੧੧੩. ਝਲਾ ਵਾ

ਝਲਤੋ ਯੋਨਂ ਨਿ ਹੋਤਿ ਵਾ ਨਪੁਂਸਕੇ. ਅਟ੍ਠੀਨਿ. ‘‘ਲੋਪੋ’’ਤਿ ਯੋਲੋਪੇ ਦੀਘੋ, ਅਟ੍ਠੀ. ਭੋ ਅਟ੍ਠਿ ਅਟ੍ਠੀ, ਅਟ੍ਠੀਨਿ ਅਟ੍ਠੀ. ਅਟ੍ਠਿਂ, ਅਟ੍ਠੀਨਿ ਅਟ੍ਠੀ. ਅਟ੍ਠਿਨਾ ਇਚ੍ਚਾਦਿ ਮੁਨਿਸਦ੍ਦਸਮਂ. ਏਵਂ ਪਚ੍ਛਿ+ਅਕ੍ਖਿ+ਦਧਿ+ਸਤ੍ਥਿ+ਵਾਰਿ+ਅਚ੍ਚਿਆਦਯੋ.

ਇਕਾਰਨ੍ਤਂ.

ਦਣ੍ਡਿ, ਨਪੁਂਸਕਤ੍ਤਾ ‘‘ਏਕਵਚਨੇ’’ਚ੍ਚਾਦਿਨਾ ਰਸ੍ਸੇ ਸਿਲੋਪੋ. ਦਣ੍ਡੀਨਿ ਦਣ੍ਡੀ. ‘‘ਗੇ ਵਾ’’ਤਿ ਰਸ੍ਸੇ ਭੋ ਦਣ੍ਡਿ ਦਣ੍ਡੀ, ਦਣ੍ਡੀਨਿ ਦਣ੍ਡੀ. ‘‘ਨਂ ਝੀਤੋ’’ਤਿ ਨਂ. ਦਣ੍ਡਿਨਂ ਦਣ੍ਡਿਂ, ਦਣ੍ਡੀਨਿ ਦਣ੍ਡੀ. ਸੇਸਂ ਪੁਲ੍ਲਿਙ੍ਗੇ ਦਣ੍ਡੀਸਮਂ. ਏਵਂ ਸੁਖਕਾਰੀ+ਸੀਘਯਾਯੀਆਦਯੋ.

ਈਕਾਰਨ੍ਤਂ.

ਚਕ੍ਖੁ, ਚਕ੍ਖੂਨਿ ਚਕ੍ਖੂ. ਸੇਸਂ ਅਟ੍ਠਿਸਮਂ. ਏਵਂ ਆਯੁ+ਵਸੁ+ਧਨੁ+ਦਾਰੁ+ਤਿਪੁ+ਮਧੁ+ਸਿਙ੍ਗੁ+ਹਿਙ੍ਗੁ+ਵਤ੍ਥੁ+ਜਤੁ+ਅਮ੍ਬੁ+ ਅਸ੍ਸੁਆਦੀਨਿ. ਆਯੁਸਦ੍ਦਤੋ ਨਾਸ੍ਸ ਕੋਧਾਦਿਤ੍ਤਾ ਸਾਵ ਵਿਸੇਸੋ.

ਉਕਾਰਨ੍ਤਂ.

ਗੋਤ੍ਰਭੁ, ਰਸ੍ਸੇ ਸਿਲੋਪੋ. ਗੋਤ੍ਰਭੂਨਿ ਗੋਤ੍ਰਭੂ. ਭੋ ਗੋਤ੍ਰਭੁ ਗੋਤ੍ਰਭੂ, ਗੋਤ੍ਰਭੂਨਿ ਗੋਤ੍ਰਭੂ. ਗੋਤ੍ਰਭੁਂ, ਗੋਤ੍ਰਭੂਨਿ ਗੋਤ੍ਰਭੂ ਇਚ੍ਚਾਦਿ ਪੁਲ੍ਲਿਙ੍ਗੇ ਵੇਸ੍ਸਭੂਸਮਂ. ਏਵਂ ਸਯਮ੍ਭੂ+ਅਭਿਭੂ+ਧਮ੍ਮਞ੍ਞੂ ਆਦਯੋ.

ਊਕਾਰਨ੍ਤਂ.

ਵਿਸਦਾ+ਵਿਸਦਾਕਾਰ-ਵੋਹਾਰੋ+ਭਯਮੁਤ੍ਤਕੋ;

ਪੁਮਾਦਿਜਾਨਨੇ ਹੇਤੁ-ਭਾਵਤੋ ਲਿਙ੍ਗ+ਮੀਰਿਤੋ.

ਥਨ+ਕੇਸਾਵਤੀ ਨਾਰੀ, ਮਸ੍ਸੁਵਾ ਪੁਰਿਸੋ ਸਿਯਾ;

ਉਭਿਨ੍ਨ+ਮਨ੍ਤਰਂ ਏਤਂ, ਇਤਰੋ+ਭਯਮੁਤ੍ਤਕੋ.

ਏਸੇ+ਸਾ ਏਤ+ਮੀਤਿ ਚ,

ਪਸਿਦ੍ਧਿਅਤ੍ਥੇਸੁ ਯੇਸੁ ਲੋਕਸ੍ਸ;

ਥੀ+ਪੁਮ+ਨਪੁਂਸਕਾਨੀ+ਤਿ,

ਵੁਚ੍ਚਨ੍ਤੇ ਤਾਨਿ ਨਾਮਾਨਿ.

ਨਪੁਂਸਕਲਿਙ੍ਗਂ.

ਅਥ ਸਬ੍ਬਾਦੀਨਂ ਰੂਪਨਯੋ ਨਿਦ੍ਦਿਸਿਯਤੇ,

ਸਬ੍ਬ ਕਤਰ ਕਤਮ ਉਭਯ ਇਤਰ ਅਞ੍ਞ ਅਞ੍ਞਤਰ ਅਞ੍ਞਤਮ, ਪੁਬ੍ਬ+ਪਰਾ+ਪਰ+ਦਕ੍ਖਿਣੁ+ਤ੍ਤਰਾ+ਧਰਾਨਿ ਵਵਤ੍ਥਾਯ+ਮਸਞ੍ਞਾਯਂ. ‘‘ਊਨਪੂਰਤ੍ਥ+ਮਧਿਕਪਦੋਦਾਹਰਣ+ਮਜ੍ਝਾਹਾਰੋ’’ਤਿ ਞਾਯਾ ਸਬ੍ਬਾਦੀਸੁ ਪਠੀਯਨ੍ਤੇਤਿ ਯੋਜੇਤਬ੍ਬਂ. ਯ ਤ੍ਯ ਤ ਏਤ ਇਮ ਅਮੁ ਕਿਂ ਏਕ ਤੁਮ੍ਹ ਅਮ੍ਹ ਇਚ੍ਚੇਤੇ ਸਬ੍ਬਾਦਯੋ. ਕਚ੍ਚਾਯਨੇ ਅਦਸ੍ਸਿਤਸ੍ਸਾਪਿ ਤ੍ਯਸਦ੍ਦਸ੍ਸ –

ਖਿਡ੍ਡਾ ਪਣਿਹਿਤਾ ਤ੍ਯਾਸੁ, ਰਤਿ ਤ੍ਯਾਸੁ ਪਤਿਟ੍ਠਿਤਾ;

ਬੀਜਾਨਿ ਤ੍ਯਾਸੁ ਰੁਹਨ੍ਤਿ, ਯਦਿਦਂ ਸਤ੍ਤਾ ਪਜਾਯਰੇਤਿ –

ਪਾਲ਼ਿਯਂ ਦਿਸ੍ਸਮਾਨਤ੍ਤਾ ਇਧ ਸਙ੍ਗਹੋ.

ਤਤ੍ਥ ਸਬ੍ਬਸਦ੍ਦੋ ਨਿਰਵਸੇਸਤ੍ਥੋ. ਕਤਰ+ਕਤਮਸਦ੍ਦਾ ਪੁਚ੍ਛਨਤ੍ਥਾ. ਉਭਯਸਦ੍ਦੋ ਦ੍ਵਿਅਵਯਵਸਮੁਦਾਯਵਚਨੋ. ਇਤਰਸਦ੍ਦੋ ਵੁਤ੍ਤਪਟਿਯੋਗੀਵਚਨੋ. ਅਞ੍ਞਸਦ੍ਦੋ ਅਧਿਕਤਾਪਰਵਚਨੋ. ਅਞ੍ਞ- ਤਰ+ਅਞ੍ਞਤਮਸਦ੍ਦਾ ਅਨਿਯਮਤ੍ਥਾ. ਪੁਬ੍ਬਾਦਯੋ ਦਿਸਾਦਿਵਵਤ੍ਥਾਵਚਨਾ. ਯਸਦ੍ਦੋ ਅਨਿਯਮਤ੍ਥੋ. ਤ੍ਯ+ਤਸਦ੍ਦਾ ਪਰਮ੍ਮੁਖਵਚਨਾ. ਏਤ+ਇਮ+ਅਮੁ+ਕਿਂ ਇਚ੍ਚੇਤੇ ਸਮੀਪ+ਅਚ੍ਚਨ੍ਤਸਮੀਪ+ਦੂਰ+ਪੁਚ੍ਛਨਤ੍ਥਵਚਨਾ. ਏਕਸਦ੍ਦੋ ਸਂਖ੍ਯਾਦਿਵਚਨੋ. ਤੁਮ੍ਹ+ਅਮ੍ਹਸਦ੍ਦਾ ਪਰ+ਅਤ੍ਤ ਨਿਦ੍ਦੇਸਵਚਨਾ.

ਸਬ੍ਬੋ, ਸਿਸ੍ਸ ਓ,