੫. ਭਾਵਾਵਬੋਧ-ਪਞ੍ਚਮਪਰਿਚ੍ਛੇਦ

੩੩੮. ਪਟਿਭਾਨਵਤਾ ਲੋਕ, ਵੋਹਾਰ’ਮਨੁਸਾਰਿਨਾ;

ਤਤੋ’ਚਿਤ੍ਯ ਸਮੁਲ੍ਲਾਸ, ਵੇਦਿਨਾ ਕਵਿਨਾ ਪਰਂ.

੩੩੯. ਠਾਯਿਸਮ੍ਬਨ੍ਧਿਨੋ ਭਾਵ, ਵਿਭਾਵਾ ਸਾ’ਨੁਭਾਵਕਾ;

ਸਮ੍ਬਜ੍ਝਨ੍ਤਿ ਨਿਬਨ੍ਧਾ ਤੇ, ਰਸ’ਸ੍ਸਾਦਾਯ ਸਾਧੁਨਂ.

ਭਾਵਅਧਿਪ੍ਪਾਯ

੩੪੦. ਚਿਤ੍ਤ ਵੁਤ੍ਤਿ ਵਿਸੇਸਾ ਤੁ, ਭਾਵਯਨ੍ਤਿ ਰਸੇ ਯਤੋ;

ਰਤ੍ਯਾਦਯੋ ਤਤੋ ਭਾਵ, ਸਦ੍ਦੇਨ ਪਰਿਕਿਤ੍ਤਿਤਾ.

ਠਾਯੀਭਾਵਅਧਿਪ੍ਪਾਯ

੩੪੧. ਵਿਰੋਧਿਨਾ’ਞ੍ਞਭਾਵੇਨ, ਯੋ ਭਾਵੋ ਨ ਤਿਰੋਹਿਤੋ;

ਸੀਲੇਨ ਤਿਟ੍ਠਤਿ’ਚ੍ਚੇਸੋ, ‘ਠਾਯੀਭਾਵੋ’ਤਿ ਸਦ੍ਦਿਤੋ.

ਠਾਯੀਭਾਵਪ੍ਪਭੇਦਉਦ੍ਦੇਸ

੩੪੨. ਰਤਿ, ਹਸ੍ਸੋ, ਚ ਸੋਕੋ, ਚ,

ਕੋਧੁ, ਸ੍ਸਾਹਾ, ਭਯਂ,ਪਿ ਚ;

ਜਿਗੁਚ੍ਛਾ, ਵਿਮ੍ਹਯੋ, ਚੇਵ, ਸਮੋ ਚ ਨਵ ਠਾਯਿਨੋ.

ਬ੍ਯਭਿਚਾਰੀਭਾਵਅਧਿਪ੍ਪਾਯ

੩੪੩. ਤਿਰੋਭਾਵਾ, ਵਿਭਾਵਾ’ਦਿ, ਵਿਸੇਸਨਾ’ਭਿਮੁਖ੍ਯਤੋ;

ਯੇ ਤੇ ਚਰਨ੍ਤਿ ਸੀਲੇਨ, ਤੇ ਹੋਨ੍ਤਿ ਬ੍ਯਭਿਚਾਰਿਨੋ.

ਬ੍ਯਭਿਚਾਰਿਭਾਵਪਭੇਦ

੩੪੪. ਨਿਬ੍ਬੇਦੋ, ਤਕ੍ਕ, ਸਙ੍ਕਾ, ਸਮ,

ਧਿਤਿ, ਜਲ਼ਤਾ, ਦੀਨਤੁ, ਗ੍ਗਾ, ਲਸਤ੍ਤਂ,

ਸੁਤ੍ਤਂ, ਤਾਸੋ, ਗਿਲਾਨੁ, ਸ੍ਸੁਕ, ਹਰਿਸ,

ਸਤਿ, ਸ੍ਸਾ, ਵਿਸਾਦਾ, ਬਹਿਤ੍ਥਾ [ਬਹਿਦ੍ਧਾ (ਕ.)];

ਚਿਨ੍ਤਾ, ਗਬ੍ਬਾ, ਪਮਾਰੋ, ਮਰਿਸ, ਮਦ,

ਮਤੁ, ਮ੍ਮਾਦ, ਮੋਹਾ, ਵਿਬੋਧੋ,

ਨਿਦ੍ਦਾ, ਵੇਗਾ, ਸਬਿਲਂ, ਮਰਣ,

ਚਪਲਤਾ [ਸਚਪਲਾ (ਕ.)], ਬ੍ਯਾਧਿ, ਤੇਤ੍ਤਿਂਸ ਮੇਤੇ.

ਸਤ੍ਤਿਕਭਾਵਅਧਿਪ੍ਪਾਯ

੩੪੫. ਸਮਾਹਿਤ’ਤ੍ਤ’ਪ੍ਪਭਵਂ, ਸਤ੍ਤਂ [ਸਤ੍ਵਂ (ਕ.)] ਤੇਨੋ’ਪਪਾਦਿਤਾ;

ਸਤ੍ਤਿਕਾ [ਸਾਤ੍ਵਿਕਾ (ਕ.)] ਪ੍ਯ’ਨੁਭਾਵਤ੍ਤੇ, ਵਿਸੁਂ ਭਾਵਾ ਭਵਨ੍ਤਿ ਤੇ.

ਸਤ੍ਤਿਕਭਾਵਪ੍ਪਭੇਦ

੩੪੬. ਥਮ੍ਭੋ, ਪਲ਼ਯ, ਰੋਮਞ੍ਚਾ, ਤਥਾ ਸੇਦ, ਸ੍ਸੁ, ਵੇਪਥੁ;

ਵੇਵਣ੍ਣਿਯਂ, ਵਿਸਰਤਾ, ਭਾਵਾ’ਟ੍ਠੇ’ਤੇ ਤੁ ਸਤ੍ਤਿਕਾ.

੩੪੭. ਯਦਾ ਰਤ੍ਯਾਦਯੋ ਭਾਵਾ, ਠਿਤਿਸੀਲਾ ਨ ਹੋਨ੍ਤਿ ਚੇ;

ਤਦਾ ਸਬ੍ਬੇਪਿ ਤੇ ਭਾਵਾ, ਭਵਨ੍ਤਿ ਬ੍ਯਭਿਚਾਰਿਨੋ.

੩੪੮. ਵਿਭਾਵੋ ਕਾਰਣਂ ਤੇਸੁ, ਪ੍ਪਤ੍ਤਿਯੁ’ਦ੍ਦੀਪਨੇ ਤਥਾ;

ਯੋ ਸਿਯਾ ਬੋਧਕੋ ਤੇਸਂ,

ਅਨੁਭਾਵੋ’ਯ ਮੀਰਿਤੋ.

੩੪੯. ਨੇਕਹੇਤੁਂ ਮਨੋਵੁਤ੍ਤਿ, ਵਿਸੇਸਞ੍ਚ ਵਿਭਾਵਿਤੁਂ;

ਭਾਵਂ ਵਿਭਾਵਾ’ਨੁਭਾਵਾ, ਵਣ੍ਣਿਯਾ ਬਨ੍ਧਨੇ ਫੁਟਂ.

੩੫੦. ਸਵਿਭਾਵਾ’ਨੁਭਾਵੇਹਿ, ਭਾਵਾ ਤੇ ਤੇ ਯਥਾਰਹਂ;

ਵਣ੍ਣਨੀਯਾ ਯਥੋ’ਚਿਤ੍ਯਂ, ਲੋਕਰੂਪਾ’ਨੁਗਾਮਿਨਾ.

੩੫੧. ਚਿਤ੍ਤ ਵੁਤ੍ਤਿ ਵਿਸੇਸਤ੍ਤਾ, ਮਾਨਸਾ ਸਤ੍ਤਿਕਾ’ਙ੍ਗਤੋ;

ਬਹਿ ਨਿਸ੍ਸਟ ਸੇਦਾਦਿ, ਅਨੁਭਾਵੇਹਿ ਵਣ੍ਣਿਯਾ.

ਰਸਅਧਿਪ੍ਪਾਯ

੩੫੨. ਸਾਮਾਜਿਕਾਨ ਮਾਨਨ੍ਦੋ, ਯੋ ਬਨ੍ਧਤ੍ਥਾ’ਨੁਸਾਰਿਨਂ;

ਰਸੀਯਤੀਤਿ ਤਞ੍ਞੂਹਿ, ਰਸੋ ਨਾਮਾ’ਯ’ਮੀਰਿਤੋ.

ਰਸਪ੍ਪਭੇਦ

੩੫੩. ਸਵਿਭਾਵਾ, ਨੁਭਾਵੇਹਿ, ਸਤ੍ਤਿਕ,ਬ੍ਯਭਿਚਾਰਿਭਿ;

ਅਸ੍ਸਾਦਿਯਤ੍ਤ ਮਾਨੀਯ, ਮਾਨੋ ਠਾਯੇ’ਵ ਸੋ ਰਸੋ.

੩੫੪. ਸਿਙ੍ਗਾਰ,ਹਸ੍ਸ,ਕਰੁਣਾ, ਰੁਦ੍ਦ,ਵੀਰ,ਭਯਾਨਕਾ;

ਬੀਭਚ੍ਛ,ਬ੍ਭੁਤ,ਸਨ੍ਤਾ, ਚ, ਰਸਾ ਠਾਯੀਨ ਨੁਕ੍ਕਮਾ.

੩੫੫. ਦੁਕ੍ਖਰੂਪੇ’ਯ’ ਮਾਨਨ੍ਦੋ, ਕਥਂ ਨੁ ਕਰੁਣਾਦਿਕੇ?

ਸਿਯਾ ਸੋਤੂਨਮਾਨਨ੍ਦੋ,

ਸੋਕੋ ਵੇਸ੍ਸਨ੍ਤਰਸ੍ਸ ਹਿ.

ਠਾਯੀਭਾਵ ਨਿਦ੍ਦੇਸ ਰਤਿਟ੍ਠਾਯੀਭਾਵ

੩੫੬. ਰਮ੍ਮ,ਦੇਸ, ਕਲਾ, ਕਾਲ, ਵੇਸਾਦਿ, ਪਟਿਸੇਵਨਾ;

ਯੁਵਾਨ’ਞ੍ਞੋਞ੍ਞਰਤ੍ਤਾਨਂ, ਪਮੋਦੋ ਰਤਿ ਰੁਚ੍ਚਤੇ.

੩੫੭. ਯੁਤ੍ਯਾ ਭਾਵਾਨੁਭਾਵਾ ਤੇ, ਨਿਬਨ੍ਧਾ ਪੋਸਯਨ੍ਤਿ ਨਂ;

ਸੋਪ੍ਯ’ਯੋਗ, ਵਿਪ੍ਪਯੋਗ, ਸਮ੍ਭੋਗਾਨਂ ਵਸਾ ਤਿਧਾ.

ਹਸ੍ਸਟ੍ਠਾਯੀਭਾਵ

੩੫੮. ਵਿਕਾਰਾ’ਕਤਿਆਦੀਹਿ, ਅਤ੍ਤਨੋ ਥ ਪਰਸ੍ਸ ਵਾ;

ਹਸ੍ਸੋ ਨਿਦ੍ਦਾ, ਸਮਾ’ਲਸ੍ਯ, ਮੁਚ੍ਛਾਦਿ,ਬ੍ਯਭਿਚਾਰਿਭਿ;

ਪਰਿਪੋਸੇ ਸਿਯਾ ਹਸ੍ਸੋ, ਭਿਯ੍ਯੋ’ਤ੍ਥਿਪਭੁਤੀਨਂ ਸੋ.

ਹਸ੍ਸਪ੍ਪਭੇਦ

੩੫੯. ਸਿਤ ਮਿਹ ਵਿਕਾਸਿ ਨਯਨਂ,

ਕਿਞ੍ਚਾ’ਲਕ੍ਖਿਯ ਦਿਜਂ ਤੁ ਤਂ ਹਸਿਤਂ;

ਮਧੁਰਸ੍ਸਰਂ ਵਿਹਸਿਤਂ, ਅਂਸਸਿਰੋਕਮ੍ਪਮੁਪਹਸਿਤਂ.

੩੬੦. ਅਪਹਸਿਤਂ ਸਜਲ’ਕ੍ਖਿ, ਵਿਕ੍ਖਿਤ੍ਤਙ੍ਗਂ ਭਵਤ੍ਯ’ਤਿਹਸਿਤਂ;

ਦ੍ਵੇ ਦ੍ਵੇ ਕਥਿਤਾ ਚੇ’ਸਂ,

ਜੇਟ੍ਠੇ [ਮਜ੍ਝੇ’ਧਮੇਤਿ ਏਤ੍ਥ ਮਜ੍ਝੇ ਅਧਮੇਤਿ ਪਦਚ੍ਛੇਦੋ] ਮਜ੍ਝੇ’ਧਮੇ ਚ ਕਮਸੋ.

ਕਰੁਣਟ੍ਠਾਯੀਭਾਵ

੩੬੧. ਸੋਕਰੂਪੋ ਤੁ ਕਰੁਣੋ, ਨਿਟ੍ਠਪ੍ਪਤ੍ਤਿ’ਟ੍ਠ ਨਾਸਤੋ;

ਤਤ੍ਥਾ’ਨੁਭਾਵਾ ਰੁਦਿਤ, ਪਲ਼ਯ,ਤ੍ਥਮ੍ਭਕਾਦਯੋ;

ਵਿਸਾਦਾ,ਲਸ੍ਯ,ਮਰਣ, ਚਿਨ੍ਤਾ’ਦੀ ਬ੍ਯਭਿਚਾਰਿਨੋ.

ਰੁਦ੍ਦਟ੍ਠਾਯੀਭਾਵ

੩੬੨. ਕੋਧੋ ਮਚ੍ਛਰਿਯਾ’ਦੀਹਿ, ਪੋਸੇ ਤਾਸ, ਮਦਾਦਿਭਿ;

ਨਯਨਾ’ਰੁਣਤਾਦੀਹਿ, ਰੁਦ੍ਦੋ ਨਾਮ ਰਸੋ ਭਵੇ.

ਵੀਰਟ੍ਠਾਯੀਭਾਵ

੩੬੩. ਪਤਾਪ, ਵਿਕ੍ਕਮਾ’ਦੀਹੁ, ਸ੍ਸਾਹੋ ‘ਵੀਰੋ’ਤਿ ਸਞ੍ਞਿਤੋ;

ਰਣ,ਦਾਨ,ਦਯਾਯੋਗਾ, ਵੀਰੋ’ਯਂ ਤਿਵਿਧੋ ਭਵੇ;

ਤੇਵਾ’ਨੁਭਾਵਾ ਧਿਤਿ,ਮ, ਤ੍ਯਾ’ਦਯੋ ਬ੍ਯਭਿਚਾਰਿਨੋ.

ਭਯਟ੍ਠਾਯੀਭਾਵ

੩੬੪. ਵਿਕਾਰਾ,ਸਨਿ,ਸਤ੍ਤਾ’ਦਿ, ਭਯੁ’ਕ੍ਕਂਸੋ ਭਯਾਨਕੋ;

ਸੇਦਾ’ਦਯੋ ਨੁਭਾਵੇ’ਤ੍ਥ, ਤਾਸਾ’ਦੀ ਬ੍ਯਭਿਚਾਰਿਨੋ.

ਜਿਗੁਚ੍ਛਾਟ੍ਠਾਯੀਭਾਵ

੩੬੫. ਜਿਗੁਚ੍ਛਾ ਰੁਧਿਰਾ’ਦੀਹਿ, ਪੂਤ੍ਯਾ’ਦੀਹਿ ਵਿਰਾਗਤੋ;

ਬੀਭਚ੍ਛੋ ਖੋਭਨੁ’ਬ੍ਬੇਗੀ, ਕਮੇਨ ਕਰੁਣਾਯੁਤੋ;

ਨਾਸਾ ਵਿਕੂਣਨਾਦੀਹਿ, ਸਙ੍ਕਾਦੀਹਿ’ਸ੍ਸ ਪੋਸਨਂ.

ਵਿਮ੍ਹਯਟ੍ਠਾਯੀਭਾਵ

੩੬੬. ਅਤਿ ਲੋਕ ਪਦਤ੍ਥੇਹਿ, ਵਿਮ੍ਹਯੋ’ਯਂ ਰਸੋ’ਬ੍ਭੁਤੋ;

ਤਸ੍ਸਾ’ਨੁਭਾਵਾ ਸੇਦ,ਸ੍ਸੁ, ਸਾਧੁਵਾਦਾ’ਦਯੋ ਸਿਯੁਂ;

ਤਾਸਾ,ਵੇਗ,ਧਿਤਿ,ਪ੍ਪਞ੍ਞਾ, ਹੋਨ੍ਤੇ’ਤ੍ਥ ਬ੍ਯਭਿਚਾਰਿਨੋ.

ਸਮਟ੍ਠਾਯੀਭਾਵ

੩੬੭. ਠਾਯੀਭਾਵੋ ਸਮੋ ਮੇਤ੍ਤਾ, ਦਯਾ,ਮੋਦਾ’ਦਿ ਸਮ੍ਭਵੋ;

ਭਾਵਾਦੀਹਿ ਤ’ਦੁਕ੍ਕਂਸੋ, ਸਨ੍ਤੋ ਸਨ੍ਤ ਨਿਸੇਵਿਤੋ.

ਇਤਿ ਸਙ੍ਘਰਕ੍ਖਿਤ ਮਹਾਸਾਮਿਵਿਰਚਿਤੇ ਸੁਬੋਧਾਲਙ੍ਕਾਰੇ

ਰਸਭਾਵਾ’ਵਬੋਧੋ ਨਾਮ

ਪਞ੍ਚਮੋ ਪਰਿਚ੍ਛੇਦੋ.

ਸੁਬੋਧਾਲਙ੍ਕਾਰੋ ਸਮਤ੍ਤੋ.