੪੭. ਤਦਮਿਨਾਦੀਨਿ

ਤਦਮਿਨਾਦੀਨਿ ਨਿਪ੍ਪਜ੍ਜਨ੍ਤਿ. ‘‘ਯ+ਦਲਕ੍ਖਣਿਕਂ, ਤਂ ਨਿਪਾਤਨਾ’’ਤਿ ਞਾਯਾ ਲਕ੍ਖਣਨ੍ਤਰੇਨ ਅਵਿਹਿਤਾ ਦੇਸ+ਲੋਪਾ+ਗਮ+ਵਿਪਲ੍ਲਾਸਾ, ਸਬ੍ਬਤ੍ਥ ਇਮਿਨਾਵ ਦਟ੍ਠਬ੍ਬਾ. ਇਦਞ੍ਚ ਪਰੇਸਂ ਪਿਸੋਦਰਾਦਿਮਿਵ ਦਟ੍ਠਬ੍ਬਂ. ਫੁਸਿਤਂ=ਜਲਬਿਨ੍ਦੁ, ਫੁਸਿਤ+ਮੁਦਰ+ਮਸ੍ਸ ਪਿਸੋਦਰਂ. ਇਸ੍ਸ ਅਕਾਰੇ ਤਂ ਇਮਿਨਾ=ਤਦਮਿਨਾ, ਸਕਿਂ ਆਗਾਮੀ=ਸਕਦਾਗਾਮੀ, ਧਸ੍ਸ ਦਕਾਰੇ ਏਕਂ ਇਧ ਅਹਂ=ਏਕ+ਮਿਦਾ+ਹਂ, ਵਿਧਸ੍ਸ ਵਿਦਾਦੇਸੋ ਸਂਵਿਧਾਯ ਅਵਹਾਰੋ=ਸਂਵਿਦਾਵਹਾਰੋ, ਵਾਰਿਸਦ੍ਦਸ੍ਸ ਵਕਾਰੇ, ਹਸ੍ਸ ਲਕਾਰੇ ਚ ਕਤੇ ਵਾਰਿਵਾਹਕੋ=ਵਲਾਹਕੋ, ਜੀਵਨਸ੍ਸ ਜੀਆਦੇਸੋ, ਜੀਵਨਸ੍ਸ ਮੁਤੋ=ਜੀਮੂਤੋ. ਛਵਸ੍ਸ ਸੁਆਦੇਸੇ, ਸਯਨਸ੍ਸ ਸਾਨਾਦੇਸੇ ਚ ਕਤੇ ਛਵਸ੍ਸ ਸਯਨਂ=ਸੁਸਾਨਂ. ਉਦ੍ਧਸ੍ਸ ਉਦੁਆਦੇਸੇ, ਖਸ੍ਸ ਖਲਆਦੇਸੇ ਚ ‘‘ਸਰਮ੍ਹਾ ਦ੍ਵੇ’’ਤਿ ਦ੍ਵਿਤ੍ਤਾਦਿਮ੍ਹਿ ਚ ਕਤੇ ਉਦ੍ਧਂ ਖਂ ਅਸ੍ਸ ਉਦੁਕ੍ਖਲਂ. ਪਿਸਿਤਸ੍ਸ ਪਿਆਦੇਸੇ, ਅਸਸ੍ਸ ਸਾਚਾਦੇਸੇ ਚ ਕਤੇ ਪਿਸਿਤਾਸੋ=ਪਿਸਾਚੋ.

ਮਹੀਸਦ੍ਦਸ੍ਸ ਮਯੂਆਦੇਸੇ, ਰਵਤਿਸ੍ਸ ਰਾਦੇਸੇ ਚ ਕਤੇ ਮਹਿਯਂ ਰਵਤੀਤਿ ਮਯੂਰੋ. ਏਵ+ਮਞ੍ਞੇਪਿ ਪਯੋਗਤੋ+ਨੁਗਨ੍ਤਬ੍ਬਾ. ਏਤ੍ਥ ਚ –

ਵਣ੍ਣਾਗਮੋ ਵਣ੍ਣਵਿਪਰਿਯਾਯੋ,

ਦ੍ਵੇ ਚਾ+ਪਰੇ ਵਣ੍ਣਵਿਕਾਰ+ਨਾਸਾ;

ਧਾਤੁਸ੍ਸ ਅਤ੍ਥਾਤਿਸਯੇਨ ਯੋਗੋ,

ਤ+ਦੁਚ੍ਚਤੇ ਪਞ੍ਚਵਿਧਂ ਨਿਰੁਤ੍ਤਂਤਿ.

ਯਥਾ ਦ੍ਵਾਰੇ ਨਿਯੁਤ੍ਤੋ=ਦੋਵਾਰਿਕੋਤਿ ਓਕਆਗਮੋ. ਹਿਂਸਸਦ੍ਦਸ੍ਸ ਸੀਹੋਤਿ ਵਿਪਲ੍ਲਾਸੋ. ਨਿਜਕੋ=ਨਿਯਕੋਤਿ ਵਿਕਾਰੋ. ਮੇਹਨਸ੍ਸ ਖਸ੍ਸ ਮਾਲਾ ਮੇਖਲਾਤਿ ਵਣ੍ਣਲੋਪੋ, ਹ+ਨ+ਮਕਾਰਾਨਂ ਲੋਪੋ. ਮਯੂਰੋਤਿ ਅਤ੍ਥੇ ਰਵਤਿਸ੍ਸ ਅਤਿਸ੍ਸਯਯੋਗੋਤਿ.

ਯਥਰਿਵ ਤਥਰਿਵੇਤਿ ਨਿਪਾਤਾਵ. ‘‘ਜਰਗ੍ਗਵਾ ਵਿਚਿਨ੍ਤੇਸੁਂ, ਵਰ+ਮ੍ਹਾਕਂ ਭੁਸਾਮਿਵੇ’’ਤਿ ਏਤ੍ਥ ਇਵਸਦ੍ਦੋ ਏਵਕਾਰਤ੍ਥੋ. ਨਿਗ੍ਗਹੀਤਸਨ੍ਧਿ.

ਸਨ੍ਧਿਸ੍ਸਰਾਨਂ ਪਟਿਸੇਧਸਨ੍ਧਿ,

ਅਥੋ ਬ੍ਯਞ੍ਜਨ+ਸਰਬ੍ਯਞ੍ਜਨਾਨਂ;

ਸਨ੍ਧਿ ਚ+ਥੋ ਨਿਗ੍ਗਹੀਤਸ੍ਸ ਸਨ੍ਧਿ,

ਭਵਨ੍ਤਿ ਸਨ੍ਧਿ ਪਨ ਪਞ੍ਚਧਾ ਵੇ.

ਇਤਿ ਪਯੋਗਸਿਦ੍ਧਿਯਂ ਸਨ੍ਧਿਕਣ੍ਡੋ ਪਠਮੋ.