੬. ਅਸੁਭਕਮ੍ਮਟ੍ਠਾਨਨਿਦ੍ਦੇਸੋ

ਉਦ੍ਧੁਮਾਤਕਾਦਿਪਦਤ੍ਥਵਣ੍ਣਨਾ

੧੦੨. ਕਸਿਣਾਨਨ੍ਤਰਮੁਦ੍ਦਿਟ੍ਠੇਸੁ ਪਨ ਉਦ੍ਧੁਮਾਤਕਂ, ਵਿਨੀਲਕਂ, ਵਿਪੁਬ੍ਬਕਂ, ਵਿਚ੍ਛਿਦ੍ਦਕਂ, ਵਿਕ੍ਖਾਯਿਤਕਂ, ਵਿਕ੍ਖਿਤ੍ਤਕਂ, ਹਤਵਿਕ੍ਖਿਤ੍ਤਕਂ, ਲੋਹਿਤਕਂ, ਪੁਲ਼ਵਕਂ, ਅਟ੍ਠਿਕਨ੍ਤਿ ਦਸਸੁ ਅਵਿਞ੍ਞਾਣਕਾਸੁਭੇਸੁ ਭਸ੍ਤਾ ਵਿਯ ਵਾਯੁਨਾ ਉਦ੍ਧਂ ਜੀਵਿਤਪਰਿਯਾਦਾਨਾ ਯਥਾਨੁਕ੍ਕਮਂ ਸਮੁਗ੍ਗਤੇਨ ਸੂਨਭਾਵੇਨ ਉਦ੍ਧੁਮਾਤਤ੍ਤਾ ਉਦ੍ਧੁਮਾਤਂ, ਉਦ੍ਧੁਮਾਤਮੇਵ ਉਦ੍ਧੁਮਾਤਕਂ. ਪਟਿਕ੍ਕੂਲਤ੍ਤਾ ਵਾ ਕੁਚ੍ਛਿਤਂ ਉਦ੍ਧੁਮਾਤਨ੍ਤਿ ਉਦ੍ਧੁਮਾਤਕਂ. ਤਥਾਰੂਪਸ੍ਸ ਛਵਸਰੀਰਸ੍ਸੇਤਂ ਅਧਿਵਚਨਂ.

ਵਿਨੀਲਂ ਵੁਚ੍ਚਤਿ ਵਿਪਰਿਭਿਨ੍ਨਨੀਲਵਣ੍ਣਂ, ਵਿਨੀਲਮੇਵ ਵਿਨੀਲਕਂ. ਪਟਿਕ੍ਕੂਲਤ੍ਤਾ ਵਾ ਕੁਚ੍ਛਿਤਂ ਵਿਨੀਲਨ੍ਤਿ ਵਿਨੀਲਕਂ. ਮਂਸੁਸ੍ਸਦਟ੍ਠਾਨੇਸੁ ਰਤ੍ਤਵਣ੍ਣਸ੍ਸ ਪੁਬ੍ਬਸਨ੍ਨਿਚਯਟ੍ਠਾਨੇਸੁ ਸੇਤਵਣ੍ਣਸ੍ਸ ਯੇਭੁਯ੍ਯੇਨ ਚ ਨੀਲਵਣ੍ਣਸ੍ਸ ਨੀਲਟ੍ਠਾਨੇ ਨੀਲਸਾਟਕਪਾਰੁਤਸ੍ਸੇਵ ਛਵਸਰੀਰਸ੍ਸੇਤਮਧਿਵਚਨਂ.

ਪਰਿਭਿਨ੍ਨਟ੍ਠਾਨੇਸੁ ਵਿਸ੍ਸਨ੍ਦਮਾਨਂ ਪੁਬ੍ਬਂ ਵਿਪੁਬ੍ਬਂ, ਵਿਪੁਬ੍ਬਮੇਵ ਵਿਪੁਬ੍ਬਕਂ. ਪਟਿਕ੍ਕੂਲਤ੍ਤਾ ਵਾ ਕੁਚ੍ਛਿਤਂ ਵਿਪੁਬ੍ਬਨ੍ਤਿ ਵਿਪੁਬ੍ਬਕਂ. ਤਥਾਰੂਪਸ੍ਸ ਛਵਸਰੀਰਸ੍ਸੇਤਮਧਿਵਚਨਂ.

ਵਿਚ੍ਛਿਦ੍ਦਂ ਵੁਚ੍ਚਤਿ ਦ੍ਵਿਧਾ ਛਿਨ੍ਦਨੇਨ ਅਪਧਾਰਿਤਂ, ਵਿਚ੍ਛਿਦ੍ਦਮੇਵ ਵਿਚ੍ਛਿਦ੍ਦਕਂ. ਪਟਿਕ੍ਕੂਲਤ੍ਤਾ ਵਾ ਕੁਚ੍ਛਿਤਂ ਵਿਚ੍ਛਿਦ੍ਦਨ੍ਤਿ ਵਿਚ੍ਛਿਦ੍ਦਕਂ. ਵੇਮਜ੍ਝੇ ਛਿਨ੍ਨਸ੍ਸ ਛਵਸਰੀਰਸ੍ਸੇਤਮਧਿਵਚਨਂ.

ਇਤੋ ਚ ਏਤ੍ਤੋ ਚ ਵਿਵਿਧਾਕਾਰੇਨ ਸੋਣਸਿਙ੍ਗਾਲਾਦੀਹਿ ਖਾਦਿਤਨ੍ਤਿ ਵਿਕ੍ਖਾਯਿਤਂ, ਵਿਕ੍ਖਾਯਿਤਮੇਵ ਵਿਕ੍ਖਾਯਿਤਕਂ. ਪਟਿਕ੍ਕੂਲਤ੍ਤਾ ਵਾ ਕੁਚ੍ਛਿਤਂ ਵਿਕ੍ਖਾਯਿਤਨ੍ਤਿ ਵਿਕ੍ਖਾਯਿਤਕਂ. ਤਥਾਰੂਪਸ੍ਸ ਛਵਸਰੀਰਸ੍ਸੇਤਮਧਿਵਚਨਂ.

ਵਿਵਿਧਂ ਖਿਤ੍ਤਂ ਵਿਕ੍ਖਿਤ੍ਤਂ, ਵਿਕ੍ਖਿਤ੍ਤਮੇਵ ਵਿਕ੍ਖਿਤ੍ਤਕਂ. ਪਟਿਕ੍ਕੂਲਤ੍ਤਾ ਵਾ ਕੁਚ੍ਛਿਤਂ ਵਿਕ੍ਖਿਤ੍ਤਨ੍ਤਿ ਵਿਕ੍ਖਿਤ੍ਤਕਂ. ਅਞ੍ਞੇਨ ਹਤ੍ਥਂ ਅਞ੍ਞੇਨ ਪਾਦਂ ਅਞ੍ਞੇਨ ਸੀਸਨ੍ਤਿ ਏਵਂ ਤਤੋ ਤਤੋ ਖਿਤ੍ਤਸ੍ਸ ਛਵਸਰੀਰਸ੍ਸੇਤਮਧਿਵਚਨਂ.

ਹਤਞ੍ਚ ਤਂ ਪੁਰਿਮਨਯੇਨੇਵ ਵਿਕ੍ਖਿਤ੍ਤਕਞ੍ਚਾਤਿ ਹਤਵਿਕ੍ਖਿਤ੍ਤਕਂ. ਕਾਕਪਦਾਕਾਰੇਨ ਅਙ੍ਗਪਚ੍ਚਙ੍ਗੇਸੁ ਸਤ੍ਥੇਨ ਹਨਿਤ੍ਵਾ ਵੁਤ੍ਤਨਯੇਨ ਵਿਕ੍ਖਿਤ੍ਤਸ੍ਸ ਛਵਸਰੀਰਸ੍ਸੇਤਮਧਿਵਚਨਂ.

ਲੋਹਿਤਂ ਕਿਰਤਿ ਵਿਕ੍ਖਿਪਤਿ ਇਤੋ ਚਿਤੋ ਚ ਪਗ੍ਘਰਤੀਤਿ ਲੋਹਿਤਕਂ. ਪਗ੍ਘਰਿਤਲੋਹਿਤਮਕ੍ਖਿਤਸ੍ਸ ਛਵਸਰੀਰਸ੍ਸੇਤਮਧਿਵਚਨਂ.

ਪੁਲ਼ਵਾ ਵੁਚ੍ਚਨ੍ਤਿ ਕਿਮਯੋ, ਪੁਲ਼ਵੇ ਕਿਰਤੀਤਿ ਪੁਲ਼ਵਕਂ. ਕਿਮਿਪਰਿਪੁਣ੍ਣਸ੍ਸ ਛਵਸਰੀਰਸ੍ਸੇਤਮਧਿਵਚਨਂ.

ਅਟ੍ਠਿਯੇਵ ਅਟ੍ਠਿਕਂ. ਪਟਿਕ੍ਕੂਲਤ੍ਤਾ ਵਾ ਕੁਚ੍ਛਿਤਂ ਅਟ੍ਠੀਤਿ ਅਟ੍ਠਿਕਂ. ਅਟ੍ਠਿਸਙ੍ਖਲਿਕਾਯਪਿ ਏਕਟ੍ਠਿਕਸ੍ਸਪੇਤਮਧਿਵਚਨਂ. ਇਮਾਨਿ ਚ ਪਨ ਉਦ੍ਧੁਮਾਤਕਾਦੀਨਿ ਨਿਸ੍ਸਾਯ ਉਪ੍ਪਨ੍ਨਨਿਮਿਤ੍ਤਾਨਮ੍ਪਿ ਨਿਮਿਤ੍ਤੇਸੁ ਪਟਿਲਦ੍ਧਜ੍ਝਾਨਾਨਮ੍ਪੇਤਾਨੇਵ ਨਾਮਾਨਿ.

ਉਦ੍ਧੁਮਾਤਕਕਮ੍ਮਟ੍ਠਾਨਂ

੧੦੩. ਤਤ੍ਥ ਉਦ੍ਧੁਮਾਤਕਸਰੀਰੇ ਉਦ੍ਧੁਮਾਤਕਨਿਮਿਤ੍ਤਂ ਉਪ੍ਪਾਦੇਤ੍ਵਾ ਉਦ੍ਧੁਮਾਤਕਸਙ੍ਖਾਤਂ ਝਾਨਂ ਭਾਵੇਤੁਕਾਮੇਨ ਯੋਗਿਨਾ ਪਥਵੀਕਸਿਣੇ ਵੁਤ੍ਤਨਯੇਨੇਵ ਵੁਤ੍ਤਪ੍ਪਕਾਰਂ ਆਚਰਿਯਂ ਉਪਸਙ੍ਕਮਿਤ੍ਵਾ ਕਮ੍ਮਟ੍ਠਾਨਂ ਉਗ੍ਗਹੇਤਬ੍ਬਂ. ਤੇਨਸ੍ਸ ਕਮ੍ਮਟ੍ਠਾਨਂ ਕਥੇਨ੍ਤੇਨ ਅਸੁਭਨਿਮਿਤ੍ਤਤ੍ਥਾਯ ਗਮਨਵਿਧਾਨਂ, ਸਮਨ੍ਤਾ ਨਿਮਿਤ੍ਤੁਪਲਕ੍ਖਣਂ, ਏਕਾਦਸਵਿਧੇਨ ਨਿਮਿਤ੍ਤਗ੍ਗਾਹੋ, ਗਤਾਗਤਮਗ੍ਗਪਚ੍ਚਵੇਕ੍ਖਣਨ੍ਤਿ ਏਵਂ ਅਪ੍ਪਨਾਵਿਧਾਨਪਰਿਯੋਸਾਨਂ ਸਬ੍ਬਂ ਕਥੇਤਬ੍ਬਂ. ਤੇਨਾਪਿ ਸਬ੍ਬਂ ਸਾਧੁਕਂ ਉਗ੍ਗਹੇਤ੍ਵਾ ਪੁਬ੍ਬੇ ਵੁਤ੍ਤਪ੍ਪਕਾਰਂ ਸੇਨਾਸਨਂ ਉਪਗਨ੍ਤ੍ਵਾ ਉਦ੍ਧੁਮਾਤਕਨਿਮਿਤ੍ਤਂ ਪਰਿਯੇਸਨ੍ਤੇਨ ਵਿਹਾਤਬ੍ਬਂ.

੧੦੪. ਏਵਂ ਵਿਹਰਨ੍ਤੇਨ ਚ ਅਸੁਕਸ੍ਮਿਂ ਨਾਮ ਗਾਮਦ੍ਵਾਰੇ ਵਾ ਅਟਵਿਮੁਖੇ ਵਾ ਪਨ੍ਥੇ ਵਾ ਪਬ੍ਬਤਪਾਦੇ ਵਾ ਰੁਕ੍ਖਮੂਲੇ ਵਾ ਸੁਸਾਨੇ ਵਾ ਉਦ੍ਧੁਮਾਤਕਸਰੀਰਂ ਨਿਕ੍ਖਿਤ੍ਤਨ੍ਤਿ ਕਥੇਨ੍ਤਾਨਂ ਵਚਨਂ ਸੁਤ੍ਵਾਪਿ ਨ ਤਾਵਦੇਵ ਅਤਿਤ੍ਥੇਨ ਪਕ੍ਖਨ੍ਦਨ੍ਤੇਨ ਵਿਯ ਗਨ੍ਤਬ੍ਬਂ. ਕਸ੍ਮਾ? ਅਸੁਭਂ ਹਿ ਨਾਮੇਤਂ ਵਾਲ਼ਮਿਗਾਧਿਟ੍ਠਿਤਮ੍ਪਿ ਅਮਨੁਸ੍ਸਾਧਿਟ੍ਠਿਤਮ੍ਪਿ ਹੋਤਿ. ਤਤ੍ਰਸ੍ਸ ਜੀਵਿਤਨ੍ਤਰਾਯੋਪਿ ਸਿਯਾ. ਗਮਨਮਗ੍ਗੋ ਵਾ ਪਨੇਤ੍ਥ ਗਾਮਦ੍ਵਾਰੇਨ ਵਾ ਨਹਾਨਤਿਤ੍ਥੇਨ ਵਾ ਕੇਦਾਰਕੋਟਿਯਾ ਵਾ ਹੋਤਿ. ਤਤ੍ਥ ਵਿਸਭਾਗਰੂਪਂ ਆਪਾਥਮਾਗਚ੍ਛਤਿ, ਤਦੇਵ ਵਾ ਸਰੀਰਂ ਵਿਸਭਾਗਂ ਹੋਤਿ. ਪੁਰਿਸਸ੍ਸ ਹਿ ਇਤ੍ਥਿਸਰੀਰਂ ਇਤ੍ਥਿਯਾ ਚ ਪੁਰਿਸਸਰੀਰਂ ਵਿਸਭਾਗਂ, ਤਦੇਤਂ ਅਧੁਨਾਮਤਂ ਸੁਭਤੋਪਿ ਉਪਟ੍ਠਾਤਿ, ਤੇਨਸ੍ਸ ਬ੍ਰਹ੍ਮਚਰਿਯਨ੍ਤਰਾਯੋਪਿ ਸਿਯਾ. ਸਚੇ ਪਨ ‘‘ਨਯਿਦਂ ਮਾਦਿਸਸ੍ਸ ਭਾਰਿਯ’’ਨ੍ਤਿ ਅਤ੍ਤਾਨਂ ਤਕ੍ਕਯਤਿ, ਏਵਂ ਤਕ੍ਕਯਮਾਨੇਨ ਗਨ੍ਤਬ੍ਬਂ.

੧੦੫. ਗਚ੍ਛਨ੍ਤੇਨ ਚ ਸਙ੍ਘਤ੍ਥੇਰਸ੍ਸ ਵਾ ਅਞ੍ਞਤਰਸ੍ਸ ਵਾ ਅਭਿਞ੍ਞਾਤਸ੍ਸ ਭਿਕ੍ਖੁਨੋ ਕਥੇਤ੍ਵਾ ਗਨ੍ਤਬ੍ਬਂ. ਕਸ੍ਮਾ? ਸਚੇ ਹਿਸ੍ਸ ਸੁਸਾਨੇ ਅਮਨੁਸ੍ਸਸੀਹਬ੍ਯਗ੍ਘਾਦੀਨਂ ਰੂਪਸਦ੍ਦਾਦਿਅਨਿਟ੍ਠਾਰਮ੍ਮਣਾਭਿਭੂਤਸ੍ਸ ਅਙ੍ਗਪਚ੍ਚਙ੍ਗਾਨਿ ਵਾ ਪਵੇਧੇਨ੍ਤਿ, ਭੁਤ੍ਤਂ ਵਾ ਨ ਪਰਿਸਣ੍ਠਾਤਿ, ਅਞ੍ਞੋ ਵਾ ਆਬਾਧੋ ਹੋਤਿ. ਅਥਸ੍ਸ ਸੋ ਵਿਹਾਰੇ ਪਤ੍ਤਚੀਵਰਂ ਸੁਰਕ੍ਖਿਤਂ ਕਰਿਸ੍ਸਤਿ. ਦਹਰੇ ਵਾ ਸਾਮਣੇਰੇ ਵਾ ਪਹਿਣਿਤ੍ਵਾ ਤਂ ਭਿਕ੍ਖੁਂ ਪਟਿਜਗ੍ਗਿਸ੍ਸਤਿ. ਅਪਿਚ ਸੁਸਾਨਂ ਨਾਮ ਨਿਰਾਸਙ੍ਕਟ੍ਠਾਨਨ੍ਤਿ ਮਞ੍ਞਮਾਨਾ ਕਤਕਮ੍ਮਾਪਿ ਅਕਤਕਮ੍ਮਾਪਿ ਚੋਰਾ ਸਮੋਸਰਨ੍ਤਿ. ਤੇ ਮਨੁਸ੍ਸੇਹਿ ਅਨੁਬਦ੍ਧਾ ਭਿਕ੍ਖੁਸ੍ਸ ਸਮੀਪੇ ਭਣ੍ਡਕਂ ਛਡ੍ਡੇਤ੍ਵਾਪਿ ਪਲਾਯਨ੍ਤਿ. ਮਨੁਸ੍ਸਾ ‘‘ਸਹੋਡ੍ਢਂ ਚੋਰਂ ਅਦ੍ਦਸਾਮਾ’’ਤਿ ਭਿਕ੍ਖੁਂ ਗਹੇਤ੍ਵਾ ਵਿਹੇਠੇਨ੍ਤਿ. ਅਥਸ੍ਸ ਸੋ ‘‘ਮਾ ਇਮਂ ਵਿਹੇਠਯਿਤ੍ਥ, ਮਮਾਯਂ ਕਥੇਤ੍ਵਾ ਇਮਿਨਾ ਨਾਮ ਕਮ੍ਮੇਨ ਗਤੋ’’ਤਿ ਤੇ ਮਨੁਸ੍ਸੇ ਸਞ੍ਞਾਪੇਤ੍ਵਾ ਸੋਤ੍ਥਿਭਾਵਂ ਕਰਿਸ੍ਸਤਿ. ਅਯਂ ਆਨਿਸਂਸੋ ਕਥੇਤ੍ਵਾ ਗਮਨੇ. ਤਸ੍ਮਾ ਵੁਤ੍ਤਪ੍ਪਕਾਰਸ੍ਸ ਭਿਕ੍ਖੁਨੋ ਕਥੇਤ੍ਵਾ ਅਸੁਭਨਿਮਿਤ੍ਤਦਸ੍ਸਨੇ ਸਞ੍ਜਾਤਾਭਿਲਾਸੇਨ ਯਥਾਨਾਮ ਖਤ੍ਤਿਯੋ ਅਭਿਸੇਕਟ੍ਠਾਨਂ, ਯਜਮਾਨੋ ਯਞ੍ਞਸਾਲਂ, ਅਧਨੋ ਵਾ ਪਨ ਨਿਧਿਟ੍ਠਾਨਂ ਪੀਤਿਸੋਮਨਸ੍ਸਜਾਤੋ ਗਚ੍ਛਤਿ, ਏਵਂ ਪੀਤਿਸੋਮਨਸ੍ਸਂ ਉਪ੍ਪਾਦੇਤ੍ਵਾ ਅਟ੍ਠਕਥਾਸੁ ਵੁਤ੍ਤੇਨ ਵਿਧਿਨਾ ਗਨ੍ਤਬ੍ਬਂ. ਵੁਤ੍ਤਞ੍ਹੇਤਂ –

‘‘ਉਦ੍ਧੁਮਾਤਕਂ ਅਸੁਭਨਿਮਿਤ੍ਤਂ ਉਗ੍ਗਣ੍ਹਨ੍ਤੋ ਏਕੋ ਅਦੁਤਿਯੋ ਗਚ੍ਛਤਿ ਉਪਟ੍ਠਿਤਾਯ ਸਤਿਯਾ ਅਸਮ੍ਮੁਟ੍ਠਾਯ ਅਨ੍ਤੋਗਤੇਹਿ ਇਨ੍ਦ੍ਰਿਯੇਹਿ ਅਬਹਿਗਤੇਨ ਮਾਨਸੇਨ ਗਤਾਗਤਮਗ੍ਗਂ ਪਚ੍ਚਵੇਕ੍ਖਮਾਨੋ. ਯਸ੍ਮਿਂ ਪਦੇਸੇ ਉਦ੍ਧੁਮਾਤਕਂ ਅਸੁਭਨਿਮਿਤ੍ਤਂ ਨਿਕ੍ਖਿਤ੍ਤਂ ਹੋਤਿ, ਤਸ੍ਮਿਂ ਪਦੇਸੇ ਪਾਸਾਣਂ ਵਾ ਵਮ੍ਮਿਕਂ ਵਾ ਰੁਕ੍ਖਂ ਵਾ ਗਚ੍ਛਂ ਵਾ ਲਤਂ ਵਾ ਸਨਿਮਿਤ੍ਤਂ ਕਰੋਤਿ, ਸਾਰਮ੍ਮਣਂ ਕਰੋਤਿ. ਸਨਿਮਿਤ੍ਤਂ ਕਤ੍ਵਾ ਸਾਰਮ੍ਮਣਂ ਕਤ੍ਵਾ ਉਦ੍ਧੁਮਾਤਕਂ ਅਸੁਭਨਿਮਿਤ੍ਤਂ ਸਭਾਵਭਾਵਤੋ ਉਪਲਕ੍ਖੇਤਿ, ਵਣ੍ਣਤੋਪਿ ਲਿਙ੍ਗਤੋਪਿ ਸਣ੍ਠਾਨਤੋਪਿ ਦਿਸਤੋਪਿ ਓਕਾਸਤੋਪਿ ਪਰਿਚ੍ਛੇਦਤੋਪਿ ਸਨ੍ਧਿਤੋ ਵਿਵਰਤੋ ਨਿਨ੍ਨਤੋ ਥਲਤੋ ਸਮਨ੍ਤਤੋ. ਸੋ ਤਂ ਨਿਮਿਤ੍ਤਂ ਸੁਗ੍ਗਹਿਤਂ ਕਰੋਤਿ, ਸੂਪਧਾਰਿਤਂ ਉਪਧਾਰੇਤਿ, ਸੁਵਵਤ੍ਥਿਤਂ ਵਵਤ੍ਥਪੇਤਿ. ਸੋ ਤਂ ਨਿਮਿਤ੍ਤਂ ਸੁਗ੍ਗਹਿਤਂ ਕਤ੍ਵਾ ਸੂਪਧਾਰਿਤਂ ਉਪਧਾਰੇਤ੍ਵਾ ਸੁਵਵਤ੍ਥਿਤਂ ਵਵਤ੍ਥਪੇਤ੍ਵਾ ਏਕੋ ਅਦੁਤਿਯੋ ਗਚ੍ਛਤਿ ਉਪਟ੍ਠਿਤਾਯ ਸਤਿਯਾ ਅਸਮ੍ਮੁਟ੍ਠਾਯ ਅਨ੍ਤੋਗਤੇਹਿ ਇਨ੍ਦ੍ਰਿਯੇਹਿ ਅਬਹਿਗਤੇਨ ਮਾਨਸੇਨ ਗਤਾਗਤਮਗ੍ਗਂ ਪਚ੍ਚਵੇਕ੍ਖਮਾਨੋ. ਸੋ ਚਙ੍ਕਮਨ੍ਤੋਪਿ ਤਬ੍ਭਾਗਿਯਞ੍ਞੇਵ ਚਙ੍ਕਮਂ ਅਧਿਟ੍ਠਾਤਿ. ਨਿਸੀਦਨ੍ਤੋਪਿ ਤਬ੍ਭਾਗਿਯਞ੍ਞੇਵ ਆਸਨਂ ਪਞ੍ਞਪੇਤਿ.

‘‘ਸਮਨ੍ਤਾ ਨਿਮਿਤ੍ਤੁਪਲਕ੍ਖਣਾ ਕਿਮਤ੍ਥਿਯਾ ਕਿਮਾਨਿਸਂਸਾਤਿ? ਸਮਨ੍ਤਾ ਨਿਮਿਤ੍ਤੁਪਲਕ੍ਖਣਾ ਅਸਮ੍ਮੋਹਤ੍ਥਾ ਅਸਮ੍ਮੋਹਾਨਿਸਂਸਾ. ਏਕਾਦਸਵਿਧੇਨ ਨਿਮਿਤ੍ਤਗ੍ਗਾਹੋ ਕਿਮਤ੍ਥਿਯੋ ਕਿਮਾਨਿਸਂਸੋਤਿ? ਏਕਾਦਸਵਿਧੇਨ ਨਿਮਿਤ੍ਤਗ੍ਗਾਹੋ ਉਪਨਿਬਨ੍ਧਨਤ੍ਥੋ ਉਪਨਿਬਨ੍ਧਨਾਨਿਸਂਸੋ. ਗਤਾਗਤਮਗ੍ਗਪਚ੍ਚਵੇਕ੍ਖਣਾ ਕਿਮਤ੍ਥਿਯਾ ਕਿਮਾਨਿਸਂਸਾਤਿ? ਗਤਾਗਤਮਗ੍ਗਪਚ੍ਚਵੇਕ੍ਖਣਾ ਵੀਥਿਸਮ੍ਪਟਿਪਾਦਨਤ੍ਥਾ ਵੀਥਿਸਮ੍ਪਟਿਪਾਦਨਾਨਿਸਂਸਾ.

‘‘ਸੋ ਆਨਿਸਂਸਦਸ੍ਸਾਵੀ ਰਤਨਸਞ੍ਞੀ ਹੁਤ੍ਵਾ ਚਿਤ੍ਤੀਕਾਰਂ ਉਪਟ੍ਠਪੇਤ੍ਵਾ ਸਮ੍ਪਿਯਾਯਮਾਨੋ ਤਸ੍ਮਿਂ ਆਰਮ੍ਮਣੇ ਚਿਤ੍ਤਂ ਉਪਨਿਬਨ੍ਧਤਿ ‘ਅਦ੍ਧਾ ਇਮਾਯ ਪਟਿਪਦਾਯ ਜਰਾਮਰਣਮ੍ਹਾ ਪਰਿਮੁਚ੍ਚਿਸ੍ਸਾਮੀ’ਤਿ. ਸੋ ਵਿਵਿਚ੍ਚੇਵ ਕਾਮੇਹਿ…ਪੇ… ਪਠਮਂ ਝਾਨਂ ਉਪਸਮ੍ਪਜ੍ਜ ਵਿਹਰਤਿ. ਤਸ੍ਸਾਧਿਗਤਂ ਹੋਤਿ ਰੂਪਾਵਚਰਂ ਪਠਮਂ ਝਾਨਂ ਦਿਬ੍ਬੋ ਚ ਵਿਹਾਰੋ ਭਾਵਨਾਮਯਞ੍ਚ ਪੁਞ੍ਞਕਿਰਿਯਵਤ੍ਥੁ’’ਨ੍ਤਿ.

੧੦੬. ਤਸ੍ਮਾ ਯੋ ਚਿਤ੍ਤਸਞ੍ਞਤ੍ਤਤ੍ਥਾਯ ਸਿਵਥਿਕਦਸ੍ਸਨਂ ਗਚ੍ਛਤਿ, ਸੋ ਘਣ੍ਡਿਂ ਪਹਰਿਤ੍ਵਾ ਗਣਂ ਸਨ੍ਨਿਪਾਤੇਤ੍ਵਾਪਿ ਗਚ੍ਛਤੁ. ਕਮ੍ਮਟ੍ਠਾਨਸੀਸੇਨ ਪਨ ਗਚ੍ਛਨ੍ਤੇਨ ਏਕਕੇਨ ਅਦੁਤਿਯੇਨ ਮੂਲਕਮ੍ਮਟ੍ਠਾਨਂ ਅਵਿਸ੍ਸਜ੍ਜੇਤ੍ਵਾ ਤਂ ਮਨਸਿਕਰੋਨ੍ਤੇਨੇਵ ਸੁਸਾਨੇ ਸੋਣਾਦਿਪਰਿਸ੍ਸਯਵਿਨੋਦਨਤ੍ਥਂ ਕਤ੍ਤਰਦਣ੍ਡਂ ਵਾ ਯਟ੍ਠਿਂ ਵਾ ਗਹੇਤ੍ਵਾ, ਸੂਪਟ੍ਠਿਤ ਭਾਵਸਮ੍ਪਾਦਨੇਨ ਅਸਮ੍ਮੁਟ੍ਠਂ ਸਤਿਂ ਕਤ੍ਵਾ, ਮਨਚ੍ਛਟ੍ਠਾਨਞ੍ਚ ਇਨ੍ਦ੍ਰਿਯਾਨਂ ਅਨ੍ਤੋਗਤਭਾਵਸਮ੍ਪਾਦਨਤੋ ਅਬਹਿਗਤਮਨੇਨ ਹੁਤ੍ਵਾ ਗਨ੍ਤਬ੍ਬਂ.

ਵਿਹਾਰਤੋ ਨਿਕ੍ਖਮਨ੍ਤੇਨੇਵ ਅਸੁਕਦਿਸਾਯ ਅਸੁਕਦ੍ਵਾਰੇਨ ਨਿਕ੍ਖਨ੍ਤੋਮ੍ਹੀਤਿ ਦ੍ਵਾਰਂ ਸਲ੍ਲਕ੍ਖੇਤਬ੍ਬਂ. ਤਤੋ ਯੇਨ ਮਗ੍ਗੇਨ ਗਚ੍ਛਤਿ, ਸੋ ਮਗ੍ਗੋ ਵਵਤ੍ਥਪੇਤਬ੍ਬੋ, ਅਯਂ ਮਗ੍ਗੋ ਪਾਚਿਨਦਿਸਾਭਿਮੁਖੋ ਵਾ ਗਚ੍ਛਤਿ, ਪਚ੍ਛਿਮਉਤ੍ਤਰਦਕ੍ਖਿਣਦਿਸਾਭਿਮੁਖੋ ਵਾ ਵਿਦਿਸਾਭਿਮੁਖੋਵਾਤਿ. ਇਮਸ੍ਮਿਂ ਪਨ ਠਾਨੇ ਵਾਮਤੋ ਗਚ੍ਛਤਿ, ਇਮਸ੍ਮਿਂ ਠਾਨੇ ਦਕ੍ਖਿਣਤੋ, ਇਮਸ੍ਮਿਂ ਚਸ੍ਸ ਠਾਨੇ ਪਾਸਾਣੋ, ਇਮਸ੍ਮਿਂ ਵਮ੍ਮਿਕੋ, ਇਮਸ੍ਮਿਂ ਰੁਕ੍ਖੋ, ਇਮਸ੍ਮਿਂ ਗਚ੍ਛੋ, ਇਮਸ੍ਮਿਂ ਲਤਾਤਿ. ਏਵਂ ਗਮਨਮਗ੍ਗਂ ਵਵਤ੍ਥਪੇਨ੍ਤੇਨ ਨਿਮਿਤ੍ਤਟ੍ਠਾਨਂ ਗਨ੍ਤਬ੍ਬਂ. ਨੋ ਚ ਖੋ ਪਟਿਵਾਤਂ. ਪਟਿਵਾਤਂ ਗਚ੍ਛਨ੍ਤਸ੍ਸ ਹਿ ਕੁਣਪਗਨ੍ਧੋ ਘਾਨਂ ਪਹਰਿਤ੍ਵਾ ਮਤ੍ਥਲੁਙ੍ਗਂ ਵਾ ਸਙ੍ਖੋਭੇਯ੍ਯ, ਆਹਾਰਂ ਵਾ ਛਡ੍ਡਾਪੇਯ੍ਯ, ਵਿਪ੍ਪਟਿਸਾਰਂ ਵਾ ਜਨੇਯ੍ਯ ‘‘ਈਦਿਸਂ ਨਾਮ ਕੁਣਪਟ੍ਠਾਨਂ ਆਗਤੋਮ੍ਹੀ’’ਤਿ. ਤਸ੍ਮਾ ਪਟਿਵਾਤਂ ਵਜ੍ਜੇਤ੍ਵਾ ਅਨੁਵਾਤਂ ਗਨ੍ਤਬ੍ਬਂ. ਸਚੇ ਅਨੁਵਾਤਮਗ੍ਗੇਨ ਨ ਸਕ੍ਕਾ ਹੋਤਿ ਗਨ੍ਤੁਂ, ਅਨ੍ਤਰਾ ਪਬ੍ਬਤੋ ਵਾ ਪਪਾਤੋ ਵਾ ਪਾਸਾਣੋ ਵਾ ਵਤਿ ਵਾ ਕਣ੍ਟਕਟ੍ਠਾਨਂ ਵਾ ਉਦਕਂ ਵਾ ਚਿਕ੍ਖਲ੍ਲਂ ਵਾ ਹੋਤਿ, ਚੀਵਰਕਣ੍ਣੇਨ ਨਾਸਂ ਪਿਦਹਿਤ੍ਵਾ ਗਨ੍ਤਬ੍ਬਂ. ਇਦਮਸ੍ਸ ਗਮਨਵਤ੍ਤਂ.

੧੦੭. ਏਵਂ ਗਤੇਨ ਪਨ ਨ ਤਾਵ ਅਸੁਭਨਿਮਿਤ੍ਤਂ ਓਲੋਕੇਤਬ੍ਬਂ. ਦਿਸਾ ਵਵਤ੍ਥਪੇਤਬ੍ਬਾ. ਏਕਸ੍ਮਿਂ ਹਿ ਦਿਸਾਭਾਗੇ ਠਿਤਸ੍ਸ ਆਰਮ੍ਮਣਞ੍ਚ ਨ ਵਿਭੂਤਂ ਹੁਤ੍ਵਾ ਖਾਯਤਿ, ਚਿਤ੍ਤਞ੍ਚ ਨ ਕਮ੍ਮਨਿਯਂ ਹੋਤਿ. ਤਸ੍ਮਾ ਤਂ ਵਜ੍ਜੇਤ੍ਵਾ ਯਤ੍ਥ ਠਿਤਸ੍ਸ ਆਰਮ੍ਮਣਞ੍ਚ ਵਿਭੂਤਂ ਹੁਤ੍ਵਾ ਖਾਯਤਿ, ਚਿਤ੍ਤਞ੍ਚ ਕਮ੍ਮਨਿਯਂ ਹੋਤਿ, ਤਤ੍ਥ ਠਾਤਬ੍ਬਂ. ਪਟਿਵਾਤਾਨੁਵਾਤਞ੍ਚ ਪਹਾਤਬ੍ਬਂ. ਪਟਿਵਾਤੇ ਠਿਤਸ੍ਸ ਹਿ ਕੁਣਪਗਨ੍ਧੇਨ ਉਬ੍ਬਾਲ਼੍ਹਸ੍ਸ ਚਿਤ੍ਤਂ ਵਿਧਾਵਤਿ. ਅਨੁਵਾਤੇ ਠਿਤਸ੍ਸ ਸਚੇ ਤਤ੍ਥ ਅਧਿਵਤ੍ਥਾ ਅਮਨੁਸ੍ਸਾ ਹੋਨ੍ਤਿ, ਤੇ ਕੁਜ੍ਝਿਤ੍ਵਾ ਅਨਤ੍ਥਂ ਕਰੋਨ੍ਤਿ. ਤਸ੍ਮਾ ਈਸਕਂ ਉਕ੍ਕਮ੍ਮ ਨਾਤਿਅਨੁਵਾਤੇ ਠਾਤਬ੍ਬਂ. ਏਵਂ ਤਿਟ੍ਠਮਾਨੇਨਾਪਿ ਨਾਤਿਦੂਰੇ ਨਾਚ੍ਚਾਸਨ੍ਨੇ ਨਾਨੁਪਾਦਂ ਨਾਨੁਸੀਸਂ ਠਾਤਬ੍ਬਂ. ਅਤਿਦੂਰੇ ਠਿਤਸ੍ਸ ਹਿ ਆਰਮ੍ਮਣਂ ਅਵਿਭੂਤਂ ਹੋਤਿ. ਅਚ੍ਚਾਸਨ੍ਨੇ ਭਯਮੁਪ੍ਪਜ੍ਜਤਿ. ਅਨੁਪਾਦਂ ਵਾ ਅਨੁਸੀਸਂ ਵਾ ਠਿਤਸ੍ਸ ਸਬ੍ਬਂ ਅਸੁਭਂ ਸਮਂ ਨ ਪਞ੍ਞਾਯਤਿ. ਤਸ੍ਮਾ ਨਾਤਿਦੂਰੇ ਨਾਚ੍ਚਾਸਨ੍ਨੇ ਓਲੋਕੇਨ੍ਤਸ੍ਸ ਫਾਸੁਕਟ੍ਠਾਨੇ ਸਰੀਰਵੇਮਜ੍ਝਭਾਗੇ ਠਾਤਬ੍ਬਂ.

੧੦੮. ਏਵਂ ਠਿਤੇਨ ‘‘ਤਸ੍ਮਿਂ ਪਦੇਸੇ ਪਾਸਾਣਂ ਵਾ…ਪੇ… ਲਤਂ ਵਾ ਸਨਿਮਿਤ੍ਤਂ ਕਰੋਤੀ’’ਤਿ ਏਵਂ ਵੁਤ੍ਤਾਨਿ ਸਮਨ੍ਤਾ ਨਿਮਿਤ੍ਤਾਨਿ ਉਪਲਕ੍ਖੇਤਬ੍ਬਾਨਿ. ਤਤ੍ਰਿਦਂ ਉਪਲਕ੍ਖਣਵਿਧਾਨਂ, ਸਚੇ ਤਸ੍ਸ ਨਿਮਿਤ੍ਤਸ੍ਸ ਸਮਨ੍ਤਾ ਚਕ੍ਖੁਪਥੇ ਪਾਸਾਣੋ ਹੋਤਿ, ਸੋ ‘‘ਅਯਂ ਪਾਸਾਣੋ ਉਚ੍ਚੋ ਵਾ ਨੀਚੋ ਵਾ ਖੁਦ੍ਦਕੋ ਵਾ ਮਹਨ੍ਤੋ ਵਾ ਤਮ੍ਬੋ ਵਾ ਕਾਲ਼ੋ ਵਾ ਸੇਤੋ ਵਾ ਦੀਘੋ ਵਾ ਪਰਿਮਣ੍ਡਲੋ ਵਾ’’ਤਿ ਵਵਤ੍ਥਪੇਤਬ੍ਬੋ. ਤਤੋ ‘‘ਇਮਸ੍ਮਿਂ ਨਾਮ ਓਕਾਸੇ ਅਯਂ ਪਾਸਾਣੋ ਇਦਂ ਅਸੁਭਨਿਮਿਤ੍ਤਂ, ਇਦਂ ਅਸੁਭਨਿਮਿਤ੍ਤਂ ਅਯਂ ਪਾਸਾਣੋ’’ਤਿ ਸਲ੍ਲਕ੍ਖੇਤਬ੍ਬਂ. ਸਚੇ ਵਮ੍ਮਿਕੋ ਹੋਤਿ, ਸੋਪਿ ‘‘ਉਚ੍ਚੋ ਵਾ ਨੀਚੋ ਵਾ ਖੁਦ੍ਦਕੋ ਵਾ ਮਹਨ੍ਤੋ ਵਾ ਤਮ੍ਬੋ ਵਾ ਕਾਲ਼ੋ ਵਾ ਸੇਤੋ ਵਾ ਦੀਘੋ ਵਾ ਪਰਿਮਣ੍ਡਲੋ ਵਾ’’ਤਿ ਵਵਤ੍ਥਪੇਤਬ੍ਬੋ. ਤਤੋ ‘‘ਇਮਸ੍ਮਿਂ ਨਾਮ ਓਕਾਸੇ ਅਯਂ ਵਮ੍ਮਿਕੋ ਇਦਂ ਅਸੁਭਨਿਮਿਤ੍ਤ’’ਨ੍ਤਿ ਸਲ੍ਲਕ੍ਖੇਤਬ੍ਬਂ. ਸਚੇ ਰੁਕ੍ਖੋ ਹੋਤਿ, ਸੋਪਿ ‘‘ਅਸ੍ਸਤ੍ਥੋ ਵਾ ਨਿਗ੍ਰੋਧੋ ਵਾ ਕਚ੍ਛਕੋ ਵਾ ਕਪੀਤਨੋ ਵਾ ਉਚ੍ਚੋ ਵਾ ਨੀਚੋ ਵਾ ਖੁਦ੍ਦਕੋ ਵਾ ਮਹਨ੍ਤੋ ਵਾ ਤਮ੍ਬੋ ਵਾ ਕਾਲ਼ੋ ਵਾ ਸੇਤੋ ਵਾ’’ਤਿ ਵਵਤ੍ਥਪੇਤਬ੍ਬੋ. ਤਤੋ ‘‘ਇਮਸ੍ਮਿਂ ਨਾਮ ਓਕਾਸੇ ਅਯਂ ਰੁਕ੍ਖੋ ਇਦਂ ਅਸੁਭਨਿਮਿਤ੍ਤ’’ਨ੍ਤਿ ਸਲ੍ਲਕ੍ਖੇਤਬ੍ਬਂ. ਸਚੇ ਗਚ੍ਛੋ ਹੋਤਿ, ਸੋਪਿ ‘‘ਸਿਨ੍ਦਿਵਾ ਕਰਮਨ੍ਦੋ ਵਾ ਕਣਵੀਰੋ ਵਾ ਕੁਰਣ੍ਡਕੋ ਵਾ ਉਚ੍ਚੋ ਵਾ ਨੀਚੋ ਵਾ ਖੁਦ੍ਦਕੋ ਵਾ ਮਹਨ੍ਤੋ ਵਾ’’ਤਿ ਵਵਤ੍ਥਪੇਤਬ੍ਬੋ. ਤਤੋ ‘‘ਇਮਸ੍ਮਿਂ ਨਾਮ ਓਕਾਸੇ ਅਯਂ ਗਚ੍ਛੋ ਇਦਂ ਅਸੁਭਨਿਮਿਤ੍ਤ’’ਨ੍ਤਿ ਸਲ੍ਲਕ੍ਖੇਤਬ੍ਬਂ. ਸਚੇ ਲਤਾ ਹੋਤਿ, ਸਾਪਿ ‘‘ਲਾਬੁ ਵਾ ਕੁਮ੍ਭਣ੍ਡੀ ਵਾ ਸਾਮਾ ਵਾ ਕਾਲ਼ਵਲ੍ਲਿ ਵਾ ਪੂਤਿਲਤਾ ਵਾ’’ਤਿ ਵਵਤ੍ਥਪੇਤਬ੍ਬਾ. ਤਤੋ ‘‘ਇਮਸ੍ਮਿਂ ਨਾਮ ਓਕਾਸੇ ਅਯਂ ਲਤਾ ਇਦਂ ਅਸੁਭਨਿਮਿਤ੍ਤਂ, ਇਦਂ ਅਸੁਭਨਿਮਿਤ੍ਤਂ ਅਯਂ ਲਤਾ’’ਤਿ ਸਲ੍ਲਕ੍ਖੇਤਬ੍ਬਂ.

੧੦੯. ਯਂ ਪਨ ਵੁਤ੍ਤਂ ਸਨਿਮਿਤ੍ਤਂ ਕਰੋਤਿ ਸਾਰਮ੍ਮਣਂ ਕਰੋਤੀਤਿ, ਤਂ ਇਧੇਵ ਅਨ੍ਤੋਗਧਂ. ਪੁਨਪ੍ਪੁਨਂ ਵਵਤ੍ਥਪੇਨ੍ਤੋ ਹਿ ਸਨਿਮਿਤ੍ਤਂ ਕਰੋਤਿ ਨਾਮ. ਅਯਂ ਪਾਸਾਣੋ ਇਦਂ ਅਸੁਭਨਿਮਿਤ੍ਤਂ, ਇਦਂ ਅਸੁਭਨਿਮਿਤ੍ਤਂ ਅਯਂ ਪਾਸਾਣੋਤਿ ਏਵਂ ਦ੍ਵੇ ਦ੍ਵੇ ਸਮਾਸੇਤ੍ਵਾ ਸਮਾਸੇਤ੍ਵਾ ਵਵਤ੍ਥਪੇਨ੍ਤੋ ਸਾਰਮ੍ਮਣਂ ਕਰੋਤਿ ਨਾਮ.

ਏਵਂ ਸਨਿਮਿਤ੍ਤਂ ਸਾਰਮ੍ਮਣਞ੍ਚ ਕਤ੍ਵਾ ਪਨ ਸਭਾਵਭਾਵਤੋ ਵਵਤ੍ਥਪੇਤੀਤਿ ਵੁਤ੍ਤਤ੍ਤਾ ਯ੍ਵਾਸ੍ਸ ਸਭਾਵਭਾਵੋ ਅਨਞ੍ਞਸਾਧਾਰਣੋ ਅਤ੍ਤਨਿਯੋ ਉਦ੍ਧੁਮਾਤਕਭਾਵੋ, ਤੇਨ ਮਨਸਿਕਾਤਬ੍ਬਂ. ਵਣਿਤਂ ਉਦ੍ਧੁਮਾਤਕਨ੍ਤਿ ਏਵਂ ਸਭਾਵੇਨ ਸਰਸੇਨ ਵਵਤ੍ਥਪੇਤਬ੍ਬਨ੍ਤਿ ਅਤ੍ਥੋ.

੧੧੦. ਏਵਂ ਵਵਤ੍ਥਪੇਤ੍ਵਾ ਵਣ੍ਣਤੋਪਿ ਲਿਙ੍ਗਤੋਪਿ ਸਣ੍ਠਾਨਤੋਪਿ ਦਿਸਤੋਪਿ ਓਕਾਸਤੋਪਿ ਪਰਿਚ੍ਛੇਦਤੋਪੀਤਿ ਛਬ੍ਬਿਧੇਨ ਨਿਮਿਤ੍ਤਂ ਗਹੇਤਬ੍ਬਂ. ਕਥਂ? ਤੇਨ ਹਿ ਯੋਗਿਨਾ ਇਦਂ ਸਰੀਰਂ ਕਾਲ਼ਸ੍ਸ ਵਾ ਓਦਾਤਸ੍ਸ ਵਾ ਮਙ੍ਗੁਰਚ੍ਛਵਿਨੋ ਵਾਤਿ ਵਣ੍ਣਤੋ ਵਵਤ੍ਥਪੇਤਬ੍ਬਂ. ਲਿਙ੍ਗਤੋ ਪਨ ਇਤ੍ਥਿਲਿਙ੍ਗਂ ਵਾ ਪੁਰਿਸਲਿਙ੍ਗਂ ਵਾਤਿ ਅਵਵਤ੍ਥਪੇਤ੍ਵਾ ਪਠਮਵਯੇ ਵਾ ਮਜ੍ਝਿਮਵਯੇ ਵਾ ਪਚ੍ਛਿਮਵਯੇ ਵਾ ਠਿਤਸ੍ਸ ਇਦਂ ਸਰੀਰਨ੍ਤਿ ਵਵਤ੍ਥਪੇਤਬ੍ਬਂ. ਸਣ੍ਠਾਨਤੋ ਉਦ੍ਧੁਮਾਤਕਸ੍ਸ ਸਣ੍ਠਾਨਵਸੇਨੇਵ ਇਦਮਸ੍ਸ ਸੀਸਸਣ੍ਠਾਨਂ, ਇਦਂ ਗੀਵਾਸਣ੍ਠਾਨਂ, ਇਦਂ ਹਤ੍ਥਸਣ੍ਠਾਨਂ, ਇਦਂ ਉਦਰਸਣ੍ਠਾਨਂ, ਇਦਂ ਨਾਭਿਸਣ੍ਠਾਨਂ, ਇਦਂ ਕਟਿਸਣ੍ਠਾਨਂ, ਇਦਂ ਊਰੁਸਣ੍ਠਾਨਂ, ਇਦਂ ਜਙ੍ਘਾਸਣ੍ਠਾਨਂ, ਇਦਂ ਪਾਦਸਣ੍ਠਾਨਨ੍ਤਿ ਵਵਤ੍ਥਪੇਤਬ੍ਬਂ. ਦਿਸਤੋ ਪਨ ਇਮਸ੍ਮਿਂ ਸਰੀਰੇ ਦ੍ਵੇ ਦਿਸਾ ਨਾਭਿਯਾ ਅਧੋ ਹੇਟ੍ਠਿਮਦਿਸਾ ਉਦ੍ਧਂ ਉਪਰਿਮਦਿਸਾਤਿ ਵਵਤ੍ਥਪੇਤਬ੍ਬਂ. ਅਥ ਵਾ ਅਹਂ ਇਮਿਸ੍ਸਾ ਦਿਸਾਯ ਠਿਤੋ ਅਸੁਭਨਿਮਿਤ੍ਤਂ ਇਮਿਸ੍ਸਾਤਿ ਵਵਤ੍ਥਪੇਤਬ੍ਬਂ. ਓਕਾਸਤੋ ਪਨ ਇਮਸ੍ਮਿਂ ਨਾਮ ਓਕਾਸੇ ਹਤ੍ਥਾ, ਇਮਸ੍ਮਿਂ ਪਾਦਾ, ਇਮਸ੍ਮਿਂ ਸੀਸਂ, ਇਮਸ੍ਮਿਂ ਮਜ੍ਝਿਮਕਾਯੋ ਠਿਤੋਤਿ ਵਵਤ੍ਥਪੇਤਬ੍ਬਂ. ਅਥ ਵਾ ਅਹਂ ਇਮਸ੍ਮਿਂ ਓਕਾਸੇ ਠਿਤੋ ਅਸੁਭਨਿਮਿਤ੍ਤਂ ਇਮਸ੍ਮਿਨ੍ਤਿ ਵਵਤ੍ਥਪੇਤਬ੍ਬਂ. ਪਰਿਚ੍ਛੇਦਤੋ ਇਦਂ ਸਰੀਰਂ ਅਧੋ ਪਾਦਤਲੇਨ ਉਪਰਿ ਕੇਸਮਤ੍ਥਕੇਨ ਤਿਰਿਯਂ ਤਚੇਨ ਪਰਿਚ੍ਛਿਨ੍ਨਂ, ਯਥਾਪਰਿਚ੍ਛਿਨ੍ਨੇ ਚ ਠਾਨੇ ਦ੍ਵਤ੍ਤਿਂਸਕੁਣਪਭਰਿਤਮੇਵਾਤਿ ਵਵਤ੍ਥਪੇਤਬ੍ਬਂ. ਅਥ ਵਾ ਅਯਮਸ੍ਸ ਹਤ੍ਥਪਰਿਚ੍ਛੇਦੋ, ਅਯਂ ਪਾਦਪਰਿਚ੍ਛੇਦੋ, ਅਯਂ ਸੀਸਪਰਿਚ੍ਛੇਦੋ, ਅਯਂ ਮਜ੍ਝਿਮਕਾਯਪਰਿਚ੍ਛੇਦੋਤਿ ਵਵਤ੍ਥਪੇਤਬ੍ਬਂ. ਯਤ੍ਤਕਂ ਵਾ ਪਨ ਠਾਨਂ ਗਣ੍ਹਤਿ, ਤਤ੍ਤਕਮੇਵ ਇਦਂ ਈਦਿਸਂ ਉਦ੍ਧੁਮਾਤਕਨ੍ਤਿ ਪਰਿਚ੍ਛਿਨ੍ਦਿਤਬ੍ਬਂ. ਪੁਰਿਸਸ੍ਸ ਪਨ ਇਤ੍ਥਿਸਰੀਰਂ ਇਤ੍ਥਿਯਾ ਵਾ ਪੁਰਿਸਸਰੀਰਂ ਨ ਵਟ੍ਟਤਿ. ਵਿਸਭਾਗੇ ਸਰੀਰੇ ਆਰਮ੍ਮਣਂ ਨ ਉਪਟ੍ਠਾਤਿ, ਵਿਪ੍ਫਨ੍ਦਨਸ੍ਸੇਵ ਪਚ੍ਚਯੋ ਹੋਤਿ. ‘‘ਉਗ੍ਘਾਟਿਤਾਪਿ ਹਿ ਇਤ੍ਥੀ ਪੁਰਿਸਸ੍ਸ ਚਿਤ੍ਤਂ ਪਰਿਯਾਦਾਯ ਤਿਟ੍ਠਤੀ’’ਤਿ (ਅ. ਨਿ. ੫.੫੫) ਮਜ੍ਝਿਮਟ੍ਠਕਥਾਯਂ ਵੁਤ੍ਤਂ. ਤਸ੍ਮਾ ਸਭਾਗਸਰੀਰੇਯੇਵ ਏਵਂ ਛਬ੍ਬਿਧੇਨ ਨਿਮਿਤ੍ਤਂ ਗਣ੍ਹਿਤਬ੍ਬਂ.

੧੧੧. ਯੋ ਪਨ ਪੁਰਿਮਬੁਦ੍ਧਾਨਂ ਸਨ੍ਤਿਕੇ ਆਸੇਵਿਤਕਮ੍ਮਟ੍ਠਾਨੋ ਪਰਿਹਤਧੁਤਙ੍ਗੋ ਪਰਿਮਦ੍ਦਿਤਮਹਾਭੂਤੋ ਪਰਿਗ੍ਗਹਿਤਸਙ੍ਖਾਰੋ ਵਵਤ੍ਥਾਪਿਤਨਾਮਰੂਪੋ ਉਗ੍ਘਾਟਿਤਸਤ੍ਤਸਞ੍ਞੋ ਕਤਸਮਣਧਮ੍ਮੋ ਵਾਸਿਤਵਾਸਨੋ ਭਾਵਿਤਭਾਵਨੋ ਸਬੀਜੋ ਞਾਣੁਤ੍ਤਰੋ ਅਪ੍ਪਕਿਲੇਸੋ ਕੁਲਪੁਤ੍ਤੋ, ਤਸ੍ਸ ਓਲੋਕਿਤੋਲੋਕਿਤਟ੍ਠਾਨੇਯੇਵ ਪਟਿਭਾਗਨਿਮਿਤ੍ਤਂ ਉਪਟ੍ਠਾਤਿ. ਨੋ ਚੇ ਏਵਂ ਉਪਟ੍ਠਾਤਿ, ਅਥੇਵਂ ਛਬ੍ਬਿਧੇਨ ਨਿਮਿਤ੍ਤਂ ਗਣ੍ਹਤੋ ਉਪਟ੍ਠਾਤਿ. ਯਸ੍ਸ ਪਨ ਏਵਮ੍ਪਿ ਨ ਉਪਟ੍ਠਾਤਿ, ਤੇਨ ਸਨ੍ਧਿਤੋ ਵਿਵਰਤੋ ਨਿਨ੍ਨਤੋ ਥਲਤੋ ਸਮਨ੍ਤਤੋਤਿ ਪੁਨਪਿ ਪਞ੍ਚਵਿਧੇਨ ਨਿਮਿਤ੍ਤਂ ਗਹੇਤਬ੍ਬਂ.

੧੧੨. ਤਤ੍ਥ ਸਨ੍ਧਿਤੋਤਿ ਅਸੀਤਿਸਤਸਨ੍ਧਿਤੋ. ਉਦ੍ਧੁਮਾਤਕੇ ਪਨ ਕਥਂ ਅਸੀਤਿਸਤਸਨ੍ਧਯੋ ਵਵਤ੍ਥਪੇਸ੍ਸਤਿ. ਤਸ੍ਮਾਨੇਨ ਤਯੋ ਦਕ੍ਖਿਣਹਤ੍ਥਸਨ੍ਧੀ, ਤਯੋ ਵਾਮਹਤ੍ਥਸਨ੍ਧੀ, ਤਯੋ ਦਕ੍ਖਿਣਪਾਦਸਨ੍ਧੀ, ਤਯੋ ਵਾਮਪਾਦਸਨ੍ਧੀ, ਏਕੋ ਗੀਵਸਨ੍ਧਿ, ਏਕੋ ਕਟਿਸਨ੍ਧੀਤਿ ਏਵਂ ਚੁਦ੍ਦਸਮਹਾਸਨ੍ਧਿਵਸੇਨ ਸਨ੍ਧਿਤੋ ਵਵਤ੍ਥਪੇਤਬ੍ਬਂ. ਵਿਵਰਤੋਤਿ ਵਿਵਰਂ ਨਾਮ ਹਤ੍ਥਨ੍ਤਰਂ ਪਾਦਨ੍ਤਰਂ ਉਦਰਨ੍ਤਰਂ ਕਣ੍ਣਨ੍ਤਰਨ੍ਤਿ ਏਵਂ ਵਿਵਰਤੋ ਵਵਤ੍ਥਪੇਤਬ੍ਬਂ. ਅਕ੍ਖੀਨਮ੍ਪਿ ਨਿਮ੍ਮੀਲਿਤਭਾਵੋ ਵਾ ਉਮ੍ਮੀਲਿਤਭਾਵੋ ਵਾ ਮੁਖਸ੍ਸ ਚ ਪਿਹਿਤਭਾਵੋ ਵਾ ਵਿਵਟਭਾਵੋ ਵਾ ਵਵਤ੍ਥਪੇਤਬ੍ਬੋ. ਨਿਨ੍ਨਤੋਤਿ ਯਂ ਸਰੀਰੇ ਨਿਨ੍ਨਟ੍ਠਾਨਂ ਅਕ੍ਖਿਕੂਪੋ ਵਾ ਅਨ੍ਤੋਮੁਖਂ ਵਾ ਗਲਵਾਟਕੋ ਵਾ, ਤਂ ਵਵਤ੍ਥਪੇਤਬ੍ਬਂ. ਅਥ ਵਾ ਅਹਂ ਨਿਨ੍ਨੇ ਠਿਤੋ ਸਰੀਰਂ ਉਨ੍ਨਤੇਤਿ ਵਵਤ੍ਥਪੇਤਬ੍ਬਂ. ਥਲਤੋਤਿ ਯਂ ਸਰੀਰੇ ਉਨ੍ਨਤਟ੍ਠਾਨਂ ਜਣ੍ਣੁਕਂ ਵਾ ਉਰੋ ਵਾ ਨਲਾਟਂ ਵਾ, ਤਂ ਵਵਤ੍ਥਪੇਤਬ੍ਬਂ. ਅਥ ਵਾ ਅਹਂ ਥਲੇ ਠਿਤੋ ਸਰੀਰਂ ਨਿਨ੍ਨੇਤਿ ਵਵਤ੍ਥਪੇਤਬ੍ਬਂ. ਸਮਨ੍ਤਤੋਤਿ ਸਬ੍ਬਂ ਸਰੀਰਂ ਸਮਨ੍ਤਤੋ ਵਵਤ੍ਥਪੇਤਬ੍ਬਂ. ਸਕਲਸਰੀਰੇ ਞਾਣਂ ਚਾਰੇਤ੍ਵਾ ਯਂ ਠਾਨਂ ਵਿਭੂਤਂ ਹੁਤ੍ਵਾ ਉਪਟ੍ਠਾਤਿ, ਤਤ੍ਥ ‘‘ਉਦ੍ਧੁਮਾਤਕਂ ਉਦ੍ਧੁਮਾਤਕ’’ਨ੍ਤਿ ਚਿਤ੍ਤਂ ਠਪੇਤਬ੍ਬਂ. ਸਚੇ ਏਵਮ੍ਪਿ ਨ ਉਪਟ੍ਠਾਤਿ, ਉਦਰਪਰਿਯੋਸਾਨਂ ਅਤਿਰੇਕਂ ਉਦ੍ਧੁਮਾਤਕਂ ਹੋਤਿ, ਤਤ੍ਥ ‘‘ਉਦ੍ਧੁਮਾਤਕਂ ਉਦ੍ਧੁਮਾਤਕ’’ਨ੍ਤਿ ਚਿਤ੍ਤਂ ਠਪੇਤਬ੍ਬਂ.

੧੧੩. ਇਦਾਨਿ ‘‘ਸੋ ਤਂ ਨਿਮਿਤ੍ਤਂ ਸੁਗ੍ਗਹਿਤਂ ਕਰੋਤੀ’’ਤਿਆਦੀਸੁ ਅਯਂ ਵਿਨਿਚ੍ਛਯਕਥਾ –

ਤੇਨ ਯੋਗਿਨਾ ਤਸ੍ਮਿਂ ਸਰੀਰੇ ਯਥਾਵੁਤ੍ਤਨਿਮਿਤ੍ਤਗ੍ਗਾਹਵਸੇਨ ਸੁਟ੍ਠੁ ਨਿਮਿਤ੍ਤਂ ਗਣ੍ਹਿਤਬ੍ਬਂ. ਸਤਿਂ ਸੂਪਟ੍ਠਿਤਂ ਕਤ੍ਵਾ ਆਵਜ੍ਜਿਤਬ੍ਬਂ. ਏਵਂ ਪੁਨਪ੍ਪੁਨਂ ਕਰੋਨ੍ਤੇਨ ਸਾਧੁਕਂ ਉਪਧਾਰੇਤਬ੍ਬਞ੍ਚੇਵ ਵਵਤ੍ਥਪੇਤਬ੍ਬਞ੍ਚ. ਸਰੀਰਤੋ ਨਾਤਿਦੂਰੇ ਨਾਚ੍ਚਾਸਨ੍ਨੇ ਪਦੇਸੇ ਠਿਤੇਨ ਵਾ ਨਿਸਿਨ੍ਨੇਨ ਵਾ ਚਕ੍ਖੁਂ ਉਮ੍ਮੀਲੇਤ੍ਵਾ ਓਲੋਕੇਤ੍ਵਾ ਨਿਮਿਤ੍ਤਂ ਗਣ੍ਹਿਤਬ੍ਬਂ. ‘‘ਉਦ੍ਧੁਮਾਤਕਪਟਿਕ੍ਕੂਲਂ ਉਦ੍ਧੁਮਾਤਕਪਟਿਕ੍ਕੂਲ’’ਨ੍ਤਿ ਸਤਕ੍ਖਤ੍ਤੁਂ ਸਹਸ੍ਸਕ੍ਖਤ੍ਤੁਂ ਉਮ੍ਮੀਲੇਤ੍ਵਾ ਓਲੋਕੇਤਬ੍ਬਂ, ਨਿਮ੍ਮੀਲੇਤ੍ਵਾ ਆਵਜ੍ਜਿਤਬ੍ਬਂ. ਏਵਂ ਪੁਨਪ੍ਪੁਨਂ ਕਰੋਨ੍ਤਸ੍ਸ ਉਗ੍ਗਹਨਿਮਿਤ੍ਤਂ ਸੁਗ੍ਗਹਿਤਂ ਹੋਤਿ. ਕਦਾ ਸੁਗ੍ਗਹਿਤਂ ਹੋਤਿ? ਯਦਾ ਉਮ੍ਮੀਲੇਤ੍ਵਾ ਓਲੋਕੇਨ੍ਤਸ੍ਸ ਨਿਮ੍ਮੀਲੇਤ੍ਵਾ ਆਵਜ੍ਜੇਨ੍ਤਸ੍ਸ ਚ ਏਕਸਦਿਸਂ ਹੁਤ੍ਵਾ ਆਪਾਥਮਾਗਚ੍ਛਤਿ, ਤਦਾ ਸੁਗ੍ਗਹਿਤਂ ਨਾਮ ਹੋਤਿ.

ਸੋ ਤਂ ਨਿਮਿਤ੍ਤਂ ਏਵਂ ਸੁਗ੍ਗਹਿਤਂ ਕਤ੍ਵਾ ਸੂਪਧਾਰਿਤਂ ਉਪਧਾਰੇਤ੍ਵਾ ਸੁਵਵਤ੍ਥਿਤਂ ਵਵਤ੍ਥਪੇਤ੍ਵਾ ਸਚੇ ਤਤ੍ਥੇਵ ਭਾਵਨਾਪਰਿਯੋਸਾਨਂ ਪਤ੍ਤੁਂ ਨ ਸਕ੍ਕੋਤਿ, ਅਥਾਨੇਨ ਆਗਮਨਕਾਲੇ ਵੁਤ੍ਤਨਯੇਨੇਵ ਏਕਕੇਨ ਅਦੁਤਿਯੇਨ ਤਦੇਵ ਕਮ੍ਮਟ੍ਠਾਨਂ ਮਨਸਿਕਰੋਨ੍ਤੇਨ ਸੂਪਟ੍ਠਿਤਂ ਸਤਿਂ ਕਤ੍ਵਾ ਅਨ੍ਤੋਗਤੇਹਿ ਇਨ੍ਦ੍ਰਿਯੇਹਿ ਅਬਹਿਗਤੇਨ ਮਾਨਸੇਨ ਅਤ੍ਤਨੋ ਸੇਨਾਸਨਮੇਵ ਗਨ੍ਤਬ੍ਬਂ.

ਸੁਸਾਨਾ ਨਿਕ੍ਖਮਨ੍ਤੇਨੇਵ ਚ ਆਗਮਨਮਗ੍ਗੋ ਵਵਤ੍ਥਪੇਤਬ੍ਬੋ, ਯੇਨ ਮਗ੍ਗੇਨ ਨਿਕ੍ਖਨ੍ਤੋਸ੍ਮਿ, ਅਯਂ ਮਗ੍ਗੋ ਪਾਚੀਨਦਿਸਾਭਿਮੁਖੋ ਵਾ ਗਚ੍ਛਤਿ, ਪਚ੍ਛਿਮਉਤ੍ਤਰਦਕ੍ਖਿਣਦਿਸਾਭਿਮੁਖੋ ਵਾ ਗਚ੍ਛਤਿ, ਵਿਦਿਸਾਭਿਮੁਖੋ ਵਾ ਗਚ੍ਛਤਿ. ਇਮਸ੍ਮਿਂ ਪਨ ਠਾਨੇ ਵਾਮਤੋ ਗਚ੍ਛਤਿ, ਇਮਸ੍ਮਿਂ ਦਕ੍ਖਿਣਤੋ, ਇਮਸ੍ਮਿਂ ਚਸ੍ਸ ਠਾਨੇ ਪਾਸਾਣੋ, ਇਮਸ੍ਮਿਂ ਵਮ੍ਮਿਕੋ, ਇਮਸ੍ਮਿਂ ਰੁਕ੍ਖੋ, ਇਮਸ੍ਮਿਂ ਗਚ੍ਛੋ, ਇਮਸ੍ਮਿਂ ਲਤਾਤਿ ਏਵਂ ਆਗਮਨਮਗ੍ਗਂ ਵਵਤ੍ਥਪੇਤ੍ਵਾ ਆਗਤੇਨ ਚਙ੍ਕਮਨ੍ਤੇਨਾਪਿ ਤਬ੍ਭਾਗਿਯੋਵ ਚਙ੍ਕਮੋ ਅਧਿਟ੍ਠਾਤਬ੍ਬੋ, ਅਸੁਭਨਿਮਿਤ੍ਤਦਿਸਾਭਿਮੁਖੇ ਭੂਮਿਪ੍ਪਦੇਸੇ ਚਙ੍ਕਮਿਤਬ੍ਬਨ੍ਤਿ ਅਤ੍ਥੋ. ਨਿਸੀਦਨ੍ਤੇਨ ਆਸਨਮ੍ਪਿ ਤਬ੍ਭਾਗਿਯਮੇਵ ਪਞ੍ਞਪੇਤਬ੍ਬਂ. ਸਚੇ ਪਨ ਤਸ੍ਸਂ ਦਿਸਾਯਂ ਸੋਬ੍ਭੋ ਵਾ ਪਪਾਤੋ ਵਾ ਰੁਕ੍ਖੋ ਵਾ ਵਤਿ ਵਾ ਕਲਲਂ ਵਾ ਹੋਤਿ, ਨ ਸਕ੍ਕਾ ਤਂਦਿਸਾਭਿਮੁਖੇ ਭੂਮਿਪ੍ਪਦੇਸੇ ਚਙ੍ਕਮਿਤੁਂ, ਆਸਨਮ੍ਪਿ ਅਨੋਕਾਸਤ੍ਤਾ ਨ ਸਕ੍ਕਾ ਪਞ੍ਞਪੇਤੁਂ. ਤਂ ਦਿਸਂ ਅਨਪਲੋਕੇਨ੍ਤੇਨਾਪਿ ਓਕਾਸਾਨੁਰੂਪੇ ਠਾਨੇ ਚਙ੍ਕਮਿਤਬ੍ਬਞ੍ਚੇਵ ਨਿਸੀਦਿਤਬ੍ਬਞ੍ਚ. ਚਿਤ੍ਤਂ ਪਨ ਤਂਦਿਸਾਭਿਮੁਖਂਯੇਵ ਕਾਤਬ੍ਬਂ.

੧੧੪. ਇਦਾਨਿ ‘‘ਸਮਨ੍ਤਾ ਨਿਮਿਤ੍ਤੁਪਲਕ੍ਖਣਾ ਕਿਮਤ੍ਥਿਯਾ’’ਤਿਆਦਿਪਞ੍ਹਾਨਂ ‘‘ਅਸਮ੍ਮੋਹਤ੍ਥਾ’’ਤਿਆਦਿਵਿਸ੍ਸਜ੍ਜਨੇ ਅਯਂ ਅਧਿਪ੍ਪਾਯੋ. ਯਸ੍ਸ ਹਿ ਅਵੇਲਾਯਂ ਉਦ੍ਧੁਮਾਤਕਨਿਮਿਤ੍ਤਟ੍ਠਾਨਂ ਗਨ੍ਤ੍ਵਾ ਸਮਨ੍ਤਾ ਨਿਮਿਤ੍ਤੁਪਲਕ੍ਖਣਂ ਕਤ੍ਵਾ ਨਿਮਿਤ੍ਤਗ੍ਗਹਣਤ੍ਥਂ ਚਕ੍ਖੁਂ ਉਮ੍ਮੀਲੇਤ੍ਵਾ ਓਲੋਕੇਨ੍ਤਸ੍ਸੇਵ ਤਂ ਮਤਸਰੀਰਂ ਉਟ੍ਠਹਿਤ੍ਵਾ ਠਿਤਂ ਵਿਯ ਅਜ੍ਝੋਤ੍ਥਰਮਾਨਂ ਵਿਯ ਅਨੁਬਨ੍ਧਮਾਨਂ ਵਿਯ ਚ ਹੁਤ੍ਵਾ ਉਪਟ੍ਠਾਤਿ, ਸੋ ਤਂ ਬੀਭਚ੍ਛਂ ਭੇਰਵਾਰਮ੍ਮਣਂ ਦਿਸ੍ਵਾ ਵਿਕ੍ਖਿਤ੍ਤਚਿਤ੍ਤੋ ਉਮ੍ਮਤ੍ਤਕੋ ਵਿਯ ਹੋਤਿ, ਭਯਂ ਛਮ੍ਭਿਤਤ੍ਤਂ ਲੋਮਹਂਸਂ ਪਾਪੁਣਾਤਿ. ਪਾਲ਼ਿਯਂ ਹਿ ਵਿਭਤ੍ਤਅਟ੍ਠਤਿਂਸਾਰਮ੍ਮਣੇਸੁ ਅਞ੍ਞਂ ਏਵਰੂਪਂ ਭੇਰਵਾਰਮ੍ਮਣਂ ਨਾਮ ਨਤ੍ਥਿ. ਇਮਸ੍ਮਿਂ ਹਿ ਕਮ੍ਮਟ੍ਠਾਨੇ ਝਾਨਵਿਬ੍ਭਨ੍ਤਕੋ ਨਾਮ ਹੋਤਿ. ਕਸ੍ਮਾ? ਅਤਿਭੇਰਵਤ੍ਤਾ ਕਮ੍ਮਟ੍ਠਾਨਸ੍ਸ. ਤਸ੍ਮਾ ਤੇਨ ਯੋਗਿਨਾ ਸਨ੍ਥਮ੍ਭੇਤ੍ਵਾ ਸਤਿਂ ਸੂਪਟ੍ਠਿਤਂ ਕਤ੍ਵਾ ਮਤਸਰੀਰਂ ਉਟ੍ਠਹਿਤ੍ਵਾ ਅਨੁਬਨ੍ਧਨਕਂ ਨਾਮ ਨਤ੍ਥਿ. ਸਚੇ ਹਿ ਸੋ ‘‘ਏਤਸ੍ਸ ਸਮੀਪੇ ਠਿਤੋ ਪਾਸਾਣੋ ਵਾ ਲਤਾ ਵਾ ਆਗਚ੍ਛੇਯ੍ਯ, ਸਰੀਰਮ੍ਪਿ ਆਗਚ੍ਛੇਯ੍ਯ. ਯਥਾ ਪਨ ਸੋ ਪਾਸਾਣੋ ਵਾ ਲਤਾ ਵਾ ਨਾਗਚ੍ਛਤਿ, ਏਵਂ ਸਰੀਰਮ੍ਪਿ ਨਾਗਚ੍ਛਤਿ. ਅਯਂ ਪਨ ਤੁਯ੍ਹਂ ਉਪਟ੍ਠਾਨਾਕਾਰੋ ਸਞ੍ਞਜੋ ਸਞ੍ਞਾਸਮ੍ਭਵੋ, ਕਮ੍ਮਟ੍ਠਾਨਂ ਤੇ ਅਜ੍ਜ ਉਪਟ੍ਠਿਤਂ, ਮਾ ਭਾਯਿ ਭਿਕ੍ਖੂ’’ਤਿ ਤਾਸਂ ਵਿਨੋਦੇਤ੍ਵਾ ਹਾਸਂ ਉਪ੍ਪਾਦੇਤ੍ਵਾ ਤਸ੍ਮਿਂ ਨਿਮਿਤ੍ਤੇ ਚਿਤ੍ਤਂ ਸਞ੍ਚਰਾਪੇਤਬ੍ਬਂ. ਏਵਂ ਵਿਸੇਸਮਧਿਗਚ੍ਛਤਿ. ਇਦਮੇਤਂ ਸਨ੍ਧਾਯ ਵੁਤ੍ਤਂ ‘‘ਸਮਨ੍ਤਾ ਨਿਮਿਤ੍ਤੁਪਲਕ੍ਖਣਾ ਅਸਮ੍ਮੋਹਤ੍ਥਾ’’ਤਿ.

ਏਕਾਦਸਵਿਧੇਨ ਪਨ ਨਿਮਿਤ੍ਤਗ੍ਗਾਹਂ ਸਮ੍ਪਾਦੇਨ੍ਤੋ ਕਮ੍ਮਟ੍ਠਾਨਂ ਉਪਨਿਬਨ੍ਧਤਿ. ਤਸ੍ਸ ਹਿ ਚਕ੍ਖੂਨਿ ਉਮ੍ਮੀਲੇਤ੍ਵਾ ਓਲੋਕਨਪਚ੍ਚਯਾ ਉਗ੍ਗਹਨਿਮਿਤ੍ਤਂ ਉਪ੍ਪਜ੍ਜਤਿ. ਤਸ੍ਮਿਂ ਮਾਨਸਂ ਚਾਰੇਨ੍ਤਸ੍ਸ ਪਟਿਭਾਗਨਿਮਿਤ੍ਤਂ ਉਪ੍ਪਜ੍ਜਤਿ. ਤਤ੍ਥ ਮਾਨਸਂ ਚਾਰੇਨ੍ਤੋ ਅਪ੍ਪਨਂ ਪਾਪੁਣਾਤਿ. ਅਪ੍ਪਨਾਯਂ ਠਤ੍ਵਾ ਵਿਪਸ੍ਸਨਂ ਵਡ੍ਢੇਨ੍ਤੋ ਅਰਹਤ੍ਤਂ ਸਚ੍ਛਿਕਰੋਤਿ. ਤੇਨ ਵੁਤ੍ਤਂ ‘‘ਏਕਾਦਸਵਿਧੇਨ ਨਿਮਿਤ੍ਤਗ੍ਗਾਹੋ ਉਪਨਿਬਨ੍ਧਨਤ੍ਥੋ’’ਤਿ.

੧੧੫. ਗਤਾਗਤਮਗ੍ਗਪਚ੍ਚਵੇਕ੍ਖਣਾ ਵੀਥਿਸਮ੍ਪਟਿਪਾਦਨਤ੍ਥਾਤਿ ਏਤ੍ਥ ਪਨ ਯਾ ਗਤਮਗ੍ਗਸ੍ਸ ਚ ਆਗਤਮਗ੍ਗਸ੍ਸ ਚ ਪਚ੍ਚਵੇਕ੍ਖਣਾ ਵੁਤ੍ਤਾ, ਸਾ ਕਮ੍ਮਟ੍ਠਾਨਵੀਥਿਯਾ ਸਮ੍ਪਟਿਪਾਦਨਤ੍ਥਾਤਿ ਅਤ੍ਥੋ. ਸਚੇ ਹਿ ਇਮਂ ਭਿਕ੍ਖੁਂ ਕਮ੍ਮਟ੍ਠਾਨਂ ਗਹੇਤ੍ਵਾ ਆਗਚ੍ਛਨ੍ਤਂ ਅਨ੍ਤਰਾਮਗ੍ਗੇ ਕੇਚਿ ਅਜ੍ਜ, ਭਨ੍ਤੇ, ਕਤਿਮੀਤਿ ਦਿਵਸਂ ਵਾ ਪੁਚ੍ਛਨ੍ਤਿ, ਪਞ੍ਹਂ ਵਾ ਪੁਚ੍ਛਨ੍ਤਿ, ਪਟਿਸਨ੍ਥਾਰਂ ਵਾ ਕਰੋਨ੍ਤਿ, ਅਹਂ ਕਮ੍ਮਟ੍ਠਾਨਿਕੋਤਿ ਤੁਣ੍ਹੀਭੂਤੇਨ ਗਨ੍ਤੁਂ ਨ ਵਟ੍ਟਤਿ. ਦਿਵਸੋ ਕਥੇਤਬ੍ਬੋ, ਪਞ੍ਹੋ ਵਿਸ੍ਸਜ੍ਜੇਤਬ੍ਬੋ. ਸਚੇ ਨ ਜਾਨਾਤਿ, ਨ ਜਾਨਾਮੀਤਿ ਵਤ੍ਤਬ੍ਬਂ. ਧਮ੍ਮਿਕੋ ਪਟਿਸਨ੍ਥਾਰੋ ਕਾਤਬ੍ਬੋ. ਤਸ੍ਸੇਵਂ ਕਰੋਨ੍ਤਸ੍ਸ ਉਗ੍ਗਹਿਤਂ ਤਰੁਣਨਿਮਿਤ੍ਤਂ ਨਸ੍ਸਤਿ. ਤਸ੍ਮਿਂ ਨਸ੍ਸਨ੍ਤੇਪਿ ਦਿਵਸਂ ਪੁਟ੍ਠੇਨ ਕਥੇਤਬ੍ਬਮੇਵ. ਪਞ੍ਹਂ ਅਜਾਨਨ੍ਤੇਨ ਨ ਜਾਨਾਮੀਤਿ ਵਤ੍ਤਬ੍ਬਂ. ਜਾਨਨ੍ਤੇਨ ਏਕਦੇਸੇਨ ਕਥੇਤੁਮ੍ਪਿ ਵਟ੍ਟਤਿ, ਪਟਿਸਨ੍ਥਾਰੋਪਿ ਕਾਤਬ੍ਬੋ. ਆਗਨ੍ਤੁਕਂ ਪਨ ਭਿਕ੍ਖੁਂ ਦਿਸ੍ਵਾ ਆਗਨ੍ਤੁਕਪਟਿਸਨ੍ਥਾਰੋ ਕਾਤਬ੍ਬੋਵ. ਅਵਸੇਸਾਨਿਪਿ ਚੇਤਿਯਙ੍ਗਣਵਤ੍ਤਬੋਧਿਯਙ੍ਗਣਵਤ੍ਤਉਪੋਸਥਾਗਾਰਵਤ੍ਤਭੋਜਨਸਾਲਾਜਨ੍ਤਾਘਰਆਚਰਿਯੁਪਜ੍ਝਾਯਆਗਨ੍ਤੁਕਗਮਿਕਵਤ੍ਤਾਦੀਨਿ ਸਬ੍ਬਾਨਿ ਖਨ੍ਧਕਵਤ੍ਤਾਨਿ ਪੂਰੇਤਬ੍ਬਾਨੇਵ. ਤਸ੍ਸ ਤਾਨਿ ਪੂਰੇਨ੍ਤਸ੍ਸਾਪਿ ਤਂ ਤਰੁਣਨਿਮਿਤ੍ਤਂ ਨਸ੍ਸਤਿ, ਪੁਨ ਗਨ੍ਤ੍ਵਾ ਨਿਮਿਤ੍ਤਂ ਗਣ੍ਹਿਸ੍ਸਾਮੀਤਿ ਗਨ੍ਤੁਕਾਮਸ੍ਸਾਪਿ ਅਮਨੁਸ੍ਸੇਹਿ ਵਾ ਵਾਲ਼ਮਿਗੇਹਿ ਵਾ ਅਧਿਟ੍ਠਿਤਤ੍ਤਾ ਸੁਸਾਨਮ੍ਪਿ ਗਨ੍ਤੁਂ ਨ ਸਕ੍ਕਾ ਹੋਤਿ, ਨਿਮਿਤ੍ਤਂ ਵਾ ਅਨ੍ਤਰਧਾਯਤਿ. ਉਦ੍ਧੁਮਾਤਕਂ ਹਿ ਏਕਮੇਵ ਵਾ ਦ੍ਵੇ ਵਾ ਦਿਵਸੇ ਠਤ੍ਵਾ ਵਿਨੀਲਕਾਦਿਭਾਵਂ ਗਚ੍ਛਤਿ. ਸਬ੍ਬਕਮ੍ਮਟ੍ਠਾਨੇਸੁ ਏਤੇਨ ਸਮਂ ਦੁਲ੍ਲਭਂ ਕਮ੍ਮਟ੍ਠਾਨਂ ਨਾਮ ਨਤ੍ਥਿ. ਤਸ੍ਮਾ ਏਵਂ ਨਟ੍ਠੇ ਨਿਮਿਤ੍ਤੇ ਤੇਨ ਭਿਕ੍ਖੁਨਾ ਰਤ੍ਤਿਟ੍ਠਾਨੇ ਵਾ ਦਿਵਾਠਾਨੇ ਵਾ ਨਿਸੀਦਿਤ੍ਵਾ ਅਹਂ ਇਮਿਨਾ ਨਾਮ ਦ੍ਵਾਰੇਨ ਵਿਹਾਰਾ ਨਿਕ੍ਖਮਿਤ੍ਵਾ ਅਸੁਕਦਿਸਾਭਿਮੁਖਂ ਮਗ੍ਗਂ ਪਟਿਪਜ੍ਜਿਤ੍ਵਾ ਅਸੁਕਸ੍ਮਿਂ ਨਾਮ ਠਾਨੇ ਵਾਮਂ ਗਣ੍ਹਿ, ਅਸੁਕਸ੍ਮਿਂ ਦਕ੍ਖਿਣਂ. ਤਸ੍ਸ ਅਸੁਕਸ੍ਮਿਂ ਠਾਨੇ ਪਾਸਾਣੋ, ਅਸੁਕਸ੍ਮਿਂ ਵਮ੍ਮਿਕਰੁਕ੍ਖਗਚ੍ਛਲਤਾਨਮਞ੍ਞਤਰਂ. ਸੋਹਂ ਤੇਨ ਮਗ੍ਗੇਨ ਗਨ੍ਤ੍ਵਾ ਅਸੁਕਸ੍ਮਿਂ ਨਾਮ ਠਾਨੇ ਅਸੁਭਂ ਅਦ੍ਦਸਂ. ਤਤ੍ਥ ਅਸੁਕਦਿਸਾਭਿਮੁਖੋ ਠਤ੍ਵਾ ਏਵਞ੍ਚੇਵਞ੍ਚ ਸਮਨ੍ਤਾ ਨਿਮਿਤ੍ਤਾਨਿ ਸਲ੍ਲਕ੍ਖੇਤ੍ਵਾ ਏਵਂ ਅਸੁਭਨਿਮਿਤ੍ਤਂ ਉਗ੍ਗਹੇਤ੍ਵਾ ਅਸੁਕਦਿਸਾਯ ਸੁਸਾਨਤੋ ਨਿਕ੍ਖਮਿਤ੍ਵਾ ਏਵਰੂਪੇਨ ਨਾਮ ਮਗ੍ਗੇਨ ਇਦਞ੍ਚਿਦਞ੍ਚ ਕਰੋਨ੍ਤੋ ਆਗਨ੍ਤ੍ਵਾ ਇਧ ਨਿਸਿਨ੍ਨੋਤਿ ਏਵਂ ਯਾਵ ਪਲ੍ਲਙ੍ਕਂ ਆਭੁਜਿਤ੍ਵਾ ਨਿਸਿਨ੍ਨਟ੍ਠਾਨਂ, ਤਾਵ ਗਤਾਗਤਮਗ੍ਗੋ ਪਚ੍ਚਵੇਕ੍ਖਿਤਬ੍ਬੋ. ਤਸ੍ਸੇਵਂ ਪਚ੍ਚਵੇਕ੍ਖਤੋ ਤਂ ਨਿਮਿਤ੍ਤਂ ਪਾਕਟਂ ਹੋਤਿ, ਪੁਰਤੋ ਨਿਕ੍ਖਿਤ੍ਤਂ ਵਿਯ ਉਪਟ੍ਠਾਤਿ. ਕਮ੍ਮਟ੍ਠਾਨਂ ਪੁਰਿਮਾਕਾਰੇਨੇਵ ਵੀਥਿਂ ਪਟਿਪਜ੍ਜਤਿ. ਤੇਨ ਵੁਤ੍ਤਂ ‘‘ਗਤਾਗਤਮਗ੍ਗਪਚ੍ਚਵੇਕ੍ਖਣਾ ਵੀਥਿਸਮ੍ਪਟਿਪਾਦਨਤ੍ਥਾ’’ਤਿ.

੧੧੬. ਇਦਾਨਿ ਆਨਿਸਂਸਦਸ੍ਸਾਵੀ ਰਤਨਸਞ੍ਞੀ ਹੁਤ੍ਵਾ ਚਿਤ੍ਤੀਕਾਰਂ ਉਪਟ੍ਠਪੇਤ੍ਵਾ ਸਮ੍ਪਿਯਾਯਮਾਨੋ ਤਸ੍ਮਿਂ ਆਰਮ੍ਮਣੇ ਚਿਤ੍ਤਂ ਉਪਨਿਬਨ੍ਧਤੀਤਿ ਏਤ੍ਥ ਉਦ੍ਧੁਮਾਤਕਪਟਿਕ੍ਕੂਲੇ ਮਾਨਸਂ ਚਾਰੇਤ੍ਵਾ ਝਾਨਂ ਨਿਬ੍ਬਤ੍ਤੇਤ੍ਵਾ ਝਾਨਪਦਟ੍ਠਾਨਂ ਵਿਪਸ੍ਸਨਂ ਵਡ੍ਢੇਨ੍ਤੋ ‘‘ਅਦ੍ਧਾ ਇਮਾਯ ਪਟਿਪਦਾਯ ਜਰਾਮਰਣਮ੍ਹਾ ਪਰਿਮੁਚ੍ਚਿਸ੍ਸਾਮੀ’’ਤਿ ਏਵਂ ਆਨਿਸਂਸਦਸ੍ਸਾਵਿਨਾ ਭਵਿਤਬ੍ਬਂ.

ਯਥਾ ਪਨ ਦੁਗ੍ਗਤੋ ਪੁਰਿਸੋ ਮਹਗ੍ਘਂ ਮਣਿਰਤਨਂ ਲਭਿਤ੍ਵਾ ਦੁਲ੍ਲਭਂ ਵਤ ਮੇ ਲਦ੍ਧਨ੍ਤਿ ਤਸ੍ਮਿਂ ਰਤਨਸਞ੍ਞੀ ਹੁਤ੍ਵਾ ਗਾਰਵਂ ਜਨੇਤ੍ਵਾ ਵਿਪੁਲੇਨ ਪੇਮੇਨ ਸਮ੍ਪਿਯਾਯਮਾਨੋ ਤਂ ਰਕ੍ਖੇਯ੍ਯ, ਏਵਮੇਵ ‘‘ਦੁਲ੍ਲਭਂ ਮੇ ਇਦਂ ਕਮ੍ਮਟ੍ਠਾਨਂ ਲਦ੍ਧਂ ਦੁਗ੍ਗਤਸ੍ਸ ਮਹਗ੍ਘਮਣਿਰਤਨਸਦਿਸਂ. ਚਤੁਧਾਤੁਕਮ੍ਮਟ੍ਠਾਨਿਕੋ ਹਿ ਅਤ੍ਤਨੋ ਚਤ੍ਤਾਰੋ ਮਹਾਭੂਤੇ ਪਰਿਗ੍ਗਣ੍ਹਾਤਿ, ਆਨਾਪਾਨਕਮ੍ਮਟ੍ਠਾਨਿਕੋ ਅਤ੍ਤਨੋ ਨਾਸਿਕਵਾਤਂ ਪਰਿਗ੍ਗਣ੍ਹਾਤਿ, ਕਸਿਣਕਮ੍ਮਟ੍ਠਾਨਿਕੋ ਕਸਿਣਂ ਕਤ੍ਵਾ ਯਥਾਸੁਖਂ ਭਾਵੇਤਿ, ਏਵਂ ਇਤਰਾਨਿ ਕਮ੍ਮਟ੍ਠਾਨਾਨਿ ਸੁਲਭਾਨਿ. ‘ਇਦਂ ਪਨ ਏਕਮੇਵ ਵਾ ਦ੍ਵੇ ਵਾ ਦਿਵਸੇ ਤਿਟ੍ਠਤਿ, ਤਤੋ ਪਰਂ ਵਿਨੀਲਕਾਦਿਭਾਵਂ ਪਾਪੁਣਾਤੀ’ਤਿ ਨਤ੍ਥਿ ਇਤੋ ਦੁਲ੍ਲਭਤਰ’’ਨ੍ਤਿ ਤਸ੍ਮਿਂ ਰਤਨਸਞ੍ਞਿਨਾ ਹੁਤ੍ਵਾ ਚਿਤ੍ਤੀਕਾਰਂ ਉਪਟ੍ਠਪੇਤ੍ਵਾ ਸਮ੍ਪਿਯਾਯਮਾਨੇਨ ਤਂ ਨਿਮਿਤ੍ਤਂ ਰਕ੍ਖਿਤਬ੍ਬਂ. ਰਤ੍ਤਿਟ੍ਠਾਨੇ ਚ ਦਿਵਾਠਾਨੇ ਚ ‘‘ਉਦ੍ਧੁਮਾਤਕਪਟਿਕ੍ਕੂਲਂ ਉਦ੍ਧੁਮਾਤਕਪਟਿਕ੍ਕੂਲ’’ਨ੍ਤਿ ਤਤ੍ਥ ਪੁਨਪ੍ਪੁਨਂ ਚਿਤ੍ਤਂ ਉਪਨਿਬਨ੍ਧਿਤਬ੍ਬਂ. ਪੁਨਪ੍ਪੁਨਂ ਤਂ ਨਿਮਿਤ੍ਤਂ ਆਵਜ੍ਜਿਤਬ੍ਬਂ, ਮਨਸਿਕਾਤਬ੍ਬਂ. ਤਕ੍ਕਾਹਤਂ ਵਿਤਕ੍ਕਾਹਤਂ ਕਾਤਬ੍ਬਂ.

੧੧੭. ਤਸ੍ਸੇਵਂ ਕਰੋਤੋ ਪਟਿਭਾਗਨਿਮਿਤ੍ਤਂ ਉਪ੍ਪਜ੍ਜਤਿ. ਤਤ੍ਰਿਦਂ ਨਿਮਿਤ੍ਤਦ੍ਵਯਸ੍ਸ ਨਾਨਾਕਰਣਂ, ਉਗ੍ਗਹਨਿਮਿਤ੍ਤਂ ਵਿਰੂਪਂ ਬੀਭਚ੍ਛਂ ਭੇਰਵਦਸ੍ਸਨਂ ਹੁਤ੍ਵਾ ਉਪਟ੍ਠਾਤਿ. ਪਟਿਭਾਗਨਿਮਿਤ੍ਤਂ ਪਨ ਯਾਵਦਤ੍ਥਂ ਭੁਞ੍ਜਿਤ੍ਵਾ ਨਿਪਨ੍ਨੋ ਥੂਲਙ੍ਗਪਚ੍ਚਙ੍ਗਪੁਰਿਸੋ ਵਿਯ. ਤਸ੍ਸ ਪਟਿਭਾਗਨਿਮਿਤ੍ਤਪਟਿਲਾਭਸਮਕਾਲਮੇਵ ਬਹਿਦ੍ਧਾ ਕਾਮਾਨਂ ਅਮਨਸਿਕਾਰਾ ਵਿਕ੍ਖਮ੍ਭਨਵਸੇਨ ਕਾਮਚ੍ਛਨ੍ਦੋ ਪਹੀਯਤਿ. ਅਨੁਨਯਪ੍ਪਹਾਨੇਨੇਵ ਚਸ੍ਸ ਲੋਹਿਤਪ੍ਪਹਾਨੇਨ ਪੁਬ੍ਬੋ ਵਿਯ ਬ੍ਯਾਪਾਦੋਪਿ ਪਹੀਯਤਿ. ਤਥਾ ਆਰਦ੍ਧਵੀਰਿਯਤਾਯ ਥਿਨਮਿਦ੍ਧਂ, ਅਵਿਪ੍ਪਟਿਸਾਰਕਰਸਨ੍ਤਧਮ੍ਮਾਨੁਯੋਗਵਸੇਨ ਉਦ੍ਧਚ੍ਚਕੁਕ੍ਕੁਚ੍ਚਂ, ਅਧਿਗਤਵਿਸੇਸਸ੍ਸ ਪਚ੍ਚਕ੍ਖਤਾਯ ਪਟਿਪਤ੍ਤਿਦੇਸਕੇ ਸਤ੍ਥਰਿ ਪਟਿਪਤ੍ਤਿਯਂ ਪਟਿਪਤ੍ਤਿਫਲੇ ਚ ਵਿਚਿਕਿਚ੍ਛਾ ਪਹੀਯਤੀਤਿ ਪਞ੍ਚ ਨੀਵਰਣਾਨਿ ਪਹੀਯਨ੍ਤਿ. ਤਸ੍ਮਿਞ੍ਞੇਵ ਚ ਨਿਮਿਤ੍ਤੇ ਚੇਤਸੋ ਅਭਿਨਿਰੋਪਨਲਕ੍ਖਣੋ ਵਿਤਕ੍ਕੋ, ਨਿਮਿਤ੍ਤਾਨੁਮਜ੍ਜਨਕਿਚ੍ਚਂ ਸਾਧਯਮਾਨੋ ਵਿਚਾਰੋ, ਪਟਿਲਦ੍ਧਵਿਸੇਸਾਧਿਗਮਪਚ੍ਚਯਾ ਪੀਤਿ, ਪੀਤਿਮਨਸ੍ਸ ਪਸ੍ਸਦ੍ਧਿਸਮ੍ਭਵਤੋ ਪਸ੍ਸਦ੍ਧਿ, ਤਨ੍ਨਿਮਿਤ੍ਤਂ ਸੁਖਂ, ਸੁਖਿਤਸ੍ਸ ਚਿਤ੍ਤਸਮਾਧਿਸਮ੍ਭਵਤੋ ਸੁਖਨਿਮਿਤ੍ਤਾ ਏਕਗ੍ਗਤਾ ਚਾਤਿ ਝਾਨਙ੍ਗਾਨਿ ਪਾਤੁਭਵਨ੍ਤਿ. ਏਵਮਸ੍ਸ ਪਠਮਜ੍ਝਾਨਪਟਿਬਿਮ੍ਬਭੂਤਂ ਉਪਚਾਰਜ੍ਝਾਨਮ੍ਪਿ ਤਙ੍ਖਣਞ੍ਞੇਵ ਨਿਬ੍ਬਤ੍ਤਤਿ. ਇਤੋ ਪਰਂ ਯਾਵ ਪਠਮਜ੍ਝਾਨਸ੍ਸ ਅਪ੍ਪਨਾ ਚੇਵ ਵਸਿਪ੍ਪਤ੍ਤਿ ਚ, ਤਾਵ ਸਬ੍ਬਂ ਪਥਵੀਕਸਿਣੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

ਵਿਨੀਲਕਾਦਿਕਮ੍ਮਟ੍ਠਾਨਾਨਿ

੧੧੮. ਇਤੋ ਪਰੇਸੁ ਪਨ ਵਿਨੀਲਕਾਦੀਸੁਪਿ ਯਂ ਤਂ ‘‘ਉਦ੍ਧੁਮਾਤਕਂ ਅਸੁਭਨਿਮਿਤ੍ਤਂ ਉਗ੍ਗਣ੍ਹਨ੍ਤੋ ਏਕੋ ਅਦੁਤਿਯੋ ਗਚ੍ਛਤਿ ਉਪਟ੍ਠਿਤਾਯ ਸਤਿਯਾ’’ਤਿਆਦਿਨਾ ਨਯੇਨ ਗਮਨਂ ਆਦਿਂ ਕਤ੍ਵਾ ਲਕ੍ਖਣਂ ਵੁਤ੍ਤਂ, ਤਂ ਸਬ੍ਬਂ ‘‘ਵਿਨੀਲਕਂ ਅਸੁਭਨਿਮਿਤ੍ਤਂ ਉਗ੍ਗਣ੍ਹਨ੍ਤੋ, ਵਿਪੁਬ੍ਬਕਂ ਅਸੁਭਨਿਮਿਤ੍ਤਂ ਉਗ੍ਗਣ੍ਹਨ੍ਤੋ’’ਤਿ ਏਵਂ ਤਸ੍ਸ ਤਸ੍ਸ ਵਸੇਨ ਤਤ੍ਥ ਤਤ੍ਥ ਉਦ੍ਧੁਮਾਤਕਪਦਮਤ੍ਤਂ ਪਰਿਵਤ੍ਤੇਤ੍ਵਾ ਵੁਤ੍ਤਨਯੇਨੇਵ ਸਵਿਨਿਚ੍ਛਯਾਧਿਪ੍ਪਾਯਂ ਵੇਦਿਤਬ੍ਬਂ.

ਅਯਂ ਪਨ ਵਿਸੇਸੋ – ਵਿਨੀਲਕੇ ‘‘ਵਿਨੀਲਕਪਟਿਕ੍ਕੂਲਂ ਵਿਨੀਲਕਪਟਿਕ੍ਕੂਲ’’ਨ੍ਤਿ ਮਨਸਿਕਾਰੋ ਪਵਤ੍ਤੇਤਬ੍ਬੋ. ਉਗ੍ਗਹਨਿਮਿਤ੍ਤਞ੍ਚੇਤ੍ਥ ਕਬਰਕਬਰਵਣ੍ਣਂ ਹੁਤ੍ਵਾ ਉਪਟ੍ਠਾਤਿ. ਪਟਿਭਾਗਨਿਮਿਤ੍ਤਂ ਪਨ ਉਸ੍ਸਦਵਸੇਨ ਉਪਟ੍ਠਾਤਿ.

ਵਿਪੁਬ੍ਬਕੇ ‘‘ਵਿਪੁਬ੍ਬਕਪਟਿਕ੍ਕੂਲਂ ਵਿਪੁਬ੍ਬਕਪਟਿਕ੍ਕੂਲ’’ਨ੍ਤਿ ਮਨਸਿਕਾਰੋ ਪਵਤ੍ਤੇਤਬ੍ਬੋ. ਉਗ੍ਗਹਨਿਮਿਤ੍ਤਂ ਪਨੇਤ੍ਥ ਪਗ੍ਘਰਨ੍ਤਮਿਵ ਉਪਟ੍ਠਾਤਿ. ਪਟਿਭਾਗਨਿਮਿਤ੍ਤਂ ਨਿਚ੍ਚਲਂ ਸਨ੍ਨਿਸਿਨ੍ਨਂ ਹੁਤ੍ਵਾ ਉਪਟ੍ਠਾਤਿ.

ਵਿਚ੍ਛਿਦ੍ਦਕਂ ਯੁਦ੍ਧਮਣ੍ਡਲੇ ਵਾ ਚੋਰਾਟਵਿਯਂ ਵਾ ਸੁਸਾਨੇ ਵਾ ਯਤ੍ਥ ਰਾਜਾਨੋ ਚੋਰੇ ਛਿਨ੍ਦਾਪੇਨ੍ਤਿ. ਅਰਞ੍ਞੇ ਵਾ ਪਨ ਸੀਹਬ੍ਯਗ੍ਘੇਹਿ ਛਿਨ੍ਨਪੁਰਿਸਟ੍ਠਾਨੇ ਲਬ੍ਭਤਿ. ਤਸ੍ਮਾ ਤਥਾਰੂਪਂ ਠਾਨਂ ਗਨ੍ਤ੍ਵਾ ਸਚੇ ਨਾਨਾਦਿਸਾਯਂ ਪਤਿਤਮ੍ਪਿ ਏਕਾਵਜ੍ਜਨੇਨ ਆਪਾਥਮਾਗਚ੍ਛਤਿ ਇਚ੍ਚੇਤਂ ਕੁਸਲਂ. ਨੋ ਚੇ ਆਗਚ੍ਛਤਿ, ਸਯਂ ਹਤ੍ਥੇਨ ਨ ਪਰਾਮਸਿਤਬ੍ਬਂ. ਪਰਾਮਸਨ੍ਤੋ ਹਿ ਵਿਸ੍ਸਾਸਂ ਆਪਜ੍ਜਤਿ. ਤਸ੍ਮਾ ਆਰਾਮਿਕੇਨ ਵਾ ਸਮਣੁਦ੍ਦੇਸੇਨ ਵਾ ਅਞ੍ਞੇਨ ਵਾ ਕੇਨਚਿ ਏਕਟ੍ਠਾਨੇ ਕਾਰੇਤਬ੍ਬਂ. ਅਲਭਨ੍ਤੇਨ ਕਤ੍ਤਰਯਟ੍ਠਿਯਾ ਵਾ ਦਣ੍ਡਕੇਨ ਵਾ ਏਕਙ੍ਗੁਲਨ੍ਤਰਂ ਕਤ੍ਵਾ ਉਪਨਾਮੇਤਬ੍ਬਂ. ਏਵਂ ਉਪਨਾਮੇਤ੍ਵਾ ‘‘ਵਿਚ੍ਛਿਦ੍ਦਕਪਟਿਕ੍ਕੂਲਂ ਵਿਚ੍ਛਿਦ੍ਦਕਪਟਿਕ੍ਕੂਲ’’ਨ੍ਤਿ ਮਨਸਿਕਾਰੋ ਪਵਤ੍ਤੇਤਬ੍ਬੋ. ਤਤ੍ਥ ਉਗ੍ਗਹਨਿਮਿਤ੍ਤਂ ਮਜ੍ਝੇ ਛਿਦ੍ਦਂ ਵਿਯ ਉਪਟ੍ਠਾਤਿ. ਪਟਿਭਾਗਨਿਮਿਤ੍ਤਂ ਪਨ ਪਰਿਪੁਣ੍ਣਂ ਹੁਤ੍ਵਾ ਉਪਟ੍ਠਾਤਿ.

ਵਿਕ੍ਖਾਯਿਤਕੇ ਵਿਕ੍ਖਾਯਿਤਕਪਟਿਕ੍ਕੂਲਂ ਵਿਕ੍ਖਾਯਿਤਕਪਟਿਕ੍ਕੂਲਨ੍ਤਿ ਮਨਸਿਕਾਰੋ ਪਵਤ੍ਤੇਤਬ੍ਬੋ. ਉਗ੍ਗਹਨਿਮਿਤ੍ਤਂ ਪਨੇਤ੍ਥ ਤਹਿਂ ਤਹਿਂ ਖਾਯਿਤਸਦਿਸਮੇਵ ਉਪਟ੍ਠਾਤਿ. ਪਟਿਭਾਗਨਿਮਿਤ੍ਤਂ ਪਰਿਪੁਣ੍ਣਂਵ ਹੁਤ੍ਵਾ ਉਪਟ੍ਠਾਤਿ.

ਵਿਕ੍ਖਿਤ੍ਤਕਮ੍ਪਿ ਵਿਚ੍ਛਿਦ੍ਦਕੇ ਵੁਤ੍ਤਨਯੇਨੇਵ ਅਙ੍ਗੁਲਙ੍ਗੁਲਨ੍ਤਰਂ ਕਾਰੇਤ੍ਵਾ ਵਾ ਕਤ੍ਵਾ ਵਾ ‘‘ਵਿਕ੍ਖਿਤ੍ਤਕਪਟਿਕ੍ਕੂਲਂ ਵਿਕ੍ਖਿਤ੍ਤਕਪਟਿਕ੍ਕੂਲ’’ਨ੍ਤਿ ਮਨਸਿਕਾਰੋ ਪਵਤ੍ਤੇਤਬ੍ਬੋ. ਏਤ੍ਥ ਉਗ੍ਗਹਨਿਮਿਤ੍ਤਂ ਪਾਕਟਨ੍ਤਰਂ ਹੁਤ੍ਵਾ ਉਪਟ੍ਠਾਤਿ. ਪਟਿਭਾਗਨਿਮਿਤ੍ਤਂ ਪਨ ਪਰਿਪੁਣ੍ਣਂਵ ਹੁਤ੍ਵਾ ਉਪਟ੍ਠਾਤਿ.

ਹਤਵਿਕ੍ਖਿਤ੍ਤਕਮ੍ਪਿ ਵਿਚ੍ਛਿਦ੍ਦਕੇ ਵੁਤ੍ਤਪ੍ਪਕਾਰੇਸੁਯੇਵ ਠਾਨੇਸੁ ਲਬ੍ਭਤਿ. ਤਸ੍ਮਾ ਤਤ੍ਥ ਗਨ੍ਤ੍ਵਾ ਵੁਤ੍ਤਨਯੇਨੇਵ ਅਙ੍ਗੁਲਙ੍ਗੁਲਨ੍ਤਰਂ ਕਾਰੇਤ੍ਵਾ ਵਾ ਕਤ੍ਵਾ ਵਾ ‘‘ਹਤਵਿਕ੍ਖਿਤ੍ਤਕਪਟਿਕ੍ਕੂਲਂ ਹਤਵਿਕ੍ਖਿਤ੍ਤਕਪਟਿਕ੍ਕੂਲ’’ਨ੍ਤਿ ਮਨਸਿਕਾਰੋ ਪਵਤ੍ਤੇਤਬ੍ਬੋ. ਉਗ੍ਗਹਨਿਮਿਤ੍ਤਂ ਪਨੇਤ੍ਥ ਪਞ੍ਞਾਯਮਾਨਂ ਪਹਾਰਮੁਖਂ ਵਿਯ ਹੋਤਿ. ਪਟਿਭਾਗਨਿਮਿਤ੍ਤਂ ਪਰਿਪੁਣ੍ਣਮੇਵ ਹੁਤ੍ਵਾ ਉਪਟ੍ਠਾਤਿ.

ਲੋਹਿਤਕਂ ਯੁਦ੍ਧਮਣ੍ਡਲਾਦੀਸੁ ਲਦ੍ਧਪ੍ਪਹਾਰਾਨਂ ਹਤ੍ਥਪਾਦਾਦੀਸੁ ਵਾ ਛਿਨ੍ਨੇਸੁ ਭਿਨ੍ਨਗਣ੍ਡਪੀਲ਼ਕਾਦੀਨਂ ਵਾ ਮੁਖਤੋ ਪਗ੍ਘਰਮਾਨਕਾਲੇ ਲਬ੍ਭਤਿ. ਤਸ੍ਮਾ ਤਂ ਦਿਸ੍ਵਾ ‘‘ਲੋਹਿਤਕਪਟਿਕ੍ਕੂਲਂ ਲੋਹਿਤਕਪਟਿਕ੍ਕੂਲ’’ਨ੍ਤਿ ਮਨਸਿਕਾਰੋ ਪਵਤ੍ਤੇਤਬ੍ਬੋ. ਏਤ੍ਥ ਉਗ੍ਗਹਨਿਮਿਤ੍ਤਂ ਵਾਤਪ੍ਪਹਤਾ ਵਿਯ ਰਤ੍ਤਪਟਾਕਾ ਚਲਮਾਨਾਕਾਰਂ ਉਪਟ੍ਠਾਤਿ. ਪਟਿਭਾਗਨਿਮਿਤ੍ਤਂ ਪਨ ਸਨ੍ਨਿਸਿਨ੍ਨਂ ਹੁਤ੍ਵਾ ਉਪਟ੍ਠਾਤਿ.

ਪੁਲ਼ਵਕਂ ਦ੍ਵੀਹਤੀਹਚ੍ਚਯੇਨ ਕੁਣਪਸ੍ਸ ਨਵਹਿ ਵਣਮੁਖੇਹਿ ਕਿਮਿਰਾਸਿਪਗ੍ਘਰਣਕਾਲੇ ਹੋਤਿ. ਅਪਿਚ ਤਂ ਸੋਣਸਿਙ੍ਗਾਲਮਨੁਸ੍ਸਗੋਮਹਿਂਸਹਤ੍ਥਿਅਸ੍ਸਅਜਗਰਾਦੀਨਂ ਸਰੀਰਪ੍ਪਮਾਣਮੇਵ ਹੁਤ੍ਵਾ ਸਾਲਿਭਤ੍ਤਰਾਸਿ ਵਿਯ ਤਿਟ੍ਠਤਿ. ਤੇਸੁ ਯਤ੍ਥ ਕਤ੍ਥਚਿ ‘‘ਪੁਲ਼ਵਕਪਟਿਕ੍ਕੂਲਂ ਪੁਲ਼ਵਕਪਟਿਕ੍ਕੂਲ’’ਨ੍ਤਿ ਮਨਸਿਕਾਰੋ ਪਵਤ੍ਤੇਤਬ੍ਬੋ. ਚੂਲ਼ਪਿਣ੍ਡਪਾਤਿਕਤਿਸ੍ਸਤ੍ਥੇਰਸ੍ਸ ਹਿ ਕਾਲ਼ਦੀਘਵਾਪਿਯਾ ਅਨ੍ਤੋ ਹਤ੍ਥਿਕੁਣਪੇ ਨਿਮਿਤ੍ਤਂ ਉਪਟ੍ਠਾਸਿ. ਉਗ੍ਗਹਨਿਮਿਤ੍ਤਂ ਪਨੇਤ੍ਥ ਚਲਮਾਨਂ ਵਿਯ ਉਪਟ੍ਠਾਤਿ. ਪਟਿਭਾਗਨਿਮਿਤ੍ਤਂ ਸਾਲਿਭਤ੍ਤਪਿਣ੍ਡੋ ਵਿਯ ਸਨ੍ਨਿਸਿਨ੍ਨਂ ਹੁਤ੍ਵਾ ਉਪਟ੍ਠਾਤਿ.

ਅਟ੍ਠਿਕਂ ‘‘ਸੇਯ੍ਯਥਾਪਿ ਪਸ੍ਸੇਯ੍ਯ ਸਰੀਰਂ ਸਿਵਥਿਕਾਯ ਛਡ੍ਡਿਤਂ ਅਟ੍ਠਿਸਙ੍ਖਲਿਕਂ ਸਮਂਸਲੋਹਿਤਂ ਨਹਾਰੁਸਮ੍ਬਨ੍ਧ’’ਨ੍ਤਿਆਦਿਨਾ (ਮ. ਨਿ. ੩.੧੫੪) ਨਯੇਨ ਨਾਨਪ੍ਪਕਾਰਤੋ ਵੁਤ੍ਤਂ. ਤਤ੍ਥ ਯਤ੍ਥ ਤਂ ਨਿਕ੍ਖਿਤ੍ਤਂ ਹੋਤਿ, ਤਤ੍ਥ ਪੁਰਿਮਨਯੇਨੇਵ ਗਨ੍ਤ੍ਵਾ ਸਮਨ੍ਤਾ ਪਾਸਾਣਾਦੀਨਂ ਵਸੇਨ ਸਨਿਮਿਤ੍ਤਂ ਸਾਰਮ੍ਮਣਂ ਕਤ੍ਵਾ ਇਦਂ ਅਟ੍ਠਿਕਨ੍ਤਿ ਸਭਾਵਭਾਵਤੋ ਉਪਲਕ੍ਖੇਤ੍ਵਾ ਵਣ੍ਣਾਦਿਵਸੇਨ ਏਕਾਦਸਹਾਕਾਰੇਹਿ ਨਿਮਿਤ੍ਤਂ ਉਗ੍ਗਹੇਤਬ੍ਬਂ.

੧੧੯. ਤਂ ਪਨ ਵਣ੍ਣਤੋ ਸੇਤਨ੍ਤਿ ਓਲੋਕੇਨ੍ਤਸ੍ਸ ਨ ਉਪਟ੍ਠਾਤਿ, ਓਦਾਤਕਸਿਣਸਮ੍ਭੇਦੋ ਹੋਤਿ. ਤਸ੍ਮਾ ਅਟ੍ਠਿਕਨ੍ਤਿ ਪਟਿਕ੍ਕੂਲਵਸੇਨੇਵ ਓਲੋਕੇਤਬ੍ਬਂ. ਲਿਙ੍ਗਨ੍ਤਿ ਇਧ ਹਤ੍ਥਾਦੀਨਂ ਨਾਮਂ. ਤਸ੍ਮਾ ਹਤ੍ਥਪਾਦਸੀਸਉਰਬਾਹੁਕਟਿਊਰੁਜਙ੍ਘਾਨਂ ਵਸੇਨ ਲਿਙ੍ਗਤੋ ਵਵਤ੍ਥਪੇਤਬ੍ਬਂ. ਦੀਘਰਸ੍ਸਵਟ੍ਟਚਤੁਰਸ੍ਸਖੁਦ੍ਦਕਮਹਨ੍ਤਵਸੇਨ ਪਨ ਸਣ੍ਠਾਨਤੋ ਵਵਤ੍ਥਪੇਤਬ੍ਬਂ. ਦਿਸੋਕਾਸਾ ਵੁਤ੍ਤਨਯਾ ਏਵ. ਤਸ੍ਸ ਤਸ੍ਸ ਅਟ੍ਠਿਨੋ ਪਰਿਯਨ੍ਤਵਸੇਨ ਪਰਿਚ੍ਛੇਦਤੋ ਵਵਤ੍ਥਪੇਤ੍ਵਾ ਯਦੇਵੇਤ੍ਥ ਪਾਕਟਂ ਹੁਤ੍ਵਾ ਉਪਟ੍ਠਾਤਿ, ਤਂ ਗਹੇਤ੍ਵਾ ਅਪ੍ਪਨਾ ਪਾਪੁਣਿਤਬ੍ਬਾ. ਤਸ੍ਸ ਤਸ੍ਸ ਅਟ੍ਠਿਨੋ ਨਿਨ੍ਨਟ੍ਠਾਨਥਲਟ੍ਠਾਨਵਸੇਨ ਪਨ ਨਿਨ੍ਨਤੋ ਚ ਥਲਤੋ ਚ ਵਵਤ੍ਥਪੇਤਬ੍ਬਂ. ਪਦੇਸਵਸੇਨਾਪਿ ਅਹਂ ਨਿਨ੍ਨੇ ਠਿਤੋ, ਅਟ੍ਠਿ ਥਲੇ, ਅਹਂ ਥਲੇ, ਅਟ੍ਠਿ ਨਿਨ੍ਨੇਤਿਪਿ ਵਵਤ੍ਥਪੇਤਬ੍ਬਂ. ਦ੍ਵਿਨ੍ਨਂ ਪਨ ਅਟ੍ਠਿਕਾਨਂ ਘਟਿਤਘਟਿਤਟ੍ਠਾਨਵਸੇਨ ਸਨ੍ਧਿਤੋ ਵਵਤ੍ਥਪੇਤਬ੍ਬਂ. ਅਟ੍ਠਿਕਾਨਂਯੇਵ ਅਨ੍ਤਰਵਸੇਨ ਵਿਵਰਤੋ ਵਵਤ੍ਥਪੇਤਬ੍ਬਂ. ਸਬ੍ਬਤ੍ਥੇਵ ਪਨ ਞਾਣਂ ਚਾਰੇਤ੍ਵਾ ਇਮਸ੍ਮਿਂ ਠਾਨੇ ਇਦਮਟ੍ਠੀਤਿ ਸਮਨ੍ਤਤੋ ਵਵਤ੍ਥਪੇਤਬ੍ਬਂ. ਏਵਮ੍ਪਿ ਨਿਮਿਤ੍ਤੇ ਅਨੁਪਟ੍ਠਹਨ੍ਤੇ ਨਲਾਟਟ੍ਠਿਮ੍ਹਿ ਚਿਤ੍ਤਂ ਸਣ੍ਠਪੇਤਬ੍ਬਂ.

੧੨੦. ਯਥਾ ਚੇਤ੍ਥ, ਏਵਂ ਇਦਂ ਏਕਾਦਸਵਿਧੇਨ ਨਿਮਿਤ੍ਤਗ੍ਗਹਣਂ ਇਤੋ ਪੁਰਿਮੇਸੁ ਪੁਲ਼ਵਕਾਦੀਸੁਪਿ ਯੁਜ੍ਜਮਾਨਵਸੇਨ ਸਲ੍ਲਕ੍ਖੇਤਬ੍ਬਂ. ਇਦਞ੍ਚ ਪਨ ਕਮ੍ਮਟ੍ਠਾਨਂ ਸਕਲਾਯਪਿ ਅਟ੍ਠਿਕਸਙ੍ਖਲਿਕਾਯ ਏਕਸ੍ਮਿਮ੍ਪਿ ਅਟ੍ਠਿਕੇ ਸਮ੍ਪਜ੍ਜਤਿ. ਤਸ੍ਮਾ ਤੇਸੁ ਯਤ੍ਥਕਤ੍ਥਚਿ ਏਕਾਦਸਵਿਧੇਨ ਨਿਮਿਤ੍ਤਂ ਉਗ੍ਗਹੇਤ੍ਵਾ ‘‘ਅਟ੍ਠਿਕਪਟਿਕ੍ਕੂਲਂ ਅਟ੍ਠਿਕਪਟਿਕ੍ਕੂਲ’’ਨ੍ਤਿ ਮਨਸਿਕਾਰੋ ਪਵਤ੍ਤੇਤਬ੍ਬੋ. ਇਧ ਉਗ੍ਗਹਨਿਮਿਤ੍ਤਮ੍ਪਿ ਪਟਿਭਾਗਨਿਮਿਤ੍ਤਮ੍ਪਿ ਏਕਸਦਿਸਮੇਵ ਹੋਤੀਤਿ ਵੁਤ੍ਤਂ, ਤਂ ਏਕਸ੍ਮਿਂ ਅਟ੍ਠਿਕੇ ਯੁਤ੍ਤਂ. ਅਟ੍ਠਿਕਸਙ੍ਖਲਿਕਾਯ ਪਨ ਉਗ੍ਗਹਨਿਮਿਤ੍ਤੇ ਪਞ੍ਞਾਯਮਾਨੇ ਵਿਵਰਤਾ. ਪਟਿਭਾਗਨਿਮਿਤ੍ਤੇ ਪਰਿਪੁਣ੍ਣਭਾਵੋ ਯੁਜ੍ਜਤਿ. ਏਕਟ੍ਠਿਕੇਪਿ ਚ ਉਗ੍ਗਹਨਿਮਿਤ੍ਤੇਨ ਬੀਭਚ੍ਛੇਨ ਭਯਾਨਕੇਨ ਭਵਿਤਬ੍ਬਂ. ਪਟਿਭਾਗਨਿਮਿਤ੍ਤੇਨ ਪੀਤਿਸੋਮਨਸ੍ਸਜਨਕੇਨ, ਉਪਚਾਰਾਵਹਤ੍ਤਾ.

ਇਮਸ੍ਮਿਂ ਹਿ ਓਕਾਸੇ ਯਂ ਅਟ੍ਠਕਥਾਸੁ ਵੁਤ੍ਤਂ, ਤਂ ਦ੍ਵਾਰਂ ਦਤ੍ਵਾਵ ਵੁਤ੍ਤਂ. ਤਥਾ ਹਿ ਤਤ੍ਥ ‘‘ਚਤੂਸੁ ਬ੍ਰਹ੍ਮਵਿਹਾਰੇਸੁ ਦਸਸੁ ਚ ਅਸੁਭੇਸੁ ਪਟਿਭਾਗਨਿਮਿਤ੍ਤਂ ਨਤ੍ਥਿ. ਬ੍ਰਹ੍ਮਵਿਹਾਰੇਸੁ ਹਿ ਸੀਮਸਮ੍ਭੇਦੋਯੇਵ ਨਿਮਿਤ੍ਤਂ. ਦਸਸੁ ਚ ਅਸੁਭੇਸੁ ਨਿਬ੍ਬਿਕਪ੍ਪਂ ਕਤ੍ਵਾ ਪਟਿਕ੍ਕੂਲਭਾਵੇਯੇਵ ਦਿਟ੍ਠੇ ਨਿਮਿਤ੍ਤਂ ਨਾਮ ਹੋਤੀ’’ਤਿ ਵਤ੍ਵਾਪਿ ਪੁਨ ਅਨਨ੍ਤਰਮੇਵ ‘‘ਦੁਵਿਧਂ ਇਧ ਨਿਮਿਤ੍ਤਂ ਉਗ੍ਗਹਨਿਮਿਤ੍ਤਂ ਪਟਿਭਾਗਨਿਮਿਤ੍ਤਂ. ਉਗ੍ਗਹਨਿਮਿਤ੍ਤਂ ਵਿਰੂਪਂ ਬੀਭਚ੍ਛਂ ਭਯਾਨਕਂ ਹੁਤ੍ਵਾ ਉਪਟ੍ਠਾਤੀ’’ਤਿਆਦਿ ਵੁਤ੍ਤਂ. ਤਸ੍ਮਾ ਯਂ ਵਿਚਾਰੇਤ੍ਵਾ ਅਵੋਚੁਮ੍ਹ, ਇਦਮੇਵੇਤ੍ਥ ਯੁਤ੍ਤਂ.

ਅਪਿਚ ਮਹਾਤਿਸ੍ਸਤ੍ਥੇਰਸ੍ਸ ਦਨ੍ਤਟ੍ਠਿਕਮਤ੍ਤਾਵਲੋਕਨੇਨ ਸਕਲਿਤ੍ਥਿਸਰੀਰਸ੍ਸ ਅਟ੍ਠਿਸਙ੍ਘਾਤਭਾਵੇਨ ਉਪਟ੍ਠਾਨਾਦੀਨਿ ਚੇਤ੍ਥ ਨਿਦਸ੍ਸਨਾਨੀਤਿ.

ਇਤਿ ਅਸੁਭਾਨਿ ਸੁਭਗੁਣੋ, ਦਸਸਤਲੋਚਨੇਨ ਥੁਤਕਿਤ੍ਤਿ;

ਯਾਨਿ ਅਵੋਚ ਦਸਬਲੋ, ਏਕੇਕਜ੍ਝਾਨਹੇਤੁਨੀਤਿ.

ਏਵਂ ਤਾਨਿ ਚ ਤੇਸਞ੍ਚ, ਭਾਵਨਾਨਯਮਿਮਂ ਵਿਦਿਤ੍ਵਾਨ;

ਤੇਸ੍ਵੇਵ ਅਯਂ ਭਿਯ੍ਯੋ, ਪਕਿਣ੍ਣਕਕਥਾਪਿ ਵਿਞ੍ਞੇਯ੍ਯਾ.

ਪਕਿਣ੍ਣਕਕਥਾ

੧੨੧. ਏਤੇਸੁ ਹਿ ਯਤ੍ਥ ਕਤ੍ਥਚਿ ਅਧਿਗਤਜ੍ਝਾਨੋ ਸੁਵਿਕ੍ਖਮ੍ਭਿਤਰਾਗਤ੍ਤਾ ਵੀਤਰਾਗੋ ਵਿਯ ਨਿਲ੍ਲੋਲੁਪ੍ਪਚਾਰੋ ਹੋਤਿ. ਏਵਂ ਸਨ੍ਤੇਪਿ ਯ੍ਵਾਯਂ ਅਸੁਭਪ੍ਪਭੇਦੋ ਵੁਤ੍ਤੋ, ਸੋ ਸਰੀਰਸਭਾਵਪ੍ਪਤ੍ਤਿਵਸੇਨ ਚ ਰਾਗਚਰਿਤਭੇਦਵਸੇਨ ਚਾਤਿ ਵੇਦਿਤਬ੍ਬੋ. ਛਵਸਰੀਰਂ ਹਿ ਪਟਿਕ੍ਕੂਲਭਾਵਂ ਆਪਜ੍ਜਮਾਨਂ ਉਦ੍ਧੁਮਾਤਕਸਭਾਵਪ੍ਪਤ੍ਤਂ ਵਾ ਸਿਯਾ, ਵਿਨੀਲਕਾਦੀਨਂ ਵਾ ਅਞ੍ਞਤਰਸਭਾਵਪ੍ਪਤ੍ਤਂ. ਇਤਿ ਯਾਦਿਸਂ ਯਾਦਿਸਂ ਸਕ੍ਕਾ ਹੋਤਿ ਲਦ੍ਧੁਂ, ਤਾਦਿਸੇ ਤਾਦਿਸੇ ਉਦ੍ਧੁਮਾਤਕਪਟਿਕ੍ਕੂਲਂ ਵਿਨੀਲਕਪਟਿਕ੍ਕੂਲਨ੍ਤਿ ਏਵਂ ਨਿਮਿਤ੍ਤਂ ਗਣ੍ਹਿਤਬ੍ਬਮੇਵਾਤਿ ਸਰੀਰਸਭਾਵਪ੍ਪਤ੍ਤਿਵਸੇਨ ਦਸਧਾ ਅਸੁਭਪ੍ਪਭੇਦੋ ਵੁਤ੍ਤੋਤਿ ਵੇਦਿਤਬ੍ਬੋ.

ਵਿਸੇਸਤੋ ਚੇਤ੍ਥ ਉਦ੍ਧੁਮਾਤਕਂ ਸਰੀਰਸਣ੍ਠਾਨਵਿਪਤ੍ਤਿਪ੍ਪਕਾਸਨਤੋ ਸਣ੍ਠਾਨਰਾਗਿਨੋ ਸਪ੍ਪਾਯਂ. ਵਿਨੀਲਕਂ ਛਵਿਰਾਗਵਿਪਤ੍ਤਿਪ੍ਪਕਾਸਨਤੋ ਸਰੀਰਵਣ੍ਣਰਾਗਿਨੋ ਸਪ੍ਪਾਯਂ. ਵਿਪੁਬ੍ਬਕਂ ਕਾਯਵਣਪਟਿਬਦ੍ਧਸ੍ਸ ਦੁਗ੍ਗਨ੍ਧਭਾਵਸ੍ਸ ਪਕਾਸਨਤੋ ਮਾਲਾਗਨ੍ਧਾਦਿਵਸੇਨ ਸਮੁਟ੍ਠਾਪਿਤਸਰੀਰਗਨ੍ਧਰਾਗਿਨੋ ਸਪ੍ਪਾਯਂ. ਵਿਚ੍ਛਿਦ੍ਦਕਂ ਅਨ੍ਤੋਸੁਸਿਰਭਾਵਪ੍ਪਕਾਸਨਤੋ ਸਰੀਰੇ ਘਨਭਾਵਰਾਗਿਨੋ ਸਪ੍ਪਾਯਂ. ਵਿਕ੍ਖਾਯਿਤਕਂ ਮਂਸੁਪਚਯਸਮ੍ਪਤ੍ਤਿਵਿਨਾਸਪ੍ਪਕਾਸਨਤੋ ਥਨਾਦੀਸੁ ਸਰੀਰਪ੍ਪਦੇਸੇਸੁ ਮਂਸੁਪਚਯਰਾਗਿਨੋ ਸਪ੍ਪਾਯਂ. ਵਿਕ੍ਖਿਤ੍ਤਕਂ ਅਙ੍ਗਪਚ੍ਚਙ੍ਗਾਨਂ ਵਿਕ੍ਖੇਪਪ੍ਪਕਾਸਨਤੋ ਅਙ੍ਗਪਚ੍ਚਙ੍ਗਲੀਲਾਰਾਗਿਨੋ ਸਪ੍ਪਾਯਂ. ਹਤਵਿਕ੍ਖਿਤ੍ਤਕਂ ਸਰੀਰਸਙ੍ਘਾਤਭੇਦਵਿਕਾਰਪ੍ਪਕਾਸਨਤੋ ਸਰੀਰਸਙ੍ਘਾਤਸਮ੍ਪਤ੍ਤਿਰਾਗਿਨੋ ਸਪ੍ਪਾਯਂ. ਲੋਹਿਤਕਂ ਲੋਹਿਤਮਕ੍ਖਿਤਪਟਿਕ੍ਕੂਲਭਾਵਪ੍ਪਕਾਸਨਤੋ ਅਲਙ੍ਕਾਰਜਨਿਤਸੋਭਰਾਗਿਨੋ ਸਪ੍ਪਾਯਂ. ਪੁਲ਼ਵਕਂ ਕਾਯਸ੍ਸ ਅਨੇਕਕਿਮਿਕੁਲਸਾਧਾਰਣਭਾਵਪ੍ਪਕਾਸਨਤੋ ਕਾਯੇ ਮਮਤ੍ਤਰਾਗਿਨੋ ਸਪ੍ਪਾਯਂ. ਅਟ੍ਠਿਕਂ ਸਰੀਰਟ੍ਠੀਨਂ ਪਟਿਕ੍ਕੂਲਭਾਵਪ੍ਪਕਾਸਨਤੋ ਦਨ੍ਤਸਮ੍ਪਤ੍ਤਿਰਾਗਿਨੋ ਸਪ੍ਪਾਯਨ੍ਤਿ ਏਵਂ ਰਾਗਚਰਿਤਭੇਦਵਸੇਨਾਪਿ ਦਸਧਾ ਅਸੁਭਪ੍ਪਭੇਦੋ ਵੁਤ੍ਤੋਤਿ ਵੇਦਿਤਬ੍ਬੋ.

ਯਸ੍ਮਾ ਪਨ ਦਸਵਿਧੇਪਿ ਏਤਸ੍ਮਿਂ ਅਸੁਭੇ ਸੇਯ੍ਯਥਾਪਿ ਨਾਮ ਅਪਰਿਸਣ੍ਠਿਤਜਲਾਯ ਸੀਘਸੋਤਾਯ ਨਦਿਯਾ ਅਰਿਤ੍ਤਬਲੇਨੇਵ ਨਾਵਾ ਤਿਟ੍ਠਤਿ, ਵਿਨਾ ਅਰਿਤ੍ਤੇਨ ਨ ਸਕ੍ਕਾ ਠਪੇਤੁਂ, ਏਵਮੇਵ ਦੁਬ੍ਬਲਤ੍ਤਾ ਆਰਮ੍ਮਣਸ੍ਸ ਵਿਤਕ੍ਕਬਲੇਨੇਵ ਚਿਤ੍ਤਂ ਏਕਗ੍ਗਂ ਹੁਤ੍ਵਾ ਤਿਟ੍ਠਤਿ, ਵਿਨਾ ਵਿਤਕ੍ਕੇਨ ਨ ਸਕ੍ਕਾ ਠਪੇਤੁਂ, ਤਸ੍ਮਾ ਪਠਮਜ੍ਝਾਨਮੇਵੇਤ੍ਥ ਹੋਤਿ, ਨ ਦੁਤਿਯਾਦੀਨਿ.

ਪਟਿਕ੍ਕੂਲੇਪਿ ਚ ਏਤਸ੍ਮਿਂ ਆਰਮ੍ਮਣੇ ‘‘ਅਦ੍ਧਾ ਇਮਾਯ ਪਟਿਪਦਾਯ ਜਰਾਮਰਣਮ੍ਹਾ ਪਰਿਮੁਚ੍ਚਿਸ੍ਸਾਮੀ’’ਤਿ ਏਵਮਾਨਿਸਂਸਦਸ੍ਸਾਵਿਤਾਯ ਚੇਵ ਨੀਵਰਣਸਨ੍ਤਾਪਪ੍ਪਹਾਨੇਨ ਚ ਪੀਤਿਸੋਮਨਸ੍ਸਂ ਉਪ੍ਪਜ੍ਜਤਿ, ‘‘ਬਹੁਂ ਦਾਨਿ ਵੇਤਨਂ ਲਭਿਸ੍ਸਾਮੀ’’ਤਿ ਆਨਿਸਂਸਦਸ੍ਸਾਵਿਨੋ ਪੁਪ੍ਫਛਡ੍ਡਕਸ੍ਸ ਗੂਥਰਾਸਿਮ੍ਹਿ ਵਿਯ, ਉਸ੍ਸਨ੍ਨਬ੍ਯਾਧਿਦੁਕ੍ਖਸ੍ਸ ਰੋਗਿਨੋ ਵਮਨਵਿਰੇਚਨਪ੍ਪਵਤ੍ਤਿਯਂ ਵਿਯ ਚ.

੧੨੨. ਦਸਵਿਧਮ੍ਪਿ ਚੇਤਂ ਅਸੁਭਂ ਲਕ੍ਖਣਤੋ ਏਕਮੇਵ ਹੋਤਿ. ਦਸਵਿਧਸ੍ਸਾਪਿ ਹੇਤਸ੍ਸ ਅਸੁਚਿਦੁਗ੍ਗਨ੍ਧਜੇਗੁਚ੍ਛਪਟਿਕ੍ਕੂਲਭਾਵੋ ਏਵ ਲਕ੍ਖਣਂ. ਤਦੇਤਂ ਇਮਿਨਾ ਲਕ੍ਖਣੇਨ ਨ ਕੇਵਲਂ ਮਤਸਰੀਰੇ, ਦਨ੍ਤਟ੍ਠਿਕਦਸ੍ਸਾਵਿਨੋ ਪਨ ਚੇਤਿਯਪਬ੍ਬਤਵਾਸਿਨੋ ਮਹਾਤਿਸ੍ਸਤ੍ਥੇਰਸ੍ਸ ਵਿਯ, ਹਤ੍ਥਿਕ੍ਖਨ੍ਧਗਤਂ ਰਾਜਾਨਂ ਓਲੋਕੇਨ੍ਤਸ੍ਸ ਸਙ੍ਘਰਕ੍ਖਿਤਤ੍ਥੇਰੂਪਟ੍ਠਾਕਸਾਮਣੇਰਸ੍ਸ ਵਿਯ ਚ ਜੀਵਮਾਨਕਸਰੀਰੇਪਿ ਉਪਟ੍ਠਾਤਿ. ਯਥੇਵ ਹਿ ਮਤਸਰੀਰਂ, ਏਵਂ ਜੀਵਮਾਨਕਮ੍ਪਿ ਅਸੁਭਮੇਵ. ਅਸੁਭਲਕ੍ਖਣਂ ਪਨੇਤ੍ਥ ਆਗਨ੍ਤੁਕੇਨ ਅਲਙ੍ਕਾਰੇਨ ਪਟਿਚ੍ਛਨ੍ਨਤ੍ਤਾ ਨ ਪਞ੍ਞਾਯਤਿ. ਪਕਤਿਯਾ ਪਨ ਇਦਂ ਸਰੀਰਂ ਨਾਮ ਅਤਿਰੇਕਤਿਸਤਅਟ੍ਠਿਕਸਮੁਸ੍ਸਯਂ ਅਸੀਤਿਸਤਸਨ੍ਧਿਸਙ੍ਘਟਿਤਂ ਨਵਨ੍ਹਾਰੁਸਤਨਿਬਨ੍ਧਨਂ ਨਵਮਂਸਪੇਸਿਸਤਾਨੁਲਿਤ੍ਤਂ ਅਲ੍ਲਚਮ੍ਮਪਰਿਯੋਨਦ੍ਧਂ ਛਵਿਯਾ ਪਟਿਚ੍ਛਨ੍ਨਂ ਛਿਦ੍ਦਾਵਛਿਦ੍ਦਂ ਮੇਦਕਥਾਲਿਕਾ ਵਿਯ ਨਿਚ੍ਚੁਗ੍ਘਰਿਤਪਗ੍ਘਰਿਤਂ ਕਿਮਿਸਙ੍ਘਨਿਸੇਵਿਤਂ ਰੋਗਾਨਂ ਆਯਤਨਂ ਦੁਕ੍ਖਧਮ੍ਮਾਨਂ ਵਤ੍ਥੁ ਪਰਿਭਿਨ੍ਨਪੁਰਾਣਗਣ੍ਡੋ ਵਿਯ ਨਵਹਿ ਵਣਮੁਖੇਹਿ ਸਤਤਵਿਸ੍ਸਨ੍ਦਨਂ. ਯਸ੍ਸ ਉਭੋਹਿ ਅਕ੍ਖੀਹਿ ਅਕ੍ਖਿਗੂਥਕੋ ਪਗ੍ਘਰਤਿ, ਕਣ੍ਣਬਿਲੇਹਿ ਕਣ੍ਣਗੂਥਕੋ, ਨਾਸਾਪੁਟੇਹਿ ਸਿਙ੍ਘਾਣਿਕਾ, ਮੁਖਤੋ ਆਹਾਰਪਿਤ੍ਤਸੇਮ੍ਹਰੁਧਿਰਾਨਿ, ਅਧੋਦ੍ਵਾਰੇਹਿ ਉਚ੍ਚਾਰਪਸ੍ਸਾਵਾ, ਨਵਨਵੁਤਿਯਾ ਲੋਮਕੂਪਸਹਸ੍ਸੇਹਿ ਅਸੁਚਿਸੇਦਯੂਸੋ ਪਗ੍ਘਰਤਿ. ਨੀਲਮਕ੍ਖਿਕਾਦਯੋ ਸਮ੍ਪਰਿਵਾਰੇਨ੍ਤਿ. ਯਂ ਦਨ੍ਤਕਟ੍ਠਮੁਖਧੋਵਨਸੀਸਮਕ੍ਖਨਨਹਾਨਨਿਵਾਸਨਪਾਰੁਪਨਾਦੀਹਿ ਅਪ੍ਪਟਿਜਗ੍ਗਿਤ੍ਵਾ ਯਥਾਜਾਤੋਵ ਫਰੁਸਵਿਪ੍ਪਕਿਣ੍ਣਕੇਸੋ ਹੁਤ੍ਵਾ ਗਾਮੇਨ ਗਾਮਂ ਵਿਚਰਨ੍ਤੋ ਰਾਜਾਪਿ ਪੁਪ੍ਫਛਡ੍ਡਕਚਣ੍ਡਾਲਾਦੀਸੁ ਅਞ੍ਞਤਰੋਪਿ ਸਮਸਰੀਰਪਟਿਕ੍ਕੂਲਤਾਯ ਨਿਬ੍ਬਿਸੇਸੋ ਹੋਤਿ, ਏਵਂ ਅਸੁਚਿਦੁਗ੍ਗਨ੍ਧਜੇਗੁਚ੍ਛਪਟਿਕ੍ਕੂਲਤਾਯ ਰਞ੍ਞੋ ਵਾ ਚਣ੍ਡਾਲਸ੍ਸ ਵਾ ਸਰੀਰੇ ਵੇਮਤ੍ਤਂ ਨਾਮ ਨਤ੍ਥਿ. ਦਨ੍ਤਕਟ੍ਠਮੁਖਧੋਵਨਾਦੀਹਿ ਪਨੇਤ੍ਥ ਦਨ੍ਤਮਲਾਦੀਨਿ ਪਮਜ੍ਜਿਤ੍ਵਾ ਨਾਨਾਵਤ੍ਥੇਹਿ ਹਿਰਿਕੋਪੀਨਂ ਪਟਿਚ੍ਛਾਦੇਤ੍ਵਾ ਨਾਨਾਵਣ੍ਣੇਨ ਸੁਰਭਿਵਿਲੇਪਨੇਨ ਵਿਲਿਮ੍ਪਿਤ੍ਵਾ ਪੁਪ੍ਫਾਭਰਣਾਦੀਹਿ ਅਲਙ੍ਕਰਿਤ੍ਵਾ ‘‘ਅਹਂ ਮਮ’’ਨ੍ਤਿ ਗਹੇਤਬ੍ਬਾਕਾਰਪ੍ਪਤ੍ਤਂ ਕਰੋਨ੍ਤਿ. ਤਤੋ ਇਮਿਨਾ ਆਗਨ੍ਤੁਕੇਨ ਅਲਙ੍ਕਾਰੇਨ ਪਟਿਚ੍ਛਨ੍ਨਤ੍ਤਾ ਤਦਸ੍ਸ ਯਾਥਾਵਸਰਸਂ ਅਸੁਭਲਕ੍ਖਣਂ ਅਸਞ੍ਜਾਨਨ੍ਤਾ ਪੁਰਿਸਾ ਇਤ੍ਥੀਸੁ, ਇਤ੍ਥਿਯੋ ਚ ਪੁਰਿਸੇਸੁ ਰਤਿਂ ਕਰੋਨ੍ਤਿ. ਪਰਮਤ੍ਥਤੋ ਪਨੇਤ੍ਥ ਰਜ੍ਜਿਤਬ੍ਬਕਯੁਤ੍ਤਟ੍ਠਾਨਂ ਨਾਮ ਅਣੁਮਤ੍ਤਮ੍ਪਿ ਨਤ੍ਥਿ. ਤਥਾ ਹਿ ਕੇਸਲੋਮਨਖਦਨ੍ਤਖੇਲ਼ਸਿਙ੍ਘਾਣਿਕਉਚ੍ਚਾਰਪਸ੍ਸਾਵਾਦੀਸੁ ਏਕਕੋਟ੍ਠਾਸਮ੍ਪਿ ਸਰੀਰਤੋ ਬਹਿ ਪਤਿਤਂ ਸਤ੍ਤਾ ਹਤ੍ਥੇਨ ਛੁਪਿਤੁਮ੍ਪਿ ਨ ਇਚ੍ਛਨ੍ਤਿ, ਅਟ੍ਟੀਯਨ੍ਤਿ ਹਰਾਯਨ੍ਤਿ ਜਿਗੁਚ੍ਛਨ੍ਤਿ. ਯਂ ਯਂ ਪਨੇਤ੍ਥ ਅਵਸੇਸਂ ਹੋਤਿ, ਤਂ ਤਂ ਏਵਂ ਪਟਿਕ੍ਕੂਲਮ੍ਪਿ ਸਮਾਨਂ ਅਵਿਜ੍ਜਨ੍ਧਕਾਰਪਰਿਯੋਨਦ੍ਧਾ ਅਤ੍ਤਸਿਨੇਹਰਾਗਰਤ੍ਤਾ ‘‘ਇਟ੍ਠਂ ਕਨ੍ਤਂ ਨਿਚ੍ਚਂ ਸੁਖਂ ਅਤ੍ਤਾ’’ਤਿ ਗਣ੍ਹਨ੍ਤਿ. ਤੇ ਏਵਂ ਗਣ੍ਹਨ੍ਤਾ ਅਟਵਿਯਂ ਕਿਂਸੁਕਰੁਕ੍ਖਂ ਦਿਸ੍ਵਾ ਰੁਕ੍ਖਤੋ ਅਪਤਿਤਪੁਪ੍ਫਂ ‘‘ਅਯਂ ਮਂਸਪੇਸੀ’’ਤਿ ਵਿਹਞ੍ਞਮਾਨੇਨ ਜਰਸਿਙ੍ਗਾਲੇਨ ਸਮਾਨਤਂ ਆਪਜ੍ਜਨ੍ਤਿ. ਤਸ੍ਮਾ –

ਯਥਾਪਿ ਪੁਪ੍ਫਿਤਂ ਦਿਸ੍ਵਾ, ਸਿਙ੍ਗਾਲੋ ਕਿਂਸੁਕਂ ਵਨੇ;

ਮਂਸਰੁਕ੍ਖੋ ਮਯਾ ਲਦ੍ਧੋ, ਇਤਿ ਗਨ੍ਤ੍ਵਾਨ ਵੇਗਸਾ.

ਪਤਿਤਂ ਪਤਿਤਂ ਪੁਪ੍ਫਂ, ਡਂਸਿਤ੍ਵਾ ਅਤਿਲੋਲੁਪੋ;

ਨਯਿਦਂ ਮਂਸਂ ਅਦੁਂ ਮਂਸਂ, ਯਂ ਰੁਕ੍ਖਸ੍ਮਿਨ੍ਤਿ ਗਣ੍ਹਤਿ.

ਕੋਟ੍ਠਾਸਂ ਪਤਿਤਂਯੇਵ, ਅਸੁਭਨ੍ਤਿ ਤਥਾ ਬੁਧੋ;

ਅਗ੍ਗਹੇਤ੍ਵਾਨ ਗਣ੍ਹੇਯ੍ਯ, ਸਰੀਰਟ੍ਠਮ੍ਪਿ ਨਂ ਤਥਾ.

ਇਮਞ੍ਹਿ ਸੁਭਤੋ ਕਾਯਂ, ਗਹੇਤ੍ਵਾ ਤਤ੍ਥ ਮੁਚ੍ਛਿਤਾ;

ਬਾਲਾ ਕਰੋਨ੍ਤਾ ਪਾਪਾਨਿ, ਦੁਕ੍ਖਾ ਨ ਪਰਿਮੁਚ੍ਚਰੇ.

ਤਸ੍ਮਾ ਪਸ੍ਸੇਯ੍ਯ ਮੇਧਾਵੀ, ਜੀਵਤੋ ਵਾ ਮਤਸ੍ਸ ਵਾ;

ਸਭਾਵਂ ਪੂਤਿਕਾਯਸ੍ਸ, ਸੁਭਭਾਵੇਨ ਵਜ੍ਜਿਤਂ.

ਵੁਤ੍ਤਞ੍ਹੇਤਂ –

ਦੁਗ੍ਗਨ੍ਧੋ ਅਸੁਚਿ ਕਾਯੋ, ਕੁਣਪੋ ਉਕ੍ਕਰੂਪਮੋ;

ਨਿਨ੍ਦਿਤੋ ਚਕ੍ਖੁਭੂਤੇਹਿ, ਕਾਯੋ ਬਾਲਾਭਿਨਨ੍ਦਿਤੋ.

ਅਲ੍ਲਚਮ੍ਮਪਟਿਚ੍ਛਨ੍ਨੋ, ਨਵਦ੍ਵਾਰੋ ਮਹਾਵਣੋ;

ਸਮਨ੍ਤਤੋ ਪਗ੍ਘਰਤਿ, ਅਸੁਚਿ ਪੂਤਿਗਨ੍ਧਿਯੋ.

ਸਚੇ ਇਮਸ੍ਸ ਕਾਯਸ੍ਸ, ਅਨ੍ਤੋ ਬਾਹਿਰਕੋ ਸਿਯਾ;

ਦਣ੍ਡਂ ਨੂਨ ਗਹੇਤ੍ਵਾਨ, ਕਾਕੇ ਸੋਣੇ ਨਿਵਾਰਯੇਤਿ.

ਤਸ੍ਮਾ ਦਬ੍ਬਜਾਤਿਕੇਨ ਭਿਕ੍ਖੁਨਾ ਜੀਵਮਾਨਸਰੀਰਂ ਵਾ ਹੋਤੁ

ਮਤਸਰੀਰਂ ਵਾ ਯਤ੍ਥ ਯਤ੍ਥ ਅਸੁਭਾਕਾਰੋ ਪਞ੍ਞਾਯਤਿ, ਤਤ੍ਥ ਤਤ੍ਥੇਵ ਨਿਮਿਤ੍ਤਂ ਗਹੇਤ੍ਵਾ ਕਮ੍ਮਟ੍ਠਾਨਂ ਅਪ੍ਪਨਂ ਪਾਪੇਤਬ੍ਬਨ੍ਤਿ.

ਇਤਿ ਸਾਧੁਜਨਪਾਮੋਜ੍ਜਤ੍ਥਾਯ ਕਤੇ ਵਿਸੁਦ੍ਧਿਮਗ੍ਗੇ

ਸਮਾਧਿਭਾਵਨਾਧਿਕਾਰੇ

ਅਸੁਭਕਮ੍ਮਟ੍ਠਾਨਨਿਦ੍ਦੇਸੋ ਨਾਮ

ਛਟ੍ਠੋ ਪਰਿਚ੍ਛੇਦੋ.