੧੧. ਸਮਾਧਿਨਿਦ੍ਦੇਸੋ

ਆਹਾਰੇਪਟਿਕ੍ਕੂਲਭਾਵਨਾ

੨੯੪. ਇਦਾਨਿ ਆਰੁਪ੍ਪਾਨਨ੍ਤਰਂ ਏਕਾ ਸਞ੍ਞਾਤਿ ਏਵਂ ਉਦ੍ਦਿਟ੍ਠਾਯ ਆਹਾਰੇ ਪਟਿਕ੍ਕੂਲਸਞ੍ਞਾਯ ਭਾਵਨਾਨਿਦ੍ਦੇਸੋ ਅਨੁਪ੍ਪਤ੍ਤੋ. ਤਤ੍ਥ ਆਹਰਤੀਤਿ ਆਹਾਰੋ. ਸੋ ਚਤੁਬ੍ਬਿਧੋ ਕਬਲ਼ੀਕਾਰਾਹਾਰੋ, ਫਸ੍ਸਾਹਾਰੋ, ਮਨੋਸਞ੍ਚੇਤਨਾਹਾਰੋ, ਵਿਞ੍ਞਾਣਾਹਾਰੋਤਿ.

ਕੋ ਪਨੇਤ੍ਥ ਕਿਮਾਹਰਤੀਤਿ? ਕਬਲ਼ੀਕਾਰਾਹਾਰੋ ਓਜਟ੍ਠਮਕਂ ਰੂਪਂ ਆਹਰਤਿ. ਫਸ੍ਸਾਹਾਰੋ ਤਿਸ੍ਸੋ ਵੇਦਨਾ ਆਹਰਤਿ. ਮਨੋਸਞ੍ਚੇਤਨਾਹਾਰੋ ਤੀਸੁ ਭਵੇਸੁ ਪਟਿਸਨ੍ਧਿਂ ਆਹਰਤਿ. ਵਿਞ੍ਞਾਣਾਹਾਰੋ ਪਟਿਸਨ੍ਧਿਕ੍ਖਣੇ ਨਾਮਰੂਪਂ ਆਹਰਤਿ.

ਤੇਸੁ ਕਬਲ਼ੀਕਾਰਾਹਾਰੇ ਨਿਕਨ੍ਤਿਭਯਂ. ਫਸ੍ਸਾਹਾਰੇ ਉਪਗਮਨਭਯਂ. ਮਨੋਸਞ੍ਚੇਤਨਾਹਾਰੇ ਉਪਪਤ੍ਤਿਭਯਂ. ਵਿਞ੍ਞਾਣਾਹਾਰੇ ਪਟਿਸਨ੍ਧਿਭਯਂ. ਏਵਂ ਸਪ੍ਪਟਿਭਯੇਸੁ ਚ ਤੇਸੁ ਕਬਲ਼ੀਕਾਰਾਹਾਰੋ ਪੁਤ੍ਤਮਂਸੂਪਮੇਨ (ਸਂ. ਨਿ. ੨.੬੩) ਦੀਪੇਤਬ੍ਬੋ. ਫਸ੍ਸਾਹਾਰੋ ਨਿਚ੍ਚਮ੍ਮਗਾਵੂਪਮੇਨ (ਸਂ. ਨਿ. ੨.੬੩). ਮਨੋਸਞ੍ਚੇਤਨਾਹਾਰੋ ਅਙ੍ਗਾਰਕਾਸੂਪਮੇਨ (ਸਂ. ਨਿ. ੨.੬੩). ਵਿਞ੍ਞਾਣਾਹਾਰੋ ਸਤ੍ਤਿਸਤੂਪਮੇਨਾਤਿ (ਸਂ. ਨਿ. ੨.੬੩). ਇਮੇਸੁ ਪਨ ਚਤੂਸੁ ਆਹਾਰੇਸੁ ਅਸਿਤਪੀਤਖਾਯਿਤਸਾਯਿਤਪ੍ਪਭੇਦੋ ਕਬਲ਼ੀਕਾਰੋ ਆਹਾਰੋਵ ਇਮਸ੍ਮਿਂ ਅਤ੍ਥੇ ਆਹਾਰੋਤਿ ਅਧਿਪ੍ਪੇਤੋ. ਤਸ੍ਮਿਂ ਆਹਾਰੇ ਪਟਿਕ੍ਕੂਲਾਕਾਰਗ੍ਗਹਣਵਸੇਨ ਉਪ੍ਪਨ੍ਨਾ ਸਞ੍ਞਾ ਆਹਾਰੇ ਪਟਿਕ੍ਕੂਲਸਞ੍ਞਾ.

ਤਂ ਆਹਾਰੇ ਪਟਿਕ੍ਕੂਲਸਞ੍ਞਂ ਭਾਵੇਤੁਕਾਮੇਨ ਕਮ੍ਮਟ੍ਠਾਨਂ ਉਗ੍ਗਹੇਤ੍ਵਾ ਉਗ੍ਗਹਤੋ ਏਕਪਦਮ੍ਪਿ ਅਵਿਰਜ੍ਝਨ੍ਤੇਨ ਰਹੋਗਤੇਨ ਪਟਿਸਲ੍ਲੀਨੇਨ ਅਸਿਤਪੀਤਖਾਯਿਤਸਾਯਿਤਪ੍ਪਭੇਦੇ ਕਬਲ਼ੀਕਾਰਾਹਾਰੇ ਦਸਹਾਕਾਰੇਹਿ ਪਟਿਕ੍ਕੂਲਤਾ ਪਚ੍ਚਵੇਕ੍ਖਿਤਬ੍ਬਾ. ਸੇਯ੍ਯਥਿਦਂ, ਗਮਨਤੋ, ਪਰਿਯੇਸਨਤੋ, ਪਰਿਭੋਗਤੋ, ਆਸਯਤੋ, ਨਿਧਾਨਤੋ, ਅਪਰਿਪਕ੍ਕਤੋ, ਪਰਿਪਕ੍ਕਤੋ, ਫਲਤੋ, ਨਿਸ੍ਸਨ੍ਦਤੋ, ਸਮ੍ਮਕ੍ਖਨਤੋਤਿ.

੨੯੫. ਤਤ੍ਥ ਗਮਨਤੋਤਿ ਏਵਂ ਮਹਾਨੁਭਾਵੇ ਨਾਮ ਸਾਸਨੇ ਪਬ੍ਬਜਿਤੇਨ ਸਕਲਰਤ੍ਤਿਂ ਬੁਦ੍ਧਵਚਨਸਜ੍ਝਾਯਂ ਵਾ ਸਮਣਧਮ੍ਮਂ ਵਾ ਕਤ੍ਵਾ ਕਾਲਸ੍ਸੇਵ ਵੁਟ੍ਠਾਯ ਚੇਤਿਯਙ੍ਗਣਬੋਧਿਯਙ੍ਗਣਵਤ੍ਤਂ ਕਤ੍ਵਾ ਪਾਨੀਯਂ ਪਰਿਭੋਜਨੀਯਂ ਉਪਟ੍ਠਪੇਤ੍ਵਾ ਪਰਿਵੇਣਂ ਸਮ੍ਮਜ੍ਜਿਤ੍ਵਾ ਸਰੀਰਂ ਪਟਿਜਗ੍ਗਿਤ੍ਵਾ ਆਸਨਮਾਰੂਯ੍ਹ ਵੀਸਤਿਂਸ ਵਾਰੇ ਕਮ੍ਮਟ੍ਠਾਨਂ ਮਨਸਿਕਰਿਤ੍ਵਾ ਉਟ੍ਠਾਯ ਪਤ੍ਤਚੀਵਰਂ ਗਹੇਤ੍ਵਾ ਨਿਜਨਸਮ੍ਬਾਧਾਨਿ ਪਵਿਵੇਕਸੁਖਾਨਿ ਛਾਯੂਦਕਸਮ੍ਪਨ੍ਨਾਨਿ ਸੁਚੀਨਿ ਸੀਤਲਾਨਿ ਰਮਣੀਯਭੂਮਿਭਾਗਾਨਿ ਤਪੋਵਨਾਨਿ ਪਹਾਯ ਅਰਿਯਂ ਵਿਵੇਕਰਤਿਂ ਅਨਪੇਕ੍ਖਿਤ੍ਵਾ ਸੁਸਾਨਾਭਿਮੁਖੇਨ ਸਿਙ੍ਗਾਲੇਨ ਵਿਯ ਆਹਾਰਤ੍ਥਾਯ ਗਾਮਾਭਿਮੁਖੇਨ ਗਨ੍ਤਬ੍ਬਂ.

ਏਵਂ ਗਚ੍ਛਤਾ ਚ ਮਞ੍ਚਮ੍ਹਾ ਵਾ ਪੀਠਮ੍ਹਾ ਵਾ ਓਤਰਣਤੋ ਪਟ੍ਠਾਯ ਪਾਦਰਜਘਰਗੋਲਿਕਵਚ੍ਚਾਦਿਸਮ੍ਪਰਿਕਿਣ੍ਣਂ ਪਚ੍ਚਤ੍ਥਰਣਂ ਅਕ੍ਕਮਿਤਬ੍ਬਂ ਹੋਤਿ. ਤਤੋ ਅਪ੍ਪੇਕਦਾ ਮੂਸਿਕਜਤੁਕਵਚ੍ਚਾਦੀਹਿ ਉਪਹਤਤ੍ਤਾ ਅਨ੍ਤੋਗਬ੍ਭਤੋ ਪਟਿਕ੍ਕੂਲਤਰਂ ਪਮੁਖਂ ਦਟ੍ਠਬ੍ਬਂ ਹੋਤਿ. ਤਤੋ ਉਲੂਕਪਾਰਾਵਤਾਦਿਵਚ੍ਚਸਮ੍ਮਕ੍ਖਿਤਤ੍ਤਾ ਉਪਰਿਮਤਲਤੋ ਪਟਿਕ੍ਕੂਲਤਰਂ ਹੇਟ੍ਠਿਮਤਲਂ. ਤਤੋ ਕਦਾਚਿ ਕਦਾਚਿ ਵਾਤੇਰਿਤੇਹਿ ਪੁਰਾਣਤਿਣਪਣ੍ਣੇਹਿ ਗਿਲਾਨਸਾਮਣੇਰਾਨਂ ਮੁਤ੍ਤਕਰੀਸਖੇਲ਼ਸਿਙ੍ਘਾਣਿਕਾਹਿ ਵਸ੍ਸਕਾਲੇ ਉਦਕਚਿਕ੍ਖਲ੍ਲਾਦੀਹਿ ਚ ਸਂਕਿਲਿਟ੍ਠਤ੍ਤਾ ਹੇਟ੍ਠਿਮਤਲਤੋ ਪਟਿਕ੍ਕੂਲਤਰਂ ਪਰਿਵੇਣਂ. ਪਰਿਵੇਣਤੋ ਪਟਿਕ੍ਕੂਲਤਰਾ ਵਿਹਾਰਰਚ੍ਛਾ ਦਟ੍ਠਬ੍ਬਾ ਹੋਤਿ.

ਅਨੁਪੁਬ੍ਬੇਨ ਪਨ ਬੋਧਿਞ੍ਚ ਚੇਤਿਯਞ੍ਚ ਵਨ੍ਦਿਤ੍ਵਾ ਵਿਤਕ੍ਕਮਾਲ਼ਕੇ ਠਿਤੇਨ ਮੁਤ੍ਤਰਾਸਿਸਦਿਸਂ ਚੇਤਿਯਂ ਮੋਰਪਿਞ੍ਛਕਲਾਪਮਨੋਹਰਂ ਬੋਧਿਂ ਦੇਵਵਿਮਾਨਸਮ੍ਪਤ੍ਤਿਸਸ੍ਸਿਰੀਕਂ ਸੇਨਾਸਨਞ੍ਚ ਅਨਪਲੋਕੇਤ੍ਵਾ ਏਵਰੂਪਂ ਨਾਮ ਰਮਣੀਯਂ ਪਦੇਸਂ ਪਿਟ੍ਠਿਤੋ ਕਤ੍ਵਾ ਆਹਾਰਹੇਤੁ ਗਨ੍ਤਬ੍ਬਂ ਭਵਿਸ੍ਸਤੀਤਿ ਪਕ੍ਕਮਿਤ੍ਵਾ ਗਾਮਮਗ੍ਗਂ ਪਟਿਪਨ੍ਨੇਨ ਖਾਣੁਕਣ੍ਟਕਮਗ੍ਗੋਪਿ ਉਦਕਵੇਗਭਿਨ੍ਨਵਿਸਮਮਗ੍ਗੋਪਿ ਦਟ੍ਠਬ੍ਬੋ ਹੋਤਿ.

ਤਤੋ ਗਣ੍ਡਂ ਪਟਿਚ੍ਛਾਦੇਨ੍ਤੇਨ ਵਿਯ ਨਿਵਾਸਨਂ ਨਿਵਾਸੇਤ੍ਵਾ ਵਣਚੋਲ਼ਕਂ ਬਨ੍ਧਨ੍ਤੇਨ ਵਿਯ ਕਾਯਬਨ੍ਧਨਂ ਬਨ੍ਧਿਤ੍ਵਾ ਅਟ੍ਠਿਸਙ੍ਘਾਤਂ ਪਟਿਚ੍ਛਾਦੇਨ੍ਤੇਨ ਵਿਯ ਚੀਵਰਂ ਪਾਰੁਪਿਤ੍ਵਾ ਭੇਸਜ੍ਜਕਪਾਲਂ ਨੀਹਰਨ੍ਤੇਨ ਵਿਯ ਪਤ੍ਤਂ ਨੀਹਰਿਤ੍ਵਾ ਗਾਮਦ੍ਵਾਰਸਮੀਪਂ ਪਾਪੁਣਨ੍ਤੇਨ ਹਤ੍ਥਿਕੁਣਪਅਸ੍ਸਕੁਣਪਗੋਕੁਣਪਮਹਿਂਸਕੁਣਪਮਨੁਸ੍ਸਕੁਣਪਅਹਿਕੁਣਪਕੁਕ੍ਕੁਰਕੁਣਪਾਨਿਪਿ ਦਟ੍ਠਬ੍ਬਾਨਿ ਭਵਨ੍ਤਿ. ਨ ਕੇਵਲਞ੍ਚ ਦਟ੍ਠਬ੍ਬਾਨਿ, ਗਨ੍ਧੋਪਿ ਨੇਸਂ ਘਾਨਂ ਪਟਿਹਨਮਾਨੋ ਅਧਿਵਾਸੇਤਬ੍ਬੋ ਹੋਤਿ. ਤਤੋ ਗਾਮਦ੍ਵਾਰੇ ਠਤ੍ਵਾ ਚਣ੍ਡਹਤ੍ਥਿਅਸ੍ਸਾਦਿਪਰਿਸ੍ਸਯਪਰਿਵਜ੍ਜਨਤ੍ਥਂ ਗਾਮਰਚ੍ਛਾ ਓਲੋਕੇਤਬ੍ਬਾ ਹੋਨ੍ਤਿ.

ਇਚ੍ਚੇਤਂ ਪਚ੍ਚਤ੍ਥਰਣਾਦਿਅਨੇਕਕੁਣਪਪਰਿਯੋਸਾਨਂ ਪਟਿਕ੍ਕੂਲਂ ਆਹਾਰਹੇਤੁ ਅਕ੍ਕਮਿਤਬ੍ਬਞ੍ਚ ਦਟ੍ਠਬ੍ਬਞ੍ਚ ਘਾਯਿਤਬ੍ਬਞ੍ਚ ਹੋਤਿ. ਅਹੋ ਵਤ ਭੋ ਪਟਿਕ੍ਕੂਲੋ ਆਹਾਰੋਤਿ ਏਵਂ ਗਮਨਤੋ ਪਟਿਕ੍ਕੂਲਤਾ ਪਚ੍ਚਵੇਕ੍ਖਿਤਬ੍ਬਾ.

੨੯੬. ਕਥਂ ਪਰਿਯੇਸਨਤੋ? ਏਵਂ ਗਮਨਪਟਿਕ੍ਕੂਲਂ ਅਧਿਵਾਸੇਤ੍ਵਾਪਿ ਗਾਮਂ ਪਵਿਟ੍ਠੇਨ ਸਙ੍ਘਾਟਿਪਾਰੁਤੇਨ ਕਪਣਮਨੁਸ੍ਸੇਨ ਵਿਯ ਕਪਾਲਹਤ੍ਥੇਨ ਘਰਪਟਿਪਾਟਿਯਾ ਗਾਮਵੀਥੀਸੁ ਚਰਿਤਬ੍ਬਂ ਹੋਤਿ. ਯਤ੍ਥ ਵਸ੍ਸਕਾਲੇ ਅਕ੍ਕਨ੍ਤਅਕ੍ਕਨ੍ਤਟ੍ਠਾਨੇ ਯਾਵ ਪਿਣ੍ਡਿਕਮਂਸਾਪਿ ਉਦਕਚਿਕ੍ਖਲ੍ਲੇ ਪਾਦਾ ਪਵਿਸਨ੍ਤਿ, ਏਕੇਨ ਹਤ੍ਥੇਨ ਪਤ੍ਤਂ ਗਹੇਤਬ੍ਬਂ ਹੋਤਿ, ਏਕੇਨ ਚੀਵਰਂ ਉਕ੍ਖਿਪਿਤਬ੍ਬਂ. ਗਿਮ੍ਹਕਾਲੇ ਵਾਤਵੇਗੇਨ ਸਮੁਟ੍ਠਿਤੇਹਿ ਪਂਸੁਤਿਣਰਜੇਹਿ ਓਕਿਣ੍ਣਸਰੀਰੇਨ ਚਰਿਤਬ੍ਬਂ. ਤਂ ਤਂ ਗੇਹਦ੍ਵਾਰਂ ਪਤ੍ਵਾ ਮਚ੍ਛਧੋਵਨਮਂਸਧੋਵਨਤਣ੍ਡੁਲਧੋਵਨਖੇਲ਼ਸਿਙ੍ਘਾਣਿਕਸੁਨਖਸੂਕਰਵਚ੍ਚਾਦੀਹਿ ਸਮ੍ਮਿਸ੍ਸਾਨਿ ਕਿਮਿਕੁਲਾਕੁਲਾਨਿ ਨੀਲਮਕ੍ਖਿਕਪਰਿਕਿਣ੍ਣਾਨਿ ਓਲ਼ਿਗਲ੍ਲਾਨਿ ਚੇਵ ਚਨ੍ਦਨਿਕਟ੍ਠਾਨਾਨਿ ਚ ਦਟ੍ਠਬ੍ਬਾਨਿ ਹੋਨ੍ਤਿ ਅਕ੍ਕਮਿਤਬ੍ਬਾਨਿਪਿ. ਯਤੋ ਤਾ ਮਕ੍ਖਿਕਾ ਉਟ੍ਠਹਿਤ੍ਵਾ ਸਙ੍ਘਾਟਿਯਮ੍ਪਿ ਪਤ੍ਤੇਪਿ ਸੀਸੇਪਿ ਨਿਲੀਯਨ੍ਤਿ.

ਘਰਂ ਪਵਿਟ੍ਠਸ੍ਸਾਪਿ ਕੇਚਿ ਦੇਨ੍ਤਿ, ਕੇਚਿ ਨ ਦੇਨ੍ਤਿ. ਦਦਮਾਨਾਪਿ ਏਕਚ੍ਚੇ ਹਿਯ੍ਯੋ ਪਕ੍ਕਭਤ੍ਤਮ੍ਪਿ ਪੁਰਾਣਖਜ੍ਜਕਮ੍ਪਿ ਪੂਤਿਕੁਮ੍ਮਾਸਪੂਪਾਦੀਨਿਪਿ ਦਦਨ੍ਤਿ. ਅਦਦਮਾਨਾਪਿ ਕੇਚਿਦੇਵ ‘‘ਅਤਿਚ੍ਛਥ, ਭਨ੍ਤੇ’’ਤਿ ਵਦਨ੍ਤਿ, ਕੇਚਿ ਪਨ ਅਪਸ੍ਸਮਾਨਾ ਵਿਯ ਤੁਣ੍ਹੀ ਹੋਨ੍ਤਿ, ਕੇਚਿ ਅਞ੍ਞੇਨ ਮੁਖਂ ਕਰੋਨ੍ਤਿ, ਕੇਚਿ ‘‘ਗਚ੍ਛ, ਰੇ ਮੁਣ੍ਡਕਾ’’ਤਿਆਦੀਹਿ ਫਰੁਸਵਾਚਾਹਿ ਸਮੁਦਾਚਰਨ੍ਤਿ. ਏਵਂ ਕਪਣਮਨੁਸ੍ਸੇਨ ਵਿਯ ਗਾਮੇ ਪਿਣ੍ਡਾਯ ਚਰਿਤ੍ਵਾ ਨਿਕ੍ਖਮਿਤਬ੍ਬਨ੍ਤਿ.

ਇਚ੍ਚੇਤਂ ਗਾਮਪ੍ਪਵੇਸਨਤੋ ਪਟ੍ਠਾਯ ਯਾਵ ਨਿਕ੍ਖਮਨਾ ਉਦਕਚਿਕ੍ਖਲ੍ਲਾਦਿਪਟਿਕ੍ਕੂਲਂ ਆਹਾਰਹੇਤੁ ਅਕ੍ਕਮਿਤਬ੍ਬਞ੍ਚੇਵ ਦਟ੍ਠਬ੍ਬਞ੍ਚ ਅਧਿਵਾਸੇਤਬ੍ਬਞ੍ਚ ਹੋਤਿ. ਅਹੋ ਵਤ ਭੋ ਪਟਿਕ੍ਕੂਲੋ ਆਹਾਰੋਤਿ ਏਵਂ ਪਰਿਯੇਸਨਤੋ ਪਟਿਕ੍ਕੂਲਤਾ ਪਚ੍ਚਵੇਕ੍ਖਿਤਬ੍ਬਾ.

੨੯੭. ਕਥਂ ਪਰਿਭੋਗਤੋ? ਏਵਂ ਪਰਿਯਿਟ੍ਠਾਹਾਰੇਨ ਪਨ ਬਹਿਗਾਮੇ ਫਾਸੁਕਟ੍ਠਾਨੇ ਸੁਖਨਿਸਿਨ੍ਨੇਨ ਯਾਵ ਤਤ੍ਥ ਹਤ੍ਥਂ ਨ ਓਤਾਰੇਤਿ, ਤਾਵ ਤਥਾਰੂਪਂ ਗਰੁਟ੍ਠਾਨਿਯਂ ਭਿਕ੍ਖੁਂ ਵਾ ਲਜ੍ਜਿਮਨੁਸ੍ਸਂ ਵਾ ਦਿਸ੍ਵਾ ਨਿਮਨ੍ਤੇਤੁਮ੍ਪਿ ਸਕ੍ਕਾ ਹੋਤਿ. ਭੁਞ੍ਜਿਤੁਕਾਮਤਾਯ ਪਨੇਤ੍ਥ ਹਤ੍ਥੇ ਓਤਾਰਿਤਮਤ੍ਤੇ ‘‘ਗਣ੍ਹਥਾ’’ਤਿ ਵਦਨ੍ਤੇਨ ਲਜ੍ਜਿਤਬ੍ਬਂ ਹੋਤਿ. ਹਤ੍ਥਂ ਪਨ ਓਤਾਰੇਤ੍ਵਾ ਮਦ੍ਦਨ੍ਤਸ੍ਸ ਪਞ੍ਚਙ੍ਗੁਲਿਅਨੁਸਾਰੇਨ ਸੇਦੋ ਪਗ੍ਘਰਮਾਨੋ ਸੁਕ੍ਖਥਦ੍ਧਭਤ੍ਤਮ੍ਪਿ ਤੇਮੇਨ੍ਤੋ ਮੁਦੁਂ ਕਰੋਤਿ.

ਅਥ ਤਸ੍ਮਿਂ ਪਰਿਮਦ੍ਦਨਮਤ੍ਤੇਨਾਪਿ ਸਮ੍ਭਿਨ੍ਨਸੋਭੇ ਆਲੋਪਂ ਕਤ੍ਵਾ ਮੁਖੇ ਠਪਿਤੇ ਹੇਟ੍ਠਿਮਦਨ੍ਤਾ ਉਦੁਕ੍ਖਲਕਿਚ੍ਚਂ ਸਾਧੇਨ੍ਤਿ, ਉਪਰਿਮਾ ਮੁਸਲਕਿਚ੍ਚਂ, ਜਿਵ੍ਹਾ ਹਤ੍ਥਕਿਚ੍ਚਂ. ਤਂ ਤਤ੍ਥ ਸੁਵਾਨਦੋਣਿਯਂ ਸੁਵਾਨਪਿਣ੍ਡਮਿਵ ਦਨ੍ਤਮੁਸਲੇਹਿ ਕੋਟ੍ਟੇਤ੍ਵਾ ਜਿਵ੍ਹਾਯ ਸਮ੍ਪਰਿਵਤ੍ਤਿਯਮਾਨਂ ਜਿਵ੍ਹਾਗ੍ਗੇ ਤਨੁਪਸਨ੍ਨਖੇਲ਼ੋ ਮਕ੍ਖੇਤਿ, ਵੇਮਜ੍ਝਤੋ ਪਟ੍ਠਾਯ ਬਹਲਖੇਲ਼ੋ ਮਕ੍ਖੇਤਿ, ਦਨ੍ਤਕਟ੍ਠੇਨ ਅਸਮ੍ਪਤ੍ਤਟ੍ਠਾਨੇ ਦਨ੍ਤਗੂਥਕੋ ਮਕ੍ਖੇਤਿ. ਸੋ ਏਵਂ ਵਿਚੁਣ੍ਣਿਤਮਕ੍ਖਿਤੋ ਤਙ੍ਖਣਞ੍ਞੇਵ ਅਨ੍ਤਰਹਿਤਵਣ੍ਣਗਨ੍ਧਸਙ੍ਖਾਰਵਿਸੇਸੋ ਸੁਵਾਨਦੋਣਿਯਂ ਠਿਤਸੁਵਾਨਵਮਥੁ ਵਿਯ ਪਰਮਜੇਗੁਚ੍ਛਭਾਵਂ ਉਪਗਚ੍ਛਤਿ. ਏਵਰੂਪੋਪਿ ਸਮਾਨੋ ਚਕ੍ਖੁਸ੍ਸ ਆਪਾਥਂ ਅਤੀਤਤ੍ਤਾ ਅਜ੍ਝੋਹਰਿਤਬ੍ਬੋ ਹੋਤੀਤਿ ਏਵਂ ਪਰਿਭੋਗਤੋ ਪਟਿਕ੍ਕੂਲਤਾ ਪਚ੍ਚਵੇਕ੍ਖਿਤਬ੍ਬਾ.

੨੯੮. ਕਥਂ ਆਸਯਤੋ? ਏਵਂ ਪਰਿਭੋਗਂ ਉਪਗਤੋ ਚ ਪਨੇਸ ਅਨ੍ਤੋ ਪਵਿਸਮਾਨੋ ਯਸ੍ਮਾ ਬੁਦ੍ਧਪਚ੍ਚੇਕਬੁਦ੍ਧਾਨਮ੍ਪਿ ਰਞ੍ਞੋਪਿ ਚਕ੍ਕਵਤ੍ਤਿਸ੍ਸ ਪਿਤ੍ਤਸੇਮ੍ਹਪੁਬ੍ਬਲੋਹਿਤਾਸਯੇਸੁ ਚਤੂਸੁ ਅਞ੍ਞਤਰੋ ਆਸਯੋ ਹੋਤਿਯੇਵ. ਮਨ੍ਦਪੁਞ੍ਞਾਨਂ ਪਨ ਚਤ੍ਤਾਰੋ ਆਸਯਾ ਹੋਨ੍ਤਿ. ਤਸ੍ਮਾ ਯਸ੍ਸ ਪਿਤ੍ਤਾਸਯੋ ਅਧਿਕੋ ਹੋਤਿ, ਤਸ੍ਸ ਬਹਲਮਧੁਕਤੇਲਮਕ੍ਖਿਤੋ ਵਿਯ ਪਰਮਜੇਗੁਚ੍ਛੋ ਹੋਤਿ. ਯਸ੍ਸ ਸੇਮ੍ਹਾਸਯੋ ਅਧਿਕੋ ਹੋਤਿ, ਤਸ੍ਸ ਨਾਗਬਲਪਣ੍ਣਰਸਮਕ੍ਖਿਤੋ ਵਿਯ. ਯਸ੍ਸ ਪੁਬ੍ਬਾਸਯੋ ਅਧਿਕੋ ਹੋਤਿ, ਤਸ੍ਸ ਪੂਤਿਤਕ੍ਕਮਕ੍ਖਿਤੋ ਵਿਯ. ਯਸ੍ਸ ਲੋਹਿਤਾਸਯੋ ਅਧਿਕੋ ਹੋਤਿ, ਤਸ੍ਸ ਰਜਨਮਕ੍ਖਿਤੋ ਵਿਯ ਪਰਮਜੇਗੁਚ੍ਛੋ ਹੋਤੀਤਿ ਏਵਂ ਆਸਯਤੋ ਪਟਿਕ੍ਕੂਲਤਾ ਪਚ੍ਚਵੇਕ੍ਖਿਤਬ੍ਬਾ.

੨੯੯. ਕਥਂ ਨਿਧਾਨਤੋ? ਸੋ ਇਮੇਸੁ ਚਤੂਸੁ ਆਸਯੇਸੁ ਅਞ੍ਞਤਰੇਨ ਆਸਯੇਨ ਮਕ੍ਖਿਤੋ ਅਨ੍ਤੋਉਦਰਂ ਪਵਿਸਿਤ੍ਵਾ ਨੇਵ ਸੁਵਣ੍ਣਭਾਜਨੇ ਨ ਮਣਿਰਜਤਾਦਿਭਾਜਨੇਸੁ ਨਿਧਾਨਂ ਗਚ੍ਛਤਿ. ਸਚੇ ਪਨ ਦਸਵਸ੍ਸਿਕੇਨ ਅਜ੍ਝੋਹਰਿਯਤਿ ਦਸ ਵਸ੍ਸਾਨਿ ਅਧੋਤਵਚ੍ਚਕੂਪਸਦਿਸੇ ਓਕਾਸੇ ਪਤਿਟ੍ਠਹਤਿ. ਸਚੇ ਵੀਸ, ਤਿਂਸ, ਚਤ੍ਤਾਲੀਸ, ਪਞ੍ਞਾਸ, ਸਟ੍ਠਿ, ਸਤ੍ਤਤਿ, ਅਸੀਤਿ, ਨਵੁਤਿਵਸ੍ਸਿਕੇਨ, ਸਚੇ ਵਸ੍ਸਸਤਿਕੇਨ ਅਜ੍ਝੋਹਰਿਯਤਿ. ਵਸ੍ਸਸਤਂ ਅਧੋਤਵਚ੍ਚਕੂਪਸਦਿਸੇ ਓਕਾਸੇ ਪਤਿਟ੍ਠਹਤੀਤਿ ਏਵਂ ਨਿਧਾਨਤੋ ਪਟਿਕ੍ਕੂਲਤਾ ਪਚ੍ਚਵੇਕ੍ਖਿਤਬ੍ਬਾ.

੩੦੦. ਕਥਂ ਅਪਰਿਪਕ੍ਕਤੋ? ਸੋ ਪਨਾਯਮਾਹਾਰੋ ਏਵਰੂਪੇ ਓਕਾਸੇ ਨਿਧਾਨਮੁਪਗਤੋ ਯਾਵ ਅਪਰਿਪਕ੍ਕੋ ਹੋਤਿ, ਤਾਵ ਤਸ੍ਮਿਞ੍ਞੇਵ ਯਥਾਵੁਤ੍ਤਪ੍ਪਕਾਰੇ ਪਰਮਨ੍ਧਕਾਰਤਿਮਿਸੇ ਨਾਨਾਕੁਣਪਗਨ੍ਧਵਾਸਿਤਪਵਨਵਿਚਰਿਤੇ ਅਤਿਦੁਗ੍ਗਨ੍ਧਜੇਗੁਚ੍ਛੇ ਪਦੇਸੇ ਯਥਾ ਨਾਮ ਨਿਦਾਘੇ ਅਕਾਲਮੇਘੇਨ ਅਭਿਵੁਟ੍ਠਮ੍ਹਿ ਚਣ੍ਡਾਲਗਾਮਦ੍ਵਾਰਆਵਾਟੇ ਪਤਿਤਾਨਿ ਤਿਣਪਣ੍ਣਕਿਲਞ੍ਜਖਣ੍ਡਅਹਿਕੁਕ੍ਕੁਰਮਨੁਸ੍ਸਕੁਣਪਾਦੀਨਿ ਸੂਰਿਯਾਤਪੇਨ ਸਨ੍ਤਤ੍ਤਾਨਿ ਫੇਣਪੁਪ੍ਫੁਲ਼ਕਾਚਿਤਾਨਿ ਤਿਟ੍ਠਨ੍ਤਿ, ਏਵਮੇਵ ਤਂਦਿਵਸਮ੍ਪਿ ਹਿਯ੍ਯੋਪਿ ਤਤੋ ਪੁਰਿਮੇ ਦਿਵਸੇਪਿ ਅਜ੍ਝੋਹਤੋ ਸਬ੍ਬੋ ਏਕਤੋ ਹੁਤ੍ਵਾ ਸੇਮ੍ਹਪਟਲਪਰਿਯੋਨਦ੍ਧੋ ਕਾਯਗ੍ਗਿਸਨ੍ਤਾਪਕੁਥਿਤਕੁਥਨਸਞ੍ਜਾਤਫੇਣਪੁਪ੍ਫੁਲ਼ਕਾਚਿਤੋ ਪਰਮਜੇਗੁਚ੍ਛਭਾਵਂ ਉਪਗਨ੍ਤ੍ਵਾ ਤਿਟ੍ਠਤੀਤਿ ਏਵਂ ਅਪਰਿਪਕ੍ਕਤੋ ਪਟਿਕ੍ਕੂਲਤਾ ਪਚ੍ਚਵੇਕ੍ਖਿਤਬ੍ਬਾ.

੩੦੧. ਕਥਂ ਪਰਿਪਕ੍ਕਤੋ? ਸੋ ਤਤ੍ਤਕਾਯਗ੍ਗਿਨਾ ਪਰਿਪਕ੍ਕੋ ਸਮਾਨੋ ਨ ਸੁਵਣ੍ਣਰਜਤਾਦਿਧਾਤੁਯੋ ਵਿਯ ਸੁਵਣ੍ਣਰਜਤਾਦਿਭਾਵਂ ਉਪਗਚ੍ਛਤਿ. ਫੇਣਪੁਪ੍ਫੁਲ਼ਕੇ ਪਨ ਮੁਞ੍ਚਨ੍ਤੋ ਸਣ੍ਹਕਰਣਿਯਂ ਪਿਸਿਤ੍ਵਾ ਨਾਲ਼ਿਕੇ ਪਕ੍ਖਿਤ੍ਤਪਣ੍ਡੁਮਤ੍ਤਿਕਾ ਵਿਯ ਕਰੀਸਭਾਵਂ ਉਪਗਨ੍ਤ੍ਵਾ ਪਕ੍ਕਾਸਯਂ, ਮੁਤ੍ਤਭਾਵਂ ਉਪਗਨ੍ਤ੍ਵਾ ਮੁਤ੍ਤਵਤ੍ਥਿਞ੍ਚ ਪੂਰੇਤੀਤਿ ਏਵਂ ਪਰਿਪਕ੍ਕਤੋ ਪਟਿਕ੍ਕੂਲਤਾ ਪਚ੍ਚਵੇਕ੍ਖਿਤਬ੍ਬਾ.

੩੦੨. ਕਥਂ ਫਲਤੋ? ਸਮ੍ਮਾ ਪਰਿਪਚ੍ਚਮਾਨੋ ਚ ਪਨਾਯਂ ਕੇਸਲੋਮਨਖਦਨ੍ਤਾਦੀਨਿ ਨਾਨਾਕੁਣਪਾਨਿ ਨਿਪ੍ਫਾਦੇਤਿ ਅਸਮ੍ਮਾਪਰਿਪਚ੍ਚਮਾਨੋ ਦਦ੍ਦੁਕਣ੍ਡੁਕਚ੍ਛੁਕੁਟ੍ਠਕਿਲਾਸਸੋਸਕਾਸਾਤਿਸਾਰਪ੍ਪਭੁਤੀਨਿ ਰੋਗਸਤਾਨਿ, ਇਦਮਸ੍ਸ ਫਲਨ੍ਤਿ ਏਵਂ ਫਲਤੋ ਪਟਿਕ੍ਕੂਲਤਾ ਪਚ੍ਚਵੇਕ੍ਖਿਤਬ੍ਬਾ.

੩੦੩. ਕਥਂ ਨਿਸ੍ਸਨ੍ਦਤੋ? ਅਜ੍ਝੋਹਰਿਯਮਾਨੋ ਚੇਸ ਏਕੇਨ ਦ੍ਵਾਰੇਨ ਪਵਿਸਿਤ੍ਵਾ ਨਿਸ੍ਸਨ੍ਦਮਾਨੋ ਅਕ੍ਖਿਮ੍ਹਾ ਅਕ੍ਖਿਗੂਥਕੋ ਕਣ੍ਣਮ੍ਹਾ ਕਣ੍ਣਗੂਥਕੋਤਿਆਦਿਨਾ ਪਕਾਰੇਨ ਅਨੇਕੇਹਿ ਦ੍ਵਾਰੇਹਿ ਨਿਸ੍ਸਨ੍ਦਤਿ. ਅਜ੍ਝੋਹਰਣਸਮਯੇ ਚੇਸ ਮਹਾਪਰਿਵਾਰੇਨਾਪਿ ਅਜ੍ਝੋਹਰਿਯਤਿ. ਨਿਸ੍ਸਨ੍ਦਨਸਮਯੇ ਪਨ ਉਚ੍ਚਾਰਪਸ੍ਸਾਵਾਦਿਭਾਵਂ ਉਪਗਤੋ ਏਕਕੇਨੇਵ ਨੀਹਰਿਯਤਿ. ਪਠਮਦਿਵਸੇ ਚ ਨਂ ਪਰਿਭੁਞ੍ਜਨ੍ਤੋ ਹਟ੍ਠਪਹਟ੍ਠੋਪਿ ਹੋਤਿ ਉਦਗ੍ਗੁਦਗ੍ਗੋ ਪੀਤਿਸੋਮਨਸ੍ਸਜਾਤੋ. ਦੁਤਿਯਦਿਵਸੇ ਨਿਸ੍ਸਨ੍ਦੇਨ੍ਤੋ ਪਿਹਿਤਨਾਸਿਕੋ ਹੋਤਿ ਵਿਕੁਣਿਤਮੁਖੋ ਜੇਗੁਚ੍ਛੀ ਮਙ੍ਕੁਭੂਤੋ. ਪਠਮਦਿਵਸੇ ਚ ਨਂ ਰਤ੍ਤੋ ਗਿਦ੍ਧੋ ਗਧਿਤੋ ਮੁਚ੍ਛਿਤੋਪਿ ਅਜ੍ਝੋਹਰਿਤ੍ਵਾ ਦੁਤਿਯਦਿਵਸੇ ਏਕਰਤ੍ਤਿਵਾਸੇਨ ਵਿਰਤ੍ਤੋ ਅਟ੍ਟੀਯਮਾਨੋ ਹਰਾਯਮਾਨੋ ਜਿਗੁਚ੍ਛਮਾਨੋ ਨੀਹਰਤਿ. ਤੇਨਾਹੁ ਪੋਰਾਣਾ –

‘‘ਅਨ੍ਨਂ ਪਾਨਂ ਖਾਦਨੀਯਂ, ਭੋਜਨਞ੍ਚ ਮਹਾਰਹਂ;

ਏਕਦ੍ਵਾਰੇਨ ਪਵਿਸਿਤ੍ਵਾ, ਨਵਦ੍ਵਾਰੇਹਿ ਸਨ੍ਦਤਿ.

‘‘ਅਨ੍ਨਂ ਪਾਨਂ ਖਾਦਨੀਯਂ, ਭੋਜਨਞ੍ਚ ਮਹਾਰਹਂ;

ਭੁਞ੍ਜਤਿ ਸਪਰਿਵਾਰੋ, ਨਿਕ੍ਖਾਮੇਨ੍ਤੋ ਨਿਲੀਯਤਿ.

‘‘ਅਨ੍ਨਂ ਪਾਨਂ ਖਾਦਨੀਯਂ, ਭੋਜਨਞ੍ਚ ਮਹਾਰਹਂ;

ਭੁਞ੍ਜਤਿ ਅਭਿਨਨ੍ਦਨ੍ਤੋ, ਨਿਕ੍ਖਾਮੇਨ੍ਤੋ ਜਿਗੁਚ੍ਛਤਿ.

‘‘ਅਨ੍ਨਂ ਪਾਨਂ ਖਾਦਨੀਯਂ, ਭੋਜਨਞ੍ਚ ਮਹਾਰਹਂ;

ਏਕਰਤ੍ਤਿਪਰਿਵਾਸਾ, ਸਬ੍ਬਂ ਭਵਤਿ ਪੂਤਿਕ’’ਨ੍ਤਿ.

ਏਵਂ ਨਿਸ੍ਸਨ੍ਦਤੋ ਪਟਿਕ੍ਕੂਲਤਾ ਪਚ੍ਚਵੇਕ੍ਖਿਤਬ੍ਬਾ.

੩੦੪. ਕਥਂ ਸਮ੍ਮਕ੍ਖਨਤੋ? ਪਰਿਭੋਗਕਾਲੇਪਿ ਚੇਸ ਹਤ੍ਥਓਟ੍ਠਜਿਵ੍ਹਾਤਾਲੂਨਿ ਸਮ੍ਮਕ੍ਖੇਤਿ. ਤਾਨਿ ਤੇਨ ਸਮ੍ਮਕ੍ਖਿਤਤ੍ਤਾ ਪਟਿਕ੍ਕੂਲਾਨਿ ਹੋਨ੍ਤਿ, ਯਾਨਿ ਧੋਤਾਨਿਪਿ ਗਨ੍ਧਹਰਣਤ੍ਥਂ ਪੁਨਪ੍ਪੁਨਂ ਧੋਵਿਤਬ੍ਬਾਨਿ ਹੋਨ੍ਤਿ. ਪਰਿਭੁਤ੍ਤੋ ਸਮਾਨੋ ਯਥਾ ਨਾਮ ਓਦਨੇ ਪਚ੍ਚਮਾਨੇ ਥੁਸਕਣਕੁਣ੍ਡਕਾਦੀਨਿ ਉਤ੍ਤਰਿਤ੍ਵਾ ਉਕ੍ਖਲਿਮੁਖਵਟ੍ਟਿਪਿਧਾਨਿਯੋ ਮਕ੍ਖਨ੍ਤਿ, ਏਵਮੇਵ ਸਕਲਸਰੀਰਾਨੁਗਤੇਨ ਕਾਯਗ੍ਗਿਨਾ ਫੇਣੁਦ੍ਦੇਹਕਂ ਪਚ੍ਚਿਤ੍ਵਾ ਉਤ੍ਤਰਮਾਨੋ ਦਨ੍ਤੇ ਦਨ੍ਤਮਲਭਾਵੇਨ ਸਮ੍ਮਕ੍ਖੇਤਿ. ਜਿਵ੍ਹਾਤਾਲੁਪ੍ਪਭੁਤੀਨਿ ਖੇਲ਼ਸੇਮ੍ਹਾਦਿਭਾਵੇਨ, ਅਕ੍ਖਿਕਣ੍ਣਨਾਸਅਧੋਮਗ੍ਗਾਦਿਕੇ ਅਕ੍ਖਿਗੂਥਕਕਣ੍ਣਗੂਥਕਸਿਙ੍ਘਾਣਿਕਾਮੁਤ੍ਤਕਰੀਸਾਦਿਭਾਵੇਨ ਸਮ੍ਮਕ੍ਖੇਤਿ. ਯੇਨ ਸਮ੍ਮਕ੍ਖਿਤਾਨਿ ਇਮਾਨਿ ਦ੍ਵਾਰਾਨਿ ਦਿਵਸੇ ਦਿਵਸੇ ਧੋਵਿਯਮਾਨਾਨਿਪਿ ਨੇਵ ਸੁਚੀਨਿ, ਨ ਮਨੋਰਮਾਨਿ ਹੋਨ੍ਤਿ. ਯੇਸੁ ਏਕਚ੍ਚਂ ਧੋਵਿਤ੍ਵਾ ਹਤ੍ਥੋ ਪੁਨ ਉਦਕੇਨ ਧੋਵਿਤਬ੍ਬੋ ਹੋਤਿ. ਏਕਚ੍ਚਂ ਧੋਵਿਤ੍ਵਾ ਦ੍ਵਤ੍ਤਿਕ੍ਖਤ੍ਤੁਂ ਗੋਮਯੇਨਪਿ ਮਤ੍ਤਿਕਾਯਪਿ ਗਨ੍ਧਚੁਣ੍ਣੇਨਪਿ ਧੋਵਤੋ ਪਾਟਿਕੁਲ੍ਯਤਾ ਵਿਗਚ੍ਛਤੀਤਿ ਏਵਂ ਸਮ੍ਮਕ੍ਖਨਤੋ ਪਟਿਕ੍ਕੂਲਤਾ ਪਚ੍ਚਵੇਕ੍ਖਿਤਬ੍ਬਾ.

੩੦੫. ਤਸ੍ਸੇਵਂ ਦਸਹਾਕਾਰੇਹਿ ਪਟਿਕ੍ਕੂਲਤਂ ਪਚ੍ਚਵੇਕ੍ਖਤੋ ਤਕ੍ਕਾਹਤਂ ਵਿਤਕ੍ਕਾਹਤਂ ਕਰੋਨ੍ਤਸ੍ਸ ਪਟਿਕ੍ਕੂਲਾਕਾਰਵਸੇਨ ਕਬਲ਼ੀਕਾਰਾਹਾਰੋ ਪਾਕਟੋ ਹੋਤਿ. ਸੋ ਤਂ ਨਿਮਿਤ੍ਤਂ ਪੁਨਪ੍ਪੁਨਂ ਆਸੇਵਤਿ ਭਾਵੇਤਿ ਬਹੁਲੀਕਰੋਤਿ. ਤਸ੍ਸੇਵਂ ਕਰੋਤੋ ਨੀਵਰਣਾਨਿ ਵਿਕ੍ਖਮ੍ਭਨ੍ਤਿ. ਕਬਲ਼ੀਕਾਰਾਹਾਰਸ੍ਸ ਸਭਾਵਧਮ੍ਮਤਾਯ ਗਮ੍ਭੀਰਤ੍ਤਾ ਅਪ੍ਪਨਂ ਅਪ੍ਪਤ੍ਤੇਨ ਉਪਚਾਰਸਮਾਧਿਨਾ ਚਿਤ੍ਤਂ ਸਮਾਧਿਯਤਿ. ਪਟਿਕ੍ਕੂਲਾਕਾਰਗ੍ਗਹਣਵਸੇਨ ਪਨੇਤ੍ਥ ਸਞ੍ਞਾ ਪਾਕਟਾ ਹੋਤਿ. ਤਸ੍ਮਾ ਇਮਂ ਕਮ੍ਮਟ੍ਠਾਨਂ ਆਹਾਰੇ ਪਟਿਕ੍ਕੂਲਸਞ੍ਞਾ ਇਚ੍ਚੇਵ ਸਙ੍ਖਂ ਗਚ੍ਛਤਿ.

ਇਮਞ੍ਚ ਪਨ ਆਹਾਰੇ ਪਟਿਕ੍ਕੂਲਸਞ੍ਞਂ ਅਨੁਯੁਤ੍ਤਸ੍ਸ ਭਿਕ੍ਖੁਨੋ ਰਸਤਣ੍ਹਾਯ ਚਿਤ੍ਤਂ ਪਤਿਲੀਯਤਿ ਪਤਿਕੁਟਤਿ ਪਤਿਵਟ੍ਟਤਿ. ਸੋ ਕਨ੍ਤਾਰਨਿਤ੍ਥਰਣਤ੍ਥਿਕੋ ਵਿਯ ਪੁਤ੍ਤਮਂਸਂ ਵਿਗਤਮਦੋ ਆਹਾਰਂ ਆਹਾਰੇਤਿ ਯਾਵਦੇਵ ਦੁਕ੍ਖਸ੍ਸ ਨਿਤ੍ਥਰਣਤ੍ਥਾਯ. ਅਥਸ੍ਸ ਅਪ੍ਪਕਸਿਰੇਨੇਵ ਕਬਲ਼ੀਕਾਰਾਹਾਰਪਰਿਞ੍ਞਾਮੁਖੇਨ ਪਞ੍ਚਕਾਮਗੁਣਿਕੋ ਰਾਗੋ ਪਰਿਞ੍ਞਂ ਗਚ੍ਛਤਿ. ਸੋ ਪਞ੍ਚਕਾਮਗੁਣਪਰਿਞ੍ਞਾਮੁਖੇਨ ਰੂਪਕ੍ਖਨ੍ਧਂ ਪਰਿਜਾਨਾਤਿ. ਅਪਰਿਪਕ੍ਕਾਦਿਪਟਿਕ੍ਕੂਲਭਾਵਵਸੇਨ ਚਸ੍ਸ ਕਾਯਗਤਾਸਤਿਭਾਵਨਾਪਿ ਪਾਰਿਪੂਰਿਂ ਗਚ੍ਛਤਿ, ਅਸੁਭਸਞ੍ਞਾਯ ਅਨੁਲੋਮਪਟਿਪਦਂ ਪਟਿਪਨ੍ਨੋ ਹੋਤਿ. ਇਮਂ ਪਨ ਪਟਿਪਤ੍ਤਿਂ ਨਿਸ੍ਸਾਯ ਦਿਟ੍ਠੇਵ ਧਮ੍ਮੇ ਅਮਤਪਰਿਯੋਸਾਨਤਂ ਅਨਭਿਸਮ੍ਭੁਣਨ੍ਤੋ ਸੁਗਤਿਪਰਾਯਨੋ ਹੋਤੀਤਿ.

ਅਯਂ ਆਹਾਰੇ ਪਟਿਕ੍ਕੂਲਸਞ੍ਞਾਭਾਵਨਾਯ ਵਿਤ੍ਥਾਰਕਥਾ.

ਚਤੁਧਾਤੁਵਵਤ੍ਥਾਨਭਾਵਨਾ

੩੦੬. ਇਦਾਨਿ ਆਹਾਰੇ ਪਟਿਕ੍ਕੂਲਸਞ੍ਞਾਨਨ੍ਤਰਂ ਏਕਂ ਵਵਤ੍ਥਾਨਨ੍ਤਿ ਏਵਂ ਉਦ੍ਦਿਟ੍ਠਸ੍ਸ ਚਤੁਧਾਤੁਵਵਤ੍ਥਾਨਸ੍ਸ ਭਾਵਨਾਨਿਦ੍ਦੇਸੋ ਅਨੁਪ੍ਪਤ੍ਤੋ. ਤਤ੍ਥ ਵਵਤ੍ਥਾਨਨ੍ਤਿ ਸਭਾਵੂਪਲਕ੍ਖਣਵਸੇਨ ਸਨ੍ਨਿਟ੍ਠਾਨਂ, ਚਤੁਨ੍ਨਂ ਧਾਤੂਨਂ ਵਵਤ੍ਥਾਨਂ ਚਤੁਧਾਤੁਵਵਤ੍ਥਾਨਂ. ਧਾਤੁਮਨਸਿਕਾਰੋ, ਧਾਤੁਕਮ੍ਮਟ੍ਠਾਨਂ, ਚਤੁਧਾਤੁਵਵਤ੍ਥਾਨਨ੍ਤਿ ਅਤ੍ਥਤੋ ਏਕਂ. ਤਯਿਦਂ ਦ੍ਵਿਧਾ ਆਗਤਂ ਸਙ੍ਖੇਪਤੋ ਚ ਵਿਤ੍ਥਾਰਤੋ ਚ. ਸਙ੍ਖੇਪਤੋ ਮਹਾਸਤਿਪਟ੍ਠਾਨੇ ਆਗਤਂ. ਵਿਤ੍ਥਾਰਤੋ ਮਹਾਹਤ੍ਥਿਪਦੂਪਮੇ ਰਾਹੁਲੋਵਾਦੇ ਧਾਤੁਵਿਭਙ੍ਗੇ ਚ. ਤਞ੍ਹਿ –

‘‘ਸੇਯ੍ਯਥਾਪਿ, ਭਿਕ੍ਖਵੇ, ਦਕ੍ਖੋ ਗੋਘਾਤਕੋ ਵਾ ਗੋਘਾਤਕਨ੍ਤੇਵਾਸੀ ਵਾ ਗਾਵਿਂ ਵਧਿਤ੍ਵਾ ਚਤੁਮਹਾਪਥੇ ਬਿਲਸੋ ਵਿਭਜਿਤ੍ਵਾ ਨਿਸਿਨ੍ਨੋ ਅਸ੍ਸ, ਏਵਮੇਵ ਖੋ, ਭਿਕ੍ਖਵੇ, ਭਿਕ੍ਖੁ ਇਮਮੇਵ ਕਾਯਂ ਯਥਾਠਿਤਂ ਯਥਾਪਣਿਹਿਤਂ ਧਾਤੁਸੋ ਪਚ੍ਚਵੇਕ੍ਖਤਿ, ਅਤ੍ਥਿ ਇਮਸ੍ਮਿਂ ਕਾਯੇ ਪਥਵੀਧਾਤੁ ਆਪੋਧਾਤੁ ਤੇਜੋਧਾਤੁ ਵਾਯੋਧਾਤੂ’’ਤਿ –

ਏਵਂ ਤਿਕ੍ਖਪਞ੍ਞਸ੍ਸ ਧਾਤੁਕਮ੍ਮਟ੍ਠਾਨਿਕਸ੍ਸ ਵਸੇਨ ਮਹਾਸਤਿਪਟ੍ਠਾਨੇ (ਦੀ. ਨਿ. ੨.੩੭੮) ਸਙ੍ਖੇਪਤੋ ਆਗਤਂ.

ਤਸ੍ਸਤ੍ਥੋ – ਯਥਾ ਛੇਕੋ ਗੋਘਾਤਕੋ ਵਾ ਤਸ੍ਸੇਵ ਵਾ ਭਤ੍ਤਵੇਤਨਭਤੋ ਅਨ੍ਤੇਵਾਸਿਕੋ ਗਾਵਿਂ ਵਧਿਤ੍ਵਾ ਵਿਨਿਵਿਜ੍ਝਿਤ੍ਵਾ ਚਤਸ੍ਸੋ ਦਿਸਾ ਗਤਾਨਂ ਮਹਾਪਥਾਨਂ ਵੇਮਜ੍ਝਟ੍ਠਾਨਸਙ੍ਖਾਤੇ ਚਤੁਮਹਾਪਥੇ ਕੋਟ੍ਠਾਸਂ ਕਤ੍ਵਾ ਨਿਸਿਨ੍ਨੋ ਅਸ੍ਸ, ਏਵਮੇਵ ਭਿਕ੍ਖੁ ਚਤੁਨ੍ਨਂ ਇਰਿਯਾਪਥਾਨਂ ਯੇਨ ਕੇਨਚਿ ਆਕਾਰੇਨ ਠਿਤਤ੍ਤਾ ਯਥਾਠਿਤਂ. ਯਥਾਠਿਤਤ੍ਤਾਵ ਯਥਾਪਣਿਹਿਤਂ ਕਾਯਂ ਅਤ੍ਥਿ ਇਮਸ੍ਮਿਂ ਕਾਯੇ ਪਥਵੀਧਾਤੁ…ਪੇ… ਵਾਯੋਧਾਤੂਤਿ ਏਵਂ ਧਾਤੁਸੋ ਪਚ੍ਚਵੇਕ੍ਖਤਿ.

ਕਿਂ ਵੁਤ੍ਤਂ ਹੋਤਿ? ਯਥਾ ਗੋਘਾਤਕਸ੍ਸ ਗਾਵਿਂ ਪੋਸੇਨ੍ਤਸ੍ਸਪਿ ਆਘਾਤਨਂ ਆਹਰਨ੍ਤਸ੍ਸਪਿ ਆਹਰਿਤ੍ਵਾ ਤਤ੍ਥ ਬਨ੍ਧਿਤ੍ਵਾ ਠਪੇਨ੍ਤਸ੍ਸਪਿ ਵਧਨ੍ਤਸ੍ਸਪਿ ਵਧਿਤਂ ਮਤਂ ਪਸ੍ਸਨ੍ਤਸ੍ਸਪਿ ਤਾਵਦੇਵ ਗਾਵੀਤਿਸਞ੍ਞਾ ਨ ਅਨ੍ਤਰਧਾਯਤਿ, ਯਾਵ ਨਂ ਪਦਾਲੇਤ੍ਵਾ ਬਿਲਸੋ ਨ ਵਿਭਜਤਿ. ਵਿਭਜਿਤ੍ਵਾ ਨਿਸਿਨ੍ਨਸ੍ਸ ਪਨ ਗਾਵੀਸਞ੍ਞਾ ਅਨ੍ਤਰਧਾਯਤਿ, ਮਂਸਸਞ੍ਞਾ ਪਵਤ੍ਤਤਿ. ਨਾਸ੍ਸ ਏਵਂ ਹੋਤਿ ‘‘ਅਹਂ ਗਾਵਿਂ ਵਿਕ੍ਕਿਣਾਮਿ, ਇਮੇ ਗਾਵਿਂ ਹਰਨ੍ਤੀ’’ਤਿ. ਅਥ ਖ੍ਵਸ੍ਸ ‘‘ਅਹਂ ਮਂਸਂ ਵਿਕ੍ਕਿਣਾਮਿ, ਇਮੇਪਿ ਮਂਸਂ ਹਰਨ੍ਤਿ’’ਚ੍ਚੇਵ ਹੋਤਿ, ਏਵਮੇਵ ਇਮਸ੍ਸਾਪਿ ਭਿਕ੍ਖੁਨੋ ਪੁਬ੍ਬੇ ਬਾਲਪੁਥੁਜ੍ਜਨਕਾਲੇ ਗਿਹਿਭੂਤਸ੍ਸਪਿ ਪਬ੍ਬਜਿਤਸ੍ਸਪਿ ਤਾਵਦੇਵ ਸਤ੍ਤੋਤਿ ਵਾ ਪੋਸੋਤਿ ਵਾ ਪੁਗ੍ਗਲੋਤਿ ਵਾ ਸਞ੍ਞਾ ਨ ਅਨ੍ਤਰਧਾਯਤਿ, ਯਾਵ ਇਮਮੇਵ ਕਾਯਂ ਯਥਾਠਿਤਂ ਯਥਾਪਣਿਹਿਤਂ ਘਨਵਿਨਿਬ੍ਭੋਗਂ ਕਤ੍ਵਾ ਧਾਤੁਸੋ ਨ ਪਚ੍ਚਵੇਕ੍ਖਤਿ. ਧਾਤੁਸੋ ਪਚ੍ਚਵੇਕ੍ਖਤੋ ਪਨ ਸਤ੍ਤਸਞ੍ਞਾ ਅਨ੍ਤਰਧਾਯਤਿ, ਧਾਤੁਵਸੇਨੇਵ ਚਿਤ੍ਤਂ ਸਨ੍ਤਿਟ੍ਠਤਿ. ਤੇਨਾਹ ਭਗਵਾ ‘‘ਸੇਯ੍ਯਥਾਪਿ, ਭਿਕ੍ਖਵੇ, ਦਕ੍ਖੋ ਗੋਘਾਤਕੋ ਵਾ…ਪੇ… ਨਿਸਿਨ੍ਨੋ ਅਸ੍ਸ, ਏਵਮੇਵ ਖੋ, ਭਿਕ੍ਖਵੇ, ਭਿਕ੍ਖੁ…ਪੇ… ਵਾਯੋਧਾਤੂ’’ਤਿ.

੩੦੭. ਮਹਾਹਤ੍ਥਿਪਦੂਪਮੇ (ਮ. ਨਿ. ੧.੩੦੦ ਆਦਯੋ) ਪਨ – ‘‘ਕਤਮਾ ਚਾਵੁਸੋ, ਅਜ੍ਝਤ੍ਤਿਕਾ ਪਥਵੀਧਾਤੁ? ਯਂ ਅਜ੍ਝਤ੍ਤਂ ਪਚ੍ਚਤ੍ਤਂ ਕਕ੍ਖਲ਼ਂ ਖਰਿਗਤਂ ਉਪਾਦਿਨ੍ਨਂ. ਸੇਯ੍ਯਥਿਦਂ, ਕੇਸਾ ਲੋਮਾ…ਪੇ… ਉਦਰਿਯਂ ਕਰੀਸਂ, ਯਂ ਵਾ ਪਨਞ੍ਞਮ੍ਪਿ ਕਿਞ੍ਚਿ ਅਜ੍ਝਤ੍ਤਂ ਪਚ੍ਚਤ੍ਤਂ ਕਕ੍ਖਲ਼ਂ ਖਰਿਗਤਂ ਉਪਾਦਿਨ੍ਨਂ, ਅਯਂ ਵੁਚ੍ਚਤਿ, ਆਵੁਸੋ, ਅਜ੍ਝਤ੍ਤਿਕਾ ਪਥਵੀਧਾਤੂ’’ਤਿ ਚ,

‘‘ਕਤਮਾ ਚਾਵੁਸੋ, ਅਜ੍ਝਤ੍ਤਿਕਾ ਆਪੋਧਾਤੁ? ਯਂ ਅਜ੍ਝਤ੍ਤਂ ਪਚ੍ਚਤ੍ਤਂ ਆਪੋ ਆਪੋਗਤਂ ਉਪਾਦਿਨ੍ਨਂ. ਸੇਯ੍ਯਥਿਦਂ, ਪਿਤ੍ਤਂ…ਪੇ… ਮੁਤ੍ਤਂ, ਯਂ ਵਾ ਪਨਞ੍ਞਮ੍ਪਿ ਕਿਞ੍ਚਿ ਅਜ੍ਝਤ੍ਤਂ ਪਚ੍ਚਤ੍ਤਂ ਆਪੋ ਆਪੋਗਤਂ ਉਪਾਦਿਨ੍ਨਂ, ਅਯਂ ਵੁਚ੍ਚਤਾਵੁਸੋ, ਅਜ੍ਝਤ੍ਤਿਕਾ ਆਪੋਧਾਤੂ’’ਤਿ ਚ,

‘‘ਕਤਮਾ ਚਾਵੁਸੋ, ਅਜ੍ਝਤ੍ਤਿਕਾ ਤੇਜੋਧਾਤੁ? ਯਂ ਅਜ੍ਝਤ੍ਤਂ ਪਚ੍ਚਤ੍ਤਂ ਤੇਜੋ ਤੇਜੋਗਤਂ ਉਪਾਦਿਨ੍ਨਂ. ਸੇਯ੍ਯਥਿਦਂ, ਯੇਨ ਚ ਸਨ੍ਤਪ੍ਪਤਿ, ਯੇਨ ਚ ਜੀਰੀਯਤਿ, ਯੇਨ ਚ ਪਰਿਡਯ੍ਹਤਿ, ਯੇਨ ਚ ਅਸਿਤਪੀਤਖਾਯਿਤਸਾਯਿਤਂ ਸਮ੍ਮਾ ਪਰਿਣਾਮਂ ਗਚ੍ਛਤਿ, ਯਂ ਵਾ ਪਨਞ੍ਞਮ੍ਪਿ ਕਿਞ੍ਚਿ ਅਜ੍ਝਤ੍ਤਂ ਪਚ੍ਚਤ੍ਤਂ ਤੇਜੋ ਤੇਜੋਗਤਂ ਉਪਾਦਿਨ੍ਨਂ, ਅਯਂ ਵੁਚ੍ਚਤਾਵੁਸੋ, ਅਜ੍ਝਤ੍ਤਿਕਾ ਤੇਜੋਧਾਤੂ’’ਤਿ ਚ,

‘‘ਕਤਮਾ ਚਾਵੁਸੋ, ਅਜ੍ਝਤ੍ਤਿਕਾ ਵਾਯੋਧਾਤੁ? ਯਂ ਅਜ੍ਝਤ੍ਤਂ ਪਚ੍ਚਤ੍ਤਂ ਵਾਯੋ ਵਾਯੋਗਤਂ ਉਪਾਦਿਨ੍ਨਂ. ਸੇਯ੍ਯਥਿਦਂ, ਉਦ੍ਧਙ੍ਗਮਾ ਵਾਤਾ, ਅਧੋਗਮਾ ਵਾਤਾ, ਕੁਚ੍ਛਿਸਯਾ ਵਾਤਾ, ਕੋਟ੍ਠਾਸਯਾ ਵਾਤਾ, ਅਙ੍ਗਮਙ੍ਗਾਨੁਸਾਰਿਨੋ ਵਾਤਾ, ਅਸ੍ਸਾਸੋ ਪਸ੍ਸਾਸੋ ਇਤਿ ਵਾ, ਯਂ ਵਾ ਪਨਞ੍ਞਮ੍ਪਿ ਕਿਞ੍ਚਿ ਅਜ੍ਝਤ੍ਤਂ ਪਚ੍ਚਤ੍ਤਂ ਵਾਯੋ ਵਾਯੋਗਤਂ ਉਪਾਦਿਨ੍ਨਂ, ਅਯਂ ਵੁਚ੍ਚਤਾਵੁਸੋ, ਅਜ੍ਝਤ੍ਤਿਕਾ ਵਾਯੋਧਾਤੂ’’ਤਿ ਚ –

ਏਵਂ ਨਾਤਿਤਿਕ੍ਖਪਞ੍ਞਸ੍ਸ ਧਾਤੁਕਮ੍ਮਟ੍ਠਾਨਿਕਸ੍ਸ ਵਸੇਨ ਵਿਤ੍ਥਾਰਤੋ ਆਗਤਂ. ਯਥਾ ਚੇਤ੍ਥ, ਏਵਂ ਰਾਹੁਲੋਵਾਦਧਾਤੁਵਿਭਙ੍ਗੇਸੁਪਿ.

ਤਤ੍ਰਾਯਂ ਅਨੁਤ੍ਤਾਨਪਦਵਣ੍ਣਨਾ, ਅਜ੍ਝਤ੍ਤਂ ਪਚ੍ਚਤ੍ਤਨ੍ਤਿ ਇਦਂ ਤਾਵ ਉਭਯਮ੍ਪਿ ਨਿਯਕਸ੍ਸ ਅਧਿਵਚਨਂ. ਨਿਯਕਂ ਨਾਮ ਅਤ੍ਤਨਿ ਜਾਤਂ ਸਸਨ੍ਤਾਨਪਰਿਯਾਪਨ੍ਨਨ੍ਤਿ ਅਤ੍ਥੋ. ਤਯਿਦਂ ਯਥਾ ਲੋਕੇ ਇਤ੍ਥੀਸੁ ਕਥਾ ਅਧਿਤ੍ਥੀਤਿ ਵੁਚ੍ਚਤਿ, ਏਵਂ ਅਤ੍ਤਨਿ ਪਵਤ੍ਤਤ੍ਤਾ ਅਜ੍ਝਤ੍ਤਂ, ਅਤ੍ਤਾਨਂ ਪਟਿਚ੍ਚ ਪਟਿਚ੍ਚ ਪਵਤ੍ਤਤ੍ਤਾ ਪਚ੍ਚਤ੍ਤਨ੍ਤਿਪਿ ਵੁਚ੍ਚਤਿ. ਕਕ੍ਖਲ਼ਨ੍ਤਿ ਥਦ੍ਧਂ. ਖਰਿਗਤਨ੍ਤਿ ਫਰੁਸਂ. ਤਤ੍ਥ ਪਠਮਂ ਲਕ੍ਖਣਵਚਨਂ, ਦੁਤਿਯਂ ਆਕਾਰਵਚਨਂ, ਕਕ੍ਖਲ਼ਲਕ੍ਖਣਾ ਹਿ ਪਥਵੀਧਾਤੁ, ਸਾ ਫਰੁਸਾਕਾਰਾ ਹੋਤਿ, ਤਸ੍ਮਾ ਖਰਿਗਤਨ੍ਤਿ ਵੁਤ੍ਤਾ. ਉਪਾਦਿਨ੍ਨਨ੍ਤਿ ਦਲ਼੍ਹਂ ਆਦਿਨ੍ਨਂ, ਅਹਂ ਮਮਨ੍ਤਿ ਏਵਂ ਦਲ਼੍ਹਂ ਆਦਿਨ੍ਨਂ, ਗਹਿਤਂ ਪਰਾਮਟ੍ਠਨ੍ਤਿ ਅਤ੍ਥੋ. ਸੇਯ੍ਯਥਿਦਨ੍ਤਿ ਨਿਪਾਤੋ. ਤਸ੍ਸ ਤਂ ਕਤਮਨ੍ਤਿ ਚੇਤਿ ਅਤ੍ਥੋ. ਤਤੋ ਤਂ ਦਸ੍ਸੇਨ੍ਤੋ ‘‘ਕੇਸਾ ਲੋਮਾ’’ਤਿਆਦਿਮਾਹ. ਏਤ੍ਥ ਚ ਮਤ੍ਥਲੁਙ੍ਗਂ ਪਕ੍ਖਿਪਿਤ੍ਵਾ ਵੀਸਤਿਯਾ ਆਕਾਰੇਹਿ ਪਥਵੀਧਾਤੁ ਨਿਦ੍ਦਿਟ੍ਠਾਤਿ ਵੇਦਿਤਬ੍ਬਾ. ਯਂ ਵਾ ਪਨਞ੍ਞਮ੍ਪਿ ਕਿਞ੍ਚੀਤਿ ਅਵਸੇਸੇਸੁ ਤੀਸੁ ਕੋਟ੍ਠਾਸੇਸੁ ਪਥਵੀਧਾਤੁ ਸਙ੍ਗਹਿਤਾ.

ਵਿਸ੍ਸਨ੍ਦਨਭਾਵੇਨ ਤਂ ਤਂ ਠਾਨਂ ਅਪ੍ਪੋਤੀਤਿ ਆਪੋ. ਕਮ੍ਮਸਮੁਟ੍ਠਾਨਾਦਿਵਸੇਨ ਨਾਨਾਵਿਧੇਸੁ ਆਪੇਸੁ ਗਤਨ੍ਤਿ ਆਪੋਗਤਂ. ਕਿਂ ਤਂ? ਆਪੋਧਾਤੁਯਾ ਆਬਨ੍ਧਨਲਕ੍ਖਣਂ.

ਤੇਜਨਵਸੇਨ ਤੇਜੋ, ਵੁਤ੍ਤਨਯੇਨੇਵ ਤੇਜੇਸੁ ਗਤਨ੍ਤਿ ਤੇਜੋਗਤਂ. ਕਿਂ ਤਂ? ਉਣ੍ਹਤ੍ਤਲਕ੍ਖਣਂ. ਯੇਨ ਚਾਤਿ ਯੇਨ ਤੇਜੋਧਾਤੁਗਤੇਨ ਕੁਪਿਤੇਨ ਅਯਂ ਕਾਯੋ ਸਨ੍ਤਪ੍ਪਤਿ, ਏਕਾਹਿਕਜਰਾਦਿਭਾਵੇਨ ਉਸੁਮਜਾਤੋ ਹੋਤਿ. ਯੇਨ ਚ ਜੀਰੀਯਤੀਤਿ ਯੇਨ ਅਯਂ ਕਾਯੋ ਜੀਰਤਿ, ਇਨ੍ਦ੍ਰਿਯਵੇਕਲ੍ਲਤਂ ਬਲਪਰਿਕ੍ਖਯਂ ਵਲਿਪਲਿਤਾਦਿਭਾਵਞ੍ਚ ਪਾਪੁਣਾਤਿ. ਯੇਨ ਚ ਪਰਿਡਯ੍ਹਤੀਤਿ ਯੇਨ ਕੁਪਿਤੇਨ ਅਯਂ ਕਾਯੋ ਡਯ੍ਹਤਿ. ਸੋ ਚ ਪੁਗ੍ਗਲੋ ‘‘ਡਯ੍ਹਾਮਿ ਡਯ੍ਹਾਮੀ’’ਤਿ ਕਨ੍ਦਨ੍ਤੋ ਸਤਧੋਤਸਪ੍ਪਿਗੋਸੀਸਚਨ੍ਦਨਾਦਿਲੇਪਞ੍ਚੇਵ ਤਾਲਵਣ੍ਟਵਾਤਞ੍ਚ ਪਚ੍ਚਾਸੀਸਤਿ. ਯੇਨ ਚ ਅਸਿਤਪੀਤਖਾਯਿਤਸਾਯਿਤਂ ਸਮ੍ਮਾ ਪਰਿਣਾਮਂ ਗਚ੍ਛਤੀਤਿ ਯੇਨੇਤਂ ਅਸਿਤਂ ਵਾ ਓਦਨਾਦਿ ਪੀਤਂ ਵਾ ਪਾਨਕਾਦਿ ਖਾਯਿਤਂ ਵਾ ਪਿਟ੍ਠਖਜ੍ਜਕਾਦਿ ਸਾਯਿਤਂ ਵਾ ਅਮ੍ਬਪਕ੍ਕਮਧੁਫਾਣਿਤਾਦਿ ਸਮ੍ਮਾ ਪਰਿਪਾਕਂ ਗਚ੍ਛਤਿ, ਰਸਾਦਿਭਾਵੇਨ ਵਿਵੇਕਂ ਗਚ੍ਛਤੀਤਿ ਅਤ੍ਥੋ. ਏਤ੍ਥ ਚ ਪੁਰਿਮਾ ਤਯੋ ਤੇਜੋਧਾਤੁਸਮੁਟ੍ਠਾਨਾ. ਪਚ੍ਛਿਮੋ ਕਮ੍ਮਸਮੁਟ੍ਠਾਨੋਵ.

ਵਾਯਨਵਸੇਨ ਵਾਯੋ, ਵੁਤ੍ਤਨਯੇਨੇਵ ਵਾਯੇਸੁ ਗਤਨ੍ਤਿ ਵਾਯੋਗਤਂ. ਕਿਂ ਤਂ? ਵਿਤ੍ਥਮ੍ਭਨਲਕ੍ਖਣਂ. ਉਦ੍ਧਙ੍ਗਮਾ ਵਾਤਾਤਿ ਉਗ੍ਗਾਰਹਿਕ੍ਕਾਦਿਪਵਤ੍ਤਕਾ ਉਦ੍ਧਂ ਆਰੋਹਣਵਾਤਾ. ਅਧੋਗਮਾ ਵਾਤਾਤਿ ਉਚ੍ਚਾਰਪਸ੍ਸਾਵਾਦਿਨੀਹਰਣਕਾ ਅਧੋ ਓਰੋਹਣਵਾਤਾ. ਕੁਚ੍ਛਿਸਯਾ ਵਾਤਾਤਿ ਅਨ੍ਤਾਨਂ ਬਹਿਵਾਤਾ. ਕੋਟ੍ਠਾਸਯਾ ਵਾਤਾਤਿ ਅਨ੍ਤਾਨਂ ਅਨ੍ਤੋਵਾਤਾ. ਅਙ੍ਗਮਙ੍ਗਾਨੁਸਾਰਿਨੋ ਵਾਤਾਤਿ ਧਮਨਿਜਾਲਾਨੁਸਾਰੇਨ ਸਕਲਸਰੀਰੇ ਅਙ੍ਗਮਙ੍ਗਾਨਿ ਅਨੁਸਟਾ ਸਮਿਞ੍ਜਨਪਸਾਰਣਾਦਿਨਿਬ੍ਬਤ੍ਤਕਾ ਵਾਤਾ. ਅਸ੍ਸਾਸੋਤਿ ਅਨ੍ਤੋਪਵਿਸਨਨਾਸਿਕਵਾਤੋ. ਪਸ੍ਸਾਸੋਤਿ ਬਹਿਨਿਕ੍ਖਮਨਨਾਸਿਕਵਾਤੋ. ਏਤ੍ਥ ਚ ਪੁਰਿਮਾ ਪਞ੍ਚ ਚਤੁਸਮੁਟ੍ਠਾਨਾ. ਅਸ੍ਸਾਸਪਸ੍ਸਾਸਾ ਚਿਤ੍ਤਸਮੁਟ੍ਠਾਨਾਵ. ਸਬ੍ਬਤ੍ਥ ਯਂ ਵਾ ਪਨਞ੍ਞਮ੍ਪਿ ਕਿਞ੍ਚੀਤਿ ਇਮਿਨਾ ਪਦੇਨ ਅਵਸੇਸਕੋਟ੍ਠਾਸੇਸੁ ਆਪੋਧਾਤੁਆਦਯੋ ਸਙ੍ਗਹਿਤਾ.

ਇਤਿ ਵੀਸਤਿਯਾ ਆਕਾਰੇਹਿ ਪਥਵੀਧਾਤੁ, ਦ੍ਵਾਦਸਹਿ ਆਪੋਧਾਤੁ, ਚਤੂਹਿ ਤੇਜੋਧਾਤੁ, ਛਹਿ ਵਾਯੋਧਾਤੂਤਿ ਦ੍ਵਾਚਤ੍ਤਾਲੀਸਾਯ ਆਕਾਰੇਹਿ ਚਤਸ੍ਸੋ ਧਾਤੁਯੋ ਵਿਤ੍ਥਾਰਿਤਾ ਹੋਨ੍ਤੀਤਿ ਅਯਂ ਤਾਵੇਤ੍ਥ ਪਾਲ਼ਿਵਣ੍ਣਨਾ.

੩੦੮. ਭਾਵਨਾਨਯੇ ਪਨੇਤ੍ਥ ਤਿਕ੍ਖਪਞ੍ਞਸ੍ਸ ਭਿਕ੍ਖੁਨੋ ਕੇਸਾ ਪਥਵੀਧਾਤੁ, ਲੋਮਾ ਪਥਵੀਧਾਤੂਤਿ ਏਵਂ ਵਿਤ੍ਥਾਰਤੋ ਧਾਤੁਪਰਿਗ੍ਗਹੋ ਪਪਞ੍ਚਤੋ ਉਪਟ੍ਠਾਤਿ. ਯਂ ਥਦ੍ਧਲਕ੍ਖਣਂ, ਅਯਂ ਪਥਵੀਧਾਤੁ. ਯਂ ਆਬਨ੍ਧਨਲਕ੍ਖਣਂ, ਅਯਂ ਆਪੋਧਾਤੁ. ਯਂ ਪਰਿਪਾਚਨਲਕ੍ਖਣਂ, ਅਯਂ ਤੇਜੋਧਾਤੁ. ਯਂ ਵਿਤ੍ਥਮ੍ਭਨਲਕ੍ਖਣਂ, ਅਯਂ ਵਾਯੋਧਾਤੂਤਿ ਏਵਂ ਮਨਸਿਕਰੋਤੋ ਪਨਸ੍ਸ ਕਮ੍ਮਟ੍ਠਾਨਂ ਪਾਕਟਂ ਹੋਤਿ. ਨਾਤਿਤਿਕ੍ਖਪਞ੍ਞਸ੍ਸ ਪਨ ਏਵਂ ਮਨਸਿਕਰੋਤੋ ਅਨ੍ਧਕਾਰਂ ਅਵਿਭੂਤਂ ਹੋਤਿ. ਪੁਰਿਮਨਯੇਨ ਵਿਤ੍ਥਾਰਤੋ ਮਨਸਿਕਰੋਨ੍ਤਸ੍ਸ ਪਾਕਟਂ ਹੋਤਿ.

ਕਥਂ? ਯਥਾ ਦ੍ਵੀਸੁ ਭਿਕ੍ਖੂਸੁ ਬਹੁਪੇਯ੍ਯਾਲਂ ਤਨ੍ਤਿਂ ਸਜ੍ਝਾਯਨ੍ਤੇਸੁ ਤਿਕ੍ਖਪਞ੍ਞੋ ਭਿਕ੍ਖੁ ਸਕਿਂ ਵਾ ਦ੍ਵਿਕ੍ਖਤ੍ਤੁਂ ਵਾ ਪੇਯ੍ਯਾਲਮੁਖਂ ਵਿਤ੍ਥਾਰੇਤ੍ਵਾ ਤਤੋ ਪਰਂ ਉਭਤੋਕੋਟਿਵਸੇਨੇਵ ਸਜ੍ਝਾਯਂ ਕਰੋਨ੍ਤੋ ਗਚ੍ਛਤਿ. ਤਤ੍ਰ ਨਾਤਿਤਿਕ੍ਖਪਞ੍ਞੋ ਏਵਂ ਵਤ੍ਤਾ ਹੋਤਿ ‘‘ਕਿਂ ਸਜ੍ਝਾਯੋ ਨਾਮੇਸ ਓਟ੍ਠਪਰਿਯਾਹਤਮਤ੍ਤਂ ਕਾਤੁਂ ਨ ਦੇਤਿ, ਏਵਂ ਸਜ੍ਝਾਯੇ ਕਰਿਯਮਾਨੇ ਕਦਾ ਤਨ੍ਤਿ ਪਗੁਣਾ ਭਵਿਸ੍ਸਤੀ’’ਤਿ. ਸੋ ਆਗਤਾਗਤਂ ਪੇਯ੍ਯਾਲਮੁਖਂ ਵਿਤ੍ਥਾਰੇਤ੍ਵਾਵ ਸਜ੍ਝਾਯਂ ਕਰੋਤਿ. ਤਮੇਨਂ ਇਤਰੋ ਏਵਮਾਹ – ‘‘ਕਿਂ ਸਜ੍ਝਾਯੋ ਨਾਮੇਸ ਪਰਿਯੋਸਾਨਂ ਗਨ੍ਤੁਂ ਨ ਦੇਤਿ, ਏਵਂ ਸਜ੍ਝਾਯੇ ਕਰਿਯਮਾਨੇ ਕਦਾ ਤਨ੍ਤਿ ਪਰਿਯੋਸਾਨਂ ਗਮਿਸ੍ਸਤੀ’’ਤਿ. ਏਵਮੇਵ ਤਿਕ੍ਖਪਞ੍ਞਸ੍ਸ ਕੇਸਾਦਿਵਸੇਨ ਵਿਤ੍ਥਾਰਤੋ ਧਾਤੁਪਰਿਗ੍ਗਹੋ ਪਪਞ੍ਚਤੋ ਉਪਟ੍ਠਾਤਿ. ਯਂ ਥਦ੍ਧਲਕ੍ਖਣਂ, ਅਯਂ ਪਥਵੀਧਾਤੂਤਿਆਦਿਨਾ ਨਯੇਨ ਸਙ੍ਖੇਪਤੋ ਮਨਸਿਕਰੋਤੋ ਕਮ੍ਮਟ੍ਠਾਨਂ ਪਾਕਟਂ ਹੋਤਿ. ਇਤਰਸ੍ਸ ਤਥਾ ਮਨਸਿਕਰੋਤੋ ਅਨ੍ਧਕਾਰਂ ਅਵਿਭੂਤਂ ਹੋਤਿ. ਕੇਸਾਦਿਵਸੇਨ ਵਿਤ੍ਥਾਰਤੋ ਮਨਸਿਕਰੋਨ੍ਤਸ੍ਸ ਪਾਕਟਂ ਹੋਤਿ.

ਤਸ੍ਮਾ ਇਮਂ ਕਮ੍ਮਟ੍ਠਾਨਂ ਭਾਵੇਤੁਕਾਮੇਨ ਤਿਕ੍ਖਪਞ੍ਞੇਨ ਤਾਵ ਰਹੋਗਤੇਨ ਪਟਿਸਲ੍ਲੀਨੇਨ ਸਕਲਮ੍ਪਿ ਅਤ੍ਤਨੋ ਰੂਪਕਾਯਂ ਆਵਜ੍ਜੇਤ੍ਵਾ ਯੋ ਇਮਸ੍ਮਿਂ ਕਾਯੇ ਥਦ੍ਧਭਾਵੋ ਵਾ ਖਰਭਾਵੋ ਵਾ, ਅਯਂ ਪਥਵੀਧਾਤੁ. ਯੋ ਆਬਨ੍ਧਨਭਾਵੋ ਵਾ ਦ੍ਰਵਭਾਵੋ ਵਾ, ਅਯਂ ਆਪੋਧਾਤੁ. ਯੋ ਪਰਿਪਾਚਨਭਾਵੋ ਵਾ ਉਣ੍ਹਭਾਵੋ ਵਾ, ਅਯਂ ਤੇਜੋਧਾਤੁ. ਯੋ ਵਿਤ੍ਥਮ੍ਭਨਭਾਵੋ ਵਾ ਸਮੁਦੀਰਣਭਾਵੋ ਵਾ, ਅਯਂ ਵਾਯੋਧਾਤੂਤਿ ਏਵਂ ਸਂਖਿਤ੍ਤੇਨ ਧਾਤੁਯੋ ਪਰਿਗ੍ਗਹੇਤ੍ਵਾ ਪੁਨਪ੍ਪੁਨਂ ਪਥਵੀਧਾਤੁ ਆਪੋਧਾਤੂਤਿ ਧਾਤੁਮਤ੍ਤਤੋ ਨਿਸ੍ਸਤ੍ਤਤੋ ਨਿਜ੍ਜੀਵਤੋ ਆਵਜ੍ਜਿਤਬ੍ਬਂ ਮਨਸਿਕਾਤਬ੍ਬਂ ਪਚ੍ਚਵੇਕ੍ਖਿਤਬ੍ਬਂ. ਤਸ੍ਸੇਵਂ ਵਾਯਮਮਾਨਸ੍ਸ ਨਚਿਰੇਨੇਵ ਧਾਤੁਪ੍ਪਭੇਦਾਵਭਾਸਨਪਞ੍ਞਾਪਰਿਗ੍ਗਹਿਤੋ ਸਭਾਵਧਮ੍ਮਾਰਮ੍ਮਣਤ੍ਤਾ ਅਪ੍ਪਨਂ ਅਪ੍ਪਤ੍ਤੋ ਉਪਚਾਰਮਤ੍ਤੋ ਸਮਾਧਿ ਉਪ੍ਪਜ੍ਜਤਿ.

ਅਥ ਵਾ ਪਨ ਯੇ ਇਮੇ ਚਤੁਨ੍ਨਂ ਮਹਾਭੂਤਾਨਂ ਨਿਸ੍ਸਤ੍ਤਭਾਵਦਸ੍ਸਨਤ੍ਥਂ ਧਮ੍ਮਸੇਨਾਪਤਿਨਾ ‘‘ਅਟ੍ਠਿਞ੍ਚ ਪਟਿਚ੍ਚ ਨ੍ਹਾਰੁਞ੍ਚ ਪਟਿਚ੍ਚ ਮਂਸਞ੍ਚ ਪਟਿਚ੍ਚ ਚਮ੍ਮਞ੍ਚ ਪਟਿਚ੍ਚ ਆਕਾਸੋ ਪਰਿਵਾਰਿਤੋ ਰੂਪਨ੍ਤ੍ਵੇਵ ਸਙ੍ਖਂ ਗਚ੍ਛਤੀ’’ਤਿ (ਮ. ਨਿ. ੧.੩੦੬) ਚਤ੍ਤਾਰੋ ਕੋਟ੍ਠਾਸਾ ਵੁਤ੍ਤਾ. ਤੇਸੁ ਤਂ ਤਂ ਅਨ੍ਤਰਾਨੁਸਾਰਿਨਾ ਞਾਣਹਤ੍ਥੇਨ ਵਿਨਿਬ੍ਭੁਜਿਤ੍ਵਾ ਵਿਨਿਬ੍ਭੁਜਿਤ੍ਵਾ ਯੋ ਏਤੇਸੁ ਥਦ੍ਧਭਾਵੋ ਵਾ ਖਰਭਾਵੋ ਵਾ, ਅਯਂ ਪਥਵੀਧਾਤੂਤਿ ਪੁਰਿਮਨਯੇਨੇਵ ਧਾਤੁਯੋ ਪਰਿਗ੍ਗਹੇਤ੍ਵਾ ਪੁਨਪ੍ਪੁਨਂ ਪਥਵੀਧਾਤੁ ਆਪੋਧਾਤੂਤਿ ਧਾਤੁਮਤ੍ਤਤੋ ਨਿਸ੍ਸਤ੍ਤਤੋ ਨਿਜ੍ਜੀਵਤੋ ਆਵਜ੍ਜਿਤਬ੍ਬਂ ਮਨਸਿਕਾਤਬ੍ਬਂ ਪਚ੍ਚਵੇਕ੍ਖਿਤਬ੍ਬਂ. ਤਸ੍ਸੇਵਂ ਵਾਯਮਮਾਨਸ੍ਸ ਨਚਿਰੇਨੇਵ ਧਾਤੁਪ੍ਪਭੇਦਾਵਭਾਸਨਪਞ੍ਞਾਪਰਿਗ੍ਗਹਿਤੋ ਸਭਾਵਧਮ੍ਮਾਰਮ੍ਮਣਤ੍ਤਾ ਅਪ੍ਪਨਂ ਅਪ੍ਪਤ੍ਤੋ ਉਪਚਾਰਮਤ੍ਤੋ ਸਮਾਧਿ ਉਪ੍ਪਜ੍ਜਤਿ. ਅਯਂ ਸਙ੍ਖੇਪਤੋ ਆਗਤੇ ਚਤੁਧਾਤੁਵਵਤ੍ਥਾਨੇ ਭਾਵਨਾਨਯੋ.

੩੦੯. ਵਿਤ੍ਥਾਰਤੋ ਆਗਤੇ ਪਨ ਏਵਂ ਵੇਦਿਤਬ੍ਬੋ. ਇਦਂ ਕਮ੍ਮਟ੍ਠਾਨਂ ਭਾਵੇਤੁਕਾਮੇਨ ਹਿ ਨਾਤਿਤਿਕ੍ਖਪਞ੍ਞੇਨ ਯੋਗਿਨਾ ਆਚਰਿਯਸਨ੍ਤਿਕੇ ਦ੍ਵਾਚਤ੍ਤਾਲੀਸਾਯ ਆਕਾਰੇਹਿ ਵਿਤ੍ਥਾਰਤੋ ਧਾਤੁਯੋ ਉਗ੍ਗਣ੍ਹਿਤ੍ਵਾ ਵੁਤ੍ਤਪ੍ਪਕਾਰੇ ਸੇਨਾਸਨੇ ਵਿਹਰਨ੍ਤੇਨ ਕਤਸਬ੍ਬਕਿਚ੍ਚੇਨ ਰਹੋਗਤੇਨ ਪਟਿਸਲ੍ਲੀਨੇਨ ਸਸਮ੍ਭਾਰਸਙ੍ਖੇਪਤੋ, ਸਸਮ੍ਭਾਰਵਿਭਤ੍ਤਿਤੋ, ਸਲਕ੍ਖਣਸਙ੍ਖੇਪਤੋ, ਸਲਕ੍ਖਣਵਿਭਤ੍ਤਿਤੋਤਿ ਏਵਂ ਚਤੂਹਾਕਾਰੇਹਿ ਕਮ੍ਮਟ੍ਠਾਨਂ ਭਾਵੇਤਬ੍ਬਂ.

ਤਤ੍ਥ ਕਥਂ ਸਸਮ੍ਭਾਰਸਙ੍ਖੇਪਤੋ ਭਾਵੇਤਿ? ਇਧ ਭਿਕ੍ਖੁ ਵੀਸਤਿਯਾ ਕੋਟ੍ਠਾਸੇਸੁ ਥਦ੍ਧਾਕਾਰਂ ਪਥਵੀਧਾਤੂਤਿ ਵਵਤ੍ਥਪੇਤਿ. ਦ੍ਵਾਦਸਸੁ ਕੋਟ੍ਠਾਸੇਸੁ ਯੂਸਗਤਂ ਉਦਕਸਙ੍ਖਾਤਂ ਆਬਨ੍ਧਨਾਕਾਰਂ ਆਪੋਧਾਤੂਤਿ ਵਵਤ੍ਥਪੇਤਿ. ਚਤੂਸੁ ਕੋਟ੍ਠਾਸੇਸੁ ਪਰਿਪਾਚਨਕਂ ਤੇਜਂ ਤੇਜੋਧਾਤੂਤਿ ਵਵਤ੍ਥਪੇਤਿ. ਛਸੁ ਕੋਟ੍ਠਾਸੇਸੁ ਵਿਤ੍ਥਮ੍ਭਨਾਕਾਰਂ ਵਾਯੋਧਾਤੂਤਿ ਵਵਤ੍ਥਪੇਤਿ. ਤਸ੍ਸੇਵਂ ਵਵਤ੍ਥਾਪਯਤੋਯੇਵ ਧਾਤੁਯੋ ਪਾਕਟਾ ਹੋਨ੍ਤਿ. ਤਾ ਪੁਨਪ੍ਪੁਨਂ ਆਵਜ੍ਜਤੋ ਮਨਸਿਕਰੋਤੋ ਵੁਤ੍ਤਨਯੇਨੇਵ ਉਪਚਾਰਸਮਾਧਿ ਉਪ੍ਪਜ੍ਜਤਿ.

੩੧੦. ਯਸ੍ਸ ਪਨ ਏਵਂ ਭਾਵਯਤੋ ਕਮ੍ਮਟ੍ਠਾਨਂ ਨ ਇਜ੍ਝਤਿ, ਤੇਨ ਸਸਮ੍ਭਾਰਵਿਭਤ੍ਤਿਤੋ ਭਾਵੇਤਬ੍ਬਂ. ਕਥਂ? ਤੇਨ ਹਿ ਭਿਕ੍ਖੁਨਾ ਯਂ ਤਂ ਕਾਯਗਤਾਸਤਿਕਮ੍ਮਟ੍ਠਾਨਨਿਦ੍ਦੇਸੇ ਸਤ੍ਤਧਾ ਉਗ੍ਗਹਕੋਸਲ੍ਲਂ ਦਸਧਾ ਮਨਸਿਕਾਰਕੋਸਲ੍ਲਞ੍ਚ ਵੁਤ੍ਤਂ. ਦ੍ਵਤ੍ਤਿਂਸਾਕਾਰੇ ਤਾਵ ਤਂ ਸਬ੍ਬਂ ਅਪਰਿਹਾਪੇਤ੍ਵਾ ਤਚਪਞ੍ਚਕਾਦੀਨਂ ਅਨੁਲੋਮਪਟਿਲੋਮਤੋ ਵਚਸਾ ਸਜ੍ਝਾਯਂ ਆਦਿਂਕਤ੍ਵਾ ਸਬ੍ਬਂ ਤਤ੍ਥ ਵੁਤ੍ਤਵਿਧਾਨਂ ਕਾਤਬ੍ਬਂ. ਅਯਮੇਵ ਹਿ ਵਿਸੇਸੋ, ਤਤ੍ਥ ਵਣ੍ਣਸਣ੍ਠਾਨਦਿਸੋਕਾਸਪਰਿਚ੍ਛੇਦਵਸੇਨ ਕੇਸਾਦਯੋ ਮਨਸਿਕਰਿਤ੍ਵਾਪਿ ਪਟਿਕ੍ਕੂਲਵਸੇਨ ਚਿਤ੍ਤਂ ਠਪੇਤਬ੍ਬਂ, ਇਧ ਧਾਤੁਵਸੇਨ. ਤਸ੍ਮਾ ਵਣ੍ਣਾਦਿਵਸੇਨ ਪਞ੍ਚਧਾ ਪਞ੍ਚਧਾ ਕੇਸਾਦਯੋ ਮਨਸਿਕਰਿਤ੍ਵਾ ਅਵਸਾਨੇ ਏਵਂ ਮਨਸਿਕਾਰੋ ਪਵਤ੍ਤੇਤਬ੍ਬੋ.

੩੧੧. ਇਮੇ ਕੇਸਾ ਨਾਮ ਸੀਸਕਟਾਹਪਲਿਵੇਠਨਚਮ੍ਮੇ ਜਾਤਾ. ਤਤ੍ਥ ਯਥਾਵਮ੍ਮਿਕਮਤ੍ਥਕੇ ਜਾਤੇਸੁ ਕੁਣ੍ਠਤਿਣੇਸੁ ਨ ਵਮ੍ਮਿਕਮਤ੍ਥਕੋ ਜਾਨਾਤਿ ਮਯਿ ਕੁਣ੍ਠਤਿਣਾਨਿ ਜਾਤਾਨੀਤਿ, ਨਪਿ ਕੁਣ੍ਠਤਿਣਾਨਿ ਜਾਨਨ੍ਤਿ ਮਯਂ ਵਮ੍ਮਿਕਮਤ੍ਥਕੇ ਜਾਤਾਨੀਤਿ, ਏਵਮੇਵ ਨ ਸੀਸਕਟਾਹਪਲਿਵੇਠਨਚਮ੍ਮਂ ਜਾਨਾਤਿ ਮਯਿ ਕੇਸਾ ਜਾਤਾਤਿ, ਨਪਿ ਕੇਸਾ ਜਾਨਨ੍ਤਿ ਮਯਂ ਸੀਸਕਟਾਹਵੇਠਨਚਮ੍ਮੇ ਜਾਤਾਤਿ, ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਕੇਸਾ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

੩੧੨. ਲੋਮਾ ਸਰੀਰਵੇਠਨਚਮ੍ਮੇ ਜਾਤਾ. ਤਤ੍ਥ ਯਥਾ ਸੁਞ੍ਞਗਾਮਟ੍ਠਾਨੇ ਜਾਤੇਸੁ ਦਬ੍ਬਤਿਣਕੇਸੁ ਨ ਸੁਞ੍ਞਗਾਮਟ੍ਠਾਨਂ ਜਾਨਾਤਿ ਮਯਿ ਦਬ੍ਬਤਿਣਕਾਨਿ ਜਾਤਾਨੀਤਿ, ਨਪਿ ਦਬ੍ਬਤਿਣਕਾਨਿ ਜਾਨਨ੍ਤਿ ਮਯਂ ਸੁਞ੍ਞਗਾਮਟ੍ਠਾਨੇ ਜਾਤਾਨੀਤਿ, ਏਵਮੇਵ ਨ ਸਰੀਰਵੇਠਨਚਮ੍ਮਂ ਜਾਨਾਤਿ ਮਯਿ ਲੋਮਾ ਜਾਤਾਤਿ. ਨਪਿ ਲੋਮਾ ਜਾਨਨ੍ਤਿ ਮਯਂ ਸਰੀਰਵੇਠਨਚਮ੍ਮੇ ਜਾਤਾਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਲੋਮਾ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

੩੧੩. ਨਖਾ ਅਙ੍ਗੁਲੀਨਂ ਅਗ੍ਗੇਸੁ ਜਾਤਾ. ਤਤ੍ਥ ਯਥਾ ਕੁਮਾਰਕੇਸੁ ਦਣ੍ਡਕੇਹਿ ਮਧੁਕਟ੍ਠਿਕੇ ਵਿਜ੍ਝਿਤ੍ਵਾ ਕੀਲ਼ਨ੍ਤੇਸੁ ਨ ਦਣ੍ਡਕਾ ਜਾਨਨ੍ਤਿ ਅਮ੍ਹੇਸੁ ਮਧੁਕਟ੍ਠਿਕਾ ਠਪਿਤਾਤਿ, ਨਪਿ ਮਧੁਕਟ੍ਠਿਕਾ ਜਾਨਨ੍ਤਿ ਮਯਂ ਦਣ੍ਡਕੇਸੁ ਠਪਿਤਾਤਿ, ਏਵਮੇਵ ਨ ਅਙ੍ਗੁਲਿਯੋ ਜਾਨਨ੍ਤਿ ਅਮ੍ਹਾਕਂ ਅਗ੍ਗੇਸੁ ਨਖਾ ਜਾਤਾਤਿ. ਨਪਿ ਨਖਾ ਜਾਨਨ੍ਤਿ ਮਯਂ ਅਙ੍ਗੁਲੀਨਂ ਅਗ੍ਗੇਸੁ ਜਾਤਾਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਨਖਾ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

੩੧੪. ਦਨ੍ਤਾ ਹਨੁਕਟ੍ਠਿਕੇਸੁ ਜਾਤਾ. ਤਤ੍ਥ ਯਥਾ ਵਡ੍ਢਕੀਹਿ ਪਾਸਾਣਉਦੁਕ੍ਖਲਕੇਸੁ ਕੇਨਚਿਦੇਵ ਸਿਲੇਸਜਾਤੇਨ ਬਨ੍ਧਿਤ੍ਵਾ ਠਪਿਤਥਮ੍ਭੇਸੁ ਨ ਉਦੁਕ੍ਖਲਾ ਜਾਨਨ੍ਤਿ ਅਮ੍ਹੇਸੁ ਥਮ੍ਭਾ ਠਿਤਾਤਿ. ਨਪਿ ਥਮ੍ਭਾ ਜਾਨਨ੍ਤਿ ਮਯਂ ਉਦੁਕ੍ਖਲੇਸੁ ਠਿਤਾਤਿ, ਏਵਮੇਵ ਨ ਹਨੁਕਟ੍ਠੀਨਿ ਜਾਨਨ੍ਤਿ ਅਮ੍ਹੇਸੁ ਦਨ੍ਤਾ ਜਾਤਾਤਿ. ਨਪਿ ਦਨ੍ਤਾ ਜਾਨਨ੍ਤਿ ਮਯਂ ਹਨੁਕਟ੍ਠੀਸੁ ਜਾਤਾਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਦਨ੍ਤਾ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

੩੧੫. ਤਚੋ ਸਕਲਸਰੀਰਂ ਪਰਿਯੋਨਨ੍ਧਿਤ੍ਵਾ ਠਿਤੋ. ਤਤ੍ਥ ਯਥਾ ਅਲ੍ਲਗੋਚਮ੍ਮਪਰਿਯੋਨਦ੍ਧਾਯ ਮਹਾਵੀਣਾਯ ਨ ਮਹਾਵੀਣਾ ਜਾਨਾਤਿ ਅਹਂ ਅਲ੍ਲਗੋਚਮ੍ਮੇਨ ਪਰਿਯੋਨਦ੍ਧਾਤਿ. ਨਪਿ ਅਲ੍ਲਗੋਚਮ੍ਮਂ ਜਾਨਾਤਿ ਮਯਾ ਮਹਾਵੀਣਾ ਪਰਿਯੋਨਦ੍ਧਾਤਿ, ਏਵਮੇਵ ਨ ਸਰੀਰਂ ਜਾਨਾਤਿ ਅਹਂ ਤਚੇਨ ਪਰਿਯੋਨਦ੍ਧਨ੍ਤਿ. ਨਪਿ ਤਚੋ ਜਾਨਾਤਿ ਮਯਾ ਸਰੀਰਂ ਪਰਿਯੋਨਦ੍ਧਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਤਚੋ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

੩੧੬. ਮਂਸਂ ਅਟ੍ਠਿਸਙ੍ਘਾਟਂ ਅਨੁਲਿਮ੍ਪਿਤ੍ਵਾ ਠਿਤਂ. ਤਤ੍ਥ ਯਥਾ ਮਹਾਮਤ੍ਤਿਕਲਿਤ੍ਤਾਯ ਭਿਤ੍ਤਿਯਾ ਨ ਭਿਤ੍ਤਿ ਜਾਨਾਤਿ ਅਹਂ ਮਹਾਮਤ੍ਤਿਕਾਯ ਲਿਤ੍ਤਾਤਿ. ਨਪਿ ਮਹਾਮਤ੍ਤਿਕਾ ਜਾਨਾਤਿ ਮਯਾ ਭਿਤ੍ਤਿ ਲਿਤ੍ਤਾਤਿ, ਏਵਮੇਵ ਨ ਅਟ੍ਠਿਸਙ੍ਘਾਟੋ ਜਾਨਾਤਿ ਅਹਂ ਨਵਪੇਸਿਸਤਪ੍ਪਭੇਦੇਨ ਮਂਸੇਨ ਲਿਤ੍ਤੋਤਿ. ਨਪਿ ਮਂਸਂ ਜਾਨਾਤਿ ਮਯਾ ਅਟ੍ਠਿਸਙ੍ਘਾਟੋ ਲਿਤ੍ਤੋਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਮਂਸਂ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

੩੧੭. ਨ੍ਹਾਰੁ ਸਰੀਰਬ੍ਭਨ੍ਤਰੇ ਅਟ੍ਠੀਨਿ ਆਬਨ੍ਧਮਾਨਾ ਠਿਤਾ. ਤਤ੍ਥ ਯਥਾ ਵਲ੍ਲੀਹਿ ਵਿਨਦ੍ਧੇਸੁ ਕੁਟ੍ਟਦਾਰੂਸੁ ਨ ਕੁਟ੍ਟਦਾਰੂਨਿ ਜਾਨਨ੍ਤਿ ਮਯਂ ਵਲ੍ਲੀਹਿ ਵਿਨਦ੍ਧਾਨੀਤਿ. ਨਪਿ ਵਲ੍ਲਿਯੋ ਜਾਨਨ੍ਤਿ ਅਮ੍ਹੇਹਿ ਕੁਟ੍ਟਦਾਰੂਨਿ ਵਿਨਦ੍ਧਾਨੀਤਿ, ਏਵਮੇਵ ਨ ਅਟ੍ਠੀਨਿ ਜਾਨਨ੍ਤਿ ਮਯਂ ਨ੍ਹਾਰੂਹਿ ਆਬਦ੍ਧਾਨੀਤਿ. ਨਪਿ ਨ੍ਹਾਰੂ ਜਾਨਨ੍ਤਿ ਅਮ੍ਹੇਹਿ ਅਟ੍ਠੀਨਿ ਆਬਦ੍ਧਾਨੀਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਨ੍ਹਾਰੁ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

੩੧੮. ਅਟ੍ਠੀਸੁ ਪਣ੍ਹਿਕਟ੍ਠਿ ਗੋਪ੍ਫਕਟ੍ਠਿਂ ਉਕ੍ਖਿਪਿਤ੍ਵਾ ਠਿਤਂ. ਗੋਪ੍ਫਕਟ੍ਠਿ ਜਙ੍ਘਟ੍ਠਿਂ ਉਕ੍ਖਿਪਿਤ੍ਵਾ ਠਿਤਂ. ਜਙ੍ਘਟ੍ਠਿ ਊਰੁਟ੍ਠਿਂ ਉਕ੍ਖਿਪਿਤ੍ਵਾ ਠਿਤਂ. ਊਰੁਟ੍ਠਿ ਕਟਿਟ੍ਠਿਂ ਉਕ੍ਖਿਪਿਤ੍ਵਾ ਠਿਤਂ. ਕਟਿਟ੍ਠਿ ਪਿਟ੍ਠਿਕਣ੍ਟਕਂ ਉਕ੍ਖਿਪਿਤ੍ਵਾ ਠਿਤਂ, ਪਿਟ੍ਠਿਕਣ੍ਟਕੋ ਗੀਵਟ੍ਠਿਂ ਉਕ੍ਖਿਪਿਤ੍ਵਾ ਠਿਤੋ. ਗੀਵਟ੍ਠਿ ਸੀਸਟ੍ਠਿਂ ਉਕ੍ਖਿਪਿਤ੍ਵਾ ਠਿਤਂ. ਸੀਸਟ੍ਠਿ ਗੀਵਟ੍ਠਿਕੇ ਪਤਿਟ੍ਠਿਤਂ. ਗੀਵਟ੍ਠਿ ਪਿਟ੍ਠਿਕਣ੍ਟਕੇ ਪਤਿਟ੍ਠਿਤਂ. ਪਿਟ੍ਠਿਕਣ੍ਟਕੋ ਕਟਿਟ੍ਠਿਮ੍ਹਿ ਪਤਿਟ੍ਠਿਤੋ. ਕਟਿਟ੍ਠਿ ਊਰੁਟ੍ਠਿਕੇ ਪਤਿਟ੍ਠਿਤਂ. ਊਰੁਟ੍ਠਿ ਜਙ੍ਘਟ੍ਠਿਕੇ ਪਤਿਟ੍ਠਿਤਂ. ਜਙ੍ਘਟ੍ਠਿ ਗੋਪ੍ਫਕਟ੍ਠਿਕੇ ਪਤਿਟ੍ਠਿਤਂ. ਗੋਪ੍ਫਕਟ੍ਠਿ ਪਣ੍ਹਿਕਟ੍ਠਿਕੇ ਪਤਿਟ੍ਠਿਤਂ.

ਤਤ੍ਥ ਯਥਾ ਇਟ੍ਠਕਦਾਰੁਗੋਮਯਾਦਿਸਞ੍ਚਯੇਸੁ ਨ ਹੇਟ੍ਠਿਮਾ ਹੇਟ੍ਠਿਮਾ ਜਾਨਨ੍ਤਿ ਮਯਂ ਉਪਰਿਮੇ ਉਪਰਿਮੇ ਉਕ੍ਖਿਪਿਤ੍ਵਾ ਠਿਤਾਤਿ. ਨਪਿ ਉਪਰਿਮਾ ਉਪਰਿਮਾ ਜਾਨਨ੍ਤਿ ਮਯਂ ਹੇਟ੍ਠਿਮੇਸੁ ਹੇਟ੍ਠਿਮੇਸੁ ਪਤਿਟ੍ਠਿਤਾਤਿ, ਏਵਮੇਵ ਨ ਪਣ੍ਹਿਕਟ੍ਠਿ ਜਾਨਾਤਿ ਅਹਂ ਗੋਪ੍ਫਕਟ੍ਠਿਂ ਉਕ੍ਖਿਪਿਤ੍ਵਾ ਠਿਤਨ੍ਤਿ. ਨ ਗੋਪ੍ਫਕਟ੍ਠਿ ਜਾਨਾਤਿ ਅਹਂ ਜਙ੍ਘਟ੍ਠਿਂ ਉਕ੍ਖਿਪਿਤ੍ਵਾ ਠਿਤਨ੍ਤਿ. ਨ ਜਙ੍ਘਟ੍ਠਿ ਜਾਨਾਤਿ ਅਹਂ ਊਰੁਟ੍ਠਿਂ ਉਕ੍ਖਿਪਿਤ੍ਵਾ ਠਿਤਨ੍ਤਿ. ਨ ਊਰੁਟ੍ਠਿ ਜਾਨਾਤਿ ਅਹਂ ਕਟਿਟ੍ਠਿਂ ਉਕ੍ਖਿਪਿਤ੍ਵਾ ਠਿਤਨ੍ਤਿ. ਨ ਕਟਿਟ੍ਠਿ ਜਾਨਾਤਿ ਅਹਂ ਪਿਟ੍ਠਿਕਣ੍ਟਕਂ ਉਕ੍ਖਿਪਿਤ੍ਵਾ ਠਿਤਨ੍ਤਿ. ਨ ਪਿਟ੍ਠਿਕਣ੍ਟਕੋ ਜਾਨਾਤਿ ਅਹਂ ਗੀਵਟ੍ਠਿਂ ਉਕ੍ਖਿਪਿਤ੍ਵਾ ਠਿਤਨ੍ਤਿ. ਨ ਗੀਵਟ੍ਠਿ ਜਾਨਾਤਿ ਅਹਂ ਸੀਸਟ੍ਠਿਂ ਉਕ੍ਖਿਪਿਤ੍ਵਾ ਠਿਤਨ੍ਤਿ. ਨ ਸੀਸਟ੍ਠਿ ਜਾਨਾਤਿ ਅਹਂ ਗੀਵਟ੍ਠਿਮ੍ਹਿ ਪਤਿਟ੍ਠਿਤਨ੍ਤਿ. ਨ ਗੀਵਟ੍ਠਿ ਜਾਨਾਤਿ ਅਹਂ ਪਿਟ੍ਠਿਕਣ੍ਟਕੇ ਪਤਿਟ੍ਠਿਤਨ੍ਤਿ. ਨ ਪਿਟ੍ਠਿਕਣ੍ਟਕੋ ਜਾਨਾਤਿ ਅਹਂ ਕਟਿਟ੍ਠਿਮ੍ਹਿ ਪਤਿਟ੍ਠਿਤੋਤਿ. ਨ ਕਟਿਟ੍ਠਿ ਜਾਨਾਤਿ ਅਹਂ ਊਰੁਟ੍ਠਿਮ੍ਹਿ ਪਤਿਟ੍ਠਿਤਨ੍ਤਿ. ਨ ਊਰੁਟ੍ਠਿ ਜਾਨਾਤਿ ਅਹਂ ਜਙ੍ਘਟ੍ਠਿਮ੍ਹਿ ਪਤਿਟ੍ਠਿਤਨ੍ਤਿ. ਨ ਜਙ੍ਘਟ੍ਠਿ ਜਾਨਾਤਿ ਅਹਂ ਗੋਪ੍ਫਕਟ੍ਠਿਮ੍ਹਿ ਪਤਿਟ੍ਠਿਤਨ੍ਤਿ. ਨ ਗੋਪ੍ਫਕਟ੍ਠਿ ਜਾਨਾਤਿ ਅਹਂ ਪਣ੍ਹਿਕਟ੍ਠਿਮ੍ਹਿ ਪਤਿਟ੍ਠਿਤਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਅਟ੍ਠਿ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

੩੧੯. ਅਟ੍ਠਿਮਿਞ੍ਜਂ ਤੇਸਂ ਤੇਸਂ ਅਟ੍ਠੀਨਂ ਅਬ੍ਭਨ੍ਤਰੇ ਠਿਤਂ. ਤਤ੍ਥ ਯਥਾ ਵੇਲ਼ੁਪਬ੍ਬਾਦੀਨਂ ਅਨ੍ਤੋ ਪਕ੍ਖਿਤ੍ਤਛਿਨ੍ਨਵੇਤ੍ਤਗ੍ਗਾਦੀਸੁ ਨ ਵੇਲ਼ੁਪਬ੍ਬਾਦੀਨਿ ਜਾਨਨ੍ਤਿ ਅਮ੍ਹੇਸੁ ਵੇਤ੍ਤਗ੍ਗਾਦੀਨਿ ਪਕ੍ਖਿਤ੍ਤਾਨੀਤਿ. ਨਪਿ ਵੇਤ੍ਤਗ੍ਗਾਦੀਨਿ ਜਾਨਨ੍ਤਿ ਮਯਂ ਵੇਲ਼ੁਪਬ੍ਬਾਦੀਸੁ ਠਿਤਾਨੀਤਿ, ਏਵਮੇਵ ਨ ਅਟ੍ਠੀਨਿ ਜਾਨਨ੍ਤਿ ਅਮ੍ਹਾਕਂ ਅਨ੍ਤੋ ਮਿਞ੍ਜਂ ਠਿਤਨ੍ਤਿ. ਨਾਪਿ ਮਿਞ੍ਜਂ ਜਾਨਾਤਿ ਅਹਂ ਅਟ੍ਠੀਨਂ ਅਨ੍ਤੋ ਠਿਤਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਅਟ੍ਠਿਮਿਞ੍ਜਂ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

੩੨੦. ਵਕ੍ਕਂ ਗਲਵਾਟਕਤੋ ਨਿਕ੍ਖਨ੍ਤੇਨ ਏਕਮੂਲੇਨ ਥੋਕਂ ਗਨ੍ਤ੍ਵਾ ਦ੍ਵਿਧਾ ਭਿਨ੍ਨੇਨ ਥੂਲਨ੍ਹਾਰੁਨਾ ਵਿਨਿਬਦ੍ਧਂ ਹੁਤ੍ਵਾ ਹਦਯਮਂਸਂ ਪਰਿਕ੍ਖਿਪਿਤ੍ਵਾ ਠਿਤਂ. ਤਤ੍ਥ ਯਥਾ ਵਣ੍ਟੁਪਨਿਬਦ੍ਧੇ ਅਮ੍ਬਫਲਦ੍ਵਯੇ ਨ ਵਣ੍ਟਂ ਜਾਨਾਤਿ ਮਯਾ ਅਮ੍ਬਫਲਦ੍ਵਯਂ ਉਪਨਿਬਦ੍ਧਨ੍ਤਿ. ਨਪਿ ਅਮ੍ਬਫਲਦ੍ਵਯਂ ਜਾਨਾਤਿ ਅਹਂ ਵਣ੍ਟੇਨ ਉਪਨਿਬਦ੍ਧਨ੍ਤਿ, ਏਵਮੇਵ ਨ ਥੂਲਨ੍ਹਾਰੁ ਜਾਨਾਤਿ ਮਯਾ ਵਕ੍ਕਂ ਉਪਨਿਬਦ੍ਧਨ੍ਤਿ. ਨਪਿ ਵਕ੍ਕਂ ਜਾਨਾਤਿ ਅਹਂ ਥੂਲਨ੍ਹਾਰੁਨਾ ਉਪਨਿਬਦ੍ਧਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਵਕ੍ਕਂ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

੩੨੧. ਹਦਯਂ ਸਰੀਰਬ੍ਭਨ੍ਤਰੇ ਉਰਟ੍ਠਿਪਞ੍ਜਰਮਜ੍ਝਂ ਨਿਸ੍ਸਾਯ ਠਿਤਂ. ਤਤ੍ਥ ਯਥਾ ਜਿਣ੍ਣਸਨ੍ਦਮਾਨਿਕਪਞ੍ਜਰਂ ਨਿਸ੍ਸਾਯ ਠਪਿਤਾਯ ਮਂਸਪੇਸਿਯਾ ਨ ਸਨ੍ਦਮਾਨਿਕਪਞ੍ਜਰਬ੍ਭਨ੍ਤਰਂ ਜਾਨਾਤਿ ਮਂ ਨਿਸ੍ਸਾਯ ਮਂਸਪੇਸਿ ਠਿਤਾਤਿ. ਨਪਿ ਮਂਸਪੇਸਿ ਜਾਨਾਤਿ ਅਹਂ ਜਿਣ੍ਣਸਨ੍ਦਮਾਨਿਕਪਞ੍ਜਰਂ ਨਿਸ੍ਸਾਯ ਠਿਤਾਤਿ, ਏਵਮੇਵ ਨ ਉਰਟ੍ਠਿਪਞ੍ਜਰਬ੍ਭਨ੍ਤਰਂ ਜਾਨਾਤਿ ਮਂ ਨਿਸ੍ਸਾਯ ਹਦਯਂ ਠਿਤਨ੍ਤਿ. ਨਪਿ ਹਦਯਂ ਜਾਨਾਤਿ ਅਹਂ ਉਰਟ੍ਠਿਪਞ੍ਜਰਂ ਨਿਸ੍ਸਾਯ ਠਿਤਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਹਦਯਂ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

੩੨੨. ਯਕਨਂ ਅਨ੍ਤੋਸਰੀਰੇ ਦ੍ਵਿਨ੍ਨਂ ਥਨਾਨਮਬ੍ਭਨ੍ਤਰੇ ਦਕ੍ਖਿਣਪਸ੍ਸਂ ਨਿਸ੍ਸਾਯ ਠਿਤਂ. ਤਤ੍ਥ ਯਥਾ ਉਕ੍ਖਲਿਕਪਾਲਪਸ੍ਸਮ੍ਹਿ ਲਗ੍ਗੇ ਯਮਕਮਂਸਪਿਣ੍ਡੇ ਨ ਉਕ੍ਖਲਿਕਪਾਲਪਸ੍ਸਂ ਜਾਨਾਤਿ ਮਯਿ ਯਮਕਮਂਸਪਿਣ੍ਡੋ ਲਗ੍ਗੋਤਿ. ਨਪਿ ਯਮਕਮਂਸਪਿਣ੍ਡੋ ਜਾਨਾਤਿ ਅਹਂ ਉਕ੍ਖਲਿਕਪਾਲਪਸ੍ਸੇ ਲਗ੍ਗੋਤਿ, ਏਵਮੇਵ ਨ ਥਨਾਨਮਬ੍ਭਨ੍ਤਰੇ ਦਕ੍ਖਿਣਪਸ੍ਸਂ ਜਾਨਾਤਿ ਮਂ ਨਿਸ੍ਸਾਯ ਯਕਨਂ ਠਿਤਨ੍ਤਿ. ਨਪਿ ਯਕਨਂ ਜਾਨਾਤਿ ਅਹਂ ਥਨਾਨਮਬ੍ਭਨ੍ਤਰੇ ਦਕ੍ਖਿਣਪਸ੍ਸਂ ਨਿਸ੍ਸਾਯ ਠਿਤਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਯਕਨਂ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

੩੨੩. ਕਿਲੋਮਕੇਸੁ ਪਟਿਚ੍ਛਨ੍ਨਕਿਲੋਮਕਂ ਹਦਯਞ੍ਚ ਵਕ੍ਕਞ੍ਚ ਪਰਿਵਾਰੇਤ੍ਵਾ ਠਿਤਂ. ਅਪ੍ਪਟਿਚ੍ਛਨ੍ਨਕਿਲੋਮਕਂ ਸਕਲਸਰੀਰੇ ਚਮ੍ਮਸ੍ਸ ਹੇਟ੍ਠਤੋ ਮਂਸਂ ਪਰਿਯੋਨਨ੍ਧਿਤ੍ਵਾ ਠਿਤਂ. ਤਤ੍ਥ ਯਥਾ ਪਿਲੋਤਿਕਪਲਿਵੇਠਿਤੇ ਮਂਸੇ ਨ ਮਂਸਂ ਜਾਨਾਤਿ ਅਹਂ ਪਿਲੋਤਿਕਾਯ ਪਲਿਵੇਠਿਤਨ੍ਤਿ. ਨਪਿ ਪਿਲੋਤਿਕਾ ਜਾਨਾਤਿ ਮਯਾ ਮਂਸਂ ਪਲਿਵੇਠਿਤਨ੍ਤਿ, ਏਵਮੇਵ ਨ ਵਕ੍ਕਹਦਯਾਨਿ ਸਕਲਸਰੀਰੇ ਚ ਮਂਸਂ ਜਾਨਾਤਿ ਅਹਂ ਕਿਲੋਮਕੇਨ ਪਟਿਚ੍ਛਨ੍ਨਨ੍ਤਿ. ਨਪਿ ਕਿਲੋਮਕਂ ਜਾਨਾਤਿ ਮਯਾ ਵਕ੍ਕਹਦਯਾਨਿ ਸਕਲਸਰੀਰੇ ਚ ਮਂਸਂ ਪਟਿਚ੍ਛਨ੍ਨਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਕਿਲੋਮਕਂ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

੩੨੪. ਪਿਹਕਂ ਹਦਯਸ੍ਸ ਵਾਮਪਸ੍ਸੇ ਉਦਰਪਟਲਸ੍ਸ ਮਤ੍ਥਕਪਸ੍ਸਂ ਨਿਸ੍ਸਾਯ ਠਿਤਂ. ਤਤ੍ਥ ਯਥਾ ਕੋਟ੍ਠਮਤ੍ਥਕਪਸ੍ਸਂ ਨਿਸ੍ਸਾਯ ਠਿਤਾਯ ਗੋਮਯਪਿਣ੍ਡਿਯਾ ਨ ਕੋਟ੍ਠਮਤ੍ਥਕਪਸ੍ਸਂ ਜਾਨਾਤਿ ਗੋਮਯਪਿਣ੍ਡਿ ਮਂ ਨਿਸ੍ਸਾਯ ਠਿਤਾਤਿ. ਨਪਿ ਗੋਮਯਪਿਣ੍ਡਿ ਜਾਨਾਤਿ ਅਹਂ ਕੋਟ੍ਠਮਤ੍ਥਕਪਸ੍ਸਂ ਨਿਸ੍ਸਾਯ ਠਿਤਾਤਿ, ਏਵਮੇਵ ਨ ਉਦਰਪਟਲਸ੍ਸ ਮਤ੍ਥਕਪਸ੍ਸਂ ਜਾਨਾਤਿ ਪਿਹਕਂ ਮਂ ਨਿਸ੍ਸਾਯ ਠਿਤਨ੍ਤਿ. ਨਪਿ ਪਿਹਕਂ ਜਾਨਾਤਿ ਅਹਂ ਉਦਰਪਟਲਸ੍ਸ ਮਤ੍ਥਕਪਸ੍ਸਂ ਨਿਸ੍ਸਾਯ ਠਿਤਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਪਿਹਕਂ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

੩੨੫. ਪਪ੍ਫਾਸਂ ਸਰੀਰਬ੍ਭਨ੍ਤਰੇ ਦ੍ਵਿਨ੍ਨਂ ਥਨਾਨਮਨ੍ਤਰੇ ਹਦਯਞ੍ਚ ਯਕਨਞ੍ਚ ਉਪਰਿ ਛਾਦੇਤ੍ਵਾ ਓਲਮ੍ਬਨ੍ਤਂ ਠਿਤਂ. ਤਤ੍ਥ ਯਥਾ ਜਿਣ੍ਣਕੋਟ੍ਠਬ੍ਭਨ੍ਤਰੇ ਲਮ੍ਬਮਾਨੇ ਸਕੁਣਕੁਲਾਵਕੇ ਨ ਜਿਣ੍ਣਕੋਟ੍ਠਬ੍ਭਨ੍ਤਰਂ ਜਾਨਾਤਿ ਮਯਿ ਸਕੁਣਕੁਲਾਵਕੋ ਲਮ੍ਬਮਾਨੋ ਠਿਤੋਤਿ. ਨਪਿ ਸਕੁਣਕੁਲਾਵਕੋ ਜਾਨਾਤਿ ਅਹਂ ਜਿਣ੍ਣਕੋਟ੍ਠਬ੍ਭਨ੍ਤਰੇ ਲਮ੍ਬਮਾਨੋ ਠਿਤੋਤਿ, ਏਵਮੇਵ ਨ ਤਂ ਸਰੀਰਬ੍ਭਨ੍ਤਰਂ ਜਾਨਾਤਿ ਮਯਿ ਪਪ੍ਫਾਸਂ ਲਮ੍ਬਮਾਨਂ ਠਿਤਨ੍ਤਿ. ਨਪਿ ਪਪ੍ਫਾਸਂ ਜਾਨਾਤਿ ਅਹਂ ਏਵਰੂਪੇ ਸਰੀਰਬ੍ਭਨ੍ਤਰੇ ਲਮ੍ਬਮਾਨਂ ਠਿਤਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਪਪ੍ਫਾਸਂ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

੩੨੬. ਅਨ੍ਤਂ ਗਲਵਾਟਕਕਰੀਸਮਗ੍ਗਪਰਿਯਨ੍ਤੇ ਸਰੀਰਬ੍ਭਨ੍ਤਰੇ ਠਿਤਂ. ਤਤ੍ਥ ਯਥਾ ਲੋਹਿਤਦੋਣਿਕਾਯ ਓਭੁਜਿਤ੍ਵਾ ਠਪਿਤੇ ਛਿਨ੍ਨਸੀਸਧਮ੍ਮਨਿਕਲ਼ੇਵਰੇ ਨ ਲੋਹਿਤਦੋਣਿ ਜਾਨਾਤਿ ਮਯਿ ਧਮ੍ਮਨਿਕਲ਼ੇਵਰਂ ਠਿਤਨ੍ਤਿ. ਨਪਿ ਧਮ੍ਮਨਿਕਲ਼ੇਵਰਂ ਜਾਨਾਤਿ ਅਹਂ ਲੋਹਿਤਦੋਣਿਯਾ ਠਿਤਨ੍ਤਿ, ਏਵਮੇਵ ਨ ਸਰੀਰਬ੍ਭਨ੍ਤਰਂ ਜਾਨਾਤਿ ਮਯਿ ਅਨ੍ਤਂ ਠਿਤਨ੍ਤਿ. ਨਪਿ ਅਨ੍ਤਂ ਜਾਨਾਤਿ ਅਹਂ ਸਰੀਰਬ੍ਭਨ੍ਤਰੇ ਠਿਤਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਅਨ੍ਤਂ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

੩੨੭. ਅਨ੍ਤਗੁਣਂ ਅਨ੍ਤਨ੍ਤਰੇ ਏਕਵੀਸਤਿਅਨ੍ਤਭੋਗੇ ਬਨ੍ਧਿਤ੍ਵਾ ਠਿਤਂ. ਤਤ੍ਥ ਯਥਾ ਪਾਦਪੁਞ੍ਛਨਰਜ੍ਜੁਮਣ੍ਡਲਕਂ ਸਿਬ੍ਬੇਤ੍ਵਾ ਠਿਤੇਸੁ ਰਜ੍ਜੁਕੇਸੁ ਨ ਪਾਦਪੁਞ੍ਛਨਰਜ੍ਜੁਮਣ੍ਡਲਕਂ ਜਾਨਾਤਿ ਰਜ੍ਜੁਕਾ ਮਂ ਸਿਬ੍ਬਿਤ੍ਵਾ ਠਿਤਾਤਿ. ਨਪਿ ਰਜ੍ਜੁਕਾ ਜਾਨਨ੍ਤਿ ਮਯਂ ਪਾਦਪੁਞ੍ਛਨਰਜ੍ਜੁਮਣ੍ਡਲਕਂ ਸਿਬ੍ਬਿਤ੍ਵਾ ਠਿਤਾਤਿ, ਏਵਮੇਵ ਨ ਅਨ੍ਤਂ ਜਾਨਾਤਿ ਅਨ੍ਤਗੁਣਂ ਮਂ ਆਬਨ੍ਧਿਤ੍ਵਾ ਠਿਤਨ੍ਤਿ. ਨਪਿ ਅਨ੍ਤਗੁਣਂ ਜਾਨਾਤਿ ਅਹਂ ਅਨ੍ਤਂ ਆਬਨ੍ਧਿਤ੍ਵਾ ਠਿਤਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਅਨ੍ਤਗੁਣਂ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

੩੨੮. ਉਦਰਿਯਂ ਉਦਰੇ ਠਿਤਂ ਅਸਿਤਪੀਤਖਾਯਿਤਸਾਯਿਤਂ. ਤਤ੍ਥ ਯਥਾ ਸੁਵਾਨਦੋਣਿਯਂ ਠਿਤੇ ਸੁਵਾਨਵਮਥੁਮ੍ਹਿ ਨ ਸੁਵਾਨਦੋਣਿ ਜਾਨਾਤਿ ਮਯਿ ਸੁਵਾਨਵਮਥੁ ਠਿਤੋਤਿ. ਨਪਿ ਸੁਵਾਨਵਮਥੁ ਜਾਨਾਤਿ ਅਹਂ ਸੁਵਾਨਦੋਣਿਯਂ ਠਿਤੋਤਿ, ਏਵਮੇਵ ਨ ਉਦਰਂ ਜਾਨਾਤਿ ਮਯਿ ਉਦਰਿਯਂ ਠਿਤਨ੍ਤਿ. ਨਪਿ ਉਦਰਿਯਂ ਜਾਨਾਤਿ ਅਹਂ ਉਦਰੇ ਠਿਤਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਉਦਰਿਯਂ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

੩੨੯. ਕਰੀਸਂ ਪਕ੍ਕਾਸਯਸਙ੍ਖਾਤੇ ਅਟ੍ਠਙ੍ਗੁਲਵੇਲ਼ੁਪਬ੍ਬਸਦਿਸੇ ਅਨ੍ਤਪਰਿਯੋਸਾਨੇ ਠਿਤਂ. ਤਤ੍ਥ ਯਥਾ ਵੇਲ਼ੁਪਬ੍ਬੇ ਓਮਦ੍ਦਿਤ੍ਵਾ ਪਕ੍ਖਿਤ੍ਤਾਯ ਸਣ੍ਹਪਣ੍ਡੁਮਤ੍ਤਿਕਾਯ ਨ ਵੇਲ਼ੁਪਬ੍ਬਂ ਜਾਨਾਤਿ ਮਯਿ ਪਣ੍ਡੁਮਤ੍ਤਿਕਾ ਠਿਤਾਤਿ. ਨਪਿ ਪਣ੍ਡੁਮਤ੍ਤਿਕਾ ਜਾਨਾਤਿ ਅਹਂ ਵੇਲ਼ੁਪਬ੍ਬੇ ਠਿਤਾਤਿ, ਏਵਮੇਵ ਨ ਪਕ੍ਕਾਸਯੋ ਜਾਨਾਤਿ ਮਯਿ ਕਰੀਸਂ ਠਿਤਨ੍ਤਿ. ਨਪਿ ਕਰੀਸਂ ਜਾਨਾਤਿ ਅਹਂ ਪਕ੍ਕਾਸਯੇ ਠਿਤਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਕਰੀਸਂ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

੩੩੦. ਮਤ੍ਥਲੁਙ੍ਗਂ ਸੀਸਕਟਾਹਬ੍ਭਨ੍ਤਰੇ ਠਿਤਂ. ਤਤ੍ਥ ਯਥਾ ਪੁਰਾਣਲਾਬੁਕਟਾਹੇ ਪਕ੍ਖਿਤ੍ਤਾਯ ਪਿਟ੍ਠਪਿਣ੍ਡਿਯਾ ਨ ਲਾਬੁਕਟਾਹਂ ਜਾਨਾਤਿ ਮਯਿ ਪਿਟ੍ਠਪਿਣ੍ਡਿ ਠਿਤਾਤਿ. ਨਪਿ ਪਿਟ੍ਠਪਿਣ੍ਡਿ ਜਾਨਾਤਿ ਅਹਂ ਲਾਬੁਕਟਾਹੇ ਠਿਤਾਤਿ, ਏਵਮੇਵ ਨ ਸੀਸਕਟਾਹਬ੍ਭਨ੍ਤਰਂ ਜਾਨਾਤਿ ਮਯਿ ਮਤ੍ਥਲੁਙ੍ਗਂ ਠਿਤਨ੍ਤਿ. ਨਪਿ ਮਤ੍ਥਲੁਙ੍ਗਂ ਜਾਨਾਤਿ ਅਹਂ ਸੀਸਕਟਾਹਬ੍ਭਨ੍ਤਰੇ ਠਿਤਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਮਤ੍ਥਲੁਙ੍ਗਂ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਥਦ੍ਧੋ ਪਥਵੀਧਾਤੂਤਿ.

੩੩੧. ਪਿਤ੍ਤੇਸੁ ਅਬਦ੍ਧਪਿਤ੍ਤਂ ਜੀਵਿਤਿਨ੍ਦ੍ਰਿਯਪਟਿਬਦ੍ਧਂ ਸਕਲਸਰੀਰਂ ਬ੍ਯਾਪੇਤ੍ਵਾ ਠਿਤਂ. ਬਦ੍ਧਪਿਤ੍ਤਂ ਪਿਤ੍ਤਕੋਸਕੇ ਠਿਤਂ. ਤਤ੍ਥ ਯਥਾ ਪੂਵਂ ਬ੍ਯਾਪੇਤ੍ਵਾ ਠਿਤੇ ਤੇਲੇ ਨ ਪੂਵਂ ਜਾਨਾਤਿ ਤੇਲਂ ਮਂ ਬ੍ਯਾਪੇਤ੍ਵਾ ਠਿਤਨ੍ਤਿ. ਨਪਿ ਤੇਲਂ ਜਾਨਾਤਿ ਅਹਂ ਪੂਵਂ ਬ੍ਯਾਪੇਤ੍ਵਾ ਠਿਤਨ੍ਤਿ, ਏਵਮੇਵ ਨ ਸਰੀਰਂ ਜਾਨਾਤਿ ਅਬਦ੍ਧਪਿਤ੍ਤਂ ਮਂ ਬ੍ਯਾਪੇਤ੍ਵਾ ਠਿਤਨ੍ਤਿ. ਨਪਿ ਅਬਦ੍ਧਪਿਤ੍ਤਂ ਜਾਨਾਤਿ ਅਹਂ ਸਰੀਰਂ ਬ੍ਯਾਪੇਤ੍ਵਾ ਠਿਤਨ੍ਤਿ. ਯਥਾ ਵਸ੍ਸੋਦਕੇਨ ਪੁਣ੍ਣੇ ਕੋਸਾਤਕਿਕੋਸਕੇ ਨ ਕੋਸਾਤਕਿਕੋਸਕੋ ਜਾਨਾਤਿ ਮਯਿ ਵਸ੍ਸੋਦਕਂ ਠਿਤਨ੍ਤਿ. ਨਪਿ ਵਸ੍ਸੋਦਕਂ ਜਾਨਾਤਿ ਅਹਂ ਕੋਸਾਤਕਿਕੋਸਕੇ ਠਿਤਨ੍ਤਿ, ਏਵਮੇਵ ਨ ਪਿਤ੍ਤਕੋਸਕੋ ਜਾਨਾਤਿ ਮਯਿ ਬਦ੍ਧਪਿਤ੍ਤਂ ਠਿਤਨ੍ਤਿ. ਨਪਿ ਬਦ੍ਧਪਿਤ੍ਤਂ ਜਾਨਾਤਿ ਅਹਂ ਪਿਤ੍ਤਕੋਸਕੇ ਠਿਤਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਪਿਤ੍ਤਂ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਯੂਸਭੂਤੋ ਆਬਨ੍ਧਨਾਕਾਰੋ ਆਪੋਧਾਤੂਤਿ.

੩੩੨. ਸੇਮ੍ਹਂ ਏਕਪਤ੍ਥਪੂਰਪ੍ਪਮਾਣਂ ਉਦਰਪਟਲੇ ਠਿਤਂ. ਤਤ੍ਥ ਯਥਾ ਉਪਰਿ ਸਞ੍ਜਾਤਫੇਣਪਟਲਾਯ ਚਨ੍ਦਨਿਕਾਯ ਨ ਚਨ੍ਦਨਿਕਾ ਜਾਨਾਤਿ ਮਯਿ ਫੇਣਪਟਲਂ ਠਿਤਨ੍ਤਿ. ਨਪਿ ਫੇਣਪਟਲਂ ਜਾਨਾਤਿ ਅਹਂ ਚਨ੍ਦਨਿਕਾਯ ਠਿਤਨ੍ਤਿ, ਏਵਮੇਵ ਨ ਉਦਰਪਟਲਂ ਜਾਨਾਤਿ ਮਯਿ ਸੇਮ੍ਹਂ ਠਿਤਨ੍ਤਿ. ਨਪਿ ਸੇਮ੍ਹਂ ਜਾਨਾਤਿ ਅਹਂ ਉਦਰਪਟਲੇ ਠਿਤਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਸੇਮ੍ਹਂ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਯੂਸਭੂਤੋ ਆਬਨ੍ਧਨਾਕਾਰੋ ਆਪੋਧਾਤੂਤਿ.

੩੩੩. ਪੁਬ੍ਬੋ ਅਨਿਬਦ੍ਧੋਕਾਸੋ ਯਤ੍ਥ ਯਤ੍ਥੇਵ ਖਾਣੁਕਣ੍ਟਕਪ੍ਪਹਰਣਅਗ੍ਗਿਜਾਲਾਦੀਹਿ ਅਭਿਹਤੇ ਸਰੀਰਪ੍ਪਦੇਸੇ ਲੋਹਿਤਂ ਸਣ੍ਠਹਿਤ੍ਵਾ ਪਚ੍ਚਤਿ, ਗਣ੍ਡਪੀਲ਼ਕਾਦਯੋ ਵਾ ਉਪ੍ਪਜ੍ਜਨ੍ਤਿ, ਤਤ੍ਥ ਤਤ੍ਥ ਤਿਟ੍ਠਤਿ. ਤਤ੍ਥ ਯਥਾ ਫਰਸੁਪ੍ਪਹਾਰਾਦਿਵਸੇਨ ਪਗ੍ਘਰਿਤਨਿਯ੍ਯਾਸੇ ਰੁਕ੍ਖੇ ਨ ਰੁਕ੍ਖਸ੍ਸ ਪਹਾਰਾਦਿਪ੍ਪਦੇਸਾ ਜਾਨਨ੍ਤਿ ਅਮ੍ਹੇਸੁ ਨਿਯ੍ਯਾਸੋ ਠਿਤੋਤਿ, ਨਪਿ ਨਿਯ੍ਯਾਸੋ ਜਾਨਾਤਿ ਅਹਂ ਰੁਕ੍ਖਸ੍ਸ ਪਹਾਰਾਦਿਪ੍ਪਦੇਸੇਸੁ ਠਿਤੋਤਿ, ਏਵਮੇਵ ਨ ਸਰੀਰਸ੍ਸ ਖਾਣੁਕਣ੍ਟਕਾਦੀਹਿ ਅਭਿਹਤਪ੍ਪਦੇਸਾ ਜਾਨਨ੍ਤਿ ਅਮ੍ਹੇਸੁ ਪੁਬ੍ਬੋ ਠਿਤੋਤਿ. ਨਪਿ ਪੁਬ੍ਬੋ ਜਾਨਾਤਿ ਅਹਂ ਤੇਸੁ ਪਦੇਸੇਸੁ ਠਿਤੋਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਪੁਬ੍ਬੋ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਯੂਸਭੂਤੋ ਆਬਨ੍ਧਨਾਕਾਰੋ ਆਪੋਧਾਤੂਤਿ.

੩੩੪. ਲੋਹਿਤੇਸੁ ਸਂਸਰਣਲੋਹਿਤਂ ਪਿਤ੍ਤਂ ਵਿਯ ਸਕਲਸਰੀਰਂ ਬ੍ਯਾਪੇਤ੍ਵਾ ਠਿਤਂ. ਸਨ੍ਨਿਚਿਤਲੋਹਿਤਂ ਯਕਨਟ੍ਠਾਨਸ੍ਸ ਹੇਟ੍ਠਾਭਾਗਂ ਪੂਰੇਤ੍ਵਾ ਏਕਪਤ੍ਥਪੂਰਮਤ੍ਤਂ ਵਕ੍ਕਹਦਯਯਕਨਪਪ੍ਫਾਸਾਨਿ ਤੇਮੇਨ੍ਤਂ ਠਿਤਂ. ਤਤ੍ਥ ਸਂਸਰਣਲੋਹਿਤੇ ਅਬਦ੍ਧਪਿਤ੍ਤਸਦਿਸੋਵ ਵਿਨਿਚ੍ਛਯੋ. ਇਤਰਂ ਪਨ ਯਥਾ ਜਜ੍ਜਰਕਪਾਲੇ ਓਵਟ੍ਠੇ ਉਦਕੇ ਹੇਟ੍ਠਾ ਲੇਡ੍ਡੁਖਣ੍ਡਾਦੀਨਿ ਤੇਮਯਮਾਨੇ ਨ ਲੇਡ੍ਡੁਖਣ੍ਡਾਦੀਨਿ ਜਾਨਨ੍ਤਿ ਮਯਂ ਉਦਕੇਨ ਤੇਮਿਯਮਾਨਾਤਿ. ਨਪਿ ਉਦਕਂ ਜਾਨਾਤਿ ਅਹਂ ਲੇਡ੍ਡੁਖਣ੍ਡਾਦੀਨਿ ਤੇਮੇਮੀਤਿ, ਏਵਮੇਵ ਨ ਯਕਨਸ੍ਸ ਹੇਟ੍ਠਾਭਾਗਟ੍ਠਾਨਂ ਵਕ੍ਕਾਦੀਨਿ ਵਾ ਜਾਨਨ੍ਤਿ ਮਯਿ ਲੋਹਿਤਂ ਠਿਤਂ ਅਮ੍ਹੇ ਵਾ ਤੇਮਯਮਾਨਂ ਠਿਤਨ੍ਤਿ. ਨਪਿ ਲੋਹਿਤਂ ਜਾਨਾਤਿ ਅਹਂ ਯਕਨਸ੍ਸ ਹੇਟ੍ਠਾਭਾਗਂ ਪੂਰੇਤ੍ਵਾ ਵਕ੍ਕਾਦੀਨਿ ਤੇਮਯਮਾਨਂ ਠਿਤਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਲੋਹਿਤਂ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਯੂਸਭੂਤੋ ਆਬਨ੍ਧਨਾਕਾਰੋ ਆਪੋਧਾਤੂਤਿ.

੩੩੫. ਸੇਦੋ ਅਗ੍ਗਿਸਨ੍ਤਾਪਾਦਿਕਾਲੇਸੁ ਕੇਸਲੋਮਕੂਪਵਿਵਰਾਨਿ ਪੂਰੇਤ੍ਵਾ ਤਿਟ੍ਠਤਿ ਚੇਵ ਪਗ੍ਘਰਤਿ ਚ. ਤਤ੍ਥ ਯਥਾ ਉਦਕਾ ਅਬ੍ਬੂਲ਼੍ਹਮਤ੍ਤੇਸੁ ਭਿਸਮੁਲ਼ਾਲਕੁਮੁਦਨਾਲ਼ਕਲਾਪੇਸੁ ਨ ਭਿਸਾਦਿਕਲਾਪਵਿਵਰਾਨਿ ਜਾਨਨ੍ਤਿ ਅਮ੍ਹੇਹਿ ਉਦਕਂ ਪਗ੍ਘਰਤੀਤਿ. ਨਪਿ ਭਿਸਾਦਿਕਲਾਪਵਿਵਰੇਹਿ ਪਗ੍ਘਰਨ੍ਤਂ ਉਦਕਂ ਜਾਨਾਤਿ ਅਹਂ ਭਿਸਾਦਿਕਲਾਪਵਿਵਰੇਹਿ ਪਗ੍ਘਰਾਮੀਤਿ, ਏਵਮੇਵ ਨ ਕੇਸਲੋਮਕੂਪਵਿਵਰਾਨਿ ਜਾਨਨ੍ਤਿ ਅਮ੍ਹੇਹਿ ਸੇਦੋ ਪਗ੍ਘਰਤੀਤਿ. ਨਪਿ ਸੇਦੋ ਜਾਨਾਤਿ ਅਹਂ ਕੇਸਲੋਮਕੂਪਵਿਵਰੇਹਿ ਪਗ੍ਘਰਾਮੀਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਸੇਦੋ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਯੂਸਭੂਤੋ ਆਬਨ੍ਧਨਾਕਾਰੋ ਆਪੋਧਾਤੂਤਿ.

੩੩੬. ਮੇਦੋ ਥੂਲਸ੍ਸ ਸਕਲਸਰੀਰਂ ਫਰਿਤ੍ਵਾ ਕਿਸਸ੍ਸ ਜਙ੍ਘਮਂਸਾਦੀਨਿ ਨਿਸ੍ਸਾਯ ਠਿਤੋ ਪਤ੍ਥਿਨ੍ਨਸਿਨੇਹੋ. ਤਤ੍ਥ ਯਥਾ ਹਲਿਦ੍ਦਿਪਿਲੋਤਿਕਪਟਿਚ੍ਛਨ੍ਨੇ ਮਂਸਪੁਞ੍ਜੇ ਨ ਮਂਸਪੁਞ੍ਜੋ ਜਾਨਾਤਿ ਮਂ ਨਿਸ੍ਸਾਯ ਹਲਿਦ੍ਦਿਪਿਲੋਤਿਕਾ ਠਿਤਾਤਿ. ਨਪਿ ਹਲਿਦ੍ਦਿਪਿਲੋਤਿਕਾ ਜਾਨਾਤਿ ਅਹਂ ਮਂਸਪੁਞ੍ਜਂ ਨਿਸ੍ਸਾਯ ਠਿਤਾਤਿ, ਏਵਮੇਵ ਨ ਸਕਲਸਰੀਰੇ ਜਙ੍ਘਾਦੀਸੁ ਵਾ ਮਂਸਂ ਜਾਨਾਤਿ ਮਂ ਨਿਸ੍ਸਾਯ ਮੇਦੋ ਠਿਤੋਤਿ. ਨਪਿ ਮੇਦੋ ਜਾਨਾਤਿ ਅਹਂ ਸਕਲਸਰੀਰੇ ਜਙ੍ਘਾਦੀਸੁ ਵਾ ਮਂਸਂ ਨਿਸ੍ਸਾਯ ਠਿਤੋਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਮੇਦੋ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਪਤ੍ਥਿਨ੍ਨਯੂਸੋ ਆਬਨ੍ਧਨਾਕਾਰੋ ਆਪੋਧਾਤੂਤਿ.

੩੩੭. ਅਸ੍ਸੁ ਯਦਾ ਸਞ੍ਜਾਯਤਿ ਤਦਾ ਅਕ੍ਖਿਕੂਪਕੇ ਪੂਰੇਤ੍ਵਾ ਤਿਟ੍ਠਤਿ ਵਾ ਪਗ੍ਘਰਤਿ ਵਾ. ਤਤ੍ਥ ਯਥਾ ਉਦਕਪੁਣ੍ਣੇਸੁ ਤਰੁਣਤਾਲਟ੍ਠਿਕੂਪਕੇਸੁ ਨ ਤਰੁਣਤਾਲਟ੍ਠਿਕੂਪਕਾ ਜਾਨਨ੍ਤਿ ਅਮ੍ਹੇਸੁ ਉਦਕਂ ਠਿਤਨ੍ਤਿ. ਨਪਿ ਤਰੁਣਤਾਲਟ੍ਠਿਕੂਪਕੇਸੁ ਉਦਕਂ ਜਾਨਾਤਿ ਅਹਂ ਤਰੁਣਤਾਲਟ੍ਠਿਕੂਪਕੇਸੁ ਠਿਤਨ੍ਤਿ, ਏਵਮੇਵ ਨ ਅਕ੍ਖਿਕੂਪਕਾ ਜਾਨਨ੍ਤਿ ਅਮ੍ਹੇਸੁ ਅਸ੍ਸੁ ਠਿਤਨ੍ਤਿ. ਨਪਿ ਅਸ੍ਸੁ ਜਾਨਾਤਿ ਅਹਂ ਅਕ੍ਖਿਕੂਪਕੇਸੁ ਠਿਤਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਅਸ੍ਸੁ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਯੂਸਭੂਤੋ ਆਬਨ੍ਧਨਾਕਾਰੋ ਆਪੋਧਾਤੂਤਿ.

੩੩੮. ਵਸਾ ਅਗ੍ਗਿਸਨ੍ਤਾਪਾਦਿਕਾਲੇ ਹਤ੍ਥਤਲਹਤ੍ਥਪਿਟ੍ਠਿਪਾਦਤਲਪਾਦਪਿਟ੍ਠਿ ਨਾਸਾਪੁਟਨਲਾਟਅਂਸਕੂਟੇਸੁ ਠਿਤਵਿਲੀਨਸ੍ਨੇਹੋ. ਤਤ੍ਥ ਯਥਾ ਪਕ੍ਖਿਤ੍ਤਤੇਲੇ ਆਚਾਮੇ ਨ ਆਚਾਮੋ ਜਾਨਾਤਿ ਮਂ ਤੇਲਂ ਅਜ੍ਝੋਤ੍ਥਰਿਤ੍ਵਾ ਠਿਤਨ੍ਤਿ. ਨਪਿ ਤੇਲਂ ਜਾਨਾਤਿ ਅਹਂ ਆਚਾਮਂ ਅਜ੍ਝੋਤ੍ਥਰਿਤ੍ਵਾ ਠਿਤਨ੍ਤਿ, ਏਵਮੇਵ ਨ ਹਤ੍ਥਤਲਾਦਿਪ੍ਪਦੇਸੋ ਜਾਨਾਤਿ ਮਂ ਵਸਾ ਅਜ੍ਝੋਤ੍ਥਰਿਤ੍ਵਾ ਠਿਤਾਤਿ. ਨਪਿ ਵਸਾ ਜਾਨਾਤਿ ਅਹਂ ਹਤ੍ਥਤਲਾਦਿਪ੍ਪਦੇਸਂ ਅਜ੍ਝੋਤ੍ਥਰਿਤ੍ਵਾ ਠਿਤਾਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਵਸਾ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਯੂਸਭੂਤੋ ਆਬਨ੍ਧਨਾਕਾਰੋ ਆਪੋਧਾਤੂਤਿ.

੩੩੯. ਖੇਲ਼ੋ ਤਥਾਰੂਪੇ ਖੇਲ਼ੁਪ੍ਪਤ੍ਤਿਪਚ੍ਚਯੇ ਸਤਿ ਉਭੋਹਿ ਕਪੋਲਪਸ੍ਸੇਹਿ ਓਰੋਹਿਤ੍ਵਾ ਜਿਵ੍ਹਾਤਲੇ ਤਿਟ੍ਠਤਿ. ਤਤ੍ਥ ਯਥਾ ਅਬ੍ਬੋਚ੍ਛਿਨ੍ਨਉਦਕਨਿਸ੍ਸਨ੍ਦੇ ਨਦੀਤੀਰਕੂਪਕੇ ਨ ਕੂਪਤਲਂ ਜਾਨਾਤਿ ਮਯਿ ਉਦਕਂ ਸਨ੍ਤਿਟ੍ਠਤੀਤਿ. ਨਪਿ ਉਦਕਂ ਜਾਨਾਤਿ ਅਹਂ ਕੂਪਤਲੇ ਸਨ੍ਤਿਟ੍ਠਾਮੀਤਿ, ਏਵਮੇਵ ਨ ਜਿਵ੍ਹਾਤਲਂ ਜਾਨਾਤਿ ਮਯਿ ਉਭੋਹਿ ਕਪੋਲਪਸ੍ਸੇਹਿ ਓਰੋਹਿਤ੍ਵਾ ਖੇਲ਼ੋ ਠਿਤੋਤਿ. ਨਪਿ ਖੇਲ਼ੋ ਜਾਨਾਤਿ ਅਹਂ ਉਭੋਹਿ ਕਪੋਲਪਸ੍ਸੇਹਿ ਓਰੋਹਿਤ੍ਵਾ ਜਿਵ੍ਹਾਤਲੇ ਠਿਤੋਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਖੇਲ਼ੋ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਯੂਸਭੂਤੋ ਆਬਨ੍ਧਨਾਕਾਰੋ ਆਪੋਧਾਤੂਤਿ.

੩੪੦. ਸਿਙ੍ਘਾਣਿਕਾ ਯਦਾ ਸਞ੍ਜਾਯਤਿ, ਤਦਾ ਨਾਸਾਪੁਟੇ ਪੂਰੇਤ੍ਵਾ ਤਿਟ੍ਠਤਿ ਵਾ ਪਗ੍ਘਰਤਿ ਵਾ. ਤਤ੍ਥ ਯਥਾ ਪੂਤਿਦਧਿਭਰਿਤਾਯ ਸਿਪ੍ਪਿਕਾਯ ਨ ਸਿਪ੍ਪਿਕਾ ਜਾਨਾਤਿ ਮਯਿ ਪੂਤਿਦਧਿ ਠਿਤਨ੍ਤਿ. ਨਪਿ ਪੂਤਿਦਧਿ ਜਾਨਾਤਿ ਅਹਂ ਸਿਪ੍ਪਿਕਾਯ ਠਿਤਨ੍ਤਿ, ਏਵਮੇਵ ਨ ਨਾਸਾਪੁਟਾ ਜਾਨਨ੍ਤਿ ਅਮ੍ਹੇਸੁ ਸਿਙ੍ਘਾਣਿਕਾ ਠਿਤਾਤਿ. ਨਪਿ ਸਿਙ੍ਘਾਣਿਕਾ ਜਾਨਾਤਿ ਅਹਂ ਨਾਸਾਪੁਟੇਸੁ ਠਿਤਾਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਸਿਙ੍ਘਾਣਿਕਾ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਯੂਸਭੂਤੋ ਆਬਨ੍ਧਨਾਕਾਰੋ ਆਪੋਧਾਤੂਤਿ.

੩੪੧. ਲਸਿਕਾ ਅਟ੍ਠਿਕਸਨ੍ਧੀਨਂ ਅਬ੍ਭਞ੍ਜਨਕਿਚ੍ਚਂ ਸਾਧਯਮਾਨਾ ਅਸੀਤਿਸਤਸਨ੍ਧੀਸੁ ਠਿਤਾ. ਤਤ੍ਥ ਯਥਾ ਤੇਲਬ੍ਭਞ੍ਜਿਤੇ ਅਕ੍ਖੇ ਨ ਅਕ੍ਖੋ ਜਾਨਾਤਿ ਮਂ ਤੇਲਂ ਅਬ੍ਭਞ੍ਜਿਤ੍ਵਾ ਠਿਤਨ੍ਤਿ. ਨਪਿ ਤੇਲਂ ਜਾਨਾਤਿ ਅਹਂ ਅਕ੍ਖਂ ਅਬ੍ਭਞ੍ਜਿਤ੍ਵਾ ਠਿਤਨ੍ਤਿ, ਏਵਮੇਵ ਨ ਅਸੀਤਿਸਤਸਨ੍ਧਯੋ ਜਾਨਨ੍ਤਿ ਲਸਿਕਾ ਅਮ੍ਹੇ ਅਬ੍ਭਞ੍ਜਿਤ੍ਵਾ ਠਿਤਾਤਿ. ਨਪਿ ਲਸਿਕਾ ਜਾਨਾਤਿ ਅਹਂ ਅਸੀਤਿਸਤਸਨ੍ਧਯੋ ਅਬ੍ਭਞ੍ਜਿਤ੍ਵਾ ਠਿਤਾਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਲਸਿਕਾ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਯੂਸਭੂਤੋ ਆਬਨ੍ਧਨਾਕਾਰੋ ਆਪੋਧਾਤੂਤਿ.

੩੪੨. ਮੁਤ੍ਤਂ ਵਤ੍ਥਿਸ੍ਸ ਅਬ੍ਭਨ੍ਤਰੇ ਠਿਤਂ. ਤਤ੍ਥ ਯਥਾ ਚਨ੍ਦਨਿਕਾਯ ਪਕ੍ਖਿਤ੍ਤੇ ਅਮੁਖੇ ਰਵਣਘਟੇ ਨ ਰਵਣਘਟੋ ਜਾਨਾਤਿ ਮਯਿ ਚਨ੍ਦਨਿਕਾਰਸੋ ਠਿਤੋਤਿ. ਨਪਿ ਚਨ੍ਦਨਿਕਾਰਸੋ ਜਾਨਾਤਿ ਅਹਂ ਰਵਣਘਟੇ ਠਿਤੋਤਿ, ਏਵਮੇਵ ਨ ਵਤ੍ਥਿ ਜਾਨਾਤਿ ਮਯਿ ਮੁਤ੍ਤਂ ਠਿਤਨ੍ਤਿ. ਨਪਿ ਮੁਤ੍ਤਂ ਜਾਨਾਤਿ ਅਹਂ ਵਤ੍ਥਿਮ੍ਹਿ ਠਿਤਨ੍ਤਿ. ਅਞ੍ਞਮਞ੍ਞਂ ਆਭੋਗਪਚ੍ਚਵੇਕ੍ਖਣਰਹਿਤਾ ਏਤੇ ਧਮ੍ਮਾ. ਇਤਿ ਮੁਤ੍ਤਂ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਯੂਸਭੂਤੋ ਆਬਨ੍ਧਨਾਕਾਰੋ ਆਪੋਧਾਤੂਤਿ.

੩੪੩. ਏਵਂ ਕੇਸਾਦੀਸੁ ਮਨਸਿਕਾਰਂ ਪਵਤ੍ਤੇਤ੍ਵਾ ਯੇਨ ਸਨ੍ਤਪ੍ਪਤਿ, ਅਯਂ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਪਰਿਪਾਚਨਾਕਾਰੋ ਤੇਜੋਧਾਤੂਤਿ, ਯੇਨ ਜੀਰੀਯਤਿ, ਯੇਨ ਪਰਿਡਯ੍ਹਤਿ, ਯੇਨ ਅਸਿਤਪੀਤਖਾਯਿਤਸਾਯਿਤਂ ਸਮ੍ਮਾ ਪਰਿਣਾਮਂ ਗਚ੍ਛਤਿ, ਅਯਂ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਪਰਿਪਾਚਨਾਕਾਰੋ ਤੇਜੋਧਾਤੂਤਿ ਏਵਂ ਤੇਜੋਕੋਟ੍ਠਾਸੇਸੁ ਮਨਸਿਕਾਰੋ ਪਵਤ੍ਤੇਤਬ੍ਬੋ.

੩੪੪. ਤਤੋ ਉਦ੍ਧਙ੍ਗਮੇ ਵਾਤੇ ਉਦ੍ਧਙ੍ਗਮਵਸੇਨ ਪਰਿਗ੍ਗਹੇਤ੍ਵਾ ਅਧੋਗਮੇ ਅਧੋਗਮਵਸੇਨ, ਕੁਚ੍ਛਿਸਯੇ ਕੁਚ੍ਛਿਸਯਵਸੇਨ, ਕੋਟ੍ਠਾਸਯੇ ਕੋਟ੍ਠਾਸਯਵਸੇਨ, ਅਙ੍ਗਮਙ੍ਗਾਨੁਸਾਰਿਮ੍ਹਿ ਅਙ੍ਗਮਙ੍ਗਾਨੁਸਾਰਿਵਸੇਨ, ਅਸ੍ਸਾਸਪਸ੍ਸਾਸੇ ਅਸ੍ਸਾਸਪਸ੍ਸਾਸਵਸੇਨ ਪਰਿਗ੍ਗਹੇਤ੍ਵਾ ਉਦ੍ਧਙ੍ਗਮਾ ਵਾਤਾ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਵਿਤ੍ਥਮ੍ਭਨਾਕਾਰੋ ਵਾਯੋਧਾਤੂਤਿ, ਅਧੋਗਮਾ ਵਾਤਾ ਨਾਮ, ਕੁਚ੍ਛਿਸਯਾ ਵਾਤਾ ਨਾਮ, ਕੋਟ੍ਠਾਸਯਾ ਵਾਤਾ ਨਾਮ, ਅਙ੍ਗਮਙ੍ਗਾਨੁਸਾਰਿਨੋ ਵਾਤਾ ਨਾਮ, ਅਸ੍ਸਾਸਪਸ੍ਸਾਸਾ ਵਾਤਾ ਨਾਮ ਇਮਸ੍ਮਿਂ ਸਰੀਰੇ ਪਾਟਿਯੇਕ੍ਕੋ ਕੋਟ੍ਠਾਸੋ ਅਚੇਤਨੋ ਅਬ੍ਯਾਕਤੋ ਸੁਞ੍ਞੋ ਨਿਸ੍ਸਤ੍ਤੋ ਵਿਤ੍ਥਮ੍ਭਨਾਕਾਰੋ ਵਾਯੋਧਾਤੂਤਿ ਏਵਂ ਵਾਯੋਕੋਟ੍ਠਾਸੇਸੁ ਮਨਸਿਕਾਰੋ ਪਵਤ੍ਤੇਤਬ੍ਬੋ. ਤਸ੍ਸੇਵਂ ਪਵਤ੍ਤਮਨਸਿਕਾਰਸ੍ਸ ਧਾਤੁਯੋ ਪਾਕਟਾ ਹੋਨ੍ਤਿ. ਤਾ ਪੁਨਪ੍ਪੁਨਂ ਆਵਜ੍ਜਤੋ ਮਨਸਿਕਰੋਤੋ ਵੁਤ੍ਤਨਯੇਨੇਵ ਉਪਚਾਰਸਮਾਧਿ ਉਪ੍ਪਜ੍ਜਤਿ.

੩੪੫. ਯਸ੍ਸ ਪਨ ਏਵਂ ਭਾਵਯਤੋ ਕਮ੍ਮਟ੍ਠਾਨਂ ਨ ਇਜ੍ਝਤਿ, ਤੇਨ ਸਲਕ੍ਖਣਸਙ੍ਖੇਪਤੋ ਭਾਵੇਤਬ੍ਬਂ. ਕਥਂ? ਵੀਸਤਿਯਾ ਕੋਟ੍ਠਾਸੇਸੁ ਥਦ੍ਧਲਕ੍ਖਣਂ ਪਥਵੀਧਾਤੂਤਿ ਵਵਤ੍ਥਪੇਤਬ੍ਬਂ. ਤਤ੍ਥੇਵ ਆਬਨ੍ਧਨਲਕ੍ਖਣਂ ਆਪੋਧਾਤੂਤਿ. ਪਰਿਪਾਚਨਲਕ੍ਖਣਂ ਤੇਜੋਧਾਤੂਤਿ. ਵਿਤ੍ਥਮ੍ਭਨਲਕ੍ਖਣਂ ਵਾਯੋਧਾਤੂਤਿ.

ਦ੍ਵਾਦਸਸੁ ਕੋਟ੍ਠਾਸੇਸੁ ਆਬਨ੍ਧਨਲਕ੍ਖਣਂ ਆਪੋਧਾਤੂਤਿ ਵਵਤ੍ਥਪੇਤਬ੍ਬਂ. ਤਤ੍ਥੇਵ ਪਰਿਪਾਚਨਲਕ੍ਖਣਂ ਤੇਜੋਧਾਤੂਤਿ. ਵਿਤ੍ਥਮ੍ਭਨਲਕ੍ਖਣਂ ਵਾਯੋਧਾਤੂਤਿ. ਥਦ੍ਧਲਕ੍ਖਣਂ ਪਥਵੀਧਾਤੂਤਿ.

ਚਤੂਸੁ ਕੋਟ੍ਠਾਸੇਸੁ ਪਰਿਪਾਚਨਲਕ੍ਖਣਂ ਤੇਜੋਧਾਤੂਤਿ ਵਵਤ੍ਥਪੇਤਬ੍ਬਂ. ਤੇਨ ਅਵਿਨਿਭੁਤ੍ਤਂ ਵਿਤ੍ਥਮ੍ਭਨਲਕ੍ਖਣਂ ਵਾਯੋਧਾਤੂਤਿ. ਥਦ੍ਧਲਕ੍ਖਣਂ ਪਥਵੀਧਾਤੂਤਿ. ਆਬਨ੍ਧਨਲਕ੍ਖਣਂ ਆਪੋਧਾਤੂਤਿ.

ਛਸੁ ਕੋਟ੍ਠਾਸੇਸੁ ਵਿਤ੍ਥਮ੍ਭਨਲਕ੍ਖਣਂ ਵਾਯੋਧਾਤੂਤਿ ਵਵਤ੍ਥਪੇਤਬ੍ਬਂ. ਤਤ੍ਥੇਵ ਥਦ੍ਧਲਕ੍ਖਣਂ ਪਥਵੀਧਾਤੂਤਿ. ਆਬਨ੍ਧਨਲਕ੍ਖਣਂ ਆਪੋਧਾਤੂਤਿ. ਪਰਿਪਾਚਨਲਕ੍ਖਣਂ ਤੇਜੋਧਾਤੂਤਿ. ਤਸ੍ਸੇਵਂ ਵਵਤ੍ਥਾਪਯਤੋ ਧਾਤੁਯੋ ਪਾਕਟਾ ਹੋਨ੍ਤਿ. ਤਾ ਪੁਨਪ੍ਪੁਨਂ ਆਵਜ੍ਜਤੋ ਮਨਸਿਕਰੋਤੋ ਵੁਤ੍ਤਨਯੇਨੇਵ ਉਪਚਾਰਸਮਾਧਿ ਉਪ੍ਪਜ੍ਜਤਿ.

੩੪੬. ਯਸ੍ਸ ਪਨ ਏਵਮ੍ਪਿ ਭਾਵਯਤੋ ਕਮ੍ਮਟ੍ਠਾਨਂ ਨ ਇਜ੍ਝਤਿ, ਤੇਨ ਸਲਕ੍ਖਣਵਿਭਤ੍ਤਿਤੋ ਭਾਵੇਤਬ੍ਬਂ. ਕਥਂ? ਪੁਬ੍ਬੇ ਵੁਤ੍ਤਨਯੇਨੇਵ ਕੇਸਾਦਯੋ ਪਰਿਗ੍ਗਹੇਤ੍ਵਾ ਕੇਸਮ੍ਹਿ ਥਦ੍ਧਲਕ੍ਖਣਂ ਪਥਵੀਧਾਤੂਤਿ ਵਵਤ੍ਥਪੇਤਬ੍ਬਂ. ਤਤ੍ਥੇਵ ਆਬਨ੍ਧਨਲਕ੍ਖਣਂ ਆਪੋਧਾਤੂਤਿ. ਪਰਿਪਾਚਨਲਕ੍ਖਣਂ ਤੇਜੋਧਾਤੂਤਿ. ਵਿਤ੍ਥਮ੍ਭਨਲਕ੍ਖਣਂ ਵਾਯੋਧਾਤੂਤਿ. ਏਵਂ ਸਬ੍ਬਕੋਟ੍ਠਾਸੇਸੁ ਏਕੇਕਸ੍ਮਿਂ ਕੋਟ੍ਠਾਸੇ ਚਤਸ੍ਸੋ ਚਤਸ੍ਸੋ ਧਾਤੁਯੋ ਵਵਤ੍ਥਪੇਤਬ੍ਬਾ. ਤਸ੍ਸੇਵਂ ਵਵਤ੍ਥਾਪਯਤੋ ਧਾਤੁਯੋ ਪਾਕਟਾ ਹੋਨ੍ਤਿ. ਤਾ ਪੁਨਪ੍ਪੁਨਂ ਆਵਜ੍ਜਤੋ ਮਨਸਿਕਰੋਤੋ ਵੁਤ੍ਤਨਯੇਨੇਵ ਉਪਚਾਰਸਮਾਧਿ ਉਪ੍ਪਜ੍ਜਤਿ.

ਅਪਿਚ ਖੋ ਪਨ ਵਚਨਤ੍ਥਤੋ, ਕਲਾਪਤੋ, ਚੁਣ੍ਣਤੋ, ਲਕ੍ਖਣਾਦਿਤੋ, ਸਮੁਟ੍ਠਾਨਤੋ, ਨਾਨਤ੍ਤੇਕਤ੍ਤਤੋ, ਵਿਨਿਬ੍ਭੋਗਾਵਿਨਿਬ੍ਭੋਗਤੋ, ਸਭਾਗਵਿਸਭਾਗਤੋ, ਅਜ੍ਝਤ੍ਤਿਕਬਾਹਿਰਵਿਸੇਸਤੋ, ਸਙ੍ਗਹਤੋ, ਪਚ੍ਚਯਤੋ, ਅਸਮਨ੍ਨਾਹਾਰਤੋ, ਪਚ੍ਚਯਵਿਭਾਗਤੋਤਿ ਇਮੇਹਿਪਿ ਆਕਾਰੇਹਿ ਧਾਤੁਯੋ ਮਨਸਿਕਾਤਬ੍ਬਾ.

੩੪੭. ਤਤ੍ਥ ਵਚਨਤ੍ਥਤੋ ਮਨਸਿਕਰੋਨ੍ਤੇਨ ਪਤ੍ਥਟਤ੍ਤਾ ਪਥਵੀ. ਅਪ੍ਪੋਤਿ ਆਪਿਯਤਿ ਅਪ੍ਪਾਯਤੀਤਿ ਵਾ ਆਪੋ. ਤੇਜਤੀਤਿ ਤੇਜੋ. ਵਾਯਤੀਤਿ ਵਾਯੋ. ਅਵਿਸੇਸੇਨ ਪਨ ਸਲਕ੍ਖਣਧਾਰਣਤੋ ਦੁਕ੍ਖਾਦਾਨਤੋ ਦੁਕ੍ਖਾਧਾਨਤੋ ਚ ਧਾਤੂਤਿ. ਏਵਂ ਵਿਸੇਸਸਾਮਞ੍ਞਵਸੇਨ ਵਚਨਤ੍ਥਤੋ ਮਨਸਿਕਾਤਬ੍ਬਾ.

੩੪੮. ਕਲਾਪਤੋਤਿ ਯਾ ਅਯਂ ਕੇਸਾ ਲੋਮਾਤਿਆਦਿਨਾ ਨਯੇਨ ਵੀਸਤਿਯਾ ਆਕਾਰੇਹਿ ਪਥਵੀਧਾਤੁ, ਪਿਤ੍ਤਂ ਸੇਮ੍ਹਨ੍ਤਿ ਚ ਆਦਿਨਾ ਨਯੇਨ ਦ੍ਵਾਦਸਹਾਕਾਰੇਹਿ ਆਪੋਧਾਤੁ ਨਿਦ੍ਦਿਟ੍ਠਾ, ਤਤ੍ਥ ਯਸ੍ਮਾ –

ਵਣ੍ਣੋ ਗਨ੍ਧੋ ਰਸੋ ਓਜਾ, ਚਤਸ੍ਸੋ ਚਾਪਿ ਧਾਤੁਯੋ;

ਅਟ੍ਠਧਮ੍ਮਸਮੋਧਾਨਾ, ਹੋਤਿ ਕੇਸਾਤਿ ਸਮ੍ਮੁਤਿ;

ਤੇਸਂਯੇਵ ਵਿਨਿਬ੍ਭੋਗਾ, ਨਤ੍ਥਿ ਕੇਸਾਤਿ ਸਮ੍ਮੁਤਿ.

ਤਸ੍ਮਾ ਕੇਸਾਪਿ ਅਟ੍ਠਧਮ੍ਮਕਲਾਪਮਤ੍ਤਮੇਵ. ਤਥਾ ਲੋਮਾਦਯੋਤਿ. ਯੋ ਪਨੇਤ੍ਥ ਕਮ੍ਮਸਮੁਟ੍ਠਾਨੋ ਕੋਟ੍ਠਾਸੋ, ਸੋ ਜੀਵਿਤਿਨ੍ਦ੍ਰਿਯੇਨ ਚ ਭਾਵੇਨ ਚ ਸਦ੍ਧਿਂ ਦਸਧਮ੍ਮਕਲਾਪੋਪਿ ਹੋਤਿ. ਉਸ੍ਸਦਵਸੇਨ ਪਨ ਪਥਵੀਧਾਤੁ ਆਪੋਧਾਤੂਤਿ ਸਙ੍ਖਂ ਗਤੋ. ਏਵਂ ਕਲਾਪਤੋ ਮਨਸਿਕਾਤਬ੍ਬਾ.

੩੪੯. ਚੁਣ੍ਣਤੋਤਿ ਇਮਸ੍ਮਿਂ ਹਿ ਸਰੀਰੇ ਮਜ੍ਝਿਮੇਨ ਪਮਾਣੇਨ ਪਰਿਗ੍ਗਯ੍ਹਮਾਨਾ ਪਰਮਾਣੁਭੇਦਸਞ੍ਚੁਣ੍ਣਾ ਸੁਖੁਮਰਜਭੂਤਾ ਪਥਵੀਧਾਤੁ ਦੋਣਮਤ੍ਤਾ ਸਿਯਾ. ਸਾ ਤਤੋ ਉਪਡ੍ਢਪ੍ਪਮਾਣਾਯ ਆਪੋਧਾਤੁਯਾ ਸਙ੍ਗਹਿਤਾ, ਤੇਜੋਧਾਤੁਯਾ ਅਨੁਪਾਲਿਤਾ ਵਾਯੋਧਾਤੁਯਾ ਵਿਤ੍ਥਮ੍ਭਿਤਾ ਨ ਵਿਕਿਰਿਯਤਿ ਨ ਵਿਦ੍ਧਂਸਿਯਤਿ, ਅਵਿਕਿਰਿਯਮਾਨਾ ਅਵਿਦ੍ਧਂਸਿਯਮਾਨਾ ਅਨੇਕਵਿਧਂ ਇਤ੍ਥਿਪੁਰਿਸਲਿਙ੍ਗਾਦਿਭਾਵਵਿਕਪ੍ਪਂ ਉਪਗਚ੍ਛਤਿ, ਅਣੁਥੂਲਦੀਘਰਸ੍ਸਥਿਰਕਥਿਨਾਦਿਭਾਵਞ੍ਚ ਪਕਾਸੇਤਿ.

ਯੂਸਗਤਾ ਆਬਨ੍ਧਨਾਕਾਰਭੂਤਾ ਪਨੇਤ੍ਥ ਆਪੋਧਾਤੁ ਪਥਵੀਪਤਿਟ੍ਠਿਤਾ ਤੇਜਾਨੁਪਾਲਿਤਾ ਵਾਯੋਵਿਤ੍ਥਮ੍ਭਿਤਾ ਨ ਪਗ੍ਘਰਤਿ ਨ ਪਰਿਸ੍ਸਵਤਿ, ਅਪਗ੍ਘਰਮਾਨਾ ਅਪਰਿਸ੍ਸਵਮਾਨਾ ਪੀਣਿਤਪੀਣਿਤਭਾਵਂ ਦਸ੍ਸੇਤਿ.

ਅਸਿਤਪੀਤਾਦਿਪਾਚਕਾ ਚੇਤ੍ਥ ਉਸੁਮਾਕਾਰਭੂਤਾ ਉਣ੍ਹਤ੍ਤਲਕ੍ਖਣਾ ਤੇਜੋਧਾਤੁ ਪਥਵੀਪਤਿਟ੍ਠਿਤਾ ਆਪੋਸਙ੍ਗਹਿਤਾ ਵਾਯੋਵਿਤ੍ਥਮ੍ਭਿਤਾ ਇਮਂ ਕਾਯਂ ਪਰਿਪਾਚੇਤਿ, ਵਣ੍ਣਸਮ੍ਪਤ੍ਤਿਞ੍ਚਸ੍ਸ ਆਵਹਤਿ. ਤਾਯ ਚ ਪਨ ਪਰਿਪਾਚਿਤੋ ਅਯਂ ਕਾਯੋ ਨ ਪੂਤਿਭਾਵਂ ਦਸ੍ਸੇਤਿ.

ਅਙ੍ਗਮਙ੍ਗਾਨੁਸਟਾ ਚੇਤ੍ਥ ਸਮੁਦੀਰਣਵਿਤ੍ਥਮ੍ਭਨਲਕ੍ਖਣਾ ਵਾਯੋਧਾਤੁ ਪਥਵੀਪਤਿਟ੍ਠਿਤਾ ਆਪੋਸਙ੍ਗਹਿਤਾ ਤੇਜਾਨੁਪਾਲਿਤਾ ਇਮਂ ਕਾਯਂ ਵਿਤ੍ਥਮ੍ਭੇਤਿ. ਤਾਯ ਚ ਪਨ ਵਿਤ੍ਥਮ੍ਭਿਤੋ ਅਯਂ ਕਾਯੋ ਨ ਪਰਿਪਤਤਿ, ਉਜੁਕਂ ਸਣ੍ਠਾਤਿ. ਅਪਰਾਯ ਵਾਯੋਧਾਤੁਯਾ ਸਮਬ੍ਭਾਹਤੋ ਗਮਨਟ੍ਠਾਨਨਿਸਜ੍ਜਾਸਯਨਇਰਿਯਾਪਥੇਸੁ ਵਿਞ੍ਞਤ੍ਤਿਂ ਦਸ੍ਸੇਤਿ, ਸਮਿਞ੍ਜੇਤਿ, ਸਮ੍ਪਸਾਰੇਤਿ, ਹਤ੍ਥਪਾਦਂ ਲਾਲ਼ੇਤਿ. ਏਵਮੇਤਂ ਇਤ੍ਥਿਪੁਰਿਸਾਦਿਭਾਵੇਨ ਬਾਲਜਨਵਞ੍ਚਨਂ ਮਾਯਾਰੂਪਸਦਿਸਂ ਧਾਤੁਯਨ੍ਤਂ ਪਵਤ੍ਤਤੀਤਿ ਏਵਂ ਚੁਣ੍ਣਤੋ ਮਨਸਿਕਾਤਬ੍ਬਾ.

੩੫੦. ਲਕ੍ਖਣਾਦਿਤੋਤਿ ਪਥਵੀਧਾਤੁ ਕਿਂ ਲਕ੍ਖਣਾ, ਕਿਂ ਰਸਾ, ਕਿਂ ਪਚ੍ਚੁਪਟ੍ਠਾਨਾਤਿ ਏਵਂ ਚਤਸ੍ਸੋਪਿ ਧਾਤੁਯੋ ਆਵਜ੍ਜੇਤ੍ਵਾ ਪਥਵੀਧਾਤੁ ਕਕ੍ਖਲ਼ਤ੍ਤਲਕ੍ਖਣਾ, ਪਤਿਟ੍ਠਾਨਰਸਾ, ਸਮ੍ਪਟਿਚ੍ਛਨਪਚ੍ਚੁਪਟ੍ਠਾਨਾ. ਆਪੋਧਾਤੁ ਪਗ੍ਘਰਣਲਕ੍ਖਣਾ, ਬ੍ਰੂਹਨਰਸਾ, ਸਙ੍ਗਹਪਚ੍ਚੁਪਟ੍ਠਾਨਾ. ਤੇਜੋਧਾਤੁ ਉਣ੍ਹਤ੍ਤਲਕ੍ਖਣਾ, ਪਰਿਪਾਚਨਰਸਾ, ਮਦ੍ਦਵਾਨੁਪ੍ਪਦਾਨਪਚ੍ਚੁਪਟ੍ਠਾਨਾ. ਵਾਯੋਧਾਤੁ ਵਿਤ੍ਥਮ੍ਭਨਲਕ੍ਖਣਾ, ਸਮੁਦੀਰਣਰਸਾ. ਅਭਿਨੀਹਾਰਪਚ੍ਚੁਪਟ੍ਠਾਨਾਤਿ ਏਵਂ ਲਕ੍ਖਣਾਦਿਤੋ ਮਨਸਿਕਾਤਬ੍ਬਾ.

੩੫੧. ਸਮੁਟ੍ਠਾਨਤੋਤਿ ਯੇ ਇਮੇ ਪਥਵੀਧਾਤੁਆਦੀਨਂ ਵਿਤ੍ਥਾਰਤੋ ਦਸ੍ਸਨਵਸੇਨ ਕੇਸਾਦਯੋ ਦ੍ਵਾਚਤ੍ਤਾਲੀਸ ਕੋਟ੍ਠਾਸਾ ਦਸ੍ਸਿਤਾ. ਤੇਸੁ ਉਦਰਿਯਂ ਕਰੀਸਂ ਪੁਬ੍ਬੋ ਮੁਤ੍ਤਨ੍ਤਿ ਇਮੇ ਚਤ੍ਤਾਰੋ ਕੋਟ੍ਠਾਸਾ ਉਤੁਸਮੁਟ੍ਠਾਨਾਵ. ਅਸ੍ਸੁ ਸੇਦੋ ਖੇਲ਼ੋ ਸਿਙ੍ਘਾਣਿਕਾਤਿ ਇਮੇ ਚਤ੍ਤਾਰੋ ਉਤੁਚਿਤ੍ਤਸਮੁਟ੍ਠਾਨਾ. ਅਸਿਤਾਦਿਪਰਿਪਾਚਕੋ ਤੇਜੋ ਕਮ੍ਮਸਮੁਟ੍ਠਾਨੋਵ. ਅਸ੍ਸਾਸਪਸ੍ਸਾਸਾ ਚਿਤ੍ਤਸਮੁਟ੍ਠਾਨਾਵ. ਅਵਸੇਸਾ ਸਬ੍ਬੇਪਿ ਚਤੁਸਮੁਟ੍ਠਾਨਾਤਿ ਏਵਂ ਸਮੁਟ੍ਠਾਨਤੋ ਮਨਸਿਕਾਤਬ੍ਬਾ.

੩੫੨. ਨਾਨਤ੍ਤੇਕਤ੍ਤਤੋਤਿ ਸਬ੍ਬਾਸਮ੍ਪਿ ਧਾਤੂਨਂ ਸਲਕ੍ਖਣਾਦਿਤੋ ਨਾਨਤ੍ਤਂ. ਅਞ੍ਞਾਨੇਵ ਹਿ ਪਥਵੀਧਾਤੁਯਾ ਲਕ੍ਖਣਰਸਪਚ੍ਚੁਪਟ੍ਠਾਨਾਨਿ. ਅਞ੍ਞਾਨਿ ਆਪੋਧਾਤੁਆਦੀਨਂ. ਏਵਂ ਲਕ੍ਖਣਾਦਿਵਸੇਨ ਪਨ ਕਮ੍ਮਸਮੁਟ੍ਠਾਨਾਦਿਵਸੇਨ ਚ ਨਾਨਤ੍ਤਭੂਤਾਨਮ੍ਪਿ ਏਤਾਸਂ ਰੂਪਮਹਾਭੂਤਧਾਤੁਧਮ੍ਮਅਨਿਚ੍ਚਾਦਿਵਸੇਨ ਏਕਤ੍ਤਂ ਹੋਤਿ. ਸਬ੍ਬਾਪਿ ਹਿ ਧਾਤੁਯੋ ਰੁਪ੍ਪਨਲਕ੍ਖਣਂ ਅਨਤੀਤਤ੍ਤਾ ਰੂਪਾਨਿ. ਮਹਨ੍ਤਪਾਤੁਭਾਵਾਦੀਹਿ ਕਾਰਣੇਹਿ ਮਹਾਭੂਤਾਨਿ.

ਮਹਨ੍ਤਪਾਤੁਭਾਵਾਦੀਹੀਤਿ ਏਤਾ ਹਿ ਧਾਤੁਯੋ ਮਹਨ੍ਤਪਾਤੁਭਾਵਤੋ, ਮਹਾਭੂਤਸਾਮਞ੍ਞਤੋ, ਮਹਾਪਰਿਹਾਰਤੋ, ਮਹਾਵਿਕਾਰਤੋ, ਮਹਤ੍ਤਾ ਭੂਤਤ੍ਤਾ ਚਾਤਿ ਇਮੇਹਿ ਕਾਰਣੇਹਿ ਮਹਾਭੂਤਾਨੀਤਿ ਵੁਚ੍ਚਨ੍ਤਿ.

ਤਤ੍ਥ ਮਹਨ੍ਤਪਾਤੁਭਾਵਤੋਤਿ ਏਤਾਨਿ ਹਿ ਅਨੁਪਾਦਿਨ੍ਨਸਨ੍ਤਾਨੇਪਿ ਉਪਾਦਿਨ੍ਨਸਨ੍ਤਾਨੇਪਿ ਮਹਨ੍ਤਾਨਿ ਪਾਤੁਭੂਤਾਨਿ. ਤੇਸਂ ਅਨੁਪਾਦਿਨ੍ਨਸਨ੍ਤਾਨੇ –

ਦੁਵੇ ਸਤਸਹਸ੍ਸਾਨਿ, ਚਤ੍ਤਾਰਿ ਨਹੁਤਾਨਿ ਚ;

ਏਤ੍ਤਕਂ ਬਹਲਤ੍ਤੇਨ, ਸਙ੍ਖਾਤਾਯਂ ਵਸੁਨ੍ਧਰਾਤਿ. –

ਆਦਿਨਾ ਨਯੇਨ ਮਹਨ੍ਤਪਾਤੁਭਾਵਤਾ ਬੁਦ੍ਧਾਨੁਸ੍ਸਤਿਨਿਦ੍ਦੇਸੇ ਵੁਤ੍ਤਾਵ.

ਉਪਾਦਿਨ੍ਨਸਨ੍ਤਾਨੇਪਿ ਮਚ੍ਛਕਚ੍ਛਪਦੇਵਦਾਨਵਾਦਿਸਰੀਰਵਸੇਨ ਮਹਨ੍ਤਾਨੇਵ ਪਾਤੁਭੂਤਾਨਿ. ਵੁਤ੍ਤਞ੍ਹੇਤਂ ‘‘ਸਨ੍ਤਿ, ਭਿਕ੍ਖਵੇ, ਮਹਾਸਮੁਦ੍ਦੇ ਯੋਜਨਸਤਿਕਾਪਿ ਅਤ੍ਤਭਾਵਾ’’ਤਿਆਦਿ.

ਮਹਾਭੂਤਸਾਮਞ੍ਞਤੋਤਿ ਏਤਾਨਿ ਹਿ ਯਥਾ ਮਾਯਾਕਾਰੋ ਅਮਣਿਂਯੇਵ ਉਦਕਂ ਮਣਿਂ ਕਤ੍ਵਾ ਦਸ੍ਸੇਤਿ, ਅਸੁਵਣ੍ਣਂਯੇਵ ਲੇਡ੍ਡੁਂ ਸੁਵਣ੍ਣਂ ਕਤ੍ਵਾ ਦਸ੍ਸੇਤਿ.

ਯਥਾ ਚ ਸਯਂ ਨੇਵ ਯਕ੍ਖੋ ਨ ਯਕ੍ਖੀ ਸਮਾਨੋ ਯਕ੍ਖਭਾਵਮ੍ਪਿ ਯਕ੍ਖਿਭਾਵਮ੍ਪਿ ਦਸ੍ਸੇਤਿ, ਏਵਮੇਵ ਸਯਂ ਅਨੀਲਾਨੇਵ ਹੁਤ੍ਵਾ ਨੀਲਂ ਉਪਾਦਾਰੂਪਂ ਦਸ੍ਸੇਨ੍ਤਿ, ਅਪੀਤਾਨਿ ਅਲੋਹਿਤਾਨਿ ਅਨੋਦਾਤਾਨੇਵ ਹੁਤ੍ਵਾ ਓਦਾਤਂ ਉਪਾਦਾਰੂਪਂ ਦਸ੍ਸੇਨ੍ਤੀਤਿ ਮਾਯਾਕਾਰਮਹਾਭੂਤਸਾਮਞ੍ਞਤੋ ਮਹਾਭੂਤਾਨਿ.

ਯਥਾ ਚ ਯਕ੍ਖਾਦੀਨਿ ਮਹਾਭੂਤਾਨਿ ਯਂ ਗਣ੍ਹਨ੍ਤਿ, ਨੇਵ ਨੇਸਂ ਤਸ੍ਸ ਅਨ੍ਤੋ ਨ ਬਹਿ ਠਾਨਂ ਉਪਲਬ੍ਭਤਿ, ਨ ਚ ਤਂ ਨਿਸ੍ਸਾਯ ਨ ਤਿਟ੍ਠਨ੍ਤਿ, ਏਵਮੇਵ ਤਾਨਿਪਿ ਨੇਵ ਅਞ੍ਞਮਞ੍ਞਸ੍ਸ ਅਨ੍ਤੋ ਨ ਬਹਿ ਠਿਤਾਨਿ ਹੁਤ੍ਵਾ ਉਪਲਬ੍ਭਨ੍ਤਿ, ਨ ਚ ਅਞ੍ਞਮਞ੍ਞਂ ਨਿਸ੍ਸਾਯ ਨ ਤਿਟ੍ਠਨ੍ਤੀਤਿ ਅਚਿਨ੍ਤੇਯ੍ਯਟ੍ਠਾਨਤਾਯ ਯਕ੍ਖਾਦਿਮਹਾਭੂਤਸਾਮਞ੍ਞਤੋਪਿ ਮਹਾਭੂਤਾਨਿ. ਯਥਾ ਚ ਯਕ੍ਖਿਨੀਸਙ੍ਖਾਤਾਨਿ ਮਹਾਭੂਤਾਨਿ ਮਨਾਪੇਹਿ ਵਣ੍ਣਸਣ੍ਠਾਨਵਿਕ੍ਖੇਪੇਹਿ ਅਤ੍ਤਨੋ ਭਯਾਨਕਭਾਵਂ ਪਟਿਚ੍ਛਾਦੇਤ੍ਵਾ ਸਤ੍ਤੇ ਵਞ੍ਚੇਨ੍ਤਿ, ਏਵਮੇਵ ਏਤਾਨਿਪਿ ਇਤ੍ਥਿਪੁਰਿਸਸਰੀਰਾਦੀਸੁ ਮਨਾਪੇਨ ਛਵਿਵਣ੍ਣੇਨ ਮਨਾਪੇਨ ਅਤ੍ਤਨੋ ਅਙ੍ਗਪਚ੍ਚਙ੍ਗਸਣ੍ਠਾਨੇਨ ਮਨਾਪੇਨ ਚ ਹਤ੍ਥਪਾਦਙ੍ਗੁਲਿਭਮੁਕਵਿਕ੍ਖੇਪੇਨ ਅਤ੍ਤਨੋ ਕਕ੍ਖਲ਼ਤ੍ਤਾਦਿਭੇਦਂ ਸਰਸਲਕ੍ਖਣਂ ਪਟਿਚ੍ਛਾਦੇਤ੍ਵਾ ਬਾਲਜਨਂ ਵਞ੍ਚੇਨ੍ਤਿ, ਅਤ੍ਤਨੋ ਸਭਾਵਂ ਦਟ੍ਠੁਂ ਨ ਦੇਨ੍ਤੀਤਿ ਵਞ੍ਚਕਤ੍ਤੇਨ ਯਕ੍ਖਿਨੀਮਹਾਭੂਤਸਾਮਞ੍ਞਤੋਪਿ ਮਹਾਭੂਤਾਨਿ.

ਮਹਾਪਰਿਹਾਰਤੋਤਿ ਮਹਨ੍ਤੇਹਿ ਪਚ੍ਚਯੇਹਿ ਪਰਿਹਰਿਤਬ੍ਬਤੋ. ਏਤਾਨਿ ਹਿ ਦਿਵਸੇ ਦਿਵਸੇ ਉਪਨੇਤਬ੍ਬਤ੍ਤਾ ਮਹਨ੍ਤੇਹਿ ਘਾਸਚ੍ਛਾਦਨਾਦੀਹਿ ਭੂਤਾਨਿ ਪਵਤ੍ਤਾਨੀਤਿ ਮਹਾਭੂਤਾਨਿ. ਮਹਾਪਰਿਹਾਰਾਨਿ ਵਾ ਭੂਤਾਨੀਤਿਪਿ ਮਹਾਭੂਤਾਨਿ.

ਮਹਾਵਿਕਾਰਤੋਤਿ ਏਤਾਨਿ ਹਿ ਅਨੁਪਾਦਿਨ੍ਨਾਨਿਪਿ ਉਪਾਦਿਨ੍ਨਾਨਿਪਿ ਮਹਾਵਿਕਾਰਾਨਿ ਹੋਨ੍ਤਿ. ਤਤ੍ਥ ਅਨੁਪਾਦਿਨ੍ਨਾਨਂ ਕਪ੍ਪਵੁਟ੍ਠਾਨੇ ਵਿਕਾਰਮਹਤ੍ਤਂ ਪਾਕਟਂ ਹੋਤਿ. ਉਪਾਦਿਨ੍ਨਾਨਂ ਧਾਤੁਕ੍ਖੋਭਕਾਲੇ. ਤਥਾ ਹਿ –

ਭੂਮਿਤੋ ਵੁਟ੍ਠਿਤਾ ਯਾਵ, ਬ੍ਰਹ੍ਮਲੋਕਾ ਵਿਧਾਵਤਿ;

ਅਚ੍ਚਿ ਅਚ੍ਚਿਮਤੋ ਲੋਕੇ, ਡਯ੍ਹਮਾਨਮ੍ਹਿ ਤੇਜਸਾ.

ਕੋਟਿਸਤਸਹਸ੍ਸੇਕਂ, ਚਕ੍ਕਵਾਲ਼ਂ ਵਿਲੀਯਤਿ;

ਕੁਪਿਤੇਨ ਯਦਾ ਲੋਕੋ, ਸਲਿਲੇਨ ਵਿਨਸ੍ਸਤਿ.

ਕੋਟਿਸਤਸਹਸ੍ਸੇਕਂ, ਚਕ੍ਕਵਾਲ਼ਂ ਵਿਕੀਰਤਿ;

ਵਾਯੋਧਾਤੁਪ੍ਪਕੋਪੇਨ, ਯਦਾ ਲੋਕੋ ਵਿਨਸ੍ਸਤਿ.

ਪਤ੍ਥਦ੍ਧੋ ਭਵਤਿ ਕਾਯੋ, ਦਟ੍ਠੋ ਕਟ੍ਠਮੁਖੇਨ ਵਾ;

ਪਥਵੀਧਾਤੁਪ੍ਪਕੋਪੇਨ, ਹੋਤਿ ਕਟ੍ਠਮੁਖੇਵ ਸੋ.

ਪੂਤਿਯੋ ਭਵਤਿ ਕਾਯੋ, ਦਟ੍ਠੋ ਪੂਤਿਮੁਖੇਨ ਵਾ;

ਆਪੋਧਾਤੁਪ੍ਪਕੋਪੇਨ, ਹੋਤਿ ਪੂਤਿਮੁਖੇਵ ਸੋ.

ਸਨ੍ਤਤ੍ਤੋ ਭਵਤਿ ਕਾਯੋ, ਦਟ੍ਠੋ ਅਗ੍ਗਿਮੁਖੇਨ ਵਾ;

ਤੇਜੋਧਾਤੁਪ੍ਪਕੋਪੇਨ, ਹੋਤਿ ਅਗ੍ਗਿਮੁਖੇਵ ਸੋ.

ਸਞ੍ਛਿਨ੍ਨੋ ਭਵਤਿ ਕਾਯੋ, ਦਟ੍ਠੋ ਸਤ੍ਥਮੁਖੇਨ ਵਾ;

ਵਾਯੋਧਾਤੁਪ੍ਪਕੋਪੇਨ, ਹੋਤਿ ਸਤ੍ਥਮੁਖੇਵ ਸੋ.

ਇਤਿ ਮਹਾਵਿਕਾਰਾਨਿ ਭੂਤਾਨੀਤਿ ਮਹਾਭੂਤਾਨਿ.

ਮਹਤ੍ਤਾ ਭੂਤਤ੍ਤਾ ਚਾਤਿ ਏਤਾਨਿ ਹਿ ਮਹਨ੍ਤਾਨਿ ਮਹਤਾ ਵਾਯਾਮੇਨ ਪਰਿਗ੍ਗਹੇਤਬ੍ਬਤ੍ਤਾ ਭੂਤਾਨਿ ਵਿਜ੍ਜਮਾਨਤ੍ਤਾਤਿ ਮਹਤ੍ਤਾ ਭੂਤਤ੍ਤਾ ਚ ਮਹਾਭੂਤਾਨਿ.

ਏਵਂ ਸਬ੍ਬਾਪੇਤਾ ਧਾਤੁਯੋ ਮਹਨ੍ਤਪਾਤੁਭਾਵਾਦੀਹਿ ਕਾਰਣੇਹਿ ਮਹਾਭੂਤਾਨਿ.

ਸਲਕ੍ਖਣਧਾਰਣਤੋ ਪਨ ਦੁਕ੍ਖਾਦਾਨਤੋ ਚ ਦੁਕ੍ਖਾਧਾਨਤੋ ਚ ਸਬ੍ਬਾਪਿ ਧਾਤੁਲਕ੍ਖਣਂ ਅਨਤੀਤਤ੍ਤਾ ਧਾਤੁਯੋ. ਸਲਕ੍ਖਣਧਾਰਣੇਨ ਚ ਅਤ੍ਤਨੋ ਖਣਾਨੁਰੂਪਧਾਰਣੇਨ ਚ ਧਮ੍ਮਾ. ਖਯਟ੍ਠੇਨ ਅਨਿਚ੍ਚਾ. ਭਯਟ੍ਠੇਨ ਦੁਕ੍ਖਾ. ਅਸਾਰਕਟ੍ਠੇਨ ਅਨਤ੍ਤਾ.

ਇਤਿ ਸਬ੍ਬਾਸਮ੍ਪਿ ਰੂਪਮਹਾਭੂਤਧਾਤੁਧਮ੍ਮਅਨਿਚ੍ਚਾਦਿਵਸੇਨ ਏਕਤ੍ਤਨ੍ਤਿ ਏਵਂ ਨਾਨਤ੍ਤੇਕਤ੍ਤਤੋ ਮਨਸਿਕਾਤਬ੍ਬਾ.

੩੫੩. ਵਿਨਿਬ੍ਭੋਗਾਵਿਨਿਬ੍ਭੋਗਤੋਤਿ ਸਹੁਪ੍ਪਨ੍ਨਾਵ ਏਤਾ ਏਕੇਕਸ੍ਮਿਂ ਸਬ੍ਬਪਰਿਯਨ੍ਤਿਮੇ ਸੁਦ੍ਧਟ੍ਠਕਾਦਿਕਲਾਪੇਪਿ ਪਦੇਸੇਨ ਅਵਿਨਿਬ੍ਭੁਤ੍ਤਾ. ਲਕ੍ਖਣੇਨ ਪਨ ਵਿਨਿਬ੍ਭੁਤ੍ਤਾਤਿ ਏਵਂ ਵਿਨਿਬ੍ਭੋਗਾਵਿਨਿਬ੍ਭੋਗਤੋ ਮਨਸਿਕਾਤਬ੍ਬਾ.

੩੫੪. ਸਭਾਗਵਿਸਭਾਗਤੋਤਿ ਏਵਂ ਅਵਿਨਿਬ੍ਭੁਤ੍ਤਾਸੁ ਚਾਪਿ ਏਤਾਸੁ ਪੁਰਿਮਾ ਦ੍ਵੇ ਗਰੁਕਤ੍ਤਾ ਸਭਾਗਾ. ਤਥਾ ਪਚ੍ਛਿਮਾ ਲਹੁਕਤ੍ਤਾ. ਪੁਰਿਮਾ ਪਨ ਪਚ੍ਛਿਮਾਹਿ ਪਚ੍ਛਿਮਾ ਚ ਪੁਰਿਮਾਹਿ ਵਿਸਭਾਗਾਤਿ ਏਵਂ ਸਭਾਗਵਿਸਭਾਗਤੋ ਮਨਸਿਕਾਤਬ੍ਬਾ.

੩੫੫. ਅਜ੍ਝਤ੍ਤਿਕਬਾਹਿਰਵਿਸੇਸਤੋਤਿ ਅਜ੍ਝਤ੍ਤਿਕਾ ਧਾਤੁਯੋ ਵਿਞ੍ਞਾਣਵਤ੍ਥੁਵਿਞ੍ਞਤ੍ਤਿਇਨ੍ਦ੍ਰਿਯਾਨਂ ਨਿਸ੍ਸਯਾ ਹੋਨ੍ਤਿ, ਸਇਰਿਯਾਪਥਾ, ਚਤੁਸਮੁਟ੍ਠਾਨਾ. ਬਾਹਿਰਾ ਵੁਤ੍ਤਵਿਪਰੀਤਪ੍ਪਕਾਰਾਤਿ ਏਵਂ ਅਜ੍ਝਤ੍ਤਿਕਬਾਹਿਰਵਿਸੇਸਤੋ ਮਨਸਿਕਾਤਬ੍ਬਾ.

੩੫੬. ਸਙ੍ਗਹਤੋਤਿ ਕਮ੍ਮਸਮੁਟ੍ਠਾਨਾ ਪਥਵੀਧਾਤੁ ਕਮ੍ਮਸਮੁਟ੍ਠਾਨਾਹਿ ਇਤਰਾਹਿ ਏਕਸਙ੍ਗਹਾ ਹੋਤਿ ਸਮੁਟ੍ਠਾਨਨਾਨਤ੍ਤਾਭਾਵਤੋ. ਤਥਾ ਚਿਤ੍ਤਾਦਿਸਮੁਟ੍ਠਾਨਾ ਚਿਤ੍ਤਾਦਿਸਮੁਟ੍ਠਾਨਾਹੀਤਿ ਏਵਂ ਸਙ੍ਗਹਤੋ ਮਨਸਿਕਾਤਬ੍ਬਾ.

੩੫੭. ਪਚ੍ਚਯਤੋਤਿ ਪਥਵੀਧਾਤੁ ਆਪੋਸਙ੍ਗਹਿਤਾ ਤੇਜੋਅਨੁਪਾਲਿਤਾ ਵਾਯੋਵਿਤ੍ਥਮ੍ਭਿਤਾ ਤਿਣ੍ਣਂ ਮਹਾਭੂਤਾਨਂ ਪਤਿਟ੍ਠਾ ਹੁਤ੍ਵਾ ਪਚ੍ਚਯੋ ਹੋਤਿ. ਆਪੋਧਾਤੁ ਪਥਵੀਪਤਿਟ੍ਠਿਤਾ ਤੇਜੋਅਨੁਪਾਲਿਤਾ ਵਾਯੋਵਿਤ੍ਥਮ੍ਭਿਤਾ ਤਿਣ੍ਣਂ ਮਹਾਭੂਤਾਨਂ ਆਬਨ੍ਧਨਂ ਹੁਤ੍ਵਾ ਪਚ੍ਚਯੋ ਹੋਤਿ. ਤੇਜੋਧਾਤੁ ਪਥਵੀਪਤਿਟ੍ਠਿਤਾ ਆਪੋਸਙ੍ਗਹਿਤਾ ਵਾਯੋਵਿਤ੍ਥਮ੍ਭਿਤਾ ਤਿਣ੍ਣਂ ਮਹਾਭੂਤਾਨਂ ਪਰਿਪਾਚਨਂ ਹੁਤ੍ਵਾ ਪਚ੍ਚਯੋ ਹੋਤਿ. ਵਾਯੋਧਾਤੁ ਪਥਵੀਪਤਿਟ੍ਠਿਤਾ ਆਪੋਸਙ੍ਗਹਿਤਾ ਤੇਜੋਪਰਿਪਾਚਿਤਾ ਤਿਣ੍ਣਂ ਮਹਾਭੂਤਾਨਂ ਵਿਤ੍ਥਮ੍ਭਨਂ ਹੁਤ੍ਵਾ ਪਚ੍ਚਯੋ ਹੋਤੀਤਿ ਏਵਂ ਪਚ੍ਚਯਤੋ ਮਨਸਿਕਾਤਬ੍ਬਾ.

੩੫੮. ਅਸਮਨ੍ਨਾਹਾਰਤੋਤਿ ਪਥਵੀਧਾਤੁ ਚੇਤ੍ਥ ‘‘ਅਹਂ ਪਥਵੀਧਾਤੂ’’ਤਿ ਵਾ, ‘‘ਤਿਣ੍ਣਂ ਮਹਾਭੂਤਾਨਂ ਪਤਿਟ੍ਠਾ ਹੁਤ੍ਵਾ ਪਚ੍ਚਯੋ ਹੋਮੀ’’ਤਿ ਵਾ ਨ ਜਾਨਾਤਿ. ਇਤਰਾਨਿਪਿ ਤੀਣਿ ‘‘ਅਮ੍ਹਾਕਂ ਪਥਵੀਧਾਤੁ ਪਤਿਟ੍ਠਾ ਹੁਤ੍ਵਾ ਪਚ੍ਚਯੋ ਹੋਤੀ’’ਤਿ ਨ ਜਾਨਨ੍ਤਿ. ਏਸ ਨਯੋ ਸਬ੍ਬਤ੍ਥਾਤਿ ਏਵਂ ਅਸਮਨ੍ਨਾਹਾਰਤੋ ਮਨਸਿਕਾਤਬ੍ਬਾ.

੩੫੯. ਪਚ੍ਚਯਵਿਭਾਗਤੋਤਿ ਧਾਤੂਨਂ ਹਿ ਕਮ੍ਮਂ, ਚਿਤ੍ਤਂ, ਆਹਾਰੋ, ਉਤੂਤਿ ਚਤ੍ਤਾਰੋ ਪਚ੍ਚਯਾ. ਤਤ੍ਥ ਕਮ੍ਮਸਮੁਟ੍ਠਾਨਾਨਂ ਕਮ੍ਮਮੇਵ ਪਚ੍ਚਯੋ ਹੋਤਿ, ਨ ਚਿਤ੍ਤਾਦਯੋ. ਚਿਤ੍ਤਾਦਿਸਮੁਟ੍ਠਾਨਾਨਮ੍ਪਿ ਚਿਤ੍ਤਾਦਯੋਵ ਪਚ੍ਚਯਾ ਹੋਨ੍ਤਿ, ਨ ਇਤਰੇ. ਕਮ੍ਮਸਮੁਟ੍ਠਾਨਾਨਞ੍ਚ ਕਮ੍ਮਂ ਜਨਕਪਚ੍ਚਯੋ ਹੋਤਿ, ਸੇਸਾਨਂ ਪਰਿਯਾਯਤੋ ਉਪਨਿਸ੍ਸਯਪਚ੍ਚਯੋ ਹੋਤਿ. ਚਿਤ੍ਤਸਮੁਟ੍ਠਾਨਾਨਂ ਚਿਤ੍ਤਂ ਜਨਕਪਚ੍ਚਯੋ ਹੋਤਿ, ਸੇਸਾਨਂ ਪਚ੍ਛਾਜਾਤਪਚ੍ਚਯੋ ਅਤ੍ਥਿਪਚ੍ਚਯੋ ਅਵਿਗਤਪਚ੍ਚਯੋ ਚ. ਆਹਾਰਸਮੁਟ੍ਠਾਨਾਨਂ ਆਹਾਰੋ ਜਨਕਪਚ੍ਚਯੋ ਹੋਤਿ, ਸੇਸਾਨਂ ਆਹਾਰਪਚ੍ਚਯੋ ਅਤ੍ਥਿਪਚ੍ਚਯੋ ਅਵਿਗਤਪਚ੍ਚਯੋ ਚ. ਉਤੁਸਮੁਟ੍ਠਾਨਾਨਂ ਉਤੁ ਜਨਕਪਚ੍ਚਯੋ ਹੋਤਿ, ਸੇਸਾਨਂ ਅਤ੍ਥਿਪਚ੍ਚਯੋ ਅਵਿਗਤਪਚ੍ਚਯੋ ਚ. ਕਮ੍ਮਸਮੁਟ੍ਠਾਨਂ ਮਹਾਭੂਤਂ ਕਮ੍ਮਸਮੁਟ੍ਠਾਨਾਨਮ੍ਪਿ ਮਹਾਭੂਤਾਨਂ ਪਚ੍ਚਯੋ ਹੋਤਿ ਚਿਤ੍ਤਾਦਿਸਮੁਟ੍ਠਾਨਾਨਮ੍ਪਿ. ਤਥਾ ਚਿਤ੍ਤਸਮੁਟ੍ਠਾਨਂ, ਆਹਾਰਸਮੁਟ੍ਠਾਨਂ. ਉਤੁਸਮੁਟ੍ਠਾਨਂ ਮਹਾਭੂਤਂ ਉਤੁਸਮੁਟ੍ਠਾਨਾਨਮ੍ਪਿ ਮਹਾਭੂਤਾਨਂ ਪਚ੍ਚਯੋ ਹੋਤਿ ਕਮ੍ਮਾਦਿਸਮੁਟ੍ਠਾਨਾਨਮ੍ਪਿ.

ਤਤ੍ਥ ਕਮ੍ਮਸਮੁਟ੍ਠਾਨਾ ਪਥਵੀਧਾਤੁ ਕਮ੍ਮਸਮੁਟ੍ਠਾਨਾਨਂ ਇਤਰਾਸਂ ਸਹਜਾਤਅਞ੍ਞਮਞ੍ਞਨਿਸ੍ਸਯਅਤ੍ਥਿਅਵਿਗਤਵਸੇਨ ਚੇਵ ਪਤਿਟ੍ਠਾਵਸੇਨ ਚ ਪਚ੍ਚਯੋ ਹੋਤਿ, ਨ ਜਨਕਵਸੇਨ. ਇਤਰੇਸਂ ਤਿਸਨ੍ਤਤਿਮਹਾਭੂਤਾਨਂ ਨਿਸ੍ਸਯਅਤ੍ਥਿਅਵਿਗਤਵਸੇਨ ਪਚ੍ਚਯੋ ਹੋਤਿ, ਨ ਪਤਿਟ੍ਠਾਵਸੇਨ ਨ ਜਨਕਵਸੇਨ. ਆਪੋਧਾਤੁ ਚੇਤ੍ਥ ਇਤਰਾਸਂ ਤਿਣ੍ਣਂ ਸਹਜਾਤਾਦਿਵਸੇਨ ਚੇਵ ਆਬਨ੍ਧਨਵਸੇਨ ਚ ਪਚ੍ਚਯੋ ਹੋਤਿ, ਨ ਜਨਕਵਸੇਨ. ਇਤਰੇਸਂ ਤਿਸਨ੍ਤਤਿਕਾਨਂ ਨਿਸ੍ਸਯਅਤ੍ਥਿਅਵਿਗਤਪਚ੍ਚਯਵਸੇਨੇਵ, ਨ ਆਬਨ੍ਧਨਵਸੇਨ ਨ ਜਨਕਵਸੇਨ. ਤੇਜੋਧਾਤੁਪੇਤ੍ਥ ਇਤਰਾਸਂ ਤਿਣ੍ਣਂ ਸਹਜਾਤਾਦਿਵਸੇਨ ਚੇਵ ਪਰਿਪਾਚਨਵਸੇਨ ਚ ਪਚ੍ਚਯੋ ਹੋਤਿ, ਨ ਜਨਕਵਸੇਨ. ਇਤਰੇਸਂ ਤਿਸਨ੍ਤਤਿਕਾਨਂ ਨਿਸ੍ਸਯਅਤ੍ਥਿਅਵਿਗਤਪਚ੍ਚਯਵਸੇਨੇਵ, ਨ ਪਰਿਪਾਚਨਵਸੇਨ, ਨ ਜਨਕਵਸੇਨ. ਵਾਯੋਧਾਤੁਪੇਤ੍ਥ ਇਤਰਾਸਂ ਤਿਣ੍ਣਂ ਸਹਜਾਤਾਦਿਵਸੇਨ ਚੇਵ ਵਿਤ੍ਥਮ੍ਭਨਵਸੇਨ ਚ ਪਚ੍ਚਯੋ ਹੋਤਿ, ਨ ਜਨਕਵਸੇਨ. ਇਤਰੇਸਂ ਤਿਸਨ੍ਤਤਿਕਾਨਂ ਨਿਸ੍ਸਯਅਤ੍ਥਿਅਵਿਗਤਪਚ੍ਚਯਵਸੇਨੇਵ, ਨ ਵਿਤ੍ਥਮ੍ਭਨਵਸੇਨ, ਨ ਜਨਕਵਸੇਨ. ਚਿਤ੍ਤਆਹਾਰਉਤੁਸਮੁਟ੍ਠਾਨਪਥਵੀਧਾਤੁਆਦੀਸੁਪਿ ਏਸੇਵ ਨਯੋ.