੪. ਸਮਥਕ੍ਖਨ੍ਧਕ

ਪੁਚ੍ਛਾ – ਅਸਮ੍ਮੁਖੀਭੂਤਾਨਂ ਆਵੁਸੋ ਭਿਕ੍ਖੂਨਂ ਤਜ੍ਜਨੀਯਂ ਵਾ ਨਿਯਸ੍ਸਂ ਵਾ ਪਬ੍ਬਾਜਨੀਯਂ ਵਾ ਪਟਿਸਾਰਣੀਯਂ ਵਾ ਉਕ੍ਖੇਪਨੀਯਂ ਵਾ ਕਮ੍ਮਂ ਕਰੋਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਂ, ਛਬ੍ਬਗ੍ਗਿਯਾ ਭਨ੍ਤੇ ਭਿਕ੍ਖੂ ਅਸਮ੍ਮੁਖੀਭੂਤਾਨਂ ਭਿਕ੍ਖੂਨਂ ਕਮ੍ਮਂ ਅਕਂਸੁ ਤਜ੍ਜਨੀਯਮ੍ਪਿ ਨਿਯਸ੍ਸਮ੍ਪਿ ਪਬ੍ਬਾਜਨੀਯਮ੍ਪਿ ਪਟਿਸਾਰਣੀਯਮ੍ਪਿ ਉਕ੍ਖੇਪਨੀਯਮ੍ਪਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਪੁਚ੍ਛਾ – ਸਤਿਵੇਪੁਲ੍ਲਪਤ੍ਤਸ੍ਸ ਆਵੁਸੋ ਭਿਕ੍ਖੁਨੋ ਸਤਿਵਿਨਯਂ ਦਾਨਂ ਭਗਵਤਾ ਕਤ੍ਥ ਅਨੁਞ੍ਞਾਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਮੇਤ੍ਤਿਯਭੂਮਜਕੇ ਭਿਕ੍ਖੂ ਆਰਬ੍ਭ ਅਨੁਞ੍ਞਾਤਂ ਮੇਤ੍ਤਿਯਭੂਮਜਕਾ ਭਨ੍ਤੇ ਭਿਕ੍ਖੂ ਆਯਸ੍ਮਨ੍ਤਂ ਦਬ੍ਬਂ ਮਲ੍ਲਪੁਤ੍ਤਂ ਅਮੂਲਿਕਾਯ ਸੀਲਵਿਪਤ੍ਤਿਯਾ ਅਨੁਦ੍ਧਂਸੇਸੁਂ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਪੁਚ੍ਛਾ – ਕਤਿਪਨਾਵੁਸੋ ਏਤ੍ਥ ਧਮ੍ਮਿਕਾਨਿ ਸਤਿਵਿਨਯਦਾਨਾਨਿ.

ਵਿਸ੍ਸਜ੍ਜਨਾ – ਪਞ੍ਚਿਮਾਨਿ ਭਨ੍ਤੇ ਧਮ੍ਮਿਕਾਨਿ ਸਤਿਵਿਨਯਸ੍ਸ ਦਾਨਾਨਿ, ਸੁਦ੍ਧੋ ਹੋਤਿ ਭਿਕ੍ਖੁ ਅਨਾਪਤ੍ਤਿਕੋ, ਅਨੁਵਦਨ੍ਤਿ ਚ ਨਂ, ਯਾਚਤਿ ਚ, ਤਸ੍ਸ ਸਙ੍ਘੋ ਸਤਿਵਿਨਯਂ ਦੇਤਿ ਧਮ੍ਮੇਨ ਸਮਗ੍ਗੇਨ, ਇਮਾਨਿ ਖੋ ਭਨ੍ਤੇ ਪਞ੍ਚ ਧਮ੍ਮਿਕਾਨਿ ਸਤਿ ਵਿਨਯਸ੍ਸ ਦਾਨਾਨਿ.

ਪੁਚ੍ਛਾ – ਅਮੂਲ਼੍ਹਸ੍ਸ ਆਵੁਸੋ ਭਿਕ੍ਖੁਨੋ ਅਮੂਲ਼੍ਹਵਿਨਯਂ ਦਾਤੁਂ ਭਗਵਤਾ ਕਤ੍ਥ ਅਨੁਞ੍ਞਾਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਅਨੁਞ੍ਞਾਤਂ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਗਗ੍ਗਂ ਭਿਕ੍ਖੁਂ ਉਮ੍ਮਤ੍ਤਕੇਨ ਚਿਤ੍ਤਵਿਪਰਿਯਾਸਕਤੇਨ ਅਜ੍ਝਾਚਿਣ੍ਣੇਨ ਆਪਤ੍ਤਿਯਾ ਚੋਦੇਸੁਂ ‘‘ਸਰਤਾ ਯਸ੍ਮਾ ਏਵਰੂਪਿਂ ਆਪਤ੍ਤਿਂ ਆਪਜ੍ਜਿਤਾ’’ਤਿ, ਸੋ ਏਵਂ ਵਦੇਤਿ ‘‘ਅਹਂ ਖੋ ਆਵੁਸੋ ਉਮ੍ਮਤ੍ਤਕੋ ਅਹੋਸਿ ਚਿਤ੍ਤਵਿਪਰਿਯਾਸਕਤੋ, ਤੇਨ ਮੇ ਉਮ੍ਮਤ੍ਤਕੇਨ ਚਿਤ੍ਤਵਿਪਰਿਯਾਸਕਤੇਨ ਬਹੁਂ ਅਸ੍ਸਾਮਣਕਂ ਅਜ੍ਝਾਚਿਣ੍ਣਂ ਭਾਸਿਤਪਰਿਕ੍ਕਨ੍ਤਂ, ਨਾਹਂ ਤਂ ਸਰਾਮਿ, ਮੂਲ਼੍ਹੇਨ ਮੇ ਏਤਂ ਕਤ’’ਨ੍ਤਿ. ਏਵਮ੍ਪਿ ਨਂ ਵੁਚ੍ਚਮਾਨਾ ਚੋਦੇਨ੍ਤੇਵ ‘‘ਸਰਤਾ ਯਸ੍ਮਾ ਏਵਰੂਪਿਂ ਆਪਤ੍ਤਿਂ ਆਪਜ੍ਜਿਤਾ’’ਤਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਪੁਚ੍ਛਾ – ਕਤਿ ਆਵੁਸੋ ਅਧਮ੍ਮਿਕਾਨਿ ਅਮੂਲ਼੍ਹਵਿਨਯਸ੍ਸ ਦਾਨਾਨਿ, ਵਿਭਜਿਤ੍ਵਾ ਕਥੇਹਿ.

ਵਿਸ੍ਸਜ੍ਜਨਾ – ਤੀਣਿ ਭਨ੍ਤੇ ਅਧਮ੍ਮਿਕਾਨਿ ਅਮੂਲ਼੍ਹਵਿਨਯਸ੍ਸ ਦਾਨਾਨਿ, ਇਧ ਭਨ੍ਤੇ ਭਿਕ੍ਖੁ ਆਪਤ੍ਤਿਂ ਆਪਨ੍ਨੋ ਹੋਤਿ, ਤਮੇਨਂ ਚੋਦੇਤਿ ਸਙ੍ਘੋ ਵਾ ਸਮ੍ਬਹੁਲਾ ਵਾ ਏਕਪੁਗ੍ਗਲੋ ਵਾ ‘‘ਸਰਤਾਯਸ੍ਮਾ ਏਵਰੂਪਿਂ ਆਪਤ੍ਤਿਂ ਆਪਜ੍ਜਿਤਾ’’ਤਿ, ਸੋ ਸਰਮਾਨੋਵ ਏਵਂ ਵਦੇਤਿ ‘‘ਨ ਖੋ ਅਹਂ ਆਵੁਸੋ ਸਰਾਮਿ ਏਵਰੂਪਿਂ ਆਪਤ੍ਤਿਂ ਆਪਜ੍ਜਿਤਾ’’ਤਿ. ਅਞ੍ਞੋ ਸਰਮਾਨੋਵ ਏਵਂ ਵਦੇਤਿ ‘‘ਸਰਾਮਿ ਖੋ ਅਹਂ ਆਵੁਸੋ ਯਥਾ ਸੁਪਿਨਨ੍ਤੇਨਾ’’ਤਿ. ਅਞ੍ਞੋ ਅਨੁਮ੍ਮਤ੍ਤਕੋਵ ਉਮ੍ਮਤ੍ਤਕਾਲਯਂ ਕਰੋਤਿ ‘‘ਅਹਮ੍ਪਿ ਖੋ ਏਵਂ ਕਰੋਮਿ, ਤੁਮ੍ਹੇਪਿ ਏਵਂ ਕਰੋਥ, ਮਯ੍ਹਮ੍ਪਿ ਏਤਂ ਕਪ੍ਪਤਿ, ਤੁਮ੍ਹਾਕਮ੍ਪੇਤਂ ਕਪ੍ਪਤੀ’’ਤਿ. ਏਸਂ ਸਙ੍ਘੋ ਅਮੂਲ਼੍ਹਵਿਨਯਂ ਦੇਤਿ, ਅਧਮ੍ਮਿਕਂ ਭਨ੍ਤੇ ਅਮੂਲ਼੍ਹਵਿਨਯਸ੍ਸ ਦਾਨਂ. ਇਮਾਨਿ ਖੋ ਭਨ੍ਤੇ ਤੀਣਿ ਅਧਮ੍ਮਿਕਾਨਿ ਅਮੂਲ਼੍ਹਵਿਨਯਸ੍ਸ ਦਾਨਾਨਿ.

ਪੁਚ੍ਛਾ – ਕਤਿ ਆਵੁਸੋ ਧਮ੍ਮਿਕਾਨਿ ਅਮੂਲ਼੍ਹਵਿਨਯਸ੍ਸ ਦਾਨਾਨਿ, ਵਿਭਜਿਤ੍ਵਾ ਕਥੇਹਿ.

ਵਿਸ੍ਸਜ੍ਜਨਾ – ਤੀਣਿ ਭਨ੍ਤੇ ਧਮ੍ਮਿਕਾਨਿ ਅਮੂਲ਼੍ਹਵਿਨਯਸ੍ਸ ਦਾਨਾਨਿ, ਇਧ ਭਨ੍ਤੇ ਭਿਕ੍ਖੁ ਉਮ੍ਮਤ੍ਤਕੋ ਹੋਤਿ ਚਿਤ੍ਤਵਿਪਰਿਯਾਸਕਤੋ ਤੇਨ ਉਮ੍ਮਤ੍ਤਕੇਨ ਚਿਤ੍ਤਵਿਪਰਿਯਾਸਕਤੇਨ ਬਹੁਂ ਅਸ੍ਸਾਮਣਕਂ ਅਜ੍ਝਾਚਿਣ੍ਣਂ ਹੋਤਿ ਭਾਸਿਤਪਰਿਕ੍ਕਨ੍ਤਂ, ਤਮੇਨਂ ਚੋਦੇਤਿ ਸਙ੍ਘੋ ਵਾ ਸਮ੍ਬਹੁਲਾ ਵਾ ਏਕਪੁਗ੍ਗਲੋ ਵਾ ‘‘ਸਰਤਾਯਸ੍ਮਾ ਏਵਰੂਪਿਂ ਆਪਤ੍ਤਿਂ ਆਪਜ੍ਜਿਤਾ’’ਤਿ, ਸੋ ਅਸ੍ਸਰਮਾਨੋਵ ਏਵਂ ਵਦੇਤਿ ‘‘ਨ ਖੋ ਅਹਂ ਆਵੁਸੋ ਸਰਾਮਿ ਏਵਰੂਪਿਂ ਆਪਤ੍ਤਿਂ ਆਪਜ੍ਜਿਤਾ’’ਤਿ. ਅਞ੍ਞੋਪਿ ਅਸ੍ਸਰਮਾਨੋਵ ਏਵਂ ਵਦੇਤਿ ‘‘ਸਰਾਮਿ ਖੋ ਅਹਂ ਆਵੁਸੋ ਯਥਾ ਸੁਪਿਨਨ੍ਤੇਨਾ’’ਤਿ. ਅਞ੍ਞੋਪਿ ਉਮ੍ਮਤ੍ਤਕੋਵ ਉਮ੍ਮਤ੍ਤਕਾਲਯਂ ਕਰੋਤਿ ‘‘ਅਹਮ੍ਪਿ ਏਵਂ ਕਰੋਮਿ, ਤੁਮ੍ਹੇਪਿ ਏਵਂ ਕਰੋਥ, ਮਯ੍ਹਮ੍ਪਿ ਏਤਂ ਕਪ੍ਪਤਿ, ਤੁਮ੍ਹਾਕਮ੍ਪੇਤਂ ਕਪ੍ਪਤੀ’’ਤਿ. ਏਸਂ ਭਨ੍ਤੇ ਤਿਣ੍ਣਂ ਭਿਕ੍ਖੂਨਂ ਸਙ੍ਘੋ ਅਮੂਲ਼੍ਹਵਿਨਯਂ ਦੇਤਿ, ਧਮ੍ਮਿਕਂ ਭਨ੍ਤੇ ਅਮੂਲ਼੍ਹਵਿਨਯਸ੍ਸ ਦਾਨਂ. ਇਮਾਨਿ ਖੋ ਭਨ੍ਤੇ ਤੀਣਿ ਧਮ੍ਮਿਕਾਨਿ ਅਮੂਲ਼੍ਹਵਿਨਯਸ੍ਸ ਦਾਨਾਨਿ.

ਪੁਚ੍ਛਾ – ਅਪ੍ਪਟਿਞ੍ਞਾਯ ਆਵੁਸੋ ਭਿਕ੍ਖੂਨਂ ਤਜ੍ਜਨੀਯਾਦੀਨਿ ਕਮ੍ਮਾਨਿ ਕਰੋਨ੍ਤਸ੍ਸ ਦੁਕ੍ਕਟਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਛਬ੍ਬਗ੍ਗਿਯੇ ਭਿਕ੍ਖੂ ਆਰਬ੍ਭ ਪਞ੍ਞਤ੍ਤਂ, ਛਬ੍ਬਗ੍ਗਿਯਾ ਭਨ੍ਤੇ ਭਿਕ੍ਖੂ ਅਪ੍ਪਟਿਞ੍ਞਾਯ ਭਿਕ੍ਖੂਨਂ ਕਮ੍ਮਾਨਿ ਅਕਂਸੁ ਤਜ੍ਜਨੀਯਾਦੀਨਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਪੁਚ੍ਛਾ – ਕਥਂ ਆਵੁਸੋ ਅਧਮ੍ਮਿਕਂ ਹੋਤਿ ਪਟਿਞ੍ਞਾਤਕਰਣਂ.

ਵਿਸ੍ਸਜ੍ਜਨਾ – ਅਞ੍ਞਥਾ ਭਨ੍ਤੇ ਆਪਤ੍ਤਿਂ ਆਪਜ੍ਜਨ੍ਤਸ੍ਸ ਅਞ੍ਞਥਾ ਪਟਿਜਾਨਨ੍ਤਸ੍ਸ ਯਥਾ ਸੋ ਪਟਿਜਾਨਾਤਿ, ਤਥਾ ਸਙ੍ਘੋ ਕਾਰੇਤਿ, ਏਵਂ ਖੋ ਭਨ੍ਤੇ ਅਧਮ੍ਮਿਕਂ ਹੋਤਿ ਪਟਿਞ੍ਞਾਤਕਰਣਂ.

ਪੁਚ੍ਛਾ – ਕਥਂ ਆਵੁਸੋ ਧਮ੍ਮਿਕਂ ਹੋਤਿ ਪਟਿਞ੍ਞਾਤਕਰਣਂ.

ਵਿਸ੍ਸਜ੍ਜਨਾ – ਯਂ ਭਨ੍ਤੇ ਆਪਤ੍ਤਿਂ ਆਪਜ੍ਜਨ੍ਤਸ੍ਸ ਤਮੇਵ ਪਟਿਜਾਨਨ੍ਤਸ੍ਸ ਤੇਨੇਵ ਸਙ੍ਘੋ ਕਾਰੇਤਿ, ਏਵਂ ਖੋ ਭਨ੍ਤੇ ਧਮ੍ਮਿਕਂ ਪਟਿਞ੍ਞਾਤਕਰਣਂ.

ਪੁਚ੍ਛਾ – ਯੇਭੁਯ੍ਯਸਿਕਾਯ ਆਵੁਸੋ ਅਧਿਕਰਣਂ ਵੂਪਸਮੇਤੁਂ ਭਗਵਤਾ ਕਤ੍ਥ ਅਨੁਞ੍ਞਾਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਅਨੁਞ੍ਞਾਤਂ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਭਣ੍ਡਨਜਾਤਾ ਕਲਹਜਾਤਾ ਵਿਵਾਦਾਪਨ੍ਨਾ ਅਞ੍ਞਮਞ੍ਞਂ ਮੁਖਸਤ੍ਤੀਹਿ ਵਿਤੁਦਨ੍ਤਾ ਵਿਹਰਿਂਸੁ, ਨ ਸਕ੍ਕੋਨ੍ਤਿ ਤਂ ਅਧਿਕਰਣਂ ਵੂਪਸਮੇਤੁਂ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਪੁਚ੍ਛਾ – ਕਥਂ ਆਵੁਸੋ ਅਧਿਕਰਣਂ ਯੇਭੁਯ੍ਯਸਿਕਾਯ ਵੂਪਸਮੇਤਬ੍ਬਂ.

ਵਿਸ੍ਸਜ੍ਜਨਾ – ਪਞ੍ਚਹਿ ਭਨ੍ਤੇ ਅਙ੍ਗੇਹਿ ਸਮਨ੍ਨਾਗਤੋ ਭਿਕ੍ਖੁ ਸਲਾਕਗ੍ਗਾਹਾਪਕੋ ਸਮ੍ਮਨ੍ਨਿਤਬ੍ਬੋ, ਤੇਨ ਭਨ੍ਤੇ ਸਲਾਕਗ੍ਗਾਹਾਪਕੇਨ ਸਲਾਕਾ ਗਾਹਾਤਬ੍ਬਾ ਯਥਾ ਬਹੁਤਰਾ ਭਿਕ੍ਖੂ ਧਮ੍ਮਵਾਦਿਨੋ ਵਦਨ੍ਤਿ ਤਥਾ ਤਂ ਅਧਿਕਰਣਂ ਵੂਪਸਮੇਤਬ੍ਬਂ, ਏਵਂ ਖੋ ਭਨ੍ਤੇ ਯੇਭੁਯ੍ਯਸਿਕਾਯ ਅਧਿਕਰਣਂ ਵੂਪਸਮੇਤਬ੍ਬਂ.

ਪੁਚ੍ਛਾ – ਕਤਿ ਆਵੁਸੋ ਅਧਮ੍ਮਿਕਾ ਸਲਾਕਗ੍ਗਾਹਾ.

ਵਿਸ੍ਸਜ੍ਜਨਾ – ਦਸ ਭਨ੍ਤੇ ਅਧਮ੍ਮਿਕਾ ਸਲਾਕਗ੍ਗਾਹਾ, ਓਰਮਤ੍ਤਕਞ੍ਚ ਅਧਿਕਰਣਂ ਹੋਤਿ, ਨ ਚ ਗਤਿਗਤਂ ਹੋਤਿ, ਨ ਚ ਸਰਿਤਸਾਰਿਤਂ ਹੋਤਿ, ਜਾਨਾਤਿ ‘ਅਧਮ੍ਮਵਾਦੀ ਬਹੁਤਰਾ’ਤਿ, ਅਪ੍ਪੇਵ ਨਾਮ ਅਧਮ੍ਮਵਾਦੀ ਬਹੁਤਰਾ ਅਸ੍ਸੂਤਿ, ਜਾਨਾਤਿ ‘ਸਙ੍ਘੋ ਭਿਜ੍ਜਿਸ੍ਸਤੀ’ਤਿ, ਅਪ੍ਪੇਵ ਨਾਮ ਸਙ੍ਘੋ ਭਿਜ੍ਜੇਯ੍ਯਾਤਿ, ਅਧਮ੍ਮੇਨ ਗਣ੍ਹਨ੍ਤਿ, ਵਗ੍ਗਾ ਗਣ੍ਹਨ੍ਤਿ, ਨ ਚ ਯਥਾਦਿਟ੍ਠਿਯਾ ਗਣ੍ਹਨ੍ਤਿ, ਇਮੇ ਖੋ ਭਨ੍ਤੇ ਦਸ ਅਧਮ੍ਮਿਕਾ ਕਲਾਕਗ੍ਗਾਹਾ.

ਪੁਚ੍ਛਾ – ਕਤਿ ਆਵੁਸੋ ਧਮ੍ਮਿਕਾ ਸਲਾਕਗ੍ਗਾਹਾ.

ਵਿਸ੍ਸਜ੍ਜਨਾ – ਦਸ ਭਨ੍ਤੇ ਧਮ੍ਮਿਕਾ ਸਲਾਕਗ੍ਗਾਹਾ ਵੁਤ੍ਤਵਿਪਰਿਯਾਯੇਨ.

ਪੁਚ੍ਛਾ – ਪਾਪੁਸ੍ਸਨ੍ਨਸ੍ਸ ਆਵੁਸੋ ਭਿਕ੍ਖੁਸ੍ਸ ਤਸ੍ਸ ਪਾਪਿਯਸਿਕਾ ਕਮ੍ਮਂ ਕਾਤੁਂ ਭਗਵਤਾ ਕਤ੍ਥ ਪਞ੍ਞਤ੍ਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਵਿਸ੍ਸਜ੍ਜਨਾ – ਰਾਜਗਹੇ ਭਨ੍ਤੇ ਉਪਵਾਲ਼ਂ ਭਿਕ੍ਖੁਂ ਆਰਬ੍ਭ ਪਞ੍ਞਤ੍ਤਂ, ਉਪਵਾਲ਼ੋ ਭਨ੍ਤੇ ਭਿਕ੍ਖੁ ਸਙ੍ਘਮਜ੍ਝੇ ਆਪਤ੍ਤਿਯਾ ਅਨੁਯੁਞ੍ਜਿਯਮਾਨੋ ਅਵਜਾਨਿਤ੍ਵਾ ਪਟਿਜਾਨਾਤਿ, ਪਟਿਜਾਨਿਤ੍ਵਾ ਅਵਜਾਨਾਤਿ, ਅਞ੍ਞੇਨਞ੍ਞਂ ਪਟਿਚਰਤਿ, ਸਮ੍ਪਜਾਨਮੁਸਾ ਭਾਸਤਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਪਞ੍ਞਤ੍ਤਂ.

ਪੁਚ੍ਛਾ – ਕਤਿ ਆਵੁਸੋ ਧਮ੍ਮਿਕਾਨਿ ਤਸ੍ਸਪਾਪਿਯਸਿਕਾ ਕਮ੍ਮਸ੍ਸ ਕਰਣਾਨਿ.

ਵਿਸ੍ਸਜ੍ਜਨਾ – ਪਞ੍ਚਿਮਾਨਿ ਭਨ੍ਤੇ ਧਮ੍ਮਿਕਾਨਿ ਤਸ੍ਸਪਾਪਿਯਸਿਕਾ ਕਮ੍ਮਸ੍ਸ ਕਰਣਾਨਿ. ਅਸੁਚਿ ਚ ਹੋਤਿ, ਅਲਜ੍ਜੀ ਚ, ਸਾਨੁਵਾਦੋ ਚ, ਤਸ੍ਸ ਸਙ੍ਘੋ ਤਸ੍ਸਪਾਪਿਯਸਿਕਾ ਕਮ੍ਮਂ ਕਰੋਤਿ ਧਮ੍ਮੇਨ ਸਮਗ੍ਗੇਨ, ਇਮਾਨਿ ਖੋ ਭਨ੍ਤੇ ਪਞ੍ਚ ਧਮ੍ਮਿਕਾਨਿ ਤਸ੍ਸ ਪਾਪਿਯਸਿਕਾ ਕਮ੍ਮਸ੍ਸ ਕਰਣਾਨਿ.

ਪੁਚ੍ਛਾ – ਤਸ੍ਸ ਪਾਪਿਯਸਿਕਾਕਮ੍ਮਕਤੇਨ ਆਵੁਸੋ ਭਿਕ੍ਖੁਨਾ ਕਤਿਸੁ ਵਤ੍ਤੇਸੁ ਸਮ੍ਮਾ ਵਤ੍ਤਿਤਬ੍ਬਂ.

ਵਿਸ੍ਸਜ੍ਜਨਾ – ਤਸ੍ਸ ਪਾਪਿਯਸਿਕਾਕਮ੍ਮਕਤੇਨ ਭਨ੍ਤੇ ਭਿਕ੍ਖੁਨਾ ਅਟ੍ਠਾਰਸਸੁ ਵਤ੍ਤੇਸੁ ਸਮ੍ਮਾ ਵਤ੍ਤਿਤਬ੍ਬਂ. ਨ ਉਪਸਮ੍ਪਾਦੇਤਬ੍ਬਂ, ਨ ਨਿਸ੍ਸਯੋ ਦਾਤਬ੍ਬੋ, ਨ ਸਾਮਣੇਰੋ ਉਪਟ੍ਠਾਪੇਤਬ੍ਬੋ, ਏਵਮਾਦੀਸੁ ਭਨ੍ਤੇ ਅਟ੍ਠਾਰਸਸੁ ਵਤ੍ਤੇਸੁ ਸਮ੍ਮਾ ਵਤ੍ਤਿਤਬ੍ਬਂ.

ਪੁਚ੍ਛਾ – ਕਤਿ ਆਵੁਸੋ ਅਧਿਕਰਣਾਨਿ ਸਮਥੇਹਿ ਵੂਪਸਮੇਤਬ੍ਬਾਨਿ.

ਵਿਸ੍ਸਜ੍ਜਨਾ – ਚਤ੍ਤਾਰਿਮਾਨਿ ਭਨ੍ਤੇ ਅਧਿਕਰਣਾਨਿ ਸਮਥੇਹਿ ਵੂਪਸਮੇਤਬ੍ਬਾਨਿ, ਵਿਵਾਦਾਧਿਕਰਣਂ ਅਨੁਵਾਦਾਧਿਕਰਣਂ ਆਪਤ੍ਤਾਧਿਕਰਣਂ ਕਿਚ੍ਚਾਧਿਕਰਣਂ, ਇਮਾਨਿ ਭਨ੍ਤੇ ਚਤ੍ਤਾਰਿ ਅਧਿਕਰਣਾਨਿ ਸਮਥੇਹਿ ਵੂਪਸਮੇਤਬ੍ਬਾਨਿ.

ਪੁਚ੍ਛਾ – ਕਿਂ ਆਵੁਸੋ ਵਿਵਾਦਾਧਿਕਰਣਸ੍ਸ ਮੂਲਂ.

ਵਿਸ੍ਸਜ੍ਜਨਾ – ਛ ਭਨ੍ਤੇ ਵਿਵਾਦਮੂਲਾਨਿ ਵਿਵਾਦਾਧਿਕਰਣਸ੍ਸ ਮੂਲਂ, ਤੀਣਿਪਿ ਅਕੁਸਲਮੂਲਾਨਿ ਵਿਵਾਦਾਧਿਕਰਣਸ੍ਸ ਮੂਲਂ, ਤੀਣਿਪਿ ਕੁਸਲਮੂਲਾਨਿ ਵਿਵਾਦਾਧਿਕਰਣਸ੍ਸ ਮੂਲਂ, ਇਦਂ ਭਨ੍ਤੇ ਵਿਵਾਦਾਧਿਕਰਣਸ੍ਸ ਮੂਲਂ.

ਪੁਚ੍ਛਾ – ਕਿਂ ਪਨਾਵੁਸੋ ਅਨੁਵਾਦਾਧਿਕਰਣਸ੍ਸ ਮੂਲਂ.

ਵਿਸ੍ਸਜ੍ਜਨਾ – ਛ ਭਨ੍ਤੇ ਅਨੁਵਾਦਮੂਲਾਨਿ ਅਨੁਵਾਦਾਧਿਕਰਣਸ੍ਸ ਮੂਲਂ, ਤੀਣਿਪਿ ਅਕੁਸਲਮੂਲਾਨਿ ਅਨੁਵਾਦਾਧਿਕਰਣਸ੍ਸ ਮੂਲਂ, ਤੀਣਿਪਿ ਕੁਸਲਮੂਲਾਨਿ ਅਨੁਵਾਦਾਧਿਕਰਣਸ੍ਸ ਮੂਲਂ, ਕਾਯੋਪਿ ਅਨੁਵਾਦਾਧਿਕਰਣਸ੍ਸ ਮੂਲਂ, ਵਾਚਾਪਿ ਅਨੁਵਾਦਾਧਿਕਰਣਸ੍ਸ ਮੂਲਂ, ਇਦਂ ਖੋ ਭਨ੍ਤੇ ਅਨੁਵਾਦਾਧਿਕਰਣਸ੍ਸ ਮੂਲਂ.

ਪੁਚ੍ਛਾ – ਕਿਂ ਪਨਾਵੁਸੋ ਆਪਤ੍ਤਾਧਿਕਰਣਸ੍ਸ ਮੂਲਂ.

ਵਿਸ੍ਸਜ੍ਜਨਾ – ਛ ਭਨ੍ਤੇ ਆਪਤ੍ਤਿਸਮੁਟ੍ਠਾਨਾ ਆਪਤ੍ਤਾਧਿਕਰਣਸ੍ਸ ਮੂਲਂ, ਅਤ੍ਤਿ ਭਨ੍ਤੇ ਆਪਤ੍ਤਿ ਕਾਯਤੋ ਸਮੁਟ੍ਠਾਤਿ ਨ ਵਾਚਤੋ ਨ ਚਿਤ੍ਤਤੋ, ਅਤ੍ਥਿ ਭਨ੍ਤੇ ਆਪਤ੍ਤਿ ਵਾਚਤੋ ਸਮੁਟ੍ਠਾਤਿ ਨ ਕਾਯਤੋ ਨ ਚਿਤ੍ਤਤੋ, ਅਤ੍ਥਿ ਭਨ੍ਤੇ ਆਪਤ੍ਤਿ ਕਾਯਤੋ ਚ ਵਾਚਤੋ ਚ ਸਮੁਟ੍ਠਾਤਿ ਨ ਚਿਤ੍ਤਤੋ, ਅਤ੍ਥਿ ਭਨ੍ਤੇ ਆਪਤ੍ਤਿ ਕਾਯਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤਿ ਨ ਵਾਚਤੋ, ਅਤ੍ਥਿ ਭਨ੍ਤੇ ਆਪਤ੍ਤਿ ਵਾਚਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤਿ ਨ ਕਾਯਤੋ, ਅਤ੍ਥਿ ਭਨ੍ਤੇ ਆਪਤ੍ਤਿ ਕਾਯਤੋ ਚ ਵਾਚਤੋ ਚ ਚਿਤ੍ਤਤੋ ਚ ਸਮੁਟ੍ਠਾਤਿ, ਇਮਾਨਿ ਭਨ੍ਤੇ ਛ ਆਪਤ੍ਤਿ ਸਮੁਟ੍ਠਾਨਾਨਿ ਆਪਤ੍ਤਾਧਿਕਰਣਸ੍ਸ ਮੂਲਂ.

ਪੁਚ੍ਛਾ – ਕਿਂ ਪਨਾਵੁਸੋ ਕਿਚ੍ਚਾਧਿਕਰਣਸ੍ਸ ਮੂਲਂ.

ਵਿਸ੍ਸਜ੍ਜਨਾ – ਕਿਚ੍ਚਾਧਿਕਰਣਸ੍ਸ ਭਨ੍ਤੇ ਏਕਂ ਮੂਲਂ ਸਙ੍ਘੋ.

ਪੁਚ੍ਛਾ – ਸਮਥਂ ਆਵੁਸੋ ਪੁਚ੍ਛਿਸ੍ਸਂ, ਸਨਿਦਾਨਂ ਸਨਿਦ੍ਦੇਸਂ. ਸਮੁਕ੍ਕਟ੍ਠਪਦਾਨਂ ਆਵੁਸੋ ਕਤਿ ਆਪਤ੍ਤਿਯੋ.

ਵਿਸ੍ਸਜ੍ਜਨਾ – ਸਮਥਂ ਭਨ੍ਤੇ ਵਿਸ੍ਸਜ੍ਜਿਸ੍ਸਂ, ਸਨਿਦਾਨਂ ਸਨਿਦ੍ਦੇਸਂ. ਸਮੁਕ੍ਕਟ੍ਠਪਦਾਨਂ ਭਨ੍ਤੇ ਦ੍ਵੇ ਆਪਤ੍ਤਿਯੋ.