੧੦. ਭਿਕ੍ਖੁਨਿਕ੍ਖਨ੍ਧਕ

ਪੁਚ੍ਛਾ – ਅਟ੍ਠਹਿ ਆਵੁਸੋ ਗਰੁਧਮ੍ਮੇਹਿ ਉਪਸਮ੍ਪਦਾ ਭਗਵਤਾ ਕਤ੍ਥ ਅਨੁਞ੍ਞਾਤਾ, ਕਸ੍ਸ ਅਨੁਞ੍ਞਾਤਾ, ਕਿਸ੍ਮਿਞ੍ਚ ਵਤ੍ਥੁਸ੍ਮਿਂ ਅਨੁਞ੍ਞਾਤਾ.

ਵਿਸ੍ਸਜ੍ਜਨਾ – ਵੇਸਾਲਿਯਂ ਭਨ੍ਤੇ ਮਹਾਪਜਾਪਤਿਯਾ ਗੋਤਮਿਯਾ ਅਨੁਞ੍ਞਾਤਾ, ਮਹਾਪਜਾਪਤਿ ਭਨ੍ਤੇ ਗੋਤਮੀ ਸੂਨੇਹਿ ਪਾਦੇਹਿ ਰਜੋਕਿਣ੍ਣੇਨ ਗਤ੍ਤੇਨ ਦੁਕ੍ਖੀ ਦੁਮ੍ਮਨਾ ਅਸ੍ਸੁਮੁਖੀ ਰੁਦਮਾਨਾ ਬਹਿਦ੍ਵਾਰਕੋਟ੍ਠਕੇ ਅਟ੍ਠਾਸਿ, ਅਥ ਖੋ ਭਨ੍ਤੇ ਆਯਸ੍ਮਾ ਆਨਨ੍ਦੋ ਮਹਾਪਜਾਪਤਿਂ ਗੋਤਮਿਂ ਤਂ ਕਾਰਣਂ ਪੁਚ੍ਛਿਤ੍ਵਾ ਭਗਵਨ੍ਤਂ ਚਤੁਕ੍ਖਤ੍ਤੁਂ ਯਾਚਿ ਮਾਤੁਗਾਮਸ੍ਸ ਤਥਾਗਤਪ੍ਪਵੇਦਿਤੇ ਧਮ੍ਮਵਿਨਯੇ ਆਗਾਰਸ੍ਮਾ ਅਨਾਗਾਰਿਯਂ ਪਬ੍ਬਜ੍ਜਂ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਾ.

ਪੁਚ੍ਛਾ – ਭਿਕ੍ਖੂਹਿ ਆਵੁਸੋ ਭਿਕ੍ਖੁਨਿਯੋ ਉਪਸਮ੍ਪਾਦੇਤੁਂ ਭਗਵਤਾ ਕਤ੍ਥ ਅਨੁਞ੍ਞਾਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਵਿਸ੍ਸਜ੍ਜਨਾ – ਵੇਸਾਲਿਯਂ ਭਨ੍ਤੇ ਮਹਾਪਜਾਪਤਿਂ ਗੋਤਮਿਂ ਆਰਬ੍ਭ ਅਨੁਞ੍ਞਾਤਂ, ਮਹਾਪਜਾਪਤਿ ਭਨ੍ਤੇ ਗੋਤਮੀ ਭਗਵਨ੍ਤਂ ਏਤਦਵੋਚ ‘‘ਕਥਾਹਂ ਭਨ੍ਤੇ ਇਮਾਸੁ ਸਾਕਿਯਾਨੀਸੁ ਪਟਿਪਜ੍ਜਾਮੀ’’ਤਿ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਪੁਚ੍ਛਾ – ਏਕਤੋ ਉਪਸਮ੍ਪਨ੍ਨਾਯ ਆਵੁਸੋ ਭਿਕ੍ਖੁਨਿਸਙ੍ਘੇ ਵਿਸੁਦ੍ਧਾਯ ਭਿਕ੍ਖੁਸਙ੍ਘੇ ਉਪਸਮ੍ਪਾਦੇਤੁਂ ਭਗਵਤਾ ਕਤ੍ਥ ਅਨੁਞ੍ਞਾਤਂ, ਕਂ ਆਰਬ੍ਭ ਕਿਸ੍ਮਿਂ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਵਿਸ੍ਸਜ੍ਜਨਾ – ਸਾਵਤ੍ਥਿਯਂ ਭਨ੍ਤੇ ਸਮ੍ਬਹੁਲੇ ਭਿਕ੍ਖੂ ਆਰਬ੍ਭ ਅਨੁਞ੍ਞਾਤਂ, ਸਮ੍ਬਹੁਲਾ ਭਨ੍ਤੇ ਭਿਕ੍ਖੂ ਭਿਕ੍ਖੁਨੀਨਂ ਅਨ੍ਤਰਾਯਿਕੇ ਧਮ੍ਮੇ ਪੁਚ੍ਛਿਂਸੁ, ਉਪਸਮ੍ਪਦਾਪੇਕ੍ਖਾਯੋ ਵਿਤ੍ਥਾਯਿਂਸੁ, ਮਙ੍ਕੂ ਅਹੇਸੁਂ, ਨ ਸਕ੍ਖਿਂਸੁ ਵਿਸ੍ਸਜ੍ਜੇਤੁਂ, ਤਸ੍ਮਿਂ ਭਨ੍ਤੇ ਵਤ੍ਥੁਸ੍ਮਿਂ ਅਨੁਞ੍ਞਾਤਂ.

ਪੁਚ੍ਛਾ – ਭਿਕ੍ਖੁਨਿਕ੍ਖਨ੍ਧਕਂ ਪੁਚ੍ਛਿਸ੍ਸਂ, ਸਨਿਦਾਨਂ ਸਨਿਦ੍ਦੇਸਂ. ਸਮੁਕ੍ਕਟ੍ਠਪਦਾਨਂ ਆਵੁਸੋ ਕਤਿ ਆਪਤ੍ਤਿਯੋ.

ਵਿਸ੍ਸਜ੍ਜਨਾ – ਭਿਕ੍ਖੁਨਿਕ੍ਖਨ੍ਧਕਂ ਵਿਸ੍ਸਜ੍ਜਿਸ੍ਸਂ, ਸਨਿਦਾਨਂ ਸਨਿਦ੍ਦੇਸਂ. ਸਮੁਕ੍ਕਟ੍ਠਪਦਾਨਂ ਭਨ੍ਤੇ ਦ੍ਵੇ ਆਪਤ੍ਤਿਯੋ.