ਨਮੋ ਤਸ੍ਸ ਭਗਵਤੋ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ

ਸੁਬੋਧਾਲਙ੍ਕਾਰੋ

੧. ਦੋਸਾਵਬੋਧ-ਪਠਮਪਰਿਚ੍ਛੇਦ

ਰਤਨਤ੍ਤਯਪ੍ਪਣਾਮ

੧. ਮੁਨਿਨ੍ਦਵਦਨਮ੍ਭੋਜ, ਗਬ੍ਭਸਮ੍ਭਵਸੁਨ੍ਦਰੀ;

ਸਰਣਂ ਪਾਣਿਨਂ ਵਾਣੀ, ਮਯ੍ਹਂ ਪੀਣਯਤਂ ਮਨਂ.

ਨਿਮਿਤ੍ਤ

੨. ਰਾਮ, ਸਮ੍ਮਾ’ਦ੍ਯ’ਲਙ੍ਕਾਰਾ, ਸਨ੍ਤਿ ਸਨ੍ਤੋ ਪੁਰਾਤਨਾ;

ਤਥਾਪਿ ਤੁ ਵਲ਼ਞ੍ਜੇਨ੍ਤਿ, ਸੁਦ੍ਧਮਾਗਧਿਕਾ ਨ ਤੇ.

ਅਭਿਧਾਨਾਦਿਕਂ

੩. ਤੇਨਾ’ਪਿ ਨਾਮ ਤੋਸੇਯ੍ਯ, ਮੇਤੇ ਲਙ੍ਕਾਰਵਜ੍ਜਿਤੇ;

ਅਨੁਰੂਪੇਨਾ’ਲਙ੍ਕਾਰੇ, ਨੇ’ਸ ਮੇਸੋ ਪਰਿਸ੍ਸਮੋ.

੪. ਯੇਸਂ ਨ ਸਞ੍ਚਿਤਾ ਪਞ੍ਞਾ, ਨੇਕਸਤ੍ਥਨ੍ਤਰੋ’ਚਿਤਾ;

ਸਮ੍ਮੋਹ’ਬ੍ਭਾਹਤਾ ਵੇ’ਤੇ, ਨਾਵਬੁਜ੍ਝਨ੍ਤਿ ਕਿਞ੍ਚਿਪਿ.

੫. ਕਿਂ ਤੇਹਿ ਪਾਦਸੁਸ੍ਸੂਸਾ, ਯੇਸਂ ਨਤ੍ਥਿ ਗਰੂਨਿ’ਹ;

ਯੇ ਤਪ੍ਪਾਦਰਜੋਕਿਣ੍ਣਾ, ਤੇ’ਵ ਸਾਧੂ ਵਿਵੇਕਿਨੋ.

੬. ਕਬ੍ਬ, ਨਾਟਕਨਿਕ੍ਖਿਤ੍ਤ, ਨੇਤ੍ਤਚਿਤ੍ਤਾ ਕਵਿਜ੍ਜਨਾ;

ਯਂਕਿਞ੍ਚਿ ਰਚਯਨ੍ਤੇ’ਤਂ, ਨ ਵਿਮ੍ਹਯਕਰਂ ਪਰਂ.

੭. ਤੇਯੇ’ਵ ਪਟਿਭਾਵੇਨ੍ਤੋ, ਸੋ’ਵ ਬਨ੍ਧੋ ਸਵਿਮ੍ਹਯੋ;

ਯੇਨ ਤੋਸੇਨ੍ਤਿ ਵਿਞ੍ਞੂ ਯੇ, ਤਤ੍ਥ ਪ੍ਯ’ਵਿਹਿਤਾ’ਦਰਾ.

੮. ਬਨ੍ਧੋ ਚ ਨਾਮ ਸਦ੍ਦ,ਤ੍ਥਾ, ਸਹਿਤਾ ਦੋਸਵਜ੍ਜਿਤਾ;

ਪਜ੍ਜ ਗਜ੍ਜ ਵਿਮਿਸ੍ਸਾਨਂ, ਭੇਦੇਨਾ’ਯਂ ਤਿਧਾ ਭਵੇ.

੯. ਨਿਬਨ੍ਧੋ ਚਾ’ਨਿਬਨ੍ਧੋ ਚ, ਪੁਨ ਦ੍ਵਿਧਾ ਨਿਰੁਪ੍ਪਤੇ;

ਤਂ ਤੁ ਪਾਪੇਨ੍ਤ੍ਯ’ਲਙ੍ਕਾਰਾ, ਵਿਨ੍ਦਨੀਯਤਰਤ੍ਤਨਂ.

੧੦. ਅਨਵਜ੍ਜਂ ਮੁਖਮ੍ਭੋਜ [‘‘ਅਮ੍ਭੋਜ’’ਨ੍ਤਿ ਪਦਂ ਪਾਲ਼ਿਯਂ ਨਤ੍ਥਿ, ਵਾਰਿਜਵਾਚਕਂ, ਸਕ੍ਕਟਗਨ੍ਥਤੋ ਅਨੀਤਂ], ਮਨਵਜ੍ਜਾ ਚ ਭਾਰਤੀ;

ਅਲਙ੍ਕਤਾ’ਵ ਸੋਭਨ੍ਤੇ, ਕਿਂ ਨੁ ਤੇ ਨਿਰ’ਲਙ੍ਕਤਾ?

੧੧. ਵਿਨਾ ਗਰੂਪਦੇਸਂ ਤਂ, ਬਾਲੋ’ਲਙ੍ਕਤ੍ਤੁ ਮਿਚ੍ਛਤਿ;

ਸਮ੍ਪਾਪੁਣੇ ਨ ਵਿਞ੍ਞੂਹਿ, ਹਸ੍ਸਭਾਵਂ ਕਥਂ ਨੁ ਸੋ?

੧੨. ਗਨ੍ਥੋਪਿ ਕਵਿਵਾਚਾਨ, ਮਲਙ੍ਕਾਰ’ਪ੍ਪਕਾਸਕੋ;

ਯਾਤਿ ਤਬ੍ਬਚਨੀਯਤ੍ਤਂ, ਤ’ਬ੍ਬੋਹਾਰੂ’ਪਚਾਰਤੋ.

੧੩. ਦ੍ਵਿਪ੍ਪਕਾਰਾ ਅਲਙ੍ਕਾਰਾ, ਤਤ੍ਥ ਸਦ੍ਦ, ਤ੍ਥਭੇਦਤੋ;

ਸਦ੍ਦਤ੍ਥਾ ਬਨ੍ਧਨਾਮਾ’ਵ, ਤਂਸਜ੍ਜਿਤ ਤਦਾਵਲਿ.

੧੪. ਗੁਣਾਲਙ੍ਕਾਰਸਂਯੁਤ੍ਤਾ, ਅਪਿ ਦੋਸਲਵ’ਙ੍ਕਿਤਾ;

ਪਸਂਸਿਯਾ ਨ ਵਿਞ੍ਞੂਹਿ, ਸਾ ਕਞ੍ਞਾ ਵਿਯ ਤਾਦਿਸੀ.

੧੫. ਤੇਨ ਦੋਸਨਿਰਾਸੋ’ਵ, ਮਹੁਸ੍ਸਾਹੇਨ ਸਾਧਿਯੋ;

ਨਿਦ੍ਦੋਸਾ ਸਬ੍ਬਥਾ ਸਾ’ਯਂ, ਸਗੁਣਾ ਨ ਭਵੇਯ੍ਯ ਕਿਂ?

੧੬. ਸਾ’ਲਙ੍ਕਾਰਵਿਯੁਤ੍ਤਾ’ਪਿ, ਗੁਣਯੁਤ੍ਤਾ ਮਨੋਹਰਾ;

ਨਿਦ੍ਦੋਸਾ ਦੋਸਰਹਿਤਾ, ਗੁਣਯੁਤ੍ਤਾ ਵਧੂ ਵਿਯ.

੧੭. ਪਦੇ ਵਾਕ੍ਯੇ ਤਦਤ੍ਥੇ ਚ, ਦੋਸਾ ਯੇ ਵਿਵਿਧਾ ਮਤਾ;

ਸੋ’ਦਾਹਰਣ ਮੇਤੇਸਂ, ਲਕ੍ਖਣਂ ਕਥਯਾਮ੍ਯ’ਹਂ.

ਪਦਦੋਸ ਉਦ੍ਦੇਸ

੧੮. ਵਿਰੁਦ੍ਧਤ੍ਥਨ੍ਤਰਾ, ਝਤ੍ਥ, ਕਿਲਿਟ੍ਠਾਨਿ, ਵਿਰੋਧਿ ਚ;

ਨੇਯ੍ਯਂ, ਵਿਸੇਸਨਾਪੇਕ੍ਖਂ, ਹੀਨਤ੍ਥਕ ਮਨਤ੍ਥਕਂ.

ਵਾਕ੍ਯਦੋਸ ਉਦ੍ਦੇਸ

੧੯. ਦੋਸਾ ਪਦਾਨ ਵਾਕ੍ਯਾਨ, ਮੇਕਤ੍ਥਂ ਭਗ੍ਗਰੀਤਿਕਂ;

ਤਥਾ ਬ੍ਯਾਕਿਣ੍ਣ ਗਾਮ੍ਮਾਨਿ, ਯਤਿਹੀਨਂ ਕਮਚ੍ਚੁਤਂ;

ਅਤਿਵੁਤ੍ਤ ਮਪੇਤਤ੍ਥਂ, ਸਬਨ੍ਧਫਰੁਸਂ ਤਥਾ.

ਵਾਕ੍ਯਤ੍ਥਦੋਸਉਦ੍ਦੇਸ

੨੦. ਅਪਕ੍ਕਮੋ’, ਚਿਤ੍ਯਹੀਨਂ, ਭਗ੍ਗਰੀਤਿ, ਸਸਂਸਯਂ;

ਗਾਮ੍ਮਂ ਦੁਟ੍ਠਾਲਙ੍ਕਤੀਤਿ, ਦੋਸਾ ਵਾਕ੍ਯਤ੍ਥਨਿਸ੍ਸਿਤਾ.

ਪਦਦੋਸਨਿਦ੍ਦੇਸ

੨੧. ਵਿਰੁਦ੍ਧਤ੍ਥਨ੍ਤਰਂ ਤਞ੍ਹਿ, ਯਸ੍ਸ’ਞ੍ਞਤ੍ਥੋ ਵਿਰੁਜ੍ਝਤਿ;

ਅਧਿਪ੍ਪੇਤੇ ਯਥਾ ਮੇਘੋ, ਵਿਸਦੋ ਸੁਖਯੇ ਜਨਂ.

੨੨. ਵਿਸੇਸ੍ਯ ਮਧਿਕਂ ਯੇਨਾ, ਝਤ੍ਥ ਮੇਤਂ ਭਵੇ ਯਥਾ;

ਓਭਾਸਿਤਾ’ਸੇਸਦਿਸੋ, ਖਜ੍ਜੋਤੋ’ਯਂ ਵਿਰਾਜਤੇ.

੨੩. ਯਸ੍ਸ’ਤ੍ਥਾ’ਵਗਮੋ ਦੁਕ੍ਖੋ, ਪਕਤ੍ਯਾ’ਦਿਵਿਭਾਗਤੋ;

ਕਿਲਿਟ੍ਠਂ ਤਂ ਯਥਾ ਤਾਯ, ਸੋ’ਯ ਮਾਲਿਙ੍ਗ੍ਯਤੇ ਪਿਯਾ.

੨੪. ਯਂ ਕਿਲਿਟ੍ਠਪਦਂ ਮਨ੍ਦਾ, ਭਿਧੇਯ੍ਯਂ ਯਮਕਾਦਿਕਂ;

ਕਿਲਿਟ੍ਠਪਦਦੋਸੇ’ਵ, ਤਮ੍ਪਿ ਅਨ੍ਤੋ ਕਰੀਯਤਿ.

੨੫. ਪਤੀਤਸਦ੍ਦਰਚਿਤਂ, ਸਿਲਿਟ੍ਠਪਦਸਨ੍ਧਿਕਂ;

ਪਸਾਦਗੁਣਸਂਯੁਤ੍ਤਂ, ਯਮਕਂ ਮਤ ਮੇਦਿਸਂ.

੨੬. ਅਬ੍ਯਪੇਤਂ ਬ੍ਯਪੇਤ’ਞ੍ਞ, ਮਾਵੁਤ੍ਤਾ’ਨੇਕਵਣ੍ਣਜਂ;

ਯਮਕਂ ਤਞ੍ਚ ਪਾਦਾਨ, ਮਾਦਿ, ਮਜ੍ਝ, ਨ੍ਤ, ਗੋਚਰਂ.

ਅਬ੍ਯਪੇਤ ਪਠਮਪਾਦਾਦਿ ਯਮਕਂ

੨੭. ਸੁਜਨਾ’ਸੁਜਨਾ ਸਬ੍ਬੇ, ਗੁਣੇਨਾਪਿ ਵਿਵੇਕਿਨੋ;

ਵਿਵੇਕਂ ਨ ਸਮਾਯਨ੍ਤਿ, ਅਵਿਵੇਕਿਜਨਨ੍ਤਿਕੇ.

ਅਬ੍ਯਪੇਤ ਪਠਮ ਦੁਤਿਯ ਪਾਦਾਦਿ ਯਮਕਂ

੨੮. ਕੁਸਲਾ’ਕੁਸਲਾ ਸਬ੍ਬੇ, ਪਬਲਾ’ਪਬਲਾ ਥਵਾ;

ਨੋ ਯਾਤਾ ਯਾਵ’ਹੋਸਿਤ੍ਤਂ, ਸੁਖਦੁਕ੍ਖਪ੍ਪਦਾ ਸਿਯੁਂ;

ਅਬ੍ਯਪੇਤ ਪਠਮ ਦੁਤਿਯ ਤਤਿਯਪਾਦਾਦਿ ਯਮਕਂ.

੨੯. ਸਾਦਰਂ ਸਾ ਦਰਂ ਹਨ੍ਤੁ, ਵਿਹਿਤਾ ਵਿਹਿਤਾ ਮਯਾ;

ਵਨ੍ਦਨਾ ਵਨ੍ਦਨਾਮਾਨ, ਭਾਜਨੇ ਰਤਨਤ੍ਤਯੇ.

ਅਬ੍ਯਪੇਤ ਚਤੁਕ੍ਕਪਾਦਾਦਿ ਯਮਕਂ

੩੦. ਕਮਲਂ ਕ’ਮਲਂ ਕਤ੍ਤੁਂ, ਵਨਦੋ ਵਨਦੋ’ਮ੍ਬਰਂ;

ਸੁਗਤੋ ਸੁਗਤੋ ਲੋਕਂ, ਸਹਿਤਂ ਸ ਹਿਤਂ ਕਰਂ.

੩੧. ਅਬ੍ਯਪੇਤਾਦਿਯਮਕ, ਸ੍ਸੇਸੋ ਲੇਸੋ ਨਿਦਸ੍ਸਿਤੋ;

ਞੇਯ੍ਯਾਨਿ’ਮਾਯੇਵ ਦਿਸਾ, ਯ’ਞ੍ਞਾਨਿ ਯਮਕਾਨਿਪਿ.

੩੨. ਅਚ੍ਚਨ੍ਤਬਹਵੋ ਤੇਸਂ, ਭੇਦਾ ਸਮ੍ਭੇਦਯੋਨਿਯੋ;

ਤਥਾਪਿ ਕੇਚਿ ਸੁਕਰਾ, ਕੇਚਿ ਅਚ੍ਚਨ੍ਤਦੁਕ੍ਕਰਾ.

੩੩. ਯਮਕਂ ਤਂ ਪਹੇਲੀ [ਪਹੇਲ਼ਿ (ਕ.)] ਚ, ਨੇਕਨ੍ਤਮਧੁਰਾਨਿ’ਤਿ;

ਉਪੇਕ੍ਖਿਯਨ੍ਤਿ ਸਬ੍ਬਾਨਿ, ਸਿਸ੍ਸਖੇਦਭਯਾ ਮਯਾ.

੩੪. ਦੇਸਕਾਲਕਲਾਲੋਕ, ਞਾਯਾਗਮਵਿਰੋਧਿ ਯਂ;

ਤਂ ਵਿਰੋਧਿਪਦਂ ਚੇ’ਤ, ਮੁਦਾਹਰਣਤੋ ਫੁਟਂ.

੩੫. ਯ ਦਪ੍ਪਤੀਤ ਮਾਨੀਯ, ਵਤ੍ਤਬ੍ਬਂ ਨੇਯ੍ਯ ਮਾਹੁ ਤਂ;

ਯਥਾ ਸਬ੍ਬਾਪਿ ਧਵਲਾ, ਦਿਸਾ ਰੋਚਨ੍ਤਿ ਰਤ੍ਤਿਯਂ.

੩੬. ਨੇਦਿਸਂ ਬਹੁ ਮਞ੍ਞਨ੍ਤਿ, ਸਬ੍ਬੇ ਸਬ੍ਬਤ੍ਥ ਵਿਞ੍ਞੁਨੋ;

ਦੁਲ੍ਲਭਾ’ਵਗਤੀ ਸਦ੍ਦ, ਸਾਮਤ੍ਥਿਯਵਿਲਙ੍ਘਿਨੀ.

੩੭. ਸਿਯਾ ਵਿਸੇਸਨਾਪੇਕ੍ਖਂ, ਯਂ ਤਂ ਪਤ੍ਵਾ ਵਿਸੇਸਨਂ;

ਸਾਤ੍ਥਕਂ ਤਂ ਯਥਾ ਤਂ ਸੋ, ਭਿਯ੍ਯੋ ਪਸ੍ਸਤਿ ਚਕ੍ਖੁਨਾ.

੩੮. ਹੀਨਂ ਕਰੇ ਵਿਸੇਸ੍ਯਂ ਯਂ, ਤਂ ਹੀਨਤ੍ਥਂ ਭਵੇ ਯਥਾ;

ਨਿਪ੍ਪਭੀ ਕਤ ਖਜ੍ਜੋਤੋ, ਸਮੁਦੇਤਿ ਦਿਵਾਕਰੋ.

੩੯. ਪਾਦਪੂਰਣਮਤ੍ਤਂ ਯਂ, ਅਨਤ੍ਥਮਿਤਿ ਤਂ ਮਤਂ;

ਯਥਾ ਹਿ ਵਨ੍ਦੇ ਬੁਦ੍ਧਸ੍ਸ, ਪਾਦਪਙ੍ਕੇਰੁਹਂ ਪਿ ਚ.

ਵਾਕ੍ਯਦੋਸ ਨਿਦ੍ਦੇਸ

੪੦. ਸਦ੍ਦਤੋ ਅਤ੍ਥਤੋ ਵੁਤ੍ਤਂ, ਯਤ੍ਥ ਭਿਯ੍ਯੋਪਿ ਵੁਚ੍ਚਤਿ;

ਤ ਮੇਕਤ੍ਥਂ ਯਥਾ’ਭਾਤਿ, ਵਾਰਿਦੋ ਵਾਰਿਦੋ ਅਯਂ.

ਯਥਾ ਚ

੪੧. ਤਿਤ੍ਥਿਯਙ੍ਕੁਰਬੀਜਾਨਿ, ਜਹਂ ਦਿਟ੍ਠਿਗਤਾਨਿ’ਹ;

ਪਸਾਦੇਤਿ ਪਸਨ੍ਨੇ’ਸੋ, ਮਹਾਮੁਨਿ ਮਹਾਜਨੇ.

੪੨. ਆਰਦ੍ਧਕ੍ਕਮਵਿਚ੍ਛੇਦਾ, ਭਗ੍ਗਰੀਤਿ ਭਵੇ ਯਥਾ;

ਕਾਪਿ ਪਞ੍ਞਾ, ਕੋਪਿ ਪਗੁਣੋ, ਪਕਤੀਪਿ ਅਹੋ ਤਵ.

੪੩. ਪਦਾਨਂ ਦੁਬ੍ਬਿਨਿਕ੍ਖੇਪਾ, ਬ੍ਯਾਮੋਹੋ ਯਤ੍ਥ ਜਾਯਤਿ;

ਤਂ ਬ੍ਯਾਕਿਣ੍ਣਨ੍ਤਿ ਵਿਞ੍ਞੇਯ੍ਯਂ, ਤਦੁਦਾਹਰਣਂ ਯਥਾ.

੪੪. ਬਹੁਗੁਣੇ ਪਣਮਤਿ, ਦੁਜ੍ਜਨਾਨਂ ਪ੍ਯਯਂ ਜਨੋ;

ਹਿਤਂ ਪਮੁਦਿਤੋ ਨਿਚ੍ਚਂ, ਸੁਗਤਂ ਸਮਨੁਸ੍ਸਰਂ.

੪੫. ਵਿਸਿਟ੍ਠਵਚਨਾ’ਪੇਤਂ, ਗਾਮ੍ਮਂ’ਤ੍ਯ’ਭਿਮਤਂ ਯਥਾ;

ਕਞ੍ਞੇ ਕਾਮਯਮਾਨਂ ਮਂ, ਨ ਕਾਮਯਸਿ ਕਿਂਨ੍ਵਿ’ਦਂ?

੪੬. ਪਦਸਨ੍ਧਾਨਤੋ ਕਿਞ੍ਚਿ, ਦੁਪ੍ਪਤੀਤਿਕਰਂ ਭਵੇ;

ਤਮ੍ਪਿ ਗਾਮ੍ਮਂ ਤ੍ਯ’ਭਿਮਤਂ, ਯਥਾ ਯਾਭਵਤੋ ਪਿਯਾ.

੪੭. ਵੁਤ੍ਤੇਸੁ ਸੂਚਿਤੇ ਟ੍ਠਾਨੇ, ਪਦਚ੍ਛੇਦੋ ਭਵੇ ਯਤਿ;

ਯਂ ਤਾਯ ਹੀਨਂ ਤਂ ਵੁਤ੍ਤਂ, ਯਤਿਹੀਨਨ੍ਤਿ ਸਾ ਪਨ.

੪੮. ਯਤਿ ਸਬ੍ਬਤ੍ਥਪਾਦਨ੍ਤੇ, ਵੁਤ੍ਤਡ੍ਢੇ ਚ ਵਿਸੇਸਤੋ;

ਪੁਬ੍ਬਾਪਰਾਨੇਕਵਣ੍ਣ, ਪਦਮਜ੍ਝੇਪਿ ਕਤ੍ਥਚਿ.

ਤਤ੍ਥੋਦਾਹਰਣਪਚ੍ਚੁਦਾਹਰਣਾਨਿ ਯਥਾ

੪੯. ਤਂ ਨਮੇ ਸਿਰਸਾ ਚਾਮਿ, ਕਰਵਣ੍ਣਂ ਤਥਾਗਤਂ;

ਸਕਲਾਪਿ ਦਿਸਾ ਸਿਞ੍ਚ, ਤਿਵ ਸੋਣ੍ਣਰਸੇਹਿ ਯੋ.

੫੦. ਸਰੋ ਸਨ੍ਧਿਮ੍ਹਿ ਪੁਬ੍ਬਨ੍ਤੋ, ਵਿਯ ਲੋਪੇ ਵਿਭਤ੍ਤਿਯਾ;

ਅਞ੍ਞਥਾ ਤ੍ਵ’ਞ੍ਞਥਾ ਤਤ੍ਥ, ਯਾ’ਦੇਸਾਦਿ ਪਰਾ’ਦਿ’ਵ.

੫੧. ਚਾਦੀ ਪੁਬ੍ਬਪਦਨ੍ਤਾ’ਵ, ਨਿਚ੍ਚਂ ਪੁਬ੍ਬਪਦਸ੍ਸਿਤਾ;

ਪਾਦਯੋ ਨਿਚ੍ਚਸਮ੍ਬਨ੍ਧਾ, ਪਰਾਦੀਵ ਪਰੇਨ ਤੁ.

ਸਬ੍ਬਤ੍ਥੋਦਾਹਰਣਾਨਿ ਯਥਾ

੫੨. ਨਮੇ ਤਂ ਸਿਰਸਾ ਸਬ੍ਬੋ, ਪਮਾ’ਤੀਤਂ ਤਥਾਗਤਂ;

ਯਸ੍ਸ ਲੋਕਗ੍ਗਤਂ ਪਤ੍ਤ, ਸ੍ਸੋ’ਪਮਾ ਨ ਹਿ ਯੁਜ੍ਜਤਿ.

੫੩. ਮੁਨਿਨ੍ਦਂ ਤਂ ਸਦਾ ਵਨ੍ਦਾ, ਮ੍ਯ’ਨਨ੍ਤਮਤਿ ਮੁਤ੍ਤਮਂ;

ਯਸ੍ਸ ਪਞ੍ਞਾ ਚ ਮੇਤ੍ਤਾ ਚ, ਨਿਸ੍ਸੀਮਾਤਿ ਵਿਜਮ੍ਭਤਿ.

ਚਾਦਿਪਾਦੀਸੁ ਪਚ੍ਚੁਦਾਹਰਣਾਨਿ ਯਥਾ

੫੪. ਮਹਾਮੇਤ੍ਤਾ ਮਹਾਪਞ੍ਞਾ, ਚ ਯਤ੍ਥ ਪਰਮੋਦਯਾ;

ਪਣਮਾਮਿ ਜਿਨਂ ਤਂ ਪ, ਵਰਂ ਵਰਗੁਣਾ’ਲਯਂ.

੫੫. ਪਦਤ੍ਥਕ੍ਕਮਤੋ ਮੁਤ੍ਤਂ, ਕਮਚ੍ਚੁਤ ਮਿਦਂ ਯਥਾ;

ਖੇਤ੍ਤਂ ਵਾ ਦੇਹਿ ਗਾਮਂ ਵਾ, ਦੇਸਂ ਵਾ ਮਮ ਸੋਭਨਂ.

੫੬. ਲੋਕਿਯਤ੍ਥ ਮਤਿਕ੍ਕਨ੍ਤਂ, ਅਤਿਵੁਤ੍ਤਂ ਮਤਂ ਯਥਾ;

ਅਤਿਸਮ੍ਬਾਧ ਮਾਕਾਸ, ਮੇਤਿਸ੍ਸਾ ਥਨਜਮ੍ਭਨੇ.

੫੭. ਸਮੁਦਾਯਤ੍ਥਤੋ’ਪੇਤਂ, ਤਂ ਅਪੇਤਤ੍ਥਕਂ ਯਥਾ;

ਗਾਵਿਪੁਤ੍ਤੋ ਬਲਿਬਦ੍ਧੋ, ਤਿਣਂ ਖਾਦੀ ਪਿਵੀ ਜਲਂ.

੫੮. ਬਨ੍ਧੇ ਫਰੁਸਤਾ ਯਤ੍ਥ, ਤਂ ਬਨ੍ਧਫਰੁਸਂ ਯਥਾ;

ਖਰਾ ਖਿਲਾ ਪਰਿਕ੍ਖੀਣਾ, ਖੇਤ੍ਤੇ ਖਿਤ੍ਤਂ ਫਲਤ੍ਯ’ਲਂ.

ਵਾਕ੍ਯਤ੍ਥਦੋਸ ਨਿਦ੍ਦੇਸ

੫੯. ਞੇਯ੍ਯਂ ਲਕ੍ਖਣ ਮਨ੍ਵਤ੍ਥ, ਵਸੇਨਾ’ਪਕ੍ਕਮਾਦਿਨਂ;

ਉਦਾਹਰਣ ਮੇਤੇਸਂ, ਦਾਨਿ ਸਨ੍ਦਸ੍ਸਯਾਮ੍ਯ’ਹਂ.

ਤਤ੍ਥਾ’ਪਕ੍ਕਮਂ ਯਥਾ

੬੦. ਭਾਵਨਾ, ਦਾਨ, ਸੀਲਾਨਿ, ਸਮ੍ਮਾ ਸਮ੍ਪਾਦਿਤਾਨਿ’ਹ;

ਭੋਗ, ਸਗ੍ਗਾਦਿ, ਨਿਬ੍ਬਾਨ, ਸਾਧਨਾਨਿ ਨ ਸਂਸਯੋ.

ਓਚਿਤ੍ਯਹੀਨਂ ਯਥਾ

੬੧. ਪੂਜਨੀਯਤਰੋ ਲੋਕੇ, ਅਹ ਮੇਕੋ ਨਿਰਨ੍ਤਰਂ;

ਮਯੇਕਸ੍ਮਿਂ ਗੁਣਾ ਸਬ੍ਬੇ, ਯਤੋ ਸਮੁਦਿਤਾ ਅਹੁਂ.

ਯਥਾ ਚ

੬੨. ਯਾਚਿਤੋ’ਹਂ ਕਥਂ ਨਾਮ, ਨ ਦਜ੍ਜਾਮ੍ਯ’ਪਿ ਜੀਵਿਤਂ;

ਤਥਾਪਿ ਪੁਤ੍ਤਦਾਨੇਨ, ਵੇਧਤੇ ਹਦਯਂ ਮਮ.

ਭਗ੍ਗਰੀਤਿ ਯਥਾ

੬੩. ਇਤ੍ਥੀਨਂ ਦੁਜ੍ਜਨਾਨਞ੍ਚ, ਵਿਸ੍ਸਾਸੋ ਨੋਪਪਜ੍ਜਤੇ;