੨੩. ਸ੍ਯਾਦੀਸੁ ਰਸ੍ਸੋਤਿ
ਨਪੁਂਸਕੇ ਵਤ੍ਤਮਾਨਸ੍ਸ ਸ੍ਯਾਦੀਸੁ ਰਸ੍ਸੋ. ਭੋ ਛਤ੍ਤੁਪਾਹਨ, ਛਤ੍ਤੁਪਾਹਨਂ, ਛਤ੍ਤੁਪਾਹਨੇਨ ਇਚ੍ਚਾਦਿ.
ਤੇ ਚ ਸਮਾਹਾਰਿਤਰੀਤਰਯੋਗਾ ਬਹੁਲਂਵਿਧਾਨਾ ਨਿਯਤਵਿਸਯਾਯੇਵ ਹੋਨ੍ਤਿ, ਤਤ੍ਰਾ+ਯਂ ਵਿਸਯਵਿਭਾਗੋ-ਨਿਰੁਤ੍ਤਿਪਿਟਕਾਗਤੋ-ਪਾਣਿ+ਤੂਰਿਯ+ਯੋਗ੍ਗ+ਸੇਨਙ੍ਗਾਨਂ, ਨਿਚ੍ਚਵੇਰੀਨਂ, ਸਙ੍ਖ੍ਯਾਪਰਿਮਾਣਸਞ੍ਞਾਨਂ, ਖੁਦ੍ਦਜਨ੍ਤੁਕਾਨਂ, ਪਚਨਚਣ੍ਡਾਲਾਨਂ, ਚਰਣਸਾਧਾਰਣਾਨਂ, ਏਕਜ੍ਝਾਯਨਪਾਵਚਨਾਨਂ, ਲਿਙ੍ਗਵਿਸੇਸਾਨਂ, ਵਿਵਿਧਵਿਰੁਦ੍ਧਾਨਂ, ਦਿਸਾਨਂ, ਨਦੀਨਞ੍ਚ ਨਿਚ੍ਚਸਮਾਹਾਰੇਕਤ੍ਥਂ ਭਵਤਿ.
ਪਾਣਙ੍ਗਾਨਂ-ਚਕ੍ਖੁ ਚ ਸੋਤਞ੍ਚ ਚਕ੍ਖੁਸੋਤਂ, ਮੁਖਞ੍ਚ ਨਾਸਿਕਾ ਚ ਮੁਖਨਾਸਿਕਂ, ‘‘ਸ੍ਯਾਦੀਸੁ ਰਸ੍ਸੋ’’ਤਿ ਨਪੁਂਸਕੇ ਵਤ੍ਤਮਾਨਸ੍ਸ ਰਸ੍ਸੋ. ਹਨੁ ਚ ਗੀਵਾ ਚ ਹਨੁਗੀਵਂ, ਕਣ੍ਣਾ ਚ ਨਾਸਾ ਚ ਕਣ੍ਣਨਾਸਂ, ਪਾਣਿ ਚ ਪਾਦੋ ਚ ਪਾਣਿਪਾਦਂ, ਛਵਿ ਚ ਮਂਸਞ੍ਚ ਲੋਹਿਤਞ੍ਚ ਛਵਿਮਂਸਲੋਹਿਤਂ, ਨਾਮਞ੍ਚ ਰੂਪਞ੍ਚ ਨਾਮਰੂਪਂ, ਜਰਾ ਚ ਮਰਣਞ੍ਚ ਜਰਾਮਰਣਂ.
ਤੂਰਿਯਙ੍ਗਾਨਂ-ਅਲਸੋ ਚ ਤਾਲਮ੍ਬਰੋ ਚ ਅਲਸਤਾਲਮ੍ਬਰਂ, ਮੁਰਜੋ ਚ ਗੋਮੁਖੋ ਚ ਮੁਰਜਗੋਮੁਖਂ, ਸਂਖੋ ਚ ਪਣਵੋ ਚ ਦੇਣ੍ਡਿਮੋ ਚ, ਸਂਖਾ ਚ ਪਣਵਾ ਚ ਦੇਣ੍ਡਿਮਾ ਚਾਤਿ ਵਾ ਸਂਖਪਣਵਦੇਣ੍ਡਿਮਂ, ਪਣਵਾਦਯੋ ਦ੍ਵੇਪਿ ਭੇਰਿਵਿਸੇਸਾ, ਮਦ੍ਦਵਿਕੋ ਚ ਪਾਣਵਿਕੋ ਚ ਮਦ੍ਦਵਿਕਪਾਣਵਿਕਂ, ਗੀਤਞ੍ਚ ਵਾਦਿਤਞ੍ਚ ਗੀਤਵਾਦਿਤਂ, ਸਮ੍ਮਞ੍ਚ ਤਾਲ਼ਞ੍ਚ ਸਮ੍ਮਤਾਲ਼ਂ, ਸਮ੍ਮਂਤਿ ਕਂਸਤਾਲਂ, ਤਾਲ਼ਂਤਿ ਹਤ੍ਥਤਾਲ਼ਂ.
ਯੋਗ੍ਗਙ੍ਗਾਨਂ-ਫਾਲੋ ਚ ਪਾਚਨਞ੍ਚ ਫਾਲਪਾਚਨਂ, ਯੁਗਞ੍ਚ ਨਙ੍ਗਲਞ੍ਚ ਯੁਗਨਙ੍ਗਲਂ.
ਸੇਨਙ੍ਗਾਨਂ-ਹਤ੍ਥਿਨੋ ਚ ਅਸ੍ਸਾ ਚ ਹਤ੍ਥਿਅਸ੍ਸਂ, ਰਥਾ ਚ ਪਤ੍ਤਿਕਾ ਚ ਰਥਪਤ੍ਤਿਕਂ, ਅਸਿ ਚ ਸਤ੍ਤਿ ਚ ਤੋਮਰਞ੍ਚ ਪਿਣ੍ਡਞ੍ਚ ਅਸਿਸਤ੍ਤਿਤੋਮਰਪਿਣ੍ਡਂ, ਅਸਿ ਚ ਚਮ੍ਮਞ੍ਚ ਅਸਿਚਮ੍ਮਂ, ਚਮ੍ਮਨ੍ਤਿ ਸਰਵਾਰਣ-ਫਲਕਂ. ਧਨੁ ਚ ਕਲਾਪੋ ਚ ਧਨੁਕਲਾਪਂ, ਕਲਾਪੋ=ਤੁਣੀਰਂ. ਪਹਰਣਞ੍ਚ ਆਵਰਣਞ੍ਚ ਪਹਰਣਾਵਰਣਂ.
ਨਿਚ੍ਚਵੇਰੀਨਂ-ਅਹਿ ਚ ਨਕੁਲੋ ਚ, ਅਹੀ ਚ ਨਕੁਲਾ ਚਾਤਿ ਵਾ ਅਹਿਨਕੁਲਂ. ਏਵਂ ਬਿਲ਼ਾਰਮੂਸਿਕਂ, ਅਨ੍ਤਸ੍ਸ ਰਸ੍ਸਤ੍ਤਂ. ਕਾਕੋਲੁਕਂ, ਸਪ੍ਪਮਣ੍ਡੂਕਂ, ਗਰੁਲ਼ਸਪ੍ਪਂ, ਨਾਗਸੁਪਣ੍ਣਂ.
ਸਙ੍ਖ੍ਯਾਪਰਿਮਾਣਸਞ੍ਞਾਨਂ-ਏਕਕਞ੍ਚ ਦੁਕਞ੍ਚ ਏਕਕਦੁਕਂ. ਏਵਂ, ਦੁਕਤਿਕਂ, ਤਿਕਚਤੁਕ੍ਕਂ, ਚਤੁਕ੍ਕਪਞ੍ਚਕਂ. ਦਸਕਞ੍ਚ ਏਕਾਦਸਕਞ੍ਚ ਦਸੇਕਾਦਸਕਂ, ‘‘ਤਿਤਾਲੀਸ’’ ਇਤਿ ਚਕ-ਭਾਗਲੋਪਨਿਦ੍ਦੇਸੇਨ ਕਕਾਰਸ੍ਸ ਲੋਪੋ.
ਖੁਦ੍ਦਜਨ੍ਤੁਕਾਨਂ-ਕੀਟਾ ਚ ਪਟਙ੍ਗਾ ਚ ਕੀਟਪਟਙ੍ਗਂ, ਕੀਟਾ=ਕਪਾਲਪਿਟ੍ਠਿਕਪਾਣਾ. ਏਵਂ ਕੁਨ੍ਥਕਿਪਿਲ੍ਲਿਕਂ, ਡਂਸਾ ਚ ਮਕਸਾ ਚ ਡਂਸਮਕਸਂ, ਮਕ੍ਖਿਕਾ ਚ ਕਿਪਿਲ੍ਲਿਕਾ ਚ ਮਕ੍ਖਿਕਕਿਪਿਲ੍ਲਿਕਂ, ਕੀਟਾ ਚ ਸਰਿਂਸਪਾ ਚ ਕੀਟਸਰਿਂਸਪਂ. ਤਤ੍ਥ ਕੁਨ੍ਥਾ=ਸੁਖੁਮਕਿਪਿਲ੍ਲਿਕਾ.
ਖੁਦ੍ਦਜਨ੍ਤੁ ਅਨਟ੍ਠੀ ਵਾ, ਅਥ ਖੋ ਖੁਦ੍ਦਕੋਪਿ ਵਾ;
ਸਤਂ ਵਾ ਪਸਤੋ ਯੇਸਂ, ਕੇਚਿ ਆਨਤੁਲਾ ਇਤਿ.
ਪਚਨਚਣ੍ਡਾਲਾਨਂ-ਓਰਬ੍ਭਿਕਾ ਚ ਸੂਕਰਿਕਾ ਚ ਓਰਬ੍ਭਿਕਸੂਕਰਿਕਂ, ਏਵਂ ਸਾਕੁਨ੍ਤਿਕਮਾਗਵਿਕਂ. ਸਪਾਕੋ ਚ ਚਣ੍ਡਾਲੋ ਚ ਸਪਾਕਚਣ੍ਡਾਲਂ, ਪੁਕ੍ਕੁਸਛਵਡਾਹਕਂ, ਵੇਨਰਥਕਾਰਂ, ਤਤ੍ਥ ਵੇਨਾ=ਤਚ੍ਛਕਾ, ਰਥਕਾਰਾ=ਚਮ੍ਮਕਾਰਾ.
ਚਰਣਸਾਧਾਰਣਾਨਂ-ਅਤਿਸੋ ਚ ਭਾਰਦ੍ਵਾਜੋ ਚ ਅਤਿਸਭਾਰਦ੍ਵਾਜਂ, ਕਟ੍ਠੋ ਚ ਕਪਾਲੋ ਚ ਕਟ੍ਠਕਪਾਲਂ, ਸੀਲਞ੍ਚ ਪਞ੍ਞਾਣਞ੍ਚ ਸੀਲਪਞ੍ਞਾਣਂ, ਸਮਥੋ ਚ ਵਿਪਸ੍ਸਨਾ ਚ ਸਮਥਵਿਪਸ੍ਸਨਂ, ਵਿਜ੍ਜਾ ਚ ਚਰਣਞ੍ਚ ਵਿਜ੍ਜਾਚਰਣਂ, ਏਵਂ ਨਾਮਰੂਪਂ, ਹਿਰੋਤ੍ਤਪ੍ਪਂ, ਸਤਿਸਮ੍ਪ-ਜਞ੍ਞਂ, ਲੋਭਮੋਹਂ, ਦੋਸਮੋਹਂ, ਅਹਿਰਿਕਾਨੋਤ੍ਤਪ੍ਪਂ, ਥਿਨਮਿਦ੍ਧਂ, ਉਦ੍ਧਚ੍ਚਕੁਕ੍ਕੁਚ੍ਚ+ਮਿਚ੍ਚਾਦਿ.
ਏਕਜ੍ਝਾਯਨਪਾਵਚਨਾਨਂ-ਦੀਘੋ ਚ ਮਜ੍ਝਿਮੋ ਚ ਦੀਘਮਜ੍ਝਿਮਂ, ਏਵਂ ਏਕੁਤ੍ਤਰ ਸਂਯੁਤ੍ਤਕਂ, ਖਨ੍ਧਕਵਿਭਙ੍ਗਂ.
ਲਿਙ੍ਗਵਿਸੇਸਾਨਂ-ਇਤ੍ਥੀ ਚ ਪੁਮਾ ਚ ਇਤ੍ਥਿਪੁਮਂ, ਦਾਸੀ ਚ ਦਾਸੋ ਚ ਦਾਸਿਦਾਸਂ, ਚੀਵਰਞ੍ਚ ਪਿਣ੍ਡਪਾਤੋ ਚ ਸੇਨਾਸਨਞ੍ਚ ਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰੋ ਚ ਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਂ, ਤਿਣਞ੍ਚ ਕਟ੍ਠੋ ਚ ਸਾਖਾ ਚ ਪਲਾਸਞ੍ਚ ਤਿਣਕਟ੍ਠਸਾਖਾਪਲਾਸਂ. ‘‘ਲਾਭੀ ਹੋਤਿ ਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਾਨਂ’’ਤਿਪਿ ਦਿਸ੍ਸਤਿ.
ਵਿਵਿਧਵਿਰੁਦ੍ਧਾਨਂ-ਕੁਸਲਞ੍ਚ ਅਕੁਸਲਞ੍ਚ ਕੁਸਲਾਕੁਸਲਂ, ਏਵਂ ਸਾਵਜ੍ਜਾਨਵਜ੍ਜਂ, ਹੀਨਪਣੀਤਂ, ਕਣ੍ਹਸੁਕ੍ਕਂ, ਛੇਕਪਾਪਕਂ, ਸੁਖਦੁਕ੍ਖਂ, ਅਧਮੁਤ੍ਤਮਂ, ਪਟਿਘਾਨੁਨਯਂ, ਛਾਯਾਤਪਂ, ਆਲੋਕਨ੍ਧਕਾਰਂ. ਰਤ੍ਤਿਞ੍ਚ ਦਿਵਾ ਚ ਰਤ੍ਤਿਨ੍ਦਿਵਂ, ‘‘ਰਤ੍ਤਿਨ੍ਦਿਵਦਾਰਗਵਚਤੁਰਸ੍ਸਾ’’ਤਿ ਅਪਚ੍ਚਯੇ ਕਤੇ ਨੁਮਆਗਮੋ. ਅਹੋ ਚ ਰਤ੍ਤਿ ਚ ਅਹੋਰਤ੍ਤਂ, ‘‘ਦੀਘਾ+ਹੋਵਸ੍ਸੇਕਦੇਸੇਹਿ ਚ ਰਤ੍ਯਾ’’ਤਿ ਅਪਚ੍ਚਯੇ ਕਤੇ ‘‘ਮਨਾਦ੍ਯਾਪਾਦੀਨ+ਮੋ ਮਯੇ ਚੇ’’ਤਿ ਓਕਾਰੋ.
ਦਿਸਾਨਂ-ਪੁਬ੍ਬਾ ਚ ਅਪਰਾ ਚ ਪੁਬ੍ਬਾਪਰਂ, ਏਵਂ ਪੁਰਤ੍ਥਿਮਪਚ੍ਛਿਮਂ, ਦਕ੍ਖਿਣੁਤ੍ਤਰਂ, ਪੁਬ੍ਬਦਕ੍ਖਿਣਂ, ਪੁਬ੍ਬੁਤ੍ਤਰਂ, ਅਪਰਦਕ੍ਖਿਣਂ, ਅਪਰੁਤ੍ਤਰਂ.
ਨਦੀਨਂ-ਗਙ੍ਗਾ ਚ ਯਮੁਨਾ ਚ ਗਙ੍ਗਾਯਮੁਨਂ, ਏਵਂ ਮਹੀਸਰਭੂ.
ਤਿਣ+ਰੁਕ੍ਖ+ਪਸੁ+ਸਕੁਣ+ਧਨ+ਖਞ੍ਞ+ਬ੍ਯਞ੍ਜਨ+ਜਨਪਦਾਨਂ ਵਾ. ਤਿਣਵਿਸੇਸਾਨਂ-ਉਸੀਰਾਨਿ ਚ ਬੀਰਣਾਨਿ ਚ ਉਸੀਰਬੀਰਣਂ ਉਸੀਰਬੀਰਣਾਨਿ ਵਾ. ਏਵਂ ਮੁਞ੍ਜਪਬ੍ਬਜਂ ਮੁਞ੍ਜਪਬ੍ਬਜਾਨਿ ਵਾ, ਕਾਸਕੁਸਂ ਕਾਸਕੁਸਾ ਵਾ.
ਰੁਕ੍ਖਵਿਸੇਸਾਨਂ-ਅਸ੍ਸਤ੍ਥਾ ਚ ਕਪਿਟ੍ਠਾ ਚ ਅਸ੍ਸਤ੍ਥਕਪਿਟ੍ਠਂ ਅਸ੍ਸਤ੍ਥਕਪਿਟ੍ਠਾ ਵਾ, ਏਵਂ ਅਮ੍ਬਪਨਸਂ ਅਮ੍ਬਪਨਸਾ, ਖਦਿਰਪਲਾਸਂ ਖਦਿਰਪਲਾਸਾ, ਧਵਾਸ੍ਸਕਣ੍ਣਂ ਧਵਾਸ੍ਸਕਣ੍ਣਾ, ਪਿਲਕ੍ਖਨਿਗ੍ਰੋਧਂ ਪਿਲਕ੍ਖਨਿਗ੍ਰੋਧਾ, ਸਾਕਸਾਲਂ ਸਾਕਸਾਲਾ.
ਪਸੁਵਿਸੇਸਾਨਂ-ਗਜਾ ਚ ਗਵਜਾ ਚ ਗਜਗਵਜਂ ਗਜਗਵਜਾ ਵਾ, ਅਜਾ ਚ ਏਲ਼ਕਾ ਚ ਅਜੇਲ਼ਕਂ ਅਜੇਲ਼ਕਾ, ਹਤ੍ਥੀ ਚ ਗਾਵੋ ਚ ਅਸ੍ਸਾ ਚ ਵਲ਼ਵਾ ਚ ਹਤ੍ਥੀਗਵਸ੍ਸਵਲ਼ਵਂ ਹਤ੍ਥੀਗਵਸ੍ਸਵਲ਼ਵਾ, ਰਸ੍ਸਤ੍ਤਂ. ਏਵਂ ਗੋਮਹਿਸਂ ਗੋਮਹਿਸਾ, ਏਣੇਯ੍ਯਵਰਾਹਂ ਏਣੇਯ੍ਯਵਰਾਹਾ, ਸੀਹਬ੍ਯਗ੍ਘਤਰਚ੍ਛਂ ਸੀਹਬ੍ਯਗ੍ਘਤਰਚ੍ਛਾ, ਕੁਕ੍ਕੁਟਸੂਕਰਂ ਕੁਕ੍ਕੁਟਸੂਕਰਾ, ਏਣੇਯ੍ਯਗੋਮਹਿਸਂ ਏਣੇਯ੍ਯਗੋਮਹਿਸਾ.
ਸਕੁਣਵਿਸੇਸਾਨਂ-ਹਂਸਾ ਚ ਬਕਾ ਚ ਹਂਸਬਕਂ ਹਂਸਬਕਾ. ਏਵਂ ਕਾਰਣ੍ਡਵਚਕ੍ਕਵਾਕਂ ਕਾਰਣ੍ਡਵਚਕ੍ਕਵਾਕਾ, ਮਯੂਰਕੋਞ੍ਚਂ ਮਯੂਰਕੋਞ੍ਚਾ, ਸੁਕਸਾਲਿਕਂ ਸੁਕਸਾਲਿਕਾ, ਬਕਬਲਾਕਂ ਬਕਬਲਾਕਾ.
ਧਨਾਨਂ-ਹਿਰਞ੍ਞਞ੍ਚ ਸੁਵਣ੍ਣਞ੍ਚ ਹਿਰਞ੍ਞਸੁਵਣ੍ਣਂ ਹਿਰਞ੍ਞਸੁਵਣ੍ਣਾਨਿ. ਏਵਂ ਜਾਤਰੂਪਰਜਤਂ ਜਾਤਰੂਪਰਜਤਾਨਿ, ਮਣਿਸਙ੍ਖਮੁਤ੍ਤਵੇਲ਼ੁਰਿਯਂ ਮਣਿਸਙ੍ਖਮੁਤ੍ਤਵੇਲ਼ੁਰਿਯਾ.
ਧਞ੍ਞਾਨਂ-ਸਾਲੀ ਚ ਯਵਾ ਚ ਸਾਲਿਯਵਂ ਸਾਲਿਯਵਾ ਵਾ. ਏਵਂ ਤਿਲਮੁਗ੍ਗਮਾਸਂ ਤਿਲਮੁਗ੍ਗਮਾਸਾਨਿ, ਨਿਪ੍ਪਾਵਕੁਲਤ੍ਥਂ ਨਿਪ੍ਪਾਵਕੁਲਤ੍ਥਾ.
ਬ੍ਯਞ੍ਜਨਾਨਂ-ਸਾਕੋ ਚ ਸੁਵਾ ਚ ਸਾਕਸੁਵਂ ਸਾਕਸੁਵਾ. ਏਵਂ ਗਬ੍ਯਮਾਹਿਸਂ ਗਬ੍ਯਮਾਹਿਸਾ, ਏਣੇਯ੍ਯਵਰਾਹਂ ਏਣੇਯ, ਵਰਾਹਾ. ਮਿਗਮਯੂਰਂ ਮਿਗਮਯੂਰਾ.
ਜਨਪਦਾਨਂ-ਕਾਸਿ ਚ ਕੋਸਲਾ ਚ ਕਾਸਿਕੋਸਲਂ ਕਾਸਿਕੋਸਲਾ, ਵਜ੍ਜੀ ਚ ਮਲ੍ਲਾ ਚ ਵਜ੍ਜਿਮਲ੍ਲਂ ਵਜ੍ਜਿਮਲ੍ਲਾ, ਅਙ੍ਗਾ ਚ ਮਗਧਾ ਚ ਅਙ੍ਗਮਗਧਂ ਅਙ੍ਗਮਗਧਾ, ਏਵਂ ਚੇਤਿਵਂਸਂ ਚੇਤਿਵਂਸਾ, ਮਚ੍ਛਸੂਰਸੇਨਂ ਮਚ੍ਛਸੂਰਸੇਨਾ, ਕੁਰੁਪਞ੍ਚਾਲਂ ਕੁਰੁਪਞ੍ਚਾਲਾ. ਨਾਮਞ੍ਚ ਰੂਪਞ੍ਚ ਨਾਮਰੂਪਞ੍ਚ ਨਾਮਰੂਪਨਾਮਰੂਪਨ੍ਤਿ ਚਤੁਰੇਕਪਞ੍ਚਵੋਕਾਰਵਸੇਨ ਵਤ੍ਤਬ੍ਬੇ ਬਹੁਲਾਧਿਕਾਰਾ ਸਰੂਪੇਕਸੇਸਂ ਕਤ੍ਵਾ ਨਾਮਰੂਪਨ੍ਤਿ ਵੁਤ੍ਤਂ.
ਏਤਸ੍ਮਿਂ ਏਕਤ੍ਥੀਭਾਵਕਣ੍ਡੇ ਯਂ ਵੁਤ੍ਤਂ ਪੁਬ੍ਬਂ, ਤਦੇਵ ਪੁਬ੍ਬਂ ਨਿਪਤਤਿ, ਕਮਾਤਿਕ੍ਕਮੇ ਪਯੋਜਨਸ੍ਸਾ+ਭਾਵਾ. ਕ੍ਵਚਿ ਵਿਪਲ੍ਲਾਸੋਪਿ ਹੋਤਿ, ਬਹੁਲਾਧਿਕਾਰਤੋ, ਦਨ੍ਤਾਨਂ ਰਾਜਾ ਰਾਜਦਨ੍ਤੋ. ਚਤ੍ਥੇ ਸਮਾਹਾਰੇ ‘‘ਸਭਾਪਰਿਸਾਯਾ’’ਤਿ ਞਾਪਕਾ ਕ੍ਵਚਿ ਨਪੁਂਸਕਲਿਙ੍ਗਂ ਨ ਭਵਤਿ, ਆਧਿਪਚ੍ਚਞ੍ਚ ਪਰਿਵਾਰੋ ਚ ਆਧਿਪਚ੍ਚਪਰਿਵਾਰੋ. ਏਵਂ ਛਨ੍ਦਪਾਰਿਸੁਦ੍ਧਿ, ਪਟਿਸਨ੍ਧਿਪਵਤ੍ਤਿਯਂ.