੮. ਅਨੁਸ੍ਸਤਿਕਮ੍ਮਟ੍ਠਾਨਨਿਦ੍ਦੇਸੋ

ਮਰਣਸ੍ਸਤਿਕਥਾ

੧੬੭. ਇਦਾਨਿ ਇਤੋ ਅਨਨ੍ਤਰਾਯ ਮਰਣਸ੍ਸਤਿਯਾ ਭਾਵਨਾਨਿਦ੍ਦੇਸੋ ਅਨੁਪ੍ਪਤ੍ਤੋ. ਤਤ੍ਥ ਮਰਣਨ੍ਤਿ ਏਕਭਵਪਰਿਯਾਪਨ੍ਨਸ੍ਸ ਜੀਵਿਤਿਨ੍ਦ੍ਰਿਯਸ੍ਸ ਉਪਚ੍ਛੇਦੋ. ਯਂ ਪਨੇਤਂ ਅਰਹਨ੍ਤਾਨਂ ਵਟ੍ਟਦੁਕ੍ਖਸਮੁਚ੍ਛੇਦਸਙ੍ਖਾਤਂ ਸਮੁਚ੍ਛੇਦਮਰਣਂ, ਸਙ੍ਖਾਰਾਨਂ ਖਣਭਙ੍ਗਸਙ੍ਖਾਤਂ ਖਣਿਕਮਰਣਂ, ਰੁਕ੍ਖੋ ਮਤੋ ਲੋਹਂ ਮਤਨ੍ਤਿਆਦੀਸੁ ਸਮ੍ਮੁਤਿਮਰਣਞ੍ਚ, ਨ ਤਂ ਇਧ ਅਧਿਪ੍ਪੇਤਂ.

ਯਮ੍ਪਿ ਚੇਤਂ ਅਧਿਪ੍ਪੇਤਂ, ਤਂ ਕਾਲਮਰਣਂ ਅਕਾਲਮਰਣਨ੍ਤਿ ਦੁਵਿਧਂ ਹੋਤਿ. ਤਤ੍ਥ ਕਾਲਮਰਣਂ ਪੁਞ੍ਞਕ੍ਖਯੇਨ ਵਾ ਆਯੁਕ੍ਖਯੇਨ ਵਾ ਉਭਯਕ੍ਖਯੇਨ ਵਾ ਹੋਤਿ. ਅਕਾਲਮਰਣਂ ਕਮ੍ਮੁਪਚ੍ਛੇਦਕਕਮ੍ਮਵਸੇਨ.

ਤਤ੍ਥ ਯਂ ਵਿਜ੍ਜਮਾਨਾਯਪਿ ਆਯੁਸਨ੍ਤਾਨਜਨਕਪਚ੍ਚਯਸਮ੍ਪਤ੍ਤਿਯਾ ਕੇਵਲਂ ਪਟਿਸਨ੍ਧਿਜਨਕਸ੍ਸ ਕਮ੍ਮਸ੍ਸ ਵਿਪਕ੍ਕਵਿਪਾਕਤ੍ਤਾ ਮਰਣਂ ਹੋਤਿ, ਇਦਂ ਪੁਞ੍ਞਕ੍ਖਯੇਨ ਮਰਣਂ ਨਾਮ. ਯਂ ਗਤਿਕਾਲਾਹਾਰਾਦਿਸਮ੍ਪਤ੍ਤਿਯਾ ਅਭਾਵੇਨ ਅਜ੍ਜਤਨਕਾਲਪੁਰਿਸਾਨਂ ਵਿਯ ਵਸ੍ਸਸਤਮਤ੍ਤਪਰਿਮਾਣਸ੍ਸ ਆਯੁਨੋ ਖਯਵਸੇਨ ਮਰਣਂ ਹੋਤਿ, ਇਦਂ ਆਯੁਕ੍ਖਯੇਨ ਮਰਣਂ ਨਾਮ. ਯਂ ਪਨ ਦੂਸੀਮਾਰਕਲਾਬੁਰਾਜਾਦੀਨਂ ਵਿਯ ਤਙ੍ਖਣਞ੍ਞੇਵ ਠਾਨਾਚਾਵਨਸਮਤ੍ਥੇਨ ਕਮ੍ਮੁਨਾ ਉਪਚ੍ਛਿਨ੍ਨਸਨ੍ਤਾਨਾਨਂ, ਪੁਰਿਮਕਮ੍ਮਵਸੇਨ ਵਾ ਸਤ੍ਥਹਰਣਾਦੀਹਿ ਉਪਕ੍ਕਮੇਹਿ ਉਪਚ੍ਛਿਜ੍ਜਮਾਨਸਨ੍ਤਾਨਾਨਂ ਮਰਣਂ ਹੋਤਿ, ਇਦਂ ਅਕਾਲਮਰਣਂ ਨਾਮ. ਤਂ ਸਬ੍ਬਮ੍ਪਿ ਵੁਤ੍ਤਪ੍ਪਕਾਰੇਨ ਜੀਵਿਤਿਨ੍ਦ੍ਰਿਯੁਪਚ੍ਛੇਦੇਨ ਸਙ੍ਗਹਿਤਂ. ਇਤਿ ਜੀਵਿਤਿਨ੍ਦ੍ਰਿਯੁਪਚ੍ਛੇਦਸਙ੍ਖਾਤਸ੍ਸ ਮਰਣਸ੍ਸ ਸਰਣਂ ਮਰਣਸ੍ਸਤਿ.

੧੬੮. ਤਂ ਭਾਵੇਤੁਕਾਮੇਨ ਰਹੋਗਤੇਨ ਪਟਿਸਲ੍ਲੀਨੇਨ ‘‘ਮਰਣਂ ਭਵਿਸ੍ਸਤਿ, ਜੀਵਿਤਿਨ੍ਦ੍ਰਿਯਂ ਉਪਚ੍ਛਿਜ੍ਜਿਸ੍ਸਤੀ’’ਤਿ ਵਾ, ‘‘ਮਰਣਂ ਮਰਣ’’ਨ੍ਤਿ ਵਾ ਯੋਨਿਸੋ ਮਨਸਿਕਾਰੋ ਪਵਤ੍ਤੇਤਬ੍ਬੋ. ਅਯੋਨਿਸੋ ਪਵਤ੍ਤਯਤੋ ਹਿ ਇਟ੍ਠਜਨਮਰਣਾਨੁਸ੍ਸਰਣੇ ਸੋਕੋ ਉਪ੍ਪਜ੍ਜਤਿ ਵਿਜਾਤਮਾਤੁਯਾ ਪਿਯਪੁਤ੍ਤਮਰਣਾਨੁਸ੍ਸਰਣੇ ਵਿਯ. ਅਨਿਟ੍ਠਜਨਮਰਣਾਨੁਸ੍ਸਰਣੇ ਪਾਮੋਜ੍ਜਂ ਉਪ੍ਪਜ੍ਜਤਿ ਵੇਰੀਨਂ ਵੇਰਿਮਰਣਾਨੁਸ੍ਸਰਣੇ ਵਿਯ. ਮਜ੍ਝਤ੍ਤਜਨਮਰਣਾਨੁਸ੍ਸਰਣੇ ਸਂਵੇਗੋ ਨ ਉਪ੍ਪਜ੍ਜਤਿ ਮਤਕਲ਼ੇਵਰਦਸ੍ਸਨੇ ਛਵਡਾਹਕਸ੍ਸ ਵਿਯ. ਅਤ੍ਤਨੋ ਮਰਣਾਨੁਸ੍ਸਰਣੇ ਸਨ੍ਤਾਸੋ ਉਪ੍ਪਜ੍ਜਤਿ ਉਕ੍ਖਿਤ੍ਤਾਸਿਕਂ ਵਧਕਂ ਦਿਸ੍ਵਾ ਭੀਰੁਕਜਾਤਿਕਸ੍ਸ ਵਿਯ. ਤਦੇਤਂ ਸਬ੍ਬਮ੍ਪਿ ਸਤਿਸਂਵੇਗਞਾਣਵਿਰਹਤੋ ਹੋਤਿ. ਤਸ੍ਮਾ ਤਤ੍ਥ ਤਤ੍ਥ ਹਤਮਤਸਤ੍ਤੇ ਓਲੋਕੇਤ੍ਵਾ ਦਿਟ੍ਠਪੁਬ੍ਬਸਮ੍ਪਤ੍ਤੀਨਂ ਸਤ੍ਤਾਨਂ ਮਤਾਨਂ ਮਰਣਂ ਆਵਜ੍ਜੇਤ੍ਵਾ ਸਤਿਞ੍ਚ ਸਂਵੇਗਞ੍ਚ ਞਾਣਞ੍ਚ ਯੋਜੇਤ੍ਵਾ ‘‘ਮਰਣਂ ਭਵਿਸ੍ਸਤੀ’’ਤਿਆਦਿਨਾ ਨਯੇਨ ਮਨਸਿਕਾਰੋ ਪਵਤ੍ਤੇਤਬ੍ਬੋ. ਏਵਂ ਪਵਤ੍ਤੇਨ੍ਤੋ ਹਿ ਯੋਨਿਸੋ ਪਵਤ੍ਤੇਤਿ, ਉਪਾਯੇਨ ਪਵਤ੍ਤੇਤੀਤਿ ਅਤ੍ਥੋ. ਏਵਂ ਪਵਤ੍ਤਯਤੋਯੇਵ ਹਿ ਏਕਚ੍ਚਸ੍ਸ ਨੀਵਰਣਾਨਿ ਵਿਕ੍ਖਮ੍ਭਨ੍ਤਿ, ਮਰਣਾਰਮ੍ਮਣਾ ਸਤਿ ਸਣ੍ਠਾਤਿ, ਉਪਚਾਰਪ੍ਪਤ੍ਤਮੇਵ ਕਮ੍ਮਟ੍ਠਾਨਂ ਹੋਤਿ.

੧੬੯. ਯਸ੍ਸ ਪਨ ਏਤ੍ਤਾਵਤਾ ਨ ਹੋਤਿ, ਤੇਨ ਵਧਕਪਚ੍ਚੁਪਟ੍ਠਾਨਤੋ, ਸਮ੍ਪਤ੍ਤਿਵਿਪਤ੍ਤਿਤੋ, ਉਪਸਂਹਰਣਤੋ, ਕਾਯਬਹੁਸਾਧਾਰਣਤੋ, ਆਯੁਦੁਬ੍ਬਲਤੋ, ਅਨਿਮਿਤ੍ਤਤੋ, ਅਦ੍ਧਾਨਪਰਿਚ੍ਛੇਦਤੋ, ਖਣਪਰਿਤ੍ਤਤੋਤਿ ਇਮੇਹਿ ਅਟ੍ਠਹਾਕਾਰੇਹਿ ਮਰਣਂ ਅਨੁਸ੍ਸਰਿਤਬ੍ਬਂ.

ਤਤ੍ਥ ਵਧਕਪਚ੍ਚੁਪਟ੍ਠਾਨਤੋਤਿ ਵਧਕਸ੍ਸ ਵਿਯ ਪਚ੍ਚੁਪਟ੍ਠਾਨਤੋ. ਯਥਾ ਹਿ ਇਮਸ੍ਸ ਸੀਸਂ ਛਿਨ੍ਦਿਸ੍ਸਾਮੀਤਿ ਅਸਿਂ ਗਹੇਤ੍ਵਾ ਗੀਵਾਯ ਚਾਰਯਮਾਨੋ ਵਧਕੋ ਪਚ੍ਚੁਪਟ੍ਠਿਤੋਵ ਹੋਤਿ, ਏਵਂ ਮਰਣਮ੍ਪਿ ਪਚ੍ਚੁਪਟ੍ਠਿਤਮੇਵਾਤਿ ਅਨੁਸ੍ਸਰਿਤਬ੍ਬਂ. ਕਸ੍ਮਾ? ਸਹ ਜਾਤਿਯਾ ਆਗਤਤੋ, ਜੀਵਿਤਹਰਣਤੋ ਚ. ਯਥਾ ਹਿ ਅਹਿਚ੍ਛਤ੍ਤਕਮਕੁਲ਼ਂ ਮਤ੍ਥਕੇਨ ਪਂਸੁਂ ਗਹੇਤ੍ਵਾਵ ਉਗ੍ਗਚ੍ਛਤਿ, ਏਵਂ ਸਤ੍ਤਾ ਜਰਾਮਰਣਂ ਗਹੇਤ੍ਵਾਵ ਨਿਬ੍ਬਤ੍ਤਨ੍ਤਿ. ਤਥਾ ਹਿ ਨੇਸਂ ਪਟਿਸਨ੍ਧਿਚਿਤ੍ਤਂ ਉਪ੍ਪਾਦਾਨਨ੍ਤਰਮੇਵ ਜਰਂ ਪਤ੍ਵਾ ਪਬ੍ਬਤਸਿਖਰਤੋ ਪਤਿਤਸਿਲਾ ਵਿਯ ਭਿਜ੍ਜਤਿ ਸਦ੍ਧਿਂ ਸਮ੍ਪਯੁਤ੍ਤਖਨ੍ਧੇਹਿ. ਏਵਂ ਖਣਿਕਮਰਣਂ ਤਾਵ ਸਹ ਜਾਤਿਯਾ ਆਗਤਂ. ਜਾਤਸ੍ਸ ਪਨ ਅਵਸ੍ਸਂ ਮਰਣਤੋ ਇਧਾਧਿਪ੍ਪੇਤਮਰਣਮ੍ਪਿ ਸਹ ਜਾਤਿਯਾ ਆਗਤਂ. ਤਸ੍ਮਾ ਏਸ ਸਤ੍ਤੋ ਜਾਤਕਾਲਤੋ ਪਟ੍ਠਾਯ ਯਥਾ ਨਾਮ ਉਟ੍ਠਿਤੋ ਸੂਰਿਯੋ ਅਤ੍ਥਾਭਿਮੁਖੋ ਗਚ੍ਛਤੇਵ, ਗਤਗਤਟ੍ਠਾਨਤੋ ਈਸਕਮ੍ਪਿ ਨ ਨਿਵਤ੍ਤਤਿ. ਯਥਾ ਵਾ ਨਦੀ ਪਬ੍ਬਤੇਯ੍ਯਾ ਸੀਘਸੋਤਾ ਹਾਰਹਾਰਿਨੀ ਸਨ੍ਦਤੇਵ ਵਤ੍ਤਤੇਵ ਈਸਕਮ੍ਪਿ ਨ ਨਿਵਤ੍ਤਤਿ, ਏਵਂ ਈਸਕਮ੍ਪਿ ਅਨਿਵਤ੍ਤਮਾਨੋ ਮਰਣਾਭਿਮੁਖੋਵ ਯਾਤਿ. ਤੇਨ ਵੁਤ੍ਤਂ –

‘‘ਯਮੇਕਰਤ੍ਤਿਂ ਪਠਮਂ, ਗਬ੍ਭੇ ਵਸਤਿ ਮਾਣਵੋ;

ਅਬ੍ਭੁਟ੍ਠਿਤੋਵ ਸੋ ਯਾਤਿ, ਸ ਗਚ੍ਛਂ ਨ ਨਿਵਤ੍ਤਤੀ’’ਤਿ. (ਜਾ. ੧.੧੫.੩੬੩);

ਏਵਂ ਗਚ੍ਛਤੋ ਚਸ੍ਸ ਗਿਮ੍ਹਾਭਿਤਤ੍ਤਾਨਂ ਕੁਨ੍ਨਦੀਨਂ ਖਯੋ ਵਿਯ, ਪਾਤੋ ਆਪੋਰਸਾਨੁਗਤਬਨ੍ਧਨਾਨਂ ਦੁਮਪ੍ਫਲਾਨਂ ਪਤਨਂ ਵਿਯ, ਮੁਗ੍ਗਰਾਭਿਤਾਲ਼ਿਤਾਨਂ ਮਤ੍ਤਿਕਭਾਜਨਾਨਂ ਭੇਦੋ ਵਿਯ, ਸੂਰਿਯਰਸ੍ਮਿਸਮ੍ਫੁਟ੍ਠਾਨਂ ਉਸ੍ਸਾਵਬਿਨ੍ਦੂਨਂ ਵਿਦ੍ਧਂਸਨਂ ਵਿਯ ਚ ਮਰਣਮੇਵ ਆਸਨ੍ਨਂ ਹੋਤਿ. ਤੇਨਾਹ –

‘‘ਅਚ੍ਚਯਨ੍ਤਿ ਅਹੋਰਤ੍ਤਾ, ਜੀਵਿਤਮੁਪਰੁਜ੍ਝਤਿ;

ਆਯੁ ਖੀਯਤਿ ਮਚ੍ਚਾਨਂ, ਕੁਨ੍ਨਦੀਨਂਵ ਓਦਕਂ. (ਸਂ. ਨਿ. ੧.੧੪੬);

‘‘ਫਲਾਨਮਿਵ ਪਕ੍ਕਾਨਂ, ਪਾਤੋ ਪਪਤਤੋ ਭਯਂ;

ਏਵਂ ਜਾਤਾਨ ਮਚ੍ਚਾਨਂ, ਨਿਚ੍ਚਂ ਮਰਣਤੋ ਭਯਂ.

‘‘ਯਥਾਪਿ ਕੁਮ੍ਭਕਾਰਸ੍ਸ, ਕਤਂ ਮਤ੍ਤਿਕਭਾਜਨਂ;

ਖੁਦ੍ਦਕਞ੍ਚ ਮਹਨ੍ਤਞ੍ਚ, ਯਂ ਪਕ੍ਕਂ ਯਞ੍ਚ ਆਮਕਂ;

ਸਬ੍ਬਂ ਭੇਦਨਪਰਿਯਨ੍ਤਂ, ਏਵਂ ਮਚ੍ਚਾਨ ਜੀਵਿਤਂ’. (ਸੁ. ਨਿ. ੫੮੧-੫੮੨);

‘‘ਉਸ੍ਸਾਵੋਵ ਤਿਣਗ੍ਗਮ੍ਹਿ, ਸੂਰਿਯੁਗ੍ਗਮਨਂ ਪਤਿ;

ਏਵਮਾਯੁ ਮਨੁਸ੍ਸਾਨਂ, ਮਾ ਮਂ ਅਮ੍ਮ ਨਿਵਾਰਯਾ’’ਤਿ. (ਜਾ. ੧.੧੧.੭੯);

ਏਵਂ ਉਕ੍ਖਿਤ੍ਤਾਸਿਕੋ ਵਧਕੋ ਵਿਯ ਸਹ ਜਾਤਿਯਾ ਆਗਤਂ ਪਨੇਤਂ ਮਰਣਂ ਗੀਵਾਯ ਅਸਿਂ ਚਾਰਯਮਾਨੋ ਸੋ ਵਧਕੋ ਵਿਯ ਜੀਵਿਤਂ ਹਰਤਿਯੇਵ, ਨ ਅਹਰਿਤ੍ਵਾ ਨਿਵਤ੍ਤਤਿ. ਤਸ੍ਮਾ ਸਹ ਜਾਤਿਯਾ ਆਗਤਤੋ, ਜੀਵਿਤਹਰਣਤੋ ਚ ਉਕ੍ਖਿਤ੍ਤਾਸਿਕੋ ਵਧਕੋ ਵਿਯ ਮਰਣਮ੍ਪਿ ਪਚ੍ਚੁਪਟ੍ਠਿਤਮੇਵਾਤਿ ਏਵਂ ਵਧਕਪਚ੍ਚੁਪਟ੍ਠਾਨਤੋ ਮਰਣਂ ਅਨੁਸ੍ਸਰਿਤਬ੍ਬਂ.

੧੭੦. ਸਮ੍ਪਤ੍ਤਿਵਿਪਤ੍ਤਿਤੋਤਿ ਇਧ ਸਮ੍ਪਤ੍ਤਿ ਨਾਮ ਤਾਵਦੇਵ ਸੋਭਤਿ, ਯਾਵ ਨਂ ਵਿਪਤ੍ਤਿ ਨਾਭਿਭਵਤਿ, ਨ ਚ ਸਾ ਸਮ੍ਪਤ੍ਤਿ ਨਾਮ ਅਤ੍ਥਿ, ਯਾ ਵਿਪਤ੍ਤਿਂ ਅਤਿਕ੍ਕਮ੍ਮ ਤਿਟ੍ਠੇਯ੍ਯ. ਤਥਾ ਹਿ –

‘‘ਸਕਲਂ ਮੇਦਿਨਿਂ ਭੁਤ੍ਵਾ, ਦਤ੍ਵਾ ਕੋਟਿਸਤਂ ਸੁਖੀ;

ਅਡ੍ਢਾਮਲਕਮਤ੍ਤਸ੍ਸ, ਅਨ੍ਤੇ ਇਸ੍ਸਰਤਂ ਗਤੋ.

‘‘ਤੇਨੇਵ ਦੇਹਬਨ੍ਧੇਨ, ਪੁਞ੍ਞਮ੍ਹਿ ਖਯਮਾਗਤੇ;

ਮਰਣਾਭਿਮੁਖੋ ਸੋਪਿ, ਅਸੋਕੋ ਸੋਕਮਾਗਤੋ’’ਤਿ.

ਅਪਿਚ ਸਬ੍ਬਂ ਆਰੋਗ੍ਯਂ ਬ੍ਯਾਧਿਪਰਿਯੋਸਾਨਂ, ਸਬ੍ਬਂ ਯੋਬ੍ਬਨਂ ਜਰਾਪਰਿਯੋਸਾਨਂ, ਸਬ੍ਬਂ ਜੀਵਿਤਂ ਮਰਣਪਰਿਯੋਸਾਨਂ, ਸਬ੍ਬੋਯੇਵ ਲੋਕਸਨ੍ਨਿਵਾਸੋ ਜਾਤਿਯਾ ਅਨੁਗਤੋ, ਜਰਾਯ ਅਨੁਸਟੋ, ਬ੍ਯਾਧਿਨਾ ਅਭਿਭੂਤੋ, ਮਰਣੇਨ ਅਬ੍ਭਾਹਤੋ. ਤੇਨਾਹ –

‘‘ਯਥਾਪਿ ਸੇਲਾ ਵਿਪੁਲਾ, ਨਭਂ ਆਹਚ੍ਚ ਪਬ੍ਬਤਾ;

ਸਮਨ੍ਤਾ ਅਨੁਪਰਿਯੇਯ੍ਯੁਂ, ਨਿਪ੍ਪੋਥੇਨ੍ਤਾ ਚਤੁਦ੍ਦਿਸਾ.

‘‘ਏਵਂ ਜਰਾ ਚ ਮਚ੍ਚੁ ਚ, ਅਧਿਵਤ੍ਤਨ੍ਤਿ ਪਾਣਿਨੇ;

ਖਤ੍ਤਿਯੇ ਬ੍ਰਾਹ੍ਮਣੇ ਵੇਸ੍ਸੇ, ਸੁਦ੍ਦੇ ਚਣ੍ਡਾਲਪੁਕ੍ਕੁਸੇ;

ਨ ਕਿਞ੍ਚਿ ਪਰਿਵਜ੍ਜੇਤਿ, ਸਬ੍ਬਮੇਵਾਭਿਮਦ੍ਦਤਿ.

‘‘ਨ ਤਤ੍ਥ ਹਤ੍ਥੀਨਂ ਭੂਮਿ, ਨ ਰਥਾਨਂ ਨ ਪਤ੍ਤਿਯਾ;

ਨ ਚਾਪਿ ਮਨ੍ਤਯੁਦ੍ਧੇਨ, ਸਕ੍ਕਾ ਜੇਤੁਂ ਧਨੇਨ ਵਾ’’ਤਿ. (ਸਂ. ਨਿ. ੧.੧੩੬);

ਏਵਂ ਜੀਵਿਤਸਮ੍ਪਤ੍ਤਿਯਾ ਮਰਣਵਿਪਤ੍ਤਿਪਰਿਯੋਸਾਨਤਂ ਵਵਤ੍ਥਪੇਨ੍ਤੇਨ ਸਮ੍ਪਤ੍ਤਿਵਿਪਤ੍ਤਿਤੋ ਮਰਣਂ ਅਨੁਸ੍ਸਰਿਤਬ੍ਬਂ.

੧੭੧. ਉਪਸਂਹਰਣਤੋਤਿ ਪਰੇਹਿ ਸਦ੍ਧਿਂ ਅਤ੍ਤਨੋ ਉਪਸਂਹਰਣਤੋ. ਤਤ੍ਥ ਸਤ੍ਤਹਾਕਾਰੇਹਿ ਉਪਸਂਹਰਣਤੋ ਮਰਣਂ ਅਨੁਸ੍ਸਰਿਤਬ੍ਬਂ, ਯਸਮਹਤ੍ਤਤੋ, ਪੁਞ੍ਞਮਹਤ੍ਤਤੋ, ਥਾਮਮਹਤ੍ਤਤੋ, ਇਦ੍ਧਿਮਹਤ੍ਤਤੋ, ਪਞ੍ਞਾਮਹਤ੍ਤਤੋ, ਪਚ੍ਚੇਕਬੁਦ੍ਧਤੋ, ਸਮ੍ਮਾਸਮ੍ਬੁਦ੍ਧਤੋਤਿ. ਕਥਂ? ਇਦਂ ਮਰਣਂ ਨਾਮ ਮਹਾਯਸਾਨਂ ਮਹਾਪਰਿਵਾਰਾਨਂ ਸਮ੍ਪਨ੍ਨਧਨਵਾਹਨਾਨਂ ਮਹਾਸਮ੍ਮਤਮਨ੍ਧਾਤੁਮਹਾਸੁਦਸ੍ਸਨ ਦਲ਼੍ਹਨੇਮਿ ਨਿਮਿਪ੍ਪਭੁਤੀਨਮ੍ਪਿ ਉਪਰਿ ਨਿਰਾਸਙ੍ਕਮੇਵ ਪਤਿਤਂ, ਕਿਮਙ੍ਗਂ ਪਨ ਮਯ੍ਹਂ ਉਪਰਿ ਨ ਪਤਿਸ੍ਸਤਿ?

ਮਹਾਯਸਾ ਰਾਜਵਰਾ, ਮਹਾਸਮ੍ਮਤਆਦਯੋ;

ਤੇਪਿ ਮਚ੍ਚੁਵਸਂ ਪਤ੍ਤਾ, ਮਾਦਿਸੇਸੁ ਕਥਾਵ ਕਾਤਿ.

ਏਵਂ ਤਾਵ ਯਸਮਹਤ੍ਤਤੋ ਅਨੁਸ੍ਸਰਿਤਬ੍ਬਂ.

ਕਥਂ ਪੁਞ੍ਞਮਹਤ੍ਤਤੋ?

ਜੋਤਿਕੋ ਜਟਿਲੋ ਉਗ੍ਗੋ, ਮੇਣ੍ਡਕੋ ਅਥ ਪੁਣ੍ਣਕੋ;

ਏਤੇ ਚਞ੍ਞੇ ਚ ਯੇ ਲੋਕੇ, ਮਹਾਪੁਞ੍ਞਾਤਿ ਵਿਸ੍ਸੁਤਾ;

ਸਬ੍ਬੇ ਮਰਣਮਾਪਨ੍ਨਾ, ਮਾਦਿਸੇਸੁ ਕਥਾਵ ਕਾਤਿ.

ਏਵਂ ਪੁਞ੍ਞਮਹਤ੍ਤਤੋ ਅਨੁਸ੍ਸਰਿਤਬ੍ਬਂ.

ਕਥਂ ਥਾਮਮਹਤ੍ਤਤੋ?

ਵਾਸੁਦੇਵੋ ਬਲਦੇਵੋ, ਭੀਮਸੇਨੋ ਯੁਧਿਟ੍ਠਿਲੋ;

ਚਾਨੁਰੋ ਯੋ ਮਹਾਮਲ੍ਲੋ, ਅਨ੍ਤਕਸ੍ਸ ਵਸਂ ਗਤਾ.

ਏਵਂ ਥਾਮਬਲੂਪੇਤਾ, ਇਤਿ ਲੋਕਮ੍ਹਿ ਵਿਸ੍ਸੁਤਾ;

ਏਤੇਪਿ ਮਰਣਂ ਯਾਤਾ, ਮਾਦਿਸੇਸੁ ਕਥਾਵ ਕਾਤਿ.

ਏਵਂ ਥਾਮਮਹਤ੍ਤਤੋ ਅਨੁਸ੍ਸਰਿਤਬ੍ਬਂ.

ਕਥਂ ਇਦ੍ਧਿਮਹਤ੍ਤਤੋ?

ਪਾਦਙ੍ਗੁਟ੍ਠਕਮਤ੍ਤੇਨ, ਵੇਜਯਨ੍ਤਮਕਮ੍ਪਯਿ;

ਯੋ ਨਾਮਿਦ੍ਧਿਮਤਂ ਸੇਟ੍ਠੋ, ਦੁਤਿਯੋ ਅਗ੍ਗਸਾਵਕੋ.

ਸੋਪਿ ਮਚ੍ਚੁਮੁਖਂ ਘੋਰਂ, ਮਿਗੋ ਸੀਹਮੁਖਂ ਵਿਯ;

ਪਵਿਟ੍ਠੋ ਸਹ ਇਦ੍ਧੀਹਿ, ਮਾਦਿਸੇਸੁ ਕਥਾਵ ਕਾਤਿ.

ਏਵਂ ਇਦ੍ਧਿਮਹਤ੍ਤਤੋ ਅਨੁਸ੍ਸਰਿਤਬ੍ਬਂ.

ਕਥਂ ਪਞ੍ਞਾਮਹਤ੍ਤਤੋ?

ਲੋਕਨਾਥਂ ਠਪੇਤ੍ਵਾਨ, ਯੇ ਚਞ੍ਞੇ ਅਤ੍ਥਿ ਪਾਣਿਨੋ;

ਪਞ੍ਞਾਯ ਸਾਰਿਪੁਤ੍ਤਸ੍ਸ, ਕਲਂ ਨਾਗ੍ਘਨ੍ਤਿ ਸੋਲ਼ਸਿਂ.

ਏਵਂ ਨਾਮ ਮਹਾਪਞ੍ਞੋ, ਪਠਮੋ ਅਗ੍ਗਸਾਵਕੋ;

ਮਰਣਸ੍ਸ ਵਸਂ ਪਤ੍ਤੋ, ਮਾਦਿਸੇਸੁ ਕਥਾਵ ਕਾਤਿ.

ਏਵਂ ਪਞ੍ਞਾਮਹਤ੍ਤਤੋ ਅਨੁਸ੍ਸਰਿਤਬ੍ਬਂ.

ਕਥਂ ਪਚ੍ਚੇਕਬੁਦ੍ਧਤੋ? ਯੇਪਿ ਤੇ ਅਤ੍ਤਨੋ ਞਾਣਵੀਰਿਯਬਲੇਨ ਸਬ੍ਬਕਿਲੇਸਸਤ੍ਤੁਨਿਮ੍ਮਥਨਂ ਕਤ੍ਵਾ ਪਚ੍ਚੇਕਬੋਧਿਂ ਪਤ੍ਤਾ ਖਗ੍ਗਵਿਸਾਣਕਪ੍ਪਾ ਸਯਮ੍ਭੁਨੋ, ਤੇਪਿ ਮਰਣਤੋ ਨ ਮੁਤ੍ਤਾ, ਕੁਤੋ ਪਨਾਹਂ ਮੁਚ੍ਚਿਸ੍ਸਾਮੀਤਿ.

ਤਂ ਤਂ ਨਿਮਿਤ੍ਤਮਾਗਮ੍ਮ, ਵੀਮਂਸਨ੍ਤਾ ਮਹੇਸਯੋ;

ਸਯਮ੍ਭੁਞ੍ਞਾਣਤੇਜੇਨ, ਯੇ ਪਤ੍ਤਾ ਆਸਵਕ੍ਖਯਂ.

ਏਕਚਰਿਯਨਿਵਾਸੇਨ, ਖਗ੍ਗਸਿਙ੍ਗਸਮੂਪਮਾ;

ਤੇਪਿ ਨਾਤਿਗਤਾ ਮਚ੍ਚੁਂ, ਮਾਦਿਸੇਸੁ ਕਥਾਵ ਕਾਤਿ.

ਏਵਂ ਪਚ੍ਚੇਕਬੁਦ੍ਧਤੋ ਅਨੁਸ੍ਸਰਿਤਬ੍ਬਂ.

ਕਥਂ ਸਮ੍ਮਾਸਮ੍ਬੁਦ੍ਧਤੋ? ਯੋਪਿ ਸੋ ਭਗਵਾ ਅਸੀਤਿਅਨੁਬ੍ਯਞ੍ਜਨਪਟਿਮਣ੍ਡਿਤਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਵਿਚਿਤ੍ਰਰੂਪਕਾਯੋ ਸਬ੍ਬਾਕਾਰਪਰਿਸੁਦ੍ਧਸੀਲਕ੍ਖਨ੍ਧਾਦਿਗੁਣਰਤਨਸਮਿਦ੍ਧਧਮ੍ਮਕਾਯੋ ਯਸਮਹਤ੍ਤਪੁਞ੍ਞਮਹਤ੍ਤਥਾਮਮਹਤ੍ਤਇਦ੍ਧਿਮਹਤ੍ਤਪਞ੍ਞਾਮਹਤ੍ਤਾਨਂ ਪਾਰਂ ਗਤੋ ਅਸਮੋ ਅਸਮਸਮੋ ਅਪ੍ਪਟਿਪੁਗ੍ਗਲੋ ਅਰਹਂ ਸਮ੍ਮਾਸਮ੍ਬੁਦ੍ਧੋ, ਸੋਪਿ ਸਲਿਲਵੁਟ੍ਠਿਨਿਪਾਤੇਨ ਮਹਾਅਗ੍ਗਿਕ੍ਖਨ੍ਧੋ ਵਿਯ ਮਰਣਵੁਟ੍ਠਿਨਿਪਾਤੇਨ ਠਾਨਸੋ ਵੂਪਸਨ੍ਤੋ.

ਏਵਂ ਮਹਾਨੁਭਾਵਸ੍ਸ, ਯਂ ਨਾਮੇਤਂ ਮਹੇਸਿਨੋ;

ਨ ਭਯੇਨ ਨ ਲਜ੍ਜਾਯ, ਮਰਣਂ ਵਸਮਾਗਤਂ.

ਨਿਲ੍ਲਜ੍ਜਂ ਵੀਤਸਾਰਜ੍ਜਂ, ਸਬ੍ਬਸਤ੍ਤਾਭਿਮਦ੍ਦਨਂ;

ਤਯਿਦਂ ਮਾਦਿਸਂ ਸਤ੍ਤਂ, ਕਥਂ ਨਾਭਿਭਵਿਸ੍ਸਤੀਤਿ.

ਏਵਂ ਸਮ੍ਮਾਸਮ੍ਬੁਦ੍ਧਤੋ ਅਨੁਸ੍ਸਰਿਤਬ੍ਬਂ.

ਤਸ੍ਸੇਵਂ ਯਸਮਹਤ੍ਤਤਾਦਿਸਮ੍ਪਨ੍ਨੇਹਿ ਪਰੇਹਿ ਸਦ੍ਧਿਂ ਮਰਣਸਾਮਞ੍ਞਤਾਯ ਅਤ੍ਤਾਨਂ ਉਪਸਂਹਰਿਤ੍ਵਾ ਤੇਸਂ ਵਿਯ ਸਤ੍ਤਵਿਸੇਸਾਨਂ ਮਯ੍ਹਮ੍ਪਿ ਮਰਣਂ ਭਵਿਸ੍ਸਤੀਤਿ ਅਨੁਸ੍ਸਰਤੋ ਉਪਚਾਰਪ੍ਪਤ੍ਤਂ ਕਮ੍ਮਟ੍ਠਾਨਂ ਹੋਤੀਤਿ. ਏਵਂ ਉਪਸਂਹਰਣਤੋ ਮਰਣਂ ਅਨੁਸ੍ਸਰਿਤਬ੍ਬਂ.

੧੭੨. ਕਾਯਬਹੁਸਾਧਾਰਣਤੋਤਿ ਅਯਂ ਕਾਯੋ ਬਹੁਸਾਧਾਰਣੋ. ਅਸੀਤਿਯਾ ਤਾਵ ਕਿਮਿਕੁਲਾਨਂ ਸਾਧਾਰਣੋ, ਤਤ੍ਥ ਛਵਿਨਿਸ੍ਸਿਤਾ ਪਾਣਾ ਛਵਿਂ ਖਾਦਨ੍ਤਿ, ਚਮ੍ਮਨਿਸ੍ਸਿਤਾ ਚਮ੍ਮਂ ਖਾਦਨ੍ਤਿ, ਮਂਸਨਿਸ੍ਸਿਤਾ ਮਂਸਂ ਖਾਦਨ੍ਤਿ, ਨ੍ਹਾਰੁਨਿਸ੍ਸਿਤਾ ਨ੍ਹਾਰੁਂ ਖਾਦਨ੍ਤਿ, ਅਟ੍ਠਿਨਿਸ੍ਸਿਤਾ ਅਟ੍ਠਿਂ ਖਾਦਨ੍ਤਿ, ਮਿਞ੍ਜਨਿਸ੍ਸਿਤਾ ਮਿਞ੍ਜਂ ਖਾਦਨ੍ਤਿ. ਤਤ੍ਥੇਵ ਜਾਯਨ੍ਤਿ ਜੀਯਨ੍ਤਿ ਮੀਯਨ੍ਤਿ, ਉਚ੍ਚਾਰਪਸ੍ਸਾਵਂ ਕਰੋਨ੍ਤਿ. ਕਾਯੋਵ ਨੇਸਂ ਸੂਤਿਘਰਞ੍ਚੇਵ ਗਿਲਾਨਸਾਲਾ ਚ ਸੁਸਾਨਞ੍ਚ ਵਚ੍ਚਕੁਟਿ ਚ ਪਸ੍ਸਾਵਦੋਣਿਕਾ ਚ. ਸ੍ਵਾਯਂ ਤੇਸਮ੍ਪਿ ਕਿਮਿਕੁਲਾਨਂ ਪਕੋਪੇਨ ਮਰਣਂ ਨਿਗਚ੍ਛਤਿਯੇਵ. ਯਥਾ ਚ ਅਸੀਤਿਯਾ ਕਿਮਿਕੁਲਾਨਂ, ਏਵਂ ਅਜ੍ਝਤ੍ਤਿਕਾਨਂਯੇਵ ਅਨੇਕਸਤਾਨਂ ਰੋਗਾਨਂ ਬਾਹਿਰਾਨਞ੍ਚ ਅਹਿਵਿਚ੍ਛਿਕਾਦੀਨਂ ਮਰਣਸ੍ਸ ਪਚ੍ਚਯਾਨਂ ਸਾਧਾਰਣੋ.

ਯਥਾ ਹਿ ਚਤੁਮਹਾਪਥੇ ਠਪਿਤੇ ਲਕ੍ਖਮ੍ਹਿ ਸਬ੍ਬਦਿਸਾਹਿ ਆਗਤਾ ਸਰਸਤ੍ਤਿਤੋਮਰਪਾਸਾਣਾਦਯੋ ਨਿਪਤਨ੍ਤਿ, ਏਵਂ ਕਾਯੇਪਿ ਸਬ੍ਬੁਪਦ੍ਦਵਾ ਨਿਪਤਨ੍ਤਿ. ਸ੍ਵਾਯਂ ਤੇਸਮ੍ਪਿ ਉਪਦ੍ਦਵਾਨਂ ਨਿਪਾਤੇਨ ਮਰਣਂ ਨਿਗਚ੍ਛਤਿਯੇਵ. ਤੇਨਾਹ ਭਗਵਾ – ‘‘ਇਧ, ਭਿਕ੍ਖਵੇ, ਭਿਕ੍ਖੁ ਦਿਵਸੇ ਨਿਕ੍ਖਨ੍ਤੇ ਰਤ੍ਤਿਯਾ ਪਟਿਹਿਤਾਯ ਇਤਿ ਪਟਿਸਞ੍ਚਿਕ੍ਖਤਿ, ਬਹੁਕਾ ਖੋ ਮੇ ਪਚ੍ਚਯਾ ਮਰਣਸ੍ਸ, ਅਹਿ ਵਾ ਮਂ ਡਂਸੇਯ੍ਯ, ਵਿਚ੍ਛਿਕੋ ਵਾ ਮਂ ਡਂਸੇਯ੍ਯ, ਸਤਪਦੀ ਵਾ ਮਂ ਡਂਸੇਯ੍ਯ, ਤੇਨ ਮੇ ਅਸ੍ਸ ਕਾਲਙ੍ਕਿਰਿਯਾ, ਸੋ ਮਮਸ੍ਸ ਅਨ੍ਤਰਾਯੋ, ਉਪਕ੍ਖਲਿਤ੍ਵਾ ਵਾ ਪਪਤੇਯ੍ਯਂ, ਭਤ੍ਤਂ ਵਾ ਮੇ ਭੁਤ੍ਤਂ ਬ੍ਯਾਪਜ੍ਜੇਯ੍ਯ, ਪਿਤ੍ਤਂ ਵਾ ਮੇ ਕੁਪ੍ਪੇਯ੍ਯ, ਸੇਮ੍ਹਂ ਵਾ ਮੇ ਕੁਪ੍ਪੇਯ੍ਯ, ਸਤ੍ਥਕਾ ਵਾ ਮੇ ਵਾਤਾ ਕੁਪ੍ਪੇਯ੍ਯੁਂ, ਤੇਨ ਮੇ ਅਸ੍ਸ ਕਾਲਙ੍ਕਿਰਿਯਾ, ਸੋ ਮਮਸ੍ਸ ਅਨ੍ਤਰਾਯੋ’’ਤਿ. ਏਵਂ (ਅ. ਨਿ. ੬.੨੦) ਕਾਯਬਹੁਸਾਧਾਰਣਤੋ ਮਰਣਂ ਅਨੁਸ੍ਸਰਿਤਬ੍ਬਂ.

੧੭੩. ਆਯੁਦੁਬ੍ਬਲਤੋਤਿ ਆਯੁ ਨਾਮੇਤਂ ਅਬਲਂ ਦੁਬ੍ਬਲਂ. ਤਥਾ ਹਿ ਸਤ੍ਤਾਨਂ ਜੀਵਿਤਂ ਅਸ੍ਸਾਸਪਸ੍ਸਾਸੂਪਨਿਬਦ੍ਧਞ੍ਚੇਵ ਇਰਿਯਾਪਥੂਪਨਿਬਦ੍ਧਞ੍ਚ ਸੀਤੁਣ੍ਹੂਪਨਿਬਦ੍ਧਞ੍ਚ ਮਹਾਭੂਤੂਪਨਿਬਦ੍ਧਞ੍ਚ ਆਹਾਰੂਪਨਿਬਦ੍ਧਞ੍ਚ. ਤਦੇਤਂ ਅਸ੍ਸਾਸਪਸ੍ਸਾਸਾਨਂ ਸਮਵੁਤ੍ਤਿਤਂ ਲਭਮਾਨਮੇਵ ਪਵਤ੍ਤਤਿ. ਬਹਿ ਨਿਕ੍ਖਨ੍ਤਨਾਸਿਕਵਾਤੇ ਪਨ ਅਨ੍ਤੋ ਅਪਵਿਸਨ੍ਤੇ, ਪਵਿਟ੍ਠੇ ਵਾ ਅਨਿਕ੍ਖਮਨ੍ਤੇ ਮਤੋ ਨਾਮ ਹੋਤਿ. ਚਤੁਨ੍ਨਂ ਇਰਿਯਾਪਥਾਨਮ੍ਪਿ ਸਮਵੁਤ੍ਤਿਤਂ ਲਭਮਾਨਮੇਵ ਪਵਤ੍ਤਤਿ. ਅਞ੍ਞਤਰਞ੍ਞਤਰਸ੍ਸ ਪਨ ਅਧਿਮਤ੍ਤਤਾਯ ਆਯੁਸਙ੍ਖਾਰਾ ਉਪਚ੍ਛਿਜ੍ਜਨ੍ਤਿ. ਸੀਤੁਣ੍ਹਾਨਮ੍ਪਿ ਸਮਵੁਤ੍ਤਿਤਂ ਲਭਮਾਨਮੇਵ ਪਵਤ੍ਤਤਿ. ਅਤਿਸੀਤੇਨ ਪਨ ਅਤਿਉਣ੍ਹੇਨ ਵਾ ਅਭਿਭੂਤਸ੍ਸ ਵਿਪਜ੍ਜਤਿ. ਮਹਾਭੂਤਾਨਮ੍ਪਿ ਸਮਵੁਤ੍ਤਿਤਂ ਲਭਮਾਨਮੇਵ ਪਵਤ੍ਤਤਿ. ਪਥਵੀਧਾਤੁਯਾ ਪਨ ਆਪੋਧਾਤੁਆਦੀਨਂ ਵਾ ਅਞ੍ਞਤਰਞ੍ਞਤਰਸ੍ਸ ਪਕੋਪੇਨ ਬਲਸਮ੍ਪਨ੍ਨੋਪਿ ਪੁਗ੍ਗਲੋ ਪਤ੍ਥਦ੍ਧਕਾਯੋ ਵਾ ਅਤਿਸਾਰਾਦਿਵਸੇਨ ਕਿਲਿਨ੍ਨਪੂਤਿਕਾਯੋ ਵਾ ਮਹਾਡਾਹਪਰੇਤੋ ਵਾ ਸਮ੍ਭਿਜ੍ਜਮਾਨਸਨ੍ਧਿਬਨ੍ਧਨੋ ਵਾ ਹੁਤ੍ਵਾ ਜੀਵਿਤਕ੍ਖਯਂ ਪਾਪੁਣਾਤਿ. ਕਬਲ਼ੀਕਾਰਾਹਾਰਮ੍ਪਿ ਯੁਤ੍ਤਕਾਲੇ ਲਭਨ੍ਤਸ੍ਸੇਵ ਜੀਵਿਤਂ ਪਵਤ੍ਤਤਿ, ਆਹਾਰਂ ਅਲਭਮਾਨਸ੍ਸ ਪਨ ਪਰਿਕ੍ਖਯਂ ਗਚ੍ਛਤੀਤਿ. ਏਵਂ ਆਯੁਦੁਬ੍ਬਲਤੋ ਮਰਣਂ ਅਨੁਸ੍ਸਰਿਤਬ੍ਬਂ.

੧੭੪. ਅਨਿਮਿਤ੍ਤਤੋਤਿ ਅਵਵਤ੍ਥਾਨਤੋ, ਪਰਿਚ੍ਛੇਦਾਭਾਵਤੋਤਿ ਅਤ੍ਥੋ. ਸਤ੍ਤਾਨਂ ਹਿ –

ਜੀਵਿਤਂ ਬ੍ਯਾਧਿ ਕਾਲੋ ਚ, ਦੇਹਨਿਕ੍ਖੇਪਨਂ ਗਤਿ;

ਪਞ੍ਚੇਤੇ ਜੀਵਲੋਕਸ੍ਮਿਂ, ਅਨਿਮਿਤ੍ਤਾ ਨ ਨਾਯਰੇ.

ਤਤ੍ਥ ਜੀਵਿਤਂ ਤਾਵ ‘‘ਏਤ੍ਤਕਮੇਵ ਜੀਵਿਤਬ੍ਬਂ, ਨ ਇਤੋ ਪਰ’’ਨ੍ਤਿ ਵਵਤ੍ਥਾਨਾਭਾਵਤੋ ਅਨਿਮਿਤ੍ਤਂ. ਕਲਲਕਾਲੇਪਿ ਹਿ ਸਤ੍ਤਾ ਮਰਨ੍ਤਿ, ਅਬ੍ਬੁਦਪੇਸਿਘਨਮਾਸਿਕਦ੍ਵੇਮਾਸਤੇਮਾਸਚਤੁਮਾਸਪਞ੍ਚਮਾਸਦਸਮਾਸਕਾਲੇਪਿ. ਕੁਚ੍ਛਿਤੋ ਨਿਕ੍ਖਨ੍ਤਸਮਯੇਪਿ. ਤਤੋ ਪਰਂ ਵਸ੍ਸਸਤਸ੍ਸ ਅਨ੍ਤੋਪਿ ਬਹਿਪਿ ਮਰਨ੍ਤਿਯੇਵ. ਬ੍ਯਾਧਿਪਿ ‘‘ਇਮਿਨਾਵ ਬ੍ਯਾਧਿਨਾ ਸਤ੍ਤਾ ਮਰਨ੍ਤਿ, ਨਾਞ੍ਞੇਨਾ’’ਤਿ ਵਵਤ੍ਥਾਨਾਭਾਵਤੋ ਅਨਿਮਿਤ੍ਤੋ. ਚਕ੍ਖੁਰੋਗੇਨਾਪਿ ਹਿ ਸਤ੍ਤਾ ਮਰਨ੍ਤਿ, ਸੋਤਰੋਗਾਦੀਨਂ ਅਞ੍ਞਤਰੇਨਾਪਿ. ਕਾਲੋਪਿ ‘‘ਇਮਸ੍ਮਿਂਯੇਵ ਕਾਲੇ ਮਰਿਤਬ੍ਬਂ, ਨਾਞ੍ਞਸ੍ਮਿ’’ਨ੍ਤਿ ਏਵਂ ਵਵਤ੍ਥਾਨਾਭਾਵਤੋ ਅਨਿਮਿਤ੍ਤੋ. ਪੁਬ੍ਬਣ੍ਹੇਪਿ ਹਿ ਸਤ੍ਤਾ ਮਰਨ੍ਤਿ, ਮਜ੍ਝਨ੍ਹਿਕਾਦੀਨਂ ਅਞ੍ਞਤਰਸ੍ਮਿਮ੍ਪਿ. ਦੇਹਨਿਕ੍ਖੇਪਨਮ੍ਪਿ ‘‘ਇਧੇਵ ਮੀਯਮਾਨਾਨਂ ਦੇਹੇਨ ਪਤਿਤਬ੍ਬਂ, ਨਾਞ੍ਞਤ੍ਰਾ’’ਤਿ ਏਵਂ ਵਵਤ੍ਥਾਨਾਭਾਵਤੋ ਅਨਿਮਿਤ੍ਤਂ. ਅਨ੍ਤੋਗਾਮੇ ਜਾਤਾਨਂ ਹਿ ਬਹਿਗਾਮੇਪਿ ਅਤ੍ਤਭਾਵੋ ਪਤਤਿ. ਬਹਿਗਾਮੇ ਜਾਤਾਨਮ੍ਪਿ ਅਨ੍ਤੋਗਾਮੇ. ਤਥਾ ਥਲਜਾਨਂ ਵਾ ਜਲੇ, ਜਲਜਾਨਂ ਵਾ ਥਲੇਤਿ ਅਨੇਕਪ੍ਪਕਾਰਤੋ ਵਿਤ੍ਥਾਰੇਤਬ੍ਬਂ. ਗਤਿਪਿ ‘‘ਇਤੋ ਚੁਤੇਨ ਇਧ ਨਿਬ੍ਬਤ੍ਤਿਤਬ੍ਬ’’ਨ੍ਤਿ ਏਵਂ ਵਵਤ੍ਥਾਨਾਭਾਵਤੋ ਅਨਿਮਿਤ੍ਤਾ. ਦੇਵਲੋਕਤੋ ਹਿ ਚੁਤਾ ਮਨੁਸ੍ਸੇਸੁਪਿ ਨਿਬ੍ਬਤ੍ਤਨ੍ਤਿ, ਮਨੁਸ੍ਸਲੋਕਤੋ ਚੁਤਾ ਦੇਵਲੋਕਾਦੀਨਮ੍ਪਿ ਯਤ੍ਥ ਕਤ੍ਥਚਿ ਨਿਬ੍ਬਤ੍ਤਨ੍ਤੀਤਿ ਏਵਂ ਯਨ੍ਤਯੁਤ੍ਤਗੋਣੋ ਵਿਯ ਗਤਿਪਞ੍ਚਕੇ ਲੋਕੋ ਸਮ੍ਪਰਿਵਤ੍ਤਤੀਤਿ ਏਵਂ ਅਨਿਮਿਤ੍ਤਤੋ ਮਰਣਂ ਅਨੁਸ੍ਸਰਿਤਬ੍ਬਂ.

੧੭੫. ਅਦ੍ਧਾਨਪਰਿਚ੍ਛੇਦਤੋਤਿ ਮਨੁਸ੍ਸਾਨਂ ਜੀਵਿਤਸ੍ਸ ਨਾਮ ਏਤਰਹਿ ਪਰਿਤ੍ਤੋ ਅਦ੍ਧਾ. ਯੋ ਚਿਰਂ ਜੀਵਤਿ, ਸੋ ਵਸ੍ਸਸਤਂ, ਅਪ੍ਪਂ ਵਾ ਭਿਯ੍ਯੋ. ਤੇਨਾਹ ਭਗਵਾ – ‘‘ਅਪ੍ਪਮਿਦਂ, ਭਿਕ੍ਖਵੇ, ਮਨੁਸ੍ਸਾਨਂ ਆਯੁ, ਗਮਨੀਯੋ ਸਮ੍ਪਰਾਯੋ, ਕਤ੍ਤਬ੍ਬਂ ਕੁਸਲਂ, ਚਰਿਤਬ੍ਬਂ ਬ੍ਰਹ੍ਮਚਰਿਯਂ, ਨਤ੍ਥਿ ਜਾਤਸ੍ਸ ਅਮਰਣਂ. ਯੋ, ਭਿਕ੍ਖਵੇ, ਚਿਰਂ ਜੀਵਤਿ, ਸੋ ਵਸ੍ਸਸਤਂ, ਅਪ੍ਪਂ ਵਾ ਭਿਯ੍ਯੋਤਿ.

ਅਪ੍ਪਮਾਯੁਮਨੁਸ੍ਸਾਨਂ, ਹੀਲ਼ੇਯ੍ਯ ਨਂ ਸੁਪੋਰਿਸੋ;

ਚਰੇਯ੍ਯਾਦਿਤ੍ਤਸੀਸੋਵ, ਨਤ੍ਥਿ ਮਚ੍ਚੁਸ੍ਸ ਨਾਗਮੋਤਿ. (ਸਂ. ਨਿ. ੧.੧੪੫);

ਅਪਰਮ੍ਪਿ ਆਹ – ‘‘ਭੂਤਪੁਬ੍ਬਂ, ਭਿਕ੍ਖਵੇ, ਅਰਕੋ ਨਾਮ ਸਤ੍ਥਾ ਅਹੋਸੀ’’ਤਿ ਸਬ੍ਬਮ੍ਪਿ ਸਤ੍ਤਹਿ ਉਪਮਾਹਿ ਅਲਙ੍ਕਤਂ ਸੁਤ੍ਤਂ ਵਿਤ੍ਥਾਰੇਤਬ੍ਬਂ.

ਅਪਰਮ੍ਪਿ ਆਹ – ‘‘ਯੋਚਾਯਂ, ਭਿਕ੍ਖਵੇ, ਭਿਕ੍ਖੁ ਏਵਂ ਮਰਣਸ੍ਸਤਿਂ ਭਾਵੇਤਿ, ਅਹੋ ਵਤਾਹਂ ਰਤ੍ਤਿਨ੍ਦਿਵਂ ਜੀਵੇਯ੍ਯਂ, ਭਗਵਤੋ ਸਾਸਨਂ ਮਨਸਿਕਰੇਯ੍ਯਂ, ਬਹੁਂ ਵਤ ਮੇ ਕਤਂ ਅਸ੍ਸਾਤਿ. ਯੋਚਾਯਂ, ਭਿਕ੍ਖਵੇ, ਭਿਕ੍ਖੁ ਏਵਂ ਮਰਣਸ੍ਸਤਿਂ ਭਾਵੇਤਿ, ਅਹੋ ਵਤਾਹਂ ਦਿਵਸਂ ਜੀਵੇਯ੍ਯਂ, ਭਗਵਤੋ ਸਾਸਨਂ ਮਨਸਿਕਰੇਯ੍ਯਂ, ਬਹੁਂ ਵਤ ਮੇ ਕਤਂ ਅਸ੍ਸਾਤਿ. ਯੋ ਚਾਯਂ, ਭਿਕ੍ਖਵੇ, ਭਿਕ੍ਖੁ ਏਵਂ ਮਰਣਸ੍ਸਤਿਂ ਭਾਵੇਤਿ, ਅਹੋ ਵਤਾਹਂ ਤਦਨ੍ਤਰਂ ਜੀਵੇਯ੍ਯਂ, ਯਦਨ੍ਤਰਂ ਏਕਂ ਪਿਣ੍ਡਪਾਤਂ ਭੁਞ੍ਜਾਮਿ, ਭਗਵਤੋ ਸਾਸਨਂ ਮਨਸਿਕਰੇਯ੍ਯਂ, ਬਹੁਂ ਵਤ ਮੇ ਕਤਂ ਅਸ੍ਸਾਤਿ. ਯੋ ਚਾਯਂ, ਭਿਕ੍ਖਵੇ, ਭਿਕ੍ਖੁ ਏਵਂ ਮਰਣਸ੍ਸਤਿਂ ਭਾਵੇਤਿ, ਅਹੋ ਵਤਾਹਂ ਤਦਨ੍ਤਰਂ ਜੀਵੇਯ੍ਯਂ, ਯਦਨ੍ਤਰਂ ਚਤ੍ਤਾਰੋ ਪਞ੍ਚ ਆਲੋਪੇ ਸਙ੍ਖਾਦਿਤ੍ਵਾ ਅਜ੍ਝੋਹਰਾਮਿ, ਭਗਵਤੋ ਸਾਸਨਂ ਮਨਸਿਕਰੇਯ੍ਯਂ, ਬਹੁਂ ਵਤ ਮੇ ਕਤਂ ਅਸ੍ਸਾਤਿ. ਇਮੇ ਵੁਚ੍ਚਨ੍ਤਿ, ਭਿਕ੍ਖਵੇ, ਭਿਕ੍ਖੂ ਪਮਤ੍ਤਾ ਵਿਹਰਨ੍ਤਿ, ਦਨ੍ਧਂ ਮਰਣਸ੍ਸਤਿਂ ਭਾਵੇਨ੍ਤਿ ਆਸਵਾਨਂ ਖਯਾਯ. ਯੋ ਚ ਖ੍ਵਾਯਂ, ਭਿਕ੍ਖਵੇ, ਭਿਕ੍ਖੁ ਏਵਂ ਮਰਣਸ੍ਸਤਿਂ ਭਾਵੇਤਿ, ਅਹੋ ਵਤਾਹਂ ਤਦਨ੍ਤਰਂ ਜੀਵੇਯ੍ਯਂ, ਯਦਨ੍ਤਰਂ ਏਕਂ ਆਲੋਪਂ ਸਙ੍ਖਾਦਿਤ੍ਵਾ ਅਜ੍ਝੋਹਰਾਮਿ, ਭਗਵਤੋ ਸਾਸਨਂ ਮਨਸਿਕਰੇਯ੍ਯਂ, ਬਹੁਂ ਵਤ ਮੇ ਕਤਂ ਅਸ੍ਸਾਤਿ. ਯੋ ਚਾਯਂ, ਭਿਕ੍ਖਵੇ, ਭਿਕ੍ਖੁ ਏਵਂ ਮਰਣਸ੍ਸਤਿਂ ਭਾਵੇਤਿ, ਅਹੋ ਵਤਾਹਂ ਤਦਨ੍ਤਰਂ ਜੀਵੇਯ੍ਯਂ, ਯਦਨ੍ਤਰਂ ਅਸ੍ਸਸਿਤ੍ਵਾ ਵਾ ਪਸ੍ਸਸਾਮਿ, ਪਸ੍ਸਸਿਤ੍ਵਾ ਵਾ ਅਸ੍ਸਸਾਮਿ, ਭਗਵਤੋ ਸਾਸਨਂ ਮਨਸਿਕਰੇਯ੍ਯਂ, ਬਹੁਂ ਵਤ ਮੇ ਕਤਂ ਅਸ੍ਸਾਤਿ. ਇਮੇ ਵੁਚ੍ਚਨ੍ਤਿ, ਭਿਕ੍ਖਵੇ, ਭਿਕ੍ਖੂ ਅਪ੍ਪਮਤ੍ਤਾ ਵਿਹਰਨ੍ਤਿ, ਤਿਕ੍ਖਂ ਮਰਣਸ੍ਸਤਿਂ ਭਾਵੇਨ੍ਤਿ ਆਸਵਾਨਂ ਖਯਾਯਾ’’ਤਿ (ਅ. ਨਿ. ੬.੧੯). ਏਵਂ ਚਤੁਪਞ੍ਚਾਲੋਪਸਙ੍ਖਾਦਨਮਤ੍ਤਂ ਅਵਿਸ੍ਸਾਸਿਯੋ ਪਰਿਤ੍ਤੋ ਜੀਵਿਤਸ੍ਸ ਅਦ੍ਧਾਤਿ ਏਵਂ ਅਦ੍ਧਾਨਪਰਿਚ੍ਛੇਦਤੋ ਮਰਣਂ ਅਨੁਸ੍ਸਰਿਤਬ੍ਬਂ.

੧੭੬. ਖਣਪਰਿਤ੍ਤਤੋਤਿ ਪਰਮਤ੍ਥਤੋ ਹਿ ਅਤਿਪਰਿਤ੍ਤੋ ਸਤ੍ਤਾਨਂ ਜੀਵਿਤਕ੍ਖਣੋ ਏਕਚਿਤ੍ਤਪ੍ਪਵਤ੍ਤਿਮਤ੍ਤੋਯੇਵ. ਯਥਾ ਨਾਮ ਰਥਚਕ੍ਕਂ ਪਵਤ੍ਤਮਾਨਮ੍ਪਿ ਏਕੇਨੇਵ ਨੇਮਿਪ੍ਪਦੇਸੇਨ ਪਵਤ੍ਤਤਿ, ਤਿਟ੍ਠਮਾਨਮ੍ਪਿ ਏਕੇਨੇਵ ਤਿਟ੍ਠਤਿ, ਏਵਮੇਵ ਏਕਚਿਤ੍ਤਕ੍ਖਣਿਕਂ ਸਤ੍ਤਾਨਂ ਜੀਵਿਤਂ. ਤਸ੍ਮਿਂ ਚਿਤ੍ਤੇ ਨਿਰੁਦ੍ਧਮਤ੍ਤੇ ਸਤ੍ਤੋ ਨਿਰੁਦ੍ਧੋਤਿ ਵੁਚ੍ਚਤਿ. ਯਥਾਹ – ‘‘ਅਤੀਤੇ ਚਿਤ੍ਤਕ੍ਖਣੇ ਜੀਵਿਤ੍ਥ, ਨ ਜੀਵਤਿ, ਨ ਜੀਵਿਸ੍ਸਤਿ. ਅਨਾਗਤੇ ਚਿਤ੍ਤਕ੍ਖਣੇ ਨ ਜੀਵਿਤ੍ਥ, ਨ ਜੀਵਤਿ, ਜੀਵਿਸ੍ਸਤਿ. ਪਚ੍ਚੁਪ੍ਪਨ੍ਨੇ ਚਿਤ੍ਤਕ੍ਖਣੇ ਨ ਜੀਵਿਤ੍ਥ, ਜੀਵਤਿ, ਨ ਜੀਵਿਸ੍ਸਤਿ.

‘‘ਜੀਵਿਤਂ ਅਤ੍ਤਭਾਵੋ ਚ, ਸੁਖਦੁਕ੍ਖਾ ਚ ਕੇਵਲਾ;

ਏਕਚਿਤ੍ਤਸਮਾਯੁਤ੍ਤਾ, ਲਹੁ ਸੋ ਵਤ੍ਤਤੇ ਖਣੋ.

‘‘ਯੇ ਨਿਰੁਦ੍ਧਾ ਮਰਨ੍ਤਸ੍ਸ, ਤਿਟ੍ਠਮਾਨਸ੍ਸ ਵਾ ਇਧ;

ਸਬ੍ਬੇਪਿ ਸਦਿਸਾ ਖਨ੍ਧਾ, ਗਤਾ ਅਪ੍ਪਟਿਸਨ੍ਧਿਕਾ.

‘‘ਅਨਿਬ੍ਬਤ੍ਤੇਨ ਨ ਜਾਤੋ, ਪਚ੍ਚੁਪ੍ਪਨ੍ਨੇਨ ਜੀਵਤਿ;

ਚਿਤ੍ਤਭਙ੍ਗਾ ਮਤੋ ਲੋਕੋ, ਪਞ੍ਞਤ੍ਤਿ ਪਰਮਤ੍ਥਿਯਾ’’ਤਿ. (ਮਹਾਨਿ. ੩੯);

ਏਵਂ ਖਣਪਰਿਤ੍ਤਤੋ ਮਰਣਂ ਅਨੁਸ੍ਸਰਿਤਬ੍ਬਂ.

੧੭੭. ਇਤਿ ਇਮੇਸਂ ਅਟ੍ਠਨ੍ਨਂ ਆਕਾਰਾਨਂ ਅਞ੍ਞਤਰਞ੍ਞਤਰੇਨ ਅਨੁਸ੍ਸਰਤੋਪਿ ਪੁਨਪ੍ਪੁਨਂ ਮਨਸਿਕਾਰਵਸੇਨ ਚਿਤ੍ਤਂ ਆਸੇਵਨਂ ਲਭਤਿ, ਮਰਣਾਰਮ੍ਮਣਾ ਸਤਿ ਸਨ੍ਤਿਟ੍ਠਤਿ, ਨੀਵਰਣਾਨਿ ਵਿਕ੍ਖਮ੍ਭਨ੍ਤਿ, ਝਾਨਙ੍ਗਾਨਿ ਪਾਤੁਭਵਨ੍ਤਿ. ਸਭਾਵਧਮ੍ਮਤ੍ਤਾ ਪਨ ਸਂਵੇਜਨੀਯਤ੍ਤਾ ਚ ਆਰਮ੍ਮਣਸ੍ਸ ਅਪ੍ਪਨਂ ਅਪ੍ਪਤ੍ਵਾ ਉਪਚਾਰਪ੍ਪਤ੍ਤਮੇਵ ਝਾਨਂ ਹੋਤਿ. ਲੋਕੁਤ੍ਤਰਜ੍ਝਾਨਂ ਪਨ ਦੁਤਿਯਚਤੁਤ੍ਥਾਨਿ ਚ ਆਰੁਪ੍ਪਜ੍ਝਾਨਾਨਿ ਸਭਾਵਧਮ੍ਮੇਪਿ ਭਾਵਨਾਵਿਸੇਸੇਨ ਅਪ੍ਪਨਂ ਪਾਪੁਣਨ੍ਤਿ. ਵਿਸੁਦ੍ਧਿਭਾਵਨਾਨੁਕ੍ਕਮਵਸੇਨ ਹਿ ਲੋਕੁਤ੍ਤਰਂ ਅਪ੍ਪਨਂ ਪਾਪੁਣਾਤਿ. ਆਰਮ੍ਮਣਾਤਿਕ੍ਕਮਭਾਵਨਾਵਸੇਨ ਆਰੁਪ੍ਪਂ. ਅਪ੍ਪਨਾਪਤ੍ਤਸ੍ਸੇਵ ਹਿ ਝਾਨਸ੍ਸ ਆਰਮ੍ਮਣਸਮਤਿਕ੍ਕਮਨਮਤ੍ਤਂ ਤਤ੍ਥ ਹੋਤਿ. ਇਧ ਪਨ ਤਦੁਭਯਮ੍ਪਿ ਨਤ੍ਥਿ. ਤਸ੍ਮਾ ਉਪਚਾਰਪ੍ਪਤ੍ਤਮੇਵ ਝਾਨਂ ਹੋਤਿ. ਤਦੇਤਂ ਮਰਣਸ੍ਸਤਿਬਲੇਨ ਉਪ੍ਪਨ੍ਨਤ੍ਤਾ ਮਰਣਸ੍ਸਤਿਚ੍ਚੇਵ ਸਙ੍ਖਂ ਗਚ੍ਛਤਿ.

ਇਮਞ੍ਚ ਪਨ ਮਰਣਸ੍ਸਤਿਂ ਅਨੁਯੁਤ੍ਤੋ ਭਿਕ੍ਖੁ ਸਤਤਂ ਅਪ੍ਪਮਤ੍ਤੋ ਹੋਤਿ, ਸਬ੍ਬਭਵੇਸੁ ਅਨਭਿਰਤਿਸਞ੍ਞਂ ਪਟਿਲਭਤਿ, ਜੀਵਿਤਨਿਕਨ੍ਤਿਂ ਜਹਾਤਿ, ਪਾਪਗਰਹੀ ਹੋਤਿ, ਅਸਨ੍ਨਿਧਿਬਹੁਲੋ ਪਰਿਕ੍ਖਾਰੇਸੁ ਵਿਗਤਮਲਮਚ੍ਛੇਰੋ, ਅਨਿਚ੍ਚਸਞ੍ਞਾ ਚਸ੍ਸ ਪਰਿਚਯਂ ਗਚ੍ਛਤਿ, ਤਦਨੁਸਾਰੇਨੇਵ ਦੁਕ੍ਖਸਞ੍ਞਾ ਅਨਤ੍ਤਸਞ੍ਞਾ ਚ ਉਪਟ੍ਠਾਤਿ. ਯਥਾ ਅਭਾਵਿਤਮਰਣਾ ਸਤ੍ਤਾ ਸਹਸਾ ਵਾਲ਼ਮਿਗਯਕ੍ਖਸਪ੍ਪਚੋਰਵਧਕਾਭਿਭੂਤਾ ਵਿਯ ਮਰਣਸਮਯੇ ਭਯਂ ਸਨ੍ਤਾਸਂ ਸਮ੍ਮੋਹਂ ਆਪਜ੍ਜਨ੍ਤਿ, ਏਵਂ ਅਨਾਪਜ੍ਜਿਤ੍ਵਾ ਅਭਯੋ ਅਸਮ੍ਮੂਲ਼੍ਹੋ ਕਾਲਂ ਕਰੋਤਿ. ਸਚੇ ਦਿਟ੍ਠੇਵ ਧਮ੍ਮੇ ਅਮਤਂ ਨਾਰਾਧੇਤਿ, ਕਾਯਸ੍ਸ ਭੇਦਾ ਸੁਗਤਿਪਰਾਯਨੋ ਹੋਤਿ.

ਤਸ੍ਮਾ ਹਵੇ ਅਪ੍ਪਮਾਦਂ, ਕਯਿਰਾਥ ਸੁਮੇਧਸੋ;

ਏਵਂ ਮਹਾਨੁਭਾਵਾਯ, ਮਰਣਸ੍ਸਤਿਯਾ ਸਦਾਤਿ.

ਇਦਂ ਮਰਣਸ੍ਸਤਿਯਂ ਵਿਤ੍ਥਾਰਕਥਾਮੁਖਂ.

ਕਾਯਗਤਾਸਤਿਕਥਾ

੧੭੮. ਇਦਾਨਿ ਯਂ ਤਂ ਅਞ੍ਞਤ੍ਰ ਬੁਦ੍ਧੁਪ੍ਪਾਦਾ ਅਪ੍ਪਵਤ੍ਤਪੁਬ੍ਬਂ ਸਬ੍ਬਤਿਤ੍ਥਿਯਾਨਂ ਅਵਿਸਯਭੂਤਂ ਤੇਸੁ ਤੇਸੁ ਸੁਤ੍ਤਨ੍ਤੇਸੁ ‘‘ਏਕਧਮ੍ਮੋ, ਭਿਕ੍ਖਵੇ, ਭਾਵਿਤੋ ਬਹੁਲੀਕਤੋ ਮਹਤੋ ਸਂਵੇਗਾਯ ਸਂਵਤ੍ਤਤਿ. ਮਹਤੋ ਅਤ੍ਥਾਯ ਸਂਵਤ੍ਤਤਿ. ਮਹਤੋ ਯੋਗਕ੍ਖੇਮਾਯ ਸਂਵਤ੍ਤਤਿ. ਮਹਤੋ ਸਤਿਸਮ੍ਪਜਞ੍ਞਾਯ ਸਂਵਤ੍ਤਤਿ. ਞਾਣਦਸ੍ਸਨਪਟਿਲਾਭਾਯ ਸਂਵਤ੍ਤਤਿ. ਦਿਟ੍ਠਧਮ੍ਮਸੁਖਵਿਹਾਰਾਯ ਸਂਵਤ੍ਤਤਿ. ਵਿਜ੍ਜਾਵਿਮੁਤ੍ਤਿਫਲਸਚ੍ਛਿਕਿਰਿਯਾਯ ਸਂਵਤ੍ਤਤਿ. ਕਤਮੋ ਏਕਧਮ੍ਮੋ? ਕਾਯਗਤਾ ਸਤਿ… (ਅ. ਨਿ. ੧.੫੬੩ ਆਦਯੋ). ਅਮਤਂ ਤੇ, ਭਿਕ੍ਖਵੇ, ਪਰਿਭੁਞ੍ਜਨ੍ਤਿ, ਯੇ ਕਾਯਗਤਾਸਤਿਂ ਪਰਿਭੁਞ੍ਜਨ੍ਤਿ. ਅਮਤਂ ਤੇ, ਭਿਕ੍ਖਵੇ, ਨ ਪਰਿਭੁਞ੍ਜਨ੍ਤਿ, ਯੇ ਕਾਯਗਤਾਸਤਿਂ ਨ ਪਰਿਭੁਞ੍ਜਨ੍ਤਿ. ਅਮਤਂ ਤੇਸਂ, ਭਿਕ੍ਖਵੇ, ਪਰਿਭੁਤ੍ਤਂ… ਅਪਰਿਭੁਤ੍ਤਂ… ਪਰਿਹੀਨਂ… ਅਪਰਿਹੀਨਂ… ਵਿਰਦ੍ਧਂ… ਅਵਿਰਦ੍ਧਂ, ਯੇਸਂ ਕਾਯਗਤਾਸਤਿ ਆਰਦ੍ਧਾਤਿ (ਅ. ਨਿ. ੧.੬੦੩) ਏਵਂ ਭਗਵਤਾ ਅਨੇਕੇਹਿ ਆਕਾਰੇਹਿ ਪਸਂਸਿਤ੍ਵਾ ‘‘ਕਥਂ ਭਾਵਿਤਾ, ਭਿਕ੍ਖਵੇ, ਕਾਯਗਤਾਸਤਿ ਕਥਂ ਬਹੁਲੀਕਤਾ ਮਹਪ੍ਫਲਾ ਹੋਤਿ ਮਹਾਨਿਸਂਸਾ? ਇਧ, ਭਿਕ੍ਖਵੇ, ਭਿਕ੍ਖੁ ਅਰਞ੍ਞਗਤੋ ਵਾ’’ਤਿਆਦਿਨਾ (ਮ. ਨਿ. ੩.੧੫੪) ਨਯੇਨ ਆਨਾਪਾਨਪਬ੍ਬਂ, ਇਰਿਯਾਪਥਪਬ੍ਬਂ, ਚਤੁਸਮ੍ਪਜਞ੍ਞਪਬ੍ਬਂ, ਪਟਿਕ੍ਕੂਲਮਨਸਿਕਾਰਪਬ੍ਬਂ, ਧਾਤੁਮਨਸਿਕਾਰਪਬ੍ਬਂ, ਨਵਸਿਵਥਿਕਪਬ੍ਬਾਨੀਤਿ ਇਮੇਸਂ ਚੁਦ੍ਦਸਨ੍ਨਂ ਪਬ੍ਬਾਨਂ ਵਸੇਨ ਕਾਯਗਤਾਸਤਿਕਮ੍ਮਟ੍ਠਾਨਂ ਨਿਦ੍ਦਿਟ੍ਠਂ, ਤਸ੍ਸ ਭਾਵਨਾਨਿਦ੍ਦੇਸੋ ਅਨੁਪ੍ਪਤ੍ਤੋ.

ਤਤ੍ਥ ਯਸ੍ਮਾ ਇਰਿਯਾਪਥਪਬ੍ਬਂ ਚਤੁਸਮ੍ਪਜਞ੍ਞਪਬ੍ਬਂ ਧਾਤੁਮਨਸਿਕਾਰਪਬ੍ਬਨ੍ਤਿ ਇਮਾਨਿ ਤੀਣਿ ਵਿਪਸ੍ਸਨਾਵਸੇਨ ਵੁਤ੍ਤਾਨਿ. ਨਵ ਸਿਵਥਿਕਪਬ੍ਬਾਨਿ ਵਿਪਸ੍ਸਨਾਞਾਣੇਸੁਯੇਵ ਆਦੀਨਵਾਨੁਪਸ੍ਸਨਾਵਸੇਨ ਵੁਤ੍ਤਾਨਿ. ਯਾਪਿ ਚੇਤ੍ਥ ਉਦ੍ਧੁਮਾਤਕਾਦੀਸੁ ਸਮਾਧਿਭਾਵਨਾ ਇਜ੍ਝੇਯ੍ਯ, ਸਾ ਅਸੁਭਨਿਦ੍ਦੇਸੇ ਪਕਾਸਿਤਾਯੇਵ. ਆਨਾਪਾਨਪਬ੍ਬਂ ਪਨ ਪਟਿਕ੍ਕੂਲਮਨਸਿਕਾਰਪਬ੍ਬਞ੍ਚ ਇਮਾਨੇਵੇਤ੍ਥ ਦ੍ਵੇ ਸਮਾਧਿਵਸੇਨ ਵੁਤ੍ਤਾਨਿ. ਤੇਸੁ ਆਨਾਪਾਨਪਬ੍ਬਂ ਆਨਾਪਾਨਸ੍ਸਤਿਵਸੇਨ ਵਿਸੁਂ ਕਮ੍ਮਟ੍ਠਾਨਂਯੇਵ. ਯਂ ਪਨੇਤਂ ‘‘ਪੁਨ ਚਪਰਂ, ਭਿਕ੍ਖਵੇ, ਭਿਕ੍ਖੁ ਇਮਮੇਵ ਕਾਯਂ ਉਦ੍ਧਂ ਪਾਦਤਲਾ ਅਧੋ ਕੇਸਮਤ੍ਥਕਾ ਤਚਪਰਿਯਨ੍ਤਂ ਪੂਰਂ ਨਾਨਪ੍ਪਕਾਰਸ੍ਸ ਅਸੁਚਿਨੋ ਪਚ੍ਚਵੇਕ੍ਖਤਿ. ਅਤ੍ਥਿ ਇਮਸ੍ਮਿਂ ਕਾਯੇ ਕੇਸਾ ਲੋਮਾ…ਪੇ… ਮੁਤ੍ਤ’’ਨ੍ਤਿ (ਮ. ਨਿ. ੩.੧੫੪) ਏਵਂ ਮਤ੍ਥਲੁਙ੍ਗਂ ਅਟ੍ਠਿਮਿਞ੍ਜੇਨ ਸਙ੍ਗਹੇਤ੍ਵਾ ਪਟਿਕ੍ਕੂਲਮਨਸਿਕਾਰਵਸੇਨ ਦੇਸਿਤਂ ਦ੍ਵਤ੍ਤਿਂਸਾਕਾਰਕਮ੍ਮਟ੍ਠਾਨਂ, ਇਦਮਿਧ ਕਾਯਗਤਾਸਤੀਤਿ ਅਧਿਪ੍ਪੇਤਂ.

੧੭੯. ਤਤ੍ਥਾਯਂ ਪਾਲ਼ਿਵਣ੍ਣਨਾਪੁਬ੍ਬਙ੍ਗਮੋ ਭਾਵਨਾਨਿਦ੍ਦੇਸੋ. ਇਮਮੇਵ ਕਾਯਨ੍ਤਿ ਇਮਂ ਚਤੁਮਹਾਭੂਤਿਕਂ ਪੂਤਿਕਾਯਂ. ਉਦ੍ਧਂ ਪਾਦਤਲਾਤਿ ਪਾਦਤਲਤੋ ਉਪਰਿ. ਅਧੋ ਕੇਸਮਤ੍ਥਕਾਤਿ ਕੇਸਗ੍ਗਤੋ ਹੇਟ੍ਠਾ. ਤਚਪਰਿਯਨ੍ਤਨ੍ਤਿ ਤਿਰਿਯਂ ਤਚਪਰਿਚ੍ਛਿਨ੍ਨਂ. ਪੂਰਂ ਨਾਨਪ੍ਪਕਾਰਸ੍ਸ ਅਸੁਚਿਨੋ ਪਚ੍ਚਵੇਕ੍ਖਤੀਤਿ ਨਾਨਪ੍ਪਕਾਰਕੇਸਾਦਿਅਸੁਚਿਭਰਿਤੋ ਅਯਂ ਕਾਯੋਤਿ ਪਸ੍ਸਤਿ. ਕਥਂ? ਅਤ੍ਥਿ ਇਮਸ੍ਮਿਂ ਕਾਯੇ ਕੇਸਾ…ਪੇ… ਮੁਤ੍ਤਨ੍ਤਿ.

ਤਤ੍ਥ ਅਤ੍ਥੀਤਿ ਸਂਵਿਜ੍ਜਨ੍ਤਿ. ਇਮਸ੍ਮਿਨ੍ਤਿ ਯ੍ਵਾਯਂ ਉਦ੍ਧਂ ਪਾਦਤਲਾ ਅਧੋ ਕੇਸਮਤ੍ਥਕਾ ਤਚਪਰਿਯਨ੍ਤੋ ਪੂਰੋ ਨਾਨਪ੍ਪਕਾਰਸ੍ਸ ਅਸੁਚਿਨੋਤਿ ਵੁਚ੍ਚਤਿ, ਤਸ੍ਮਿਂ. ਕਾਯੇਤਿ ਸਰੀਰੇ. ਸਰੀਰਂ ਹਿ ਅਸੁਚਿਸਞ੍ਚਯਤੋ ਕੁਚ੍ਛਿਤਾਨਂ ਕੇਸਾਦੀਨਞ੍ਚੇਵ ਚਕ੍ਖੁਰੋਗਾਦੀਨਞ੍ਚ ਰੋਗਸਤਾਨਂ ਆਯਭੂਤਤੋ ਕਾਯੋਤਿ ਵੁਚ੍ਚਤਿ. ਕੇਸਾ ਲੋਮਾਤਿ ਏਤੇ ਕੇਸਾਦਯੋ ਦ੍ਵਤ੍ਤਿਂਸਾਕਾਰਾ. ਤਤ੍ਥ ਅਤ੍ਥਿ ਇਮਸ੍ਮਿਂ ਕਾਯੇ ਕੇਸਾ, ਅਤ੍ਥਿ ਇਮਸ੍ਮਿਂ ਕਾਯੇ ਲੋਮਾਤਿ ਏਵਂ ਸਮ੍ਬਨ੍ਧੋ ਵੇਦਿਤਬ੍ਬੋ.

ਇਮਸ੍ਮਿਂ ਹਿ ਪਾਦਤਲਾ ਪਟ੍ਠਾਯ ਉਪਰਿ, ਕੇਸਮਤ੍ਥਕਾ ਪਟ੍ਠਾਯ ਹੇਟ੍ਠਾ, ਤਚਤੋ ਪਟ੍ਠਾਯ ਪਰਿਤੋਤਿ ਏਤ੍ਤਕੇ ਬ੍ਯਾਮਮਤ੍ਤੇ ਕਲ਼ੇਵਰੇ ਸਬ੍ਬਾਕਾਰੇਨਪਿ ਵਿਚਿਨਨ੍ਤੋ ਨ ਕੋਚਿ ਕਿਞ੍ਚਿ ਮੁਤ੍ਤਂ ਵਾ ਮਣਿਂ ਵਾ ਵੇਲ਼ੁਰਿਯਂ ਵਾ ਅਗਰੁਂ ਵਾ ਕੁਙ੍ਕੁਮਂ ਵਾ ਕਪ੍ਪੂਰਂ ਵਾ ਵਾਸਚੁਣ੍ਣਾਦਿਂ ਵਾ ਅਣੁਮਤ੍ਤਮ੍ਪਿ ਸੁਚਿਭਾਵਂ ਪਸ੍ਸਤਿ, ਅਥ ਖੋ ਪਰਮਦੁਗ੍ਗਨ੍ਧਜੇਗੁਚ੍ਛਂ ਅਸਿਰਿਕਦਸ੍ਸਨਂ ਨਾਨਪ੍ਪਕਾਰਂ ਕੇਸਲੋਮਾਦਿਭੇਦਂ ਅਸੁਚਿਂਯੇਵ ਪਸ੍ਸਤਿ. ਤੇਨ ਵੁਤ੍ਤਂ ‘‘ਅਤ੍ਥਿ ਇਮਸ੍ਮਿਂ ਕਾਯੇ ਕੇਸਾ ਲੋਮਾ…ਪੇ… ਮੁਤ੍ਤ’’ਨ੍ਤਿ. ਅਯਮੇਤ੍ਥ ਪਦਸਮ੍ਬਨ੍ਧਤੋ ਵਣ੍ਣਨਾ.

੧੮੦. ਇਮਂ ਪਨ ਕਮ੍ਮਟ੍ਠਾਨਂ ਭਾਵੇਤੁਕਾਮੇਨ ਆਦਿਕਮ੍ਮਿਕੇਨ ਕੁਲਪੁਤ੍ਤੇਨ ਵੁਤ੍ਤਪ੍ਪਕਾਰਂ ਕਲ੍ਯਾਣਮਿਤ੍ਤਂ ਉਪਸਙ੍ਕਮਿਤ੍ਵਾ ਇਦਂ ਕਮ੍ਮਟ੍ਠਾਨਂ ਗਹੇਤਬ੍ਬਂ. ਤੇਨਾਪਿਸ੍ਸ ਕਮ੍ਮਟ੍ਠਾਨਂ ਕਥੇਨ੍ਤੇਨ ਸਤ੍ਤਧਾ ਉਗ੍ਗਹਕੋਸਲ੍ਲਂ ਦਸਧਾ ਚ ਮਨਸਿਕਾਰਕੋਸਲ੍ਲਂ ਆਚਿਕ੍ਖਿਤਬ੍ਬਂ. ਤਤ੍ਥ ਵਚਸਾ ਮਨਸਾ ਵਣ੍ਣਤੋ ਸਣ੍ਠਾਨਤੋ ਦਿਸਤੋ ਓਕਾਸਤੋ ਪਰਿਚ੍ਛੇਦਤੋਤਿ ਏਵਂ ਸਤ੍ਤਧਾ ਉਗ੍ਗਹਕੋਸਲ੍ਲਂ ਆਚਿਕ੍ਖਿਤਬ੍ਬਂ.

ਇਮਸ੍ਮਿਂ ਹਿ ਪਟਿਕ੍ਕੂਲਮਨਸਿਕਾਰਕਮ੍ਮਟ੍ਠਾਨੇ ਯੋਪਿ ਤਿਪਿਟਕੋ ਹੋਤਿ, ਤੇਨਾਪਿ ਮਨਸਿਕਾਰਕਾਲੇ ਪਠਮਂ ਵਾਚਾਯ ਸਜ੍ਝਾਯੋ ਕਾਤਬ੍ਬੋ. ਏਕਚ੍ਚਸ੍ਸ ਹਿ ਸਜ੍ਝਾਯਂ ਕਰੋਨ੍ਤਸ੍ਸੇਵ ਕਮ੍ਮਟ੍ਠਾਨਂ ਪਾਕਟਂ ਹੋਤਿ ਮਲਯਵਾਸੀ ਮਹਾਦੇਵਤ੍ਥੇਰਸ੍ਸ ਸਨ੍ਤਿਕੇ ਉਗ੍ਗਹਿਤਕਮ੍ਮਟ੍ਠਾਨਾਨਂ ਦ੍ਵਿਨ੍ਨਂ ਥੇਰਾਨਂ ਵਿਯ. ਥੇਰੋ ਕਿਰ ਤੇਹਿ ਕਮ੍ਮਟ੍ਠਾਨਂ ਯਾਚਿਤੋ ਚਤ੍ਤਾਰੋ ਮਾਸੇ ਇਮਂਯੇਵ ਸਜ੍ਝਾਯਂ ਕਰੋਥਾਤਿ ਦ੍ਵਤ੍ਤਿਂਸਾਕਾਰਪਾਲ਼ਿਂ ਅਦਾਸਿ. ਤੇ ਕਿਞ੍ਚਾਪਿ ਨੇਸਂ ਦ੍ਵੇ ਤਯੋ ਨਿਕਾਯਾ ਪਗੁਣਾ, ਪਦਕ੍ਖਿਣਗ੍ਗਾਹਿਤਾਯ ਪਨ ਚਤ੍ਤਾਰੋ ਮਾਸੇ ਦ੍ਵਤ੍ਤਿਂਸਾਕਾਰਂ ਸਜ੍ਝਾਯਨ੍ਤਾਵ ਸੋਤਾਪਨ੍ਨਾ ਅਹੇਸੁਂ. ਤਸ੍ਮਾ ਕਮ੍ਮਟ੍ਠਾਨਂ ਕਥੇਨ੍ਤੇਨ ਆਚਰਿਯੇਨ ਅਨ੍ਤੇਵਾਸਿਕੋ ਵਤ੍ਤਬ੍ਬੋ ‘‘ਪਠਮਂ ਤਾਵ ਵਾਚਾਯ ਸਜ੍ਝਾਯਂ ਕਰੋਹੀ’’ਤਿ.

ਕਰੋਨ੍ਤੇਨ ਚ ਤਚਪਞ੍ਚਕਾਦੀਨਿ ਪਰਿਚ੍ਛਿਨ੍ਦਿਤ੍ਵਾ ਅਨੁਲੋਮਪਟਿਲੋਮਵਸੇਨ ਸਜ੍ਝਾਯੋ ਕਾਤਬ੍ਬੋ. ਕੇਸਾ ਲੋਮਾ ਨਖਾ ਦਨ੍ਤਾ ਤਚੋਤਿ ਹਿ ਵਤ੍ਵਾ ਪੁਨ ਪਟਿਲੋਮਤੋ ਤਚੋ ਦਨ੍ਤਾ ਨਖਾ ਲੋਮਾ ਕੇਸਾਤਿ ਵਤ੍ਤਬ੍ਬਂ.

ਤਦਨਨ੍ਤਰਂ ਵਕ੍ਕਪਞ੍ਚਕੇ ਮਂਸਂ ਨ੍ਹਾਰੁ ਅਟ੍ਠਿ ਅਟ੍ਠਿਮਿਞ੍ਜਂ ਵਕ੍ਕਨ੍ਤਿ ਵਤ੍ਵਾ ਪੁਨ ਪਟਿਲੋਮਤੋ ਵਕ੍ਕਂ ਅਟ੍ਠਿਮਿਞ੍ਜਂ ਅਟ੍ਠਿ ਨ੍ਹਾਰੁ ਮਂਸਂ, ਤਚੋ ਦਨ੍ਤਾ ਨਖਾ ਲੋਮਾ ਕੇਸਾਤਿ ਵਤ੍ਤਬ੍ਬਂ.

ਤਤੋ ਪਪ੍ਫਾਸਪਞ੍ਚਕੇ ਹਦਯਂ ਯਕਨਂ ਕਿਲੋਮਕਂ ਪਿਹਕਂ ਪਪ੍ਫਾਸਨ੍ਤਿ ਵਤ੍ਵਾ ਪੁਨ ਪਟਿਲੋਮਤੋ ਪਪ੍ਫਾਸਂ ਪਿਹਕਂ ਕਿਲੋਮਕਂ ਯਕਨਂ ਹਦਯਂ, ਵਕ੍ਕਂ ਅਟ੍ਠਿਮਿਞ੍ਜਂ ਅਟ੍ਠਿ ਨ੍ਹਾਰੁ ਮਂਸਂ, ਤਚੋ ਦਨ੍ਤਾ ਨਖਾ ਲੋਮਾ ਕੇਸਾਤਿ ਵਤ੍ਤਬ੍ਬਂ.

ਤਤੋ ਮਤ੍ਥਲੁਙ੍ਗਪਞ੍ਚਕੇ ਅਨ੍ਤਂ ਅਨ੍ਤਗੁਣਂ ਉਦਰਿਯਂ ਕਰੀਸਂ ਮਤ੍ਥਲੁਙ੍ਗਨ੍ਤਿ ਵਤ੍ਵਾ ਪੁਨ ਪਟਿਲੋਮਤੋ ਮਤ੍ਥਲੁਙ੍ਗਂ ਕਰੀਸਂ ਉਦਰਿਯਂ ਅਨ੍ਤਗੁਣਂ ਅਨ੍ਤਂ, ਪਪ੍ਫਾਸਂ ਪਿਹਕਂ ਕਿਲੋਮਕਂ ਯਕਨਂ ਹਦਯਂ, ਵਕ੍ਕਂ ਅਟ੍ਠਿਮਿਞ੍ਜਂ ਅਟ੍ਠਿ ਨ੍ਹਾਰੁ ਮਂਸਂ, ਤਚੋ ਦਨ੍ਤਾ ਨਖਾ ਲੋਮਾ ਕੇਸਾਤਿ ਵਤ੍ਤਬ੍ਬਂ.

ਤਤੋ ਮੇਦਛਕ੍ਕੇ ਪਿਤ੍ਤਂ ਸੇਮ੍ਹਂ ਪੁਬ੍ਬੋ ਲੋਹਿਤਂ ਸੇਦੋ ਮੇਦੋਤਿ ਵਤ੍ਵਾ ਪੁਨ ਪਟਿਲੋਮਤੋ ਮੇਦੋ ਸੇਦੋ ਲੋਹਿਤਂ ਪੁਬ੍ਬੋ ਸੇਮ੍ਹਂ ਪਿਤ੍ਤਂ, ਮਤ੍ਥਲੁਙ੍ਗਂ ਕਰੀਸਂ ਉਦਰਿਯਂ ਅਨ੍ਤਗੁਣਂ ਅਨ੍ਤਂ, ਪਪ੍ਫਾਸਂ ਪਿਹਕਂ ਕਿਲੋਮਕਂ ਯਕਨਂ ਹਦਯਂ, ਵਕ੍ਕਂ ਅਟ੍ਠਿਮਿਞ੍ਜਂ ਅਟ੍ਠਿ ਨ੍ਹਾਰੁ ਮਂਸਂ, ਤਚੋ ਦਨ੍ਤਾ ਨਖਾ ਲੋਮਾ ਕੇਸਾਤਿ ਵਤ੍ਤਬ੍ਬਂ.

ਤਤੋ ਮੁਤ੍ਤਛਕ੍ਕੇ ਅਸ੍ਸੁ ਵਸਾ ਖੇਲ਼ੋ ਸਿਙ੍ਘਾਣਿਕਾ ਲਸਿਕਾ ਮੁਤ੍ਤਨ੍ਤਿ ਵਤ੍ਵਾ ਪੁਨ ਪਟਿਲੋਮਤੋ ਮੁਤ੍ਤਂ ਲਸਿਕਾ ਸਿਙ੍ਘਾਣਿਕਾ ਖੇਲ਼ੋ ਵਸਾ ਅਸ੍ਸੁ, ਮੇਦੋ ਸੇਦੋ ਲੋਹਿਤਂ ਪੁਬ੍ਬੋ ਸੇਮ੍ਹਂ ਪਿਤ੍ਤਂ, ਮਤ੍ਥਲੁਙ੍ਗਂ ਕਰੀਸਂ ਉਦਰਿਯਂ ਅਨ੍ਤਗੁਣਂ ਅਨ੍ਤਂ, ਪਪ੍ਫਾਸਂ ਪਿਹਕਂ ਕਿਲੋਮਕਂ ਯਕਨਂ ਹਦਯਂ, ਵਕ੍ਕਂ ਅਟ੍ਠਿਮਿਞ੍ਜਂ ਅਟ੍ਠਿ ਨ੍ਹਾਰੁ ਮਂਸਂ, ਤਚੋ ਦਨ੍ਤਾ ਨਖਾ ਲੋਮਾ ਕੇਸਾਤਿ ਵਤ੍ਤਬ੍ਬਂ.

ਏਵਂ ਕਾਲਸਤਂ ਕਾਲਸਹਸ੍ਸਂ ਕਾਲਸਤਸਹਸ੍ਸਮ੍ਪਿ ਵਾਚਾਯ ਸਜ੍ਝਾਯੋ ਕਾਤਬ੍ਬੋ. ਵਚਸਾ ਸਜ੍ਝਾਯੇਨ ਹਿ ਕਮ੍ਮਟ੍ਠਾਨਤਨ੍ਤਿ ਪਗੁਣਾ ਹੋਤਿ, ਨ ਇਤੋ ਚਿਤੋ ਚ ਚਿਤ੍ਤਂ ਵਿਧਾਵਤਿ. ਕੋਟ੍ਠਾਸਾ ਪਾਕਟਾ ਹੋਨ੍ਤਿ, ਹਤ੍ਥਸਙ੍ਖਲਿਕਾ ਵਿਯ ਵਤਿਪਾਦਪਨ੍ਤਿ ਵਿਯ ਚ ਖਾਯਨ੍ਤਿ.

ਯਥਾ ਪਨ ਵਚਸਾ, ਤਥੇਵ ਮਨਸਾਪਿ ਸਜ੍ਝਾਯੋ ਕਾਤਬ੍ਬੋ. ਵਚਸਾ ਸਜ੍ਝਾਯੋ ਹਿ ਮਨਸਾ ਸਜ੍ਝਾਯਸ੍ਸ ਪਚ੍ਚਯੋ ਹੋਤਿ. ਮਨਸਾ ਸਜ੍ਝਾਯੋ ਲਕ੍ਖਣਪਟਿਵੇਧਸ੍ਸ ਪਚ੍ਚਯੋ ਹੋਤਿ.

ਵਣ੍ਣਤੋਤਿ ਕੇਸਾਦੀਨਂ ਵਣ੍ਣੋ ਵਵਤ੍ਥਪੇਤਬ੍ਬੋ.

ਸਣ੍ਠਾਨਤੋਤਿ ਤੇਸਞ੍ਞੇਵ ਸਣ੍ਠਾਨਂ ਵਵਤ੍ਥਪੇਤਬ੍ਬਂ.

ਦਿਸਤੋਤਿ ਇਮਸ੍ਮਿਂ ਹਿ ਸਰੀਰੇ ਨਾਭਿਤੋ ਉਦ੍ਧਂ ਉਪਰਿਮਦਿਸਾ, ਅਧੋ ਹੇਟ੍ਠਿਮਦਿਸਾ, ਤਸ੍ਮਾ ਅਯਂ ਕੋਟ੍ਠਾਸੋ ਇਮਿਸ੍ਸਾ ਨਾਮ ਦਿਸਾਯਾਤਿ ਦਿਸਾ ਵਵਤ੍ਥਪੇਤਬ੍ਬਾ.

ਓਕਾਸਤੋਤਿ ਅਯਂ ਕੋਟ੍ਠਾਸੋ ਇਮਸ੍ਮਿਂ ਨਾਮ ਓਕਾਸੇ ਪਤਿਟ੍ਠਿਤੋਤਿ ਏਵਂ ਤਸ੍ਸ ਤਸ੍ਸ ਓਕਾਸੋ ਵਵਤ੍ਥਪੇਤਬ੍ਬੋ.

ਪਰਿਚ੍ਛੇਦਤੋਤਿ ਸਭਾਗਪਰਿਚ੍ਛੇਦੋ ਵਿਸਭਾਗਪਰਿਚ੍ਛੇਦੋਤਿ ਦ੍ਵੇ ਪਰਿਚ੍ਛੇਦਾ. ਤਤ੍ਥ ਅਯਂ ਕੋਟ੍ਠਾਸੋ ਹੇਟ੍ਠਾ ਚ ਉਪਰਿ ਚ ਤਿਰਿਯਞ੍ਚ ਇਮਿਨਾ ਨਾਮ ਪਰਿਚ੍ਛਿਨ੍ਨੋਤਿ ਏਵਂ ਸਭਾਗਪਰਿਚ੍ਛੇਦੋ ਵੇਦਿਤਬ੍ਬੋ. ਕੇਸਾ ਨ ਲੋਮਾ, ਲੋਮਾਪਿ ਨ ਕੇਸਾਤਿ ਏਵਂ ਅਮਿਸ੍ਸਕਤਾਵਸੇਨ ਵਿਸਭਾਗਪਰਿਚ੍ਛੇਦੋ ਵੇਦਿਤਬ੍ਬੋ.

ਏਵਂ ਸਤ੍ਤਧਾ ਉਗ੍ਗਹਕੋਸਲ੍ਲਂ ਆਚਿਕ੍ਖਨ੍ਤੇਨ ਪਨ ਇਦਂ ਕਮ੍ਮਟ੍ਠਾਨਂ ਅਸੁਕਸ੍ਮਿਂ ਸੁਤ੍ਤੇ ਪਟਿਕ੍ਕੂਲਵਸੇਨ ਕਥਿਤਂ, ਅਸੁਕਸ੍ਮਿਂ ਧਾਤੁਵਸੇਨਾਤਿ ਞਤ੍ਵਾ ਆਚਿਕ੍ਖਿਤਬ੍ਬਂ. ਇਦਞ੍ਹਿ ਮਹਾਸਤਿਪਟ੍ਠਾਨੇ (ਦੀ. ਨਿ. ੨.੩੭੭) ਪਟਿਕ੍ਕੂਲਵਸੇਨੇਵ ਕਥਿਤਂ. ਮਹਾਹਤ੍ਥਿਪਦੋਪਮ(ਮ. ਨਿ. ੧.੩੦੦ ਆਦਯੋ) ਮਹਾਰਾਹੁਲੋਵਾਦ(ਮ. ਨਿ. ੨.੧੧੩ ਆਦਯੋ) ਧਾਤੁਵਿਭਙ੍ਗੇਸੁ(ਮ. ਨਿ. ੩.੩੪੨ ਆਦਯੋ) ਧਾਤੁਵਸੇਨ ਕਥਿਤਂ. ਕਾਯਗਤਾਸਤਿਸੁਤ੍ਤੇ (ਮ. ਨਿ. ੩.੧੫੩) ਪਨ ਯਸ੍ਸ ਵਣ੍ਣਤੋ ਉਪਟ੍ਠਾਤਿ, ਤਂ ਸਨ੍ਧਾਯ ਚਤ੍ਤਾਰਿ ਝਾਨਾਨਿ ਵਿਭਤ੍ਤਾਨਿ. ਤਤ੍ਥ ਧਾਤੁਵਸੇਨ ਕਥਿਤਂ ਵਿਪਸ੍ਸਨਾਕਮ੍ਮਟ੍ਠਾਨਂ ਹੋਤਿ. ਪਟਿਕ੍ਕੂਲਵਸੇਨ ਕਥਿਤਂ ਸਮਥਕਮ੍ਮਟ੍ਠਾਨਂ. ਤਦੇਤਂ ਇਧ ਸਮਥਕਮ੍ਮਟ੍ਠਾਨਮੇਵਾਤਿ.

੧੮੧. ਏਵਂ ਸਤ੍ਤਧਾ ਉਗ੍ਗਹਕੋਸਲ੍ਲਂ ਆਚਿਕ੍ਖਿਤ੍ਵਾ ਅਨੁਪੁਬ੍ਬਤੋ, ਨਾਤਿਸੀਘਤੋ, ਨਾਤਿਸਣਿਕਤੋ, ਵਿਕ੍ਖੇਪਪਟਿਬਾਹਨਤੋ, ਪਣ੍ਣਤ੍ਤਿਸਮਤਿਕ੍ਕਮਨਤੋ, ਅਨੁਪੁਬ੍ਬਮੁਞ੍ਚਨਤੋ, ਅਪ੍ਪਨਾਤੋ, ਤਯੋ ਚ ਸੁਤ੍ਤਨ੍ਤਾਤਿ ਏਵਂ ਦਸਧਾ ਮਨਸਿਕਾਰਕੋਸਲ੍ਲਂ ਆਚਿਕ੍ਖਿਤਬ੍ਬਂ. ਤਤ੍ਥ ਅਨੁਪੁਬ੍ਬਤੋਤਿ ਇਦਞ੍ਹਿ ਸਜ੍ਝਾਯਕਰਣਤੋ ਪਟ੍ਠਾਯ ਅਨੁਪਟਿਪਾਟਿਯਾ ਮਨਸਿਕਾਤਬ੍ਬਂ, ਨ ਏਕਨ੍ਤਰਿਕਾਯ. ਏਕਨ੍ਤਰਿਕਾਯ ਹਿ ਮਨਸਿਕਰੋਨ੍ਤੋ ਯਥਾ ਨਾਮ ਅਕੁਸਲੋ ਪੁਰਿਸੋ ਦ੍ਵਤ੍ਤਿਂਸਪਦਂ ਨਿਸ੍ਸੇਣਿਂ ਏਕਨ੍ਤਰਿਕਾਯ ਆਰੋਹਨ੍ਤੋ ਕਿਲਨ੍ਤਕਾਯੋ ਪਤਤਿ, ਨ ਆਰੋਹਨਂ ਸਮ੍ਪਾਦੇਤਿ, ਏਵਮੇਵ ਭਾਵਨਾਸਮ੍ਪਤ੍ਤਿਵਸੇਨ ਅਧਿਗਨ੍ਤਬ੍ਬਸ੍ਸ ਅਸ੍ਸਾਦਸ੍ਸ ਅਨਧਿਗਮਾ ਕਿਲਨ੍ਤਚਿਤ੍ਤੋ ਪਤਤਿ, ਨ ਭਾਵਨਂ ਸਮ੍ਪਾਦੇਤਿ.

ਅਨੁਪੁਬ੍ਬਤੋ ਮਨਸਿਕਰੋਨ੍ਤੇਨਾਪਿ ਚ ਨਾਤਿਸੀਘਤੋ ਮਨਸਿਕਾਤਬ੍ਬਂ. ਅਤਿਸੀਘਤੋ ਮਨਸਿਕਰੋਤੋ ਹਿ ਯਥਾ ਨਾਮ ਤਿਯੋਜਨਮਗ੍ਗਂ ਪਟਿਪਜ੍ਜਿਤ੍ਵਾ ਓਕ੍ਕਮਨਵਿਸ੍ਸਜ੍ਜਨਂ ਅਸਲ੍ਲਕ੍ਖੇਤ੍ਵਾ ਸੀਘੇਨ ਜਵੇਨ ਸਤਕ੍ਖਤ੍ਤੁਮ੍ਪਿ ਗਮਨਾਗਮਨਂ ਕਰੋਤੋ ਪੁਰਿਸਸ੍ਸ ਕਿਞ੍ਚਾਪਿ ਅਦ੍ਧਾਨਂ ਪਰਿਕ੍ਖਯਂ ਗਚ੍ਛਤਿ, ਅਥ ਖੋ ਪੁਚ੍ਛਿਤ੍ਵਾਵ ਗਨ੍ਤਬ੍ਬਂ ਹੋਤਿ, ਏਵਮੇਵ ਕੇਵਲਂ ਕਮ੍ਮਟ੍ਠਾਨਂ ਪਰਿਯੋਸਾਨਂ ਪਾਪੁਣਾਤਿ, ਅਵਿਭੂਤਂ ਪਨ ਹੋਤਿ, ਨ ਵਿਸੇਸਂ ਆਵਹਤਿ, ਤਸ੍ਮਾ ਨਾਤਿਸੀਘਤੋ ਮਨਸਿਕਾਤਬ੍ਬਂ.

ਯਥਾ ਚ ਨਾਤਿਸੀਘਤੋ, ਏਵਂ ਨਾਤਿਸਣਿਕਤੋਪਿ. ਅਤਿਸਣਿਕਤੋ ਮਨਸਿਕਰੋਤੋ ਹਿ ਯਥਾ ਨਾਮ ਤਦਹੇਵ ਤਿਯੋਜਨਮਗ੍ਗਂ ਗਨ੍ਤੁਕਾਮਸ੍ਸ ਪੁਰਿਸਸ੍ਸ ਅਨ੍ਤਰਾਮਗ੍ਗੇ ਰੁਕ੍ਖਪਬ੍ਬਤਤਲ਼ਾਕਾਦੀਸੁ ਵਿਲਮ੍ਬਮਾਨਸ੍ਸ ਮਗ੍ਗੋ ਪਰਿਕ੍ਖਯਂ ਨ ਗਚ੍ਛਤਿ, ਦ੍ਵੀਹਤੀਹੇਨ ਪਰਿਯੋਸਾਪੇਤਬ੍ਬੋ ਹੋਤਿ, ਏਵਮੇਵ ਕਮ੍ਮਟ੍ਠਾਨਂ ਪਰਿਯੋਸਾਨਂ ਨ ਗਚ੍ਛਤਿ, ਵਿਸੇਸਾਧਿਗਮਸ੍ਸ ਪਚ੍ਚਯੋ ਨ ਹੋਤਿ.

ਵਿਕ੍ਖੇਪਪਟਿਬਾਹਨਤੋਤਿ ਕਮ੍ਮਟ੍ਠਾਨਂ ਵਿਸ੍ਸਜ੍ਜੇਤ੍ਵਾ ਬਹਿਦ੍ਧਾ ਪੁਥੁਤ੍ਤਾਰਮ੍ਮਣੇ ਚੇਤਸੋ ਵਿਕ੍ਖੇਪੋ ਪਟਿਬਾਹਿਤਬ੍ਬੋ. ਅਪ੍ਪਟਿਬਾਹਤੋ ਹਿ ਯਥਾ ਨਾਮ ਏਕਪਦਿਕਂ ਪਪਾਤਮਗ੍ਗਂ ਪਟਿਪਨ੍ਨਸ੍ਸ ਪੁਰਿਸਸ੍ਸ ਅਕ੍ਕਮਨਪਦਂ ਅਸਲ੍ਲਕ੍ਖੇਤ੍ਵਾ ਇਤੋ ਚਿਤੋ ਚ ਵਿਲੋਕਯਤੋ ਪਦਵਾਰੋ ਵਿਰਜ੍ਝਤਿ, ਤਤੋ ਸਤਪੋਰਿਸੇ ਪਪਾਤੇ ਪਤਿਤਬ੍ਬਂ ਹੋਤਿ, ਏਵਮੇਵ ਬਹਿਦ੍ਧਾ ਵਿਕ੍ਖੇਪੇ ਸਤਿ ਕਮ੍ਮਟ੍ਠਾਨਂ ਪਰਿਹਾਯਤਿ ਪਰਿਧਂਸਤਿ. ਤਸ੍ਮਾ ਵਿਕ੍ਖੇਪਪਟਿਬਾਹਨਤੋ ਮਨਸਿਕਾਤਬ੍ਬਂ.

ਪਣ੍ਣਤ੍ਤਿਸਮਤਿਕ੍ਕਮਨਤੋਤਿ ਯਾਯਂ ਕੇਸਾ ਲੋਮਾਤਿਆਦਿਕਾ ਪਣ੍ਣਤ੍ਤਿ, ਤਂ ਅਤਿਕ੍ਕਮਿਤ੍ਵਾ ਪਟਿਕ੍ਕੂਲਨ੍ਤਿ ਚਿਤ੍ਤਂ ਠਪੇਤਬ੍ਬਂ. ਯਥਾ ਹਿ ਉਦਕਦੁਲ੍ਲਭਕਾਲੇ ਮਨੁਸ੍ਸਾ ਅਰਞ੍ਞੇ ਉਦਪਾਨਂ ਦਿਸ੍ਵਾ ਤਤ੍ਥ ਤਾਲਪਣ੍ਣਾਦਿਕਂ ਕਿਞ੍ਚਿਦੇਵ ਸਞ੍ਞਾਣਂ ਬਨ੍ਧਿਤ੍ਵਾ ਤੇਨ ਸਞ੍ਞਾਣੇਨ ਆਗਨ੍ਤ੍ਵਾ ਨ੍ਹਾਯਨ੍ਤਿ ਚੇਵ ਪਿਵਨ੍ਤਿ ਚ. ਯਦਾ ਪਨ ਨੇਸਂ ਅਭਿਣ੍ਹਸਞ੍ਚਾਰੇਨ ਆਗਤਾਗਤਪਦਂ ਪਾਕਟਂ ਹੋਤਿ, ਤਦਾ ਸਞ੍ਞਾਣੇਨ ਕਿਚ੍ਚਂ ਨ ਹੋਤਿ, ਇਚ੍ਛਿਤਿਚ੍ਛਿਤਕ੍ਖਣੇ ਗਨ੍ਤ੍ਵਾ ਨ੍ਹਾਯਨ੍ਤਿ ਚੇਵ ਪਿਵਨ੍ਤਿ ਚ, ਏਵਮੇਵ ਪੁਬ੍ਬਭਾਗੇ ਕੇਸਾ ਲੋਮਾਤਿਪਣ੍ਣਤ੍ਤਿਵਸੇਨ ਮਨਸਿਕਰੋਤੋ ਪਟਿਕ੍ਕੂਲਭਾਵੋ ਪਾਕਟੋ ਹੋਤਿ. ਅਥ ਕੇਸਾ ਲੋਮਾਤਿਪਣ੍ਣਤ੍ਤਿਂ ਸਮਤਿਕ੍ਕਮਿਤ੍ਵਾ ਪਟਿਕ੍ਕੂਲਭਾਵੇਯੇਵ ਚਿਤ੍ਤਂ ਠਪੇਤਬ੍ਬਂ.

ਅਨੁਪੁਬ੍ਬਮੁਞ੍ਚਨਤੋਤਿ ਯੋ ਯੋ ਕੋਟ੍ਠਾਸੋ ਨ ਉਪਟ੍ਠਾਤਿ, ਤਂ ਤਂ ਮੁਞ੍ਚਨ੍ਤੇਨ ਅਨੁਪੁਬ੍ਬਮੁਞ੍ਚਨਤੋ ਮਨਸਿਕਾਤਬ੍ਬਂ. ਆਦਿਕਮ੍ਮਿਕਸ੍ਸ ਹਿ ਕੇਸਾਤਿ ਮਨਸਿਕਰੋਤੋ ਮਨਸਿਕਾਰੋ ਗਨ੍ਤ੍ਵਾ ਮੁਤ੍ਤਨ੍ਤਿ ਇਮਂ ਪਰਿਯੋਸਾਨਕੋਟ੍ਠਾਸਮੇਵ ਆਹਚ੍ਚ ਤਿਟ੍ਠਤਿ. ਮੁਤ੍ਤਨ੍ਤਿ ਚ ਮਨਸਿਕਰੋਤੋ ਮਨਸਿਕਾਰੋ ਗਨ੍ਤ੍ਵਾ ਕੇਸਾਤਿ ਇਮਂ ਆਦਿਕੋਟ੍ਠਾਸਮੇਵ ਆਹਚ੍ਚ ਤਿਟ੍ਠਤਿ. ਅਥਸ੍ਸ ਮਨਸਿਕਰੋਤੋ ਮਨਸਿਕਰੋਤੋ ਕੇਚਿ ਕੋਟ੍ਠਾਸਾ ਉਪਟ੍ਠਹਨ੍ਤਿ, ਕੇਚਿ ਨ ਉਪਟ੍ਠਹਨ੍ਤਿ. ਤੇਨ ਯੇ ਯੇ ਉਪਟ੍ਠਹਨ੍ਤਿ, ਤੇਸੁ ਤੇਸੁ ਤਾਵ ਕਮ੍ਮਂ ਕਾਤਬ੍ਬਂ. ਯਾਵ ਦ੍ਵੀਸੁ ਉਪਟ੍ਠਿਤੇਸੁ ਤੇਸਮ੍ਪਿ ਏਕੋ ਸੁਟ੍ਠੁਤਰਂ ਉਪਟ੍ਠਹਤਿ, ਏਵਂ ਉਪਟ੍ਠਿਤਂ ਪਨ ਤਮੇਵ ਪੁਨਪ੍ਪੁਨਂ ਮਨਸਿਕਰੋਨ੍ਤੇਨ ਅਪ੍ਪਨਾ ਉਪ੍ਪਾਦੇਤਬ੍ਬਾ.

ਤਤ੍ਰਾਯਂ ਉਪਮਾ – ਯਥਾ ਹਿ ਦ੍ਵਤ੍ਤਿਂਸਤਾਲਕੇ ਤਾਲਵਨੇ ਵਸਨ੍ਤਂ ਮਕ੍ਕਟਂ ਗਹੇਤੁਕਾਮੋ ਲੁਦ੍ਦੋ ਆਦਿਮ੍ਹਿ ਠਿਤਤਾਲਸ੍ਸ ਪਣ੍ਣਂ ਸਰੇਨ ਵਿਜ੍ਝਿਤ੍ਵਾ ਉਕ੍ਕੁਟ੍ਠਿਂ ਕਰੇਯ੍ਯ, ਅਥ ਖੋ ਸੋ ਮਕ੍ਕਟੋ ਪਟਿਪਾਟਿਯਾ ਤਸ੍ਮਿਂ ਤਸ੍ਮਿਂ ਤਾਲੇ ਪਤਿਤ੍ਵਾ ਪਰਿਯਨ੍ਤਤਾਲਮੇਵ ਗਚ੍ਛੇਯ੍ਯ, ਤਤ੍ਥਪਿ ਗਨ੍ਤ੍ਵਾ ਲੁਦ੍ਦੇਨ ਤਥੇਵ ਕਤੇ ਪੁਨ ਤੇਨੇਵ ਨਯੇਨ ਆਦਿਤਾਲਂ ਆਗਚ੍ਛੇਯ੍ਯ, ਸੋ ਏਵਂ ਪੁਨਪ੍ਪੁਨਂ ਪਰਿਪਾਤਿਯਮਾਨੋ ਉਕ੍ਕੁਟ੍ਠੁਕ੍ਕੁਟ੍ਠਿਟ੍ਠਾਨੇਯੇਵ ਉਟ੍ਠਹਿਤ੍ਵਾ ਅਨੁਕ੍ਕਮੇਨ ਏਕਸ੍ਮਿਂ ਤਾਲੇ ਨਿਪਤਿਤ੍ਵਾ ਤਸ੍ਸ ਵੇਮਜ੍ਝੇ ਮਕੁਲ਼ਤਾਲਪਣ੍ਣਸੂਚਿਂ ਦਲ਼੍ਹਂ ਗਹੇਤ੍ਵਾ ਵਿਜ੍ਝਿਯਮਾਨੋਪਿ ਨ ਉਟ੍ਠਹੇਯ੍ਯ, ਏਵਂਸਮ੍ਪਦਮਿਦਂ ਦਟ੍ਠਬ੍ਬਂ.

ਤਤ੍ਰਿਦਂ ਓਪਮ੍ਮਸਂਸਨ੍ਦਨਂ – ਯਥਾ ਹਿ ਤਾਲਵਨੇ ਦ੍ਵਤ੍ਤਿਂਸਤਾਲਾ, ਏਵਂ ਇਮਸ੍ਮਿਂ ਕਾਯੇ ਦ੍ਵਤ੍ਤਿਂਸਕੋਟ੍ਠਾਸਾ. ਮਕ੍ਕਟੋ ਵਿਯ ਚਿਤ੍ਤਂ. ਲੁਦ੍ਦੋ ਵਿਯ ਯੋਗਾਵਚਰੋ. ਮਕ੍ਕਟਸ੍ਸ ਦ੍ਵਤ੍ਤਿਂਸਤਾਲਕੇ ਤਾਲਵਨੇ ਨਿਵਾਸੋ ਵਿਯ ਯੋਗਿਨੋ ਚਿਤ੍ਤਸ੍ਸ ਦ੍ਵਤ੍ਤਿਂਸਕੋਟ੍ਠਾਸਕੇ ਕਾਯੇ ਆਰਮ੍ਮਣਵਸੇਨ ਅਨੁਸਞ੍ਚਰਣਂ. ਲੁਦ੍ਦੇਨ ਆਦਿਮ੍ਹਿ ਠਿਤਤਾਲਸ੍ਸ ਪਣ੍ਣਂ ਸਰੇਨ ਵਿਜ੍ਝਿਤ੍ਵਾ ਉਕ੍ਕੁਟ੍ਠਿਯਾ ਕਤਾਯ ਮਕ੍ਕਟਸ੍ਸ ਤਸ੍ਮਿਂ ਤਸ੍ਮਿਂ ਤਾਲੇ ਪਤਿਤ੍ਵਾ ਪਰਿਯਨ੍ਤਤਾਲਗਮਨਂ ਵਿਯ ਯੋਗਿਨੋ ਕੇਸਾਤਿ ਮਨਸਿਕਾਰੇ ਆਰਦ੍ਧੇ ਪਟਿਪਾਟਿਯਾ ਗਨ੍ਤ੍ਵਾ ਪਰਿਯੋਸਾਨਕੋਟ੍ਠਾਸੇਯੇਵ ਚਿਤ੍ਤਸ੍ਸ ਸਣ੍ਠਾਨਂ. ਪੁਨ ਪਚ੍ਚਾਗਮਨੇਪਿ ਏਸੇਵ ਨਯੋ. ਪੁਨਪ੍ਪੁਨਂ ਪਰਿਪਾਤਿਯਮਾਨਸ੍ਸ ਮਕ੍ਕਟਸ੍ਸ ਉਕ੍ਕੁਟ੍ਠੁਕ੍ਕੁਟ੍ਠਿਟ੍ਠਾਨੇ ਉਟ੍ਠਾਨਂ ਵਿਯ ਪੁਨਪ੍ਪੁਨਂ ਮਨਸਿਕਰੋਤੋ ਕੇਸੁਚਿ ਕੇਸੁਚਿ ਉਪਟ੍ਠਿਤੇਸੁ ਅਨੁਪਟ੍ਠਹਨ੍ਤੇ ਵਿਸ੍ਸਜ੍ਜੇਤ੍ਵਾ ਉਪਟ੍ਠਿਤੇਸੁ ਪਰਿਕਮ੍ਮਕਰਣਂ. ਅਨੁਕ੍ਕਮੇਨ ਏਕਸ੍ਮਿਂ ਤਾਲੇ ਨਿਪਤਿਤ੍ਵਾ ਤਸ੍ਸ ਮਜ੍ਝੇ ਮਕੁਲ਼ਤਾਲਪਣ੍ਣਸੂਚਿਂ ਦਲ਼੍ਹਂ ਗਹੇਤ੍ਵਾ ਵਿਜ੍ਝਿਯਮਾਨਸ੍ਸਪਿ ਅਨੁਟ੍ਠਾਨਂ ਵਿਯ ਅਵਸਾਨੇ ਦ੍ਵੀਸੁ ਉਪਟ੍ਠਿਤੇਸੁ ਯੋ ਸੁਟ੍ਠੁਤਰਂ ਉਪਟ੍ਠਾਤਿ, ਤਮੇਵ ਪੁਨਪ੍ਪੁਨਂ ਮਨਸਿਕਰਿਤ੍ਵਾ ਅਪ੍ਪਨਾਯ ਉਪ੍ਪਾਦਨਂ.

ਅਪਰਾਪਿ ਉਪਮਾ – ਯਥਾ ਨਾਮ ਪਿਣ੍ਡਪਾਤਿਕੋ ਭਿਕ੍ਖੁ ਦ੍ਵਤ੍ਤਿਂਸਕੁਲਂ ਗਾਮਂ ਉਪਨਿਸ੍ਸਾਯ ਵਸਨ੍ਤੋ ਪਠਮਗੇਹੇਯੇਵ ਦ੍ਵੇ ਭਿਕ੍ਖਾ ਲਭਿਤ੍ਵਾ ਪਰਤੋ ਏਕਂ ਵਿਸ੍ਸਜ੍ਜੇਯ੍ਯ. ਪੁਨਦਿਵਸੇ ਤਿਸ੍ਸੋ ਲਭਿਤ੍ਵਾ ਪਰਤੋ ਦ੍ਵੇ ਵਿਸ੍ਸਜ੍ਜੇਯ੍ਯ. ਤਤਿਯਦਿਵਸੇ ਆਦਿਮ੍ਹਿਯੇਵ ਪਤ੍ਤਪੂਰਂ ਲਭਿਤ੍ਵਾ ਆਸਨਸਾਲਂ ਗਨ੍ਤ੍ਵਾ ਪਰਿਭੁਞ੍ਜੇਯ੍ਯ. ਏਵਂਸਮ੍ਪਦਮਿਦਂ ਦਟ੍ਠਬ੍ਬਂ. ਦ੍ਵਤ੍ਤਿਂਸਕੁਲਗਾਮੋ ਵਿਯ ਹਿ ਦ੍ਵਤ੍ਤਿਂਸਾਕਾਰੋ. ਪਿਣ੍ਡਪਾਤਿਕੋ ਵਿਯ ਯੋਗਾਵਚਰੋ. ਤਸ੍ਸ ਤਂ ਗਾਮਂ ਉਪਨਿਸ੍ਸਾਯ ਵਾਸੋ ਵਿਯ ਯੋਗਿਨੋ ਦ੍ਵਤ੍ਤਿਂਸਾਕਾਰੇ ਪਰਿਕਮ੍ਮਕਰਣਂ. ਪਠਮਗੇਹੇ ਦ੍ਵੇ ਭਿਕ੍ਖਾ ਲਭਿਤ੍ਵਾ ਪਰਤੋ ਏਕਿਸ੍ਸਾ ਵਿਸ੍ਸਜ੍ਜਨਂ ਵਿਯ ਦੁਤਿਯਦਿਵਸੇ ਤਿਸ੍ਸੋ ਲਭਿਤ੍ਵਾ ਪਰਤੋ ਦ੍ਵਿਨ੍ਨਂ ਵਿਸ੍ਸਜ੍ਜਨਂ ਵਿਯ ਚ ਮਨਸਿਕਰੋਤੋ ਮਨਸਿਕਰੋਤੋ ਅਨੁਪਟ੍ਠਹਨ੍ਤੇ ਵਿਸ੍ਸਜ੍ਜੇਤ੍ਵਾ ਉਪਟ੍ਠਿਤੇਸੁ ਯਾਵ ਕੋਟ੍ਠਾਸਦ੍ਵਯੇ ਪਰਿਕਮ੍ਮਕਰਣਂ. ਤਤਿਯਦਿਵਸੇ ਆਦਿਮ੍ਹਿਯੇਵ ਪਤ੍ਤਪੂਰਂ ਲਭਿਤ੍ਵਾ ਆਸਨਸਾਲਾਯਂ ਨਿਸੀਦਿਤ੍ਵਾ ਪਰਿਭੋਗੋ ਵਿਯ ਦ੍ਵੀਸੁ ਯੋ ਸੁਟ੍ਠੁਤਰਂ ਉਪਟ੍ਠਾਤਿ, ਤਮੇਵ ਪੁਨਪ੍ਪੁਨਂ ਮਨਸਿਕਰਿਤ੍ਵਾ ਅਪ੍ਪਨਾਯ ਉਪ੍ਪਾਦਨਂ.

ਅਪ੍ਪਨਾਤੋਤਿ ਅਪ੍ਪਨਾਕੋਟ੍ਠਾਸਤੋ ਕੇਸਾਦੀਸੁ ਏਕੇਕਸ੍ਮਿਂ ਕੋਟ੍ਠਾਸੇ ਅਪ੍ਪਨਾ ਹੋਤੀਤਿ ਵੇਦਿਤਬ੍ਬਾਤਿ ਅਯਮੇਵੇਤ੍ਥ ਅਧਿਪ੍ਪਾਯੋ.

ਤਯੋ ਚ ਸੁਤ੍ਤਨ੍ਤਾਤਿ ਅਧਿਚਿਤ੍ਤਂ, ਸੀਤਿਭਾਵੋ, ਬੋਜ੍ਝਙ੍ਗਕੋਸਲ੍ਲਨ੍ਤਿ ਇਮੇ ਤਯੋ ਸੁਤ੍ਤਨ੍ਤਾ ਵੀਰਿਯਸਮਾਧਿਯੋਜਨਤ੍ਥਂ ਵੇਦਿਤਬ੍ਬਾਤਿ ਅਯਮੇਤ੍ਥ ਅਧਿਪ੍ਪਾਯੋ. ਤਤ੍ਥ –

‘‘ਅਧਿਚਿਤ੍ਤਮਨੁਯੁਤ੍ਤੇਨ, ਭਿਕ੍ਖਵੇ, ਭਿਕ੍ਖੁਨਾ ਤੀਣਿ ਨਿਮਿਤ੍ਤਾਨਿ ਕਾਲੇਨਕਾਲਂ ਮਨਸਿਕਾਤਬ੍ਬਾਨਿ. ਕਾਲੇਨਕਾਲਂ ਸਮਾਧਿਨਿਮਿਤ੍ਤਂ ਮਨਸਿਕਾਤਬ੍ਬਂ. ਕਾਲੇਨਕਾਲਂ ਪਗ੍ਗਹਨਿਮਿਤ੍ਤਂ ਮਨਸਿਕਾਤਬ੍ਬਂ. ਕਾਲੇਨਕਾਲਂ ਉਪੇਕ੍ਖਾਨਿਮਿਤ੍ਤਂ ਮਨਸਿਕਾਤਬ੍ਬਂ. ਸਚੇ, ਭਿਕ੍ਖਵੇ, ਅਧਿਚਿਤ੍ਤਮਨੁਯੁਤ੍ਤੋ ਭਿਕ੍ਖੁ ਏਕਨ੍ਤਂ ਸਮਾਧਿਨਿਮਿਤ੍ਤਞ੍ਞੇਵ ਮਨਸਿਕਰੇਯ੍ਯ, ਠਾਨਂ ਤਂ ਚਿਤ੍ਤਂ ਕੋਸਜ੍ਜਾਯ ਸਂਵਤ੍ਤੇਯ੍ਯ. ਸਚੇ, ਭਿਕ੍ਖਵੇ, ਅਧਿਚਿਤ੍ਤਮਨੁਯੁਤ੍ਤੋ ਭਿਕ੍ਖੁ ਏਕਨ੍ਤਂ ਪਗ੍ਗਹਨਿਮਿਤ੍ਤਞ੍ਞੇਵ ਮਨਸਿਕਰੇਯ੍ਯ, ਠਾਨਂ ਤਂ ਚਿਤ੍ਤਂ ਉਦ੍ਧਚ੍ਚਾਯ ਸਂਵਤ੍ਤੇਯ੍ਯ. ਸਚੇ, ਭਿਕ੍ਖਵੇ, ਅਧਿਚਿਤ੍ਤਮਨੁਯੁਤ੍ਤੋ ਭਿਕ੍ਖੁ ਏਕਨ੍ਤਂ ਉਪੇਕ੍ਖਾਨਿਮਿਤ੍ਤਞ੍ਞੇਵ ਮਨਸਿਕਰੇਯ੍ਯ, ਠਾਨਂ ਤਂ ਚਿਤ੍ਤਂ ਨ ਸਮ੍ਮਾ ਸਮਾਧਿਯੇਯ੍ਯ ਆਸਵਾਨਂ ਖਯਾਯ. ਯਤੋ ਚ ਖੋ, ਭਿਕ੍ਖਵੇ, ਅਧਿਚਿਤ੍ਤਮਨੁਯੁਤ੍ਤੋ ਭਿਕ੍ਖੁ ਕਾਲੇਨਕਾਲਂ ਸਮਾਧਿਨਿਮਿਤ੍ਤਂ ਪਗ੍ਗਹਨਿਮਿਤ੍ਤਂ ਉਪੇਕ੍ਖਾਨਿਮਿਤ੍ਤਂ ਮਨਸਿਕਰੋਤਿ, ਤਂ ਹੋਤਿ ਚਿਤ੍ਤਂ ਮੁਦੁਞ੍ਚ ਕਮ੍ਮਞ੍ਞਞ੍ਚ ਪਭਸ੍ਸਰਞ੍ਚ, ਨ ਚ ਪਭਙ੍ਗੁ, ਸਮ੍ਮਾ ਸਮਾਧਿਯਤਿ ਆਸਵਾਨਂ ਖਯਾਯ.

‘‘ਸੇਯ੍ਯਥਾਪਿ, ਭਿਕ੍ਖਵੇ, ਸੁਵਣ੍ਣਕਾਰੋ ਵਾ ਸੁਵਣ੍ਣਕਾਰਨ੍ਤੇਵਾਸੀ ਵਾ ਉਕ੍ਕਂ ਬਨ੍ਧਤਿ, ਉਕ੍ਕਂ ਬਨ੍ਧਿਤ੍ਵਾ ਉਕ੍ਕਾਮੁਖਂ ਆਲਿਮ੍ਪੇਤਿ, ਉਕ੍ਕਾਮੁਖਂ ਆਲਿਮ੍ਪੇਤ੍ਵਾ ਸਣ੍ਡਾਸੇਨ ਜਾਤਰੂਪਂ ਗਹੇਤ੍ਵਾ ਉਕ੍ਕਾਮੁਖੇ ਪਕ੍ਖਿਪਿਤ੍ਵਾ ਕਾਲੇਨਕਾਲਂ ਅਭਿਧਮਤਿ, ਕਾਲੇਨਕਾਲਂ ਉਦਕੇਨ ਪਰਿਪ੍ਫੋਸੇਤਿ, ਕਾਲੇਨਕਾਲਂ ਅਜ੍ਝੁਪੇਕ੍ਖਤਿ. ਸਚੇ, ਭਿਕ੍ਖਵੇ, ਸੁਵਣ੍ਣਕਾਰੋ ਵਾ ਸੁਵਣ੍ਣਕਾਰਨ੍ਤੇਵਾਸੀ ਵਾ ਤਂ ਜਾਤਰੂਪਂ ਏਕਨ੍ਤਂ ਅਭਿਧਮੇਯ੍ਯ, ਠਾਨਂ ਤਂ ਜਾਤਰੂਪਂ ਡਹੇਯ੍ਯ. ਸਚੇ, ਭਿਕ੍ਖਵੇ, ਸੁਵਣ੍ਣਕਾਰੋ ਵਾ ਸੁਵਣ੍ਣਕਾਰਨ੍ਤੇਵਾਸੀ ਵਾ ਤਂ ਜਾਤਰੂਪਂ ਏਕਨ੍ਤਂ ਉਦਕੇਨ ਪਰਿਪ੍ਫੋਸੇਯ੍ਯ, ਠਾਨਂ ਤਂ ਜਾਤਰੂਪਂ ਨਿਬ੍ਬਾਯੇਯ੍ਯ. ਸਚੇ, ਭਿਕ੍ਖਵੇ, ਸੁਵਣ੍ਣਕਾਰੋ ਵਾ ਸੁਵਣ੍ਣਕਾਰਨ੍ਤੇਵਾਸੀ ਵਾ ਤਂ ਜਾਤਰੂਪਂ ਏਕਨ੍ਤਂ ਅਜ੍ਝੁਪੇਕ੍ਖੇਯ੍ਯ, ਠਾਨਂ ਤਂ ਜਾਤਰੂਪਂ ਨ ਸਮ੍ਮਾ ਪਰਿਪਾਕਂ ਗਚ੍ਛੇਯ੍ਯ. ਯਤੋ ਚ ਖੋ, ਭਿਕ੍ਖਵੇ, ਸੁਵਣ੍ਣਕਾਰੋ ਵਾ ਸੁਵਣ੍ਣਕਾਰਨ੍ਤੇਵਾਸੀ ਵਾ ਤਂ ਜਾਤਰੂਪਂ ਕਾਲੇਨਕਾਲਂ ਅਭਿਧਮਤਿ, ਕਾਲੇਨਕਾਲਂ ਉਦਕੇਨ ਪਰਿਪ੍ਫੋਸੇਤਿ, ਕਾਲੇਨਕਾਲਂ ਅਜ੍ਝੁਪੇਕ੍ਖਤਿ, ਤਂ ਹੋਤਿ ਜਾਤਰੂਪਂ ਮੁਦੁਞ੍ਚ ਕਮ੍ਮਞ੍ਞਞ੍ਚ ਪਭਸ੍ਸਰਞ੍ਚ, ਨ ਚ ਪਭਙ੍ਗੁ, ਸਮ੍ਮਾ ਉਪੇਤਿ ਕਮ੍ਮਾਯ. ਯਸ੍ਸਾ ਯਸ੍ਸਾ ਚ ਪਿਲ਼ਨ੍ਧਨਵਿਕਤਿਯਾ ਆਕਙ੍ਖਤਿ ਯਦਿ ਪਟਿਕਾਯ ਯਦਿ ਕੁਣ੍ਡਲਾਯ ਯਦਿ ਗੀਵੇਯ੍ਯਾਯ ਯਦਿ ਸੁਵਣ੍ਣਮਾਲਾਯ, ਤਞ੍ਚਸ੍ਸ ਅਤ੍ਥਂ ਅਨੁਭੋਤਿ.

‘‘ਏਵਮੇਵ ਖੋ, ਭਿਕ੍ਖਵੇ, ਅਧਿਚਿਤ੍ਤਮਨੁਯੁਤ੍ਤੇਨ…ਪੇ… ਸਮਾਧਿਯਤਿ ਆਸਵਾਨਂ ਖਯਾਯ. ਯਸ੍ਸ ਯਸ੍ਸ ਚ ਅਭਿਞ੍ਞਾ ਸਚ੍ਛਿ ਕਰਣੀਯਸ੍ਸ ਧਮ੍ਮਸ੍ਸ ਚਿਤ੍ਤਂ ਅਭਿਨਿਨ੍ਨਾਮੇਤਿ ਅਭਿਞ੍ਞਾ ਸਚ੍ਛਿ ਕਿਰਿਯਾਯ, ਤਤ੍ਰ ਤਤ੍ਰੇਵ ਸਕ੍ਖਿਭਬ੍ਬਤਂ ਪਾਪੁਣਾਤਿ ਸਤਿ ਸਤਿ ਆਯਤਨੇ’’ਤਿ (ਅ. ਨਿ. ੩.੧੦੩).

ਇਦਂ ਸੁਤ੍ਤਂ ਅਧਿਚਿਤ੍ਤਨ੍ਤਿ ਵੇਦਿਤਬ੍ਬਂ.

‘‘ਛਹਿ, ਭਿਕ੍ਖਵੇ, ਧਮ੍ਮੇਹਿ ਸਮਨ੍ਨਾਗਤੋ ਭਿਕ੍ਖੁ ਭਬ੍ਬੋ ਅਨੁਤ੍ਤਰਂ ਸੀਤਿਭਾਵਂ ਸਚ੍ਛਿਕਾਤੁਂ. ਕਤਮੇਹਿ ਛਹਿ? ਇਧ, ਭਿਕ੍ਖਵੇ, ਭਿਕ੍ਖੁ ਯਸ੍ਮਿਂ ਸਮਯੇ ਚਿਤ੍ਤਂ ਨਿਗ੍ਗਹੇਤਬ੍ਬਂ, ਤਸ੍ਮਿਂ ਸਮਯੇ ਚਿਤ੍ਤਂ ਨਿਗ੍ਗਣ੍ਹਾਤਿ. ਯਸ੍ਮਿਂ ਸਮਯੇ ਚਿਤ੍ਤਂ ਪਗ੍ਗਹੇਤਬ੍ਬਂ, ਤਸ੍ਮਿਂ ਸਮਯੇ ਚਿਤ੍ਤਂ ਪਗ੍ਗਣ੍ਹਾਤਿ. ਯਸ੍ਮਿਂ ਸਮਯੇ ਚਿਤ੍ਤਂ ਸਮ੍ਪਹਂਸਿਤਬ੍ਬਂ, ਤਸ੍ਮਿਂ ਸਮਯੇ ਚਿਤ੍ਤਂ ਸਮ੍ਪਹਂਸੇਤਿ. ਯਸ੍ਮਿਂ ਸਮਯੇ ਚਿਤ੍ਤਂ ਅਜ੍ਝੁਪੇਕ੍ਖਿਤਬ੍ਬਂ, ਤਸ੍ਮਿਂ ਸਮਯੇ ਚਿਤ੍ਤਂ ਅਜ੍ਝੁਪੇਕ੍ਖਤਿ. ਪਣੀਤਾਧਿਮੁਤ੍ਤਿਕੋ ਚ ਹੋਤਿ ਨਿਬ੍ਬਾਨਾਭਿਰਤੋ. ਇਮੇਹਿ ਖੋ, ਭਿਕ੍ਖਵੇ, ਛਹਿ ਧਮ੍ਮੇਹਿ ਸਮਨ੍ਨਾਗਤੋ ਭਿਕ੍ਖੁ ਭਬ੍ਬੋ ਅਨੁਤ੍ਤਰਂ ਸੀਤਿਭਾਵਂ ਸਚ੍ਛਿਕਾਤੁ’’ਨ੍ਤਿ (ਅ. ਨਿ. ੬.੮੫).

ਇਦਂ ਸੁਤ੍ਤਂ ਅਨੁਤ੍ਤਰਂ ਸੀਤਿਭਾਵੋਤਿ ਵੇਦਿਤਬ੍ਬਂ.

ਬੋਜ੍ਝਙ੍ਗਕੋਸਲ੍ਲਂ ‘‘ਪਨ ਏਵਮੇਵ ਖੋ, ਭਿਕ੍ਖਵੇ, ਯਸ੍ਮਿਂ ਸਮਯੇ ਲੀਨਂ ਚਿਤ੍ਤਂ ਹੋਤਿ, ਅਕਾਲੋ ਤਸ੍ਮਿਂ ਸਮਯੇ ਪਸ੍ਸਦ੍ਧਿਸਮ੍ਬੋਜ੍ਝਙ੍ਗਸ੍ਸ ਭਾਵਨਾਯਾ’’ਤਿ (ਸਂ. ਨਿ. ੫.੨੩੪) ਅਪ੍ਪਨਾਕੋਸਲ੍ਲਕਥਾਯਂ ਦਸ੍ਸਿਤਮੇਵ.

ਇਤਿ ਇਦਂ ਸਤ੍ਤਵਿਧਂ ਉਗ੍ਗਹਕੋਸਲ੍ਲਂ ਸੁਗ੍ਗਹਿਤਂ ਕਤ੍ਵਾ ਇਦਞ੍ਚ ਦਸਵਿਧਂ ਮਨਸਿਕਾਰਕੋਸਲ੍ਲਂ ਸੁਟ੍ਠੁ ਵਵਤ੍ਥਪੇਤ੍ਵਾ ਤੇਨ ਯੋਗਿਨਾ ਉਭਯਕੋਸਲ੍ਲਵਸੇਨ ਕਮ੍ਮਟ੍ਠਾਨਂ ਸਾਧੁਕਂ ਉਗ੍ਗਹੇਤਬ੍ਬਂ. ਸਚੇ ਪਨਸ੍ਸ ਆਚਰਿਯੇਨ ਸਦ੍ਧਿਂ ਏਕਵਿਹਾਰੇਯੇਵ ਫਾਸੁ ਹੋਤਿ, ਏਵਂ ਵਿਤ੍ਥਾਰੇਨ ਅਕਥਾਪੇਤ੍ਵਾ ਕਮ੍ਮਟ੍ਠਾਨਂ ਸੁਟ੍ਠੁ ਵਵਤ੍ਥਪੇਤ੍ਵਾ ਕਮ੍ਮਟ੍ਠਾਨਂ ਅਨੁਯੁਜ੍ਜਨ੍ਤੇਨ ਵਿਸੇਸਂ ਲਭਿਤ੍ਵਾ ਉਪਰੂਪਰਿ ਕਥਾਪੇਤਬ੍ਬਂ. ਅਞ੍ਞਤ੍ਥ ਵਸਿਤੁਕਾਮੇਨ ਯਥਾਵੁਤ੍ਤੇਨ ਵਿਧਿਨਾ ਵਿਤ੍ਥਾਰਤੋ ਕਥਾਪੇਤ੍ਵਾ ਪੁਨਪ੍ਪੁਨਂ ਪਰਿਵਤ੍ਤੇਤ੍ਵਾ ਸਬ੍ਬਂ ਗਣ੍ਠਿਟ੍ਠਾਨਂ ਛਿਨ੍ਦਿਤ੍ਵਾ ਪਥਵੀਕਸਿਣਨਿਦ੍ਦੇਸੇ ਵੁਤ੍ਤਨਯੇਨੇਵ ਅਨਨੁਰੂਪਂ ਸੇਨਾਸਨਂ ਪਹਾਯ ਅਨੁਰੂਪੇ ਵਿਹਾਰੇ ਵਸਨ੍ਤੇਨ ਖੁਦ੍ਦਕਪਲਿਬੋਧੁਪਚ੍ਛੇਦਂ ਕਤ੍ਵਾ ਪਟਿਕ੍ਕੂਲਮਨਸਿਕਾਰੇ ਪਰਿਕਮ੍ਮਂ ਕਾਤਬ੍ਬਂ.

ਕਰੋਨ੍ਤੇਨ ਪਨ ਕੇਸੇਸੁ ਤਾਵ ਨਿਮਿਤ੍ਤਂ ਗਹੇਤਬ੍ਬਂ. ਕਥਂ? ਏਕਂ ਵਾ ਦ੍ਵੇ ਵਾ ਕੇਸੇ ਲੁਞ੍ਚਿਤ੍ਵਾ ਹਤ੍ਥਤਲੇ ਠਪੇਤ੍ਵਾ ਵਣ੍ਣੋ ਤਾਵ ਵਵਤ੍ਥਪੇਤਬ੍ਬੋ. ਛਿਨ੍ਨਟ੍ਠਾਨੇਪਿ ਕੇਸੇ ਓਲੋਕੇਤੁਂ ਵਟ੍ਟਤਿ. ਉਦਕਪਤ੍ਤੇ ਵਾ ਯਾਗੁਪਤ੍ਤੇ ਵਾ ਓਲੋਕੇਤੁਮ੍ਪਿ ਵਟ੍ਟਤਿਯੇਵ. ਕਾਲ਼ਕਕਾਲੇ ਦਿਸ੍ਵਾ ਕਾਲ਼ਕਾਤਿ ਮਨਸਿਕਾਤਬ੍ਬਾ. ਸੇਤਕਾਲੇ ਸੇਤਾਤਿ. ਮਿਸ੍ਸਕਕਾਲੇ ਪਨ ਉਸ੍ਸਦਵਸੇਨ ਮਨਸਿਕਾਤਬ੍ਬਾ ਹੋਨ੍ਤਿ. ਯਥਾ ਚ ਕੇਸੇਸੁ, ਏਵਂ ਸਕਲੇਪਿ ਤਚਪਞ੍ਚਕੇ ਦਿਸ੍ਵਾਵ ਨਿਮਿਤ੍ਤਂ ਗਹੇਤਬ੍ਬਂ.

ਕੋਟ੍ਠਾਸਵਵਤ੍ਥਾਪਨਕਥਾ

੧੮੨. ਏਵਂ ਨਿਮਿਤ੍ਤਂ ਗਹੇਤ੍ਵਾ ਸਬ੍ਬਕੋਟ੍ਠਾਸੇ ਵਣ੍ਣਸਣ੍ਠਾਨਦਿਸੋਕਾਸਪਰਿਚ੍ਛੇਦਵਸੇਨ ਵਵਤ੍ਥਪੇਤ੍ਵਾ ਵਣ੍ਣਸਣ੍ਠਾਨਗਨ੍ਧਆਸਯੋਕਾਸਵਸੇਨ ਪਞ੍ਚਧਾ ਪਟਿਕ੍ਕੂਲਤੋ ਵਵਤ੍ਥਪੇਤਬ੍ਬਾ.

ਤਤ੍ਰਾਯਂ ਸਬ੍ਬਕੋਟ੍ਠਾਸੇਸੁ ਅਨੁਪੁਬ੍ਬਕਥਾ. ਕੇਸਾ ਤਾਵ ਪਕਤਿਵਣ੍ਣੇਨ ਕਾਲ਼ਕਾ ਅਦ੍ਦਾਰਿਟ੍ਠਕਵਣ੍ਣਾ. ਸਣ੍ਠਾਨਤੋ ਦੀਘਵਟ੍ਟਲਿਕਾ ਤੁਲਾਦਣ੍ਡਸਣ੍ਠਾਨਾ. ਦਿਸਤੋ ਉਪਰਿਮਦਿਸਾਯ ਜਾਤਾ. ਓਕਾਸਤੋ ਉਭੋਸੁ ਪਸ੍ਸੇਸੁ ਕਣ੍ਣਚੂਲ਼ਿਕਾਹਿ, ਪੁਰਤੋ ਨਲਾਟਨ੍ਤੇਨ, ਪਚ੍ਛਤੋ ਗਲਵਾਟਕੇਨ ਪਰਿਚ੍ਛਿਨ੍ਨਾ. ਸੀਸਕਟਾਹਵੇਠਨਂ ਅਲ੍ਲਚਮ੍ਮਂ ਕੇਸਾਨਂ ਓਕਾਸੋ. ਪਰਿਚ੍ਛੇਦਤੋ ਕੇਸਾ ਸੀਸਵੇਠਨਚਮ੍ਮੇ ਵੀਹਗ੍ਗਮਤ੍ਤਂ ਪਵਿਸਿਤ੍ਵਾ ਪਤਿਟ੍ਠਿਤੇਨ ਹੇਟ੍ਠਾ ਅਤ੍ਤਨੋ ਮੂਲਤਲੇਨ, ਉਪਰਿ ਆਕਾਸੇਨ, ਤਿਰਿਯਂ ਅਞ੍ਞਮਞ੍ਞੇਨ ਪਰਿਚ੍ਛਿਨ੍ਨਾ, ਦ੍ਵੇ ਕੇਸਾ ਏਕਤੋ ਨਤ੍ਥੀਤਿ ਅਯਂ ਸਭਾਗਪਰਿਚ੍ਛੇਦੋ. ਕੇਸਾ ਨ ਲੋਮਾ, ਲੋਮਾ ਨ ਕੇਸਾਤਿ ਏਵਂ ਅਵਸੇਸਏਕਤਿਂਸਕੋਟ੍ਠਾਸੇਹਿ ਅਮਿਸ੍ਸੀਕਤਾ ਕੇਸਾ ਨਾਮ ਪਾਟਿਯੇਕ੍ਕੋ ਏਕਕੋਟ੍ਠਾਸੋਤਿ ਅਯਂ ਵਿਸਭਾਗਪਰਿਚ੍ਛੇਦੋ. ਇਦਂ ਕੇਸਾਨਂ ਵਣ੍ਣਾਦਿਤੋ ਵਵਤ੍ਥਾਪਨਂ.

੧੮੩. ਇਦਂ ਪਨ ਨੇਸਂ ਵਣ੍ਣਾਦਿਵਸੇਨ ਪਞ੍ਚਧਾ ਪਟਿਕ੍ਕੂਲਤੋ ਵਵਤ੍ਥਾਪਨਂ. ਕੇਸਾ ਨਾਮੇਤੇ ਵਣ੍ਣਤੋਪਿ ਪਟਿਕ੍ਕੂਲਾ. ਸਣ੍ਠਾਨਤੋਪਿ ਗਨ੍ਧਤੋਪਿ ਆਸਯਤੋਪਿ ਓਕਾਸਤੋਪਿ ਪਟਿਕ੍ਕੂਲਾ.

ਮਨੁਞ੍ਞੇਪਿ ਹਿ ਯਾਗੁਪਤ੍ਤੇ ਵਾ ਭਤ੍ਤਪਤ੍ਤੇ ਵਾ ਕੇਸਵਣ੍ਣਂ ਕਿਞ੍ਚਿ ਦਿਸ੍ਵਾ ਕੇਸਮਿਸ੍ਸਕਮਿਦਂ ਹਰਥ ਨਨ੍ਤਿ ਜਿਗੁਚ੍ਛਨ੍ਤਿ. ਏਵਂ ਕੇਸਾ ਵਣ੍ਣਤੋ ਪਟਿਕ੍ਕੂਲਾ. ਰਤ੍ਤਿਂ ਭੁਞ੍ਜਨ੍ਤਾਪਿ ਕੇਸਸਣ੍ਠਾਨਂ ਅਕ੍ਕਵਾਕਂ ਵਾ ਮਕਚਿਵਾਕਂ ਵਾ ਛੁਪਿਤ੍ਵਾਪਿ ਤਥੇਵ ਜਿਗੁਚ੍ਛਨ੍ਤਿ. ਏਵਂ ਸਣ੍ਠਾਨਤੋ ਪਟਿਕ੍ਕੂਲਾ.

ਤੇਲਮਕ੍ਖਨਪੁਪ੍ਫਧੂਪਾਦਿ ਸਙ੍ਖਾਰਵਿਰਹਿਤਾਨਞ੍ਚ ਕੇਸਾਨਂ ਗਨ੍ਧੋ ਪਰਮਜੇਗੁਚ੍ਛੋ ਹੋਤਿ. ਤਤੋ ਜੇਗੁਚ੍ਛਤਰੋ ਅਗ੍ਗਿਮ੍ਹਿ ਪਕ੍ਖਿਤ੍ਤਾਨਂ. ਕੇਸਾ ਹਿ ਵਣ੍ਣਸਣ੍ਠਾਨਤੋ ਅਪ੍ਪਟਿਕ੍ਕੂਲਾਪਿ ਸਿਯੁਂ, ਗਨ੍ਧੇਨ ਪਨ ਪਟਿਕ੍ਕੂਲਾਯੇਵ. ਯਥਾ ਹਿ ਦਹਰਸ੍ਸ ਕੁਮਾਰਸ੍ਸ ਵਚ੍ਚਂ ਵਣ੍ਣਤੋ ਹਲਿਦ੍ਦਿਵਣ੍ਣਂ, ਸਣ੍ਠਾਨਤੋਪਿ ਹਲਿਦ੍ਦਿਪਿਣ੍ਡਸਣ੍ਠਾਨਂ. ਸਙ੍ਕਾਰਟ੍ਠਾਨੇ ਛਡ੍ਡਿਤਞ੍ਚ ਉਦ੍ਧੁਮਾਤਕਕਾਲ਼ਸੁਨਖਸਰੀਰਂ ਵਣ੍ਣਤੋ ਤਾਲਪਕ੍ਕਵਣ੍ਣਂ. ਸਣ੍ਠਾਨਤੋ ਵਟ੍ਟੇਤ੍ਵਾ ਵਿਸ੍ਸਟ੍ਠਮੁਦਿਙ੍ਗਸਣ੍ਠਾਨਂ. ਦਾਠਾਪਿਸ੍ਸ ਸੁਮਨਮਕੁਲ਼ਸਦਿਸਾਤਿ ਉਭਯਮ੍ਪਿ ਵਣ੍ਣਸਣ੍ਠਾਨਤੋ ਸਿਯਾ ਅਪ੍ਪਟਿਕ੍ਕੂਲਂ ਗਨ੍ਧੇਨ ਪਨ ਪਟਿਕ੍ਕੂਲਮੇਵ. ਏਵਂ ਕੇਸਾਪਿ ਸਿਯੁਂ ਵਣ੍ਣਸਣ੍ਠਾਨਤੋ ਅਪ੍ਪਟਿਕ੍ਕੂਲਾ ਗਨ੍ਧੇਨ ਪਨ ਪਟਿਕ੍ਕੂਲਾਯੇਵਾਤਿ.

ਯਥਾ ਪਨ ਅਸੁਚਿਟ੍ਠਾਨੇ ਗਾਮਨਿਸ੍ਸਨ੍ਦੇਨ ਜਾਤਾਨਿ ਸੂਪੇਯ੍ਯਪਣ੍ਣਾਨਿ ਨਾਗਰਿਕਮਨੁਸ੍ਸਾਨਂ ਜੇਗੁਚ੍ਛਾਨਿ ਹੋਨ੍ਤਿ ਅਪਰਿਭੋਗਾਨਿ, ਏਵਂ ਕੇਸਾਪਿ ਪੁਬ੍ਬਲੋਹਿਤਮੁਤ੍ਤਕਰੀਸਪਿਤ੍ਤਸੇਮ੍ਹਾਦਿਨਿਸ੍ਸਨ੍ਦੇਨ ਜਾਤਤ੍ਤਾ ਜੇਗੁਚ੍ਛਾਤਿ ਇਦਂ ਨੇਸਂ ਆਸਯਤੋ ਪਾਟਿਕ੍ਕੁਲ੍ਯਂ.

ਇਮੇ ਚ ਕੇਸਾ ਨਾਮ ਗੂਥਰਾਸਿਮ੍ਹਿ ਉਟ੍ਠਿਤਕਣ੍ਣਿਕਂ ਵਿਯ ਏਕਤਿਂਸਕੋਟ੍ਠਾਸਰਾਸਿਮ੍ਹਿ ਜਾਤਾ. ਤੇ ਸੁਸਾਨਸਙ੍ਕਾਰਟ੍ਠਾਨਾਦੀਸੁ ਜਾਤਸਾਕਂ ਵਿਯ ਪਰਿਕ੍ਖਾਦੀਸੁ ਜਾਤਕਮਲਕੁਵਲਯਾਦਿਪੁਪ੍ਫਂ ਵਿਯ ਚ ਅਸੁਚਿਟ੍ਠਾਨੇ ਜਾਤਤ੍ਤਾ ਪਰਮਜੇਗੁਚ੍ਛਾਤਿ ਇਦਂ ਨੇਸਂ ਓਕਾਸਤੋ ਪਾਟਿਕ੍ਕੁਲ੍ਯਂ.