੧੫੦. ਭਿਦਾਦਿਤੋ ਨੋ ਕ੍ਤ+ਕ੍ਤਵਨ੍ਤੂਨਂ

ਭਿਦਾਦੀਹਿ ਪਰੇਸਂ ਕ੍ਤ+ਕ੍ਤਵਨ੍ਤੂਨਂ ਤਸ੍ਸ ਨੋ ਹੋਤਿ. ਆਕਤਿਗਣੋ+ਯਂ. ‘‘ਕ੍ਤੋ ਭਾਵਕਮ੍ਮੇਸੂ’’ਤਿ ਕਮ੍ਮੇ ਉਪਰਿ ਸਬ੍ਬਤ੍ਥ ਕ੍ਤੋ. ਭਿਜ੍ਜਿਤ੍ਥੋਤਿ ਭਿਨ੍ਨੋ, ਤਸ੍ਸ ਨੇ ਪਰਰੂਪਂ. ਅਭਿਨ੍ਦੀਤਿ ਭਿਨ੍ਨਵਾ, ‘‘ਕਤ੍ਤਰਿ ਭੂਤੇ’’ ਚ੍ਚਾਦਿਨਾ ਕ੍ਤਵਨ੍ਤੁ. ਏਵ+ਮੁਪਰਿਪਿ. ਛਿਜ੍ਜਿਤ੍ਥਾਤਿ ਛਿਨ੍ਨੋ. ਅਛਿਨ੍ਦੀਤਿ ਛਿਨ੍ਨਵਾ. ਛਦ=ਅਪਵਾਰਣੇ, ਛਾਦੀਯਿਤ੍ਥਾਤਿ ਛਨ੍ਨੋ. ਅਛਾਦਯੀਤਿ ਛਨ੍ਨਵਾ, ਚੁਰਾਦਿਤ੍ਤਾ ਣਿ, ਤਸ੍ਸ ‘‘ਣਿਣਾਪੀਨਂ ਤੇਸੂ’’ਤਿ ਏਤ੍ਥ ‘‘ਣਿ’’ ਇਤਿ ਯੋਗਵਿਭਾਗਾ ਲੋਪੋ. ਖਿਦ=ਅਸਹਨੇ, ਖਿਜ੍ਜੀਤਿ ਖਿਨ੍ਨੋ ਖਿਨ੍ਨਵਾ, ਕਤ੍ਤਰਿ. ਏਵ+ਮੁਪਰਿਪਿ. ਉਪ੍ਪਜ੍ਜੀਤਿ ਉਪ੍ਪਨ੍ਨੋ ਉਪ੍ਪਨ੍ਨਵਾ. ਸਿਦ=ਪਾਕੇ, ਅਸਿਜ੍ਜੀਤਿ ਸਿਨ੍ਨੋ ਸਿਨ੍ਨਵਾ. ਸਦ=ਵਿਸਰਣਗਤ੍ਯ ਵਸਾਦਨਾਦਾਨੇਸੁ, ਸਿਦੀਤਿ ਸਨ੍ਨੋ ਸਨ੍ਨਵਾ. ਪੀਨੀਤਿ ਪੀਨੋ ਪੀਨਵਾ. ਸੂ=ਪਸਵੇ, ਸੂਨੀਤਿ ਸੂਨੋ. ਪਸਵੀਤਿ ਸੂਨਵਾ. ਦੀ=ਖਯੇ, ਦੀਯੀਤਿ ਦੀਨੋ ਦੀਨਵਾ. ਡੀ+ਲੀ=ਆਕਾਸਗਮਨੇ, ਡੀਯੀਤਿ ਡੀਨੋ ਡੀਨਵਾ. ਲੀਯਿ ਲੇਯਿ ਅਲੀਯੀਤਿ ਲੀਨੋ ਲੀਨਵਾ. ਅਲੁਯੀਤਿ ਲੂਨੋ ਲੂਨਵਾ.