੩੫. ਛਟ੍ਠੀ ਚਾ+ਨਾਦਰੇ

ਯਸ੍ਸ ਭਾਵੋ ਭਾਵਨ੍ਤਰਸ੍ਸ ਲਕ੍ਖਣਂ ਭਵਤਿ, ਤਤੋ ਛਟ੍ਠੀ ਹੋਤਿ ਸਤ੍ਤਮੀ ਚਾ+ਨਾਦਰੇ ਗਮ੍ਯਮਾਨੇ. ਅਕਾਮਕਾਨਂ ਮਾਤਾਪਿਤੂਨਂ ਰੁਦਨ੍ਤਾਨਂ ਪਬ੍ਬਜਿ, ਮਾਤਾਪਿਤੂਸੁ ਰੁਦਨ੍ਤੇਸੁ ਵਾ. ‘‘ਆਕੋਟਯਨ੍ਤੋ ਸੋ ਨੇਤਿ, ਸਿਵਿਰਾਜਸ੍ਸ ਪੇਕ੍ਖਤੇ’’, ‘‘ਮਚ੍ਚੁ ਆਦਾਯ ਗਚ੍ਛਤਿ, ਪੇਕ੍ਖਮਾਨੇ ਮਹਾਜਨੇ’’.

ਗੁਨ੍ਨਂ ਸਾਮੀਤਿ ਸਮ੍ਬਨ੍ਧੇ ਛਟ੍ਠੀ, ਗੋਸੁ ਸਾਮੀਤਿ ਵਿਸਯਸਤ੍ਤਮੀ. ਏਵਂ ਗੁਨ੍ਨਮਿਸ੍ਸਰੋ, ਗੋਸ੍ਵਿ+ਸ੍ਸਰੋ, ਗੁਨ੍ਨਂ ਅਧਿਪਤਿ, ਗੋਸੁ ਅਧਿਪਤਿ, ਗੁਨ੍ਨਂ ਦਾਯਾਦੋ, ਗੋਸੁ ਦਾਯਾਦੋ, ਗੁਨ੍ਨਂ ਸਕ੍ਖੀ, ਗੋਸੁ ਸਕ੍ਖੀ, ਗੁਨ੍ਨਂ ਪਤਿਭੂ, ਗੋਸੁ ਪਤਿਭੂ, ਗੁਨ੍ਨਂ ਪਸੁਤੋ, ਗੋਸੁ ਪਸੁਤੋ, ਕੁਸਲਾ ਨਚ੍ਚਗੀਤਸ੍ਸ, ਕੁਸਲਾ ਨਚ੍ਚਗੀਤੇ, ਆਯੁਤ੍ਤੋ ਕਟਕਰਣਸ੍ਸ, ਆਯੁਤ੍ਤੋ ਕਟਕਰਣੇ. ਤਥਾ ਆਧਾਰਵਚਨਿਚ੍ਛਾਯਂ ਸਤ੍ਤਮੀ, ਭਿਕ੍ਖੂਸੁ ਅਭਿਵਾਦੇਨ੍ਤਿ, ਮੁਦ੍ਧਨਿ ਚੁਮ੍ਬਿਤ੍ਵਾ, ਬਾਹਾਸੁ ਗਹੇਤ੍ਵਾ, ਹਤ੍ਥੇਸੁ ਪਿਣ੍ਡਾਯ ਚਰਨ੍ਤਿ, ਕਦਲੀਸੁ ਗਜੇ ਰਕ੍ਖਨ੍ਤਿ, ਞਾਣਸ੍ਮਿਂ ਪਸਨ੍ਨੋ, ਞਾਣਸ੍ਮਿਂ ਉਸ੍ਸੁਕ੍ਕੋਤਿ ਵਿਸਯਸਤ੍ਤਮੀ.