੬੧. ਤੁਂ ਤਾਯੇ ਤਵੇ ਭਾਵੇ ਭਵਿਸ੍ਸਤਿ ਕ੍ਰਿਯਾਯਂ ਤਦਤ੍ਥਾਯਂ

ਭਵਿਸ੍ਸਤਿਅਤ੍ਥੇ ਵਤ੍ਤਮਾਨਤੋ ਕ੍ਰਿਯਤ੍ਥਾ ਭਾਵੇ ਤੁਮਾਦਯੋ ਹੋਨ੍ਤਿ ਕ੍ਰਿਯਾਯਂ ਤਦਤ੍ਥਾਯਂ ਪਤੀਯਮਾਨਾਯਂ. ਕਰਣਾਯ ਗਚ੍ਛਤਿ ਕਾਤੁਂ ਗਚ੍ਛਤਿ. ‘‘ਤੁਂਤੁਨਤਬ੍ਬੇਸੁ ਵਾ’’ਤਿ ਕਰਸ੍ਸ ਵਾ ਆ ਹੋਤਿ, ਪੁਬ੍ਬਰੂਪੇ ਕਤ੍ਤਾਯੇ. ‘‘ਕਰਸ੍ਸਾ ਤਵੇ’’ਤਿ ਨਿਚ੍ਚਂ ਆ, ਕਾਤਵੇ. ਨਿਪਾਤਤ੍ਤਾ ‘‘ਅਸਙ੍ਖ੍ਯੇਹਿ ਸਬ੍ਬਾਸਂ’’ਤਿ ਚਤੁਤ੍ਥੀਸਸ੍ਸ ਲੋਪੋ. ਏਵ+ਮੁਪਰਿ ਤੁਨਾਦੀਸੁ. ਕਤ੍ਤੁਂ ਕਾਮੇਤੀਤਿ ਕਤ੍ਤੁਕਾਮੋ, ਅਭਿਸਙ੍ਖਰਿਤੁ+ਮਾਕਙ੍ਖਤਿ. ਸਦ੍ਧਮ੍ਮਂ ਸੁਣਿਤੁਂ, ਞਿਮ੍ਹਿ ਨਾਗਮੇ ਤਸ੍ਸ ਣੋ, ਨਾਗਮਤ੍ਤਾ ਨ ਵੁਦ੍ਧਿ. ਸੋਤਵੇ ਸੋਤੁਂ ਸੁਣਿਤੁਂ ਵਾ ਪਤ੍ਥੇਹਿ. ਏਵਂ ਅਨੁਭਵਿਤੁਂ, ਪਚਿਤੁਂ. ਗਨ੍ਤੁਂ, ‘‘ਮਨਾਨਂ ਨਿਗ੍ਗਹੀਤਂ’’ਤਿ ਨਿਗ੍ਗਹੀਤਂ. ਗਮਿਤੁਂ, ਖਨ੍ਤੁਂ, ਖਨਿਤੁਂ, ਹਨ੍ਤੁਂ, ਹਨਿਤੁਂ, ਮਨ੍ਤੁਂ, ਮਨਿਤੁਂ, ਹਰਿਤੁਂ, ਅਨੁਸ੍ਸਰਿਤੁਂ ਇਚ੍ਛਤਿ. ਤਥਾ ਤੁਦਿਤੁਂ, ਪਵਿਸਿਤੁਂ, ਉਦ੍ਦਿਸਿਤੁਂ, ਭੋਤ੍ਤੁਂ, ਸਯਿਤੁਂ, ਨੇਤੁਂ, ਜੁਹੋਤੁਂ, ਪਜਹਿਤੁਂ, ਪਹਾਤੁਂ, ਦਾਤੁਂ, ਰੋਦ੍ਧੁਂ, ਰੁਨ੍ਧਿਤੁਂ, ਭੋਤ੍ਤੁਂ, ਭੁਞ੍ਜੀਤੁਂ, ਛੇਤ੍ਤੁਂ, ਛਿਨ੍ਦਿਤੁਂ, ਸਿਬ੍ਬਿਤੁਂ, ਊਮ੍ਹਿ ਵਸ੍ਸ ਬੋ, ਦ੍ਵਿਤ੍ਤਂ, ਬੁਦ੍ਧੁਂ, ਤਸ੍ਸ ਧੋ. ਬੁਜ੍ਝਿਤੁਂ, ਯੁਕ. ਜਾਨਿਤੁਂ ਞਾ=ਅਵਬੋਧਨੇ. ਜਨਿਤੁਂ. ਜੇਤੁਂ ਜਿਨਿਤੁਂ. ਪਤ੍ਤੁਂ ਪਾਪੁਣਿਤੁਂ. ਕੇਤੁਂ ਕਿਣਿਤੁਂ. ਵਿਨਿਚ੍ਛੇਤੁਂ, ਇਸ੍ਸ ਏ, ਵਿਨਿਚ੍ਛਿਨਿਤੁਂ. ਗਹੇਤੁਂ ਗਣ੍ਹਿਤੁਂ. ਚੋਰਿਤੁਂ ਚੋਰੇਤੁਂ ਚੋਰਯਿਤੁਂ, ਪਾਲੇਤੁਂ ਪਾਲਯਿਤੁਂ. ਪਯੋਜਕੇ-ਭਾਵੇਤੁਂ ਭਾਵਯਿਤੁਂ, ਕਾਰੇਤੁਂ ਕਾਰਯਿਤੁਂ ਕਾਰਾਪੇਤੁਂ ਕਾਰਾਪਯਿਤੁਂ ਇਚ੍ਛਤਿ+ਚ੍ਚਾਦਿ.

ਏਵਂ ਕ੍ਰਿਯਤ੍ਥਕ੍ਰਿਯਾਯਂ ਗਮ੍ਯਮਾਨਾਯਂ, ਯਥਾ ਸੁਬੋਦ੍ਧੁਂ ਵਕ੍ਖਾਮਿ, ਏਵਂ ਦਟ੍ਠੁਂ ਗਚ੍ਛਤਿ, ਗਨ੍ਤੁ+ਮਾਰਭਤਿ, ਗਨ੍ਤੁਂ ਪਯੋਜੇਤਿ, ਦਸ੍ਸੇਤੁ+ਮਾਹ ਇਚ੍ਚਾਦਿ.

ਅਰਹਸਕ੍ਕਾਦੀਸੁਪਿ ਸਿਦ੍ਧਂ, ਤਥਾ ਕਾਲ ਸਮਯਵੇਲਾਸੁ. ਕੋ ਤਂ ਨਿਨ੍ਦਿਤੁ+ਮਰਹਤਿ, ਰਾਜਾ ਭਵਿਤੁ+ਮਰਹਤਿ, ਅਰਹੋ ਭਵਂ ਵਤ੍ਤੁਂ, ਸਕ੍ਕਾ ਜੇਤੁਂ ਧਨੇਨ ਵਾ, ਸਕ੍ਕਾ ਲਦ੍ਧੁਂ, ਭਸ੍ਸ ਧੋ. ਕਤ੍ਤੁਂ ਸਕ੍ਖਿਸ੍ਸਤਿ. ਭਬ੍ਬੋ ਨਿਯਾਮਂ ਓਕ੍ਕਮਿਤੁਂ, ਅਭਬ੍ਬੋ ਕਾਤੁਂ. ਅਨੁਚ੍ਛਵਿਕੋ ਭਵਂ ਦਾਨਂ ਪਟਿਗ੍ਗਹੇਤੁਂ, ਇਦਂ ਕਾਤੁਂ ਅਨੁਰੂਪਂ, ਦਾਨਂ ਦਾਤੁਂ ਯੁਤ੍ਤਂ, ਦਾਤੁਂ ਵਤ੍ਤੁਞ੍ਚ ਲਭਤਿ. ਏਵਂ ਵਟ੍ਟਤਿ ਭਾਸਿਤੁਂ, ਛਿਨ੍ਦਿਤੁਂ ਨ ਚ ਕਪ੍ਪਤਿ ਇਚ੍ਚਾਦਿ. ਤਥਾਕਾਲੋ ਭੁਞ੍ਜਿਤੁਂ, ਸਮਯੋ ਭੁਞ੍ਜਿਤੁਂ, ਵੇਲਾ ਭੁਞ੍ਜਿਤੁਂ.

ਅਲਮਤ੍ਥੇਪਿ ਸਿਦ੍ਧਂ, ਅਲਮੇਵ ਦਾਨਾਨਿ ਦਾਤੁਂ, ਅਲਮੇਵ ਪੁਞ੍ਞਾਨਿ ਕਾਤੁਂ.