੪. ਅਤ੍ਥਾਲਙ੍ਕਾਰਾਵਬੋਧ-ਚਤੁਤ੍ਥਪਰਿਚ੍ਛੇਦ

੧੬੪. ਅਤ੍ਥਾਲਙ੍ਕਾਰਸਹਿਤਾ, ਸਗੁਣਾ ਬਨ੍ਧਪਦ੍ਧਤਿ;

ਅਚ੍ਚਨ੍ਤਕਨ੍ਤਾ ਕਨ੍ਤਾ [ਯਤੋ ਅਚ੍ਚਨ੍ਤਕਨ੍ਤਾ (ਕ.)] ਵ ਵੁਚ੍ਚਨ੍ਤੇ ਤੇ ਤਤੋ’ਧੁਨਾ.

੧੬੫. ਸਭਾਵ, ਵਙ੍ਕਵੁਤ੍ਤੀਨਂ, ਭੇਦਾ ਦ੍ਵਿਧਾ ਅਲਂਕ੍ਰਿਯਾ;

ਪਠਮਾ ਤਤ੍ਥ ਵਤ੍ਥੂਨਂ, ਨਾਨਾਵਤ੍ਥਾ’ਵਿਭਾਵਿਨੀ.

ਯਥਾ

੧੬੬. ਲੀਲਾ ਵਿਕਨ੍ਤਿ ਸੁਭਗੋ, ਦਿਸਾ ਥਿਰ ਵਿਲੋਕਨੋ;

ਬੋਧਿਸਤ੍ਤਙ੍ਕੁਰੋ ਭਾਸਂ, ਵਿਰੋਚਿ ਵਾਚ ਮਾਸਭਿਂ.

੧੬੭. ਵੁਤ੍ਤਿ ਵਤ੍ਥੁਸਭਾਵਸ੍ਸ, ਯਾ’ਞ੍ਞਥਾ ਸਾ’ਪਰਾ ਭਵੇ;

ਤਸ੍ਸਾ’ਨਨ੍ਤਵਿਕਪ੍ਪਤ੍ਤਾ, ਹੋਤਿ ਬੀਜੋ’ਪਦਸ੍ਸਨਂ.

ਵਙ੍ਕਵੁਤ੍ਤਿ ਅਤ੍ਥਾਲਙ੍ਕਾਰ

ਉਦ੍ਦੇਸ

੧੬੮. ਤਤ੍ਥਾ’ਤਿਸਯ, ਉਪਮਾ, ਰੂਪਕਾ, ਵੁਤ੍ਤਿ, ਦੀਪਕਂ,;

ਅਕ੍ਖੇਪੋ, ਤ੍ਥਨ੍ਤਰਨ੍ਯਾਸੋ, ਬ੍ਯਤਿਰੇਕੋ, ਵਿਭਾਵਨਾ.

੧੬੯. ਹੇਤੁ, ਕ੍ਕਮੋ, ਪਿਯਤਰਂ, ਸਮਾਸ, ਪਰਿਕਪ੍ਪਨਾ;

ਸਮਾਹਿਤਂ, ਪਰਿਯਾਯ, ਵੁਤ੍ਤਿ, ਬ੍ਯਾਜੋਪਵਣ੍ਣਨਂ.

੧੭੦. ਵਿਸੇਸ, ਰੁਲ਼੍ਹਾਹਙ੍ਕਾਰਾ, ਸਿਲੇਸੋ, ਤੁਲ੍ਯਯੋਗਿਤਾ;

ਨਿਦਸ੍ਸਨਂ, ਮਹਨ੍ਤਤ੍ਤਂ, ਵਞ੍ਚਨਾ, ਪ੍ਪਕਤਤ੍ਥੁਤਿ,.

੧੭੧. ਏਕਾਵਲਿ, ਅਞ੍ਞਮਞ੍ਞਂ, ਸਹਵੁਤ੍ਤਿ, ਵਿਰੋਧਿਤਾ;

ਪਰਿਵੁਤ੍ਤਿ, ਬ੍ਭਮੋ, ਭਾਵੋ, ਮਿਸ੍ਸ, ਮਾਸੀ, ਰਸੀ, ਇਤਿ.

੧੭੨. ਏਤੇ ਭੇਦਾ ਸਮੁਦ੍ਦਿਟ੍ਠਾ, ਭਾਵੋ ਜੀਵਿਤ ਮੁਚ੍ਚਤੇ;

ਵਙ੍ਕਵੁਤ੍ਤੀਸੁ ਪੋਸੇਸਿ, ਸਿਲੇਸੋ ਤੁ ਸਿਰਿਂ ਪਰਂ.

ਨਿਦ੍ਦੇਸ

੧੭੩. ਪਕਾਸਕਾ ਵਿਸੇਸਸ੍ਸ, ਸਿਯਾ’ਤਿਸਯਵੁਤ੍ਤਿ ਯਾ;

ਲੋਕਾ’ਤਿਕ੍ਕਨ੍ਤਵਿਸਯਾ, ਲੋਕਿਯਾ,ਤਿ ਚ ਸਾ ਦ੍ਵਿਧਾ.

੧੭੪. ਲੋਕਿਯਾਤਿਸਯਸ੍ਸੇ’ਤੇ,

ਭੇਦਾ ਯੇ ਜਾਤਿਆਦਯੋ;

ਪਟਿਪਾਦੀਯਤੇ ਤ੍ਵ’ਜ੍ਜ, ਲੋਕਾਤਿਕ੍ਕਨ੍ਤਗੋਚਰਾ.

੧੭੫. ਪਿਵਨ੍ਤਿ ਦੇਹਕਨ੍ਤੀ ਯੇ, ਨੇਤ੍ਤਞ੍ਜਲਿਪੁਟੇਨ ਤੇ;

ਨਾ’ਲਂ ਹਨ੍ਤੁਂ ਜਿਨੇ’ਸਂ ਤ੍ਵਂ, ਤਣ੍ਹਂ ਤਣ੍ਹਾਹਰੋਪਿ ਕਿਂ?

੧੭੬. ਉਪਮਾਨੋ’ਪਮੇਯ੍ਯਾਨਂ, ਸਧਮ੍ਮਤ੍ਤਂ ਸਿਯੋ’ਪਮਾ;

ਸਦ੍ਦ, ਤ੍ਥਗਮ੍ਮਾ, ਵਾਕ੍ਯਤ੍ਥ, ਵਿਸਯਾ,ਤਿ ਚ ਸਾ ਭਿਧਾ.

੧੭੭. ਸਮਾਸ, ਪਚ੍ਚਯੇ, ਵਾ’ਦੀ, ਸਦ੍ਦਾ ਤੇਸਂ ਵਸਾ ਤਿਧਾ;

ਸਦ੍ਦਗਮ੍ਮਾ ਸਮਾਸੇਨ, ਮੁਨਿਨ੍ਦੋ ਚਨ੍ਦਿਮਾ’ਨਨੋ.

੧੭੮. ਆਯਾਦੀ ਪਚ੍ਚਯਾ ਤੇਹਿ, ਵਦਨਂ ਪਙ੍ਕਜਾਯਤੇ;

ਮੁਨਿਨ੍ਦਨਯਨ ਦ੍ਵਨ੍ਦਂ, ਨੀਲੁਪ੍ਪਲਦਲੀਯਤਿ.

੧੭੯. ਇਵਾਦੀ ਇਵ, ਵਾ, ਤੁਲ੍ਯ, ਸਮਾਨ, ਨਿਭ, ਸਨ੍ਨਿਭਾ;

ਯਥਾ, ਸਙ੍ਕਾਸ, ਤੁਲਿਤ, ਪ੍ਪਕਾਸ, ਪਤਿਰੂਪਕਾ.

੧੮੦. ਸਰੀ, ਸਰਿਕ੍ਖ, ਸਂਵਾਦੀ, ਵਿਰੋਧਿ, ਸਦਿਸਾ, ਵਿਯ;

ਪਟਿਪਕ੍ਖ, ਪਚ੍ਚਨੀਕਾ, ਸਪਕ੍ਖੋ, ਪਮਿਤੋ, ਪਮਾ.

੧੮੧. ਪਟਿਬਿਮ੍ਬ, ਪਟਿਚ੍ਛਨ੍ਨ, ਸਰੂਪ, ਸਮ, ਸਮਿਤਾ;

ਸਵਣ੍ਣਾ, ਭਾ, ਪਟਿਨਿਧਿ, ਸਧਮ੍ਮਾ, ਦਿ ਸਲਕ੍ਖਣਾ.

੧੮੨. ਜਯਤ੍ਯ, ਕ੍ਕੋਸਤਿ, ਹਸਤਿ, ਪਤਿਗਜ੍ਜਤਿ, ਦੂਭਤਿ;

ਉਸੂਯਤ੍ਯ, ਵਜਾਨਾਤਿ, ਨਿਨ੍ਦਤਿ, ਸ੍ਸਤਿ, ਰੁਨ੍ਧਤਿ.

੧੮੩. ਤਸ੍ਸ ਚੋਰੇਤਿ ਸੋਭਗ੍ਗਂ, ਤਸ੍ਸ ਕਨ੍ਤਿਂ ਵਿਲੁਮ੍ਪਤਿ;

ਤੇਨ ਸਦ੍ਧਿਂ ਵਿਵਦਤਿ, ਤੁਲ੍ਯਂ ਤੇਨਾ’ਧਿਰੋਹਤਿ.

੧੮੪. ਕਚ੍ਛਂ ਵਿਗਾਹਤੇ, ਤਸ੍ਸ, ਤ ਮਨ੍ਵੇਤ੍ਯ, ਨੁਬਨ੍ਧਤਿ;

ਤਂਸੀਲਂ, ਤਂਨਿਸੇਧੇਤਿ, ਤਸ੍ਸ ਚਾ’ਨੁਕਰੋਤਿ, ਮੇ.

੧੮੫. ਉਪਮਾਨੋ’ਪਮੇਯ੍ਯਾਨਂ, ਸਧਮ੍ਮਤ੍ਤਂ ਵਿਭਾਵਿਭਿ;

ਇਮੇਹਿ ਉਪਮਾਭੇਦਾ, ਕੇਚਿ ਨਿਯ੍ਯਨ੍ਤਿ ਸਮ੍ਪਤਿ.

੧੮੬. ਵਿਕਾਸਿਪਦੁਮਂ’ਵਾ’ਤਿ, ਸੁਨ੍ਦਰਂ ਸੁਗਤਾ’ਨਨਂ;

ਇਤਿ ਧਮ੍ਮੋਪਮਾ ਨਾਮ, ਤੁਲ੍ਯਧਮ੍ਮਨਿਦਸ੍ਸਨਾ.

੧੮੭. ਧਮ੍ਮਹੀਨਾ ‘‘ਮੁਖ’ਮ੍ਭੋਜ, ਸਦਿਸਂ ਮੁਨਿਨੋ’’ਇਤਿ;

ਵਿਪਰੀਤੋ’ਪਮਾ ‘‘ਤੁਲ੍ਯ, ਮਾਨਨੇਨ’ਮ੍ਬੁਜਂ ਤਵ’’.

੧੮੮. ਤਵਾ’ਨਨ’ਮਿਵ’ਮ੍ਭੋਜਂ, ਅਮ੍ਭੋਜ’ਮਿਵ ਤੇ ਮੁਖਂ;

ਅਞ੍ਞਮਞ੍ਞੋਪਮਾ ਸਾ’ਯਂ, ਅਞ੍ਞਮਞ੍ਞੋਪਮਾਨਤੋ.

੧੮੯. ‘‘ਯਦਿ ਕਿਞ੍ਚਿ ਭਵੇ’ਮ੍ਭੋਜਂ, ਲੋਚਨ’ਬ੍ਭਮੁਵਿਬ੍ਭਮਂ;

ਧਾਰੇਤੁਂ ਮੁਖਸੋਭਂ ਤਂ, ਤਵੇ’’ਤਿ ਅਬ੍ਭੁਤੋਪਮਾ.

੧੯੦. ‘‘ਸੁਗਨ੍ਧਿ ਸੋਭਾ ਸਮ੍ਬਨ੍ਧੀ, ਸਿਸਿਰਂ’ਸੁ ਵਿਰੋਧਿ ਚ;

ਮੁਖਂ ਤਵ’ਮ੍ਬੁਜਂਵੇ’ਤਿ’’, ਸਾ ਸਿਲੇਸੋਪਮਾ ਮਤਾ.

੧੯੧. ਸਰੂਪਸਦ੍ਦਵਾਚ੍ਚਤ੍ਤਾ, ਸਾ ਸਨ੍ਤਾਨੋਪਮਾ ਯਥਾ;

ਬਾਲਾ’ਵੁ’ਯ੍ਯਾਨਮਾਲਾ’ਯਂ, ਸਾ’ਲਕਾ’ਨਨਸੋਭਿਨੀ.

੧੯੨. ਖਯੀ ਚਨ੍ਦੋ, ਬਹੁਰਜਂ, ਪਦੁਮਂ, ਤੇਹਿ ਤੇ ਮੁਖਂ;

ਸਮਾਨਮ੍ਪਿ ਸਮੁਕ੍ਕਂਸਿ, ਤ੍ਯ’ਯਂ ਨਿਨ੍ਦੋਪਮਾ ਮਤਾ.

੧੯੩. ਅਸਮਤ੍ਥੋ ਮੁਖੇਨਿ’ਨ੍ਦੁ, ਜਿਨ! ਤੇ ਪਟਿਗਜ੍ਜਿਤੁਂ;

ਜਲ਼ੋ ਕਲਙ੍ਕੀ’ਤਿ ਅਯਂ, ਪਟਿਸੇਧੋਪਮਾ ਸਿਯਾ.

੧੯੪. ‘‘ਕਚ੍ਛਂ ਚਨ੍ਦਾਰਵਿਨ੍ਦਾਨਂ, ਅਤਿਕ੍ਕਮ੍ਮ ਮੁਖਂ ਤਵ;

ਅਤ੍ਤਨਾ’ਵ ਸਮਂ ਜਾਤ’’, ਮਿਤ੍ਯ’ਸਾਧਾਰਣੋਪਮਾ.

੧੯੫. ‘‘ਸਬ੍ਬ’ਮ੍ਭੋਜ’ਪ੍ਪਭਾਸਾਰੋ, ਰਾਸਿਭੂਤੋ’ਵ ਕਤ੍ਥਚਿ;

ਤਵਾ’ਨਨਂ ਵਿਭਾਤੀ’’ਤਿ, ਹੋਤਾ’ਭੂਤੋਪਮਾ ਅਯਂ.

੧੯੬. ਪਤੀਯਤੇ’ਤ੍ਥਗਮ੍ਮਾ ਤੁ, ਸਦ੍ਦਸਾਮਤ੍ਥਿਯਾ ਕ੍ਵਚਿ;

ਸਮਾਸ, ਪ੍ਪਚ੍ਚਯੇ, ਵਾਦਿ, ਸਦ੍ਦਯੋਗਂ ਵਿਨਾ ਅਪਿ.

੧੯੭. ਭਿਙ੍ਗਾਨੇ’ਮਾਨਿ ਚਕ੍ਖੂਨਿ, ਨਾ’ਮ੍ਬੁਜਂ ਮੁਖ’ਮੇਵਿ’ਦਂ;

ਸੁਬ੍ਯਤ੍ਤਸਦਿਸਤ੍ਤੇਨ, ਸਾ ਸਰੂਪੋਪਮਾ ਮਤਾ.

੧੯੮. ‘‘ਮਯੇ’ਵ ਮੁਖਸੋਭਾ’ਸ੍ਸੇ, ਤ੍ਯਲ’ਮਿਨ੍ਦੁ! ਵਿਕਤ੍ਥਨਾ;

ਯਤੋ’ਮ੍ਬੁਜੇਪਿ ਸਾ’ਤ੍ਥੀਤਿ’’, ਪਰਿਕਪ੍ਪੋਪਮਾ ਅਯਂ.

੧੯੯. ‘‘ਕਿਂ ਵਾ’ਮ੍ਬੁਜ’ਨ੍ਤੋਭਨ੍ਤਾਲਿ, ਕਿਂ ਲੋਲਨਯਨਂ ਮੁਖਂ;

ਮਮ ਦੋਲਾਯਤੇ ਚਿਤ੍ਤ’’, ਮਿਚ੍ਚ’ਯਂ ਸਂਸਯੋਪਮਾ.

੨੦੦. ਕਿਞ੍ਚਿ ਵਤ੍ਥੁਂ ਪਦਸ੍ਸੇਤ੍ਵਾ, ਸਧਮ੍ਮਸ੍ਸਾ’ਭਿਧਾਨਤੋ;

ਸਾਮ੍ਯਪ੍ਪਤੀਤਿਸਬ੍ਭਾਵਾ, ਪਤਿਵਤ੍ਥੁਪਮਾ ਯਥਾ.

੨੦੧. ਜਨੇਸੁ ਜਾਯਮਾਨੇਸੁ, ਨੇ’ਕੋਪਿ ਜਿਨਸਾਦਿਸੋ;

ਦੁਤਿਯੋ ਨਨੁ ਨਤ੍ਥੇ’ਵ, ਪਾਰਿਜਾਤਸ੍ਸ ਪਾਦਪੋ.

੨੦੨. ਵਾਕ੍ਯਤ੍ਥੇਨੇ’ਵ ਵਾਕ੍ਯਤ੍ਥੋ, ਯਦਿ ਕੋਚੂ’ਪਮੀਯਤੇ;

ਇਵਯੁਤ੍ਤਾ, ਵਿਯੁਤ੍ਤਤ੍ਤਾ, ਸਾ ਵਾਕ੍ਯਤ੍ਥੋਪਮਾ ਦ੍ਵਿਧਾ.

ਇਵਯੁਤ੍ਤਾ

੨੦੩. ਜਿਨੋ ਸਂਕ੍ਲੇਸਤਤ੍ਤਾਨਂ, ਆਵਿਭੂਤੋ ਜਨਾਨ’ਯਂ;

ਘਮ੍ਮਸਨ੍ਤਾਪਤਤ੍ਤਾਨਂ, ਘਮ੍ਮਕਾਲੇ’ਮ੍ਬੁਦੋ ਵਿਯ.

ਇਵਵਿਯੁਤ੍ਤਾ

੨੦੪. ਮੁਨਿਨ੍ਦਾਨਨ ਮਾਭਾਤਿ, ਵਿਲਾਸੇਕਮਨੋਹਰਂ;

ਉਦ੍ਧਂ ਸਮੁਗ੍ਗਤਸ੍ਸਾ’ਪਿ, ਕਿਂ ਤੇ ਚਨ੍ਦ ਵਿਜਮ੍ਭਨਾ.

੨੦੫. ਸਮੁਬ੍ਬੇਜੇਤਿ ਧੀਮਨ੍ਤਂ, ਭਿਨ੍ਨਲਿਙ੍ਗਾਦਿਕਂ ਤੁ ਯਂ;

ਉਪਮਾਦੂਸਨਾਯਾ’ਲ, ਮੇਤਂ ਕਤ੍ਥਚਿ ਤਂ ਯਥਾ.

੨੦੬. ਹਂਸੀ’ਵਾ’ਯਂ ਸਸੀ ਭਿਨ੍ਨ, ਲਿਙ੍ਗਾ, ਕਾਸਂ ਸਰਾਨਿ’ਵ;

ਵਿਜਾਤਿ ਵਚਨਾ, ਹੀਨਾ, ਸਾ’ਵ ਭਤ੍ਤੋ ਭਟੋ’ਧਿਪੇ.

੨੦੭. ‘‘ਖਜ੍ਜੋਤੋ ਭਾਣੁਮਾਲੀ’ਵ, ਵਿਭਾਤਿ’’ਤ੍ਯਧਿਕੋਪਮਾ;

ਅਫੁਟ੍ਠਤ੍ਥਾ ‘‘ਬਲਮ੍ਬੋਧਿ, ਸਾਗਰੋ ਵਿਯ ਸਂਖੁਭਿ.’’

੨੦੮. ‘‘ਚਨ੍ਦੇ ਕਲਙ੍ਕੋ ਭਿਙ੍ਗੋ’ਵੇ’, ਤ੍ਯੁ’ਪਮਾਪੇਕ੍ਖਿਨੀ ਅਯਂ;

ਖਣ੍ਡਿਤਾ ਕੇਰਵਾ’ਕਾਰੋ, ਸਕਲਙ੍ਕੋ ਨਿਸਾਕਰੋ.

੨੦੯. ਇਚ੍ਚੇਵਮਾਦਿਰੂਪੇਸੁ, ਭਵਨ੍ਤਿ ਵਿਗਤਾ’ਦਰਾ;

ਕਰੋਨ੍ਤਿ ਚਾ’ਦਰਂ ਧੀਰਾ, ਪਯੋਗੇ ਕ੍ਵਚਿ ਦੇ’ਵ ਤੁ.

੨੧੦. ਇਤ੍ਥੀਯਂ’ਵਾ’ਜਨੋ ਯਾਤਿ, ਵਦਤ੍ਯੇ’ਸਾ ਪੁਮਾ ਵਿਯ;

ਪਿਯੋ ਪਾਣਾ ਇਵਾ’ਯਂ ਮੇ, ਵਿਜ੍ਜਾ ਧਨ’ਮਿਵ’ਚ੍ਚਿਤਾ.

੨੧੧. ਭਵਂ ਵਿਯ ਮਹੀਪਾਲ, ਦੇਵਰਾਜਾ ਵਿਰੋਚਤੇ;

ਅਲ’ਮਂਸੁਮਤੋ ਕਚ੍ਛਂ, ਤੇਜਸਾ ਰੋਹਿਤੁਂ ਅਯਂ.

੨੧੨. ਉਪਮਾਨੋ’ਪਮੇਯ੍ਯਾਨਂ, ਅਭੇਦਸ੍ਸ ਨਿਰੂਪਨਾ;

ਉਪਮਾ’ਵ ਤਿਰੋਭੂਤ, ਭੇਦਾ ਰੂਪਕ ਮੁਚ੍ਚਤੇ.

੨੧੩. ਅਸੇਸ ਵਤ੍ਥੁ ਵਿਸਯਂ, ਏਕਦੇਸ ਵਿਵੁਤ੍ਤਿ [ਵਿਵਤ੍ਤਿ (ਟੀਕਾ)], ਚ;

ਤਂ ਦ੍ਵਿਧਾ ਪੁਨ ਪਚ੍ਚੇਕਂ, ਸਮਾਸਾਦਿਵਸਾ ਤਿਧਾ.

ਅਸੇਸਵਤ੍ਥੁਵਿਸਯਸਮਾਸ

੨੧੪. ਅਙ੍ਗੁਲਿਦਲ ਸਂਸੋਭਿਂ, ਨਖਦੀਧਿਤਿ ਕੇਸਰਂ;

ਸਿਰਸਾ ਨ ਪਿਲਨ੍ਧਨ੍ਤਿ, ਕੇ ਮੁਨਿਨ੍ਦ ਪਦ’ਮ੍ਬੁਜਂ.

ਅਸੇਸਵਤ੍ਥੁਵਿਸਯਅਸਮਾਸ

੨੧੫. ਰਤਨਾਨਿ ਗੁਣਾ ਭੂਰੀ, ਕਰੁਣਾ ਸੀਤਲਂ ਜਲਂ;

ਗਮ੍ਭੀਰਤ੍ਤ ਮਗਾਧਤ੍ਤਂ, ਪਚ੍ਚਕ੍ਖੋ’ਯਂ ਜਿਨੋ’ਮ੍ਬੁਧਿ.

ਅਸੇਸਵਤ੍ਥੁਵਿਸਯਮਿਸ੍ਸਕ

੨੧੬. ਚਨ੍ਦਿਕਾ ਮਨ੍ਦਹਾਸਾ ਤੇ, ਮੁਨਿਨ੍ਦ! ਵਦਨਿ’ਨ੍ਦੁਨੋ;

ਪਬੋਧਯਤ੍ਯ’ਯਂ ਸਾਧੁ, ਮਨੋ ਕੁਮੁਦ ਕਾਨਨਂ.

੨੧੭. ਅਸੇਸਵਤ੍ਥੁਵਿਸਯੇ, ਪਭੇਦੋ ਰੂਪਕੇ ਅਯਂ;

ਏਕਦੇਸਵਿਵੁਤ੍ਤਿਮ੍ਹਿ, ਭੇਦੋ ਦਾਨਿ ਪਵੁਚ੍ਚਤਿ.

ਏਕਦੇਸਵਿਵੁਤ੍ਤਿਸਮਾਸ

੨੧੮. ਵਿਲਾਸ ਹਾਸ ਕੁਸੁਮਂ, ਰੁਚਿਰਾ’ਧਰ ਪਲ੍ਲਵਂ;

ਸੁਖਂ ਕੇ ਵਾ ਨ ਵਿਨ੍ਦਨ੍ਤਿ, ਪਸ੍ਸਨ੍ਤਾ ਮੁਨਿਨੋ ਮੁਖਂ.

ਏਕਦੇਸਵਿਵੁਤ੍ਤਿਅਸਮਾਸ

੨੧੯. ਪਾਦਦ੍ਵਨ੍ਦਂ ਮੁਨਿਨ੍ਦਸ੍ਸ, ਦਦਾਤੁ ਵਿਜਯਂ ਤਵ;

ਨਖਰਂਸੀ ਪਰਂ ਕਨ੍ਤਾ, ਯਸ੍ਸ ਪਾਪਜਯਦ੍ਧਜਾ.

ਏਕਦੇਸਵਿਵੁਤ੍ਤਿਮਿਸ੍ਸਕ

੨੨੦. ਸੁਨਿਮ੍ਮਲਕਪੋਲਸ੍ਸ, ਮੁਨਿਨ੍ਦ ਵਦਨਿ’ਨ੍ਦੁਨੋ;

ਸਾਧੁ’ਪ੍ਪਬੁਦ੍ਧ ਹਦਯਂ, ਜਾਤਂ ਕੇਰਵ ਕਾਨਨਂ.

੨੨੧. ਰੂਪਕਾਨਿ ਬਹੂਨ੍ਯੇ’ਵ [ਟੀਕਾਯਂ ਉਦ੍ਧਟਂ ਯੁਤ੍ਤਰੂਪਕਂ ਸਿਤਪੁਪ੍ਫੁਜਲਂ ਲੋਲ, ਨੇਤ੍ਤਭਿਙ੍ਗ ਤਵਾ’ਨਨਂ; ਕਸ੍ਸ ਨਾਮ ਮਨੋ ਧੀਰ, ਨਾਕਡ੍ਢਤਿ ਮਨੋਹਰਂ;], ਯੁਤ੍ਤਾ, ਯੁਤ੍ਤਾਦਿਭੇਦਤੋ;

ਵਿਸੁਂ ਨ ਤਾਨਿ ਵੁਤ੍ਤਾਨਿ, ਏਤ੍ਥੇ’ਵ’ਨ੍ਤੋਗਧਾਨਿ’ਤਿ.

੨੨੨. ‘‘ਚਨ੍ਦਿਮਾ’ਕਾਸਪਦੁਮ’’, ਮਿਚ੍ਚੇਤਂ ਖਣ੍ਡਰੂਪਕਂ;

ਦੁਟ੍ਠ, ‘‘ਮਮ੍ਬੋਰੁਹਵਨਂ, ਨੇਤ੍ਤਾਨਿ’ਚ੍ਚਾ’’ਦਿ ਸੁਨ੍ਦਰਂ.

੨੨੩. ਪਰਿਯਨ੍ਤੋ ਵਿਕਪ੍ਪਾਨਂ, ਰੂਪਕਸ੍ਸੋ’ਪਮਾਯ ਚ;

ਨਤ੍ਥਿ ਯਂ ਤੇਨ ਵਿਞ੍ਞੇਯ੍ਯਂ, ਅਵੁਤ੍ਤ ਮਨੁਮਾਨਤੋ.

੨੨੪. ਪੁਨਪ੍ਪੁਨ ਮੁਚ੍ਚਾਰਣਂ [ਪੁਨਪ੍ਪੁਨੁਚ੍ਚਾਰਣਂ ਯਂ (ਸੀ. ਕ.)], ਯਮਤ੍ਥਸ੍ਸ, ਪਦਸ੍ਸ ਚ;

ਉਭਯੇਸਞ੍ਚ ਵਿਞ੍ਞੇਯ੍ਯਾ, ਸਾ’ਯ’ਮਾਵੁਤ੍ਤਿ ਨਾਮਤੋ.

ਅਤ੍ਥਾਵੁਤ੍ਤਿ

੨੨੫. ਮਨੋ ਹਰਤਿ ਸਬ੍ਬੇਸਂ, ਆਦਦਾਤਿ ਦਿਸਾ ਦਸ;

ਗਣ੍ਹਾਤਿ ਨਿਮ੍ਮਲਤ੍ਤਞ੍ਚ, ਯਸੋਰਾਸਿ ਜਿਨਸ੍ਸ’ਯਂ.

ਪਦਾਵੁਤ੍ਤਿ

੨੨੬. ਵਿਭਾਸੇਨ੍ਤਿ ਦਿਸਾ ਸਬ੍ਬਾ, ਮੁਨਿਨੋ ਦੇਹਕਨ੍ਤਿਯੋ;

ਵਿਭਾ ਸੇਨ੍ਤਿ ਚ ਸਬ੍ਬਾਪਿ, ਚਨ੍ਦਾਦੀਨਂ ਹਤਾ ਵਿਯ.

ਉਭਯਾਵੁਤ੍ਤਿ

੨੨੭. ਜਿਤ੍ਵਾ ਵਿਹਰਤਿ ਕ੍ਲੇਸ, ਰਿਪੁਂ ਲੋਕੇ ਜਿਨੋ ਅਯਂ;

ਵਿਹਰਤ੍ਯ’ਰਿਵਗ੍ਗੋ’ਯਂ, ਰਾਸਿਭੂਤੋ’ਵ ਦੁਜ੍ਜਨੇ.

੨੨੮. ਏਕਤ੍ਥ ਵਤ੍ਤਮਾਨਮ੍ਪਿ, ਸਬ੍ਬਵਾਕ੍ਯੋ’ਪਕਾਰਕਂ;

ਦੀਪਕਂ ਨਾਮ ਤਂ ਚਾਦਿ, ਮਜ੍ਝ, ਨ੍ਤਵਿਸਯਂ ਤਿਧਾ.

ਆਦਿ ਦੀਪਕ

੨੨੯. ਅਕਾਸਿ ਬੁਦ੍ਧੋ ਵੇਨੇਯ੍ਯ, ਬਨ੍ਧੂਨ ਮਮਿਤੋ’ਦਯਂ;

ਸਬ੍ਬਪਾਪੇਹਿ ਚ ਸਮਂ, ਨੇਕਤਿਤ੍ਥਿਯਮਦ੍ਦਨਂ.