੫. ਣਾਦਿਕਣ੍ਡ
ਸਮਾਸੋ ਪਦਸਂਖੇਪੋ, ਪਦਪਚ੍ਚਯਸਂਹਿਤਂ;
ਤਦ੍ਧਿਤਂ ਨਾਮ ਹੋਤੀਤਿ, ਵਿਞ੍ਞੇਯ੍ਯਂ ਤੇਸ+ਮਨ੍ਤਰਂ.
੧. ਣੋ ਵਾ+ਪਚ੍ਚੇ
ਛਟ੍ਠੀਯਨ੍ਤਾ ਨਾਮਸ੍ਮਾ ਵਾ ਣਪਚ੍ਚਯੋ ਹੋਤਿ ਅਪਚ੍ਚੇ+ਭਿਧੇਯ੍ਯੇ. ਅਪਚ੍ਚਸਦ੍ਦਸਮ੍ਬਨ੍ਧਿਤ੍ਤੇਨ ਅਪਚ੍ਚਵਨ੍ਤਤੋ ਕਤਸਰਪਚ੍ਚਯੋ ਸਮਤ੍ਥ੍ਯਤੋ ਛਟ੍ਠ੍ਯਨ੍ਤਤੋ ਹੋਤੀਤਿ ‘‘ਛਟ੍ਠੀਯਨ੍ਤਾ ਨਾਮਸ੍ਮਾ’’ਤਿ ਸੁਤ੍ਤੇ ਅਵੁਤ੍ਤਮ੍ਪਿ ਵੁਤ੍ਤਂ. ਣਾਦੀਨਂ ਤਦ੍ਧਿਤਨ੍ਤਿ ਪੁਬ੍ਬਾਚਰਿਯਸਞ੍ਞਾ. ਣਕਾਰੋ ਵੁਦ੍ਧ੍ਯਤ੍ਥੋ. ਏਵ+ਮਞ੍ਞਤ੍ਰਾਪਿ. ਣਾਦਿਵੁਤ੍ਤਿਤ੍ਤਾ ‘‘ਏਕਤ੍ਥਤਾਯਂ’’ਤਿ ਵਿਭਤ੍ਤਿਲੋਪੋ.
੧੨੪. ਸਰਾਨ+ਮਾਦਿਸ੍ਸਾ+ਯੁਵਣ੍ਣਸ੍ਸਾ+ਏਓ ਣਾਨੁਬਨ੍ਧੇ
ਸਰਾਨ+ਮਾਦਿਭੂਤਾ ਯੇ ਅਕਾਰਿ+ਵਣ੍ਣੁ+ਵਣ੍ਣਾ, ਤੇਸਂ ਆ+ਏ+ਓ ਵਾ ਹੋਨ੍ਤਿ ਯਥਾਕ੍ਕਮਂ ਣਾਨੁਬਨ੍ਧੇਤਿ ਅਕਾਰਸ੍ਸ ਆਕਾਰੋ. ਆ+ਏ+ਓਨਂ ਵੁਦ੍ਧੀਤਿਪਿ ਪੁਬ੍ਬਾਚਰਿਯਸਞ੍ਞਾ. ਵਸਿਟ੍ਠਸ੍ਸਾ+ਪਚ੍ਚਂ ਵਾਸਿਟ੍ਠੋ. ਵੀਮ੍ਹਿ ਵਾਸਿਟ੍ਠੀ. ਵੇਤਿ ਵਸਿਟ੍ਠਸ੍ਸਾ+ਪਚ੍ਚਂਤਿ ਵਾਕ੍ਯਸ੍ਸ ਚ ਵਸਿਟ੍ਠਾਪਚ੍ਚਂਤਿ ਸਮਾਸਸ੍ਸ ਚ ਵਿਕਪ੍ਪਤ੍ਥਂ. ਸੋ ਚ ਵਾਸਦ੍ਦੋ ਯਾਵ ‘‘ਸਕਤ੍ਥੇ’’ਤਿ ਅਧਿਕਰੀਯਤਿ.
ਨਪੁਂਸਕੇਨ ਲਿਙ੍ਗੇਨ, ਸਦ੍ਦੋ+ਦਾਹੁ ਪੁਮੇਨ ਵਾ;
ਨਿਦ੍ਦਿਸ੍ਸਤੀਤਿ ਞਾਤਬ੍ਬ+ਮਵਿਸੇਸੇ ਪਨਿ+ਚ੍ਛਿਤੇਤਿ –
ਵੁਤ੍ਤਤ੍ਥਾ ਅਪਚ੍ਚਸਦ੍ਦਸ੍ਸ ਨਪੁਂਸਕਤ੍ਥੇਪਿ ਪੁਤ੍ਤਪੁਤ੍ਤੀਨਂ ਦ੍ਵਿਨ੍ਨਮ੍ਪਿ ਵਾਚਕੋ ਹੋਤਿ.
ਣਾਦਯੋ+ਭਿਧੇਯ੍ਯਲਿਙ੍ਗਾ, ਅਪਚ੍ਚੇ ਤ੍ਵ+ਨਪੁਂਸਕਾ;
ਨਪੁਂਸਕੇ ਸਕਤ੍ਥੇ ਣ੍ਯੋ, ਭਿਯ੍ਯੋ ਭਾਵਸਮੂਹਜਾ;
ਤਾ ਤੁ+ਤ੍ਥਿਯ+ਮਸਂਖ੍ਯਾਨੇ, ਤ੍ਵਾਦਿਚੀਪਚ੍ਚਯਨ੍ਤਕਾ.
ਭਾਰਦ੍ਵਾਜਸ੍ਸ ਅਪਚ੍ਚਂ=ਪੁਤ੍ਤੋ ਭਾਰਦ੍ਵਾਜੋ, ਏਵਂ ਵੇਸ੍ਸਾਮਿਤ੍ਤੋ, ਗੋਤਮੋ. ਏਤ੍ਥ ਚ ਅ+ਯੁਵਣ੍ਣਨ੍ਤਾਭਾਵਾ ਆ+ਏ+ਓਨਂ ਨ ਵੁਦ੍ਧਿ. ਵਾਸੁਦੇਵਸ੍ਸ ਅਪਚ੍ਚਂ ਵਾਸੁਦੇਵੋ, ਬਲਦੇਵੋ. ਚਿਤ੍ਤਕੋਤਿਆਦੀਸੁ ਪਨ ਸਂਯੋਗਨ੍ਤਤ੍ਤਾ ‘‘ਸਂਯੋਗੇ ਕ੍ਵਚੀ’’ਤਿ ਕ੍ਵਚਿ ਨ ਵੁਦ੍ਧਿ. ਉਪਗੁਨੋ ਅਪਚ੍ਚਂ ਓਪਗਵੋ ਓਪਗਵੀ. ਏਤ੍ਥ ‘‘ਉਵਣ੍ਣਸ੍ਸਾ+ਵਙ ਸਰੇ’’ਤਿ ਉਕਾਰਸ੍ਸ ਅਵਙ.
ਵਚ੍ਛਸ੍ਸਾ+ਪਚ੍ਚਨ੍ਤਿ ਵਿਗ੍ਗਯ੍ਹ ਪੁਬ੍ਬਸੁਤ੍ਤੇਨ ਣਪਚ੍ਚਯੇ ਕਤੇ ਪੁਨ ਵਚ੍ਛਸ੍ਸਾ+ਪਚ੍ਚਂਤਿ ਵਿਗ੍ਗਹੋ.
੨. ਵਚ੍ਛਾਦਿਤੋ ਣਾਨ+ਣਾਯਨਾ
ਵਚ੍ਛਾਦੀਹਿ ਅਪਚ੍ਚਪਚ੍ਚਯਨ੍ਤੇਹਿ ਗੋਤ੍ਤਾਦੀਹਿ ਚ ਸਦ੍ਦੇਹਿ ਣਾਨ+ਣਾਯਨਪਚ੍ਚਯਾ ਵਾ ਹੋਨ੍ਤਿ ਅਪਚ੍ਚੇ. ਵਚ੍ਛਾਨੋ, ਵਚ੍ਛਾਯਨੋ, ‘‘ਸਂਯੋਗੇ ਕ੍ਵਚੀ’’ਤਿ ਨ ਵੁਦ੍ਧਿ. ਕਤਿਸ੍ਸਾ+ਪਚ੍ਚਂ ਕਚ੍ਚੋ, ‘‘ਣ੍ਯ ਦਿਚ੍ਚਾਦੀਹੀ’’ਤਿ ਣ੍ਯੋ, ‘‘ਲੋਪੋ+ਵਣ੍ਣਿ+ਵਣ੍ਣਾਨਂ’’ਤਿ ਅਕਾਰਲੋਪੇ ਚਵਗ੍ਗਪੁਬ੍ਬਰੂਪਾਨਿ. ਕਚ੍ਚਸ੍ਸਾ+ਪਚ੍ਚਂ ਕਚ੍ਚਾਨੋ, ਕਚ੍ਚਾਯਨੋ, ਯਾਗਮੇ ਕਾਤਿਯਾਨੋ. ਮੁਗ੍ਗਸ੍ਸਾ+ਪਚ੍ਚਂ=ਨਤ੍ਤਾਦੀਤਿ ਵਾਕ੍ਯੇ ਵੁਦ੍ਧਿ+ਇਕਾਰਲੋਪ+ਪੁਬ੍ਬਰੂਪਾਨਿ. ਮੋਗ੍ਗਲ੍ਲਸ੍ਸਾ+ਪਚ੍ਚਂਤਿ ਪੁਨਣਾਨ+ਣਾਯਨਾ ਹੋਨ੍ਤਿ, ਮੋਗ੍ਗਲ੍ਲਾਨੋ ਮੋਗ੍ਗਲ੍ਲਾਯਨੋ. ਇਮੇ ਚਤ੍ਤਾਰੋ ਅਪਚ੍ਚਪਚ੍ਚਯਨ੍ਤਾ. ਗੋਤ੍ਤਾਦਿਤੋ ਯਥਾਸਕਟਸ੍ਸਾ+ਪਚ੍ਚਂ ਨਤ੍ਤਾਦੀਹਿ ਸਕਟਾਨੋ ਸਕਟਾਯਨੋ. ਕਣ੍ਹਸ੍ਸਾ+ਪਚ੍ਚਂ ਨਤ੍ਤਾਦਿ ਕਣ੍ਹਾਨੋ ਕਣ੍ਹਾਯਨੋ. ਏਵਂ ਅਗ੍ਗਿਵੇਸ੍ਸਾਨੋ ਅਗ੍ਗਿਵੇਸ੍ਸਾਯਨੋ, ਮੁਞ੍ਜਾਨੋ ਮੁਞ੍ਜਾਯਨੋ, ਕੁਞ੍ਜਾਨੋ ਕੁਞ੍ਜਾਯਨੋ. ਸਬ੍ਬਤ੍ਥ ਸਂਯੋਗਤ੍ਤਾ ਨ ਵੁਦ੍ਧਿ. ਆਕਤਿਗਣੋ+ਯਂ.
੩. ਕਤ੍ਤਿਕਾਵਿਧਵਾਦੀਹਿ ਣੇਯ੍ਯਣੇਰਾ
ਕਤ੍ਤਿਕਾਦੀਹਿ ਵਿਧਵਾਦੀਹਿ ਚ ਣੇਯ੍ਯਣੇਰਪ੍ਪਚ੍ਚਯਾ ਹੋਨ੍ਤਿ ਵਾ ਯਥਾਕ੍ਕਮਂ. ਕਤ੍ਤਿਕਾਯ ਅਪਚ੍ਚਂ ਕਤ੍ਤਿਕੇਯ੍ਯੋ, ਗਰੁਲ਼ੋ ਵਿਨਤਾਯ=ਸੁਪਣ੍ਣਮਾਤੁਯਾ ਅਪਚ੍ਚਂ ਵੇਨਤੇਯ੍ਯੋ. ਰੋਹਿਣਿਯਾ ਅਪਚ੍ਚਂ ਰੋਹਿਣੇਯ੍ਯੋ, ਗਙ੍ਗਾਯ ਅਪਚ੍ਚਂ ਗਙ੍ਗੇਯ੍ਯੋ. ਏਵਂ ਭਾਗਿਨੇਯ੍ਯੋ, ਨਾਦੇਯ੍ਯੋ, ਅਨ੍ਤੇਯ੍ਯੋ, ਆਹੇਯ੍ਯੋ, ਕਾਪੇਯ੍ਯੋ, ਸੁਚਿਯਾ ਅਪਚ੍ਚਂ ਸੋਚੇਯ੍ਯੋ, ਬਾਲੇਯ੍ਯੋ. ਣੇਰੇ-ਵਿਧਵਾਯ ਅਪਚ੍ਚਂ ਵੇਧਵੇਰੋ. ਬਨ੍ਧਕਿਯਾ=ਅਭਿਸਾਰਿਕਾਯ ਅਪਚ੍ਚਂ ਬਨ੍ਧ-ਕੇਰੋ. ਸਮਣਸ੍ਸ ਉਪਜ੍ਝਾਯਸ੍ਸਾ+ਪਚ੍ਚਂ ਸਾਮਣੇਰੋ, ਨਾਲ਼ਿਕੇਰੋ ਇਚ੍ਚਾਦਿ.
੪. ਣ੍ਯ ਦਿਚ੍ਚਾਦੀਹਿ
ਦਿਤਿਪ੍ਪਭੁਤੀਹਿ ਣ੍ਯੋ ਹੋਤਿ ਅਪਚ੍ਚੇ.
੧੨੫. ਸਂਯੋਗੇ ਕ੍ਵਚਿ
ਸਂਯੋਗਵਿਸਯੇ ਕ੍ਵਚਿ ਆ+ਏ+ਓਵੁਦ੍ਧਿਯੋ ਹੋਨ੍ਤਿ ਣਾਨੁਬਨ੍ਧੇ.
੧੩੧. ਲੋਪੋ+ਵਣ੍ਣਿ+ਵਣ੍ਣਾਨਂ
ਅਵਣ੍ਣਿ+ਵਣ੍ਣਾਨਂ ਲੋਪੋ ਹੋਤਿ ਯਕਾਰਾਦੋ ਪਚ੍ਚਯੇ. ਦਿਤਿਯਾ=ਅਸੁਰਮਾਤੁਯਾ ਅਪਚ੍ਚਂ ਦੇਚ੍ਚੋ ਆਦਿਚ੍ਚੋ. ਕੁਣ੍ਡਨਿਯਾ ਅਪਚ੍ਚਂ ਕੋਣ੍ਡਞ੍ਞੋ, ਨਸ੍ਸ ਞ੍ਞੇ ਪੁਬ੍ਬਰੂਪਂ. ਅਦਿਤੀਤਿ ਦੇਵਮਾਤਾ.
ਭਾਤੁਨੋ ਅਪਚ੍ਚਂ ਭਾਤਬ੍ਯੋ, ‘‘ਯਮ੍ਹਿ ਗੋਸ੍ਸ ਚਾ’’ਤਿ ਯਮ੍ਹਿ ਉਸ੍ਸ ਅਵਙ ਅਕਾਰਲੋਪਪੁਬ੍ਬਰੂਪਾਨਿ.
੫. ਆ ਣਿ
ਅਕਾਰਨ੍ਤਤੋ ਣਿ ਵਾ ਹੋਤ+ਪਚ੍ਚੇ ਬਹੁਲਂ. ਆ=ਤਿ ਨਾਮਵਿਸੇਸਨਤ੍ਤਾ ਅ-ਕਾਰਨ੍ਤਤੋਤਿ ਵੁਤ੍ਤਂ. ਦਕ੍ਖਸ੍ਸਾ+ਪਚ੍ਚਂ ਦਕ੍ਖਿ, ਦਤ੍ਤਿ, ਦੋਣਿ, ਵਾਸਵਿ, ਵਾਰੁਣਿ. ਜਿਨਦਤ੍ਤਸ੍ਸਾ+ਪਚ੍ਚਂ ਜੇਨਦਤ੍ਤਿ, ਸੁਦ੍ਧੋਦਨਿ, ਆਨੁਰੁਦ੍ਧਿ ਇਚ੍ਚਾਦਿ.
੬. ਰਾਜਤੋ ਞ੍ਞੋ ਜਾਤਿਯਂ
ਰਾਜਤੋ ਞ੍ਞੋ ਵਾ ਹੋਤ+ਪਚ੍ਚੇ ਖਤ੍ਥਿਯਜਾਤਿਯਂ ਗਮ੍ਯਮਾਨਾਯਂ. ਰਞ੍ਞੋ ਅਪਚ੍ਚਂ ਰਾਜਞ੍ਞੋ. ਜਾਤੀਯਨ੍ਤਿ ਕਿਂ, ਰਾਜਾਪਚ੍ਚਂ.
੭. ਖਤ੍ਤਾ ਯਿ+ਯਾ
ਤਿਜਾਤਿਯਂ ਅਪਚ੍ਚੇ ਯ+ਇਯਾ ਹੋਨ੍ਤਿ. ਖਤ੍ਤਸ੍ਸਾ+ਪਚ੍ਚਂ ਖਤ੍ਯੋ ਖਤ੍ਤਿਯੋ. ਜਾਤਿਯਂ ਤ੍ਵੇਵ, ਖਤ੍ਤਿ.
੮. ਮਨੁਤੋ ਸ੍ਸ+ਸਣ
ਮਨੁਤੋ ਜਾਤਿਸਮੁਦਾਯੇ ਸ੍ਸ+ਸਣ ਹੋਨ੍ਤੁ+ਪਚ੍ਚੇ. ਮਨੁਨੋ ਅਪਚ੍ਚਂ ਮਨੁਸ੍ਸੋ ਮਾਨੁਸੋ, ਮਨੁਸ੍ਸੀ ਮਾਨੁਸੀ. ਜਾਤਿਯਂ ਤ੍ਵੇਵ, ਮਾਨਵੋ, ਨਸ੍ਸ ਣੋ, ਮਾਣਵੋ.
੯. ਜਨਪਦਨਾਮਸ੍ਮਾ ਖਤ੍ਤਿਯਾ ਰਞ੍ਞੇ ਚ ਣੋ
ਜਨਪਦਸ੍ਸ ਯਂ ਨਾਮਂ, ਤਂ ਨਾਮਸ੍ਮਾ ਖਤ੍ਤਿਯਾ ਅਪਚ੍ਚੇ ਰਞ੍ਞੇ ਚ ਣੋ ਹੋਤਿ. ਪਞ੍ਚਾਲਾਨਂ ਅਪਚ੍ਚਂ ਰਾਜਾ ਵਾ ਪਞ੍ਚਾਲੋ, ਕੋਸਲੋ, ਮਾਗਧੋ, ਓਕ੍ਕਾਕੋ. ਜਨਪਦਨਾਮਸ੍ਮਾਤਿ ਕਿਂ, ਦਾਸਰਥਿ. ਖਤ੍ਤਿਯਾਤਿ ਕਿਂ, ਪਞ੍ਚਾਲਸ੍ਸ ਬ੍ਰਾਹ੍ਮਣਸ੍ਸਾ+ਪਚ੍ਚਂ ਪਞ੍ਚਾਲਿ.
੧੦. ਣ੍ਯ ਕੁਰੁਸਿਵੀਹਿ
ਕੁਰੁਸਿਵੀਹਿ ਅਪਚ੍ਚੇ ਰਞ੍ਞੇ ਚ ਣ੍ਯੋ ਹੋਤਿ. ਕੁਰੂਨਂ ਅਪਚ੍ਚਂ ਰਾਜਾ ਵਾ ਕੋਰਬ੍ਯੋ. ‘‘ਯਮ੍ਹਿ ਗੋਸ੍ਸ ਚਾ’’ਤਿਮਿਨਾ ਅਵਙ, ਬਕਾਰਪੁਬ੍ਬਰੂਪਾਨਿ. ਸੇਬ੍ਬੋ, ਇਲੋਪੋ. (ਅਪਚ੍ਚਤਦ੍ਧਿਤਂ).
੧੧. ਣ ਰਾਗਾ ਤੇਨ ਰਤ੍ਤਂ
ਰਾਗਵਾਚੀਤਤਿਯਨ੍ਤਤੋ ਰਤ੍ਤ+ਮਿਚ੍ਚੇ+ਤਸ੍ਮਿਂ ਅਤ੍ਤੇ ਣੋ ਹੋਤਿ. ਕੁਸੁਮ੍ਭਾਦੀਹਿ ਵਣ੍ਣਨ੍ਤਰਪਤ੍ਤਂ ਰਤ੍ਤਂ ਨਾਮ. ਕਸਾਵੇਨ ਰਤ੍ਤਂ ਕਾਸਾਵਂ. ਏਵਂ ਕੁਸੁਮ੍ਭੇਨ ਰਤ੍ਤਂ ਕੋਸੁਮ੍ਭਂ, ਹਾਲਿਦ੍ਦਂ, ਪਤ੍ਤਙ੍ਗਂ, ਮਞ੍ਜੇਟ੍ਠਂ, ਕੁਙ੍ਕੁਮਂ. ਇਧ ਨ ਹੋਤਿ ਨੀਲਂ ਪੀਤਨ੍ਤਿ, ਗੁਣਵਚਨਤ੍ਤਾ ਣੇਨ ਵਿਨਾਪਿ ਦਬ੍ਬਸ੍ਸਾ+ਭਿਧਾਨਤੋ.
੧੨. ਨਕ੍ਖਤ੍ਤੇਨਿ+ਨ੍ਦੁਯੁਤ੍ਤੇਨ ਕਾਲੇ
ਤਤਿਯਨ੍ਤਤੋ ਨਕ੍ਖਤ੍ਤਾ ਤੇਨ ਲਕ੍ਖਿਤੇ ਕਾਲੇ ਣੋ ਹੋਤਿ, ਤਂ ਚੇ ਨਕ੍ਖਤ੍ਤ+ਮਿਨ੍ਦੁਯੁਤ੍ਤਂ ਹੋਤਿ. ਫੁਸ੍ਸੇਨ ਇਨ੍ਦੁਯੁਤ੍ਤੇਨ ਲਕ੍ਖਿਤਾ ਪੁਣ੍ਣਮਾਸੀ ਫੁਸ੍ਸੀ ਰਤ੍ਤਿ, ਫੁਸ੍ਸੋ ਅਹੋ, ਮਘਾਯ ਇਨ੍ਦੁਯੁਤ੍ਤਾਯ ਲਕ੍ਖਿਤਾ ਪੁਣ੍ਣਮਾਸੀ ਮਾਘੀ, ਮਾਘੋ.
੧੩. ਸਾ+ਸ੍ਸ ਦੇਵਤਾ ਪੁਣ੍ਣਮਾਸੀ
ਸੇਤਿ ਪਠਮਨ੍ਤਾ ਅਸ੍ਸੇਤਿ ਛਟ੍ਠਿਯਤ੍ਥੇ ਣੋ ਹੋਤਿ, ਯਂ ਪਠਮਨ੍ਤਂ, ਸਾ ਚੇ ਦੇਵਤਾ ਪੁਣ੍ਣਮਾਸੀ ਵਾ. ਸੁਗਤੋ ਦੇਵਤਾ ਅਸ੍ਸ ਸੋਗਤੋ, ਮਾਹਿਨ੍ਦੋ, ਯਾਮੋ, ਵਾਰੁਣੋ. ਬੁਦ੍ਧੋ ਅਸ੍ਸ ਦੇਵਤਾਤਿ ਬੁਦ੍ਧੋ. ਫੁਸ੍ਸੀ ਪੁਣ੍ਣਮਾਸੀ ਅਸ੍ਸ ਸਮ੍ਬਨ੍ਧਿਨੀਤਿ ਫੁਸ੍ਸੋ ਮਾਸੋ. ਏਵਂ ਮਾਘੋ, ਫਗ੍ਗੁਨੋ, ਚਿਤ੍ਤੋ, ਵੇਸਾਖੋ, ਜੇਟ੍ਠਮੂਲੋ, ਆਸਾਲ਼੍ਹੋ, ਸਾਵਣੋ, ਪੋਟ੍ਠਪਾਦੋ, ਅਸ੍ਸਯੁਜੋ, ਕਤ੍ਤਿਕੋ, ਮਾਗਸਿਰੋ. ਪੁਣ੍ਣਮਾਸੀ ਚ ਭਤਕਮਾਸਸਮ੍ਬਨ੍ਧਿਨੀ ਨ ਹੋਤਿ, ਪੁਣ੍ਣੋ ਮਾ ਅਸ੍ਸਨ੍ਤਿ ਨਿਬ੍ਬਚਨਾ, ਅਤੋ ਏਵ ਨਿਪਾਤਨਾ ਣੋ, ਸਾਗਮੋ ਚ.
੧੪. ਤ+ਮਧੀਤੇ ਤਂ ਜਾਨਾਤਿ ਕ+ਣਿਕਾ ਚ
ਦੁਤਿਯਨ੍ਤਤੋ ਤ+ਮਧੀਤੇ ਤਂ ਜਾਨਾਤੀਤਿ ਏਤੇਸ੍ਵ+ਤ੍ਥੇਸੁ ਣੋ ਹੋਤਿ ਕੋ ਣਿਕੋ ਚ. ਏਤ੍ਥ ਚਸਦ੍ਦੋ ਕੋ ਚਣਿਕੋ ਚ ਹੋਤੀਤਿ ਸਮੁਚ੍ਚਿਨੋ, ਨੋ ਣਪਚ੍ਚਯਂ. ਬ੍ਯਾਕਰਣ+ਮਧੀਤੇ ਜਾਨਾਤੀਤਿ ਵਾ ਵੇਯ੍ਯਾਕਰਣੋ, ਵਿ+ਆ+ਕਰਣਨ੍ਤਿ ਵਿਚ੍ਛਿਜ੍ਜ ਕਤਯਾਦੇਸਸ੍ਸਿ+ਕਾਰਸ੍ਸ ‘‘ਤਦਾਦੇਸਾ ਤਦੀਵ ਭਵਨ੍ਤੀ’’ਤਿ ਞਾਯਾ ‘‘ਸਰਾਨ’’ਮਿਚ੍ਚਾਦਿਨਾ ਏਕਾਰੇ ਯਾਗਮਦ੍ਵਿਤ੍ਤਾਨਿ. ਏਵਂ ਮੋਹੁਤ੍ਤੋ, ਨੇਮਿਤ੍ਤੋ, ਅਙ੍ਗਵਿਜ੍ਜੋ, ਵਤ੍ਥੁਵਿਜ੍ਜੋ, ਛਨ੍ਦਸੋ, ‘‘ਮਨਾ, ਦੀਨਂ ਸਕ’’ ਇਤਿ ਸਕਾਗਮੋ. ਕਮਕੋ, ਪਦਕੋ, ਵੇਨਯਿਕੋ, ਸੁਤ੍ਤਨ੍ਤਿਕੋ, ਆਭਿਧਮ੍ਮਿਕੋ. ਦ੍ਵਿਤਗ੍ਗਹਣਂ ਅਜ੍ਝੇਨਜਾਨਨੇ ਚ ਵਿਸੁਂ ਵਿਸੁਂ ਪਚ੍ਚਯਵਿਧਾਨਤ੍ਥਂ, ਅਜ੍ਝੇਨਵਿਸਯਦਸ੍ਸਨਤ੍ਥਂ, ਪਸਿਦ੍ਧੁਪਸਂਹਰਣਤ੍ਥਞ੍ਚ.
੧੫. ਤਸ੍ਸ ਵਿਸਯੇ ਦੇਸੇ
ਛਟ੍ਠਿਯਨ੍ਤਾ ਵਿਸਯੇ ਦੇਸਸਰੂਪੇ ਣੋ ਹੋਤਿ. ਵਸਾਤੀਨਂ ਵਿਸਯੋ ਦੇਸੋ ਵਾਸਾਤੋ. ਦੇਸੇਤਿ ਕਿਂ, ਚਕ੍ਖੁਸ੍ਸ ਵਿਸਯੋ ਰੂਪਂ, ਦੇਵਦਤ੍ਤਸ੍ਸ ਵਿਸਯੋ+ਨੁਵਾਕੋ.
੧੬. ਨਿਵਾਸੇ ਤਨ੍ਨਾਮੇ
ਤਿ ਤਨ੍ਨਾਮੇ ਨਿਵਾਸੇ ਦੇਸੇ ਣੋ ਹੋਤਿ. ਸਿਵੀਨਂ ਨਿਵਾਸੋ ਦੇਸੋ ਸੇਬ੍ਬੋ. ਏਤ੍ਥ ‘‘ਯਵਾ ਸਰੇ’’ਤਿ ਯਕਾਰੇ ਬਕਾਰਪੁਬ੍ਬਰੂਪਾਨਿ. ਵਾਸਾਤੋ.
੧੭. ਅਦੂਰਭਵੇਤਿ
ਣੋ, ਵਿਦਿਸਾਯ ਅਦੂਰਭਵਂ ਵੇਦਿਸਂ.
੧੮. ਤੇਨ ਨਿਬ੍ਬਤ੍ਤੇਤਿ
ਤਤਿਯਨ੍ਤਾ ਨਿਬ੍ਬਤ੍ਤਤ੍ਥੇ ਣੋ ਹੋਤਿ. ਕੁਸਮ੍ਬੇਨ ਨਿਬ੍ਬਤ੍ਤਾ ਕੋਸਮ੍ਬੀ ਨਗਰਂ, ਏਵਂ ਕਾਕਨ੍ਦੀ, ਮਾਕਨ੍ਦੀ, ਸਹਸ੍ਸੇਨ ਨਿਬ੍ਬਤ੍ਤਾ ਸਾਹਸ੍ਸੀ ਪਰਿਖਾ, ਹੇਤੁਮ੍ਹਿ ਕਤ੍ਤਰਿ ਕਰਣੇ ਚ ਯਥਾਯੋਗਂ ਤਤਿਯਾ.
੧੯. ਤ+ਮਿਧ+ਤ੍ਥਿ
ਤਨ੍ਤਿ ਪਠਮਨ੍ਤਾ ਇਧਾਤਿ ਸਤ੍ਤਮ੍ਯਤ੍ਥੇ ਦੇਸੇ ਤਨ੍ਨਾਮੇ ਣੋ ਹੋਤਿ, ਯਂ ਤਂ ਪਠਮਨ੍ਤ+ਮਤ੍ਥਿ ਚੇ. ਉਦੁਮ੍ਬਰਾ ਅਸ੍ਮਿਂ ਦੇਸੇ ਸਨ੍ਤੀਤਿ ਓਦੁਮ੍ਬਰੋ, ਬਾਦਰੋ, ਪਬ੍ਬਜੋ.
੨੦. ਤਤ੍ਰ ਭਵੇਤਿ
ਸਤ੍ਤਮ੍ਯਨ੍ਤਾ ਭਵਤ੍ਥੇ ਣੋ. ਉਦਕੇ ਭਵੋ ਓਦਕੋ, ਓਰਸੋ, ਜਾਨਪਦੋ, ਮਾਗਧੋ, ਕਾਪਿਲਵਤ੍ਥਵੋ, ਕੋਸਮ੍ਬੋ, ਮਨਸਿ ਭਵਂ ਮਾਨਸਂ ਸੁਖਂ, ਸਕਾਗਮੋ. ਸਾਰਸੋ ਸਕੁਣੋ, ਸਾਰਸੀ ਸਕੁਣੀ, ਸਾਰਸਂ ਪੁਪ੍ਫਂ. ਮਿਤ੍ਤੇ ਭਵਾ ਮੇਤ੍ਤਾ ਮੇਤ੍ਤੀ ਵਾ. ਪੁਰੇ ਭਵਾ ਪੋਰੀ ਵਾਚਾ. ਪਾਵੁਸੇ ਭਵੋ ਪਾਵੁਸੋ ਮੇਘੋ. ਪਾਵੁਸਾ ਰਤ੍ਤਿ, ਪਾਵੁਸਂ ਅਬ੍ਭਂ. ਸਾਰਦੋ, ਸਾਰਦਾ, ਸਾਰਦਂ ਪੁਪ੍ਫਂ. ਮਾਧੁਰੋ ਜਨੋ, ਮਾਧੁਰਾ ਗਣਿਕਾ, ਮਾਧੁਰਂ ਵਤ੍ਥਂ.
੨੧. ਅਜ੍ਜਾਦੀਹਿ ਤਨੋਤਿ
ਭਵਤ੍ਥੇ ਤਨੋ. ਅਜ੍ਜ ਭਵੋ ਅਜ੍ਜਤਨੋ, ਸ੍ਵਾਤਨੋ, ਹਿਯ੍ਯਤਨੋ. ‘‘ਏਓਨ+ਮ ਵਣ੍ਣੇ’’ਤਿ ਏਓਨਂ ਅ ਹੋਤਿ.
੨੨. ਪੁਰਾਤੋ ਣੋ ਚਤਿ
ਭਵਤ੍ਥੇ ਣੋ ਤਨੋ ਚ. ਏਤ੍ਥ ਣਕਾਰੋ ਅਵਯਵੋ, ਨੇਵਾ+ਨੁਬਨ੍ਧੋ. ਪੁਰਾਣੋ, ਪੁਰਾਤਨੋ.
੨੩. ਅਮਾਤ੍ਵ+ਚ੍ਚੋਤਿ
ਭਵਤ੍ਥੇ ਅਚ੍ਚੋ ਹੋਤਿ. ਅਮਾ=ਸਹ ਭਵੋ ਅਮਚ੍ਚੋ.
੨੪. ਮਜ੍ਝਾਦਿਤ੍ਵਿ+ਮੋਤਿ
ਭਵਤ੍ਥੇ ਇਮੋ, ਮਜ੍ਝੇ ਭਵੋ ਮਜ੍ਝਿਮੋ. ਏਵਂ ਅਨ੍ਤਿਮੋ, ਹੇਟ੍ਠਿਮੋ, ਉਪਰਿਮੋ, ਓਰਿਮੋ, ਪਾਰਿਮੋ, ਪਚ੍ਛਿਮੋ, ਅਬ੍ਭਨ੍ਤਰਿਧੋ, ਪਚ੍ਚਨ੍ਤਿਮੋ.
੨੫. ਕਣ+ਣੇਯ੍ਯ+ਣੇਯ੍ਯਕ+ਯਿ+ਯਾਤਿ
ਭਵਤ੍ਥੇ ਕਣਆਦਯੋ ਹੋਨ੍ਤਿ. ਕਣ-ਕੁਸਿਨਾਰਾਯਂ ਭਵੋ ਕੋਸਿਨਾਰਕੋ, ਮਾਗਧਕੋ, ਆਰਞ੍ਞਕੋ ਵਿਹਾਰੋ, ਰਾਜਗਹਕੋ, ਕੋਸਮ੍ਬਕੋ, ਇਨ੍ਦਪਤ੍ਤਕੋ, ਕਾਪਿਲਕੋ, ਭਾਰੁਕਚ੍ਛਕੋ, ਨਾਗਰਕੋ. ਅਙ੍ਗੇਸੁ ਜਾਤੋ ਅਙ੍ਗਕੋ, ਕੋਸਲਕੋ, ਵੇਦੇਹਕੋ, ਕਮ੍ਬੋਜਕੋ, ਗਨ੍ਧਾਰਕੋ, ਸੋਵੀਰਕੋ, ਸਿਨ੍ਧਵਕੋ, ਅਸ੍ਸਕੋ ਇਚ੍ਚਾਦਿ. ਣੇਯ੍ਯ-ਗਙ੍ਗੇਯ੍ਯੋ, ਪਬ੍ਬਤੇਯ੍ਯੋ, ਵਾਨੇਯ੍ਯੋ. ਣੇਯ੍ਯਕ-ਕੋਸਲੇਯ੍ਯਕੋ, ਬਾਰਾਣਸੇਯ੍ਯਕੋ, ਚਮ੍ਪੇਯ੍ਯਕੋ, ਸਿਲਾਯ ਜਾਤਂ ਸੇਲੇਯ੍ਯਕਂ, ਮਿਥਿਲੇਯ੍ਯਕੋ. ਬਾਰਾਣਸੇਯ੍ਯਕੋਤ੍ਯਾਦੀਸੁ ‘‘ਦਿਸ੍ਸਨ੍ਤ+ਞ੍ਞੇਪਿ ਪਚ੍ਚਯਾ’’ਤਿ ਏਯ੍ਯਕੋ, ਏਵਂ ਉਪਰਿ ਸੁਤ੍ਤੇ ਦਸ੍ਸਿਤਪਚ੍ਚਯਤੋ ਵਿਸੁਂ ਪਚ੍ਚਯੇ ਦਸ੍ਸਿਤੇ ਇਮਿਨਾ ਸੁਤ੍ਤੇਨਾਤਿ ਦਟ੍ਠਬ੍ਬਂ. ਯ-ਗਮ੍ਮੋ, ਯਮ੍ਹਿ ਅਕਾਰਲੋਪੇ ਪੁਬ੍ਬਰੂਪਂ ਰਸ੍ਸੋ ਚ. ਦਿਬ੍ਬੋ. ਇਯ-ਉਦਰਿਯੋ, ਦਿਵਿਯੋ, ਪਞ੍ਚਾਲਿਯੋ, ਬੋਧਿਪਕ੍ਖਿਯੋ, ਲੋਕਿਯੋ.
੨੬. ਣਿਕੋ
ਸਤ੍ਤਮ੍ਯਨ੍ਤਾ ਭਵਤ੍ਥੇ ਣਿਕੋ ਹੋਤਿ. ਸਰਦੇ ਭਵੋ ਸਾਰਦਿਕੋ ਦਿਵਸੋ, ਸਾਰਦਿਕਾ ਰਤ੍ਤਿ.
੨੭. ਤ+ਮਸ੍ਸ ਸਿਪ੍ਪਂ ਸੀਲਂ ਪਣ੍ਯਂ ਪਹਰਣਂ ਪਯੋਜਨਂ
ਪਠਮਨ੍ਤਾ ਸਿਪ੍ਪਾਦਿਵਾਚਕਾ ਅਸ੍ਸੇਤਿ ਛਟ੍ਠ੍ਯਤ੍ਥੇ ਣਿਕੋ ਹੋਤਿ. ਵੀਣਾਵਾਦਨਂ ਸਿਪ੍ਪ+ਮਸ੍ਸ ਵੇਣਿਕੋ, ਵੀਣਾਵਾਦਨਂ ਅਭੇਦੋਪਚਾਰੇਨ ਵੀਣਾ ਨਾਮ. ਮੋਦਿਙ੍ਗਿਕੋ, ਵਂਸਿਕੋ. ਪਂਸੁਕੂਲਧਾਰਣਂ ਸੀਲ+ਮਸ੍ਸ ਪਂਸੁਕੂਲਿਕੋ, ਤੇਚੀਵਰਿਕੋ. ਗਨ੍ਧੋ ਪਣ੍ਯ+ਮਸ੍ਸ ਗਨ੍ਧਿਕੋ, ਤੇਲਿਕੋ, ਗੋਲ਼ਿਕੋ, ਪੂਵਿਕੋ, ਪਣ੍ਣਿਕੋ, ਤਮ੍ਬੁਲਿਕੋ, ਲੋਣਿਕੋ. ਚਾਪੋਪਹਰਣ+ਮਸ੍ਸ ਚਾਪਿਕੋ, ਤੋਮਰਿਕੋ, ਮੁਗ੍ਗਰਿਕੋ, ਮੋਸਲਿਕੋ. ਉਪਧਿ=ਕ੍ਖਨ੍ਧਾਦਿ ਪਯੋਜਨ+ਮਸ੍ਸ ਓਪਧਿਕਂ, ਸਾਤਿਕਂ, ਸਾਹਸ੍ਸਿਕਂ.
੨੮. ਤਂ ਹਨ੍ਤ+ਰਹਤਿ ਗਚ੍ਛਤੁ+ਞ੍ਛਤਿ+ਚਰਤਿ
ਦੁਤਿਯਨ੍ਤਾ ਹਨ੍ਤੀਤਿ ਏਵਮਾਦੀਸ੍ਵ+ਤ੍ਥੇਸੁ ਣਿਕੋ ਹੋਤਿ. ਪਕ੍ਖਿਨੋ ਹਨ੍ਤੀਤਿ ਪਕ੍ਖਿਕੋ, ਸਾਕੁਣਿਕੋ, ਮਾਯੂਰਿਕੋ, ਮਚ੍ਛੇ ਹਨ੍ਤੀਤਿ ਮਚ੍ਛਿਕੋ, ਮੇਨਿਕੋ. ਮਿਗੇ ਹਨ੍ਤੀਤਿ ਮਾਗਵਿਕੋ, ਵਕਾਰਾਗਮੋ. ਮਿਗਸ੍ਸ ‘‘ਤਦਮਿਨਾ’’ਦਿਨਾ ਮਗਵਾਦੇਸੇਪਿ ਮਾਗਵਿਕੋ. ਓਰਬ੍ਭਿਕੋ, ਹਾਰਿਣਿਕੋ. ਸੂਕਰਿਕੋਤਿ ਇਕੋ. ਸਤ+ਮਰਹਤੀਤਿ ਸਾਤਿਕਂ, ਸਨ੍ਦਿਟ੍ਠਿਕਂ, ਏਹਿ ਪਸ੍ਸ ਵਿਧਿਂ ਅਰਹਤੀਤਿ ਏਹਿਪਸ੍ਸਿਕੋ. ਏਤ੍ਥ ਤ੍ਯਾਦ੍ਯਨ੍ਤਸਮੁਦਾਯਤੋ ਅਨੁਕਰਣਤ੍ਤਾ ਵਾ ਤਦ੍ਧਿਤਸ੍ਸ ਅਭਿਧਾਨਲਕ੍ਖਣਤ੍ਤਾ ਵਾ ਬਹੁਲਂਵਿਧਾਨੇਨ ਵਾ ਪਚ੍ਚਯੋ. ਸਾਹਸ੍ਸਿਕੋ, ਕੁਮ੍ਭਿਕੋ, ਦੋਣਿਕੋ, ਅਦ੍ਧਮਾਸਿਕੋ, ਕਹਾਪਣਿਕੋ, ਆਸੀਤਿਕਾ ਗਾਥਾ, ਨਾਵੁਤਿਕਾ. ਸਹਸ੍ਸਿਯੋਤਿ ਇਯੋ. ਪਰਦਾਰਂ ਗਚ੍ਛਤੀਤਿ ਪਾਰਦਾਰਿਕੋ, ਮਗ੍ਗਿਕੋ, ਪਞ੍ਞਾਸਯੋਜਨਿਕੋ, ਪਥਿਕੋ. ਬਦਰੇ ਉਞ੍ਛਤੀਤਿ ਬਾਦਰਿਕੋ, ਸਾਮਾਕਿਕੋ. ਧਮ੍ਮਂ ਚਰਤੀਤਿ ਧਮ੍ਮਿਕੋ, ਅਧਮ੍ਮਿਕੋ.
੨੯. ਤੇਨ ਕਤਂ ਕੀਤਂ ਬਦ੍ਧ+ਮਭਿਸਙ੍ਖਤਂ ਸਂਸਟ੍ਠਂ ਹਤਂ ਹਨ੍ਤਿ ਜਿਤਂ ਜਯਤਿ ਦਿਬ੍ਬਤਿ ਖਨਤਿ ਤਰਤਿ ਚਰਤਿ ਵਹਤਿ ਜੀਵਤਿਤਿ
ਕਤਾਦੀਸ੍ਵ+ਤ੍ਥੇਸੁ ਣਿਕੋ. ਕਾਯੇਨ ਕਤਂ ਕਾਯਿਕਂ, ਵਾਚਸਿਕਂ, ਮਾਨਸਿਕਂਤਿ ਸਕਾਗਮੋ. ਵਾਤੇਨ ਕਤੋ ਆਬਾਧੋ ਵਾਤਿਤੋ, ਸੇਮ੍ਹਿਕੋ, ਪਿਤ੍ਤਿਕੋ. ਸਤੇਨ ਕੀਤਂ ਸਾਤਿਕਂ, ਸਾਹਸ੍ਸਿਕਂ, ਵਤ੍ਥੇਨ ਕੀਤਂ ਵਤ੍ਥਿਕਂ, ਕੁਮ੍ਭਿਕਂ, ਸੋਵਣ੍ਣਿਕਂ, ਘਾਤਿਕਂ. ਮੂਲਤੋਵ ਪਚ੍ਚਯੋ, ਅਮੂਲਵਾਚਿਤ੍ਤਾ ਦੇਵਦਤ੍ਤੇਨ ਕੀਤੋਤਿ ਨ ਹੋਤਿ, ਤਦਤ੍ਥਾਪ੍ਪਤੀਤਿਯਾ. ਵਰਤ੍ਥਾਯ ਬਦ੍ਧੋ ਵਾਰਤ੍ਤਿਕੋ, ਆਯਸਿਕੋ, ਪਾਸਿਕੋ, ਸੁਤ੍ਤਿਕੋ. ਘਤੇਨ ਅਭਿਸਙ੍ਖਤਂ ਸਂਸਟ੍ਠਂ ਵਾ ਘਾਤਿਕਂ, ਗੋਲ਼ਿਕਂ, ਦਧਿਕਂ, ਮਾਰੀਚਿਕਂ. ਜਾਲੇਨ ਹਤੋ ਹਨ੍ਤੀਤਿ ਵਾ ਜਾਲਿਕੋ, ਬਾਲਿਸਿਕੋ. ਅਕ੍ਖੇਹਿ ਜਿਤਂ ਅਕ੍ਖਿਕਂ ਧਨਂ, ਸਾਲਾਕਿਕਂ, ਤਿਨ੍ਦੁਕਿਕੋ, ਅਮ੍ਬਫਲਿਕੋ. ਅਕ੍ਖੇਹਿ ਜਯਤਿ ਦਿਬ੍ਬਤਿ ਵਾ ਅਕ੍ਖਿਕੋ. ਖਣਿਤ੍ਤਿਯਾ ਖਨਤੀਤਿ ਖਾਣਿਤ੍ਤਿਕੋ, ਕੁਦ੍ਦਾਲਿਕੋ. ਦੇਵਦਤ੍ਤੇਨ ਜਿਤਂ, ਅਙ੍ਗੁਲ੍ਯਾ ਖਨਤੀਤਿ ਨ ਹੋਤਿ, ਤਦਤ੍ਥਾਨਵਗਮਾ. ਉਲ਼ੁਮ੍ਪੇਨ ਤਰਤੀਤਿ ਓਲ਼ੁਮ੍ਪਿਕੋ, ਉਲ਼ੁਮ੍ਪਿਕੋਤਿ ਇਕੋ. ਕੁਲ੍ਲਿਕੋ, ਗੋਪੁਚ੍ਛਿਕੋ, ਨਾਵਿਕੋ. ਸਕਟੇਨ ਚਰਤੀਤਿ ਸਾਕਟਿਕੋ, ਰਥਿਕੋ. ਪਰਪ੍ਪਿਕੋਤਿ ਇਕੋ. ਖਨ੍ਧੇਨ ਵਹਤੀਤਿ ਖਨ੍ਧਿਕੋ. ਅਂਸਿਕੋ, ਸੀਸਿਕੋਤਿ ਇਕੋ. ਵੇਤਨੇਨ ਜੀਵਤੀਤਿ ਵੇਤਨਿਕੋ, ਭਤਿਕੋ, ਕਯਿਕੋ, ਵਿਕ੍ਕਯਿਕੋ, ਕਯਵਿਕ੍ਕਯਿਕੋਤਿ ਇਕੋ.
੩੦. ਤਸ੍ਸ ਸਂਵਤ੍ਤਤਿ
ਚਤੁਤ੍ਥ੍ਯਨ੍ਤਾ ਸਂਵਤ੍ਤਤੀਤਿ ਅਸ੍ਮਿਂ ਅਤ੍ਥੇਣਿਕੋ ਹੋਤਿ. ਪੁਨਬ੍ਭਵਾਯ ਸਂਵਤ੍ਤਤੀਤਿ ਪੋਨੋਬ੍ਭਵਿਕੋ, ਇਤ੍ਥਿਯਂ ਪੋਨੋਬ੍ਭਵਿਕਾ. ਲੋਕਾਯ ਸਂਵਤ੍ਤਤੀਤਿ ਲੋਕਿਕੋ. ਸੁਟ੍ਠੁ ਅਗ੍ਗੋਤਿ ਸਗ੍ਗੋ, ਸਗ੍ਗਾਯ ਸਂਵਤ੍ਤਤੀਤਿ ਸੋਵਗ੍ਗਿਕੋ, ਸਸ੍ਸੋ+ਵਕ ਤਦਮਿਨਾਦੀਪਾਠਾ. ਧਨਾਯ ਸਂਵਤ੍ਤਤੀਤਿ ਧਞ੍ਞਂ.
੩੧. ਤਤੋ ਸਮ੍ਭੂਤ+ਮਾਗਤਂ
ਪਞ੍ਚਮ੍ਯਨ੍ਤਾ ਸਮ੍ਭੂਤ+ਮਾਗਤਨ੍ਤਿ ਏਤੇਸ੍ਵ+ਤ੍ਥੇਸੁ ਣਿਕੋ ਹੋਤਿ. ਮਾਤਿਤੋ ਸਮ੍ਭੂਤ+ਮਾਗਤਂਵਾ+ਤਿ ਏਤ੍ਥ ‘‘ਮਾਤਿਤੋ ਚ ਭਗਿਨਿਯਂਚ੍ਛੋ’’ਤਿ ‘‘ਮਾਤਿਤੋ’’ਤਿ ਭਾਗੇਨ ਉਸ੍ਸ ਇਮ੍ਹਿ ਵਾਕ੍ਯਂ, ਰਸ੍ਸਦ੍ਵਿਤ੍ਤੇਸੁ ਮਤ੍ਤਿਕਂ, ਪੇਤ੍ਤਿਕਂ. ਣ੍ਯ+ਰਿਯਣ+ਰ੍ਯਪਚ੍ਚਯਾਪਿ ਦਿਸ੍ਸਨ੍ਤਿ. ਸੁਰਭਿਤੋ ਸਮ੍ਭੂਤਂ ਸੋਰਭ੍ਯਂ. ਯਮ੍ਹਿ ਥਞ੍ਞਂ. ਉਭਯਤ੍ਥ ‘‘ਲੋਪੋ+ਵਣ੍ਣਿ+ਵਣ੍ਣਾਨਂ’’ਤਿ ਲੋਪੋ. ਰਿਯਣ-ਪਿਤੁਤੋ ਸਮ੍ਭੂਤੋ ਪੇਤ੍ਤਿਯੋ, ਮਾਤਿਯੋ, ‘‘ਰਾਨੁਬਨ੍ਧੇ+ਨ੍ਤਸਰਾਦਿਸ੍ਸਾ’’ਤਿ ਉਲੋਪੋ, ਮਤ੍ਤਿਯੋ. ਰ੍ਯਮ੍ਹਿ-ਉਲੋਪੋ, ਚਵਗ੍ਗਪੁਬ੍ਬਰੂਪਾਨਿ, ਮਚ੍ਚੋ ਵਾ.
੩੨. ਤਤ੍ਥ ਵਸਤਿ ਵਿਦਿਤੋ ਭਤ੍ਤੋ ਨਿਯੁਤ੍ਤੋ
ਸਤ੍ਤਮ੍ਯਨ੍ਤਾ ਵਸਤੀਤ੍ਵੇਵਮਾਦੀਸ੍ਵ+ਤ੍ਥੇਸੁ ਣਿਕੋ ਹੋਤਿ. ਰੁਕ੍ਖਮੂਲੇ ਵਸਤੀਤਿ ਰੁਕ੍ਖਮੂਲਿਕੋ, ਆਰਞ੍ਞਿਕੋ, ਰਾਜਗਹਿਕੋ, ਮਾਗਧਿਕੋ, ਸੋਸਾਨਿਕੋ. ਲੋਕੇ ਵਿਦਿਤੋ ਲੋਕਿਕੋ. ਚਤੁਮਹਾਰਾਜੇਸੁ ਭਤ੍ਤਾ ਚਾਤੁਮ੍ਮਹਾਰਾਜਿਕਾ. ਦ੍ਵਾਰੇ ਨਿਯੁਤ੍ਤੋ ਦੋਵਾਰਿਕੋ, ਦਸ੍ਸੋਕ ਤਦਮਿਨਾਦਿਪਾਠਾ. ਭਣ੍ਡਾਗਾਰਿਕੋ. ਇਕੇ-ਨਵਕਮ੍ਮਿਕੋ, ਆਦਿਕਮ੍ਮਿਕੋ. ਕਿਯੇ-ਜਾਤਿਕਿਯੋ, ਅਨ੍ਧਕਿਯੋ.
੩੩. ਤਸ੍ਸਿ+ਦਂ
ਛਟ੍ਠਿਯਨ੍ਤਾ ਇਦ+ਮਿਚ੍ਚ+ਸ੍ਮਿਂ ਅਤ੍ਥੇ ਣਿਕੋ ਹੋਤਿ. ਸਙ੍ਘਸ੍ਸ ਇਦਂ ਸਙ੍ਘਿਕਂ, ਪੁਗ੍ਗਲਿਕਂ, ਸਕ੍ਯਪੁਤ੍ਤਿਕੋ, ਨਾਟਪੁਤ੍ਤਿਕੋ, ਜੇਨਦਤ੍ਤਿਕੋ. ਕਿਯੇ-ਸਸ੍ਸ ਇਦਂ ਸਕਿਯੋ, ਪਰਕਿਯੋ. ਨਿਯੇਅਤ੍ਤਨਿਯਂ. ਕੇ-ਸਕੋ, ਰਞ੍ਞੋ ਇਦਂ ਰਾਜਕਂ ਭਣ੍ਡਂ.
੩੪. ਣੋ
ਛਟ੍ਠਿਯਨ੍ਤਾ ਇਦ+ਮਿਚ੍ਚ+ਸ੍ਮਿਂ ਅਤ੍ਥੇ ਣੋ ਹੋਤਿ. ਕਚ੍ਚਾਯਨਸ੍ਸ ਇਦਂ ਕਚ੍ਚਾਯਨਂ, ਬ੍ਯਾਕਰਣਂ, ਸੋਗਤਂ ਸਾਸਨਂ, ਮਾਹਿਸਂ ਮਂਸਾਦਿ.
੩੫. ਗਵਾਦੀਹਿ ਯੋ
ਗਵਾਦੀਹਿ ਛਟ੍ਠਿਯਨ੍ਤੇਹਿ ਇਦ+ਮਿਚ੍ਚ+ਸ੍ਮਿਂ ਅਤ੍ਥੇ ਯੋ ਹੋਤਿ. ਗੁਨ੍ਨਂ ਇਦਂ ਗਬ੍ਯਂ, ਅਵਙ, ਮਂਸਾਦਿ. ਇਲੋਪੇ ਕਬ੍ਬਂ. ਦੁਨੋ ਇਦਂ ਦਬ੍ਬਂ.
੩੬. ਪਿਤਿਤੋ ਭਾਤਰਿ ਰੇਯ੍ਯਣ
‘‘ਪਿਤਿਤੋ ਮਾਤਿਤੋ’’ਤਿ ਤੇਨ ਤੇਨ ਸੁਤ੍ਤਨਿਪਾਤੇਨੇਵ ਉਸ੍ਸ ਇ. ਪਿਤੁਸਦ੍ਦਾ ਤਸ੍ਸ ਭਾਤਰਿ ਰੇਯ੍ਯਣ. ਪਿਤੁ ਭਾਤਾ ਪੇਤ੍ਤੇਯ੍ਯੋ.
੩੭. ਮਾਤਿਤੋ ਚ ਭਗਿਨਿਯਂ ਚ੍ਛੋ
ਮਾਤੁਤੋ ਚ ਪਿਤੁਤੋ ਚ ਤੇਸਂ ਭਗਿਨਿਯਂ ਚ੍ਛੋ ਹੋਤਿ. ਮਾਤੁ ਭਗਿਨਿ ਮਾਤੁਚ੍ਛਾ, ਪਿਤੁ ਭਗਿਨਿ ਪਿਤੁਚ੍ਛਾ. ਕਥਂ ‘‘ਮਾਤੁ ਭਾਤਾ ਮਾਤੁਲੋ’’ਤਿ, ‘‘ਮਾਤੁਲਾਦਿਤ੍ਵਾਨੀ’’ਤਿ ਨਿਪਾਤਨਾ ਲਪਚ੍ਚਯੋ.
੩੮. ਮਾਤਾਪਿਤੂਸ੍ਵਾ+ਮਹੋ
ਮਾਤਾਪਿਤੂਹਿ ਤੇਸਂ ਮਾਤਾਪਿਤੂਸ੍ਵਾ+ਮਹੋ ਹੋਤਿ. ਮਾਤੁ ਮਾਤਾ ਮਾਤਾਮਹੀ, ਮਾਤੁ ਪਿਤਾ ਮਾਤਾਮਹੋ. ਪਿਤੁ ਮਾਤਾ ਪਿਤਾਮਹੀ, ਪਿਤੁ ਪਿਤਾ ਪਿਤਾਮਹੋ. ਨ ਯਥਾਸਙ੍ਖ੍ਯਂ ਪਚ੍ਚੇਕਾਭਿਸਮ੍ਬਨ੍ਧਤੋ ਵਿਸੁਂ ਵਿਸੁਂ ਮਾਤਾਪਿਤੁਸਦ੍ਦੇਹਿ ਤੇਸਂ ਮਾਤਾਪਿਤੁਨ੍ਨਂ ਅਤ੍ਥੇ ਪਚ੍ਚਯੋ ਹੋਤਿ.
੩੯. ਹਿਤੇ ਰੇਯ੍ਯਣ
ਮਾਤਾਪਿਤੂਹਿ ਹਿਤੇ ਰੇਯ੍ਯਣ ਹੋਤਿ. ਮਾਤੁ ਹਿਤੋ ਮਤ੍ਤੇਯ੍ਯੋ, ਪੇਤ੍ਤੇਯ੍ਯੋ.
੪੦. ਨਿਨ੍ਦਾ+ਞ੍ਞਾਤ+ਪ੍ਪ ਪਟਿਭਾਗ ਰਸ੍ਸ ਦਯਾ ਸਞ੍ਞਾਸੁ ਕੋ
ਨਿਨ੍ਦਾਦੀਸ੍ਵ+ਤ੍ਥੇਸੁ ਨਾਮਸ੍ਮਾ ਕੋ ਹੋਤਿ. ਨਿਨ੍ਦਾਯਂ-ਨਿਨ੍ਦਿਤੋ ਮੁਣ੍ਡੋ ਮੁਣ੍ਡਕੋ, ਏਵਂ ਸਮਣਕੋ, ਪਣ੍ਡਿਤਕੋ, ਬ੍ਰਾਹ੍ਮਣਕੋ, ਵੇਯ੍ਯਾਕਰਣਕੋ. ਅਞ੍ਞਾਤੇ-ਕਸ੍ਸਾ+ਯਂ ਅਸ੍ਸੋ ਅਸ੍ਸਕੋ, ਪਯੋਗਸਾਮਤ੍ਥਿਯਾ ਸਮ੍ਬਨ੍ਧਿਵਿਸੇਸਾਨਾਵਗਮੋ+ਵਗਮ੍ਯਤੇ. ਅਪ੍ਪਤ੍ਥੇ-ਅਪ੍ਪਕਂ ਤੇਲਂ ਤੇਲਕਂ, ਘਤਕਂ. ਪਟਿਭਾਗਤ੍ਥੇ-ਹਤ੍ਥੀ ਵਿਯ ਹਤ੍ਥਿਕੋ, ਅਸ੍ਸਕੋ, ਬਲੀਬਦ੍ਧਕੋ. ‘‘ਇਮੇ ਨੋ ਹਤ੍ਥਿਕਾ ਅਸ੍ਸਾ, ਬਲੀਬਦ੍ਧਾ ਚ ਨੋ ਇਮੇ’’ਤ੍ਯਾਦਿਪਾਠੇ ‘‘ਲੋਪੋ’’ਤਿ ਕਪਚ੍ਚਯਲੋਪੇਨ ਵਾ ਅਭੇਦੋਪਚਾਰੇਨ ਵਾ ਦਟ੍ਠਬ੍ਬਂ, ਇਮੇ ਚ ਦਾਰੁਆਦੀਹਿ ਕਤਰੂਪਾਨਿ. ਰਸ੍ਸੇਰਸ੍ਸੋ ਮਾਨੁਸੋ ਮਾਨੁਸਕੋ, ਰੁਕ੍ਖਕੋ, ਪਿਲਕ੍ਖਕੋ. ਦਯਾਯਂ-ਦਯਿਤੋ=ਨੁਕਮ੍ਪਿਤੋ ਪੁਤ੍ਤੋ ਪੁਤ੍ਤਕੋ, ਵਚ੍ਛਕੋ. ਸਞ੍ਞਾਯਂ-ਮੋਰੋ ਵਿਯ ਮੋਰਕੋ, ਕਤਕੋ, ਭਤਕੋ.
੪੧. ਤ+ਮਸ੍ਸ ਪਰਿਮਾਣਂ ਣਿਕੋ ਚ
ਪਠਮਨ੍ਤਾ ਅਸ੍ਸੇਤਿ ਅਸ੍ਮਿਂ ਅਤ੍ਥੇ ਣਿਕੋ ਹੋਤਿ ਕੋ ਚ, ਤਞ੍ਚੇ ਪਠਮਨ੍ਤਂ ਪਰਿਮਾਣਂ ਭਵਤਿ. ਦੋਣਾਦੀਨਂ ਪਰਿਮਿਤਵੀਹਾਦੀਨਂ ਕਰਣਤ੍ਤਾ ‘‘ਪਰਿਮੀਯਨ੍ਤ੍ਯ+ਨੇਨਾਤਿ ਪਰਿਮਾਣ’’ਨ੍ਤਿ ਹੋਤਿ. ਦੋਣੋ ਪਰਿਮਾਣ+ਮਸ੍ਸਾਤਿ ਦੋਣਿਕੋ ਵੀਹਿ, ਖਾਰਸਤਿਕੋ, ਖਾਰਸਹਸ੍ਸਿਕੋ, ਆਸੀਤਿਕੋ ਵਯੋ, ਉਪਡ੍ਢਕਾਯੋ ਪਰਿਮਾਣ+ਮਸ੍ਸ ਉਪਡ੍ਢਕਾਯਿਕਂ ਬਿਮ੍ਬੋਹਨਂ. ਪਞ੍ਚਕਂ, ਛਕ੍ਕਂ.
੪੨. ਯ+ਤੇ+ਤੇਹਿ+ਤ੍ਤਕੋ
ਯਾਦੀਹਿ ਪਠਮਨ੍ਤੇਹਿ ਅਸ੍ਸੇਤਿ ਛਟ੍ਠ੍ਯਤ੍ਥੇ ਤ੍ਤਕੋ ਹੋਤਿ, ਤਞ੍ਚੇ ਪਠਮਨ੍ਤਂ ਪਰਿਮਾਣਂ ਭਵਤਿ. ਯਂ ਪਰਿਮਾਣ+ਮਸ੍ਸ ਯਤ੍ਤਕਂ, ਤਤ੍ਤਕਂ, ‘‘ਏਤਸ੍ਸੇਟ ਤ੍ਤਕੇ’’ਤਿ ਏਤਸ੍ਸ ਏਟ, ਏਤ੍ਤਕਂ. ਆਵਤਕੇ-ਯਂ ਪਰਿਮਾਣ+ਮਸ੍ਸ ਯਾਵਤਕੋ, ਤਾਵਤਕੋ.
੪੩. ਸਬ੍ਬਾ ਚਾ+ਵਨ੍ਤੁ
ਸਬ੍ਬਤੋ ਪਠਮਨ੍ਤਾ ਯਾਦੀਹਿ ਚ ਅਸ੍ਸੇਤਿ ਛਟ੍ਠ੍ਯਤ੍ਥੇ ਆਵਨ੍ਤੁ ਹੋਤਿ, ਤਞ੍ਚੇ ਪਠਮਨ੍ਤਂ ਪਰਿਮਾਣਂ ਭਵਤਿ. ਸਬ੍ਬਂ ਪਰਿਮਾਣ+ਮਸ੍ਸ ਸਬ੍ਬਾਵਨ੍ਤਂ, ‘‘ਅਂਙਂ ਨਪੁਂਸਕੇ’’ਤਿ ਅਂ. ਯਾਵਨ੍ਤਂ, ਤਾਵਨ੍ਤਂ.
੪੪. ਕਿਮ੍ਹਾ ਰਤਿ+ਰੀਵ+ਰੀਵਤਕ+ਰਿਤ੍ਤਕਾ
ਕਿਮ੍ਹਾ ਪਠਮਨ੍ਤਾ ਅਸ੍ਸੇਤਿ ਛਟ੍ਠ੍ਯਤ੍ਥੇ ਰਤਿ+ਰੀਵ+ਰੀਵਤਕ+ਰਿਤ੍ਤਕਾ ਹੋਨ੍ਤਿ. ਕਿਂਸਙ੍ਖ੍ਯਾਨਂ ਪਰਿਮਾਣ+ਮੇਸਂ ਕਤਿ, ਰਾਨੁਬਨ੍ਧਤ੍ਤਾ ਇਂਭਾਗਲੋਪੋ. ਕੀਵ, ਕੀਵਤਕਂ, ਕਿਤ੍ਤਕਂ. ਰੀਵਨ੍ਤੋ ਸਭਾਵਤੋ ਅਸਂਖ੍ਯੋ.
੪੫. ਸਞ੍ਜਾਤਂ ਤਾਰਕਾਦਿਤ੍ਵਿ+ਤੋਤਿ
ਸਞ੍ਜਾਤਤ੍ਥੇ ਇਤੋ. ਤਾਰਕਾ ਸਞ੍ਜਾਤਾ ਅਸ੍ਸ ਤਾਰਕਿਤਂ ਗਗਨਂ, ਪੁਪ੍ਫਾਨਿ ਸਞ੍ਜਾਤਾਨਿ ਅਸ੍ਸ ਪੁਪ੍ਫਿਤੋ ਰੁਕ੍ਖੋ, ਪਲ੍ਲਵਿਤਾ ਲਤਾ.
੪੬. ਮਾਨੇ ਮਤ੍ਤੋ
ਪਠਮਨ੍ਤਾ ਮਾਨਵੁਤ੍ਤਿਤੋ ਅਸ੍ਸੇਤਿ ਅਸ੍ਮਿਂ ਅਤ੍ਥੇ ਮਤ੍ਤੋ ਹੋਤਿ. ਪਲਂ ਉਮ੍ਮਾਨ+ਮਸ੍ਸ ਪਲਮਤ੍ਤਂ. ਹਤ੍ਥੋ ਪਣਾਮ+ਮਸ੍ਸ ਹਤ੍ਥਮਤ੍ਤਂ. ਸਤਂ ਮਾਨ+ਮਸ੍ਸ ਸਤਮਤ੍ਤਂ. ਦੋਣੋ ਪਰਿਮਾਣ+ਮਸ੍ਸ ਦੋਣਮਤ੍ਤਂ. ਅਭੇਦੋਪਚਾਰਾ ਦੋਣੋਤਿਪਿ ਹੋਤਿ. ਮੀਯਤੇ+ਨੇਨਾਤਿ ਮਾਨਂ, ਮਾਨਸ੍ਸ ਸਮ੍ਬਨ੍ਧਿਤ੍ਤਾ ਛਟ੍ਠ੍ਯਨ੍ਤਭੂਤਾਨਮੇਵ ਵਿਧਿ ਹੋਤਿ. ਏਤ੍ਥ ਚ –
ਉਦ੍ਧਮਾਨਨ੍ਤੁ ਉਮ੍ਮਾਨਂ, ਪਰਿਮਾਣਨ੍ਤੁ ਸਬ੍ਬਤੋ;
ਪਮਾਣਂ ਹੋਤਿ ਆਯਾਮੋ, ਸਂਖ੍ਯਾਸੇਸੋ ਤੁ ਸਬ੍ਬਤੋ.
੪੭. ਤਗ੍ਘੋ ਚੁ+ਦ੍ਧਂ
ਉਦ੍ਧਮਾਨਵੁਤ੍ਤਿਤੋ ਤਗ੍ਘੋ ਹੋਤਿ ਮਤ੍ਤੋ ਚ. ਜਣ੍ਣੁ ਪਰਿਮਾਣ+ਮਸ੍ਸ ਜਣ੍ਣੁਤਗ੍ਘਂ, ਜਣ੍ਣੁਮਤ੍ਤਂ.
੪੮. ਣੋ ਚ ਪੁਰਿਸਾਤਿ
ਪੁਰਿਸਾ ਣੋ ਹੋਤਿ ਮਤ੍ਤਾਦਯੋ ਚ. ਪੁਰਿਸੋ ਪਰਿਮਾਣ+ਮਸ੍ਸ ਪੋਰਿਸਂ, ਪੁਰਿਸਮਤ੍ਤਂ+ਪੁਰਿਸਤਗ੍ਘਂ.
੪੯. ਅਯੁ+ਭਦ੍ਵਿਤੀਹਂ+ਸੇ
ਉਭਦ੍ਵਿਤੀਹਿ ਅਵਯਵਵੁਤ੍ਤੀਹਿ ਅਯੋ ਹੋਤਿ. ਉਭੋ ਅਂਸਾ ਅਸ੍ਸ ਉਭਯਂ, ਦ੍ਵਯਂ, ਤਯਂ. ਅਂਸਸਮ੍ਬਨ੍ਧੇਨ ਸਮੁਦਾਯੇ ਵਿਧਿ ਹੋਤੀਤਿ ਨ ਉਭਯਾਦਿਤੋ ਬਹੁਵਚਨਨ੍ਤਿ ਚੇ, ‘‘ਰਾਹੁਨੋ ਸਿਰੋ’’ ਤ੍ਯਾਦੋ ਅਭੇਦੇਪਿ ਭੇਦਵਿਵਕ੍ਖਾਯ ਲਬ੍ਭਮਾਨਤੋ ਬਹੁਵਚਨਂ ਹੋਤੇਵ.
੫੦. ਸਙ੍ਖ੍ਯਾਯ ਸਚ੍ਚੁ+ਤੀ+ਸਾ+ਸ+ਦਸਨ੍ਤਾਯਾ+ਧਿਕਾ+ਸ੍ਮਿਂ ਸਤਸਹਸ੍ਸੇ ਡੋ
ਸਤ੍ਯਨ੍ਤਾਯ ਉਤ੍ਯਨ੍ਤਾਯ ਈਸਨ੍ਤਾਯ ਆਸਨ੍ਤਾਯ ਦਸਨ੍ਤਾਯ ਸਙ੍ਖ੍ਯਾਯ ਪਠਮਨ੍ਤਾਯ ਅਸ੍ਮਿਨ੍ਤਿ ਸਤ੍ਤਮ੍ਯਤ੍ਥੇ ਡੋ ਹੋਤਿ, ਸਾ ਚੇ ਸਙ੍ਖ੍ਯਾ ਅਧਿਕਾ ਹੋਤਿ, ਯ+ਦਸ੍ਮਿਨ੍ਤਿ, ਤਂ ਚੇ ਸਤਂ ਸਹਸ੍ਸਂ ਸਤਸਹਸ੍ਸਂ ਵਾ ਹੋਤਿ. ਵੀਸਤਿ ਅਧਿਕਾ ਅਸ੍ਮਿਂ ਸਤੇਤਿ ਵੀਸਂਸਤਂ.
੧੩੯. ਡੇ ਸਤਿਸ੍ਸ ਤਿਸ੍ਸਤਿ
ਡੇ ਪਰੇ ਸਤ੍ਯਨ੍ਤਸ੍ਸ ਤਿਕਾਰਸ੍ਸ ਲੋਪੋ ਹੋਤਿ. ਏਕਵੀਸਂਸਤਂ ਸਹਸ੍ਸਂ ਸਤਸਹਸ੍ਸਂ ਵਾ. ਤਿਂਸਤਿ ਅਧਿਕਾ ਅਸ੍ਮਿਂ ਸਤਾਦਿਕੇਤਿ ਤਿਂਸਸਤਂ ਏਕਤਿਂਸਸਤਂ ਇਚ੍ਚਾਦਿ. ਉਤ੍ਯਨ੍ਤਾਯਨਵੁਤਿ ਅਧਿਕਾ ਅਸ੍ਮਿਂ ਸਤਾਦਿਕੇਤਿ ਨਵੁਤਂਸਤਂ ਸਹਸ੍ਸਂ ਸਤਸਹਸ੍ਸਂ ਵਾ. ਈਸਨ੍ਤਾਯ-ਚਤ੍ਤਾਲੀਸਂ ਅਧਿਕਾ ਅਸ੍ਮਿਂ ਸਤੇ ਸਹਸ੍ਸੇ ਸਤਸਹਸ੍ਸੇਤਿ ਚਤ੍ਤਾਲੀਸਸਤ+ਮਿਚ੍ਚਾਦਿ. ਆਸਨ੍ਤਾਯ ਏਵਂ, ਪਞ੍ਞਾਸਂਸਤ+ਮਿਚ੍ਚਾਦਿ. ਦਸਨ੍ਤਾਯ-ਏਕਾਦਸਂਸਤ+ਮਿਚ੍ਚਾਦਿ.
੫੧. ਤਸ੍ਸ ਪੂਰਣੇ+ਕਾਦਸਾਦਿਤੋ ਵਾ
ਛਟ੍ਠਿਯਨ੍ਤਾਯੇ+ਕਾਦਸਾਦਿਕਾਯ ਸਂਖ੍ਯਾਯ ਡੋ ਹੋਤਿ ਪੂਰਣਤ੍ਥੇ ਵਿਭਾਸਾ. ਸਾ ਸਂਖ੍ਯਾ ਪੂਰਿਯਤੇ ਯੇਨ ਤਂ ਪੂਰਣਂ. ਏਕਾਦਸਨ੍ਨਂ ਪੂਰਣੋ ਏਕਾਦਸੋ. ਅਞ੍ਞਤ੍ਰ ‘‘ਮ ਪਞ੍ਚਾਦਿਕਤੀਹੀ’’ਤਿ ਮੋ, ਏਕਾਦਸਮੋ. ਵੀਸਤਿਯਾ ਪੂਰਣੋ ਵੀਸੋ ਵੀਸਤਿਮੋ, ਤਿਂਸੋ, ਤਿਂਸਤਿਮੋ. ਵਾਸਦ੍ਦਸ੍ਸ ਵਵਤ੍ਥਿਤਵਿਭਾਸਤ੍ਤਾ ਨਿਚ੍ਚਂ ਚਤ੍ਤਾਲੀਸੋ ਪਞ੍ਞਾਸੋ.
੫੨. ਮ ਪਞ੍ਚਾਦਿਕਤੀਹਿਤਿ
ਮਪਚ੍ਚਯੇ ਪਞ੍ਚਮੋ, ਪਞ੍ਚਮੀ. ਸਤ੍ਤਮੋ, ਸਤ੍ਤਮੀ. ਅਟ੍ਠਮੋ, ਅਟ੍ਠਮੀ. ਕਤਿਮੋ, ਕਤਿਮੀ ਇਚ੍ਚਾਦਿ.
੫੩. ਸਥਾਦੀਨ+ਮਿ ਚਤਿ
ਸਤਾਦੀਨਂ ਮੋ ਚ ਅਨ੍ਤਾਦੇਸੋ ਇ ਚ. ਸਤਸ੍ਸ ਪੂਰਣੋ ਸਤਿਮੋ, ਸਹਸ੍ਸਿਮੋ.
੫੪. ਛਾ ਟ੍ਠ+ਟ੍ਠਮਾਤਿ
ਛਸਦ੍ਦਾ ਪੂਰਣਤ੍ਥੇ ਟ੍ਠ+ਟ੍ਠਮਾ. ਛਨ੍ਨਂ ਪੂਰਣੋ ਛਟ੍ਠੋ, ਛਟ੍ਠਮੋ. ਇਤ੍ਥਿਯਂ ਛਟ੍ਠੀ, ਛਟ੍ਠਮੀ. ‘‘ਚਤੁਤ੍ਥਦੁਤਿਯੇਸ੍ਵੇ+ਸਂ ਤਤਿਯਪਠਮਾ’’ਤਿ ਨਿਪਾਤਨਾ ਪੂਰਣਤ੍ਥੇ ਦ੍ਵਿਤੋ ਤਿਯੋ ਦ੍ਵਿਸ੍ਸ ਦੁ ਚ, ਤਿਚਤੂਹਿ ਤਿਸ੍ਸ ਅ, ਤਿਯ+ਤ੍ਥਾ ਚ ਯਥਾਕ੍ਕਮਂ, ਦੁਤਿਯੋ ਤਤਿਯੋ, ਚਤੁਤ੍ਥੋ.
੫੫. ਏਕਾ ਕਾ+ਕ੍ਯ+ਸਹਾਯੇ
‘‘ਸਤਿ ਬ੍ਯਭਿਚਾਰੇ ਵਿਸੇਸਨਂ ਸਾਤ੍ਥਕਂ’’ਤਿ ਞਾਯਾ ਸਂਖ੍ਯਾਤੋ ਵਿਸੇਸੇਤੁਂ ‘‘ਅਸਹਾਯੇ’’ਤਿ ਵੁਤ੍ਤਂ. ਏਕਸ੍ਮਾ ਅਸਹਾਯਤ੍ਥੇ ਕ+ਆਕੀ ਹੋਨ੍ਤਿ ਵਾ. ਏਕੋਵ ਏਕਕੋ, ਏਕਾਕੀ, ਏਕੋ ਵਾ.
੫੬. ਵਚ੍ਛਾਦੀਹਿ ਤਨੁਤ੍ਤੇ ਤਰੋ
ਵਚ੍ਛਾਦੀਨਂ ਸਭਾਵਸ੍ਸ ਤਨੁਤ੍ਤੇ=ਕਿਞ੍ਚਿਮਤ੍ਤਾਵਸੇਸੇ ਤਰੋ ਹੋਤਿ. ਸੋ=ਸਕੋ ਭਾਵੋ ਸਭਾਵੋ ਅਤ੍ਤਨਿਯਪਵਤ੍ਤਿਨਿਮਿਤ੍ਤਂ. ਸੁਸੁਤ੍ਤਸ੍ਸ ਤਨੁਤ੍ਤੇ ਵਚ੍ਛਤਰੋ, ਇਤ੍ਥਿਯਂ ਵਚ੍ਛਤਰੀ. ਯੋਬ੍ਬਨਸ੍ਸ ਤਨੁਤ੍ਤੇ ਓਕ੍ਖਤਰੋ. ਓਕ੍ਖਾ=ਦੁਤਿਯਵਯਟ੍ਠਗੋਣੋ. ਅਸ੍ਸਭਾਵਸ੍ਸ ਤਨੁਤ੍ਤੇ ਅਸ੍ਸਤਰੋ. ਗਾਵੋਤਿ ਜਾਤਿਸਾਮਤ੍ਥਿਯਸ੍ਸ ਤਨੁਤ੍ਤੇ ਉਸਭਤਰੋ. ਏਤ੍ਥ ਤਨੁਤ੍ਤਂ ਅਪ੍ਪਬਲਤਾ.
੫੭. ਕਿਮ੍ਹਾ ਨਿਦ੍ਧਾਰਣੇ ਰਤਰ+ਰਤਮਾ
ਕਿਂਸਦ੍ਦਾ ਨਿਦ੍ਧਾਰਣੇ ਰਤਰ+ਰਤਮਾ ਹੋਨ੍ਤਿ. ਕੋ ਏਵਾਤਿ ਕਤਰੋ ਭਵਤਂ ਦੇਵਦਤ੍ਤੋ, ਕਤਰੋ ਭਵਤਂ ਕਟ੍ਠੋ. ਕਤਮੋ ਭਵਤਂ ਦੇਵਦਤ੍ਤੋ, ਕਤਮੋ ਭਵਤਂ ਕਟ੍ਠੋ. ਭਾਰਦ੍ਵਾਜਾਨਂ ਕਤਮੋ+ਸਿ ਬ੍ਰਹ੍ਮੇ.
੫੮. ਤੇਨ ਦਤ੍ਤੇ ਲਿ+ਯਾਤਿ
ਦਤ੍ਤੇ+ਭਿਧੇਯ੍ਯੇ ਲ+ਇਯਾ ਹੋਨ੍ਤਿ ਬਹੁਲਾਧਿਕਾਰਾ ਮਨੁਸ੍ਸਸਞ੍ਞਾਯਂ. ਦੇਵੇਨ ਦਤ੍ਤੋ ਦੇਵਲੋ ਦੇਵਿਯੋ, ਬ੍ਰਹ੍ਮਲੋ ਬ੍ਰਹ੍ਮਿਯੋ. ਸੀਵਲੋ ਸੀਵਿਯੋ ਸਿਸ੍ਸ ਦੀਘੋ. ਦੇਵ+ਬ੍ਰਹ੍ਮ+ਸਿਵਾਤਿ ਤਨ੍ਨਾਮਕਾ ਮਨੁਸ੍ਸਾ. (ਰਤ੍ਤਮਿਚ੍ਚਾਦਿਅਨੇਕਤ੍ਥਤਦ੍ਧਿਤਂ).
੫੯. ਤਸ੍ਸ ਭਾਵਕਮ੍ਮੇਸੁਤ੍ਤ+ਤਾ+ਤ੍ਤਨ+ਣ੍ਯ+ਣੇਯ੍ਯ+ਣਿ+ਯ+ਣਿਯਾ
ਛਟ੍ਠਿਯਨ੍ਤਾ ਭਾਵੇ ਕਮ੍ਮੇ ਚ ਤ੍ਤਾਦਯੋ ਹੋਨ੍ਤਿ ਬਹੁਲਂ. ਨ ਸਬ੍ਬੇ ਪਚ੍ਚਯਾ ਸਬ੍ਬਤੋ ਹੋਨ੍ਤਿ ਅਞ੍ਞਤ੍ਰਤ੍ਤ+ਤਾਹਿ. ਭਵਨ੍ਤਿ ਏਤਸ੍ਮਾ ਬੁਦ੍ਧਿਸਦ੍ਦਾਤਿ ਭਾਵੋ ਸਦ੍ਦਪਵਤ੍ਤਿਨਿਮਿਤ੍ਤਂ. ਵੁਤ੍ਤਞ੍ਚ –
ਹੋਨ੍ਤ੍ਯ+ਸ੍ਮਾ ਸਦ੍ਦਬੁਦ੍ਧੀਤਿ, ਭਾਵੋ ਤਂ ਸਦ੍ਦਵੁਤ੍ਤਿਯਾ;
ਨਿਮਿਤ੍ਤਭੂਤਂ ਨਾਮਞ੍ਚ, ਜਾਤਿ ਦਬ੍ਬਂ ਕ੍ਰਿਯਾ ਗੁਣੋਤਿ.
ਨੀਲਸ੍ਸ ਪਟਸ੍ਸ ਭਾਵੋ ਨੀਲਤ੍ਤਂ ਨੀਲਤਾਤਿ ਗੁਣੋ ਭਾਵੋ. ਏਤ੍ਥ ਨੀਲਗੁਣਵਸੇਨ ਪਟੇ ਨੀਲਸਦ੍ਦਸ੍ਸ ਵੁਤ੍ਤਿਯਾ ਪਟਬੁਦ੍ਧਿਯਾ ਨਿਮਿਤ੍ਤਂ ਭਾਵੋ ਨਾਮ. ਨੀਲਸ੍ਸ ਗੁਣਸ੍ਸ ਭਾਵੋ ਨੀਲਤ੍ਤਂ ਨੀਲਤਾਤਿ ਨੀਲਗੁਣਜਾਤਿ, ਏਤ੍ਥ ਨੀਲਗੁਣਜਾਤਿ ਨਿਮਿਤ੍ਤਂ ਹੁਤ੍ਵਾ ਨੀਲਸਦ੍ਦਸ੍ਸ ਗੁਣਵੁਤ੍ਤਿਯਾ ਨੀਲਗੁਣਜਾਤਿ ਨਿਮਿਤ੍ਤਂ. ਗੋਤ੍ਤਂ ਗੋਤਾਤਿ ਗੋਜਾਤਿ, ਏਤ੍ਥ ਜਾਤਿਸਦ੍ਦਾਨਂ ਦਬ੍ਬਵੁਤ੍ਤਿਯਾ ਸਤਿ ਜਾਤਿ ਨਿਮਿਤ੍ਤਂ. ਪਾਚਕਸ੍ਸ ਭਾਵੋ ਪਾਚਕਤ੍ਤਂਤਿ ਕ੍ਰਿਯਾਸਮ੍ਬਨ੍ਧਿਤ੍ਤਂ ਭਾਵੋ, ਏਤ੍ਥ ਪਚਨਕ੍ਰਿਯਾਸਮ੍ਬਨ੍ਧਿਤ੍ਤਂ ਭਾਵੋ. ਦਣ੍ਡਿਤ੍ਤਂ ਵਿਸਾਣਿਤ੍ਤਂ ਰਾਜਪੁਰਿਸਤ੍ਤਂਤਿ ਦਣ੍ਡ+ਵਿਸਾਣ+ਰਾਜਦਬ੍ਬਾਨਂ ਸਮ੍ਬਨ੍ਧਿਤ੍ਤਂ ਭਾਵੋ, ਦਣ੍ਡੀਤ੍ਯਾਦਿਸਦ੍ਦਪਵਤ੍ਤਿਯਾ ਨਿਮਿਤ੍ਤਤ੍ਤਾ.
ਦੇਵਦਤ੍ਤਸ੍ਸ ਭਾਵੋ ਦੇਵਦਤ੍ਤਤ੍ਤਂ, ਚਨ੍ਦਤ੍ਤਂ, ਸੂਰਿਯਤ੍ਤਂਤਿ ਤਦਵਤ੍ਥਾ ਵਿਸੇਸਸਾਮਞ੍ਞਂ, ਦੇਵਦਤ੍ਤਸ੍ਸ ਬਾਲਤਾਦਿਅਵਤ੍ਥਾਭੇਦੋ, ਚਨ੍ਦਸ੍ਸ ਕਲਾਦਿਅਵਤ੍ਥਭੇਦੋ ਚ, ਸੂਰਿਯਸ੍ਸ ਮਨ੍ਦਪਟੁਤਾਦਿਅਵਤ੍ਥਾਭੇਦੋ ਚ ਸਾਮਞ੍ਞਂ, ਤਦੇਤ੍ਥ ਨਿਮਿਤ੍ਤਂ. ਏਤ੍ਥ ਵਿਜ੍ਜਮਾਨਪਦਤ੍ਥਾਨਂ ਵਿਸਯਭੂਤਸਞ੍ਞਾਸਦ੍ਦਾਨਂ ਪਵਤ੍ਤਿਨਿਮਿਤ੍ਤਂ ਵੁਤ੍ਤਂ. ਆਕਾਸਤ੍ਤਂ ਅਭਾਵਤ੍ਤਂਤਿ, ਤਤ੍ਥ ਘਟਾਕਾਸ+ਪੀਠਰਾਕਾਸ, ਪਟਾਭਾਵ+ਘਟਾਭਾਵਾਦਿਨਾ ਉਪਚਰਿਤਭੇਦਸਾਮਞ੍ਞਂ ਭਾਵੋ.
ਤ੍ਤਨ-ਪੁਥੁਜ੍ਜਨਤ੍ਤਨਂ. ਵੇਦਨਾਯ ਭਾਵੋ ਵੇਦਨਤ੍ਤਨਂ, ਰਸ੍ਸੋ. ਏਵਂ ਜਾਯਤ੍ਤਨਂ, ਜਾਰਤ੍ਤਨਂ.
ਣ੍ਯ-ਅਲਸਸ੍ਸ ਭਾਵੋ ਕਮ੍ਮਂ ਵਾ ਆਲਸ੍ਯਂ, ਏਤ੍ਥ ‘‘ਲੋਪੋ+ਵਣ੍ਣਿ+ਵਣ੍ਣਾਨਂ’’ਤਿ ਅ-ਲੋਪੇ ‘‘ਸਰਾਨ+ਮਾਦਿਸ੍ਸਾ’’ਦਿਨਾ ਆਕਾਰੋ, ਏਵ+ਮੁਪਰਿ ਚ. ਬ੍ਰਾਹ੍ਮਣਸ੍ਸ ਭਾਵੋ ਬ੍ਰਹ੍ਮਞ੍ਞਂ, ਞ੍ਞਕਾਰਪੁਬ੍ਬਰੂਪਾਨਿ. ਚਾਪਲ੍ਯਂ, ਨੇਪੁਞ੍ਞਂ, ਪੇਸੁਞ੍ਞਂ, ਰਞ੍ਞੋ ਭਾਵੋ ਰਜ੍ਜਂ, ਆਧਿਪਚ੍ਚਂ, ਦਾਯਜ੍ਜਂ, ਵੇਸਮ੍ਮਂ, ਵੇਸਮਂ, ਣਪਚ੍ਚਯੋ. ਸਖਿਨੋ ਭਾਵੋ ਸਖ੍ਯਂ, ਵਾਣਿਜ੍ਜਂ, ਆਰੋਗ੍ਯਂ, ਓਦਗ੍ਯਂ, ਆਨਣ੍ਯਂ, ਦੁਬ੍ਬਲ੍ਯਂ, ਬਲ੍ਯਂ, ਪਣ੍ਡਿਚ੍ਚਂ, ਬਾਹੁਸ੍ਸਚ੍ਚਂ, ਪੋਰੋਹਿਚ੍ਚਂ. ਮੁਟ੍ਠਸ੍ਸਤਿਸ੍ਸ ਭਾਵੋ ਮੁਟ੍ਠਸ੍ਸਚ੍ਚਂ, ਇਲੋਪੋ. ਕੋਸਲ੍ਲਂ, ਵੇਪੁਲ੍ਲਂ. ਸਮਾਨਸ੍ਸ ਭਾਵੋ ਸਾਮਞ੍ਞਂ, ਪੇਰਿਸ੍ਸਂ, ਸੋਮਨਸ੍ਸਂ, ਦੋਮਨਸ੍ਸਂ, ਸੋਵਚਸ੍ਸਂ, ਦੋਵਚਸ੍ਸਂ, ਨਿਪਕਸ੍ਸ ਭਾਵੋ ਨੇਪਕ੍ਕਂ, ਆਧਿਕ੍ਕਂ, ਦੁਭਗਸ੍ਸ ਭਾਵੋ ਦੋਭਗ੍ਗਂ, ਸਰੂਪਸ੍ਸ ਭਾਵੋ ਸਾਰੁਪ੍ਪਂ, ਓਪਮ੍ਮਂ, ਸੋਖੁਮ੍ਮਂ, ਤਥਸ੍ਸ ਭਾਵੋ ਤਚ੍ਛਂ. ਦੁਮ੍ਮੇਧਸ੍ਸ ਭਾਵੋ ਦੁਮ੍ਮੇਜ੍ਝਂ. ਭੇਸਜਸ੍ਸ ਭਾਵੋ ਭੇਸਜ੍ਜਂ, ਬ੍ਯਾਵਟਸ੍ਸ ਕਮ੍ਮਂ ਵੇਯ੍ਯਾਵਚ੍ਚਂ ਯਥਾ ਵੇਯ੍ਯਾਕਰਣਂ.
ਣੇਯ੍ਯ-ਸੁਚਿਨੋ ਭਾਵੋ ਸੋਚੇਯ੍ਯਂ, ਆਧਿਪਤੇਯ੍ਯਂ, ਕਪਿਸ੍ਸ ਭਾਵੋ ਕਾਪੇਯ੍ਯਂ. ਸਠਸ੍ਸ ਭਾਵੋ ਕਮ੍ਮਂ ਵਾ ਸਾਠੇਯ੍ਯਂ.
ਣ-ਗਰੂਨਂ ਭਾਵੋ ਗਾਰਵਂ, ਉ ਅਵਙ. ਪਾਟਵਂ, ਅਜ੍ਜਵਂ, ਮਦ੍ਦਵਂ, ‘‘ਕੋਸਜ੍ਜਾ’’ਦਿਨਾ ਉਸ੍ਸ ਅਤ੍ਤਂ ਦ੍ਵਿਤ੍ਤਞ੍ਚ. ਪਰਮਾਨਂ ਭਾਵੋ ਪਾਰਮੀ, ਵੀਪਚ੍ਚਯੋ. ਸਮਗ੍ਗਾਨਂ ਭਾਵੋ ਸਾਮਗ੍ਗੀ.
ਇਯ-ਅਧਿਪਤਿਨੋ ਭਾਵੋ ਅਧਿਪਤਿਯਂ, ਪਣ੍ਡਿਤਿਯਂ, ਬਹੁਸ੍ਸੁਤਿਯਂ, ਨਗ੍ਗਿਯਂ, ਸੂਰਿਯਂ.
ਣਿਯ-ਅਲਸਸ੍ਸ ਭਾਵੋ ਕਮ੍ਮਂ ਵਾ ਆਲਸਿਯਂ, ਤਾਲੁਸਿਯਂ, ਮਨ੍ਦਿਯਂ, ਦਕ੍ਖਿਯਂ, ਪੋਰੋਹਿਤਿਯਂ, ਵੇਯ੍ਯਤ੍ਤਿਯਂ.