੬. ਦੇਵਤਾਨੁਸ੍ਸਤਿਕਥਾ

੧੬੨. ਦੇਵਤਾਨੁਸ੍ਸਤਿਂ ਭਾਵੇਤੁਕਾਮੇਨ ਪਨ ਅਰਿਯਮਗ੍ਗਵਸੇਨ ਸਮੁਦਾਗਤੇਹਿ ਸਦ੍ਧਾਦੀਹਿ ਗੁਣੇਹਿ ਸਮਨ੍ਨਾਗਤੇਨ ਭਵਿਤਬ੍ਬਂ. ਤਤੋ ਰਹੋਗਤੇਨ ਪਟਿਸਲ੍ਲੀਨੇਨ ‘‘ਸਨ੍ਤਿ ਦੇਵਾ ਚਾਤੁਮਹਾਰਾਜਿਕਾ, ਸਨ੍ਤਿ ਦੇਵਾ ਤਾਵਤਿਂਸਾ, ਯਾਮਾ, ਤੁਸਿਤਾ, ਨਿਮ੍ਮਾਨਰਤਿਨੋ, ਪਰਨਿਮ੍ਮਿਤਵਸਵਤ੍ਤਿਨੋ, ਸਨ੍ਤਿ ਦੇਵਾ ਬ੍ਰਹ੍ਮਕਾਯਿਕਾ, ਸਨ੍ਤਿ ਦੇਵਾ ਤਤੁਤ੍ਤਰਿ, ਯਥਾਰੂਪਾਯ ਸਦ੍ਧਾਯ ਸਮਨ੍ਨਾਗਤਾ ਤਾ ਦੇਵਤਾ ਇਤੋ ਚੁਤਾ ਤਤ੍ਥ ਉਪਪਨ੍ਨਾ, ਮਯ੍ਹਮ੍ਪਿ ਤਥਾਰੂਪਾ ਸਦ੍ਧਾ ਸਂਵਿਜ੍ਜਤਿ. ਯਥਾਰੂਪੇਨ ਸੀਲੇਨ. ਯਥਾਰੂਪੇਨ ਸੁਤੇਨ. ਯਥਾਰੂਪੇਨ ਚਾਗੇਨ. ਯਥਾਰੂਪਾਯ ਪਞ੍ਞਾਯ ਸਮਨ੍ਨਾਗਤਾ ਤਾ ਦੇਵਤਾ ਇਤੋ ਚੁਤਾ ਤਤ੍ਥ ਉਪਪਨ੍ਨਾ, ਮਯ੍ਹਮ੍ਪਿ ਤਥਾਰੂਪਾ ਪਞ੍ਞਾ ਸਂਵਿਜ੍ਜਤੀ’’ਤਿ (ਅ. ਨਿ. ੬.੧੦) ਏਵਂ ਦੇਵਤਾ ਸਕ੍ਖਿਟ੍ਠਾਨੇ ਠਪੇਤ੍ਵਾ ਅਤ੍ਤਨੋ ਸਦ੍ਧਾਦਿਗੁਣਾ ਅਨੁਸ੍ਸਰਿਤਬ੍ਬਾ.

ਸੁਤ੍ਤੇ ਪਨ ਯਸ੍ਮਿਂ ਮਹਾਨਾਮ ਸਮਯੇ ਅਰਿਯਸਾਵਕੋ ਅਤ੍ਤਨੋ ਚ ਤਾਸਞ੍ਚ ਦੇਵਤਾਨਂ ਸਦ੍ਧਞ੍ਚ ਸੀਲਞ੍ਚ ਸੁਤਞ੍ਚ ਚਾਗਞ੍ਚ ਪਞ੍ਞਞ੍ਚ ਅਨੁਸ੍ਸਰਤਿ, ਨੇਵਸ੍ਸ ਤਸ੍ਮਿਂ ਸਮਯੇ ਰਾਗਪਰਿਯੁਟ੍ਠਿਤਂ ਚਿਤ੍ਤਂ ਹੋਤੀਤਿ ਵੁਤ੍ਤਂ. ਕਿਞ੍ਚਾਪਿ ਵੁਤ੍ਤਂ, ਅਥ ਖੋ ਤਂ ਸਕ੍ਖਿਟ੍ਠਾਨੇ ਠਪੇਤਬ੍ਬਦੇਵਤਾਨਂ ਅਤ੍ਤਨੋ ਸਦ੍ਧਾਦੀਹਿ ਸਮਾਨਗੁਣਦੀਪਨਤ੍ਥਂ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਅਟ੍ਠਕਥਾਯਞ੍ਹਿ ਦੇਵਤਾ ਸਕ੍ਖਿਟ੍ਠਾਨੇ ਠਪੇਤ੍ਵਾ ਅਤ੍ਤਨੋ ਗੁਣੇ ਅਨੁਸ੍ਸਰਤੀਤਿ ਦਲ਼੍ਹਂ ਕਤ੍ਵਾ ਵੁਤ੍ਤਂ.

੧੬੩. ਤਸ੍ਮਾ ਪੁਬ੍ਬਭਾਗੇ ਦੇਵਤਾਨਂ ਗੁਣੇ ਅਨੁਸ੍ਸਰਿਤ੍ਵਾ ਅਪਰਭਾਗੇ ਅਤ੍ਤਨੋ ਸਂਵਿਜ੍ਜਮਾਨੇ ਸਦ੍ਧਾਦਿਗੁਣੇ ਅਨੁਸ੍ਸਰਤੋ ਚਸ੍ਸ ਨੇਵ ਤਸ੍ਮਿਂ ਸਮਯੇ ਰਾਗਪਰਿਯੁਟ੍ਠਿਤਂ ਚਿਤ੍ਤਂ ਹੋਤਿ. ਨ ਦੋਸ…ਪੇ… ਨ ਮੋਹਪਰਿਯੁਟ੍ਠਿਤਂ ਚਿਤ੍ਤਂ ਹੋਤਿ, ਉਜੁਗਤਮੇਵਸ੍ਸ ਤਸ੍ਮਿਂ ਸਮਯੇ ਚਿਤ੍ਤਂ ਹੋਤਿ ਦੇਵਤਾ ਆਰਬ੍ਭਾਤਿ (ਅ. ਨਿ. ੬.੧੦) ਪੁਰਿਮਨਯੇਨੇਵ ਵਿਕ੍ਖਮ੍ਭਿਤਨੀਵਰਣਸ੍ਸ ਏਕਕ੍ਖਣੇ ਝਾਨਙ੍ਗਾਨਿ ਉਪ੍ਪਜ੍ਜਨ੍ਤਿ. ਸਦ੍ਧਾਦਿਗੁਣਾਨਂ ਪਨ ਗਮ੍ਭੀਰਤਾਯ ਨਾਨਪ੍ਪਕਾਰਗੁਣਾਨੁਸ੍ਸਰਣਾਧਿਮੁਤ੍ਤਤਾਯ ਵਾ ਅਪ੍ਪਨਂ ਅਪ੍ਪਤ੍ਵਾ ਉਪਚਾਰਪ੍ਪਤ੍ਤਮੇਵ ਝਾਨਂ ਹੋਤਿ. ਤਦੇਤਂ ਦੇਵਤਾਨਂ ਗੁਣਸਦਿਸਸਦ੍ਧਾਦਿਗੁਣਾਨੁਸ੍ਸਰਣਵਸੇਨ ਦੇਵਤਾਨੁਸ੍ਸਤਿਚ੍ਚੇਵ ਸਙ੍ਖਂ ਗਚ੍ਛਤਿ.

ਇਮਞ੍ਚ ਪਨ ਦੇਵਤਾਨੁਸ੍ਸਤਿਂ ਅਨੁਯੁਤ੍ਤੋ ਭਿਕ੍ਖੁ ਦੇਵਤਾਨਂ ਪਿਯੋ ਹੋਤਿ ਮਨਾਪੋ, ਭਿਯ੍ਯੋਸੋ ਮਤ੍ਤਾਯ ਸਦ੍ਧਾਦਿਵੇਪੁਲ੍ਲਂ ਅਧਿਗਚ੍ਛਤਿ, ਪੀਤਿਪਾਮੋਜ੍ਜਬਹੁਲੋ ਵਿਹਰਤਿ. ਉਤ੍ਤਰਿ ਅਪ੍ਪਟਿਵਿਜ੍ਝਨ੍ਤੋ ਪਨ ਸੁਗਤਿਪਰਾਯਨੋ ਹੋਤਿ.

ਤਸ੍ਮਾ ਹਵੇ ਅਪ੍ਪਮਾਦਂ, ਕਯਿਰਾਥ ਸੁਮੇਧਸੋ;

ਏਵਂ ਮਹਾਨੁਭਾਵਾਯ, ਦੇਵਤਾਨੁਸ੍ਸਤਿਯਾ ਸਦਾਤਿ.

ਇਦਂ ਦੇਵਤਾਨੁਸ੍ਸਤਿਯਂ ਵਿਤ੍ਥਾਰਕਥਾਮੁਖਂ.

ਪਕਿਣ੍ਣਕਕਥਾ

੧੬੪. ਯਂ ਪਨ ਏਤਾਸਂ ਵਿਤ੍ਥਾਰਦੇਸਨਾਯਂ ‘‘ਉਜੁਗਤਮੇਵਸ੍ਸ ਤਸ੍ਮਿਂ ਸਮਯੇ ਚਿਤ੍ਤਂ ਹੋਤਿ ਤਥਾਗਤਂ ਆਰਬ੍ਭਾ’’ਤਿਆਦੀਨਿ ਵਤ੍ਵਾ ‘‘ਉਜੁਗਤਚਿਤ੍ਤੋ ਖੋ ਪਨ, ਮਹਾਨਾਮ, ਅਰਿਯਸਾਵਕੋ ਲਭਤਿ ਅਤ੍ਥਵੇਦਂ, ਲਭਤਿ ਧਮ੍ਮਵੇਦਂ, ਲਭਤਿ ਧਮ੍ਮੂਪਸਂਹਿਤਂ ਪਾਮੋਜ੍ਜਂ, ਪਮੁਦਿਤਸ੍ਸ ਪੀਤਿ ਜਾਯਤੀ’’ਤਿ (ਅ. ਨਿ. ੬.੧੦) ਵੁਤ੍ਤਂ, ਤਤ੍ਥ ਇਤਿਪਿ ਸੋ ਭਗਵਾਤਿਆਦੀਨਂ ਅਤ੍ਥਂ ਨਿਸ੍ਸਾਯ ਉਪ੍ਪਨ੍ਨਂ ਤੁਟ੍ਠਿਂ ਸਨ੍ਧਾਯ ਲਭਤਿ ਅਤ੍ਥਵੇਦਨ੍ਤਿ ਵੁਤ੍ਤਂ. ਪਾਲ਼ਿਂ ਨਿਸ੍ਸਾਯ ਉਪ੍ਪਨ੍ਨਂ ਤੁਟ੍ਠਿਂ ਸਨ੍ਧਾਯ ਲਭਤਿ ਧਮ੍ਮਵੇਦਂ. ਉਭਯਵਸੇਨ ਲਭਤਿ ਧਮ੍ਮੂਪਸਂਹਿਤਂ ਪਾਮੋਜ੍ਜਨ੍ਤਿ ਵੁਤ੍ਤਨ੍ਤਿ ਵੇਦਿਤਬ੍ਬਂ.

ਯਞ੍ਚ ਦੇਵਤਾਨੁਸ੍ਸਤਿਯਂ ਦੇਵਤਾ ਆਰਬ੍ਭਾਤਿ ਵੁਤ੍ਤਂ, ਤਂ ਪੁਬ੍ਬਭਾਗੇ ਦੇਵਤਾ ਆਰਬ੍ਭ ਪਵਤ੍ਤਚਿਤ੍ਤਵਸੇਨ ਦੇਵਤਾਗੁਣਸਦਿਸੇ ਵਾ ਦੇਵਤਾਭਾਵਨਿਪ੍ਫਾਦਕੇ ਗੁਣੇ ਆਰਬ੍ਭ ਪਵਤ੍ਤਚਿਤ੍ਤਵਸੇਨ ਵੁਤ੍ਤਨ੍ਤਿ ਵੇਦਿਤਬ੍ਬਂ.

੧੬੫. ਇਮਾ ਪਨ ਛ ਅਨੁਸ੍ਸਤਿਯੋ ਅਰਿਯਸਾਵਕਾਨਞ੍ਞੇਵ ਇਜ੍ਝਨ੍ਤਿ. ਤੇਸਂ ਹਿ ਬੁਦ੍ਧਧਮ੍ਮਸਙ੍ਘਗੁਣਾ ਪਾਕਟਾ ਹੋਨ੍ਤਿ. ਤੇ ਚ ਅਖਣ੍ਡਤਾਦਿਗੁਣੇਹਿ ਸੀਲੇਹਿ, ਵਿਗਤਮਲਮਚ੍ਛੇਰੇਨ ਚਾਗੇਨ, ਮਹਾਨੁਭਾਵਾਨਂ ਦੇਵਤਾਨਂ ਗੁਣਸਦਿਸੇਹਿ ਸਦ੍ਧਾਦਿਗੁਣੇਹਿ ਸਮਨ੍ਨਾਗਤਾ. ਮਹਾਨਾਮਸੁਤ੍ਤੇ (ਅ. ਨਿ. ੬.੧੦) ਚ ਸੋਤਾਪਨ੍ਨਸ੍ਸ ਨਿਸ੍ਸਯਵਿਹਾਰਂ ਪੁਟ੍ਠੇਨ ਭਗਵਤਾ ਸੋਤਾਪਨ੍ਨਸ੍ਸ ਨਿਸ੍ਸਯਵਿਹਾਰਦਸ੍ਸਨਤ੍ਥਮੇਵ ਏਤਾ ਵਿਤ੍ਥਾਰਤੋ ਕਥਿਤਾ.

ਗੇਧਸੁਤ੍ਤੇਪਿ ‘‘ਇਧ, ਭਿਕ੍ਖਵੇ, ਅਰਿਯਸਾਵਕੋ ਤਥਾਗਤਂ ਅਨੁਸ੍ਸਰਤਿ, ਇਤਿਪਿ ਸੋ ਭਗਵਾ…ਪੇ… ਉਜੁਗਤਮੇਵਸ੍ਸ ਤਸ੍ਮਿਂ ਸਮਯੇ ਚਿਤ੍ਤਂ ਹੋਤਿ ਨਿਕ੍ਖਨ੍ਤਂ ਮੁਤ੍ਤਂ ਵੁਟ੍ਠਿਤਂ ਗੇਧਮ੍ਹਾ. ਗੇਧੋਤਿ ਖੋ, ਭਿਕ੍ਖਵੇ, ਪਞ੍ਚਨ੍ਨੇਤਂ ਕਾਮਗੁਣਾਨਮਧਿਵਚਨਂ. ਇਦਮ੍ਪਿ ਖੋ, ਭਿਕ੍ਖਵੇ, ਆਰਮ੍ਮਣਂ ਕਰਿਤ੍ਵਾ ਏਵਮਿਧੇਕਚ੍ਚੇ ਸਤ੍ਤਾ ਵਿਸੁਜ੍ਝਨ੍ਤੀ’’ਤਿ (ਅ. ਨਿ. ੬.੨੫) ਏਵਂ ਅਰਿਯਸਾਵਕਸ੍ਸ ਅਨੁਸ੍ਸਤਿਵਸੇਨ ਚਿਤ੍ਤਂ ਵਿਸੋਧੇਤ੍ਵਾ ਉਤ੍ਤਰਿ ਪਰਮਤ੍ਥਵਿਸੁਦ੍ਧਿਅਧਿਗਮਤ੍ਥਾਯ ਕਥਿਤਾ.

ਆਯਸ੍ਮਤਾ ਮਹਾਕਚ੍ਚਾਨੇਨ ਦੇਸਿਤੇ ਸਮ੍ਬਾਧੋਕਾਸਸੁਤ੍ਤੇਪਿ ‘‘ਅਚ੍ਛਰਿਯਂ, ਆਵੁਸੋ, ਅਬ੍ਭੁਤਂ, ਆਵੁਸੋ, ਯਾਵਞ੍ਚਿਦਂ ਤੇਨ ਭਗਵਤਾ ਜਾਨਤਾ ਪਸ੍ਸਤਾ ਅਰਹਤਾ ਸਮ੍ਮਾਸਮ੍ਬੁਦ੍ਧੇਨ ਸਮ੍ਬਾਧੇ ਓਕਾਸਾਧਿਗਮੋ ਅਨੁਬੁਦ੍ਧੋ ਸਤ੍ਤਾਨਂ ਵਿਸੁਦ੍ਧਿਯਾ…ਪੇ… ਨਿਬ੍ਬਾਨਸ੍ਸ ਸਚ੍ਛਿਕਿਰਿਯਾਯ ਯਦਿਦਂ ਛ ਅਨੁਸ੍ਸਤਿਟ੍ਠਾਨਾਨਿ. ਕਤਮਾਨਿ ਛ? ਇਧਾਵੁਸੋ, ਅਰਿਯਸਾਵਕੋ ਤਥਾਗਤਂ ਅਨੁਸ੍ਸਰਤਿ…ਪੇ… ਏਵਮਿਧੇਕਚ੍ਚੇ ਸਤ੍ਤਾ ਵਿਸੁਦ੍ਧਿਧਮ੍ਮਾ ਭਵਨ੍ਤੀ’’ਤਿ (ਅ. ਨਿ. ੬.੨੬) ਏਵਂ ਅਰਿਯਸਾਵਕਸ੍ਸੇਵ ਪਰਮਤ੍ਥਵਿਸੁਦ੍ਧਿਧਮ੍ਮਤਾਯ ਓਕਾਸਾਧਿਗਮਵਸੇਨ ਕਥਿਤਾ.

ਉਪੋਸਥਸੁਤ੍ਤੇਪਿ ‘‘ਕਥਞ੍ਚ, ਵਿਸਾਖੇ, ਅਰਿਯੂਪੋਸਥੋ ਹੋਤਿ? ਉਪਕ੍ਕਿਲਿਟ੍ਠਸ੍ਸ, ਵਿਸਾਖੇ, ਚਿਤ੍ਤਸ੍ਸ ਉਪਕ੍ਕਮੇਨ ਪਰਿਯੋਦਪਨਾ ਹੋਤਿ. ਕਥਞ੍ਚ, ਵਿਸਾਖੇ, ਉਪਕ੍ਕਿਲਿਟ੍ਠਸ੍ਸ ਚਿਤ੍ਤਸ੍ਸ ਉਪਕ੍ਕਮੇਨ ਪਰਿਯੋਦਪਨਾ ਹੋਤਿ? ਇਧ, ਵਿਸਾਖੇ, ਅਰਿਯਸਾਵਕੋ ਤਥਾਗਤਂ ਅਨੁਸ੍ਸਰਤੀ’’ਤਿ (ਅ. ਨਿ. ੩.੭੧) ਏਵਂ ਅਰਿਯਸਾਵਕਸ੍ਸੇਵ ਉਪੋਸਥਂ ਉਪਵਸਤੋ ਚਿਤ੍ਤਵਿਸੋਧਨਕਮ੍ਮਟ੍ਠਾਨਵਸੇਨ ਉਪੋਸਥਸ੍ਸ ਮਹਪ੍ਫਲਭਾਵਦਸ੍ਸਨਤ੍ਥਂ ਕਥਿਤਾ.

ਏਕਾਦਸਨਿਪਾਤੇਪਿ ‘‘ਸਦ੍ਧੋ ਖੋ, ਮਹਾਨਾਮ, ਆਰਾਧਕੋ ਹੋਤਿ, ਨੋ ਅਸ੍ਸਦ੍ਧੋ. ਆਰਦ੍ਧਵੀਰਿਯੋ, ਉਪਟ੍ਠਿਤਸਤਿ, ਸਮਾਹਿਤੋ, ਪਞ੍ਞਵਾ, ਮਹਾਨਾਮ, ਆਰਾਧਕੋ ਹੋਤਿ, ਨੋ ਦੁਪ੍ਪਞ੍ਞੋ. ਇਮੇਸੁ ਖੋ ਤ੍ਵਂ, ਮਹਾਨਾਮ, ਪਞ੍ਚਸੁ ਧਮ੍ਮੇਸੁ ਪਤਿਟ੍ਠਾਯ ਛ ਧਮ੍ਮੇ ਉਤ੍ਤਰਿ ਭਾਵੇਯ੍ਯਾਸਿ. ਇਧ ਤ੍ਵਂ, ਮਹਾਨਾਮ, ਤਥਾਗਤਂ ਅਨੁਸ੍ਸਰੇਯ੍ਯਾਸਿ ਇਤਿਪਿ ਸੋ ਭਗਵਾ’’ਤਿ (ਅ. ਨਿ. ੧੧.੧੧) ਏਵਂ ਅਰਿਯਸਾਵਕਸ੍ਸੇਵ ‘‘ਤੇਸਂ ਨੋ, ਭਨ੍ਤੇ, ਨਾਨਾਵਿਹਾਰੇਨ ਵਿਹਰਤਂ ਕੇਨਸ੍ਸ ਵਿਹਾਰੇਨ ਵਿਹਰਿਤਬ੍ਬ’’ਨ੍ਤਿ ਪੁਚ੍ਛਤੋ ਵਿਹਾਰਦਸ੍ਸਨਤ੍ਥਂ ਕਥਿਤਾ.

੧੬੬. ਏਵਂ ਸਨ੍ਤੇਪਿ ਪਰਿਸੁਦ੍ਧਸੀਲਾਦਿਗੁਣਸਮਨ੍ਨਾਗਤੇਨ ਪੁਥੁਜ੍ਜਨੇਨਾਪਿ ਮਨਸਿ ਕਾਤਬ੍ਬਾ. ਅਨੁਸ੍ਸਵਵਸੇਨਾਪਿ ਹਿ ਬੁਦ੍ਧਾਦੀਨਂ ਗੁਣੇ ਅਨੁਸ੍ਸਰਤੋ ਚਿਤ੍ਤਂ ਪਸੀਦਤਿਯੇਵ. ਯਸ੍ਸਾਨੁਭਾਵੇਨ ਨੀਵਰਣਾਨਿ ਵਿਕ੍ਖਮ੍ਭੇਤ੍ਵਾ ਉਲ਼ਾਰਪਾਮੋਜ੍ਜੋ ਵਿਪਸ੍ਸਨਂ ਆਰਭਿਤ੍ਵਾ ਅਰਹਤ੍ਤਂਯੇਵ ਸਚ੍ਛਿਕਰੇਯ੍ਯ ਕਟਅਨ੍ਧਕਾਰਵਾਸੀ ਫੁਸ੍ਸਦੇਵਤ੍ਥੇਰੋ ਵਿਯ.

ਸੋ ਕਿਰਾਯਸ੍ਮਾ ਮਾਰੇਨ ਨਿਮ੍ਮਿਤਂ ਬੁਦ੍ਧਰੂਪਂ ਦਿਸ੍ਵਾ ‘‘ਅਯਂ ਤਾਵ ਸਰਾਗਦੋਸਮੋਹੋ ਏਵਂ ਸੋਭਤਿ, ਕਥਂ ਨੁ ਖੋ ਭਗਵਾ ਨ ਸੋਭਤਿ, ਸੋ ਹਿ ਸਬ੍ਬਸੋ ਵੀਤਰਾਗਦੋਸਮੋਹੋ’’ਤਿ ਬੁਦ੍ਧਾਰਮ੍ਮਣਂ ਪੀਤਿਂ ਪਟਿਲਭਿਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣੀਤਿ.

ਇਤਿ ਸਾਧੁਜਨਪਾਮੋਜ੍ਜਤ੍ਥਾਯ ਕਤੇ ਵਿਸੁਦ੍ਧਿਮਗ੍ਗੇ

ਸਮਾਧਿਭਾਵਨਾਧਿਕਾਰੇ

ਛਅਨੁਸ੍ਸਤਿਨਿਦ੍ਦੇਸੋ ਨਾਮ

ਸਤ੍ਤਮੋ ਪਰਿਚ੍ਛੇਦੋ.