੧੫੩. ਹਿਮਵਤੋ ਵਾ ਓ

ਹਿਮਵਤੋ ਸਿਮ੍ਹਿ ਨ੍ਤੁਸ੍ਸ ਓ ਵਾ ਹੋਤਿ, ਹਿਮਵਨ੍ਤੋ ਹਿਮਵਾ. ਸੇਸਂ ਪੁਰਿਮਸਮਂ.

ਆਯਸ੍ਮਨ੍ਤੁਸਦ੍ਦੋ ਕਮ੍ਮਵਾਚਾਯ ਕ੍ਵਚਿ ਬਹੁਲਾਧਿਕਾਰਾ ਦ੍ਵਿਵਚਨੇਨ ਆਯਸ੍ਮਨ੍ਤਾ, ਤਿਣ੍ਣਂ ਵਚਨੇਨ ਆਯਸ੍ਮਨ੍ਤੋਤਿ ਦਿਸ੍ਸਤਿ.

ਏਵਂ ਸਤਿਮਾ ਧਿਤਿਮਾ ਗਤਿਮਾ ਮੁਤਿਮਾ ਮਤਿਮਾ ਜੁਤਿਮਾ ਸਿਰਿਮਾ ਹਿਰਿਮਾ ਥੁਤਿਮਾ ਰਤਿਮਾ ਯਤਿਮਾ ਸੁਚਿਮਾ ਕਲਿਮਾ ਬਲਿਮਾ ਕਸਿਮਾ ਰੁਚਿਮਾ ਬੁਦ੍ਧਿਮਾ ਚਕ੍ਖੁਮਾ ਬਨ੍ਧੁਮਾ ਹੇਤੁਮਾ ਸੇਤੁਮਾ ਕੇਤੁਮਾ ਰਾਹੁਮਾ ਭਾਣੁਮਾ ਖਾਣੁਮਾ ਵਿਜ੍ਜੁਮਾ ਇਚ੍ਚਾਦਯੋ.

ਉਕਾਰਨ੍ਤਂ.

ਵੇਸ੍ਸਭੂ ਸਿਲੋਪੋ. ਤੇ ਚ ਰਸ੍ਸਾਭਾਵੋਵ ਵਿਸੇਸੋ. ‘‘ਏਕਵਚਨਯੋਸ੍ਵ+ਘੋਨਂ’’ਤਿ ਰਸ੍ਸੇ ‘‘ਲਾ ਯੋਨਂ ਵੋ ਪੁਮੇ’’ਤਿ ਵੋ, ਵੇਸ੍ਸਭੁਵੋ, ‘‘ਵੇਵੋਸੁ ਲੁਸ੍ਸਾ’’ਤਿ ਵੁਤ੍ਤਤ੍ਤਾ ਨ ਟਾਦੇਸੋ, ‘‘ਲੋਪੋਤਿ ਯੋਲੋਪੇ ਵੇਸ੍ਸਭੂ. ‘‘ਗੇ ਵਾ’’ਤਿ ਵਾ ਰਸ੍ਸੇ ਭੋ ਵੇਸ੍ਸਭੁ ਵੇਸ੍ਸਭੂ, ਵੇਸ੍ਸਭੁਵੋ ਵੇਸ੍ਸਭੂ. ਵੇਸ੍ਸਭੁਂ, ਵੇਸ੍ਸਭੁਵੋ ਵੇਸ੍ਸਭੂ. ਵੇਸ੍ਸਭੁਨਾ ਇਚ੍ਚਾਦਿ ਭਿਕ੍ਖੁਸਮਂ. ਏਵਂ ਸਯਮ੍ਭੂ ਪਰਾਭਿਭੂ ਅਭਿਭੂਆਦਯੋ. ਗੋਤ੍ਰਭੂ+ਸਹਭੂਸਦ੍ਦੇਹਿ ਪਨ ਯੋਨਂ ‘‘ਜਨ੍ਤ੍ਵਾਦਿਤੋ ਨੋ ਵਾ’’ਤਿ ਨੋ, ਵੋ ਵਾ, ਗੋਤ੍ਰਭੁਨੋ ਗੋਤ੍ਰਭੁਵੋ ਗੋਤ੍ਰਭੂ. ਸਹਭੁਨੋ ਸਹਭੁਵੋ ਸਹਭੂ, ਸੇਸਂ ਵੇਸ੍ਸਭੂਸਮਂ.