੨੬. ਇਤ੍ਥਿ

ਇਤ੍ਥਿਵਿਧੀਸੁ ‘‘ਪੁਥੁਸ੍ਸ ਪਥਵਪੁਥਵਾ’’ਤਿ (੩-੩੯) ਸੁਤ੍ਤਪਰਿਯਨ੍ਤੇਸੁ. ਇਤ੍ਥਿਯਨ੍ਤਿ ਇਦਂ ਨਾਮਵਿਸੇਸਨਂ ਵਾ ਸਿਯਾ ਪਚ੍ਚਯਤ੍ਥਵਿਸੇਸਨਂ ਵਾ, ਤਤ੍ਥ ਨਾਮਵਿਸੇਸਨਮੇਵਿਦਂ ਨ ਪਚ੍ਚਯਤ੍ਥਵਿਸੇਸਨਨ੍ਤਿ ਦਸ੍ਸੇਤੁਮਾਹ- ‘ਨਾਮੇ’ਚ੍ਚਾਦਿ. ਅਕਾਰਨ੍ਤਤੋ ਨਾਮਸ੍ਮਾਤਿ ਏਕਤ੍ਤਾਦਿਮਹਨ੍ਤਤ੍ਥਵਾਚਿਤੋ ਅਕਾਰਨ੍ਤਤੋ ਨਾਮਸ੍ਮਾ. ਇਤ੍ਥਤ੍ਤਨ੍ਤਿ ਏਤ੍ਥ ਇਤ੍ਥੀਤਿ ਇਤ੍ਥਿਲਿਙ੍ਗਂ ਵੁਚ੍ਚਤਿ. ਇਤ੍ਥਿਯੇਵ ਹਿ ਏਸਾਤਿ ਲਿਙ੍ਗੀਯਤਿ ਸਙ੍ਕੇਤੀਯਤੀਤਿ ਲਿਙ੍ਗਂ. ਇਤ੍ਥਿਯਾ ਏਸਾਤਿ ਪਸਿਦ੍ਧਿਮਤੋ ਅਤ੍ਥਸ੍ਸ ਭਾਵੋ ਸਾਮਞ੍ਞਂ ਬਾਲਯੁਵਤ੍ਤਾਦਿ ਲਕ੍ਖਣਂ ਇਤ੍ਥਤ੍ਤਂ. ਕਿਮੇਤ੍ਥ ਲਿਙ੍ਗਂ ਨਾਮ–

ਏਸੇਸੋ ਏਤਮਿਤਿ ਚ,

ਪਸਿਦ੍ਧਿ ਅਤ੍ਥੇਸੁ ਯੇਸੁ ਲੋਕਸ੍ਸ;

ਥੀਪੁਂ ਨਪੁਂਸਕਾਨੀਤਿ,

ਵੁਚ੍ਚਨ੍ਤੇ ਤਾਨਿ ਨਾਮਾਨਿ.

ਅਤ੍ਥੇਸੁ ਯੇਸੁ ਏਸਾ ਏਸੋ ਏਤਨ੍ਤਿ ਪਸਿਦ੍ਧਿ ਲੋਕਸ੍ਸ ਹੋਤਿ ਏਤਾਨਿ ਯਥਾਕ੍ਕਮਂ ਇਤ੍ਥਿਪੁਰਿਸਨਪੁਂਸਕਲਿਙ੍ਗਾਨੀਤਿ ਲੋਕੇਨ ਵੁਚ੍ਚਨ੍ਤੀਤਿ ਅਤ੍ਥੋ. ਏਵਞ੍ਚਕਤ੍ਵਾ ਵੁਚ੍ਚਤੇ ‘‘ਲਿਙ੍ਗਂ ਨਾਨੁਸਾਸਨੀਯਂ ਲੋਕਨਿਸ੍ਸ ਯਤ੍ਤਾ ਲਿਙ੍ਗਸ੍ਸਾ’’ਤਿ. ਤਤ੍ਥ ਗੋਇਚ੍ਚਾਦੀਸ੍ਵੇਸਾ ਏਸੋਤਿ ਪਸਿਦ੍ਧਿਯਾ ਇਤ੍ਥਿਲਿਙ੍ਗਤ੍ਤਂ, ਅਚ੍ਚਿਆਦੀਸ੍ਵੇਸਾ ਏਤਨ੍ਤਿ ਪਸਿਦ੍ਧਿਯਾ ਇਤ੍ਥਿਨਪੁਂਸਕਤ੍ਤਂ, ਤਟੋਭਟੀ ਤਟਮਿਚ੍ਚਾਦੀਸ੍ਵੇਸੋ ਏਸਾਏਤਨ੍ਤਿ ਪਸਿਦ੍ਧਿਯਾ ਪੁਮਿਤ੍ਥਿਨਪੁਂਸਕਤ੍ਤਂ, ਮਾਲਾਇਚ੍ਚਾਦੀਸ੍ਵੇਸਾਤਿ ਪਸਿਦ੍ਧਿਯਾ ਇਤ੍ਥਤ੍ਤਂ, ਰੁਕ੍ਖੋਚ੍ਚਾਦੀਸ੍ਵੇਸੋਤਿ ਪਸਿਦ੍ਧਿਯਾ ਪੁਲ੍ਲਿਙ੍ਗਤ੍ਤਂ, ਕੁਲਮਿਚ੍ਚਾਦੋ ਏਤਨ੍ਤਿ ਪਸਿਦ੍ਧਿਯਾ ਨਪੁਂਸਕਤ੍ਤਂ. ਸਮਾਸਸ੍ਸਾਪ੍ਯੇਵਂ ਦਟ੍ਠਬ੍ਬਂ, ਜੋਤਕਾਤਿ ਦਸ੍ਸੇਤੀਤਿ ਸਮ੍ਬਨ੍ਧੋ. ਜੋਤਕਾ ਇਤ੍ਥਤ੍ਤਸ੍ਸੇਤਿ ਪਕਰਣਤੋ ਵਿਞ੍ਞਾਯਤਿ. ਤਤੋ ਵੇਚ੍ਚਾਦਿਨਾ ਪਚ੍ਚਯਤ੍ਥਭਾਵਿਨੋ ਯੇ ਦੋਸਾ ਤੇਸਮੇਤ੍ਥਨਾਵਕਾਸੋਤਿ ਦਸ੍ਸੇਤਿ. ਸਮਾਨਾਧਿਕਰਣਤ੍ਤਂ ਬਹੁਵਚਨਮ੍ਪਿ ਹੋਤੀਤਿਸਮ੍ਬਨ੍ਧੋ. ਇਮਿਨਾ ਇਦਂ ਦੀਪੇਤਿ ‘‘ਇਤ੍ਥਤ੍ਤਸ੍ਸ ਪਚ੍ਚਯਤ੍ਥਤ੍ਤੇ ਸਤਿ ਪਧਾਨਤ੍ਤਾਸ੍ਸ ਬ੍ਯਤਿਰੇਕਲਕ੍ਖਣਾਯ ਛਟ੍ਠਿਯਾ ‘ਕੁਮਾਰਿਤ੍ਤਂ (ਦੇਵਦਤ੍ਤਾਯਾ’ਤਿਭਵਿਤਬ੍ਬਂ, ਤਤੋ ਚ ਨ ਸਿਯਾ ਕੁਮਾਰੀ) ਦੇਵਦਤ੍ਤਾ’ਤਿ ਸਮਾਨਾਧਿਕਰਣਤ੍ਤਂ, ਤਥਾ ਕੁਮਾਰਿਯੋਤਿ ਬਹੁਵਚਨਮ੍ਪਿ ਇਤ੍ਥਤ੍ਤਸ੍ਸੇਕਤ੍ਤਾ. ਪਕਤਿਯਤ੍ਥ ਵਿਸੇਸਨਪਕ੍ਖੇ ਤੁ ਪਕਤਿਯਾ ਇਤ੍ਥਤ੍ਤਵਿਸਿਟ੍ਠਂ ਦਬ੍ਬਮੇਵੋਚ੍ਚਤੇ, ਆਆਦਯੋ ਤੁ ਜੋਤਕਤਾਤਿ ਤਤ੍ਥ ਬ੍ਯਤਿਰੇਕਾਭਾਵਾ ਛਟ੍ਠਿਯਾ ਅਪ੍ਪਸਙ੍ਗੋ ਚ ਬਹੁਵਚਨਮ੍ਪਿ ਅਨੇਕਤ੍ਤਾਵ ਦਬ੍ਬਸ੍ਸ ਯੁਤ੍ਤਨ੍ਤਿ ਯਥਾਵੁਤ੍ਤਦੋਸਾਵਸਰਾਭਾਵਾ ਇਟ੍ਠਤ੍ਥਸਿਦ੍ਧੀ’’ਤਿ. ਅਞ੍ਞੇਤਿ ਜਯਾਦਿਚ੍ਚ ਜਿਨਿਨ੍ਦਬੁਦ੍ਧ੍ਯਾਚਰਿਯਾਦਯੋ ਦਸ੍ਸੇਤਿ.

ਇਤ੍ਥਿਯਮਭਿਧੇਯ੍ਯਾਯਨ੍ਤਿ ਇਤ੍ਥਿਲਿਙ੍ਗਸਙ੍ਖਾਤੇ ਇਤ੍ਥਤ੍ਤੇ ਅਤ੍ਥਭੂਤੇ, ਯਥੇਵਹੀਤਿਆਦਿਨਾ ਉਪਮਾਵਸੇਨ ਯਥਾਵੁਤ੍ਤਮੇਵਤ੍ਥਂ ਵਿਭਾਵੇਤਿ. ਤਤ੍ਥ ਇਤ੍ਥਤ੍ਤਮਿਚ੍ਚਾਦਿਨਾ ਪਰੋਪਵਣ੍ਣਿਤਪਕ੍ਖਸ੍ਸਾਯੁਤ੍ਤਤ੍ਤਨ੍ਨਿਚ੍ਛਿਨ੍ਦੇਤਿ, ਨੋ ਪਪਜ੍ਜਤੇ [ਨੋਪਪਜ੍ਜੇਯ੍ਯ (ਪਞ੍ਚਿਕਾ)] ਦੇਵਦਤ੍ਤਾਸਦ੍ਦਵਚਨੀਯਸ੍ਸਾਪਿ ਇਤ੍ਥਤ੍ਤਤੋ ਅਬ੍ਯਤਿਰਿਤ੍ਤਤ੍ਤਾ ‘ਇਤ੍ਥਤ੍ਤਂ ਦੇਵਦਤ੍ਤਾਯਾ’ਤਿ ਭਿਨ੍ਨਾਧਿਕਰਣਤਾ ਨ ਯੁਜ੍ਜਤੇ, ਅਨੁਪਪਤ੍ਤਿਮੇਵ ਸਮਤ੍ਥੇਤਿ ‘ਦੇਵਦਤ੍ਤਾਯਾਤਿ’ਚ੍ਚਾਦਿਨਾ. ਸਮਾਨਾਧਿਕਰਣਤ੍ਤਮੇਵ ਸਿਯਾ ਇਤ੍ਥਿਸਦ੍ਦਵਚਨੀਯਤੋ ਅਨਞ੍ਞਤ੍ਤਾ ਦੇਵਦਤ੍ਤਾ ਸਦ੍ਦਵਚਨੀਯਸ੍ਸ ਇਤ੍ਥੀ ਦੇਵਦਤ੍ਤਾਤਿ.

ਅਤੋਏਵਾਤਿ ਇਤ੍ਥਤ੍ਤੇ ਆਵਿਧਾਨਤੋਯੇਵ. ਤਬ੍ਬਤੋਤ੍ਥਸ੍ਸਾਤਿ ਇਦਂ ਜਯਾਦਿਚ੍ਚਾਦਿਮਤਾਨੁਗਾਮਿਨਾ [ਨੁਗਾਮੀ ਪਨ (ਪੋਤ੍ਥਕੇ)] ਵੁਤ੍ਤਂ, ਤਥਾ ਹਿ ਤੇ ਏਵਂ ਲਿਙ੍ਗਲਕ੍ਖਣ ਮਾਹੁ (ਪਾ, ੪-੧-੩ ਕਾਸਿਕਾਯਂ) ‘‘ਸਾਮਞ੍ਞਵਿਸੇਸਾ ਇਤ੍ਥਤ੍ਤਾਦਯੋ ਗੋਤ੍ਤਾਦਯੋ ਵਿਯ ਬਹੁਪ੍ਪਕਾਰਬ੍ਯਤ੍ਤਿਯੋਤਿ [ਸਾਮਞ੍ਞਾਨਿ ਚ ਤੁਲ੍ਯਜਾਤਿਯਪਦਤ੍ਥਸਾਧਾਰਣਤ੍ਤਾ ਤਾਨਿ ਵਿਸੇਸਾ ਚ ਅਞ੍ਞ ਮਞ੍ਞੇਹਿ ਵਿਜਾਤਿਯੇਤਿ ਚ ਵਿਸਿਸ੍ਸਨ੍ਤੇ ਬ੍ਯਾਵਤ੍ਤਨ੍ਤੇਤਿ ਸਾਮਞ੍ਞਵਿਸੇਸਾ. ਬ੍ਯਞ੍ਜੀਯਨ੍ਤਿਆ ਏਤੇਹੀਤਿ ਬ੍ਯਤ੍ਤਿਯੋ ਸਾਮਞ੍ਞਵਿਸੇਸਾਨਂ ਨਿਸ੍ਸਯਾ, ਬਹੁਪ੍ਪਕਾਰਾ ਬ੍ਯਤ੍ਤਿ ਯੋ ਯੇਸਂ ਸਾਮਞ੍ਞਵਿਸੇਸਾਨਂ ਤੇ ਤਥਾਵੁਤ੍ਤਾਤਿ– (ਕਾਸਿਕਾਵਿਵਰਣ ਪਞ੍ਜਿਕਾ.)] ਤੇ ਹ੍ਯੇਵਂ ਮਞ੍ਞਨ੍ਤੇ ‘‘ਯਥਾ ਗੋਤ੍ਤਾਦਯੋ ਸਮਾਨਜਾਤਿਯੇਸੁ ਸਬ੍ਬੇਸ੍ਵਨੁਵਤ੍ਤਨ੍ਤੇ, ਵਿਜਾਤਿਯੇਹਿ ਪਨ ਨਿਵਤ੍ਤਨ੍ਤੇ, ਤਥਾ ਇਤ੍ਥਤ੍ਤਾਦਯੋਪਿ. ਵਿਚਿਤ੍ਤਤ੍ਤਾ ਪਨ ਸਾਮਞ੍ਞਵਿਸੇਸਨਿਸ੍ਸਯਾਨਂ ਬ੍ਯਞ੍ਜਕਾਨਂ ਕੋਚਿਯੇਵ ਸਾਮਞ੍ਞਵਿਸੇਸੋ ਕੇਨਚਿਦੇਵ ਨਿਸ੍ਸਯੇਨ ਬ੍ਯਞ੍ਜਤੇ, ਨ ਸਬ੍ਬੋ ਸਬ੍ਬੇਨ (ਪਤਿ) ਨਿਯਤਵਿਸਯਤ੍ਤਾ ਭਾਵਸਤ੍ਤੀਨਂ, ਤਤ੍ਥ ਯੇਨਤ੍ਥੇਨ ਇਤ੍ਥਤ੍ਤਮੇਵ ਬ੍ਯਞ੍ਜਤੇ ਨ ਪੁਮਤ੍ਤਂ ਨਾਪਿ ਨਪੁਂਸਕਤ੍ਤਂ, ਸਾ ਇਤ੍ਥਿਯੇਵ ਭਵਤਿ ਨ ਪੁਮਾ ਨਾਪਿ ਨਪੁਂਸਕਂ. ਯੇਨ ਪੁਮਤ੍ਤਮੇਵ ਬ੍ਯਞ੍ਜਤੇ, ਸੋ ਪੁਮਾਯੇਵ. ਯੇਨ ਤੁ ਨਪੁਂਸਕਤ੍ਤਂ ਤਂ ਨਪੁਂਸਕਮੇਵ. ਯੋ ਤੁ ਦ੍ਵਿਨ੍ਨਂ ਤਿਣ੍ਣਂ (ਵਾ) ਬ੍ਯਞ੍ਜਕੋ, ਸੋ ਦ੍ਵਿਲਿਙ੍ਗੋ ਤਿਲਿਙ੍ਗੋ ਵੇ’’ਤਿ (ਪਾ, ੪-੧-੩ ਕਾਸਿਕਾਵਿਵਰਣਪਞ੍ਜਿਕਾ) ਤਸ੍ਮਾ ਪਬ੍ਬਤੋ ਯਥਾ ਵੁਤ੍ਤਇਤ੍ਥਤ੍ਤਵਤੋ ਅਤ੍ਥਸ੍ਸ ਅਭਿਧੇਯ੍ਯਸ੍ਸਾਤਿ ਏਵਮੇਤ੍ਥ ਅਤ੍ਥੋ ਦਟ੍ਠਬ੍ਬੋ.

ਅਥੇਚ੍ਚਾਦਿਨਾ ਯਥਾਵੁਤ੍ਤਦੋਸਪਰਿਹਾਰਾਯ ਜਿਨਿਨ੍ਦਬੁਦ੍ਧਿਨਾ ਯਦੁਪਵਣ੍ਣਿ ਤਂ ਤਂ ਪਰਿਕਪ੍ਪੇਤਿ. ਸੋ ਏਵ ਚਰਹਿਚ੍ਚਾਦਿਨਾ ਉਪਹਾਸਪੁਬ੍ਬਕਮੁਤ੍ਤਰ ਮਾਚਿਕ੍ਖਤੇ. ਮਸਿਮਕ੍ਖਿਤਕੁਕ੍ਕੁਟੋਵਿਯਾਤਿ ਯਦਾ ਕੋਚਿ ਅਞ੍ਞਕੁਕ੍ਕੁਟੋ ਅਞ੍ਞਸ੍ਮਾ ਭੀਤੋ ਸਿਯਾ, ਤਦਾ ਵਿਜਯਿਨੋ ਕੁਕ੍ਕੁਟਸ੍ਸ ਮੁਖਂ ਮਸਿਯਾ ਮਕ੍ਖੇਤ੍ਵਾ ਉਪਨੇਨ੍ਤਿ ਸੋ ਪਠਮਂ ਤਤੋ ਭੀਤੋਪਿ ਪੁਨ ਅਞ੍ਞੋਤਿ ਮਨ੍ਤ੍ਵਾ ਯੁਜ੍ਝਿਤੁਮੁਸ੍ਸਹਤੇ. ਯਥਾਤ੍ਰ ਸੋਵ ਕੁਕ੍ਕੁਟੋ ਬ੍ਯਾਜੇ ਨੋਪਦਸ੍ਸਿਤੋ, ਤਥਾ ਤ੍ਰਾਮੀਤ੍ਯਤ੍ਥੋ.