੫. ਚਾਗਾਨੁਸ੍ਸਤਿਕਥਾ

੧੬੦. ਚਾਗਾਨੁਸ੍ਸਤਿਂ ਭਾਵੇਤੁਕਾਮੇਨ ਪਨ ਪਕਤਿਯਾ ਚਾਗਾਧਿਮੁਤ੍ਤੇਨ ਨਿਚ੍ਚਪ੍ਪਵਤ੍ਤਦਾਨਸਂਵਿਭਾਗੇਨ ਭਵਿਤਬ੍ਬਂ. ਅਥ ਵਾ ਪਨ ਭਾਵਨਂ ਆਰਭਨ੍ਤੇਨ ਇਤੋ ਦਾਨਿ ਪਭੁਤਿ ਸਤਿ ਪਟਿਗ੍ਗਾਹਕੇ ਅਨ੍ਤਮਸੋ ਏਕਾਲੋਪਮਤ੍ਤਮ੍ਪਿ ਦਾਨਂ ਅਦਤ੍ਵਾ ਨ ਭੁਞ੍ਜਿਸ੍ਸਾਮੀਤਿ ਸਮਾਦਾਨਂ ਕਤ੍ਵਾ ਤਂਦਿਵਸਂ ਗੁਣਵਿਸਿਟ੍ਠੇਸੁ ਪਟਿਗ੍ਗਾਹਕੇਸੁ ਯਥਾਸਤ੍ਤਿ ਯਥਾਬਲਂ ਦਾਨਂ ਦਤ੍ਵਾ ਤਤ੍ਥ ਨਿਮਿਤ੍ਤਂ ਗਣ੍ਹਿਤ੍ਵਾ ਰਹੋਗਤੇਨ ਪਟਿਸਲ੍ਲੀਨੇਨ ‘‘ਲਾਭਾ ਵਤ ਮੇ ਸੁਲਦ੍ਧਂ ਵਤ ਮੇ, ਯੋਹਂ ਮਚ੍ਛੇਰਮਲਪਰਿਯੁਟ੍ਠਿਤਾਯ ਪਜਾਯ ਵਿਗਤਮਲਮਚ੍ਛੇਰੇਨ ਚੇਤਸਾ ਵਿਹਰਾਮਿ ਮੁਤ੍ਤਚਾਗੋ ਪਯਤਪਾਣਿ ਵੋਸ੍ਸਗ੍ਗਰਤੋ ਯਾਚਯੋਗੋ ਦਾਨਸਂਵਿਭਾਗਰਤੋ’’ਤਿ ਏਵਂ ਵਿਗਤਮਲਮਚ੍ਛੇਰਤਾਦਿਗੁਣਵਸੇਨ ਅਤ੍ਤਨੋ ਚਾਗੋ ਅਨੁਸ੍ਸਰਿਤਬ੍ਬੋ.

ਤਤ੍ਥ ਲਾਭਾ ਵਤ ਮੇਤਿ ਮਯ੍ਹਂ ਵਤ ਲਾਭਾ, ਯੇ ਇਮੇ ‘‘ਆਯੁਂ ਖੋ ਪਨ ਦਤ੍ਵਾ ਆਯੁਸ੍ਸ ਭਾਗੀ ਹੋਤਿ ਦਿਬ੍ਬਸ੍ਸ ਵਾ ਮਾਨੁਸਸ੍ਸ ਵਾ’’ ਇਤਿ (ਅ. ਨਿ. ੫.੩੭) ਚ, ‘‘ਦਦਂ ਪਿਯੋ ਹੋਤਿ ਭਜਨ੍ਤਿ ਨਂ ਬਹੂ’’ ਇਤਿ (ਅ. ਨਿ. ੫.੩੪) ਚ, ‘‘ਦਦਮਾਨੋ ਪਿਯੋ ਹੋਤਿ, ਸਤਂ ਧਮ੍ਮਂ ਅਨੁਕ੍ਕਮਂ’’ ਇਤਿ (ਅ. ਨਿ. ੫.੩੫) ਚ ਏਵਮਾਦੀਹਿ ਨਯੇਹਿ ਭਗਵਤਾ ਦਾਯਕਸ੍ਸ ਲਾਭਾ ਸਂਵਣ੍ਣਿਤਾ, ਤੇ ਮਯ੍ਹਂ ਅਵਸ੍ਸਂ ਭਾਗਿਨੋਤਿ ਅਧਿਪ੍ਪਾਯੋ. ਸੁਲਦ੍ਧਂ ਵਤ ਮੇਤਿ ਯਂ ਮਯਾ ਇਦਂ ਸਾਸਨਂ ਮਨੁਸ੍ਸਤ੍ਤਂ ਵਾ ਲਦ੍ਧਂ, ਤਂ ਸੁਲਦ੍ਧਂ ਵਤ ਮੇ. ਕਸ੍ਮਾ? ਯੋਹਂ ਮਚ੍ਛੇਰਮਲਪਰਿਯੁਟ੍ਠਿਤਾਯ ਪਜਾਯ…ਪੇ… ਦਾਨਸਂਵਿਭਾਗਰਤੋਤਿ.

ਤਤ੍ਥ ਮਚ੍ਛੇਰਮਲਪਰਿਯੁਟ੍ਠਿਤਾਯਾਤਿ ਮਚ੍ਛੇਰਮਲੇਨ ਅਭਿਭੂਤਾਯ. ਪਜਾਯਾਤਿ ਪਜਾਯਨਵਸੇਨ ਸਤ੍ਤਾ ਵੁਚ੍ਚਨ੍ਤਿ. ਤਸ੍ਮਾ ਅਤ੍ਤਨੋ ਸਮ੍ਪਤ੍ਤੀਨਂ ਪਰਸਾਧਾਰਣਭਾਵਮਸਹਨਲਕ੍ਖਣੇਨ ਚਿਤ੍ਤਸ੍ਸ ਪਭਸ੍ਸਰਭਾਵਦੂਸਕਾਨਂ ਕਣ੍ਹਧਮ੍ਮਾਨਂ ਅਞ੍ਞਤਰੇਨ ਮਚ੍ਛੇਰਮਲੇਨ ਅਭਿਭੂਤੇਸੁ ਸਤ੍ਤੇਸੂਤਿ ਅਯਮੇਤ੍ਥ ਅਤ੍ਥੋ. ਵਿਗਤਮਲਮਚ੍ਛੇਰੇਨਾਤਿ ਅਞ੍ਞੇਸਮ੍ਪਿ ਰਾਗਦੋਸਾਦਿਮਲਾਨਞ੍ਚੇਵ ਮਚ੍ਛੇਰਸ੍ਸ ਚ ਵਿਗਤਤ੍ਤਾ ਵਿਗਤਮਲਮਚ੍ਛੇਰੇਨ. ਚੇਤਸਾ ਵਿਹਰਾਮੀਤਿ ਯਥਾਵੁਤ੍ਤਪ੍ਪਕਾਰਚਿਤ੍ਤੋ ਹੁਤ੍ਵਾ ਵਸਾਮੀਤਿ ਅਤ੍ਥੋ. ਸੁਤ੍ਤੇਸੁ ਪਨ ਮਹਾਨਾਮਸਕ੍ਕਸ੍ਸ ਸੋਤਾਪਨ੍ਨਸ੍ਸ ਸਤੋ ਨਿਸ੍ਸਯਵਿਹਾਰਂ ਪੁਚ੍ਛਤੋ ਨਿਸ੍ਸਯਵਿਹਾਰਵਸੇਨ ਦੇਸਿਤਤ੍ਤਾ ਅਗਾਰਂ ਅਜ੍ਝਾਵਸਾਮੀਤਿ ਵੁਤ੍ਤਂ. ਤਤ੍ਥ ਅਭਿਭਵਿਤ੍ਵਾ ਵਸਾਮੀਤਿ ਅਤ੍ਥੋ.

ਮੁਤ੍ਤਚਾਗੋਤਿ ਵਿਸ੍ਸਟ੍ਠਚਾਗੋ. ਪਯਤਪਾਣੀਤਿ ਪਰਿਸੁਦ੍ਧਹਤ੍ਥੋ. ਸਕ੍ਕਚ੍ਚਂ ਸਹਤ੍ਥਾ ਦੇਯ੍ਯਧਮ੍ਮਂ ਦਾਤੁਂ ਸਦਾ ਧੋਤਹਤ੍ਥੋਯੇਵਾਤਿ ਵੁਤ੍ਤਂ ਹੋਤਿ. ਵੋਸ੍ਸਗ੍ਗਰਤੋਤਿ ਵੋਸ੍ਸਜ੍ਜਨਂ ਵੋਸ੍ਸਗ੍ਗੋ, ਪਰਿਚ੍ਚਾਗੋਤਿ ਅਤ੍ਥੋ. ਤਸ੍ਮਿਂ ਵੋਸ੍ਸਗ੍ਗੇ ਸਤਤਾਭਿਯੋਗਵਸੇਨ ਰਤੋਤਿ ਵੋਸ੍ਸਗ੍ਗਰਤੋ. ਯਾਚਯੋਗੋਤਿ ਯਂ ਯਂ ਪਰੇ ਯਾਚਨ੍ਤਿ, ਤਸ੍ਸ ਤਸ੍ਸ ਦਾਨਤੋ ਯਾਚਨਯੋਗੋਤਿ ਅਤ੍ਥੋ. ਯਾਜਯੋਗੋਤਿਪਿ ਪਾਠੋ. ਯਜਨਸਙ੍ਖਾਤੇਨ ਯਾਜੇਨ ਯੁਤ੍ਤੋਤਿ ਅਤ੍ਥੋ. ਦਾਨਸਂਵਿਭਾਗਰਤੋਤਿ ਦਾਨੇ ਚ ਸਂਵਿਭਾਗੇ ਚ ਰਤੋ. ਅਹਞ੍ਹਿ ਦਾਨਞ੍ਚ ਦੇਮਿ, ਅਤ੍ਤਨਾ ਪਰਿਭੁਞ੍ਜਿਤਬ੍ਬਤੋਪਿ ਚ ਸਂਵਿਭਾਗਂ ਕਰੋਮਿ, ਏਤ੍ਥੇਵ ਚਸ੍ਮਿ ਉਭਯੇ ਰਤੋਤਿ ਏਵਂ ਅਨੁਸ੍ਸਰਤੀਤਿ ਅਤ੍ਥੋ.

੧੬੧. ਤਸ੍ਸੇਵਂ ਵਿਗਤਮਲਮਚ੍ਛੇਰਤਾਦਿਗੁਣਵਸੇਨ ਅਤ੍ਤਨੋ ਚਾਗਂ ਅਨੁਸ੍ਸਰਤੋ ਨੇਵ ਤਸ੍ਮਿਂ ਸਮਯੇ ਰਾਗਪਰਿਯੁਟ੍ਠਿਤਂ ਚਿਤ੍ਤਂ ਹੋਤਿ. ਨ ਦੋਸ…ਪੇ… ਨ ਮੋਹਪਰਿਯੁਟ੍ਠਿਤਂ ਚਿਤ੍ਤਂ ਹੋਤਿ. ਉਜੁਗਤਮੇਵਸ੍ਸ ਤਸ੍ਮਿਂ ਸਮਯੇ ਚਿਤ੍ਤਂ ਹੋਤਿ ਚਾਗਂ ਆਰਬ੍ਭਾਤਿ (ਅ. ਨਿ. ੫.੧੦) ਪੁਰਿਮਨਯੇਨੇਵ ਵਿਕ੍ਖਮ੍ਭਿਤਨੀਵਰਣਸ੍ਸ ਏਕਕ੍ਖਣੇ ਝਾਨਙ੍ਗਾਨਿ ਉਪ੍ਪਜ੍ਜਨ੍ਤਿ. ਚਾਗਗੁਣਾਨਂ ਪਨ ਗਮ੍ਭੀਰਤਾਯ ਨਾਨਪ੍ਪਕਾਰਚਾਗਗੁਣਾਨੁਸ੍ਸਰਣਾਧਿਮੁਤ੍ਤਤਾਯ ਵਾ ਅਪ੍ਪਨਂ ਅਪ੍ਪਤ੍ਵਾ ਉਪਚਾਰਪ੍ਪਤ੍ਤਮੇਵ ਝਾਨਂ ਹੋਤਿ. ਤਦੇਤਂ ਚਾਗਗੁਣਾਨੁਸ੍ਸਰਣਵਸੇਨ ਉਪ੍ਪਨ੍ਨਤ੍ਤਾ ਚਾਗਾਨੁਸ੍ਸਤਿਚ੍ਚੇਵ ਸਙ੍ਖਂ ਗਚ੍ਛਤਿ.

ਇਮਞ੍ਚ ਪਨ ਚਾਗਾਨੁਸ੍ਸਤਿਂ ਅਨੁਯੁਤ੍ਤੋ ਭਿਕ੍ਖੁ ਭਿਯ੍ਯੋਸੋ ਮਤ੍ਤਾਯ ਚਾਗਾਧਿਮੁਤ੍ਤੋ ਹੋਤਿ, ਅਲੋਭਜ੍ਝਾਸਯੋ, ਮੇਤ੍ਤਾਯ ਅਨੁਲੋਮਕਾਰੀ, ਵਿਸਾਰਦੋ, ਪੀਤਿਪਾਮੋਜ੍ਜਬਹੁਲੋ, ਉਤ੍ਤਰਿ ਅਪ੍ਪਟਿਵਿਜ੍ਝਨ੍ਤੋ ਪਨ ਸੁਗਤਿਪਰਾਯਨੋ ਹੋਤਿ.

ਤਸ੍ਮਾ ਹਵੇ ਅਪ੍ਪਮਾਦਂ, ਕਯਿਰਾਥ ਸੁਮੇਧਸੋ;

ਏਵਂ ਮਹਾਨੁਭਾਵਾਯ, ਚਾਗਾਨੁਸ੍ਸਤਿਯਾ ਸਦਾਤਿ.

ਇਦਂ ਚਾਗਾਨੁਸ੍ਸਤਿਯਂ ਵਿਤ੍ਥਾਰਕਥਾਮੁਖਂ.