੨. ਦੋਸਪਰਿਹਾਰਾਵਬੋਧ-ਦੁਤਿਯਪਰਿਚ੍ਛੇਦ

੬੮. ਕਦਾਚਿ ਕਵਿਕੋਸਲ੍ਲਾ, ਵਿਰੋਧੋ ਸਕਲੋ ਪ੍ਯ’ਯਂ;

ਦੋਸਸਙ੍ਖ੍ਯ ਮਤਿਕ੍ਕਮ੍ਮ, ਗੁਣਵੀਥਿਂ ਵਿਗਾਹਤੇ.

੬੯. ਤੇਨ ਵੁਤ੍ਤਵਿਰੋਧਾਨ, ਮਵਿਰੋਧੋ ਯਥਾ ਸਿਯਾ;

ਤਥਾ ਦੋਸਪਰਿਹਾਰਾ, ਵਬੋਧੋ ਦਾਨਿ ਨੀਯਤੇ.

ਤਤ੍ਥ ਵਿਰੁਦ੍ਧਤ੍ਥਨ੍ਤਰਸ੍ਸ ਪਰਿਹਾਰੋ ਯਥਾ

੭੦. ਵਿਨ੍ਦਨ੍ਤਂ ਪਾਕਸਾਲੀਨਂ, ਸਾਲੀਨਂ ਦਸ੍ਸਨਾ ਸੁਖਂ;

ਤਂ ਕਥਂ ਨਾਮ ਮੇਘੋ’ਯਂ, ਵਿਸਦੋ ਸੁਖਯੇ ਜਨਂ?

ਯਥਾ ਵਾ

੭੧. ਵਿਨਾਯਕੋਪਿ ਨਾਗੋ ਸਿ, ਗੋਤਮੋਪਿ ਮਹਾਮਤਿ;

ਪਣੀਤੋਪਿ ਰਸਾ’ਪੇਤੋ, ਚਿਤ੍ਤਾ ਮੇ ਸਾਮਿ ਤੇ ਗਤਿ.

ਅਝ’ਤ੍ਥਸ੍ਸ ਯਥਾ

੭੨. ਕਥਂ ਤਾਦਿਗੁਣਾਭਾਵੇ, ਲੋਕਂ ਤੋਸੇਤਿ ਦੁਜ੍ਜਨੋ?

ਓਭਾਸਿਤਾਸੇਸਦਿਸੋ, ਖਜ੍ਜੋਤੋ ਨਾਮ ਕਿਂ ਭਵੇ?

੭੩. ਪਹੇਲਿਕਾਯ [ਪਹੇਲ਼ਿਕਾਯ (ਕ.)] ਮਾਰੁਲ਼੍ਹਾ, ਨ ਹਿ ਦੁਟ੍ਠਾ ਕਿਲਿਟ੍ਠਤਾ;

ਪਿਯਾ ਸੁਖਾ’ਲਿਙ੍ਗਿਤਂ ਕ, ਮਾਲਿਙ੍ਗਤਿ ਨੁ ਨੋ ਇਤਿ.

੭੪. ਯਮਕੇ ਨੋ ਪਯੋਜੇਯ੍ਯ, ਕਿਲਿਟ੍ਠਪਦ ਮਿਚ੍ਛਿਤੇ;

ਤਤੋ ਯਮਕ ਮਞ੍ਞਂ ਤੁ, ਸਬ੍ਬ ਮੇਤਂਮਯਂ ਵਿਯ.

ਦੇਸਵਿਰੋਧਿਨੋ ਯਥਾ

੭੫. ਬੋਧਿਸਤ੍ਤਪ੍ਪਭਾਵੇਨ, ਥਲੇਪਿ ਜਲਜਾਨ੍ਯ’ਹੁਂ;

ਨੁਦਨ੍ਤਾਨਿ’ਵ ਸੁਚਿਰਾ, ਵਾਸਕ੍ਲੇਸਂ ਤਹਿਂ ਜਲੇ.

ਕਾਲਵਿਰੋਧਿਨੋ ਯਥਾ

੭੬. ਮਹਾਨੁਭਾਵ ਪਿਸੁਨੋ, ਮੁਨਿਨੋ ਮਨ੍ਦ ਮਾਰੁਤੋ;

ਸਬ੍ਬੋਤੁਕਮਯਂ ਵਾਯਿ, ਧੁਨਨ੍ਤੋ ਕੁਸੁਮਂ ਸਮਂ.

ਕਲਾਵਿਰੋਧਿਨੋ ਯਥਾ

੭੭. ਨਿਮੁਗ੍ਗਮਾਨਸੋ ਬੁਦ੍ਧ, ਗੁਣੇ ਪਞ੍ਚਸਿਖਸ੍ਸਪਿ;

ਤਨ੍ਤਿਸ੍ਸਰ ਵਿਰੋਧੋ ਸੋ, ਨ ਸਮ੍ਪੀਣੇਤਿ ਕਂ ਜਨਂ?

ਲੋਕਵਿਰੋਧਿਨੋ ਯਥਾ

੭੮. ਗਣਯੇ ਚਕ੍ਕਵਾਲ਼ਂ ਸੋ, ਚਨ੍ਦਨਾਯਪਿ ਸੀਤਲਂ;

ਸਮ੍ਬੋਧਿ ਸਤ੍ਤ ਹਦਯੋ, ਪਦਿਤ੍ਤ’ਙ੍ਗਾਰਪੂਰਿਤਂ.

ਞਾਯਵਿਰੋਧਿਨੋ ਯਥਾ

੭੯. ਪਰਿਚ੍ਚਤ੍ਤਭਵੋਪਿ ਤ੍ਵ, ਮੁਪਨੀਤਭਵੋ ਅਸਿ;

ਅਚਿਨ੍ਤ੍ਯਗੁਣਸਾਰਾਯ, ਨਮੋ ਤੇ ਮੁਨਿਪੁਙ੍ਗਵ.

ਆਗਮਵਿਰੋਧਿਨੋ ਯਥਾ

੮੦. ਨੇਵਾ’ਲਪਤਿ ਕੇਨਾ’ਪਿ, ਵਚੀਵਿਞ੍ਞਤ੍ਤਿਤੋ ਯਤਿ;

ਸਮ੍ਪਜਾਨਮੁਸਾਵਾਦਾ, ਫੁਸੇਯ੍ਯਾ’ਪਤ੍ਤਿਦੁਕ੍ਕਟਂ.

ਨੇਯ੍ਯਸ੍ਸ ਯਥਾ

੮੧. ਮਰੀਚਿਚਨ੍ਦਨਾ’ਲੇਪ, ਲਾਭਾ ਸੀਤਮਰੀਚਿਨੋ;

ਇਮਾ ਸਬ੍ਬਾਪਿ ਧਵਲਾ, ਦਿਸਾ ਰੋਚਨ੍ਤਿ ਨਿਬ੍ਭਰਂ.

ਯਥਾ ਵਾ

੮੨. ਮਨੋਨੁਰਞ੍ਜਨੋ ਮਾਰ, ਙ੍ਗਨਾਸਿਙ੍ਗਾਰਵਿਬ੍ਭਮੋ;

ਜਿਨੇਨਾ’ਸਮਨੁਞ੍ਞਾਤੋ, ਮਾਰਸ੍ਸ ਹਦਯਾ’ਨਲੋ.

ਵਿਸੇਸਨਾਪੇਕ੍ਖਸ੍ਸ ਯਥਾ

੮੩. ਅਪਯਾਤਾ’ਪਰਾਧਮ੍ਪਿ, ਅਯਂ ਵੇਰੀ ਜਨਂ ਜਨੋ;

ਕੋਧਪਾਟਲਭੂਤੇਨ, ਭਿਯ੍ਯੋ ਪਸ੍ਸਤਿ ਚਕ੍ਖੁਨਾ.

ਹੀਨਤ੍ਥਸ੍ਸ ਯਥਾ

੮੪. ਅਪ੍ਪਕਾਨਮ੍ਪਿ ਪਾਪਾਨਂ, ਪਭਾਵਂ ਨਾਸਯੇ ਬੁਧੋ;

ਅਪਿ ਨਿਪ੍ਪਭਾਤਾ’ਨੀਤ, ਖਜ੍ਜੋਤੋ ਹੋਤਿ ਭਾਣੁਮਾ.

ਅਨਤ੍ਥਸ੍ਸ ਯਥਾ

੮੫. ਨ ਪਾਦਪੂਰਣਤ੍ਥਾਯ, ਪਦਂ ਯੋਜੇਯ੍ਯ ਕਤ੍ਥਚਿ,

ਯਥਾ ਵਨ੍ਦੇ ਮੁਨਿਨ੍ਦਸ੍ਸ, ਪਾਦਪਙ੍ਕੇਰੁਹਂ ਵਰਂ.

੮੬. ਭਯਕੋਧਪਸਂਸਾਦਿ, ਵਿਸੇਸੋ ਤਾਦਿਸੋ ਯਦਿ;

ਵਤ੍ਤੁਂ ਕਾਮੀਯਤੇ ਦੋਸੋ, ਨ ਤਤ੍ਥੇ’ਕਤ੍ਥਤਾਕਤੋ.

ਯਥਾ

੮੭. ਸਪ੍ਪੋ ਸਪ੍ਪੋ! ਅਯਂ ਹਨ੍ਦ, ਨਿਵਤ੍ਤਤੁ ਭਵਂ ਤਤੋ,

ਯਦਿ ਜੀਵਿਤੁਕਾਮੋ’ਸਿ, ਕਥਂ ਤ ਮੁਪਸਪ੍ਪਸਿ?

ਭਗ੍ਗਰੀਤਿਨੋ ਯਥਾ

੮੮. ਯੋਕੋਚਿ ਰੂਪਾ’ਤਿਸਯੋ, ਕਨ੍ਤਿ ਕਾਪਿ ਮਨੋਹਰਾ;

ਵਿਲਾਸਾ’ਤਿਸਯੋ ਕੋਪਿ,

ਅਹੋ! ਬੁਦ੍ਧਮਹੋ’ਦਯੋ.

੮੯. ਅਬ੍ਯਾਮੋਹਕਰਂ ਬਨ੍ਧਂ, ਅਬ੍ਯਾਕਿਣ੍ਣਂ ਮਨੋਹਰਂ;

ਅਦੂਰਪਦ ਵਿਨ੍ਯਾਸਂ, ਪਸਂਸਨ੍ਤਿ ਕਵਿਸ੍ਸਰਾ.

ਯਥਾ

੯੦. ਨੀਲੁਪ੍ਪਲਾ’ਭਂ ਨਯਨਂ, ਬਨ੍ਧੁਕਰੁਚਿਰੋ’ਧਰੋ;

ਨਾਸਾ ਹੇਮ’ਙ੍ਕੁਸੋ ਤੇਨ, ਜਿਨੋ’ਯਂ ਪਿਯਦਸ੍ਸਨੋ.

੯੧. ਸਮਤਿਕ੍ਕਨ੍ਤ ਗਾਮ੍ਮਤ੍ਤਂ, ਕਨ੍ਤ ਵਾਚਾ’ਭਿਸਙ੍ਖਤਂ;

ਬਨ੍ਧਨਂ ਰਸਹੇਤੁਤ੍ਤਾ, ਗਾਮ੍ਮਤ੍ਤਂ ਅਤਿਵਤ੍ਤਤਿ.

ਯਥਾ

੯੨. ਦੁਨੋਤਿ ਕਾਮਚਣ੍ਡਾਲੋ, ਸੋ ਮਂ ਸਦਯ ਨਿਦ੍ਦਯੋ;

ਈਦਿਸਂ ਬ੍ਯਸਨਾ’ਪਨ੍ਨਂ, ਸੁਖੀਪਿ ਕਿ ਮੁਪੇਕ੍ਖਸੇ?

੯੩. ਯਤਿਹੀਨਪਰਿਹਾਰੋ, ਨ ਪੁਨੇ’ਦਾਨਿ ਨੀਯਤੇ;

ਯਤੋ ਨ ਸਵਨੁ’ਬ੍ਬੇਗਂ, ਹੇਟ੍ਠਾ ਯੇਸਂ ਵਿਚਾਰਿਤਂ.

ਕਮਚ੍ਚੁਤਸ੍ਸ ਯਥਾ

੯੪. ਉਦਾਰਚਰਿਤੋ’ਸਿ ਤ੍ਵਂ, ਤੇਨੇ’ਵਾ’ਰਾਧਨਾ ਤ੍ਵਯਿ;

ਦੇਸਂ ਵਾ ਦੇਹਿ ਗਾਮਂ ਵਾ, ਖੇਤ੍ਤਂ ਵਾ ਮਮ ਸੋਭਨਂ.

ਅਤਿਵੁਤ੍ਤਸ੍ਸ ਯਥਾ

੯੫. ਮੁਨਿਨ੍ਦਚਨ੍ਦਸਮ੍ਭੂਤ, ਯਸੋਰਾਸਿਮਰੀਚਿਨਂ;

ਸਕਲੋਪ੍ਯ’ਯ ਮਾਕਾਸੋ, ਨਾ’ਵਕਾਸੋ ਵਿਜਮ੍ਭਨੇ.

੯੬. ਵਾਕ੍ਯਂ ਬ੍ਯਾਪਨ੍ਨਚਿਤ੍ਤਾਨਂ, ਅਪੇਤਤ੍ਥਂ ਅਨਿਨ੍ਦਿਤਂ;

ਤੇਨੁ’ਮ੍ਮਤ੍ਤਾਦਿਕਾਨਂ ਤਂ, ਵਚਨਾ’ਞ੍ਞਤ੍ਰ ਦੁਸ੍ਸਤਿ.

ਯਥਾ

੯੭. ਸਮੁਦ੍ਦੋ ਪੀਯਤੇ ਸੋ’ਯ, ਮਹ’ਮਜ੍ਜ ਜਰਾਤੁਰੋ;

ਇਮੇ ਗਜ੍ਜਨ੍ਤਿ ਜੀਮੂਤਾ, ਸਕ੍ਕਸ੍ਸੇ’ਰਾਵਣੋ ਪਿਯੋ.

੯੮. ਸੁਖੁਮਾਲਾ’ਵਿਰੋਧਿਤ੍ਤ, ਦਿਤ੍ਤਭਾਵਪ੍ਪਭਾਵਿਤਂ;

ਬਨ੍ਧਨਂ ਬਨ੍ਧਫਰੁਸ, ਦੋਸਂ ਸਂਦੂਸਯੇਯ੍ਯ ਤਂ.

ਯਥਾ

੯੯. ਪਸ੍ਸਨ੍ਤਾ ਰੂਪਵਿਭਵਂ, ਸੁਣਨ੍ਤਾ ਮਧੁਰਂ ਗਿਰਂ;

ਚਰਨ੍ਤਿ ਸਾਧੂ ਸਮ੍ਬੁਦ੍ਧ, ਕਾਲੇ ਕੇਲ਼ਿਪਰਮ੍ਮੁਖਾ.

ਅਪਕ੍ਕਮਸ੍ਸ ਯਥਾ

੧੦੦. ਭਾਵਨਾ, ਦਾਨ, ਸੀਲਾਨਿ, ਸਮ੍ਮਾ ਸਮ੍ਪਾਦਿਤਾਨਿ’ਹ;

ਨਿਬ੍ਬਾਨ, ਭੋਗ, ਸਗ੍ਗਾਦਿ, ਸਾਧਨਾਨਿ ਨ ਸਂਸਯੋ.

੧੦੧. ਉਦ੍ਦਿਟ੍ਠਵਿਸਯੋ ਕੋਚਿ, ਵਿਸੇਸੋ ਤਾਦਿਸੋ ਯਦਿ;

ਅਨੁ’ਦ੍ਦਿਟ੍ਠੇਸੁ ਨੇਵ’ਤ੍ਥਿ, ਦੋਸੋ ਕਮਵਿਲਙ੍ਘਨੇ.

ਯਥਾ

੧੦੨. ਕੁਸਲਾ’ਕੁਸਲਂ ਅਬ੍ਯਾ, ਕਤ’ਮਿਚ੍ਚੇਸੁ ਪਚ੍ਛਿਮਂ;

ਅਬ੍ਯਾਕਤਂ ਪਾਕਦਂ ਨ, ਪਾਕਦਂ ਪਠਮਦ੍ਵਯਂ.

੧੦੩. ਸਗੁਣਾਨਾ’ਵਿਕਰਣੇ, ਕਾਰਣੇ ਸਤਿ ਤਾਦਿਸੇ;

ਓਚਿਤ੍ਯਹੀਨਤਾ’ਪਤ੍ਤਿ, ਨਤ੍ਥਿ ਭੂਤਤ੍ਥਸਂਸਿਨੋ.

੧੦੪. ਓਚਿਤ੍ਯਂ ਨਾਮ ਵਿਞ੍ਞੇਯ੍ਯਂ, ਲੋਕੇ ਵਿਖ੍ਯਾਤ ਮਾਦਰਾ;

ਤਤ੍ਥੋ’ਪਦੇਸਪਭਵਾ, ਸੁਜਨਾ ਕਵਿਪੁਙ੍ਗਵਾ.

੧੦੫. ਵਿਞ੍ਞਾਤੋਚਿਤ੍ਯਵਿਭਵੋ, ਚਿਤ੍ਯਹੀਨਂ ਪਰਿਹਰੇ;

ਤਤੋ’ਚਿਤ੍ਯਸ੍ਸ ਸਮ੍ਪੋਸੇ,

ਰਸਪੋਸੋ ਸਿਯਾ ਕਤੇ.

ਯਥਾ

੧੦੬. ਯੋ ਮਾਰਸੇਨ ਮਾਸਨ੍ਨ, ਮਾਸਨ੍ਨਵਿਜਯੁ’ਸ੍ਸਵੋ;

ਤਿਣਾਯਪਿ ਨ ਮਞ੍ਞਿਤ੍ਥ, ਸੋ ਵੋ ਦੇਤੁ ਜਯਂ ਜਿਨੋ.

੧੦੭. ਆਰਦ੍ਧਕਤ੍ਤੁਕਮ੍ਮਾਦਿ, ਕਮਾ’ਤਿਕ੍ਕਮਲਙ੍ਘਨੇ;

ਭਗ੍ਗਰੀਤਿਵਿਰੋਧੋ’ਯਂ, ਗਤਿਂ ਨ ਕ੍ਵਾ’ਪਿ ਵਿਨ੍ਦਤਿ.

ਯਥਾ

੧੦੮. ਸੁਜਨ’ਞ੍ਞਾਨ ਮਿਤ੍ਥੀਨਂ, ਵਿਸ੍ਸਾਸੋ ਨੋ’ਪਪਜ੍ਜਤੇ;

ਵਿਸਸ੍ਸ ਸਿਙ੍ਗਿਨੋ ਰੋਗ, ਨਦੀਰਾਜਕੁਲਸ੍ਸ ਚ.

ਯਥਾ

੧੦੯. ਭੇਸਜ੍ਜੇ ਵਿਹਿਤੇ ਸੁਦ੍ਧ, ਬੁਦ੍ਧਾਦਿਰਤਨਤ੍ਤਯੇ;

ਪਸਾਦ ਮਾਚਰੇ ਨਿਚ੍ਚਂ, ਸਜ੍ਜਨੇ ਸਗੁਣੇਪਿ ਚ.

ਸਸਂਸਯਸ੍ਸ ਯਥਾ

੧੧੦. ਮੁਨਿਨ੍ਦਚਨ੍ਦਿਮਾ’ਲੋਕ, ਰਸ ਲੋਲ ਵਿਲੋਚਨੋ;

ਜਨੋ’ਵਕ੍ਕਨ੍ਤਪਨ੍ਥੋ’ਵ, ਰਂਸਿਦਸ੍ਸਨਪੀਣਿਤੋ.

੧੧੧. ਸਂਸਯਾਯੇ’ਵ ਯਂਕਿਞ੍ਚਿ, ਯਦਿ ਕੀਲ਼ਾਦਿਹੇਤੁਨਾ;

ਪਯੁਜ੍ਜਤੇ ਨ ਦੋਸੋ’ਵ, ਸਸਂਸਯਸਮਪ੍ਪਿਤੋ.

ਯਥਾ

੧੧੨. ਯਾਤੇ ਦੁਤਿਯਂ ਨਿਲਯਂ, ਗਰੁਮ੍ਹਿ ਸਕਗੇਹਤੋ;

ਪਾਪੁਣੇਯ੍ਯਾਮ ਨਿਯਤਂ, ਸੁਖ’ਮਜ੍ਝਯਨਾ’ਦਿਨਾ.

੧੧੩. ਸੁਭਗਾ ਭਗਿਨੀ ਸਾ’ਯਂ, ਏਤਸ੍ਸਿ’ਚ੍ਚੇਵਮਾਦਿਕਂ;

ਨ ‘ਗਾਮ੍ਮ’ਮਿਤਿ ਨਿਦ੍ਦਿਟ੍ਠਂ, ਕਵੀਹਿ ਸਕਲੇਹਿਪਿ.

੧੧੪. ਦੁਟ੍ਠਾ’ਲਙ੍ਕਾਰਵਿਗਮੇ, ਸੋਭਨਾ’ਲਙ੍ਕਤਿਕ੍ਕਮੋ;

ਅਲਙ੍ਕਾਰਪਰਿਚ੍ਛੇਦੇ, ਆਵਿਭਾਵਂ ਗਮਿਸ੍ਸਤਿ.

੧੧੫. ਦੋਸੇ ਪਰੀਹਰਿਤੁ ਮੇਸ ਵਰੋ’ਪਦੇਸੋ,

ਸਤ੍ਥਨ੍ਤਰਾਨੁਸਰਣੇਨ ਕਤੋ ਮਯੇਵਂ;

ਵਿਞ੍ਞਾਯਿ’ਮਂ ਗਰੁਵਰਾਨ’ਧਿਕ’ਪ੍ਪਸਾਦਾ,

ਦੋਸੇ ਪਰਂ ਪਰਿਹਰੇਯ੍ਯ ਯਸੋਭਿਲਾਸੀ.

ਇਤਿ ਸਙ੍ਘਰਕ੍ਖਿਤਮਹਾਸਾਮਿਵਿਰਚਿਤੇ ਸੁਬੋਧਾਲਙ੍ਕਾਰੇ

ਦੋਸਪਰਿਹਾਰਾਵਬੋਧੋ ਨਾਮ

ਦੁਤਿਯੋ ਪਰਿਚ੍ਛੇਦੋ.