੧੧. ਸਮਾਧਿਨਿਦ੍ਦੇਸਵਣ੍ਣਨਾ
ਆਹਾਰੇਪਟਿਕ੍ਕੂਲਭਾਵਨਾਵਣ੍ਣਨਾ
੨੯੪. ਉਦ੍ਦੇਸੋ ਨਾਮ ਨਿਦ੍ਦੇਸਤ੍ਥੋ ਮੁਦੁਮਜ੍ਝਿਮਪਞ੍ਞਾਬਾਹੁਲ੍ਲਤੋ, ਆਗਤੋ ਚ ਭਾਰੋ ਅਵਸ੍ਸਂ ਵਹਿਤਬ੍ਬੋਤਿ ਆਹ ‘‘ਏਕਾ ਸਞ੍ਞਾਤਿ ਏਵਂ ਉਦ੍ਦਿਟ੍ਠਾਯ ਆਹਾਰੇ ਪਟਿਕ੍ਕੂਲਸਞ੍ਞਾਯ ਭਾਵਨਾਨਿਦ੍ਦੇਸੋ ਅਨੁਪ੍ਪਤ੍ਤੋ’’ਤਿ. ਤਤ੍ਥਾਯਂ ਸਞ੍ਞਾ-ਸਦ੍ਦੋ ‘‘ਰੂਪਸਞ੍ਞਾ ਸਦ੍ਦਸਞ੍ਞਾ’’ਤਿਆਦੀਸੁ (ਮਹਾਨਿ. ੧੪) ਸਞ੍ਜਾਨਨਲਕ੍ਖਣੇ ਧਮ੍ਮੇ ਆਗਤੋ, ‘‘ਅਨਿਚ੍ਚਸਞ੍ਞਾ ਦੁਕ੍ਖਸਞ੍ਞਾ’’ਤਿਆਦੀਸੁ ਵਿਪਸ੍ਸਨਾਯਂ ਆਗਤੋ, ‘‘ਉਦ੍ਧੁਮਾਤਕਸਞ੍ਞਾਤਿ ਵਾ ਸੋਪਾਕਰੂਪਸਞ੍ਞਾਤਿ ਵਾ ਇਮੇ ਧਮ੍ਮਾ ਏਕਤ੍ਥਾ ਉਦਾਹੁ ਨਾਨਤ੍ਥਾ’’ਤਿਆਦੀਸੁ ਸਮਥੇ ਆਗਤੋ. ਇਧ ਪਨ ਸਮਥਸ੍ਸ ਪਰਿਕਮ੍ਮੇ ਦਟ੍ਠਬ੍ਬੋ. ਆਹਾਰੇ ਹਿ ਪਟਿਕ੍ਕੂਲਾਕਾਰਗ੍ਗਹਣਂ, ਤਪ੍ਪਭਾਵਿਤਂ ਵਾ ਉਪਚਾਰਜ੍ਝਾਨਂ ਇਧ ‘‘ਆਹਾਰੇ ਪਟਿਕ੍ਕੂਲਸਞ੍ਞਾ’’ਤਿ ਅਧਿਪ੍ਪੇਤਂ. ਤਤ੍ਥ ਯਸ੍ਮਿਂ ਆਹਾਰੇ ਪਟਿਕ੍ਕੂਲਸਞ੍ਞਾ ਭਾਵੇਤਬ੍ਬਾ, ਤਤ੍ਥ ਨਿਬ੍ਬੇਦਵਿਰਾਗੁਪ੍ਪਾਦਨਾਯ ਤਪ੍ਪਸਙ੍ਗੇਨ ਸਬ੍ਬਮ੍ਪਿ ਆਹਾਰਂ ਕਿਚ੍ਚਪ੍ਪਭੇਦਾਦੀਨਵੋਪਮ੍ਮੇਹਿ ਵਿਭਾਵੇਤੁਂ ‘‘ਆਹਰਤੀਤਿ ਆਹਾਰੋ’’ਤਿਆਦਿ ਆਰਦ੍ਧਂ.
ਤਤ੍ਥ ਆਹਰਤੀਤਿ ਆਹਾਰਪਚ੍ਚਯਸਙ੍ਖਾਤੇਨ ਉਪ੍ਪਤ੍ਤਿਯਾ, ਠਿਤਿਯਾ ਵਾ ਪਚ੍ਚਯਭਾਵੇਨ ਅਤ੍ਤਨੋ ਫਲਂ ਆਨੇਤਿ ਨਿਬ੍ਬਤ੍ਤੇਤਿ ਪਵਤ੍ਤੇਤਿ ਚਾਤਿ ਅਤ੍ਥੋ. ਕਬਲ਼ਂ ਕਰੀਯਤੀਤਿ ਕਬਲ਼ੀਕਾਰੋ, ਵਤ੍ਥੁਵਸੇਨ ਚੇਤਂ ਵੁਤ੍ਤਂ, ਲਕ੍ਖਣਤੋ ਪਨ ਓਜਾਲਕ੍ਖਣੋ ਵੇਦਿਤਬ੍ਬੋ, ਕਬਲ਼ੀਕਾਰੋ ਚ ਸੋ ਯਥਾਵੁਤ੍ਤੇਨਤ੍ਥੇਨ ਆਹਾਰੋ ਚਾਤਿ ਕਬਲ਼ੀਕਾਰਾਹਾਰੋ. ਏਸ ਨਯੋ ਸੇਸੇਸੁਪਿ. ਫੁਸਤੀਤਿ ਫਸ੍ਸੋ. ਅਯਂ ਹਿ ਅਰੂਪਧਮ੍ਮੋਪਿ ਸਮਾਨੋ ਆਰਮ੍ਮਣੇ ਫੁਸਨਾਕਾਰੇਨੇਵ ਪਵਤ੍ਤਤਿ. ਤਥਾ ਹਿ ਸੋ ਫੁਸਨਲਕ੍ਖਣੋਤਿ ਵੁਚ੍ਚਤਿ. ਚੇਤਯਤੀਤਿ ਚੇਤਨਾ, ਅਤ੍ਤਨੋ ਸਮ੍ਪਯੁਤ੍ਤਧਮ੍ਮੇਹਿ ਸਦ੍ਧਿਂ ਆਰਮ੍ਮਣੇ ਅਭਿਸਨ੍ਦਹਤੀਤਿ ਅਤ੍ਥੋ, ਮਨੋਸਨ੍ਨਿਸ੍ਸਿਤਾ ਚੇਤਨਾ ਮਨੋਸਞ੍ਚੇਤਨਾ. ਉਪਪਤ੍ਤਿਪਰਿਕਪ੍ਪਨਵਸੇਨ ਵਿਜਾਨਾਤੀਤਿ ਵਿਞ੍ਞਾਣਂ. ਏਵਮੇਤ੍ਥ ਸਾਮਞ੍ਞਤ੍ਥਤੋ, ਵਿਸੇਸਤ੍ਥਤੋ ਚ ਆਹਾਰਾ ਵੇਦਿਤਬ੍ਬਾ. ਕਸ੍ਮਾ ਪਨੇਤੇ ਚਤ੍ਤਾਰੋਵ ਵੁਤ੍ਤਾ, ਅਞ੍ਞੇ ਧਮ੍ਮਾ ਕਿਂ ਅਤ੍ਤਨੋ ਫਲਸ੍ਸ ਪਚ੍ਚਯਾ ਨ ਹੋਨ੍ਤੀਤਿ? ਨੋ ਨ ਹੋਨ੍ਤਿ, ਇਮੇ ਪਨ ਤਥਾ ਚ ਹੋਨ੍ਤਿ ਅਞ੍ਞਥਾ ਚਾਤਿ ਸਮਾਨੇਪਿ ਪਚ੍ਚਯਭਾਵੇ ਅਤਿਰੇਕਪਚ੍ਚਯਾ ਹੋਨ੍ਤਿ, ਤਸ੍ਮਾ ਆਹਾਰਾਤਿ ਵੁਚ੍ਚਨ੍ਤਿ.
ਕਥਂ? ਏਤੇਸੁ ਹਿ ਪਠਮੋ ਸਯਂ ਯਸ੍ਮਿਂ ਕਲਾਪੇ ਤਪ੍ਪਰਿਯਾਪਨ੍ਨਾਨਂ ਯਥਾਰਹਂ ਪਚ੍ਚਯੋ ਹੋਨ੍ਤੋਵ ਓਜਟ੍ਠਮਕਂ ਰੂਪਂ ਆਹਰਤਿ, ਦੁਤਿਯੋ ਤਿਸ੍ਸੋ ਵੇਦਨਾ ਆਹਰਤਿ, ਤਤਿਯੋ ਤੀਸੁ ਭਵੇਸੁ ਪਟਿਸਨ੍ਧਿਂ ਆਹਰਤਿ, ਚਤੁਤ੍ਥੋ ਪਟਿਸਨ੍ਧਿਕ੍ਖਣੇ ਨਾਮਰੂਪਂ ਆਹਰਤਿ. ਤੇਨਾਹ ‘‘ਕਬਲ਼ੀਕਾਰਾਹਾਰੋ’’ਤਿਆਦਿ. ਏਤ੍ਥ ਚ ਕਮ੍ਮਜਾਦਿਭੇਦਭਿਨ੍ਨਾ ਓਜਾ ਸਤਿ ਪਚ੍ਚਯਲਾਭੇ ਦ੍ਵੇ ਤਿਸ੍ਸੋ ਪਵੇਣਿਯੋ ਘਟੇਨ੍ਤੀ ਓਜਟ੍ਠਮਕਰੂਪਂ ਆਹਰਤਿ, ਸੁਖਵੇਦਨੀਯਾਦਿਭੇਦਭਿਨ੍ਨੋ ਫਸ੍ਸਾਹਾਰੋ ਯਥਾਰਹਂ ਤਿਸ੍ਸੋ ਵੇਦਨਾ ਆਹਰਤਿ, ਪੁਞ੍ਞਾਭਿਸਙ੍ਖਾਰਾਦਿਭੇਦਭਿਨ੍ਨੋ ਮਨੋਸਞ੍ਚੇਤਨਾਹਾਰੋ ਕਾਮਭਵਾਦੀਸੁ ਤੀਸੁ ਭਵੇਸੁ ਯਥਾਰਹਂ ਸਵਿਞ੍ਞਾਣਂ, ਅਵਿਞ੍ਞਾਣਞ੍ਚ ਪਟਿਸਨ੍ਧਿਂ ਆਹਰਤਿ, ਵਿਞ੍ਞਾਣਾਹਾਰੋ ਯਥਾਪਚ੍ਚਯਂ ਪਟਿਸਨ੍ਧਿਕ੍ਖਣੇ ਨਾਮਂ ਰੂਪਂ, ਨਾਮਰੂਪਞ੍ਚ ਆਹਰਤੀਤਿ ਦਟ੍ਠਬ੍ਬਂ. ਅਥ ਵਾ ਉਪਤ੍ਥਮ੍ਭਕਟ੍ਠੇਨ ਇਮੇ ਏਵ ਧਮ੍ਮਾ ਆਹਾਰਾਤਿ ਵੁਤ੍ਤਾ. ਯਥਾ ਹਿ ਕਬਲ਼ੀਕਾਰਾਹਾਰੋ ਰੂਪਕਾਯਸ੍ਸ ਉਪਤ੍ਥਮ੍ਭਕਟ੍ਠੇਨ ਪਚ੍ਚਯੋ, ਏਵਂ ਅਰੂਪਿਨੋ ਆਹਾਰਾ ਸਮ੍ਪਯੁਤ੍ਤਧਮ੍ਮਾਨਂ. ਤਥਾ ਹਿ ਵੁਤ੍ਤਂ ‘‘ਕਬਲ਼ੀਕਾਰੋ ਆਹਾਰੋ ਇਮਸ੍ਸ ਕਾਯਸ੍ਸ ਆਹਾਰਪਚ੍ਚਯੇਨ ਪਚ੍ਚਯੋ, ਅਰੂਪਿਨੋ ਆਹਾਰਾ ਸਮ੍ਪਯੁਤ੍ਤਕਾਨਂ ਧਮ੍ਮਾਨਂ ਤਂਸਮੁਟ੍ਠਾਨਾਨਞ੍ਚ ਰੂਪਾਨਂ ਆਹਾਰਪਚ੍ਚਯੇਨ ਪਚ੍ਚਯੋ’’ਤਿ (ਪਟ੍ਠਾ. ੧.੧.੧੫). ਅਪਰੋ ਨਯੋ – ਅਜ੍ਝਤ੍ਤਿਕਸਨ੍ਤਤਿਯਾ ਵਿਸੇਸਪਚ੍ਚਯਤ੍ਤਾ ਕਬਲ਼ੀਕਾਰਾਹਾਰੋ, ਫਸ੍ਸਾਦਯੋ ਚ ਤਯੋ ਧਮ੍ਮਾ ਆਹਾਰਾਤਿ ਵੁਤ੍ਤਾ. ਵਿਸੇਸਪਚ੍ਚਯੋ ਹਿ ਕਬਲ਼ੀਕਾਰਾਹਾਰਭਕ੍ਖਾਨਂ ਸਤ੍ਤਾਨਂ ਰੂਪਕਾਯਸ੍ਸ ਕਬਲ਼ੀਕਾਰਾਹਾਰੋ, ਨਾਮਕਾਯੇ ਵੇਦਨਾਯ ਫਸ੍ਸੋ, ਵਿਞ੍ਞਾਣਸ੍ਸ ਮਨੋਸਞ੍ਚੇਤਨਾ, ਨਾਮਰੂਪਸ੍ਸ ਵਿਞ੍ਞਾਣਂ. ਯਥਾਹ ‘‘ਸੇਯ੍ਯਥਾਪਿ, ਭਿਕ੍ਖਵੇ, ਅਯਂ ਕਾਯੋ ਆਹਾਰਟ੍ਠਿਤਿਕੋ, ਆਹਾਰਂ ਪਟਿਚ੍ਚ ਤਿਟ੍ਠਤਿ, ਅਨਾਹਾਰੋ ਨੋ ਤਿਟ੍ਠਤਿ (ਸਂ. ਨਿ. ੫.੧੮੩). ਤਥਾ ਫਸ੍ਸਪਚ੍ਚਯਾ ਵੇਦਨਾ, ਸਙ੍ਖਾਰਪਚ੍ਚਯਾ ਵਿਞ੍ਞਾਣਂ, ਵਿਞ੍ਞਾਣਪਚ੍ਚਯਾ ਨਾਮਰੂਪ’’ਨ੍ਤਿ (ਉਦਾ. ੧; ਮਹਾਵ. ੧; ਨੇਤ੍ਤਿ. ੨੪).
ਕਬਲ਼ੀਕਾਰਾਹਾਰੇਤਿ ਕਬਲ਼ੀਕਾਰੇ ਆਹਾਰੇ ਨਿਕਨ੍ਤਿ ਤਣ੍ਹਾ, ਤਂ ਭਯਂ ਅਨਤ੍ਥਾਵਹਤੋ. ਗਧਿਤਸ੍ਸ ਹਿ ਆਹਾਰਪਰਿਭੋਗੋ ਅਨਤ੍ਥਾਯ ਹੋਤਿ. ਹੇਤੁਅਤ੍ਥੇ ਭੁਮ੍ਮਂ. ਏਵਂ ਸੇਸੇਸੁ. ਨਿਕਨ੍ਤੀਤਿ ਨਿਕਾਮਨਾ ਛਨ੍ਦਰਾਗੋ. ਭਾਯਤਿ ਏਤਸ੍ਮਾਤਿ ਭਯਂ, ਨਿਕਨ੍ਤਿ ਏਵ ਭਯਂ ਨਿਕਨ੍ਤਿਭਯਂ. ਕਬਲ਼ੀਕਾਰਾਹਾਰਹੇਤੁ ਇਮੇਸਂ ਸਤ੍ਤਾਨਂ ਛਨ੍ਦਰਾਗੋ ਭਯਂ ਭਯਾਨਕਂ ਦਿਟ੍ਠਧਮ੍ਮਿਕਾਦਿਭੇਦਸ੍ਸ ਅਨਤ੍ਥਸ੍ਸ ਸਕਲਸ੍ਸਾਪਿ ਵਟ੍ਟਦੁਕ੍ਖਸ੍ਸ ਹੇਤੁਭਾਵਤੋ. ਤੇਨੇਵਾਹ ‘‘ਕਬਲ਼ੀਕਾਰੇ ਚੇ, ਭਿਕ੍ਖਵੇ, ਆਹਾਰੇ ਅਤ੍ਥਿ ਰਾਗੋ, ਅਤ੍ਥਿ ਨਨ੍ਦੀ, ਅਤ੍ਥਿ ਤਣ੍ਹਾ, ਪਤਿਟ੍ਠਿਤਂ ਤਤ੍ਥ ਵਿਞ੍ਞਾਣਂ ਵਿਰੁਲ਼੍ਹ’’ਨ੍ਤਿਆਦਿ (ਸਂ. ਨਿ. ੨.੬੪; ਕਥਾ. ੨੯੬; ਮਹਾਨਿ. ੭). ਉਪਗਮਨਂ ਅਪ੍ਪਹੀਨਵਿਪਲ੍ਲਾਸਸ੍ਸ ਆਰਮ੍ਮਣੇਨ ਸਮੋਧਾਨਂ ਸਙ੍ਗਤਿ ਸੁਖਵੇਦਨੀਯਾਦਿਫਸ੍ਸੁਪ੍ਪਤ੍ਤਿ ਭਯਂ ਭਯਾਨਕਂ ਤੀਹਿ ਦੁਕ੍ਖਤਾਹਿ ਅਪਰਿਮੁਚ੍ਚਨਤੋ. ਤੇਨਾਹ ‘‘ਸੁਖਵੇਦਨੀਯਂ, ਭਿਕ੍ਖਵੇ, ਫਸ੍ਸਂ ਪਟਿਚ੍ਚ ਉਪ੍ਪਜ੍ਜਤਿ ਸੁਖਾ ਵੇਦਨਾ (ਸਂ. ਨਿ. ੪.੧੨੯), ਤਸ੍ਸ ਵੇਦਨਾਪਚ੍ਚਯਾ ਤਣ੍ਹਾ…ਪੇ… ਦੁਕ੍ਖਕ੍ਖਨ੍ਧਸ੍ਸ ਸਮੁਦਯੋ ਹੋਤੀ’’ਤਿ (ਉਦਾ. ੧). ਤਤ੍ਥ ਤਤ੍ਥ ਭਵੇ ਉਪਪਜ੍ਜਤਿ ਏਤੇਨਾਤਿ ਉਪਪਤ੍ਤਿ, ਉਪਪਜ੍ਜਨਂ ਵਾ ਉਪਪਤ੍ਤਿ, ਖਿਪਨਂ ਭਯਂ ਭਯਾਨਕਂ ਉਪਪਤ੍ਤਿਮੂਲਕੇਹਿ ਬ੍ਯਸਨੇਹਿ ਅਪਰਿਮੁਤ੍ਤਤੋ. ਤੇਨਾਹ ‘‘ਅਵਿਦ੍ਵਾ, ਭਿਕ੍ਖਵੇ, ਪੁਰਿਸਪੁਗ੍ਗਲੋ ਪੁਞ੍ਞਞ੍ਚੇ ਸਙ੍ਖਾਰਂ ਅਭਿਸਙ੍ਖਰੋਤਿ, ਪੁਞ੍ਞੁਪਗਂ ਭਵਤਿ ਵਿਞ੍ਞਾਣਂ. ਅਪੁਞ੍ਞਞ੍ਚੇ ਸਙ੍ਖਾਰਂ ਅਭਿਸਙ੍ਖਰੋਤਿ, ਅਪੁਞ੍ਞੁਪਗਂ ਭਵਤਿ ਵਿਞ੍ਞਾਣ’’ਨ੍ਤਿਆਦਿ (ਸਂ. ਨਿ. ੨.੫੧). ਪਟਿਸਨ੍ਧੀਤਿ ਭਵਨ੍ਤਰਾਦੀਹਿ ਪਟਿਸਨ੍ਧਾਨਂ, ਤਂ ਭਯਂ ਭਯਾਨਕਂ ਪਟਿਸਨ੍ਧਿਨਿਮਿਤ੍ਤੇਹਿ ਦੁਕ੍ਖੇਹਿ ਅਵਿਮੁਚ੍ਚਨਤੋ. ਤੇਨਾਹ ‘‘ਵਿਞ੍ਞਾਣੇ ਚੇ, ਭਿਕ੍ਖਵੇ, ਆਹਾਰੇ ਅਤ੍ਥਿ ਰਾਗੋ, ਅਤ੍ਥਿ ਨਨ੍ਦੀ, ਅਤ੍ਥਿ ਤਣ੍ਹਾ, ਪਤਿਟ੍ਠਿਤਂ ਤਤ੍ਥ ਵਿਞ੍ਞਾਣਂ ਵਿਰੁਲ਼੍ਹ’’ਨ੍ਤਿਆਦਿ (ਸਂ. ਨਿ. ੨.੬੪).
ਪੁਤ੍ਤਮਂਸੂਪਮੇਨ ਓਵਾਦੇਨ ਦੀਪੇਤਬ੍ਬੋ ਨਿਚ੍ਛਨ੍ਦਰਾਗਪਰਿਭੋਗਾਯ. ਏਵਂ ਹਿ ਤਤ੍ਥ ਨਿਕਨ੍ਤਿਭਯਂ ਨ ਹੋਤਿ. ਨਿਚ੍ਚਮ੍ਮਾ ਗਾਵੀ ਯਂ ਯਂ ਠਾਨਂ ਉਪਗਚ੍ਛਤਿ, ਤਤ੍ਥ ਤਤ੍ਥੇਵ ਨਂ ਪਾਣਿਨੋ ਖਾਦਨ੍ਤਿਯੇਵ. ਏਵਂ ਫਸ੍ਸੇ ਸਤਿ ਵੇਦਨਾ ਉਪ੍ਪਜ੍ਜਤਿ, ਵੇਦਨਾ ਚ ਦੁਕ੍ਖਸਲ੍ਲਾਦਿਤੋ ਦਟ੍ਠਬ੍ਬਾਤਿ ਫਸ੍ਸੇ ਆਦੀਨਵਂ ਪਸ੍ਸਨ੍ਤਸ੍ਸ ਉਪਗਮਨਭਯਂ ਨ ਹੋਤੀਤਿ ਆਹ ‘‘ਫਸ੍ਸਾਹਾਰੋ ਨਿਚ੍ਚਮ੍ਮਗਾਵੂਪਮੇਨ ਦੀਪੇਤਬ੍ਬੋ’’ਤਿ. ਏਕਾਦਸਹਿ ਅਗ੍ਗੀਹਿ ਸਬ੍ਬਸੋ ਆਦਿਤ੍ਤਾ ਭਵਾ ਅਙ੍ਗਾਰਕਾਸੁਸਦਿਸਾਤਿ ਪਸ੍ਸਤੋ ਉਪਪਤ੍ਤਿਭਯਂ ਨ ਹੋਤੀਤਿ ਆਹ ‘‘ਮਨੋਸਞ੍ਚੇਤਨਾਹਾਰੋ ਅਙ੍ਗਾਰਕਾਸੂਪਮੇਨ ਦੀਪੇਤਬ੍ਬੋ’’ਤਿ. ਚੋਰਸਦਿਸਂ ਵਿਞ੍ਞਾਣਂ ਅਨਤ੍ਥਪਾਤਤੋ, ਪਹਾਰਸਦਿਸੀ ਵੇਦਨਾ ਦੁਰਧਿਵਾਸਤੋਤਿ ਸਮ੍ਮਦੇਵ ਪਸ੍ਸਤੋ ਪਟਿਸਨ੍ਧਿਭਯਂ ਨ ਹੋਤੀਤਿ ਆਹ ‘‘ਵਿਞ੍ਞਾਣਾਹਾਰੋ ਸਤ੍ਤਿਸਤੂਪਮੇਨ ਦੀਪੇਤਬ੍ਬੋ’’ਤਿ.
ਏਵਂ ਕਿਚ੍ਚਾਦਿਮੁਖੇਨ ਆਹਾਰੇਸੁ ਆਦੀਨਵਂ ਵਿਭਾਵੇਤ੍ਵਾ ਇਦਾਨਿ ਤਤ੍ਥ ਯਥਾਧਿਪ੍ਪੇਤਂ ਆਹਾਰਂ ਨਿਦ੍ਧਾਰੇਤ੍ਵਾ ਪਟਿਕ੍ਕੂਲਤੋ ਮਨਸਿਕਾਰਵਿਧਿਂ ਦਸ੍ਸੇਤੁਂ ‘‘ਇਮੇਸੁ ਪਨਾ’’ਤਿਆਦਿ ਵੁਤ੍ਤਂ. ਉਪਾਦਾਯਰੂਪਨਿਦ੍ਦੇਸੇਪਿ ‘‘ਕਬਲ਼ੀਕਾਰੋ ਆਹਾਰੋ’’ਤਿ (ਧ. ਸ. ੫੯੫) ਆਗਤਤ੍ਤਾ ਤਤੋ ਵਿਸੇਸੇਨ੍ਤੋ ‘‘ਅਸਿਤਪੀਤਖਾਯਿਤਸਾਯਿਤਪ੍ਪਭੇਦੋ’’ਤਿ ਆਹ, ਭੂਤਕਥਨਂ ਵਾ ਏਤਂ. ਤਤ੍ਥ ਅਸਿਤਪੀਤਖਾਯਿਤਸਾਯਿਤਪ੍ਪਭੇਦੋਤਿ ਅਸਿਤਬ੍ਬਪਾਤਬ੍ਬਖਾਯਿਤਬ੍ਬਸਾਯਿਤਬ੍ਬਵਿਭਾਗੋ ਕਾਲਭੇਦਵਚਨਿਚ੍ਛਾਯ ਅਭਾਵਤੋ ਯਥਾ ‘‘ਦੁਦ੍ਧ’’ਨ੍ਤਿ. ਕਬਲ਼ੀਕਾਰੋ ਆਹਾਰੋ ਵਾਤਿ ਅਵਧਾਰਣਂ ਯਥਾ ਫਸ੍ਸਾਹਾਰਾਦਿਨਿਵਤ੍ਤਨਂ, ਏਵਂ ਓਜਾਹਾਰਨਿਵਤ੍ਤਨਮ੍ਪਿ ਦਟ੍ਠਬ੍ਬਂ. ਸਵਤ੍ਥੁਕੋ ਏਵ ਹਿ ਆਹਾਰੋ ਇਧ ਕਮ੍ਮਟ੍ਠਾਨਭੂਤੋ, ਤੇਨ ਆਹਰੀਯਤੀਤਿ ਆਹਾਰੋਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਆਹਰਤੀਤਿ ਆਹਾਰੋਤਿ ਅਯਂ ਪਨਤ੍ਥੋ ਨਿਬ੍ਬਤ੍ਤਿਤਓਜਾਵਸੇਨ ਵੇਦਿਤਬ੍ਬੋ. ਇਮਸ੍ਮਿਂ ਅਤ੍ਥੇਤਿ ਇਮਸ੍ਮਿਂ ਕਮ੍ਮਟ੍ਠਾਨਸਙ੍ਖਾਤੇ ਅਤ੍ਥੇ. ਉਪ੍ਪਨ੍ਨਾ ਸਞ੍ਞਾਤਿ ਸਞ੍ਞਾਸੀਸੇਨ ਭਾਵਨਂ ਵਦਤਿ. ਤਥਾ ਹਿ ਵਕ੍ਖਤਿ ‘‘ਪਟਿਕ੍ਕੂਲਾਕਾਰਗ੍ਗਹਣਵਸੇਨ ਪਨਾ’’ਤਿਆਦਿ (ਵਿਸੁਦ੍ਧਿ. ੧.੩੦੫).
ਕਮ੍ਮਟ੍ਠਾਨਂ ਉਗ੍ਗਹੇਤ੍ਵਾਤਿ ਕਮ੍ਮਟ੍ਠਾਨਂ ਪਰਿਯਤ੍ਤਿਧਮ੍ਮਤੋ, ਅਤ੍ਥਤੋ ਚ ਸੁਗ੍ਗਹਿਤਂ ਸੁਮਨਸਿਕਤਂ ਸੂਪਧਾਰਿਤਂ ਕਤ੍ਵਾ. ਤੇਨਾਹ ‘‘ਉਗ੍ਗਹਤੋ ਏਕਪਦਮ੍ਪਿ ਅਵਿਰਜ੍ਝਨ੍ਤੇਨਾ’’ਤਿ. ਤਤ੍ਥ ਉਗ੍ਗਹਤੋਤਿ ਆਚਰਿਯੁਗ੍ਗਹਤੋ. ਏਕਪਦਮ੍ਪੀਤਿ ਏਕਮ੍ਪਿ ਪਦਂ, ਏਕਕੋਟ੍ਠਾਸਮ੍ਪਿ ਵਾ, ਪਦੇਸਮਤ੍ਤਮ੍ਪੀਤਿ ਅਤ੍ਥੋ. ਦਸਹਾਕਾਰੇਹੀਤਿ ਕਸ੍ਮਾ ਵੁਤ੍ਤਂ, ਨਨੁ ਅਨ੍ਤਿਮਜੀਵਿਕਾਭਾਵਤੋ, ਪਿਣ੍ਡਪਾਤਸ੍ਸ ਅਲਾਭਲਾਭੇਸੁ ਪਰਿਤਸ੍ਸਨਗੇਧਾਦਿਸਮੁਪ੍ਪਤ੍ਤਿਤੋ, ਭੁਤ੍ਤਸ੍ਸ ਸਮ੍ਮਦਜਨਨਤੋ, ਕਿਮਿਕੁਲਸਂਵਦ੍ਧਨਤੋਤਿ ਏਵਮਾਦੀਹਿਪਿ ਆਕਾਰੇਹਿ ਆਹਾਰੇ ਪਟਿਕ੍ਕੂਲਤਾ ਪਚ੍ਚਵੇਕ੍ਖਿਤਬ੍ਬਾ? ਵੁਤ੍ਤਂ ਹੇਤਂ ‘‘ਅਨ੍ਤਮਿਦਂ, ਭਿਕ੍ਖਵੇ, ਜੀਵਿਕਾਨਂ ਯਦਿਦਂ ਪਿਣ੍ਡੋਲ੍ਯਂ, ਅਭਿਸਾਪੋਯਂ, ਭਿਕ੍ਖਵੇ, ਲੋਕਸ੍ਮਿਂ ‘ਪਿਣ੍ਡੋਲੋ ਵਿਚਰਸਿ ਪਤ੍ਤਪਾਣੀ’’’ਤਿ (ਸਂ. ਨਿ. ੩.੮੦), ‘‘ਅਲਦ੍ਧਾ ਚ ਪਿਣ੍ਡਪਾਤਂ ਪਰਿਤਸ੍ਸਤਿ, ਲਦ੍ਧਾ ਚ ਪਿਣ੍ਡਪਾਤਂ ਗਧਿਤੋ ਮੁਚ੍ਛਿਤੋ ਅਜ੍ਝੋਸਨ੍ਨੋ ਅਨਾਦੀਨਵਦਸ੍ਸਾਵੀ ਅਨਿਸ੍ਸਰਣਪਞ੍ਞੋ ਪਰਿਭੁਞ੍ਜਤੀ’’ਤਿ (ਅ. ਨਿ. ੩.੧੨੪), ‘‘ਭੁਤ੍ਤੋ ਚ ਆਹਾਰੋ ਕਸ੍ਸਚਿ ਕਦਾਚਿ ਮਰਣਂ ਵਾ ਮਰਣਮਤ੍ਤਂ ਵਾ ਦੁਕ੍ਖਂ ਆਵਹਤਿ, ਉਕ੍ਕੋਚਕਾਦਯੋ, ਤਕ੍ਕੋਟਕਾਦਯੋ ਚ ਦ੍ਵਤ੍ਤਿਂਸ ਦ੍ਵਤ੍ਤਿਂਸ ਕੁਲਪ੍ਪਭੇਦਾ ਕਿਮਯੋ ਚ ਨਂ ਉਪਨਿਸ੍ਸਾਯ ਜੀਵਨ੍ਤੀ’’ਤਿ.
ਵੁਚ੍ਚਤੇ – ਅਨ੍ਤਿਮਜੀਵਿਕਾਭਾਵੋ ਤਾਵ ਚਿਤ੍ਤਸਂਕਿਲੇਸਵਿਸੋਧਨਤ੍ਥਂ ਕਮ੍ਮਟ੍ਠਾਨਾਭਿਨਿਵੇਸਤੋ ਪਗੇਵ ਮਨਸਿ ਕਾਤਬ੍ਬੋ ‘‘ਮਾਹਂ ਛਵਾਲਾਤਸਦਿਸੋ ਭਵੇਯ੍ਯ’’ਨ੍ਤਿ. ਤਥਾ ਪਿਣ੍ਡਪਾਤਸ੍ਸ ਅਲਾਭਲਾਭੇਸੁਪਿ ਪਰਿਤਸ੍ਸਨਗੇਧਾਦਿਸਮੁਪ੍ਪਤ੍ਤਿਨਿਵਾਰਣਂ ਪਗੇਵ ਅਨੁਟ੍ਠਾਤਬ੍ਬਂ ਸੁਪਰਿਸੁਦ੍ਧਸੀਲਸ੍ਸ ਪਟਿਸਙ੍ਖਾਨਵਤੋ ਤਦਭਾਵਤੋ. ਭਤ੍ਤਸਮ੍ਮਦੋ ਅਨੇਕਨ੍ਤਿਕੋ, ਪਰਿਭੋਗਨ੍ਤੋਗਧੋ ਵਾ ਵੇਦਿਤਬ੍ਬੋ. ਕਿਮਿਕੁਲਸਂਵਦ੍ਧਨਂ ਪਨ ਨ ਸਙ੍ਗਹੇਤਬ੍ਬਂ, ਸਙ੍ਗਹਿਤਮੇਵ ਵਾ ‘‘ਦਸਹਾਕਾਰੇਹੀ’’ਤਿ ਏਤ੍ਥ ਨਿਯਮਸ੍ਸ ਅਕਤਤ੍ਤਾ. ਇਮਿਨਾ ਵਾ ਨਯੇਨ ਇਤਰੇਸਮ੍ਪੇਤ੍ਥ ਸਙ੍ਗਹੋ ਦਟ੍ਠਬ੍ਬੋ ਯਥਾਸਮ੍ਭਵਮੇਤ੍ਥ ਪਟਿਕ੍ਕੂਲਤਾਪਚ੍ਚਵੇਕ੍ਖਣਸ੍ਸ ਅਧਿਪ੍ਪੇਤਤ੍ਤਾ. ਤਥਾ ਹਿ ਘਰਗੋਲ਼ਿਕਵਚ੍ਚਮੂਸਿਕਜਤੁਕਵਚ੍ਚਾਦਿਕਂ ਸਮ੍ਭਵਨ੍ਤਂ ਗਹਿਤਂ, ਨ ਏਕਨ੍ਤਿਕਨ੍ਤਿ. ਤਥਾ ਪਰਿਯੇਸਨਾਦੀਸੁਪਿ ਯਥਾਸਮ੍ਭਵਂ ਵਤ੍ਤਬ੍ਬਂ.
ਗਮਨਤੋਤਿਆਦੀਸੁ ਪਚ੍ਚਾਗਮਨਮ੍ਪਿ ਗਮਨਸਭਾਗਤ੍ਤਾ ਗਮਨੇਨੇਵ ਸਙ੍ਗਹਿਤਂ. ਪਟਿਕ੍ਕਮਨਸਾਲਾਦਿਉਪਸਙ੍ਕਮਨਂ ਵਿਯ ਪਰਿਯੇਸਨੇ ਸਮਾਨਪਟਿਕ੍ਕੂਲਂ ਹਿ ਅਸੁਚਿਟ੍ਠਾਨਕ੍ਕਮਨਵਿਰੂਪਦੁਗ੍ਗਨ੍ਧਦਸ੍ਸਨਘਾਯਨਾਧਿਵਾਸਨੇਹਿ. ਗਮਨਤੋਤਿ ਭਿਕ੍ਖਾਚਾਰਵਸੇਨ ਗੋਚਰਗਾਮਂ ਉਦ੍ਦਿਸ੍ਸ ਗਮਨਤੋ. ਪਰਿਯੇਸਨਤੋਤਿ ਗੋਚਰਗਾਮੇ ਭਿਕ੍ਖਤ੍ਥਂ ਆਹਿਣ੍ਡਨਤੋ. ਪਰਿਭੋਗਤੋਤਿ ਆਹਾਰਸ੍ਸ ਪਰਿਭੁਞ੍ਜਨਤੋ. ਉਭਯਂ ਉਭਯੇਨ ਆਸਯਤਿ, ਏਕਜ੍ਝਂ ਪਵਤ੍ਤਮਾਨੋਪਿ ਕਮ੍ਮਬਲਵਵਤ੍ਥਿਤੋ ਹੁਤ੍ਵਾ ਮਰਿਯਾਦਵਸੇਨ ਅਞ੍ਞਮਞ੍ਞਂ ਅਸਙ੍ਕਰਤੋ ਸਯਤਿ ਤਿਟ੍ਠਤਿ ਪਵਤ੍ਤਤੀਤਿ ਆਸਯੋ, ਆਮਾਸਯਸ੍ਸ ਉਪਰਿ ਤਿਟ੍ਠਨਕੋ ਪਿਤ੍ਤਾਦਿਕੋ. ਮਰਿਯਾਦਤ੍ਥੋ ਹਿ ਅਯਮਾਕਾਰੋ, ਤਤੋ ਆਸਯਤੋ. ਨਿਦਧਾਤਿ ਯਥਾਭੁਤ੍ਤੋ ਆਹਾਰੋ ਨਿਚਿਤੋ ਹੁਤ੍ਵਾ ਤਿਟ੍ਠਤਿ ਏਤ੍ਥਾਤਿ ਨਿਧਾਨਂ, ਆਮਾਸਯੋ, ਤਤੋ ਨਿਧਾਨਤੋ. ਅਪਰਿਪਕ੍ਕਤੋਤਿ ਗਹਣੀਸਙ੍ਖਾਤੇਨ ਕਮ੍ਮਜਤੇਜੇਨ ਅਪਰਿਪਕ੍ਕਤੋ. ਪਰਿਪਕ੍ਕਤੋਤਿ ਯਥਾਭੁਤ੍ਤਸ੍ਸ ਆਹਾਰਸ੍ਸ ਵਿਪਕ੍ਕਭਾਵਤੋ. ਫਲਤੋਤਿ ਨਿਬ੍ਬਤ੍ਤਿਤੋ. ਨਿਸ੍ਸਨ੍ਦਤੋਤਿ ਇਤੋ ਚਿਤੋ ਚ ਵਿਸ੍ਸਨ੍ਦਨਤੋ. ਸਮ੍ਮਕ੍ਖਨਤੋਤਿ ਸਬ੍ਬਸੋ ਮਕ੍ਖਨਤੋ. ਸਬ੍ਬਤ੍ਥ ਆਹਾਰੇ ਪਟਿਕ੍ਕੂਲਤਾ ਪਚ੍ਚਵੇਕ੍ਖਿਤਬ੍ਬਾਤਿ ਯੋਜਨਾ. ਤਂਤਂਕਿਰਿਯਾਨਿਪ੍ਫਤ੍ਤਿਪਟਿਪਾਟਿਵਸੇਨ ਚਾਯਂ ਗਮਨਤੋਤਿਆਦਿਕਾ ਅਨੁਪੁਬ੍ਬੀ ਠਪਿਤਾ, ਸਮ੍ਮਕ੍ਖਨਂ ਪਨ ਪਰਿਭੋਗਾਦੀਸੁ ਲਬ੍ਭਮਾਨਮ੍ਪਿ ਨਿਸ੍ਸਨ੍ਦਵਸੇਨ ਵਿਸੇਸਤੋ ਪਟਿਕ੍ਕੂਲਨ੍ਤਿ ਸਬ੍ਬਪਚ੍ਛਾ ਠਪਿਤਨ੍ਤਿ ਦਟ੍ਠਬ੍ਬਂ.
੨੯੫. ਏਵਂ ਮਹਾਨੁਭਾਵੇਤਿ ਇਦਾਨਿ ਵਤ੍ਤਬ੍ਬਪਟਿਪਤ੍ਤਿਯਾ ਮਹਾਨੁਭਾਵੇਤਿ ਵਦਨ੍ਤਿ, ਸਬ੍ਬਤ੍ਥਕਕਮ੍ਮਟ੍ਠਾਨਪਰਿਹਰਣਾਦਿਸਿਦ੍ਧਂ ਵਾ ਧਮ੍ਮਸੁਧਮ੍ਮਤਂ ਪੁਰਕ੍ਖਤ੍ਵਾ ਯੋਗਾਵਚਰੇਨ ਏਵਂ ਪਟਿਪਜ੍ਜਿਤਬ੍ਬਨ੍ਤਿ ਦਸ੍ਸੇਨ੍ਤੋ ‘‘ਏਵਂ ਮਹਾਨੁਭਾਵੇ ਨਾਮ ਸਾਸਨੇ’’ਤਿਆਦਿਮਾਹ. ਤਤ੍ਥ ਨਾਮ-ਸਦ੍ਦੋ ਸਮ੍ਭਾਵਨੇ ਦਟ੍ਠਬ੍ਬੋ. ਪਬ੍ਬਜਿਤੇਨ ਗਾਮਾਭਿਮੁਖੇਨ ਗਨ੍ਤਬ੍ਬਨ੍ਤਿ ਯੋਜਨਾ. ਅਯਞ੍ਚ ਗਮਨਾਦਿਤੋ ਪਚ੍ਚਵੇਕ੍ਖਣਾ ਯੋਗਿਨੋ ਨ ਅਤ੍ਤੁਦ੍ਦੇਸਿਕਾਵ, ਅਥ ਖੋ ਅਨੁਦ੍ਦੇਸਿਕਾਪੀਤਿ ਦਸ੍ਸੇਨ੍ਤੋ ‘‘ਸਕਲਰਤ੍ਤਿ’’ਨ੍ਤਿਆਦਿਨਾ ਧੁਰਦ੍ਵਯਂ ਪਰਿਗ੍ਗਹੇਸਿ. ਪਰਿਵੇਣਨ੍ਤਿ ਪਰਿਵੇਣਙ੍ਗਣਂ. ਵੀਸਤਿਂਸਵਾਰੇਤਿ ਏਤ੍ਥ ਸਨ੍ਤਤਿਪਚ੍ਚੁਪ੍ਪਨ੍ਨਵਸੇਨ ਵਾਰਪਰਿਚ੍ਛੇਦੋਤਿ ਕੇਚਿ, ਅਪਰੇ ਪਨ ‘‘ਉਣ੍ਹਾਸਨੇਨਾ’’ਤਿ ਵਦਨ੍ਤਿ. ਨੀਵਰਣਵਿਕ੍ਖਮ੍ਭਨਞ੍ਹਿ ਅਪ੍ਪਤ੍ਤਾ ਭਾਵਨਾ ਫਰਣਪੀਤਿਯਾ ਅਭਾਵਤੋ ਨਿਸਜ੍ਜਾਵਸੇਨ ਕਾਯਕਿਲਮਥਂ ਨ ਵਿਨੋਦਤਿਯੇਵਾਤਿ ਇਰਿਯਾਪਥਚਲਨਂ ਹੋਤਿਯੇਵ. ਵੀਸਤਿਂਸਗ੍ਗਹਣਂ ਪਨ ਯਥਾਸਲ੍ਲਕ੍ਖਿਤਭਿਕ੍ਖਾਚਰਣਵੇਲਾਵਸੇਨ. ਅਥ ਵਾ ਗਮਨਤੋ ਯਾਵ ਸਮ੍ਮਕ੍ਖਨਮਨਸਿਕਾਰੋ ਏਕੋ ਵਾਰੋ, ਏਵਂ ਵੀਸਤਿਂਸਵਾਰੇ ਕਮ੍ਮਟ੍ਠਾਨਂ ਮਨਸਿ ਕਰਿਤ੍ਵਾ. ਨਿਜਨਸਮ੍ਬਾਧਾਨੀਤਿ ਜਨਸਮ੍ਬਾਧਰਹਿਤਾਨਿ, ਤੇਨ ਅਪ੍ਪਾਕਿਣ੍ਣਤਂ, ਅਪ੍ਪਸਦ੍ਦਤਂ, ਅਪ੍ਪਨਿਗ੍ਘੋਸਤਞ੍ਚ ਦਸ੍ਸੇਤਿ. ਤਤੋ ਏਵ ਪਵਿਵੇਕਸੁਖਾਨਿ ਜਨਵਿਵੇਕੇਨ ਇਟ੍ਠਾਨਿ, ਪਵਿਵੇਕਸ੍ਸ ਵਾ ਝਾਨਾਨੁਯੋਗਸ੍ਸ ਉਪਕਾਰਾਨਿ. ਯਸ੍ਮਾ ਛਾਯੂਦਕਸਮ੍ਪਨ੍ਨਾਨਿ, ਤਸ੍ਮਾ ਸੀਤਲਾਨਿ. ਯਸ੍ਮਾ ਸੁਚੀਨਿ, ਤਸ੍ਮਾ ਰਮਣੀਯਭੂਮਿਭਾਗਾਨੀਤਿ ਪੁਰਿਮਾਨਿ ਦ੍ਵੇ ਪਚ੍ਛਿਮਾਨਂ ਦ੍ਵਿਨ੍ਨਂ ਕਾਰਣਵਚਨਾਨਿ. ਅਰਿਯਨ੍ਤਿ ਨਿਦ੍ਦੋਸਂ. ਵਿਵੇਕਰਤਿਨ੍ਤਿ ਝਾਨਾਨੁਯੋਗਰਤਿਂ.
ਕਿਞ੍ਚਾਪਿ ਯੋਗਾਵਚਰਾਨਂ ਵਸਨਟ੍ਠਾਨਂ ਨਾਮ ਸੁਜਗ੍ਗਿਤਂ ਸੁਸਮ੍ਮਟ੍ਠਮੇਵ ਹੋਤਿ, ਕਦਾਚਿ ਪਨ ਜਗ੍ਗਨਤੋ ਪਚ੍ਛਾ ਏਵਮ੍ਪਿ ਸਿਯਾਤਿ ਪਟਿਕ੍ਕੂਲਤਾਪਚ੍ਚਵੇਕ੍ਖਣਾਯ ਸਮ੍ਭਵਦਸ੍ਸਨਤ੍ਥਂ ‘‘ਪਾਦਰਜਘਰਗੋਲਿਕਵਚ੍ਚਾਦਿਸਮ੍ਪਰਿਕਿਣ੍ਣ’’ਨ੍ਤਿਆਦਿ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਤਤ੍ਥ ਪਚ੍ਚਤ੍ਥਰਣਨ੍ਤਿ ਭੂਮਿਯਾ ਛਵਿਰਕ੍ਖਣਤ੍ਥਂ ਅਤ੍ਥਰਿਤਬ੍ਬਂ ਚਿਮਿਲਿਕਾਦਿਅਤ੍ਥਰਣਮਾਹ. ਜਤੁਕਾ ਖੁਦ੍ਦਕਵਗ੍ਗੁਲਿਯੋ. ਉਪਹਤਤ੍ਤਾਤਿ ਦੂਸਿਤਤ੍ਤਾ. ਤਤੋਤਿ ਤਤੋ ਤਤੋ. ਅਪ੍ਪੇਕਦਾ ਉਲੂਕਪਾਰਾਵਤਾਦੀਹੀਤਿ ਇਧਾਪਿ ‘‘ਅਪ੍ਪੇਕਦਾ’’ਤਿ ਪਦਂ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ਉਦਕਚਿਕ੍ਖਲ੍ਲਾਦੀਹੀਤਿ ਆਦਿ-ਸਦ੍ਦੇਨ ਕਚਵਰਾਦਿਂ ਸਙ੍ਗਣ੍ਹਾਤਿ. ਪਰਿਵੇਣਤੋ ਵਿਹਾਰਙ੍ਗਣਪ੍ਪਵੇਸਮਗ੍ਗੋ ਵਿਹਾਰਰਚ੍ਛਾ.
ਵਿਤਕ੍ਕਮਾਲ਼ਕੇਤਿ ‘‘ਕਤ੍ਥ ਨੁ ਖੋ ਅਜ੍ਜ ਭਿਕ੍ਖਾਯ ਚਰਿਤਬ੍ਬ’’ਨ੍ਤਿਆਦਿਨਾ ਵਿਤਕ੍ਕਨਮਾਲ਼ਕੇ. ਗਾਮਮਗ੍ਗਨ੍ਤਿ ਗਾਮਗਾਮਿਮਗ੍ਗਂ. ਖਾਣੁਕਣ੍ਟਕਮਗ੍ਗੋਤਿ ਖਾਣੁਕਣ੍ਟਕਵਨ੍ਤੋ ਮਗ੍ਗੋ. ਦਟ੍ਠਬ੍ਬੋ ਹੋਤੀਤਿ ਦਸ੍ਸਨੇਨ ਗਮਨਂ ਉਪਲਕ੍ਖੇਤਿ.
ਗਣ੍ਡਂ ਪਟਿਚ੍ਛਾਦੇਨ੍ਤੇਨਾਤਿਆਦਿ ਏਵਮਜ੍ਝਾਸਯੇਨ ਨਿਵਾਸਨਾਦਿ ਕਾਤਬ੍ਬਨ੍ਤਿ ਵਤ੍ਤਦਸ੍ਸਨਂ, ਗਣ੍ਡਰੋਗਿਨਾ ਵਾਤਾਤਪਾਦਿਪਰਿਸ੍ਸਯਵਿਨੋਦਨਤ੍ਥਂ ਗਣ੍ਡਂ ਪਟਿਚ੍ਛਾਦਯਮਾਨੇਨ ਵਿਯ. ਅਥ ਵਾ ਗਣ੍ਡਂ ਵਿਯ ਗਣ੍ਡਂ ਪਟਿਚ੍ਛਾਦਯਮਾਨੇਨਾਤਿ ਏਕਂ ਗਣ੍ਡ-ਸਦ੍ਦਂ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ ਭਵਤਿ. ‘‘ਗਣ੍ਡੋਤਿ ਖੋ, ਭਿਕ੍ਖਵੇ, ਪਞ੍ਚਨ੍ਨੇਤਂ ਉਪਾਦਾਨਕ੍ਖਨ੍ਧਾਨਂ ਅਧਿਵਚਨ’’ਨ੍ਤਿ (ਅ. ਨਿ. ੯.੧੫; ਸਂ. ਨਿ. ੪.੧੦੩) ਵਚਨਤੋ ਗਣ੍ਡੋਤਿ ਅਤ੍ਤਭਾਵਸ੍ਸ ਪਰਿਯਾਯੋ, ਵਿਸੇਸਤੋ ਰੂਪਕਾਯਸ੍ਸ ਦੁਕ੍ਖਤਾਸੂਲਯੋਗਤੋ, ਅਸੁਚਿਪਗ੍ਘਰਣਤੋ, ਉਪ੍ਪਾਦਜਰਾਭਙ੍ਗੇਹਿ ਉਦ੍ਧੁਮਾਤਕਪਕ੍ਕਪਭਿਜ੍ਜਨਤੋ. ਵਣਚੋਲ਼ਕਨ੍ਤਿ ਵਣਪਟਿਚ੍ਛਾਦਕਵਤ੍ਥਖਣ੍ਡਂ. ਨੀਹਰਿਤ੍ਵਾਤਿ ਥਵਿਕਤੋ ਉਦ੍ਧਰਿਤ੍ਵਾ. ਕੁਣਪਾਨਿਪੀਤਿ ਪਿ-ਸਦ੍ਦੋ ਗਰਹਾਯਂ ਏਵਰੂਪਾਨਿਪਿ ਦਟ੍ਠਬ੍ਬਾਨਿ ਭਵਨ੍ਤੀਤਿ, ਸਮ੍ਭਵਦਸ੍ਸਨੇ ਵਾ ਇਦਮ੍ਪਿ ਤਤ੍ਥ ਸਮ੍ਭਵਤੀਤਿ. ਅਧਿਵਾਸੇਤਬ੍ਬੋਤਿ ਖਮਿਤਬ੍ਬੋ ਅਞ੍ਞਥਾ ਆਹਾਰਸ੍ਸ ਅਨੁਪਲਬ੍ਭਨਤੋ. ਗਾਮਦ੍ਵਾਰੇਤਿ ਗਾਮਦ੍ਵਾਰਸਮੀਪੇ, ਉਮ੍ਮਾਰਬ੍ਭਨ੍ਤਰੇ ਵਾ. ਗਾਮਰਚ੍ਛਾ ਵਿਨਿਵਿਜ੍ਝਿਤ੍ਵਾ ਠਿਤਾ ਓਲੋਕੇਤਬ੍ਬਾ ਹੋਨ੍ਤਿ ਯੁਗਮਤ੍ਤਦਸ੍ਸਿਨਾਪਿ ਸਤਾਤਿ ਅਧਿਪ੍ਪਾਯੋ.
ਪਚ੍ਚਤ੍ਥਰਣਾਦੀਤਿ ਘਰਗੋਲਿਕਵਚ੍ਚਾਦਿਸਂਕਿਲਿਟ੍ਠਪਚ੍ਚਤ੍ਥਰਣਾਦਿਕਂ. ਅਨੇਕਕੁਣਪਪਰਿਯੋਸਾਨਨ੍ਤਿ ਏਤ੍ਥ ਦੁਨ੍ਨਿਵਤ੍ਥਦੁਪ੍ਪਾਰੁਤਮਨੁਸ੍ਸਸਮਾਕੁਲਾਨਂ ਗਾਮਰਚ੍ਛਾਨਂ ਓਲੋਕਨਮ੍ਪਿ ਆਨੇਤ੍ਵਾ ਵਤ੍ਤਬ੍ਬਂ. ਤਮ੍ਪਿ ਹਿ ਪਟਿਕ੍ਕੂਲਮੇਵਾਤਿ. ਅਹੋ ਵਤਾਤਿ ਗਰਹਨੇ ਨਿਪਾਤੋ. ਭੋਤਿ ਧਮ੍ਮਾਲਪਨਂ. ਯਾਵਞ੍ਚਿਦਂ ਪਟਿਕ੍ਕੂਲੋ ਆਹਾਰੋ ਯਦਤ੍ਥਂ ਗਮਨਮ੍ਪਿ ਨਾਮ ਏਵਂ ਜੇਗੁਚ੍ਛਂ, ਦੁਰਧਿਵਾਸਨਞ੍ਚਾਤਿ ਅਤ੍ਥੋ.
੨੯੬. ਗਮਨਪਟਿਕ੍ਕੂਲਨ੍ਤਿ ਗਮਨਮੇਵ ਪਟਿਕ੍ਕੂਲਂ ਗਮਨਪਟਿਕ੍ਕੂਲਂ. ਅਧਿਵਾਸੇਤ੍ਵਾਪੀਤਿ ਪਿ-ਸਦ੍ਦੋ ਸਮ੍ਪਿਣ੍ਡਨਤ੍ਥੋ, ਤੇਨ ‘‘ਏਤ੍ਤਕੇਨਾਪਿ ਮੁਤ੍ਤਿ ਨਤ੍ਥਿ, ਇਤੋ ਪਰਮ੍ਪਿ ਮਹਨ੍ਤਂ ਪਟਿਕ੍ਕੂਲਂ ਸਕਲਂ ਅਧਿਵਾਸੇਤਬ੍ਬਮੇਵਾ’’ਤਿ ਵਕ੍ਖਮਾਨਂ ਪਟਿਕ੍ਕੂਲਂ ਸਮ੍ਪਿਣ੍ਡੇਤਿ. ਸਙ੍ਘਾਟਿਪਾਰੁਤੇਨਾਤਿ ਸਙ੍ਘਾਟਿਯਾ ਕਪ੍ਪਨਪਾਰੁਪਨੇਨ ਪਾਰੁਤਸਰੀਰੇਨ. ਯਤ੍ਥਾਤਿ ਯਾਸੁ ਵੀਥੀਸੁ. ਯਾਵ ਪਿਣ੍ਡਿਕਮਂਸਾਪੀਤਿ ਯਾਵ ਜਙ੍ਘਪਿਣ੍ਡਿਕਮਂਸਪ੍ਪਦੇਸਾਪਿ. ਉਦਕਚਿਕ੍ਖਲ੍ਲੇਤਿ ਉਦਕਮਿਸ੍ਸੇ ਕਦ੍ਦਮੇ. ਏਕੇਨ ਚੀਵਰਨ੍ਤਿ ਏਕੇਨ ਹਤ੍ਥੇਨ ਨਿਵਤ੍ਥਚੀਵਰਂ. ਮਚ੍ਛਾ ਧੋਵੀਯਨ੍ਤਿ ਏਤੇਨਾਤਿ ਮਚ੍ਛਧੋਵਨਂ, ਉਦਕਂ. ਸਮ੍ਮਿਸ੍ਸ-ਸਦ੍ਦੋ ਪਚ੍ਚੇਕਂ ਸਮ੍ਬਨ੍ਧਿਤਬ੍ਬੋ. ਓਲ਼ਿਗਲ੍ਲਾਨਿ ਉਚ੍ਛਿਟ੍ਠੋਦਕਗਬ੍ਭਮਲਾਦੀਨਂ ਸਕਦ੍ਦਮਾਨਂ ਸਨ੍ਦਨਟ੍ਠਾਨਾਨਿ, ਯਾਨਿ ਜਣ੍ਣੁਮਤ੍ਤਅਸੁਚਿਭਰਿਤਾਨਿਪਿ ਹੋਨ੍ਤਿ. ਚਨ੍ਦਨਿਕਾਨਿ ਕੇਵਲਾਨਂ ਉਚ੍ਛਿਟ੍ਠੋਦਕਗਬ੍ਭਮਲਾਦੀਨਂ ਸਨ੍ਦਨਟ੍ਠਾਨਾਨਿ. ਯਤੋਤਿ ਓਲ਼ਿਗਲ੍ਲਾਦਿਤੋ. ਤਾ ਮਕ੍ਖਿਕਾਤਿ ਤਤ੍ਥ ਸਣ੍ਡਸਣ੍ਡਚਾਰਿਨੋ ਨੀਲਮਕ੍ਖਿਕਾ. ਨਿਲੀਯਨ੍ਤੀਤਿ ਅਚ੍ਛਨ੍ਤਿ.
ਦਦਮਾਨਾਪੀਤਿਆਦਿ ਸਤਿਪਿ ਕੇਸਞ੍ਚਿ ਸਦ੍ਧਾਨਂ ਵਸੇਨ ਸਕ੍ਕਚ੍ਚਕਾਰੇ ਪਟਿਕ੍ਕੂਲਪਚ੍ਚਵੇਕ੍ਖਣਾਯੋਗ੍ਯਂ ਪਨ ਅਸਦ੍ਧਾਨਂ ਵਸੇਨ ਪਵਤ੍ਤਨਕਅਸਕ੍ਕਚ੍ਚਕਾਰਮੇਵ ਦਸ੍ਸੇਤੁਂ ਆਰਦ੍ਧਂ. ਤੁਣ੍ਹੀ ਹੋਨ੍ਤਿ ਸਯਮੇਵ ਰਿਞ੍ਚਿਤ੍ਵਾ ਗਚ੍ਛਿਸ੍ਸਤੀਤਿ. ਗਚ੍ਛਾਤਿ ਅਪੇਹਿ. ਰੇਤਿ ਅਮ੍ਭੋ. ਮੁਣ੍ਡਕਾਤਿ ਅਨਾਦਰਾਲਪਨਂ. ਸਮੁਦਾਚਰਨ੍ਤੀਤਿ ਕਥੇਨ੍ਤਿ. ਪਿਣ੍ਡੋਲ੍ਯਸ੍ਸ ਅਨ੍ਤਿਮਜੀਵਿਕਾਭਾਵੇਨਾਹ ‘‘ਕਪਣਮਨੁਸ੍ਸੇਨ ਵਿਯ ਗਾਮੇ ਪਿਣ੍ਡਾਯ ਚਰਿਤ੍ਵਾ ਨਿਕ੍ਖਮਿਤਬ੍ਬ’’ਨ੍ਤਿ.
੨੯੭. ਤਤ੍ਥਾਤਿ ਤਸ੍ਮਿਂ ਪਤ੍ਤਗਤੇ ਆਹਾਰੇ. ਲਜ੍ਜਿਤਬ੍ਬਂ ਹੋਤਿ ‘‘ਉਚ੍ਛਿਟ੍ਠਂ ਨੁ ਖੋ ਅਯਂ ਮਯ੍ਹਂ ਦਾਤੁਕਾਮੋ’’ਤਿ ਆਸਙ੍ਕੇਯ੍ਯਾਤਿ, ਸੇਦੋ ਪਗ੍ਘਰਮਾਨੋ ਆਹਾਰਸ੍ਸ ਵਾ ਉਣ੍ਹਤਾਯ, ਭਿਕ੍ਖੁਨੋ ਵਾ ਸਪਰਿਲ਼ਾਹਤਾਯਾਤਿ ਅਧਿਪ੍ਪਾਯੋ. ਸੁਕ੍ਖਥਦ੍ਧਭਤ੍ਤਮ੍ਪੀਤਿ ਸੁਕ੍ਖਤਾਯ ਥਦ੍ਧਮ੍ਪਿ ਭਤ੍ਤਂ, ਪਗੇਵ ਤਕ੍ਕਕਞ੍ਜਿਕਾਦਿਨਾ ਉਪਸਿਤ੍ਤਨ੍ਤਿ ਅਧਿਪ੍ਪਾਯੋ. ਤੇਨ ਸੇਦੇਨ ਕਿਲਿਨ੍ਨਤਾਯ ਪਟਿਕ੍ਕੂਲਤਂ ਵਦਤਿ.
ਤਸ੍ਮਿਨ੍ਤਿ ਪਿਣ੍ਡਪਾਤੇ. ਸਮ੍ਭਿਨ੍ਨਸੋਭੇਤਿ ਸਬ੍ਬਸੋ ਵਿਨਟ੍ਠਸੋਭੇ. ਵੇਮਜ੍ਝਤੋ ਪਟ੍ਠਾਯਾਤਿ ਜਿਵ੍ਹਾਯ ਮਜ੍ਝਤੋ ਪਟ੍ਠਾਯ. ਦਨ੍ਤਗੂਥਕੋ ਦਨ੍ਤਮਲਂ. ਵਿਚੁਣ੍ਣਿਤਮਕ੍ਖਿਤੋਤਿ ਉਭਯੇਹਿ ਦਨ੍ਤੇਹਿ ਵਿਚੁਣ੍ਣਿਤੋ ਖੇਲ਼ਾਦੀਹਿ ਸਮੁਪਲਿਤ੍ਤੋ. ਏਵਂਭੂਤਸ੍ਸ ਚਸ੍ਸ ਯਾਯਂ ਪੁਬ੍ਬੇ ਵਣ੍ਣਸਮ੍ਪਦਾ, ਗਨ੍ਧਸਮ੍ਪਦਾ, ਅਭਿਸਙ੍ਖਾਰਸਮ੍ਪਦਾ ਚ, ਸਾ ਏਕਂਸੇਨ ਵਿਨਸ੍ਸਤਿ, ਰਸੋ ਪਨ ਨਸ੍ਸੇਯ੍ਯ ਵਾ ਨ ਵਾਤਿ ਆਹ ‘‘ਅਨ੍ਤਰਹਿਤਵਣ੍ਣਗਨ੍ਧਸਙ੍ਖਾਰਵਿਸੇਸੋ’’ਤਿ. ਸੁਵਾਨਦੋਣਿਯਨ੍ਤਿ ਸਾਰਮੇਯ੍ਯਾਨਂ ਭੁਞ੍ਜਨਕਅਮ੍ਬਣੇ. ਸੁਵਾਨਵਮਥੁ ਵਿਯਾਤਿ ਵਨ੍ਤਸੁਨਖਛਡ੍ਡਨਂ ਵਿਯ. ਚਕ੍ਖੁਸ੍ਸ ਆਪਾਥਂ ਅਤੀਤਤ੍ਤਾ ਅਜ੍ਝੋਹਰਿਤਬ੍ਬੋ ਹੋਤੀਤਿ ਉਕ੍ਕਂਸਗਤਂ ਤਸ੍ਸ ਪਟਿਕ੍ਕੂਲਭਾਵਂ ਵਿਭਾਵੇਤਿ.
੨੯੮. ਪਰਿਭੋਗਨ੍ਤਿ ਅਜ੍ਝੋਹਰਣਂ. ਏਸ ਆਹਾਰੋ ਅਨ੍ਤੋ ਪਵਿਸਮਾਨੋ ਬਹਲਮਧੁਕਤੇਲਮਕ੍ਖਿਤੋ ਵਿਯ ਪਰਮਜੇਗੁਚ੍ਛੋ ਹੋਤੀਤਿ ਸਮ੍ਬਨ੍ਧੋ. ਅਨ੍ਤੋਤਿ ਕੋਟ੍ਠਸ੍ਸ ਅਬ੍ਭਨ੍ਤਰੇ. ਨਿਧਾਨਮਨੁਪਗਤੋ ਆਮਾਸਯਂ ਅਪ੍ਪਤ੍ਤੋਯੇਵ ਆਹਾਰੋ ਪਿਤ੍ਤਾਦੀਹਿ ਵਿਮਿਸ੍ਸਿਤੋ ਹੋਤੀਤਿ ਆਹ ‘‘ਪਵਿਸਮਾਨੋ’’ਤਿ. ਆਮਾਸਯਪਕ੍ਕਾਸਯਵਿਨਿਮੁਤ੍ਤੋ ਕੋਯਮਾਸਯੋ ਨਾਮਾਤਿ ਆਸਙ੍ਕਂ ਸਨ੍ਧਾਯਾਹ ‘‘ਯਸ੍ਮਾ’’ਤਿਆਦਿ. ਪਿਤ੍ਤਮੇਵਾਸਯੋ ਪਿਤ੍ਤਾਸਯੋ. ਅਧਿਕੋ ਹੋਤੀਤਿ ਵੁਤ੍ਤਂ ਮਨ੍ਦਪੁਞ੍ਞਬਾਹੁਲ੍ਲਤੋ ਲੋਕਸ੍ਸ. ਏਵਂ ਆਸਯਤੋਤਿ ਜੇਗੁਚ੍ਛੋ ਹੁਤ੍ਵਾ ਅਨ੍ਤੋ ਪਵਿਟ੍ਠੋ ਜੇਗੁਚ੍ਛਤਰੇਹਿ ਪਿਤ੍ਤਾਦੀਹਿ ਵਿਮਿਸ੍ਸਿਤੋ ਅਤਿਵਿਯ ਜੇਗੁਚ੍ਛੋ ਹੋਤੀਤਿ ਏਵਂ ਆਸਯਤੋ ਪਟਿਕ੍ਕੂਲਤਾ ਪਚ੍ਚਵੇਕ੍ਖਿਤਬ੍ਬਾ.
੨੯੯. ਨਿਧਾਨਤੋਤਿ ਏਤ੍ਥਾਪਿ ਏਸੇਵ ਨਯੋ. ਸੋਤਿ ਆਹਾਰੋ. ਦਸਵਸ੍ਸਿਕੇਨਾਤਿ ਜਾਤਿਯਾ ਦਸਵਸ੍ਸੇਨ ਸਤ੍ਤੇਨ. ਓਕਾਸੇਤਿ ਆਮਾਸਯਸਙ੍ਖਾਤੇ ਪਦੇਸੇ.
੩੦੦. ਏਵਰੂਪੇਤਿ ਏਦਿਸੇ, ਦਸਵਸ੍ਸਾਨਿ ਯਾਵ ਵਸ੍ਸਸਤਂ ਅਧੋਤਵਚ੍ਚਕੂਪਸਦਿਸੇਤਿ ਅਤ੍ਥੋ. ਨਿਧਾਨਨ੍ਤਿ ਨਿਧਾਤਬ੍ਬਤਂ. ਯਥਾਵੁਤ੍ਤਪ੍ਪਕਾਰੇਤਿ ਸਚੇ ਪਨ ‘‘ਦਸਵਸ੍ਸਿਕੇਨਾ’’ਤਿਆਦਿਨਾ (ਵਿਸੁਦ੍ਧਿ. ੧.੨੯੯) ਯਥਾਵੁਤ੍ਤੋ ਪਕਾਰੋ ਏਤਸ੍ਸਾਤਿ ਯਥਾਵੁਤ੍ਤਪ੍ਪਕਾਰੋ, ਤਸ੍ਮਿਂ. ਪਰਮਨ੍ਧਕਾਰਤਿਮਿਸੇਤਿ ਅਤਿਵਿਯ ਅਨ੍ਧਕਰਣਮਹਾਤਮਸਿ. ਅਤਿਦੁਗ੍ਗਨ੍ਧਜੇਗੁਚ੍ਛੇ ਪਦੇਸੇ ਪਰਮਜੇਗੁਚ੍ਛਭਾਵਂ ਉਪਗਨ੍ਤ੍ਵਾ ਤਿਟ੍ਠਤੀਤਿ ਸਮ੍ਬਨ੍ਧੋ. ਕਤ੍ਥ ਕਿਂ ਵਿਯਾਤਿ ਆਹ ‘‘ਯਥਾ ਨਾਮਾ’’ਤਿਆਦਿ. ਕਾਲਮੇਘੇਨ ਅਭਿਵੁਟ੍ਠੇ ਆਵਾਟੇ ਬਹੁਸੋ ਵਸ੍ਸਨੇਨ ਏਕਚ੍ਚਂ ਅਸੁਚਿਜਾਤਂ ਉਪ੍ਪਿਲਵਿਤ੍ਵਾ ਵਿਗਚ੍ਛੇਯ੍ਯਾਤਿ ਅਕਾਲਮੇਘ-ਗ੍ਗਹਣਂ. ਤਿਣਪਣ੍ਣਕਿਲਞ੍ਜਖਣ੍ਡ-ਗ੍ਗਹਣਂ ਨ ਅਸੁਭਸ੍ਸਾਪਿ ਅਸੁਭੇਨ ਸਮ੍ਮਿਸ੍ਸਤਾਯ ਅਸੁਭਭਾਵਪ੍ਪਤ੍ਤਿਦਸ੍ਸਨਤ੍ਥਂ. ਕਾਯਗ੍ਗਿਸਨ੍ਤਾਪਕੁਥਿਤਕੁਥਨਸਞ੍ਜਾਤਫੇਣਪੁਬ੍ਬੁਲ਼ਕਾਚਿਤੋਤਿ ਗਹਣਿਤੇਜੇਨ ਪਕ੍ਕੁਥਿਤਨਿਪ੍ਪਕ੍ਕਤਾਯ ਸਮੁਪ੍ਪਨ੍ਨਫੇਣਪੁਬ੍ਬੁਲ਼ਨਿਚਿਤੋ. ਅਪਰਿਪਕ੍ਕਤੋਤਿ ਅਪਰਿਪਕ੍ਕਭਾਵਤੋ.
੩੦੧. ਸੁਵਣ੍ਣਰਜਤਾਦਿਧਾਤੁਯੋ ਵਿਯਾਤਿ ਯਥਾ ਸੁਵਣ੍ਣਰਜਤਾਦਿਧਾਤੁਯੋ ਵਿਧਿਨਾ ਤਾਪਿਯਮਾਨਾ ਸੁਵਣ੍ਣਰਜਤਾਦਿਕੇ ਮੁਞ੍ਚਨ੍ਤਿਯੋ ਸੁਵਣ੍ਣਰਜਤਾਦਿਭਾਵਂ ਉਪਗਚ੍ਛਨ੍ਤੀਤਿ ਵੁਚ੍ਚਨ੍ਤਿ, ਨ ਏਵਮਯਂ. ਅਯਂ ਪਨ ਆਹਾਰੋ ਕਾਯਗ੍ਗਿਨਾ ਪਰਿਪਕ੍ਕੋ ਫੇਣਪੁਬ੍ਬੁਲ਼ਕੇ ਮੁਞ੍ਚਨ੍ਤੋ ਸਣ੍ਹਂ ਕਰੋਨ੍ਤਿ ਏਤ੍ਥਾਤਿ ‘‘ਸਣ੍ਹਕਰਣੀ’’ਤਿ ਲਦ੍ਧਨਾਮਕੇ ਨਿਸਦੇ ਪਿਸਿਤ੍ਵਾ ਨਾਲ਼ਿਕੇ ਖੁਦ੍ਦਕਵੇਲ਼ੁਨਾਲ਼ਿਕਾਯਂ ਵਣ੍ਣਸਣ੍ਠਾਨਮਤ੍ਤੇਨ ਪਕ੍ਖਿਪ੍ਪਮਾਨਪਣ੍ਡੁਮਤ੍ਤਿਕਾ ਵਿਯ ਕਰੀਸਭਾਵਂ ਉਪਗਨ੍ਤ੍ਵਾ ਪਕ੍ਕਾਸਯਂ ਪੂਰੇਤਿ, ਮੁਤ੍ਤਭਾਵਂ ਉਪਗਨ੍ਤ੍ਵਾ ਮੁਤ੍ਤਵਤ੍ਥਿਂ ਪੂਰੇਤੀਤਿ ਯੋਜਨਾ. ਗਹਣਿਯਾ ਇਨ੍ਧਨਭਾਗੋ ਵਿਯ ਕਿਮਿਭਕ੍ਖਭਾਗੋ ਚ ਅਪਾਕਟੋਵ. ਰਸਭਾਗੋ ਫਲਤੋ ਪਕਾਸੀਯਤਿ, ਅਪਰਿਪਕ੍ਕਸਭਾਗਾ ਚ ਤੇਤਿ ਤੇ ਅਨਾਮਸਿਤ੍ਵਾ ਕਰੀਸਮੁਤ੍ਤਭਾਗਾ ਏਵੇਤ੍ਥ ਦਸ੍ਸਿਤਾ.
੩੦੨. ਪਟਿਕ੍ਕੂਲਸ੍ਸ ਨਾਮ ਫਲੇਨ ਪਟਿਕ੍ਕੂਲੇਨੇਵ ਭਵਿਤਬ੍ਬਨ੍ਤਿ ਦਸ੍ਸੇਨ੍ਤੋ ‘‘ਸਮ੍ਮਾ ਪਰਿਪਚ੍ਚਮਾਨੋ’’ਤਿਆਦਿਮਾਹ. ਨਖਦਨ੍ਤਾਦੀਨੀਤਿ ਆਦਿ-ਸਦ੍ਦੇਨ ਨ ਕੇਵਲਂ ਤਚਾਦੀਨਿ ਏਵ ਦ੍ਵਤ੍ਤਿਂਸਾਕਾਰਪਾਲ਼ਿਯਂ (ਮ. ਨਿ. ੩.੧੫੪; ਖੁ. ਪਾ. ੩.ਦ੍ਵਤ੍ਤਿਂਸਾਕਾਰ) ਆਗਤਾਨਿ, ਅਥ ਖੋ ਅਕ੍ਖਿਗੂਥਕਣ੍ਣਗੂਥਦਨ੍ਤਮਲਜਲ੍ਲਿਕਾਸਮ੍ਭਵਾਦੀਨਿ ਦ੍ਵਤ੍ਤਿਂਸਕੋਟ੍ਠਾਸਵਿਨਿਮੁਤ੍ਤਾਨਿ ਅਸੁਭਾਨਿ ਸਙ੍ਗਣ੍ਹਨ੍ਤੋ ‘‘ਨਾਨਾਕੁਣਪਾਨੀ’’ਤਿ ਆਹਾਤਿ ਦਟ੍ਠਬ੍ਬਂ.
੩੦੩. ਨਿਸ੍ਸਨ੍ਦਮਾਨੋਤਿ ਵਿਸ੍ਸਵਨ੍ਤੋ, ਪਗ੍ਘਰਨ੍ਤੋਤਿ ਅਤ੍ਥੋ. ਆਦਿਨਾ ਪਕਾਰੇਨਾਤਿ ਏਤ੍ਥ ਆਦਿ-ਸਦ੍ਦੇਨ ਨਾਸਿਕਾਯ ਸਿਙ੍ਘਾਣਿਕਾ, ਮੁਖੇਨ ਖੇਲ਼ੋ, ਕਦਾਚਿ ਪਿਤ੍ਤਂ, ਸੇਮ੍ਹਂ, ਲੋਹਿਤਂ ਵਮਤਿ, ਵਚ੍ਚਮਗ੍ਗੇਨ ਉਚ੍ਚਾਰੋ, ਪਸ੍ਸਾਵਮਗ੍ਗੇਨ ਪਸ੍ਸਾਵੋ, ਸਕਲਕਾਯੇ ਲੋਮਕੂਪੇਹਿ ਸੇਦਜਲ੍ਲਿਕਾਤਿ ਏਵਂਪਕਾਰਂ ਅਸੁਚਿਂ ਸਙ੍ਗਣ੍ਹਾਤਿ. ‘‘ਪਠਮਦਿਵਸੇ’’ਤਿ ਇਦਂ ਨਿਸ੍ਸਨ੍ਦਦਿਵਸਾਪੇਕ੍ਖਾਯ ਵੁਤ੍ਤਂ. ਤੇਨਾਹ ‘‘ਦੁਤਿਯਦਿਵਸੇ ਨਿਸ੍ਸਨ੍ਦੇਨ੍ਤੋ’’ਤਿ. ਵਿਕੁਣਿਤਮੁਖੋਤਿ ਜਿਗੁਚ੍ਛਾਵਸੇਨ ਸਙ੍ਕੁਚਿਤਮੁਖੋ. ਤੇਨਾਹ ‘‘ਜੇਗੁਚ੍ਛੀ’’ਤਿ. ਮਙ੍ਕੁਭੂਤੋਤਿ ਵਿਮਨਕਜਾਤੋ ‘‘ਇਮਮ੍ਪਿ ਨਾਮ ਪੋਸੇਮੀ’’ਤਿ. ਰਤ੍ਤੋਤਿ ਵਤ੍ਥਂ ਵਿਯ ਰਙ੍ਗਜਾਤੇਨ ਚਿਤ੍ਤਸ੍ਸ ਵਿਪਰਿਣਾਮਾਕਾਰੇਨ ਛਨ੍ਦਰਾਗੇਨ ਰਤ੍ਤੋ. ਗਿਦ੍ਧੋਤਿ ਅਭਿਕਙ੍ਖਨਸਭਾਵੇਨ ਅਭਿਗਿਜ੍ਝਨੇਨ ਗਿਦ੍ਧੋ ਗੇਧਂ ਆਪਨ੍ਨੋ. ਗਧਿਤੋਤਿ ਦੁਮ੍ਮੋਚਨੀਯਭਾਵੇਨ ਗਨ੍ਥਿਤੋ ਵਿਯ ਤਤ੍ਥ ਪਟਿਬਦ੍ਧੋ. ਮੁਚ੍ਛਿਤੋਤਿ ਰਸਤਣ੍ਹਾਯ ਮੁਚ੍ਛਂ ਮੋਹਂ ਆਪਨ੍ਨੋ. ਵਿਰਤ੍ਤੋਤਿ ਵਿਗਤਰਾਗੋ. ਅਟ੍ਟੀਯਮਾਨੋਤਿ ਦੁਕ੍ਖਿਯਮਾਨੋ. ਹਰਾਯਮਾਨੋਤਿ ਲਜ੍ਜਮਾਨੋ. ਜਿਗੁਚ੍ਛਮਾਨੋਤਿ ਹੀਲ਼ੇਨ੍ਤੋ.
ਨਵਦ੍ਵਾਰੇਹੀਤਿ ਪਾਕਟਾਨਂ ਮਹਨ੍ਤਾਨਂ ਵਸੇਨ ਵੁਤ੍ਤਂ, ਲੋਮਕੂਪਵਿਵਰੇਹਿਪਿ ਸਨ੍ਦਤੇਵਾਤਿ. ਨਿਲੀਯਤੀਤਿ ਅਤ੍ਤਾਨਂ ਅਦਸ੍ਸੇਨ੍ਤੋ ਨਿਗੂਹਤਿ, ਸਙ੍ਕੁਚਤਿ ਵਾ. ਏਵਨ੍ਤਿ ਏਕੇਨ ਦ੍ਵਾਰੇਨ ਪਵੇਸਨਂ ਅਨੇਕੇਹਿ ਦ੍ਵਾਰੇਹਿ ਅਨੇਕਧਾ ਨਿਕ੍ਖਾਮਨਂ, ਪਕਾਸਨਂ ਪਵੇਸਨਂ, ਨਿਗੂਲ਼੍ਹਂ ਨਿਕ੍ਖਾਮਨਮ੍ਪੀਤਿ ਸੋਮਨਸ੍ਸਜਾਤੇਨ ਪਵੇਸਨਂ, ਮਙ੍ਕੁਭੂਤੇਨ ਨਿਕ੍ਖਾਮਨਂ, ਸਾਰਤ੍ਤੇਨ ਪਵੇਸਨਂ, ਵਿਰਤ੍ਤੇਨ ਨਿਕ੍ਖਾਮਨਨ੍ਤਿ ਇਮੇਹਿ ਪਕਾਰੇਹਿ.
੩੦੪. ਪਰਿਭੋਗਕਾਲੇਪੀਤਿ ਪਿ-ਸਦ੍ਦੇਨ ਪਵਿਟ੍ਠਮਤ੍ਤੋਪਿ ਨਾਮ ਪਵੇਸਦ੍ਵਾਰਂ ਜੇਗੁਚ੍ਛਂ ਕਰੋਤਿ, ਪਗੇਵ ਲਦ੍ਧਪਰਿਵਾਸੋ ਪਰਿਪਾਕਪ੍ਪਤ੍ਤੋ ਇਤਰਦ੍ਵਾਰਾਨੀਤਿ ਦਸ੍ਸੇਤਿ. ਏਸ ਆਹਾਰੋ. ਗਨ੍ਧਹਰਣਤ੍ਥਨ੍ਤਿ ਵਿਸ੍ਸਗਨ੍ਧਾਪਨਯਨਤ੍ਥਂ. ਕਾਯਗ੍ਗਿਨਾਤਿ ਗਹਣਿਤੇਜਾਨੁਗਤੇਨ ਕਾਯੁਸ੍ਮਾਨਾ. ਫੇਣੁਦ੍ਦੇਹਕਨ੍ਤਿ ਫੇਣਾਨਿ ਉਟ੍ਠਪੇਤ੍ਵਾ ਉਟ੍ਠਪੇਤ੍ਵਾ. ਪਚ੍ਚਿਤ੍ਵਾਤਿ ਪਰਿਪਾਕਂ ਗਨ੍ਤ੍ਵਾ. ਉਤ੍ਤਰਮਾਨੋਤਿ ਉਪ੍ਪਿਲਵਨ੍ਤੋ. ਸੇਮ੍ਹਾਦੀਤਿ ਆਦਿ-ਸਦ੍ਦੇਨ ਪਿਤ੍ਤਾਦਿਕੇ ਸਙ੍ਗਣ੍ਹਾਤਿ. ਕਰੀਸਾਦੀਤਿ ਆਦਿ-ਸਦ੍ਦੇਨ ਸੇਦਜਲ੍ਲਿਕਾਦਿਕੇ. ਇਮਾਨਿ ਦ੍ਵਾਰਾਨਿ ਮੁਖਾਦੀਨਿ. ਏਕਚ੍ਚਨ੍ਤਿ ਪਸ੍ਸਾਵਮਗ੍ਗਂ ਸਨ੍ਧਾਯ ਵਦਤਿ. ਚੋਕ੍ਖਜਾਤਿਕਾ ਪਨ ਮੁਖਾਦੀਨਿਪਿ ਧੋਵਿਤ੍ਵਾ ਹਤ੍ਥਂ ਪੁਨ ਧੋਵਨ੍ਤਿਯੇਵ. ਪੁਨ ਏਕਚ੍ਚਨ੍ਤਿ ਵਚ੍ਚਮਗ੍ਗਂ. ਦ੍ਵਤ੍ਤਿਕ੍ਖਤ੍ਤੁਨ੍ਤਿ ਦ੍ਵਿਕ੍ਖਤ੍ਤੁਂ, ਤਿਕ੍ਖਤ੍ਤੁਂ ਵਾ. ਏਤ੍ਥ ਚ ਆਹਾਰਤ੍ਥਾਯ ਗਮਨਪਰਿਯੇਸਨਾਨਂ ਪਟਿਕ੍ਕੂਲਤਾ ਆਹਾਰੇ ਪਟਿਕ੍ਕੂਲਤਾ ਵੁਤ੍ਤਾ. ਪਰਿਭੋਗਸ੍ਸ ਤਨ੍ਨਿਸ੍ਸਯਤੋ, ਆਸਯਨਿਧਾਨਾਨਂ ਤਂਸਮ੍ਬਨ੍ਧਤੋ, ਇਤਰੇਸਂ ਤਬ੍ਬਿਕਾਰਤੋਤਿ ਅਯਮ੍ਪਿ ਵਿਸੇਸੋ ਵੇਦਿਤਬ੍ਬੋ. ਕਿਮਿਭਕ੍ਖਭਾਵੋਪਿ ਹਿਸ੍ਸ ਵਿਕਾਰਪਕ੍ਖੇਯੇਵ ਠਪੇਤਬ੍ਬੋਤਿ.
੩੦੫. ਤਂ ਨਿਮਿਤ੍ਤਨ੍ਤਿ ਯਥਾਵੁਤ੍ਤੇਹਿ ਆਕਾਰੇਹਿ ਪੁਨਪ੍ਪੁਨਂ ਮਨਸਿ ਕਰੋਨ੍ਤਸ੍ਸ ਪਟਿਕ੍ਕੂਲਾਕਾਰਵਸੇਨ ਉਪਟ੍ਠਿਤਂ ਕਬਲ਼ੀਕਾਰਾਹਾਰਸਞ੍ਞਿਤਂ ਭਾਵਨਾਯ ਨਿਮਿਤ੍ਤਂ ਆਰਮ੍ਮਣਂ, ਨ ਉਗ੍ਗਹਪਟਿਭਾਗਨਿਮਿਤ੍ਤਂ. ਯਦਿ ਹਿ ਤਤ੍ਥ ਉਗ੍ਗਹਨਿਮਿਤ੍ਤਂ ਉਪ੍ਪਜ੍ਜੇਯ੍ਯ, ਪਟਿਭਾਗਨਿਮਿਤ੍ਤੇਨਪਿ ਭਵਿਤਬ੍ਬਂ. ਤਥਾ ਚ ਸਤਿ ਅਪ੍ਪਨਾਪ੍ਪਤ੍ਤੇਨ ਝਾਨੇਨ ਭਵਿਤਬ੍ਬਂ, ਨ ਚ ਭਵਤਿ, ਕਸ੍ਮਾ? ਭਾਵਨਾਯ ਨਾਨਾਕਾਰਤੋ, ਸਭਾਵਧਮ੍ਮਭਾਵੇਨ ਚ ਕਮ੍ਮਟ੍ਠਾਨਸ੍ਸ ਗਮ੍ਭੀਰਭਾਵਤੋ. ਤੇਨਾਹ ‘‘ਕਬਲ਼ੀਕਾਰਾਹਾਰਸ੍ਸ ਸਭਾਵਧਮ੍ਮਤਾਯ ਗਮ੍ਭੀਰਤ੍ਤਾ’’ਤਿ. ਏਤ੍ਥ ਹਿ ਯਦਿਪਿ ਪਟਿਕ੍ਕੂਲਾਕਾਰਵਸੇਨ ਭਾਵਨਾ ਪਵਤ੍ਤਤਿ. ਯੇ ਪਨ ਧਮ੍ਮੇ ਉਪਾਦਾਯ ਕਬਲ਼ੀਕਾਰਾਹਾਰਪਞ੍ਞਤ੍ਤਿ, ਤੇ ਏਵ ਧਮ੍ਮਾ ਪਟਿਕ੍ਕੂਲਾ, ਨ ਪਞ੍ਞਤ੍ਤੀਤਿ ਪਟਿਕ੍ਕੂਲਾਕਾਰਗ੍ਗਹਣਮੁਖੇਨਪਿ ਸਭਾਵਧਮ੍ਮੇਯੇਵ ਆਰਬ੍ਭ ਭਾਵਨਾਯ ਪਵਤ੍ਤਨਤੋ, ਸਭਾਵਧਮ੍ਮਾਨਞ੍ਚ ਸਭਾਵੇਨੇਵ ਗਮ੍ਭੀਰਭਾਵਤੋ ਨ ਤਤ੍ਥ ਝਾਨਂ ਅਪ੍ਪੇਤੁਂ ਸਕ੍ਕੋਤਿ. ਗਮ੍ਭੀਰਭਾਵਤੋ ਹਿ ਪੁਰਿਮਸਚ੍ਚਦ੍ਵਯਂ ਦੁਦ੍ਦਸਂ ਜਾਤਨ੍ਤਿ. ਯਦਿ ਉਪਚਾਰਸਮਾਧਿਨਾ ਚਿਤ੍ਤਂ ਸਮਾਧਿਯਤਿ, ਕਥਂ ਕਮ੍ਮਟ੍ਠਾਨਂ ‘‘ਸਞ੍ਞਾ’’ ਇਚ੍ਚੇਵ ਵੋਹਰੀਯਤੀਤਿ ਆਹ ‘‘ਪਟਿਕ੍ਕੂਲਾਕਾਰਗ੍ਗਹਣਵਸੇਨ ਪਨਾ’’ਤਿਆਦਿ.
ਇਦਾਨਿ ਇਮਿਸ੍ਸਾ ਭਾਵਨਾਯ ਆਨਿਸਂਸਂ ਦਸ੍ਸੇਤੁਂ ‘‘ਇਮਞ੍ਚ ਪਨਾ’’ਤਿਆਦਿ ਵੁਤ੍ਤਂ. ਰਸਤਣ੍ਹਾਯਾਤਿ ਮਧੁਰਾਦਿਰਸਵਿਸਯਾਯ ਤਣ੍ਹਾਯ. ਪਤਿਲੀਯਤੀਤਿ ਸਙ੍ਕੁਚਤਿ ਅਨੇਕਾਕਾਰਂ ਤਤ੍ਥ ਪਟਿਕ੍ਕੂਲਤਾਯ ਸਣ੍ਠਿਤਤ੍ਤਾ. ਪਤਿਕੁਟਤੀਤਿ ਅਪਸਕ੍ਕਤਿ ਨ ਵਿਸਰਤਿ. ਪਤਿਵਤ੍ਤਤੀਤਿ ਨਿਵਤ੍ਤਤਿ. ਕਨ੍ਤਾਰਨਿਤ੍ਥਰਣਤ੍ਥਿਕੋਤਿ ਮਹਤੋ ਦੁਬ੍ਭਿਕ੍ਖਕਨ੍ਤਾਰਸ੍ਸ ਨਿਤ੍ਥਰਣਪ੍ਪਯੋਜਨੋ. ਵਿਗਤਮਦੋਤਿ ਮਾਨਮਦਾਦੀਨਂ ਅਭਾਵੇਨ ਨਿਮ੍ਮਦੋ, ਮਦਾਭਾਵਗ੍ਗਹਣੇਨੇਵ ਚਸ੍ਸ ਦਵਮਣ੍ਡਨਵਿਭੂਸਨਾਦੀਨਮ੍ਪਿ ਅਭਾਵੋ ਗਹਿਤੋਯੇਵਾਤਿ ਦਟ੍ਠਬ੍ਬਂ. ਕਬਲ਼ੀਕਾਰਾਹਾਰਪਰਿਞ੍ਞਾਮੁਖੇਨਾਤਿ ਵੁਤ੍ਤਨਯੇਨ ਪਟਿਕ੍ਕੂਲਾਕਾਰਤੋ ਕਬਲ਼ੀਕਾਰਾਹਾਰਸ੍ਸ ਪਰਿਚ੍ਛਿਜ੍ਜ ਜਾਨਨਦ੍ਵਾਰੇਨ. ਪਞ੍ਚਕਾਮਗੁਣਿਕੋ ਰਾਗੋਤਿ ਅਨਤਿਵਤ੍ਤਨਟ੍ਠੇਨ ਪਞ੍ਚਸੁ ਕਾਮਗੁਣੇਸੁ ਨਿਯੁਤ੍ਤੋ, ਤਪ੍ਪਯੋਜਨੋ ਵਾ ਰਾਗੋ. ਪਰਿਞ੍ਞਂ ਸਮਤਿਕ੍ਕਮਂ ਗਚ੍ਛਤਿ. ਰਸਤਣ੍ਹਾਯ ਹਿ ਸਮ੍ਮਦੇਵ ਵਿਗਤਾਯ ਰੂਪਤਣ੍ਹਾਦਯੋਪਿ ਵਿਗਤਾ ਏਵ ਹੋਨ੍ਤਿ ਭੋਜਨੇ ਮਤ੍ਤਞ੍ਞੁਤਾਯ ਉਕ੍ਕਂਸਗਮਨਤੋ. ਸਤਿ ਚ ਵਿਸਯਿਸਮਤਿਕ੍ਕਮੇ ਵਿਸਯੋ ਸਮਤਿਕ੍ਕਨ੍ਤੋ ਏਵ ਹੋਤੀਤਿ ਆਹ ‘‘ਸੋ ਪਞ੍ਚਕਾਮਗੁਣਪਰਿਞ੍ਞਾਮੁਖੇਨ ਰੂਪਕ੍ਖਨ੍ਧਂ ਪਰਿਜਾਨਾਤੀ’’ਤਿ. ਰੂਪਾਯਤਨਾਦੀਸੁ ਹਿ ਪਰਿਞ੍ਞਂ ਗਚ੍ਛਨ੍ਤੇਸੁ ਤਨ੍ਨਿਸ੍ਸਯਭੂਤਾਨਿ, ਤਗ੍ਗਾਹਕਾ ਪਸਾਦਾ ਚ ਸੁਖੇਨੇਵ ਪਰਿਞ੍ਞਂ ਗਚ੍ਛਨ੍ਤੀਤਿ. ਅਪਰਿਪਕ੍ਕਾਦੀਤਿ ਆਦਿ-ਸਦ੍ਦੇਨ ਆਸਯਨਿਧਾਨਾਨਮ੍ਪਿ ਸਙ੍ਗਹੋ ਦਟ੍ਠਬ੍ਬੋ. ਤਤ੍ਥ ਅਪਰਿਪਕ੍ਕਂ ਤਾਵ ਉਦਰਿਯਮੇਵ. ਆਸਯਗ੍ਗਹਣੇਨ ਪਿਤ੍ਤਸੇਮ੍ਹਪੁਬ੍ਬਲੋਹਿਤਾਨਂ, ਪਰਿਪਕ੍ਕਗ੍ਗਹਣੇਨ ਕਰੀਸਮੁਤ੍ਤਾਨਂ, ਫਲਗ੍ਗਹਣੇਨ ਕੇਸਾਦੀਨਂ ਸਬ੍ਬੇਸਂ ਪਰਿਗ੍ਗਹੋ ਸਿਦ੍ਧੋ ਹੋਤੀਤਿ ਆਹ ‘‘ਕਾਯਗਤਾਸਤਿਭਾਵਨਾਪਿ ਪਾਰਿਪੂਰਿਂ ਗਚ੍ਛਤੀ’’ਤਿ. ਅਸੁਭਸਞ੍ਞਾਯਾਤਿ ਅਸੁਭਭਾਵਨਾਯ, ਅਵਿਞ੍ਞਾਣਕਅਸੁਭਭਾਵਨਾਨੁਯੋਗਸ੍ਸਾਤਿ ਅਤ੍ਥੋ. ਅਨੁਲੋਮਪਟਿਪਦਂ ਪਟਿਪਨ੍ਨੋ ਹੋਤਿ ਪਟਿਕ੍ਕੂਲਾਕਾਰਗ੍ਗਹਣੇਨ ਕਾਯਸ੍ਸ ਅਸੁਚਿਦੁਗ੍ਗਨ੍ਧਜੇਗੁਚ੍ਛਭਾਵਸਲ੍ਲਕ੍ਖਣਤੋ. ਇਮਂ ਪਨ ਪਟਿਪਤ੍ਤਿਨ੍ਤਿ ਇਮਂ ਆਹਾਰੇ ਪਟਿਕ੍ਕੂਲਸਞ੍ਞਾਭਾਵਨਂ. ਅਮਤਪਰਿਯੋਸਾਨਤਨ੍ਤਿ ਨਿਬ੍ਬਾਨਨਿਟ੍ਠਿਤਂ ਆਹਾਰੇ ਪਟਿਕ੍ਕੂਲਸਞ੍ਞਾਭਾਵਨਾਸਙ੍ਖਾਤਂ ਉਪਚਾਰਜ੍ਝਾਨਂ ਪਾਦਕਂ ਕਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਨਿਬ੍ਬਾਨਾਧਿਗਮਨ੍ਤਿ ਅਤ੍ਥੋ.
ਆਹਾਰੇਪਟਿਕ੍ਕੂਲਭਾਵਨਾਵਣ੍ਣਨਾ ਨਿਟ੍ਠਿਤਾ.
ਚਤੁਧਾਤੁਵਵਤ੍ਥਾਨਭਾਵਨਾਵਣ੍ਣਨਾ
੩੦੬. ‘‘ਏਕਂ ਵਵਤ੍ਥਾਨਨ੍ਤਿ ਏਵਂ ਉਦ੍ਦਿਟ੍ਠਸ੍ਸ ਚਤੁਧਾਤੁਵਵਤ੍ਥਾਨਸ੍ਸ ਭਾਵਨਾਨਿਦ੍ਦੇਸੋ ਅਨੁਪ੍ਪਤ੍ਤੋ’’ਤਿ ਉਦ੍ਦੇਸੋ ਨਾਮ ਨਿਦ੍ਦੇਸਤ੍ਥੋ ਮੁਦੁਮਜ੍ਝਪਞ੍ਞਾਬਾਹੁਲ੍ਲਤੋ, ਆਗਤੋ ਚ ਭਾਰੋ ਅਵਸ੍ਸਂ ਵਹਿਤਬ੍ਬੋਤਿ ਕਤ੍ਵਾ ਵੁਤ੍ਤਂ. ਤਤ੍ਥ ਸਤਿਪਿ ਵਿਸਯਭੇਦੇਨ ਵਵਤ੍ਥਾਨਸ੍ਸ ਭੇਦੇ ਵਵਤ੍ਥਾਨਭਾਵਸਾਮਞ੍ਞੇਨ ਪਨ ਤਂ ਅਭਿਨ੍ਨਂ ਕਤ੍ਵਾ ਵੁਤ੍ਤਂ ‘‘ਏਕਂ ਵਵਤ੍ਥਾਨ’’ਨ੍ਤਿ, ਪੁਬ੍ਬਭਾਗੇ ਵਾ ਸਤਿਪਿ ਵਿਸਯਭੇਦੇ ਅਤ੍ਥਸਿਦ੍ਧਿਯਂ ਤਸ੍ਸ ਏਕਵਿਸਯਤਾਵਾਤਿ ‘‘ਏਕਂ ਵਵਤ੍ਥਾਨ’’ਨ੍ਤਿ ਵੁਤ੍ਤਂ. ਯਥਾ ਹਿ ਦ੍ਵਤ੍ਤਿਂਸਾਕਾਰੇ ਕਮ੍ਮਂ ਕਰੋਨ੍ਤਸ੍ਸ ਯੋਗਿਨੋ ਯਦਿਪਿ ਪੁਬ੍ਬਭਾਗੇ ਵਿਸੁਂ ਵਿਸੁਂ ਕੋਟ੍ਠਾਸੇਸੁ ਮਨਸਿਕਾਰੋ ਪਵਤ੍ਤਤਿ, ਅਪਰਭਾਗੇ ਪਨ ਏਕਸ੍ਮਿਂ ਖਣੇ ਏਕਸ੍ਮਿਂਯੇਵ ਕੋਟ੍ਠਾਸੇ ਅਤ੍ਥਸਿਦ੍ਧਿ ਹੋਤਿ, ਨ ਸਬ੍ਬੇਸੁ, ਏਵਮਿਧਾਪੀਤਿ. ਤਤ੍ਥ ਸਿਯਾ – ਯਥਾ ਪਟਿਕ੍ਕੂਲਭਾਵਸਾਮਞ੍ਞੇਨ ਦ੍ਵਤ੍ਤਿਂਸਾਕਾਰਕਮ੍ਮਟ੍ਠਾਨੇ ਅਭੇਦਤੋ ਮਨਸਿਕਾਰੋ ਪਵਤ੍ਤਤਿ, ਏਵਂ ਇਧ ਧਾਤੁਭਾਵਸਾਮਞ੍ਞੇਨ ਅਭੇਦਤੋ ਮਨਸਿਕਾਰੋ ਪਵਤ੍ਤਤੀਤਿ ‘‘ਏਕਂ ਵਵਤ੍ਥਾਨ’’ਨ੍ਤਿ ਵੁਤ੍ਤਨ੍ਤਿ? ਨਯਿਦਮੇਵਂ. ਤਤ੍ਥ ਹਿ ਪਣ੍ਣਤ੍ਤਿਸਮਤਿਕ੍ਕਮਤੋ ਪਟ੍ਠਾਯ ਪਟਿਕ੍ਕੂਲਵਸੇਨੇਵ ਸਬ੍ਬਤ੍ਥ ਮਨਸਿਕਾਰੋ ਪਵਤ੍ਤੇਤਬ੍ਬੋ, ਇਧ ਪਨ ਸਭਾਵਸਰਸਲਕ੍ਖਣਤੋ ਧਾਤੁਯੋ ਮਨਸਿ ਕਾਤਬ੍ਬਾ, ਨ ਧਾਤੁਭਾਵਸਾਮਞ੍ਞਤੋ. ਤੇਨੇਵਾਹ ‘‘ਸਭਾਵੂਪਲਕ੍ਖਣਵਸੇਨ ਸਨ੍ਨਿਟ੍ਠਾਨ’’ਨ੍ਤਿ. ਕਿਂ ਵਾ ਏਤੇਨ ਪਪਞ੍ਚੇਨ, ਅਞ੍ਞੇਹਿ ਏਕੂਨਚਤ੍ਤਾਲੀਸਾਯ ਕਮ੍ਮਟ੍ਠਾਨੇਹਿ ਅਸਂਸਟ੍ਠਂ ਚਤੁਧਾਤੁਵਵਤ੍ਥਾਨਂ ਨਾਮ ਏਕਂ ਕਮ੍ਮਟ੍ਠਾਨਨ੍ਤਿ ਦਸ੍ਸੇਤੁਂ ‘‘ਏਕਂ ਵਵਤ੍ਥਾਨ’’ਨ੍ਤਿ ਵੁਤ੍ਤਨ੍ਤਿ ਦਟ੍ਠਬ੍ਬਂ. ‘‘ਚਤੁਧਾਤੁਵਵਤ੍ਥਾਨਸ੍ਸ ਭਾਵਨਾਨਿਦ੍ਦੇਸੋ’’ਤਿ ਕਸ੍ਮਾ ਵੁਤ੍ਤਂ, ਨਨੁ ਚਤੁਧਾਤੁਵਵਤ੍ਥਾਨਂ ਭਾਵਨਾਵ? ਸਚ੍ਚਂ ਭਾਵਨਾਵ, ਸਕਿਂ ਪਵਤ੍ਤਂ ਪਨ ਵਵਤ੍ਥਾਨਂ, ਤਸ੍ਸ ਬਹੁਲੀਕਾਰੋ ਭਾਵਨਾਤਿ ਵਚਨਭੇਦੇਨ ਵੁਤ੍ਤਂ. ਕਥਂ ਪਨ ਭਾਵਨਾ ਨਿਦ੍ਦਿਸੀਯਤਿ ਤਸ੍ਸਾ ਵਚੀਗੋਚਰਾਤਿਕ੍ਕਨ੍ਤਭਾਵਤੋਤਿ? ਨਾਯਂ ਦੋਸੋ ਭਾਵਨਤ੍ਥੇ ਭਾਵਨਾਵੋਹਾਰਤੋ. ਭਾਵਨਤ੍ਥੋ ਹਿ ਕਮ੍ਮਟ੍ਠਾਨਪਰਿਗ੍ਗਹੋ ਇਧ ‘‘ਭਾਵਨਾ’’ਤਿ ਅਧਿਪ੍ਪੇਤੋ.
ਸਭਾਵੂਪਲਕ੍ਖਣਵਸੇਨਾਤਿ ਕਕ੍ਖਲ਼ਤ੍ਤਾਦਿਕਸ੍ਸ ਸਲਕ੍ਖਣਸ੍ਸ ਉਪਧਾਰਣਵਸੇਨ. ਇਦਂ ਹਿ ਕਮ੍ਮਟ੍ਠਾਨਂ ਪਥਵੀਕਸਿਣਾਦਿਕਮ੍ਮਟ੍ਠਾਨਂ ਵਿਯ ਨ ਪਣ੍ਣਤ੍ਤਿਮਤ੍ਤਸਲ੍ਲਕ੍ਖਣਵਸੇਨ, ਨੀਲਕਸਿਣਾਦਿਕਮ੍ਮਟ੍ਠਾਨਂ ਵਿਯ ਨ ਨੀਲਾਦਿਵਣ੍ਣਸਲ੍ਲਕ੍ਖਣਵਸੇਨ, ਨਾਪਿ ਵਿਪਸ੍ਸਨਾਕਮ੍ਮਟ੍ਠਾਨਂ ਵਿਯ ਸਙ੍ਖਾਰਾਨਂ ਅਨਿਚ੍ਚਤਾਦਿਸਾਮਞ੍ਞਲਕ੍ਖਣਸਲ੍ਲਕ੍ਖਣਵਸੇਨ ਪਵਤ੍ਤਤਿ, ਅਥ ਖੋ ਪਥਵੀਆਦੀਨਂ ਸਭਾਵਸਲ੍ਲਕ੍ਖਣਵਸੇਨ ਪਵਤ੍ਤਤਿ. ਤੇਨ ਵੁਤ੍ਤਂ ‘‘ਸਭਾਵੂਪਲਕ੍ਖਣਵਸੇਨਾ’’ਤਿ, ਕਕ੍ਖਲ਼ਤ੍ਤਾਦਿਕਸ੍ਸ ਸਲਕ੍ਖਣਸ੍ਸ ਉਪਧਾਰਣਵਸੇਨਾਤਿ ਅਤ੍ਥੋ. ਸਨ੍ਨਿਟ੍ਠਾਨਨ੍ਤਿ ਞਾਣਵਿਨਿਚ੍ਛਯੋ ਵੇਦਿਤਬ੍ਬੋ, ਨ ਯੇਵਾਪਨਕਵਿਨਿਚ੍ਛਯੋ, ਨਾਪਿ ਵਿਤਕ੍ਕਾਦਿਵਿਨਿਚ੍ਛਯੋ. ਧਾਤੁਮਨਸਿਕਾਰੋਤਿ ਧਾਤੂਸੁ ਮਨਸਿਕਾਰੋ, ਚਤਸ੍ਸੋ ਧਾਤੁਯੋ ਆਰਬ੍ਭ ਭਾਵਨਾਮਨਸਿਕਾਰੋਤਿ ਅਤ੍ਥੋ. ਕਾਤਬ੍ਬਤੋ ਕਮ੍ਮਂ, ਯੋਗਿਨੋ ਸੁਖਵਿਸੇਸਾਨਂ ਕਾਰਣਭਾਵਤੋ ਠਾਨਞ੍ਚਾਤਿ ਕਮ੍ਮਟ੍ਠਾਨਂ, ਚਤੁਨ੍ਨਂ ਮਹਾਭੂਤਾਨਂ ਸਭਾਵਸਲ੍ਲਕ੍ਖਣਵਸੇਨ ਪਵਤ੍ਤਂ ਯੋਗਕਮ੍ਮਂ. ਤੇਨਾਹ ‘‘ਧਾਤੁਮਨਸਿਕਾਰੋ, ਧਾਤੁਕਮ੍ਮਟ੍ਠਾਨਂ, ਚਤੁਧਾਤੁਵਵਤ੍ਥਾਨਨ੍ਤਿ ਅਤ੍ਥਤੋ ਏਕ’’ਨ੍ਤਿ. ਤਯਿਦਂ ਚਤੁਧਾਤੁਵਵਤ੍ਥਾਨਂ. ‘‘ਦ੍ਵਿਧਾ ਆਗਤ’’ਨ੍ਤਿ ਕਸ੍ਮਾ ਵੁਤ੍ਤਂ, ਨਨੁ ਧਾਤੁਵਿਭਙ੍ਗੇ ਨਾਤਿਸਙ੍ਖੇਪਵਿਤ੍ਥਾਰਵਸੇਨ ਆਗਤਂ, ਤਸ੍ਮਾ ‘‘ਤਿਧਾ ਆਗਤ’’ਨ੍ਤਿ ਵਤ੍ਤਬ੍ਬਨ੍ਤਿ? ਨ, ਤਤ੍ਥਾਪਿ ਅਜ੍ਝਤ੍ਤਿਕਾਨਂ ਧਾਤੂਨਂ ਪਭੇਦਤੋ ਅਨਵਸੇਸਪਰਿਯਾਦਾਨਸ੍ਸ ਕਤਤ੍ਤਾ, ਬਾਹਿਰਾਨਞ੍ਚ ਧਾਤੂਨਂ ਪਰਿਗ੍ਗਹਿਤਤ੍ਤਾ. ਅਥ ਵਾ ਦ੍ਵਿਧਾ ਆਗਤਨ੍ਤਿ ਏਤ੍ਥ ਦ੍ਵਿਧਾਵ ਆਗਤਨ੍ਤਿ ਨ ਏਵਂ ਨਿਯਮੋ ਗਹੇਤਬ੍ਬੋ, ਅਥ ਖੋ ਦ੍ਵਿਧਾ ਆਗਤਮੇਵਾਤਿ, ਤੇਨ ਤਤਿਯਸ੍ਸਾਪਿ ਪਕਾਰਸ੍ਸ ਸਙ੍ਗਹੋ ਸਿਦ੍ਧੋ ਹੋਤਿ. ਸੋ ਚ ਨਾਤਿਸਙ੍ਖੇਪਵਿਤ੍ਥਾਰਨਯੋ ‘‘ਸਙ੍ਖੇਪਤੋ ਚ ਵਿਤ੍ਥਾਰਤੋ ਚਾ’’ਤਿ ਏਤ੍ਥ ਆਵੁਤ੍ਤਿਵਸੇਨ, ਚ-ਸਦ੍ਦੇਨੇਵ ਵਾ ਸਙ੍ਗਹੋਤਿ ਦਟ੍ਠਬ੍ਬੋ. ਅਥ ਵਾ ਯੋ ਨਾਤਿਸਙ੍ਖੇਪਵਿਤ੍ਥਾਰਨਯੇਨ ਅਤਿਸਙ੍ਖੇਪਪਟਿਕ੍ਖੇਪਮੁਖੇਨ ਲਬ੍ਭਮਾਨੋ ਵਿਤ੍ਥਾਰਭਾਗੋ, ਤਂ ਵਿਤ੍ਥਾਰਨਯਨ੍ਤੋਗਧਮੇਵ ਕਤ੍ਵਾ ਵੁਤ੍ਤਂ ‘‘ਦ੍ਵਿਧਾ ਆਗਤ’’ਨ੍ਤਿ. ਏਵਞ੍ਚ ਕਤ੍ਵਾ ‘‘ਨਾਤਿਤਿਕ੍ਖਪਞ੍ਞਸ੍ਸ ਧਾਤੁਕਮ੍ਮਟ੍ਠਾਨਿਕਸ੍ਸ ਵਸੇਨ ਵਿਤ੍ਥਾਰਤੋ ਆਗਤ’’ਨ੍ਤਿ ਇਦਞ੍ਚ ਵਚਨਂ ਸਮਤ੍ਥਿਤਂ ਹੋਤਿ. ‘‘ਮਹਾਸਤਿਪਟ੍ਠਾਨੇ’’ਤਿ ਚ ਇਦਂ ਨਿਦਸ੍ਸਨਮਤ੍ਤਂ ਦਟ੍ਠਬ੍ਬਂ, ਸਤਿਪਟ੍ਠਾਨ(ਦੀ. ਨਿ. ੨.੩੭੮ ਆਦਯੋ; ਮ. ਨਿ. ੩.੧੧੧ ਆਦਯੋ) ਕਾਯਗਤਾਸਤਿਸੁਤ੍ਤਾਦੀਸੁਪਿ (ਮ. ਨਿ. ੩.੧੫੩ ਆਦਯੋ) ਤਥੇਵ ਆਗਤਤ੍ਤਾ. ਰਾਹੁਲੋਵਾਦੇਤਿ ਮਹਾਰਾਹੁਲੋਵਾਦੇ (ਮ. ਨਿ. ੨.੧੧੩ ਆਦਯੋ). ਧਾਤੁਵਿਭਙ੍ਗੇਤਿ ਧਾਤੁਵਿਭਙ੍ਗਸੁਤ੍ਤੇ (ਮ. ਨਿ. ੩.੩੪੨ ਆਦਯੋ), ਅਭਿਧਮ੍ਮੇ ਧਾਤੁਵਿਭਙ੍ਗੇ (ਵਿਭ. ੧੭੨ ਆਦਯੋ) ਚ.
ਕਾਮਂ ਮਹਾਸਤਿਪਟ੍ਠਾਨੇ ਅਤ੍ਥੇਨ ਉਪਮਂ ਪਰਿਵਾਰੇਤ੍ਵਾ ਦੇਸਨਾ ਆਗਤਾ, ਉਪਮਾ ਚ ਨਾਮ ਯਾਵਦੇਵ ਉਪਮੇਯ੍ਯਤ੍ਥਵਿਭਾਵਨਤ੍ਥਾਤਿ ਉਪਮਂ ਤਾਵ ਦਸ੍ਸੇਤ੍ਵਾ ਉਪਮੇਯ੍ਯਤ੍ਥਂ ਵਿਭਾਵੇਤੁਂ ‘‘ਸੇਯ੍ਯਥਾਪੀ’’ਤਿਆਦਿਨਾ ਪਾਲ਼ਿ ਆਨੀਤਾ. ਕਸ੍ਮਾ ਪਨੇਤ੍ਥ ਧਾਤੁਵਸੇਨ, ਤਤ੍ਥਪਿ ਚਤੁਮਹਾਭੂਤਵਸੇਨ ਕਮ੍ਮਟ੍ਠਾਨਨਿਦ੍ਦੇਸੋ ਕਤੋਤਿ? ਸਤ੍ਤਸੁਞ੍ਞਤਾਸਨ੍ਦਸ੍ਸਨਤ੍ਥਂ, ਏਤ੍ਥ ਧਾਤੁਵਸੇਨ, ਤਤ੍ਥਾਪਿ ਓਲ਼ਾਰਿਕਭਾਵੇਨ ਸੁਪਾਕਟਤਾਯ, ਏਕਚ੍ਚਵੇਨੇਯ੍ਯਜਨਚਰਿਤਾਨੁਕੁਲਤਾਯ ਚ ਮਹਾਭੂਤਵਸੇਨ ਕਮ੍ਮਟ੍ਠਾਨਨਿਦ੍ਦੇਸੋ ਕਤੋਤਿ ਵੇਦਿਤਬ੍ਬੋ. ਤਤ੍ਥ ਪਥਵੀਧਾਤੂਤਿਆਦੀਸੁ ਧਾਤੁਤ੍ਥੋ ਨਾਮ ਸਭਾਵਤ੍ਥੋ, ਸਭਾਵਤ੍ਥੋ ਨਾਮ ਸੁਞ੍ਞਤਤ੍ਥੋ, ਸੁਞ੍ਞਤਤ੍ਥੋ ਨਾਮ ਨਿਸ੍ਸਤ੍ਤਤ੍ਥੋ. ਏਵਂ ਸਭਾਵਸੁਞ੍ਞਤਨਿਸ੍ਸਤ੍ਤਤ੍ਥੇਨ ਪਥਵੀਯੇਵ ਧਾਤੁ ਪਥਵੀਧਾਤੁ. ਆਪੋਧਾਤੁਆਦੀਸੁਪਿ ਏਸੇਵ ਨਯੋ. ਪਥਵੀਧਾਤੂਤਿ ਸਹਜਰੂਪਧਮ੍ਮਾਨਂ ਪਤਿਟ੍ਠਾ ਧਾਤੁ, ਤਥਾ ਆਪੋਧਾਤੂਤਿ ਆਬਨ੍ਧਨਧਾਤੁ, ਤੇਜੋਧਾਤੂਤਿ ਪਰਿਪਾਚਨਧਾਤੁ, ਵਾਯੋਧਾਤੂਤਿ ਵਿਤ੍ਥਮ੍ਭਨਧਾਤੂਤਿ ਏਵਮੇਤ੍ਥ ਸਮਾਸੋ, ਭਾਵਤ੍ਥੋ ਚ ਵੇਦਿਤਬ੍ਬੋ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਪਰਤੋ ਆਗਮਿਸ੍ਸਤਿ.
ਏਵਂ ਤਿਕ੍ਖਪਞ੍ਞਸ੍ਸਾਤਿਆਦੀਸੁ ਏਵਨ੍ਤਿ ਯਥਾਦਸ੍ਸਿਤਂ ਪਾਲ਼ਿਂ ਪਚ੍ਚਾਮਸਤਿ. ਨਾਤਿਤਿਕ੍ਖਪਞ੍ਞਸ੍ਸ ਵਿਤ੍ਥਾਰਦੇਸਨਾਤਿ ਕਤ੍ਵਾ ਆਹ ‘‘ਤਿਕ੍ਖਪਞ੍ਞਸ੍ਸਾ’’ਤਿ. ਯਥਾ ਵਤ੍ਥਯੁਗਂ ਅਰਹਤੀਤਿ ਵਤ੍ਥਯੁਗਿਕੋ, ਏਵਂ ਧਾਤੁਕਮ੍ਮਟ੍ਠਾਨਂ ਅਰਹਤਿ, ਧਾਤੁਕਮ੍ਮਟ੍ਠਾਨਪਯੋਜਨੋਤਿ ਵਾ ਧਾਤੁਕਮ੍ਮਟ੍ਠਾਨਿਕੋ, ਤਸ੍ਸ ਧਾਤੁਕਮ੍ਮਟ੍ਠਾਨਿਕਸ੍ਸ.
ਛੇਕੋਤਿ ਤਂਤਂਸਮਞ੍ਞਾਯ ਕੁਸਲੋ, ਯਥਾਜਾਤੇ ਸੂਨਸ੍ਮਿਂ ਨਙ੍ਗੁਟ੍ਠਖੁਰਵਿਸਾਣਾਦਿਵਨ੍ਤੇ ਅਟ੍ਠਿਮਂਸਾਦਿਅਵਯਵਸਮੁਦਾਯੇ ਅਵਿਭਤ੍ਤੇ ਗਾਵੀਸਮਞ੍ਞਾ, ਨ ਵਿਭਤ੍ਤੇ, ਵਿਭਤ੍ਤੇ ਪਨ ਅਟ੍ਠਿਮਂਸਾਦਿਅਵਯਵਸਮਞ੍ਞਾਤਿ ਜਾਨਨਕੋ. ਗੋਘਾਤਕੋਤਿ ਜੀਵਿਕਤ੍ਥਾਯ ਗੁਨ੍ਨਂ ਘਾਤਕੋ. ਅਨ੍ਤੇਵਾਸੀਤਿ ਕਮ੍ਮਕਰਣਵਸੇਨ ਤਸ੍ਸ ਸਮੀਪਵਾਸੀ ਤਸ੍ਸ ਤਨ੍ਨਿਸ੍ਸਾਯ ਜੀਵਨਤੋ. ਵਿਨਿਵਿਜ੍ਝਿਤ੍ਵਾਤਿ ਏਕਸ੍ਮਿਂ ਠਾਨੇ ਅਞ੍ਞਂ ਵਿਨਿਵਿਜ੍ਝਿਤ੍ਵਾ. ਮਹਾਪਥਾਨਂ ਵੇਮਜ੍ਝਟ੍ਠਾਨਸਙ੍ਖਾਤੇਤਿ ਚਤੁਨ੍ਨਂ ਮਹਾਪਥਾਨਂ ਤਾਯ ਏਵ ਵਿਨਿਵਿਜ੍ਝਨਟ੍ਠਾਨਸਙ੍ਖਾਤੇ. ਯਸ੍ਮਾ ਤੇ ਚਤ੍ਤਾਰੋ ਮਹਾਪਥਾ ਚਤੂਹਿ ਦਿਸਾਹਿ ਆਗਨ੍ਤ੍ਵਾ ਸਮੋਹਿਤਾ ਵਿਯ ਹੋਨ੍ਤਿ, ਤਸ੍ਮਾ ਤਂ ਠਾਨਂ ਚਤੁਮਹਾਪਥਾਨਂ, ਤਸ੍ਮਿਂ ਚਤੁਮਹਾਪਥੇ. ਵਿਲੀਯਨ੍ਤਿ ਭਿਜ੍ਜਨ੍ਤਿ ਵਿਭਜ੍ਜਨ੍ਤੀਤਿ ਬੀਲਾ, ਭਾਗਾ, ਵ-ਕਾਰਸ੍ਸ ਬ-ਕਾਰਂ, ਇ-ਕਾਰਸ੍ਸ ਚ ਈ-ਕਾਰਂ ਕਤ੍ਵਾ. ਤਮੇਵ ਹਿ ਭਾਗਤ੍ਥਂ ਦਸ੍ਸੇਤੁਂ ‘‘ਕੋਟ੍ਠਾਸਂ ਕਤ੍ਵਾ’’ਤਿ ਵੁਤ੍ਤਂ. ਕਿਞ੍ਚਾਪਿ ਠਿਤ-ਸਦ੍ਦੋ ‘‘ਠਿਤੋ ਵਾ’’ਤਿਆਦੀਸੁ (ਅ. ਨਿ. ੫.੨੮) ਵਿਯ ਠਾਨਸਙ੍ਖਾਤਇਰਿਯਾਪਥਸਮਙ੍ਗਿਤਾਯ, ਗਤਿਨਿਵਤ੍ਤਿਅਤ੍ਥਤਾਯ ਵਾ ਠਾ-ਸਦ੍ਦਸ੍ਸ ਅਞ੍ਞਤ੍ਥ ਠਪੇਤ੍ਵਾ ਗਮਨਂ ਸੇਸਇਰਿਯਾਪਥਸਮਙ੍ਗਿਤਾਯ ਬੋਧਕੋ, ਇਧ ਪਨ ਯਥਾ ਤਥਾ ਰੂਪਕਾਯਸ੍ਸ ਪਵਤ੍ਤਿਆਕਾਰਬੋਧਕੋ ਅਧਿਪ੍ਪੇਤੋਤਿ ਆਹ ‘‘ਚਤੁਨ੍ਨਂ ਇਰਿਯਾਪਥਾਨਂ ਯੇਨ ਕੇਨਚਿ ਆਕਾਰੇਨ ਠਿਤਤ੍ਤਾਯਥਾਠਿਤ’’ਨ੍ਤਿ. ਤਤ੍ਥ ਆਕਾਰੇਨਾਤਿ ਠਾਨਾਦਿਨਾ ਰੂਪਕਾਯਸ੍ਸ ਪਵਤ੍ਤਿਆਕਾਰੇਨ. ਠਾਨਾਦਯੋ ਹਿ ਇਰਿਯਾਸਙ੍ਖਾਤਾਯ ਕਾਯਿਕਕਿਰਿਯਾਯ ਪਵਤ੍ਤਿਟ੍ਠਾਨਤਾਯ ‘‘ਇਰਿਯਾਪਥਾ’’ਤਿ ਵੁਚ੍ਚਨ੍ਤਿ. ਯਥਾਠਿਤਨ੍ਤਿ ਯਥਾਪਵਤ੍ਤਂ. ਯਥਾਵੁਤ੍ਤਟ੍ਠਾਨਮੇਵੇਤ੍ਥ ਪਣਿਧਾਨਨ੍ਤਿ ਅਧਿਪ੍ਪੇਤਨ੍ਤਿ ਆਹ ‘‘ਯਥਾਠਿਤਤ੍ਤਾਵ ਯਥਾਪਣਿਹਿਤ’’ਨ੍ਤਿ. ਠਿਤਨ੍ਤਿ ਵਾ ਕਾਯਸ੍ਸ ਠਾਨਸਙ੍ਖਾਤਇਰਿਯਾਪਥਸਮਾਯੋਗਪਰਿਦੀਪਨਂ. ਪਣਿਹਿਤਨ੍ਤਿ ਤਦਞ੍ਞਇਰਿਯਾਪਥਸਮਾਯੋਗਪਰਿਦੀਪਨਂ. ਠਿਤਨ੍ਤਿ ਵਾ ਕਾਯਸਙ੍ਖਾਤਾਨਂ ਰੂਪਧਮ੍ਮਾਨਂ ਤਸ੍ਮਿਂ ਤਸ੍ਮਿਂ ਖਣੇ ਸਕਿਚ੍ਚਵਸੇਨ ਅਵਟ੍ਠਾਨਪਰਿਦੀਪਨਂ. ਪਣਿਹਿਤਨ੍ਤਿ ਪਚ੍ਚਯਕਿਚ੍ਚਵਸੇਨ ਤੇਹਿ ਤੇਹਿ ਪਚ੍ਚਯੇਹਿ ਪਕਾਰਤੋ ਨਿਹਿਤਂ ਪਣਿਹਿਤਨ੍ਤਿ ਏਵਮੇਤ੍ਥ ਅਤ੍ਥੋ ਵੇਦਿਤਬ੍ਬੋ. ਧਾਤੁਸੋਤਿ ਧਾਤੁਂ ਧਾਤੁਂ ਪਥਵੀਆਦਿਧਾਤੁਂ ਵਿਸੁਂ ਵਿਸੁਂ ਕਤ੍ਵਾ. ਪਚ੍ਚਵੇਕ੍ਖਤੀਤਿ ਪਤਿ ਪਤਿ ਅਵੇਕ੍ਖਤਿ ਞਾਣਚਕ੍ਖੁਨਾ ਵਿਨਿਬ੍ਭੁਜਿਤ੍ਵਾ ਪਸ੍ਸਤਿ.
ਯਥਾ ਛੇਕੋਤਿਆਦਿਨਾ ਪਾਲ਼ਿਯਾ ਸਦ੍ਦਤ੍ਥਵਿਵਰਣਵਸੇਨ ਵੁਤ੍ਤਮੇਵਤ੍ਥਂ ਇਦਾਨਿ ਭਾਵਤ੍ਥਵਿਭਾਵਨਵਸੇਨ ਦਸ੍ਸੇਤੁਂ ‘‘ਯਥਾ ਗੋਘਾਤਕਸ੍ਸਾ’’ਤਿਆਦਿ ਵੁਤ੍ਤਂ. ਤਤ੍ਥ ਪੋਸੇਨ੍ਤਸ੍ਸਾਤਿ ਮਂਸੂਪਚਯਪਰਿਬ੍ਰੂਹਨਾਯ ਕੁਣ੍ਡਕਭਤ੍ਤਕਪ੍ਪਾਸਟ੍ਠਿਆਦੀਹਿ ਸਂਵਡ੍ਢੇਨ੍ਤਸ੍ਸ. ਵਧਿਤਂ ਮਤਨ੍ਤਿ ਹਿਂਸਿਤਂ ਹੁਤ੍ਵਾ ਮਤਂ. ਮਤਨ੍ਤਿ ਚ ਮਤਮਤ੍ਤਂ. ਤੇਨੇਵਾਹ ‘‘ਤਾਵਦੇਵਾ’’ਤਿ. ਗਾਵੀਤਿ ਸਞ੍ਞਾ ਨ ਅਨ੍ਤਰਧਾਯਤਿ ਯਾਨਿ ਅਙ੍ਗਪਚ੍ਚਙ੍ਗਾਨਿ ਉਪਾਦਾਯ ਗਾਵੀਸਮਞ੍ਞਾ, ਮਤਮਤ੍ਤਾਯਪਿ ਗਾਵਿਯਾ ਤੇਸਂ ਸਨ੍ਨਿਵੇਸਸ੍ਸ ਅਵਿਨਟ੍ਠਤ੍ਤਾ. ਬਿਲਾਸੋਤਿ ਬਿਲਂ ਬਿਲਂ ਕਤ੍ਵਾ. ਵਿਭਜਿਤ੍ਵਾਤਿ ਅਟ੍ਠਿਸਙ੍ਘਾਤਤੋ ਮਂਸਂ ਵਿਵੇਚੇਤ੍ਵਾ, ਤਤੋ ਵਾ ਵਿਵੇਚਿਤਂ ਮਂਸਂ ਭਾਗਸੋ ਕਤ੍ਵਾ. ਤੇਨੇਵਾਹ ‘‘ਮਂਸਸਞ੍ਞਾ ਪਵਤ੍ਤਤੀ’’ਤਿ. ਪਬ੍ਬਜਿਤਸ੍ਸਪਿ ਅਪਰਿਗ੍ਗਹਿਤਕਮ੍ਮਟ੍ਠਾਨਸ੍ਸ. ਘਨਵਿਨਿਬ੍ਭੋਗਨ੍ਤਿ ਸਨ੍ਤਤਿਸਮੂਹਕਿਚ੍ਚਘਨਾਨਂ ਵਿਨਿਬ੍ਭੁਜਨਂ ਵਿਵੇਚਨਂ. ਧਾਤੁਸੋ ਪਚ੍ਚਵੇਕ੍ਖਤੋਤਿ ਯਥਾਵੁਤ੍ਤਂ ਘਨਵਿਨਿਬ੍ਭੋਗਂ ਕਤ੍ਵਾ ਧਾਤੁਸੋ ਪਚ੍ਚਵੇਕ੍ਖਨ੍ਤਸ੍ਸ. ਸਤ੍ਤਸਞ੍ਞਾਤਿ ਅਤ੍ਤਾਨੁਦਿਟ੍ਠਿਵਸੇਨ ਪਵਤ੍ਤਾ ਸਤ੍ਤਸਞ੍ਞਾਤਿ ਵਦਨ੍ਤਿ, ਵੋਹਾਰਵਸੇਨ ਪਵਤ੍ਤਸਤ੍ਤਸਞ੍ਞਾਯਪਿ ਤਦਾ ਅਨ੍ਤਰਧਾਨਂ ਯੁਤ੍ਤਮੇਵ ਯਾਥਾਵਤੋ ਘਨਵਿਨਿਬ੍ਭੋਗਸ੍ਸ ਸਮ੍ਪਾਦਨਤੋ. ਏਵਂ ਹਿ ਸਤਿ ਯਥਾਵੁਤ੍ਤਓਪਮ੍ਮਤ੍ਥੇਨ ਓਪਮੇਯ੍ਯਤ੍ਥੋ ਅਞ੍ਞਦਤ੍ਥੁ ਸਂਸਨ੍ਦਤਿ ਸਮੇਤਿ. ਤੇਨੇਵਾਹ ‘‘ਧਾਤੁਵਸੇਨੇਵ ਚਿਤ੍ਤਂ ਸਨ੍ਤਿਟ੍ਠਤੀ’’ਤਿ.
੩੦੭. ਏਵਂ ਧਾਤੁਕਮ੍ਮਟ੍ਠਾਨਸ੍ਸ ਸਙ੍ਖੇਪਤੋ ਆਗਤਟ੍ਠਾਨਂ ਦਸ੍ਸੇਤ੍ਵਾ ਇਦਾਨਿ ਵਿਤ੍ਥਾਰਤੋ ਆਗਤਟ੍ਠਾਨਂ ਦਸ੍ਸੇਤੁਂ ‘‘ਮਹਾਹਤ੍ਥਿਪਦੂਪਮੇ ਪਨਾ’’ਤਿਆਦਿ ਵੁਤ੍ਤਂ. ਏਵਨ੍ਤਿ ਇਮਿਨਾ ਰਾਹੁਲੋਵਾਦ- (ਮ. ਨਿ. ੨.੧੧੩ ਆਦਯੋ) ਧਾਤੁਵਿਭਙ੍ਗੇਸੁ (ਮ. ਨਿ. ੩.੩੪੨ ਆਦਯੋ; ਵਿਭ. ੧੭੨ ਆਦਯੋ) ਧਾਤੁਕਮ੍ਮਟ੍ਠਾਨਸ੍ਸ ਵਿਤ੍ਥਾਰਤੋ ਆਗਮਨਮੇਵ ਉਪਸਂਹਰਤਿ, ਨ ਸਬ੍ਬਂ ਦੇਸਨਾਨਯਂ ਅਞ੍ਞਥਾਪਿ ਤਤ੍ਥ ਦੇਸਨਾਨਯਸ੍ਸ ਆਗਤਤ੍ਤਾ.
ਤਤ੍ਰਾਤਿ ਤਸ੍ਮਿਂ ਯਥਾਦਸ੍ਸਿਤੇ ਮਹਾਹਤ੍ਥਿਪਦੂਪਮਪਾਠੇ. ਅਜ੍ਝਤ੍ਤਿਕਾਤਿ ਸਤ੍ਤਸਨ੍ਤਾਨਪਰਿਯਾਪਨ੍ਨਾ. ਅਜ੍ਝਤ੍ਤਂ ਪਚ੍ਚਤ੍ਤਨ੍ਤਿ ਪਦਦ੍ਵਯੇਨਾਪਿ ਤਂਤਂਪਾਟਿਪੁਗ੍ਗਲਿਕਧਮ੍ਮੋ ਵੁਚ੍ਚਤੀਤਿ ਆਹ ‘‘ਉਭਯਮ੍ਪਿ ਨਿਯਕਸ੍ਸ ਅਧਿਵਚਨ’’ਨ੍ਤਿ. ਸਸਨ੍ਤਤਿਪਰਿਯਾਪਨ੍ਨਤਾਯ ਪਨ ਅਤ੍ਤਨਿ ਗਹੇਤਬ੍ਬਭਾਵੂਪਗਮਨਵਸੇਨ ਅਤ੍ਤਾਨਂ ਅਧਿਕਿਚ੍ਚ ਪਵਤ੍ਤਂ ਅਜ੍ਝਤ੍ਤਂ. ਤਂਤਂਸਨ੍ਤਤਿਪਰਿਯਾਪਨ੍ਨਤਾਯ ਪਚ੍ਚਤ੍ਤਂ. ਤੇਨੇਵਾਹ ‘‘ਅਤ੍ਤਨਿ ਪਵਤ੍ਤਤ੍ਤਾ ਅਜ੍ਝਤ੍ਤਂ, ਅਤ੍ਤਾਨਂ ਪਟਿਚ੍ਚ ਪਟਿਚ੍ਚ ਪਵਤ੍ਤਤ੍ਤਾ ਪਚ੍ਚਤ੍ਤ’’ਨ੍ਤਿ. ਕਕ੍ਖਲ਼ਨ੍ਤਿ ਕਥਿਨਂ. ਯਸ੍ਮਾ ਤਂ ਥਦ੍ਧਭਾਵੇਨ ਸਹਜਾਤਾਨਂ ਪਤਿਟ੍ਠਾ ਹੋਤਿ, ਤਸ੍ਮਾ ‘‘ਥਦ੍ਧ’’ਨ੍ਤਿ ਵੁਤ੍ਤਂ. ਖਰਿਗਤਨ੍ਤਿ ਖਰੀਸੁ ਖਰਸਭਾਵੇਸੁ ਗਤਂ ਤਪ੍ਪਰਿਯਾਪਨ੍ਨਂ, ਖਰਸਭਾਵਮੇਵਾਤਿ ਅਤ੍ਥੋ. ਯਸ੍ਮਾ ਪਨ ਖਰਸਭਾਵਂ ਫਰੁਸਾਕਾਰੇਨ ਉਪਟ੍ਠਾਨਤੋ ਫਰੁਸਾਕਾਰਂ ਹੋਤਿ, ਤਸ੍ਮਾ ਵੁਤ੍ਤਂ ‘‘ਫਰੁਸ’’ਨ੍ਤਿ. ਤੇਨਾਹ ‘‘ਦੁਤਿਯਂ ਆਕਾਰਵਚਨ’’ਨ੍ਤਿ. ਉਪਾਦਿਨ੍ਨਂ ਨਾਮ ਸਰੀਰਟ੍ਠਕਂ. ਤਂ ਪਨ ਕਮ੍ਮਸਮੁਟ੍ਠਾਨਤਂ ਸਨ੍ਧਾਯ ਉਪਾਦਿਨ੍ਨਮ੍ਪਿ ਅਤ੍ਥਿ ਅਨੁਪਾਦਿਨ੍ਨਮ੍ਪਿ, ਤਣ੍ਹਾਦੀਹਿ ਆਦਿਨ੍ਨਗਹਿਤਪਰਾਮਟ੍ਠਵਸੇਨ ਸਬ੍ਬਮ੍ਪੇਤਂ ਉਪਾਦਿਨ੍ਨਮੇਵਾਤਿ ਦਸ੍ਸੇਤੁਂ ‘‘ਉਪਾਦਿਨ੍ਨਨ੍ਤਿ ਦਲ਼੍ਹਂ ਆਦਿਨ੍ਨ’’ਨ੍ਤਿਆਦਿ ਵੁਤ੍ਤਂ. ਤਤ੍ਥ ‘‘ਮਮ’’ਨ੍ਤਿ ਗਹਿਤਂ ‘‘ਅਹ’’ਨ੍ਤਿ ਪਰਾਮਟ੍ਠਨ੍ਤਿ ਯੋਜਨਾ. ਸੇਯ੍ਯਥਿਦਨ੍ਤਿ ਕਥੇਤੁਕਮ੍ਯਤਾਪੁਚ੍ਛਾਵਾਚੀਤਿ ਆਹ ‘‘ਤਂ ਕਤਮਨ੍ਤਿ ਚੇਤਿ ਅਤ੍ਥੋ’’ਤਿ. ਤਤੋਤਿ ਪਚ੍ਛਾ. ਤਨ੍ਤਿ ਤਂ ਅਜ੍ਝਤ੍ਤਿਕਾਦਿਭੇਦਤੋ ਦਸ੍ਸਿਤਂ ਪਥਵੀਧਾਤੁਂ. ਦਸ੍ਸੇਨ੍ਤੋਤਿ ਵਤ੍ਥੁਵਿਭਾਗੇਨ ਦਸ੍ਸੇਨ੍ਤੋ. ਕਿਞ੍ਚਾਪਿ ਮਤ੍ਥਲੁਙ੍ਗਂ ਅਟ੍ਠਿਮਿਞ੍ਜੇਨੇਵ ਸਙ੍ਗਹੇਤ੍ਵਾ ਇਧ ਪਾਲ਼ਿਯਂ ਵਿਸੁਂ ਨ ਉਦ੍ਧਟਂ, ਪਟਿਸਮ੍ਭਿਦਾਮਗ੍ਗੇ (ਪਟਿ. ਮ. ੧.੪) ਪਨ ਵੀਸਤਿਯਾ ਆਕਾਰੇਹਿ ਪਰਿਪੁਣ੍ਣਂ ਕਤ੍ਵਾ ਦਸ੍ਸੇਤੁਂ ਵਿਸੁਂ ਗਹਿਤਨ੍ਤਿ ਤਮ੍ਪਿ ਸਙ੍ਗਣ੍ਹਨ੍ਤੋ ਥਦ੍ਧਭਾਵਾਧਿਕਤਾਯ ਪਥਵੀਧਾਤੁਕੋਟ੍ਠਾਸੇਸੁਯੇਵ ‘‘ਮਤ੍ਥਲੁਙ੍ਗਂ ਪਕ੍ਖਿਪਿਤ੍ਵਾ ਵੀਸਤਿਯਾ ਆਕਾਰੇਹਿ ਪਥਵੀਧਾਤੁ ਨਿਦ੍ਦਿਟ੍ਠਾਤਿ ਵੇਦਿਤਬ੍ਬਾ’’ਤਿ ਆਹ. ‘‘ਯਂ ਵਾ ਪਨਞ੍ਞਮ੍ਪਿ ਕਿਞ੍ਚੀ’’ਤਿ ਵਾ ਇਮਿਨਾ ਪਾਲ਼ਿਯਂ ਮਤ੍ਥਲੁਙ੍ਗਸ੍ਸ ਸਙ੍ਗਹੋ ਦਟ੍ਠਬ੍ਬੋ. ਤਸ੍ਮਾ ਇਧ ‘‘ਯਂ ਵਾ ਪਨਞ੍ਞਮ੍ਪਿ ਕਿਞ੍ਚੀ’’ਤਿ ਇਦਂ ਪੁਬ੍ਬਾਪਰਾਪੇਕ੍ਖਂ ‘‘ਮਤ੍ਥਲੁਙ੍ਗਂ ਪਕ੍ਖਿਪਿਤ੍ਵਾ ਵੀਸਤਿਯਾ ਆਕਾਰੇਹਿ ਪਥਵੀਧਾਤੁ ਨਿਦ੍ਦਿਟ੍ਠਾਤਿ ਵੇਦਿਤਬ੍ਬਾ, ਯਂ ਵਾ ਪਨਞ੍ਞਮ੍ਪਿ ਕਿਞ੍ਚੀ’’ਤਿ ਵਚਨਤੋ. ਪੁਨ ਯਂ ਵਾ ਪਨਞ੍ਞਮ੍ਪਿ ਕਿਞ੍ਚੀਤਿ ਅਵਸੇਸੇਸੁ ਤੀਸੁ ਕੋਟ੍ਠਾਸੇਸੂਤਿ ਯੋਜੇਤਬ੍ਬਂ. ਤੀਸੁ ਕੋਟ੍ਠਾਸੇਸੂਤਿ ਤਿਪ੍ਪਕਾਰੇਸੁ ਕੋਟ੍ਠਾਸੇਸੁ. ਨ ਹਿ ਤੇ ਤਯੋ ਕੋਟ੍ਠਾਸਾ.
ਵਿਸ੍ਸਨ੍ਦਨਭਾਵੇਨਾਤਿ ਪਗ੍ਘਰਣਸਭਾਵੇਨ. ਅਪ੍ਪੋਤੀਤਿ ਵਿਸਰਤਿ. ਪਪ੍ਪੋਤੀਤਿ ਪਾਪੁਣਾਤਿ, ਸਸਮ੍ਭਾਰਆਪਵਸੇਨ ਚੇਤਂ ਵੁਤ੍ਤਂ. ਸੋ ਹਿ ਵਿਸ੍ਸਨ੍ਦਨਭਾਵੇਨ ਸਸਮ੍ਭਾਰਪਥਵੀਸਙ੍ਖਾਤਂ ਤਂ ਤਂ ਠਾਨਂ ਵਿਸਰਤਿ, ਪਾਪੁਣਾਤਿ ਚ, ਲਕ੍ਖਣਾਪਵਸੇਨੇਵ ਵਾ. ਸੋਪਿ ਹਿ ਸਹਜਾਤਅਞ੍ਞਮਞ੍ਞਨਿਸ੍ਸਯਾਦਿਪਚ੍ਚਯਤਾਯ ਸੇਸਭੂਤਤ੍ਤਯਸਙ੍ਖਾਤਂ ਤਂ ਤਂ ਠਾਨਂ ਦ੍ਰਵਭਾਵਸਿਦ੍ਧੇਨ ਵਿਸ੍ਸਨ੍ਦਨਭਾਵੇਨ ਆਬਨ੍ਧਤ੍ਤਂ, ਆਸਤ੍ਤਤ੍ਤਂ, ਅਵਿਪ੍ਪਕਿਣ੍ਣਞ੍ਚ ਕਰੋਨ੍ਤਂ ‘‘ਅਪ੍ਪੋਤਿ ਪਪ੍ਪੋਤੀ’’ਤਿ ਵਤ੍ਤਬ੍ਬਤਂ ਅਰਹਤੀਤਿ.
ਤੇਜਨਵਸੇਨਾਤਿ ਨਿਸਿਤਭਾਵੇਨ ਤਿਕ੍ਖਭਾਵੇਨ. ਵੁਤ੍ਤਨਯੇਨਾਤਿ ਕਮ੍ਮਸਮੁਟ੍ਠਾਨਾਦਿਵਸੇਨ ‘‘ਨਾਨਾਵਿਧੇਸੂ’’ਤਿ ਆਪੋਧਾਤੁਯਂ ਵੁਤ੍ਤਨਯੇਨ. ਕੁਪਿਤੇਨਾਤਿ ਖੁਭਿਤੇਨ. ਉਸੁਮਜਾਤੋਤਿ ਉਸ੍ਮਾਭਿਭੂਤੋ. ਜੀਰਤੀਤਿ ਜਿਣ੍ਣੋ ਹੋਤਿ. ਤੇਜੋਧਾਤੁਵਸੇਨ ਲਬ੍ਭਮਾਨਾ ਇਮਸ੍ਮਿਂ ਕਾਯੇ ਜਰਾਪਵਤ੍ਤਿ ਪਾਕਟਜਰਾਵਸੇਨ ਵੇਦਿਤਬ੍ਬਾਤਿ ਦਸ੍ਸੇਤੁਂ ‘‘ਇਨ੍ਦ੍ਰਿਯਵੇਕਲ੍ਲਤ’’ਨ੍ਤਿਆਦਿ ਵੁਤ੍ਤਂ. ਸਰੀਰੇ ਪਕਤਿਉਸੁਮਂ ਅਤਿਕ੍ਕਮਿਤ੍ਵਾ ਉਣ੍ਹਭਾਵੋ ਸਨ੍ਤਾਪੋ, ਸਰੀਰਸ੍ਸ ਦਹਨਵਸੇਨ ਪਵਤ੍ਤੋ ਮਹਾਦਾਹੋ ਪਰਿਦਾਹੋਤਿ ਅਯਮੇਤੇਸਂ ਵਿਸੇਸੋ. ਯੇਨ ਜੀਰੀਯਤੀਤਿ ਚ ਏਕਾਹਿਕਾਦਿਜਰਰੋਗੇਨ ਜਰੀਯਤੀਤਿਪਿ ਅਤ੍ਥੋ ਯੁਜ੍ਜਤਿ. ਸਤਕ੍ਖਤ੍ਤੁਂ ਤਾਪੇਤ੍ਵਾ ਤਾਪੇਤ੍ਵਾ ਸੀਤੁਦਕੇ ਪਕ੍ਖਿਪਿਤ੍ਵਾ ਉਦ੍ਧਟਾ ਸਪ੍ਪਿ ‘‘ਸਤਧੋਤਸਪ੍ਪੀ’’ਤਿ ਵਦਨ੍ਤਿ. ਅਸਿਤਨ੍ਤਿ ਭੁਤ੍ਤਂ. ਖਾਯਿਤਨ੍ਤਿ ਖਾਦਿਤਂ. ਸਾਯਿਤਨ੍ਤਿ ਅਸ੍ਸਾਦਿਤਂ. ਸਮ੍ਮਾ ਪਰਿਪਾਕਂ ਗਚ੍ਛਤੀਤਿ ਸਮਵੇਪਾਕਿਨਿਯਾ ਗਹਣਿਯਾ ਵਸੇਨ ਵੁਤ੍ਤਂ, ਅਸਮ੍ਮਾਪਰਿਪਾਕੋਪਿ ਪਨ ਵਿਸਮਵੇਪਾਕਿਨਿਯਾ ਤਸ੍ਸਾ ਏਵ ਵਸੇਨ ਵੇਦਿਤਬ੍ਬੋ. ਰਸਾਦਿਭਾਵੇਨਾਤਿ ਰਸਰੁਧਿਰਮਂਸਮੇਦਨ੍ਹਾਰੁਅਟ੍ਠਿਅਟ੍ਠਿਮਿਞ੍ਜਸੁਕ੍ਕਵਸੇਨ. ਵਿਵੇਕਨ੍ਤਿ ਪੁਥੁਭਾਵਂ ਅਞ੍ਞਮਞ੍ਞਂ ਵਿਸਦਿਸਭਾਵਂ. ਅਸਿਤਾਦਿਭੇਦਸ੍ਸ ਹਿ ਆਹਾਰਸ੍ਸ ਪਰਿਣਾਮੇ ਰਸੋ ਹੋਤਿ, ਤਂ ਪਟਿਚ੍ਚ ਰਸਧਾਤੁ ਉਪ੍ਪਜ੍ਜਤੀਤਿ ਅਤ੍ਥੋ. ਏਵਂ ‘‘ਰਸਸ੍ਸ ਪਰਿਣਾਮੇ ਰੁਧਿਰ’’ਨ੍ਤਿਆਦਿਨਾ ਸਬ੍ਬਂ ਨੇਤਬ੍ਬਂ.
ਵਾਯਨਵਸੇਨਾਤਿ ਸਮੁਦੀਰਣਵਸੇਨ, ਸਵੇਗਗਮਨਵਸੇਨ ਵਾ. ਉਗ੍ਗਾਰਹਿਕ੍ਕਾਦੀਤਿ ਏਤ੍ਥ ਆਦਿ-ਸਦ੍ਦੇਨ ਉਦ੍ਦੇਕਖਿਪਨਾਦਿਪਵਤ੍ਤਨਕਵਾਤਾਨਂ ਸਙ੍ਗਹੋ ਦਟ੍ਠਬ੍ਬੋ. ਉਚ੍ਚਾਰਪਸ੍ਸਾਵਾਦੀਤਿ ਆਦਿ-ਸਦ੍ਦੇਨ ਪਿਤ੍ਤਸੇਮ੍ਹਲਸਿਕਾਕੇਵਲਦੁਗ੍ਗਨ੍ਧਾਦਿਨੀਹਰਣਕਾਨਂ ਸਙ੍ਗਹੋ ਦਟ੍ਠਬ੍ਬੋ. ਯਦਿਪਿ ਕੁਚ੍ਛਿ-ਸਦ੍ਦੋ ਉਦਰਪਰਿਯਾਯੋ, ਕੋਟ੍ਠ-ਸਦ੍ਦੇਨ ਪਨ ਅਨ੍ਤਨ੍ਤਰਸ੍ਸ ਵੁਚ੍ਚਮਾਨਤ੍ਤਾ ਤਦਵਸਿਟ੍ਠੋ ਉਦਰਪ੍ਪਦੇਸੋ ਇਧ ਕੁਚ੍ਛਿ-ਸਦ੍ਦੇਨ ਵੁਚ੍ਚਤੀਤਿ ਆਹ ‘‘ਕੁਚ੍ਛਿਸਯਾ ਵਾਤਾਤਿ ਅਨ੍ਤਾਨਂ ਬਹਿਵਾਤਾ’’ਤਿ. ਸਮਿਞ੍ਜਨਪਸਾਰਣਾਦੀਤਿ ਆਦਿ-ਸਦ੍ਦੇਨ ਆਲੋਕਨਵਿਲੋਕਨਉਦ੍ਧਰਣਾਤਿਹਰਣਾਦਿਕਾ ਸਬ੍ਬਾ ਕਾਯਿਕਕਿਰਿਯਾ ਸਙ੍ਗਹਿਤਾ. ‘‘ਅਸ੍ਸਾਸਪਸ੍ਸਾਸਾ ਚਿਤ੍ਤਸਮੁਟ੍ਠਾਨਾਵਾ’’ਤਿ ਏਤੇਨ ਅਸ੍ਸਾਸਪਸ੍ਸਾਸਾਨਂ ਸਰੀਰਂ ਮੁਞ੍ਚਿਤ੍ਵਾ ਪਵਤ੍ਤਿ ਨਤ੍ਥੀਤਿ ਦੀਪੇਤਿ. ਨ ਹਿ ਬਹਿਦ੍ਧਾ ਚਿਤ੍ਤਸਮੁਟ੍ਠਾਨਸ੍ਸ ਸਮ੍ਭਵੋ ਅਤ੍ਥੀਤਿ. ਯਦਿ ਏਵਂ ਕਥਂ ‘‘ਪਸ੍ਸਾਸੋਤਿ ਬਹਿਨਿਕ੍ਖਮਨਨਾਸਿਕਵਾਤੋ, ਦੀਘਨਾਸਿਕਸ੍ਸ ਨਾਸਿਕਗ੍ਗਂ, ਇਤਰਸ੍ਸ ਉਤ੍ਤਰੋਟ੍ਠਂ ਫੁਸਨ੍ਤੋ ਪਵਤ੍ਤਤੀ’’ਤਿ ਵਚਨਂ? ਤਂ ਨਿਕ੍ਖਮਨਾਕਾਰੇਨ ਪਵਤ੍ਤਿਯਾ ਚਿਤ੍ਤਸਮੁਟ੍ਠਾਨਸ੍ਸ, ਸਨ੍ਤਾਨੇ ਪਵਤ੍ਤਉਤੁਸਮੁਟ੍ਠਾਨਸ੍ਸ ਚ ਵਸੇਨ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਸਬ੍ਬਤ੍ਥਾਤਿ ਆਪੋਧਾਤੁਆਦੀਨਂ ਤਿਸ੍ਸਨ੍ਨਂ ਧਾਤੂਨਂ ਨਿਦ੍ਦੇਸਂ ਸਨ੍ਧਾਯਾਹ. ਤਤ੍ਥ ਆਪੋਧਾਤੁਨਿਦ੍ਦੇਸੇ ‘‘ਯਂ ਵਾ ਪਨਞ੍ਞ’’ਨ੍ਤਿ ਇਮਿਨਾ ਸਮ੍ਭਵਸ੍ਸ, ਤੇਜੋਧਾਤੁਨਿਦ੍ਦੇਸੇ ਸਰੀਰੇ ਪਾਕਤਿਕਉਸ੍ਮਾਯ, ਵਾਯੋਧਾਤੁਨਿਦ੍ਦੇਸੇ ਧਮਨਿਜਾਲਾਨੁਸਟਸ੍ਸ ਤਤ੍ਥ ਤਤ੍ਥ ਚਮ੍ਮਖੀਲਪੀਲ਼ਕਾਦਿਨਿਬ੍ਬਤ੍ਤਕਵਾਯੁਨੋ ਸਙ੍ਗਹੋ ਦਟ੍ਠਬ੍ਬੋ. ਸਮਿਞ੍ਜਨਾਦਿਨਿਬ੍ਬਤ੍ਤਕਵਾਤਾ ਚਿਤ੍ਤਸਮੁਟ੍ਠਾਨਾਵ. ਯਦਿ ਏਵਂ, ਕਥਂ ‘‘ਪੁਰਿਮਾ ਪਞ੍ਚ ਚਤੁਸਮੁਟ੍ਠਾਨਾ’’ਤਿ ਵਚਨਂ? ਨ ਹਿ ਸਮਿਞ੍ਜਨਾਦਿਨਿਬ੍ਬਤ੍ਤਕਾ ਏਵ ਅਙ੍ਗਮਙ੍ਗਾਨੁਸਾਰਿਨੋ ਵਾਤਾ, ਅਥ ਖੋ ਤਦਞ੍ਞੇਪੀਤਿ ਨਤ੍ਥਿ ਵਿਰੋਧੋ.
ਇਤੀਤਿ ਵੁਤ੍ਤਪ੍ਪਕਾਰਪਰਾਮਸਨਂ. ਤੇਨਾਹ ‘‘ਵੀਸਤਿਯਾ ਆਕਾਰੇਹੀ’’ਤਿਆਦਿ. ਏਤ੍ਥਾਤਿ ਏਤਸ੍ਮਿਂ ਵਿਤ੍ਥਾਰਤੋ ਆਗਤੇ ਧਾਤੁਕਮ੍ਮਟ੍ਠਾਨੇਤਿ ਅਤ੍ਥੋ. ਤੇਨ ਅਯਂ ਵਣ੍ਣਨਾ ਨ ਕੇਵਲਂ ਮਹਾਹਤ੍ਥਿਪਦੂਪਮਸ੍ਸੇਵ (ਮ. ਨਿ. ੧.੩੦੦ ਆਦਯੋ), ਅਥ ਖੋ ਮਹਾਰਾਹੁਲੋਵਾਦ- (ਮ. ਨਿ. ੨.੧੧੩ ਆਦਯੋ) ਧਾਤੁਵਿਭਙ੍ਗਸੁਤ੍ਤਾਨਮ੍ਪਿ (ਮ. ਨਿ. ੩.੩੪੨ ਆਦਯੋ) ਅਤ੍ਥਸਂਵਣ੍ਣਨਾ ਹੋਤਿਯੇਵਾਤਿ ਦਸ੍ਸਿਤਂ ਹੋਤਿ. ਭਾਵਨਾਨਯੇਪਿ ਏਸੇਵ ਨਯੋ. ਤਥਾ ਹਿ ਵੁਤ੍ਤਂ ‘‘ਏਵਂ ਰਾਹੁਲੋਵਾਦਧਾਤੁਵਿਭਙ੍ਗੇਸੁਪੀ’’ਤਿ.
੩੦੮. ਭਾਵਨਾਨਯੇਤਿ ਭਾਵਨਾਯ ਨਯੇ. ਯੇਨ ਕਮ੍ਮਟ੍ਠਾਨਭਾਵਨਾ ਇਜ੍ਝਤਿ, ਤਸ੍ਮਿਂ ਭਾਵਨਾਵਿਧਿਮ੍ਹੀਤਿ ਅਤ੍ਥੋ. ਏਤ੍ਥਾਤਿ ਧਾਤੁਕਮ੍ਮਟ੍ਠਾਨੇ. ਯਸ੍ਮਾ ਯੇਸਂ ‘‘ਤਿਕ੍ਖਪਞ੍ਞੋ ਨਾਤਿਤਿਕ੍ਖਪਞ੍ਞੋ’’ਤਿ ਇਮੇਸਂ ਦੁਵਿਧਾਨਂ ਪੁਗ੍ਗਲਾਨਂ ਵਸੇਨ ਇਦਂ ਕਮ੍ਮਟ੍ਠਾਨਂ ਦ੍ਵਿਧਾ ਆਗਤਂ ਦ੍ਵਿਧਾ ਦੇਸਿਤਂ, ਤਸ੍ਮਾ ਕਮ੍ਮਟ੍ਠਾਨਾਭਿਨਿਵੇਸੋਪਿ ਤੇਸਂ ਦ੍ਵਿਧਾਵ ਇਚ੍ਛਿਤਬ੍ਬੋਤਿ ਤਂ ਤਾਵ ਦਸ੍ਸੇਤੁਂ ‘‘ਤਿਕ੍ਖਪਞ੍ਞਸ੍ਸ ਭਿਕ੍ਖੁਨੋ’’ਤਿਆਦਿ ਆਰਦ੍ਧਂ. ਲੋਮਾ ਪਥਵੀਧਾਤੂਤੀਤਿ ਏਤ੍ਥ ਇਤਿ-ਸਦ੍ਦੋ ਆਦਿਅਤ੍ਥੋ. ਏਵਂ ਵਿਤ੍ਥਾਰਤੋ ਧਾਤੁਪਰਿਗ੍ਗਹੋਤਿ ‘‘ਕੇਸਾ ਪਥਵੀਧਾਤੁ, ਲੋਮਾ ਪਥਵੀਧਾਤੂ’’ਤਿਆਦਿਨਾ ਏਵਂ ਦ੍ਵਾਚਤ੍ਤਾਲੀਸਾਯ ਆਕਾਰੇਹਿ ਵਿਤ੍ਥਾਰਤੋ ਧਾਤੁਕਮ੍ਮਟ੍ਠਾਨਪਰਿਗ੍ਗਹੋ. ਪਪਞ੍ਚਤੋਤਿ ਦਨ੍ਧਤੋ ਸਣਿਕਤੋ. ਯਂ ਥਦ੍ਧਲਕ੍ਖਣਨ੍ਤਿ ਕੇਸਾਦੀਸੁ ਯਂ ਥਦ੍ਧਲਕ੍ਖਣਂ ਕਕ੍ਖਲ਼ਭਾਵੋ. ਯਂ ਆਬਨ੍ਧਨਲਕ੍ਖਣਨ੍ਤਿਆਦੀਸੁਪਿ ਏਸੇਵ ਨਯੋ. ਏਵਂ ਮਨਸਿ ਕਰੋਤੋਤਿ ਵਤ੍ਥੁਂ ਅਨਾਮਸਿਤ੍ਵਾ ਏਵਂ ਲਕ੍ਖਣਮਤ੍ਤਤੋ ਮਨਸਿਕਾਰਂ ਪਵਤ੍ਤੇਨ੍ਤਸ੍ਸ. ਅਸ੍ਸਾਤਿ ਤਿਕ੍ਖਪਞ੍ਞਸ੍ਸ. ਕਮ੍ਮਟ੍ਠਾਨਂ ਪਾਕਟਂ ਹੋਤੀਤਿ ਯੋਗਕਮ੍ਮਸ੍ਸ ਪਵਤ੍ਤਿਟ੍ਠਾਨਭੂਤਂ ਤਦੇਵ ਲਕ੍ਖਣਂ ਵਿਭੂਤਂ ਹੋਤਿ, ਤਸ੍ਸ ਵਾ ਲਕ੍ਖਣਸ੍ਸ ਸੁਟ੍ਠੁ ਉਪਟ੍ਠਾਨਤੋ ਤਂ ਆਰਬ੍ਭ ਪਵਤ੍ਤਮਾਨਂ ਮਨਸਿਕਾਰਸਙ੍ਖਾਤਂ ਕਮ੍ਮਟ੍ਠਾਨਂ ਵਿਭੂਤਂ ਵਿਸਦਂ ਹੋਤਿ, ਤਿਕ੍ਖਪਞ੍ਞਸ੍ਸ ਇਨ੍ਦ੍ਰਿਯਪਾਟਵੇਨ ਸਂਖਿਤ੍ਤਰੁਚਿਭਾਵਤੋ. ਸਬ੍ਬਸੋ ਮਨ੍ਦਪਞ੍ਞਸ੍ਸ ਭਾਵਨਾਵ ਨ ਇਜ੍ਝਤੀਤਿ ਆਹ ‘‘ਨਾਤਿਤਿਕ੍ਖਪਞ੍ਞਸ੍ਸਾ’’ਤਿ. ਏਵਂ ਮਨਸਿ ਕਰੋਤੋਤਿ ਵੁਤ੍ਤਨਯੇਨ ਸਙ੍ਖੇਪਤੋ ਮਨਸਿ ਕਰੋਤੋ. ਅਨ੍ਧਕਾਰਂ ਅਵਿਭੂਤਂ ਹੋਤੀਤਿ ਅਨੁਪਟ੍ਠਾਨਤੋ ਅਨ੍ਧਂ ਵਿਯ ਕਰੋਨ੍ਤਂ ਅਪਾਕਟਂ ਹੋਤਿ ਕਮ੍ਮਟ੍ਠਾਨਨ੍ਤਿ ਯੋਜਨਾ. ਪੁਰਿਮਨਯੇਨਾਤਿ ‘‘ਕੇਸਾ ਪਥਵੀਧਾਤੂ’’ਤਿਆਦਿਨਾ ਪੁਬ੍ਬੇ ਵੁਤ੍ਤਨਯੇਨ. ਵਤ੍ਥੁਆਮਸਨੇਨ ਵਿਤ੍ਥਾਰਤੋ ਮਨਸਿ ਕਰੋਨ੍ਤਸ੍ਸ ਪਾਕਟਂ ਹੋਤਿ ਕਮ੍ਮਟ੍ਠਾਨਂ, ਨਾਤਿਤਿਕ੍ਖਪਞ੍ਞਸ੍ਸ ਅਖਿਪ੍ਪਨਿਸਨ੍ਤਿਤਾਯ ਵਿਤ੍ਥਾਰਰੁਚਿਭਾਵਤੋ.
ਇਦਾਨਿ ਯਥਾਵੁਤ੍ਤਮਤ੍ਥਂ ਉਪਮਾਯ ਵਿਭਾਵੇਤੁਂ ‘‘ਯਥਾ ਦ੍ਵੀਸੁ ਭਿਕ੍ਖੂਸੂ’’ਤਿਆਦਿ ਵੁਤ੍ਤਂ. ਤਤ੍ਥ ਪੇਯ੍ਯਾਲਮੁਖਨ੍ਤਿ ਪੇਯ੍ਯਾਲਪਾਲ਼ਿਯਾ ਮੁਖਭੂਤਂ ਦ੍ਵਾਰਭੂਤਂ ਆਦਿਤੋ ਵਾਰਂ, ਵਾਰਦ੍ਵਯਂ ਵਾ. ਵਿਤ੍ਥਾਰੇਤ੍ਵਾਤਿ ਅਨਵਸੇਸਤੋ ਸਜ੍ਝਾਯਿਤ੍ਵਾ. ਉਭਤੋਕੋਟਿਵਸੇਨੇਵਾਤਿ ਤਸ੍ਸ ਤਸ੍ਸ ਵਾਰਸ੍ਸ ਆਦਿਅਨ੍ਤਗ੍ਗਹਣਵਸੇਨੇਵ. ਓਟ੍ਠਪਰਿਯਾਹਤਮਤ੍ਤਨ੍ਤਿ ਓਟ੍ਠਾਨਂ ਸਮ੍ਫੁਸਨਮਤ੍ਤਂ. ਯਥਾ ਗਨ੍ਥਪਰਿਵਤ੍ਤਨੇ ਤਿਕ੍ਖਪਞ੍ਞਸ੍ਸ ਭਿਕ੍ਖੁਨੋ ਸਙ੍ਖੇਪੋ ਰੁਚ੍ਚਤਿ, ਨ ਵਿਤ੍ਥਾਰੋ. ਇਤਰਸ੍ਸ ਚ ਵਿਤ੍ਥਾਰੋ ਰੁਚ੍ਚਤਿ, ਨ ਸਙ੍ਖੇਪੋ, ਏਵਂ ਭਾਵਨਾਨਯੇਪੀਤਿ ਉਪਮਾਸਂਸਨ੍ਦਨਂ ਵੇਦਿਤਬ੍ਬਂ.
ਤਸ੍ਮਾਤਿ ਯਸ੍ਮਾ ਤਿਕ੍ਖਪਞ੍ਞਸ੍ਸ ਸਙ੍ਖੇਪੋ, ਨਾਤਿਤਿਕ੍ਖਪਞ੍ਞਸ੍ਸ ਚ ਵਿਤ੍ਥਾਰੋ ਸਪ੍ਪਾਯੋ, ਤਸ੍ਮਾ. ਯਸ੍ਮਾ ਕਮ੍ਮਟ੍ਠਾਨਂ ਅਨੁਯੁਞ੍ਜਿਤੁਕਾਮਸ੍ਸ ਸੀਲਵਿਸੋਧਨਾਦਿਪੁਬ੍ਬਕਿਚ੍ਚਂ ਇਚ੍ਛਿਤਬ੍ਬਂ, ਤਂ ਸਬ੍ਬਾਕਾਰਸਮ੍ਪਨ੍ਨਂ ਹੇਟ੍ਠਾ ਵੁਤ੍ਤਮੇਵਾਤਿ ਇਧ ਨ ਆਮਟ੍ਠਂ. ਯਸ੍ਮਾ ਪਨ ਵਿਵੇਕਟ੍ਠਕਾਯਸ੍ਸ, ਵਿਵੇਕਟ੍ਠਚਿਤ੍ਤਸ੍ਸੇਵ ਚ ਭਾਵਨਾ ਇਜ੍ਝਤਿ, ਨ ਇਤਰਸ੍ਸ, ਤਸ੍ਮਾ ਤਦੁਭਯਂ ਦਸ੍ਸੇਨ੍ਤੋ ‘‘ਰਹੋਗਤੇਨ ਪਟਿਸਲ੍ਲੀਨੇਨਾ’’ਤਿ ਆਹ. ਤਤ੍ਥ ਰਹੋਗਤੇਨਾਤਿ ਰਹਸਿ ਗਤੇਨ, ਏਕਾਕਿਨਾ ਭਾਵਨਾਨੁਕੂਲਟ੍ਠਾਨਂ ਉਪਗਤੇਨਾਤਿ ਅਤ੍ਥੋ. ਪਟਿਸਲ੍ਲੀਨੇਨਾਤਿ ਪਤਿ ਪਤਿ ਪੁਥੁਤ੍ਤਾਰਮ੍ਮਣਤੋ ਚਿਤ੍ਤਂ ਨਿਸੇਧੇਤ੍ਵਾ ਕਮ੍ਮਟ੍ਠਾਨੇ ਸਲ੍ਲੀਨੇਨ, ਤਤ੍ਥ ਸਂਸਿਲਿਟ੍ਠਚਿਤ੍ਤੇਨਾਤਿ ਅਤ੍ਥੋ. ਸਕਲਮ੍ਪਿ ਅਤ੍ਤਨੋ ਰੂਪਕਾਯਂ ਆਵਜ੍ਜੇਤ੍ਵਾਤਿ ਉਦ੍ਧਂ ਪਾਦਤਲਾ, ਅਧੋ ਕੇਸਮਤ੍ਥਕਾ, ਤਿਰਿਯਂ ਤਚਪਰਿਯਨ੍ਤਂ ਸਬ੍ਬਮ੍ਪਿ ਅਤ੍ਤਨੋ ਕਰਜਕਾਯਂ ਧਾਤੁਵਸੇਨ ਮਨਸਿ ਕਰੋਨ੍ਤੋ ਯਸ੍ਮਾ ਚਾਤੁਮਹਾਭੂਤਿਕੋ ਅਯਂ ਕਾਯੋ, ਤਸ੍ਮਾ ‘‘ਅਤ੍ਥਿ ਇਮਸ੍ਮਿਂ ਕਾਯੇ ਪਥਵੀਧਾਤੁ ਆਪੋਧਾਤੁ ਤੇਜੋਧਾਤੁ ਵਾਯੋਧਾਤੂ’’ਤਿ ਚਤੁਮਹਾਭੂਤਵਸੇਨ ਸਮਨ੍ਨਾਹਰਿਤ੍ਵਾਤਿ ਅਤ੍ਥੋ. ਇਦਾਨਿ ਤਾਸਂ ਧਾਤੂਨਂ ਲਕ੍ਖਣਤੋ, ਉਪਟ੍ਠਾਨਾਕਾਰਤੋ ਚ ਮਨਸਿਕਾਰਵਿਧਿਂ ਦਸ੍ਸੇਤੁਂ ‘‘ਯੋ ਇਮਸ੍ਮਿਂ ਕਾਯੇ’’ਤਿਆਦਿ ਵੁਤ੍ਤਂ.
ਤਤ੍ਥ ਥਦ੍ਧਭਾਵੋਤਿ ਲਕ੍ਖਣਮਾਹ. ਥਦ੍ਧਤ੍ਤਲਕ੍ਖਣਾ ਹਿ ਪਥਵੀਧਾਤੁ. ਖਰਭਾਵੋਤਿ ਉਪਟ੍ਠਾਨਾਕਾਰਂ, ਞਾਣੇਨ ਗਹੇਤਬ੍ਬਾਕਾਰਨ੍ਤਿ ਅਤ੍ਥੋ. ਦ੍ਰਵਭਾਵੋ ਲਕ੍ਖਣਂ ਆਪੋਧਾਤੁਯਾ ਪਗ੍ਘਰਣਸਭਾਵਤ੍ਤਾ. ਆਬਨ੍ਧਨਂ ਉਪਟ੍ਠਾਨਾਕਾਰੋ. ਉਣ੍ਹਭਾਵੋ ਲਕ੍ਖਣਂ ਤੇਜੋਧਾਤੁਯਾ ਉਸ੍ਮਾਸਭਾਵਤ੍ਤਾ. ਪਰਿਪਾਚਨਂ ਉਪਟ੍ਠਾਨਾਕਾਰੋ. ਵਿਤ੍ਥਮ੍ਭਨਂ ਲਕ੍ਖਣਂ ਵਾਯੋਧਾਤੁਯਾ ਉਪਤ੍ਥਮ੍ਭਨਸਭਾਵਤ੍ਤਾ. ਸਮੁਦੀਰਣਂ ਉਪਟ੍ਠਾਨਾਕਾਰੋ, ਉਪਟ੍ਠਾਨਾਕਾਰੋ ਚ ਨਾਮ ਧਾਤੂਨਂ ਸਕਿਚ੍ਚਕਰਣਵਸੇਨ ਞਾਣਸ੍ਸ ਵਿਭੂਤਾਕਾਰੋ. ਕਸ੍ਮਾ ਪਨੇਤ੍ਥ ਉਭਯਗ੍ਗਹਣਂ? ਪੁਗ੍ਗਲਜ੍ਝਾਸਯਤੋ. ਏਕਚ੍ਚਸ੍ਸ ਹਿ ਧਾਤੁਯੋ ਮਨਸਿ ਕਰੋਨ੍ਤਸ੍ਸ ਤਾ ਸਭਾਵਤੋ ਗਹੇਤਬ੍ਬਤਂ ਗਚ੍ਛਨ੍ਤਿ, ਏਕਚ੍ਚਸ੍ਸ ਸਕਿਚ੍ਚਕਰਣਤੋ, ਯੋ ਰਸੋਤਿ ਵੁਚ੍ਚਤਿ. ਤਤ੍ਰਾਯਂ ਯੋਗੀ ਧਾਤੁਯੋ ਮਨਸਿ ਕਰੋਨ੍ਤੋ ਆਦਿਤੋ ਪਚ੍ਚੇਕਂ ਸਲਕ੍ਖਣਤੋ, ਸਰਸਤੋਪਿ ਪਰਿਗ੍ਗਣ੍ਹਾਤਿ. ਤੇਨਾਹ ‘‘ਯੋ ਇਮਸ੍ਮਿਂ ਕਾਯੇ ਥਦ੍ਧਭਾਵੋ ਵਾ ਖਰਭਾਵੋ ਵਾ…ਪੇ… ਏਵਂ ਸਂਖਿਤ੍ਤੇਨ ਧਾਤੁਯੋ ਪਰਿਗ੍ਗਹੇਤ੍ਵਾ’’ਤਿ. ਤਤ੍ਥ ਪਰਿਗ੍ਗਹੇਤ੍ਵਾਤਿ ਪਰਿਗ੍ਗਾਹਕਭੂਤੇਨ ਞਾਣੇਨ ਧਾਤੁਯੋ ਲਕ੍ਖਣਤੋ, ਰਸਤੋ ਵਾ ਪਰਿਚ੍ਛਿਜ੍ਜ ਗਹੇਤ੍ਵਾ. ਅਯਂ ਤਾਵ ਸਂਖਿਤ੍ਤਤੋ ਭਾਵਨਾਨਯੇ ਕਮ੍ਮਟ੍ਠਾਨਾਭਿਨਿਵੇਸੋ.
ਏਵਂ ਪਨ ਧਾਤੁਯੋ ਪਰਿਗ੍ਗਹੇਤ੍ਵਾ ‘‘ਅਤ੍ਥਿ ਇਮਸ੍ਮਿਂ ਕਾਯੇ ਪਥਵੀਧਾਤੁ ਥਦ੍ਧਭਾਵੋ ਵਾ ਖਰਭਾਵੋ ਵਾ, ਆਪੋਧਾਤੁ ਦ੍ਰਵਭਾਵੋ ਵਾ ਆਬਨ੍ਧਨਭਾਵੋ ਵਾ, ਤੇਜੋਧਾਤੁ ਉਣ੍ਹਭਾਵੋ ਵਾ ਪਰਿਪਾਚਨਭਾਵੋ ਵਾ, ਵਾਯੋਧਾਤੁ ਵਿਤ੍ਥਮ੍ਭਨਭਾਵੋ ਵਾ ਸਮੁਦੀਰਣਭਾਵੋ ਵਾ’’ਤਿ ਏਵਂ ਲਕ੍ਖਣਾਦੀਹਿ ਸਦ੍ਧਿਂਯੇਵ ਧਾਤੁਯੋ ਮਨਸਿ ਕਰੋਨ੍ਤੇਨ ਕਾਲਸਤਮ੍ਪਿ ਕਾਲਸਹਸ੍ਸਮ੍ਪਿ ਪੁਨਪ੍ਪੁਨਂ ਆਵਜ੍ਜਿਤਬ੍ਬਂ ਮਨਸਿ ਕਾਤਬ੍ਬਂ, ਤਕ੍ਕਾਹਤਂ ਵਿਤਕ੍ਕਪਰਿਯਾਹਤਂ ਕਾਤਬ੍ਬਂ. ਤਸ੍ਸੇਵਂ ਮਨਸਿ ਕਰੋਤੋ ਯਂ ਲਕ੍ਖਣਾਦੀਸੁ ਸੁਪਾਕਟਂ ਹੁਤ੍ਵਾ ਉਪਟ੍ਠਾਤਿ, ਤਦੇਵ ਗਹੇਤ੍ਵਾ ਇਤਰਂ ਵਿਸ੍ਸਜ੍ਜੇਤ੍ਵਾ ਤੇਨ ਸਦ੍ਧਿਂ ‘‘ਪਥਵੀਧਾਤੁ ਆਪੋਧਾਤੂ’’ਤਿਆਦਿਨਾ ਮਨਸਿਕਾਰੋ ਪਵਤ੍ਤੇਤਬ੍ਬੋ. ਏਵਂ ਮਨਸਿ ਕਰੋਨ੍ਤੇਨ ਹਿ ਅਨੁਪੁਬ੍ਬਤੋ, ਨਾਤਿਸੀਘਤੋ, ਨਾਤਿਸਣਿਕਤੋ, ਵਿਕ੍ਖੇਪਪਟਿਬਾਹਨਤੋ, ਪਣ੍ਣਤ੍ਤਿਸਮਤਿਕ੍ਕਮਨਤੋ, ਅਨੁਪਟ੍ਠਾਨਮੁਞ੍ਚਨਤੋ, ਲਕ੍ਖਣਤੋ, ਤਯੋ ਚ ਸੁਤ੍ਤਨ੍ਤਾਤਿ ਇਮੇਹਿ ਦਸਹਾਕਾਰੇਹਿ ਮਨਸਿਕਾਰਕੋਸਲ੍ਲਂ ਅਨੁਟ੍ਠਾਤਬ੍ਬਂ.
ਤਤ੍ਥ ਅਨੁਪੁਬ੍ਬਤੋਤਿ ਅਨੁਪਟਿਪਾਟਿਤੋ ਆਚਰਿਯਸ੍ਸ ਸਨ੍ਤਿਕੇ ਉਗ੍ਗਹਿਤਪਟਿਪਾਟਿਤੋ, ਸਾ ਚ ਦੇਸਨਾਪਟਿਪਾਟਿਯੇਵ. ਏਵਂ ਅਨੁਪੁਬ੍ਬਤੋ ਮਨਸਿ ਕਰੋਨ੍ਤੇਨਾਪਿ ਨਾਤਿਸੀਘਤੋ ਮਨਸਿ ਕਾਤਬ੍ਬਂ. ਅਤਿਸੀਘਤੋ ਮਨਸਿ ਕਰੋਤੋ ਹਿ ਅਪਰਾਪਰਂ ਕਮ੍ਮਟ੍ਠਾਨਮਨਸਿਕਾਰੋ ਨਿਰਨ੍ਤਰਂ ਪਵਤ੍ਤਤਿ, ਕਮ੍ਮਟ੍ਠਾਨਂ ਪਨ ਅਵਿਭੂਤਂ ਹੋਤਿ, ਨ ਵਿਸੇਸਂ ਆਵਹਤਿ. ਤਸ੍ਮਾ ਨਾਤਿਸੀਘਤੋ ਮਨਸਿ ਕਾਤਬ੍ਬਂ. ਯਥਾ ਚ ਨਾਤਿਸੀਘਤੋ, ਏਵਂ ਨਾਤਿਸਣਿਕਤੋਪਿ. ਅਤਿਸਣਿਕਤੋ ਮਨਸਿ ਕਰੋਤੋ ਹਿ ਕਮ੍ਮਟ੍ਠਾਨਂ ਪਰਿਯੋਸਾਨਂ ਨ ਗਚ੍ਛਤਿ, ਵਿਸੇਸਾਧਿਗਮਸ੍ਸ ਪਚ੍ਚਯੋ ਨ ਹੋਤਿ. ਅਤਿਸੀਘਂ ਅਤਿਸਣਿਕਞ੍ਚ ਮਗ੍ਗਂ ਗਚ੍ਛਨ੍ਤਾ ਪੁਰਿਸਾ ਏਤ੍ਥ ਨਿਦਸ੍ਸੇਤਬ੍ਬਾ. ਵਿਕ੍ਖੇਪਪਟਿਬਾਹਨਤੋਤਿ ਕਮ੍ਮਟ੍ਠਾਨਂ ਵਿਸ੍ਸਜ੍ਜੇਤ੍ਵਾ ਬਹਿਦ੍ਧਾ ਪੁਥੁਤ੍ਤਾਰਮ੍ਮਣੇ ਚੇਤਸੋ ਵਿਕ੍ਖੇਪੋ ਪਟਿਬਾਹਿਤਬ੍ਬੋ. ਬਹਿਦ੍ਧਾ ਵਿਕ੍ਖੇਪੇ ਹਿ ਸਤਿ ਕਮ੍ਮਟ੍ਠਾਨਾ ਪਰਿਹਾਯਤਿ ਪਰਿਧਂਸਤਿ. ਏਕਪਦਿਕਮਗ੍ਗਗਾਮੀ ਪੁਰਿਸੋ ਚੇਤ੍ਥ ਨਿਦਸ੍ਸੇਤਬ੍ਬੋ. ਪਣ੍ਣਤ੍ਤਿਸਮਤਿਕ੍ਕਮਨਤੋਤਿ ‘‘ਯਾ ਅਯਂ ਪਥਵੀਧਾਤੂ’’ਤਿਆਦਿਕਾ ਪਣ੍ਣਤ੍ਤਿ, ਤਂ ਅਤਿਕ੍ਕਮਿਤ੍ਵਾ ਲਕ੍ਖਣੇਸੁ ਏਵ ਚਿਤ੍ਤਂ ਠਪੇਤਬ੍ਬਂ.
ਏਵਂ ਪਣ੍ਣਤ੍ਤਿਂ ਵਿਜਹਿਤ੍ਵਾ ਕਕ੍ਖਲ਼ਲਕ੍ਖਣਾਦੀਸੁ ਏਵ ਮਨਸਿਕਾਰਂ ਪਵਤ੍ਤੇਨ੍ਤਸ੍ਸ ਲਕ੍ਖਣਾਨਿ ਸੁਪਾਕਟਾਨਿ ਸੁਵਿਭੂਤਾਨਿ ਹੁਤ੍ਵਾ ਉਪਟ੍ਠਹਨ੍ਤਿ. ਤਸ੍ਸੇਵਂ ਪੁਨਪ੍ਪੁਨਂ ਮਨਸਿਕਾਰਵਸੇਨ ਚਿਤ੍ਤਂ ਆਸੇਵਨਂ ਲਭਤਿ. ਸਬ੍ਬੋ ਰੂਪਕਾਯੋ ਧਾਤੁਮਤ੍ਤਤੋ ਉਪਟ੍ਠਾਤਿ ਸੁਞ੍ਞੋ ਨਿਸ੍ਸਤ੍ਤੋ ਨਿਜ੍ਜੀਵੋ ਯਨ੍ਤਂ ਵਿਯ ਯਨ੍ਤਸੁਤ੍ਤੇਨ ਅਪਰਾਪਰਂ ਪਰਿਵਤ੍ਤਮਾਨੋ. ਸਚੇ ਪਨ ਬਹਿਦ੍ਧਾਪਿ ਮਨਸਿਕਾਰਂ ਉਪਸਂਹਰਤਿ, ਅਥਸ੍ਸ ਆਹਿਣ੍ਡਨ੍ਤਾ ਮਨੁਸ੍ਸਤਿਰਚ੍ਛਾਨਾਦਯੋ ਸਤ੍ਤਾਕਾਰਂ ਵਿਜਹਿਤ੍ਵਾ ਧਾਤੁਸਮੂਹਵਸੇਨੇਵ ਉਪਟ੍ਠਹਨ੍ਤਿ, ਤੇਹਿ ਕਰਿਯਮਾਨਾ ਕਿਰਿਯਾ ਧਾਤੁਮਯੇਨ ਯਨ੍ਤੇਨ ਪਵਤ੍ਤਿਯਮਾਨਾ ਹੁਤ੍ਵਾ ਉਪਟ੍ਠਾਤਿ, ਤੇਹਿ ਅਜ੍ਝੋਹਰਿਯਮਾਨਂ ਪਾਨਭੋਜਨਾਦਿ ਧਾਤੁਸਙ੍ਘਾਤੇ ਪਕ੍ਖਿਪ੍ਪਮਾਨੋ ਧਾਤੁਸਙ੍ਘਾਤੋ ਵਿਯ ਉਪਟ੍ਠਾਤਿ. ਅਥਸ੍ਸ ਤਥਾ ਲਦ੍ਧਾਸੇਵਨਮ੍ਪਿ ਚਿਤ੍ਤਂ ਯਦਿ ਅਚ੍ਚਾਰਦ੍ਧਵੀਰਿਯਤਾਯ ਉਦ੍ਧਚ੍ਚਵਸੇਨ ਵਾ ਅਤਿਲੀਨਵੀਰਿਯਤਾਯ ਕੋਸਜ੍ਜਵਸੇਨ ਵਾ ਭਾਵਨਾਵਿਧਿਂ ਨ ਓਤਰੇਯ੍ਯ, ਤਦਾ ਅਧਿਚਿਤ੍ਤਸੁਤ੍ਤਂ (ਅ. ਨਿ. ੩.੧੦੩), ਅਨੁਤ੍ਤਰਸੀਤਿਭਾਵਸੁਤ੍ਤਂ (ਅ. ਨਿ. ੬.੮੫), ਬੋਜ੍ਝਙ੍ਗਸੁਤ੍ਤਨ੍ਤਿ (ਸਂ. ਨਿ. ੫.੧੯੪-੧੯੫) ਇਮੇਸੁ ਤੀਸੁ ਸੁਤ੍ਤੇਸੁ ਆਗਤਨਯੇਨ ਵੀਰਿਯਸਮਾਧਿਯੋਜਨਾ ਕਾਤਬ੍ਬਾ. ਤੇਨ ਵੁਤ੍ਤਂ ‘‘ਤਯੋ ਚ ਸੁਤ੍ਤਨ੍ਤਾ’’ਤਿ. ਏਵਂ ਪਨ ਵੀਰਿਯਸਮਤਂ ਯੋਜੇਤ੍ਵਾ ਤਸ੍ਮਿਂਯੇਵ ਲਕ੍ਖਣੇ ਮਨਸਿਕਾਰਂ ਪਵਤ੍ਤੇਨ੍ਤਸ੍ਸ ਯਦਾ ਸਦ੍ਧਾਦੀਨਿ ਇਨ੍ਦ੍ਰਿਯਾਨਿ ਲਦ੍ਧਸਮਤਾਨਿ ਸੁਵਿਸਦਾਨਿ ਪਵਤ੍ਤਨ੍ਤਿ, ਤਦਾ ਅਸਦ੍ਧਿਯਾਦੀਨਂ ਦੂਰੀਭਾਵੇਨ ਸਾਤਿਸਯਂ ਥਾਮਪ੍ਪਤ੍ਤੇਹਿ ਸਤ੍ਤਹਿ ਬਲੇਹਿ ਲਦ੍ਧੂਪਤ੍ਥਮ੍ਭਾਨਿ ਵਿਤਕ੍ਕਾਦੀਨਿ ਝਾਨਙ੍ਗਾਨਿ ਪਟੁਤਰਾਨਿ ਹੁਤ੍ਵਾ ਪਾਤੁਭਵਨ੍ਤਿ, ਤੇਸਂ ਉਜੁਵਿਪਚ੍ਚਨੀਕਤਾਯ ਨੀਵਰਣਾਨਿ ਵਿਕ੍ਖਮ੍ਭਿਤਾਨਿਯੇਵ ਹੋਨ੍ਤਿ ਸਦ੍ਧਿਂ ਤਦੇਕਟ੍ਠੇਹਿ ਪਾਪਧਮ੍ਮੇਹਿ. ਏਤ੍ਤਾਵਤਾ ਚਾਨੇਨ ਉਪਚਾਰਜ੍ਝਾਨਂ ਸਮਧਿਗਤਂ ਹੋਤਿ ਧਾਤੁਲਕ੍ਖਣਾਰਮ੍ਮਣਂ. ਤੇਨ ਵੁਤ੍ਤਂ ‘‘ਪੁਨਪ੍ਪੁਨਂ ਪਥਵੀਧਾਤੁ ਆਪੋਧਾਤੂਤਿ…ਪੇ… ਉਪਚਾਰਮਤ੍ਤੋ ਸਮਾਧਿ ਉਪ੍ਪਜ੍ਜਤੀ’’ਤਿ.
ਤਤ੍ਥ ਧਾਤੁਮਤ੍ਤਤੋਤਿ ਵਿਸੇਸਨਿਵਤ੍ਤਿਅਤ੍ਥੋ ਮਤ੍ਤ-ਸਦ੍ਦੋ. ਤੇਨ ਯਂ ਇਤੋ ਬਾਹਿਰਕਾ, ਲੋਕਿਯਮਹਾਜਨੋ ਚ ‘‘ਸਤ੍ਤੋ ਜੀਵੋ’’ਤਿਆਦਿਕਂ ਵਿਸੇਸਂ ਇਮਸ੍ਮਿਂ ਅਤ੍ਤਭਾਵੇ ਅਵਿਜ੍ਜਮਾਨਂ ਵਿਕਪ੍ਪਨਾਮਤ੍ਤੇਨੇਵ ਸਮਾਰੋਪੇਨ੍ਤਿ, ਤਂ ਨਿਵਤ੍ਤੇਤਿ. ਤੇਨੇਵਾਹ ‘‘ਨਿਸ੍ਸਤ੍ਤਤੋ ਨਿਜ੍ਜੀਵਤੋ’’ਤਿ. ਆਵਜ੍ਜਿਤਬ੍ਬਨ੍ਤਿ ਸਮਨ੍ਨਾਹਰਿਤਬ੍ਬਂ. ਮਨਸਿ ਕਾਤਬ੍ਬਨ੍ਤਿ ਪੁਨਪ੍ਪੁਨਂ ਭਾਵਨਾਵਸੇਨ ਧਾਤੁਮਤ੍ਤਤੋ ਧਾਤੁਲਕ੍ਖਣਂ ਮਨਸਿ ਠਪੇਤਬ੍ਬਂ. ਪਚ੍ਚਵੇਕ੍ਖਿਤਬ੍ਬਨ੍ਤਿ ਤਦੇਵ ਧਾਤੁਲਕ੍ਖਣਂ ਪਤਿ ਪਤਿ ਅਵੇਕ੍ਖਿਤਬ੍ਬਂ, ਭਾਵਨਾਸਿਦ੍ਧੇਨ ਞਾਣਚਕ੍ਖੁਨਾ ਅਪਰਾਪਰਂ ਪਚ੍ਚਕ੍ਖਤੋ ਪਸ੍ਸਿਤਬ੍ਬਂ.
ਤਸ੍ਸੇਵਂ ਵਾਯਮਮਾਨਸ੍ਸਾਤਿ ਤਸ੍ਸ ਯੋਗਿਨੋ ਏਵਂ ਵੁਤ੍ਤਪ੍ਪਕਾਰੇਨ ਭਾਵਨਂ ਅਨੁਯੁਞ੍ਜਨ੍ਤਸ੍ਸ, ਤਤ੍ਥ ਚ ਭਾਵਨਾਅਨੁਯੋਗੇ ਸਕ੍ਕਚ੍ਚਕਾਰਿਤਾਯ, ਸਾਤਚ੍ਚਕਾਰਿਤਾਯ, ਸਪ੍ਪਾਯਸੇਵਿਤਾਯ, ਸਮਥਨਿਮਿਤ੍ਤਸਲ੍ਲਕ੍ਖਣੇਨ, ਬੋਜ੍ਝਙ੍ਗਾਨਂ ਅਨੁਪਵਤ੍ਤਨੇਨ, ਕਾਯੇ ਚ ਜੀਵਿਤੇ ਚ ਨਿਰਪੇਕ੍ਖਵੁਤ੍ਤਿਤਾਯ, ਅਨ੍ਤਰਾ ਸਙ੍ਕੋਚਂ ਅਨਾਪਜ੍ਜਨ੍ਤੇਨ ਭਾਵਨਂ ਉਸ੍ਸੁਕ੍ਕਾਪੇਤ੍ਵਾ ਉਸ੍ਸੋਲ਼੍ਹਿਯਂ ਅਵਟ੍ਠਾਨੇਨ ਸਮ੍ਮਦੇਵ ਵਾਯਾਮਂ ਪਯੋਗਂ ਪਰਕ੍ਕਮਂ ਪਵਤ੍ਤੇਨ੍ਤਸ੍ਸ. ਧਾਤੁਪ੍ਪਭੇਦਾਵਭਾਸਨਪਞ੍ਞਾਪਰਿਗ੍ਗਹਿਤੋਤਿ ਪਥਵੀਆਦੀਨਂ ਧਾਤੂਨਂ ਸਭਾਵਲਕ੍ਖਣਾਵਭਾਸਨੇਨ ਅਵਭਾਸਨਕਿਚ੍ਚਾਯ ਭਾਵਨਾਪਞ੍ਞਾਯ ਆਦਿਮਜ੍ਝਪਰਿਯੋਸਾਨੇਸੁ ਅਵਿਜਹਨੇਨ ਸਬ੍ਬਤੋ ਗਹਿਤੋ ਮਹਗ੍ਗਤਭਾਵਂ ਅਪ੍ਪਤ੍ਤਤਾਯ ਉਪਚਾਰਮਤ੍ਤੋ ਸਿਖਾਪ੍ਪਤ੍ਤੋ ਕਾਮਾਵਚਰਸਮਾਧਿ ਉਪ੍ਪਜ੍ਜਤਿ. ਉਪਚਾਰਸਮਾਧੀਤਿ ਚ ਰੁਲ਼੍ਹੀਵਸੇਨ ਵੇਦਿਤਬ੍ਬਂ. ਅਪ੍ਪਨਂ ਹਿ ਉਪੇਚ੍ਚ ਚਾਰੀ ਸਮਾਧਿ ਉਪਚਾਰਸਮਾਧਿ, ਅਪ੍ਪਨਾ ਚੇਤ੍ਥ ਨਤ੍ਥਿ. ਤਾਦਿਸਸ੍ਸ ਪਨ ਸਮਾਧਿਸ੍ਸ ਸਮਾਨਲਕ੍ਖਣਤਾਯ ਏਵਂ ਵੁਤ੍ਤਂ. ਕਸ੍ਮਾ ਪਨੇਤ੍ਥ ਅਪ੍ਪਨਾ ਨ ਹੋਤੀਤਿ? ਤਤ੍ਥ ਕਾਰਣਮਾਹ ‘‘ਸਭਾਵਧਮ੍ਮਾਰਮ੍ਮਣਤ੍ਤਾ’’ਤਿ. ਸਭਾਵਧਮ੍ਮੇ ਹਿ ਤਸ੍ਸ ਗਮ੍ਭੀਰਭਾਵਤੋ ਅਸਤਿ ਭਾਵਨਾਵਿਸੇਸੇ ਅਪ੍ਪਨਾਝਾਨਂ ਨ ਉਪ੍ਪਜ੍ਜਤਿ, ਲੋਕੁਤ੍ਤਰਂ ਪਨ ਝਾਨਂ ਵਿਸੁਦ੍ਧਿਭਾਵਨਾਨੁਕ੍ਕਮਵਸੇਨ, ਆਰੁਪ੍ਪਂ ਆਰਮ੍ਮਣਾਤਿਕ੍ਕਮਭਾਵਨਾਵਸੇਨ ਅਪ੍ਪਨਾਪ੍ਪਤ੍ਤਂ ਹੋਤੀਤਿ ਮਰਣਾਨੁਸ੍ਸਤਿਨਿਦ੍ਦੇਸੇ (ਵਿਸੁਦ੍ਧਿ. ੧.੧੭੭) ਵੁਤ੍ਤੋਵਾਯਮਤ੍ਥੋ.
ਏਵਂ ਰੂਪਕਾਯੇ ਅਵਿਸੇਸੇਨ ਚਤੁਨ੍ਨਂ ਧਾਤੂਨਂ ਪਰਿਗ੍ਗਣ੍ਹਨਵਸੇਨ ਧਾਤੁਕਮ੍ਮਟ੍ਠਾਨਂ ਦਸ੍ਸੇਤ੍ਵਾ ਇਦਾਨਿ ਤਤ੍ਥ ਅਟ੍ਠਿਆਦੀਨਂ ਵਿਨਿਬ੍ਭੁਜਨਵਸੇਨ ਸਙ੍ਖੇਪਤੋ ਸੁਤ੍ਤੇ ਆਗਤਂ ਧਾਤੁਮਨਸਿਕਾਰਵਿਧਿਂ ਦਸ੍ਸੇਤੁਂ ‘‘ਅਥ ਵਾ ਪਨਾ’’ਤਿਆਦਿ ਆਰਦ੍ਧਂ. ਤਤ੍ਥ ਯੇ ਇਮੇ ਚਤ੍ਤਾਰੋ ਕੋਟ੍ਠਾਸਾ ਵੁਤ੍ਤਾਤਿ ਸਮ੍ਬਨ੍ਧੋ. ਯਥਾਪਚ੍ਚਯਂ ਠਿਤਾ ਸਨ੍ਨਿਵੇਸਵਿਸਿਟ੍ਠਾ ਕਟ੍ਠਵਲ੍ਲਿਤਿਣਮਤ੍ਤਿਕਾਯੋ ਉਪਾਦਾਯ ਯਥਾ ਅਗਾਰਸਮਞ੍ਞਾ, ਨ ਤਤ੍ਥ ਕੋਚਿ ਅਗਾਰੋ ਨਾਮ ਅਤ੍ਥਿ, ਏਵਂ ਯਥਾਪਚ੍ਚਯਂ ਸਨ੍ਨਿਵੇਸਵਿਸਿਟ੍ਠਾਨਿ ਪਵਤ੍ਤਮਾਨਾਨਿ ਅਟ੍ਠਿਨ੍ਹਾਰੁਮਂਸਚਮ੍ਮਾਨਿ ਪਟਿਚ੍ਚ ਸਰੀਰਸਮਞ੍ਞਾ, ਨ ਏਤ੍ਥ ਕੋਚਿ ਅਤ੍ਤਾ ਜੀਵੋ. ਕੇਵਲਂ ਤੇਹਿ ਪਰਿਵਾਰਿਤਮਾਕਾਸਮਤ੍ਤਨ੍ਤਿ ਦਸ੍ਸੇਤਿ. ਦੇਸਨਾ ਸਤ੍ਤਸੁਞ੍ਞਤਾਸਨ੍ਦਸ੍ਸਨਪਰਾਤਿ ਇਮਮਤ੍ਥਂ ਵਿਭਾਵੇਨ੍ਤੋ ‘‘ਨਿਸ੍ਸਤ੍ਤਭਾਵਦਸ੍ਸਨਤ੍ਥ’’ਨ੍ਤਿਆਦਿਮਾਹ. ਤਤ੍ਥ ਅਟ੍ਠਿਞ੍ਚ ਪਟਿਚ੍ਚਾਤਿ ਪਣ੍ਹਿਕਟ੍ਠਿਕਾਦਿਭੇਦਂ ਪਟਿਪਾਟਿਯਾ ਉਸ੍ਸਿਤਂ ਹੁਤ੍ਵਾ ਠਿਤਂ ਅਤਿਰੇਕਤਿਸਤਭੇਦਂ ਅਟ੍ਠਿਂ ਉਪਾਦਾਯ. ਨ੍ਹਾਰੁਞ੍ਚਾਤਿ ਤਮੇਵ ਅਟ੍ਠਿਸਙ੍ਘਾਟਂ ਆਬਨ੍ਧਿਤ੍ਵਾ ਠਿਤਂ ਨਵਸਤਪ੍ਪਭੇਦਂ ਨ੍ਹਾਰੁਂ. ਮਂਸਨ੍ਤਿ ਤਮੇਵ ਅਟ੍ਠਿਸਙ੍ਘਾਟਂ ਅਨੁਲਿਮ੍ਪਿਤ੍ਵਾ ਠਿਤਂ ਨਵਪੇਸਿਸਤਪ੍ਪਭੇਦਂ ਮਂਸਂ. ਚਮ੍ਮਨ੍ਤਿ ਮਚ੍ਛਿਕਪਤ੍ਤਕਚ੍ਛਾਯਾਯ ਛਵਿਯਾ ਸਞ੍ਛਾਦਿਤਂ ਸਕਲਸਰੀਰਂ ਪਰਿਯੋਨਨ੍ਧਿਤ੍ਵਾ ਠਿਤਂ ਬਹਲਚਮ੍ਮਂ ਪਟਿਚ੍ਚ ਉਪਾਦਾਯ. ਸਬ੍ਬਤ੍ਥ ਚ-ਸਦ੍ਦੋ ਸਮੁਚ੍ਚਯਤ੍ਥੋ. ਆਕਾਸੋ ਪਰਿਵਾਰਿਤੋਤਿ ਯਥਾ ਭਿਤ੍ਤਿਪਾਦਾਦਿਵਸੇਨ ਠਪਿਤਂ ਕਟ੍ਠਂ, ਤਸ੍ਸੇਵ ਆਬਨ੍ਧਨਵਲ੍ਲਿ, ਅਨੁਲੇਪਨਮਤ੍ਤਿਕਾ, ਛਾਦਨਤਿਣਨ੍ਤਿ ਏਤਾਨਿ ਕਟ੍ਠਾਦੀਨਿ ਅਨ੍ਤੋ, ਬਹਿ ਚ ਪਰਿਵਾਰੇਤ੍ਵਾ ਠਿਤੋ ਆਕਾਸੋ ਅਗਾਰਨ੍ਤ੍ਵੇਵ ਸਙ੍ਖਂ ਗਚ੍ਛਤਿ, ਗੇਹਨ੍ਤਿ ਪਣ੍ਣਤ੍ਤਿਂ ਲਭਤਿ, ਏਵਮੇਵ ਯਥਾਵੁਤ੍ਤਾਨਿ ਅਟ੍ਠਿਆਦੀਨਿ ਅਨ੍ਤੋ, ਬਹਿ ਚ ਪਰਿਵਾਰੇਤ੍ਵਾ ਠਿਤੋ ਆਕਾਸੋ ਤਾਨੇਵ ਅਟ੍ਠਿਆਦੀਨਿ ਉਪਾਦਾਯ ਰੂਪਨ੍ਤ੍ਵੇਵ ਸਙ੍ਖਂ ਗਚ੍ਛਤਿ, ਸਰੀਰਨ੍ਤਿ ਵੋਹਾਰਂ ਲਭਤਿ. ਯਥਾ ਚ ਕਟ੍ਠਾਦੀਨਿ ਪਟਿਚ੍ਚ ਸਙ੍ਖਂ ਗਤਂ ਅਗਾਰਂ ਲੋਕੇ ‘‘ਖਤ੍ਤਿਯਗੇਹਂ, ਬ੍ਰਾਹ੍ਮਣਗੇਹ’’ਨ੍ਤਿ ਵੁਚ੍ਚਤਿ, ਏਵਮਿਦਮ੍ਪਿ ‘‘ਖਤ੍ਤਿਯਸਰੀਰਂ ਬ੍ਰਾਹ੍ਮਣਸਰੀਰ’’ਨ੍ਤਿ ਵੋਹਰੀਯਤਿ, ਨਤ੍ਥੇਤ੍ਥ ਕੋਚਿ ਸਤ੍ਤੋ ਵਾ ਜੀਵੋ ਵਾਤਿ ਅਧਿਪ੍ਪਾਯੋ.
ਤੇਤਿ ਤੇ ਚਤ੍ਤਾਰੋ ਕੋਟ੍ਠਾਸੇ ਵਿਨਿਬ੍ਭੁਜਿਤ੍ਵਾ ਵਿਨਿਬ੍ਭੁਜਿਤ੍ਵਾਤਿ ਯੋਜਨਾ. ਤਂਤਂਅਨ੍ਤਰਾਨੁਸਾਰਿਨਾਤਿ ਅਟ੍ਠਿਨ੍ਹਾਰੂਨਂ ਨ੍ਹਾਰੁਮਂਸਾਨਂ ਮਂਸਚਮ੍ਮਾਨਨ੍ਤਿ ਤੇਸਂ ਤੇਸਂ ਕੋਟ੍ਠਾਸਾਨਂ ਵਿਵਰਾਨੁਪਾਤਿਨਾ ਞਾਣਸਙ੍ਖਾਤੇਨ ਹਤ੍ਥੇਨ. ਵਿਨਿਬ੍ਭੁਜਿਤ੍ਵਾ ਵਿਨਿਬ੍ਭੁਜਿਤ੍ਵਾਤਿ ਅਨੇਕਕ੍ਖਤ੍ਤੁਂ ਵਿਨਿਵੇਠੇਤ੍ਵਾ. ਅਥ ਵਾ ਵਿਨਿਬ੍ਭੁਜਿਤ੍ਵਾ ਵਿਨਿਬ੍ਭੁਜਿਤ੍ਵਾਤਿ ਪਚ੍ਚੇਕਂ ਅਟ੍ਠਿਆਦੀਨਂ ਅਨ੍ਤਰਾਨੁਸਾਰਿਨਾ ਞਾਣਹਤ੍ਥੇਨ ਵਿਨਿਬ੍ਭੋਗਂ ਕਤ੍ਵਾ. ਏਤੇਸੂਤਿ ਸਕਲਮ੍ਪਿ ਅਤ੍ਤਨੋ ਰੂਪਕਾਯਂ ਚਤੁਧਾ ਕਤ੍ਵਾ ਵਿਭਤ੍ਤੇਸੁ ਯਥਾਵੁਤ੍ਤੇਸੁ ਅਟ੍ਠਿਆਦੀਸੁ ਚਤੂਸੁ ਕੋਟ੍ਠਾਸੇਸੁ. ਪੁਰਿਮਨਯੇਨੇਵਾਤਿ ‘‘ਯੋ ਇਮਸ੍ਮਿਂ ਕਾਯੇ ਥਦ੍ਧਭਾਵੋ ਵਾ’’ਤਿਆਦਿਨਾ ਪੁਬ੍ਬੇ ਵੁਤ੍ਤਨਯੇਨੇਵ. ਯਂ ਪਨੇਤ੍ਥ ਵਤ੍ਤਬ੍ਬਂ ਭਾਵਨਾਵਿਧਾਨਂ, ਤਂ ਅਨਨ੍ਤਰਨਯੇ ਵੁਤ੍ਤਾਕਾਰੇਨੇਵ ਵਤ੍ਤਬ੍ਬਂ.
੩੦੯. ਵਿਤ੍ਥਾਰਤੋ ਆਗਤੇ ਪਨ ‘‘ਚਤੁਧਾਤੁਵਵਤ੍ਥਾਨੇ’’ਤਿ ਆਨੇਤ੍ਵਾ ਯੋਜਨਾ. ਏਵਂ ਇਦਾਨਿ ਵੁਚ੍ਚਮਾਨਾਕਾਰੇਨ ਵੇਦਿਤਬ੍ਬੋ ਭਾਵਨਾਨਯੋ. ‘‘ਦ੍ਵਾਚਤ੍ਤਾਲੀਸਾਯ ਆਕਾਰੇਹਿ ਧਾਤੁਯੋ ਉਗ੍ਗਣ੍ਹਿਤ੍ਵਾ’’ਤਿ ਕਸ੍ਮਾ ਵੁਤ੍ਤਂ, ਨਨੁ ਆਦਿਤੋ ਦ੍ਵਤ੍ਤਿਂਸਾਕਾਰਾ ਧਾਤੁਯੋ ਨ ਹੋਨ੍ਤੀਤਿ? ਵਤ੍ਥੁਸੀਸੇਨ ਧਾਤੂਨਂਯੇਵ ਉਗ੍ਗਹੇਤਬ੍ਬਤ੍ਤਾ ਨਾਯਂ ਦੋਸੋ. ਵੁਤ੍ਤਪ੍ਪਕਾਰੇਤਿ ‘‘ਗੋਚਰਗਾਮਤੋ ਨਾਤਿਦੂਰਨਾਚ੍ਚਾਸਨ੍ਨਤਾਦੀਹਿ ਪਞ੍ਚਹਿ ਅਙ੍ਗੇਹਿ ਸਮਨ੍ਨਾਗਤੇ’’ਤਿਆਦਿਨਾ (ਵਿਸੁਦ੍ਧਿ. ੧.੫੩) ਵੁਤ੍ਤਪ੍ਪਕਾਰੇ. ਕਤਸਬ੍ਬਕਿਚ੍ਚੇਨਾਤਿ ਪਲਿਬੋਧੁਪਚ੍ਛੇਦਾਦਿਕਂ ਕਤਂ ਸਬ੍ਬਕਿਚ੍ਚਂ ਏਤੇਨਾਤਿ ਕਤਸਬ੍ਬਕਿਚ੍ਚੋ, ਤੇਨਸ੍ਸ ਸੀਲਵਿਸੋਧਨਾਦਿ ਪਨ ਕਮ੍ਮਟ੍ਠਾਨੁਗ੍ਗਹਣਤੋ ਪਗੇਵ ਸਿਦ੍ਧਂ ਹੋਤੀਤਿ ਦਸ੍ਸੇਤਿ. ਸਸਮ੍ਭਾਰਸਙ੍ਖੇਪਤੋਤਿ ਸਮ੍ਭਰੀਯਨ੍ਤਿ ਏਤੇਨ ਬੁਦ੍ਧਿਵੋਹਾਰਾਤਿ ਸਮ੍ਭਾਰੋ, ਤਨ੍ਨਿਮਿਤ੍ਤਂ. ਕਿਂ ਪਨੇਤਂ? ਪਥਵੀਆਦਿ. ਕੇਸਾਦੀਸੁ ਹਿ ਵੀਸਤਿਯਾ ਆਕਾਰੇਸੁ ‘‘ਪਥਵੀ’’ਤਿ ਬੁਦ੍ਧਿਵੋਹਾਰਾ ਪਥਵੀਨਿਮਿਤ੍ਤਕਾ ਥਦ੍ਧਤਂ ਉਪਾਦਾਯ ਪਵਤ੍ਤਨਤੋ. ਤਸ੍ਮਾ ਤਤ੍ਥ ਪਥਵੀਸਮ੍ਭਾਰੋ ਨਾਮ ਸਵਿਸੇਸਾਯ ਤਸ੍ਸਾ ਅਤ੍ਥਿਤਾਯ ਕੇਸਾਦਯੋ ਸਹ ਸਮ੍ਭਾਰੇਹੀਤਿ ਸਸਮ੍ਭਾਰਾ. ਆਪੋਕੋਟ੍ਠਾਸਾਦੀਸੁਪਿ ਏਸੇਵ ਨਯੋ. ਸਸਮ੍ਭਾਰਾਨਂ ਸਙ੍ਖੇਪੋ ਸਸਮ੍ਭਾਰਸਙ੍ਖੇਪੋ, ਤਤੋ ਸਸਮ੍ਭਾਰਸਙ੍ਖੇਪਤੋ ਭਾਵੇਤਬ੍ਬਨ੍ਤਿ ਯੋਜਨਾ. ਸਙ੍ਖੇਪਤੋ ਵੀਸਤਿਯਾ, ਦ੍ਵਾਦਸਸੁ, ਚਤੂਸੁ, ਛਸੁ ਚ ਕੋਟ੍ਠਾਸੇਸੁ ਯਥਾਕ੍ਕਮਂ ਪਥਵੀਆਦਿਕਾ ਚਤਸ੍ਸੋ ਧਾਤੁਯੋ ਪਰਿਗ੍ਗਹੇਤ੍ਵਾ ਧਾਤੁਵਵਤ੍ਥਾਨਂ ਸਸਮ੍ਭਾਰਸਙ੍ਖੇਪਤੋ ਭਾਵਨਾ. ਤੇਨਾਹ ‘‘ਇਧ ਭਿਕ੍ਖੁ ਵੀਸਤਿਯਾ ਕੋਟ੍ਠਾਸੇਸੂ’’ਤਿਆਦਿ.
ਸਸਮ੍ਭਾਰਵਿਭਤ੍ਤਿਤੋਤਿ ਸਸਮ੍ਭਾਰਾਨਂ ਕੇਸਾਦੀਨਂ ਵਿਭਾਗਤੋ ਕੇਸਾਦਿਕੇ ਵੀਸਤਿ ਕੋਟ੍ਠਾਸੇ ਪੁਬ੍ਬੇ ਵਿਯ ਏਕਜ੍ਝਂ ਅਗ੍ਗਹੇਤ੍ਵਾ ਵਿਭਾਗਤੋ ਪਥਵੀਧਾਤੁਭਾਵੇਨ ਵਵਤ੍ਥਾਪਨਂ. ਆਪੋਕੋਟ੍ਠਾਸਾਦੀਸੁਪਿ ਏਸੇਵ ਨਯੋ. ਸਲਕ੍ਖਣਸਙ੍ਖੇਪਤੋਤਿ ਲਕ੍ਖੀਯਤਿ ਏਤੇਨਾਤਿ ਲਕ੍ਖਣਂ, ਧਮ੍ਮਾਨਂ ਸਭਾਵੋ, ਇਧ ਪਨ ਥਦ੍ਧਤਾਦਿ. ਤਸ੍ਮਾ ਥਦ੍ਧਲਕ੍ਖਣਾਦਿਵਨ੍ਤਤਾਯ ਸਹ ਲਕ੍ਖਣੇਹੀਤਿ ਸਲਕ੍ਖਣਾ, ਕੇਸਾਦਯੋ ਦ੍ਵਾਚਤ੍ਤਾਲੀਸ ਆਕਾਰਾ. ਤੇਸਂ ਸਙ੍ਖੇਪਤੋ. ਇਦਂ ਵੁਤ੍ਤਂ ਹੋਤਿ – ਕੇਸਾਦਿਕੇ ਵੀਸਤਿ ਕੋਟ੍ਠਾਸੇ ਏਕਜ੍ਝਂ ਗਹੇਤ੍ਵਾ ਤਤ੍ਥ ਥਦ੍ਧਤਾਦਿਕਂ ਚਤੁਬ੍ਬਿਧਮ੍ਪਿ ਲਕ੍ਖਣਂ ਵਵਤ੍ਥਪੇਤ੍ਵਾ ਭਾਵਨਾ ਸਲਕ੍ਖਣਸਙ੍ਖੇਪਤੋ ਭਾਵਨਾ. ਏਸ ਨਯੋ ਆਪੋਕੋਟ੍ਠਾਸਾਦੀਸੁਪਿ. ਸਲਕ੍ਖਣਵਿਭਤ੍ਤਿਤੋਤਿ ਥਦ੍ਧਲਕ੍ਖਣਾਦਿਨਾ ਸਲਕ੍ਖਣਾਨਂ ਕੇਸਾਦੀਨਂ ਵਿਭਾਗਤੋ ਕੇਸਾਦੀਸੁ ਦ੍ਵਾਚਤ੍ਤਾਲੀਸਾਯ ਆਕਾਰੇਸੁ ਪਚ੍ਚੇਕਂ ਥਦ੍ਧਤਾਦੀਨਂ ਚਤੁਨ੍ਨਂ ਚਤੁਨ੍ਨਂ ਲਕ੍ਖਣਾਨਂ ਵਵਤ੍ਥਾਪਨਵਸੇਨ ਭਾਵਨਾ.
ਏਵਂ ਚਤੂਹਿ ਆਕਾਰੇਹਿ ਉਦ੍ਦਿਟ੍ਠਂ ਭਾਵਨਾਨਯਂ ਨਿਦ੍ਦਿਸਿਤੁਂ ‘‘ਕਥਂ ਸਸਮ੍ਭਾਰਸਙ੍ਖੇਪਤੋ ਭਾਵੇਤੀ’’ਤਿਆਦਿ ਆਰਦ੍ਧਂ. ਏਤ੍ਥ ਚ ਯਥਾ ਤਿਕ੍ਖਪਞ੍ਞੋ ਪੁਗ੍ਗਲੋ ਤਿਕ੍ਖਤਾਯ ਪਰੋਪਰਿਯਤ੍ਤਸਬ੍ਭਾਵਤੋ ਤਿਕ੍ਖਿਨ੍ਦ੍ਰਿਯਮੁਦਿਨ੍ਦ੍ਰਿਯਤਾਵਸੇਨ ਦੁਵਿਧੋਤਿ. ਤਤ੍ਥ ਤਿਕ੍ਖਿਨ੍ਦ੍ਰਿਯਸ੍ਸ ਵਸੇਨ ਸਙ੍ਖੇਪਤੋ ਪਠਮਨਯੋ ਵੁਤ੍ਤੋ, ਮੁਦਿਨ੍ਦ੍ਰਿਯਸ੍ਸ ਵਸੇਨ ਦੁਤਿਯੋ. ਏਵਂ ਨਾਤਿਤਿਕ੍ਖਪਞ੍ਞੋਪਿ ਪੁਗ੍ਗਲੋਤਿ. ਤਤ੍ਥ ਯੋ ਵਿਸਦਿਨ੍ਦ੍ਰਿਯੋ ਪੁਗ੍ਗਲੋ, ਤਸ੍ਸ ਵਸੇਨ ਸਸਮ੍ਭਾਰਸਙ੍ਖੇਪਤੋ, ਸਲਕ੍ਖਣਸਙ੍ਖੇਪਤੋ ਚ ਭਾਵਨਾਨਯੋ ਨਿਦ੍ਦਿਟ੍ਠੋ. ਯੋ ਪਨ ਨਾਤਿਵਿਸਦਿਨ੍ਦ੍ਰਿਯੋ, ਤਸ੍ਸ ਵਸੇਨ ਸਸਮ੍ਭਾਰਵਿਭਤ੍ਤਿਤੋ, ਸਲਕ੍ਖਣਵਿਭਤ੍ਤਿਤੋ ਚ ਭਾਵਨਾਨਯੋ ਨਿਦ੍ਦਿਟ੍ਠੋਤਿ ਵੇਦਿਤਬ੍ਬੋ. ਤਸ੍ਸ ਏਵਂ ਵਵਤ੍ਥਾਪਯਤੋ ਏਵ ਧਾਤੁਯੋ ਪਾਕਟਾ ਹੋਨ੍ਤਿ ਸਵਿਸੇਸਂ ਧਾਤੂਨਂ ਪਰਿਗ੍ਗਹਿਤਤ੍ਤਾ. ਭਾਵਨਾਵਿਧਾਨਂ ਪਨੇਤ੍ਥ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.
੩੧੦. ਯਸ੍ਸਾਤਿ ਨਾਤਿਵਿਸਦਿਨ੍ਦ੍ਰਿਯਂ ਪੁਗ੍ਗਲਂ ਸਨ੍ਧਾਯ ਵਦਤਿ. ਏਵਂ ਭਾਵਯਤੋਤਿ ਸਸਮ੍ਭਾਰਸਙ੍ਖੇਪਤੋ ਭਾਵੇਨ੍ਤਸ੍ਸ. ਯੇਨ ਵਿਧਿਨਾ ਉਗ੍ਗਹੇਤ੍ਵਾ ਕੁਸਲੋ ਹੋਤਿ, ਸੋ ਸਤ੍ਤਵਿਧੋ ਵਿਧਿ ‘‘ਉਗ੍ਗਹਕੋਸਲ੍ਲ’’ਨ੍ਤਿ ਵੁਚ੍ਚਤਿ, ਤਨ੍ਨਿਬ੍ਬਤ੍ਤਂ ਵਾ ਞਾਣਂ. ਏਵਂ ਮਨਸਿਕਾਰਕੋਸਲ੍ਲਮ੍ਪਿ ਵੇਦਿਤਬ੍ਬਂ. ਦ੍ਵਤ੍ਤਿਂਸਾਕਾਰੇਤਿ ਧਾਤੁਮਨਸਿਕਾਰਵਸੇਨ ਪਰਿਗ੍ਗਹਿਤੇ ਕੇਸਾਦਿਕੇ ਦ੍ਵਤ੍ਤਿਂਸਵਿਧੇ ਕੋਟ੍ਠਾਸੇ. ‘‘ਦ੍ਵਤ੍ਤਿਂਸਾਕਾਰੇ’’ਤਿ ਚ ਇਦਂ ਤੇਜਵਾਯੁਕੋਟ੍ਠਾਸੇਸੁ ਵਣ੍ਣਾਦਿਵਸੇਨ ਵਵਤ੍ਥਾਨਸ੍ਸ ਅਭਾਵਤੋ ਵੁਤ੍ਤਂ. ਸਬ੍ਬਂ ਤਤ੍ਥ ਵੁਤ੍ਤਵਿਧਾਨਂ ਕਾਤਬ੍ਬਨ੍ਤਿ ‘‘ਵਚਸਾ ਮਨਸਾ’’ਤਿਆਦਿਨਾ ਵੁਤ੍ਤਉਗ੍ਗਹਕੋਸਲ੍ਲੁਦ੍ਦੇਸਤੋ ਪਟ੍ਠਾਯ ਯਾਵ ‘‘ਅਨੁਪੁਬ੍ਬਮੁਞ੍ਚਨਾਦਿਵਸੇਨਾ’’ਤਿ ਪਦਂ, ਤਾਵ ਆਗਤਂ ਸਬ੍ਬਂ ਭਾਵਨਾਵਿਧਾਨਂ ਕਾਤਬ੍ਬਂ ਸਮ੍ਪਾਦੇਤਬ੍ਬਂ. ਵਣ੍ਣਾਦਿਵਸੇਨਾਤਿ ਵਣ੍ਣਸਣ੍ਠਾਨਦਿਸੋਕਾਸਪਰਿਚ੍ਛੇਦਵਸੇਨ. ਅਯਞ੍ਚ ਵਣ੍ਣਾਦਿਵਸੇਨ ਮਨਸਿਕਾਰੋ ਧਾਤੁਪਟਿਕ੍ਕੂਲਵਣ੍ਣਮਨਸਿਕਾਰਾਨਂ ਸਾਧਾਰਣੋ ਪੁਬ੍ਬਭਾਗੋਤਿ ਨਿਬ੍ਬਤ੍ਤਿਤਧਾਤੁਮਨਸਿਕਾਰਮੇਵ ਦਸ੍ਸੇਤੁਂ ‘‘ਅਵਸਾਨੇ ਏਵਂ ਮਨਸਿਕਾਰੋ ਪਵਤ੍ਤੇਤਬ੍ਬੋ’’ਤਿ ਵੁਤ੍ਤਂ.
੩੧੧. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾਤਿ ਏਤੇ ‘‘ਸੀਸਕਟਾਹਪਲਿਵੇਠਨਚਮ੍ਮਂ ਕੇਸਾ’’ਤਿ ਏਵਂ ਵੋਹਰਿਯਮਾਨਾ ਭੂਤੁਪਾਦਾਯਧਮ੍ਮਾ ‘‘ਮਯਿ ਕੇਸਾ ਜਾਤਾ, ਮਯਮੇਤ੍ਥ ਜਾਤਾ’’ਤਿ ਏਵਂ ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਸੁਞ੍ਞਾ. ਇਮਿਨਾ ਕਾਰਣਸ੍ਸ ਚ ਫਲਸ੍ਸ ਚ ਅਬ੍ਯਾਪਾਰਤਾਯ ਧਾਤੁਮਤ੍ਤਤਂ ਸਨ੍ਦਸ੍ਸੇਤਿ, ਤੇਨ ਚ ਆਭੋਗਪਚ੍ਚਵੇਕ੍ਖਣਾਨਮ੍ਪਿ ਏਵਮੇਵ ਅਬ੍ਯਾਪਾਰਤਾ ਦੀਪਿਤਾਤਿ ਦਟ੍ਠਬ੍ਬਂ. ਨ ਹਿ ਤਾਨਿ, ਤੇਸਂ ਕਾਰਣਾਨਿ ਚ ਤਥਾ ਤਥਾ ਆਭੁਜਿਤ੍ਵਾ, ਪਚ੍ਚਵੇਕ੍ਖਿਤ੍ਵਾ ਚ ਉਪ੍ਪਜ੍ਜਨ੍ਤਿ, ਪਚ੍ਚਯਭਾਵਂ ਵਾ ਗਚ੍ਛਨ੍ਤੀਤਿ. ਇਤੀਤਿ ਵੁਤ੍ਤਪ੍ਪਕਾਰਪਰਾਮਸਨਂ. ਅਚੇਤਨੋਤਿ ਨ ਚੇਤਨੋ, ਚੇਤਨਾਰਹਿਤੋ ਵਾ. ਅਬ੍ਯਾਕਤੋਤਿ ਅਬ੍ਯਾਕਤਰਾਸਿਪਰਿਯਾਪਨ੍ਨੋ. ਸੁਞ੍ਞੋਤਿ ਅਤ੍ਤਸੁਞ੍ਞੋ. ਤਤੋ ਏਵ ਨਿਸ੍ਸਤ੍ਤੋ. ਥਦ੍ਧਲਕ੍ਖਣਾਧਿਕਤਾਯ ਥਦ੍ਧੋ. ਤਤੋ ਏਵ ਪਥਵੀਧਾਤੂਤਿ ਏਵਂ ਮਨਸਿਕਾਰੋ ਪਵਤ੍ਤੇਤਬ੍ਬੋਤਿ ਸਮ੍ਬਨ੍ਧੋ. ਏਵਂ ਸਬ੍ਬਤ੍ਥ.
੩੧੨. ਸੁਞ੍ਞਗਾਮਟ੍ਠਾਨੇਤਿ ਏਤ੍ਥ ਸੁਞ੍ਞਗਾਮਗ੍ਗਹਣਂ ਪਰਮਤ੍ਥਤੋ ਵੇਦਕਵਿਰਹਦਸ੍ਸਨਤ੍ਥਂ ਕਾਯਸ੍ਸ.
੩੧੩. ਮਧੁਕਟ੍ਠਿਕੇਤਿ ਮਧੁਕਬੀਜਾਨਿ.
੩੧੪. ਗੇਹਥਮ੍ਭਾਨਂ ਆਧਾਰਭਾਵੇਨ ਠਪਿਤਸਿਲਾਯੋ ਪਾਸਾਣਉਦੁਕ੍ਖਲਕਾਨੀਤਿ ਅਧਿਪ੍ਪੇਤਾਨਿ.
੩੧੫. ਦੁਗ੍ਗਨ੍ਧਾਦਿਭਾਵੇ ਚਸ੍ਸ ਸਦਿਸਭਾਵਦਸ੍ਸਨਤ੍ਥਂ ਅਲ੍ਲਗੋਚਮ੍ਮਗ੍ਗਹਣਂ.
੩੧੬. ਯੇਭੁਯ੍ਯੇਨ ਮਂਸਪੇਸੀਨਂ ਬਹਲਤਾਯ ਮਹਾਮਤ੍ਤਿਕਗ੍ਗਹਣਂ.
੩੧੭. ਕੁਟ੍ਟਦਾਰੂਸੂਤਿ ਦਾਰੁਕੁਟ੍ਟਿਕਾਯ ਕੁਟਿਯਾ ਭਿਤ੍ਤਿਪਾਦਭੂਤੇਸੁ ਕਟ੍ਠੇਸੁ.
੩੧੮. ਪਣ੍ਹਿਕਟ੍ਠਿਆਦੀਨਂ ਆਧਾਰਭਾਵੋ ਵਿਯ ਗੋਪ੍ਫਕਟ੍ਠਿਆਦੀਨਂ ਆਧੇਯ੍ਯਭਾਵੋਪਿ ਅਸਮਨ੍ਨਾਹਾਰਸਿਦ੍ਧੋਤਿ ਦਸ੍ਸਨਤ੍ਥਂ ‘‘ਪਣ੍ਹਿਕਟ੍ਠਿਗੋਪ੍ਫਕਟ੍ਠਿਂ ਉਕ੍ਖਿਪਿਤ੍ਵਾ ਠਿਤ’’ਨ੍ਤਿਆਦਿਂ ਵਤ੍ਵਾ ਪੁਨ ‘‘ਸੀਸਟ੍ਠਿਗੀਵਟ੍ਠਿਕੇ ਪਤਿਟ੍ਠਿਤ’’ਨ੍ਤਿਆਦਿ ਵੁਤ੍ਤਂ.
੩੧੯. ਸਿਨ੍ਨਵੇਤ੍ਤਗ੍ਗਾਦੀਸੂਤਿ ਸੇਦਿਤਵੇਤ੍ਤਕਲ਼ੀਰਾਦੀਸੁ.
੩੨੧. ਉਰਟ੍ਠਿਸਙ੍ਘਾਟੋ ਪਞ੍ਜਰਸਦਿਸਤਾਯ ‘‘ਉਰਟ੍ਠਿਪਞ੍ਜਰ’’ਨ੍ਤਿ ਵੁਤ੍ਤੋ. ਤਸ੍ਸ ਅਥਿਰਭਾਵਦਸ੍ਸਨਤ੍ਥਂ ਜਿਣ੍ਣਸਨ੍ਦਮਾਨਿਕਪਞ੍ਜਰਂ ਨਿਦਸ੍ਸਨਭਾਵੇਨ ਗਹਿਤਂ.
੩੨੨. ਯਮਕਮਂਸਪਿਣ੍ਡੇਤਿ ਮਂਸਪਿਣ੍ਡਯੁਗਲ਼ੇ.
੩੨੩. ਕਿਲੋਮਕਸ੍ਸ ਸੇਤਵਣ੍ਣਤਾਯ ‘‘ਪਿਲੋਤਿਕਪਲਿਵੇਠਿਤੇ’’ਤਿ ਪਿਲੋਤਿਕਂ ਨਿਦਸ੍ਸਨਭਾਵੇਨ ਵੁਤ੍ਤਂ. ਏਵਮੇਵ ਨ ਵਕ੍ਕਹਦਯਾਨਿ ਸਕਲਸਰੀਰੇ ਚ ਮਂਸਂ ਜਾਨਾਤੀਤਿ ਏਤ੍ਥ ਨ ਵਕ੍ਕਹਦਯਾਨਿ ਜਾਨਨ੍ਤਿ ‘‘ਮਯਂ ਪਟਿਚ੍ਛਨ੍ਨਕਿਲੋਮਕੇਨ ਪਟਿਚ੍ਛਨ੍ਨਾਨੀ’’ਤਿ, ਨ ਸਕਲਸਰੀਰੇ ਚ ਮਂਸਂ ਜਾਨਾਤਿ ‘‘ਅਹਂ ਪਟਿਚ੍ਛਨ੍ਨਕਿਲੋਮਕੇਨ ਪਟਿਚ੍ਛਨ੍ਨ’’ਨ੍ਤਿ ਯੋਜੇਤਬ੍ਬਂ.
੩੨੪. ਕੋਟ੍ਠਮਤ੍ਥਕਪਸ੍ਸਨ੍ਤਿ ਕੁਸੂਲਸ੍ਸ ਅਬ੍ਭਨ੍ਤਰੇ ਮਤ੍ਥਕਪਸ੍ਸਂ.
੩੨੫. ਦ੍ਵਿਨ੍ਨਂ ਥਨਾਨਮਨ੍ਤਰੇਤਿ ਦ੍ਵਿਨ੍ਨਂ ਥਨਪ੍ਪਦੇਸਾਨਂ ਵੇਮਜ੍ਝੇ, ਥਨਪ੍ਪਦੇਸੋ ਚ ਅਬ੍ਭਨ੍ਤਰਵਸੇਨ ਵੇਦਿਤਬ੍ਬੋ.
੩੨੭. ਏਕਵੀਸਤਿਅਨ੍ਤਭੋਗੇਤਿ ਏਕਵੀਸਤਿਯਾ ਠਾਨੇਸੁ ਓਭਗ੍ਗੋਭਗ੍ਗੇ ਅਨ੍ਤਮਣ੍ਡਲੇ.
੩੨੮. ਆਮਾਸਯੇ ਠਿਤੋ ਪਰਿਭੁਤ੍ਤਾਹਾਰੋ ਉਦਰਿਯਨ੍ਤਿ ਅਧਿਪ੍ਪੇਤਨ੍ਤਿ ਆਹ ‘‘ਉਦਰਿਯਂ ਉਦਰੇ ਠਿਤਂ ਅਸਿਤਪੀਤਖਾਯਿਤਸਾਯਿਤ’’ਨ੍ਤਿ.
੩੩੧. ਅਬਦ੍ਧਪਿਤ੍ਤਂ ਸਂਸਰਣਲੋਹਿਤਂ ਵਿਯ, ਕਾਯੁਸ੍ਮਾ ਵਿਯ ਚ ਕਮ੍ਮਜਰੂਪਪਟਿਬਦ੍ਧਵੁਤ੍ਤਿਕਨ੍ਤਿ ਆਹ ‘‘ਆਬਦ੍ਧਪਿਤ੍ਤਂ ਜੀਵਿਤਿਨ੍ਦ੍ਰਿਯਪਟਿਬਦ੍ਧਂ ਸਕਲਸਰੀਰਂ ਬ੍ਯਾਪੇਤ੍ਵਾ ਠਿਤ’’ਨ੍ਤਿ. ਪਟਿਬਦ੍ਧਤਾਵਚਨੇਨ ਚਸ੍ਸ ਜੀਵਿਤਿਨ੍ਦ੍ਰਿਯੇ ਸਤਿ ਸਬ੍ਭਾਵਮੇਵ ਦੀਪੇਤਿ, ਨ ਜੀਵਿਤਿਨ੍ਦ੍ਰਿਯਸ੍ਸ ਵਿਯ ਏਕਨ੍ਤਕਮ੍ਮਜਤਨ੍ਤਿ ਦਟ੍ਠਬ੍ਬਂ. ਪਿਤ੍ਤਕੋਸਕੇਤਿ ਮਹਾਕੋਸਾਟਕੀਕੋਸਸਦਿਸੇ ਪਿਤ੍ਤਾਧਾਰੇ. ਯੂਸਭੂਤੋਤਿ ਰਸਭੂਤੋ.
੩੩੨. ਉਚ੍ਛਿਟ੍ਠੋਦਕਗਬ੍ਭਮਲਾਦੀਨਂ ਛਡ੍ਡਨਟ੍ਠਾਨਂ ਚਨ੍ਦਨਿਕਾ, ਤਸ੍ਸਂ ਚਨ੍ਦਨਿਕਾਯਂ.
੩੩੩. ਪੁਬ੍ਬਾਸਯੋ ਮਨ੍ਦਪਞ੍ਞਾਨਂ ਕੇਸਞ੍ਚਿਦੇਵ ਹੋਤੀਤਿ ਕਤ੍ਵਾ ਅਸਬ੍ਬਸਾਧਾਰਣਨ੍ਤਿ ਅਧਿਪ੍ਪਾਯੇਨਾਹ ‘‘ਪੁਬ੍ਬੋ ਅਨਿਬਦ੍ਧੋਕਾਸੋ’’ਤਿ.
੩੩੪. ਪਿਤ੍ਤਂ ਵਿਯਾਤਿ ਅਬਦ੍ਧਪਿਤ੍ਤਂ ਵਿਯ. ਸਕਲਸਰੀਰਨ੍ਤਿ ਜੀਵਿਤਿਨ੍ਦ੍ਰਿਯਪਟਿਬਦ੍ਧਂ ਸਬ੍ਬਂ ਸਰੀਰਪ੍ਪਦੇਸਂ. ਵਕ੍ਕਹਦਯਯਕਨਪਪ੍ਫਾਸਾਨਿ ਤੇਮੇਨ੍ਤਨ੍ਤਿ ਏਤ੍ਥ ਯਕਨਂ ਹੇਟ੍ਠਾਭਾਗਪੂਰਣੇਨ, ਇਤਰਾਨਿ ਤੇਸਂ ਉਪਰਿ ਥੋਕਂ ਥੋਕਂ ਪਗ੍ਘਰਣੇਨ ਚ ਤੇਮੇਤੀਤਿ ਦਟ੍ਠਬ੍ਬਂ. ਹੇਟ੍ਠਾ ਲੇਡ੍ਡੁਖਣ੍ਡਾਦੀਨਿ ਤੇਮਯਮਾਨੇਤਿ ਤੇਮਕਤੇਮਿਤਬ੍ਬਾਨਂ ਅਬ੍ਯਾਪਾਰਤਾਸਾਮਞ੍ਞਨਿਦਸ੍ਸਨਤ੍ਥਂ ਏਵ ਉਪਮਾ ਦਟ੍ਠਬ੍ਬਾ, ਨ ਠਾਨਸਾਮਞ੍ਞਨਿਦਸ੍ਸਨਤ੍ਥਂ. ਸਨ੍ਨਿਚਿਤਲੋਹਿਤੇਨ ਹਿ ਤੇਮੇਤਬ੍ਬਾਨਂ ਕੇਸਞ੍ਚਿ ਹੇਟ੍ਠਾ, ਕਸ੍ਸਚਿ ਉਪਰਿ ਠਿਤਤਾ ਕਾਯਗਤਾਸਤਿਨਿਦ੍ਦੇਸੇ (ਵਿਸੁਦ੍ਧਿ. ੧.੨੦੬) ਦਸ੍ਸਿਤਾਤਿ. ਯਕਨਸ੍ਸ ਹੇਟ੍ਠਾਭਾਗਟ੍ਠਾਨਂ ‘‘ਮਯਿ ਲੋਹਿਤਂ ਠਿਤ’’ਨ੍ਤਿ ਨ ਜਾਨਾਤਿ, ਵਕ੍ਕਾਦੀਨਿ ‘‘ਅਮ੍ਹੇ ਤੇਮਯਮਾਨਂ ਲੋਹਿਤਂ ਠਿਤ’’ਨ੍ਤਿ ਨ ਜਾਨਨ੍ਤੀਤਿ ਏਵਂ ਯੋਜਨਾ ਵੇਦਿਤਬ੍ਬਾ.
੩੩੬. ਪਤ੍ਥਿਨ੍ਨਸਿਨੇਹੋਤਿ ਥਿਨਭਾਵਂ ਘਨਭਾਵਂ ਗਤਸਿਨੇਹੋ. ਸਕਲਸਰੀਰੇ ਮਂਸਨ੍ਤਿ ਯੋਜਨਾ, ਤਞ੍ਚ ਥੂਲਸਰੀਰਂ ਸਨ੍ਧਾਯ ਵੁਤ੍ਤਂ. ਮੇਦਸ੍ਸ ਸਤਿਪਿ ਪਤ੍ਥਿਨ੍ਨਤਾਯ ਘਨਭਾਵੇ ਮਂਸਸ੍ਸ ਵਿਯ ਨ ਬਦ੍ਧਤਾਤਿ ਵੁਤ੍ਤਂ ‘‘ਪਤ੍ਥਿਨ੍ਨਯੂਸੋ’’ਤਿ. ਤੇਨੇਵਸ੍ਸ ਆਪੋਕੋਟ੍ਠਾਸਤਾ.
੩੩੭. ਉਦਕਪੁਣ੍ਣੇਸੁ ਤਰੁਣਤਾਲਟ੍ਠਿਕੂਪਕੇਸੂਤਿ ਨਾਤਿਪਰਿਣਤਾਨਂ ਸਜਲਕਾਨਂ ਅਗ੍ਗਤੋ ਛਿਨ੍ਨਾਨਂ ਤਾਲਸਲਾਟੁਕਾਨਂ ਵਿਵਰਾਨਿ ਸਨ੍ਧਾਯ ਵੁਤ੍ਤਂ.
੩੩੮. ਵਸਾਯ ਅਤ੍ਤਨੋ ਆਧਾਰੇ ਅਭਿਬ੍ਯਾਪਨਮੁਖੇਨ ਅਬ੍ਯਾਪਾਰਤਾਸਾਮਞ੍ਞਂ ਵਿਭਾਵੇਤਬ੍ਬਨ੍ਤਿ ਆਚਾਮਗਤਤੇਲਂ ਨਿਦਸ੍ਸਿਤਨ੍ਤਿ ਦਟ੍ਠਬ੍ਬਂ.
੩੩੯. ਖੇਲ਼ੁਪ੍ਪਤ੍ਤਿਪਚ੍ਚਯੇ ਅਮ੍ਬਿਲਗ੍ਗਮਧੁਰਗ੍ਗਾਦਿਕੇ.
੩੪੩. ਕੇਸਾਦੀਸੁ ਮਨਸਿਕਾਰਂ ਪਵਤ੍ਤੇਤ੍ਵਾ ਤੇਜੋਕੋਟ੍ਠਾਸੇਸੁ ਪਵਤ੍ਤੇਤਬ੍ਬੋ ਮਨਸਿਕਾਰੋਤਿ ਵਿਭਤ੍ਤਿਂ ਪਰਿਣਾਮੇਤ੍ਵਾ ਯੋਜੇਤਬ੍ਬਂ. ਯੇਨ ਸਨ੍ਤਪ੍ਪਤੀਤਿ ਯੇਨ ਕਾਯੋ ਸਨ੍ਤਪ੍ਪਤਿ, ਅਯਂ ਸਨ੍ਤਪ੍ਪਨਕਿਚ੍ਚੋ. ਤੇਜੋਤਿ ਤਸ੍ਸ ਪਰਿਗ੍ਗਣ੍ਹਨਾਕਾਰੋ ਏਵ ਪਚ੍ਚਾਮਟ੍ਠੋ. ਯੇਨ ਜੀਰੀਯਤੀਤਿਆਦੀਸੁਪਿ ਏਸੇਵ ਨਯੋ.
੩੪੪. ਅਸ੍ਸਾਸਪਸ੍ਸਾਸਵਸੇਨਾਤਿ ਅਨ੍ਤੋਪਵਿਸਨਬਹਿਨਿਕ੍ਖਮਨਨਾਸਿਕਾਵਾਤਭਾਵੇਨ. ‘‘ਏਵਂ ਪਵਤ੍ਤਮਨਸਿਕਾਰਸ੍ਸਾ’’ਤਿ ਇਮਿਨਾ ਵੁਤ੍ਤਾਕਾਰੇਨ ਸਸਮ੍ਭਾਰਵਿਭਤ੍ਤਿਤੋ ਪਵਤ੍ਤਕਮ੍ਮਟ੍ਠਾਨਮਨਸਿਕਾਰਸ੍ਸ. ਧਾਤੁਯੋ ਪਾਕਟਾ ਹੋਨ੍ਤੀਤਿ ਵਿਤ੍ਥਾਰਤੋ ਪਰਿਗ੍ਗਹਿਤਤ੍ਤਾ ਧਾਤੁਯੋ ਵਿਭੂਤਾ ਹੋਨ੍ਤਿ. ਇਧਾਪਿ ਭਾਵਨਾਵਿਧਾਨਂ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.
੩੪੫. ਤਤ੍ਥੇਵਾਤਿ ਤੇਸੁਯੇਵ ਵੀਸਤਿਯਾ ਕੋਟ੍ਠਾਸੇਸੁ. ਪਰਿਪਾਚਨਲਕ੍ਖਣਂ ਵਿਤ੍ਥਮ੍ਭਨਲਕ੍ਖਣਨ੍ਤਿ ਏਤ੍ਥਾਪਿ ‘‘ਤਤ੍ਥੇਵਾ’’ਤਿ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ.
ਪੁਨ ਤਤ੍ਥੇਵਾਤਿ ਤੇਸੁਯੇਵ ਦ੍ਵਾਦਸਸੁ ਕੋਟ੍ਠਾਸੇਸੂਤਿ ਅਤ੍ਥੋ. ਏਤ੍ਥ ਚ ਕੇਸਾਦਿਕੋਟ੍ਠਾਸਾਨਂ ਸਂਵਿਗ੍ਗਹਤਾਯ ਤਤ੍ਥ ਵਿਜ੍ਜਮਾਨਾ ਆਪੋਧਾਤੁਆਦਯੋ ਨ੍ਹਾਨਿਯਚੁਣ੍ਣਾਦੀਸੁ ਉਦਕਾਦਯੋ ਵਿਯ ਸੁਵਿਞ੍ਞੇਯ੍ਯਾਤਿ ‘‘ਤਤ੍ਥੇਵ ਆਬਨ੍ਧਨਲਕ੍ਖਣ’’ਨ੍ਤਿਆਦਿ ਵੁਤ੍ਤਂ.
ਸਨ੍ਤਪ੍ਪਨਾਦਿਤੇਜੋਕੋਟ੍ਠਾਸੇਸੁ ਪਨ ਵਾਯੋਧਾਤੁਆਦਯੋ ਨ ਤਥਾ ਸੁਵਿਞ੍ਞੇਯ੍ਯਾਤਿ ਕਤ੍ਵਾ ‘‘ਤੇਨ ਅਵਿਨਿਭੁਤ੍ਤ’’ਨ੍ਤਿ ਵੁਤ੍ਤਂ, ਨ ਤਤ੍ਥੇਵਾਤਿ. ਯਦਿ ਏਵਂ, ਵਾਯੁਕੋਟ੍ਠਾਸੇਸੁ ਕਥਂ ਤਤ੍ਥੇਵਾਤਿ? ਵਾਯੁਕੋਟ੍ਠਾਸਾਪਿ ਹਿ ਉਦ੍ਧਙ੍ਗਮਵਾਤਾਦਯੋ ਪਿਣ੍ਡਾਕਾਰੇਨੇਵ ਪਰਿਗ੍ਗਹੇਤਬ੍ਬਤਂ ਉਪਗਚ੍ਛਨ੍ਤਿ, ਨ ਪਨ ਸਨ੍ਤਪ੍ਪਨਾਦਿਤੇਜੋਕੋਟ੍ਠਾਸਾਤਿ ਨਾਯਂ ਦੋਸੋ. ਤਤ੍ਥ ਤੇਨਾਤਿ ਤੇਨ ਤੇਜੇਨ. ਅਵਿਨਿਭੁਤ੍ਤਨ੍ਤਿ ਅਵਿਨਾਭੂਤਂ, ਤਂਤਂਕਲਾਪਗਤਵਸੇਨ ਵਾ ਏਵਂ ਵੁਤ੍ਤਂ. ਏਵਂ ਵਵਤ੍ਥਾਪਯਤੋਤਿ ਵੁਤ੍ਤਾਕਾਰੇਨ ਸਲਕ੍ਖਣਸਙ੍ਖੇਪਤੋ ਧਾਤੁਯੋ ਵਵਤ੍ਥਾਪੇਨ੍ਤਸ੍ਸ. ਵੁਤ੍ਤਨਯੇਨਾਤਿ ‘‘ਤਸ੍ਸੇਵਂ ਵਾਯਮਮਾਨਸ੍ਸਾ’’ਤਿਆਦਿਨਾ (ਵਿਸੁਦ੍ਧਿ. ੧.੩੦੮) ਹੇਟ੍ਠਾ ਵੁਤ੍ਤਨਯੇਨ.
੩੪੬. ਏਵਮ੍ਪਿ ਭਾਵਯਤੋਤਿ ਸਲਕ੍ਖਣਸਙ੍ਖੇਪਤੋ ਧਾਤੁਯੋ ਪਰਿਗ੍ਗਹੇਤ੍ਵਾ ਭਾਵੇਨ੍ਤਸ੍ਸਾਪਿ. ਪੁਬ੍ਬੇ ਵੁਤ੍ਤਨਯੇਨਾਤਿ ਸਸਮ੍ਭਾਰਵਿਭਤ੍ਤਿਤੋ ਭਾਵਨਾਯਂ ਵੁਤ੍ਤੇਨ ਨਯੇਨ. ਏਵਨ੍ਤਿ ਯਥਾ ਕੇਸੇ, ਏਵਂ. ਸਬ੍ਬਕੋਟ੍ਠਾਸੇਸੂਤਿ ਏਕਚਤ੍ਤਾਲੀਸਭੇਦੇਸੁ ਸੇਸਸਬ੍ਬਕੋਟ੍ਠਾਸੇਸੁ ਏਵਮੇਤ੍ਥ ਅਟ੍ਠਸਟ੍ਠਿਧਾਤੁਸਤਸ੍ਸ ਪਰਿਗ੍ਗਹੋ ਵੁਤ੍ਤੋ ਹੋਤਿ. ਭਾਵਨਾਵਿਧਾਨਂ ਪਨੇਤ੍ਥ ਹੇਟ੍ਠਾ ਵੁਤ੍ਤਨਯਮੇਵ.
ਇਦਾਨਿ ਵਚਨਤ੍ਥਾਦਿਮੁਖੇਨਪਿ ਧਾਤੂਸੁ ਮਨਸਿਕਾਰਵਿਧਾਨਂ ਦਸ੍ਸੇਤੁਂ ‘‘ਵਚਨਤ੍ਥਤੋ’’ਤਿਆਦਿ ਵੁਤ੍ਤਂ. ਤਤ੍ਥ ਵਚਨਤ੍ਥਤੋਤਿ ਯਸ੍ਮਾ ਸਬ੍ਬਪਠਮਂ ਕਮ੍ਮਟ੍ਠਾਨਸ੍ਸ ਉਗ੍ਗਹਣਂ ਵਚਨਵਸੇਨ ਹੋਤਿ ਵਚਨਦ੍ਵਾਰੇਨ ਤਦਤ੍ਥਸ੍ਸ ਆਦਿਤੋ ਗਹੇਤਬ੍ਬਤੋ, ਤਸ੍ਮਾ ਵਚਨਤ੍ਥਤੋਪਿ ਧਾਤੂਨਂ ਮਨਸਿਕਾਤਬ੍ਬਤਾ ਵੁਤ੍ਤਾ. ਕਲਾਪਤੋਤਿ ਵਚਨਤ੍ਥਵਸੇਨ ਵਿਸੇਸਤੋ, ਸਾਮਞ੍ਞਤੋ ਚ ਧਾਤੁਯੋ ਪਰਿਗ੍ਗਹੇਤ੍ਵਾ ਠਿਤਸ੍ਸ ਯਸ੍ਮਾ ਤਾ ਪਿਣ੍ਡਸੋ ਪਵਤ੍ਤਨ੍ਤਿ, ਨ ਪਚ੍ਚੇਕਂ, ਤਸ੍ਮਾ ਕਲਾਪਤੋਪਿ ਮਨਸਿਕਾਤਬ੍ਬਤਾ ਵੁਤ੍ਤਾ. ਤੇ ਪਨ ਕਲਾਪਾ ਪਰਮਾਣੁਪਰਿਮਾਣਾ ਹੋਨ੍ਤੀਤਿ ਤਪ੍ਪਰਿਯਾਪਨ੍ਨਾਨਂ ਪਥਵੀਧਾਤੁਆਦੀਨਂ ਏਕਸ੍ਮਿਂ ਸਰੀਰੇ ਪਰਿਮੇਯ੍ਯਪਰਿਚ੍ਛੇਦਂ ਦਸ੍ਸੇਤੁਂ ਚੁਣ੍ਣਤੋ ਮਨਸਿਕਾਤਬ੍ਬਤਾ ਵੁਤ੍ਤਾ. ਸੋ ਪਨਾਯਂ ਤਾਸਂ ਚੁਣ੍ਣਤੋ ਮਨਸਿਕਾਰੋ ਸਙ੍ਘਾਟਵਸੇਨ ਹੋਤੀਤਿ ਨਿਬ੍ਬਟ੍ਟਿਤਸਰੂਪਮੇਵ ਪਰਿਗ੍ਗਹੇਤਬ੍ਬਂ ਦਸ੍ਸੇਤੁਂ ਲਕ੍ਖਣਾਦਿਤੋ ਮਨਸਿਕਾਰੋ ਵੁਤ੍ਤੋ. ਲਕ੍ਖਣਾਦਿਤੋ ਧਾਤੁਯੋ ਪਰਿਗ੍ਗਣ੍ਹਨ੍ਤੇਨ ਸਲਕ੍ਖਣਵਿਭਤ੍ਤਿਤੋ ਕਮ੍ਮਟ੍ਠਾਨਾਭਿਨਿਵੇਸੇ ਯਸ੍ਮਾ ਦ੍ਵਾਚਤ੍ਤਾਲੀਸਾਯ ਕੋਟ੍ਠਾਸਾਨਂ ਵਸੇਨ ਧਾਤੂਸੁ ਪਰਿਗ੍ਗਯ੍ਹਮਾਨਾਸੁ ‘‘ਏਤ੍ਤਕਾ ਉਤੁਸਮੁਟ੍ਠਾਨਾ, ਏਤ੍ਤਕਾ ਚਿਤ੍ਤਾਦਿਸਮੁਟ੍ਠਾਨਾ’’ਤਿ ਅਯਂ ਵਿਭਾਗੋ ਞਾਤਬ੍ਬੋ ਹੋਤਿ, ਤਸ੍ਮਾ ਸਮੁਟ੍ਠਾਨਤੋ ਮਨਸਿਕਾਰੋ ਵੁਤ੍ਤੋ.
ਏਵਂ ਪਰਿਞ੍ਞਾਤਸਮੁਟ੍ਠਾਨਾਨਮ੍ਪਿ ਤਾਸਂ ਸਦ੍ਦਾਨੁਸਾਰੇਨ ਵਿਨਾ ਵਿਸੇਸਸਾਮਞ੍ਞਪਰਿਗ੍ਗਹੋ ਕਾਤਬ੍ਬੋਤਿ ਦਸ੍ਸੇਤੁਂ ਨਾਨਤ੍ਤੇਕਤ੍ਤਤੋ ਮਨਸਿਕਾਰੋ ਵੁਤ੍ਤੋ. ਲਕ੍ਖਣਵਿਸੇਸਤੋ ਵਿਨਿਭੁਤ੍ਤਰੂਪਾਪਿ ਏਤਾ ਅਨਿਦ੍ਦਿਸਿਤਬ੍ਬਟ੍ਠਾਨਤਾਯ ਪਦੇਸੇਨ ਅਵਿਨਿਭੁਤ੍ਤਾਤਿ ਅਯਂ ਵਿਸੇਸੋ ਪਰਿਗ੍ਗਹੇਤਬ੍ਬੋਤਿ ਦਸ੍ਸੇਤੁਂ ਵਿਨਿਬ੍ਭੋਗਾਵਿਨਿਬ੍ਭੋਗਤੋ ਮਨਸਿਕਾਰੋ ਵੁਤ੍ਤੋ. ਸਤਿਪਿ ਅਵਿਨਿਬ੍ਭੋਗਵੁਤ੍ਤਿਯਂ ਕਾਚਿਦੇਵ ਕਾਸਞ੍ਚਿ ਸਭਾਗਾ, ਕਾਚਿ ਵਿਸਭਾਗਾਤਿ ਅਯਮ੍ਪਿ ਵਿਸੇਸੋ ਪਰਿਗ੍ਗਹੇਤਬ੍ਬੋਤਿ ਦਸ੍ਸੇਤੁਂ ਸਭਾਗਵਿਸਭਾਗਤੋ ਮਨਸਿਕਾਰੋ ਵੁਤ੍ਤੋ. ਸਭਾਗਵਿਸਭਾਗਾਪਿ ਧਾਤੁਯੋ ਅਜ੍ਝਤ੍ਤਿਕਾ ਈਦਿਸਕਿਚ੍ਚਵਿਸੇਸਯੁਤ੍ਤਾ, ਬਾਹਿਰਾ ਤਬ੍ਬਿਪਰੀਤਾਤਿ ਅਯਂ ਵਿਸੇਸੋ ਪਰਿਗ੍ਗਹੇਤਬ੍ਬੋਤਿ ਦਸ੍ਸੇਤੁਂ ਅਜ੍ਝਤ੍ਤਿਕਬਾਹਿਰਵਿਸੇਸਤੋ ਮਨਸਿਕਾਰੋ ਵੁਤ੍ਤੋ. ਸਜਾਤਿਸਙ੍ਗਹਾਦਿਕੋ ਧਾਤੁਸਙ੍ਗਹਵਿਸੇਸੋਪਿ ਪਰਿਗ੍ਗਹਿਤਬ੍ਬੋਤਿ ਦਸ੍ਸੇਤੁਂ ਸਙ੍ਗਹਤੋ ਮਨਸਿਕਾਰੋ ਵੁਤ੍ਤੋ. ਸਨ੍ਧਾਰਣਾਦੀਹਿ ਯਥਾਸਕਕਿਚ੍ਚੇਹਿ ਅਞ੍ਞਮਞ੍ਞੂਪਤ੍ਥਮ੍ਭਭਾਵਤੋਪਿ ਧਾਤੁਯੋ ਪਰਿਗ੍ਗਹੇਤਬ੍ਬਾਤਿ ਦਸ੍ਸੇਤੁਂ ਪਚ੍ਚਯਤੋ ਮਨਸਿਕਾਰੋ ਵੁਤ੍ਤੋ. ਅਬ੍ਯਾਪਾਰਨਯਤੋ ਧਾਤੁਯੋ ਪਰਿਗ੍ਗਹੇਤਬ੍ਬਾਤਿ ਦਸ੍ਸੇਤੁਂ ਅਸਮਨ੍ਨਾਹਾਰਤੋ ਮਨਸਿਕਾਰੋ ਵੁਤ੍ਤੋ. ਅਤ੍ਤਨੋ ਪਚ੍ਚਯਧਮ੍ਮਵਿਸੇਸਤੋ, ਪਚ੍ਚਯਭਾਵਵਿਸੇਸਤੋ ਚ ਧਾਤੁਯੋ ਪਰਿਗ੍ਗਹੇਤਬ੍ਬਾਤਿ ਦਸ੍ਸੇਤੁਂ ਪਚ੍ਚਯਵਿਭਾਗਤੋ ਮਨਸਿਕਾਰੋ ਵੁਤ੍ਤੋਤਿ ਏਵਮੇਤੇਸਂ ਤੇਰਸਨ੍ਨਂ ਆਕਾਰਾਨਂ ਪਰਿਗ੍ਗਹੇ ਕਾਰਣਂ ਵੇਦਿਤਬ੍ਬਂ. ਆਕਾਰੇਹੀਤਿ ਪਕਾਰੇਹਿ, ਕਾਰਣੇਹਿ ਵਾ.
੩੪੭. ਤਤ੍ਥ ਪਤ੍ਥਟਤ੍ਤਾਤਿ ਪੁਥੁਤ੍ਤਾ, ਤੇਨ ਪੁਥੁਭਾਵਤੋ ਪੁਥੁਵੀ, ਪੁਥੁਵੀ ਏਵ ਪਥਵੀਤਿ ਨਿਰੁਤ੍ਤਿਨਯੇਨ ਸਦ੍ਦਤ੍ਥਮਾਹ. ਪਤ੍ਥਨਟ੍ਠੇਨ ਵਾ ਪਥਵੀ, ਪਤਿਟ੍ਠਾਭਾਵੇਨ ਪਤ੍ਥਾਯਤਿ ਉਪਤਿਟ੍ਠਤੀਤਿ ਅਤ੍ਥੋ. ‘‘ਅਪ੍ਪੋਤੀ’’ਤਿ ਪਦਸ੍ਸ ਅਤ੍ਥੋ ਹੇਟ੍ਠਾ ਵੁਤ੍ਤੋ ਏਵ. ਆਪੀਯਤੀਤਿ ਸੋਸੀਯਤਿ, ਪਿਵੀਯਤੀਤਿ ਕੇਚਿ. ‘‘ਅਯਂ ਪਨਤ੍ਥੋ ਸਸਮ੍ਭਾਰਾਪੇ ਯੁਜ੍ਜਤੀ’’ਤਿ ਵਦਨ੍ਤਿ, ਲਕ੍ਖਣਾਪੇਪਿ ਯੁਜ੍ਜਤੇਵ. ਸੋਪਿ ਹਿ ਫਰੁਸਪਾਚਨਵਿਸੋਸਨਾਕਾਰੇਨ ਸੇਸਭੂਤਤ੍ਤਯੇਨ ਪੀਯਮਾਨੋ ਵਿਯ ਪਵਤ੍ਤਤੀਤਿ. ਅਪ੍ਪਾਯਤੀਤਿ ਬ੍ਰੂਹੇਤਿ. ਪਰਿਬ੍ਰੂਹਨਰਸਾ ਹਿ ਆਪੋਧਾਤੁ. ਤੇਜਤੀਤਿ ਨਿਸੇਤਿ, ਤਿਕ੍ਖਭਾਵੇਨ ਸੇਸਭੂਤਤ੍ਤਯਂ ਉਸ੍ਮਾਪਯਤੀਤਿ ਅਤ੍ਥੋ. ਵਾਯਤੀਤਿ ਸਮੀਰੇਤਿ, ਦੇਸਨ੍ਤਰੁਪ੍ਪਤ੍ਤਿਹੇਤੁਭਾਵੇਨ ਭੂਤਸਙ੍ਘਾਤਂ ਗਮੇਤੀਤਿ ਅਤ੍ਥੋ.
ਏਵਂ ਤਾਵ ਵਿਸੇਸਤੋ ਵਚਨਤ੍ਥਂ ਵਤ੍ਵਾ ਇਦਾਨਿ ਸਾਮਞ੍ਞਤੋ ਵਤ੍ਤੁਂ ‘‘ਅਵਿਸੇਸੇਨ ਪਨਾ’’ਤਿਆਦਿ ਵੁਤ੍ਤਂ. ਸਲਕ੍ਖਣਧਾਰਣਤੋਤਿ ਯਥਾ ਤਿਤ੍ਥਿਯਪਰਿਕਪ੍ਪਿਤੋ ‘‘ਪਕਤਿ ਅਤ੍ਤਾ’’ਤਿ ਏਵਮਾਦਿਕੋ ਸਭਾਵਤੋ ਨਤ੍ਥਿ, ਨ ਏਵਮੇਤਾ. ਏਤਾ ਪਨ ਸਲਕ੍ਖਣਂ ਸਭਾਵਂ ਧਾਰੇਨ੍ਤੀਤਿ ਧਾਤੁਯੋ. ਦੁਕ੍ਖਾਦਾਨਤੋਤਿ ਦੁਕ੍ਖਸ੍ਸ ਵਿਦਹਨਤੋ. ਏਤਾ ਹਿ ਧਾਤੁਯੋ ਕਾਰਣਭਾਵੇਨ ਵਵਤ੍ਥਿਤਾ ਹੁਤ੍ਵਾ ਅਯਲੋਹਾਦਿਧਾਤੁਯੋ ਵਿਯ ਅਯਲੋਹਾਦਿਂ ਅਨੇਕਪ੍ਪਕਾਰਂ ਸਂਸਾਰਦੁਕ੍ਖਂ ਵਿਦਹਨ੍ਤਿ. ਦੁਕ੍ਖਾਧਾਨਤੋਤਿ ਅਨਪ੍ਪਕਸ੍ਸ ਦੁਕ੍ਖਸ੍ਸ ਵਿਧਾਨਮਤ੍ਤਤੋ ਅਵਸਵਤ੍ਤਨਤੋ, ਤਂ ਵਾ ਦੁਕ੍ਖਂ ਏਤਾਹਿ ਕਾਰਣਭੂਤਾਹਿ ਸਤ੍ਤੇਹਿ ਅਨੁਵਿਧੀਯਤਿ, ਤਥਾਵਿਹਿਤਞ੍ਚ ਤਂ ਏਤਾਸ੍ਵੇਵ ਧੀਯਤਿ ਠਪੀਯਤੀਤਿ ਏਵਂ ਦੁਕ੍ਖਾਧਾਨਤੋ, ਧਾਤੁਯੋ. ਅਪਿਚ ‘‘ਨਿਜ੍ਜੀਵਟ੍ਠੋ ਧਾਤੁਟ੍ਠੋ’’ਤਿ ਵੁਤ੍ਤੋਵਾਯਮਤ੍ਥੋ. ਤਥਾ ਹਿ ਭਗਵਾ ‘‘ਛਧਾਤੁਰੋਯਂ ਭਿਕ੍ਖੁ ਪੁਰਿਸੋ’’ਤਿਆਦੀਸੁ (ਮ. ਨਿ. ੩.੩੪੩-੩੪੫) ਜੀਵਸਞ੍ਞਾਸਮੂਹਨਨਤ੍ਥਂ ਧਾਤੁਦੇਸਨਂ ਅਕਾਸੀਤਿ. ਇਤਿ ਵਚਨਤ੍ਥਮੁਖੇਨਪਿ ਅਸਾਧਾਰਣਤੋ, ਸਾਧਾਰਣਤੋ ਚ ਧਾਤੂਨਂ ਸਰਸਲਕ੍ਖਣਮੇਵ ਵਿਭਾਵੀਯਤੀਤਿ ਆਹ ‘‘ਏਵਂ ਵਿਸੇਸਸਾਮਞ੍ਞਵਸੇਨ ਵਚਨਤ੍ਥਤੋ ਮਨਸਿ ਕਾਤਬ੍ਬਾ’’ਤਿ. ਮਨਸਿਕਾਰੋ ਪਨ ਵਚਨਤ੍ਥਮੁਖੇਨ ਧਾਤੁਯੋ ਪਰਿਗ੍ਗਹੇਤ੍ਵਾ ਠਿਤਸ੍ਸ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.
੩੪੮. ਆਕਾਰੇਹੀਤਿ ਪਕਾਰੇਹਿ. ਅਥ ਵਾ ਆਕਰੀਯਨ੍ਤਿ ਦਿਸ੍ਸਨ੍ਤਿ ਏਤ੍ਥ ਧਾਤੁਯੋਤਿ ਆਕਾਰਾ, ਕੋਟ੍ਠਾਸਾ. ਅਟ੍ਠਧਮ੍ਮਸਮੋਧਾਨਾਤਿ ਯਥਾਵੁਤ੍ਤਾਨਂ ਪਚ੍ਚਯਵਿਸੇਸੇਨ ਵਿਸਿਟ੍ਠਰੂਪਾਨਂ ਵਣ੍ਣਾਦੀਨਂ ਅਟ੍ਠਨ੍ਨਂ ਧਮ੍ਮਾਨਂ ਸਮਵਧਾਨਤੋ ਸਨ੍ਨਿਵੇਸਵਿਸੇਸਵਸੇਨ ਸਹਾਵਟ੍ਠਾਨਤੋ ਤਂ ਉਪਾਦਾਯ. ਕੇਸਾਤਿ ਸਮ੍ਮੁਤਿ ਸਮਞ੍ਞਾਮਤ੍ਤਂ ਹੋਤਿ. ਤੇਸਂਯੇਵ ਵਿਨਿਬ੍ਭੋਗਾਤਿ ਤੇਸਂਯੇਵ ਵਣ੍ਣਾਦੀਨਂ ਵਿਨਿਬ੍ਭੁਜਨਤੋ. ਯਥਾ ਹਿ ਵਣ੍ਣਾਦਯੋ ਅਟ੍ਠ ਧਮ੍ਮਾ ਪਞ੍ਞਾਯ ਵਿਨਿਬ੍ਭੁਜ੍ਜਮਾਨਾ ਅਞ੍ਞਮਞ੍ਞਬ੍ਯਤਿਰੇਕੇਨ ਪਰਮਤ੍ਥਤੋ ਉਪਲਬ੍ਭਨ੍ਤਿ, ਨ ਏਵਂ ਵਣ੍ਣਾਦਿਬ੍ਯਤਿਰੇਕੇਨ ਪਰਮਤ੍ਥਤੋ ਕੇਸਾ ਉਪਲਬ੍ਭਨ੍ਤਿ. ਤਸ੍ਮਾ ਯੇ ਚ ਧਮ੍ਮੇ ਸਮੁਦਿਤੇ ਉਪਾਦਾਯ ‘‘ਕੇਸਾ’’ਤਿ ਸਮ੍ਮੁਤਿ, ਤੇਸੁ ਵਿਸੁਂ ਵਿਸੁਂ ਕਤੇਸੁ ਨਤ੍ਥਿ ‘‘ਕੇਸਾ’’ਤਿ ਸਮ੍ਮੁਤਿ, ਵੋਹਾਰਮਤ੍ਤਨ੍ਤਿ ਅਤ੍ਥੋ.
‘‘ਅਟ੍ਠਧਮ੍ਮਕਲਾਪਮਤ੍ਤਮੇਵਾ’’ਤਿ ਇਦਂ ਕੇਸਪਞ੍ਞਤ੍ਤਿਯਾ ਉਪਾਦਾਯਭੂਤੇ ਵਣ੍ਣਾਦਿਕੇ ਏਕਤ੍ਤੇਨ ਗਹੇਤ੍ਵਾ ਵੁਤ੍ਤਂ, ਨ ਤੇਸਂ ਅਟ੍ਠਧਮ੍ਮਮਤ੍ਤਭਾਵਤੋ. ਕਮ੍ਮਸਮੁਟ੍ਠਾਨੋ ਕੋਟ੍ਠਾਸੋਤਿ ਕੇਸੇਸੁ ਤਾਵ ਕੇਸਮੂਲਂ, ਏਵਂ ਲੋਮਾਦੀਸੁਪਿ ਯਥਾਰਹਂ ਵੇਦਿਤਬ੍ਬਂ. ਦਸਧਮ੍ਮਕਲਾਪੋਪੀਤਿ ਏਤ੍ਥ ਅਸਿਤਾਦਿਪਰਿਪਾਚਕੋ ਤੇਜੋਕੋਟ੍ਠਾਸੋ ਨਵਧਮ੍ਮਕਲਾਪੋਪੀਤਿ ਵਤ੍ਤਬ੍ਬੋ. ਯਦਿਮੇ ਕੇਸਾਦਿਕੋਟ੍ਠਾਸਾ ਯਥਾਰਹਂ ਅਟ੍ਠਨਵਦਸਧਮ੍ਮਸਮੂਹਭੂਤਾ, ਅਥ ਕਸ੍ਮਾ ਪਥਵੀਆਦਿਧਾਤੁਮਤ੍ਤਤੋ ਮਨਸਿ ਕਰੀਯਨ੍ਤੀਤਿ ਆਹ ‘‘ਉਸ੍ਸਦਵਸੇਨ ਪਨਾ’’ਤਿਆਦਿ. ਯਸ੍ਮਾ ਅਯਂ ਧਾਤੁਮਨਸਿਕਾਰੋ ਯਾਵਦੇਵ ਸਤ੍ਤਸਞ੍ਞਾਸਮੁਗ੍ਘਾਟਨਤ੍ਥੋ, ਧਮ੍ਮਵਿਨਿਬ੍ਭੋਗੋ ਚ ਸਾਤਿਸਯਂ ਸਤ੍ਤਸਞ੍ਞਾਸਮੁਗ੍ਘਾਟਾਯ ਸਂਵਤ੍ਤਤਿ, ਤਸ੍ਮਾ ਕੋਟ੍ਠਾਸੇਸੁ ਏਵਂ ਧਮ੍ਮਵਿਭਾਗੋ ਵੇਦਿਤਬ੍ਬੋ. ਏਤ੍ਥ ਹਿ ਉਦਰਿਯਂ ਕਰੀਸਂ ਪੁਬ੍ਬੋ ਮੁਤ੍ਤਞ੍ਚ ਉਤੁਸਮੁਟ੍ਠਾਨਾ, ਅਸਿਤਾਦਿਪਰਿਪਾਚਕਤੇਜੋ ਕਮ੍ਮਸਮੁਟ੍ਠਾਨੋ, ਅਸ੍ਸਾਸਪਸ੍ਸਾਸਵਾਤੋ ਚਿਤ੍ਤਸਮੁਟ੍ਠਾਨੋਤਿ ਛ ਏਕਸਮੁਟ੍ਠਾਨਾ, ਸੇਦੋਅਸ੍ਸੁ ਖੇਲ਼ੋ ਸਿਙ੍ਘਾਣਿਕਾਤਿ ਚਤ੍ਤਾਰੋ ਉਤੁਚਿਤ੍ਤਵਸੇਨ ਦ੍ਵਿਸਮੁਟ੍ਠਾਨਾ, ਸੇਸਾ ਦ੍ਵਤ੍ਤਿਂਸ ਚਤੁਸਮੁਟ੍ਠਾਨਾ.
ਤੇਸੁ ਅਸਿਤਾਦਿਪਰਿਪਾਚਕੇ ਤੇਜੋਕੋਟ੍ਠਾਸੇ ਏਕੋ ਕਲਾਪੋ ਜੀਵਿਤਨਵਕੋ, ਅਞ੍ਞੇਸੁ ਏਕਸਮੁਟ੍ਠਾਨੇਸੁ ਉਤੁਸਮੁਟ੍ਠਾਨੋ, ਚਿਤ੍ਤਸਮੁਟ੍ਠਾਨੋ ਵਾ ਏਕੇਕੋ ਅਟ੍ਠਕੋ, ਦ੍ਵਿਸਮੁਟ੍ਠਾਨੇਸੁ ਉਤੁਚਿਤ੍ਤਵਸੇਨ ਦ੍ਵੇ ਦ੍ਵੇ ਅਟ੍ਠਕਾ, ਚਤੁਸਮੁਟ੍ਠਾਨੇਸੁ ਉਤੁਚਿਤ੍ਤਾਹਾਰਸਮੁਟ੍ਠਾਨਾ ਤਯੋ ਤਯੋ ਅਟ੍ਠਕਾ, ਉਤੁਚਿਤ੍ਤਸਮੁਟ੍ਠਾਨੇਸੁ ਸਦ੍ਦਨਵਕਾ, ਅਟ੍ਠਸੁ ਤੇਜੋਵਾਯੋਕੋਟ੍ਠਾਸੇਸੁ ਅਟ੍ਠ ਜੀਵਿਤਨਵਕਾ, ਸੇਸੇਸੁ ਚਤੁਵੀਸਤਿਯਾ ਕੋਟ੍ਠਾਸੇਸੁ ਕਾਯਭਾਵਦਸਕਦ੍ਵਯਸਹਿਤਾ, ਚਕ੍ਖਾਦਿਸਞ੍ਞਿਤੇਸੁ ਮਂਸਕੋਟ੍ਠਾਸੇਸੁ ਚਕ੍ਖੁਸੋਤਘਾਨਜਿਵ੍ਹਾਵਤ੍ਥੁਦਸਕਸਹਿਤਾ ਚਾਤਿ ਪਰਿਪੁਣ੍ਣਾਯਤਨਕੇ ਰੂਪਕਾਯੇ ਭੇਦਂ ਅਨਾਮਸਿਤ੍ਵਾ ਏਕਤ੍ਤਵਸੇਨ ਗਯ੍ਹਮਾਨਾ ਸਤ੍ਤਚਤ੍ਤਾਲੀਸਾਧਿਕਸਤਰੂਪਕਲਾਪਾ ਰੂਪਵਿਭਾਗਤੋ ਸਾਧਿਕਂ ਦਿਯਡ੍ਢਰੂਪਸਹਸ੍ਸਂ ਹੋਤਿ, ਕੋਟ੍ਠਾਸਾਨਂ ਪਨ ਅਵਯਵਵਿਭਾਗੇਨ ਤਦਵਯਵਕਲਾਪਾਨਂ ਭੇਦੇ ਗਯ੍ਹਮਾਨੇ ਰੂਪਧਮ੍ਮਾਨਂ ਅਸਙ੍ਖ੍ਯੇਯ੍ਯਭੇਦਤਾ ਵੇਦਿਤਬ੍ਬਾ. ਏਵਂ ਧਮ੍ਮਵਿਭਾਗਤੋ ਅਨੇਕਭੇਦਭਿਨ੍ਨਾਪਿ ਇਮੇ ਦ੍ਵਾਚਤ੍ਤਾਲੀਸ ਕੋਟ੍ਠਾਸਾ ਉਸ੍ਸਦਗ੍ਗਹਣੇਨ ਚਤੁਧਾਤੁਵਸੇਨੇਵ ਵਵਤ੍ਥਪੇਤਬ੍ਬਾ. ਤੇਨਾਹ ‘‘ਉਸ੍ਸਦਵਸੇਨ ਪਨ…ਪੇ… ਮਨਸਿ ਕਾਤਬ੍ਬਾ’’ਤਿ. ਤਤ੍ਥ ਮਨਸਿਕਾਰਵਿਧਿ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.
੩੪੯. ਮਜ੍ਝਿਮੇਨ ਪਮਾਣੇਨਾਤਿ ਆਰੋਹਪਰਿਣਾਹੇਹਿ ਮਜ੍ਝਿਮਸਰੀਰੇ ਲਬ੍ਭਮਾਨੇਨ ਮਜ੍ਝਿਮੇਨ ਪਰਿਮਾਣੇਨ. ਪਰਿਗ੍ਗਯ੍ਹਮਾਨਾਤਿ ਪਞ੍ਞਾਯ ਪਰਿਤਕ੍ਕੇਤ੍ਵਾ ਗਯ੍ਹਮਾਨਾ. ਪਰਮਾਣੁਭੇਦਸਞ੍ਚੁਣ੍ਣਾਤਿ ਏਤ੍ਥ ਯਥਾ ‘‘ਅਙ੍ਗੁਲਸ੍ਸ ਅਟ੍ਠਮੋ ਭਾਗੋ ਯਵੋ, ਯਵਸ੍ਸ ਅਟ੍ਠਮੋ ਭਾਗੋ ਊਕਾ, ਊਕਾਯ ਅਟ੍ਠਮੋ ਭਾਗੋ ਲਿਕ੍ਖਾ, ਲਿਕ੍ਖਾਯ ਅਟ੍ਠਮੋ ਭਾਗੋ ਰਥਰੇਣੁ, ਰਥਰੇਣੁਸ੍ਸ ਅਟ੍ਠਮੋ ਭਾਗੋ ਤਜ੍ਜਾਰੀ, ਤਜ੍ਜਾਰਿਯਾ ਅਟ੍ਠਮੋ ਭਾਗੋ ਅਣੁ, ਏਵਂ ਅਣੁਨੋ ਅਟ੍ਠਮੋ ਭਾਗੋ ਪਰਮਾਣੁ ਨਾਮਾ’’ਤਿ ਕੇਚਿ. ਅਟ੍ਠਕਥਾਯਂ (ਵਿਭ. ਅਟ੍ਠ. ੫੧੫) ਪਨ ‘‘ਸਤ੍ਤਧਞ੍ਞਮਾਸਪ੍ਪਮਾਣਂ ਏਕਂ ਅਙ੍ਗੁਲਂ, ਸਤ੍ਤਊਕਾਪਮਾਣੋ ਏਕੋ ਧਞ੍ਞਮਾਸੋ, ਸਤ੍ਤਲਿਕ੍ਖਾਪਮਾਣਾ ਏਕਾ ਊਕਾ, ਛਤ੍ਤਿਂਸਰਥਰੇਣੁਪ੍ਪਮਾਣਾ ਏਕਾ ਲਿਕ੍ਖਾ, ਛਤ੍ਤਿਂਸਤਜ੍ਜਾਰਿਪ੍ਪਮਾਣੋ ਏਕੋ ਰਥਰੇਣੁ, ਛਤ੍ਤਿਂਸਅਣੁਪ੍ਪਮਾਣਾ ਏਕਾ ਤਜ੍ਜਾਰੀ, ਛਤ੍ਤਿਂਸਪਰਮਾਣੁਪ੍ਪਮਾਣੋ ਏਕੋ ਅਣੂ’’ਤਿ ਵੁਤ੍ਤਂ. ਤਸ੍ਮਾ ਅਣੁਨੋ ਛਤ੍ਤਿਂਸਤਿਮਭਾਗਮਤ੍ਤੋ ਪਰਮਾਣੁ ਨਾਮ ਆਕਾਸਕੋਟ੍ਠਾਸਿਕੋ ਮਂਸਚਕ੍ਖੁਸ੍ਸ ਅਗੋਚਰੋ ਦਿਬ੍ਬਚਕ੍ਖੁਸ੍ਸੇਵ ਗੋਚਰਭੂਤੋ. ਤਂ ਸਨ੍ਧਾਯਾਹ ‘‘ਪਰਮਾਣੁਭੇਦਸਞ੍ਚੁਣ੍ਣਾ’’ਤਿ, ਯਥਾਵੁਤ੍ਤਪਰਮਾਣੁਪ੍ਪਭੇਦੇਨ ਚੁਣ੍ਣਵਿਚੁਣ੍ਣਭੂਤਾ. ਸੁਖੁਮਰਜਭੂਤਾਤਿ ਤਤੋਯੇਵ ਅਤਿਵਿਯ ਸੁਖੁਮਰਜਭਾਵਂ ਗਤਾ.
ਦੋਣਮਤ੍ਤਾ ਸਿਯਾਤਿ ਸੋਲ਼ਸ ਨਾਲ਼ਿਮਤ੍ਤਾ. ਇਧਾਪਿ ‘‘ਮਜ੍ਝਿਮੇਨ ਪਮਾਣੇਨਾ’’ਤਿ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ਤੇਨ ‘‘ਪਕਤਿਯਾ ਚਤੁਮੁਟ੍ਠਿਕਂ ਕੁਡੁਵਂ, ਚਤੁਕੁਡੁਵਂ ਨਾਲ਼ਿ, ਤਾਯ ਨਾਲ਼ਿਯਾ ਸੋਲ਼ਸ ਨਾਲ਼ਿਯੋ ਦੋਣਂ, ਤਂ ਪਨ ਮਗਧਨਾਲ਼ਿਯਾ ਦ੍ਵਾਦਸ ਨਾਲ਼ਿਯੋ ਹੋਨ੍ਤੀ’’ਤਿ ਵਦਨ੍ਤਿ. ਸਙ੍ਗਹਿਤਾਤਿ ਯਥਾ ਨ ਵਿਪ੍ਪਕਿਰਤਿ, ਏਵਂ ਆਬਨ੍ਧਨਵਸੇਨ ਸਮ੍ਪਿਣ੍ਡਿਤ੍ਵਾ ਗਹਿਤਾ. ਅਨੁਪਾਲਿਤਾਤਿ ਯਥਾ ਪਗ੍ਘਰਣਸਭਾਵਾਯ ਆਪੋਧਾਤੁਯਾ ਵਸੇਨ ਕਿਲਿਨ੍ਨਭਾਵਂ, ਪਿਚ੍ਛਿਲਭਾਵਂ ਵਾ ਨਾਪਜ੍ਜਤਿ, ਏਵਂ ਅਨੁਰਕ੍ਖਿਤਾ. ਵਿਤ੍ਥਮ੍ਭਿਤਾਤਿ ਸਙ੍ਘਾਤਵਾਯੁਨਾ ਅਤਿਵਿਯ ਵਿਤ੍ਥਮ੍ਭਨਂ ਪਾਪਿਤਾ. ਨ ਵਿਕਿਰਤਿ ਨ ਵਿਦ੍ਧਂਸਤੀਤਿ ਸੁਖੁਮਰਜਭੂਤਾਪਿ ਪਥਵੀਧਾਤੁ ਆਬਨ੍ਧਨਪਰਿਪਾਚਨਸਮੁਦੀਰਣਕਿਚ੍ਚਾਹਿ ਆਪੋਤੇਜੋਵਾਯੋਧਾਤੂਹਿ ਲਦ੍ਧਪਚ੍ਚਯਾ ਸਿਨੇਹੇਨ ਤੇਮਿਤਾ ਤੇਜਸਾ ਪਰਿਪਕ੍ਕਾ ਵਾਯੁਨਾ ਵਿਤ੍ਥਮ੍ਭਨਂ ਪਾਪਿਤਾ ਪਿਟ੍ਠਚੁਣ੍ਣਾ ਵਿਯ ਨ ਇਤੋ ਚਿਤੋ ਚ ਵਿਕਿਰਤਿ ਨ ਵਿਦ੍ਧਂਸਤਿ, ਅਥ ਖੋ ਪਿਣ੍ਡਿਤਾ ਘਨਭੂਤਾ ਹੁਤ੍ਵਾ ਨਾਨਪ੍ਪਕਾਰੇਨ ਗਹੇਤਬ੍ਬਤਂ ਆਪਜ੍ਜਤਿ. ਤੇਨਾਹ ‘‘ਅਵਿਕਿਰਿਯਮਾਨਾ’’ਤਿਆਦਿ. ਤਤ੍ਥ ਵਿਕਪ੍ਪਨ੍ਤਿ ਵਿਭਾਗਂ. ਯਦਿਪਿ ਤੇਜੋਵਾਯੋਧਾਤੁਯੋਪਿ ਸਵਿਗ੍ਗਹਾ ਰੂਪਧਮ੍ਮਭਾਵਤੋ, ਯਾਦਿਸੋ ਪਨ ਘਨਭਾਵੋ ਪਥਵੀਆਪੋਧਾਤੂਸੁ ਲਬ੍ਭਤਿ, ਨ ਤਾਦਿਸੋ ਤੇਜੋਵਾਯੋਧਾਤੂਸੁ ਲਬ੍ਭਤੀਤਿ ਮੇਯ੍ਯਭਾਵਾਭਾਵਤੋ ਤਤ੍ਥ ਚੁਣ੍ਣਭੇਦੋ ਨ ਉਦ੍ਧਟੋ. ਤਥਾ ਹਿ ਸਸਮ੍ਭਾਰਤੇਜੋਵਾਯੂਸੁਪਿ ਮੇਯ੍ਯਭਾਵੋ ਨ ਲਬ੍ਭਤੇਵ.
ਯੂਸਗਤਾਤਿ ਯੂਸਭਾਵਂ ਦ੍ਰਵਭਾਵਂ ਗਤਾ. ਤਤੋ ਏਵ ਆਬਨ੍ਧਨਾਕਾਰਭੂਤਾ. ਨ ਪਗ੍ਘਰਤੀਤਿ ਨ ਓਗਲ਼ਤਿ. ਨ ਪਰਿਸ੍ਸਵਤੀਤਿ ਨ ਵਿਸ੍ਸਨ੍ਦਤਿ. ਪੀਣਿਤਪੀਣਿਤਭਾਵਂ ਦਸ੍ਸੇਤੀਤਿ ਆਪੋਧਾਤੁਯਾ ਬ੍ਰੂਹਨਰਸਤਾਯ ਵੁਤ੍ਤਂ.
ਉਸੁਮਾਕਾਰਭੂਤਾਤਿ ਏਤੇਨ ਕਾਯੇ ਪਾਕਤਿਕਉਸ੍ਮਾਪਿ ਗਹਣੀਸਙ੍ਖਾਤਾਯ ਤਸ੍ਸਾਯੇਵ ਤੇਜੋਧਾਤੁਯਾ ਵਸੇਨ ਹੋਤੀਤਿ ਦਸ੍ਸੇਤਿ. ਪਰਿਪਾਚੇਤੀਤਿ ਸਨ੍ਤੇਜੇਤਿ. ਸਾ ਹਿ ਯਥਾਭੁਤ੍ਤਸ੍ਸ ਆਹਾਰਸ੍ਸ ਸਮ੍ਮਾ ਪਰਿਣਾਮਨੇਨ ਰਸਾਦਿਸਮ੍ਪਤ੍ਤਿਯਾ ਹੇਤੁਭਾਵਂ ਗਚ੍ਛਨ੍ਤੀ ਇਮਂ ਕਾਯਂ ਪਰਿਪਾਚੇਤਿ ਸਨ੍ਤੇਜੇਤੀਤਿ ਵੁਚ੍ਚਤਿ. ਤੇਨੇਵਾਹ ‘‘ਨ ਪੂਤਿਭਾਵਂ ਦਸ੍ਸੇਤੀ’’ਤਿ. ਕਮ੍ਮੂਪਨਿਸ੍ਸਯਾਯ, ਚਿਤ੍ਤਪ੍ਪਸਾਦਹੇਤੁਕਾਯ ਚ ਸਰੀਰੇ ਵਣ੍ਣਸਮ੍ਪਦਾਯ ਤੇਜੋਧਾਤੁ ਵਿਸੇਸਪਚ੍ਚਯੋ, ਪਗੇਵ ਉਤੁਆਹਾਰਸਮੁਟ੍ਠਾਨਾਯ ਰੂਪਸਮ੍ਪਤ੍ਤਿਯਾ ਯਥਾਵੁਤ੍ਤਤੇਜੋਧਾਤੂਤਿ ਆਹ ‘‘ਵਣ੍ਣਸਮ੍ਪਤ੍ਤਿਞ੍ਚਸ੍ਸ ਆਵਹਤੀ’’ਤਿ.
ਸਮੁਦੀਰਣਵਿਤ੍ਥਮ੍ਭਨਲਕ੍ਖਣਾਤਿ ਏਤ੍ਥ ਸਮੁਦੀਰਣਂ ਅਨੁਪੇਲ੍ਲਨਂ, ਵਿਸੋਸਨਨ੍ਤਿ ਕੇਚਿ. ਵਿਤ੍ਥਮ੍ਭਨਂ ਸੇਸਭੂਤਤ੍ਤਯਸ੍ਸ ਥਮ੍ਭਿਤਤ੍ਤਾਪਾਦਨਂ, ਉਪ੍ਪੀਲਨਨ੍ਤਿ ਏਕੇ. ਤਾਯਾਤਿ ਵਿਤ੍ਥਮ੍ਭਨਲਕ੍ਖਣਾਯ ਵਾਯੋਧਾਤੁਯਾ. ਅਪਰਾਯਾਤਿ ਸਮੁਦੀਰਣਲਕ੍ਖਣਾਯ. ਸਾ ਹਿ ਪੇਲ੍ਲਨਸਭਾਵਾ. ਤੇਨਾਹ ‘‘ਸਮਬ੍ਭਾਹਤੋ’’ਤਿ. ਸਮਬ੍ਭਾਹਨਞ੍ਚ ਰੂਪਕਲਾਪਸ੍ਸ ਦੇਸਨ੍ਤਰੁਪ੍ਪਤ੍ਤਿਯਾ ਹੇਤੁਭਾਵੋ. ਅਵਘਟ੍ਟਨਂ ਆਸਨ੍ਨਤਰੁਪ੍ਪਤ੍ਤਿਯਾ. ਲਾਲ਼ੇਤੀਤਿ ਪਰਿਵਤ੍ਤੇਤਿ. ਇਦਾਨਿ ਯਦਤ੍ਥਂ ਚੁਣ੍ਣਤੋ ਮਨਸਿਕਾਰੋ ਆਗਤੋ, ਤਂ ਨਿਗਮਨਵਸੇਨ ਦਸ੍ਸੇਤੁਂ ‘‘ਏਵਮੇਤ’’ਨ੍ਤਿਆਦਿ ਵੁਤ੍ਤਂ. ਤਤ੍ਥ ਧਾਤੁਯਨ੍ਤਨ੍ਤਿ ਸੁਤ੍ਤੇਨ ਵਿਯ ਯਨ੍ਤਰੂਪਕਂ ਅਸਤਿਪਿ ਕਤ੍ਤੁਭੂਤੇ ਅਤ੍ਤਨਿ ਚਿਤ੍ਤਵਸੇਨ ਧਾਤੁਮਯਂ ਯਨ੍ਤਂ ਪਵਤ੍ਤਤਿ, ਇਧਾਪਿ ਮਨਸਿਕਾਰਵਿਧਿ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.
੩੫੦. ਯਦਿਪਿ ਚਤੁਨ੍ਨਂ ਧਾਤੂਨਂ ਲਕ੍ਖਣਾਦਯੋ ਹੇਟ੍ਠਾ ਤਤ੍ਥ ਤਤ੍ਥ ਵੁਤ੍ਤਾ ਏਵ, ਤਥਾਪਿ ਤੇ ਅਨਵਸੇਸਤੋ ਦਸ੍ਸੇਤ੍ਵਾ ਵਿਸੁਂ ਕਮ੍ਮਟ੍ਠਾਨਪਰਿਗ੍ਗਹਵਿਧਿਂ ਦਸ੍ਸੇਤੁਂ ‘‘ਲਕ੍ਖਣਾਦਿਤੋ’’ਤਿਆਦਿ ਆਰਦ੍ਧਂ. ਤਤ੍ਥ ਲਕ੍ਖੀਯਤਿ ਏਤੇਨਾਤਿ ਲਕ੍ਖਣਂ, ਕਕ੍ਖਲ਼ਤ੍ਤਂ ਲਕ੍ਖਣਮੇਤਿਸ੍ਸਾਤਿ ਕਕ੍ਖਲ਼ਤ੍ਤਲਕ੍ਖਣਾ. ਨਨੁ ਚ ਕਕ੍ਖਲ਼ਤ੍ਤਮੇਵ ਪਥਵੀਧਾਤੂਤਿ? ਸਚ੍ਚਮੇਤਂ, ਤਥਾਪਿ ਵਿਞ੍ਞਾਤਾਵਿਞ੍ਞਾਤਸਦ੍ਦਤ੍ਥਤਾਵਸੇਨ ਅਭਿਨ੍ਨੇਪਿ ਧਮ੍ਮੇ ਕਪ੍ਪਨਾਸਿਦ੍ਧੇਨ ਭੇਦੇਨ ਏਵਂ ਨਿਦ੍ਦੇਸੋ ਕਤੋ. ਏਵਂ ਹਿ ਅਤ੍ਥਵਿਸੇਸਾਵਬੋਧੋ ਹੋਤੀਤਿ. ਅਥ ਵਾ ਲਕ੍ਖੀਯਤੀਤਿ ਲਕ੍ਖਣਂ, ਕਕ੍ਖਲ਼ਤ੍ਤਂ ਹੁਤ੍ਵਾ ਲਕ੍ਖਿਯਮਾਨਾ ਧਾਤੁ ਕਕ੍ਖਲ਼ਤ੍ਤਲਕ੍ਖਣਾਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ. ਸੇਸਾਸੁਪਿ ਏਸੇਵ ਨਯੋ. ਪਤਿਟ੍ਠਾਨਰਸਾਤਿ ਸਹਜਾਤਧਮ੍ਮਾਨਂ ਪਤਿਟ੍ਠਾਭਾਵਕਿਚ੍ਚਾ. ਤਤੋ ਏਵ ਨੇਸਂ ਸਮ੍ਪਟਿਚ੍ਛਨਾਕਾਰੇਨ ਞਾਣਸ੍ਸ ਪਚ੍ਚੁਪਤਿਟ੍ਠਤੀਤਿ ਸਮ੍ਪਟਿਚ੍ਛਨਪਚ੍ਚੁਪਟ੍ਠਾਨਾ. ਪਦਟ੍ਠਾਨਂ ਪਨੇਤ੍ਥ ਅਞ੍ਞਧਮ੍ਮਤਾਯ ਨ ਉਦ੍ਧਟਂ, ਸਾਧਾਰਣਭਾਵਸਬ੍ਭਾਵਤੋ ਵਾ ਦੂਰਕਾਰਣਂ ਵਿਯ. ਯਥਾ ਵਾ ਧਮ੍ਮੁਦ੍ਦੇਸਵਾਰਵਣ੍ਣਨਾਦੀਸੁ ਰਸਾਦਿਨਾ ਅਞ੍ਞੇਸਂ ਪਚ੍ਚਯਭਾਵਂ ਦਸ੍ਸੇਤ੍ਵਾ ਪਚ੍ਚਯਵਨ੍ਤਤਾਦਸ੍ਸਨਤ੍ਥਂ ਪਦਟ੍ਠਾਨਂ ਉਦ੍ਧਟਂ, ਨ ਏਵਮਿਧ. ਇਧ ਪਨ ਧਾਤੂਨਂ ਅਨਞ੍ਞਸਾਧਾਰਣਵਿਸੇਸਵਿਭਾਵਨਪਰਾਯ ਚੋਦਨਾਯ ਅਞ੍ਞਧਮ੍ਮਭੂਤਂ ਪਦਟ੍ਠਾਨਂ ਨ ਉਦ੍ਧਟਨ੍ਤਿ ਦਟ੍ਠਬ੍ਬਂ. ਬ੍ਰੂਹਨਰਸਾਤਿ ਸਹਜਾਤਧਮ੍ਮਾਨਂ ਵਡ੍ਢਨਕਿਚ੍ਚਾ. ਤਥਾ ਹਿ ਸਾ ਨੇਸਂ ਪੀਣਿਤਭਾਵਂ ਦਸ੍ਸੇਤੀਤਿ ਵੁਚ੍ਚਤਿ. ਸਙ੍ਗਹਪਚ੍ਚੁਪਟ੍ਠਾਨਾਤਿ ਬਾਹਿਰਉਦਕਂ ਵਿਯ ਨ੍ਹਾਨੀਯਚੁਣ੍ਣਸ੍ਸ ਸਹਜਾਤਧਮ੍ਮਾਨਂ ਸਙ੍ਗਹਣਪਚ੍ਚੁਪਟ੍ਠਾਨਾ. ਮਦ੍ਦਵਾਨੁਪ੍ਪਦਾਨਪਚ੍ਚੁਪਟ੍ਠਾਨਾਤਿ ਬਾਹਿਰਗ੍ਗਿ ਵਿਯ ਜਤੁਲੋਹਾਦੀਨਂ ਸਹਜਾਤਧਮ੍ਮਾਨਂ ਮੁਦੁਭਾਵਾਨੁਪ੍ਪਦਾਨਪਚ੍ਚੁਪਟ੍ਠਾਨਾ. ਅਭਿਨੀਹਾਰੋ ਭੂਤਸਙ੍ਘਾਟਸ੍ਸ ਦੇਸਨ੍ਤਰੁਪ੍ਪਤ੍ਤਿਹੇਤੁਭਾਵੋ, ਨੀਹਰਣਂ ਵਾ ਬੀਜਤੋ ਅਙ੍ਕੁਰਸ੍ਸ ਵਿਯ.
੩੫੧. ਉਤੁਸਮੁਟ੍ਠਾਨਾਵ ਕਮ੍ਮਾਦਿਵਸੇਨ ਅਨੁਪ੍ਪਤ੍ਤਿਤੋ. ਉਤੁਚਿਤ੍ਤਸਮੁਟ੍ਠਾਨਾ ਕਦਾਚਿ ਉਤੁਤੋ, ਕਦਾਚਿ ਚਿਤ੍ਤਤੋ ਉਪ੍ਪਜ੍ਜਨਤੋ. ਅਵਸੇਸਾਤਿ ਵੁਤ੍ਤਾਵਸੇਸਾ ਕੇਸਾਦਯੋ ਚਤੁਵੀਸਤਿ, ਆਦਿਤੋ ਤਯੋ ਤੇਜੋਕੋਟ੍ਠਾਸਾ, ਪਞ੍ਚ ਵਾਯੋਕੋਟ੍ਠਾਸਾ ਚਾਤਿ ਦ੍ਵਤ੍ਤਿਂਸ. ਸਬ੍ਬੇਪੀਤਿ ਤੇ ਸਬ੍ਬੇਪਿ ਕਮ੍ਮਾਦਿਵਸੇਨ ਉਪ੍ਪਜ੍ਜਨਤੋ ਚਤੁਸਮੁਟ੍ਠਾਨਾ. ਕੇਸਾਦੀਨਮ੍ਪਿ ਹਿ ਮਂਸਤੋ ਅਵਿਮੁਤ੍ਤਭਾਗੋ ਕਮ੍ਮਾਹਾਰਚਿਤ੍ਤਸਮੁਟ੍ਠਾਨੋਵ ਹੋਤੀਤਿ.
੩੫੨. ਨਾਨਤ੍ਤੇਕਤ੍ਤਤੋਤਿ ਵਿਸੇਸਸਾਮਞ੍ਞਤੋ. ਧਮ੍ਮਾਨਂ ਹਿ ਅਞ੍ਞਮਞ੍ਞਂ ਵਿਸਦਿਸਤਾ ਨਾਨਤ੍ਤਂ, ਸਮਾਨਤਾ ਏਕਤ੍ਤਂ. ਸਬ੍ਬਾਸਮ੍ਪੀਤਿ ਚਤੁਨ੍ਨਮ੍ਪਿ. ਸਲਕ੍ਖਣਾਦਿਤੋਤਿ ਸਕਂ ਲਕ੍ਖਣਂ ਸਲਕ੍ਖਣਂ, ਤਤੋ ਸਲਕ੍ਖਣਾਦਿਤੋ. ਆਦਿ-ਸਦ੍ਦੇਨ ਰਸਪਚ੍ਚੁਪਟ੍ਠਾਨਾਨਂ ਵਿਯ ਮੁਦੁਸਣ੍ਹਫਰੁਸਭਾਵਾਦੀਨਮ੍ਪਿ ਸਙ੍ਗਹੋ ਦਟ੍ਠਬ੍ਬੋ. ‘‘ਕਮ੍ਮਸਮੁਟ੍ਠਾਨਾਦਿਵਸੇਨ ਨਾਨਤ੍ਤਭੂਤਾਨ’’ਨ੍ਤਿ ਕਸ੍ਮਾ ਵੁਤ੍ਤਂ, ਨਨੁ ਕਮ੍ਮਸਮੁਟ੍ਠਾਨਾਦਿਵਸੇਨ ਚਤੁਨ੍ਨਂ ਧਾਤੂਨਂ ਏਕਤ੍ਤਂ ਹੋਤਿ ਸਾਧਾਰਣਤ੍ਤਾਤਿ? ਨ, ‘‘ਅਞ੍ਞਾ ਏਵ ਧਾਤੁਯੋ ਕਮ੍ਮਸਮੁਟ੍ਠਾਨਾ, ਅਞ੍ਞਾ ਉਤੁਆਦਿਸਮੁਟ੍ਠਾਨਾ’’ਤਿਆਦਿਕਂ ਭੇਦਂ ਸਨ੍ਧਾਯ ਤਥਾ ਵਚਨਤੋ. ਏਤਾਸਂ ਧਾਤੂਨਂ. ਰੁਪ੍ਪਨਲਕ੍ਖਣਂ ਰੁਪ੍ਪਨਸਭਾਵਂ. ਕਿਮ੍ਪਨੇਤਂ ਰੁਪ੍ਪਨਂ ਨਾਮ? ਯਾ ਸੀਤਾਦਿਵਿਰੋਧਿਪਚ੍ਚਯਸਨ੍ਨਿਪਾਤੇ ਵਿਸਦਿਸੁਪ੍ਪਤ੍ਤਿ, ਤਸ੍ਮਿਂ ਵਾ ਸਤਿ ਯੋ ਵਿਜ੍ਜਮਾਨਸ੍ਸੇਵ ਵਿਸਦਿਸੁਪ੍ਪਤ੍ਤਿਯਾ ਹੇਤੁਭਾਵੋ, ਤਂ ਰੁਪ੍ਪਨਂ. ਅਨਤੀਤਤ੍ਤਾਤਿ ਅਪਰਿਚ੍ਚਜਨਤੋ.
ਮਹਨ੍ਤਪਾਤੁਭਾਵੋ ਚੇਤ੍ਥ ਸਸਮ੍ਭਾਰਧਾਤੁਵਸੇਨ ਵੇਦਿਤਬ੍ਬੋ, ਤਥਾ ਮਹਾਵਿਕਾਰਤਾ ਮਹਾਭੂਤਸਾਮਞ੍ਞਲਕ੍ਖਣਧਾਤੁਵਸੇਨ, ਮਹਾਪਰਿਹਾਰਤਾ, ਮਹਤ੍ਤਵਿਜ੍ਜਮਾਨਤਾ ਚ ਉਭਯਵਸੇਨਾਤਿ. ਭੂਤਸਦ੍ਦਾਪੇਕ੍ਖਾਯ ‘‘ਏਤਾਨੀ’’ਤਿ ਨਪੁਂਸਕਨਿਦ੍ਦੇਸੋ. ਮਹਨ੍ਤਾਨਿ ਪਾਤੁਭੂਤਾਨਿ ਅਨੇਕਸਤਸਹਸ੍ਸ ਰੂਪਕਲਾਪਸਙ੍ਘਾਟਤਾਯ ਸਮੂਹਵਸੇਨ, ਸਨ੍ਤਤਿਵਸੇਨ ਚ ਅਪਰਿਮਿਤਪਰਿਮਾਣਾਨਂ, ਅਨੇਕਯੋਜਨਾਯਾਮਵਿਤ੍ਥਾਰਾਨਞ੍ਚ ਉਪ੍ਪਜ੍ਜਨਤੋ. ਚਤ੍ਤਾਰਿ ਨਹੁਤਾਨੀਤਿ ਚਤ੍ਤਾਰਿ ਦਸਸਹਸ੍ਸਾਨਿ. ਦੇਵਦਾਨਵਾਦੀਨਂ ਤਿਗਾਵੁਤਾਦਿਸਰੀਰਵਸੇਨ ਮਹਨ੍ਤਾਨਿ ਪਾਤੁਭੂਤਾਨਿ.
ਤਤ੍ਥਾਯਂ ਵਚਨਤ੍ਥੋ – ਮਹਨ੍ਤਾਨਿ ਭੂਤਾਨਿ ਜਾਤਾਨਿ ਨਿਬ੍ਬਤ੍ਤਾਨੀਤਿ ਮਹਾਭੂਤਾਨੀਤਿ. ਅਨੇਕਾਭੂਤਵਿਸੇਸਦਸ੍ਸਨੇਨ, ਅਨੇਕਬ੍ਭੁਤਦਸ੍ਸਨੇਨ ਚ ਅਨੇਕਚ੍ਛਰਿਯਦਸ੍ਸਨਵਸੇਨ ਮਹਨ੍ਤੋ ਅਬ੍ਭੁਤੋ, ਮਹਨ੍ਤਾਨਿ ਵਾ ਅਭੂਤਾਨਿ ਏਤ੍ਥਾਤਿ ਮਹਾਭੂਤੋ, ਮਾਯਾਕਾਰੋ. ਯਕ੍ਖਾਦਯੋ ਜਾਤਿਵਸੇਨੇਵ ਮਹਨ੍ਤਾ ਭੂਤਾਤਿ ਮਹਾਭੂਤਾ, ਨਿਰੁਲ਼੍ਹੋ ਵਾ ਅਯਂ ਤੇਸੁ ਮਹਾਭੂਤਸਦ੍ਦੋ ਦਟ੍ਠਬ੍ਬੋ. ਪਥਵੀਆਦਯੋ ਪਨ ਵਞ੍ਚਕਤਾਯ, ਅਨਿਦ੍ਦਿਸਿਤਬ੍ਬਟ੍ਠਾਨਤਾਯ ਚ ਮਹਾਭੂਤਾ ਵਿਯ ਮਹਾਭੂਤਾ. ਭੂਤਸਦ੍ਦਸ੍ਸ ਉਭਯਲਿਙ੍ਗਤਾਯ ਨਪੁਂਸਕਤਾ ਕਤਾ. ਤਤ੍ਥ ਵਞ੍ਚਕਤਾ ਸਯਂ ਅਨੀਲਾਦਿਸਭਾਵਾਨਿ ਹੁਤ੍ਵਾ ਨੀਲਾਦਿਸਭਾਵਸ੍ਸ ਉਪਟ੍ਠਾਪਨਂ, ਅਨਿਤ੍ਥਿਪੁਰਿਸਾਦਿਸਭਾਵਾਨੇਵ ਚ ਹੁਤ੍ਵਾ ਇਤ੍ਥਿਪੁਰਿਸਾਦਿਆਕਾਰਸ੍ਸ ਉਪਟ੍ਠਾਪਨਂ. ਤਥਾ ਅਞ੍ਞਮਞ੍ਞਸ੍ਸ ਅਨ੍ਤੋ, ਬਹਿ ਚ ਅਟ੍ਠਿਤਾਨਂਯੇਵ ਅਞ੍ਞਮਞ੍ਞਂ ਨਿਸ੍ਸਾਯ ਅਵਟ੍ਠਾਨਤੋ ਅਨਿਦ੍ਦਿਸਿਤਬ੍ਬਟ੍ਠਾਨਤਾ. ਯਦਿ ਹਿ ਇਮਾ ਧਾਤੁਯੋ ਅਞ੍ਞਮਞ੍ਞਸ੍ਸ ਅਨ੍ਤੋ ਠਿਤਾ, ਨ ਸਕਿਚ੍ਚਕਰਾ ਸਿਯੁਂ ਅਞ੍ਞਮਞ੍ਞਾਨੁਪ੍ਪਵੇਸਨਤੋ, ਅਥ ਬਹਿ ਠਿਤਾ ਵਿਨਿਬ੍ਭੁਤ੍ਤਾ ਸਿਯੁਂ. ਤਥਾ ਸਤਿ ਅਵਿਨਿਬ੍ਭੁਤ੍ਤਵਾਦੋ ਹਾਯੇਯ੍ਯ, ਤਸ੍ਮਾ ਨ ਨਿਦ੍ਦਿਸਿਤਬ੍ਬਟ੍ਠਾਨਾ. ਏਵਂ ਸਨ੍ਤੇਪਿ ਪਤਿਟ੍ਠਾਨਾਦਿਨਾ ਯਥਾਸਕਂ ਕਿਚ੍ਚਵਿਸੇਸੇਨ ਸੇਸਾਨਂ ਤਿਣ੍ਣਂ ਤਿਣ੍ਣਂ ਉਪਕਾਰਿਕਾ ਹੋਨ੍ਤਿ, ਯੇਨ ਸਹਜਾਤਾਦਿਨਾ ਪਚ੍ਚਯੇਨ ਪਚ੍ਚਯਾ ਹੋਨ੍ਤਿ. ਤੇਨਾਹ ‘‘ਨ ਚ ਅਞ੍ਞਮਞ੍ਞਂ ਨਿਸ੍ਸਾਯ ਨ ਤਿਟ੍ਠਨ੍ਤੀ’’ਤਿ. ਮਨਾਪੇਹੀਤਿ ਮਨੋਹਰੇਹਿ ਚਾਤੁਰਿਯਵਨ੍ਤੇਹਿ. ਵਣ੍ਣਸਣ੍ਠਾਨਵਿਕ੍ਖੇਪੇਹੀਤਿ ਕਾਲ਼ਸਾਮਤਾਦਿਵਣ੍ਣੇਹਿ, ਪੁਥੁਲਵਿਵਰਕਿਸਤਾਦਿਸਣ੍ਠਾਨੇਹਿ, ਹਤ੍ਥਭਮੁਕਾਦਿਵਿਕ੍ਖੇਪੇਹਿ ਚ. ਸਰਸਲਕ੍ਖਣਨ੍ਤਿ ਸਭਾਵਭੂਤਂ ਲਕ੍ਖਣਂ, ਸਕਿਚ੍ਚਕਂ ਵਾ ਸਭਾਵਂ.
ਮਹਾਪਰਿਹਾਰਤੋਤਿ ਏਤ੍ਥ ਵਚਨਤ੍ਥਂ ਵਦਨ੍ਤੋ ਆਹ ‘‘ਮਹਨ੍ਤੇਹਿ…ਪੇ… ਭੂਤਾਨਿ, ਮਹਾਪਰਿਹਾਰਾਨਿ ਵਾ ਭੂਤਾਨੀ’’ਤਿ. ਤਤ੍ਥ ਪਚ੍ਛਿਮਤ੍ਥੇ ਪੁਰਿਮਪਦੇ ਉਤ੍ਤਰਪਦਸ੍ਸ ਪਰਿਹਾਰ-ਸਦ੍ਦਸ੍ਸ ਲੋਪਂ ਕਤ੍ਵਾ ‘‘ਮਹਾਭੂਤਾਨੀ’’ਤਿ ਵੁਤ੍ਤਂ.
ਤਥਾ ਹੀਤਿ ਤਤੋ ਏਵ ਵਿਕਾਰਸ੍ਸ ਮਹਨ੍ਤਤ੍ਤਾ ਏਵਾਤਿ ਤਂ ਵਿਕਾਰਂ ਦਸ੍ਸੇਤੁਂ ‘‘ਭੂਮਿਤੋ’’ਤਿਆਦਿ ਵੁਤ੍ਤਂ. ਤਤ੍ਥ ਅਚ੍ਚਿਮਤੋਤਿ ਅਗ੍ਗਿਸ੍ਸ. ਕੋਟਿਸਤਸਹਸ੍ਸਂ ਏਕਂ ਕੋਟਿਸਤਸਹਸ੍ਸੇਕਂ ਚਕ੍ਕਵਾਲ਼ਨ੍ਤਿ ਤਂ ਸਬ੍ਬਂ ਆਣਾਖੇਤ੍ਤਭਾਵੇਨ ਏਕਂ ਕਤ੍ਵਾ ਵਦਤਿ. ਵਿਲੀਯਤੀਤਿ ਵਿਪਤ੍ਤਿਕਰਮੇਘਾਭਿਵੁਟ੍ਠੇਨ ਖਾਰੁਦਕੇਨ ਲਵਣਂ ਵਿਯ ਵਿਲਯਂ ਗਚ੍ਛਤਿ ਵਿਦ੍ਧਂਸਤਿ. ਕੁਪਿਤੇਨਾਤਿ ਖੁਭਿਤੇਨ. ਵਿਕੀਰਤੀਤਿ ਵਿਧਮਤਿ ਵਿਦ੍ਧਂਸਤਿ.
ਅਨੁਪਾਦਿਨ੍ਨੇਸੁ ਵਿਕਾਰਮਹਤ੍ਤਂ ਦਸ੍ਸੇਤ੍ਵਾ ਉਪਾਦਿਨ੍ਨੇਸੁ ਦਸ੍ਸੇਨ੍ਤੋ ‘‘ਪਤ੍ਥਦ੍ਧੋ’’ਤਿਆਦਿਮਾਹ. ਤਤ੍ਥ ਕਟ੍ਠਮੁਖੇਨ ਵਾਤਿ ਵਾ-ਸਦ੍ਦੋ ਉਪਮਤ੍ਥੋ. ਯਥਾ ਕਟ੍ਠਮੁਖੇਨ ਸਪ੍ਪੇਨ ਡਟ੍ਠੋ ਪਤ੍ਥਦ੍ਧੋ ਹੋਤਿ, ਏਵਂ ਪਥਵੀਧਾਤੁਪ੍ਪਕੋਪੇਨ ਸੋ ਕਾਯੋ ਕਟ੍ਠਮੁਖੇਵ ਹੋਤਿ, ਕਟ੍ਠਮੁਖਮੁਖਗਤੋ ਵਿਯ ਪਤ੍ਥਦ੍ਧੋ ਹੋਤੀਤਿ ਅਤ੍ਥੋ. ਅਥ ਵਾ ਵਾ-ਸਦ੍ਦੋ ਅਵਧਾਰਣਤ੍ਥੋ. ਸੋ ‘‘ਪਥਵੀਧਾਤੁਪ੍ਪਕੋਪੇਨ ਵਾ’’ਤਿ ਏਵਂ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬੋ. ਅਯਞ੍ਹੇਤ੍ਥ ਅਤ੍ਥੋ – ਕਟ੍ਠਮੁਖੇਨ ਡਟ੍ਠੋਪਿ ਕਾਯੋ ਪਥਵੀਧਾਤੁਪ੍ਪਕੋਪੇਨੇਵ ਪਤ੍ਥਦ੍ਧੋ ਹੋਤਿ, ਤਸ੍ਮਾ ਪਥਵੀਧਾਤੁਯਾ ਅਵਿਯੁਤ੍ਤੋ ਸੋ ਕਾਯੋ ਸਬ੍ਬਦਾ ਕਟ੍ਠਮੁਖਮੁਖਗਤੋ ਵਿਯ ਹੋਤੀਤਿ. ਵਾ-ਸਦ੍ਦੋ ਵਾ ਅਨਿਯਮਤ੍ਥੋ, ਤਤ੍ਰਾਯਮਤ੍ਥੋ – ਕਟ੍ਠਮੁਖੇਨ ਡਟ੍ਠੋ ਕਾਯੋ ਪਤ੍ਥਦ੍ਧੋ ਹੋਤਿ ਵਾ, ਨ ਵਾ ਹੋਤਿ ਮਨ੍ਤਾਗਦਵਸੇਨ, ਪਥਵੀਧਾਤੁਪ੍ਪਕੋਪੇਨ ਪਨ ਮਨ੍ਤਾਗਦਰਹਿਤੋ ਸੋ ਕਾਯੋ ਕਟ੍ਠਮੁਖਮੁਖਗਤੋ ਵਿਯ ਹੋਤਿ ਏਕਨ੍ਤਪਤ੍ਥਦ੍ਧੋਤਿ.
ਪੂਤਿਯੋਤਿ ਕੁਥਿਤੋ. ਸਨ੍ਤਤ੍ਤੋਤਿ ਸਬ੍ਬਸੋ ਤਤ੍ਤੋ ਸਮੁਪ੍ਪਨ੍ਨਦਾਹੋ. ਸਞ੍ਛਿਨ੍ਨੋਤਿ ਸਮਨ੍ਤਤੋ ਛਿਨ੍ਨੋ ਪਰਮਾਣੁਭੇਦਸਞ੍ਚੁਣ੍ਣੋ ਆਯਸ੍ਮਤੋ ਉਪਸੇਨਤ੍ਥੇਰਸ੍ਸ ਸਰੀਰਂ ਵਿਯ. ਮਹਾਵਿਕਾਰਾਨਿ ਭੂਤਾਨੀਤਿ ਮਹਾਵਿਕਾਰਵਨ੍ਤਾਨਿ ਭੂਤਾਨਿ ਮਹਾਭੂਤਾਨੀਤਿ ਪੁਰਿਮਪਦੇ ਉਤ੍ਤਰਪਦਲੋਪੇਨ ਨਿਦ੍ਦੇਸੋ ਦਟ੍ਠਬ੍ਬੋ. ‘‘ਪਥਵੀ’’ਤਿਆਦਿਨਾ ਸਬ੍ਬਲੋਕਸ੍ਸ ਪਾਕਟਾਨਿਪਿ ਵਿਪਲ੍ਲਾਸਂ ਮੁਞ੍ਚਿਤ੍ਵਾ ਯਥਾਸਭਾਵਤੋ ਪਰਿਗ੍ਗਣ੍ਹਨੇ ਮਹਨ੍ਤੇਨ ਵਾਯਾਮੇਨ ਵਿਨਾ ਨ ਪਰਿਗ੍ਗਣ੍ਹਨ੍ਤੀਤਿ ਦੁਵਿਞ੍ਞੇਯ੍ਯਸਭਾਵਤ੍ਤਾ ‘‘ਮਹਨ੍ਤਾਨੀ’’ਤਿ ਵੁਚ੍ਚਨ੍ਤਿ. ਤਾਨਿ ਹਿ ਸੁਵਿਞ੍ਞੇਯ੍ਯਾਨਿ. ‘‘ਅਮਹਨ੍ਤਾਨੀ’’ਤਿ ਮਨ੍ਤ੍ਵਾ ਠਿਤਾ ਤੇਸਂ ਦੁਪ੍ਪਰਿਗ੍ਗਹਤਂ ਦਿਸ੍ਵਾ ‘‘ਅਹੋ ਮਹਨ੍ਤਾਨਿ ਏਤਾਨੀ’’ਤਿ ਜਾਨਾਤੀਤਿ ਮਹਾਭੂਤੇਕਦੇਸਤਾਦੀਹਿ ਵਾ ਕਾਰਣੇਹਿ ਮਹਾਭੂਤਾਨਿ. ਏਤਾ ਹਿ ਧਾਤੁਯੋ ਮਹਾਭੂਤੇਕਦੇਸਤੋ, ਮਹਾਭੂਤਸਾਮਞ੍ਞਤੋ, ਮਹਾਭੂਤਸਨ੍ਨਿਸ੍ਸਯਤੋ, ਮਹਾਭੂਤਭਾਵਤੋ, ਮਹਾਭੂਤਪਰਿਯੋਸਾਨਤੋ ਚਾਤਿ ਇਮੇਹਿਪਿ ਕਾਰਣੇਹਿ ‘‘ਮਹਾਭੂਤਾਨੀ’’ਤਿ ਵੁਚ੍ਚਨ੍ਤਿ.
ਤਤ੍ਥ ਮਹਾਭੂਤੇਕਦੇਸਤੋਤਿ ‘‘ਭੂਤਮਿਦਨ੍ਤਿ, ਭਿਕ੍ਖਵੇ, ਸਮਨੁਪਸ੍ਸਥਾ’’ਤਿਆਦੀਸੁ (ਮ. ਨਿ. ੧.੪੦੧) ਹਿ ਅਵਿਸੇਸੇਨ ਖਨ੍ਧਪਞ੍ਚਕਂ ‘‘ਭੂਤ’’ਨ੍ਤਿ ਵੁਚ੍ਚਤਿ. ਤਤ੍ਥ ਯਦਿਦਂ ਕਾਮਭਵੇ, ਰੂਪਭਵੇ, ਪਞ੍ਚਵੋਕਾਰਭਵੇ, ਏਕਚ੍ਚੇ ਚ ਸਞ੍ਞੀਭਵੇ ਪਵਤ੍ਤਂ ਖਨ੍ਧਪਞ੍ਚਕਂ, ਤਂ ਮਹਾਵਿਸਯਤਾਯ ‘‘ਮਹਾਭੂਤ’’ਨ੍ਤਿ ਵਤ੍ਤਬ੍ਬਤਂ ਅਰਹਤਿ. ਪਥਵੀਆਦਯੋ ਪਨ ਚਤਸ੍ਸੋ ਧਾਤੁਯੋ ਤਸ੍ਸ ਮਹਾਭੂਤਸ੍ਸ ਏਕਦੇਸਭੂਤਾ ‘‘ਮਹਾਭੂਤਾ’’ਤਿ ਵੁਚ੍ਚਨ੍ਤਿ. ਸਮੁਦਾਯੇਸੁ ਹਿ ਪਵਤ੍ਤਵੋਹਾਰਾ ਅਵਯਵੇਸੁਪਿ ਦਿਸ੍ਸਨ੍ਤਿ ਯਥਾ ‘‘ਸਮੁਦ੍ਦੋ ਦਿਟ੍ਠੋ, ਪਟੋ ਦਡ੍ਢੋ’’ਤਿ ਚ. ਮਹਾਭੂਤਸਮਞ੍ਞਤੋਤਿ ਤਦਧੀਨਵੁਤ੍ਤਿਤਾਯ ਭਵਨ੍ਤਿ ਏਤ੍ਥ ਉਪਾਦਾਰੂਪਾਨੀਤਿ ਭੂਤਾਨਿ, ਪਥਵੀਆਦਯੋ ਚਤਸ੍ਸੋ ਧਾਤੁਯੋ. ਸਾ ਪਨਾਯਮੇਤਾਸੁ ਭੂਤਸਮਞ੍ਞਾ ਅਨਞ੍ਞਤ੍ਥਵੁਤ੍ਤਿਤਾਯ ਉਪਾਦਾਰੂਪਾਨਂ ਅਵਿਪਰੀਤਟ੍ਠਾ, ਲੋਕਸ੍ਸ ਚੇਤਾ ਬਹੂਪਕਾਰਾ, ਚਕ੍ਖੁਸਮੁਦ੍ਦਾਦੀਨਂ ਨਿਸ੍ਸਯਭੂਤਾ ਚਾਤਿ ਮਹਨ੍ਤਾਨਿ ਭੂਤਾਨੀਤਿ ਸਮਞ੍ਞਾਯਿਂਸੁ. ਮਹਾਭੂਤਸਨ੍ਨਿਸ੍ਸਯਤੋਤਿ ਮਹਨ੍ਤਾਨਂ ਮਹਾਨੁਭਾਵਾਨਂ ਮਹਾਸਮ੍ਮਤਮਨ੍ਧਾਤੁਪ੍ਪਭੁਤੀਨਂ ਰਞ੍ਞਂ, ਸਕ੍ਕਾਦੀਨਂ ਦੇਵਾਨਂ, ਵੇਪਚਿਤ੍ਤਿਆਦੀਨਂ ਅਸੁਰਾਨਂ, ਮਹਾਬ੍ਰਹ੍ਮਾਦੀਨਂ ਬ੍ਰਹ੍ਮਾਨਂ, ਗੁਣਤੋ ਵਾ ਮਹਨ੍ਤਾਨਂ ਬੁਦ੍ਧਾਨਂ, ਪਚ੍ਚੇਕਬੁਦ੍ਧਾਨਂ, ਸਾਵਕਾਨਂ ਉਪਾਦਾਯੁਪਾਦਾਯ ਵਾ ਸਬ੍ਬੇਸਮ੍ਪਿ ਭੂਤਾਨਂ ਸਤ੍ਤਾਨਂ ਨਿਸ੍ਸਯਭੂਤਤਾਯ ਮਹਨ੍ਤਾ ਭੂਤਾ ਏਤੇਸੂਤਿ ਮਹਾਭੂਤਾ. ਚਾਤੁਮਹਾਭੂਤਿਕੋ ਹਿ ਨੇਸਂ ਕਾਯੋਤਿ. ਮਹਾਭੂਤਭਾਵਤੋਤਿ ਬਹੁਭੂਤਭਾਵਤੋ. ਅਯਂ ਹਿ ਮਹਾ-ਸਦ੍ਦੋ ‘‘ਮਹਾਜਨੋ ਸਨ੍ਨਿਪਤਿਤੋ’’ਤਿਆਦੀਸੁ ਬਹੁਭਾਵੇ ਦਿਸ੍ਸਤਿ. ਪਥਵੀਆਦਯੋ ਚ ਧਾਤੁਯੋ ਏਕਸ੍ਮਿਮ੍ਪਿ ਅਤ੍ਤਭਾਵੇ ਅਪਰਿਮੇਯ੍ਯਪ੍ਪਭੇਦਾ ਪਵਤ੍ਤਨ੍ਤਿ. ਤਸ੍ਮਾ ਮਹਨ੍ਤਾ ਬਹੂ ਅਨੇਕਸਤਸਹਸ੍ਸਪ੍ਪਭੇਦਾ ਭੂਤਾਤਿ ਮਹਾਭੂਤਾ. ਮਹਾਭੂਤਪਰਿਯੋਸਾਨਤੋਤਿ ਮਹਾਭੂਤਸ੍ਸ ਵਸੇਨ ਪਰਿਯੋਸਾਨਪ੍ਪਤ੍ਤਿਤੋ.
‘‘ਕਾਲੋ ਘਸਤਿ ਭੂਤਾਨਿ, ਸਬ੍ਬਾਨੇਵ ਸਹਤ੍ਤਨਾ;
ਯੋ ਚ ਕਾਲਘਸੋ ਭੂਤੋ, ਸ ਭੂਤਪਚਨਿਂ ਪਚੀ’’ਤਿ. (ਜਾ. ੧.੨.੧੯੦) –
ਹਿ ਏਵਮਾਦੀਸੁ ਖੀਣਾਸਵੋ ‘‘ਭੂਤੋ’’ਤਿ ਵੁਤ੍ਤੋ. ਸੋ ਹਿ ਉਚ੍ਛਿਨ੍ਨਭਵਨੇਤ੍ਤਿਕਤਾਯ ਆਯਤਿਂ ਅਪ੍ਪਟਿਸਨ੍ਧਿਕਤ੍ਤਾ ਏਕਨ੍ਤਤੋ ‘‘ਭੂਤੋ’’ਤਿ ਵੁਚ੍ਚਤਿ, ਨ ਇਤਰੇ, ਭਵਿਸ੍ਸਨ੍ਤੀਤਿ ਵੋਹਾਰਂ ਅਨਤੀਤਤ੍ਤਾ. ਭੂਤੋ ਏਵ ਇਧ ਪੂਜਾਵਸੇਨ ‘‘ਮਹਾਭੂਤੋ’’ਤਿ ਵੁਤ੍ਤੋ ਯਥਾ ‘‘ਮਹਾਖੀਣਾਸਵੋ, ਮਹਾਮੋਗ੍ਗਲ੍ਲਾਨੋ’’ਤਿ ਚ. ਇਮਾਸਞ੍ਚ ਧਾਤੂਨਂ ਅਨਾਦਿਮਤਿ ਸਂਸਾਰੇ ਪਬਨ੍ਧਵਸੇਨ ਪਵਤ੍ਤਮਾਨਾਨਂ ਯਥਾਵੁਤ੍ਤਸ੍ਸ ਮਹਾਭੂਤਸ੍ਸੇਵ ਸਨ੍ਤਾਨੇ ਪਰਿਯੋਸਾਨਪ੍ਪਤ੍ਤਿ, ਨਾਞ੍ਞਤ੍ਰ. ਤਸ੍ਮਾ ਮਹਾਭੂਤੇ ਭੂਤਾ ਪਰਿਯੋਸਾਨਂ ਪਤ੍ਤਾਤਿ ਮਹਾਭੂਤਾ ਪੁਰਿਮਪਦੇ ਭੂਤ-ਸਦ੍ਦਸ੍ਸ ਲੋਪਂ ਕਤ੍ਵਾ. ਏਵਮੇਤਾ ਧਾਤੁਯੋ ਮਹਾਭੂਤੇਕਦੇਸਤਾਦੀਹਿ ਮਹਾਭੂਤਾਤਿ ਵੇਦਿਤਬ੍ਬਾ. ਪਥਵੀਆਦੀਨਂ ਕਕ੍ਖਲ਼ਪਗ੍ਘਰਣਾਦਿਵਿਸੇਸਲਕ੍ਖਣਸਮਙ੍ਗਿਤਾ ਅਪਰਿਚ੍ਚਤ੍ਤਧਾਤੁਲਕ੍ਖਣਾਨਂਯੇਵਾਤਿ ਆਹ ‘‘ਧਾਤੁਲਕ੍ਖਣਂ ਅਨਤੀਤਤ੍ਤਾ’’ਤਿ. ਨ ਹਿ ਸਾਮਞ੍ਞਪਰਿਚ੍ਚਾਗੇਨ ਵਿਸੇਸੋ, ਵਿਸੇਸਨਿਰਪੇਕ੍ਖਂ ਵਾ ਸਾਮਞ੍ਞਂ ਪਵਤ੍ਤਤਿ. ਤਥਾ ਹਿ ਵਦਨ੍ਤਿ –
‘‘ਤਮਤ੍ਥਾਪੇਕ੍ਖਤੋ ਭੇਦਂ, ਸਸਾਮਞ੍ਞਂ ਜਹਾਤਿ ਨੋ;
ਗਣ੍ਹਾਤਿ ਸਂਸਯੁਪ੍ਪਾਦਾ, ਸਮੇਵੇਕਤ੍ਥਕਂ ਦ੍ਵਯ’’ਨ੍ਤਿ.
ਸਲਕ੍ਖਣਧਾਰਣੇਨ ਚਾਤਿ ਯੇਨ ਸਲਕ੍ਖਣਧਾਰਣੇਨ ‘‘ਧਾਤੁਯੋ’’ਤਿ ਵੁਚ੍ਚਨ੍ਤਿ, ਤੇਨੇਵ ‘‘ਧਮ੍ਮਾ’’ਤਿਪਿ ਵੁਚ੍ਚਨ੍ਤਿ ਉਭਯਥਾਪਿ ਨਿਸ੍ਸਤ੍ਤਨਿਜ੍ਜੀਵਤਾਯ ਏਵ ਵਿਭਾਵਨਤੋ. ਤੇਨੇਵਾਹ – ‘‘ਛਧਾਤੁਰੋਯਂ ਭਿਕ੍ਖੁ ਪੁਰਿਸੋ, ਧਮ੍ਮੇਸੁ ਧਮ੍ਮਾਨੁਪਸ੍ਸੀ ਵਿਹਰਤੀ’’ਤਿ ਚ. ਅਰੂਪਾਨਂ ਖਣਤੋ ਰੂਪਾਨਂ ਖਣਸ੍ਸ ਨਾਤਿਇਤ੍ਤਰਤਾਯਾਹ ‘‘ਅਤ੍ਤਨੋ ਖਣਾਨੁਰੂਪ’’ਨ੍ਤਿ. ਧਰਣੇਨਾਤਿ ਠਾਨੇਨ, ਪਵਤ੍ਤਨੇਨਾਤਿ ਅਤ੍ਥੋ. ਖਯਟ੍ਠੇਨਾਤਿ ਖਣਭਙ੍ਗੁਤਾਯ. ਭਯਟ੍ਠੇਨਾਤਿ ਉਦਯਵਯਪਟਿਪੀਲ਼ਨਾਦਿਨਾ ਸਪ੍ਪਟਿਭਯਤਾਯ. ਅਸਾਰਕਟ੍ਠੇਨਾਤਿ ਅਤ੍ਤਸਾਰਵਿਰਹੇਨ.
੩੫੩. ਸਹੁਪ੍ਪਨ੍ਨਾਵ ਏਤਾਤਿ ਏਤਾ ਚਤਸ੍ਸੋ ਧਾਤੁਯੋ ਸਹ ਉਪ੍ਪਨ੍ਨਾਵ ਸਹ ਪਵਤ੍ਤਮਾਨਾਵ ਸਮਾਨਕਾਲੇ ਲਬ੍ਭਮਾਨਾਪਿ ਅਵਕਂਸਤੋ ਸਬ੍ਬਪਰਿਯਨ੍ਤਿਮੇ ਉਤੁਚਿਤ੍ਤਾਹਾਰਸਮੁਟ੍ਠਾਨੇਸੁ ਸੁਦ੍ਧਟ੍ਠਕੇ, ਕਮ੍ਮਜੇਸੁ ਜੀਵਿਤਨਵਕੇਤਿ ਏਕੇਕਸ੍ਮਿਂ ਸੁਦ੍ਧਟ੍ਠਕਾਦਿਕਲਾਪੇਪਿ ਪਦੇਸੇਨ ਅਵਿਨਿਬ੍ਭੁਤ੍ਤਾ ਵਿਸੁਂ ਵਿਸੁਂ ਅਨਿਦ੍ਦਿਸਿਤਬ੍ਬਟ੍ਠਾਨਤਾਯ. ਯਤ੍ਥ ਹਿ ਤਿਸ੍ਸਨ੍ਨਂ ਧਾਤੂਨਂ ਪਤਿਟ੍ਠਾਵਸੇਨ ਪਥਵੀ, ਤਤ੍ਥੇਵ ਤਸ੍ਸਾ ਆਬਨ੍ਧਨਪਰਿਪਾਚਨਸਮੁਦੀਰਣਵਸੇਨ ਇਤਰਾ. ਏਸ ਨਯੋ ਸੇਸਾਸੁਪਿ.
੩੫੪. ਪੁਰਿਮਾ ਦ੍ਵੇ ਗਰੁਕਤ੍ਤਾ ਸਭਾਗਾ ਅਞ੍ਞਮਞ੍ਞਨ੍ਤਿ ਅਧਿਪ੍ਪਾਯੋ. ਏਤ੍ਥ ਚ ਨਨੁ ਪਥਵਿਯਾਪਿ ਲਹੁਭਾਵੋ ਅਤ੍ਥਿ. ਤਥਾ ਹਿ ਸਾ ‘‘ਕਕ੍ਖਲ਼ਂ ਮੁਦੁਕਂ ਸਣ੍ਹਂ ਫਰੁਸਂ ਗਰੁਕਂ ਲਹੁਕ’’ਨ੍ਤਿ ਨਿਦ੍ਦਿਟ੍ਠਾ, ਆਪੇਪਿ ਲਹੁਭਾਵੋ ਲਬ੍ਭਤੇਵਾਤਿ? ਨ, ਨਿਪ੍ਪਰਿਯਾਯਗਰੁਭਾਵਸ੍ਸ ਅਧਿਪ੍ਪੇਤਤ੍ਤਾ. ਗਰੁਭਾਵੋ ਏਵ ਹਿ ਪਥਵੀਧਾਤੁਯਾ ਗਰੁਤਰਂ ਉਪਾਦਾਯ ਲਹੁਭਾਵੋਤਿ ਪਰਿਯਾਯੇਨ ਵੁਤ੍ਤੋ ਸੀਤਭਾਵੋ ਵਿਯ ਤੇਜੋਧਾਤੁਯਾ. ਯਦਿ ਏਵਂ ਰੂਪਸ੍ਸ ਲਹੁਤਾਤਿ ਕਥਂ? ਅਯਮ੍ਪਿ ਵੁਤ੍ਤਨਯਾ ਏਵ ਲਹੁਤਾਕਾਰਂ ਉਪਾਦਾਯ ਲਬ੍ਭਨਤੋ. ਨ ਹਿ ਪਰਿਚ੍ਛੇਦਵਿਕਾਰਲਕ੍ਖਣਾਨਿ ਪਰਮਤ੍ਥਤੋ ਲਬ੍ਭਨ੍ਤਿ ਨਿਪ੍ਫਨ੍ਨਰੂਪਾਨਂ ਅਵਤ੍ਥਾਵਿਸੇਸਸਭਾਵਤੋ. ਤਸ੍ਮਾ ਪਰਮਤ੍ਥਸਿਦ੍ਧਂ ਗਰੁਭਾਵਂ ਸਨ੍ਧਾਯ ਵੁਤ੍ਤਂ ‘‘ਪੁਰਿਮਾ ਦ੍ਵੇ ਗਰੁਕਤ੍ਤਾ ਸਭਾਗਾ’’ਤਿ. ‘‘ਤਥਾ’’ਤਿ ਪਦੇਨ ‘‘ਸਭਾਗਾ’’ਤਿ ਇਮਮਤ੍ਥਂ ਉਪਸਂਹਰਤਿ. ‘‘ਦ੍ਵੇ’’ਤਿ ਪਨ ਇਦਂ ਯਥਾ ‘‘ਪੁਰਿਮਾ’’ਤਿ ਏਤ੍ਥ, ਏਵਂ ‘‘ਪਚ੍ਛਿਮਾ’’ਤਿ ਏਤ੍ਥਾਪਿ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ਵਿਸਭਾਗਾ ਗਰੁਕਲਹੁਕਭਾਵਤੋਤਿ ਅਧਿਪ੍ਪਾਯੋ. ਯਥਾ ਚ ਗਰੁਕਲਹੁਕਭਾਵੇਹਿ, ਏਵਂ ਪੇਯ੍ਯਭਾਵਾਪੇਯ੍ਯਭਾਵੇਹਿ ਚ ਸਭਾਗਵਿਸਭਾਗਤਾ ਯੋਜੇਤਬ੍ਬਾ.
੩੫੫. ਅਜ੍ਝਤ੍ਤਿਕਾ ਹੇਟ੍ਠਾ ਵੁਤ੍ਤਅਜ੍ਝਤ੍ਤਿਕਾ, ਸਤ੍ਤਸਨ੍ਤਾਨਪਰਿਯਾਪਨ੍ਨਾਤਿ ਅਤ੍ਥੋ. ਵਿਞ੍ਞਾਣਵਤ੍ਥੁ ਵਿਞ੍ਞਤ੍ਤਿਇਨ੍ਦ੍ਰਿਯਾਨਨ੍ਤਿ ਚਕ੍ਖਾਦੀਨਂ ਛਨ੍ਨਂ ਵਿਞ੍ਞਾਣਵਤ੍ਥੂਨਂ, ਦ੍ਵਿਨ੍ਨਂ ਵਿਞ੍ਞਤ੍ਤੀਨਂ, ਇਤ੍ਥਿਪੁਰਿਸਿਨ੍ਦ੍ਰਿਯਜੀਵਿਤਿਨ੍ਦ੍ਰਿਯਾਨਞ੍ਚ. ਯੇ ਪਨ ‘‘ਵਿਞ੍ਞਾਣਵਤ੍ਥੂਤਿ ਹਦਯਵਤ੍ਥੁ ਗਹਿਤ’’ਨ੍ਤਿ ਵਦਨ੍ਤਿ, ਤੇਸਂ ਇਨ੍ਦ੍ਰਿਯ-ਗ੍ਗਹਣੇਨ ਅਟ੍ਠਨ੍ਨਮ੍ਪਿ ਰੂਪਿਨ੍ਦ੍ਰਿਯਾਨਂ ਗਹਣਂ ਵੇਦਿਤਬ੍ਬਂ. ‘‘ਵੁਤ੍ਤਵਿਪਰੀਤਪ੍ਪਕਾਰਾ’’ਤਿ ਇਦਂ ਬਾਹਿਰਾਨਂ ਧਾਤੂਨਂ ਯਥਾ ਸਬ੍ਬਸੋ ਵਿਞ੍ਞਾਣਵਤ੍ਥੁਵਿਞ੍ਞਤ੍ਤਿਇਨ੍ਦ੍ਰਿਯਾਨਂ ਅਨਿਸ੍ਸਯਤਾ ਚ ਇਰਿਯਾਪਥਵਿਰਹੋ ਚ ਵੁਤ੍ਤਵਿਪਰਿਯਾਯੋ, ਏਵਂ ਚਤੁਸਮੁਟ੍ਠਾਨਤਾਪੀਤਿ ਕਤ੍ਵਾ ਵੁਤ੍ਤਂ, ਨ ਲਕ੍ਖਣਰੂਪਸ੍ਸ ਵਿਯ ਕੁਤੋਚਿਪਿ ਸਮੁਟ੍ਠਾਨਸ੍ਸ ਅਭਾਵਤੋ ਉਤੁਸਮੁਟ੍ਠਾਨਤਾਯ ਤਾਸਂ. ਲਹੁਤਾਦਿਨਿਸ੍ਸਯਤਾਪਿ ਅਜ੍ਝਤ੍ਤਿਕਾਨਂ ਧਾਤੂਨਂ ਵਤ੍ਤਬ੍ਬਾ, ਨ ਵਾ ਵਤ੍ਤਬ੍ਬਾ. ਵਿਞ੍ਞਤ੍ਤਿ-ਗ੍ਗਹਣਂ ਹਿ ਲਕ੍ਖਣਨ੍ਤਿ.
੩੫੬. ਇਤਰਾਹੀਤਿ ਆਪੋਤੇਜੋਵਾਯੁਧਾਤੂਹਿ. ਏਕਸਙ੍ਗਹਾਤਿ ਸਜਾਤਿਸਙ੍ਗਹੇਨ ਏਕਸਙ੍ਗਹਾ. ਸਮਾਨਜਾਤਿਯਾਨਂ ਹਿ ਸਙ੍ਗਹੋ ਸਹਜਾਤਿਸਙ੍ਗਹੋ. ਤੇਨਾਹ ‘‘ਸਮੁਟ੍ਠਾਨਨਾਨਤ੍ਤਾਭਾਵਤੋ’’ਤਿ.
੩੫੭. ਤਿਣ੍ਣਂ ਮਹਾਭੂਤਾਨਂ ਪਤਿਟ੍ਠਾ ਹੁਤ੍ਵਾ ਪਚ੍ਚਯੋ ਹੋਤੀਤਿ ਯੇਹਿ ਮਹਾਭੂਤੇਹਿ ਸਮ੍ਪਿਣ੍ਡਨਵਸੇਨ ਸਙ੍ਗਹਿਤਾ, ਪਰਿਪਾਚਨਵਸੇਨ ਅਨੁਪਾਲਿਤਾ, ਸਮੁਦੀਰਣਵਸੇਨ ਵਿਤ੍ਥਮ੍ਭਿਤਾ ਚ, ਤੇਸਂ ਅਤ੍ਤਨਾ ਸਹਜਾਤਾਨਂ ਤਿਣ੍ਣਂ ਮਹਾਭੂਤਾਨਂ ਪਤਿਟ੍ਠਾ ਹੁਤ੍ਵਾ ਤਤੋ ਏਵ ਸਨ੍ਧਾਰਣਵਸੇਨ ਅਵਸ੍ਸਯੋ ਹੋਤਿ, ਵੁਤ੍ਤਨਯੇਨ ਵਾ ਪਤਿਟ੍ਠਾ ਹੁਤ੍ਵਾ ਸਹਜਾਤਾਦਿਵਸੇਨ ਪਚ੍ਚਯੋ ਹੋਤੀਤਿ. ਏਸ ਨਯੋ ਸੇਸਾਸੁਪਿ.
੩੫੮. ਯਦਿਪਿ ਅਞ੍ਞਮਞ੍ਞਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾਤਿ ਹੇਟ੍ਠਾ ਧਾਤੂਨਂ ਅਸਮਨ੍ਨਾਹਾਰਤਾ ਦਸ੍ਸਿਤਾ ਏਵ, ਅਥਾਪਿ ਇਮਿਨਾਵ ਨਯੇਨ ਵਿਸੁਂ ਕਮ੍ਮਟ੍ਠਾਨਪਰਿਗ੍ਗਹੋ ਕਾਤਬ੍ਬੋਤਿ ਦਸ੍ਸੇਨ੍ਤੋ ‘‘ਪਥਵੀਧਾਤੁ ਚੇਤ੍ਥਾ’’ਤਿਆਦਿਮਾਹ. ਤਤ੍ਥ ਪਥਵੀਧਾਤੁ ਚੇਤ੍ਥਾਤਿ ਚ-ਸਦ੍ਦੋ ਸਮ੍ਪਿਣ੍ਡਨਤ੍ਥੋ, ਤੇਨ ਅਯਮ੍ਪਿ ਏਕੋ ਮਨਸਿਕਾਰਪ੍ਪਕਾਰੋਤਿ ਦੀਪੇਤਿ. ਏਤ੍ਥਾਤਿ ਏਤਾਸੁ ਧਾਤੂਸੁ. ਅਹਂ ‘‘ਪਥਵੀਧਾਤੂ’’ਤਿ ਵਾ ‘‘ਪਚ੍ਚਯੋ ਹੋਮੀ’’ਤਿ ਵਾ ਨ ਜਾਨਾਤੀਤਿ ਅਤ੍ਤਨਿ ਵਿਯ ਅਤ੍ਤਨੋ ਕਿਚ੍ਚੇ ਚ ਆਭੋਗਾਭਾਵਂ ਦਸ੍ਸੇਤ੍ਵਾ ਉਪਕਾਰਕਸ੍ਸ ਵਿਯ ਉਪਕਤ੍ਤਬ੍ਬਾਨਮ੍ਪਿ ਆਭੋਗਾਭਾਵਂ ਦਸ੍ਸੇਤੁਂ ‘‘ਇਤਰਾਨਿਪੀ’’ਤਿਆਦਿ ਵੁਤ੍ਤਂ. ਸਬ੍ਬਤ੍ਥਾਤਿ ਸਬ੍ਬਾਸੁ ਧਾਤੂਸੁ, ਤਤ੍ਥਾਪਿ ਅਤ੍ਤਕਿਚ੍ਚੁਪਕਤ੍ਤਬ੍ਬਭੇਦੇਸੁ ਸਬ੍ਬੇਸੁ.
੩੫੯. ਪਚ੍ਚਯਵਿਭਾਗਤੋਤਿ ਪਚ੍ਚਯਧਮ੍ਮਵਿਭਾਗਤੋ ਚੇਵ ਪਚ੍ਚਯਭਾਵਵਿਭਾਗਤੋ ਚ. ‘‘ਪਚ੍ਚਯਤੋ’’ਤਿ ਹਿ ਇਮਿਨਾ ਪਥਵੀਆਦੀਨਂ ਅਞ੍ਞਾਸਾਧਾਰਣੋ ਪਤਿਟ੍ਠਾਭਾਵਾਦਿਨਾ ਸੇਸਭੂਤਤ੍ਤਯਸ੍ਸ ਪਚ੍ਚਯਭਾਵੋ ਵੁਤ੍ਤੋ. ਇਧ ਪਨ ਯੇਹਿ ਧਮ੍ਮੇਹਿ ਪਥਵੀਆਦੀਨਂ ਉਪ੍ਪਤ੍ਤਿ, ਤੇਸਂ ਪਥਵੀਆਦੀਨਞ੍ਚ ਅਨਵਸੇਸਤੋ ਪਚ੍ਚਯਭਾਵਵਿਭਾਗੋ ਵੁਚ੍ਚਤੀਤਿ ਅਯਂ ਇਮੇਸਂ ਦ੍ਵਿਨ੍ਨਂ ਆਕਾਰਾਨਂ ਵਿਸੇਸੋ. ਕਮ੍ਮਨ੍ਤਿ ਕੁਸਲਾਕੁਸਲਂ ਰੂਪੁਪ੍ਪਾਦਕਂ ਕਮ੍ਮਂ. ਚਿਤ੍ਤਨ੍ਤਿ ਯਂ ਕਿਞ੍ਚਿ ਰੂਪੁਪ੍ਪਾਦਕਂ ਚਿਤ੍ਤਂ. ਆਹਾਰੋਤਿ ਅਜ੍ਝਤ੍ਤਿਕੋ ਰੂਪੁਪ੍ਪਾਦਕੋ ਆਹਾਰੋ. ਉਤੂਤਿ ਯੋ ਕੋਚਿ ਉਤੁ, ਅਤ੍ਥਤੋ ਤੇਜੋਧਾਤੁ. ਕਮ੍ਮਮੇਵਾਤਿ ਅਵਧਾਰਣਂ ਸਮੁਟ੍ਠਾਨਸਙ੍ਕਰਾਭਾਵਦਸ੍ਸਨਤ੍ਥਂ, ਤੇਨ ਅਕਮ੍ਮਜਾਨਮ੍ਪਿ ਕੇਸਞ੍ਚਿ ਕਮ੍ਮਸ੍ਸ ਪਰਿਯਾਯਪਚ੍ਚਯਭਾਵੋ ਦੀਪਿਤੋ ਹੋਤਿ. ਤਥਾ ਹਿ ਵਕ੍ਖਤਿ ‘‘ਕਮ੍ਮਪਚ੍ਚਯਚਿਤ੍ਤਸਮੁਟ੍ਠਾਨ’’ਨ੍ਤਿਆਦਿ. ਨਨੁ ਚ ਕਮ੍ਮਸਮੁਟ੍ਠਾਨਾਨਂ ਕਮ੍ਮਤੋ ਅਞ੍ਞੇਨਪਿ ਪਚ੍ਚਯੇਨ ਭਵਿਤਬ੍ਬਨ੍ਤਿ? ਭਵਿਤਬ੍ਬਂ, ਸੋ ਪਨ ਕਮ੍ਮਗਤਿਕੋਵਾਤਿ ਪਟਿਯੋਗੀਨਿਵਤ੍ਤਨਤ੍ਥਂ ਅਵਧਾਰਣਂ ਕਤਂ, ਤੇਨਾਹ ‘‘ਨ ਚਿਤ੍ਤਾਦਯੋ’’ਤਿ. ਚਿਤ੍ਤਾਦਿਸਮੁਟ੍ਠਾਨਾਨਨ੍ਤਿ ਏਤ੍ਥਾਪਿ ਅਯਮਤ੍ਥੋ ਯਥਾਰਹਂ ਵਤ੍ਤਬ੍ਬੋ. ਇਤਰੇਤਿ ਚਿਤ੍ਤਾਦਿਤੋ ਅਞ੍ਞੇ. ਜਨਕਪਚ੍ਚਯੋਤਿ ਸਮੁਟ੍ਠਾਪਕਤਂ ਸਨ੍ਧਾਯ ਵੁਤ੍ਤਂ, ਪਚ੍ਚਯੋ ਪਨ ਕਮ੍ਮਪਚ੍ਚਯੋਵ. ਵੁਤ੍ਤਂ ਹਿ ‘‘ਕੁਸਲਾਕੁਸਲਾ ਚੇਤਨਾ ਵਿਪਾਕਾਨਂ ਖਨ੍ਧਾਨਂ ਕਟਤ੍ਤਾ ਚ ਰੂਪਾਨਂ ਕਮ੍ਮਪਚ੍ਚਯੇਨ ਪਚ੍ਚਯੋ’’ਤਿ (ਪਟ੍ਠਾ. ੧.੧.੪੨੭).
ਸੇਸਾਨਨ੍ਤਿ ਚਿਤ੍ਤਾਦਿਸਮੁਟ੍ਠਾਨਾਨਂ. ਪਰਿਯਾਯਤੋ ਉਪਨਿਸ੍ਸਯਪਚ੍ਚਯੋ ਹੋਤੀਤਿ ਪਟ੍ਠਾਨੇ (ਪਟ੍ਠਾ. ੧.੧.੯) ਅਰੂਪਾਨਂਯੇਵ ਉਪਨਿਸ੍ਸਯਪਚ੍ਚਯਸ੍ਸ ਆਗਤਤ੍ਤਾ ਨਿਪ੍ਪਰਿਯਾਯੇਨ ਰੂਪਧਮ੍ਮਾਨਂ ਉਪਨਿਸ੍ਸਯਪਚ੍ਚਯੋ ਨਤ੍ਥਿ. ਸੁਤ੍ਤੇ ਪਨ ‘‘ਪੁਗ੍ਗਲਂ ਉਪਨਿਸ੍ਸਾਯ ਵਨਸਣ੍ਡਂ ਉਪਨਿਸ੍ਸਾਯਾ’’ਤਿ ਵਚਨਤੋ ਸੁਤ੍ਤਨ੍ਤਿਕਪਰਿਯਾਯੇਨ ਵਿਨਾ ਅਭਾਵੋ ਉਪਨਿਸ੍ਸਯਪਚ੍ਚਯੋਤਿ ਵੇਦਿਤਬ੍ਬੋ. ਚਿਤ੍ਤਂ ਜਨਕਪਚ੍ਚਯੋ ਹੋਤੀਤਿ ਸਹਜਾਤਨਿਸ੍ਸਯਾਹਾਰਾਦਿਵਸੇਨ ਪਚ੍ਚਯੋ ਹੋਨ੍ਤਂ ਚਿਤ੍ਤਂ ਸਮੁਟ੍ਠਾਪਕਤਂ ਉਪਾਦਾਯ ‘‘ਜਨਕਪਚ੍ਚਯੋ ਹੋਤੀ’’ਤਿ ਵੁਤ੍ਤਂ. ਆਹਾਰਉਤੂਸੁਪਿ ਏਸੇਵ ਨਯੋ.
ਏਵਂ ਕਮ੍ਮਾਦੀਨਂ ਪਚ੍ਚਯਧਮ੍ਮਾਨਂ ਵਸੇਨ ਧਾਤੂਸੁ ਪਚ੍ਚਯਵਿਭਾਗਂ ਦਸ੍ਸੇਤ੍ਵਾ ਇਦਾਨਿ ਤਂਸਮੁਟ੍ਠਾਨਾਨਂ ਧਾਤੂਨਮ੍ਪਿ ਵਸੇਨ ਪਚ੍ਚਯਵਿਭਾਗਂ ਦਸ੍ਸੇਨ੍ਤੋ ਪਠਮਂ ਤਾਵ ‘‘ਕਮ੍ਮਸਮੁਟ੍ਠਾਨਂ ਮਹਾਭੂਤ’’ਨ੍ਤਿਆਦਿਨਾ ਉਦ੍ਦਿਸਿਤ੍ਵਾ ਪੁਨ ‘‘ਤਤ੍ਥ ਕਮ੍ਮਸਮੁਟ੍ਠਾਨਾ ਪਥਵੀਧਾਤੂ’’ਤਿਆਦਿਨਾ ਨਿਦ੍ਦਿਸਤਿ. ਤਤ੍ਥ ਕਮ੍ਮਸਮੁਟ੍ਠਾਨਾ ਪਥਵੀਧਾਤੂਤਿ ‘‘ਕਮ੍ਮਸਮੁਟ੍ਠਾਨਂ ਮਹਾਭੂਤ’’ਨ੍ਤਿ ਏਤ੍ਥ ਸਾਮਞ੍ਞਤੋ ਵੁਤ੍ਤਾ ਕਮ੍ਮਜਪਥਵੀਧਾਤੁ. ਕਮ੍ਮਸਮੁਟ੍ਠਾਨਾਨਂ ਇਤਰਾਸਨ੍ਤਿ ਕਮ੍ਮਜਾਨਂ ਆਪੋਧਾਤੁਆਦੀਨਂ ਤਿਸ੍ਸਨ੍ਨਂ ਧਾਤੂਨਂ ਸਹੁਪ੍ਪਤ੍ਤਿਯਾ ਅਤ੍ਤਨੋ ਉਪਕਾਰਕਾਨਂ ਤਾਸਂ ਉਪਕਾਰਕਤੋ, ਆਧਾਰਭਾਵਤੋ, ਉਪ੍ਪਾਦਤੋ ਯਾਵ ਭਙ੍ਗਾਧਰਣਤੋ, ਵਿਗਮਾਭਾਵਤੋ ਚ ਸਹਜਾਤਅਞ੍ਞਮਞ੍ਞਨਿਸ੍ਸਯਅਤ੍ਥਿਅਵਿਗਤਵਸੇਨ ਚੇਵ ਪਤਿਟ੍ਠਾਵਸੇਨ ਚ ਪਚ੍ਚਯੋ ਹੋਤਿ, ਹੋਨ੍ਤੀ ਚ ਕਮ੍ਮਂ ਵਿਯ ਅਤ੍ਤਨੋ, ਤਾਸਞ੍ਚ ਨ ਜਨਕਵਸੇਨ ਪਚ੍ਚਯੋ ਹੋਤਿ ਅਸਮੁਟ੍ਠਾਪਕਤ੍ਤਾ ਤਾਸਂ. ਕਾਮਞ੍ਚੇਤ੍ਥ ਨਿਸ੍ਸਯਪਚ੍ਚਯ-ਗ੍ਗਹਣੇਨੇਵ ਪਤਿਟ੍ਠਾਭਾਵੋ ਸਙ੍ਗਹਿਤੋ, ਪਥਵੀਧਾਤੁਯਾ ਪਨ ਅਨਞ੍ਞਸਾਧਾਰਣਕਿਚ੍ਚਂ ਸਹਜਾਤਾਨਂ ਪਤਿਟ੍ਠਾਭਾਵੋਤਿ ਇਮਂ ਵਿਸੇਸਂ ਦਸ੍ਸੇਤੁਂ ‘‘ਪਤਿਟ੍ਠਾਵਸੇਨ ਚਾ’’ਤਿ ਵਿਸੁਂ ਕਤ੍ਵਾ ਵੁਤ੍ਤਂ. ਆਬਨ੍ਧਨਵਸੇਨ ਚਾਤਿਆਦੀਸੁਪਿ ਏਸੇਵ ਨਯੋ. ਤਿਸਨ੍ਤਤਿਮਹਾਭੂਤਾਨਨ੍ਤਿ ਉਤੁਚਿਤ੍ਤਾਹਾਰਸਮੁਟ੍ਠਾਨਾਨਂ ਚਤੁਮਹਾਭੂਤਾਨਂ ਅਞ੍ਞਮਞ੍ਞਂ ਅਵੋਕਿਣ੍ਣਾਨਂ, ਅਵਿਚ੍ਛੇਦੇਨ ਪਵਤ੍ਤਿਂ ਉਪਾਦਾਯ ਸਨ੍ਤਤੀਤਿ ਸਨ੍ਤਤਿਗ੍ਗਹਣਂ. ਪਥਵੀਧਾਤੁਯਾ ਪਤਿਟ੍ਠਾਭਾਵੋ ਨਾਮ ਸਹਜਾਤਾਨਂ ਧਮ੍ਮਾਨਂਯੇਵਾਤਿ ਆਹ ‘‘ਨ ਪਤਿਟ੍ਠਾਵਸੇਨਾ’’ਤਿ. ਨ ਆਬਨ੍ਧਨਵਸੇਨਾਤਿਆਦੀਸੁਪਿ ਏਸੇਵ ਨਯੋ. ਏਤ੍ਥਾਤਿ ਏਤੇਸੁ ਕਮ੍ਮਸਮੁਟ੍ਠਾਨਮਹਾਭੂਤੇਸੁ. ‘‘ਚਿਤ੍ਤਸਮੁਟ੍ਠਾਨਾ ਪਥਵੀਧਾਤੁ ਚਿਤ੍ਤਸਮੁਟ੍ਠਾਨਾਨਂ ਇਤਰਾਸ’’ਨ੍ਤਿਆਦੀਸੁ ਸੁਕਰੋ ਤਨ੍ਤਿਨਯੋ ਨੇਤੁਨ੍ਤਿ ‘‘ਚਿਤ੍ਤਆਹਾਰ…ਪੇ… ਏਸੇਵ ਨਯੋ’’ਤਿ ਅਤਿਦਿਸਤਿ.
ਸਹਜਾਤਾਦਿਪਚ੍ਚਯਵਸਪ੍ਪਵਤ੍ਤਾਸੁ ਚ ਪਨਾਤਿ ਏਤ੍ਥ ਚ-ਸਦ੍ਦੋ ਸਮੁਚ੍ਚਯਤ੍ਥੋ, ਪਨ-ਸਦ੍ਦੋ ਵਿਸੇਸਤ੍ਥੋ, ਤਦੁਭਯੇਨ ਚ ਯਥਾਵੁਤ੍ਤਸਹਜਾਤਾਦਿਪਚ੍ਚਯੇਹਿ ਪਵਤ੍ਤਮਾਨਾ ਧਾਤੁਯੋ ਇਮਿਨਾ ਵਿਸੇਸੇਨ ਪਵਤ੍ਤਨ੍ਤੀਤਿ ਇਮਮਤ੍ਥਂ ਦੀਪੇਤਿ.
ਇਦਾਨਿ ਤਂ ਵਿਸੇਸਂ ਦਸ੍ਸੇਤੁਂ ‘‘ਏਕਂ ਪਟਿਚ੍ਚਾ’’ਤਿਗਾਥਮਾਹ. ਤਤ੍ਥ ਏਕਂ ਧਾਤੁਂ ਪਟਿਚ੍ਚ ਤਿਸ੍ਸੋ ਧਾਤੁਯੋ ਚਤੁਧਾ ਸਮ੍ਪਵਤ੍ਤਨ੍ਤਿ, ਤਿਸ੍ਸੋ ਧਾਤੁਯੋ ਪਟਿਚ੍ਚ ਏਕਾਵ ਧਾਤੁ ਚਤੁਧਾ ਸਮ੍ਪਵਤ੍ਤਤਿ, ਦ੍ਵੇ ਧਾਤੁਯੋ ਪਟਿਚ੍ਚ ਦ੍ਵੇ ਧਾਤੁਯੋ ਛਧਾ ਸਮ੍ਪਵਤ੍ਤਨ੍ਤੀਤਿ ਯੋਜਨਾ. ਅਤ੍ਥੋ ਪਨ ਪਥਵੀਆਦੀਸੁ ਏਕੇਕਿਸ੍ਸਾ ਪਚ੍ਚਯਭਾਵੇ ਇਤਰਾਸਂ ਤਿਸ੍ਸਨ੍ਨਂ ਤਿਸ੍ਸਨ੍ਨਂ ਪਚ੍ਚਯੁਪ੍ਪਨ੍ਨਤਾਤਿ ਅਯਮੇਕੋ ਚਤੁਕ੍ਕੋ, ਤਿਸ੍ਸਨ੍ਨਂ ਤਿਸ੍ਸਨ੍ਨਂ ਪਚ੍ਚਯਭਾਵੇ ਇਤਰਾਯ ਏਕੇਕਿਸ੍ਸਾ ਪਚ੍ਚਯੁਪ੍ਪਨ੍ਨਤਾਤਿ ਅਯਮਪਰੋ ਚਤੁਕ੍ਕੋ, ਪਠਮਦੁਤਿਯਾ, ਤਤਿਯਚਤੁਤ੍ਥਾ, ਪਠਮਤਤਿਯਾ, ਦੁਤਿਯਚਤੁਤ੍ਥਾ, ਪਠਮਚਤੁਤ੍ਥਾ, ਦੁਤਿਯਤਤਿਯਾਤਿ ਇਮਾਸਂ ਦ੍ਵਿਨ੍ਨਂ ਦ੍ਵਿਨ੍ਨਂ ਪਚ੍ਚਯਭਾਵੇ ਤਤ੍ਥ ਤਤ੍ਥ ਇਤਰਾਸਂ ਦ੍ਵਿਨ੍ਨਂ ਦ੍ਵਿਨ੍ਨਂ ਪਚ੍ਚਯੁਪ੍ਪਨ੍ਨਤਾਤਿ ਅਯਮੇਕੋ ਛਕ੍ਕੋ. ਏਵਂ ਪਚ੍ਚਯਭਾਵੇਨ ਚਤੁਧਾ, ਛਧਾ ਚ ਪਵਤ੍ਤਮਾਨਾਨਂ ਏਕਕਦ੍ਵਿਕਤਿਕਵਸੇਨ ਤਿਕਦੁਕਏਕਕਵਸੇਨ ਚ ਯਥਾਕ੍ਕਮਂ ਪਚ੍ਚਯਪਚ੍ਚਯੁਪ੍ਪਨ੍ਨਤਾਵਿਭਾਗੋ ਵੇਦਿਤਬ੍ਬੋ. ਅਯਞ੍ਚ ਪਚ੍ਚਯਭਾਵੋ ਸਹਜਾਤਅਞ੍ਞਮਞ੍ਞਨਿਸ੍ਸਯਅਤ੍ਥਿਅਵਿਗਤਪਚ੍ਚਯਵਸੇਨ, ਤਤ੍ਥਾਪਿ ਚ ਅਞ੍ਞਮਞ੍ਞਮੁਖੇਨੇਵ ਵੇਦਿਤਬ੍ਬੋ. ਯਂ ਸਨ੍ਧਾਯ ਵੁਤ੍ਤਂ ਪਟਿਚ੍ਚਵਾਰੇ ‘‘ਏਕਂ ਮਹਾਭੂਤਂ ਪਟਿਚ੍ਚ ਤਯੋ ਮਹਾਭੂਤਾ, ਤਯੋ ਮਹਾਭੂਤੇ ਪਟਿਚ੍ਚ ਏਕਂ ਮਹਾਭੂਤਂ, ਦ੍ਵੇ ਮਹਾਭੂਤੇ ਪਟਿਚ੍ਚ ਦ੍ਵੇ ਮਹਾਭੂਤਾ ਉਪ੍ਪਜ੍ਜਨ੍ਤੀ’’ਤਿ (ਪਟ੍ਠਾ. ੧.੧.੫੩).
ਅਭਿਕ੍ਕਮਪਟਿਕ੍ਕਮਾਦੀਤਿ ਆਦਿ-ਸਦ੍ਦੇਨ ਆਦਾਨਵਿਸ੍ਸਜ੍ਜਨਾਦਿਕਾਯਿਕਕਿਰਿਯਾਕਰਣਸ੍ਸ ਸਙ੍ਗਹੋ ਦਟ੍ਠਬ੍ਬੋ. ਉਪ੍ਪੀਲ਼ਨਸ੍ਸ ਪਚ੍ਚਯੋ ਹੋਤਿ ਘਟ੍ਟਨਕਿਰਿਯਾਯ ਪਥਵੀਧਾਤੁਵਸੇਨ ਸਿਜ੍ਝਨਤੋ. ਸਾਵਾਤਿ ਪਥਵੀਧਾਤੁਯੇਵ. ਆਪੋਧਾਤੁਯਾ ਅਨੁਗਤਾ ਆਪੋਧਾਤੁਯਾ ਤਤ੍ਥ ਅਪ੍ਪਧਾਨਭਾਵਂ, ਪਥਵੀਧਾਤੁਯਾ ਚ ਪਧਾਨਭਾਵਨ੍ਤਿ ਪਤਿਟ੍ਠਾਭਾਵੇ ਵਿਯ ਪਤਿਟ੍ਠਾਪਨੇਪਿ ਸਾਤਿਸਯਕਿਚ੍ਚਤ੍ਤਾ ਤਸ੍ਸਾ ਪਤਿਟ੍ਠਾਪਨਸ੍ਸ ਪਾਦਟ੍ਠਪਨਸ੍ਸ ਪਚ੍ਚਯੋ ਹੋਤੀਤਿ ਸਮ੍ਬਨ੍ਧੋ. ਅਵਕ੍ਖੇਪਨਸ੍ਸਾਤਿ ਅਧੋਨਿਕ੍ਖਿਪਨਸ੍ਸ. ਤਤ੍ਥ ਚ ਗਰੁਤਰਸਭਾਵਾਯ ਆਪੋਧਾਤੁਯਾ ਸਾਤਿਸਯੋ ਬ੍ਯਾਪਾਰੋਤਿ ਆਹ ‘‘ਪਥਵੀਧਾਤੁਯਾ ਅਨੁਗਤਾ ਆਪੋਧਾਤੂ’’ਤਿ. ਤਥਾ ਉਦ੍ਧਙ੍ਗਤਿਕਾ ਤੇਜੋਧਾਤੂਤਿ ਉਦ੍ਧਰਣੇ ਵਾਯੋਧਾਤੁਯਾ ਤਸ੍ਸਾ ਅਨੁਗਤਭਾਵੋ ਵੁਤ੍ਤੋ. ਤਿਰਿਯਂ ਗਤਿਕਾਯ ਵਾਯੋਧਾਤੁਯਾ ਅਤਿਹਰਣਵੀਤਿਹਰਣੇਸੁ ਸਾਤਿਸਯੋ ਬ੍ਯਾਪਾਰੋਤਿ ਤੇਜੋਧਾਤੁਯਾ ਤਸ੍ਸਾ ਅਨੁਗਤਭਾਵੋ ਗਹਿਤੋ. ਤਤ੍ਥ ਠਿਤਟ੍ਠਾਨਤੋ ਅਭਿਮੁਖਂ ਪਾਦਸ੍ਸ ਹਰਣਂ ਅਤਿਹਰਣਂ, ਪੁਰਤੋ ਹਰਣਂ. ਤਤੋ ਥੋਕਂ ਵੀਤਿਕ੍ਕਮ੍ਮ ਹਰਣਂ ਵੀਤਿਹਰਣਂ, ਪਸ੍ਸਤੋ ਹਰਣਂ.
ਏਕੇਕੇਨ ਮੁਖੇਨਾਤਿ ‘‘ਪਤ੍ਥਟਤ੍ਤਾ ਪਥਵੀ’’ਤਿਆਦਿਨਾ (ਵਿਸੁਦ੍ਧਿ. ੧.੩੪੭) ਵਿਭਤ੍ਤੇਸੁ ਤੇਰਸਸੁ ਆਕਾਰੇਸੁ ਏਕੇਕੇਨ ਧਾਤੂਨਂ ਪਰਿਗ੍ਗਣ੍ਹਨਮੁਖੇਨ. ਸ੍ਵਾਯਨ੍ਤਿ ਸੋ ਅਯਂ ਉਪਚਾਰਸਮਾਧਿ. ਕਥਂ ਪਨਸ੍ਸ ਵਵਤ੍ਥਾਨਪਰਿਯਾਯੋਤਿ ਆਹ ‘‘ਚਤੁਨ੍ਨਂ ਧਾਤੂਨ’’ਨ੍ਤਿਆਦਿ.
੩੬੦. ਇਦਾਨਿ ਇਮਿਸ੍ਸਾ ਭਾਵਨਾਯ ਆਨਿਸਂਸੇ ਦਸ੍ਸੇਤੁਂ ‘‘ਇਦਞ੍ਚ ਪਨਾ’’ਤਿਆਦਿ ਵੁਤ੍ਤਂ. ਸੁਞ੍ਞਤਂ ਅਵਗਾਹਤੀਤਿ ਧਾਤੁਮਤ੍ਤਤਾਦਸ੍ਸਨੇਨ ਰੂਪਕਾਯਸ੍ਸ ਅਨਤ੍ਤਕਤਂ ਵਵਤ੍ਥਾਪਯਤੋ ਤਦਨੁਸਾਰੇਨ ਨਾਮਕਾਯਸ੍ਸਾਪਿ ਅਨਤ੍ਤਕਤਾ ਸੁਪਾਕਟਾ ਹੋਤੀਤਿ ਸਬ੍ਬਸੋ ਅਤ੍ਤਸੁਞ੍ਞਤਂ ਪਰਿਯੋਗਾਹਤਿ ਤਤ੍ਥ ਪਤਿਟ੍ਠਹਤਿ. ਸਤ੍ਤਸਞ੍ਞਂ ਸਮੁਗ੍ਘਾਤੇਤੀਤਿ ਤਤੋ ਏਵ ‘‘ਸਤ੍ਤੋ ਪੋਸੋ ਇਤ੍ਥੀ ਪੁਰਿਸੋ’’ਤਿ ਏਵਂ ਪਵਤ੍ਤਂ ਅਯਾਥਾਵਸਞ੍ਞਂ ਉਗ੍ਘਾਤੇਤਿ ਸਮੂਹਨਤਿ. ਵਾਲ਼ਮਿਗਯਕ੍ਖਰਕ੍ਖਸਾਦਿਵਿਕਪ੍ਪਂ ਅਨਾਵਜ੍ਜਮਾਨੋਤਿ ਸਸਨ੍ਤਾਨੇ ਵਿਯ ਪਰਸਨ੍ਤਾਨੇਪਿ ਧਾਤੁਮਤ੍ਤਤਾਯ ਸੁਦਿਟ੍ਠਤ੍ਤਾ ਖੀਣਾਸਵੋ ਵਿਯ ‘‘ਇਮੇ ਸੀਹਬ੍ਯਗ੍ਘਾਦਯੋ ਵਾਲ਼ਮਿਗਾ, ਇਮੇ ਯਕ੍ਖਰਕ੍ਖਸਾ’’ਤਿ ਏਵਮਾਦਿਵਿਕਪ੍ਪਂ ਅਕਰੋਨ੍ਤੋ ਭਯਭੇਰਵਂ ਸਹਤਿ ਅਭਿਭਵਤਿ. ਯਥਾਵੁਤ੍ਤਵਿਕਪ੍ਪਨਾਪਜ੍ਜਨਂ ਹਿ ਭਯਭੇਰਵਸਹਨਸ੍ਸ ਕਾਰਣਂ ਵੁਤ੍ਤਂ. ਉਗ੍ਘਾਤੋ ਉਪ੍ਪਿਲਾਵਿਤਤ੍ਤਂ. ਨਿਗ੍ਘਾਤੋ ਦੀਨਭਾਵਪ੍ਪਤ੍ਤਿ. ਮਹਾਪਞ੍ਞੋ ਚ ਪਨ ਹੋਤਿ ਧਾਤੁਵਸੇਨ ਕਾਯੇ ਸਮ੍ਮਦੇਵ ਘਨਵਿਨਿਬ੍ਭੋਗਸ੍ਸ ਕਰਣਤੋ. ਤਥਾ ਹਿਦਂ ਕਮ੍ਮਟ੍ਠਾਨਂ ਬੁਦ੍ਧਿਚਰਿਤਸ੍ਸ ਅਨੁਕੂਲਨ੍ਤਿ ਵੁਤ੍ਤਂ, ਸੁਗਤਿਪਰਾਯਣੋ ਵਾ ਇਨ੍ਦ੍ਰਿਯਾਨਂ ਅਪਰਿਪਕ੍ਕਤਾਯਨ੍ਤਿ ਅਧਿਪ੍ਪਾਯੋ.
ਏਕੂਨਵੀਸਤਿਭਾਵਨਾਨਯਪਟਿਮਣ੍ਡਿਤਸ੍ਸ
ਚਤੁਧਾਤੁਵਵਤ੍ਥਾਨਨਿਦ੍ਦੇਸਸ੍ਸ ਲੀਨਤ੍ਥਵਣ੍ਣਨਾ ਨਿਟ੍ਠਿਤਾ.
੩੬੧. ‘‘ਕੋ ਸਮਾਧੀ’’ਤਿਆਦਿਨਾ ਸਰੂਪਾਦਿਪੁਚ੍ਛਾ ਯਾਵਦੇਵ ਵਿਭਾਗਾਵਬੋਧਨਤ੍ਥਾ. ਸਰੂਪਾਦਿਤੋ ਹਿ ਞਾਤਸ੍ਸ ਪਭੇਦੋ ਵੁਚ੍ਚਮਾਨੋ ਸੁਵਿਞ੍ਞੇਯ੍ਯੋ ਹੋਤਿ ਸਙ੍ਖੇਪਪੁਬ੍ਬਕਤ੍ਤਾ ਵਿਤ੍ਥਾਰਸ੍ਸ, ਵਿਤ੍ਥਾਰਵਿਧਿਨਾ ਚ ਸਙ੍ਖੇਪਵਿਧਿ ਸਙ੍ਗਯ੍ਹਤੀਤਿ ‘‘ਸਮਾਧਿਸ੍ਸ ਵਿਤ੍ਥਾਰਂ ਭਾਵਨਾਨਯਞ੍ਚ ਦਸ੍ਸੇਤੁ’’ਨ੍ਤਿ ਵੁਤ੍ਤਂ. ਅਥ ਵਾ ‘‘ਕੋ ਸਮਾਧੀ’’ਤਿਆਦਿਨਾਪਿ ਸਮਾਧਿਸ੍ਸੇਵ ਪਕਾਰਭੇਦੋ ਦਸ੍ਸੀਯਤਿ, ਭਾਵਨਾਨਿਸਂਸੋਪਿ ਭਾਵਨਾਨਯਨਿਸ੍ਸਿਤੋ ਏਵਾਤਿ ਅਧਿਪ੍ਪਾਯੇਨ ‘‘ਵਿਤ੍ਥਾਰਂ ਭਾਵਨਾਨਯਞ੍ਚ ਦਸ੍ਸੇਤੁ’’ਨ੍ਤਿ ਵੁਤ੍ਤਂ. ਸਬ੍ਬਪ੍ਪਕਾਰਤੋਤਿ ਪਲਿਬੋਧੁਪਚ੍ਛੇਦਾਦਿਕਸ੍ਸ ਸਬ੍ਬਸ੍ਸ ਭਾਵਨਾਯ ਪੁਬ੍ਬਕਿਚ੍ਚਸ੍ਸ ਕਰਣਪ੍ਪਕਾਰਤੋ ਚੇਵ ਸਬ੍ਬਕਮ੍ਮਟ੍ਠਾਨਭਾਵਨਾਵਿਭਾਵਨਤੋ ਚ.
‘‘ਸਮਤ੍ਤਾ ਹੋਤੀ’’ਤਿ ਵਤ੍ਵਾ ਤਮੇਵ ਸਮਤ੍ਤਭਾਵਂ ਵਿਭਾਵੇਤੁਂ ‘‘ਦੁਵਿਧੋਯੇਵਾ’’ਤਿਆਦਿ ਵੁਤ੍ਤਂ. ਇਧ ਅਧਿਪ੍ਪੇਤੋ ਸਮਾਧੀਤਿ ਲੋਕਿਯਸਮਾਧਿਂ ਆਹ. ਦਸਸੁ ਕਮ੍ਮਟ੍ਠਾਨੇਸੂਤਿ ਯਾਨਿ ਹੇਟ੍ਠਾ ‘‘ਉਪਚਾਰਾਵਹਾਨੀ’’ਤਿ ਵੁਤ੍ਤਾਨਿ ਦਸ ਕਮ੍ਮਟ੍ਠਾਨਾਨਿ, ਤੇਸੁ. ਅਪ੍ਪਨਾਪੁਬ੍ਬਭਾਗਚਿਤ੍ਤੇਸੂਤਿ ਅਪ੍ਪਨਾਯ ਪੁਬ੍ਬਭਾਗਚਿਤ੍ਤੇਸੁ ਅਟ੍ਠਨ੍ਨਂ ਝਾਨਾਨਂ ਪੁਬ੍ਬਭਾਗਚਿਤ੍ਤੁਪ੍ਪਾਦੇਸੁ. ਏਕਗ੍ਗਤਾਤਿ ਏਕਾਵਜ੍ਜਨਵੀਥਿਯਂ, ਨਾਨਾਵਜ੍ਜਨਵੀਥਿਯਞ੍ਚ ਏਕਗ੍ਗਤਾ. ਅਵਸੇਸਕਮ੍ਮਟ੍ਠਾਨੇਸੂਤਿ ‘‘ਅਪ੍ਪਨਾਵਹਾਨੀ’’ਤਿ ਵੁਤ੍ਤੇਸੁ ਤਿਂਸਕਮ੍ਮਟ੍ਠਾਨੇਸੁ.
ਸਮਾਧਿਆਨਿਸਂਸਕਥਾਵਣ੍ਣਨਾ
੩੬੨. ਦਿਟ੍ਠਧਮ੍ਮੋ ਵੁਚ੍ਚਤਿ ਪਚ੍ਚਕ੍ਖਭੂਤੋ ਅਤ੍ਤਭਾਵੋ, ਤਤ੍ਥ ਸੁਖਵਿਹਾਰੋ ਦਿਟ੍ਠਧਮ੍ਮਸੁਖਵਿਹਾਰੋ. ਕਾਮਂ ‘‘ਸਮਾਪਜ੍ਜਿਤ੍ਵਾ’’ਤਿ ਏਤੇਨ ਅਪ੍ਪਨਾਸਮਾਧਿਯੇਵ ਵਿਭਾਵਿਤੋ, ‘‘ਏਕਗ੍ਗਚਿਤ੍ਤਾ’’ਤਿ ਪਨ ਪਦੇਨ ਉਪਚਾਰਸਮਾਧਿਨੋਪਿ ਗਹਣਂ ਹੋਤੀਤਿ ਤਤੋ ਨਿਵਤ੍ਤਨਤ੍ਥਂ ‘‘ਅਪ੍ਪਨਾਸਮਾਧਿਭਾਵਨਾ’’ਤਿ ਵੁਤ੍ਤਂ. ਨ ਖੋ ਪਨੇਤੇਤਿ ਏਤੇ ਬਾਹਿਰਕਭਾਵਿਤਾ ਝਾਨਧਮ੍ਮਾ ਚਿਤ੍ਤੇਕਗ੍ਗਤਾਮਤ੍ਤਕਰਾ. ਅਰਿਯਸ੍ਸ ਵਿਨਯੇ ਬੁਦ੍ਧਸ੍ਸ ਭਗਵਤੋ ਸਾਸਨੇ ‘‘ਸਲ੍ਲੇਖਾ’’ਤਿ ਨ ਵੁਚ੍ਚਨ੍ਤਿ ਕਿਲੇਸਾਨਂ ਸਲ੍ਲੇਖਨਪਟਿਪਦਾ ਨ ਹੋਤੀਤਿ ਕਤ੍ਵਾ, ਸਾਸਨੇ ਪਨ ਅਵਿਹਿਂਸਾਦਯੋਪਿ ਸਲ੍ਲੇਖਾਵ ਲੋਕੁਤ੍ਤਰਪਾਦਕਤ੍ਤਾ.
ਸਮ੍ਬਾਧੇਤਿ ਤਣ੍ਹਾਸਂਕਿਲੇਸਾਦਿਨਾ ਸਂਕਿਲਿਟ੍ਠਤਾਯ ਪਰਮਸਮ੍ਬਾਧੇ ਅਤਿਵਿਯ ਸਙ੍ਕਟਟ੍ਠਾਨਭੂਤੇ ਸਂਸਾਰਪ੍ਪਵਤ੍ਤੇ. ਓਕਾਸਾਧਿਗਮਨਯੇਨਾਤਿ ਅਤ੍ਥਪਟਿਲਾਭਯੋਗ੍ਗਸ੍ਸ ਨਵਮਖਣਸਙ੍ਖਾਤਸ੍ਸ ਓਕਾਸਸ੍ਸ ਅਧਿਗਮਨਯੇਨ. ਤਸ੍ਸ ਹਿ ਦੁਲ੍ਲਭਤਾਯ ਅਪ੍ਪਨਾਧਿਗਮਮ੍ਪਿ ਅਨਧਿਗਮਯਮਾਨੋ ਸਂਵੇਗਬਹੁਲੋ ਪੁਗ੍ਗਲੋ ਉਪਚਾਰਸਮਾਧਿਮ੍ਹਿਯੇਵ ਠਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕਰੋਤਿ ‘‘ਸੀਘਂ ਸਂਸਾਰਦੁਕ੍ਖਂ ਸਮਤਿਕ੍ਕਮਿਸ੍ਸਾਮੀ’’ਤਿ.
ਅਭਿਞ੍ਞਾਪਾਦਕਨ੍ਤਿ ਇਦ੍ਧਿਵਿਧਾਦਿਅਭਿਞ੍ਞਾਞਾਣਪਾਦਕਭੂਤਂ ਅਧਿਟ੍ਠਾਨਭੂਤਂ. ਹੋਤੀਤਿ ਵੁਤ੍ਤਨਯਾਤਿ ਏਤ੍ਥ ਇਤਿ-ਸਦ੍ਦੋ ਪਕਾਰਤ੍ਥੋ, ਤੇਨ ‘‘ਇਮਿਨਾ ਪਕਾਰੇਨ ਵੁਤ੍ਤਨਯਾ’’ਤਿ ਸੇਸਾਭਿਞ੍ਞਾਨਮ੍ਪਿ ਵੁਤ੍ਤਪ੍ਪਕਾਰਂ ਸਙ੍ਗਣ੍ਹਾਤਿ. ਸਤਿ ਸਤਿ ਆਯਤਨੇਤਿ ਪੁਰਿਮਭਵਸਿਦ੍ਧੇ ਅਭਿਞ੍ਞਾਧਿਗਮਸ੍ਸ ਕਾਰਣੇ ਵਿਜ੍ਜਮਾਨੇ. ਅਭਿਞ੍ਞਾਧਿਗਮਸ੍ਸ ਹਿ ਅਧਿਕਾਰੋ ਇਚ੍ਛਿਤਬ੍ਬੋ, ਯੋ ‘‘ਪੁਬ੍ਬਹੇਤੂ’’ਤਿ ਵੁਚ੍ਚਤਿ. ਨ ਸਮਾਪਤ੍ਤੀਸੁ ਵਸੀਭਾਵੋ. ਤੇਨਾਹ ਭਗਵਾ ‘‘ਸਤਿ ਸਤਿ ਆਯਤਨੇ’’ਤਿ (ਮ. ਨਿ. ੩.੧੫੮; ਅ. ਨਿ. ੩.੧੦੨). ਅਭਿਞ੍ਞਾਸਚ੍ਛਿਕਰਣੀਯਸ੍ਸਾਤਿ ਵਕ੍ਖਮਾਨਵਿਭਾਗਾਯ ਅਭਿਵਿਸਿਟ੍ਠਾਯ ਪਞ੍ਞਾਯ ਸਚ੍ਛਿਕਾਤਬ੍ਬਸ੍ਸ. ਧਮ੍ਮਸ੍ਸਾਤਿ ਭਾਵੇਤਬ੍ਬਸ੍ਸ ਚੇਵ ਵਿਭਾਵੇਤਬ੍ਬਸ੍ਸ ਚ ਧਮ੍ਮਸ੍ਸ. ਅਭਿਞ੍ਞਾਸਚ੍ਛਿਕਿਰਿਯਾਯ ਚਿਤ੍ਤਂ ਅਭਿਨਿਨ੍ਨਾਮੇਤੀਤਿ ਯੋਜਨਾ. ਤਤ੍ਰ ਤਤ੍ਰੇਵਾਤਿ ਤਸ੍ਮਿਂ ਤਸ੍ਮਿਂਯੇਵ ਸਚ੍ਛਿਕਾਤਬ੍ਬਧਮ੍ਮੇ. ਸਕ੍ਖਿਭਾਵਾਯ ਪਚ੍ਚਕ੍ਖਕਾਰਿਤਾਯ ਭਬ੍ਬੋ ਸਕ੍ਖਿਭਬ੍ਬੋ, ਤਸ੍ਸ ਭਾਵੋ ਸਕ੍ਖਿਭਬ੍ਬਤਾ, ਤਂ ਸਕ੍ਖਿਭਬ੍ਬਤਂ.
ਤਂ ਤਂ ਭਵਗਮਿਕਮ੍ਮਂ ਆਰਬ੍ਭ ਭਵਪਤ੍ਥਨਾਯ ਅਨੁਪ੍ਪਨ੍ਨਾਯਪਿ ਕਮ੍ਮਸ੍ਸ ਕਤੂਪਚਿਤਭਾਵੇਨੇਵ ਭਵਪਤ੍ਥਨਾਕਿਚ੍ਚਂ ਸਿਜ੍ਝਤੀਤਿ ਦਸ੍ਸੇਨ੍ਤੋ ਆਹ ‘‘ਅਪਤ੍ਥਯਮਾਨਾ ਵਾ’’ਤਿ. ਸਹ ਬ੍ਯੇਤਿ ਪਵਤ੍ਤਤੀਤਿ ਸਹਬ੍ਯੋ, ਸਹਾਯੋ, ਇਧ ਪਨ ਏਕਭਵੂਪਗੋ ਅਧਿਪ੍ਪੇਤੋ, ਤਸ੍ਸ ਭਾਵੋ ਸਹਬ੍ਯਤਾ, ਤਂ ਸਹਬ੍ਯਤਂ.
ਕਿਂ ਪਨ ਅਪ੍ਪਨਾਸਮਾਧਿਭਾਵਨਾਯੇਵ ਭਵਵਿਸੇਸਾਨਿਸਂਸਾ, ਉਦਾਹੁ ਇਤਰਾਪੀਤਿ ਚੋਦਨਂ ਮਨਸਿ ਕਤ੍ਵਾ ਆਹ ‘‘ਉਪਚਾਰਸਮਾਧਿਭਾਵਨਾਪੀ’’ਤਿਆਦਿ.
ਨਿਬ੍ਬਾਨਨ੍ਤਿ ਤਿਸ੍ਸਨ੍ਨਂ ਦੁਕ੍ਖਤਾਨਂ ਨਿਬ੍ਬੁਤਿਂ. ਰੂਪਧਮ੍ਮੇ ਪਰਿਯਾਪਨ੍ਨਾ ਵਿਜ੍ਜਮਾਨਾਪਿ ਸਙ੍ਖਾਰਦੁਕ੍ਖਤਾ ਚਿਤ੍ਤਸ੍ਸ ਅਭਾਵੇਨ ਅਸਨ੍ਤਸਮਾਵ. ਤੇਨਾਹ ‘‘ਸੁਖਂ ਵਿਹਰਿਸ੍ਸਾਮਾ’’ਤਿ. ਸੋਲ਼ਸਹਿ ਞਾਣਚਰਿਯਾਹੀਤਿ ਅਨਿਚ੍ਚਾਨੁਪਸ੍ਸਨਾਦੁਕ੍ਖਅਨਤ੍ਤਨਿਬ੍ਬਿਦਾਵਿਰਾਗਨਿਰੋਧਪਟਿਨਿਸ੍ਸਗ੍ਗਵਿਵਟ੍ਟਾਨੁਪਸ੍ਸਨਾਤਿ ਇਮਾਹਿ ਅਟ੍ਠਹਿ, ਅਟ੍ਠਹਿ ਚ ਅਰਿਯਮਗ੍ਗਫਲਞਾਣੇਹੀਤਿ ਏਵਂ ਸੋਲ਼ਸਹਿ. ਨਵਹਿ ਸਮਾਧਿਚਰਿਯਾਹੀਤਿ ਪਞ੍ਚਨ੍ਨਂ ਰੂਪਜ੍ਝਾਨਾਨਂ, ਚਤੁਨ੍ਨਂ ਅਰੂਪਜ੍ਝਾਨਾਨਞ੍ਚ ਵਸੇਨ ਏਵਂ ਨਵਹਿ. ਕੇਚਿ ਪਨ ‘‘ਚਤ੍ਤਾਰੋ ਰੂਪਜ੍ਝਾਨਸਮਾਧੀ, ਚਤ੍ਤਾਰੋ ਅਰੂਪਜ੍ਝਾਨਸਮਾਧੀ, ਉਭਯੇਸਂ ਉਪਚਾਰਸਮਾਧਿਂ ਏਕਂ ਕਤ੍ਵਾ ਏਵਂ ਨਵਾ’’ਤਿ ਵਦਨ੍ਤਿ.
ਸਮਾਧਿਭਾਵਨਾਯੋਗੇਤਿ ਸਮਾਧਿਭਾਵਨਾਯ ਅਨੁਯੋਗੇ ਅਨੁਯੁਞ੍ਜਨੇ, ਸਮਾਧਿਭਾਵਨਾਸਙ੍ਖਾਤੇ ਵਾ ਯੋਗੇ. ਯੋਗੋਤਿ ਭਾਵਨਾ ਵੁਚ੍ਚਤਿ. ਯਥਾਹ ‘‘ਯੋਗਾ ਵੇ ਜਾਯਤੀ ਭੂਰੀ’’ਤਿ (ਧ. ਪ. ੨੮੨).
੩੬੩. ਸਮਾਧਿਪੀਤਿ ਪਿ-ਸਦ੍ਦੇਨ ਸੀਲਂ ਸਮ੍ਪਿਣ੍ਡੇਤਿ.
ਸਮਾਧਿਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.
ਇਤਿ ਏਕਾਦਸਮਪਰਿਚ੍ਛੇਦਵਣ੍ਣਨਾ.
ਪਠਮੋ ਭਾਗੋ ਨਿਟ੍ਠਿਤੋ.