਰਪਟਿਬਦ੍ਧੋਤਿ ਵਤ੍ਤਬ੍ਬਮੇਵ ਨਤ੍ਥਿ ਤਤੋ ਪੁਬ੍ਬੇ ਅਵਿਜ੍ਜਮਾਨਤ੍ਤਾ, ਪਟਿਲਦ੍ਧਤ੍ਤਲਾਭਸ੍ਸਾਪਿ ਪਰਪਟਿਬਦ੍ਧਮੇਵ ਅਤ੍ਥਕਿਚ੍ਚਨ੍ਤਿ ਦਸ੍ਸੇਤੁਂ ‘‘ਨ ਸਕੇਨ ਤੇਜੇਨ ਉਪ੍ਪਜ੍ਜਤਿ, ਨ ਤਾਸੁ ਤਾਸੁ ਕਿਰਿਯਾਸੁ ਪਵਤ੍ਤਤੀ’’ਤਿ ਵੁਤ੍ਤਂ. ਤੇਸਂ ਨਾਮਰੂਪਾਨਂ ਅਞ੍ਞਮਞ੍ਞਂ ਨਿਸ੍ਸਾਯ ਉਪ੍ਪਤ੍ਤਿ ਵਾ ਪਵਤ੍ਤਿ ਵਾ ਨ ਚ ਨ ਹੋਤੀਤਿ ਜਚ੍ਚਨ੍ਧਪੀਠਸਪ੍ਪਿਉਪਮਾਯ ਸਾਧਿਤਮਤ੍ਥਂ ਨਿਗਮੇਨ੍ਤੋ ‘‘ਅਸਾਮਗ੍ਗਿਯਂ ਅਹੇਤੂਨਂ ਸਾਮਗ੍ਗਿਯਮ੍ਪਿ ਅਹੇਤੁਕਭਾਵਾਪਤ੍ਤਿਤੋ’’ਤਿ ਯਥਾਵੁਤ੍ਤਸ੍ਸ ਹੇਤੁਨੋ ਅਨੇਕਨ੍ਤਿਕਭਾਵਂ ਵਿਭਾਵੇਤਿ.

ਪਰਧਮ੍ਮਵਸਾਨੁਵਤ੍ਤਿਨੋਤਿ ਪਰੇਸਂ ਅਤ੍ਤਤੋ ਅਞ੍ਞੇਸਂ ਹੇਤੁਪਚ੍ਚਯਸਙ੍ਖਾਤਾਨਂ ਧਮ੍ਮਾਨਂ ਵਸੇਨ ਅਨੁਵਤ੍ਤਨਸੀਲਾ. ਅਤ੍ਤਦੁਬ੍ਬਲਾਤਿ ਅਤ੍ਤਨਾ ਦੁਬ੍ਬਲਾ ਅਸਮਤ੍ਥਾ. ਪਰਪਚ੍ਚਯਤੋਤਿ ਪਰੇਸਂ ਧਮ੍ਮਾਨਂ ਪਚ੍ਚਯਭਾਵਤੋ. ਏਤੇਨ ਜਨਕਪਚ੍ਚਯਂ ਵਦਤਿ. ਤੇਨੇਵਾਹ ‘‘ਜਾਯਰੇ’’ਤਿ. ਪਰਆਰਮ੍ਮਣਤੋਤਿ ਪਰੇਸਂ ਧਮ੍ਮਾਨਂ ਆਰਮ੍ਮਣਭਾਵਤੋ. ਏਤੇਨ ਉਪਤ੍ਥਮ੍ਭਕਪਚ੍ਚਯਂ ਵਦਤਿ. ਪਚ੍ਚਯਗ੍ਗਹਣਂ ਵਾ ਰੂਪਾਪੇਕ੍ਖਂ, ਆਰਮ੍ਮਣਗ੍ਗਹਣਂ ਨਾਮਾਪੇਕ੍ਖਂ. ‘‘ਪਰਧਮ੍ਮੇਹੀ’’ਤਿ ਇਦਂ ਆਰਮ੍ਮਣਪਚ੍ਚਯਾਨਂ ਵਿਸੇਸਨਂ. ਪੁਰਿਮਤ੍ਥੇਨ ਹਿ ਵੁਤ੍ਤਮੇਵਤ੍ਥਂ ਪਚ੍ਛਿਮਤ੍ਥੇਨ ਪਾਕਟਂ ਕਰੋਤਿ. ਪਭਾਵਿਤਾਤਿ ਉਪ੍ਪਾਦਿਤਾ.

ਨਾਵਾਯਨ੍ਤਿਕੂਪਮਾਯਪਿ ਨਾਮਰੂਪਾਨਂ ਅਵਸਵਤ੍ਤਿਤਂ ਵਿਭਾਵੇਤੁਂ ‘‘ਯਥਾਪੀ’’ਤਿਆਦਿਨਾ ਤਿਸ੍ਸੋ ਗਾਥਾ ਵੁਤ੍ਤਾ. ਨਿਸ੍ਸਾਯਾਤਿ ਪਤਿਟ੍ਠਾਯ. ਯਨ੍ਤੀਤਿ ਗਚ੍ਛਨ੍ਤਿ. ਮਨੁਸ੍ਸੇ ਨਿਸ੍ਸਾਯਾਤਿ ਨੇਤੁਭੂਤੇ ਨਿਯਾਮਕਕਮ੍ਮਕਾਰਕਾਦਿਮਨੁਸ੍ਸੇ ਅਪਸ੍ਸਾਯ. ਨ ਹਿ ਤੇਸਂ ਅਰਣਗ੍ਗਹਣਲਙ੍ਕਾਰਸਣ੍ਠਾਪਨਉਦਕੁਸ੍ਸਿਞ੍ਚਨਾਦਿਕਿਰਿਯਾਯ ਵਿਨਾ ਨਾਵਾ ਇਚ੍ਛਿਤਦੇਸਂ ਪਾਪੁਣਾਤਿ. ਉਭੋਤਿ ਅਞ੍ਞਮਞ੍ਞਂ ਨਾਵਂ ਨਿਸ੍ਸਾਯ ਮਨੁਸ੍ਸਾ, ਮਨੁਸ੍ਸੇ ਨਿਸ੍ਸਾਯ ਨਾਵਾਤਿ ਅਤ੍ਥੋ.

ਏਵਨ੍ਤਿ ਵੁਤ੍ਤਪ੍ਪਕਾਰੇਨ. ਨਾਨਾਨਯੇਹੀਤਿ ਪਠਮਾਦੀਨਂ ਸਤ੍ਤਨ੍ਨਂ ਝਾਨਾਨਂ, ਤੇਸਂ ਉਪਚਾਰਾਨਞ੍ਚ ਵਸੇਨ ਚੁਦ੍ਦਸ ਅਰੂਪਪਰਿਗ੍ਗਹਮੁਖਾਨਿ, ਚਤੁਧਾਤੁਵਵਤ੍ਥਾਨੇ ਵੁਤ੍ਤਾਨਂ ਤੇਰਸਨ੍ਨਂ ਧਾਤੁਪਰਿਗ੍ਗਹਮੁਖਾਨਂ ਧਾਤਾਯਤਨਖਨ੍ਧਮਹਾਭੂਤਵਸੇਨ, ਇਧ ਵੁਤ੍ਤਾਨਂ ਅਵੁਤ੍ਤਾਨਞ੍ਚ ਇਨ੍ਦ੍ਰਿਯਸਚ੍ਚਪਟਿਚ੍ਚਸਮੁਪ੍ਪਨ੍ਨਾਨਂ ਵਸੇਨ ਸਮਵੀਸਤਿ ਰੂਪਪਰਿਗ੍ਗਹਮੁਖਾਨਿ, ਤਾਨਿ ਪਚ੍ਚੇਕਂ ‘‘ਫਸ੍ਸੋ ਵੇਦਨਾ ਚਿਤ੍ਤ’’ਨ੍ਤਿ ਇਮੇਸਂ ਸਮ੍ਮੁਖਭਾਵੇਨ ਉਪਟ੍ਠਿਤਾਨਂ ਤਿਣ੍ਣਂ ਅਰੂਪਧਮ੍ਮਾਨਂ ਵਸੇਨ ਤਿਗੁਣਿਤਾਨਿ ਸਮਸਟ੍ਠਿ, ਚੁਦ੍ਦਸ ਅਰੂਪਪਰਿਗ੍ਗਹਮੁਖਾਨਿ, ਤਾਨਿ ਚਾਤਿ ਚਤੁਸਤ੍ਤਤਿਯਾ ਨਾਮਰੂਪਪਰਿਗ੍ਗਹਨਯੇਹਿ ਚੇਵ ਸਮ੍ਬਹੁਲਸੁਤ੍ਤਨ੍ਤਰਥਗੇਹਮੁਟ੍ਠਿਵੀਣਾਸੇਨਾਰੁਕ੍ਖਦਾਰੁਯਨ੍ਤਨਲ਼ਕਲਾਪਿਭੇਰਿਜਚ੍ਚਨ੍ਧਪਙ੍ਗੁਲ਼ਨਾਵਾਮਨੁਸ੍ਸੂਪਮਾਹਿ ਚ ਨਾਮਰੂਪਪਮਤ੍ਤਤਾਵਵਤ੍ਥਾਪਨਨਯੇਹਿ ਚ. ਸਤ੍ਤਸਞ੍ਞਂ ਅਭਿਭਵਿਤ੍ਵਾਤਿ ਅਨਾਦਿਕਾਲਭਾਵਿਤਂ ਖਨ੍ਧਪਞ੍ਚਕੇ ਅਤ੍ਤਗਾਹਂ ਵਿਕ੍ਖਮ੍ਭੇਤ੍ਵਾ. ਨਾਮਰੂਪਾਨਂ ਯਾਥਾਵਦਸ੍ਸਨਨ੍ਤਿ ‘‘ਇਦਂ ਨਾਮਂ, ਏਤ੍ਤਕਂ ਨਾਮਂ, ਨ ਇਤੋ ਭਿਯ੍ਯੋ. ਇਦਂ ਰੂਪਂ, ਏਤ੍ਤਕਂ ਰੂਪਂ, ਨ ਇਤੋ ਭਿਯ੍ਯੋ’’ਤਿ ਚ ਤੇਸਂ ਲਕ੍ਖਣਸਲ੍ਲਕ੍ਖਣਮੁਖੇਨ ਧਮ੍ਮਮਤ੍ਤਭਾਵਦਸ੍ਸਨਂ. ਅਤ੍ਤਦਿਟ੍ਠਿਮਲਵਿਸੋਧਨਤੋ ਦਿਟ੍ਠਿਵਿਸੁਦ੍ਧੀਤਿ ਵੇਦਿਤਬ੍ਬਂ. ਏਤਸ੍ਸੇਵਾਤਿ ਨਾਮਰੂਪਸ੍ਸ ਯਾਥਾਵਦਸ੍ਸਨਸ੍ਸੇਵ.

ਦਿਟ੍ਠਿਵਿਸੁਦ੍ਧਿਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

ਇਤਿ ਅਟ੍ਠਾਰਸਮਪਰਿਚ੍ਛੇਦਵਣ੍ਣਨਾ.