੫. ਸੇਸਕਸਿਣਨਿਦ੍ਦੇਸੋ

ਆਪੋਕਸਿਣਕਥਾ

੯੧. ਇਦਾਨਿ ਪਥਵੀਕਸਿਣਾਨਨ੍ਤਰੇ ਆਪੋਕਸਿਣੇ ਵਿਤ੍ਥਾਰਕਥਾ ਹੋਤਿ. ਯਥੇਵ ਹਿ ਪਥਵੀਕਸਿਣਂ, ਏਵਂ ਆਪੋਕਸਿਣਮ੍ਪਿ ਭਾਵੇਤੁਕਾਮੇਨ ਸੁਖਨਿਸਿਨ੍ਨੇਨ ਆਪਸ੍ਮਿਂ ਨਿਮਿਤ੍ਤਂ ਗਣ੍ਹਿਤਬ੍ਬਂ, ਕਤੇ ਵਾ ਅਕਤੇ ਵਾਤਿ ਸਬ੍ਬਂ ਵਿਤ੍ਥਾਰੇਤਬ੍ਬਂ. ਯਥਾ ਚ ਇਧ, ਏਵਂ ਸਬ੍ਬਤ੍ਥ. ਇਤੋ ਪਰਞ੍ਹਿ ਏਤ੍ਤਕਮ੍ਪਿ ਅਵਤ੍ਵਾ ਵਿਸੇਸਮਤ੍ਤਮੇਵ ਵਕ੍ਖਾਮ.

ਇਧਾਪਿ ਪੁਬ੍ਬੇਕਤਾਧਿਕਾਰਸ੍ਸ ਪੁਞ੍ਞਵਤੋ ਅਕਤੇ ਆਪਸ੍ਮਿਂ ਪੋਕ੍ਖਰਣਿਯਾ ਵਾ ਤਲ਼ਾਕੇ ਵਾ ਲੋਣਿਯਂ ਵਾ ਸਮੁਦ੍ਦੇ ਵਾ ਨਿਮਿਤ੍ਤਂ ਉਪ੍ਪਜ੍ਜਤਿ ਚੂਲ਼ਸਿਵਤ੍ਥੇਰਸ੍ਸ ਵਿਯ. ਤਸ੍ਸ ਕਿਰਾਯਸ੍ਮਤੋ ਲਾਭਸਕ੍ਕਾਰਂ ਪਹਾਯ ਵਿਵਿਤ੍ਤਵਾਸਂ ਵਸਿਸ੍ਸਾਮੀਤਿ ਮਹਾਤਿਤ੍ਥੇ ਨਾਵਮਾਰੂਹਿਤ੍ਵਾ ਜਮ੍ਬੁਦੀਪਂ ਗਚ੍ਛਤੋ ਅਨ੍ਤਰਾ ਮਹਾਸਮੁਦ੍ਦਂ ਓਲੋਕਯਤੋ ਤਪ੍ਪਟਿਭਾਗਂ ਕਸਿਣਨਿਮਿਤ੍ਤਂ ਉਦਪਾਦਿ.

ਅਕਤਾਧਿਕਾਰੇਨ ਚਤ੍ਤਾਰੋ ਕਸਿਣਦੋਸੇ ਪਰਿਹਰਨ੍ਤੇਨ ਨੀਲਪੀਤਲੋਹਿਤੋਦਾਤਵਣ੍ਣਾਨਮਞ੍ਞਤਰਵਣ੍ਣਂ ਆਪਂ ਅਗਹੇਤ੍ਵਾ ਯਂ ਪਨ ਭੂਮਿਂ ਅਸਮ੍ਪਤ੍ਤਮੇਵ ਆਕਾਸੇ ਸੁਦ੍ਧਵਤ੍ਥੇਨ ਗਹਿਤਂ ਉਦਕਂ, ਅਞ੍ਞਂ ਵਾ ਤਥਾਰੂਪਂ ਵਿਪ੍ਪਸਨ੍ਨਂ ਅਨਾਵਿਲਂ, ਤੇਨ ਪਤ੍ਤਂ ਵਾ ਕੁਣ੍ਡਿਕਂ ਵਾ ਸਮਤਿਤ੍ਤਿਕਂ ਪੂਰੇਤ੍ਵਾ ਵਿਹਾਰਪਚ੍ਚਨ੍ਤੇ ਵੁਤ੍ਤਪ੍ਪਕਾਰੇ ਪਟਿਚ੍ਛਨ੍ਨੇ ਓਕਾਸੇ ਠਪੇਤ੍ਵਾ ਸੁਖਨਿਸਿਨ੍ਨੇਨ ਨ ਵਣ੍ਣੋ ਪਚ੍ਚਵੇਕ੍ਖਿਤਬ੍ਬੋ. ਨ ਲਕ੍ਖਣਂ ਮਨਸਿ ਕਾਤਬ੍ਬਂ. ਨਿਸ੍ਸਯਸਵਣ੍ਣਮੇਵ ਕਤ੍ਵਾ ਉਸ੍ਸਦਵਸੇਨ ਪਣ੍ਣਤ੍ਤਿਧਮ੍ਮੇ ਚਿਤ੍ਤਂ ਠਪੇਤ੍ਵਾ ਅਮ੍ਬੁ, ਉਦਕਂ, ਵਾਰਿ, ਸਲਿਲਨ੍ਤਿਆਦੀਸੁ ਆਪੋਨਾਮੇਸੁ ਪਾਕਟਨਾਮਵਸੇਨੇਵ ‘‘ਆਪੋ ਆਪੋ’’ਤਿ ਭਾਵੇਤਬ੍ਬਂ.

ਤਸ੍ਸੇਵਂ ਭਾਵਯਤੋ ਅਨੁਕ੍ਕਮੇਨ ਵੁਤ੍ਤਨਯੇਨੇਵ ਨਿਮਿਤ੍ਤਦ੍ਵਯਂ ਉਪ੍ਪਜ੍ਜਤਿ. ਇਧ ਪਨ ਉਗ੍ਗਹਨਿਮਿਤ੍ਤਂ ਚਲਮਾਨਂ ਵਿਯ ਉਪਟ੍ਠਾਤਿ, ਸਚੇ ਫੇਣਪੁਪ੍ਫੁਲ਼ਕਮਿਸ੍ਸਂ ਉਦਕਂ ਹੋਤਿ, ਤਾਦਿਸਮੇਵ ਉਪਟ੍ਠਾਤਿ, ਕਸਿਣਦੋਸੋ ਪਞ੍ਞਾਯਤਿ. ਪਟਿਭਾਗਨਿਮਿਤ੍ਤਂ ਪਨ ਨਿਪ੍ਪਰਿਪ੍ਫਨ੍ਦਂ ਆਕਾਸੇ ਠਪਿਤਮਣਿਤਾਲਵਣ੍ਟਂ ਵਿਯ ਮਣਿਮਯਾਦਾਸਮਣ੍ਡਲਮਿਵ ਚ ਹੁਤ੍ਵਾ ਉਪਟ੍ਠਾਤਿ. ਸੋ ਤਸ੍ਸ ਸਹ ਉਪਟ੍ਠਾਨੇਨੇਵ ਉਪਚਾਰਜ੍ਝਾਨਂ, ਵੁਤ੍ਤਨਯੇਨੇਵ ਚਤੁਕ੍ਕਪਞ੍ਚਕਜ੍ਝਾਨਾਨਿ ਚ ਪਾਪੁਣਾਤੀਤਿ. ਆਪੋਕਸਿਣਂ.

ਤੇਜੋਕਸਿਣਕਥਾ

੯੨. ਤੇਜੋਕਸਿਣਂ ਭਾਵੇਤੁਕਾਮੇਨਾਪਿ ਤੇਜਸ੍ਮਿਂ ਨਿਮਿਤ੍ਤਂ ਗਣ੍ਹਿਤਬ੍ਬਂ. ਤਤ੍ਥ ਕਤਾਧਿਕਾਰਸ੍ਸ ਪੁਞ੍ਞਵਤੋ ਅਕਤੇ ਨਿਮਿਤ੍ਤਂ ਗਣ੍ਹਨ੍ਤਸ੍ਸ ਦੀਪਸਿਖਾਯ ਵਾ ਉਦ੍ਧਨੇ ਵਾ ਪਤ੍ਤਪਚਨਟ੍ਠਾਨੇ ਵਾ ਦਵਦਾਹੇ ਵਾ ਯਤ੍ਥ ਕਤ੍ਥਚਿ ਅਗ੍ਗਿਜਾਲਂ ਓਲੋਕੇਨ੍ਤਸ੍ਸ ਨਿਮਿਤ੍ਤਂ ਉਪ੍ਪਜ੍ਜਤਿ ਚਿਤ੍ਤਗੁਤ੍ਤਤ੍ਥੇਰਸ੍ਸ ਵਿਯ. ਤਸ੍ਸ ਹਾਯਸ੍ਮਤੋ ਧਮ੍ਮਸ੍ਸਵਨਦਿਵਸੇ ਉਪੋਸਥਾਗਾਰਂ ਪਵਿਟ੍ਠਸ੍ਸ ਦੀਪਸਿਖਂ ਓਲੋਕੇਨ੍ਤਸ੍ਸੇਵ ਨਿਮਿਤ੍ਤਂ ਉਪ੍ਪਜ੍ਜਿ.

ਇਤਰੇਨ ਪਨ ਕਾਤਬ੍ਬਂ. ਤਤ੍ਰਿਦਂ ਕਰਣਵਿਧਾਨਂ, ਸਿਨਿਦ੍ਧਾਨਿ ਸਾਰਦਾਰੂਨਿ ਫਾਲੇਤ੍ਵਾ ਸੁਕ੍ਖਾਪੇਤ੍ਵਾ ਘਟਿਕਂ ਘਟਿਕਂ ਕਤ੍ਵਾ ਪਤਿਰੂਪਂ ਰੁਕ੍ਖਮੂਲਂ ਵਾ ਮਣ੍ਡਪਂ ਵਾ ਗਨ੍ਤ੍ਵਾ ਪਤ੍ਤਪਚਨਾਕਾਰੇਨ ਰਾਸਿਂ ਕਤ੍ਵਾ ਆਲਿਮ੍ਪੇਤ੍ਵਾ ਕਟਸਾਰਕੇ ਵਾ ਚਮ੍ਮੇ ਵਾ ਪਟੇ ਵਾ ਵਿਦਤ੍ਥਿਚਤੁਰਙ੍ਗੁਲਪ੍ਪਮਾਣਂ ਛਿਦ੍ਦਂ ਕਾਤਬ੍ਬਂ. ਤਂ ਪੁਰਤੋ ਠਪੇਤ੍ਵਾ ਵੁਤ੍ਤਨਯੇਨੇਵ ਨਿਸੀਦਿਤ੍ਵਾ ਹੇਟ੍ਠਾ ਤਿਣਕਟ੍ਠਂ ਵਾ ਉਪਰਿ ਧੂਮਸਿਖਂ ਵਾ ਅਮਨਸਿਕਰਿਤ੍ਵਾ ਵੇਮਜ੍ਝੇ ਘਨਜਾਲਾਯ ਨਿਮਿਤ੍ਤਂ ਗਣ੍ਹਿਤਬ੍ਬਂ, ਨੀਲਨ੍ਤਿ ਵਾ ਪੀਤਨ੍ਤਿ ਵਾਤਿਆਦਿਵਸੇਨ ਵਣ੍ਣੋ ਨ ਪਚ੍ਚਵੇਕ੍ਖਿਤਬ੍ਬੋ, ਉਣ੍ਹਤ੍ਤਵਸੇਨ ਲਕ੍ਖਣਂ ਨ ਮਨਸਿ ਕਾਤਬ੍ਬਂ. ਨਿਸ੍ਸਯਸਵਣ੍ਣਮੇਵ ਕਤ੍ਵਾ ਉਸ੍ਸਦਵਸੇਨ ਪਣ੍ਣਤ੍ਤਿਧਮ੍ਮੇ ਚਿਤ੍ਤਂ ਠਪੇਤ੍ਵਾ ਪਾਵਕੋ, ਕਣ੍ਹਵਤ੍ਤਨੀ, ਜਾਤਵੇਦੋ, ਹੁਤਾਸਨੋਤਿਆਦੀਸੁ ਅਗ੍ਗਿਨਾਮੇਸੁ ਪਾਕਟਨਾਮਵਸੇਨੇਵ ‘‘ਤੇਜੋ ਤੇਜੋ’’ਤਿ ਭਾਵੇਤਬ੍ਬਂ.

ਤਸ੍ਸੇਵਂ ਭਾਵਯਤੋ ਅਨੁਕ੍ਕਮੇਨ ਵੁਤ੍ਤਨਯੇਨੇਵ ਨਿਮਿਤ੍ਤਦ੍ਵਯਂ ਉਪ੍ਪਜ੍ਜਤਿ. ਤਤ੍ਥ ਉਗ੍ਗਹਨਿਮਿਤ੍ਤਂ ਜਾਲਂ ਛਿਜ੍ਜਿਤ੍ਵਾ ਛਿਜ੍ਜਿਤ੍ਵਾ ਪਤਨਸਦਿਸਂ ਹੁਤ੍ਵਾ ਉਪਟ੍ਠਾਤਿ. ਅਕਤੇ ਗਣ੍ਹਨ੍ਤਸ੍ਸ ਪਨ ਕਸਿਣਦੋਸੋ ਪਞ੍ਞਾਯਤਿ, ਅਲਾਤਖਣ੍ਡਂ ਵਾ ਅਙ੍ਗਾਰਪਿਣ੍ਡੋ ਵਾ ਛਾਰਿਕਾ ਵਾ ਧੂਮੋ ਵਾ ਉਪਟ੍ਠਾਤਿ. ਪਟਿਭਾਗਨਿਮਿਤ੍ਤਂ ਨਿਚ੍ਚਲਂ ਆਕਾਸੇ ਠਪਿਤਰਤ੍ਤਕਮ੍ਬਲਕ੍ਖਣ੍ਡਂ ਵਿਯ ਸੁਵਣ੍ਣਤਾਲਵਣ੍ਟਂ ਵਿਯ ਕਞ੍ਚਨਤ੍ਥਮ੍ਭੋ ਵਿਯ ਚ ਉਪਟ੍ਠਾਤਿ. ਸੋ ਤਸ੍ਸ ਸਹ ਉਪਟ੍ਠਾਨੇਨੇਵ ਉਪਚਾਰਜ੍ਝਾਨਂ, ਵੁਤ੍ਤਨਯੇਨੇਵ ਚਤੁਕ੍ਕਪਞ੍ਚਕਜ੍ਝਾਨਾਨਿ ਚ ਪਾਪੁਣਾਤੀਤਿ. ਤੇਜੋਕਸਿਣਂ.

ਵਾਯੋਕਸਿਣਕਥਾ

੯੩. ਵਾਯੋਕਸਿਣਂ ਭਾਵੇਤੁਕਾਮੇਨਾਪਿ ਵਾਯੁਸ੍ਮਿਂ ਨਿਮਿਤ੍ਤਂ ਗਣ੍ਹਿਤਬ੍ਬਂ. ਤਞ੍ਚ ਖੋ ਦਿਟ੍ਠਵਸੇਨ ਵਾ ਫੁਟ੍ਠਵਸੇਨ ਵਾ. ਵੁਤ੍ਤਞ੍ਹੇਤਂ ਅਟ੍ਠਕਥਾਸੁ ‘‘ਵਾਯੋਕਸਿਣਂ ਉਗ੍ਗਣ੍ਹਨ੍ਤੋ ਵਾਯੁਸ੍ਮਿਂ ਨਿਮਿਤ੍ਤਂ ਗਣ੍ਹਾਤਿ, ਉਚ੍ਛਗ੍ਗਂ ਵਾ ਏਰਿਤਂ ਸਮੇਰਿਤਂ ਉਪਲਕ੍ਖੇਤਿ, ਵੇਲ਼ਗ੍ਗਂ ਵਾ…ਪੇ… ਰੁਕ੍ਖਗ੍ਗਂ ਵਾ ਕੇਸਗ੍ਗਂ ਵਾ ਏਰਿਤਂ ਸਮੇਰਿਤਂ ਉਪਲਕ੍ਖੇਤਿ, ਕਾਯਸ੍ਮਿਂ ਵਾ ਫੁਟ੍ਠਂ ਉਪਲਕ੍ਖੇਤੀ’’ਤਿ. ਤਸ੍ਮਾ ਸਮਸੀਸਟ੍ਠਿਤਂ ਘਨਪਤ੍ਤਂ ਉਚ੍ਛੁਂ ਵਾ ਵੇਲ਼ੁਂ ਵਾ ਰੁਕ੍ਖਂ ਵਾ ਚਤੁਰਙ੍ਗੁਲਪ੍ਪਮਾਣਂ ਘਨਕੇਸਸ੍ਸ ਪੁਰਿਸਸ੍ਸ ਸੀਸਂ ਵਾ ਵਾਤੇਨ ਪਹਰਿਯਮਾਨਂ ਦਿਸ੍ਵਾ ‘‘ਅਯਂ ਵਾਤੋ ਏਤਸ੍ਮਿਂ ਠਾਨੇ ਪਹਰਤੀ’’ਤਿ ਸਤਿਂ ਠਪੇਤ੍ਵਾ, ਯਂ ਵਾ ਪਨਸ੍ਸ ਵਾਤਪਾਨਨ੍ਤਰਿਕਾਯ ਵਾ ਭਿਤ੍ਤਿਛਿਦ੍ਦੇਨ ਵਾ ਪਵਿਸਿਤ੍ਵਾ ਵਾਤੋ ਕਾਯਪ੍ਪਦੇਸਂ ਪਹਰਤਿ, ਤਤ੍ਥ ਸਤਿਂ ਠਪੇਤ੍ਵਾ ਵਾਤਮਾਲੁਤਅਨਿਲਾਦੀਸੁ ਵਾਯੁਨਾਮੇਸੁ ਪਾਕਟਨਾਮਵਸੇਨੇਵ ‘‘ਵਾਤੋ ਵਾਤੋ’’ਤਿ ਭਾਵੇਤਬ੍ਬਂ. ਇਧ ਉਗ੍ਗਹਨਿਮਿਤ੍ਤਵਡ੍ਢਨਤੋ ਓਤਾਰਿਤਮਤ੍ਤਸ੍ਸ ਪਾਯਾਸਸ੍ਸ ਉਸੁਮਵਟ੍ਟਿਸਦਿਸਂ ਚਲਂ ਹੁਤ੍ਵਾ ਉਪਟ੍ਠਾਤਿ. ਪਟਿਭਾਗਨਿਮਿਤ੍ਤਂ ਸਨ੍ਨਿਸਿਨ੍ਨਂ ਹੋਤਿ ਨਿਚ੍ਚਲਂ. ਸੇਸਂ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ. ਵਾਯੋਕਸਿਣਂ.

ਨੀਲਕਸਿਣਕਥਾ

੯੪. ਤਦਨਨ੍ਤਰਂ ਪਨ ਨੀਲਕਸਿਣਂ ਉਗ੍ਗਣ੍ਹਨ੍ਤੋ ਨੀਲਕਸ੍ਮਿਂ ਨਿਮਿਤ੍ਤਂ ਗਣ੍ਹਾਤਿ ਪੁਪ੍ਫਸ੍ਮਿਂ ਵਾ ਵਤ੍ਥਸ੍ਮਿਂ ਵਾ ਵਣ੍ਣਧਾਤੁਯਾ ਵਾਤਿ ਵਚਨਤੋ ਕਤਾਧਿਕਾਰਸ੍ਸ ਪੁਞ੍ਞਵਤੋ ਤਾਵ ਤਥਾਰੂਪਂ ਮਾਲਾਗਚ੍ਛਂ ਵਾ ਪੂਜਾਠਾਨੇਸੁ ਪੁਪ੍ਫਸਨ੍ਥਰਂ ਵਾ ਨੀਲਵਤ੍ਥਮਣੀਨਂ ਵਾ ਅਞ੍ਞਤਰਂ ਦਿਸ੍ਵਾਵ ਨਿਮਿਤ੍ਤਂ ਉਪ੍ਪਜ੍ਜਤਿ. ਇਤਰੇਨ ਨੀਲੁਪ੍ਪਲਗਿਰਿਕਣ੍ਣਿਕਾਦੀਨਿ ਪੁਪ੍ਫਾਨਿ ਗਹੇਤ੍ਵਾ ਯਥਾ ਕੇਸਰਂ ਵਾ ਵਣ੍ਟਂ ਵਾ ਨ ਪਞ੍ਞਾਯਤਿ, ਏਵਂ ਚਙ੍ਗੋਟਕਂ ਵਾ ਕਰਣ੍ਡਪਟਲਂ ਵਾ ਪਤ੍ਤੇਹਿਯੇਵ ਸਮਤਿਤ੍ਤਿਕਂ ਪੂਰੇਤ੍ਵਾ ਸਨ੍ਥਰਿਤਬ੍ਬਂ. ਨੀਲਵਣ੍ਣੇਨ ਵਾ ਵਤ੍ਥੇਨ ਭਣ੍ਡਿਕਂ ਬਨ੍ਧਿਤ੍ਵਾ ਪੂਰੇਤਬ੍ਬਂ. ਮੁਖਵਟ੍ਟਿਯਂ ਵਾ ਅਸ੍ਸ ਭੇਰਿਤਲਮਿਵ ਬਨ੍ਧਿਤਬ੍ਬਂ. ਕਂਸਨੀਲਪਲਾਸਨੀਲਅਞ੍ਜਨਨੀਲਾਨਂ ਵਾ ਅਞ੍ਞਤਰੇਨ ਧਾਤੁਨਾ ਪਥਵੀਕਸਿਣੇ ਵੁਤ੍ਤਨਯੇਨ ਸਂਹਾਰਿਮਂ ਵਾ ਭਿਤ੍ਤਿਯਂਯੇਵ ਵਾ ਕਸਿਣਮਣ੍ਡਲਂ ਕਤ੍ਵਾ ਵਿਸਭਾਗਵਣ੍ਣੇਨ ਪਰਿਚ੍ਛਿਨ੍ਦਿਤਬ੍ਬਂ. ਤਤੋ ਪਥਵੀਕਸਿਣੇ ਵੁਤ੍ਤਨਯੇਨ ‘‘ਨੀਲਂ ਨੀਲ’’ਨ੍ਤਿ ਮਨਸਿਕਾਰੋ ਪਵਤ੍ਤੇਤਬ੍ਬੋ. ਇਧਾਪਿ ਉਗ੍ਗਹਨਿਮਿਤ੍ਤੇ ਕਸਿਣਦੋਸੋ ਪਞ੍ਞਾਯਤਿ, ਕੇਸਰਦਣ੍ਡਕਪਤ੍ਤਨ੍ਤਰਿਕਾਦੀਨਿ ਉਪਟ੍ਠਹਨ੍ਤਿ. ਪਟਿਭਾਗਨਿਮਿਤ੍ਤਂ ਕਸਿਣਮਣ੍ਡਲਤੋ ਮੁਞ੍ਚਿਤ੍ਵਾ ਆਕਾਸੇ ਮਣਿਤਾਲਵਣ੍ਟਸਦਿਸਂ ਉਪਟ੍ਠਾਤਿ. ਸੇਸਂ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ. ਨੀਲਕਸਿਣਂ.

ਪੀਤਕਸਿਣਕਥਾ

੯੫. ਪੀਤਕਸਿਣੇਪਿ ਏਸੇਵ ਨਯੋ. ਵੁਤ੍ਤਞ੍ਹੇਤਂ ਪੀਤਕਸਿਣਂ ਉਗ੍ਗਣ੍ਹਨ੍ਤੋ ਪੀਤਕਸ੍ਮਿਂ ਨਿਮਿਤ੍ਤਂ ਗਣ੍ਹਾਤਿ ਪੁਪ੍ਫਸ੍ਮਿਂ ਵਾ ਵਤ੍ਥਸ੍ਮਿਂ ਵਾ ਵਣ੍ਣਧਾਤੁਯਾ ਵਾਤਿ. ਤਸ੍ਮਾ ਇਧਾਪਿ ਕਤਾਧਿਕਾਰਸ੍ਸ ਪੁਞ੍ਞਵਤੋ ਤਥਾਰੂਪਂ ਮਾਲਾਗਚ੍ਛਂ ਵਾ ਪੁਪ੍ਫਸਨ੍ਥਰਂ ਵਾ ਪੀਤਵਤ੍ਥਧਾਤੂਨਂ ਵਾ ਅਞ੍ਞਤਰਂ ਦਿਸ੍ਵਾਵ ਨਿਮਿਤ੍ਤਂ ਉਪ੍ਪਜ੍ਜਤਿ ਚਿਤ੍ਤਗੁਤ੍ਤਤ੍ਥੇਰਸ੍ਸ ਵਿਯ. ਤਸ੍ਸ ਕਿਰਾਯਸ੍ਮਤੋ ਚਿਤ੍ਤਲਪਬ੍ਬਤੇ ਪਤ੍ਤਙ੍ਗਪੁਪ੍ਫੇਹਿ ਕਤਂ ਆਸਨਪੂਜਂ ਪਸ੍ਸਤੋ ਸਹ ਦਸ੍ਸਨੇਨੇਵ ਆਸਨਪ੍ਪਮਾਣਂ ਨਿਮਿਤ੍ਤਂ ਉਦਪਾਦਿ. ਇਤਰੇਨ ਕਣਿਕਾਰਪੁਪ੍ਫਾਦਿਨਾ ਵਾ ਪੀਤਵਤ੍ਥੇਨ ਵਾ ਧਾਤੁਨਾ ਵਾ ਨੀਲਕਸਿਣੇ ਵੁਤ੍ਤਨਯੇਨੇਵ ਕਸਿਣਂ ਕਤ੍ਵਾ ‘‘ਪੀਤਕਂ ਪੀਤਕ’’ਨ੍ਤਿ ਮਨਸਿਕਾਰੋ ਪਵਤ੍ਤੇਤਬ੍ਬੋ. ਸੇਸਂ ਤਾਦਿਸਮੇਵਾਤਿ. ਪੀਤਕਸਿਣਂ.

ਲੋਹਿਤਕਸਿਣਕਥਾ

੯੬. ਲੋਹਿਤਕਸਿਣੇਪਿ ਏਸੇਵ ਨਯੋ. ਵੁਤ੍ਤਞ੍ਹੇਤਂ ਲੋਹਿਤਕਸਿਣਂ ਉਗ੍ਗਣ੍ਹਨ੍ਤੋ ਲੋਹਿਤਕਸ੍ਮਿਂ ਨਿਮਿਤ੍ਤਂ ਗਣ੍ਹਾਤਿ ਪੁਪ੍ਫਸ੍ਮਿਂ ਵਾ ਵਤ੍ਥਸ੍ਮਿਂ ਵਾ ਵਣ੍ਣਧਾਤੁਯਾ ਵਾਤਿ. ਤਸ੍ਮਾ ਇਧਾਪਿ ਕਤਾਧਿਕਾਰਸ੍ਸ ਪੁਞ੍ਞਵਤੋ ਤਥਾਰੂਪਂ ਬਨ੍ਧੁਜੀਵਕਾਦਿਮਾਲਾਗਚ੍ਛਂ ਵਾ ਪੁਪ੍ਫਸਨ੍ਥਰਂ ਵਾ ਲੋਹਿਤਕਵਤ੍ਥਮਣਿਧਾਤੂਨਂ ਵਾ ਅਞ੍ਞਤਰਂ ਦਿਸ੍ਵਾਵ ਨਿਮਿਤ੍ਤਂ ਉਪ੍ਪਜ੍ਜਤਿ. ਇਤਰੇਨ ਜਯਸੁਮਨਬਨ੍ਧੁਜੀਵਕਰਤ੍ਤਕੋਰਣ੍ਡਕਾਦਿਪੁਪ੍ਫੇਹਿ ਵਾ ਰਤ੍ਤਵਤ੍ਥੇਨ ਵਾ ਧਾਤੁਨਾ ਵਾ ਨੀਲਕਸਿਣੇ ਵੁਤ੍ਤਨਯੇਨੇਵ ਕਸਿਣਂ ਕਤ੍ਵਾ ‘‘ਲੋਹਿਤਕਂ ਲੋਹਿਤਕ’’ਨ੍ਤਿ ਮਨਸਿਕਾਰੋ ਪਵਤ੍ਤੇਤਬ੍ਬੋ. ਸੇਸਂ ਤਾਦਿਸਮੇਵਾਤਿ. ਲੋਹਿਤਕਸਿਣਂ.

ਓਦਾਤਕਸਿਣਕਥਾ

੯੭. ਓਦਾਤਕਸਿਣੇਪਿ ਓਦਾਤਕਸਿਣਂ ਉਗ੍ਗਣ੍ਹਨ੍ਤੋ ਓਦਾਤਸ੍ਮਿਂ ਨਿਮਿਤ੍ਤਂ ਗਣ੍ਹਾਤਿ ਪੁਪ੍ਫਸ੍ਮਿਂ ਵਾ ਵਤ੍ਥਸ੍ਮਿਂ ਵਾ ਵਣ੍ਣਧਾਤੁਯਾ ਵਾਤਿ ਵਚਨਤੋ ਕਤਾਧਿਕਾਰਸ੍ਸ ਤਾਵ ਪੁਞ੍ਞਵਤੋ ਤਥਾਰੂਪਂ ਮਾਲਾਗਚ੍ਛਂ ਵਾ ਵਸ੍ਸਿਕਸੁਮਨਾਦਿਪੁਪ੍ਫਸਨ੍ਥਰਂ ਵਾ ਕੁਮੁਦਪਦੁਮਰਾਸਿਂ ਵਾ ਓਦਾਤਵਤ੍ਥਧਾਤੂਨਂ ਵਾ ਅਞ੍ਞਤਰਂ ਦਿਸ੍ਵਾਵ ਨਿਮਿਤ੍ਤਂ ਉਪ੍ਪਜ੍ਜਤਿ, ਤਿਪੁਮਣ੍ਡਲਰਜਤਮਣ੍ਡਲਚਨ੍ਦਮਣ੍ਡਲੇਸੁਪਿ ਉਪ੍ਪਜ੍ਜਤਿਯੇਵ. ਇਤਰੇਨ ਵੁਤ੍ਤਪ੍ਪਕਾਰੇਹਿ ਓਦਾਤਪੁਪ੍ਫੇਹਿ ਵਾ ਓਦਾਤਵਤ੍ਥੇਨ ਵਾ ਧਾਤੁਨਾ ਵਾ ਨੀਲਕਸਿਣੇ ਵੁਤ੍ਤਨਯੇਨੇਵ ਕਸਿਣਂ ਕਤ੍ਵਾ ‘‘ਓਦਾਤਂ ਓਦਾਤ’’ਨ੍ਤਿ ਮਨਸਿਕਾਰੋ ਪਵਤ੍ਤੇਤਬ੍ਬੋ. ਸੇਸਂ ਤਾਦਿਸਮੇਵਾਤਿ. ਓਦਾਤਕਸਿਣਂ.

ਆਲੋਕਕਸਿਣਕਥਾ

੯੮. ਆਲੋਕਕਸਿਣੇ ਪਨ ਆਲੋਕਕਸਿਣਂ ਉਗ੍ਗਣ੍ਹਨ੍ਤੋ ਆਲੋਕਸ੍ਮਿਂ ਨਿਮਿਤ੍ਤਂ ਗਣ੍ਹਾਤਿ ਭਿਤ੍ਤਿਛਿਦ੍ਦੇ ਵਾ ਤਾਲ਼ਚ੍ਛਿਦ੍ਦੇ ਵਾ ਵਾਤਪਾਨਨ੍ਤਰਿਕਾਯ ਵਾਤਿ ਵਚਨਤੋ ਕਤਾਧਿਕਾਰਸ੍ਸ ਤਾਵ ਪੁਞ੍ਞਵਤੋ ਯਂ ਭਿਤ੍ਤਿਛਿਦ੍ਦਾਦੀਨਂ ਅਞ੍ਞਤਰੇਨ ਸੂਰਿਯਾਲੋਕੋ ਵਾ ਚਨ੍ਦਾਲੋਕੋ ਵਾ ਪਵਿਸਿਤ੍ਵਾ ਭਿਤ੍ਤਿਯਂ ਵਾ ਭੂਮਿਯਂ ਵਾ ਮਣ੍ਡਲਂ ਸਮੁਟ੍ਠਾਪੇਤਿ, ਘਨਪਣ੍ਣਰੁਕ੍ਖਸਾਖਨ੍ਤਰੇਨ ਵਾ ਘਨਸਾਖਾਮਣ੍ਡਪਨ੍ਤਰੇਨ ਵਾ ਨਿਕ੍ਖਮਿਤ੍ਵਾ ਭੂਮਿਯਮੇਵ ਮਣ੍ਡਲਂ ਸਮੁਟ੍ਠਾਪੇਤਿ, ਤਂ ਦਿਸ੍ਵਾਵ ਨਿਮਿਤ੍ਤਂ ਉਪ੍ਪਜ੍ਜਤਿ. ਇਤਰੇਨਾਪਿ ਤਦੇਵ ਵੁਤ੍ਤਪ੍ਪਕਾਰਮੋਭਾਸਮਣ੍ਡਲਂ ‘‘ਓਭਾਸੋ ਓਭਾਸੋ’’ਤਿ ਵਾ ‘‘ਆਲੋਕੋ ਆਲੋਕੋ’’ਤਿ ਵਾ ਭਾਵੇਤਬ੍ਬਂ. ਤਥਾ ਅਸਕ੍ਕੋਨ੍ਤੇਨ ਘਟੇ ਦੀਪਂ ਜਾਲੇਤ੍ਵਾ ਘਟਮੁਖਂ ਪਿਦਹਿਤ੍ਵਾ ਘਟੇ ਛਿਦ੍ਦਂ ਕਤ੍ਵਾ ਭਿਤ੍ਤਿਮੁਖਂ ਠਪੇਤਬ੍ਬਂ. ਤੇਨ ਛਿਦ੍ਦੇਨ ਦੀਪਾਲੋਕੋ ਨਿਕ੍ਖਮਿਤ੍ਵਾ ਭਿਤ੍ਤਿਯਂ ਮਣ੍ਡਲਂ ਕਰੋਤਿ, ਤਂ ਆਲੋਕੋ ਆਲੋਕੋਤਿ ਭਾਵੇਤਬ੍ਬਂ. ਇਦਮਿਤਰੇਹਿ ਚਿਰਟ੍ਠਿਤਿਕਂ ਹੋਤਿ. ਇਧ ਉਗ੍ਗਹਨਿਮਿਤ੍ਤਂ ਭਿਤ੍ਤਿਯਂ ਵਾ ਭੂਮਿਯਂ ਵਾ ਉਟ੍ਠਿਤਮਣ੍ਡਲਸਦਿਸਮੇਵ ਹੋਤਿ. ਪਟਿਭਾਗਨਿਮਿਤ੍ਤਂ ਘਨਵਿਪ੍ਪਸਨ੍ਨਆਲੋਕਪੁਞ੍ਜਸਦਿਸਂ. ਸੇਸਂ ਤਾਦਿਸਮੇਵਾਤਿ. ਆਲੋਕਕਸਿਣਂ.

ਪਰਿਚ੍ਛਿਨ੍ਨਾਕਾਸਕਸਿਣਕਥਾ

੯੯. ਪਰਿਚ੍ਛਿਨ੍ਨਾਕਾਸਕਸਿਣੇਪਿ ਆਕਾਸਕਸਿਣਂ ਉਗ੍ਗਣ੍ਹਨ੍ਤੋ ਆਕਾਸਸ੍ਮਿਂ ਨਿਮਿਤ੍ਤਂ ਗਣ੍ਹਾਤਿ ਭਿਤ੍ਤਿਛਿਦ੍ਦੇ ਵਾ ਤਾਲ਼ਚ੍ਛਿਦ੍ਦੇ ਵਾ ਵਾਤਪਾਨਨ੍ਤਰਿਕਾਯ ਵਾਤਿ ਵਚਨਤੋ ਕਤਾਧਿਕਾਰਸ੍ਸ ਤਾਵ ਪੁਞ੍ਞਵਤੋ ਭਿਤ੍ਤਿਛਿਦ੍ਦਾਦੀਸੁ ਅਞ੍ਞਤਰਂ ਦਿਸ੍ਵਾਵ ਨਿਮਿਤ੍ਤਂ ਉਪ੍ਪਜ੍ਜਤਿ. ਇਤਰੇਨ ਸੁਚ੍ਛਨ੍ਨਮਣ੍ਡਪੇ ਵਾ ਚਮ੍ਮਕਟਸਾਰਕਾਦੀਨਂ ਵਾ ਅਞ੍ਞਤਰਸ੍ਮਿਂ ਵਿਦਤ੍ਥਿਚਤੁਰਙ੍ਗੁਲਪ੍ਪਮਾਣਂ ਛਿਦ੍ਦਂ ਕਤ੍ਵਾ ਤਦੇਵ ਵਾ ਭਿਤ੍ਤਿਛਿਦ੍ਦਾਦਿਭੇਦਂ ਛਿਦ੍ਦਂ ‘‘ਆਕਾਸੋ ਆਕਾਸੋ’’ਤਿ ਭਾਵੇਤਬ੍ਬਂ. ਇਧ ਉਗ੍ਗਹਨਿਮਿਤ੍ਤਂ ਸਦ੍ਧਿਂ ਭਿਤ੍ਤਿਪਰਿਯਨ੍ਤਾਦੀਹਿ ਛਿਦ੍ਦਸਦਿਸਮੇਵ ਹੋਤਿ, ਵਡ੍ਢਿਯਮਾਨਮ੍ਪਿ ਨ ਵਡ੍ਢਤਿ. ਪਟਿਭਾਗਨਿਮਿਤ੍ਤਮਾਕਾਸਮਣ੍ਡਲਮੇਵ ਹੁਤ੍ਵਾ ਉਪਟ੍ਠਾਤਿ, ਵਡ੍ਢਿਯਮਾਨਞ੍ਚ ਵਡ੍ਢਤਿ. ਸੇਸਂ ਪਥਵੀਕਸਿਣੇ ਵੁਤ੍ਤਨਯੇਨੇਵ ਵੇਦਿਤਬ੍ਬਨ੍ਤਿ. ਪਰਿਚ੍ਛਿਨ੍ਨਾਕਾਸਕਸਿਣਂ.

ਇਤਿ ਕਸਿਣਾਨਿ ਦਸਬਲੋ,

ਦਸ ਯਾਨਿ ਅਵੋਚ ਸਬ੍ਬਧਮ੍ਮਦਸੋ;

ਰੂਪਾਵਚਰਮ੍ਹਿ ਚਤੁਕ੍ਕਪਞ੍ਚਕਜ੍ਝਾਨਹੇਤੂਨਿ.

ਏਵਂ ਤਾਨਿ ਚ ਤੇਸਞ੍ਚ,

ਭਾਵਨਾਨਯਮਿਮਂ ਵਿਦਿਤ੍ਵਾਨ;

ਤੇਸ੍ਵੇਵ ਅਯਂ ਭਿਯ੍ਯੋ,

ਪਕਿਣ੍ਣਕਕਥਾਪਿ ਵਿਞ੍ਞੇਯ੍ਯਾ.

ਪਕਿਣ੍ਣਕਕਥਾ

੧੦੦. ਇਮੇਸੁ ਹਿ ਪਥਵੀਕਸਿਣਵਸੇਨ ਏਕੋਪਿ ਹੁਤ੍ਵਾ ਬਹੁਧਾ ਹੋਤੀਤਿਆਦਿਭਾਵੋ, ਆਕਾਸੇ ਵਾ ਉਦਕੇ ਵਾ ਪਥਵਿਂ ਨਿਮ੍ਮਿਨਿਤ੍ਵਾ ਪਦਸਾ ਗਮਨਂ, ਠਾਨਨਿਸਜ੍ਜਾਦਿਕਪ੍ਪਨਂ ਵਾ, ਪਰਿਤ੍ਤਅਪ੍ਪਮਾਣਨਯੇਨ ਅਭਿਭਾਯਤਨਪਟਿਲਾਭੋਤਿ ਏਵਮਾਦੀਨਿ ਇਜ੍ਝਨ੍ਤਿ.

ਆਪੋਕਸਿਣਵਸੇਨ ਪਥਵਿਯਂ ਉਮ੍ਮੁਜ੍ਜਨਨਿਮ੍ਮੁਜ੍ਜਨਂ, ਉਦਕਵੁਟ੍ਠਿਸਮੁਪ੍ਪਾਦਨਂ, ਨਦੀਸਮੁਦ੍ਦਾਦਿਨਿਮ੍ਮਾਨਂ, ਪਥਵੀਪਬ੍ਬਤਪਾਸਾਦਾਦੀਨਂ ਕਮ੍ਪਨਨ੍ਤਿ ਏਵਮਾਦੀਨਿ ਇਜ੍ਝਨ੍ਤਿ.

ਤੇਜੋਕਸਿਣਵਸੇਨ ਧੂਮਾਯਨਾ, ਪਜ੍ਜਲਨਾ, ਅਙ੍ਗਾਰਵੁਟ੍ਠਿਸਮੁਪ੍ਪਾਦਨਂ, ਤੇਜਸਾ ਤੇਜੋਪਰਿਯਾਦਾਨਂ, ਯਦੇਵ ਸੋ ਇਚ੍ਛਤਿ ਤਸ੍ਸ ਡਹਨਸਮਤ੍ਥਤਾ, ਦਿਬ੍ਬੇਨ ਚਕ੍ਖੁਨਾ ਰੂਪਦਸ੍ਸਨਤ੍ਥਾਯ ਆਲੋਕਕਰਣਂ, ਪਰਿਨਿਬ੍ਬਾਨਸਮਯੇ ਤੇਜੋਧਾਤੁਯਾ ਸਰੀਰਜ੍ਝਾਪਨਨ੍ਤਿ ਏਵਮਾਦੀਨਿ ਇਜ੍ਝਨ੍ਤਿ.

ਵਾਯੋਕਸਿਣਵਸੇਨ ਵਾਯੁਗਤਿਗਮਨਂ, ਵਾਤਵੁਟ੍ਠਿਸਮੁਪ੍ਪਾਦਨਨ੍ਤਿ ਏਵਮਾਦੀਨਿ ਇਜ੍ਝਨ੍ਤਿ.

ਨੀਲਕਸਿਣਵਸੇਨ ਨੀਲਰੂਪਨਿਮ੍ਮਾਨਂ, ਅਨ੍ਧਕਾਰਕਰਣਂ, ਸੁਵਣ੍ਣਦੁਬ੍ਬਣ੍ਣਨਯੇਨ ਅਭਿਭਾਯਤਨਪਟਿਲਾਭੋ, ਸੁਭਵਿਮੋਕ੍ਖਾਧਿਗਮੋਤਿ ਏਵਮਾਦੀਨਿ ਇਜ੍ਝਨ੍ਤਿ.

ਪੀਤਕਸਿਣਵਸੇਨ ਪੀਤਕਰੂਪਨਿਮ੍ਮਾਨਂ, ਸੁਵਣ੍ਣਨ੍ਤਿ ਅਧਿਮੁਚ੍ਚਨਾ, ਵੁਤ੍ਤਨਯੇਨੇਵ ਅਭਿਭਾਯਤਨਪਟਿਲਾਭੋ, ਸੁਭਵਿਮੋਕ੍ਖਾਧਿਗਮੋ ਚਾਤਿ ਏਵਮਾਦੀਨਿ ਇਜ੍ਝਨ੍ਤਿ.

ਲੋਹਿਤਕਸਿਣਵਸੇਨ ਲੋਹਿਤਕਰੂਪਨਿਮ੍ਮਾਨਂ, ਵੁਤ੍ਤਨਯੇਨੇਵ ਅਭਿਭਾਯਤਨਪਟਿਲਾਭੋ, ਸੁਭਵਿਮੋਕ੍ਖਾਧਿਗਮੋਤਿ ਏਵਮਾਦੀਨਿ ਇਜ੍ਝਨ੍ਤਿ.

ਓਦਾਤਕਸਿਣਵਸੇਨ ਓਦਾਤਰੂਪਨਿਮ੍ਮਾਨਂ, ਥਿਨਮਿਦ੍ਧਸ੍ਸ ਦੂਰਭਾਵਕਰਣਂ, ਅਨ੍ਧਕਾਰਵਿਧਮਨਂ, ਦਿਬ੍ਬੇਨ ਚਕ੍ਖੁਨਾ ਰੂਪਦਸ੍ਸਨਤ੍ਥਾਯ ਆਲੋਕਕਰਣਨ੍ਤਿ ਏਵਮਾਦੀਨਿ ਇਜ੍ਝਨ੍ਤਿ.

ਆਲੋਕਕਸਿਣਵਸੇਨ ਸਪ੍ਪਭਾਰੂਪਨਿਮ੍ਮਾਨਂ, ਥਿਨਮਿਦ੍ਧਸ੍ਸ ਦੂਰਭਾਵਕਰਣਂ, ਅਨ੍ਧਕਾਰਵਿਧਮਨਂ, ਦਿਬ੍ਬੇਨ ਚਕ੍ਖੁਨਾ ਰੂਪਦਸ੍ਸਨਤ੍ਥਂ ਆਲੋਕਕਰਣਨ੍ਤਿ ਏਵਮਾਦੀਨਿ ਇਜ੍ਝਨ੍ਤਿ.

ਆਕਾਸਕਸਿਣਵਸੇਨ ਪਟਿਚ੍ਛਨ੍ਨਾਨਂ ਵਿਵਟਕਰਣਂ, ਅਨ੍ਤੋਪਥਵੀਪਬ੍ਬਤਾਦੀਸੁਪਿ ਆਕਾਸਂ ਨਿਮ੍ਮਿਨਿਤ੍ਵਾ ਇਰਿਯਾਪਥਕਪ੍ਪਨਂ, ਤਿਰੋਕੁਡ੍ਡਾਦੀਸੁ ਅਸਜ੍ਜਮਾਨਗਮਨਨ੍ਤਿ ਏਵਮਾਦੀਨਿ ਇਜ੍ਝਨ੍ਤਿ.

ਸਬ੍ਬਾਨੇਵ ਉਦ੍ਧਂ ਅਧੋ ਤਿਰਿਯਂ ਅਦ੍ਵਯਂ ਅਪ੍ਪਮਾਣਨ੍ਤਿ ਇਮਂ ਪਭੇਦਂ ਲਭਨ੍ਤਿ. ਵੁਤ੍ਤਞ੍ਹੇਤਂ ‘‘ਪਥਵੀਕਸਿਣਮੇਕੋ ਸਞ੍ਜਾਨਾਤਿ. ਉਦ੍ਧਮਧੋਤਿਰਿਯਂ ਅਦ੍ਵਯਮਪ੍ਪਮਾਣ’’ਨ੍ਤਿਆਦਿ.

ਤਤ੍ਥ ਉਦ੍ਧਨ੍ਤਿ ਉਪਰਿਗਗਨਤਲਾਭਿਮੁਖਂ. ਅਧੋਤਿ ਹੇਟ੍ਠਾਭੂਮਿਤਲਾਭਿਮੁਖਂ. ਤਿਰਿਯਨ੍ਤਿ ਖੇਤ੍ਤਮਣ੍ਡਲਮਿਵ ਸਮਨ੍ਤਾ ਪਰਿਚ੍ਛਿਨ੍ਦਿਤਂ. ਏਕਚ੍ਚੋ ਹਿ ਉਦ੍ਧਮੇਵ ਕਸਿਣਂ ਵਡ੍ਢੇਤਿ, ਏਕਚ੍ਚੋ ਅਧੋ, ਏਕਚ੍ਚੋ ਸਮਨ੍ਤਤੋ. ਤੇਨ ਤੇਨ ਵਾ ਕਾਰਣੇਨ ਏਵਂ ਪਸਾਰੇਤਿ. ਆਲੋਕਮਿਵ ਦਿਬ੍ਬਚਕ੍ਖੁਨਾ ਰੂਪਦਸ੍ਸਨਕਾਮੋ. ਤੇਨ ਵੁਤ੍ਤਂ ਉਦ੍ਧਮਧੋਤਿਰਿਯਨ੍ਤਿ. ਅਦ੍ਵਯਨ੍ਤਿ ਇਦਂ ਪਨ ਏਕਸ੍ਸ ਅਞ੍ਞਭਾਵਾਨੁਪਗਮਨਤ੍ਥਂ ਵੁਤ੍ਤਂ. ਯਥਾ ਹਿ ਉਦਕਂ ਪਵਿਟ੍ਠਸ੍ਸ ਸਬ੍ਬਦਿਸਾਸੁ ਉਦਕਮੇਵ ਹੋਤਿ, ਨ ਅਞ੍ਞਂ, ਏਵਮੇਵ ਪਥਵੀਕਸਿਣਂ ਪਥਵੀਕਸਿਣਮੇਵ ਹੋਤਿ, ਨਤ੍ਥਿ ਤਸ੍ਸ ਅਞ੍ਞੋ ਕਸਿਣਸਮ੍ਭੇਦੋਤਿ. ਏਸੇਵ ਨਯੋ ਸਬ੍ਬਤ੍ਥ. ਅਪ੍ਪਮਾਣਨ੍ਤਿ ਇਦਂ ਤਸ੍ਸ ਫਰਣਅਪ੍ਪਮਾਣਵਸੇਨ ਵੁਤ੍ਤਂ. ਤਞ੍ਹਿ ਚੇਤਸਾ ਫਰਨ੍ਤੋ ਸਕਲਮੇਵ ਫਰਤਿ. ਨ ਅਯਮਸ੍ਸ ਆਦਿ ਇਦਂ ਮਜ੍ਝਨ੍ਤਿ ਪਮਾਣਂ ਗਣ੍ਹਾਤੀਤਿ.

੧੦੧. ਯੇ ਚ ਤੇ ਸਤ੍ਤਾ ਕਮ੍ਮਾਵਰਣੇਨ ਵਾ ਸਮਨ੍ਨਾਗਤਾ ਕਿਲੇਸਾਵਰਣੇਨ ਵਾ ਸਮਨ੍ਨਾਗਤਾ ਵਿਪਾਕਾਵਰਣੇਨ ਵਾ ਸਮਨ੍ਨਾਗਤਾ ਅਸਦ੍ਧਾ ਅਚ੍ਛਨ੍ਦਿਕਾ ਦੁਪ੍ਪਞ੍ਞਾ ਅਭਬ੍ਬਾ ਨਿਯਾਮਂ ਓਕ੍ਕਮਿਤੁਂ ਕੁਸਲੇਸੁ ਧਮ੍ਮੇਸੁ ਸਮ੍ਮਤ੍ਤਨ੍ਤਿ ਵੁਤ੍ਤਾ, ਤੇਸਮੇਕਸ੍ਸਾਪੇਕਕਸਿਣੇਪਿ ਭਾਵਨਾ ਨ ਇਜ੍ਝਤਿ. ਤਤ੍ਥ ਕਮ੍ਮਾਵਰਣੇਨ ਸਮਨ੍ਨਾਗਤਾਤਿ ਆਨਨ੍ਤਰਿਯਕਮ੍ਮਸਮਙ੍ਗਿਨੋ. ਕਿਲੇਸਾਵਰਣੇਨ ਸਮਨ੍ਨਾਗਤਾਤਿ ਨਿਯਤਮਿਚ੍ਛਾਦਿਟ੍ਠਿਕਾ ਚੇਵ ਉਭਤੋਬ੍ਯਞ੍ਜਨਕਪਣ੍ਡਕਾ ਚ. ਵਿਪਾਕਾਵਰਣੇਨ ਸਮਨ੍ਨਾਗਤਾਤਿ ਅਹੇਤੁਕਦ੍ਵਿਹੇਤੁਕਪਟਿਸਨ੍ਧਿਕਾ. ਅਸਦ੍ਧਾਤਿ ਬੁਦ੍ਧਾਦੀਸੁ ਸਦ੍ਧਾਵਿਰਹਿਤਾ. ਅਚ੍ਛਨ੍ਦਿਕਾਤਿ ਅਪਚ੍ਚਨੀਕਪਟਿਪਦਾਯਂ ਛਨ੍ਦਵਿਰਹਿਤਾ. ਦੁਪ੍ਪਞ੍ਞਾਤਿ ਲੋਕਿਯਲੋਕੁਤ੍ਤਰਸਮ੍ਮਾਦਿਟ੍ਠਿਯਾ ਵਿਰਹਿਤਾ. ਅਭਬ੍ਬਾ ਨਿਯਾਮਂ ਓਕ੍ਕਮਿਤੁਂ ਕੁਸਲੇਸੁ ਧਮ੍ਮੇਸੁ ਸਮ੍ਮਤ੍ਤਨ੍ਤਿ ਕੁਸਲੇਸੁ ਧਮ੍ਮੇਸੁ ਨਿਯਾਮਸਙ੍ਖਾਤਂ ਸਮ੍ਮਤ੍ਤਸਙ੍ਖਾਤਞ੍ਚ ਅਰਿਯਮਗ੍ਗਂ ਓਕ੍ਕਮਿਤੁਂ ਅਭਬ੍ਬਾਤਿ ਅਤ੍ਥੋ. ਨ ਕੇਵਲਞ੍ਚ ਕਸਿਣੇਯੇਵ, ਅਞ੍ਞੇਸੁਪਿ ਕਮ੍ਮਟ੍ਠਾਨੇਸੁ ਏਤੇਸਮੇਕਸ੍ਸਪਿ ਭਾਵਨਾ ਨ ਇਜ੍ਝਤਿ. ਤਸ੍ਮਾ ਵਿਗਤਵਿਪਾਕਾਵਰਣੇਨਪਿ ਕੁਲਪੁਤ੍ਤੇਨ ਕਮ੍ਮਾਵਰਣਞ੍ਚ ਕਿਲੇਸਾਵਰਣਞ੍ਚ ਆਰਕਾ ਪਰਿਵਜ੍ਜੇਤ੍ਵਾ ਸਦ੍ਧਮ੍ਮਸ੍ਸਵਨਸਪ੍ਪੁਰਿਸੂਪਨਿਸ੍ਸਯਾਦੀਹਿ ਸਦ੍ਧਞ੍ਚ ਛਨ੍ਦਞ੍ਚ ਪਞ੍ਞਞ੍ਚ ਵਡ੍ਢੇਤ੍ਵਾ ਕਮ੍ਮਟ੍ਠਾਨਾਨੁਯੋਗੇ ਯੋਗੋ ਕਰਣੀਯੋਤਿ.

ਇਤਿ ਸਾਧੁਜਨਪਾਮੋਜ੍ਜਤ੍ਥਾਯ ਕਤੇ ਵਿਸੁਦ੍ਧਿਮਗ੍ਗੇ

ਸਮਾਧਿਭਾਵਨਾਧਿਕਾਰੇ

ਸੇਸਕਸਿਣਨਿਦ੍ਦੇਸੋ ਨਾਮ

ਪਞ੍ਚਮੋ ਪਰਿਚ੍ਛੇਦੋ.