੩. ਗੁਣਾਵਬੋਧ-ਤਤਿਯਪਰਿਚ੍ਛੇਦ

ਅਨੁਸਨ੍ਧਿ

੧੧੬. ਸਮ੍ਭਵਨ੍ਤਿ ਗੁਣਾ ਯਸ੍ਮਾ, ਦੋਸਾਨੇ’ਵ’ਮਤਿਕ੍ਕਮੇ;

ਦਸ੍ਸੇਸ੍ਸਂ ਤੇ ਤਤੋ ਦਾਨਿ, ਸਦ੍ਦੇ ਸਮ੍ਭੂਸਯਨ੍ਤਿ ਯੇ.

ਸਦ੍ਦਾਲਙ੍ਕਾਰ ਉਦ੍ਦੇਸ

੧੧੭. ਪਸਾਦੋ’ਜੋ, ਮਧੁਰਤਾ, ਸਮਤਾ, ਸੁਖੁਮਾਲਤਾ;

ਸਿਲੇਸੋ’ਦਰਤਾ, ਕਨ੍ਤਿ, ਅਤ੍ਥਬ੍ਯਤ੍ਤਿ, ਸਮਾਧਯੋ.

ਸਦ੍ਦਾਲਙ੍ਕਾਰ ਪਯੋਜਨ

੧੧੮. ਗੁਣੇਹੇ’ਤੇਹਿ ਸਮ੍ਪਨ੍ਨੋ, ਬਨ੍ਧੋ ਕਵਿਮਨੋਹਰੋ;

ਸਮ੍ਪਾਦਿਯਤਿ ਕਤ੍ਤੂਨਂ, ਕਿਤ੍ਤਿ ਮਚ੍ਚਨ੍ਤਨਿਮ੍ਮਲਂ.

ਸਦ੍ਦਾਲਙ੍ਕਾਰ ਨਿਦ੍ਦੇਸ

੧੧੯. ਅਦੂਰਾਹਿਤਸਮ੍ਬਨ੍ਧ, ਸੁਭਗਾ ਯਾ ਪਦਾ’ਵਲਿ;

ਸੁਪਸਿਦ੍ਧਾ’ਭਿਧੇਯ੍ਯਾ’ਯਂ, ਪਸਾਦਂ ਜਨਯੇ ਯਥਾ.

੧੨੦. ਅਲਙ੍ਕਰੋਨ੍ਤਾ ਵਦਨਂ, ਮੁਨਿਨੋ’ਧਰਰਂਸਿਯੋ;

ਸੋਭਨ੍ਤੇ’ਰੁਣਰਂਸੀ’ਵ, ਸਮ੍ਪਤਨ੍ਤਾ’ਮ੍ਬੁਜੋ’ਦਰੇ.

੧੨੧. ਓਜੋ ਸਮਾਸਬਾਹੁਲ੍ਯ, ਮੇਸੋ ਗਜ੍ਜਸ੍ਸ ਜੀਵਿਤਂ;

ਪਜ੍ਜੇਪ੍ਯ’ਨਾ’ਕੁਲੋ ਸੋ’ਯਂ,

ਕਨ੍ਤੋ ਕਾਮੀਯਤੇ ਯਥਾ.

੧੨੨. ਮੁਨਿਨ੍ਦ ਮਨ੍ਦ ਸਞ੍ਜਾਤ, ਹਾਸ ਚਨ੍ਦਨ ਲਿਮ੍ਪਿਤਾ;

ਪਲ੍ਲਵਾ ਧਵਲਾ ਤਸ੍ਸੇ, ਵੇਕੋ ਨਾ’ਧਰਪਲ੍ਲਵੋ.

੧੨੩. ਪਦਾ’ਭਿਧੇਯ੍ਯਵਿਸਯਂ, ਸਮਾਸ ਬ੍ਯਾਸ ਸਮ੍ਭਵਂ;

ਯਂ ਪਾਰਿਣਤ੍ਯਂ ਹੋਤੀ’ਹ, ਸੋਪਿ ਓਜੋ’ਵ ਤਂ ਯਥਾ.

੧੨੪. ਜੋਤਯਿਤ੍ਵਾਨ ਸਦ੍ਧਮ੍ਮਂ, ਸਨ੍ਤਾਰੇਤ੍ਵਾ ਸਦੇਵਕੇ;

ਜਲਿਤ੍ਵਾ ਅਗ੍ਗਿਖਨ੍ਧੋ’ਵ, ਨਿਬ੍ਬੁਤੋ ਸੋ ਸਸਾਵਕੋ.

੧੨੫. ਮਤ੍ਥਕਟ੍ਠੀ ਮਤਸ੍ਸਾ’ਪਿ, ਰਜੋਭਾਵਂ ਵਜਨ੍ਤੁ ਮੇ;

ਯਤੋ ਪੁਞ੍ਞੇਨ ਤੇ ਸੇਨ੍ਤੁ, ਜਿਨ ਪਾਦ’ਮ੍ਬੁਜਦ੍ਵਯੇ.

੧੨੬. ਇਚ੍ਚਤ੍ਰ ਨਿਚ੍ਚਪ੍ਪਣਤਿ, ਗੇਧੋ ਸਾਧੁ ਪਦਿਸ੍ਸਤਿ;

ਜਾਯਤੇ’ਯਂ ਗੁਣੋ ਤਿਕ੍ਖ, ਪਞ੍ਞਾਨਮਭਿਯੋਗਤੋ.

੧੨੭. ਮਧੁਰਤ੍ਤਂ ਪਦਾਸਤ੍ਤਿ, ਰ’ਨੁਪ੍ਪਾਸਵਸਾ ਦ੍ਵਿਧਾ;

ਸਿਯਾ ਸਮਸੁਤਿ ਪੁਬ੍ਬਾ, ਵਣ੍ਣਾ’ਵੁਤ੍ਤਿ ਪਰੋ ਯਥਾ.

੧੨੮. ਯਦਾ ਏਸੋ’ਭਿਸਮ੍ਬੋਧਿਂ, ਸਮ੍ਪਤ੍ਤੋ ਮੁਨਿਪੁਙ੍ਗਵੋ;

ਤਦਾ ਪਭੁਤਿ ਧਮ੍ਮਸ੍ਸ, ਲੋਕੇ ਜਾਤੋ ਮਹੁ’ਸ੍ਸਵੋ.

੧੨੯. ਮੁਨਿਨ੍ਦਮਨ੍ਦਹਾਸਾ ਤੇ, ਕੁਨ੍ਦ ਸਨ੍ਦੋਹਵਿਬ੍ਭਮਾ;

ਦਿਸਨ੍ਤ ਮਨੁਧਾਵਨ੍ਤਿ, ਹਸਨ੍ਤਾ ਚਨ੍ਦਕਨ੍ਤਿਯੋ.

੧੩੦. ਸਬ੍ਬਕੋਮਲਵਣ੍ਣੇਹਿ, ਨਾ’ਨੁਪ੍ਪਾਸੋ ਪਸਂਸਿਯੋ;

ਯਥਾ’ਯਂ ਮਾਲਤੀਮਾਲਾ, ਲਿਨ ਲੋਲਾ’ਲਿਮਾਲਿਨੀ.

੧੩੧. ਮੁਦੂਹਿ ਵਾ ਕੇਵਲੇਹਿ, ਕੇਵਲੇਹਿ ਫੁਟੇਹਿ ਵਾ,

ਮਿਸ੍ਸੇਹਿ ਵਾ ਤਿਧਾ ਹੋਤਿ, ਵਣ੍ਣੇਹਿ ਸਮਤਾ ਯਥਾ.

ਕੇਵਲਮੁਦੁਸਮਤਾ

੧੩੨. ਕੋਕਿਲਾ’ਲਾਪਸਂਵਾਦੀ, ਮੁਨਿਨ੍ਦਾ’ਲਾਪਵਿਬ੍ਭਮੋ;

ਹਦਯਙ੍ਗਮਤਂ ਯਾਤਿ, ਸਤਂ ਦੇਤਿ ਚ ਨਿਬ੍ਬੁਤਿਂ.

ਕੇਵਲਫੁਟਸਮਤਾ

੧੩੩. ਸਮ੍ਭਾਵਨੀਯਸਮ੍ਭਾਵਂ, ਭਗਵਨ੍ਤਂ ਭਵਨ੍ਤਗੁਂ;

ਭਵਨ੍ਤਸਾਧਨਾ’ਕਙ੍ਖੀ, ਕੋ ਨ ਸਮ੍ਭਾਵਯੇ ਵਿਭੁਂ.

ਮਿਸ੍ਸਕਸਮਤਾ

੧੩੪. ਲਦ੍ਧਚਨ੍ਦਨਸਂਸਗ੍ਗ, ਸੁਗਨ੍ਧਿ ਮਲਯਾ’ਨਿਲੋ;

ਮਨ੍ਦ ਮਾਯਾਤਿ ਭੀਤੋ’ਵ, ਮੁਨਿਨ੍ਦਮੁਖਮਾਰੁਤਾ.

੧੩੫. ਅਨਿਟ੍ਠੁਰ’ਕ੍ਖਰ’ਪ੍ਪਾਯਾ, ਸਬ੍ਬਕੋਮਲ ਨਿਸ੍ਸਟਾ;

ਕਿਚ੍ਛਮੁਚ੍ਚਾਰਣਾ’ਪੇਤ, ਬ੍ਯਞ੍ਜਨਾ ਸੁਖੁਮਾਲਤਾ.

੧੩੬. ਪਸ੍ਸਨ੍ਤਾ ਰੂਪਵਿਭਵਂ, ਸੁਣਨ੍ਤਾ ਮਧੁਰਂ ਗਿਰਂ;

ਚਰਨ੍ਤਿ ਸਾਧੂ [ਸਾਧੁ (ਸੀ-ਛਨ੍ਧਾਨੁਰਕ੍ਖਣਤ੍ਥਂ)] ਸਮ੍ਬੁਦ੍ਧ, ਕਾਲੇ ਕੇਲ਼ਿਪਰਮ੍ਮੁਖਾ.

੧੩੭. ਅਲਙ੍ਕਾਰਵਿਹੀਨਾ’ਪਿ, ਸਤਂ ਸਮ੍ਮੁਖਤੇ’ਦਿਸੀ;

ਆਰੋਹਤਿ ਵਿਸੇਸੇਨ, ਰਮਣੀਯਾ ਤ’ਦੁਜ੍ਜਲਾ.

੧੩੮. ਰੋਮਞ੍ਚ ਪਿਞ੍ਛ ਰਚਨਾ, ਸਾਧੁ ਵਾਦਾਹਿਤਦ੍ਧਨੀ;

ਲਲ਼ਨ੍ਤਿ’ਮੇ ਮੁਨਿਮੇਘੁ, ਮ੍ਮਦਾ ਸਾਧੁ ਸਿਖਾਵਲਾ.

੧੩੯. ਸੁਖੁਮਾਲਤ੍ਤ ਮਤ੍ਥੇ’ਵ, ਪਦਤ੍ਥਵਿਸਯਮ੍ਪਿ ਚ;

ਯਥਾ ਮਤਾਦਿਸਦ੍ਦੇਸੁ, ਕਿਤ੍ਤਿਸੇਸਾਦਿਕਿਤ੍ਤਨਂ.

੧੪੦. ਸਿਲਿਟ੍ਠ ਪਦ ਸਂਸਗ੍ਗ, ਰਮਣੀਯ ਗੁਣਾ’ਲਯੋ;

ਸਬਨ੍ਧਗਾਰਵੋ ਸੋ’ਯਂ, ਸਿਲੇਸੋ ਨਾਮ ਤਂ ਯਥਾ.

੧੪੧. ਬਾਲਿ’ਨ੍ਦੁਵਿਬ੍ਭਮ’ਚ੍ਛੇਦਿ, ਨਖਰਾ’ਵਲਿ ਕਨ੍ਤਿਭਿ;

ਸਾ ਮੁਨਿਨ੍ਦਪਦ’ਮ੍ਭੋਜ, ਕਨ੍ਤਿ ਵੋ ਵਲਿਤਾ’ਵਤਂ.

੧੪੨. ਉਕ੍ਕਂਸਵਨ੍ਤੋ ਯੋਕੋਚਿ, ਗੁਣੋ ਯਦਿ ਪਤੀਯਤੇ;

ਉਦਾਰੋ’ਯਂ ਭਵੇ ਤੇਨ, ਸਨਾਥਾ ਬਨ੍ਧਪਦ੍ਧਤਿ.

੧੪੩. ਪਾਦਮ੍ਭੋਜ ਰਜੋ ਲਿਤ੍ਤ, ਗਤ੍ਤਾ ਯੇ ਤਵ ਗੋਤਮ;

ਅਹੋ! ਤੇ ਜਨ੍ਤਵੋ ਯਨ੍ਤਿ, ਸਬ੍ਬਥਾ ਨਿਰਜਤ੍ਤਨਂ.

੧੪੪. ਏਵਂ ਜਿਨਾ’ਨੁਭਾਵਸ੍ਸ, ਸਮੁਕ੍ਕਂਸੋ’ਤ੍ਰ ਦਿਸ੍ਸਤਿ;

ਪਞ੍ਞਵਾ ਵਿਧਿਨਾ’ਨੇਨ, ਚਿਨ੍ਤਯੇ ਪਰ ਮੀਦਿਸਂ.

੧੪੫. ਉਦਾਰੋ ਸੋਪਿ ਵਿਞ੍ਞੇਯ੍ਯੋ, ਯਂ ਪਸਤ੍ਥ ਵਿਸੇਸਨਂ;

ਯਥਾ ਕੀਲ਼ਾਸਰੋ ਲੀਲਾ, ਹਾਸੋ ਹੇਮਙ੍ਗਦਾ’ਦਯੋ.

੧੪੬. ਲੋਕਿਯ’ਤ੍ਥਾ’ਨ’ਤਿਕ੍ਕਨ੍ਤਾ, ਕਨ੍ਤਾ ਸਬ੍ਬਜਨਾਨਪਿ;

ਕਨ੍ਤਿ ਨਾਮਾ’ਤਿਵੁਤ੍ਤਸ੍ਸ, ਵੁਤ੍ਤਾ ਸਾ ਪਰਿਹਾਰਤੋ.

ਯਥਾ ਮੁਨਿਨ੍ਦ ਇਚ੍ਚਾਦਿ.

੧੪੭. ਅਤ੍ਥਬ੍ਯਤ੍ਤਾ’ਭਿਧੇਯ੍ਯਸ੍ਸਾ,

ਨੇਯ੍ਯਤਾ ਸਦ੍ਦਤੋ’ਤ੍ਥਤੋ;

ਸਾ’ਯਂ ਤਦੁਭਯਾ ਨੇਯ੍ਯ, ਪਰਿਹਾਰੇ ਪਦਸ੍ਸਿਤਾ;

ਯਥਾ ਮਰੀਚਿਚ੍ਚਾਦਿ ਚ, ਮਨੋਨੁਰਞ੍ਜਨੋਚ੍ਚਾਦਿ.

ਪੁਨ ਅਤ੍ਥੇਨ ਯਥਾ

੧੪੮. ਸਭਾਵਾ’ਮਲਤਾ ਧੀਰ, ਮੁਧਾ ਪਾਦਨਖੇਸੁ ਤੇ;

ਯਤੋ ਤੇ’ਵਨਤਾ’ਨਨ੍ਤ, ਮੋਲ਼ਿਚ੍ਛਾਯਾ ਜਹਨ੍ਤਿ ਨੋ.

੧੪੯. ‘ਬਨ੍ਧਸਾਰੋ’ਤਿ ਮਞ੍ਞਨ੍ਤਿ, ਯਂ ਸਮਗ੍ਗਾਪਿ ਵਿਞ੍ਞੁਨੋ;

ਦਸ੍ਸਨਾ’ਵਸਰਂ ਪਤ੍ਤੋ, ਸਮਾਧਿ ਨਾਮ’ਯਂ ਗੁਣੋ.

੧੫੦. ਅਞ੍ਞਧਮ੍ਮੋ ਤਤੋ’ਞ੍ਞਤ੍ਥ, ਲੋਕਸੀਮਾ’ਨੁਰੋਧਤੋ;

ਸਮ੍ਮਾ ਆਧੀਯਤੇ’ਚ੍ਚੇ’ਸੋ, ‘ਸਮਾਧੀ’ਤਿ ਨਿਰੁਚ੍ਚਤਿ.

ਸਮਾਧਿ ਉਦ੍ਦੇਸ

੧੫੧. ਅਪਾਣੇ ਪਾਣੀਨਂ ਧਮ੍ਮੋ, ਸਮ੍ਮਾ ਆਧੀਯਤੇ ਕ੍ਵਚਿ,;

ਨਿਰੂਪੇ ਰੂਪਯੁਤ੍ਤਸ੍ਸ, ਨਿਰਸੇ ਸਰਸਸ੍ਸ, ਚ.

੧੫੨. ਅਦ੍ਰਵੇ ਦ੍ਰਵਯੁਤ੍ਤਸ੍ਸ, ਅਕਤ੍ਤਰਿਪਿ ਕਤ੍ਤੁਤਾ,;

ਕਠਿਨਸ੍ਸਾ’ਸਰੀਰੇ,ਪਿ, ਰੂਪਂ ਤੇਸਂ ਕਮਾ ਸਿਯਾ.

ਸਮਾਧਿਨਿਦ੍ਦੇਸ

ਅਪਾਣੇ ਪਾਣੀਨਂ ਧਮ੍ਮੋ

੧੫੩. ਉਣ੍ਣਾ ਪੁਣ੍ਣਿ’ਨ੍ਦੁਨਾ ਨਾਥ! ਦਿਵਾਪਿ ਸਹ ਸਙ੍ਗਮਾ;

ਵਿਨਿਦ੍ਦਾ ਸਮ੍ਪਮੋਦਨ੍ਤਿ, ਮਞ੍ਞੇ ਕੁਮੁਦਿਨੀ ਤਵ.

ਨਿਰੁਪੇ ਰੂਪਯੁਤ੍ਤਸ੍ਸ

੧੫੪. ਦਯਾਰਸੇਸੁ ਮੁਜ੍ਜਨ੍ਤਾ, ਜਨਾ’ਮਤਰਸੇਸ੍ਵਿ’ਵ;

ਸੁਖਿਤਾ ਹਤਦੋਸਾ ਤੇ, ਨਾਥ! ਪਾਦ’ਮ੍ਬੁਜਾ’ਨਤਾ.

ਨਿਰਸੇ ਸਰਸਸ੍ਸ

੧੫੫. ਮਧੁਰੇਪਿ ਗੁਣੇ ਧੀਰ, ਨ’ਪ੍ਪਸੀਦਨ੍ਤਿ ਯੇ ਤਵ;

ਕੀਦਿਸੀ ਮਨਸੋਵੁਤ੍ਤਿ, ਤੇਸਂ ਖਾਰਗੁਣਾਨ ਭੋ’.

ਅਦ੍ਰਵੇ ਦ੍ਰਵਯੁਤ੍ਤਸ੍ਸ

੧੫੬. ਸਬ੍ਬਤ੍ਥਸਿਦ੍ਧ! ਚੂਲ਼ਕ, ਪੁਟਪੇਯ੍ਯਾ ਮਹਾਗੁਣਾ;

ਦਿਸਾ ਸਮਨ੍ਤਾ ਧਾਵਨ੍ਤਿ, ਕੁਨ੍ਦਸੋਭਾ ਸ ਲਕ੍ਖਣਾ.

ਅਕਤ੍ਤਰਿਪਿ ਕਤ੍ਤੁਤਾ

੧੫੭. ਮਾਰਾ’ਰਿਬਲਵਿਸ੍ਸਟ੍ਠਾ, ਕੁਣ੍ਠਾ ਨਾਨਾਵਿਧਾ’ਯੁਧਾ;

ਲਜ੍ਜਮਾਨਾ’ਞ੍ਞਵੇਸੇਨ, ਜਿਨ! ਪਾਦਾ’ਨਤਾ ਤਵ.

ਕਠਿਨਸ੍ਸਾ ਸਰੀਰੇ

੧੫੮. ਮੁਨਿਨ੍ਦਭਾਣੁਮਾ ਕਾਲੋ,

ਦਿਤੋ ਬੋਧੋ’ਦਯਾ’ਚਲੇ;

ਸਦ੍ਧਮ੍ਮਰਂਸਿਨਾ ਭਾਤਿ, ਭਿਨ੍ਦ ਮਨ੍ਦਤਮਂ ਪਰਂ.

੧੫੯. ਵਮਨੁ’ਗ੍ਗਿਰਨਾਦ੍ਯੇ’ਤਂ, ਗੁਣਵੁਤ੍ਯ’ਪਰਿਚ੍ਚੁਤਂ;

ਅਤਿਸੁਨ੍ਦਰ ਮਞ੍ਞਂ ਤੁ, ਕਾਮਂ ਵਿਨ੍ਦਤਿ ਗਾਮ੍ਮਤਂ.

੧੬੦. ਕਨ੍ਤੀਨਂ ਵਮਨਬ੍ਯਾਜਾ, ਮੁਨਿਪਾਦਨਖਾ’ਵਲੀ;

ਚਨ੍ਦਕਨ੍ਤੀ ਪਿਵਨ੍ਤੀ’ਵ, ਨਿਪ੍ਪਭਂ ਤਂ ਕਰੋਨ੍ਤਿਯੋ.

੧੬੧. ਅਚਿਤ੍ਤਕਤ੍ਤੁਕਂ ਰੁਚ੍ਯ [ਰੁਚ੍ਚ (ਸੀ.)], ਮਿਚ੍ਚੇਵਂ ਗੁਣਕਮ੍ਮਤਂ;

ਸਚਿਤ੍ਤਕਤ੍ਤੁਕਂ ਪੇ’ਤਂ, ਗੁਣਕਮ੍ਮਂ ਯਦੁ’ਤ੍ਤਮਂ.

੧੬੨. ਉਗ੍ਗਿਰਨ੍ਤੋ’ਵ ਸਸ੍ਨੇਹ, ਰਸਂ ਜਿਨਵਰੋ ਜਨੇ;

ਭਾਸਨ੍ਤੋ ਮਧੁਰਂ ਧਮ੍ਮਂ, ਕਂ ਨ ਸਪ੍ਪੀਣਯੇ ਜਨਂ.

੧੬੩. ਯੋ ਸਦ੍ਦਸਤ੍ਥਕੁਸਲੋ ਕੁਸਲੋ ਨਿਘਣ੍ਡੁ,

ਛਨ੍ਦੋਅਲਙ੍ਕਤਿਸੁ ਨਿਚ੍ਚਕਤਾ’ਭਿਯੋਗੋ;

ਸੋ’ਯਂ ਕਵਿਤ੍ਤਵਿਕਲੋਪਿ ਕਵੀਸੁ ਸਙ੍ਖ੍ਯ,

ਮੋਗ੍ਗਯ੍ਹ ਵਿਨ੍ਦਤਿ ਹਿ ਕਿਤ੍ਤਿ’ ਮਮਨ੍ਦਰੂਪਂ.

ਇਤਿ ਸਙ੍ਘਰਕ੍ਖਿਤਮਹਾਸਾਮਿਵਿਰਚਿਤੇ ਸੁਬੋਧਾਲਙ੍ਕਾਰੇ

ਗੁਣਾਵਬੋਧੋ ਨਾਮ

ਤਤਿਯੋ ਪਰਿਚ੍ਛੇਦੋ.