੧੩. ਕੁਲਦੂਸਕ ਸਙ੍ਘਾਦਿਸੇਸ ਸਿਕ੍ਖਾਪੁਚ੍ਛਾ
ਪੁਚ੍ਛਾ – ਯਂ ਤੇਨ ਆਵੁਸੋ ਭਗਵਤਾ…ਪੇ… ਸਮ੍ਮਾਸਮ੍ਬੁਦ੍ਧੇਨ ਕੁਲਦੂਸਕਸ੍ਸ ਭਿਕ੍ਖੁਨੋ ਯਾਵਤਤਿਯਂ ਸਮਨੁਭਾਸਨਾਯ ਅਪ੍ਪਟਿਨਿਸ੍ਸਜ੍ਜਨ੍ਤਸ੍ਸ ਸਙ੍ਘਾਦਿਸੇਸੋ ਕਤ੍ਥ ਪਞ੍ਞਤ੍ਤੋ.
ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਪਞ੍ਞਤ੍ਤੋ.
ਪੁਚ੍ਛਾ – ਕਂ ਆਰਬ੍ਭ ਆਵੁਸੋ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤੋ.
ਵਿਸ੍ਸਜ੍ਜਨਾ – ਅਸ੍ਸਜਿ ਪੁਨਬ੍ਬਸੁਕੇ ਭਨ੍ਤੇ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤੋ, ਅਸ੍ਸਜਿਪੁਨਬ੍ਬਸੁਕਾ ਭਨ੍ਤੇ ਭਿਕ੍ਖੂ ਸਙ੍ਘੇਨ ਪਬ੍ਬਾਜਨੀਯਕਮ੍ਮਕਤਾ ਛਨ੍ਦਗਾਮਿਤਾ ਦੋਸਗਾਮਿਤਾ ਮੋਹਗਾਮਿਤਾ ਭਯਗਾਮਿਤਾ ਪਾਪੇਸੁਂ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤੋ.
ਅਨਿਯਤ ਸਿਕ੍ਖਾਪੁਚ੍ਛਾ
ਪੁਚ੍ਛਾ – ਯਂ ਤੇਨ ਆਵੁਸੋ ਭਗਵਤਾ…ਪੇ… ਸਮ੍ਮਾਸਮ੍ਬੁਦ੍ਧੇਨ ਪਠਮੋ ਚ ਅਨਿਯਤੋ ਦੁਤਿਯੋ ਚ ਅਨਿਯਤੋ ਕਤ੍ਥ ਪਞ੍ਞਤ੍ਤੋ.
ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਪਞ੍ਞਤ੍ਤੋ.
ਪੁਚ੍ਛਾ – ਕਂ ਆਵੁਸੋ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤੋ.
ਵਿਸ੍ਸਜ੍ਜਨਾ – ਆਯਸ੍ਮਨ੍ਤਂ ਭਨ੍ਤੇ ਉਦਾਯਿਂ ਆਰਬ੍ਭ ਪਞ੍ਞਤ੍ਤੋ, ਆਯਸ੍ਮਾ ਭਨ੍ਤੇ ਉਦਾਯੀ ਮਾਤੁਗਾਮੇਨ ਸਦ੍ਧਿਂ ਏਕੋਏਕਾਯ ਰਹੋ ਪਟਿਚ੍ਛਨ੍ਨੇ ਆਸਨੇ ਅਲਂਕਮ੍ਮਨਿਯੇ ਨਿਸਜ੍ਜਂ ਕਪ੍ਪੇਸਿ, ਤਸ੍ਮਿਞ੍ਚ ਵਤ੍ਥੁਸ੍ਮਿਂ, ਆਯਸ੍ਮਾਯੇਵ ਭਨ੍ਤੇ ਉਦਾਯੀ ਮਾਤੁਗਾਮੇਨ ਸਦ੍ਧਿਂ ਰਹੋ ਨਿਸਜ੍ਜਂ ਅਕਾਸਿ, ਤਸ੍ਮਿਞ੍ਚ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤੋ.
ਪੁਚ੍ਛਾ – ਕਸ੍ਸ ਆਵੁਸੋ ਵਚਨਂ.
ਵਿਸ੍ਸਜ੍ਜਨਾ – ਭਗਵਤੋ ਭਨ੍ਤੇ ਵਚਨਂ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ.
ਪੁਚ੍ਛਾ – ਕੇਨਾਵੁਸੋ ਆਭਤਂ.
ਵਿਸ੍ਸਜ੍ਜਨਾ – ਪਰਮ੍ਪਰਾਯ ਭਨ੍ਤੇ ਆਭਤਂ.
ਪੁਚ੍ਛਾ – ਅਤ੍ਥਿ ਨੁਖੋ ਆਵੁਸੋ ਏਤ੍ਥ ਕੋਚਿਪਿ ਵਿਰਦ੍ਧਦੋਸੋ.
ਵਿਸ੍ਸਜ੍ਜਨਾ – ਨਤ੍ਥਿ ਭਨ੍ਤੇ.
ਸਂਗਾਯਨਤ੍ਥਾਯ ਸਙ੍ਘਸ੍ਸਞਾਪਨਂ
ਸੁਣਾਤੁ ਮੇ ਭਨ੍ਤੇ ਸਙ੍ਘੋ, ਅਹਂ ਭਨ੍ਤੇ ਆਯਸ੍ਮਨ੍ਤਂ ਵਿਚਿਤ੍ਤਸਾਰਾਭਿਵਂਸਂ ਤਿਪਿਟਕਧਰ ਧਮ੍ਮਭਣ੍ਡਾਗਾਰਿਕਂ ਪਠਮ ਦੁਟ੍ਠਦੋਸ ਸਿਕ੍ਖਾਪਦਤੋ ਪਟ੍ਠਾਯ ਪੁਚ੍ਛਿਤਬ੍ਬਾਨਿ ਅਨੇਕਾਨਿ ਠਾਨਾਨਿ ਪੁਚ੍ਛਿਂ, ਸੋ ਚ ਆਯਸ੍ਮਾ ਪੁਟ੍ਠੋ ਪੁਟ੍ਠੋ ਵਿਸ੍ਸਜ੍ਜੇਤਿ, ਇਤਿਹਿਦਂ ਭਨ੍ਤੇ ਸਬ੍ਬਂ ਸਿਕ੍ਖਾਪਦਂ ਨਿਮ੍ਮਲਂ ਸੁਪਰਿਸੁਦ੍ਧਂ ਤਸ੍ਸੇਵ ਭਗਵਤੋ ਵਚਨਂ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ, ਤਸ੍ਮਾ ਯਥਾਪੁਰੇ ਮਹਾਕਸ੍ਸਪਾਦਯੋ ਮਹਾਥੇਰਵਰਾ ਪੋਰਾਣਸਂਗੀਤਿਕਾਰਾ ਬ੍ਰਹ੍ਮਚਰਿਯਸ੍ਸ ਚਿਰਟ੍ਠਿਤਿਯਾ ਬਹੁਜਨਹਿਤਾਯ ਬਹੁਜਨਸੁਖਾਯ ਲੋਕਾਨੁਕਮ੍ਪਾਯ ਅਤ੍ਥਾਯ ਹਿਤਾਯ ਸੁਖਾਯ ਦੇਵਮਨੁਸ੍ਸਾਨਂ ਸਂਗਾਯਿਂਸੁਚੇਵ ਅਨੁਸਂਗਾਯਿਂਸੁਚ, ਏਵਮੇਵ ਮਯਮ੍ਪਿ ਦਾਨਿ ਸਬ੍ਬੇਵ ਛਟ੍ਠਸਂਗੀਤਿ ਮਹਾਧਮ੍ਮਸਭਾਪਰਿਯਾਪਨ੍ਨਾ ਇਮਾਨਿ ਸਿਕ੍ਖਾਪਦਾਨਿ ਏਕਤੋ ਗਣਸਜ੍ਝਾਯਂ ਕਤ੍ਵਾ ਸਂਗਾਯੇਯ੍ਯਾਮ.