੧. ਤਤ੍ਥ ਦ੍ਵਿਪਦੋ ਤੁਲ੍ਯਾਧਿਕਰਣੋ ਕਮ੍ਮਾਦੀਸੁ ਛਸੁ ਵਿਭਤ੍ਯਤ੍ਥੇਸੁ ਭਵਤਿ.
(ਕ) ਤਤ੍ਥ ਦੁਤਿਯਤ੍ਥੇ ਤਾਵ-ਆਗਤਾ ਸਮਣਾ ਇਮਂ ਸਙ੍ਘਾਰਾਮਨ੍ਤਿ ਆਗਤਸਮਣੋ ਸਙ੍ਘਾਰਾਮੋ. ਸੋ ਚ ਦੁਵਿਧੋ ਤਗ੍ਗੁਣਾ+ਤਗ੍ਗੁਣਵਸੇਨ. ਵੁਤ੍ਤਞ੍ਹਿ –
ਤਗ੍ਗੁਣੋ+ਤਗ੍ਗੁਣੋ ਚੇ+ਤਿ,
ਸੋ ਸਮਾਸੋ ਦ੍ਵਿਧਾ ਮਤੋ.
ਤਂ ਯਥਾ ‘ਨੀਯਤਂ ਲਮ੍ਬ-
ਕਣ੍ਣੋ+’ ‘ਯਂ ਦਿਟ੍ਠਸਾਗਰੋ’.
ਤੇਸੁ ਯਤ੍ਥ ਵਿਸੇਸਨਭੂਤੋ ਅਤ੍ਥੋ ਅਞ੍ਞਪਦਤ੍ਥਗ੍ਗਹਣੇਨ ਗਯ੍ਹਤਿ, ਸੋ ਤਗ੍ਗੁਣਸਂਵਿਞ੍ਞਾਣੋ, ਯਥਾ ‘ਲਮ੍ਬਕਣ੍ਣ+ਮਾਨਯਾ’ਤਿ. ਯਤ੍ਥ ਪਨ ਨ ਗਯ੍ਹਤਿ, ਸੋ ਅਤਗ੍ਗੁਣਸਂਵਿਞ੍ਞਾਣੋ, ਯਥਾ ‘ਬਹੁਧਨ+ਮਾਨਯਾ’ਤਿ.
ਇਧ ਵਿਸੇਸਨਸ੍ਸ ਪੁਬ੍ਬਨਿਪਾਤੋ. ਏਤ੍ਥ ਚ ਆਗਤਸਦ੍ਦੋ ਚ ਸਮਣਸਦ੍ਦੋ ਚ ਅਤ੍ਤਨੋ ਅਤ੍ਥੇ ਅਟ੍ਠਤ੍ਵਾ ਦੁਤਿਯਾਵਿਭਤ੍ਯਤ੍ਥਭੂਤੇ ਸਙ੍ਘਾਰਾਮਸਙ੍ਖਾਤੇ ਅਞ੍ਞਪਦਤ੍ਥੇ ਵਤ੍ਤਨ੍ਤਿ, ਤਤੋ ਸਮਾਸੇਨੇਵ ਕਮ੍ਮਤ੍ਥਸ੍ਸ ਅਭਿਹਿਤਤ੍ਤਾ ਪੁਨ ਦੁਤਿਯਾ ਨ ਹੋਤਿ. ਤਥਾ ਆਗਤਸਮਣਾ ਸਾਵਤ੍ਥਿ, ਆਗਤਸਮਣਂ ਜੇਤਵਨਂ. ਪਟਿਪਨ੍ਨਾ ਅਦ੍ਧਿਕਾ ਯਂ ਪਟਿਪਨ੍ਨਦ੍ਧਿਕੋ ਪਥੋ, ਅਭਿਰੂਲ਼੍ਹਾਵ, ਣਿਜਾਯਂ ਨਾਵਂ ਸਾ ਅਭਿਰੂਲ਼੍ਹਵਾਣਿਜਾ ਨਾਵਾ.
(ਖ) ਤਤਿਯਤ੍ਥੇ-ਜਿਤਾਨਿ ਇਨ੍ਦ੍ਰਿਯਾਨਿ ਯੇਨ ਸੋ ਜਿਤਿਨ੍ਦ੍ਰਿਯੋ ਸਮਣੋ, ਏਵਂ ਦਿਟ੍ਠਧਮ੍ਮੋ, ਪਤ੍ਤਧਮ੍ਮੋ, ਕਤਕਿਚ੍ਚੋ. ਵਿਜਿਤਾ ਮਾਰਾ ਅਨੇਨਾਤਿ ਵਿਜਿਤਮਾਰੋ ਭਗਵਾ, ਪਟਿਵਿਦ੍ਧਸਬ੍ਬਧਮ੍ਮੋ. ਕਰਣਤ੍ਥੇ-ਛਿਨ੍ਨੋ ਰੁਕ੍ਖੋ ਯੇਨ ਸੋ ਛਿਨ੍ਨਰੁਕ੍ਖੋ ਫਰਸੁ.
(ਗ) ਚਤੁਤ੍ਥਿਯਤ੍ਥੇ-ਦਿਨ੍ਨੋ ਸੁਙ੍ਕੋ ਯਸ੍ਸ ਸੋ ਦਿਨ੍ਨਸੁਙ੍ਕੋ ਰਾਜਾ, ਦਿਨ੍ਨਂ ਭੋਜਨਂ ਅਸ੍ਸਾਤਿ ਦਿਨ੍ਨਭੋਜਨੋ.
(ਘ) ਪਞ੍ਚਮਿਯਤ੍ਥੇ-ਨਿਗ੍ਗਤਾ ਜਨਾ ਯਸ੍ਮਾ ਸੋ ਨਿਗ੍ਗਤਜਨੋ ਗਾਮੋ, ਨਿਗ੍ਗਤੋ ਅਯੋ=ਸੁਖਂ ਯਸ੍ਮਾਤਿ ਨਿਰਯੋ, ਨਿਕ੍ਕਿਲੇ- ਸੋ. ਅਪੇਤਂ ਵਿਞ੍ਞਾਣਂ ਅਸ੍ਮਾਤਿ ਅਪੇਤਵਿਞ੍ਞਾਣੋ ਮਤਕਾਯੋ, ਅਪਗਤਭਯਭੇਰਵੋ ਅਰਹਾ.
(ਙ) ਛਟ੍ਠਿਯਤ੍ਥੇ-ਛਿਨ੍ਨਾ ਹਤ੍ਥਾ ਯਸ੍ਸ ਸੋ ਛਿਨ੍ਨਹਤ੍ਥੋ. ਏਵਂ ਪਰਿਪੁਣ੍ਣਸਙ੍ਕਪ੍ਪੋ ਖੀਣਾਸਵੋ, ਵੀਤੋ ਰਾਗੋ ਅਸ੍ਸਾਤਿ ਵੀਤਰਾਗੋ. ਦ੍ਵੇ ਪਦਾਨਿ ਅਸ੍ਸਾਤਿ ਦ੍ਵਿਪਦੋ, ਦ੍ਵਿਹਤ੍ਥੋ ਪਟੋ. ਤੇਵਿਜ੍ਜੋਤਿ ਏਤ੍ਥ ਤਿਵਿਜ੍ਜੋ ਏਵਾਤਿ ਸਕਤ੍ਥੇ ਣੋ ਵੁਦ੍ਧਿ ਚ. ਚਤੁਪ੍ਪਦੋ, ਪਞ੍ਚ ਚਕ੍ਖੂਨਿ ਅਸ੍ਸਾਤਿ ਪਞ੍ਚਚਕ੍ਖੁ ਭਗਵਾ, ਛਲ਼ਭਿਞ੍ਞੋ, ‘‘ਘਪਸ੍ਸਾ’’ਦਿਨਾ ਰਸ੍ਸਤ੍ਤਂ. ਨਵਙ੍ਗਂ ਸਤ੍ਥੁਸਾਸਨਂ. ਦਸਬਲੋ, ਅਨਨ੍ਤਞਾਣੋ. ਤੀਣਿ ਦਸ ਪਰਿਮਾਣ+ਮੇਸਂਤਿ ਤਿਦਸਾ ਦੇਵਾ, ਇਧ ਪਰਿਮਾਣਸਦ੍ਦਸਨ੍ਨਿਮਾਨਤੋ ਦਸਸਦ੍ਦੋ ਸਙ੍ਖ੍ਯਾਨੇ ਵਤ੍ਤਤੇ. ਅਯਂ ਪਚ੍ਚਯੋ ਏਤੇਸਨ੍ਤਿ ਇਦਪ੍ਪਚ੍ਚਯਾ, ਉਤ੍ਤਰਪਦੇ ‘‘ਇਮਸ੍ਸਿ+ਦਂ ਵਾ’’ਤਿ ਇਮਸ੍ਸ ਇਦਂ. ਕੋ ਪਭਵੋ ਅਸ੍ਸਾਤਿ ਕਿਂ ਪਭਵੋ ਕਾਯੋ. ਵਿਗਤਂ ਮਲਂ ਅਸ੍ਸਾਤਿ ਵਿਮਲੋ, ਸੁਨ੍ਦਰੋ ਗਨ੍ਧੋ ਅਸ੍ਸਾਤਿ ਸੁਗਨ੍ਧਂ ਚਨ੍ਦਨਂ, ਏਵਂ ਸੁਸੀਲੋ, ਸੁਮੁਖੋ, ਕੁਚ੍ਛਿਤੋ ਗਨ੍ਧੋ ਅਸ੍ਸਾਤਿ ਦੁਗ੍ਗਨ੍ਧਂ ਕੁਣਪਂ, ਦੁਮ੍ਮੁਖੋ, ਦੁਟ੍ਠੁ ਮਨੋ ਅਸ੍ਸਾਤਿ ਦੁਮ੍ਮਨੋ, ਏਵਂ ਦੁਸ੍ਸੀਲੋ. ਤਪੋ ਏਵ ਧਨਂ ਅਸ੍ਸਾਤਿ ਤਪੋਧਨੋ. ਖਨ੍ਤਿਸਙ੍ਖਾਤਂ ਬਲਂ ਅਸ੍ਸਾਤਿ ਖਨ੍ਤਿਬਲੋ. ਇਨ੍ਦੋਤਿ ਨਾਮਂ ਏਤਸ੍ਸਾਤਿ ਇਨ੍ਦਨਾਮੋ.
ਛਨ੍ਦਜਾਤਾਦੀਸੁ ਵਿਸੇਸਨਵਿਸੇਸਿਤਬ੍ਬਾਨਂ ਯਥਿਚ੍ਛਿਤਤ੍ਤਾ ਉਭਯਂ ਪੁਬ੍ਬਂ ਨਿਪਤਤਿ, ਕਮਾਤਿਕ੍ਕਮੇ ਪਯੋਜਨਾਭਾਵਾ. ਜਾਤੋ ਛਨ੍ਦੋ ਅਸ੍ਸਾਤਿ ਜਾਤਛਨ੍ਦੋ, ਏਵਂ ਛਨ੍ਦਜਾਤੋ. ਸਞ੍ਜਾਤਪੀਤਿਸੋਮਨਸ੍ਸੋ, ਪੀਤਿਸੋਮਨਸ੍ਸਸਞ੍ਜਾਤੋ. ਮਾਸਜਾਤੋ, ਜਾਤਮਾਸੋ. ਛਿਨ੍ਨਹਤ੍ਥੋ, ਹਤ੍ਥਛਿਨ੍ਨੋ.
ਦੀਘਾਜਙ੍ਘਾ ਅਸ੍ਸਾਤਿ ਦੀਘਜਙ੍ਘੋ, ਏਤ੍ਥ ਪੁਮ੍ਭਾਵੋ, ‘‘ਘਪਸ੍ਸਾ’’ਦਿਨਾ ਰਸ੍ਸੋ ਚ. ਤਥਾ ਪਹੂਤਜਿਵ੍ਹੋ. ਮਹਨ੍ਤੀ ਪਞ੍ਞਾ ਅਸ੍ਸਾਤਿ ਮਹਾਪਞ੍ਞੋ. ‘‘ਇਤ੍ਥਿਯਂ ਭਾਸਿਤਪੁਮਿ+ਤ੍ਥੀ ਪੁਮੇ+ਵੇ+ਕਤ੍ਥੇ’’ਤਿ ਵੀਪਚ੍ਚਯਾਭਾਵੇਨ੍ਤਸ੍ਸ ਟਾਦੇਸੋ ਰਸ੍ਸਤ੍ਤਞ੍ਚ. ਇਤ੍ਥਿਯਨ੍ਤਿ ਕਿਂ, ਖਮਾਧਨੋ. ਭਾਸਿਤਪੁਮਾਤਿ ਕਿਂ, ਸਦ੍ਧਾਧੁਰੋ. ਪਞ੍ਞਾਪਕਤਿਕੋ, ਪਞ੍ਞਾਵਿਸੁਦ੍ਧਿਕੋ, ਏਤ੍ਥ ‘‘ਲ੍ਤ੍ਵਿਤ੍ਥਿਯੂਹਿ ਕੋ’’ਤਿ ਕੋ. ਗਣ੍ਡੀਵਧਨ੍ਵਾਤਿ ਪਕਤਨ੍ਤਰੇਨ ਸਿਦ੍ਧਂ.
ਨਾਨਾ=ਪ੍ਪਕਾਰਾ ਦੁਮਾ ਨਾਨਾਦੁਮਾ, ਨਾਨਾਦੁਮੇਹਿ ਪਤਿਤਾਨਿ ਨਾਨਾਦੁਮਪਤਿਤਾਨਿ, ਨਾਨਾਦੁਮਪਤਿਤਾਨਿ ਚ ਤਾਨਿ ਪੁਪ੍ਫਾਨਿ ਚੇਤਿ ਨਾਨਾਦੁਮਪਤਿਤਪੁਪ੍ਫਾਨਿ, ਤੇਹਿ ਵਾਸਿਤਾ ਨਾਨਾਦੁਮਪਤਿਤਪੁਪ੍ਫਵਾਸਿਤਾ, ਨਾਨਾਦੁਮਪਤਿਤਪੁਪ੍ਫਵਾਸਿਤਾਸਾਨੁਯਸ੍ਸਸੋ ਨਾਨਾਦੁਮਪਤਿਤਪੁਪ੍ਫਵਾਸਿਤਸਾਨੁ ਪਬ੍ਬਤੋ, ਅਯਂ ਵਿਸੇਸਨ+ਅਮਾਦਿਸਮਾਸਗਬ੍ਭੋ ਤੁਲ੍ਯਾਧਿਕਰਣਅਞ੍ਞਪਦਤ੍ਥੋ.
(ਚ) ਸਤ੍ਤਮ੍ਯਤ੍ਥੇ-ਸਮ੍ਪਨ੍ਨਾਨਿ ਸਸ੍ਸਾਨਿ ਯਸ੍ਮਿਂ ਸੋ ਸਮ੍ਪਨ੍ਨਸਸ੍ਸੋ ਜਨਪਦੋ. ਸੁਲਭੋ ਪਿਣ੍ਡੋ ਇਮਸ੍ਮਿਨ੍ਤਿ ਸੁਲਭਪਿਣ੍ਡੋ ਦੇਸੋ. ਆਕਿਣ੍ਣਾ ਮਨੁਸ੍ਸਾ ਯਸ੍ਸਂ ਸਾ ਆਕਿਣ੍ਣਮਨੁਸ੍ਸਾ ਰਾਜਧਾਨੀ. ਬਹਵੋ ਤਾਪਸਾ ਏਤਸ੍ਮਿਨ੍ਤਿ ਬਹੁਤਾਪਸੋ ਅਸ੍ਸਮੋ. ਉਪਚਿਤਂ ਮਂਸਲੋਹਿਤਂ ਅਸ੍ਮਿਨ੍ਤਿ ਉਪਚਿਤਮਂਸਲੋਹਿਤਂ ਸਰੀਰਂ. ਬਹਵੋ ਸਾਮਿਨੋ ਅਸ੍ਮਿਨ੍ਤਿ ਬਹੁਸਾਮਿਕਂ ਨਗਰਂ, ਬਹੂ ਨਦਿਯੋ ਅਸ੍ਮਿਨ੍ਤਿ ਬਹੁਨਦਿਕੋ, ਈਕਾਰਨ੍ਤਤ੍ਤਾ ਕਪਚ੍ਚਯੋ. ਏਵਂ ਬਹੁਜਮ੍ਬੁਕਂ ਵਨਂ, ਬਹਵੋ ਕਤ੍ਤਾਰੋ ਅਸ੍ਮਿਂ ਅਸ੍ਸ ਵਾਤਿ ਬਹੁਕਤ੍ਤੁਕੋ ਦੇਸੋ, ਏਵਂ ਬਹੁਭਤ੍ਤੁਕੋ, ‘‘ਲ੍ਤ੍ਵਿਤ੍ਥਿਯੂਹਿ ਕੋ’’ਤਿ ਕੋ.
੨. ਭਿਨ੍ਨਾਧਿਕਰਣੋ ਯਥਾ-ਏਕਰਤ੍ਤਿਂ ਵਾਸੋ ਅਸ੍ਸਾਤਿ ਏਕਰਤ੍ਤਿਵਾਸੋ, ਸਮਾਨੇਨ ਜਨੇਨ ਸਦ੍ਧਿਂ ਵਾਸੋ ਅਸ੍ਸਾਤਿ ਸਮਾਨਵਾਸੋ ਪੁਰਿਸੋ. ਉਭਤੋ ਬ੍ਯਞ੍ਜਨ+ਮਸ੍ਸਾਤਿ ਉਭਤੋਬ੍ਯਞ੍ਜਨਕੋ, ਵਿਭਤ੍ਯਲੋਪੋ ‘‘ਵਾ+ਞ੍ਞਤੋ’’ਤਿ ਕੋ ਚ, ਛਤ੍ਤਂ ਪਾਣਿਮ੍ਹਿ ਅਸ੍ਸਾਤਿ ਛਤ੍ਤਪਾਣਿ, ਏਵਂ ਦਣ੍ਡਪਾਣਿ, ਸਤ੍ਥਪਾਣਿ, ਵਜਿਰਪਾਣਿ, ਖਗ੍ਗਹਤ੍ਥੋ, ਪਤ੍ਤਹਤ੍ਥੋ, ਦਾਨੇ ਅਜ੍ਝਾਸਯੋ ਅਸ੍ਸਾਤਿ ਦਾਨਜ੍ਝਾਸਯੋ ਦਾਨਾਧਿਮੁਤ੍ਤਿਕੋ, ਬੁਦ੍ਧਭਤ੍ਤਿਕੋ, ਸਦ੍ਧਮ੍ਮਗਾਰਵੋ ਇਚ੍ਚਾਦਿ.
੩. ਤਿਪਦੋ ਯਥਾ-ਪਰਕ੍ਕਮੇਨਾ+ਧਿਗਤਾ ਸਮ੍ਪਦਾ ਯੇਹਿ ਤੇ ਪਰਕ੍ਕਮਾਧਿਗਤਸਮ੍ਪਦਾ ਮਹਾਪੁਰਿਸਾ. ਏਵਂ ਧਮ੍ਮਾਧਿਗਤਭੋਗਾ. ਓਨੀਤੋ ਪਤ੍ਤਤੋ ਪਾਣਿ ਯੇਨ ਸੋ ਓਨੀਤਪਤ੍ਤਪਾਣਿ. ਸੀਹਸ੍ਸ ਪੁਬ੍ਬਦ੍ਧਮਿਵ ਕਾਯੋ ਅਸ੍ਸਾਤਿ ਸੀਹਪੁਬ੍ਬਦ੍ਧਕਾਯੋ. ਮਤ੍ਤਾ ਬਹਵੋ ਮਾਤਙ੍ਗਾ ਅਸ੍ਮਿਨ੍ਤਿ ਮਤ੍ਤਬਹੁਮਾਤਙ੍ਗਂ ਵਨਂ.
੪. ਨ-ਨਿਪਾਤਪੁਬ੍ਬਪਦੋ ਯਥਾ-ਨਤ੍ਥਿ ਏਤਸ੍ਸ ਸਮੋਤਿ ਅਸ੍ਸਮੋ, ‘‘ਟ ਨਞਸ੍ਸਾ’’ਤਿ ਨਸ੍ਸ ਟੋ. ਏਵਂ ਅਪ੍ਪਟਿਪੁਗ੍ਗਲੋ, ਅਪੁਤ੍ਤਕੋ, ਅਹੇਤੁਕੋ, ਕਪਚ੍ਚਯੋ, ਏਵ+ਮੁਪਰਿਪਿ ਞੇਯ੍ਯਂ. ਨਤ੍ਥਿ ਸਂਵਾਸੋ ਏਤੇਨਾਤਿ ਅਸਂਵਾਸੋ, ਨ ਵਿਜ੍ਜਤੇ ਵੁਟ੍ਠਿ ਏਤ੍ਥਾਤਿ ਅਵੁਟ੍ਠਿਕੋ ਜਨਪਦੋ, ਅਭਿਕ੍ਖੁਕੋ ਵਿਹਾਰੋ. ਏਵਂ ਅਨੁਤ੍ਤਰੋ ‘‘ਅਨ ਸਰੇ’’ਤਿ ਅਨ, ਏਵਂ ਅਨਨ੍ਤਂ, ਅਨਾਸਵੋ.
੫. ਪਠਮਾਤ੍ਥੇ ਸਹਪੁਬ੍ਬਪਦੋ ਯਥਾ-ਸਹ ਹੇਤੁਨਾ ਵਤ੍ਤਤਿ ਸੋ ਸਹੇਤੁਕੋ ਸਹੇਤੁ ਵਾ, ‘‘ਸਹਸ੍ਸ ਸੋ+ਞ੍ਞਤ੍ਥੇ’’ਤਿ ਸਹਸ੍ਸ ਸੋ, ਏਵਂ ਸਪ੍ਪੀਤਿਕਾ, ਸਪ੍ਪਚ੍ਚਯਾ, ਸਕਿਲੇਸੋ, ਸਉਪਾਦਾਨੋ, ਸਪਰਿਵਾਰੋ ਸਹਪਰਿਵਾਰੋ ਵਾ, ਸਹ ਮੂਲੇਨ ਉਦ੍ਧਟੋ ਸਮੂਲੁਦ੍ਧਟੋ ਰੁਕ੍ਖੋ.
੬. ਉਪਮਾਨੋਪਮੇਯ੍ਯਜੋਤਕਇਵਯੁਤ੍ਤੋ ਉਪਮਾਨਪੁਬ੍ਬਪਦੋ ਪਠਮਾਯ ਯਥਾ-ਨਿਗ੍ਰੋਧੋ ਇਵ ਪਰਿਮਣ੍ਡਲੋ ਯੋ ਸੋ ਨਿਗ੍ਰੋਧਪਰਿਮਣ੍ਡਲੋ. ਸਙ੍ਖੋ ਵਿਯ ਪਣ੍ਡਰੋ ਅਯਨ੍ਤਿ ਸਙ੍ਖਪਣ੍ਡਰੋ, ਕਾਕੋ ਵਿਯ ਸੂਰੋ ਅਯਨ੍ਤਿ ਕਾਕਸੂਰੋ. ਚਕ੍ਖੁ ਇਵ ਭੂਤੋ ਅਯਂ ਪਰਮਤ੍ਥਦਸ੍ਸਨਤੋਤਿ ਚਕ੍ਖੁਭੂਤੋ ਭਗਵਾ. ਏਵਂ ਅਤ੍ਥਭੂਤੋ, ਧਮ੍ਮਭੂਤੋ, ਬ੍ਰਹ੍ਮਭੂਤੋ, ਅਨ੍ਧਭੂਤੋ. ਮੁਞ੍ਜਪਬ੍ਬਜਮਿਵ ਭੂਤਾ ਅਯਂ ਮੁਞ੍ਜਪਬ੍ਬਜਭੂਤਾ ਕੁਦਿਟ੍ਠਿ. ਤਨ੍ਤਾਕੁਲਮਿਵ ਜਾਤਾ ਅਯਂਤਿ ਤਨ੍ਤਾਕੁਲਜਾਤਾ.
ਛਟ੍ਠ੍ਯਤ੍ਥੇ-ਸੁਵਣ੍ਣਸ੍ਸ ਵਣ੍ਣੋ ਵਿਯ ਵਣ੍ਣੋ ਯਸ੍ਸ ਸੋ ਸੁਵਣ੍ਣਵਣ੍ਣੋ ਭਗਵਾ, ਮਜ੍ਝਪਦਲੋਪੋ. ਨਾਗਸ੍ਸ ਗਤਿ ਵਿਯ ਗਤਿ ਅਸ੍ਸਾਤਿ ਨਾਗਗਤਿ. ਏਵਂ ਸੀਹਗਤਿ, ਨਾਗਵਿਕ੍ਕਮੋ, ਸੀਹਵਿਕ੍ਕਮੋ, ਸੀਹਹਨੁ. ਏਣਿਸ੍ਸ ਵਿਯ ਜਙ੍ਘਾ ਅਸ੍ਸਾਤਿ ਏਣਿਜਙ੍ਘੋ. ਬ੍ਰਹ੍ਮੁਨੋ ਵਿਯ ਸਰੋ ਅਸ੍ਸਾਤਿ ਬ੍ਰਹ੍ਮਸ੍ਸਰੋ.
੭. ਵਾਸਦ੍ਦਤ੍ਥੇ ਸਙ੍ਖ੍ਯਾਉਭਯਪਦੋ ਯਥਾ-ਦ੍ਵੇ ਵਾ ਤਯੋ ਵਾ ਦ੍ਵਤ੍ਤਿ, ਦ੍ਵਤ੍ਤਯੋ ਚ ਤੇ ਪਤ੍ਤਾ ਚੇਤਿ ਦ੍ਵਤ੍ਤਿਪਤ੍ਤਾ, ‘‘ਤਿਸ੍ਵ’’ਇਤਿ ਤਿਸਦ੍ਦੇ ਪਰੇ ਦ੍ਵਿਸ੍ਸ ਅਤ੍ਤਂ. ਦ੍ਵੀਹਂ ਵਾ ਤੀਹਂ ਵਾ ਦ੍ਵੀਹਤੀਹਂ, ਛ ਵਾ ਪਞ੍ਚ ਵਾ ਵਾਚਾ ਛਪ੍ਪਞ੍ਚਵਾਚਾ, ਏਵਂ ਸਤ੍ਤਟ੍ਠਮਾਸਾ, ਏਕਯੋਜਨਦ੍ਵਿਯੋਜਨਾਨਿ.
੮. ਦਿਸਨ੍ਤਰਾਲਤ੍ਥੋ ਯਥਾ-ਪੁਬ੍ਬਸ੍ਸਾ ਚ ਦਕ੍ਖਿਣਸ੍ਸਾ ਚ ਦਿਸਾਯ ਯਦਨ੍ਤਰਾਲਂ ਸਾ ਪੁਬ੍ਬਦਕ੍ਖਿਣਾ ਵਿਦਿਸਾ. ਏਤ੍ਥ –