੯੯. ਸਬ੍ਬਾ

ਨਨੁ ਕਤਰਾਦਯੋਵ ਸਬ੍ਬਾਦਿਸਦ੍ਦਵਚਨੀਯਾ ਹੋਨ੍ਤਿ ਸਮਾਸੇਨਾਭਿਹਿਤਤ੍ਤਾ, ਨ ਤੁ ਸਬ੍ਬਸਦ੍ਦੋ [ਸਦ੍ਦਸ੍ਸੇ (ਪੋਤ੍ਥਕੇ)] ਤ੍ਯਾਹ-‘ਅਵਯਵੇਨੇ’ਤ੍ਯਾਦਿ,ਯਦਿਪਿ ‘ਸਬ੍ਬ ਸਦ੍ਦੋ ਆਦਿ ਯੇਸ’ਨ੍ਤਿ ਅਵਯਵੇਨ ਵਿਗ੍ਗਹੋ, ਤਥਾਪਿ ਸਮੁਦਾਯੋਵਾਸ੍ਸਤ੍ਥੋ ਭਵਤਿ… ਯੇਸਨ੍ਤ੍ਯਨੇਨ ਸਮੁਦਾਯਸ੍ਸ ਪਰਾਮਾਸਾਤਿ ਭਾਵੋ, ਇਤੀਤਿ ਹੇਤੁਮ੍ਹਿ, ਕੋ ਭਵਨ੍ਤਾਨਂ ਦ੍ਵਿਨ੍ਨਂ ਬਹੁਨ੍ਨਂ ਵਾ ਏਕੋ ਦੇਵ ਦਤ੍ਤੋ ਕਠਾਦੀਹਿ ਵਾ ਅਤ੍ਥੇ ਦ੍ਵੀਹਿ ਬਹੂਹਿ ਵਾ ਏਕਸ੍ਸ ਨਿਦ੍ਧਾਰਣੇ ਸਤਿ ਕਿਮ੍ਹਾ ਨਿਦ੍ਧਾਰਣੇ ਰਤਰ ਰਤਮੇਸੁ ਣਾਦਿਵੁਤ੍ਤਿਯਂ ‘‘ਏਕਤ੍ਥਤਾਯ’’ਨ੍ਤਿ (੨-੧੧੯) ਵਿਭਤ੍ਤਿਲੋਪੇ ‘‘ਰਾਨੁਬਨ੍ਧੇਨ੍ਤਸਰਾਦਿਸ੍ਸਾ’’ਤਿ (੪-੧੩੨) ਅਨ੍ਤਸਰਾਦਿਲੋਪੇ ਕਿਂਸਦ੍ਦਸ੍ਸ ਰੂਪਸਿਦ੍ਧੀਤਿ ਦਸ੍ਸੇਤੁਮਾਹ ਕਤਮਾ’ਤਿਆਦਿ, ਉਭੋ ਅਂਸਾ ਅਸ੍ਸਾਤਿ ਅਤ੍ਥੇ ‘‘ਅਯੁਭਦ੍ਵਿਤੀਹਂਸੇ’’ਤਿ (੪-੪੯) ਅਯੇ‘‘ਸਰੋ ਲੋਪੋ ਸਰੇ’’ਤਿ (੧-੨੬) ਸਰਲੋਪੇ ਰੂਪਸਿਦ੍ਧੀਤਿ ਆਹ-‘ਉਭੋ ਅਂਸਾ’ਇਚ੍ਚਾਦਿ, ਕਾਯਂ ਵਵਤ੍ਥਾ ਨਾਮੇ ਤ੍ਯਾਹ-‘ਸਾਭਿਧੇਯ੍ਯਾ’ਤ੍ਯਾਦਿ, ਅਵਧਿਚ੍ਚਾਦਿਨਾ ਤਸ੍ਸੇਵਾਤ੍ਥਂ ਵਿਭਾਵੇਤਿ, ਅਧਂਸੋ ਅਭਟ੍ਠਤਾ ਅਵਧਿਭਾਵੇਯੇਵਾਵਟ੍ਠਾਨਂ, ਸਾਭਿਧੇਯ੍ਯਾ ਪੇਕ੍ਖਾਤਿ ਏਤ੍ਥ ਸੋ ਸਕੋ ਅਭਿਧੇਯ੍ਯੋ ਅਤ੍ਥੋ ਦਿਸਾਦਿ ਸਾਭਿਧੇਯ੍ਯੋਤਿ ਗਹਿਤੋਤਿ ਆਹ-‘ਪੁਬ੍ਬਾਦੀਨ’ਨ੍ਤਿਆਦਿ, ਸਾਭਿਧੇਯ੍ਯਨ੍ਤਿ ਕਮ੍ਮਤੋ ਪਰਾ ਅਪਪੁਬ੍ਬਾ ‘ਇਕ੍ਖ=ਦਸ੍ਸਨੇ’ਤੀਮਸ੍ਮਾ ‘‘ਕ੍ਵਚਣ’’ਇਤਿ (੫-੪੧) ਅਣ੍ਪਚ੍ਚਯੇ ਸਾਭਿਧੇਯ੍ਯਾਪੇਕ੍ਖੋ, ਸੋ ਵਾਵਧਿਨਿਯਮੋਤਿ ਦਸ੍ਸੇਤੁਮਾਹ-‘ਤਮਪੇਕ੍ਖਤਿ’ਚ੍ਚਾਦਿ, ਤਤ੍ਥਾਧਿਪ੍ਪਾਯਂ ਵਿਵਰਤਿ ‘ਤਥਾਹਿ’ਚ੍ਚਾਦਿਨਾ, ਏਤ੍ਥ ਚ ਪਰਾਦਿਸਦ੍ਦਾਭਿਧੇਯ੍ਯੋ-ਤ੍ਥੋ ਦਿਸਾਦੇਸਾਦਿ ਪੁਬ੍ਬਾਦਿਸਦ੍ਦਾਭਿਧੇਯ੍ਯਸ੍ਸਾਤ੍ਥਸ੍ਸ ਦਿਸਾਯ ਦੇਸਾਦਿਨੋ ਵਾਵਧਿਭਾਵੇਨ ਨਿਯਮਵਸੇਨ ਪਵਤ੍ਤਤਿ, ਯੋ ਚਾਵਧਿਭਾਵੋ ਨਿਯਮਵਸੇਨ ਪਵਤ੍ਤਤਿ, ਸੋਚਾਵਧਿਭਾਵੋ ਨਿਯਮਵਸੇਨ ਪਵਤ੍ਤੋ ਪੁਬ੍ਬਾਦਿਸਦ੍ਦਵਚਨੀਯਂ ਦਿਸਾਦੇਸਾਦਿ ਮਪੇਕ੍ਖਤੀਤਿ ਸਾਭਿਧੇਯ੍ਯਾਪੇਕ੍ਖੋਵਧਿਨਿਯਮੋਯੇਵ ਵਵਤ੍ਥਾਤਿ ਵੁਚ੍ਚਤੀਤ੍ਯਯਮਧਿਪ੍ਪਾਯੋ, ਨ ਤੁ ਅਭਿਧੇਯ੍ਯਾਯਨ੍ਤਿ ਅਸਮ੍ਭਵਾ, ਅਸਮ੍ਭਵਮੇਵ ਦਸ੍ਸੇਨ੍ਤੋ ਆਹ-‘ਯੋ ਹਿ’ਚ੍ਚਾਦਿ, ਕੋਸਲ੍ਲੇਨ ਨਿਮਿਤ੍ਤੇਨਾਤਿ ਕੁਸਲ ਸਦ੍ਦਸ੍ਸ ਪਵਤ੍ਤਿਨਿਮਿਤ੍ਤੇਨ ਕੋਸਲ੍ਲੇਨ, ਉਤ੍ਤਰਾਕੁਰਵੋ ਉਤ੍ਤਰਕੁਰੁਦੀਪ ਵਾਸਿਨੋ, ਦੇਸੋ ਵਾ, ‘ਨਾਞ੍ਞਞ੍ਚ ਨਾਮਪ੍ਪਧਾਨਾ’’ਤਿ (੨-੧੩੬) ਅਨੇਨੇਵ ਸਞ੍ਞਾਯਂ ਸਬ੍ਬਾਦਿਕਾਰਿਯਸ੍ਸ ਨਿਸਿਦ੍ਧਤ੍ਤੇ ਕਿਮਸਞ੍ਞਾਯਂਭ੍ਯਨੇਨੇਤ੍ਯਾਹ ‘ਨਾਞ੍ਞਞ੍ਚੇ’ਤ੍ਯਾਦਿ, ਕਿਞ੍ਚਿ ਪੁਬ੍ਬਤ੍ਤਾਦਿਕਮੁਦ੍ਦਿਸ੍ਸ ਕੇਸਞ੍ਚਿ ਪੁਬ੍ਬੋਪਰੋਤ੍ਯਾਦਿਕਾ ਅਤ੍ਥਾਨੁਗਤਾ ਸਞ੍ਞਾ ਅਨ੍ਵਤ੍ਥਸਞ੍ਞਾ.

੧੦੪.ਤਿ

‘‘ਵਾਨੇਕਞ੍ਞਤ੍ਥੇ’’ਤਿ (੩-੧੭) ਵਿਕਪ੍ਪਾਨੁਵਤ੍ਤਨਤੋ ਅਯੁਤ੍ਤਤ੍ਤਾਭਾਵਂ ਦਸ੍ਸੇਤਿ‘ਨਯਿਦਮਯੁਤ੍ਤ’ਨ੍ਤਿ, ਯੁਤ੍ਤਤਾ ਚਾਸ੍ਸ ਪਾਠੇ ਬ੍ਯਭਿਚਾਰ ਦਸ੍ਸਨਤੋਤਿ ਵਤ੍ਤੁਮਾਹ-‘ਨਪੁਂਸਕੇ’ਚ੍ਚਾਦਿ, ਪਾਠਾਨੁਗਤਾ ਹਿ ਸੁਤ੍ਤਰਚਨਾ, ਵਿਕਪ੍ਪਾਨੁਵਤ੍ਤਿਯਾ ਅਨਪੁਂਸਕਮਿਦਮੇਵ ਵਚਨਂ ਤਸ੍ਸ ਕ੍ਵਚਿ ਬ੍ਯਭਿਚਾਰਤ੍ਤੇ ਞਾਪਕਨ੍ਤਿ ਵਤ੍ਤੁਮਾਹ-‘ਤਸ੍ਸ ਚਾ’ਤਿਆਦਿ, ਅਵਸ੍ਸਮੇਵਮੇਤ੍ਥ ਅਤ੍ਥੋ ਗਹੇਤਬ੍ਬੋ, ਅਞ੍ਞਥਾ ਯਥਾਵਟ੍ਠਿਤਪਾਠਾਨੁਕ੍ਕਮੇਨਾਤ੍ਥਗ੍ਗਹਣੇ ਸਤਿ ਸੁਤ੍ਤਸ੍ਸ [ਸੁਤ੍ਤਸ੍ਸਾ (ਪੋਤ੍ਥਕੇ)] ਮੁਖ੍ਯਤ੍ਤਪ੍ਪਤੀਤਿਤੋ ਕਥਨ੍ਤਮਞ੍ਞਸ੍ਸ ਞਾਪਕਂ ਭਵੇਯ੍ਯ, ਮੁਖ੍ਯਭਾਵੇ ਹਿ ਞਾਪਕਤ੍ਥਂ ਨ ਯੁਜ੍ਜੇਯ੍ਯ.